Yosua

Joshua

1 Le Afetɔ ƒe subɔla Mose ƒe ku megbe la, Afetɔ gblɔ na Yosua, Nun vi, si nye Mose ƒe subɔvi be: 
2 “Nye subɔla Mose ku. Azɔ tso nàtso Yordan, wò kple dukɔ blibo sia katã, ne miayi anyigba si metsɔ le Israel-viwo nam la dzi. 
3 Matsɔ teƒe sia teƒe si miaɖo afɔe la ana mi, abe ale si medo ŋugbe na Mose ene. 
4 Miaƒe anyigba la akeke tso gbea dzi ayi Lebanon, eye wòatso Frat, tɔsisi gã la nu, Hititɔwo ƒe anyigba blibo la katã, va se ɖe Ƒu Gã la nu le ɣetoɖoƒe. 
5 Ame aɖeke manɔ te ɖe nuwò le wò agbemeŋkekewo katã me o. Ale si ko menɔ kple Mose la, nenemae manɔ kpli wò hã. Nyemaɖe asi le ŋuwò o, eye nyemagblẽ wò ɖi o. 
6 Lé dzi ɖe ƒo, eye nàsẽ ŋu, elabena wòe akplɔ dukɔ sia wòaxɔ anyigba si ŋu meka atam ɖo na wo tɔgbuiwo be matsɔ ana wo wòazu wo tɔ la.
7 “Lé dzi ɖe ƒo, eye nàsẽ ŋu vevie eye nàwɔ Se siwo katã nye subɔla Mose de na wò la dzi pɛpɛpɛ ko. Mègadze le eŋu ɖe ɖusime alo miame o, ne nàwɔ nu le nunya me le afi sia afi si nàyi. 
8 Mègaɖe nu le Segbalẽ sia ŋu o, ke boŋ xlẽe kple gbe blewu zã kple keli, be nàwɔ nu siwo katã woŋlɔ ɖe eme la dzi pɛpɛpɛ; ekema wò mɔwo adze edzi na wò, eye àwɔ nu le nunya me. 
9 Ðe nyemede se na wò be nàlé dzi ɖe ƒo, eye nàsẽ ŋu oa? Mègavɔ̃ o, eye ŋɔ megadzi wò o, elabena Afetɔ wò Mawu li kpli wò le afi sia afi si nàyi.”
10 Eye Yosua de se na dukɔ la dzi kpɔlawo gblɔ be: 
11 “Mitsa le asaɖa la me, eye mide se na dukɔ la be: ‘Midzra nu siwo ahiã mi la ɖo, elabena ŋkeke etɔ̃ megbe la, miatso Yordan ayi anyigba, si Afetɔ mia Mawu tsɔ le mia nam be miaxɔe wòazu mia tɔ la dzi.’”
12 Eye Yosua gblɔ na Ruben viwo kple Gad viwo kpakple Manase-toa ƒe afã la be: 
13 “Miɖo ŋku nya si Afetɔ ƒe subɔla Mose gblɔ na mi la dzi be: ‘Afetɔ mia Mawu ana gbɔɖeme mi, eye wòatsɔ anyigba sia ana mi. 
14 Mia srɔ̃wo, mia viwo kple miaƒe lãhawo anɔ anyigba si Mose tsɔ na mi le Yordan ƒe go sia dzi la dzi, gake miaƒe aʋakalẽawo katã nabla aʋakpa atso tɔa le mia nɔviwo ŋgɔ. Eye miakpe ɖe wo ŋu 
15 va se ɖe esime Afetɔ nana gbɔɖeme mia nɔviwo, abe ale si wòna mii ene, eye woawo hã woaxɔ anyigba si Afetɔ mia Mawu tsɔ le wo nam be wòazu wo tɔ la. Emegbe hafi miatrɔ ayi anyigba si wotsɔ na mi be mianɔ edzi eye wòazu mia tɔ la dzi, anyigba si Afetɔ ƒe subɔla Mose tsɔ na mi le Yordan ƒe ɣedzeƒe.’”
16 Woɖo eŋu na Yosua be: “Míawɔ se siwo katã nède na mí la dzi, eye míayi afi sia afi si nàɖo mí ɖo. 
17 Ale si ko míeɖo to Mose le nu sia nu mee la, nenema ke míaɖo to wò hãe. Afetɔ wò Mawu nenɔ kpli wò ko, abe ale si wònɔ kple Mose ene. 
18 Ame sia ame si adze aglã ɖe wò sedede ŋu, eye maɖo to wò nya siwo katã nàgblɔ nɛ o la, woawui. Wò ya lé dzi ɖe ƒo, eye nàsẽ ŋu ko.”

Yosua 2
1 Eye Yosua, Nun vi la, dɔ ŋutsu eve tso Sitim le adzame be woayi aɖatsa ŋku. Egblɔ na wo be: “Miyi ɖakpɔ ale si anyigba la le, vevietɔ Yeriko.” Eya ta woyi, eye woge ɖe gbolo aɖe si ŋkɔe nye Rahab la ƒe me, eye wotsi afi ma. 
2 Amewo yi ɖagblɔ na Yeriko-fia be: “Kpɔ ɖa! Israel ŋutsu aɖewo va afi sia zã sia me be yewoatsa ŋku le anyigba la dzi.” 
3 Ale Yeriko-fia dɔ ame ɖe Rahab be: “Kplɔ ŋutsu siwo va dze aƒewò me la do goe, elabena ŋku tsa gee wova le anyigba blibo la dzi.”
4 Ke nyɔnu la tsɔ ŋutsu eveawo ɣla. Eye wògblɔ be: “Nyateƒee, ŋutsuawo nya va gbɔnye baa, gake nyemenya afi si wotso o. 
5 Esime anyigba tsyɔ, eye agboawo tuɣi ɖo la, ŋutsuawo do go. Nyemenya afi si woɖo tae o, gake ne mieti wo yome kaba la, miatu wo.” 
6 (Evɔ wònye ekplɔ wo yi xɔ ta, eye wòɣla wo ɖe ɖetifu siwo woli kɔ ɖe fliwo me le xɔa ta la dome hafi.) 
7 Eye ameawo ti wo yome ɖo ta Yordan tɔtsoƒe la, eye esi ame siwo ti wo yome nya do go ko la, wodo agbo la.
8 Hafi ŋutsuawo namlɔ anyi la, nyɔnua va wo gbɔ le xɔa ta. 
9 Eye wògblɔ na ŋutsuawo be: “Menya be Afetɔ atsɔ anyigba la ana mi, eye vɔvɔ̃ si le mia ŋu la lé mí. Dzi ɖe le anyigba la dzi nɔlawo katã ƒo le mia ta, 
10 elabena míese ale si Afetɔ na Ƒudzĩ la mie le mia ŋgɔ esime mieʋu dzo le Egipte, kple nu si miewɔ Amori-fia eve, siwo nye Sihon kple Og, ame siwo mietsrɔ̃ gbidigbidi le Yordan ƒe go kemɛ dzi. 
11 Esi míesee la, dzi ɖe le mía ƒo, eye dzi megale ame aɖeke ƒo o le mia ta, elabena Afetɔ mia Mawu lae nye Mawu le dziƒo afi mɛ kple anyigba dzi afii. 
12 Eya ta meɖe kuku, mika atam nam le Afetɔ ŋkɔ me, be esi meve mia nu ta la, miawo hã miave fofonye ƒe aƒe la nu; eye mina dzesi si ŋu kakaɖedzi le lam, 
13 be miana fofonye kple danye, nɔvinyeŋutsuwo kple nɔvinyenyɔnuwo kple wo ƒemetɔwo katã natsi agbe, eye miaɖe mí tso ku me.”
14 Eye ŋutsuawo gblɔ nɛ be: “Míatsɔ míaƒe agbe ana ɖe mia ta! Ne miegblɔ nu si wɔ ge míeva ame aɖeke se o la, ekema míave nuwò ahawɔ nuteƒe na wò ne Afetɔ tsɔ anyigba la na mí.” 
15 Ema megbe la, ena woɖiɖi kple ka to eƒe xɔ si le dua ƒe gli dzi la, ƒe fesre nu ɖe anyi. Le nyateƒe me la, glia dzie eƒe aƒe le. 
16 Eye wògblɔ na wo be: “Miyi tonuto la me, ne miabe ɖe afi ma ŋkeke etɔ̃, ale be mia yometilawo nagake ɖe mia ŋu o. Eye ne mia yometilawo trɔ gbɔ la, ekema miate ŋu alé miaƒe mɔ.”
17 Ŋutsuawo ɖo eŋu nɛ be: “Atam sia si nèna míeka la ƒe fɔɖiɖi manɔ mía dzi o 
18 negbe ne míeva anyigba la dzi, eye nèsa ka dzĩ sia ɖe fesre si nu nèɖiɖi mí toe la ŋu ko hafi. Eye ele be nàƒo fofowò kple dawò kple nɔviwòŋutsuwo kple fofowò ƒe aƒe blibo la katã nu ƒu ɖe gbɔwò le aƒea me. 
19 Eye ne ame aɖe do le wò aƒea me yi gota la, eƒe ʋu anɔ eya ŋutɔ ƒe ta dzi, ke míawo la, míaɖi fɔ o. Gake ne vɔ̃ aɖe dzɔ ɖe ame aɖe si le gbɔwò le aƒea me dzi la, ekema eƒe ʋu ava míaƒe ta dzi. 
20 Gake ne ègblɔ nu si wɔ ge míeva ame aɖe se la, ekema atam si nèna míeka la ƒe fɔɖiɖi aɖeke megale mía dzi o.” 
21 Eɖo eŋu be: “Neva eme le miaƒe nyawo nu.”
Edo mɔ wo, eye wodzo. Emegbe esa ka dzĩ la ɖe fesrea ŋu. 
22 Ale wodzo, eye woyi tonuto la me, eye wonɔ afi ma ŋkeke etɔ̃, va se ɖe esime wo yometilawo trɔ gbɔ. Wo yometilawo di wo le mɔ sia mɔ dzi, gake womeke ɖe wo ŋu o. 
23 Azɔ ŋutsu eveawo gbugbɔ tso toawo dzi, eye wotso tɔa va Yosua, Nun vi la gbɔ. Woka nu siwo katã dzɔ ɖe wo dzi la ta nɛ. 
24 Eye wogblɔ na Yosua be: “Afetɔ tsɔ anyigba blibo la de asi na mí. Le nyateƒe me la, dzi ɖe le anyigba la dzi nɔlawo katã ƒo le mía ta.”

Yosua 3
1 Yosua fɔ ŋdi kanya, eye eya kple Israel-viwo katã woho tso Sitim heva Yordan nu. Wotsi afi ma dɔ hafi tso tɔ la.
2 Le ŋkeke etɔ̃ megbe la, dzikpɔlawo tsa le asaɖa la me, 
3 eye wode se na dukɔ la be: “Ne mienya kpɔ nunɔla Lewi viwo wokɔ Afetɔ mia Mawu ƒe nubablaɖaka la ko la, ekema miaho le mia nɔƒewo adze eyome. 
4 Gake mina mia kplii dome nadidi abe abɔklugui akpe eve ene; migate ɖe eŋu wu ema o, be mianya mɔ si miato, elabena miezɔ mɔ sia kpɔ o.”
5 Azɔ Yosua gblɔ na dukɔ la be: “Mikɔ mia ɖokuiwo ŋu, elabena etsɔ la, Afetɔ le nukunuwo wɔ ge le mia dome.”
6 Eye Yosua gblɔ na nunɔlawo be: “Mikɔ nubablaɖaka la dze dukɔ la ŋgɔ.” Ale wokɔ nubablaɖaka la, eye wodze dukɔ la ŋgɔ.
7 Eye Afetɔ gblɔ na Yosua be: “Madze egɔme egbea ado gã wò le Israel blibo la katã ŋkume, ne woadze sii be, ale si tututu menɔ kple Mose la, nenemae manɔ kpli wò hã. 
8 De se sia na nunɔla siwo kɔ nubablaɖaka la be: ‘Ne mienya ɖo afɔ Yordan tɔa me ko la, mitɔ ɖe tɔa me le afi ma.’”
9 Eye Yosua gblɔ na Israel-viwo be: “Miva afii, ne miase Afetɔ mia Mawu ƒe nyawo.” 
10 Yosua gagblɔ be: “Esia mee mianyae le be, Mawu gbagbe aɖe le mia dome, eye be anya Kanaantɔwo, Hititɔwo, Hivitɔwo, Perizitɔwo, Girgasitɔwo, Amoritɔwo kple Yebusitɔwo ɖa le mia ŋgɔ godoo. 
11 Kpɔ ɖa! Anyigba blibo la katã ƒe Aƒetɔ ƒe nubablaɖaka la dze mia ŋgɔ yina Yordan la me. 
12 Azɔ la, miɖe ŋutsu wuieve tso Israel-toawo me, to ɖeka ŋutsu ɖeka, 
13 eye ne nunɔla siwo kɔ Afetɔ, anyigba blibo la katã ƒe Aƒetɔ la, ƒe Aɖaka la ƒe afɔƒome nya ka Yordan tsia me ko la, Yordan me tsi siwo le sisim tso dzigbe gbɔna anyime la nu atso, eye woatɔ ahamli ɖe teƒe ɖeka abe gli ene.”
14 Eya ta dukɔ la do go le woƒe agbadɔwo me yina Yordan tso ge, eye esi wòsusɔ vie woatso tɔa la, nunɔla siwo kɔ nubablaɖaka la nɔ dukɔ la ŋgɔ ɖe zɔ yi ŋgɔ. 
15 Eye esi Aɖaka la kɔlawo va ɖo Yordan nu, eye nunɔla siwo kɔ Aɖaka la ƒe afɔ nya ka tsiawo me ko la (Yordan ɖɔ gbagba gbɔ eƒe goawo katã ŋu le nuŋeɣi blibo la katã), 
16 tsi siwo le sisim tso dzigbe gbɔna anyime la tɔ. Womli kɔ abe gli ene va ɖo keke Adam, si nye du si le Zaretan xa ke, eye tsi siwo nɔ sisim yi Araba-ƒu, si nye Dzeƒu la, me la mie. Wo nu tso, eye dukɔ la tso tɔa le Yeriko ŋgɔ. 
17 Nunɔla siwo kɔ Afetɔ ƒe nubablaɖaka la tɔ ɖi maʋamaʋãe le ƒuƒuiƒe le Yordan titina, eye Israel blibo la zɔ to ƒuƒuiƒe le tɔa me nɔ yiyim va se ɖe esime dukɔ blibo la katã tso Yordan vɔ.

Yosua 4
1 Esi dukɔ blibo la katã nya tso Yordan vɔ ko la, Afetɔ gblɔ na Yosua be: 
2 “Miɖe ŋutsu wuieve tso dukɔ la dome, to ɖeka ŋutsu ɖeka, 
3 eye nàde se sia na wo be: ‘Mikɔ kpe wuieve le Yordan titina, le afi si nunɔlawo tɔ ɖo maʋamaʋãe la, eye miakɔ wo ɖe asi aɖada ɖe teƒe si miatsi adɔ zã sia.’”
4 Eya ta Yosua yɔ ŋutsu wuieve siwo wòtia tso Israel-viwo dome, to ɖeka ŋutsu ɖeka, 
5 eye Yosua gblɔ na wo be: “Miyi Afetɔ mia Mawu ƒe Aɖaka la ŋgɔ le Yordan titina, eye mia dometɔ ɖe sia ɖe nakɔ kpe ɖeka ɖe abɔta, ɖe Israel-viwo ƒe toawo ƒe xexlẽme nu, 
6 ne woanye dzesi le mia dome. Ne mia viwo va bia mi gbe aɖe gbe be: ‘Nu ka tae kpe siawo le afii?’ mahã la, 
7 migblɔ na wo be: ‘Elabena Yordan me tsiawo nu tso le Afetɔ ƒe nubablaɖaka la ŋgɔ. Esi wòto Yordan me la, Yordan me tsiawo nu tso. Kpe siawo anye ŋkuɖodzinu na Israel-viwo ɖaa.’”
8 Eya ta Israel-viwo wɔ abe ale si tututu Yosua de se ene. Wokɔ kpe wuieve le Yordan titina, abe ale si tututu Afetɔ gblɔe na Yosua ene, ɖe Israel-viwo ƒe toawo ƒe xexlẽme nu. Wokɔ wo yi afi si woatsi adɔ, eye woda wo ɖe afi ma.
9 Yosua ɖi kpe wuieve hã ɖe Yordan titina le afi si nunɔla siwo kɔ nubablaɖaka la tsi tsitre ɖo, eye wole afi ma va se ɖe egbe sia.
10 Nunɔla siwo kɔ Aɖakaa la tsi tsitre ɖe Yordan titina va se ɖe esime wowɔ nu siwo katã ƒe se Afetɔ de na Yosua be wòagblɔ na dukɔa la vɔ, le se siwo katã Mose de na Yosua la nu. Ɣemaɣi la, dukɔ la zɔ kabakaba tso tɔa. 
11 Esi dukɔ bliboa tso tɔa vɔ la, nunɔlawo kɔ Afetɔ ƒe Aɖaka la va tɔa godo le dukɔ la ŋkume. 
12 Eye Ruben viwo, Gad viwo kple Manase-to afã la bla aʋakpa dze Israel-viwo ŋgɔ tso tɔa abe ale si Mose de se na wo ene. 
13 Aʋawɔla siwo ade akpe blaene ye bla aʋakpa tso tɔa le Afetɔ ŋkume yi Yeriko tagba.
14 Afetɔ do gã Yosua le Israel blibo la katã ŋkume gbe ma gbe, eye wode bubu gã eŋu le eƒe agbemeŋkekewo katã me, abe ale si ko wode bubu gã Mose ŋu ene.
15 Azɔ Afetɔ gblɔ na Yosua be: 
16 “Gblɔ na nunɔla siwo kɔ Ðaseɖiɖiɖaka la be woado go le Yordan me.” 
17 Eya ta Yosua gblɔ na nunɔlawo be: “Mido go le Yordan me.” 
18 Esi nunɔla siwo kɔ Afetɔ ƒe nubablaɖaka la do go le Yordan titina, eye nunɔlawo ƒe afɔƒome nya ka ƒuƒuiƒe ko la, Yordan me tsiawo gate sisi, eye woɖɔ gbagba ɖe goawo katã dzi abe tsã ene.
19 Dukɔ la tso Yordan le ɣleti gbãtɔ ƒe ŋkeke ewolia dzi, eye woƒu asaɖa anyi ɖe Gilgal le Yeriko ƒe ɣedzeƒeliƒo dzi.
20 Ke Yosua ɖi kpe wuieve siwo wofɔ le Yordan me la ɖe Gilgal. 
21 Eye wògblɔ na Israel-viwo be: “Ne mia viwo va bia mi gbe aɖe gbe be: ‘Kpe siawo gɔme ɖe?’ hã la, 
22 ekema miaɖe eme na mia viwo be: ‘Ƒuƒuiƒee Israel to tsò Yordan, 
23 esime Afetɔ mia Mawu na Yordan me tsiawo mie le wo ŋgɔ va se ɖe esime wotsoe, abe ale si tututu Afetɔ mia Mawu wɔ Ƒudzĩ la, esime wòna wòmie le mía ŋgɔ va se ɖe esime míetsoe ene. 
24 Ewɔ esia be anyigbadzidukɔwo katã nanya ale si gbegbe Afetɔ ƒe alɔkame sẽe, ale be miavɔ̃ Afetɔ mia Mawu la ɣesiaɣi.’”

Yosua 5

1 Esi Amoritɔwo ƒe fia siwo katã le Yordan ƒe ɣetoɖoƒekpa dzi, kple Kanaantɔwo ƒe fia siwo katã le atsiaƒua nu, see be Afetɔ na Yordan me tsiawo mie le Israel-viwo ŋgɔ, va se ɖe esime wotsoe la, dzi ɖe le wo ƒo, eye kalẽwɔwɔ bú ɖe wo le Israel-viwo ta.
2 Ɣemaɣi la, Afetɔ gblɔ na Yosua be: “Tsɔ kpe sesẽ wɔ hɛwo, eye nàtso aʋa na Israel ŋutsuwo zi evelia.” 
3 Ale Yosua tsɔ kpe sesẽ wɔ hɛwo, eye wòtso aʋa na Israel ŋutsuwo le Gibeat-Haaralot. 
4 Nu si ta Yosua tso aʋa na wo ɖoe nye be, Ŋutsu siwo katã ʋu tso Egipte, siwo katã nye aʋawɔlawo la, ku le mɔa dzi esi woʋu le Egipte megbe. 
5 Wotso aʋa na ame siwo katã ʋu tso Egipte la, gake wometso aʋa na ame siwo katã wodzi le gbea dzi le mɔa dzi, esime woʋu le Egipte megbe ya o. 
6 Elabena Israel-viwo zɔ gbea dzi ƒe blaene va se ɖe esime dukɔ blibo la ku vɔ, ame siawoe nye ŋutsu aʋawɔla siwo katã ʋu tso Egipte, siwo meɖo to Afetɔ ƒe gbe o la. Afetɔ ka atam na wo be, yemana woakpɔ anyigba si ŋu Afetɔ ka atam ɖo na wo tɔgbuiwo be yeatsɔe ana mí, anyigba si dzi notsi kple anyitsi le sisim le la gbeɖe o. 
7 Eya ta etsɔ wo viwo ɖo wo teƒe. Woawoe Yosua tso aʋa na, elabena wometso aʋa na wo le mɔa dzi o.
8 Esi wotso aʋa na dukɔ bliboa vɔ la, wotsi wo nɔƒe le asaɖa la me, va se ɖe esime wohaya.
9 Azɔ Afetɔ gblɔ na Yosua be: “Meɖe Egipte ƒe vlodoame ɖa le mia ŋu egbea.” Eya ta woyɔa teƒe ma be Gilgal va se ɖe egbe sia.
10 Israel-viwo ƒu asaɖa anyi ɖe Gilgal, eye woɖu Ŋutitotoŋkekenyui la le ɣletia ƒe ŋkeke wuienelia ƒe fiẽ le Yeriko tagba. 
11 Eye wodze anyigba la dzi nuwo ɖuɖu gɔme le Ŋutitotoŋkekenyuia ƒe ŋufɔke, woɖu amɔwɔ maʋamaʋã bolowo kple nuku tɔtɔewo le ŋkeke sia ke dzi. 
12 Eye mana la nu tso gbe si gbe woɖu anyigba la dzi nuku aɖewo; mana aɖeke megali na Israel-viwo azɔ o, ke boŋ wodze Kanaan-nyigba la dzi nuwo ɖuɖu gɔme le ƒe ma me.
13 Esi Yosua gogo Yeriko la, efɔ mo dzi, eye wòkpɔ ŋutsu aɖe lé yi ɖe asi tɔ ɖe eŋgɔ. Ale Yosua zɔ ɖe edzi hebiae be: “Mía dzie nèle loo alo míaƒe futɔwo dzie nèle?” 
14 Eɖo eŋu be: “Ao, ke boŋ Afetɔ ƒe aʋakɔ ƒe amegã menye va.” Eye Yosua bɔbɔ hetsyɔ mo anyi hebiae be: “Nya kae le nye aƒetɔ si na eƒe subɔla?” 
15 Ale Afetɔ ƒe aʋakɔ ƒe amegã la ɖo eŋu na Yosua be: “Ðe wò afɔkpawo le afɔ, elabena teƒe si nètsi tsitre ɖo la le kɔkɔe.” Enumake Yosua wɔe nenema.

Yosua 6
1 Wodo Yeriko ƒe agbowo goŋgoŋ le Israel-viwo ta, ame aɖeke medona alo gena ɖe eme o.
2 Eye Afetɔ gblɔ na Yosua be: “Kpɔ ɖa, metsɔ Yeriko kple eƒe fia kpakple eƒe kalẽtɔwo de asi na wò. 
3 Mi ŋutsu aʋawɔlawo katã mizɔ ƒo xlã dua zi ɖeka. Aleae miawɔ ŋkeke ade. 
4 Na nunɔla adre natsɔ agbodzokpẽ adre ɖe asi adze Aɖaka la ŋgɔ. Gake le ŋkeke adrea gbe la, miazɔ aƒo xlã dua zi adre, eye nunɔlawo naku kpẽawo. 
5 Eye ne woku agbodzokpẽawo, eye mienya se kpẽawo ƒe ɖiɖi ko la, aʋawɔlawo katã nado aʋaɣli sesĩe. Eye du la ƒe gli amu adze anyi, eye aʋawɔlaawo nage ɖe eme, ame sia ame nayi ŋgɔ tẽe.”
6 Eya ta Yosua, Nun vi, yɔ nunɔlawo, eye wògblɔ na wo be: “Mikɔ nubablaɖaka la, eye nunɔla adre natsɔ agbodzokpẽ adre adze Afetɔ ƒe Aɖaka la ŋgɔ.” 
7 Egblɔ na aʋawɔlaawo be: “Mizɔ yi ŋgɔ, mizɔ ƒo xlã dua, eye aʋakpablalawo nadze Afetɔ ƒe Aɖaka la ŋgɔ.” 
8 Eye abe ale si Yosua gblɔ na aʋawɔlawo ene la, nunɔla adre siwo lé agbodzokpẽ adreawo ɖe asi le Afetɔ ŋkume la zɔ yi ŋgɔ heku kpẽawo, eye Afetɔ ƒe nubablaɖaka la dze wo yome. 
9 Aʋakpablalaawo dze nunɔla siwo nɔ kpẽawo kum la ŋgɔ, eye aʋawɔla megbexeawo dze Aɖaka la yome esime nunɔlawo le kpẽawo kum atraɖii.
10 Ke Yosua de se na aʋawɔlawo be: “Migado ɣli alo ana woase miaƒe gbe o. Nya aɖeke megado le mia nu o, va se ɖe gbe si gbe magblɔ na mi be: ‘Mido ɣli!’ Ekema miado ɣli.” 
11 Ena wokɔ Afetɔ ƒe Aɖaka la ƒo xlã du la zi ɖeka, emegbe wogbugbɔ yi asaɖa la me hetsi afi ma dɔ le zã ma me.
12 Le ŋufɔke la, Yosua fɔ ŋdi kanya, eye nunɔlawo kɔ Afetɔ ƒe Aɖaka la, 
13 eye nunɔla adre siwo lé agbodzokpẽ adre ɖe asi dze Afetɔ ƒe Aɖaka ŋgɔ la le kpẽawo kum atraɖii. Aʋakpablalaawo nɔ zɔzɔm le wo ŋgɔ, eye aʋawɔla megbexeawo dze Afetɔ ƒe Aɖaka la yome esime nunɔlawo le kpẽawo kum atraɖii. 
14 Wozɔ ƒo xlã du la zi ɖeka le ŋkeke evelia dzi, emegbe wotrɔ yi asaɖa la me. Aleae wowɔ ŋkeke ade sɔŋ.
15 Ke le ŋkeke adrelia dzi la, wofɔ ŋdi kanya, esi agu nya dze teti ko, eye wozɔ ƒo xlã dua alea zi adre. Ŋkeke ma dzi koe wozɔ ƒo xlã dua zi adre. 
16 Esi woƒo xlãe zi adrelia la, nunɔlawo ku kpẽawo, eye Yosua gblɔ na aʋawɔlaawo be: “Mido ɣli; elabena Afetɔ tsɔ du la de asi na mi! 
17 Miatsrɔ̃ du la kple nu sia nu si le eme la gbidigbidi; wo katã nye Afetɔ tɔ. Negbe Rahab gbolo la koe atsi agbe, eya kple ame siwo katã le egbɔ le aƒea me, elabena eɣla ame siwo míedɔ ɖa la. 
18 Ke migate ɖe nu siwo wòle be woatsrɔ̃ gbidigbidi la ŋu o, ale be nu siwo wòle be woatsrɔ̃ gbidigbidi la ƒe ɖeke nagadzro mi miahayi etsɔ ge, eye miahe vɔ̃ ava Israel ƒe asaɖa la dzi ahana woatsrɔ̃e gbidii o. 
19 Ke klosalo kple sika kple akɔblinuwo kpakple gayibɔnuwo ŋu kɔ na Afetɔ. Ele be mialɔ wo ayi Afetɔ ƒe nu xɔasiwo dzraɖoƒe.”
20 Aʋawɔlaawo do ɣli esi woku kpẽawo. Esi aʋawɔlaawo nya se kpẽawo ƒe ɖiɖi eye wodo aʋaɣli ko la, gli la mu dze anyi. Emegbe aʋawɔlaawo ge ɖe dua me, ame sia ame yi ŋgɔ tẽe, eye woxɔ du la. 
21 Wotsrɔ̃ nu siwo katã le dua me, ŋutsuwo kple nyɔnuwo, ɖekakpuiwo kple amegãɖeɖiwo, nyiwo kple alẽwo kpakple tedziwo kple yi.
22 Yosua gblɔ na ŋutsu eve siwo yi ɖatsa ŋku le anyigba la dzi be: “Miyi gbolo la ƒe me, eye miakplɔ nyɔnu la kple eƒemetɔwo katã do goe, abe ale si mieka atam nɛ ene.” 
23 Ale ɖekakpui siwo va tsa ŋku la yi ɖakplɔ Rahab kple fofoa kple dadaa kple nɔviawo kpakple eƒe amewo katã do goe, ɛ̃, wokplɔ eƒemetɔwo katã do goe; eye wokplɔ wo dedie va teƒe aɖe le Israel ƒe asaɖa la godo.
24 Eye wotɔ dzo du la kple nu sia nu si le eme. Negbe klosalo, sika, akɔblinuwo kple gayibɔnuwo koe wolɔ yi Afetɔ ƒe aƒe la me nu xɔasiwo dzraɖoƒe. 
25 Rahab gbolo la kple fofoa ƒemetɔwo kpakple eya ŋutɔ ƒemetɔwo katã koe Yosua na wotsi agbe; eye wòle Israel va se ɖe egbe sia, elabena eɣla ame siwo Yosua dɔ ɖa be woaɖatsa ŋku le Yeriko la.
26 Eye Yosua ka atam sia ɣemaɣi be: “Aɖi ŋutsu si agbugbɔ Yeriko du sia atso la ŋu kpékpekpe le Afetɔ ŋkume. Eƒe ŋgɔgbevi ƒe agbee wòatsɔ aɖo egɔme anyi, eye eƒe dɔmlɔea ƒe agbee wòatsɔ ade agbo enu.”
27 Ale Afetɔ nɔ kple Yosua, eye eƒe ŋkɔ ɖi le anyigba blibo la katã dzi.

Yosua 7
1 Ke Israel-viwo meɖi anukware le nu siwo wòle be woatsrɔ̃ gbidigbidi la me o, elabena Akan, Karmi vi, ame si nye Zabdi vi, ame si nye Zera vi, si tso Yuda-to la me tsɔ nu siwo wòle be woatsrɔ̃ gbidii la ƒe ɖe. Eye Afetɔ ƒe dziku fla ɖe Israel-viwo ŋu.
2 Eye Yosua dɔ ŋutsuwo tso Yeriko ɖo ɖe Ai, si te ɖe Bet-Aven ŋu le Betel ƒe ɣedzeƒe, eye wògblɔ na wo be: “Miyi ɖatsa ŋku le anyigba la dzi.” Eya ta ŋutsuawo yi ɖatsa ŋku le Ai. 
3 Esi wotrɔ gbɔ va Yosua gbɔ la, wogblɔ nɛ be: “Mehiã be aʋawɔlawo katã nayi o. Ame akpe eve alo akpe etɔ̃ ko ate ŋu asi Ai. Mègaɖe fu na aʋawɔlawo katã be woayi o, elabena ameawo mesɔ gbɔ o.”
4 Eya ta aʋawɔla siwo anɔ abe akpe etɔ̃ ene yi, gake wosi le Aitɔwo nu. 
5 Aitɔwo wu ŋutsu blaetɔ̃ vɔ ade, eye wonya wo ɖe nu tso dugbo la nu va se ɖe keke Sebarim ke, eye wonɔ wo wum le aga la me. Eya ta dukɔ la ƒe dzi lólo zu tsi.
6 Enumake Yosua dze eƒe awuwo, eye wòtsyɔ mo anyi ɖe Afetɔ ƒe Aɖaka la ŋgɔ va se ɖe fiẽ, Israel ametsitsiwo hã wɔ nenema, eye wonɔ ke lɔm kɔ ɖe tame. 
7 Eye Yosua gblɔ be: “Oo Aƒetɔ Dziɖulagã Afetɔ, nu ka tae nèkplɔ dukɔ sia wotso Yordan-tɔsisia be nàtsɔ mí ade asi na Amoritɔwo woatsrɔ̃? Ne ɖe míenya hetsi Yordan godo la, ne enyo wu ɖe! 
8 Oo Afetɔ, meɖe kuku, esi Israel si le eƒe futɔwo nu ɖe, aleke gblɔ ge mala fifia? 
9 Ne Kanaantɔwo kple anyigba la dzi nɔlawo katã see la, woaɖe to ɖe mí, ahatsrɔ̃ míaƒe ŋkɔ ɖa le anyigba la dzi; ekema nu kae nàwɔ le wò ŋkɔ gã la ŋu?”
10 Eye Afetɔ ɖo eŋu na Yosua be: “Tso ɖe tsitre! Nu ka tae nètsyɔ mo anyi? 
11 Israel wɔ nu vɔ̃, eye wotu nu, si mebla kpli wo la. Wotsɔ nu siwo wòle be woatsrɔ̃ gbidigbidi la dometɔ aɖewo, wofi wo, eye wotsɔ wo ɣla ɖe woƒe nuwo dome. 
12 Eya ta Israel-viwo mate ŋu anɔ te ɖe woƒe futɔwo nu o. Woatrɔ megbe ade woƒe futɔwo ahasi le wo nu, elabena wozu nu si wòle be woatsrɔ̃ gbidigbidi. Nyemaganɔ kpli mi o, negbe ɖe mieɖe nu si wòle be woatsrɔ̃ gbidii la ɖa le mia dome hafi. 
13 Tso nàkɔ dukɔ la ŋu! Gblɔ na wo be: ‘Mikɔ mia ɖokuiwo ŋu etsɔ, elabena ale Afetɔ Israel ƒe Mawu la gblɔe nye esi: “Oo Israel, nu si wòle be woatsrɔ̃ gbidii la le dowòme. Màgate ŋu anɔ te ɖe wò futɔwo nu o, va se ɖe esime mieɖe nu si wòle be woatsrɔ̃ gbidigbidi la ɖa le mia dome hafi. 
14 Miva etsɔ ŋdi, to sia to, eye to si dzi Afetɔ atɔ asii la nate va, ƒome sia ƒome, eye ƒome si dzi Afetɔ atɔ asii la nate va, aƒe sia aƒe, eye aƒe si dzi Afetɔ atɔ asii la nate va ŋutsu ɖekaɖeka. 
15 Woatɔ dzo ame si gbɔ wokpɔ nu si wòle be woatsrɔ̃ gbidii la le, eya kple eƒe nuwo katã, elabena etu Afetɔ ƒe nubabla la, eye wòwɔ ŋukpenanu le Israel.”’”
16 Le ŋufɔke la, Yosua fɔ ŋdi kanya, eye wòna Israel te va, to sia to, eye wotɔ asi Yuda-to la dzi. 
17 Ena Yuda ƒomeawo te va, eye wotɔ asi Zera viwo ƒe ƒome la dzi, eye emegbe wòna Zera viwo ƒe ƒomea te va, ŋutsu sia ŋutsu, eye wotɔ asi Zabdi dzi. 
18 Mlɔeba ena Zabdi ƒe aƒe la te va, ŋutsu sia ŋutsu, eye wotɔ asi Akan, Karmi vi, Zabdi vi, ame si nye Zera vi, tso Yuda-toa me la dzi. 
19 Eye Yosua gblɔ na Akan be: “Vinye, meɖe kuku, de bubu Afetɔ Israel ƒe Mawu la ŋu, eye nàʋu eme nam. Meɖe kuku, gblɔ nu si nèwɔ la nam. Mègaɣlae ɖem o.”
20 Eye Akan ɖo eŋu na Yosua be: “Le nyateƒe me la, nyee wɔ nu vɔ̃ ɖe Afetɔ Israel ƒe Mawu la ŋu, eye nu si mewɔ lae nye esi: 
21 Esi mekpɔ awu xɔasi nyakpɔ aɖe si tso Sinar kple klosalo sekel alafa eve, kple sikakpɔti ɖeka, si ƒe kpekpeme nye sekel blaatɔ̃ le aboyonuawo dome la, wobiã ŋu nam, eye metsɔ wo. Meɖi nuawo ɖe nye agbadɔ me, eye ga la le wo te.”
22 Enumake Yosua dɔ amewo woƒu du yi agbadɔ la me, eye vavãe woɖi awuawo ɖe eƒe agbadɔ la me, eye ga la hã le wo te. 
23 Ale wotsɔ nuawo tso agbadɔ la me vɛ na Yosua kple Israel-viwo katã, eye wotsɔ wo da ɖe Afetɔ ŋkume. 
24 Azɔ Yosua kple Israel blibo si le eŋu la kplɔ Akan, Zera vi la, eye wotsɔ klosaloa, awu xɔasia kple sikakpɔti la, eye wokplɔ viaŋutsuwo, vianyɔnuwo, eƒe nyiwo, tedziwo, alẽwo, eye wotsɔ eƒe agbadɔ kple eƒe nuwo katã yi Akor Bali la me. 
25 Eye Yosua gblɔ be: “Nu ka tae nèhe vɔ̃ va mía dzi? Afetɔ hã ahe vɔ̃ ava dziwò egbe sia.” Israel blibo la ƒu kpe wo woku, eye wotɔ dzo wo. Ale woƒu kpe wo katã woku. 
26 Eye wofɔ kpewo li kɔ gã aɖe ɖe edzi, eye kɔ sia li va se ɖe egbe. Eye Afetɔ ƒe dziku helĩhelĩ la nu fa. Esia tae wona ŋkɔ teƒe ma be Akor Bali me va se ɖe egbe sia.

Yosua 8
1 Azɔ Afetɔ gblɔ na Yosua be: “Mègavɔ̃ o, eye ŋɔ megadzi wò o. Kplɔ aʋawɔlawo katã nàho ɖe Ai ŋu. Kpɔ ɖa, metsɔ Ai-fia, eƒe dukɔ, eƒe du la kple eƒe anyigba de asi na wò. 
2 Wɔ Ai kple eƒe fia la abe ale si tututu nèwɔ Yeriko kple eƒe fia la ene, ke le eya gome la, miate ŋu aha eƒe nuwo kple eƒe lãwo na mia ɖokuiwo. Na amewo nade xa ɖe du la megbe.”
3 Eya ta Yosua kple aʋawɔlawo katã ho ɖe Ai ŋu, eye Yosua tia aʋakalẽtɔ akpe blaetɔ̃, eye wòdɔ wo ɖa le zã me. 
4 Ede se sia na wo be: “Miyi ɖade xa ɖe du la megbe. Migayi adzɔge boo tso dua gbɔ o, eye mi katã minɔ klalo. 
5 Ke nye kple ame siwo katã le ŋunye la míate ɖe du la ŋu, eye ne wodo go va kpe mí abe tsã ene la, ekema míasi le wo nu. 
6 Ne woyɔ mí ɖe enu la, míahe wo ɖa le dua gbɔ, elabena woagblɔ be: ‘Wole sisim le mía nu abe tsã ene.’ Ale míasi le wo nu. 
7 Ekema miado le xadeƒe la axɔ dua; Afetɔ mia Mawu atsɔe ade asi na mi. 
8 Ne mienya xɔ dua ko la, mitɔ dzoe. Miwɔ abe ale si Afetɔ gblɔ ene. Kpɔ ɖa, se siawoe mede na mi.”
9 Emegbe Yosua dɔ wo ɖa, eye woyi xadeƒe la; wode xa ɖe Betel kple Ai dome, le Ai ƒe ɣetoɖoƒe, eye Yosua tsi aʋawɔla susɔeawo gbɔ zã ma.
10 Esi Yosua fɔ ŋdi kanya, eye wòƒo aʋawɔlaawo nu ƒu la, eya kple Israel ametsitsiwo kplɔ wo ɖo ta Ai. 
11 Eye aʋawɔla siwo katã le eŋu la zɔ yi dua ŋgɔ. Woƒu asaɖa anyi ɖe Ai ƒe dziehe, eye bali aɖe tso wo kple Ai dome. 
12 Le ɣeyiɣi ma me la, eɖe ŋutsu siwo anɔ akpe atɔ̃, eye wòna wode xa ɖe Betel kple Ai dome le dua ƒe ɣetoɖoƒe. 
13 Ale aʋawɔlawo ƒe akpa gãtɔ ƒu asaɖa anyi ɖe dua ƒe dziehe, eye aʋawɔla megbexeawo ƒu asaɖa anyi ɖe dua ƒe ɣetoɖoƒe, eye Yosua yi bali la me le zã ma me.
14 Esi Ai-fia kpɔ esia ko la, eya kple dua me ŋutsuwo katã fɔ ŋdi kanya hewɔ kaba do yi aʋa kpe ge kple Israel le teƒe aɖe si dze ŋgɔ tagba la. Ke menya be wode xa ɖi na ye le dua megbe o. 
15 Esi Ai ŋutsuwo dze aʋa ɖe wo ŋu la, Yosua kple Israel blibo la katã si to mɔ si ɖo ta gbedzi. 
16 Eye woyɔ ame siwo katã le dua me ƒo ƒu be woanya wo ɖe nu; esi wonya Yosua ɖe nu la, wohe wo yi adzɔge tso dua gbɔ. 
17 Ŋutsu aɖeke mekpɔtɔ ɖe Ai kple Betel, si medo go heti Israel yome o. Ale wogblẽ du la ɖe nuvo henya Israel ɖe nu.
18 Azɔ Afetɔ gblɔ na Yosua be: “Do akplɔ si le asiwò la ɖe Ai lɔƒo, elabena asiwò mee matsɔe ade.” Eya ta Yosua do akplɔ si le esi la ɖe du la gbɔ. 
19 Esi wònya do eƒe asi ɖa teti ko la, xadelawo do le xadeƒea kaba, eye woƒu du ge ɖe dua me hexɔe. Eye wotɔ dzo du la enumake.
20 Esi Ai ŋutsuwo trɔ kpɔ megbe la, wokpɔ be dzudzɔ de dzi kɔtɔɔ le dua me, eye ŋusẽ meganɔ wo ŋu woasi aɖo ta afi aɖeke o. Eye Israel-vi siwo si yina gbea dzi la trɔ ɖe wo yometilawo ŋu. 
21 Esi Yosua kple Israel blibo la katã kpɔ be xadelawo xɔ dua, eye dzudzɔ de dzi le dua me la, wotrɔ ɖe Ai ŋutsuawo ŋu. 
22 Ame siwo xɔ dua la do go va kpe wo, ale wɔ Ai ŋutsuwo tsi to me, Israel-viwo le woƒe akpa si kple akpa kemɛ, eye wosi wo va se ɖe esime agbetsila alo sisila aɖeke mekpɔtɔ o. 
23 Gake wolé Ai-fia agbagbee hekplɔe vɛ na Yosua.
24 Esi Israel wu Aitɔwo katã le tagba, le gbedzi afi si woti wo yome va, eye wotsrɔ̃ wo dometɔ ɖe sia ɖe kple yi vɔ keŋkeŋ la, Israel blibo la trɔ yi Ai, eye wòtsrɔ̃e kple yi. 
25 Aitɔ siwo katã tsi yi nu gbe ma gbe, ŋutsuwo kple nyɔnuwo siaa le ame akpe wuieve. 
26 Yosua megbugbɔ eƒe asi si wòtsɔ do akplɔ la ɖa la ɖe megbe o, va se ɖe esime wòtsrɔ̃ Aitɔwo katã vɔ keŋkeŋ. 
27 Ke Israel ha lãwo kple dua me nuwo na wo ɖokuiwo, abe ale si Afetɔ de se na Yosua ene.
28 Eye Yosua tɔ dzo Ai, eye wòzu aƒedo gbidigbidi va se ɖe egbe sia. 
29 Ehe Ai-fia ɖe ati ŋu va se ɖe fiẽ, eye esi ɣe yina to ɖo ge la, Yosua ɖe gbe be woaɖe eƒe kukua le atia ŋu. Eye wotsɔe ƒu gbe ɖe dua ƒe agbo nu, eye wofɔ kpewo li kɔ gã aɖe ɖe edzi, kpekɔa le afi ma va se ɖe egbe.
30 Ɣemaɣie Yosua ɖi vɔsamlekpui na Afetɔ, Israel ƒe Mawu la, ɖe Ebal To la dzi, 
31 abe ale si Afetɔ ƒe subɔla Mose de se na Israel-viwo, eye woŋlɔe ɖe Mose ƒe Segbalẽa me ene, be wòanye “Kpe blibo siwo wometsɔ gadɔwɔnu aɖeke fui o la ƒe vɔsamlekpui.” Wosa numevɔwo kple ŋutifafavɔwo le edzi na Afetɔ.
32 Yosua gbugbɔ ŋlɔ Mose ƒe Se, si wòŋlɔ le Israel-viwo ŋkume la, ɖe kpewo dzi le afi ma. 
33 Eye Israel blibo la katã, woƒe ametsitsiwo, dzikpɔlawo kple ʋɔnudrɔ̃lawo tɔ ɖe Aɖaka la ƒe axa eveawo dzi le Lewi vi nunɔla siwo kɔa Afetɔ ƒe nubablaɖaka la ŋgɔ. Amedzrowo kple dumeviwo siaa nɔ afi ma. Woƒe afã tɔ ɖe Gerizim To la ŋgɔ, eye afã tɔ ɖe Ebal To la ŋgɔ, be woayra Israel dukɔ la (abe ale si tututu Afetɔ ƒe subɔla Mose de se na wo gbe aɖe gbe ene). 
34 Emegbe exlẽ Se la me nyawo katã, yayrawo kple fiƒodewo, sesĩe le nya siwo katã woŋlɔ ɖe Segbalẽa me la nu. 
35 Nya siwo katã ƒe se Mose de la dometɔ aɖeke metsi anyi, si Yosua mexlẽ sesĩe le Israel ƒe ha blibo la katã, si me nyɔnuwo kple ɖeviwo kpakple amedzro siwo le wo dome hã le la ŋkume o.

Yosua 9
1 Esi fia siwo katã le Yordan ƒe ɣetoɖoƒe, siwo le tonuto la me, le Sefela kple Ƒu Gã blibo la nu kpakple Lebanon ŋgɔ, siwo nye Hititɔwo kple Amoritɔwo, Kanaantɔwo, Perizitɔwo, Hivitɔwo kple Yebusitɔwo, nya se nu si dzɔ ko la, 
2 wo katã wowɔ ɖeka be yewoawɔ aʋa kple Yosua kpakple Israel.
3 Gibeontɔwo hã se nu si Yosua tu kple Yeriko kple Ai. 
4 Eya ta wowɔ ayenu, eye wodi mɔdzinuɖuɖu de kotoku xoxowo me tsɔ ɖo woƒe tedziwo dzi, eye wotsɔ waingolo xoxo vuvu siwo wogbugbɔ tɔ, 
5 eye wodo afɔkpa xoxo siwo woka, kple awu xoxowo. Abolo siwo katã wotsɔ ɖe asi la ƒu hefli kakɛkakɛ. 
6 Woyi Yosua gbɔ le asaɖa la me le Gilgal, eye wogblɔ na eya kple Israel ŋutsuwo be: “Anyigba didi aɖe dzie míetso va. Eye míedi be miabla nu kpli mí.” 
7 Ke Israel ŋutsuwo gblɔ na Hivitɔawo be: “Ðewohĩ mía gbɔ afi sia koe miele. Ekema aleke wɔ míabla nu kpli mi?” 
8 Woɖo eŋu na Yosua be: “Wò subɔviwoe míenye.” Eye Yosua bia wo be: “Ame kawoe mienye, eye afi kae mietso?” 
9 Woɖo eŋu nɛ be: “Anyigba didi aɖe ŋutɔ dzie wò subɔviwo tso le Afetɔ wò Mawu ƒe ŋkɔ la ta, elabena míese eŋkɔ kple nu siwo katã wòwɔ le Egipte, 
10 kple nu siwo katã wòwɔ Amoritɔwo ƒe fia eve siwo nɔ Yordan godo, siwo nye Sihon, Hesbon-fia, kple Og, Basan-fia si nɔ Astarot. 
11 Eya ta míaƒe ametsitsiwo kple míaƒe anyigbadzitɔwo katã gblɔ na mí be: ‘Mitsɔ mɔdzinuɖuɖu ɖe asi miayi aɖakpe wo. Migblɔ na wo be: “Míazu miaƒe subɔviwo; eya ta mibla nu kpli mí.”’ 
12 Abolo siawo la, abolo dzodzoe wonye nɔ mía si gbe si gbe míedzo le míaƒe aƒewo me gbɔna mia gbɔ afi sia. Ke azɔ abe ale si miawo ŋutɔwo miakpɔe ene la, woƒu hefli kakɛkakɛ. 
13 Eye waingolo siawo le yeye hafi míeku wain ɖe wo me, ke azɔ la wovuvu. Eye míaƒe awuwo kple afɔkpawo vuvu le ale si gbegbe mɔa didii ta.”
14 Eye ŋutsuawo xɔ woƒe nuɖuɖuawo ƒe ɖe, gake womebia gbe Afetɔ se o. 
15 Eye Yosua wɔ ŋutifafa kpli wo, eye wòbla nu kpli wo be yeana woanɔ agbe, eye ha la ƒe tatɔwo ka atam na wo tsɔ ɖo kpe esia dzi.
16 Esi wobla nu kpli wo ŋkeke etɔ̃ megbe la, wova se be womele adzɔge tso yewo gbɔ o, yewoƒe nutoa me koe wole. 
17 Eye Israel-viwo dze mɔ eye le ŋkeke etɔ̃a gbe la, wova ɖo woƒe duwo me; woƒe duawoe nye Gibeon, Kefira, Beerot kple Kiriat-Yearim. 
18 Gake Israel-viwo medze wo dzi o, elabena ha la ƒe tatɔwo ka atam na wo le Afetɔ, Israel ƒe Mawu la ƒe ŋkɔ me. Eye ha blibo la lĩ liʋiliʋĩ le tatɔawo ŋu. 
19 Eye tatɔawo gblɔ na ha blibo la be: “Esi míeka atam na wo le Afetɔ, Israel ƒe Mawu la ŋkɔ me ta la, míekpɔ mɔ awɔ nu vevi wo o. 
20 Nu si wɔ ge míalae nye esi: Míana woanɔ agbe, ne dziku nagava mía dzi le atam si míeka na wo la ta o.” 
21 Eye tatɔawo gblɔ kpee be: “Mina woanɔ agbe, gake woazu nakefɔlawo kple tsidulawo na ha blibo la katã.” Nya siawoe tatɔawo tsɔ do ŋugbee na wo.”
22 Azɔ Yosua yɔ wo, eye wògblɔ na wo be: “Nu ka tae mieflu mí gblɔ be, ‘Didiƒe kee míetso,’ evɔ wònye mía gbɔ afi sia ko miele? 
23 Tso fifia la, woƒo fi de mi, eye mianye kluviwo ahazu nakefɔlawo kple tsidulawo na nye Mawu ƒe aƒe la ɖaa.” 
24 Eye woɖo eŋu na Yosua be: “Nu si tae nye be, wogblɔ na wò subɔviwo be Afetɔ wò Mawu la de se na eƒe subɔla Mose be wòatsɔ anyigba blibo la katã ana mi, eye wòatsrɔ̃ anyigba la dzi nɔlawo katã gbidigbidi le mia ŋgɔ. Eya ta míevɔ̃ ɖe míaƒe agbe ta le mia ta, esia tae míewɔ nu sia ɖo. 
25 Azɔ míele asiwò me. Wɔ nu sia nu si nèkpɔ be enyo hesɔ la kpli mí.” 
26 Eye nenemae wòwɔ wo; eɖe wo tso Israel-viwo si me, eye womewu wo o. 
27 Gake tso gbe ma gbe la, Yosua na wozu nakefɔlawo kple tsidulawo na ha la kple Afetɔ ƒe vɔsamlekpui la le teƒe si Mawu atia la, wogale esia wɔwɔ dzi va se ɖe egbe.

Yosua 10
1 Esi Yerusalem-fia Adoni-Zedek nya se be Yosua xɔ Ai eye wòtsrɔ̃e gbidii, ewɔ Ai kple eƒe fia abe ale si tututu wòwɔ Yeriko kple eƒe fia ene, eye Gibeontɔwo wɔ ŋutifafa kple Israel, eye wole wo dome ko la, 
2 dzidzi ƒoe ŋutɔ, elabena Gibeon du la lolo abe fiaduawo dometɔ ɖeka ene. Elolo wu Ai, eye eme ŋutsuwo katã nye aʋakalẽtɔwo. 
3 Eya ta Yerusalem-fia Adoni-Zedek ɖo du sia ɖe Hebron-fia Hoham kple Yarmut-fia Piram kple Lakis-fia Yafia kpakple Eglon-fia Debir be: 
4 “Miva kpe ɖe ŋunye ne míaho aʋa ɖe Gibeon ŋu, elabena ewɔ ŋutifafa kple Yosua kpakple Israel-viwo.” 
5 Ale Amoritɔwo ƒe fia atɔ̃ siwo nye Yerusalem-fia, Hebron-fia, Yarmut-fia, Lakis-fia, Eglon-fia kple woƒe aʋakɔwo katã ƒo ƒu, eye wova ƒu asaɖa anyi ɖe Gibeon ŋu be yewoakpe aʋa kplii.
6 Eye Gibeon ŋutsuwo dɔ ame ɖo ɖe Yosua le asaɖa la me le Gilgal be: “Mègagblẽ wò kluviwo ɖi o. Va kaba ne nàxɔ na mí, eye nàkpe ɖe mía ŋu! Amoritɔwo ƒe fia siwo katã le tonutoa me la ƒo takpli ɖe mía ŋu.” 
7 Eya ta Yosua kple aʋawɔlawo kpakple kalẽtɔwo katã ho tso Gilgal yi.
8 Eye Afetɔ gblɔ na Yosua be: “Mègavɔ̃ wo o, elabena metsɔ wo de asi na wò. Wo dometɔ aɖeke mate ŋu anɔ te ɖe nuwò o.” 
9 Eye Yosua zɔ zã blibo la katã tso Gilgal va dze wo dzi le vo me. 
10 Eye Afetɔ na wotɔtɔ le Israel ŋkume, eye wowu wo eteƒe mekɔ o le Gibeon, eye wokplɔ wo ɖo to todzimɔ si yi Bet-Horon, eye wonɔ wo wum va se ɖe keke Azeka kple Makeda ke. 
11 Esime wonɔ sisim le Israel nu, eye wonɔ Bet-Horon ƒe abu ɖim la, Afetɔ na tsikpe gãwo dza tso dziƒo ɖe wo dzi, va se ɖe keke Azeka ke eye woku. Le nyateƒe me la, ame siwo tsikpeawo wu sɔ gbɔ wu ame siwo Israel-viwo wu kple yi.
12 Ɣemaɣi, le gbe si gbe Afetɔ si Amoritɔwo vevie le Israel-viwo ŋgɔ lae Yosua gblɔ na Afetɔ le Israel-viwo ŋkume be:
“Ɣe, tɔ ɖe Gibeon tame, Eye ɣleti, tɔ ɖe Aiyalon Bali la tame!”
13 Ale ɣe la tɔ ɖi, eye ɣleti hã meɖe zɔ o va se ɖe esime dukɔ la bia hlɔ̃ eƒe futɔwo. Ðe womeŋlɔe ɖe Yasar ƒe agbalẽ me oa? Eye ɣe tɔ ɖe dziƒo titina, eye meɖe abla yi ɖaɖo to o abe ŋkeke ɖeka blibo ene. 
14 Ŋkeke aɖeke menɔ abe esia ene kpɔ o, eɖanye do ŋgɔ nɛ alo le emegbe, si me Afetɔ ɖo to amegbetɔ ƒe gbe o, elabena Afetɔ nɔ aʋa wɔm na Israel.
15 Le ema megbe la, Yosua kple Israel-viwo katã gbugbɔ va asaɖa la me le Gilgal.
16 Ke fia atɔ̃awo si yi ɖabe ɖe agado me le Makeda. 
17 Eye wova gblɔ na Yosua be: “Wokpɔ fia atɔ̃awo wobe ɖe agado me le Makeda.” 
18 Eya ta Yosua gblɔ be: “Mimli kpe gãwo ɖo agado la nu, eye miɖe ŋutsuwo woadzɔ wo ŋu. 
19 Ke mi ame susɔeawo, migatɔ o. Minya miaƒe futɔwo ɖe nu, eye minɔ wo wum tso wo megbe. Migaɖe mɔ na wo woage ɖe woƒe duawo me o, elabena Afetɔ mia Mawu tsɔ wo de asi na mi.”
20 Yosua kple Israel-viwo wu wo dometɔ gbogbo aɖewo hetsrɔ̃ wo katã kloe, negbe agbetsila ʋɛ aɖewo koe susɔ siwo si yi ɖabe ɖe woƒe du sesẽwo me; 
21 ke aʋakɔ blibo la katã trɔ yi asaɖa la me le Yosua gbɔ le Makeda dedie. Ame aɖeke megake atse gblɔ nya aɖeke ɖe Israel-viwo ŋu o. 
22 Azɔ Yosua gblɔ be: “Miʋu nu le agado la nu, ne miakplɔ fia atɔ̃awo do goe tso agado la me vɛ nam.” 
23 Eye wokplɔ fia atɔ̃awo tso agado la me vɛ nɛ: Yerusalem-fia, Hebron-fia, Yarmut-fia, Lakis-fia kple Eglon-fia. 
24 Esi wokplɔ fia siawo vɛ na Yosua la, eyɔ Israel ŋutsuwo katã, eye wògblɔ na aʋakplɔla siwo yi kplii la be: “Mite va ŋgɔ. Mitsɔ miaƒe afɔwo ɖo fia siawo ƒe ʋume.” Eya ta wote va ŋgɔ, eye wotsɔ woƒe afɔwo ɖo woƒe ʋume. 
25 Eye Yosua gblɔ na wo be: “Migavɔ̃ o, eye ŋɔ megadzi mi o. Milé dzi ɖe ƒo, eye misẽ ŋu, elabena aleae Afetɔ awɔ miaƒe futɔ siwo katã ŋu mieho aʋa ɖo lae.”
26 Emegbe Yosua wu wo, eye wòhe wo ɖe ati atɔ̃ ŋu, eye wonɔ atiawo ŋu va se ɖe fiẽ. 
27 Le ɣetrɔ la, Yosua ɖe gbe be woayi aɖaɖe wo le atiawo ŋu, eye wokɔ wo ƒu gbe ɖe agado si me wobe ɖo la me. Eye wotsɔ kpe gãwo ɖo agado la nu, eye wogale afi ma va se ɖe egbe.
28 Gbe ma gbe Yosua xɔ Makeda, eye wòsii kple yi. Etsrɔ̃ eƒe fia kple ame siwo katã le eme la gbidigbidi. Mena ame aɖeke tsi agbe o. Ewɔ Makeda-fia abe ale si wòwɔ Yeriko-fia ene.
29 Eye Yosua kple Israel ƒe aʋakɔ blibo la ho tso Makeda yi Libna, eye wowɔ aʋa kple Libna. 
30 Eye Afetɔ tsɔ Libna hã kple eƒe fia de asi na Israel, eye wotsrɔ̃ emenɔlawo katã kple yi, womena ame aɖeke tsi agbe le eme o. Ale wowɔ eƒe fia la abe ale si wowɔ Yeriko-fia ene.
31 Eyome Yosua kple Israel ƒe aʋakɔ blibo la ho tso Libna yi Lakis, eye woyi ɖaƒu asaɖa anyi ɖe afi ma eye wowɔ aʋa kplii. 
32 Afetɔ tsɔ Lakis de asi na Israel, eye woxɔe le ŋkeke evea gbe. Wotsrɔ̃ dua kple emenɔlawo katã kple yi, abe ale si ko wowɔ Libna ene.
33 Eye Gezer-fia Horam yi ɖakpe ɖe Lakis ŋu, gake Yosua si eya kple eƒe dukɔ la va se ɖe esime ame aɖeke metsi agbe o.
34 Yosua kple Israel ƒe aʋakɔ blibo la ho tso Lakis yi Eglon, eye woyi ɖaƒu asaɖa anyi ɖe eŋu hewɔ aʋa kplii. 
35 Woxɔe gbe ma gbe, eye wosii kple yi. Wotsrɔ̃ emenɔlawo katã gbe ma gbe, abe ale si ko wowɔ Lakis ene.
36 Eye Yosua kple Israel ƒe aʋakɔ blibo la ho tso Eglon yi Hebron, eye wowɔ aʋa kplii. 
37 Woxɔe hetsrɔ̃e kple eƒe fia, eƒe duwo kple emenɔlawo katã kple yi. Mena ame aɖeke tsi agbe o, abe ale si ko wòwɔ Eglon ene, etsrɔ̃ eya kple emenɔlawo katã gbidii.
38 Eyome Yosua kple Israel ƒe aʋakɔ blibo la trɔ ɖo ta Debir, eye wowɔ aʋa kplii. 
39 Exɔe kple eŋu duwo katã, elé eƒe fia la, eye wotsrɔ̃ duawo kple wo me nɔlawo katã kple yi, mena ame aɖeke tsi agbe o. Ewɔ Debir kple eƒe fia abe ale si tututu wòwɔ Hebron kpakple Libna kple eƒe fia ene.
40 Yosua ɖu anyigba siwo katã le tonutoa me, Negeb, Sefela kple toŋuduwo kpakple woƒe fiawo katã dzi, mena ame aɖeke tsi agbe o; etsrɔ̃ ame sia ame gbidigbidi, abe ale si tututu Afetɔ, Israel ƒe Mawu la, de see ene. 
41 Yosua ɖu wo dzi tso Kades-Barnea va se ɖe Gaza, tso Gosen-nyigba blibo la dzi va se ɖe Gibeon. 
42 Eye Yosua ɖu fia siawo kple woƒe anyigbawo katã dzi le aʋahoho ɖeka me, elabena Afetɔ, Israel ƒe Mawu, lae nɔ aʋa wɔm na Israel. 
43 Emegbe Yosua kple Israel ƒe aʋakɔ blibo la katã trɔ gbɔ va asaɖa la me le Gilgal.

Yosua 11
1 Esi Hazor-fia Yabin nya see ko la, eɖo du ɖe Madon-fia Yobab, Simron-fia kple Aksaf-fia, 
2 fia siwo le tonutowo me le dziehe, esiwo le tagba le Kineret ƒe anyiehe, Sefela kple Dor togbɛwo dzi le ɣetoɖoƒe, 
3 kpakple Kanaantɔ siwo le ɣedzeƒe kple ɣetoɖoƒe, Amoritɔwo, Hititɔwo, Perizitɔwo, Yebusitɔ siwo le tonutoa me, kple Hivitɔ siwo le Hermon To la ƒe bali me le Mizpa-nyigba dzi. 
4 Eya ta woho va kple woƒe aʋakɔwo katã, wosɔ gbɔ abe ƒutake ene; wova kple sɔwo kple aʋatasiaɖam gbogbo aɖewo. 
5 Fia siawo katã ɖo gbe ɖi, eye wova ƒu asaɖa anyi ɖe Merom-tɔʋu la nu be yewoakpe aʋa kple Israel.
6 Afetɔ gblɔ na Yosua be: “Mègavɔ̃ wo o, elabena etsɔ ɣealewoɣi la, mawu wo katã na Israel. Nàtso agbeka na woƒe sɔwo, eye nàtɔ dzo woƒe tasiaɖamwo.” 
7 Yosua kple aʋawɔlaawo katã va ƒo ɖe wo dzi le vo me le Merom-tɔʋu la nu. 
8 Afetɔ tsɔ wo de asi na Israel, eye woɖu wo dzi, eye wonya wo ɖe nu va se ɖe keke Sidon Gã kple Misrefot-Mayim kpakple gbadzaƒe si le Mizpe Bali si le ɣedzeƒe la me ke, wonɔ wo wum va se ɖe esime ame aɖeke metsi agbe o. 
9 Emegbe Yosua wɔ wo abe ale si tututu Afetɔ gblɔ nɛ ene; etso agbeka na woƒe sɔwo, eye wòtɔ dzo woƒe tasiaɖamwo.
10 Gawu la, Yosua trɔ va xɔ Hazor, eye wòwu eƒe fia kple yi, elabena Hazor ye nye fiaɖuƒe siawo katã ƒe ta tsã. 
11 Wowu emenɔlawo katã kple yi hetsrɔ̃ wo gbidigbidi. Womegblẽ ame aɖeke ɖi o. Eye wòtɔ dzo Hazor. 
12 Yosua xɔ fia siawo ƒe duwo katã, eye wòwu woƒe fiawo katã kple yi. Etsrɔ̃ wo gbidii, abe ale si tututu Afetɔ ƒe subɔla Mose de se ene. 
13 Ke Israel metɔ dzo du siwo le woƒe togbɛwo dzi la dometɔ aɖeke o, negbe Hazor koe Yosua tɔ dzoe. 
14 Israel-viwo ha du siawo ƒe aboyonuwo katã kple lãwo na wo ɖokuiwo. Gake wowu ame sia ame kple yi va se ɖe esime wotsrɔ̃ wo dometɔ ɖe sia ɖe. Womena ame aɖeke tsi agbe o. 
15 Ale si tututu Afetɔ de se na eƒe subɔla Mose la, nenemae Mose de se na Yosua, eye nenema tututue Yosua wɔ. Ewɔ nu siwo katã ƒe se Afetɔ de na Mose la pɛpɛpɛ, meɖe ɖeke le eme o.
16 Yosua xɔ anyigba siawo katã, tonuto la, Negeb blibo la, Gosen-nyigba blibo la, Sefela, Araba, Israel tonuto la kple eƒe Sefela, 
17 tso Halak To si ɖo ta Seir la gbɔ va se ɖe keke Baal-Gad si le Lebanon Bali me le Hermon Toa te ke, eye wòɖu woƒe fiawo katã dzi hewu wo. 
18 Yosua wɔ aʋa kple fia siawo ɣeyiɣi didi aɖe. 19 Du aɖeke mewɔ ŋutifafa kple Israel-viwo o, negbe Hivitɔwo, ame siwo le Gibeon la ko. Ke wowɔ aʋa xɔ du bubuawo katã. 
20 Elabena Afetɔ ye ɖe mɔ woƒe dzi me sẽ, be woaho aʋa ɖe Israel ŋu, ale be wòatsrɔ̃ wo nublanuimakpɔmakpɔe. Ele be woatsrɔ̃ wo gbidigbidi, abe ale si tututu Afetɔ de se na Mose ene.
21 Ɣemaɣi la, Yosua yi ɖatsrɔ̃ Anakitɔwo ɖa le tonuto la me, le Hebron, le Debir, le Anab, le Yuda tonuto bliboa me kple Israel tonuto bliboa katã me. Yosua tsrɔ̃ wo kple woƒe duwo gbidii. 
22 Anakitɔ aɖeke mekpɔtɔ ɖe Israel-viwo ƒe anyigba dzi o. Negbe Gaza, Gat kple Asdod ko. 
23 Ale Yosua xɔ anyigba blibo la katã, abe ale si Afetɔ do ŋugbe na Mose ene, eye Yosua tsɔ anyigba la na Israel-viwo wotɔwotɔe wòzu woƒe domenyinu be woamae le woƒe toawo me. Eye anyigba la kpɔ gbɔdzɔe tso aʋawɔwɔ me.

Yosua 12
1 Azɔ esiawoe nye anyigba la dzi fia siwo dzi Israel-viwo ɖu, ame siwo ƒe anyigba woxɔ le Yordan ƒe ɣedzeƒe gome, tso Arnon Bali la nu va se ɖe Hermon To la gbɔ kple Araba blibo la le ɣedzeƒe: 
2 Sihon, Amori-fia si nɔ Hesbon ƒe dziɖuƒe tso Aroer si le Arnon Bali nu, kple tso balia titina hekpe ɖe Gilead ƒe afã ŋu va se ɖe keke Yabok Bali, si nye Amonitɔwo ƒe liƒo, la me ke. 
3 Eƒe dziɖuƒe la gatso Araba va se ɖe keke Kineret-ƒu la nu le ɣedzeƒe gome va se ɖe keke Araba-ƒu, si nye Dzeƒu la nu le ɣedzeƒe ɖo ta Bet-Yesimot, va se ɖe Pisga-to ƒe aga nu le anyiehe.
4 Hekpe ɖe Og, Basan-fia, si nye Refaimtɔ mamlɛawo dometɔ ɖeka si nɔ Astarot kple Edrei la ƒe anyigba hã ŋu, 
5 ame si ƒe dziɖuƒe nye Hermon To, Saleka kple Basan blibo la va se ɖe keke Gesurtɔwo kple Maakatitɔwo ƒe liƒo dzi ke, hekpe ɖe Gilead ƒe afã ŋu va se ɖe Hesbon-fia, Sihon, ƒe anyigba dzi ke.
6 Afetɔ ƒe subɔla Mose kple Israel-viwo ɖu wo dzi, eye Afetɔ ƒe subɔla Mose tsɔ woƒe anyigba na Ruben viwo kple Gad viwo kpakple Manase-toa ƒe afã la be wòanye wo tɔ.
7 Esiawoe nye anyigba la dzi fia siwo dzi Yosua kple Israel-viwo ɖu le Yordan ƒe ɣetoɖoƒe gome, tso Baal-Gad si le Lebanon Bali la me va se ɖe keke Halak To, si ɖo ta Seir gbɔ ke; emegbe Yosua ma woƒe anyigba la na Israel-toawo wotɔwotɔwoe be wòanye wo tɔ, 
8 le tonuto la me, le Sefela, Araba, agawo me, gbegbe kple Negeb. Esiawoe nye Hititɔwo, Amoritɔwo kple Kanaantɔwo, Perizitɔwo, Hivitɔwo kple Yebusitɔwo ƒe anyigba. Fiawo siawoe nye:
 9 Yeriko-fia, ɖeka; Ai, si le Betel xa la ƒe fia, ɖeka;
10 Yerusalem-fia, ɖeka; Hebron-fia, ɖeka;
11 Yarmut-fia, ɖeka; Lakis-fia, ɖeka;
12 Eglon-fia, ɖeka; Gezer-fia, ɖeka;
13 Debir-fia, ɖeka; Geder-fia, ɖeka;
14 Horma-fia, ɖeka; Arad-fia, ɖeka;
15 Libna-fia, ɖeka; Adulam-fia, ɖeka;
16 Makeda-fia, ɖeka; Betel-fia, ɖeka;
17 Tapua-fia, ɖeka; Hefer-fia, ɖeka;
18 Afek-fia, ɖeka; Lasaron-fia, ɖeka;
19 Madon-fia, ɖeka; Hazor-fia, ɖeka;
20 Simron-Meron fia, ɖeka; Aksaf-fia, ɖeka;
21 Taanak-fia, ɖeka; Megido-fia, ɖeka;
22 Kedes-fia, ɖeka; Yokneam-fia si le Karmel, ɖeka;
23 Dor-fia si le Dor togbɛ dzi, ɖeka; Goim-fia si le Gilgal, ɖeka;
24 Tirza-fia, ɖeka; fiaawo katã le blaetɔ̃ vɔ ɖekɛ.

Yosua 13
1 Yosua tsi xɔ ƒe geɖe. Eya ta Afetɔ gblɔ nɛ be: “Ètsi ku amegã hexɔ ƒe geɖe, gake anyigba la ƒe akpa gã aɖe gakpɔtɔ li woaxɔ. 
2 Anyigba siwo susɔ la woe nye esi: Filistitɔwo ƒe nutowo katã kple Gesurtɔwo ƒe nutowo katã, 
3 (tso Nil ƒe alɔdze si le Egipte ƒe ɣedzeƒe va se ɖe Ekron ƒe liƒo dzi le dziehe, si wobuna tsã be enye Kanaantɔwo ƒe anyigba) kple Filistitɔwo ƒe kplɔla atɔ̃awo ƒe anyigbawo: Gazatɔwo, Asdodtɔwo, Askelontɔwo, Gititɔwo kple Ekrontɔwo; hekpe ɖe Avitɔwo ƒe anyigba ŋu 
4 le anyiehe; Kanaantɔwo ƒe anyigbawo katã; Meara, si nye Sidontɔwo tɔ, va se ɖe Afek, yi Amoritɔwo ƒe liƒo dzi; 
5 kple Gebaltɔwo ƒe anyigbawo kple Lebanon blibo la le ɣedzeƒe, tso Baal-Gad le Hermon To la ƒe bali me va se ɖe Lebo-Hamat; 
6 tonuto la me tɔwo katã, tso Lebanon va ɖo Misrefot-Mayim; kple Sidontɔwo katã. Manya wo ɖa le Israel-viwo ŋgɔ. Ðeko wò ya nàmae na Israel wòanye eƒe domenyinu, abe ale si mede se na wò ene. 
7 Azɔ ma anyigba sia wòanye domenyinu na to asiekeawo kple Manase-toa ƒe afã la.”
8 Manase-toa ƒe afã susɔea, Ruben viwo kple Gad viwo xɔ woƒe domenyinu si Mose na wo le Yordan ƒe ɣedzeƒe gome, abe ale si Afetɔ ƒe subɔla Mose na woe ene: 
9 tso Aroer, si le Arnon Bali la nu, kple du si le bali la titina, kple Medeba tonyigba gbadza blibo la va se ɖe keke Dibon ke; 
10 kple Sihon, Amori-fia si ɖu fia le Hesbon la, ƒe duwo katã va se ɖe Amonitɔwo ƒe liƒo dzi; 
11 kple Gilead, Gesurtɔwo kple Maakatitɔwo ƒe anyigba, hekpe ɖe Hermon To blibo la kple Basan blibo la ŋu va se ɖe keke Saleka ke; 
12 Og ƒe dziɖuƒe si le Basan la katã, ame si ɖu fia le Astarot kple Edrei. (Eyae nye Refaimtɔ mamlɛ si susɔ.) Mose ɖu wo dzi henya wo ɖa. 
13 Ke Israel-viwo menya Gesurtɔwo kple Maakatitɔwo ɖa o, eye Gesurtɔwo kple Maakatitɔwo kpɔtɔ le Israel-viwo dome va se ɖe egbe.
14 Lewi-to la koe mena domenyinu aɖeke o. Afetɔ, Israel ƒe Mawu, ƒe dzovɔsawoe nye woƒe domenyinu, abe ale si wòdo ŋugbe na wo ene.
15 Eye Mose na domenyinu Ruben viwo ƒe to la le woƒe ƒomewo nu, 
16 eye woxɔ anyigba tso Aroer, si le Arnon Bali la nu, kple du si le bali la titina, kple Medeba tonyigba gbadza blibo la; 
17 Hesbon kple eŋu du siwo katã le tonyigba gbadza la dzi, Dibon, Bamot-Baal kple Bet-Baal-Meon, 
18 Yahaz, Kedemot, Mefaat, 
19 Kiriatayim, Sibma kple Zeret-Sahar le to si le bali me la dzi, 
20 Bet-Peor, Pisga ƒe agawo, Bet-Yesimot, 
21 du siwo katã le tonyigba gbadza la dzi kple Sihon, Amori-fia si ɖu fia le Hesbon la, ƒe dziɖuƒe blibo la katã. Mose ɖu eya kple Midian-megã siwo nye Evi, Rekem, Zur, Hur, Reba, kple ame siwo nye Sihon ƒe dziɖula siwo nɔ anyigbaa dzi la dzi. 
22 Israel-viwo wu nukala Bileam, Beor vi, kple yi hekpe ɖe ame bubu siwo wowu la ŋu. 
23 Yordan nye Ruben viwo ƒe liƒo; eye anyigba sia nye Ruben viwo ƒe domenyinu le woƒe ƒomewo nu hekpe ɖe eƒe duwo kple kɔƒewo ŋu.
24 Eye Mose na domenyinu Gad-to la le woƒe ƒomewo nu, 
25 Yazer kple Gilead ƒe duwo katã kple Amonitɔwo ƒe anyigba ƒe afã, va se ɖe keke Aroer, si dze ŋgɔ Raba la kpe ɖe woƒe anyigba ŋu; 
26 tso Hesbon yi Ramat-Mizpe kple Betonim, tso Mahanayim yi Debir ƒe liƒo dzi; 
27 Bet-Haran, Bet-Nimra, Sukot kple Zafon, siwo nye Hesbon-fia Sihon ƒe dziɖuƒe susɔea le bali la me, Yordan ye nye woƒe liƒo le Kineret-ƒu la ƒe mlɔenu le anyime, le Yordan ƒe ɣedzeƒe gome. 
28 Esiae nye Gad viwo ƒe domenyinu, woƒe duwo hekpe ɖe woƒe kɔƒewo ŋu, le woƒe ƒomewo nu.
29 Mlɔeba Mose na domenyinu Manase-to afã la, ena Manase viwo ƒe to afã la le woƒe ƒomewo nu. 
30 Woƒe anyigba tso Mahanayim hekpe ɖe Basan blibo la, si nye Basan-fia Og ƒe dziɖuƒe blibo la katã kple Yair ƒe avɔgbadɔkɔƒe siwo katã le Basan la ŋu, wole du blaade. 
31 Eye Gilead ƒe afã, kpakple Astarot kple Edrei, du siwo le Basan-fia Og ƒe dziɖuƒe la, zu Manase vi Makir viwo tɔ, ezu Makir viwo ƒe afã tɔ le woƒe ƒomewo nu.
32 Esiawoe nye domenyinu siwo Mose na wo le Moab tagba le Yordan godo le Yeriko ƒe ɣedzeƒe gome.
33 Ke Mose mena domenyinu Lewi viwo o. Afetɔ, Israel ƒe Mawue nye woƒe domenyinu, abe ale si wòdo ŋugbe na wo ene.

Yosua 14
1 Ke esiae nye domenyinu si Israel-viwo xɔ le Kanaan-nyigba dzi, si nunɔla Eleazar kple Yosua, Nun vi, kpakple Israel-viwo ƒe tatɔ siwo le wo fofowo ƒe aƒekɔwo nu la na wo. 
2 Wodzidze nu hafi mae na to asieke kple afã la, abe ale si ko Afetɔ de se to Mose dzi ene. 
3 Elabena Mose na domenyinu to eve kple afã kemɛawo ɖe Yordan ƒe go kemɛ dzi, ke mena domenyinu Lewi viwo le wo dome o. 
4 Elabena wobu Yosef ƒe dzidzimeviwo to eve, woawoe nye Manase kple Efrayim; eye womena gome Lewi viwo le anyigba la dzi o, negbe du siwo me woanɔ kple wo ŋu lãnyiƒewo hena woƒe lãwo nyinyi kple woƒe nunɔamesiwo ko. 
5 Israel-viwo ma anyigba la abe ale si tututu Afetɔ de se na Mose ene.
6 Azɔ Yuda viwo va Yosua gbɔ le Gilgal, eye Kaleb, Yefune vi, si nye Kenizitɔ la, gblɔ nɛ be: “Ènya nya si Afetɔ gblɔ na Mawu vavã la ƒe ame Mose le nye kpli wò ŋu le Kades-Barnea la nyuie. 
7 Mexɔ ƒe blaene esime Afetɔ ƒe subɔla Mose dɔm tso Kades-Barnea be mayi aɖatsa ŋku le anyigba la dzi, eye meva gblɔ nu siwo mekpɔ la tututu nɛ. 
8 Togbɔ be nɔvinye siwo yi kplim la ɖe dzi le dukɔ la ƒo hã la, nye ya medze Afetɔ nye Mawu yome kple dzi blibo.
9 Mose ka atam gbe ma gbe gblɔ be: ‘Anyigba si dzi nèɖo afɔe la, azu wò kple viwòwo ƒe domenyinu ɖaa, elabena èdze Afetɔ nye Mawu la yome kple dzi blibo.’ 
10 Azɔ Afetɔ na mekpɔtɔ le agbe, abe ale si tututu wòdo ŋugbee ene, ƒe blaene vɔ atɔ̃e nye esia tso esime Afetɔ do ŋugbe sia na Mose esime Israel zɔ gbea dzi, mekpɔtɔ le agbe, eye mexɔ ƒe blaenyi vɔ atɔ̃. 
11 Gake ŋusẽ gale ŋunye egbea abe ale si wònɔ gbe si gbe Mose dɔm ene. Ŋusẽ gakpɔtɔ le ŋunye egbea mate ŋu awɔ aʋa kple nu bubuwo abe ɣemaɣi ene. 
12 Eya ta tsɔ tonuto si ŋugbe Afetɔ do gbe ma gbe la nam. Togbɔ be èsee gbe ma gbe be Anakitɔ siwo le du gã sesẽwo me la le afi ma hã la, Afetɔ anɔ kplim godoo, eye manya wo ɖa, abe ale si tututu Afetɔ do ŋugbee ene.”
13 Ale Yosua yrae, eye wòtsɔ Hebron na Kaleb, Yefune vi la, be wòanye eƒe domenyinu. 
14 Esia tae Hebron zu Kaleb, Yefune vi, si nye Kenizitɔ la tɔ eye wònye eƒe domenyinu va se ɖe egbe, elabena edze Afetɔ, Israel ƒe Mawu la, yome kple dzi blibo. 
15 Tsã la, woyɔa Hebron be Kiriat-Arba, (Arba siae nye ame si xɔ ŋkɔ wu le Anakitɔwo dome). Eye anyigba la kpɔ gbɔdzɔe tso aʋawɔwɔ me.

Yosua 15
1 Anyigba si wona Yuda-to la ɖe woƒe ƒomeawo nu la de keke Edom ƒe liƒo dzi ke le Zin gbedzi va ɖo Negeb le eƒe nuwuƒe si le anyiehekpa dzi. 
2 Woƒe anyieheliƒo tso Dzeƒu la ƒe mlɔenu, tso adɔ̃ si dze ŋgɔ anyiehe gome la gbɔ. 
3 Eye wòɖo ta anyiehe gome yi Akrabim-todzimɔ la gbɔ hemlo yi Zin, eye wòtso anyiehe yi Kades-Barnea hegamlo yi Hezron kple Adar, eye wògɔdɔ̃ ɖo ta Karka. 
4 Eto Azmon va do ɖe Egipte-tɔʋu la me, eye liƒoa va wu nu ɖe ƒu la nu. Esiae nye woƒe anyieheliƒo.
5 Ɣedzeƒeliƒo lae nye Dzeƒu la va se ɖe Yordan ƒe mlɔenu, eye liƒo si le dzogoe si le dziehe la, le ƒu la ƒe adɔ̃ nu, le Yordan ƒe mlɔenu. 
6 Liƒo la tso afi ma va ɖo Bet-Hogla, eye wòmlo to Bet-Araba ƒe dziehe, azɔ liƒo la gayi ŋgɔ ɖado ɖe Ruben vi Bohan ƒe kpe la gbɔ. 
7 Liƒo la tso afi ma va ɖo Debir le Akor Bali me, eye wòtrɔ to dziehe gome ɖo ta Gilgal, si le Adumim-todzimɔ ŋgɔ, le tɔʋu la ƒe anyiehe; eye liƒo la va to En-Semes-tɔ la ŋu, eye wòva wu nu ɖe En-Rogel. 
8 Eye liƒo la to Hinom Vi Ƒe Bali la me va to Yebusitɔwo ƒe to la ŋu le anyiehe, si nye Yerusalem; eye wòto to, si dze ŋgɔ Hinom Balia le ɣetoɖoƒe gome la tame le Refaim Bali la ƒe seƒe le eƒe dziehe. 
9 Eye liƒo la to toa tame va ɖo Neftoa-tsidzɔƒea gbɔ, eye wòyi ɖado ɖe du siwo le Efron To dzi la gbɔ yi ɖado ɖe Baala, si nye Kiriat-Yearim.
10 Liƒo la gɔdɔ̃ tso Baala le ɣetoɖoƒe gome ɖo ta Seir To la gbɔ, eye wòmlo to Yearim To la ŋu le dziehe, si nye Kesalon, eye wòɖiɖi va Bet-Semes hemlo ɖo ta Timna. 
11 Eye liƒo la va do ɖe Ekron To la ŋu le dziehe, eye wòva to Sikeron hemlo yi Baala To la gbɔ heva do ɖe Yabneel, eye liƒoa va wu nu ɖe ƒu la nu.
12 Ɣetoɖoƒeliƒo la nye Ƒu Gã la kple eƒe ƒuta. Esiae nye Yuda ƒe dzidzimeviwo ƒe liƒo la godoo va kpe le woƒe ƒomewo nu.
13 Eye Yosua na anyigba Kaleb, Yefune vi la, ɖe Yuda ƒe dzidzimeviwo dome le se si Afetɔ de nɛ la nu, eye anyigba lae nye Kiriat-Arba si woyɔna be Hebron (Arba siae nye Anak fofo). 
14 Eya ta Kaleb nya Anak viŋutsu etɔ̃ siwo nye Sesai, Ahiman kple Talmai, siwo nye Anak ƒe dzidzimeviwo la ɖa le afi ma. 
15 Eye wòho tso afi ma yi ɖawɔ aʋa kple Debirtɔwo. (Tsã la woyɔa Debir be Kiriat-Sefer.) 
16 Eye Kaleb gblɔ be: “Ame si asi Kiriat-Sefer, eye wòaxɔe la, matsɔ vinyenyɔnu Aksa nɛ wòaɖe.” 
17 Eye Otniel, Kaleb nɔvi Kenaz ƒe vi, xɔ dua. Ale wòtsɔ vianyɔnu Aksa nɛ wòɖe. 
18 Eye esi nyɔnua kple srɔ̃a yina aƒe me la, nyɔnua ƒoe ɖe srɔ̃a nu be yeabia agble ye fofo. Eye nyɔnu la ɖi le eƒe tedzi dzi. Eye Kaleb biae be: “Nu ka dim nèle?” 
19 Eɖo eŋu nɛ be: “Meɖe kuku yram, elabena èna anyigbam le anyiehe; tsɔ Gulot-Mayim hã nam.” Ale wòtsɔ Dzigbe Gulot kple Anyigbe Gulot nɛ.
20 Esiae nye Yuda-to la ƒe domenyinu le woƒe ƒomewo nu.
21 Du siwo le Yuda-to la ƒe mlɔenu le Edom ƒe liƒo dzi le anyiehe la woe nye Kabzeel, Eder, Yagur, 
22 Kina, Dimona, Adada, 23 Kedes, Hazor, Yitnan, 
24 Zif, Telem, Bealot, 
25 Hazor-Hadata, Keriot-Hezron, si nye Hazor, 
26 Amam, Sema, Molada, 
27 Hazar-Gada, Hesmon, Bet-Pelet, 
28 Hazar-Sual, Beer-Seba, Biziotiya, 
29 Baala, Iyim, Ezem, 
30 Eltolad, Kesil, Horma, 
31 Ziklag, Madmana, Sansana, 
32 Lebaot, Silhim, Ayin kple Rimon—wo katã le du blaeve vɔ asieke hekpe ɖe woƒe kɔƒewo ŋu.
33 Du siwo le Sefela woe nye: Estaol, Zora, Asna, 34 Zanoa, En-Ganim, Tapua, Enam, 
35 Yarmut, Adulam, Soko, Azeka, 
36 Saarayim, Aditayim, Gedera kple Gederotayim—wole du wuiene hekpe ɖe woƒe kɔƒewo ŋu.
37 Zenan, Hadasa, Migdal-Gad, 
38 Dilean, Mizpe, Yokteel, 
39 Lakis, Bozkat, Eglon, 
40 Kabon, Lahmam, Kitlis, 
41 Gederot, Bet-Dagon, Naama kple Makeda: wole du wuiade hekpe ɖe woƒe kɔƒewo ŋu.
42 Libna, Eter, Asan, 
43 Yifta, Asna, Nezib, 
44 Keila, Akzib kple Maresa: wole du asieke hekpe ɖe woƒe kɔƒewo ŋu.
45 Ekron kple eŋu duwo kple kɔƒewo; 
46 tso Ekron ɖo ta ɣetoɖoƒe gome, teƒe siwo katã le Asdod ŋu kple woƒe kɔƒewo.
47 Asdod, eŋu duwo kple kɔƒewo; Gaza, eŋu duwo kple kɔƒewo va ɖo Egipte-tɔʋu la gbɔ, kple Ƒu Gã la kple eƒe nutoa.
48 Du siwo le tonuto la me woe nye Samir, Yatir, Soko, 
49 Dana, Kiriat-Sana, si nye Debir, 
50 Anab, Estemo, Anim, 51 Gosen, Holon kple Gilo—wole du wuiɖekɛ hekpe ɖe woƒe kɔƒewo ŋu.
52 Arab, Duma, Esan, 
53 Yanim, Bet-Tapua, Afeka, 
54 Humta, Kiriat-Arba, si nye Hebron, kple Zior: wole du asieke hekpe ɖe woƒe kɔƒewo ŋu.
55 Maon, Karmel, Zif, Yuta, 
56 Yezreel, Yokdeam, Zanoa, 
57 Kain, Gibea kple Timna—wole du ewo hekpe ɖe woƒe kɔƒewo ŋu.
58 Halhul, Bet-Zur, Gedor, 
59 Maarat, Bet-Anot kple Eltekon—wole du ade hekpe ɖe woƒe kɔƒewo ŋu.
60 Kiriat-Baal, si nye Kiriat-Yearim, kple Raba—wole du eve hekpe ɖe woƒe kɔƒewo ŋu.
61 Du siwo le gbedzi la woe nye: Bet-Araba, Midin, Sekaka, 
62 Nibsan, Dzedu la kple En-Gedi—wole du ade hekpe ɖe woƒe kɔƒewo ŋu.
63 Ke Yuda ŋutsuwo mete ŋu nya Yebusitɔ siwo le Yerusalem la ɖa o; eye Yebusitɔwo kpɔtɔ le Yuda viwo dome le Yerusalem va se ɖe egbe.

Yosua 16
1 Anyigba si wona Yosef ƒe dzidzimeviwo la tso Yordan nu le Yeriko yi ɖe Yeriko-tɔ la nu le ɣedzeƒe, eye wòva to gbegbe si le Yeriko ŋgɔ heyi Betel tonuto la me. 
2 Etso Betel si le Luz, eye wòmlo to Atarot, si nye Arkitɔwo ƒe liƒo la ŋu, 
3 eye wòɖiɖi to ɣetoɖoƒe gome yi Yaflettɔwo ƒe liƒo dzi va se ɖe keke Anyigbe Bet-Horon kple Gezer ƒe liƒo dzi ke, eye wòva wu nu ɖe ƒu la nu.
4 Ale Yosef ƒe dzidzimevi siwo nye Manase kple Efrayim xɔ woƒe anyigba. 
5 Efrayim ƒe dzidzimeviwo ƒe liƒo lae nye esi le woƒe ƒomewo nu: Woƒe anyigba ƒe liƒo le ɣedzeƒe gomee nye Atarot-Adar va se ɖe keke Dzigbe Bet-Horon ke, 
6 eye liƒo la tso afi ma yi ƒu la nu. Mikmetat le eƒe dziehe, eye liƒo la gɔdɔ̃ to ɣedzeƒe gome yi Taanat-Silo heto ɣedzeƒe gome yi Yanoa. 
7 Eɖiɖi tso Yanoa va to Atarot kple Naara, yi Yeriko heva do ɖe Yordan nu. 
8 Liƒo la tso Tapua le ɣetoɖoƒe gome va ɖo Kana-tɔʋu la me, eye wòva wu nu ɖe ƒu la nu. Esiae nye Efrayim-to la ƒe domenyinu le woƒe ƒomewo nu; 
9 hekpe ɖe du aɖewo kple wo ŋu kɔƒe siwo wotsɔ na Efrayim ƒe dzidzimeviwo le Manase viwo ƒe domenyinu dome la ŋu.
10 Gake womenya Kanaantɔ siwo le Gezer la ɖa o, eye Kanaantɔwo le Efrayim va se ɖe egbe sia, eye wona wozu dzizizidɔwɔlawo na wo.

Yosua 17
1 Eye wona anyigba Manase-to la, elabena eyae nye Yosef ƒe ŋgɔgbevi. Esi wònye aʋamee Makir, Manase ƒe ŋgɔgbevi, ame si nye Gilead fofo, nye ta la, wotsɔ Gilead kple Basan nɛ. 
2 Eye wona anyigba Manase ƒe dzidzimevi siwo kpɔtɔ la le woƒe ƒomewo nu, woawoe nye Abi-Ezer viwo, Helek viwo, Asriel viwo, Sekem viwo, Hefer viwo kple Semida viwo. Esiawoe nye Yosef vi Manase ƒe dzidzimeviwo, woƒe ŋutsuwo le woƒe ƒomewo nu. 
3 Ke Zelofehad, Hefer vi, si nye Gilead vi, Makir vi, Manase vi medzi ŋutsuvi aɖeke o, negbe nyɔnuviwo ko, eye vianyɔnuawo ŋkɔwoe nye: Mahla, Noa, Hogla, Milka kple Tirza. 
4 Eya ta wova nunɔla Eleazar kple Yosua, Nun vi la, kpakple tatɔwo ŋkume, gblɔ be: “Afetɔ de se na Mose be wòana domenyinu mí ɖe mía nɔviŋutsuwo dome.” Eya ta ena domenyinu wo ɖe wo fofo nɔviŋutsuwo dome abe ale si Afetɔ de see ene.
5 Manase xɔ akpa ewo hekpe ɖe Gilead-nyigba kple Basan-nyigba, si le Yordan ƒe go kemɛ dzi la ŋu, 
6 elabena Manase vinyɔnuwo hã xɔ domenyinu kpe ɖe viaŋutsuwo ŋu, eye Gilead-nyigba la zu Manase viŋutsu siwo susɔ la tɔ.
7 Manase ƒe liƒo la tso Aser yi Mikmetat, si dze ŋgɔ Sekem, eye liƒo la tso afi ma yi anyiehe va ɖo En-Tapuatɔwo ƒe anyigba dzi. 
8 Tapua-nyigba la zu Manase tɔ, gake Tapua-du si le Manase ƒe liƒo dzi la nye Efrayim viwo tɔ. 
9 Eye liƒo la ɖiɖi yi Kana-tɔʋu la me le tɔʋua ƒe anyiehe. Efrayim ƒe du aɖewo le Manase ƒe duwo dome, eye Manase ƒe liƒo la le tɔʋua ƒe dziehe, eye wòva wu nu ɖe ƒua nu. 
10 Anyiehe gome nye Efrayim tɔ, eye dziehe gome nye Manase tɔ, ƒu lae nye liƒo nɛ, Manase do liƒo kple Aser le dziehe, eye wodo liƒo kple Isakar le ɣedzeƒe.
11 Le Isakar kple Aser ƒe anyigbawo dzi la, wona du aɖewo Manase, woawoe nye Bet-Sean kple eŋu duwo, Yibleam kple eŋu duwo, Dortɔwo kple woƒe duwo, En-Dortɔwo kple woƒe duwo, Taanaktɔwo kple woƒe duwo, kpakple Megidotɔwo kple woƒe duwo; eye woawoe nye togbɛnuto etɔ̃awo.
12 Gake Manase ƒe dzidzimeviwo mete ŋu xɔ du siawo o; Kanaantɔwo do dzi nɔ anyigba sia dzi kpiŋ. 
13 Gake esi ŋusẽ va ɖo Israel-viwo ŋu la, wozi Kanaantɔwo dzi wowɔ dɔ sesẽ, negbe ɖeko womenya wo ɖa keŋkeŋ o.
14 Yosef ƒe dzidzimeviwo bia Yosua be: “Nu ka ta nèna anyigba dzidze ɖeka ko mí be wòanye míaƒe domenyinu? Evɔ míesɔ gbɔ, eye Afetɔ yra mí va se ɖe fifia.” 
15 Yosua ɖo eŋu na wo be: “Ne miesɔ gbɔ nenema gbegbe la, ekema miyi Perizitɔwo kple Refaimtɔwo ƒe anyigba dzi, eye miƒo aveawo ɖa le afi ma ne woazu mia tɔ, le esi Efrayim tonuto la xaxa na mi akpa ta.” 
16 Eye Yosef ƒe dzidzimeviwo gblɔ be: “Tonuto la mede mía nu o, gake aʋatasiaɖam siwo ƒe afɔtiwo ŋu lãnuwo le la le Kanaantɔ siwo katã le balia me la si; wole ame siwo le Bet-Sean kple eŋu duwo me kple ame siwo le Yezreel Bali me la siaa si.” 
17 Eya ta Yosua gblɔ na Yosef ƒe aƒe la, si nye Efrayim kple Manase be: “Miesɔ gbɔ, eye ŋusẽ geɖe le mia ŋu. Menye anyigba dzidze ɖeka koe wòle be miaxɔ o, 
18 ke boŋ tonuto la hã azu mia tɔ. Togbɔ be enye ave hã la, miaƒoe eye wòazu miaƒe anyigba la ƒe nuwuƒe. Elabena ele be mianya Kanaantɔwo ɖa, togbɔ be aʋatasiaɖam siwo ƒe afɔtiwo ŋu lãnuwo le la le wo si, eye wosesẽ hã.”

Yosua 18
1 Israel ƒe ha blibo la katã va ƒo ƒu ɖe Silo, eye wotu takpegbadɔ ɖe afi ma, elabena woɖu anyigba la dzi keŋ le wo ŋgɔ. 
2 Gake Israel-viwo ƒe to adre gasusɔ siwo mexɔ woƒe domenyinu haɖe o. 
3 Eya ta Yosua gblɔ na Israel-viwo be: “Ɣekaɣie mialala ase ɖo hafi ayi aɖaxɔ anyigba si Afetɔ mia tɔgbuiwo ƒe Mawu tsɔ na mi? 
4 Mitia ŋutsu etɔ̃ tso to sia to me, ne madɔ wo; woayi aɖatsa le anyigba la dzi, ne woatae ɖe agbalẽ dzi le woƒe domenyinuwo nu. Emegbe woatrɔ ava gbɔnye. 
5 Ele be woamae ɖe akpa adre me ɖe wo nɔewo dome. Yuda akpɔtɔ anɔ eƒe anyigba dzi le anyiehe, eye Yosef ƒe aƒe la akpɔtɔ anɔ woƒe anyigba dzi le dziehe. 
6 Ke miawo la, mima anyigba la ɖe akpa adre me ɖe agbalẽ dzi miatsɔ vɛ nam le afii, eye madzidze nu ɖe edzi na mi le Afetɔ mía Mawu la ŋkume. 
7 Lewi viwo mexɔ anyigba aɖeke le mia dome o, elabena Afetɔ ƒe nunɔladɔ lae nye woƒe domenyinu; Gad kple Ruben kpakple Manase-to afã la xɔ woƒe domenyinu, si Afetɔ ƒe subɔla Mose na wo la, ɖe Yordan ƒe ɣedzeƒe gome.”
8 Ŋutsuawo dzra ɖo be yewoadze mɔ, ke Yosua de se na ame siwo yina anyigba la ta ge la be: “Miyi ɖatsa le anyigba la dzi, mitae ɖe agbalẽ dzi, emegbe miatrɔ va gbɔnye, eye madzidze nu ɖe edzi na mi le afi sia le Afetɔ ŋkume le Silo.” 
9 Ale ŋutsuawo yi ɖatsa le anyigba la dzi, eye wotae hemae ɖe akpa adre me le woƒe duwo nu ɖe agbalẽ dzi. Emegbe wogbugbɔ va Yosua gbɔ le asaɖa la me le Silo. 
10 Eye Yosua dzidze nu ɖe edzi na wo le Silo le Afetɔ ŋkume. Yosua ma anyigba la na Israel-viwo le afi ma wotɔwotɔwoe.
11 Nudzidze gbãtɔ dze Benyamin-to la dzi le woƒe ƒomewo nu, eye anyigba si woxɔ le nudzidzea nu la le Yuda viwo kple Yosef viwo tɔwo dome. 
12 Le dziehekpa dzi la, liƒo la dze egɔme tso Yordan nu, eye wòyi ɖato Yeriko ƒe aga ŋu le dziehe heto to la dzi le ɣetoɖoƒe gome, eye wòva do ɖe Bet-Aven gbedzi. 
13 Eye liƒo la tso afi ma yi ɖado ɖe Luz, le Luz si wogayɔna be Betel la ƒe aga ŋu le anyiehekpa dzi; liƒo la yi ɖato Atarot-Adar le to si le Anyigbe Bet-Horon ƒe anyiehe la tame. 
14 Le ɣetoɖoƒekpa dzi la, liƒo la gɔdɔ̃ ɖo ta anyiehe tso to si dze ŋgɔ Bet-Horon le anyiehe la gbɔ; eye wòva wu nu ɖe Kiriat-Baal, si wogayɔna be Kiriat-Yearim, si nye Yuda du. Esiae nye ɣetoɖoƒeliƒo la.
15 Anyieheliƒo la dze egɔme tso Kiriat-Yearim ƒe mlɔenu, liƒo la ɖo ta ɣetoɖoƒe gome; eye wòva do ɖe Neftoa-tsidzɔƒe gbɔ. 
16 Liƒo la ɖiɖi va do ɖe to si dze ŋgɔ Hinom Vi Ƒe Bali, si le Refaim Balia ƒe dziehe gome la ƒe mlɔenu, eye wòɖiɖi va Hinom Bali la me va to Yebusitɔwo ƒe to la ƒe aga ŋu le anyiehe heva do ɖe En-Rogel. 
17 Eye liƒo la yi ɖato dziehe gome va do ɖe En-Semes va ɖo Gelilot, si dze ŋgɔ Adumim-todzimɔ, eye wòɖiɖi va ɖo Ruben vi Bohan ƒe kpe la gbɔ. 
18 Eye wòyi ɖado ɖe aga si le dziehekpa dzi le Araba ŋgɔ la ŋu, eye wòɖiɖi yi Araba. 
19 Eye liƒo la mlo to Bet-Hogla ƒe aga ŋu le dziehekpa dzi, eye wòva wu nu ɖe Dzeƒu la ƒe adɔ̃ si le dziehe le Yordan ƒe mlɔenu si le anyiehe la nu. Esiae nye anyieheliƒo la. 
20 Yordan ye nye eƒe liƒo le ɣedzeƒekpa dzi. Esiae nye Benyamin ƒe dzidzimeviwo ƒe domenyinu la ƒe liƒowo godoo va kpe le woƒe ƒomewo nu.
21 Benyamin-to la ƒe duwo le woƒe ƒomewo nu la woe nye: Yeriko, Bet-Hogla, kple Emek-Keziz, 
22 Bet-Araba, Zemarayim, Betel, 
23 Avim, Para, Ofra, 
24 Kefar-Amoni, Ofni kple Geba—wole du wuieve hekpe ɖe woƒe kɔƒewo ŋu.
25 Gibeon, Rama, Beerot, 
26 Mizpe, Kefira, Moza, 
27 Rekem, Yirpel, Tarala, 
28 Zela, Ha-Elef, Yebusi, si nye Yerusalem, Gibea kple Kiriat—wole du wuiene hekpe ɖe woƒe kɔƒewo ŋu.
Esiae nye Benyamin ƒe dzidzimeviwo ƒe domenyinu le woƒe ƒomewo nu.

Yosua 19
1 Azɔ nudzidze evelia dze Simeon dzi, eye Simeon-to la xɔ woƒe gome le woƒe ƒomewo nu. Eye woƒe domenyinu si woxɔ la le Yuda viwo tɔ me. 
2 Woƒe domenyinu la nye Beer-Seba, Seba, Molada, 
3 Hazar-Sual, Bala, Ezem, 
4 Eltolad, Betul, Horma, 
5 Ziklag, Bet-Markabot, Hazar-Susa, 
6 Bet-Lebaot kple Saruhen—wole du wuietɔ̃ hekpe ɖe woƒe kɔƒewo ŋu; 
7 Ayin, Rimon, Eter kple Asan—wole du ene hekpe ɖe woƒe kɔƒewo ŋu; 
8 kple kɔƒe siwo katã le du siawo ŋu godoo va kpe va se ɖe keke Baalat-Beer, si wogayɔna be anyiehe Rama la ke. Esiae nye Simeon-to la ƒe domenyinu le woƒe ƒomewo nu. 
9 Yuda ƒe anyigba la mee wona teƒe Simeon ƒe dzidzimeviwo ɖo wònye woƒe domenyinu, elabena Yuda-to la ƒe gome lolo na wo akpa. Eya ta Simeon ƒe dzidzimeviwo xɔ wo tɔ ɖe Yuda viwo ƒe domenyinu la me.
10 Azɔ nudzidze etɔ̃lia dze Zebulon dzi, eye woxɔ woƒe gome le woƒe ƒomewo nu, eye woƒe domenyinu la ƒe liƒo va ɖo keke Sarid ke. 
11 Eye woƒe liƒo la yi ɖato ɣetoɖoƒe gome yi Mareal va ɖo Dabeset, eye wòva do ɖe bali si le Yokneam ŋgɔ la me. 
12 Etso Sarid le ɣedzeƒe gome yi Kislot-Tabor ƒe liƒo dzi, eye wòva do ɖe Daberat heyi Yafia. 
13 Eye wòtso afi ma to ɣedzeƒe gome yi Gat-Hefer kple Et-Kazin, eye wòva ɖo Rimon heyi ɖado ɖe Nea. 
14 Liƒo la gɔdɔ̃ le dziehe yi Hanaton, eye wòva wu nu ɖe Yifta-El Bali la me, 
15 kpakple Katat, Nahalal, Simron, Yidala kple Betlehem—woƒe duawo katã le wuieve hekpe ɖe woƒe kɔƒewo ŋu. 
16 Esiae nye Zebulon ƒe dzidzimeviwo ƒe domenyinu, woƒe duwo hekpe ɖe woƒe kɔƒewo ŋu le woƒe ƒomewo nu.
17 Azɔ nudzidze enelia dze Isakar dzi, eye Isakar ƒe dzidzimeviwo xɔ woƒe gome le woƒe ƒomewo nu. 
18 Woƒe liƒo la to Yezreel, Kesulot, Sunem, 
19 Hafarayim, Sion, Anaharat, 
20 Rabit, Kision, Ebez, 
21 Remet, En-Ganim, En-Hada kple Bet-Pazez. 
22 Liƒo la va ɖo Tabor, Sahazuma kple Bet-Semes, eye woƒe liƒo la va wu nu ɖe Yordan nu—wole du wuiade hekpe ɖe woƒe kɔƒewo ŋu. 
23 Esiae nye Isakar-to la ƒe domenyinu, woƒe duwo hekpe ɖe woƒe kɔƒewo ŋu le woƒe ƒomewo nu.
24 Azɔ nudzidze atɔ̃lia dze Aser-to la dzi, eye woxɔ woƒe gome le woƒe ƒomewo nu. 
25 Woƒe liƒo la to Helkat, Hali, Beten, Aksaf, 
26 Alamelek, Amad kple Misal. Eye wòva ɖo Karmel kple Sihor-Libnat le ɣetoɖoƒe gome, 
27 etrɔ ɖo ta ɣedzeƒe yi Bet-Dagon, eye wòva do ɖe Zebulon kple Yifta-El Bali la ƒe dziehe, yi Bet-Emek kple Neiel, eye wòva do ɖe Kabul ƒe miame, 
28 va to Ebron, Rehob, Hamon kple Kana va se ɖe keke Sidon Gã la ke. 
29 Liƒo la trɔ to Rama va ɖo keke Tiro du sesẽ la gbɔ ke. Eye liƒo la trɔ ɖo ta Hosa, eva wu nu ɖe ƒutanuto me afi si Akzib, 
30 Uma, Afek kple Rehob le—wole du blaeve vɔ eve hekpe ɖe woƒe kɔƒewo ŋu. 
31 Esiae nye Aser-to la ƒe domenyinu, woƒe duwo hekpe ɖe woƒe kɔƒewo ŋu le woƒe ƒomewo nu.
32 Nudzidze adelia dze Naftali ƒe dzidzimeviwo dzi, eye Naftali ƒe dzidzimeviwo xɔ woƒe gome le woƒe ƒomewo nu. 
33 Woƒe liƒo la tso Helef, tso ati gã si le Zaananim gbɔ, heto Adami-Nekeb, Yabneel va se ɖe keke Lakum ke, eye wòva wu nu ɖe Yordan nu. 
34 Liƒo la trɔ le ɣetoɖoƒe gome yi Aznot-Tabor, etso afi ma va do ɖe Hukok heyi Zebulon le anyiehe, eye wòyi Aser le ɣetoɖoƒe ɖado ɖe Yuda le Yordan nu le ɣedzeƒe gome. 
35 Woƒe du sesẽwoe nye Zidim, Zer, Hamat, Rakat, Kineret, 
36 Adama, Rama, Hazor, 
37 Kedes, Edrei, En-Hazor, 
38 Yiron, Migdal-El, Horem, Bet-Anat kple Bet-Semes—wole du wuiasieke hekpe ɖe woƒe kɔƒewo ŋu. 
39 Esiae nye Naftali-to la ƒe domenyinu, woƒe duwo hekpe ɖe woƒe kɔƒewo ŋu le woƒe ƒomewo nu.
40 Azɔ nudzidze adrelia dze Dan-to la dzi, eye woxɔ woƒe gome le woƒe ƒomewo nu. 
41 Eye woƒe domenyinu la ƒe liƒo to Zora, Estaol, Ir-Semes, 
42 Saalabin, Aiyalon, Yitla, 
43 Elon, Timna, Ekron, 
44 Elteke, Gibeton, Baalat, 
45 Yehud, Bene-Berak, Gat-Rimon, 
46 Me-Yarkon kple Rakon, eye liƒo la to Yopa ŋgɔ. 
47 Ke Dan ƒe anyigba la xaxa na wo akpa. Eya ta woyi ɖawɔ aʋa kple Lesem, eye wowu wo kple yi hexɔ du la. Woxɔe wòzu wo tɔ henɔ afi ma, eye wotrɔ ŋkɔ na Lesem dua be Dan, si nye wo tɔgbui Dan ƒe ŋkɔ. 
48 Esiae nye Dan-to la ƒe domenyinu, woƒe duwo hekpe ɖe woƒe kɔƒewo ŋu le woƒe ƒomewo nu.
49 Ale woma anyigba la vɔ keŋ wòzu woƒe domenyinu. Eye Israel-viwo na domenyinu Yosua, Nun vi la, ɖe wo dome. 
50 Wotsɔ du si nye Timna-Sera si wòbia la nɛ le Efrayim tonuto la me abe ale si Afetɔ de see ene; egbugbɔ du la tso henɔ eme.
51 Esiawoe nye domenyinu siwo dzi nunɔla Eleazar kple Yosua, Nun vi, kpakple Israel-viwo ƒe tatɔ siwo le wo fofowo ƒe aƒekɔwo nu dzidze nu ɖo hema be woaxɔ le Silo le Afetɔ ŋkume, le takpegbadɔ la ƒe mɔnu. Ale wowu anyigba la mama nu.

Yosua 20
1 Azɔ Afetɔ gblɔ na Yosua be: 
2 “Gblɔ na Israel-viwo be: ‘Mitia sitsoƒedu siwo ŋu nya megblɔ na mi to Mose dzi la na mia ɖokuiwo, 
3 ale be ame si meɖoe alo nya hafi wu ame o la nasi ayi afi ma. Eye woanye sitsoƒe na mi tso hlɔ̃biala si me. 
4 Ele be wòasi ayi du siawo dometɔ ɖeka me, eye wòatɔ ɖe dugbo la nu, ne wòagblɔ eƒe nya na dumemetsitsiawo woase. Eye woaxɔe ɖe du la me ahana teƒee wòanɔ wo gbɔ. 
5 Ne hlɔ̃biala la ti eyome va la, mele be woatsɔ amewula la ade asi nɛ o, elabena menya hafi wu ehavi o, eye melé fui tsã hã o. 
6 Ele be wòanɔ du ma me va se ɖe esime woadrɔ̃ ʋɔnui le ha la ŋkume, eye wòanɔ afi ma va se ɖe esime nunɔlagã si li ɣemaɣi la ku. Ekema amewula la ate ŋu agbugbɔ ayi du si me wòsi dzo le la me, ayi eƒe aƒe me le eƒe du me.’”
7 Eya ta woɖe Kedes le Galilea le Naftali tonuto la me, kple Sekem le Efrayim tonuto la me, kple Kiriat-Arba, si nye Hebron, le Yuda tonuto la me be woanye du kɔkɔewo. 
8 Le Yordan nutoa me le Yeriko ƒe ɣedzeƒe la, wotia Bezer si le gbedzi le tonyigba gbadza la dzi tso Ruben-to la me, kple Ramot si le Gilead la tso Gad-to la me, kpakple Golan si le Basan la tso Manase-to la me.
9 Du siawoe wotia na Israel-viwo katã kple amedzro siwo katã le wo dome, ale be ame sia ame si meɖoe hafi wu ame o la nasi ayi afi ma, ne hlɔ̃biala la nagawui o, va se ɖe esime wodrɔ̃ ʋɔnui le ha la ŋkume.

Yosua 21
1 Azɔ Lewi viwo ƒe tatɔ siwo le wo fofowo ƒe aƒekɔwo nu va nunɔla Eleazar kple Yosua, Nun vi la, kpakple Israel-toawo ƒe tatɔ siwo le wo fofowo ƒe aƒekɔwo nu la gbɔ, 
2 eye wogblɔ na wo le Silo le Kanaan-nyigba dzi be: “Afetɔ de se to Mose dzi be woatsɔ du aɖewo ana mí míanɔ wo me hekpe ɖe wo ŋu lãnyiƒewo ŋu na míaƒe lãwo.” 
3 Eya ta Israel-viwo tsɔ duawo kple wo ŋu lãnyiƒewo na Lewi viwo tso woƒe domenyinu me le Afetɔ ƒe sedede la nu.
4 Azɔ nudzidze la dze Kohat viwo ƒe ƒomewo dzi, eye wotsɔ du wuietɔ̃ na nunɔla Aron vi siwo nye Lewi viwo la tso Yuda-to, Simeon-to kple Benyamin-to la me le nudzidze la nu.
5 Wotsɔ du ewo na Kohat vi mamlɛawo tso Efrayim-to, Dan-to, kple Manase-to afã la ƒe ƒomeawo me.
6 Wotsɔ du wuietɔ̃ na Gerson viwo tso Isakar-to, Aser-to, Naftali-to, kple Manase-to afã si le Basan la ƒe ƒomeawo me.
7 Wotsɔ du wuieve na Merari viwo le woƒe ƒomewo nu tso Ruben-to, Gad-to kple Zebulon-to la me.
8 Ale Israel-viwo dzidze nu tsɔ du siawo kple wo ŋu lãnyiƒewo na Lewi viwo, abe ale si tututu Afetɔ de se to Mose dzi ene.
9 Eya ta woɖe du siwo gbɔna la tso Yuda-to kple Simeon-to la me, 
10 eye wotsɔ wo na Aron viwo, ame siwo tso Kohat-ƒomeawo me le Lewi viwo dome la, elabena woawo dzie nudzidze la dze gbã. 
11 Wotsɔ Kiriat-Arba (Arba ye nye Anak fofo) si nye Hebron na wo le Yuda tonuto la me, kple eŋu lãnyiƒewo. 
12 Ke wotsɔ agbledenyigba si le du la ŋu kple eƒe kɔƒewo na Kaleb, Yefune vi wòzu etɔ.
13 Eye du si wotsɔ na nunɔla Aron viwoe nye: Hebron, si nye sitsoƒedu na amewula kple eŋu lãnyiƒe, Libna kple eŋu lãnyiƒe, 
14 Yatir kple eŋu lãnyiƒe, Estemoa kple eŋu lãnyiƒe, 
15 Holon kple eŋu lãnyiƒe, Debir kple eŋu lãnyiƒe, 
16 Ayin kple eŋu lãnyiƒe, Yuta kple eŋu lãnyiƒe, kpakple Bet-Semes kple eŋu lãnyiƒe—wole du asieke tso to eve siawo me.
17 Le Benyamin-toa me la, woxɔ Gibeon kple eŋu lãnyiƒe, Geba kple eŋu lãnyiƒe, 
18 Anatot kple eŋu lãnyiƒe, Almon kple eŋu lãnyiƒe—wole du ene.
19 Eye du siwo katã wotsɔ na nunɔla Aron ƒe dzidzimeviwo le du wuietɔ̃ kple wo ŋu lãnyiƒewo.
20 Le Kohat viwo ƒe ƒome mamlɛa, siwo hã nye Lewi viwo gome la, wodzidze nu tsɔ duwo na wo tso Efrayim-to la me. 
21 Ale wotsɔ Sekem si nye sitsoƒedu na amewula kple eŋu lãnyiƒe na wo le Efrayim tonuto la me, Gezer kple eŋu lãnyiƒe, 
22 Kibzaim kple eŋu lãnyiƒe, kpakple Bet-Horon kple eŋu lãnyiƒe—wole du ene.
23 Le Dan-toa me la, woxɔ Elteke kple eŋu lãnyiƒe, Gibeton kple eŋu lãnyiƒe, 
24 Aiyalon kple eŋu lãnyiƒe, Gat-Rimon kple eŋu lãnyiƒe—wole du ene.
25 Le Manase-to afã la me la, woxɔ Taanak kple eŋu lãnyiƒe, kpakple Gat-Rimon kple eŋu lãnyiƒe—wole du eve.
26 Duawo katã kple wo ŋu lãnyiƒe siwo wotsɔ na Kohat viwo ƒe ƒome mamlɛawo la le du ewo.
27 Du siwo Gerson viwo, ame siwo tso Lewi viwo ƒe ƒomeawo me, xɔ tso Manase-to afã la mee nye: Golan le Basan si nye sitsoƒedu na amewula kple eŋu lãnyiƒe, kpakple BeESTAa kple eŋu lãnyiƒe—wole du eve.
28 Le Isakar-toa me la, woxɔ Kision kple eŋu lãnyiƒe, Daberat kple eŋu lãnyiƒe, 
29 Yarmut kple eŋu lãnyiƒe, kpakple En-Ganim kple eŋu lãnyiƒe—wole du ene.
30 Le Aser-toa me la, woxɔ Misal kple eŋu lãnyiƒe, Abdon kple eŋu lãnyiƒe, 
31 Helkat kple eŋu lãnyiƒe, kpakple Rehob kple eŋu lãnyiƒe—wole du ene.
32 Le Naftali-toa me la, woxɔ Kedes le Galilea si nye sitsoƒedu na amewula kple eŋu lãnyiƒe, Hamot-Dor kple eŋu lãnyiƒe, kpakple Kartan kple eŋu lãnyiƒe—wole du etɔ̃.
33 Gerson viwo ƒe duwo katã le woƒe ƒomewo nu le du wuietɔ̃ kple wo ŋu lãnyiƒewo.
34 Le Zebulon-toa me la, Merari viwo ƒe ƒomewo, ame siwo nye Lewi vi mamlɛawo, xɔ Yokneam kple eŋu lãnyiƒe, Karta kple eŋu lãnyiƒe, 
35 Dimna kple eŋu lãnyiƒe, kpakple Nahalal kple eŋu lãnyiƒe—wole du ene.
36 Le Ruben-toa me la, woxɔ Bezer kple eŋu lãnyiƒe, Yahaz kple eŋu lãnyiƒe, 
37 Kedemot kple eŋu lãnyiƒe, kpakple Mefaat kple eŋu lãnyiƒe—wole du ene.
38 Le Gad-toa me la, woxɔ Ramot le Gilead si nye sitsoƒedu na amewula kple eŋu lãnyiƒe, Mahanayim kple eŋu lãnyiƒe, 
39 Hesbon kple eŋu lãnyiƒe, kpakple Yazer kple eŋu lãnyiƒe—wo katã le du ene.
40 Du siwo katã wotsɔ na Merari-ƒomeawo, siwo nye Lewi viwo ƒe ƒome mamlɛawo la, le du wuieve.
41 Lewi viwo ƒe du siwo katã le Israel-viwo ƒe anyigba dzi la le du blaene vɔ enyi kple wo ŋu lãnyiƒewo. 
42 Lãnyiƒe le du siawo dometɔ ɖe sia ɖe ŋu; aleae du siawo dometɔ ɖe sia ɖe le.
43 Ale Afetɔ tsɔ anyigba blibo la katã na Israel abe ale si wòka atam na wo tɔgbuiwo ene, eye woxɔe henɔ edzi. 
44 Eye Afetɔ na gbɔdzɔe wo godoo va kpe, abe ale si wòka atam na wo tɔgbuiwo ene, eye woƒe futɔwo katã dometɔ ɖeka pɛ hã mete ŋu nɔ te ɖe wo nu o. Afetɔ tsɔ woƒe futɔwo katã de asi na wo. 
45 Ŋugbe nyui siwo katã Afetɔ do na Israel ƒe aƒe la dometɔ ɖeka hɔ̃ hã medo kpo emevava o; wo katã va eme.

Yosua 22
1 Yosua yɔ Ruben viwo kple Gad viwo kpakple Manase-to afã la, 
2 eye wògblɔ na wo be: “Miewɔ nu siwo katã ƒe se Mose, Afetɔ ƒe subɔla, de na mi la dzi, eye mieɖo to nye gbe le nu siwo katã ƒe se mede na mi la me. 
3 Miegblẽ mia nɔviwo ɖi le ɣeyiɣi siawo katã me va se ɖe egbe sia o, eye miewɔ se si Afetɔ mia Mawu de na mi la dzi. 
4 Ke azɔ Afetɔ mia Mawu la na gbɔdzɔe mia nɔviwo, abe ale si tututu wòdo ŋugbe na wo ene. Eya ta azɔ miate ŋu atrɔ ayi miaƒe agbadɔwo me le anyigba si Mose, Afetɔ ƒe subɔla, tsɔ na mi le Yordan ƒe go kemɛ dzi be wòazu mia tɔ la dzi. 
5 Ðeko mikpɔ nyuie, be miawɔ ɖoɖo kple Se siwo Mose, Afetɔ ƒe subɔla, de na mi la dzi, ahalɔ̃ Afetɔ mia Mawu la, azɔ le eƒe mɔwo katã dzi, alé eƒe sededewo me ɖe asi, aku ɖe eŋu, eye miasubɔe kple dzi blibo kpakple luʋɔ blibo.”
6 Azɔ Yosua yra wo heɖe asi le wo ŋu, eye wodzo yi woƒe agbadɔwo me. 
7 Mose na domenyinu Manase-to afã la le Basan, eye Yosua na anyigba to la ƒe afã mamlɛa kpe ɖe wo nɔviwo ŋu le Yordan ƒe ɣetoɖoƒe. Esi Yosua ɖe asi le wo ŋu be woayi woƒe agbadɔwo me la, eyra wo 
8 hegblɔ na wo be: “Mitsɔ kesinɔnu geɖewo kple lãha gbogbowo, klosalo, sika, akɔbli, gayibɔ kple awu geɖewo fũu ne miagbugbɔ ayi miaƒe agbadɔwo me. Eye mima miaƒe futɔwo ƒe aboyonuwo kple mia nɔviwo.”
9 Emegbe Ruben viwo kple Gad viwo kpakple Manase-to afã la dzo le Israel-vi bubuawo gbɔ le Silo, le Kanaan-nyigba dzi, hetrɔ yi Gilead-nyigba si woxɔ henɔ edzi le se si Afetɔ de to Mose dzi nu la dzi. 
10 Esi Ruben viwo kple Gad viwo kpakple Manase-to afã la va ɖo Yordan nutowo me le Kanaan-nyigba dzi la, woɖi vɔsamlekpui ɖe Yordan nu, enye vɔsamlekpui gã aɖe ŋutɔ. 
11 Emegbe Israel-vi bubuawo see, eye wogblɔ be: “Mikpɔ ɖa! Ruben viwo kple Gad viwo kpakple Manase-to afã la ɖi vɔsamlekpui ɖe Kanaan-nyigba la ƒe liƒo dzi le Yordan nutowo me, le eƒe go si nye Israel-viwo tɔ la dzi.” 
12 Esi Israel-viwo see la, Israel-viwo ƒe ha blibo la va kpe ta ɖe Silo be yewoawɔ aʋa kpli wo.
13 Eye Israel-viwo dɔ Finehas, nunɔla Eleazar vi, ɖo ɖe Ruben viwo, Gad viwo kple Manase-to afã la le Gilead-nyigba dzi, 
14 eye tatɔ ewo kpe ɖe eŋu, tatɔ ɖeka tso Israel-toawo ƒe aƒekɔ ɖe sia ɖe me, wo dometɔ ɖe sia ɖe nye wo fofowo ƒe aƒekɔ ƒe tatɔ le Israel-viwo ƒe ame akpeawo dome. 
15 Esi wova ɖo Ruben viwo, Gad viwo kple Manase-to afã la gbɔ le Gilead-nyigba dzi la, wogblɔ na wo be:
16 “Ale Afetɔ ƒe ha blibo la katã gblɔe nye esi: ‘Anukwaremaɖimaɖinu kae nye esi miewɔ ɖe Israel ƒe Mawu la ŋu? Mietrɔ le Afetɔ yome egbea esi mieɖi vɔsamlekpui na mia ɖokui eye miedze aglã ɖe Afetɔ ŋu. 
17 Ðe vo si míeda le Peor la mesɔ gbɔ na mí oa? Míeklɔe ɖa le mía ɖokui ŋu vɔ o va se ɖe egbe, togbɔ be dɔvɔ̃ va Afetɔ ƒe ha la dzi hã. 
18 Eye miagatrɔ ɖa le Afetɔ yome egbea! Ne miedze aglã ɖe Afetɔ ŋu egbea la, ekema Israel ƒe ha blibo la katã ŋue wòava do dziku ɖo etsɔ. 
19 Ke nenye be anyigba si miexɔ wòzu mia tɔ la ŋue mekɔ o la, ekema mitso tɔ va anyigba si nye Afetɔ tɔ la dzi, afi si Afetɔ ƒe avɔgbadɔ la le, ne mianɔ mía dome, gake ɖeko migaɖi vɔsamlekpui aɖeke kpe ɖe Afetɔ, mía Mawu la, ƒe vɔsamlekpui ŋu ahadze aglã ɖe Afetɔ ŋu, eye miana míazu aglãdzelawo o. 
20 Esi Akan, Zera vi la, meɖi anukware le nu siwo wòle be woatsrɔ̃ gbidigbidi la me o la, menye Israel ƒe ha blibo la katã ŋue wodo dziku ɖo oa? Eye menye eya ɖeka koe ku le eƒe vodada ta o.’”
21 Eye Ruben viwo, Gad viwo kple Manase-toa ƒe afã la ɖo eŋu na Israel ƒe ame akpewo ƒe tatɔawo be: 
22 “Afetɔ, mawuwo dzi Mawu! Afetɔ, mawuwo dzi Mawu! Enyae, eye Israel hã anyae. Afetɔ, ne aglãe míedze, eye míewɔ nuteƒe na wò o la, ekema mègaxɔ na mí egbea o. 
23 Ne ɖe míeɖi vɔsamlekpui na mía ɖokuiwo, be míatrɔ le Afetɔ yome, ne míasa numevɔwo, nuɖuvɔwo kple ŋutifafavɔwo le edzi la, Afetɔ ahe to na mí. 
24 Gake kpao, susu bubu aɖe tae míewɔ nu sia ɖo, elabe míegblɔ be: ‘Mia viwo ava gblɔ na mía viwo gbe aɖe gbe be: “Nya kae le mi kple Afetɔ, Israel ƒe Mawu la dome? 
25 Afetɔ tsɔ Yordan do liƒo na míawo kpakple mi Ruben viwo kple Gad viwo. Gome aɖeke mele mia si le Afetɔ gbɔ o.” Ale mia viwo axe mɔ na mía viwo be woagasubɔ Afetɔ o.’
26 “Eya tae míegblɔ be: ‘Mina míawɔ nane godoo, míaɖi vɔsamlekpui, menye le numevɔwo alo vɔ bubuwo sasa ta o, 
27 ke boŋ be wòanye ɖase le míawo kpli miawo kpakple míaƒe dzidzimevi siwo ava ɖe mía yome la dome, be míasa míaƒe numevɔwo, míaƒe vɔ bubuwo kple míaƒe ŋutifafavɔwo ahasubɔ le Afetɔ ŋkume, ne mia viwo magava gblɔ na mía viwo gbe aɖe gbe be: “Gome aɖeke mele mia si le Afetɔ gbɔ o.”’ 
28 Eya ta míegblɔ be: ‘Ne woava gblɔ nya ma na míawo ŋutɔ kple míaƒe dzidzimeviwo gbe aɖe gbe la, ekema míawo hã míagblɔ be: “Mikpɔ Afetɔ ƒe vɔsamlekpui tɔgbi si mía fofowo ɖi la ɖa, menye le numevɔwo alo vɔ bubuwo sasa ta o, ke boŋ be wòanye ɖase le míawo kpli miawo dome.”’ 
29 Nede megbe xaa tso mía gbɔ be míadze aglã ɖe Afetɔ ŋu, eye míatrɔ le Afetɔ yome egbea ahaɖi vɔsamlekpui bubu akpe ɖe Afetɔ mía Mawu ƒe vɔsamlekpui si le eƒe avɔgbadɔ ŋgɔ la ŋu hena numevɔ, nuɖuvɔ kple vɔ bubuwo sasa!”
30 Esi nunɔla Finehas, ha la ƒe tatɔ siwo kpe ɖe eŋu, siwo nye Israel ƒe ame akpewo ƒe tatɔwo, se nya siwo Ruben viwo, Gad viwo kple Manase viwo gblɔ la, edze wo ŋu. 
31 Eya ta Finehas, nunɔla Eleazar vi gblɔ na Ruben viwo, Gad viwo kple Manase viwo be: “Míenyae egbea be, Afetɔ le mía dome, elabena miewɔ anukwaremaɖimaɖinu aɖeke ɖe Afetɔ ŋu o. Azɔ mieɖe Israel-viwo tso Afetɔ si me.”
32 Eye Finehas, nunɔla Eleazar vi kple tatɔawo gbugbɔ tso Ruben viwo kple Gad viwo gbɔ le Gilead-nyigba dzi heva Kanaan-nyigba dzi, eye wogblɔ dɔgbedenyaa na Israel-vi bubuawo. 
33 Eye nya si wova gblɔ la dze Israel-viwo ŋu. Ale Israel-viwo kafu Mawu, eye womegagblɔ kpɔ be yewoaho aʋa ɖe Ruben viwo kple Gad viwo ŋu ahagblẽ anyigba si dzi wole la o.
34 Eye Ruben viwo kple Gad viwo na ŋkɔ vɔsamlekpuia hegblɔ be: “Enye ɖase le mía dome be, Afetɔe nye Mawu vavã la.”

Yosua 23
1 Le ƒe geɖe megbe, esi Afetɔ na gbɔdzɔe Israel tso eƒe futɔ siwo ƒo xlãe godoo si me vɔ, eye Yosua tsi xɔ ƒe geɖe la, 
2 Yosua yɔ Israel blibo la katã, eƒe ametsitsiwo, tatɔwo, ʋɔnudrɔ̃lawo kple dzikpɔlawo, eye wògblɔ na wo be: “Metsi ku amegã xɔ ƒe geɖe. 
3 Miawo ŋutɔwo miekpɔ nu siwo katã Afetɔ mia Mawu wɔ dukɔ siawo katã le mia ta, elabena Afetɔ mia Mawue le aʋa wɔm na mi. 
4 Kpɔ ɖa, medzidze nu ɖe dukɔ siwo susɔ la ƒe anyigbawo dzi hema wo na mi wozu domenyinu na miaƒe toawo hekpe ɖe dukɔ siwo katã metsrɔ̃ le Yordan nu va se ɖe Ƒu Gã la nu le ɣetoɖoƒe la ƒe anyigbawo ŋuti. 
5 Afetɔ mia Mawue tutu wo ɖa le mia ŋgɔ henya wo ɖa na mi, eye miexɔ woƒe anyigba, abe ale si tututu Afetɔ mia Mawu do ŋugbe na mi ene.
6 “Azɔ ele be mialé dzi ɖe ƒo vevie, ne mialé nu siwo katã woŋlɔ ɖe Mose ƒe Segbalẽa me la me ɖe asi ahawɔ wo dzi, ne miagadze le eŋu ɖe ɖusime alo miame 
7 ahade ha kple dukɔ siawo, siwo kpɔtɔ le mia dome la gbeɖe o. Migayɔ woƒe mawuwo ŋkɔ alo atsɔ wo aka atam gɔ̃ hã o, eye migasubɔ wo alo ade ta agu na wo gbeɖe o. 
8 Ke boŋ miku ɖe Afetɔ mia Mawu la ŋu, abe ale si tututu miewɔe va se ɖe egbe sia ene. 
9 Afetɔ anya dukɔ gã sesẽwo ɖa le mia ŋgɔ, elabena ame aɖeke kura mete ŋu nɔ te ɖe mia nu va se ɖe egbe sia o. 
10 Mia dometɔ ɖeka pɛ anya ame akpe ɖe nu, elabena Afetɔ mia Mawu le aʋa wɔm na mi, abe ale si tututu wòdo ŋugbe na mi ene. 
11 Eya ta mikpɔ mia ɖokui dzi nyuie ɣesiaɣi ne mialɔ̃ Afetɔ mia Mawu la.
12 “Gake ne mietrɔ megbe heku ɖe dukɔ siawo me tɔ siwo kpɔtɔ le mia gbɔ la ŋu, eye miena srɔ̃ɖekadodo le mi kpli wo dome, miede ha kpli wo eye woawo hã wode ha kpli mi la, 
13 ekema minyae nyuie be Afetɔ mia Mawu mayi edzi anya dukɔ siawo ɖa na mi o. Woazu mɔ̃ kple kamɔ̃ aɖe mi, woazu abe ameƒoti ene anɔ axadame ƒom na mi, eye woanye ŋù anɔ ŋku dzi na mi va se ɖe esime mietsrɔ̃ vɔ keŋ le anyigba nyui sia si Afetɔ mia Mawu tsɔ na mi la dzi.
14 “Kpɔ ɖa, nye kuɣi ɖo, eye mienyae nyuie tso miaƒe dzi blibo kple luʋɔ blibo me be, nya ɖeka pɛ hã medo kpo emevava le ŋugbe nyui siwo katã Afetɔ mia Mawu do na mi la me o. Wo katã va eme na mi. Wo dometɔ ɖeka pɛ hã medo kpo emevava o. 
15 Gake ale si ko ŋugbe nyui siwo katã Afetɔ mia Mawu do na mi va eme na mi la, nenema kee Afetɔ ahe vɔ̃ siwo katã ƒe ŋugbe wòdo la ava mia dzi, eye wòatsrɔ̃ mi ɖa keŋkeŋ le anyigba nyui sia si Afetɔ mia Mawu tsɔ na mi la dzi. 
16 Ne mietu Afetɔ mia Mawu ƒe nu, si wòbla kpli mi, eye mieyi ɖasubɔ mawu bubuwo hede ta agu na wo la, ekema Afetɔ ƒe dziku afla ɖe mia ŋu, eye miatsrɔ̃ avɔ kaba ŋutɔ le anyigba nyui si wòtsɔ na mi la dzi.”

Yosua 24
1 Yosua ƒo Israel-toawo katã nu ƒu ɖe Sekem, eye wòyɔ Israel ƒe ametsitsiwo, tatɔwo, ʋɔnudrɔ̃lawo kple dzikpɔlawo, eye wova tsi tsitre ɖe Mawu vavã la ŋkume. 
2 Yosua gblɔ na dukɔ blibo la be: “Ale Afetɔ, Israel ƒe Mawu la, gblɔe nye esi: ‘Le blema la, Tɔsisi la ƒe go kemɛ dzie mia tɔgbuiwo nɔ—wo dometɔ ɖekae nye Tera, si nye Abraham kple Nahor fofo—eye wosubɔ mawu bubuwo.
3 “‘Emegbe mekplɔ mia tɔgbui Abraham tso Tɔsisi la ƒe go kemɛ dzi, mena wòtsa le Kanaan-nyigba blibo la dzi, eye mena eƒe dzidzimeviwo sɔ gbɔ. Metsɔ Isak nɛ, 
4 eye metsɔ Yakob kple Esau na Isak. Emegbe metsɔ Seir To la na Esau be wòazu etɔ; eye Yakob kple viawo yi Egipte. 
5 Emegbe medɔ Mose kple Aron, eye metsɔ nu siwo mewɔ le Egipte la wɔ fu dukɔ ma, eye mekplɔ mi dzoe. 
6 Esime mekplɔ mia fofowo tso Egipte gbɔna, eye mieva ɖo ƒua nu la, Egiptetɔwo ti mia fofowo yome kple aʋatasiaɖamwo kpakple sɔdolawo va ɖo keke Ƒudzĩ la nu ke. 
7 Wodo ɣli na Afetɔ, eye wòna viviti va nɔ mi kple Egiptetɔwo dome, ena ƒu la nyè tsyɔ wo dzi, eye miaƒe ŋkuwo kpɔ nu si mewɔ le Egipte. Eye mieva nɔ gbea dzi ƒe geɖe.
8 “‘Eye mekplɔ mi va Amoritɔ siwo nɔ Yordan ƒe go kemɛ dzi la ƒe anyigba dzi, eye wowɔ aʋa kpli mi. Gake metsɔ wo de asi na mi, ale be miete ŋu xɔ woƒe anyigba, eye metsrɔ̃ wo ɖa gbidigbidi le mia ŋgɔ. 
9 Eye Moab-fia Balak, Zipor vi, ho aʋa ɖe Israel ŋu. Eya ta edɔ woyi ɖayɔ Bileam, Beor vi vɛ, be wòaƒo fi ade mi. 
10 Gake nyemeɖo to Bileam o. Eya ta eyra mi enuenu, eye meɖe mi tso esi me.
11 “‘Emegbe mietso Yordan va Yeriko. Ke Yerikotɔwo ƒe kplɔlawo, Amoritɔwo, Perizitɔwo, Kanaantɔwo, Hititɔwo, Girgasitɔwo, Hivitɔwo kple Yebusitɔwo wɔ aʋa kpli mi, ke metsɔ wo de asi na mi. 
12 Eya ta mena dzi ɖe le amewo ƒo le mia ŋgɔ, eye esia nya wo ɖa le mia ŋgɔ abe ale si ko wonya Amoritɔwo ƒe fia eveawo ene. Ke menye wò yi kple wò da ye wɔ esia o. 
13 Ale metsɔ anyigba si ŋu mieku kutri aɖeke le o kple du siwo mietso o la na mi miele wo me. Waingble siwo miede o kple amitibɔ siwo mietso o la me nuwo ɖumee miele.’
14 “Eya ta mivɔ̃ Afetɔ, eye misubɔe le fɔmaɖimaɖi kple nuteƒewɔwɔ me, miɖe mawu siwo mia tɔgbuiwo subɔ le Tɔsisi la ƒe go kemɛ dzi kple Egipte la ɖa, eye misubɔ Afetɔ.
15 Ke ne medze mia ŋu be miasubɔ Afetɔ o la, ekema mitia ame si subɔ ge miala egbea, eɖanye mawu siwo mia tɔgbuiwo subɔ le Tɔsisi la ƒe go kemɛ dzi alo Amoritɔ siwo ƒe anyigba dzi miele la ƒe mawuwo o. Ke nye kple nye aƒe ya, míasubɔ Afetɔ.”
16 Eye dukɔ la ɖo eŋu be: “Madzɔ akpɔ gbeɖe be míagblẽ Afetɔ ɖi aɖasubɔ mawu bubuwo o. 
17 Afetɔ mía Mawu ye kplɔ mí kple mía fofowo dzoe le Egipte-nyigba dzi, tso kluviwo ƒe me, eye eyae wɔ dzesi gã siawo le mía ŋkume, eye wòdzɔ mía ŋu le mɔ blibo si míezɔ la katã dzi kple dukɔ siwo katã dome míeto la me. 
18 Afetɔ nya dukɔwo katã kple Amoritɔ siwo nɔ anyigbaa dzi la ɖa le mía ŋgɔ. Eya ta míawo hã míasubɔ Afetɔ, elabena eyae nye mía Mawu.”
19 Eye Yosua gblɔ na dukɔ la be: “Miate ŋu asubɔ Afetɔ o, elabena Mawu kɔkɔe wònye; Mawu si biaa ɖokuitsɔtsɔna blibo ye wònye. Matsɔ miaƒe dzidadawo kple miaƒe nu vɔ̃wo ake o. 
20 Ne miegblẽ Afetɔ ɖi, eye miesubɔ dutamawuwo la, ekema eya hã atɔ ŋku mi ahatsrɔ̃ mi ɖa keŋkeŋ evɔ wònye ewɔ nyui na mi hafi.”
21 Ke dukɔ la ɖo eŋu na Yosua be: “Gbeɖe, Afetɔ koe míasubɔ!” 
22 Eya ta Yosua gblɔ na dukɔ la be: “Miawo ŋutɔe nye ɖasefowo na mia ɖokui be, yewo ŋutɔe tiae be yewoasubɔ Afetɔ.” Eye woɖo eŋu be: “Ɛ̃, míawoe nye ɖasefowo.”
23 “‘Ekema miɖe dutamawu siwo le mia dome la ɖa, eye mitrɔ miaƒe dzi ɖe Afetɔ, Israel ƒe Mawu la ŋu.” 
24 Eye dukɔ la ɖo eŋu na Yosua be: “Míasubɔ Afetɔ mía Mawu la, eye míaɖo to eƒe gbe!”
25 Ale Yosua bla nu kple dukɔ la gbe ma gbe, eye wòwɔ ɖoɖowo kple sewo na wo le Sekem. 
26 Eye Yosua ŋlɔ nya siawo ɖe Mawu ƒe Segbalẽ la me, eye wòtsɔ kpe gã aɖe ɖi ɖe ati gã si le Afetɔ ƒe kɔkɔeƒea gbɔ la te.
27 Yosua gblɔ na dukɔ blibo la be: “Kpɔ ɖa! Kpe sia azu ɖasefo ɖe mía ŋu, elabena ese nya siwo katã Afetɔ gblɔ na mí, eye wòazu ɖasefo ɖe mia ŋu, ne miagagbe nu le mia Mawu la gbɔ o.” 
28 Eye Yosua ɖe asi le dukɔ la ŋu, eye ame sia ame yi eƒe anyigba dzi.
29 Le nu siawo megbe la, Afetɔ ƒe subɔla Yosua, Nun vi la, ku esime wòxɔ ƒe alafa ɖeka kple ewo. 
30 Eye woɖii ɖe eƒe anyigba si dome wònyi la dzi le Timna-Sera, si le Efrayim tonuto la me, le Gaas To la ƒe dziehe. 
31 Eye Israel yi edzi subɔ Afetɔ le Yosua ƒe agbemeŋkekewo katã kple ame tsitsi siwo ganɔ agbe le Yosua ƒe ku megbe, siwo nya dɔ siwo katã Afetɔ wɔ na Israel la ƒe agbenɔɣi katã.
32 Eye Israel-viwo ɖi Yosef ƒe ƒu siwo wotsɔ tso Egipte vɛ la ɖe Sekem le anyigba si Yakob ƒle gaku alafa ɖeka le Sekem fofo Hamor ƒe viwo si la dzi; eye anyigba la zu Yosef viwo ƒe domenyinu.
33 Eleazar, Aron vi la hã ku. Eye woɖii ɖe via Finehas Ƒe Togbɛ si wotsɔ nɛ le Efrayim tonuto me la dzi.

LEAVE A REPLY

Please enter your comment!
Please enter your name here