Yesaya

YESAYA
Isaiah
1  Yesaya, Amoz vi, ƒe ŋutega si wòkpɔ ku ɖe Yuda kple Yerusalem ŋu le Yuda-fia siwo nye Uziya, Yotam, Ahaz kple Hizkiya ŋɔli lae nye esi:
 2 Mi dziƒowo, misee, eye anyigba, ƒu to anyi,
Elabena Afetɔ gblɔ be:
“Menyi viwo wotsi,
Ke wodze aglã ɖe ŋunye.
 3 Nyitsu nyaa eƒlela,
Eye tedzi nyaa eƒe aƒetɔ ƒe lãnuɖunu;
Ke Israel ya menyam o,
Nye dukɔ mewɔa gɔmesese ŋu dɔ o.”
 4 Baba na dukɔ wɔnuvɔ̃,
Dukɔ si ƒe vodada kpe,
Dzidzime si wɔa vɔ̃, vi gblẽkuwo!
Wogblẽ Afetɔ ɖi;
Womede bubu Israel ƒe Kɔkɔetɔ la ŋu o;
Wotrɔ megbe dee.
 5 Afi kae woagaƒo na mi esi miegale aglãdzedze dzi?
Ta blibo la katã dze dɔ,
Eye dzi blibo la le dɔ lém.
 6 Tso miaƒe afɔƒome va se ɖe dzodome la, nyuiƒe aɖeke meli o,
Negbe abi kple dodro kpakple abi yeye sɔŋ;
—Womeklɔ wo o, womebla wo o, eye womeɖo ami wo ne woabɔbɔ hã o.
 7 Miaƒe anyigba zu gbegbe,
Dzo fiã miaƒe duwo.
Du bubu me tɔwo le miaƒe agblemenuwo ɖum le miawo ŋutɔ mia ŋkume.
Ele abe afi si du bubu me tɔwo va gblẽ nu le wòzu gbegbe ene.
 8 Zion vinyɔnu la tsi anyi abe agbadɔ le waingble me ene,
Abe agblexɔ le aŋanyigble me ene,
Abe du si woɖe to ɖo ene.
 9 Ne ɖe aʋakɔwo ƒe Afetɔ mekpɔtɔ ame ʋɛ aɖewo ɖi na mí o la,
Anye ne míezu abe Sodom ene,
Anye ne míeɖi Gomora.
10 Mi Sodom ƒe dziɖula sẽŋutawo, mise Afetɔ ƒe nya.
Mi Gomora dukɔ, miƒu to anyi ɖe mía Mawu ƒe se la ŋu.
11 Afetɔ be: “Vi kae miaƒe vɔsa gbogboawo ɖena nam?
Miaƒe agbowo ƒe numevɔsawo kple lã damiwo ƒe ami ti kɔ nam,
Nyitsuiwo kple alẽtsuiwo kpakple gbɔ̃tsuwo ƒe ʋu medzea ŋunye o.
12 Ne mieva be yewoado ɖe ŋkunyeme la,
Ame kae bia tso mia si
Be mianɔ afɔ ƒom nye xɔxɔnuwo?
13 Midzudzɔ nuɖuvɔsa maɖinuwo tsɔtsɔ vɛ.
Miaƒe dzudzɔdodowo nye ŋunyɔ nam.
Mieɖua dzinu yeye kple sabat, eye miewɔa takpekpewo
—Gake nyemate ŋu ado dzi atsɔ miaƒe akunyawɔwɔ kple miaƒe takpekpe tɔxɛwo o.
14 Melé fu miaƒe dzinu yeyewo kple ŋkekenyuiwo.
Wozu agba nam;
Wo tsɔtsɔ tim.
15 Ne mieke miaƒe abɔwo me la,
Maɣla ŋkume ɖe mi.
Ne mieli kɔ gbedodoɖawo gleglegle hã la,
Nyemele wo se ge o;
Elabena ʋu yɔ asi me na mi.
16 Mile tsi; mikɔ mia ɖokuiwo ŋu;
Miɖe miaƒe nu vɔ̃ɖi wɔwɔwo ɖa le ŋkunyeme;
Midzudzɔ nu baɖa wɔwɔ.
17 Misrɔ̃ nu nyui wɔwɔ; midi dzɔdzɔenyenye yome mɔ,
Miɖɔ ame si tea ame ɖe anyi la ɖo,
Miʋli tsyɔ̃eviwo ta,
Eye mixɔ ahosiwo ƒe nya ɖe akɔ.”
18 Afetɔ be: “Miva ne míakpɔ mía dome nyawo gbɔ.
Ne miaƒe nu vɔ̃wo biã helĩhelĩ hã la,
Woafu abe sno ene;
Ne wobiã abe nyagadzĩ ene hã la,
Woazu abe alẽfu ene.
19 Ne mielɔ̃ heɖo to la,
Ekema miaɖu anyigba la dzi nu nyuiwo.
20 Ke ne miegbe hedze aglã la,
Ekema yi aɖu mi,
Elabena Afetɔ ƒe nue gblɔe.”
21 Aleke du wɔnuteƒe la zu gbolo ale!
Tsã la, nya dzɔdzɔe yɔe fũu;
Eye dzɔdzɔenyenye nɔ eme,
Ke azɔ la, amewulawoe xɔ aƒe ɖe eme.
22 Wò klosalo va zu gamĩ,
Eye wotɔ tsi wò aha.
23 Wò amegãwo nye tosẽlawo, eye wodea ha kple fiafiwo.
Wo dometɔ ɖe sia ɖe lɔ̃a zãnuxɔxɔ, eye wòtia nunana yome.
Wometsoa afia dzɔdzɔe na tsyɔ̃eviwo o,
Eye womekpɔa ahosiwo ƒe nya gbɔ hã o.
24 Eya ta ale Aƒetɔ vavã la, aʋakɔwo ƒe Afetɔ,
Israel ƒe Ŋusẽtɔ la gblɔe nye esi:
“Kpɔ ɖa! Maɖe nye ketɔwo ɖa le ɖokuinye ŋu,
Eye mabia hlɔ̃ nye futɔwo.
25 Matrɔ nye asi ɖe ŋuwò,
Malólo wò gamĩ abe adzalẽɖaɖi wotsɔ lóloe ene,
Eye maɖe wò ɖinuwo katã ɖa.
26 Magaɖo ʋɔnudrɔ̃lawo na wò abe tsã ene,
Kple adaŋudelawo na wò abe le gɔmedzedzea me ene.
Esia megbe woayɔ wò be Dzɔdzɔenyenye Ƒe Du, Du Wɔnuteƒe.
27 Woatsɔ ʋɔnu dzɔdzɔe dɔdrɔ̃ aɖe Zion,
Eye woatsɔ dzɔdzɔenyenye aɖe eƒe ame siwo trɔ gbɔ la.
28 Woagbã aglãdzelawo kple nu vɔ̃ wɔlawo le ɣeyiɣi ɖeka me,
Eye ame siwo gblẽ Afetɔ ɖi la nu ayi.
29 Elabena ŋu akpe wo le ati gã siwo ŋu miekpɔa dzidzɔ ɖo la ŋu,
Eye miaƒe mo atsi dãa le abɔ siwo mietia la ta.
30 Elabena miazu abe ati gã si ƒe aŋgbawo le yɔyrɔm ene,
Abe abɔ si mekpɔ tsi o ene.
31 Ame sesẽ la azu abe ɖetifu ene,
Eye eƒe dɔwɔwɔ azu dzoxi;
Wo kple eve la siaa ayi dzo me le ɣeyiɣi ɖeka me,
Eye ame aɖeke mate ŋu atsii o.”

YESAYA 2
1 Nu si Yesaya, Amoz vi, kpɔ le Yuda kple Yerusalem ŋue nye esi:
 2 Le ŋkeke mamlɛawo me la,
Afetɔ ƒe aƒe ƒe to la
Ali ke sesĩe, akɔ ta agbɔ towo ŋu,
Eye wòakɔ aƒo togbɛwo ta,
Eye dukɔwo katã aƒo zi ɖe eŋu.
 3 Eye dukɔ geɖewo ava agblɔ be:
“Miva míayi Afetɔ ƒe to la dzi,
Míayi Yakob ƒe Mawu ƒe aƒe la me.
Afia eƒe mɔwo mí,
Eye míazɔ eƒe toƒewo.”
Elabena sedede atso Zion,
Eye Afetɔ ƒe nya atso Yerusalem.
 4 Atso afia na dukɔwo,
Eye wòadzra dukɔ geɖewo dome ɖo.
Woatsɔ woƒe yiwo atu agblenuwoe,
Eye woatsɔ woƒe akplɔwo atu hɛ gobɛwoe.
Dukɔ magatsɔ yi ɖe dukɔ ŋu azɔ o,
Eye womagasrɔ̃ aʋawɔwɔ azɔ o.
 5 Oo, Yakob ƒe aƒe la me tɔwo,
Miva míazɔ le Afetɔ ƒe kekeli me.
 6 Ègblẽ wò dukɔ, Yakob ƒe aƒe la ɖi,
Elabena Ɣedzeƒetɔwo ƒe nuwɔnawo yɔ wo fũu;
Wowɔ akunya abe Filistitɔwo ene,
Eye du bubu me tɔwo bɔ ɖe wo dome fũu.
 7 Klosalo kple sika bɔ ɖe woƒe anyigba dzi,
Eye seɖoƒe meli na woƒe kesinɔnuwo o.
Sɔwo bɔ ɖe woƒe anyigba dzi fũu,
Eye seɖoƒe meli na woƒe tasiaɖamwo o.
 8 Mawu maɖinuwo yɔ woƒe anyigba dzi taŋ.
Wodea ta agu na woawo ŋutɔwo ƒe asinudɔwɔwɔwo,
Nu siwo wotsɔ woawo ŋutɔwo ƒe asibidɛwo wɔ.
 9 Ale amegbetɔ ɖi gbɔ eɖokui, eda eɖokui ɖe anyi;
Màtsɔe ake wo akpɔ o.
10 Yi ɖe kpeto me, ne nàɣla ɖokuiwò ɖe ke me
Le Afetɔ ƒe ŋɔdzi
Kple eƒe gãnyenye ƒe atsyɔ̃ la ta.
11 Woabɔbɔ amegbetɔ ƒe dadaŋkuwo ɖe anyi,
Eye amegbetɔwo ƒe dada ayi to.
Afetɔ ɖeɖe koe woado ɖe dzi le ŋkeke ma dzi.
12 Elabena aʋakɔwo ƒe Afetɔ ƒe ŋkekee.
Ava ame siwo katã doa wo ɖokui ɖe dzi hedana la dzi,
Ava ame ɖe sia ɖe dzi, eɖanye ame ŋkuta alo ame tsɛ o,
13 Ava Lebanon ƒe sederti kɔkɔ dedziwo katã
Kple Basan ƒe logotiwo katã dzi,
14 Ava to kɔkɔwo katã
Kple togbɛ kɔkɔwo katã dzi,
15 Ava mɔ́ kɔkɔ ɖe sia ɖe kple gli sesẽ ɖe sia ɖe dzi,
16 Ava Tarsis tɔdziʋu gãwo katã
Kple tɔdziʋu nyuiwo katã dzi.
17 Woabɔbɔ amegbetɔ ƒe ɖokuidodoɖedzi ɖe anyi,
Eye amegbetɔwo ƒe dada ayi to.
Afetɔ ɖeɖe koe woado ɖe dzi le ŋkeke ma dzi.
18 Mawu maɖinuwo nu ayi keŋkeŋ.
19 Ne Afetɔ tso be yeana anyigba la nadzo kpekpekpe ŋɔdzitɔe la,
Amewo age ɖe kpetowo
Kple dowo me le anyigba tume
Le eƒe ŋɔdzi
Kple eƒe gãnyenye ƒe atsyɔ̃ la ta.
20 Gbe ma gbe la, amegbetɔwo atsɔ woƒe klosalomawu dzodzro kple sikamawu maɖinu
Siwo wowɔ na wo ɖokuiwo be woade ta agu na la
Aƒu gbe ɖo ɖe atɔewo kple agutɔwo,
21 Ne woage ɖe kpetowo
Kple agatowo me,
Le Afetɔ ƒe ŋɔdzi
Kple eƒe gãnyenye ƒe atsyɔ̃ la ta,
Ne etso be yeana anyigba la nadzo kpekpekpe ŋɔdzitɔe.
22 Midzudzɔ ŋuɖoɖo ɖe amegbetɔ gbɔlo, si nye gbɔgbɔ dzro le eƒe ŋɔti me la ŋu,
Ne eme nanyo na mi.
Nu ka ta gɔ̃ woabu eya amea ŋu?

YESAYA 3
1 Elabena kpɔ ɖa, Aƒetɔ vavã, aʋakɔwo ƒe Afetɔ,
Le ziɔɖeŋu kple kpekpeɖeŋu ɖe sia ɖe ɖem ɖa le Yerusalem kple Yuda,
Aɖe abolo kple tsi siwo katã léa wo ɖe te,
 2 Aɖe ŋutsu kalẽtɔ kple aʋawɔla,
Ʋɔnudrɔ̃la kple nyagblɔɖila, afakala kple dumemetsitsiwo,
 3 Ame blaatɔ̃ ƒe tatɔ, bubume, aɖaŋuɖola,
Akunyawɔla bibi kple gbesala bibi siaa ɖa.
 4 Matsɔ ɖeviwo aɖo amegãwoe ɖe wo nu,
Eye ame maɖoŋuɖeŋua akplɔ wo.
 5 Woasẽ ŋuta le wo nɔewo ŋu,
Ame sia ame ɖe ehavi ŋu.
Ðevi atso ɖe ame tsitsi ŋu,
Eye ame tsɛ atso ɖe bubume ŋu.
 6 Elabena wo dometɔ ɖe sia ɖe alé nɔvia le fofoa ƒe me agblɔ be:
“Awu ʋlaya le asiwò—ɖu amegã ɖe mía dzi.
Nànɔ glikpo sia nu.”
 7 Aɖo eŋu na wo gbe ma gbe be:
“Nyemele abi aɖeke bla ge na mi o;
Abolo alo awu ʋlaya hã mele aƒenye me o.
Migatsɔm ɖo amegã ɖe dukɔ la dzi o.”
 8 Elabena Yerusalem kli nu,
Eye Yuda dze anyi,
Le esi wotsɔ woƒe nya kple nuwɔnawo tso ɖe Afetɔ ŋu,
Eye wodze aglã le Kɔkɔetɔ la ŋkume ta.
 9 Woƒe moɖoɖo ɖeɖe hã le ha ɖem wo,
Eye woɖea woƒe nu vɔ̃ si le abe Sodom tɔ ene la gblɔna.
Womeɣlae o.
Baba na wo! Elabena wole gbegblẽ hem va wo ɖokuiwo dzi.
10 Migblɔ na ame dzɔdzɔewo be eme anyo na wo;
Woaɖo woƒe nuwɔnawo teƒe na wo.
11 Baba na ame vɔ̃ɖi!
Gbegblẽ ava edzi,
Elabena woaxe nu si eƒe asiwo wɔ la ŋuti fetu nɛ!
12 Ke nye dukɔ la ƒe kplɔlawo ƒe nya me sẽ,
Eye nyɔnuwo ɖu fia ɖe wo dzi.
Oo, nye dukɔ, kplɔwòlawo na nèle tsaglãla tsam,
Eye wobaɖa wò afɔtoƒewo.
13 Afetɔ le enɔƒe be yeahe nya ɖe go;
Ele tsitrenu be yeadrɔ̃ ʋɔnu dukɔwo.
14 Afetɔ adrɔ̃ ʋɔnu eƒe dukɔ ƒe ametsitsiwo kple amegãwo.
“Mietɔ dzo waingble la,
Eye nu si mieda adzo ame dahe xɔ le esi la le miaƒe xɔwo me.
15 Mɔ kae miekpɔ be miegbã nye dukɔ la gudugudu,
Eye mietigi ame dahewo ƒe mo ɖe ke me?” Aƒetɔ Dziɖulagã, aʋakɔwo ƒe Afetɔ ye gblɔe.
16 Afetɔ be: “Esi Zion vinyɔnuwo doa wo ɖokuiwo ɖe dzi,
Eye wowua mo dzi nɔa yiyim,
Heɖoa ahiãmo nɔa atsyãzɔli zɔm,
Eye woƒe afɔgɛwo nɔa ɖiɖim gleŋgleŋgleŋ ta la,
17 Afetɔ hã ana Zion vinyɔnuwo ƒe dzodome nade akpa,
Eye Afetɔ ana woƒe ŋgonu nakpa.
18 Gbe ma gbe Afetɔ aɖe woƒe atsyɔ̃ɖonu siwo nye afɔgɛwo,
Ŋgoblanuwo, atsyɔ̃ɖonu gobɛwo,
19 Togɛwo, alɔnugɛwo, motsyɔnuwo,
20 Tatsyɔnuwo, afɔkɔsɔkɔsɔwo, akɔtablanuwo,
Ami ʋeʋĩ goewo kple sebɛwo,
21 Asigɛwo, ŋɔtigɛwo,
22 Atsyɔ̃ɖowuwo, awudziwuiwo, awu ʋlayawo, gakploviwo,
23 Asihuhɔ̃ewo, aklalawuwo,
Tablanuwo kple motsyɔnuwo ɖa.
24 “Ʋeʋẽ kũ axɔ ɖe balsam-mi ƒe ʋeʋẽ teƒe;
Ka axɔ ɖe alidziblanu teƒe;
Tabebe axɔ ɖe atsyãɖaƒoƒo teƒe;
Akpanya axɔ ɖe awu xɔasiwo teƒe;
Dzobi axɔ ɖe tugbedzedze teƒe.
25 Wò ŋutsuwo atsi yi nu,
Eye wò kalẽtɔwo atsi aʋa.
26 Eƒe agbowo afa konyi ahaxa nu,
Eye woaɖi gbɔlo ahabɔbɔ nɔ anyigba.”

YESAYA 4 
1  Gbe ma gbe la, nyɔnu adre alé ŋutsu ɖeka agblɔ be:
“Míaɖu míawo ŋutɔ míaƒe abolo,
Eye míado míawo ŋutɔwo míaƒe awuwo;
Na woayɔ wò ŋkɔ ɖe mía ŋu ko,
Ne nàɖe míaƒe ŋukpe ɖa.”
2 Gbe ma gbe la, nu si Afetɔ na wòmie la anye atsyɔ̃ kple ŋutikɔkɔe, eye anyigba la dzi kutsetse anye adegbeƒonu kple atsyɔ̃ na Israel ƒe ame siwo tsi agbe. 
3 Woayɔ ame siwo kpɔtɔ ɖe Zion kple ame siwo wogblẽ ɖe Yerusalem, ame sia ame si ƒe ŋkɔ woŋlɔ ɖi be wòanɔ agbe le Yerusalem la, be kɔkɔe.
4 Ne Afetɔ tsɔ ʋɔnudɔdrɔ̃ ƒe gbɔgbɔ kple dzobibi ƒe gbɔgbɔ klɔ Zion vinyɔnuwo ƒe ɖiƒoƒo ɖa, eye wòklɔ ʋu si Yerusalem kɔ ɖi la ɖa le eme la, 
5 ekema Afetɔ aɖo alilikpo kple dzudzɔ ɖe Zion To la katã kple eƒe takpeƒe la dzi le ŋkeke me, eye wòaɖo dzobibi keklẽ ɖa le zã me; agbadɔ anɔ eƒe ŋutikɔkɔe nɔƒe blibo la katã tame. 
6 Eye agbadɔ anɔ anyi anye vɔvɔli le ŋkeke me le ŋdɔkutsu nu, eye wòanye sitsoƒe kple bebeƒe tso ahom kple tsidzadza nu.

YESAYA 5
1 Na madzi ha na nye lɔlɔ̃tɔ,
Madzi ha le nye lɔlɔ̃tɔ kple eƒe waingble ŋu.
Waingble aɖe le nye lɔlɔ̃tɔ si le togbɛ wɔnu aɖe dzi.
 2 Edzobo eme, eye wòɖe kpewo le eme.
Edo wain dzĩ nyuitɔ ƒe ka ɖe eme,
Etu xɔ tsrala aɖe ɖe etitina.
Ewɔ wainfiãƒe hã ɖe eme.
Eye wòle mɔ kpɔm be wòatse ku nyuiwo,
Ke etse ku manyomanyowo.
 3 “Azɔ mi Yerusalem nɔlawo kple mi Yuda ŋutsuwo,
Taflatsɛ midrɔ̃ nya le nye kple nye waingble la dome.
 4 Nu kae gasusɔ mawɔ na nye waingble la,
Si nyemewɔ nɛ o?
Nu ka tae mekpɔ mɔ be wòatse wainku nyuiwo,
Ke wòva tse wainku manyomanyowo?
 5 Eya ta meɖe kuku, mina magblɔ
Nu si wɔ ge mala na nye waingble la na mi:
Makaka kpɔ le eŋu,
Eye matɔ dzoe.
Magbã gli le eŋu,
Ne woazɔ edzi.
 6 Mana wòazu gbegbe.
Womaɖe eŋu o, eye womaga eme o.
Ŋù kple gbe axɔ eme;
Eye made se na alilikpowo be woagadza tsi ɖe edzi azɔ o.
 7 Elabena aʋakɔwo ƒe Afetɔ ƒe waingble lae nye Israel ƒe aƒe;
Yudatɔwoe nye agble si gbɔ melɔ̃a nu le o la.
Ekpɔ mɔ na ʋɔnu dzɔdzɔe dɔdrɔ̃,
Ke kpɔ ɖa, sedzidadae li;
Ekpɔ mɔ na dzɔdzɔenyenye,
Ke kpɔ ɖa, konyifafae li.”
 8 Baba na ame siwo le xɔ tsiãm ɖe xɔ nu
Kple ame siwo le agble tsiãm ɖe agble nu,
Va se ɖe esime teƒe aɖeke megali o,
Ale be miawo ɖeɖe koe susɔ ɖe anyigba la dzi!
 9 Aʋakɔwo ƒe Afetɔ ka atam mese be,
Xɔ gã nyui geɖeawo
Azu nu wɔmoyaa,
Eye ame aɖeke manɔ wo me o.
10 Eye wain baf ɖeka koe woakpɔ tso waingble agbleka ewo me,
Eye nuku efa ɖeka koe woakpɔ tso nuku homer ɖeka si woƒã la me.
11 Baba na ame siwo fɔna ŋdi kanya noa aha sesẽ,
Ame siwo nɔa enono dzi va se ɖe esime xexea me tsyɔna, be wain nade dzo lãme na yewo!
12 Saŋku kple kasaŋku,
Axatsɛ kple dze kpakple wain nɔa woƒe azãɖuƒewo;
Ke womeléa ŋku ɖe Afetɔ ƒe dɔwɔwɔ ya ŋu o,
Eye womekpɔa eƒe asinudɔwɔwɔ o.
13 Eya ta woaɖe aboyo nye dukɔ
Le esi medzea si nu o ta;
Dɔ awu woƒe bubumewo
Eye tsikɔ awu woƒe amehawo ate wo ŋu.
14 Eya ta Tsiẽƒe vu eɖokui gblotoo,
Eye wòke eƒe nu baa;
Eƒe atsyɔ̃, kple eƒe amehawo ƒe hoowɔwɔ kpakple aseyetsolawo
Age adze eme.
15 Amegbetɔ abɔbɔ ɖe anyi,
Woabɔbɔ amegbetɔ ɖe anyi,
Eye woabɔbɔ dadalawo ƒe ŋkuwo ɖe anyi.
16 Aʋakɔwo ƒe Afetɔ ado gã eɖokui to eƒe ʋɔnudɔdrɔ̃ me,
Eye Mawu vavã, Kɔkɔetɔ la, akɔ eɖokui ŋu le dzɔdzɔenyenye me.
17 Alẽviwo aɖu gbe le afi ma abe woƒe gbeɖuƒee wònye ene;
Eye amedzrowo aɖu nu le lã damiwo nɔƒe siwo ɖi gbɔlo.
18 Baba na ame siwo tsɔa alakpaka dea woƒe vodada nɔa hehem,
Eye wotsɔa tasiaɖamkawo dea woƒe nu vɔ̃ nɔa hehem;
19 Ame siwo gblɔna be: “Newɔ kabakaba,
Neʋã ɖe eƒe dɔ ŋu ne míakpɔe.
Israel ƒe Kɔkɔetɔ la ƒe tameɖoɖo neva eme,
Ne míadze sii!”
20 Baba na ame siwo yɔa nyui be vɔ̃ heyɔa vɔ̃ be nyui,
Ame siwo tsɔa viviti ɖɔlia kekeli hetsɔa kekeli ɖɔlia vivitii,
Ame siwo tsɔa veve wɔa vivi hetsɔa vivi wɔa vevee!
21 Baba na ame siwo bua wo ɖokui nunyalawo,
Eye wonye aɖaŋudzelawo le woawo ŋutɔwo ŋkume!
22 Baba na ame siwo nye kalẽawo le wain nono me
Kple ŋutsu siwo bi ɖe aha muamewo tɔtɔ me,
23 Ame siwo xɔa zãnu hetsoa afia dzɔdzɔe na ame vɔ̃ɖi,
Eye wogbea nya dzɔdzɔe dɔdrɔ̃ na ame dzɔdzɔe!
24 Eya ta ale si ko dzo fiãa ahɔ̃liti,
Eye dzobibi fiãa gbe ƒuƒu la,
Nenemae woƒe kewo anyunyɔ,
Eye woƒe seƒoƒo aʋu ya abe ʋuʋudedi ene,
Elabena wogbe aʋakɔwo ƒe Afetɔ ƒe se,
Eye womede bubu Israel ƒe Kɔkɔetɔ la ƒe nya ŋu o.
25 Esia tae Afetɔ ƒe dɔmedzoe bi ɖe eƒe dukɔ la ŋu,
Eye ado eƒe alɔ ɖe dzi ahaƒo wo.
Towo adzo kpekpekpe,
Eye woƒe kukuawo azu abe gbeɖuɖɔ ene le kpɔdomeewo.
Esiawo katã megbe hã la, eƒe dɔmedzoe nu mefa o,
Eƒe alɔ gale dzi kokoko be yeaƒo wo.
26 Edo dzesiti ɖe dzi na dukɔ aɖe le didiƒe;
Elia aku na wo be woatso anyigba ƒe mlɔenu ava;
Kpɔ ɖa, wole du dzi sesĩe gbɔna.
27 Ðeɖi mete ame aɖeke ŋu o, eye ame aɖeke mekli nu le wo dome o.
Wo dometɔ aɖeke medɔ akɔlɔ̃e alo dɔ alɔ̃ o.
Alidziblanu metu le woƒe ali o,
Eye woƒe afɔkpakawo metso o.
28 Wonyre woƒe aŋutrɔwo,
Eye wovu woƒe dawo katã me.
Woƒe sɔwo ƒe afɔkliwo le abe kpe sesẽ ene,
Eye woƒe tasiaɖamfɔtiwo le abe ahom ene.
29 Woƒe gbeɖeɖe le abe dzata tɔ ene,
Woɖea gbe abe dzatatsui ene.
Woaɖe gbe ahalé nu,
Woatsɔ nulélea adzoe, ke xɔnametɔ aɖeke manɔ anyi o.
30 Gbe ma gbe la, woaɖe gbe ɖe edzi
Abe atsiaƒu ƒe gbeɖeɖe ene.
Ame sia ame si alé ŋku ɖe anyigbaa ŋu la akpɔ viviti dziŋɔ;
Kekeli hã do viviti le alilikpo dodowo ta.

YESAYA 6
1  Le ƒe si me Fia Uziya ku la, mekpɔ Afetɔ wòbɔbɔ nɔ fiazikpui gã aɖe si le dzi boo la dzi, eye eƒe awu togawo yɔ gbedoxɔ la taŋ. 
2 Serafiwo le etame; wo dometɔ ɖe sia ɖe to aʋala ade. Wotsɔ eve tsyɔ mo, wotsɔ eve tsyɔ afɔ, eye wotsɔ eve dzona.
 3 Eye wodo ɣli ɖo ɖe wo nɔewo gblɔ be:
“Kɔkɔe, kɔkɔe, kɔkɔe nye aʋakɔwo ƒe Afetɔ.
Eƒe ŋutikɔkɔe yɔ anyigba blibo la katã dzi.”
4 Eye woƒe gbe ƒe ɖiɖi na kpuiawo ƒe agunuwo ʋuʋu, eye dzudzɔ yɔ xɔ la taŋ.
 5 Eye megblɔ be: “Aléle!
Meku,
Elabena nuyi makɔmakɔtɔe menye,
Eye dukɔ si ƒe nuyi mekɔ o domee mele;
Elabena nye ŋkuwo kpɔ Fia la, aʋakɔwo ƒe Afetɔ ŋutɔ!”
6 Ke serafiawo dometɔ ɖeka dzo va gbɔnye, eye wòlé dzoka xɔxɔ, si wòtsɔ abè ɖe le vɔsamlekpuia me la, ɖe asi. 7 Eye wòtsɔe ka nu nam hegblɔ be:
“Kpɔ ɖa! Esia ka wò nuyiwo ŋu,
Woɖe wò fɔɖiɖi ɖa,
Eye wolé avu ɖe wò nu vɔ̃ ta.”
8 Eye mese Afetɔ ƒe gbe wògblɔ be: “Ame kae madɔ, eye ame kae ayi na mí?” Ale megblɔ be: “Nyee nye esi! Dɔm!”
 9 Eye wògblɔ nam be, “Heyi ɖagblɔ na dukɔ sia be:
‘Miase nu agasee ake,
Ke miase egɔme o;
Miakpɔ nu agakpɔe ake,
Ke miadze si nu o.’
10 Na dukɔ sia ƒe dzi naku atri,
Tu woƒe towo,
Eye nàtre woƒe ŋkuwo,
Ne woagakpɔ nu kple woƒe ŋkuwo,
Ase nu kple woƒe towo,
Eye woase nu gɔme kple woƒe dzi,
Ne woatrɔ be woada gbe le wo ŋu o.”
11 Eye megblɔ be: “Oo Afetɔ, va se ɖe ɣekaɣi?” Eye wòɖo eŋu be:
“Va se ɖe esime duwo nagbã azu aƒedo, eye ame aɖeke maganɔ wo me o,
Va se ɖe esime aƒewo katã naɖi gbɔlo,
Eye anyigba la nazu gbegbe;
12 Va se ɖe esime Afetɔ nanya amegbetɔwo ɖo ɖe didiƒe ʋĩi,
Eye anyigba la nazu gbegbe sɔŋ.
13 “Togbɔ be amewo me mama ɖe ewo ƒe akpa ɖeka asusɔ ɖe edzi hã la, woagatɔ dzoe, eye wòanɔ abe ati gã alo logoti si ne wolãe la, takpoea tsia anyi ene; dzidzime kɔkɔe aɖee anye takpoea.”

YESAYA 7
1  Le Ahaz, Yotam vi, Uziya vi, ame si nye Yuda-fia ŋɔli la, Siria-fia Rezin kple Israel-fia Peka, Remaliya vi, ho ɖe Yerusalem ŋu be yewoawɔ aʋa kplii, ke mete ŋu ɖu edzi o. 
2 Eye wova gblɔ na David ƒe aƒe la be: “Siria ƒe aʋakɔ va wɔ ɖeka kple Efrayim ƒe aʋakɔ.”
Ale Ahaz kple eƒe amewo ƒe dzi ʋuʋu abe ale si avemetiwo ʋuʋuna le ya nu ene.
3 Eye Afetɔ gblɔ na Yesaya be: “Meɖe kuku, wò kple viwò Sear-Yasub mido go yi ɖakpe Ahaz le dzigbeta la ƒe tɔʋu ƒe mlɔenu le avɔnyala ƒe agblemɔ gã la to. 
4 Eye nàgblɔ nɛ be: ‘Lé ɖokuiwò, nànɔ anyi kpoo. Mègavɔ̃ o, eye mègana dzi naɖe le ƒowò le dzoti takpoe eve siawo, siwo le dzudzɔ tum, siwo nye Siria-fia Rezin kple Remaliya vi la ƒe dziku ta o. 
5 Elabena Siria kple Efrayim kpakple Remaliya vi la ɖo vɔ̃ ɖe ŋuwò gblɔ be, 
6 “Mina míaho ɖe Yuda ŋu, míavuvui, eye míadze edzi ahaxɔe na mía ɖokui, ne míatsɔ Tabeel vi aɖo fiae ɖe enu.”
7 “‘Ale Aƒetɔ Dziɖulagã Afetɔ gblɔe nye esi:
Madze edzi o,
Eye madzɔ hã o.
 8 Elabena Siria ƒe tae nye Damasko,
Eye Damasko ƒe tae nye Rezin.
Le ƒe blaade vɔ atɔ̃ pɛ ko me la,
Woagbã Efrayim gudugudu, eye maganye dukɔ azɔ o.
 9 Efrayim ƒe tae nye Samaria,
Eye Samaria ƒe tae nye Remaliya vi la.
Ne miexɔe se o la,
Ekema miali ke o.”’”
10 Eye Afetɔ gagblɔ na Ahaz be: 
11 Bia dzesi tso Afetɔ wò Mawu la gbɔ; ate ŋu agoglo abe Tsiẽƒe ene alo akɔkɔ abe dziƒo ene.” 
12 Ke Ahaz gblɔ be: “Nyemabia o, eye nyemado Afetɔ kpɔ hã o.”
13 Eye Yesaya gblɔ be: “Oo, David ƒe aƒe, meɖe kuku, misee. Nu tsɛ wònye be miedo amewo ƒe dzigbɔɖi kpɔ hafi miebe yewoado Mawu hã ƒe dzigbɔɖi kpɔa? 
14 Eya ta Afetɔ ŋutɔ ana dzesi mi: Kpɔ ɖa! Ðetugbui afɔ fu adzi ŋutsuvi; eye wòana ŋkɔe be Imanuel. 
15 Anɔ notsi kpekẽ kple anyitsi nom hafi ava nya vɔ̃tsitsri kple nyuitiatia. 
16 Elabena hafi ɖevi la nava nya vɔ̃tsitsri kple nyuitiatia la, fia eve siwo le ŋɔ dzim na wò la ƒe anyigba aɖi gbɔlo. 
17 Afetɔ ahe ɣeyiɣi sesẽ siwo tɔgbi meva kpɔ tso gbe si gbe Efrayim klã ɖa tso Yuda gbɔ o la, ava wò ŋutɔ kple wò dukɔ la kpakple fofowò ƒe aƒe la dzi, elabena akplɔ Asiria-fia aƒu wò.
18 “Le ŋkeke ma dzi la, Afetɔ alia aku ayɔ nu dzodzoe siwo le Egipte ƒe Nil-tɔsisi la ƒe alɔdze siwo le adzɔge ke kple anyi siwo le Asiria-nyigba dzi, 
19 eye wo katã woava ƒo ɖe tɔʋu globowo, agatowo kple ŋuvewo katã me kple tsiteƒewo katã.
20 “Gbe ma gbe la, Afetɔ azã talũhɛ si Ahaz da tso Tɔsisi la ƒe nuto me, si nye Asiria-fia, atsɔ alũ ɖa le ta nɛ, alũ fu le afɔ ŋu nɛ ahaƒlɔ ge nɛ keŋkeŋ.
21 “Gbe ma gbe la, ame ɖeka axɔ nyinɔe kple alẽ eve ɖe agbe. 
22 Eye le esi notsi bɔ ta la, ano notsi kpekẽ, elabena notsi kpekẽ kple anyitsi koe ame siwo katã susɔ ɖe anyigba la dzi la ano.
23 “Gbe ma gbe la, afi sia afi si wainka akpe ɖeka le tsã, eye wòxɔa klosalo akpe ɖeka la, ŋùwo kple gbewo amie ɖe wo teƒe. 
24 Aŋutrɔ kple da ye amewo atsɔ hafi ayi afi ma, elabena ŋù kple gbe sɔŋ koe axɔ anyigba blibo la katã dzi. 
25 Eye miagayi to siwo katã dzi wotsɔa kodzi ŋlɔna tsã la dzi o, le vɔvɔ̃ na ŋùwo kple gbewo ta; eye woazu nyiwo ƒe gbeɖuƒe kple alẽwo toƒe.”

YESAYA 8
1  Eye Afetɔ gblɔ nam be: “Tsɔ nuŋlɔkpe gã aɖe, eye nàtsɔ nuŋlɔti aŋlɔ ɖe edzi be: ‘Maher-Salal-Has-Baz.’ 
2 Eye na nye ɖasefo wɔnuteƒe, siwo nye nunɔla Uriya kple Zakariya, Yeberekiya vi, naŋlɔ nu aɖo kpe edzi.”
3 Eye medɔ kple nyɔnunyagblɔɖila la, eye wòfɔ fu dzi ŋutsuvi. Eye Afetɔ gblɔ nam be: “Tsɔ ŋkɔ nɛ be Maher-Salal-Has-Baz, 
4 elabena hafi ɖevi la nanya ‘Papa!’ kple ‘Dada!’ yɔyɔ la, woalɔ Damasko ƒe kesinɔnuwo kple Samaria ƒe aboyonuwo ayi Asiria-fia gbɔe.”
5 Afetɔ gagblɔ nam be:
 6 “Esi dukɔ sia gbe Siloa tsi siwo sina blewu,
Eye wole aseye tsom ɖe Rezin kple Remaliya vi ŋu ta la,
 7 Kpɔ ɖa, Afetɔ akplɔ
Tɔsisi la ƒe tsi gã sẽŋuawo,
Siwo nye Asiria-fia kple eƒe bubu la katã, ava ƒo ɖe wo dzi.
Ayɔ eƒe tɔʋuwo katã me,
Eye eƒe tɔgowo katã agbagba
 8 Eye wòasi ato Yuda.
Aɖɔ agbagba asi ava yi, aɖɔ va se ɖe ve ke.
Oo Imanuel,
Eƒe aʋala siwo ke la, asɔ ɖe wò anyigba ƒe kekeme nu!”
 9 Oo, dukɔwo, miwɔ vɔ̃, gake woagbã mi gudugudu;
Mi ame siwo katã le didiƒewo le anyigba dzi la, miƒu to anyi!
Mibla aʋakpa, gake woagbã mi gudugudu!
Mibla aʋakpa, gake woagbã mi gudugudu!
10 Mide adaŋu, gake woagblẽ eme.
Migblɔ nya sia nya si dze mia ŋu, gake madze edzi o,
Elabena Mawu li kpli mí.
11 Afetɔ ƒe asi sẽ ɖe dzinye eye wògbe nam be magazɔ dukɔ sia ƒe mɔ dzi o hegblɔ nam be:
12 “Migayɔ nu si dukɔ sia le yɔyɔm be, ‘Nugbeɖoɖo!’ la be ‘Nugbeɖoɖo!’ o,
Migavɔ̃ nu si vɔ̃m wole la o;
Eye megadzi ŋɔ na mi o.
13 Aʋakɔwo ƒe Afetɔ ye miabu Ame kɔkɔe,
Eyae miavɔ̃,
Eye eyae nye ame si wòle be wòadzi ŋɔ na mi.”
14 Azu kɔkɔeƒe;
Gake anye kpe si woakli
Kple agakpe
Si Israel ƒe aƒe eveawo akli,
Eye wòanye mɔ̃ kple adoboli
Na Yerusalem nɔlawo.
15 Wo dometɔ geɖewo akli nu adze anyi ahaŋe,
Eye woatre mɔ̃ na wo aɖe wo.
16 Bla ɖaseɖiɖi ƒe nuŋlɔɖi la;
Tre se la nu le nye nusrɔ̃lawo dome!
17 Manɔ Afetɔ, ame si ɣla eƒe ŋkume ɖe Yakob ƒe aƒe la, sinu kpɔm, eye manɔ mɔ kpɔm nɛ.
18 Kpɔ ɖa! Nye kple vi siwo Afetɔ nam la, míenye dzesi kple nukunu le Israel tso aʋakɔwo ƒe Afetɔ, ame si le Zion To dzi la gbɔ.
19 Eye ne wogblɔ na mi be: “Mibia nu ŋɔliyɔlawo alo nukalawo, ame siwo nɔa ŋɔtimegbee kple dalĩ dom” la, ɖe dukɔ mabia nu eƒe Mawu oa? Ðe woabia nu ta se le kukuawo gbɔ na agbagbeawoa? 
20 Ele be woatrɔ ɖe se la kple ɖaseɖiɖi ƒe nuŋlɔɖi la boŋ ŋu!
Ne womeƒo nu alea o la, womakpɔ kekeli o. 
21 Wo dometɔ ɖe sia ɖe anɔ tsaglãla tsam le anyigba la dzi, nu ate eŋu, eye dɔ awui; esi dɔ le ewum, eye wòdo dziku ta la, afɔ mo dzi ado ɖiŋu na Fia la kple eƒe Mawu. 
22 Eye ne etrɔ mo ɖe anyigba dzi la, xaxa kple viviti, tsizi, nɔnɔme sesẽwo kple blukɔ tsiɖitsiɖi si me kekeli aɖeke mele o la koe wòakpɔ.

YESAYA 9
1  Ke hã viviti la manɔ abe tsã esime anyigba la ɖo xaxa me, eye wodo vlo Zebulon-nyigba kple Naftali-nyigba la ene o. Gake emegbe ana woade bubu anyigba ma, ƒutamɔ si le Yordan nuto me, si nye dukɔwo ƒe Galilea, la ŋu.
 2 Dukɔ si nɔ viviti me zɔm la,
Kpɔ kekeli gã aɖe.
Eye ame siwo le anyigba si dzi blukɔ do ɖo la,
Kekeli klẽ na wo.
 3 Èna dukɔ la dzi ɖe edzi;
Èna wòkpɔ dzidzɔ gã aɖe.
Wokpɔ dzidzɔ le ŋkuwòme
Abe ale si wokpɔa dzidzɔ le nuŋeɣi ene,
Abe ale si wotsoa aseye ne wole aboyonu mam ene.
 4 Elabena èŋe woƒe agba ƒe kɔkuti,
Ati si le woƒe abɔta kple ame si ƒoa du ɖe wo nu be woawɔ dɔ la ƒe ameƒoti,
Abe ale si wònɔ le Midian ŋɔli ene.
 5 Afɔkpa ɖe sia ɖe si ʋuʋua anyigba ne wole zɔzɔm
Kple awu ɖe sia ɖe si ƒo ʋu blibaa la,
Azu dzodonu.
 6 Elabena wodzi vi na mí,
Wona ŋutsuvi mí;
Dziɖuɖu anɔ abɔta nɛ.
Eye woayɔ eŋkɔ be Aɖaŋuɖola Bibi, Mawu Ŋusẽtɔ, Fofo Mavɔ, Ŋutifafafia.
 7 Eƒe dziɖuɖu akeke ta,
Eye seɖoƒe manɔe na ŋutifafa
Le David ƒe fiazikpui dzi kple eƒe fiaɖuƒe la me o,
Ne wòali kee ahalée ɖe te
To nu dzɔdzɔe wɔwɔ kple dzɔdzɔenyenye dzi,
Tso fifia yi mavɔmavɔ me.
Aʋakɔwo ƒe Afetɔ ƒe dzonɔameme awɔ esia ade goe.
 8 Afetɔ gblɔ nya aɖe ɖe Yakob ŋu,
Eye wòva ƒo ɖe Israel dzi.
 9 Dukɔwo katã adze sii,
—Efrayim kple Samaria nɔlawo adze sii—
Ame siwo gblɔ le woƒe dada kple dzimesesẽ me be:
10 “Anyikpewoe mu dze anyi,
Ke kpe fufuwoe míatsɔ atui.
Gbotiwoe wolã,
Ke sedertiwoe míatsɔ aɖɔli woe.”
11 Afetɔ ana Rezin ƒe ketɔwo natso ɖe eŋu,
Eye wòade adã tame na eƒe futɔwo,
12 Siriatɔwo atso ɣedzeƒe eye Filistitɔwo atso ɣetoɖoƒe,
Woake nu aɖu Israel wòavɔ keŋkeŋ.
Esiawo katã megbe hã la, eƒe dɔmedzoe nu mefa o,
Eƒe alɔ gale dzi kokoko be yeaƒo wo.
13 Elabena dukɔ la metrɔ ɖe ame si le wo ƒom la ŋu o;
Womedi aʋakɔwo ƒe Afetɔ yome mɔ o.
14 Afetɔ atsrɔ̃ ta kple asike,
Gbe fẽ kple keti siaa ɖa le Israel le ŋkeke ɖeka dzi.
15 Dumemetsitsi kple bubumee nye ta la,
Eye nyagblɔɖila si fiaa alakpanu lae nye asike la.
16 Dukɔ sia kplɔlawo kplɔ wo trae,
Eye wole ame siwo kplɔm wole la tɔtɔm.
17 Esia tae Afetɔ makpɔ dzidzɔ ɖe woƒe ɖekakpuiwo ŋu o,
Eye makpɔ nublanui na woƒe tsyɔ̃eviwo kple ahosiwo o,
Elabena wo katã wonye xɔsegbelawo kple nu vɔ̃ɖi wɔlawo,
Eye ame sia ame ƒe nu gblɔa bometsinya.
Esiawo katã megbe hã la, eƒe dɔmedzoe nu mefa o,
Eƒe alɔ gale dzi kokoko be yeaƒo wo.
18 Elabena vɔ̃ɖinyenye le bibim abe dzo ene,
Le ŋùwo kple gbewo fiãm.
Abi avekɔewo,
Eye dzudzɔ ade dzi kɔtɔɔ.
19 Aʋakɔwo ƒe Afetɔ ƒe dɔmedzoe helĩhelĩ
Na anyigba la lé dzo,
Eye dukɔ la azu nake na dzo la.
Ame aɖeke makpɔ nublanui na nɔvia gɔ̃ hã o.
20 Woavuvu nu le ɖusime,
Ke dɔ aganɔ wo wum kokoko;
Woaɖu nu le miame,
Ke womaɖi ƒo o.
Wo dometɔ ɖe sia ɖe aɖu eya ŋutɔ ƒe abɔ ƒe lã,
21 Manase aɖu Efrayim,
Eye Efrayim aɖu Manase.
Woawɔ ɖeka atso ɖe Yuda ŋu.
Esiawo katã megbe hã la, eƒe dɔmedzoe nu mefa o,
Eƒe alɔ gale dzi kokoko be yeaƒo wo.

YESAYA 10
1  Baba na ame siwo dea se siwo agblẽ nu le amewo ŋu,
Eye wonɔa se siwo woatsɔ ate amewo ɖe anyi la ŋɔŋlɔ dzi,
 2 Ne woate ame tsɛwo ƒe nyawo ɖe to,
Ne woagbe nya dzɔdzɔe dɔdrɔ̃ na nye dukɔ la ƒe ame tsɛwo,
Ne ahosiwo nazu woƒe aboyonu,
Eye tsyɔ̃eviwo nazu woƒe nuhaha!
 3 Nu kae miawɔ le akɔntanagbe,
Ne tsɔtsrɔ̃ tso adzɔge va?
Ame ka gbɔe miasi ayi be wòakpe ɖe mia ŋu,
Eye afi kae miagblẽ miaƒe kesinɔnuwo ɖo?
 4 Naneke masusɔ wu be miado dɔgɔ̃e ɖe gamenɔlawo dome o,
Alo miaku atsi ame tsiaʋawo dome.
Esiawo katã megbe hã la, eƒe dɔmedzoe nu mefa o,
Eƒe alɔ gale dzi kokoko be yeaƒo wo.
 5 “Ahã! Asiriatɔ la,
Enye ameƒoti si matsɔ aɖe nye dziku afia,
Eye nye fɔbuame ƒe ati le woƒe asi me!
 6 Madɔe ɖe dukɔ gbexɔse la ŋu,
Ðe dukɔ si do dziku nam la ŋu;
Made se nɛ wòaha nu geɖe ahada adzo nu geɖe,
Eye wòafanya wo abe ba le kpɔdomee ene.
 7 Gake eya masusui alea o,
Eye maɖoe ɖe dzi me alea hã o;
Elabena ele dzi me nɛ be yeagblẽ nu,
Eye yeatsrɔ̃ dukɔ geɖewo, menye dukɔ ʋɛ aɖewo ko o.
 8 Elabena egblɔ be:
‘Ðe nye amegãwo katã menye fiawo oa?
 9 Ðe Kalno mele abe Karkemis ene oa?
Ðe Hamat mele abe Arpad ene oa?
Ðe Samaria mele abe Damasko ene oa?
10 Nye asi su mawu maɖinuwo ƒe fiaɖuƒewo dzi,
Siwo ƒe legbawo sɔ gbɔ wu esiwo le Yerusalem kple Samaria!
11 Ðe nyemawɔ Yerusalem kple eƒe legbawo
Abe ale si mewɔ Samaria kple eƒe mawu maɖinuawo ene oa?’
12 “Ne Afetɔ wu eƒe dɔwo katã nu le Zion To dzi kple Yerusalem vɔ la, ahe to na Asiria-fia ɖe eƒe dzimesesẽ kple eƒe dadaŋkuwo ta. 13 Elabena egblɔ be,
‘Nye asi ƒe ŋusẽ
Kple nye nunyae matsɔ awɔ esiae, elabena nunyalae menye.
Maɖe dukɔwo ƒe liƒowo ɖa,
Maha woƒe kesinɔnuwo,
Eye mabɔbɔ wo me nɔlawo ɖe anyi abe ŋusẽtɔ ene.
14 Ale si woƒoa asi ɖe xevitɔ mee la,
Nenemae nye asi asu dukɔwo ƒe nunɔamesiwo dzi;
Ale si wolɔa xevizi siwo wogblẽ ɖi la,
Nenemae malɔ anyigba blibo lae!
Ame aɖeke maƒo aʋala ake nu alo axlɔ̃ o.’”
15 Ðe fía ado eɖokui ɖe dzi ɖe ame si tsɔe le nu lãmee ŋua?
Ðe laxalaxa ado eɖokui ɖe dzi ɖe ame si le ehem la ŋua?
Ðe atizɔti ate ŋu anyè ame si le ezãm laa?
Ðe ati ate ŋu akɔ ame si menye ati o la ɖe dzia?
16 Eya ta Aƒetɔ vavã, aʋakɔwo ƒe Afetɔ
Ana Asiria ƒe ame damiwo naɖi ku glaŋglaŋ,
Ado dzo ɖe eƒe bubu te wòabi vlavlavla.
17 Israel ƒe Kekeli azu dzo,
Eye eƒe Kɔkɔetɔ la azu dzoƒaɖe;
Alé eye wòafiã eƒe gbewo kple ŋùwo le ŋkeke ɖeka dzi.
18 Atsrɔ̃ eƒe ave kple eƒe atikutsetsebɔ dzeaniawo keŋkeŋ;
Anɔ abe ale si dɔnɔ ɖia ku glaŋglaŋ ene.
19 Eye ati siwo susɔ ɖe eƒe avewo me la
Anɔ ʋɛ ale gbegbe be ɖevi sue ɖeka pɛ ate ŋu axlẽ wo aŋlɔ ɖi.
20 Le ŋkeke ma dzi la, Israel ƒe ame siwo susɔ
Kple Yakob ƒe aƒe la me tɔ siwo tsi agbe
Magaziɔ ɖe ame si ƒo wo la ŋu azɔ o;
Ke boŋ woaziɔ ɖe Afetɔ,
Israel ƒe Kɔkɔetɔ la ŋu le nyateƒe me.
21 Ame susɔe aɖewo koe atrɔ agbɔ,
Yakob ƒe ame susɔe aɖewo koe atrɔ ɖe Mawu Ŋusẽtɔ la ŋu.
22 Oo Israel, ne wò dukɔ sɔ gbɔ
Abe ƒutake ene hã la,
Ame ʋɛ siwo susɔ koe atrɔ agbɔ.
Woɖo woƒe tsɔtsrɔ̃ la ɖi,
Eye ʋɔnu dzɔdzɔe dɔdrɔ̃ anyè atsyɔ wo.
23 Ɛ̃, Aƒetɔ Dziɖulagã, aʋakɔwo ƒe Afetɔ, ahe tsɔtsrɔ̃ si wòɖo kplikpaa la
Ava anyigba blibo la katã dzi.
24 Eya ta ale Aƒetɔ Dziɖulagã, aʋakɔwo ƒe Afetɔ, gblɔe nye esi: “Nye dukɔ si le Zion, migavɔ̃ Asiriatɔ si tsɔ ati ƒo mi, eye wòɖe kpo ɖe mia dzi abe ale si Egipte wɔ ene la o. 
25 Elabena ekpɔtɔ vie ko fɔbubu la nu nayi, eye matrɔ nye dziku la ɖe wo tsɔtsrɔ̃ ŋu. 
26 Aʋakɔwo ƒe Afetɔ aɖe atam ɖe edzi, abe ale si wòɖu Midian dzi le Oreb-gakpe la gbɔ ene. Eƒe atikplɔ anɔ atsiaƒu dzi, eye wòadoe ɖe dzi abe ale si wòwɔe ɖe Egipte ŋu ene.
27 “Le ŋkeke ma dzi la, eƒe agba aɖe ɖa le wò abɔta,
Eye eƒe kɔkuti aɖe ɖa le wò kɔ,
Eye amidada ana kɔkuti la naŋe.”
28 Eva Ayat;
Eto Migron;
Eda eƒe agbawo ɖe Mikmas.
29 Eto tɔtsoƒe la;
Wotsi Geba dɔ;
Rama dzo nyanyanya, Saul ƒe du Gibea de afɔ du me.
30 Oo, Galim vinyɔnu, do boboe!
Oo, Laisa, ƒu to anyi!
Oo, wò, nublanuitɔ Anatot!
31 Madmena si dzo.
Gebim nɔlawo yi ɖabe.
32 Egbea ke atɔ ɖe Nob.
Eŋlɔ kɔ́ henyèe ɖe Zion vinyɔnu ƒe to la ŋu,
Ðe Yerusalem ƒe togbɛ la ŋu.
33 Kpɔ ɖa! Aƒetɔ vavã, aʋakɔwo ƒe Afetɔ,
Alã atilɔwo woamu gbloo;
Atso ati siwo de dzi bobobo,
Eye wòamu kɔkɔtɔwo aƒu anyi.
34 Etsɔ lãnu ƒo avekɔewo,
Eye ŋusẽtɔ aɖe amu Lebanon aƒu anyi.

YESAYA 11
1  Atilɔ adze tso Isai ƒe atitakpo me;
Eye dzedze atso eƒe kewo me atse ku.
 2 Eye Afetɔ ƒe gbɔgbɔ,
Nunya kple gɔmesese ƒe gbɔgbɔ,
Adaŋudede kple ŋusẽ ƒe gbɔgbɔ,
Sidzedze kple Afetɔ vɔvɔ̃ ƒe gbɔgbɔ anɔ edzi.
 3 Eye Afetɔ vɔvɔ̃ anyo eŋu.
Madrɔ̃ ʋɔnu ɖe nu si eƒe ŋkuwo kpɔ la nu o,
Eye maka mo na ame le nu si eƒe to se la ɖeɖe ko nu o.
 4 Adrɔ̃ ʋɔnu dzɔdzɔe na ame tsɛwo,
Eye wòaka mo na amewo ɖe eteƒe, le ame fafa siwo le anyigba dzi la ta.
Atsɔ eƒe numeti aƒo anyigba la,
Eye wòatsɔ eƒe numegbɔgbɔ awu ame vɔ̃ɖi la.
 5 Dzɔdzɔenyenyee anye alidziblanu le eƒe ali,
Eye nuteƒewɔwɔ anye alidziblanu le eƒe aklito.
 6 Amegãxi anɔ alẽvi gbɔ,
Eye lãklẽ atsyɔ akɔ ɖe gbɔ̃vi gbɔ,
Nyivi kple dzata kpakple lã dami woanɔ wo nɔewo gbɔ;
Eye ŋutsuvi sue aɖe akplɔ wo.
 7 Nyinɔ kple sisiblisi aɖu gbe le teƒe ɖeka,
Eye wo viwo atsyɔ akɔ ɖe wo nɔewo gbɔ.
Dzata aɖu gbe abe nyi ene.
 8 Ðevi nono afe le ƒli ƒe do nu,
Eye ɖevi si wotso no na la atsyɔ asi da vɔ̃ɖi ƒe do nu.
 9 Womawɔ vɔ̃ aɖeke o,
Eye womahe gbegblẽ ava nye to kɔkɔe blibo la dzi o,
Elabena sidzedze Afetɔ axɔ anyigba la dzi,
Abe ale si tsi yɔ atsiaƒu mee ene.
10 Gbe ma gbe Isai ƒe ke ado anye dzesi na dukɔwo.
Dukɔwo adi mɔfiame tso egbɔ,
Eye eƒe gbɔɖemeƒe azu atsyɔ̃.
11 Gbe ma gbe la, Afetɔ ado eƒe asi ɖa zi evelia, eye wòakplɔ eƒe dukɔ la ƒe ame susɔe siwo kpɔtɔ la tso Asiria, Egipte, Patros, Kus, Elam, Sinar, Hamat kple atsiaƒu me ƒukpowo dzi. 
12 Ado dzesiti ɖe dzi na dukɔwo, eye wòaƒo Israel ƒe ame siwo wokaka la nu ƒu, eye wòaƒo Yuda ƒe ame siwo woka hlẽ la nu ƒu tso anyigba ƒe go eneawo dzi.
13 Efrayim ƒe ŋuʋaʋã nu atso,
Eye woatsrɔ̃ ame siwo lé fu Yuda hã ɖa.
Efrayim maʋã ŋu Yuda o,
Eye Yuda hã malé fu Efrayim o.
14 Woaho ava Filistitɔwo ƒe aga nu le ɣetoɖoƒe;
Woawɔ ɖeka aha Ɣedzeƒetɔwo.
Woado woƒe asi ɖa ɖe Edom kple Moab ŋu,
Eye Amonitɔwo azu wo teviwo.
15 Afetɔ ana Egipte-ƒu la ƒe adɔ̃ nama,
Eye wòanyè eƒe asi ɖe Tɔsisi la dzi.
Le eƒe gbɔgbɔ ƒe dzoxɔxɔ me la, aƒo eƒe tɔʋu adreawo,
Eye wòana amewo nanɔ woƒe afɔkpa me atsoe.
16 Mɔ gã aɖe atso Asiria na eƒe dukɔ la ƒe ame susɔe siwo akpɔtɔ,
Abe ale si wònɔ na Israel le gbe si gbe woʋu tso Egipte-nyigba dzi ene.

YESAYA 12
1  Gbe ma gbe àgblɔ godoo be:
“Oo Afetɔ, meda akpe na wò,
Elabena togbɔ be èdo dziku ɖe ŋunye hã la,
Wò dzikua nu fa, eye nèfa akɔ nam.
 2 Kpɔ ɖa! Mawue nye nye xɔnametɔ.
Maɖo ŋu ɖe eŋu, dzika matso ƒonye o;
Elabena Yah Afetɔe nye nye ŋutete kple nye ŋusẽ,
Eye eya zu nye xɔnametɔ.”
 3 Miatsɔ dzidzɔ adu tsi
Le xɔname ƒe tsidzɔƒewo.
 4 Miagblɔ gbe ma gbe be:
“Mida akpe na Afetɔ, miyɔ eŋkɔ,
Miɖe eƒe nuwɔwɔwo fia le dukɔwo dome!
Miɖe gbeƒã be eƒe ŋkɔ de dzi.
 5 Midzi kafukafuhawo na Afetɔ, elabena ewɔ nu dzɔtsuwo.
Mina woanya esia le anyigba blibo la katã dzi.
 6 “Oo, Zion nɔla, do ɣli nàtso aseye,
Elabena Israel ƒe Kɔkɔetɔ la tri akɔ le dowòme.”

YESAYA 13
1  Nya si Yesaya, Amoz vi, kpɔ ɖe Babilon ŋu le ŋutega mee nye esi:
 2 “Mitu dzesiti ɖe to ƒeƒle tame.
Mido ɣli yɔ wo, mimia asi wo,
Ne woava bubumewo ƒe agbowo nu.
 3 Mede se na ame siwo meɖo.
Meyɔ nye aʋakalẽawo, ne maɖe nye dɔmedzoe afia
Ame siwo le aseye tsom dadatɔe.
 4 Mise ɖa! Hoowɔwɔ le ɖiɖim le towo dzi;
Abe ame gbogbo aɖewo ƒe hoowɔwɔ ene!
Mise ɖa! Fiaɖuƒewo,
Dukɔ siwo nu woƒo ƒu la ƒe hoowɔwɔ le ɖiɖim!
Aʋakɔwo ƒe Afetɔ le aʋakɔwo nu ƒom ƒu hena aʋawɔwɔ.
 5 Wotso anyigba didi aɖe dzi gbɔna,
Tso dziƒowo ƒe mlɔenu,
Afetɔ gbɔna kple eƒe dziku ƒe aʋawɔnuwo,
Be woatsrɔ̃ anyigba blibo la katã.
 6 Mifa avi, elabena Afetɔ ƒe ŋkeke la tu aƒe!
Egbɔna abe Ŋusẽkatãtɔ la ƒe tsɔtsrɔ̃ ene.
 7 Esia tae asiwo katã ado agblɔ,
Eye ame sia ame ƒe dzi alólo gbanaa.
 8 Vɔvɔ̃ lé amewo,
Wole ƒoƒom tititi le veve sem;
Abe nyɔnu si le ku lém ene.
Wofɔ ŋku ɖe wo nɔewo dzi gãa,
Eye vevesese na woƒe mo do ʋusrã.
 9 Kpɔ ɖa! Afetɔ ƒe ŋkeke la gbɔna
Egbɔna kple ŋutasesẽ le dɔmedzoe kpakple dziku helĩhelĩ me,
Ne wòana anyigba la nazu ŋɔdzinu,
Eye wòatsrɔ̃ nu vɔ̃ wɔlawo ɖa le anyigba la dzi gbidii.
10 Elabena dziƒoɣletiviwo kple woƒe ɣletivihatsotsowo gɔ̃ hã
Mana woƒe kekeli naklẽ o;
Ne ɣe dze la, ado viviti,
Eye dzinu maɖi o.
11 Mabia akɔnta anyigba la ɖe eƒe nu vɔ̃ɖi wɔwɔ ta,
Kple ame vɔ̃ɖiwo ɖe woƒe vodadawo ta.
Mana dadalawo ƒe dada nu natso,
Eye mabɔbɔ ŋutasẽlawo ƒe ɖokuidodoɖedzi ɖe anyi.
12 Mana amegbetɔ nave wu sika si ŋu wodza,
Eye mana amegbetɔ nave wu Ofir sika.
13 Esia tae mana dziƒo nadzo kpekpekpe,
Eye anyigba naʋuʋu le enɔƒe
Le aʋakɔwo ƒe Afetɔ ƒe dɔmedzoe kple dzikudogbe.
14 Abe sãde si wonya ɖe nu kple lãha si nu kplɔla mele o ene la,
Wo dometɔ ɖe sia ɖe aɖo ta eƒe dukɔ gbɔ;
Wo dometɔ ɖe sia ɖe asi ayi eƒe anyigba dzi.
15 Woaƒo lãnu ɖe ame sia ame si ŋu woake ɖo,
Eye ame sia ame si woalé la atsi yi nu.
16 Woaxlã wo viwo ɖe nu le wo ŋkume.
Woaha woƒe aƒewo,
Eye woadɔ wo srɔ̃wo gbɔ sesẽe.
17 “Kpɔ ɖa! Made adã tame na Mediatɔwo ɖe wo ŋu,
Ame siwo mebua klosalo ɖe naneke me o,
Eye sika medzroa wo o.
18 Woƒe dawo até ɖekakpuiwo aƒu anyi;
Womakpɔ nublanui na fu nɔdɔmee o,
Womakpɔ nublanui na viwo o.
19 Babilon, si nye fiaɖuƒewo ƒe atsyɔ̃,
Kaldeatɔwo ƒe adegbeƒonu kple atsyɔ̃,
Azu abe ale si Mawu trɔ Sodom kple Gomora bu anyi ene.
20 Ame maganɔ eme akpɔ o,
Eye maganye teƒe si ame anɔ o tso dzidzime yi dzidzime.
Arabiatɔ aɖeke matu eƒe agbadɔ ɖe afi ma o,
Eye alẽkplɔlawo mana woƒe lãhawo natsyɔ akɔ ɖe afi ma o.
21 Lã siwo nɔa dzogbe la atsyɔ akɔ anyi ɖe afi ma;
Eye favieʋutowo ayɔ woƒe xɔwo me.
Golowo anɔ afi ma,
Eye gbegbɔ̃wo aɖi adzrɔ le afi ma.
22 Lãwo anɔ xɔxlɔ̃m le eƒe xɔ tsralawo me,
Eye agbotoewo anɔ eƒe fiasã dzeaniawo me.
Eƒe azãgbe gogo, eye eƒe ŋkekewo mahe ɖe megbe o.”

YESAYA 14
1  Elabena Afetɔ akpɔ nublanui na Yakob, eye wòagatia Israel. Aɖo wo woƒe anyigba dzi, amedzrowo awɔ ɖeka kpli wo ahaku ɖe Yakob ƒe aƒe la ŋu. 
2 Dukɔ bubu me tɔwo akplɔ wo agbɔ va wo de, eye Israel ƒe aƒe la axɔ wo woazu etɔ ahanye eƒe dɔlaŋutsuwo kple dɔlanyɔnuwo le Afetɔ ƒe anyigba dzi; woalé ame siwo ɖe aboyo wo la, eye woabɔbɔ ame siwo ƒoa du ɖe wo te be woawɔ dɔ tsã la ɖe anyi.
3 Gbe si gbe Afetɔ ana gbɔdzɔe wò tso wò vevesese kple wò fuɖename kpakple dɔ sesẽ si wotsɔ do kluvi wòe me la, 4 àdo lo sia ɖe Babilon-fia ŋu be:
“Aleke wɔ ame si ƒoa du ɖe amewo te be woawɔ dɔ tsã la nu yi ale!
Aleke ameteteɖeanyi nu tso ale!
 5 Afetɔ ŋe ame vɔ̃ɖiwo ƒe ati,
Eŋe dziɖulawo ƒe atikplɔ,
 6 Ame si ƒoa dukɔwo le dɔmedzoe helĩhelĩ me atraɖii,
Ame si bɔbɔa dukɔwo ɖe anyi le dziku me hetia wo yome madzudzɔmadzudzɔe.
 7 Anyigba bliboa kpɔ gbɔdzɔe azɔ, edzi fa.
Amewo de asi aseyetsotso me.
 8 Sesewuwo kple
Lebanon ƒe sedertiwo ke hã kpɔ dzidzɔ le tawò
Hele gbɔgblɔm be: ‘Tso esime nèdze anyi la,
Atitsola aɖeke megatso ɖe mía ŋu kpɔ o.’
 9 Dzo ɖo lãme na Tsiẽƒe le to me ke hã le tawò
Be yeakpe wò ne èva.
Enyɔ ame siwo katã ŋu wɔna vɔ le le ku me la le tawò,
Anyigbadziɖula sẽŋutawo katã.
Ena dukɔwo ƒe fiawo katã tso le woƒe zikpuiwo dzi.
10 Wo katã wobia wò be:
‘Ðe wò hã nèva gbɔdzɔ abe míawo ke enea?
Èva zu abe míawo ke enea?
11 Keke Tsiẽƒe kee wò dada,
Wò kasaŋkuwo ƒe ɖiɖi la va do ɖo.
Nyéviwo ɖo ɖe tewò abe aba ene;
Ŋɔwo tsyɔ dziwò.’
12 Aleke nège tso dziƒoe ale,
Oo, wò ame si le keklẽm, agudzevi!
Aleke wolã wò ƒu anyi ale,
Wò, ame si ɖu dukɔwo dzi!
13 Ègblɔ le wò dzi me be: ‘Malia ayi dziƒowo.
Mali nye fiazikpui anyi ɖe Mawu ƒe ɣletiviwo tame,
Eye manɔ anyi ɖe takpeto la dzi
Le dziehe ʋĩi ke.
14 Malia ayi alilikpowo tame;
Mawɔ ɖokuinye abe Dziƒoʋĩtɔ la ene.’
15 Ke hã, Tsiẽƒee woahe wò ayii,
Le to me ʋĩi ke.
16 Ame siwo kpɔ wò la afɔ ŋku ɖe dziwò gãa;
Woalé ŋku ɖe ŋuwò nyuie ahabia be:
‘Ame si na anyigba la dzo nyanyanya,
Eye wòna fiaɖuƒewo ʋuʋu,
17 Ame si na anyigba zu gbegbe,
Eye wògbã eƒe duwo,
Ame si meɖea asi le eƒe gamenɔlawo ŋu woyia aƒe o lae nye esia?’
18 Dukɔwo ƒe fia bubuawo katã,
Ɛ̃, wo katã womlɔ anyi le bubu me,
Wo dometɔ ɖe sia ɖe mlɔ eya ŋutɔ ƒe yɔdo me.
19 Ke wotsɔ wò ya ƒu gbe, ɖiƒe meli na wò o,
Èle ko abe nu miemie si wotsri ene,
Ame siwo tsi yi nu,
Siwo wotsɔ ƒu gbe ɖe kpetowo me la, tsyɔ dziwò,
Abe nu kuku si wofanya kple afɔ ene.
20 Womatsɔ wò akpe ɖe fia mawo ŋu le yɔ me o,
Elabena ègblẽ wò ŋutɔ wò anyigba,
Èwu wò ŋutɔ wò amewo.
Womagayɔ ame vɔ̃ɖiwo ƒe dzidzimeviwo ŋkɔ gbeɖegbeɖe o.
21 “Midzra amewuƒe ɖo ɖi na viawo,
Le wo tɔgbuiwo ƒe fɔɖiɖi ta,
Ne woagatso axɔ anyigba la,
Eye woatso duwo ɖe anyigba la dzi keŋ o.”
22 Aʋakɔwo ƒe Afetɔ gblɔ be: “Matso ɖe wo ŋu.
Matsrɔ̃ ŋkɔ, ame susɔewo, viwo kple dzidzimeviwo ɖa le Babilon,” Afetɔ ye gblɔe.
23 “Matsɔe awɔ hlɔ̃madewo nɔƒe kple tɔba me, eye matsɔ tsɔtsrɔ̃ ƒe xa akplɔe,” aʋakɔwo ƒe Afetɔ ye gblɔe.
24 Aʋakɔwo ƒe Afetɔ ka atam be:
“Nu si meɖo ɖe tame la, eyae adzɔ;
Ale si tututu meɖoe la, nenemae wòava emee.
25 Magbã Asiriatɔ la le nye anyigba dzi,
Eye mafanyae ɖe nye towo dzi.
Eƒe kɔkuti la aɖe ɖa le wo ŋu,
Eye eƒe agba la aɖe ɖa le woƒe abɔta.”
26 Nu siae woɖo ɖe anyigba blibo la katã ŋu,
Esiae nye alɔ si wodo ɖe dzi ɖe dukɔwo katã ŋu.
27 Elabena aʋakɔwo ƒe Afetɔ ɖo nu,
Ame kae ate ŋu agblẽ eme?
Edo alɔ ɖe dzi,
Ame kae ate ŋu agbugbɔe?
28 Le ƒe si me Fia Ahaz ku la, woɖe gbeƒã sia be:
29 “Filistia, mèganɔ dzidzɔ kpɔm o, mia dometɔ aɖeke meganɔ dzidzɔ kpɔm,
Be woŋe ati si le mia ƒom la o.
Elabena da vɔ̃ɖi ado tso da la ƒe kè me,
Eye eƒe dzidzime anye da vɔ̃ɖi si lũa ʋɔ.
30 Ne ame tsɛwo ƒe ŋgɔgbeviwo ɖu nu,
Eye ame dahewo mlɔ anyi dedie la,
Matsɔ dɔtoto atsrɔ̃ wò kè,
Eye wò ame siwo susɔ la, woawu wo.
31 Oo, agbo, fa avi sesĩe! Oo, du, do ɣli!
Oo, Filistia, dzi aɖe le mi katã mia ƒo!
Elabena dzudzɔ tu tso dziehe gbɔna,
Eye wo dometɔ aɖeke meɖe eɖokui ɖe aga le wo tɔwo ŋu o.”
32 Nya kae woatsɔ aɖo eŋu na dukɔ la ƒe ame dɔdɔawo?
Eyae nye be, Afetɔ ɖo Zion gɔme anyi,
Eye wòanye sitsoƒe na eƒe dukɔa ƒe hiãtɔwo.

YESAYA 15
1  Nya ɖe Moab ŋu:
Woha Ar si le Moab le zã me,
Eye ɖoɖoe zi le enu.
Woha Kir si le Moab le zã me,
Eye ɖoɖoe zi le enu.
 2 Eyi Aƒe la me, eyi Dibon,
Eyi nuxeƒewo be yeaɖafa avi.
Moab fa avi sesĩe le Nebo kple Medeba ta.
Wolũ tawo katã kolikoli; wolũ gewo katã.
 3 Wota akpanya le eƒe kpɔdomeewo.
Ame sia ame le konyifaɣli dom le xɔwo tame kple ablɔwo me;
Eye wole avi fam hehehe le yiyim.
 4 Hesbon kple Eleale le ɣli dom;
Wose woƒe gbe le keke Yahaz ke.
Esia tae Moab ƒe aʋawɔlawo le ɣli dom.
Ele dzodzom nyanyanya.
 5 Nye dzi le ɣli dom le Moab ta.
Eƒe aʋasilawo va ɖo Zoar kple Eglat-Selisiya ke.
Wole avi fam to Luhit todzimɔ dzi yina;
Wole ɣli dom bobobo le Horonayim mɔ la dzi le vɔ̃ la ta.
 6 Elabena Nimrim tsiwo mie keŋkeŋ
Eye gbe mumuwo ƒu,
Gbewo tsrɔ̃, gbe mumu aɖeke megali o.
 7 Eya tae wotsɔ nu siwo susɔ ɖe woƒe nudzraɖoƒewo kple woƒe kesinɔnu siwo susɔ la dzoe;
Wotso amutitɔʋu la hedzo yi.
 8 Elabena ɣli la ɖi le Moab nutoa katã me kpe ɖo.
Konyifaɣli la de Eglaim ke;
Konyifaɣli la de Beer-Elim ke.
 9 Elabena ʋu yɔ Dimon-tsiwo me fũu.
Eye magahe nu bubuwo ava Dimon dzi:
Makplɔ dzata ade Moab ƒe aʋasilawo
Kple ame siwo susɔ ɖe anyigba la dzi.

YESAYA 16
1  Miɖo agbo ɖe anyigbadziɖula la,
Mikplɔe tso Sela miato gbegbe
Ayi Zion vinyɔnu ƒe to la dzi.
 2 Abe xevi si wonya le eƒe atɔ me ene la,
Nenemae Moab vinyɔnuwo anɔ le Arnon tɔtsoƒewo.
 3 “Mide adaŋu, miwɔ nyametsotso la dzi.
Mina miaƒe vɔvɔli le ŋdɔkutsu dzatsɛ nanɔ abe zã ene.
Miɣla ame siwo ka hlẽ la; migade sisila aɖeke asi o.
 4 Oo Moab, na nye ame siwo ka hlẽ la nanɔ mewò.
Nànye bebeƒe na wo tso nugblẽla la si me.
Ameteɖeanyila nu ayi,
Gbegblẽ la nu atso,
Ame siwo le amewo fanyam la atsrɔ̃ ɖa le anyigba la dzi.
 5 Ekema woatsɔ lɔlɔ̃ mavɔ ali ke fiazikpui aɖe.
Ame si abɔbɔ nɔ edzi le David ƒe agbadɔ me la anye nuteƒewɔla;
Adrɔ̃ ʋɔnu dzɔdzɔe, eye wòatso kpla ɖe nu dzɔdzɔe wɔwɔ ŋu.”
 6 Míese Moab ŋkɔ be edana—edana ŋutɔ—
Míese eƒe ɖokuidodoɖedzi, eƒe dada kple eƒe dɔmedzoedodo;
Gake eƒe numeɖiɖi azu dzodzro.
 7 Eya ta Moab afa na Moab.
Moabtɔwo katã afa avi sesĩe.
Ame siwo woƒo la afa konyi vevie ɖe Kir-Hareset ƒe waintsetse ƒuƒu kɔwo ta.
 8 Elabena Hesbon ƒe toŋugblewo yrɔ,
Sibma ƒe wainkawo,
Dukɔwo ƒe dziɖulawo fanya eƒe alɔ siwo dzi waintsetse nyuitɔwo le;
Wode Yazer ke;
Wovu ɖo gbegbe.
Eƒe alɔwo vu va ɖo atsiaƒu la gbɔ ke.
 9 Esia tae mafa avi le Sibma ƒe wainka ŋu abe ale si mefa na Yazer ene.
Oo, Hesbon kple Eleale, mafa aɖatsi ɖe mia dzi,
Elabena ɣli si wodona ɖe miaƒe dzomeŋɔlikutsetsewo kple miaƒe nuŋeŋewo ŋu la nu yi.
10 Woɖe dzidzɔ kple aseyetsotso ɖa le atikutsetsebɔ la me,
Eye aseyetsotso alo ɣli aɖeke mele ɖiɖim le waingblewo me o.
Wainfiãla megafiãa wain le wainfiãnuwo me o.
Elabena metsi ɣlidodo nu.
11 Esia tae nye dɔme le gbe ɖem ɖe Moab ŋu
Abe saŋku ƒe ɖiɖi ene,
Eye nye ƒodome hã le gbe ɖem ɖe Kir-Hareset ŋu.
12 Ne nu te Moab ŋu belibeli le togbɛ la dzi, eye wòva eƒe nuxeƒe la be yeado gbe ɖa hã la, eƒe gbedodoɖaa maɖe vi aɖeke o.
13 Esiae nye nya si Afetɔ gblɔ ɖe Moab ŋu tsã. 
14 Azɔ Afetɔ gblɔ be: “Le ƒe etɔ̃ me tututu, abe apaɖila ƒe ƒe ene la, woaɖi gbɔ Moab ƒe atsyɔ̃ le zitɔtɔ ƒomevi geɖewo me, eye ame ʋɛ aɖewo koe asusɔ, eye womaɖi naneke o.”

YESAYA 17
1  Nya ɖe Damasko ŋu:
“Kpɔ ɖa! Damasko maganye du azɔ o,
Azu aƒedo.
 2 Woagblẽ Aroer ƒe duwo ɖi;
Woazu teƒe siwo lãhawo atsyɔ akɔ ɖo
Eye ame aɖeke mado voɖi na wo o.
 3 Du sesẽwo nu ayi le Efrayim,
Fiaɖuƒe la nu ayi le Damasko;
Eye Siria ƒe ame susɔeawo ƒe bubu
Nu ayi abe Israel-viwo tɔ ene,” aʋakɔwo ƒe Afetɔ ye gblɔe.
 4 “Gbe ma gbe la, Yakob ƒe bubu ayi to,
Eye eƒe ŋutilã dami la aɖi ku.
 5 Anɔ abe ale si nuŋela ŋea nuku si le bo dzi,
Eye eƒe asi ŋea nukui ene,
Abe ame si le nuku siwo tsi agble me fɔm le Refaim Bali me la ene.
 6 Nuku siwo woafɔ koe asusɔ,
Anɔ ko abe ale si woƒoa amiti ene:
Kutsetse ɖiɖi eve alo etɔ̃ koe tsia eƒe ɖɔme ɖaa.
Wo ame ene alo atɔ̃ koe anɔ alɔ tsekuawo dzi,” Afetɔ, Israel ƒe Mawu, ye gblɔe.
7 Gbe ma gbe la, amegbetɔ atrɔ ɖe Ewɔla ŋu, eye eƒe ŋkuwo anɔ Israel Ƒe Kɔkɔetɔ la ŋu. 
8 Matrɔ kɔ ɖe vɔsamlekpui siwo nye eƒe asinudɔwɔwɔ ŋu o; eye maɖe ŋku ɖe nu si eƒe asibidɛwo wɔ la o, eɖanye Aserawo alo nu siwo dzi wodoa dzudzɔ ɖo o.
 9 Gbe ma gbe la, eƒe du sesẽawo azu abe teƒe si wogblẽ ɖi le ave me ene,
Abe atilɔ si amewo gblẽ ɖi le Israel-viwo ŋgɔ ene;
Azu aƒedo.
10 Elabena èŋlɔ wò xɔname ƒe Mawu la be;
Mèɖo ŋku wò Agakpe si nye wò mɔ́ sesẽ la dzi o.
Esia tae nède agble nyuiwo,
Eye nèdo ame tutɔ ƒe nu miemie fẽwo ɖe wo me.
11 Ètɔ kpɔ ɖe wò agble ŋu le ŋkeke me,
Eye èna wò nuku la mie le ŋdi,
Gake màŋe nuku aɖeke o le dɔléle kple veve si nu matsi o ƒe ŋkeke la dzi.
12 Mise ɖa! Dukɔ geɖewo le ʋunyaʋunya wɔm,
Wodze agbo abe atsiaƒu ene!
Dukɔwo ƒe hoowɔwɔ,
Wo ŋkɔ le ɖiɖim abe tɔ dzeagbowo ƒe hoowɔwɔ ene!
13 Dukɔwo ƒe hoowɔwɔ aɖi abe tsi geɖewo ƒe hoowɔwɔ ene.
Ablu ɖe wo ta, eye woasi ayi didiƒe ke,
Woanya wo ɖe nu abe tsro le ya nu le towo dzi,
Kple gbe ƒuƒu le ahom nu ene.
14 Fiẽ la, ŋɔdzi li.
Hafi ŋu nake la, womegali o.
Esiae nye ame siwo le mía ham la tɔ gome
Kple ame siwo le adzo dam mí la tɔ nua.

YESAYA 18
1   Baba na anyigba si dzi nu dzodzoe siwo ƒoa aʋala le,
Le Etiopia-tɔsisiwo ƒe nuto me!
 2 Edɔa amewo ɖa to atsiaƒu dzi,
Eye wonɔa aƒlaʋuwo me toa tɔwo dzi gblɔna be:
“Miheyi, mi dɔla ɖeablɛwo,
Miyi dukɔ, si dzɔ atsu ƒlalu, si ŋu zrɔ̃ la gbɔ,
Miyi dukɔ si wovɔ̃na na le afi sia afi,
Dukɔ sesẽ si ɖua duwo dzi,
Si ƒe anyigba tɔsisiwo kplɔ dzoe la gbɔ.”
 3 Mi anyigbadzinɔlawo katã kple mi anyigbadzitɔwo,
Nu si miakpɔ la, anɔ abe dzesitie wotu ɖe towo dzi ene,
Eye miase gbeɖiɖi aɖe abe lãdzoe woku ene.
 4 Elabena ale Afetɔ gblɔ nam ye nye esi:
“Manɔ anyi kpoo anɔ nɔnyeƒe kpɔm,
Anɔ abe dzoxɔxɔ gbãgbãgbã le ŋdɔ me ene,
Anɔ abe alilikpo si le zãmu dzam le nuŋeɣi ƒe dzoxɔxɔ me ene.
 5 Elabena hafi nuŋeɣi naɖo,
Esime seƒoɣi nu yi, eye seƒoƒo la zu waintsetse ɖiɖi la,
Atsɔ hɛ gobɛ alã alɔ sueawo,
Eye woalã eƒe kaawo ahaɖe wo ɖa.
 6 Woagblẽ wo katã ɖi na todzixe ƒonuwo
Kple anyigbadzilãwo.
Xe ƒonuwo anɔ edzi le dzomeŋɔli,
Eye anyigbadzilãwo katã anɔ edzi le nuŋeɣi.
 7 “Ɣemaɣi la, woatsɔ nunana vɛ na aʋakɔwo ƒe Afetɔ,
Tso dukɔ si dzɔ atsu ƒlalu, si ŋu zrɔ̃,
Dukɔ si wovɔ̃na na le afi sia afi,
Dukɔ sesẽ si ɖua duwo dzi,
Si ƒe anyigba tɔsisiwo kplɔ dzoe la gbɔ
Yi Afetɔ, aʋakɔwo ƒe Mawu la, ƒe ŋkɔ nɔƒe, Zion To la dzi.”

YESAYA 19
1  Nya ɖe Egipte ŋu:
Kpɔ ɖa! Afetɔ le alilikpo ɖidu dzi gbɔna Egipte.
Egipte ƒe mawu maɖinuawo adzo nyanyanya le eŋkume,
Eye dzi alólo ɖe dɔme na Egipte.
 2 “Made adã tame na Egiptetɔ ɖe Egiptetɔ ŋu,
Wo dometɔ ɖe sia ɖe awɔ aʋa kple nɔvia,
Ame sia ame atso ɖe nɔvia kple ehavi ŋu,
Du ɖe du ŋu, fiaɖuƒe ɖe fiaɖuƒe ŋu.
 3 Egipte ƒe gbɔgbɔ atɔtɔ le eme,
Eye magblẽ eƒe tameɖoɖowo me.
Woatrɔ ɖe mawu maɖinuawo,
Gbesalawo, ŋɔliyɔlawo kple nukalawo ŋu.
 4 Matsɔ Egipte ade asi na aƒetɔ sẽŋuta aɖe,
Eye fia sẽŋuta aɖe aɖu wo dzi,” Aƒetɔ vavã, aʋakɔwo ƒe Afetɔ, ye gblɔe.
 5 Tsi ano le atsiaƒu me,
Tɔsisi amie, eye eme aƒu kplakplakpla.
 6 Tɔsisiwo aʋẽ kũu;
Egipte ƒe Nil-tɔʋuwo amie, eye wo me aƒu kplakplakpla.
Aɖa kple keti anyunyɔ.
 7 Gbe siwo le Nil-tɔsisia ŋu le Nil-tɔsisia ƒe azizã nu
Kple anyigba siwo katã dzi woƒã nuku ɖo le Nil-tɔsisia to la aƒu.
Ya akplɔ wo adzoe, eye womaganɔ anyi o.
 8 Tɔƒodelawo afa konyi,
Ame siwo doa ƒu le Nil-tɔsisi me la axa nu,
Eye ame siwo daa asabu le tɔawo me la azu ʋɛ.
 9 Ŋukpe alé ɖetitrelawo
Kple aklalalɔ̃lawo.
10 Woagbã eƒe avɔlɔ̃lawo gudugudu;
Eye apadɔwɔlawo axa nu.
11 Zoan ƒe amegãwo tsi bome.
Eye susu mele Farao ƒe adaŋudela nyanuwo ƒe adaŋudede me o.
Aleke wɔ miagblɔ na Farao be:
“Nunyalawo ƒe vie menye,
Blemafiawo ƒe vie menye”?
12 Afi kae wò nunyalawo le azɔ?
Ne wonya la, wonegblɔ tame si aʋakɔwo ƒe Afetɔ ɖo ɖe Egipte ŋu la na wò.
13 Zoan-megãwo wɔ bometsinu;
Woble Nof-megãwo;
Egipte ƒe toawo ƒe ame ŋkutawo kplɔ dukɔa trae.
14 Afetɔ de tɔtɔgbɔgbɔ eme;
Eye wokplɔ Egipte trae le nu sia nu si wòwɔna la me,
Abe ale si ahamula nɔa yiyim sagasaga le eƒe xeɖeɖe me ene.
15 Egipte mate ŋu awɔ naneke
Na ta alo asike, nu miemie alo keti o.
16 Gbe ma gbe la, Egipte anɔ abe nyɔnu ene, adzo nyanyanya, eye ŋɔdzi alée le aʋakɔwo ƒe Afetɔ ƒe asi si wòdo ɖe dzi ɖe eŋuti la ta. 
17 Yuda-nyigba la azu ŋɔdzi na Egipte. Ne woyɔ eŋkɔ la, vɔvɔ̃ aɖo wo le tame si aʋakɔwo ƒe Afetɔ ɖo ɖe eŋu la ta.
18 Gbe ma gbe la, du atɔ̃ anɔ Egipte-nyigba dzi, siwo ado Kanaangbe, eye woaka atam na aʋakɔwo ƒe Afetɔ be yewoawɔ nuteƒe nɛ. Woayɔ duawo dometɔ ɖeka be Nugbãdu.
19 Gbe ma gbe la, vɔsamlekpui anɔ Egipte-nyigbaa titina na Afetɔ, eye sɔti anɔ eƒe liƒo dzi na Afetɔ. 
20 Anye dzesi kple ɖase na aʋakɔwo ƒe Afetɔ le Egipte-nyigba dzi; elabena woado ɣli ayɔ Afetɔ le ameteɖeanyilawo ta, eye wòaɖo xɔnametɔ gã aɖe ɖe wo, ame si aɖe wo. 
21 Afetɔ aɖe eɖokui afia Egiptetɔwo, Egiptetɔwo adze si Afetɔ gbe ma gbe, eye woasa vɔwo ahana nuwo, woaɖe adzɔgbe na Afetɔ eye woawɔ edzi. 
22 Afetɔ atu nu kple Egipte. Atu nu kplii, eye wòagada gbe le eŋu; woatrɔ ɖe Afetɔ ŋu, eye wòase woƒe kukuɖeɖe la, ada gbe le wo ŋu.

23 Gbe ma gbe la, mɔ gã aɖe atso Egipte ayi Asiria. Asiria ava Egipte, eye Egipte ayi Asiria; eye Egipte kple Asiria awɔ ɖeka asubɔ Mawu. 
24 Gbe ma gbe la, Israel anye etɔ̃lia akpe ɖe Egipte kple Asiria ŋu, eye wòanye yayra le anyigba la titina, 
25 elabena aʋakɔwo ƒe Afetɔ ayra wo agblɔ be: “Woayra nye dukɔ Egipte, nye asinudɔwɔwɔ Asiria kple nye domenyinu Israel.”

YESAYA 20
1  Le ƒe si me Asiria-fia Sargon dɔ Tartan wòva Asdod la, ewɔ aʋa kple Asdod hexɔe. 
2 Ɣemaɣie Afetɔ de gbe asi na Yesaya, Amoz vi be: “Heyi nàɖe akpanya le ali; eye nàɖe wò afɔkpawo le afɔ.” Eye wòwɔe nenema heɖe ama le afɔ ƒuƒlu le yiyim.
3 Eye Afetɔ gagblɔ be: “Ale si nye subɔla Yesaya ɖe ama hele afɔ ƒuƒlu le yiyim ƒe etɔ̃ sɔŋ, wònye dzesi kple nukunu ɖe Egipte kple Etiopia ŋu la, 
4 nenemae Asiria-fia akplɔ Egipte ƒe aboyomewo kple Etiopia ƒe aboyomewo adzoe, ŋutsuviwo kple amegãɖeɖiwo siaa, woaɖe ama anɔ afɔ ƒuƒlu, eye woƒe gbinu atsi ƒeƒle, wòanye amaɖeɖe Egipte. 
5 Dzika atso wo ƒo, eye ŋukpe alé wo le Etiopia si ŋu woɖo ŋu ɖo kple Egipte si nye woƒe dada la ŋu. 
6 Gbe ma gbe la, ƒutanyigba sia dzi nɔlawo agblɔ be: ‘Mikpɔ nu si dzɔ ɖe ame si dzi míeda míaƒe mɔkpɔkpɔ ɖo, si gbɔ míesi yi be wòaxɔ na mí tso Asiria-fia si me la dzi ɖa! Aleke míawɔ asi fifia?’”

YESAYA 21
1 Nya ɖe gbegbe si le ƒuta la ŋu:
Egbɔna abe ahom si tu tso anyiehe ene,
Tso gbegbe, tso anyigba dziŋɔ aɖe dzi.
 2 Woɖe ŋutega dziŋɔ aɖe fiam:
Ametatrɔla le ame ta trɔm,
Eye nugblẽla le nu gblẽm.
Elam, ho yi! Media, ɖe to ɖee!
Matsi hũɖeɖe siwo katã wòhe vɛ la nu.
 3 Eya ta metɔtɔ vevie.
Mele veve sem
Abe nyɔnu funɔ si le ku lém ene.
Metɔtɔ ale gbegbe be nyemegale nu sem o;
Dzidzi ƒom ale gbegbe be nyemegale nu kpɔm o.
 4 Nye dzi ʋuʋu; ŋɔdzi na nye lãme le ƒoƒom kpakpakpa.
Fiẽ si mekpɔa mɔ na vevie la zu ŋɔdzi nam.
 5 Miɖo kplɔ̃, miɖo zikpuiawo!
Miɖu nu miano nu!
Mi amegãwo, mitso, misi ami na akpoxɔnu!
 6 Elabena ale Afetɔ gblɔ nam ye nye esi:
“Yi nàɖo gbetakpɔla, ne nàna wòagblɔ nu si wòkpɔ.”
 7 Ekpɔ aʋatasiaɖam si hem sɔ eve le,
Aʋatasiaɖam si hem tedziwo le,
Aʋatasiaɖam si hem kposɔwo le.
Eɖo ŋku anyi heƒu to anyi vevie.
 8 Eye wòɖe gbe abe dzata ene be:
“Oo Afetɔ, metɔ ɖe gbetakpɔxɔ la dzi ɖaa le ŋkeke me,
Eye mele nye dzɔƒe zã sia zã.
 9 Kpɔ nu si gbɔna ɖa:
Ŋutsuwo le aʋatasiaɖam si hem sɔ eve le la me!”
Eye wòdo ɣli gblɔ be:
“Emu loo! Babilon mu!
Egbã eƒe mawuwo ƒe legbawo katã ƒu anyi!”
10 Oo, nye ame siwo woƒo,
Nye nuku tso nye nukuƒoƒe,
Megblɔ nya si mese tso aʋakɔwo ƒe Afetɔ, Israel ƒe Mawu gbɔ la na mi.
11 Nya ɖe Duma ŋu:
Ame aɖe do ɣli le yɔyem tso Seir be:
“Dzɔla, zã va yi vɔa?
Dzɔla, zã va yi vɔa?”
12 Dzɔla la ɖo eŋu be:
“Ŋu le keke ge, eye zã agado.
Ne miedi be yewoabia la, mibia.
Migava faa!”
13 Nya ɖe tagba ŋu:
Oo, mi Dedan mɔzɔhawo,
Miatsi ave me adɔ le tagba.
14 Mitsɔ tsi yi ɖakpe tsikɔwuitɔ.
Oo, Tema-nyigba dzi tɔwo,
Mitsɔ nuɖuɖu yi ɖakpe ame si le sisim.
15 Elabena yi nue wosi le, yi si woɖe le aku me,
Dati si me wovu, kple aʋa la ƒe nyanyra nue wosi le.
16 Elabena ale Afetɔ gblɔ nam ye nye esi: “Le ƒe ɖeka me tututu, abe apadɔwɔla ƒe ƒe ene la, Kedar ƒe ŋutikɔkɔe la katã nu ayi. 
17 Kedar ƒe aʋawɔla, aŋutrɔdala susɔeawo, azu ʋɛ, elabena Afetɔ, Israel ƒe Mawu, ye gblɔe.”

YESAYA 22
1  Nya ɖe Ŋutegabali la ŋu:
Nya kae dzɔ ɖe dziwò, hafi mi katã mieyi xɔ ta?
 2 Zitɔtɔ yɔ mewò fũu,
Hoowɔwɔ kple aseyetsotso ƒe du.
Wò ame siwo wowu la, menye yi nue wotsi o,
Eye menye aʋa mee woku le hã o.
 3 Wò dziɖula ŋutasẽlawo katã si le ɣeyiɣi ɖeka me.
Wolé wo dati mazamazãe.
Wolé ame siwo wokpɔ la katã.
Togbɔ be wosi yi didiƒe ke hã.
 4 Esia tae megblɔ be: “Miɖe ŋku ɖa le ŋunye.
Mafa avi vevie.
Migate kpɔ be yewoafa akɔ nam
Le nye dukɔ ƒe vinyɔnu si wotsrɔ̃ la ta o.
 5 Elabena tɔtɔ, tsɔtsrɔ̃ kple dzodzo nyanyanya ƒe ŋkekee wònye
Tso Aƒetɔ Dziɖulagã, aʋakɔwo ƒe Afetɔ gbɔ
Le Ŋutegabali la me.
Wole gli gbãm,
Eye ɣli ɖi ɖo ɖe to la gbɔ.
 6 Elam tsɔ daku ɖe asi
Tasiaɖam siwo amewo yɔ kple sɔwo la kpe ɖe eŋu;
Kir klo nu le akpoxɔnu ŋu.
 7 Aʋatasiaɖamwo
Ayɔ wò bali nyuitɔwo me fũu,
Eye sɔwo atɔ ɖe dugbo la nu,
 8 Eye woaɖe Yuda ƒe takpɔnu ɖa.
“Gbe ma gbe la, àkpɔ Avexɔ la ƒe aʋawɔnuwo dzraɖoƒe ɖo ɖa, 
9 eye miakpɔ David Ƒe Du la ƒe gbagbãƒe geɖeawo. Eye miaƒo anyigbeta la ƒe tsiwo nu ƒu. 
10 Miaxlẽ Yerusalem xɔwo, eye miagbã xɔwo be miatsɔ ali ke gliawoe. 
11 Miaɖe tsiʋe ɖe gli eveawo dome na ta xoxo la me tsiwo, ke miatrɔ kɔ ɖe Ewɔla Gã ya ŋu o, eye mialé ŋku ɖe ame si wɔe tso gbe aɖe gbe ke la ŋu o.
12 Gbe ma gbe Aƒetɔ Dziɖulagã, aʋakɔwo ƒe Afetɔ,
Ayɔ ame hena avifafa, konyifafa,
Talulũ kple akpanyatata.
13 Ke wole aseye tsom, eye wole dzidzɔ kpɔm,
Wole nyi wum, eye wole alẽ tsom,
Wole lã ɖum, eye wole wain nom.
Hegblɔ be, ‘Mina míaɖu nu ano nu, elabena etsɔ míele kuku ge.’”
14 Ke aʋakɔwo ƒe Afetɔ gblɔ ɖe to me nam be: “‘Womalé avu ɖe miaƒe vodada sia ta o va se ɖe esime miaku,’ Aƒetɔ Dziɖulagã Afetɔ, aʋakɔwo ƒe Mawu lae gblɔe.”
15 Ale Aƒetɔ Dziɖulagã, aʋakɔwo ƒe Afetɔ gblɔe nye esi: “Tso nàyi aƒedzikpɔla Sebna, ame si le aƒea nu la gbɔ, eye nàbiae be, 
16 ‘Nu kae le afi sia na wò, eye ame kae le afi sia na wò hafi nèle yɔdo ɖem na ɖokuiwò ɖe afi sia?’ Ele yɔdo ɖem na eɖokui ɖe kɔkɔƒe; eye wòle gbɔɖemeƒe wɔm na eɖokui ɖe agakpe me. 
17 ‘Oo ŋutsu, kpɔ ɖa, Afetɔ atsɔ wò axlã ɖe anyi sesĩe, eye wòalé wò goŋgoŋ. 
18 Aŋlɔ wò nogoe atsɔ aƒu gbe ɖe anyigba gbadzaa aɖe dzi. Afi mae nàku ɖo, eye afi mae tasiaɖam siwo nye atsyɔ̃ na wò la azu ŋukpe na wò aƒetɔ ƒe aƒe la le. 
19 Maɖe wò ɖa le nɔwòƒe, eye maxɔ dɔ le asiwò.
20 “‘Gbe ma gbe la, mayɔ nye subɔla Eliyakim, si nye Hilkiya vi, 
21 eye mado wò awu ʋlaya la nɛ, matsɔ wò alidziblanu abla ali dzi nɛ, eye matsɔ ɖoƒe si nèle la ade asi nɛ. Eye wòanye fofo na Yerusalem nɔlawo kple Yuda ƒe aƒe la. 
22 Matsɔ David ƒe aƒe la ƒe safui aɖo abɔta nɛ. Ne eʋui la, ame aɖeke matui o; eye ne etui la, ame aɖeke maʋui o. 
23 Maƒoe ɖe teƒe sesẽ abe tsyoti ene, eye wòazu fiazikpui si ŋu bubu le na fofoa ƒe aƒe. 
24 Woaku fofoa ƒe aƒe ƒe ŋutikɔkɔe la katã, viawo kple dzidzimeviwo, siwo nye agba suewo katã kple agba goboewo katã kpakple ze gãwo katã, ɖe eŋu.
25 Aʋakɔwo ƒe Afetɔ be: “Gbe ma gbe la tsyoti si woƒo ɖe teƒe sesẽ la aho, aŋe, age, eye agba si woku ɖe eŋu la dome agblẽ, elabena Afetɔ ŋutɔe gblɔe.”

YESAYA 23
1  Nya ɖe Tiro ŋu:
Mi Tarsis tɔdziʋuwo, miƒu asi nu!
Elabena wotsrɔ̃ tɔdziʋudzeƒe la, afi ma yiyi megali o.
Wosee le Kitim-nyigba dzi ke.
 2 Mi ƒutatɔwo, mizi ɖoɖoe.
Sidon-sitsala siwo toa atsiaƒu dzi la yɔ mewò taŋ.
 3 Wotsɔ Sihor ƒe agblemenukuwo
Kple Nil ƒe nuŋeŋewo, siwo nye adzɔnuwo, to tsi geɖewo dzi,
Wohe dukɔwo ƒe viɖewo vɛ.
 4 Oo Sidon, ŋu nekpe wò, wò atsiaƒu ƒe mɔ́ sesẽ,
Elabena atsiaƒu la gblɔ be:
“Nyemelé ku o, nyemedzi vi o,
Nyemenyi ɖekakpuiwo alo ɖetugbuiwo wotsi o.”
 5 Amewo ase veve vevie le nya si woase tso Tiro ŋu,
Abe ale si wònɔ esi wose nu si dzɔ ɖe Egipte dzi ene.
 6 Mitso ƒu yi Tarsis!
Mi ƒutatɔwo, mifa konyi vevie!
 7 Miaƒe du si tsoa aseye tso gbe aɖe gbe ke, tso blema ke, lae nye esia?
Eƒe afɔwo kplɔnɛ dea keke didiƒe ʋĩi ke tsã wòɖanɔa afi ma.
 8 Ame kae ɖo nu sia ɖe Tiro ŋu,
Eya, si ɖɔa fiakuku na ame,
Si ƒe asitsalawo nye amegãwo,
Si ƒe nudzralawo nye bubumewo le anyigba dzi katã?
 9 Aʋakɔwo ƒe Afetɔ ŋutɔe ɖoe
Be yeaɖi gbɔ eƒe dada kple atsyɔ̃ɖoɖowo katã
Ne yeado vlo ame siwo katã ŋu wodea bubui le anyigba bliboa dzi.
10 Oo, Tarsis vinyɔnu, gbagba ɖe wò anyigba dzi abe Nil-tɔsisi ene.
Tɔdziʋudzeƒe aɖeke megali o.
11 Edo eƒe asi ɖe atsiaƒu dzi;
Eʋuʋu fiaɖuƒewo.
Afetɔ ɖe gbe be woatsrɔ̃ Foinike ƒe mɔ́ sesẽwo keŋkeŋ.
12 Eye wògblɔ be: “Mègatso aseye azɔ o,
Wò Sidon ɖetugbui leaƒe si wote ɖe anyi,
Tso, nàtso ƒu ayi Kitim.
Màkpɔ gbɔdzɔe le afi ma hã o.”
13 Kpɔ Kaldeatɔwo ƒe anyigba la ɖa!
Esiae nye dukɔ la—ke menye Asiria ye o—
Woawoe wɔe wòzu gbemelãwo nɔƒe.
Wotu dudzidzelawo ƒe xɔ tsralawo,
Eye wogbã woƒe mɔ́ sesẽwo ƒu anyi,
Ale wòzu glikpo.
14 Mi Tarsis tɔdziʋuwo, mifa avi sesĩe,
Elabena wogbã miaƒe mɔ́ sesẽ la.
15 Ɣemaɣi la, woaŋlɔ Tiro be ƒe blaadre sɔŋ, si nye fia ƒe agbenɔƒe. Le ƒe blaadre la ƒe nuwuwu la, ava eme na Tiro, abe gbolo si ŋu wole ha dzim ɖo ene be:
16 “Oo, gbolo si woŋlɔ be, tsɔ kasaŋku ɖe asi nàtsa le dua me godoo.
Ƒo kasaŋku la aɖaŋutɔe;
Dzi ha geɖe,
Ale be woaɖo ŋku dziwò.”
17  Le ƒe blaadre la ƒe nuwuwu la, Afetɔ atrɔ ɖe Tiro ŋu, eye Tiro agadze eƒe gbolohoxɔxɔ gɔme, eye wòawɔ gbolo kple xexea me fiaɖuƒe siwo katã le anyigba dzi. 
18 Ke eƒe viɖe kple eƒe gboloho la azu nu kɔkɔe na Afetɔ. Womadzrae ɖo o, eye womali kɔe ɖi o, elabena eƒe gboloho la azu ame siwo le Afetɔ ŋkume la tɔ, ne woaɖu nu aɖi ƒo, eye woado awu nyuiwo.

YESAYA 24
1  Kpɔ ɖa! Afetɔ aɖi gbɔlo anyigba la, eye wòatsi ƒuƒlu.
Atrɔ anyigba la ƒe ŋkume abu anyi, eye wòaka edzinɔlawo ahlẽ.
 2 Nu ɖeka tɔgbi adzɔ ɖe ame sia ame dzi:
Dukɔ la kple nunɔla siaa,
Dɔlaŋutsu anɔ abe eƒe aƒetɔ ene,
Dɔlanyɔnu abe eƒe aƒenɔ ene,
Nuƒlela abe nudzrala ene,
Agbanatɔ abe agbanadola ene,
Fetɔ abe fenyila ene.
 3 Anyigba la aɖi gbɔlo keŋkeŋ;
Woahae keŋkeŋ,
Elabena Afetɔe gblɔ nya sia.
 4 Anyigba la le nu xam; eye wòlé akpɔ̃.
Anyigba la yrɔ sũu, eye edome le gbegblẽm.
Dukɔ la ƒe ame ŋkutawo yrɔ sũu.
 5 Anyigba la dzi nɔlawo ƒo ɖi anyigba la,
Elabena wogblẽ seawo ɖi,
Wotrɔ ɖoɖoawo,
Eye wotu nubabla mavɔ la.
 6 Esia tae fiƒode le anyigba la ɖum,
Eye edzinɔlawo ɖi fɔ.
Esia tae anyigba la dzi nɔlawo zu ʋɛ,
Eye amegbetɔ ʋɛ aɖewo koe susɔ.
 7 Wain yeye le nu xam, wainka yrɔ sũu,
Eye ame siwo katã ƒe dzi kpɔa dzidzɔ la le hũ ɖem.
 8 Axatsɛwo ƒe gbe viviwo nu tso;
Aseyetsolawo ƒe hoowɔwɔ nu yi;
Saŋkuwo ƒe gbe viviwo nu tso.
 9 Womegadzia ha ɖe wain nono ŋu o,
Eye aha muame le vevem le nu me na enolawo.
10 Wogbã du si wogblẽ ɖi la;
Wotu xɔwo katã ƒe ʋɔtruwo, ame aɖeke mate ŋu age ɖe wo me o.
11 Wole ɣli dom le kpɔdomeewo le wain dim.
Dzidzɔkpɔkpɔwo katã nu yi;
Vivisese bu le anyigba la dzi.
12 Du la zu aƒedo;
Wogbã agbo la keŋkeŋ.
13 Elabena aleae wòanɔ le anyigba la dzi le dukɔwo dome:
Abe ale si woƒoa amiti ene,
Abe ale si wofɔa nu siwo susɔ, ne wainxaxa nu va yi ene.
14 Woakɔ woƒe gbe dzi,
Atso aseye.
Woaɖe gbeƒã Afetɔ ƒe gãnyenye tso ƒu gome.
15 Esia tae woakafu Afetɔ le kekelitsoƒe;
Kple Afetɔ, Israel ƒe Mawu la, ƒe ŋkɔ le ƒukpowo dzi.
16 Míese haƒoƒo tso anyigba ƒe mlɔenu be:
“Ŋutikɔkɔe na Dzɔdzɔetɔ la!”
Gake megblɔ be: “Nye ya nu te ŋunye, nu te ŋunye belibeli!
Baba nam! Alakpanuwɔlawo wɔa alakpanu;
Alakpanuwɔlawo le alakpanuwɔwɔ dzi.”
17 Ŋɔdzi, ʋewo, kple mɔ̃wo le mi anyigbadzinɔlawo lalam.
18 Ame si ase ŋɔdzinu ŋkɔ ahasi la, age dze ʋe me,
Eye ame si ado le ʋea me la, mɔ̃ aɖee.
Elabena woaʋu dziƒowo ƒe tsigbowo nu,
Eye anyigba ƒe agunuwo aʋuʋu.
19 Anyigba la fe kpla;
Woʋuʋu anyigba la;
Anyigba la le ʋuʋum keɖekeɖe.
20 Anyigba la le ya mum sagasaga abe ahamula ene,
Eye wòle nyenyem abe agbadɔ le ya nu ene.
Eƒe dzidada do agba ɖe edzi.
Adze anyi, eye magafɔ o.
21 Gbe ma gbe la, Afetɔ atrɔ ɖe dziƒoʋakɔ siwo le dzi
Kple anyigbadzifia siwo le anyigba dzi la ŋu.
22 Woaƒo wo nu ƒu
Abe ale si woƒoa gamenɔlawo nu ƒu ɖe do me ene,
Eye woatu wo ɖe tomegaxɔ me;
Eye woatrɔ susu ɖe wo ŋu le ŋkeke geɖewo megbe.
23 Ɣleti si sɔ tegblẽe la ƒe mo tsi dãa,
Eye ŋukpe lé ɣe si le keklẽm la,
Elabena aʋakɔwo ƒe Afetɔ zu Fia le Zion To dzi kple Yerusalem
Le ŋutikɔkɔe me, le eƒe dukɔ la ƒe ametsitsiwo ŋkume.

YESAYA 25
1  Oo Afetɔ, wòe nye nye Mawu.
Medo wò ɖe dzi, mekafu wò ŋkɔ,
Elabena èwɔ nukunuwo,
Nu siwo nèɖo tso blema ke,
Le nuteƒewɔwɔ kple nyateƒe me.
 2 Elabena èna du la zu aƒedo,
Du sesẽ la zu glikpo,
Du bubu me tɔwo ƒe mɔ́ sesẽ meganye du azɔ o,
Womagagbugbɔe atso akpɔ o.
 3 Esia tae dukɔ sesẽwo akafu wò;
Dukɔ sẽŋutawo ƒe duwo avɔ̃ wò.
 4 Elabena èzu mɔ́ sesẽ na ame tsɛ,
Mɔ́ sesẽ na ame dahe le eƒe xaxa me,
Sitsoƒe tso yatsi nu,
Kple vɔvɔli tso dzoxɔxɔ nu.
Ne ŋutasẽla ƒe gbɔgbɔ fuxefuxe le abe yatsie le ƒoƒom ɖe gli ŋu ene,
 5 Abe dzoxɔxɔ le kuɖiɖinyigba dzi ene hã la,
Àna ame tutɔwo ƒe hoowɔwɔ nayi to.
Ale si alilikpo ƒe vɔvɔli nana dzoxɔxɔ ɖiɖina la,
Nenemae ŋutasẽlawo ƒe haƒoƒo nu atsii.
 6 Aʋakɔwo ƒe Afetɔ aɖo kplɔ̃ na dukɔwo le to sia dzi,
Atsɔ nuɖuɖu damiwo aɖo kplɔ̃,
Atsɔ wain nyuitɔwo aɖo kplɔ̃,
Nuɖuɖu dami siwo me ƒutomemi le,
Wain siwo me dzae wòatsɔ aɖo kplɔ̃ lae.
 7 Aɖe nutsyɔnu si tsyɔ dukɔwo katã dzi
Kple avɔ si tsyɔ dukɔwo katã dzi la ɖa le to sia dzi.
 8 Ami ku tegbee,
Eye Aƒetɔ Dziɖulagã Afetɔ atutu aɖatsi ɖa le ŋkuwo katã me.
Aɖe eƒe dukɔ ƒe ŋukpe ɖa le anyigba bliboa dzi,
Elabena Afetɔ ŋutɔe gblɔe.
 9 Gbe ma gbe la, woagblɔ be:
“Kpɔ ɖa! Mía Mawue nye esi!
Míeda míaƒe mɔkpɔkpɔ ɖe eya amea dzi,
Eyae aɖe mí.
Afetɔe nye esi!
Míeda míaƒe mɔkpɔkpɔ ɖe eya amea dzi.
Mina míatso aseye, eye míakpɔ dzidzɔ ɖe eƒe xɔname ŋu.”
10 Elabena Afetɔ ƒe asi anɔ to sia dzi,
Eye woafanya Moab ɖe enɔƒe
Abe ale si wofanyaa gbe ɖe aɖu si woli kɔe me ene.
11 Ake abɔ aƒo Moab,
Abe ale si tsiƒula kea abɔ me ƒua tsii ene,
Eye wòatsɔ eƒe asiwo aƒoe aɖaŋutɔe
Atsɔ abɔbɔ eƒe dada ɖe anyi.
12 Amu du sesẽ la kple eƒe gli kɔkɔ siwo kpɔa eta la
Aƒu anyi;
Abɔbɔe ɖe anyi ava ɖo keke anyigba ke, eye wòatee ɖe ke me.

YESAYA 26
1  Gbe ma gbe la, woadzi ha sia le Yuda-nyigba dzi be:
“Du sesẽ aɖe le mía si.
Etsɔ xɔname wɔ gli kple kpo ɖe eŋu keŋ.
 2 Miʋu agboawo, ne dukɔ dzɔdzɔe la nage ɖe eme,
Dukɔ si wɔa nuteƒe.
 3 Àkpɔ ame si ziɔ ɖe ŋuwò bliboe la ta;
Àna ŋutifafa si nɔa anyi ɖaa la wo,
Elabena ŋuwòe woɖo ŋu ɖo.
 4 Miɖo ŋu ɖe Afetɔ ŋu ɖaa,
Elabena Yah Afetɔe nye Agakpe tegbee.
 5 Elabena eƒu kɔkɔƒenɔlawo anyi, ebɔbɔ du kɔkɔ la ɖe anyi.
Ebɔbɔe ɖe anyi,
Ebɔbɔe va se ɖe anyigba ke;
Exlãe ɖe ke me.
 6 Afɔ afanyae;
Fukpelawo kple ame tsɛwo ƒe afɔwoe afanyae.”
 7 Ame dzɔdzɔe ƒe toƒe le tẽe.
Esi nènye nu dzɔdzɔe wɔla ta la,
Àna ame dzɔdzɔe ƒe mɔ dzi nasɔ.
 8 Oo Afetɔ, esi míele wò ʋɔnudɔdrɔ̃ ƒe mɔ dzi la,
Wòe míele mɔ kpɔm na.
Wò ŋkɔ kple wò ŋkuɖodzi dzro mí vevie.
 9 Èdzroa nye ameti bliboa vevie le zã me,
Ɛ̃, nye gbɔgbɔ dia wò vevie;
Elabena ne wò ʋɔnudɔdrɔ̃ va anyigba dzi la,
Anyigbadzinɔlawo srɔ̃a dzɔdzɔenyenye.
10 Ne wove ame vɔ̃ɖi nu hã la,
Masrɔ̃ dzɔdzɔenyenye o.
Le dzɔdzɔenyenyenyigba dzi gɔ̃ hã, awɔ nu madzɔmadzɔ,
Eye medzea si Afetɔ ƒe gãnyenye o.
11 Oo Afetɔ, wò alɔ le dzi, ke womele ekpɔm o.
Woakpɔ ale si nètsɔa dzo ɖe wò dukɔ la ŋu, eye ŋu akpe wo.
Ɛ̃, wò dzo afiã wò ketɔwo.
12 Oo Afetɔ, àna ŋutifafa mí,
Elabena nu sia nu si míewɔ la,
Èwɔe de go na mí.
13 Oo Afetɔ mía Mawu, aƒetɔ bubuwo ɖu mía dzi kpɔ kpe ɖe ŋuwò,
Gake wò ɖeka ko ƒe ŋkɔ míeyɔ.
14 Woku; womaganɔ agbe o.
Esi woku, eye wɔna vɔ le wo ŋu ta la, womagafɔ o.
Elabena ètrɔ ɖe wo ŋu,
Be nàtsrɔ̃ wo gbidii ahatutu woƒe ŋkɔwo ɖa keŋkeŋ.
15 Oo Afetɔ, èna dukɔ la dzi ɖe edzi;
Èna dukɔ la dzi ɖe edzi;
Èkɔ ɖokuiwò ŋu.
Èkeke anyigba la ƒe liƒowo katã ɖe enu.
16 Oo Afetɔ, wotrɔ ɖe ŋuwò le woƒe xaxaɣi;
Esi nèhe to na wo la, wodo dalĩ do gbe ɖa.
17 Ale si funɔ si ƒe vidziɣi ɖo
Léa ku eye wòdoa ɣli le vevesese ta la,
Afetɔ, nenemae míenɔ le tawò.
18 Míefɔ fu, eye míelé ku,
Gake ɖeko wòle abe yae míedzi ene.
Míehe xɔname va anyigba la dzi o,
Eye míedzi ame aɖeke ne wòanɔ anyigba la dzi o.
19 “Wò ame kukuwo agbɔ agbe.
Nye kukuawo afɔ ɖe tsitre.
Mi ketumetɔwo,
Minyɔ, ne miatso aseye!
Elabena miaƒe zãmu le abe esi dzana le ŋdi me ene,
Eye anyigba ana ame siwo ŋu wɔna vɔ le le ku me la nagbɔ agbe.
20 Nye dukɔ, yi ɖe wò xɔgãwo me,
Eye nàtu ʋɔ ɖe ɖokuiwò nu.
Ɣla ɖokuiwò vie
Va se ɖe esime dziku la nu nava yi.
21 Elabena Afetɔ do tso enɔƒe gbɔna
Be yeabia akɔnta anyigba la dzi nɔlawo ɖe woƒe vodada ta,
Anyigba la aklo nu le ʋu si wokɔ ɖe edzi la dzi,
Eye magatsyɔ nu ame siwo wowu ɖe edzi la dzi azɔ o.”

YESAYA 27
1  Gbe ma gbe la, Afetɔ atsɔ eƒe yi gã titri sesẽ la
Atrɔ ɖe Leviatan, da si le yiyim mii,
Leviatan, da si le yiyim gɔdɔgɔdɔ̃ la ŋu,
Eye wòawu ƒumelã klitsu si le atsiaƒu me la.
 2 Gbe ma gbe la, midzi ha nɛ be:
“Waingble si ƒe wain tsɔa fu!
 3 Nye, Afetɔ, mele eŋu dzɔm.
Medea tsii ɣesiaɣi.
Medzɔa eŋu zã kple keli,
Ale be ame aɖeke nagagblẽ edome o.
 4 Dzi megale kuyem o.
Ame kae atsɔ ŋù kple gbe akpem le aʋa la me?
Matu afɔ wo dzi ahatɔ dzo wo katã zi ɖeka.
 5 Negbe ɖeko wòatrɔ ɖe nye mɔ́ sesẽ la ŋu.
Ne wòawɔ ŋutifafa kplim;
Ŋutifafa ko wòawɔ kplim hafi.”
 6 Le ŋkeke siwo gbɔna me la, Yakob ato ke,
Israel adze ahaƒo se,
Eye woƒe kutsetsewo ayɔ anyigba la dzi fũu.
 7 Ðe woaƒoe abe ale si woƒo eƒolawo enea?
Alo ɖe woawui abe ale si wowu eƒe amewo enea?
 8 Ne èle enyam ɖa la, àtsɔ ŋɔdziɣli awɔ avu kplii.
Atsɔ eƒe ya sesẽ la akplɔe ɖa le gbe si gbe ɣedzeƒeya ƒo.
 9 Eya ta alea ko woawɔ hafi alé avu ɖe Yakob ƒe vodada ta,
Eye ne eɖe eƒe nu vɔ̃ ɖa la, kutsetse si ado tso emee nye esi:
Agbã vɔsamlekpui la ƒe kpewo katã
Abe akalokpe siwo wotu la ene,
Eye womagblẽ Aserawo kple nu siwo dzi wodoa dzudzɔ ɖo la ƒe ɖeke ɖi o.
10 Elabena du sesẽ la aɖi gbɔlo;
Woaɖe asi le lãnyiƒewo ŋu, eye woagblẽ wo ɖi abe gbegbe ene.
Nyivi aɖu gbe le afi ma, eye afi mae wòatsyɔ akɔ ɖo;
Eye wòaɖu eƒe atilɔwo keŋkeŋ.
11 Ne eƒe alɔawo ƒu la,
Nyɔnuwo ava ŋe wo
Atsɔ wo ado dzoe.
Elabena dukɔ masenugɔmee wònye.
Esia tae wo Wɔla makpɔ nublanui na wo o,
Eye Ame si mè wo la mave wo nu o.
12 Gbe ma gbe la, Afetɔ aƒo kutsetseawo woadudu tso Tɔsisi la nu va se ɖe Egipte-tɔʋu la nu, eye woafɔ mi ɖekaɖeka, mi Israel-viwo. 
13 Gbe ma gbe la, woaku lãdzo gã aɖe, eye ame siwo le tsɔtsrɔ̃m le Asiria-nyigba dzi kple ame siwo kaka ɖe Egipte-nyigba dzi la ava de ta agu na Afetɔ le to kɔkɔe la dzi le Yerusalem.

YESAYA 28
1  Baba na Efrayim-hamulawo ƒe fiakuku gã la,
Kple eƒe atsyɔ̃seƒoƒo dzeani si le yɔyrɔm,
Si le ta na wainmulawo ƒe bali wɔnu la!
 2 Kpɔ ɖa! Kalẽtɔ sesẽ aɖe le Afetɔ si.
Abe kpetsi sesẽ si le dzadzam kple ya gblẽnu ene,
Abe ahom gblẽnu ƒe tsiɖɔɖɔ si gbagba ɖe anyi ene la,
Atsɔe axlã ɖe anyi sesĩe.
 3 Woatsɔ afɔ afanya
Efrayim-hamulawo ƒe fiakuku gãwo.
 4 Eƒe atsyɔ̃seƒoƒo dzeani si le yɔyrɔm,
Si le ta na bali wɔnu la,
Azu abe gbotsetse gbãtɔ siwo ɖi hafi dzomeŋɔli ɖo,
Eye ne ame aɖe kpɔe, eye wòɖo asi me nɛ la, wòɖunɛ kaba ene.
5 Gbe ma gbe la, aʋakɔwo ƒe Afetɔ azu atsyɔ̃fiakuku kple seƒoƒotsihe dzeani na eƒe dukɔ la ƒe ame susɔeawo. 
6 Eye wòanye ʋɔnudrɔ̃gbɔgbɔ na ame si le ʋɔnu drɔ̃m, kple ŋusẽtsoƒe na ame siwo nyaa futɔwo ɖa le agbo la nu.
 7 Wain na ame siawo hã tra mɔ;
Woƒe aha muame na wole yiyim sagasaga.
Aha muame na nunɔla kple nyagblɔɖila siaa tra mɔ;
Wain na wotɔtɔ,
Aha muame na wole yiyim sagasaga;
Wotra le woƒe ŋutegakpɔkpɔ me,
Woƒe nyametsotsowo tro.
 8 Elabena xeɖeɖe nyɔŋu yɔ woƒe kplɔ̃wo dzi fũu,
—Teƒe aɖeke meli si xeɖeɖe mele o.
 9 Ame kae woafia sidzedzee,
Eye ame kae woaɖe gbedeasi la me na?
Ðevi siwo wotso no na,
Siwo woɖe le no nuea?
10 Ele ale, “se ɖe se dzi, se ɖe se dzi,
Ðoɖo ɖe ɖoɖo dzi, ɖoɖo ɖe ɖoɖo dzi,
Afii ʋɛ, afi mɛ ʋɛ.”
11 Eya ta atsɔ ame siwo kukɔna kple gbe bubu dolawo ƒe gbe aƒo nu kple dukɔ sia. 
12 Egblɔ na wo be, “Gbɔɖemeƒe lae nye esi. Mina ame siwo ŋu ɖeɖi te la nagbɔ ɖe eme; gbɔdzɔeƒee nye esi,” ke wogbe esese. 
13 Eya ta Afetɔ ƒe nya la ava eme ɖe wo dzi be:
“Se ɖe se dzi, se ɖe se dzi,
Ðoɖo ɖe ɖoɖo dzi, ɖoɖo ɖe ɖoɖo dzi,
Afii ʋɛ, afi mɛ ʋɛ,”
Ale be ne wole zɔzɔm la,
Woakli nu adze anyi ɖe megbe,
Woaŋe, mɔ̃ aɖe wo, eye asi atu wo.
14 Eya ta mi adegbeƒolawo,
Mi dukɔ sia ƒe dziɖula siwo le Yerusalem, mise Afetɔ ƒe nya,
15 Elabena miegblɔ be:
“Míebla nu kple Ku,
Eye mía kple Tsiẽƒe míele nubabla me.
Ne tsi ɖɔ gbagba hã la,
Maɖo mía gbɔ o,
Elabena míetsɔ alakpa wɔ míaƒe sitsoƒe,
Eye míebe ɖe aʋatsokaka me.”
16 Eya ta ale Aƒetɔ Dziɖulagã Afetɔ gblɔe nye esi:
“Kpɔ ɖa, mele kpe aɖe ɖom anyi ɖe Zion, kpe si wodo kpɔ,
Gɔmeɖoanyi si ŋu kakaɖedzi le la ƒe dzogoedzikpe xɔasie.
Ame si xɔa edzi sena la, dzika matso eƒo o.
17 Matsɔ ʋɔnu dzɔdzɔe dɔdrɔ̃ awɔ dzidzeka
Kple dzɔdzɔenyenye awɔ glidzidzenu.
Kpetsi akplɔ alakpasitsoƒe la adzoe,
Eye tsi aɖɔ aɖe bebeƒe la.
18 Woagblẽ mia kple Ku ƒe nubabla la me,
Eye nubabla si le mia kple Tsiẽƒe dome la manɔ te o.
Ne tsi ɖɔ gbagba va yi la,
Agbã mi gudugudu.
19 Ɣesiaɣi si wòva le yiyim la,
Akplɔ mi adzoe,
Elabena ava yi ŋdi sia ŋdi,
Le ŋkeke me kple zã me.
Ŋɔdzi ɖeɖe koe ana woase eƒe gbedeasi la gɔme.”
20 Elabena aba la le kpuie ale gbegbe be afɔdadra meli o,
Eye avɔ la le lɛe ale gbegbe be ame mate ŋu axatsa eɖokui ɖe eme o.
21 Elabena Afetɔ atso abe ale si wòwɔ le Perazim To dzi ene,
Atso abe ale si wònɔ le bali si gogo Gibeon me ene,
Ne wòawɔ eƒe nu, si nye nu wɔmoyaa la,
Eye wòawɔ eƒe dɔ, si nye dɔ si tɔgbi mebɔ o.
22 Eya ta miganɔ fewu ɖum o,
Ne miaƒe bablawo nagasẽ ɖe edzi goŋgoŋ o,
Elabena mese le Aƒetɔ Dziɖulagã, aʋakɔwo ƒe Afetɔ nu
Be woɖo tsɔtsrɔ̃ ɖe anyigba blibo la katã ŋu.
23 Miƒu to anyi, eye mise nye gbe;
Miɖo to, ne miase nya si gblɔm mele.
24 Ðe agbleŋlɔla nɔa nuŋɔŋlɔ dzi atraɖii hafi ƒãa nua?
Ðe wònɔa anyigba dzobom henɔa edzi dzram ɖo ɖaa?
25 Ne edzra edzi ɖo vɔ la,
Ðe mewua sikɔni eye wòƒãa adrike ɖe edzi oa,
Eye ɖe meƒãa lu, ƒo yibɔ kple ƒo ɖe wo nɔƒe,
Kple lu dzĩ ɖe eƒe boliƒo dzi oa?
26 Elabena Mawu ɖɔa ame ɖo le mɔ si sɔ nu;
Eƒe Mawu fiaa nui.
27 Elabena menye luƒotasiaɖam wotsɔna ƒoa sikɔni o;
Eye womemlia tasiaɖamfɔ toa adrike dzi o.
Ke boŋ kpoe wotsɔna ƒoa sikɔni,
Eye atie wotsɔna ƒoa adrike.
28 Ðe wogbãa nuku si wotsɔna ƒoa aboloe nyanyanya?
Ao, womenɔa eƒoƒo dzi atraɖii o;
Eye ne ehe eƒe tasiaɖamfɔ kple eƒe sɔwo to edzi la,
Megbãnɛ nyanyanya o.
29 Esia hã tso aʋakɔwo ƒe Afetɔ gbɔ,
Ame si ƒe adaŋudede wɔ nuku,
Eye eƒe nuwɔwɔwo lolo.

YESAYA 29
1  “Baba na Ariel, Ariel, du si me David ƒu asaɖa anyi ɖo!
Minɔ edzi ƒe sia ƒe,
Minɔ miaƒe ŋkekenyuiwo ɖuɖu dzi ƒe sia ƒe.
 2 Gake mahe xaxa ava Ariel dzi,
Eye nuxaxa kple konyifafa anɔ anyi,
Eye wòazu abe Mawu ƒe vɔsamlekpui ene nam.
 3 Maƒu asaɖa anyi ɖe ŋuwò godoo,
Matɔ kpɔ ɖe ŋuwò aɖe to ɖe wò,
Eye maƒu kpo ɖe ŋuwò.
 4 Woabɔbɔ wò ɖe anyi,
Anyigba tu me kee nàƒo nu tso,
Eye wò gbe aɖi hɔlɔhɔlɔ tso ke me.
Wò gbe aɖi tso to me
Abe ŋɔliyɔla ƒe gbe ene,
Eye àdo ŋɔtimegbee tso ke me.
 5 Wò ketɔ gbogboawo azu abe kewɔ memee ene,
Eye ŋutasẽlawo ƒe ha azu abe tsro si ya lɔ ɖe enu ene.
Ava eme zi ɖeka kpoyi.
 6 Aʋakɔwo ƒe Afetɔ atrɔ susu ɖe ŋuwò,
Eye wòatsɔ dziɖegbe, anyigbaʋuʋu kple gbeɖiɖi sesẽ,
Ahom kple ya sesẽ kpakple dzobibi axɔ na wò.”
 7 Dukɔ siwo katã ho aʋa ɖe Ariel ŋu,
—Dukɔ siwo katã ho aʋa ɖe eŋu,
Dudzidzelawo ƒe xɔ tsrala siwo wotu ɖe eŋu,
Kple ame siwo hea xaxa vaa edzi—
Anɔ abe drɔ̃e kple zãmeŋutega ene.
 8 Anɔ abe ale si dɔwuitɔ kua drɔ̃e be yele nu ɖum,
Ke ne enyɔ la, dɔ ganɔa ewum ene;
Eye abe ale si tsikɔwuitɔ kua drɔ̃e be yele tsi nom,
Ke ne enyɔ la, nu tea eŋu eye tsikɔ ganɔa ewum la ene.
Aleae wòanɔ na dukɔ siwo katã
Ho aʋa ɖe Zion To ŋu la ƒe amehawo.
 9 Miɖo asi nu, eye miaƒe nu neku;
Mitsɔ nu tre ŋku, ne miagakpɔ nu o.
Womu aha, ke menye wain ye mu wo o;
Wole zɔzɔm sagasaga, ke menye aha muamee na o.
10 Elabena Afetɔ trɔ alɔ̃ tsu dɔdɔ ƒe gbɔgbɔ kɔ ɖe mia dzi;
Emia miaƒe ŋku siwo nye nyagblɔɖilawo,
Eye wòtsyɔ nu miaƒe ta siwo nye ŋutegakpɔlawo.
11 Ŋutegawo katã zu abe agbalẽ si nu wotre la me nyawo ene na mi. Ne wotsɔe na ame si nya nuxexlẽ hegblɔ nɛ be, “Meɖe kuku, xlẽe sesĩe” la, aɖo eŋu be, “Nyemate ŋui o, elabena wotre enu.” 
12 Eye ne wotsɔ agbalẽ la na ame si menya nuxexlẽ o hegblɔ nɛ be, “Meɖe kuku, xlẽe” la, aɖo eŋu be: “Nyemenya nuxexlẽ o!”
13 Afetɔ be: “Dukɔ sia vaa gbɔnye kple woƒe nu,
Eye wotsɔ woƒe nuyiwo dea bubu ŋunye,
Ke woƒe dzi te ɖa xaa tso gbɔnye;
Eye amegbetɔwo ƒe sedede siwo wofia wo la dzie wonɔa te ɖo vɔ̃am.
14 Eya ta nyee nye Ame si agawɔ nu kple dukɔ sia wòawɔ nuku,
Nukunuwo ƒe nukunu wòanye mawɔ;
Eye nunya abu ɖe woƒe nunyalawo,
Eye gɔmesese aɣla ɖe woƒe aɖaŋudzelawo.”
15 Baba na ame siwo dzea agbagba ɖe sia ɖe be yewoaɣla yewoƒe ɖoɖowo ɖe Afetɔ,
Wowɔa woƒe dɔwo le viviti me
Henɔa gbɔgblɔm be: “Ame kae le mía kpɔm?
Ame kae nya nu si wɔm míele?”
16 Aleke mietrɔ gbo nuwo ale!
Ðe woabu zemela abe tsu enea?
Ðe nuwɔwɔ la agblɔ le ewɔla ŋu be:
“Menye eyae wɔm oa”?
Eye ɖe numeme agblɔ le emela ŋu be:
“Mele ɖeke me sem oa”?
17 Madidi o Lebanon azu atikutsetsebɔ,
Eye woabu atikutsetsebɔ la ɖe avewo dome.
18 Gbe ma gbe la, tokunɔwo ase agbalẽ la me nyawo,
Eye ŋkuagbãtɔwo ƒe ŋkuwo akpɔ nu tso blukɔ kple viviti me.
19 Ame fafawo akpɔ dzidzɔ ɖe Afetɔ ŋu vevie,
Eye ame siwo da ahe le amegbetɔwo dome la atso aseye ɖe Israel Ƒe Kɔkɔetɔ la ŋu.
20 Elabena ŋutasẽla maganɔ anyi o,
Adegbeƒola la nu ayi,
Eye woatsrɔ̃ ame siwo katã nɔa adeklo dzi ɖe vɔ̃wɔwɔ ŋu la ɖa,
21 Ame siwo alakpanya le nu na la naa amewo zua agɔdzelawo,
Wotrea mɔ̃ na ametaʋlilawo le dugbo la nu
Eye wotsɔa nyahehe ƒuƒluwo tea ame dzɔdzɔe ƒe nya ɖe to.
22 Eya ta ale Afetɔ, ame si ɖe Abraham la, gblɔ na Yakob ƒe aƒee nye esi:
“Ŋu magakpe Yakob azɔ o,
Eye eƒe mo magatsi dãa azɔ o.
23 Elabena ne ekpɔ viawo,
Siwo nye nye asinudɔwɔwɔwo le eme la,
Woakɔ nye ŋkɔ ŋu;
Ɛ̃, woakɔ Yakob Ƒe Kɔkɔetɔ la ŋu,
Eye Israel ƒe Mawu la ƒe ŋɔdzi alé wo.
24 Ame siwo ƒe gbɔgbɔ le mɔ tram la ase nu gɔme,
Eye nyatoƒoetolawo ke hã alɔ̃ woafia nu wo.”

YESAYA  30
1  Afetɔ be: “Baba na vi sẽtowo,
Ame siwo wɔa ɖoɖo siwo menye tɔnye o dzi,
Ame siwo wɔa nubablawo nye gbɔgbɔ manɔmee,
Ne woadzi nu vɔ̃ ɖe nu vɔ̃ dzi.
 2 Ame siwo mebia gbem hafi dze mɔ yina Egipte,
Be yewoabe ɖe Farao ƒe ametakpɔkpɔ te,
Eye yewoabe ɖe Egipte ƒe vɔvɔli te o!
 3 Gake Farao ƒe ametakpɔkpɔ la azu ŋukpe na mi,
Eye bebe ɖe Egipte ƒe vɔvɔli te ahe vlododo vɛ na mi.
 4 Elabena eƒe amegãwo le Zoan,
Eye eƒe ame dɔdɔwo ɖo Hanes.
 5 Ŋukpe alé wo katã,
To dukɔ si mate ŋu aɖe vi aɖeke na wo o la dzi,
Dukɔ si mana kpekpeɖeŋu aɖeke, alo ahe viɖe aɖeke vɛ o
Ke boŋ ŋukpe kple vlododo ko.”
6 Nya ɖe anyiehelãwo ŋu:
To hiãkame kple xaxa ƒe anyigba dzi,
Afi si dzata, dzata si ɖea gbe la le,
Dakpui kple da vɔ̃ɖi si lũa ʋɔ la le,
Wotsɔa woƒe kesinɔnuwo ɖoa tedziwo dzi,
Eye wotsɔa woƒe nuwo ɖoa kposɔwo ƒe kpo dzi.
Gake nu siawo maɖe vi aɖeke na dukɔ la o.
 7 Elabena Egipte ƒe kpekpeɖeŋu nye tofloko.
Eya ta meyɔ wo be: “Rahab, ame si nɔa anyi ɖi naneke mawɔmawɔe.”
 8 “Azɔ yi nàŋlɔe ɖe nuŋlɔkpe dzi le wo ŋkume,
Eye nàŋlɔe ɖe agbalẽ me,
Ne wòanye ɖaseɖiɖi tegbee
Le ŋkeke si gbɔna me.
 9 Elabena dukɔ dzeaglã, vi maɖianukwarewo,
Vi siwo gbe Afetɔ ƒe se la sese wonye.
10 Wogblɔ na nukpɔlawo be: ‘Migakpɔ nu o,’
Eye na ŋutegakpɔlawo be, ‘Migagblɔ ŋutega siwo le eteƒe la na mí o.
Mivivi nu me na mí; mikpɔ alakpaŋutegawo.
11 Mite ɖa le mɔ la dzi; midze le toƒe la ŋu.
Migagblɔ Israel Ƒe Kɔkɔetɔ la ŋu nya le mía ŋkume azɔ o.’”
12 Eya ta ale Israel Ƒe Kɔkɔetɔ la gblɔe nye esi:
“Esi miegbe nya sia,
Eye mieɖo ŋu ɖe ametafatafa kple amefuflu ŋu
Heziɔ ɖe wo ŋu la,
13 Eya ta vodada sia anɔ na mi abe gli gbagbã ene,
Abe gli kɔkɔ fefe si tre azã be yeamu la ene,
Amu zi ɖeka kpoyi.
14 Woagbãe abe ale si wogbãa zemela ƒe ze ene,
Woagbãe gudugudu ale gbegbe be ze kakɛ aɖeke manɔ eƒe gbagbã la me
Woatsɔ aɖe dzo le mlekpui me
Alo atsɔ akpa tsi le tsiteƒe o.”
15 Elabena ale Aƒetɔ Dziɖulagã Afetɔ, Israel Ƒe Kɔkɔetɔ la, gblɔe nye esi:
“Ne mietrɔ va gbɔnye henɔ anyi kpoo la, woaxɔ na mi;
Eye miakpɔ ŋusẽ ne mieɖe dzi ɖi heɖo ŋu ɖe ŋunye.”
Ke mielɔ̃ o.
16 Ke miegblɔ be: “Kpao, míanɔ sɔwo dzi asi!”
Eya ta miasi vavã.
“Míado sɔ ɖeablɛwo!”
Esia tae ame siwo ati mia yome la aƒu du sesĩe wu mi.
17 Ame akpe ɖeka adzo nyanyanya le ame ɖeka pɛ ƒe vɔvɔ̃doname ta;
Eye miasi le ame atɔ̃ ƒe vɔvɔ̃doname nu,
Va se ɖe esime miasusɔ abe ati si wotu ɖe to tame,
Kple dzesiti le togbɛ dzi ene.
18 Gake Afetɔ anɔ lalam dzigbɔɖitɔe be yeave mia nu,
Eye wòatso be yeakpɔ nublanui na mi.
Elabena Afetɔ nye Mawu si drɔ̃a ʋɔnu dzɔdzɔe.
Dzidzɔtɔwoe nye ame siwo katã kpɔa esinu.
19 Ne amewo va le Zion, Yerusalem la, miagafa avi azɔ o. Ave mia nu godoo ne ese miaƒe ɣlidodo la; ne esee ko la, atɔ na mi. 
20 Togbɔ be Afetɔ ana miaɖu xaxa abe abolo ene eye miano teteɖeanyi abe tsi ene hã la, miaƒe Nufiala Gãtɔ la magaɣla eɖokui azɔ o, eye miaƒe ŋkuwo akpɔ miaƒe Nufiala Gãtɔ la. 
21 Eye ne mietra mɔ yi ɖusime alo miame la, miaƒe to ase nya sia le mia megbe be, “Mɔ lae nye esi. Mito edzi.”
22 Miagblẽ kɔ ɖo na klosalo si wofa ɖe miaƒe legbawo ŋu, kple sika si wofa ɖe miaƒe galegbawo ŋu. Miatsɔ wo aƒu gbe abe gbelégodoe ene ahagblɔ ɖe wo ŋu be, “Mite ɖa!” 
23 Ana tsi nadza ɖe nuku si nèƒã ɖe anyigba dzi la dzi, eye wòana nuɖuɖu si anyigbaa awɔ la nasɔ gbɔ, eye wòanyo. Gbe ma gbe la, wò lãhawo aɖu gbe le gbeɖuƒe siwo keke. 
24 Eye nyi kple tedzi siwo ŋlɔa agble la aɖu gbe si wotsɔ amagbe tsaka hetsɔ sofi kple gaflo dzoboe. 
25 Le amewugbe gã si xɔ tsralawo amu la, tɔsisiwo kple tɔʋuwo anɔ to kɔkɔwo katã kple togbɛ kɔkɔwo katã dzi. 
26 Gbe si gbe Afetɔ abla eƒe dukɔ ƒe gbagbãƒe, eye wòawu abi si wòde wo ŋu la, ɣleti si sɔ tegblẽe la ƒe keklẽ anɔ abe ɣe ƒe keklẽ ene; eye ɣe ƒe keklẽ adzi ɖe edzi zi gbɔ zi adre, eye wòanɔ abe ŋkeke adre ƒe keklẽ ene.
27 Kpɔ ɖa! Afetɔ ƒe ŋkɔ tso didiƒe gbɔna,
Eye eƒe dɔmedzoe le bibim kple dzudzɔ babla kɔtɔɔ.
Dɔmedzoe yɔ nu me nɛ fũu,
Eye eƒe aɖe le abe dzo flafla ene.
28 Eƒe gbɔgbɔ le abe tɔʋu si ɖɔ va se ɖe ve ke ene,
Ne wòaʋuʋu dukɔwo le tsɔtsrɔ̃ ƒe sranui me;
Eye wòade numega dukɔwo ƒe nu me, ne wòakplɔ wo atrae.
29 Gake miadzi ha abe esi wodzina le zã si me
Miele dzadzram ɖo na ŋkekenyuiɖuɖu ene,
Eye miaƒe dzi akpɔ dzidzɔ
Abe ame si le dze kum yina
Afetɔ ƒe to la, Israel ƒe Agakpe la gbɔ ene.
30 Afetɔ ana woase eƒe gãnyenye ƒe gbe,
Eye wòana eƒe alɔ naɖiɖi ɖe anyi woakpɔ le dziku helĩhelĩ,
Dzobibi flaflafla,
Tsidzadza gãwo, ahom kple tsikpewo me.
31 Elabena Afetɔ ƒe gbe ana ŋɔdzi nalé Asiria;
Atsɔ ati aƒoe.
32 Zi ale si Afetɔ tsɔ eƒe ameƒoti,
Le to hem na Asiria la,
Zi nenemae axatsɛwo kple saŋkuwo aɖi,
Eye wòanɔ alɔ nyèm atsɔ awɔ avu kpli wo.
33 Elabena wodzra eƒe Tofet la ɖo xoxo;
Wodzrae ɖo na fia la.
Afi si wòli kɔ eƒe nakewo ɖo la goglo hekeke,
Dzo kple nake li kpaŋkpaŋ.
Afetɔ ƒe gbɔgbɔ, si le abe dzokpeta ene la,
Atɔ dzoe.

YESAYA 31
1  Baba na ame siwo yia Egipte ɖabiaa kpekpeɖeŋu,
Ame siwo ɖoa dzi ɖe sɔwo ŋu,
Ame siwo ɖoa ŋu ɖe aʋatasiaɖamwo ŋu, elabena wosɔ gbɔ,
Eye woɖoa ŋu ɖe aʋawɔsɔwo ŋu, elabena ŋusẽ le wo ŋu,
Ke womeɖoa ŋu ɖe Israel Ƒe Kɔkɔetɔ la ŋu o,
Eye womedia Afetɔ yome mɔ o.
 2 Nunyalae eya hã nye, eye wòahe gbegblẽ avɛ,
Magbe eya ŋutɔ ƒe nyawo dzi wɔwɔ o.
Atso ɖe nu vlo wɔlawo ƒe aƒe
Kple ame siwo doa alɔ nu vɔ̃ɖi wɔlawo la ŋu.
 3 Egiptetɔwo la, amegbetɔ dzro ko wonye, menye Mawu o;
Woƒe sɔwo la, ŋutilãe wonye, menye gbɔgbɔ o.
Ne Afetɔ do eƒe asi ɖa la,
Kpeɖeŋutɔ la akli nu,
Ame si ŋu wole kpekpem ɖo la hã adze anyi;
Eye wo katã nu ayi ɖekae.
 4 Elabena ale Afetɔ gblɔ nam ye nye esi:
“Ale si ko dzata alo dzatatsui tea gbe ɖe eƒe nuléle ŋu,
Eye ne woyɔ lãkplɔviwo katã ɖe eŋu hã,
Mevɔ̃na le woƒe ɣli,
Alo hoowɔwɔ ta o la,
Nenemae aʋakɔwo ƒe Afetɔ aɖi ava wɔ aʋa
Le Zion To la kple eƒe togbɛ dzi.
 5 Ale si xevi dea agba anyii la, nenemae aʋakɔwo ƒe Afetɔ aʋli Yerusalem tae.
Aʋli eta, eye wòaxɔ nɛ.
Ato eta ayi, eye wòaɖee.”
6 “Oo, mi Israel-viwo, mitrɔ va ame si ŋu miedze aglã ɖo vevie la gbɔ. 
7 Elabena gbe ma gbe la, mia dometɔ ɖe sia ɖe agbe nu le eƒe klosalomawu dzodzrowo kple eƒe sikamawu maɖinu siwo mietsɔ miaƒe asiwo wɔ wònye nu vɔ̃ miewɔ la gbɔ.
 8 Asiriatɔ la atsi yi nu, ke menye ame ƒe yi nu o;
Eye yi aɖui, ke menye amegbetɔ tɔ o.
Asi le yi nu,
Eye woazi eƒe ɖekakpuiwo dzi woawɔ dɔ sesẽ.
 9 Eƒe agakpe la nu ayi le vɔvɔ̃ ko ta,
Eye ŋɔdzi alé eƒe amegãwo le dzesiti la ta,”
Afetɔ, ame si ƒe kekeli le Zion, eye eƒe kpodzo le Yerusalem, ye gblɔe.

YESAYA 32
1  Kpɔ ɖa! Fia aɖu fia le dzɔdzɔenyenye me;
Eye amegãwo aɖu dzi hena ʋɔnu dzɔdzɔe dɔdrɔ̃.
 2 Wo dometɔ ɖe sia ɖe anɔ abe sitsoƒe tso ya nu
Kple bebeƒe tso tsidzadza gã nu ene,
Abe tɔsisiwo le kuɖiɖinyigba dzi
Kple agakpe gã ƒe vɔvɔli le anyigba si ƒu kplakplakpla dzi ene.
 3 Ekema ame siwo kpɔa nu la ƒe ŋkuwo manyè atre o,
Eye ame siwo sea nu la aƒu to anyi.
 4 Ame siwo tsia klokloklo la ƒe dzi abu sidzedze ŋu,
Eye kukɔlawo gɔ̃ hã ƒe aɖe aƒo nu eme nakɔ nyuie.
 5 Womagayɔ movitɔwo be dɔmenyotɔwo azɔ o,
Eye womagayɔ yakamewo be bubumewo o;
 6 Elabena movitɔ agblɔ movinyawo,
Eye wòaɖo nu vɔ̃ɖi wɔwɔ ɖe dzi me,
Ne wòana amewo nagbe xɔse ahagblɔ nya tramawo ɖe Afetɔ ŋu,
Ne wòana dɔwuitɔ natsi dɔmeɣi,
Eye wòate tsi tsikɔwuitɔ.
 7 Ke yakame ɖoa tame vɔ̃;
Edoa ŋukpenanuwɔwɔ ɖe ŋgɔ
Ne wòatsɔ alakpanya agblẽ fukpelawo dome,
Ne ame dahe la gblɔ nya dzɔdzɔe gɔ̃ hã.
 8 Ke dɔmenyotɔ bua dɔmenyonyo ŋu,
Eye wònɔa dɔmenyonyo dzi.
 9 “Mi nyɔnu siwo li bɔkɔɔ, mitso, mise nye gbe!
Mi nyɔnuvi siwo metsɔa ɖeke le naneke me o, miƒu to anyi ɖe nye nyawo ŋu!
10 Le ƒe ɖeka kple ŋkeke aɖewo megbe la, mi ɖekematsɔlemetɔ siawo miadzo nyanyanya,
Elabena waintsetsexaɣi nu ayi evɔ womaƒo kutsetse aɖeke nu ƒu o.
11 Mi nyɔnu siwo li bɔkɔɔ, dzidzi neƒo mi!
Mi ame siwo metsɔa ɖeke le naneke me o, midzo nyanyanya!
Miɖe amama,
Eye misa akpanya ɖe ali.
12 Miƒo akɔta miafa konyi
Le agble nyuiawo kple wainka tsekuawo ta.
13 Elabena ŋù kple aŋɔka amie ɖe nye dukɔ ƒe anyigba dzi keŋ;
Woavu atsyɔ dzidzɔkpɔxɔwo,
Ɛ̃, du tsoaseye la katã dzi.
14 Elabena wogblẽ mɔ́ sesẽ la ɖi;
Du si me hoowɔwɔ le la ɖi gbɔlo.
Ofel kple gbetakpɔxɔ la siaa zu gbegbe tegbee,
Ezu fefeƒe na gbetedziwo
Kple gbeɖuƒe na lãhawo,
15 Va se ɖe esime woakɔ gbɔgbɔ ɖe mía dzi tso dziƒo,
Eye gbegbe nazu atikutsetsebɔ,
Eye woabu atikutsetsebɔ la ɖe avewo dome.
16 Ekema ʋɔnudɔdrɔ̃ dzɔdzɔe anɔ gbegbe,
Eye dzɔdzɔenyenye axɔ aƒe ɖe atikutsetsebɔ la me.
17 Dzɔdzɔenyenye vavãtɔ me tsonu anye ŋutifafa,
Eye dzɔdzɔenyenye vavãtɔ ƒe kutsetse anye tomefafa kple dedienɔnɔ tegbee.
18 Nye dukɔ anɔ teƒe siwo ŋutifafa le,
Aƒe siwo me dedienɔnɔ le kple teƒe siwo tomefafa kple dziɖeɖi le.
19 Ke kpetsi ana ave la nava anyi,
Eye du la aɖo baba ɖe anyi keŋkeŋ.
20 Dzidzɔtɔwoe nye mi ame siwo le nu ƒãm ɖe tɔwo katã to,
Mi ame siwo ɖea asi le nyitsuwo kple tedziwo ŋu.”

YESAYA 33
1  Baba na wò ame si gblẽa nu, evɔ womegblẽ wò ya o,
Wò, ametatrɔla, evɔ wometrɔ wò ya tawò o!
Ne ègblẽ nu vɔ la, woagblẽ wò hã.
Ne ètrɔ ame ta vɔ la, woatrɔ wò hã tawò.
 2 Oo Afetɔ, ve mía nu.
Wòe míele mɔ kpɔm na.
Nye míaƒe alɔ ŋdi sia ŋdi
Kple míaƒe xɔname le xaxaɣi.
 3 Dukɔwo si le wò gbeɖeɖe nu.
Ne ètso la, dukɔwo kana hlẽna.
 4 Woaƒo miaƒe aboyonuwo nu ƒu abe ale si ʋetsuvi gblẽnuwo ƒoa zi ɖe nu ŋu bibibi ene;
Amewo aƒo zi ɖe eŋu abe ʋetsuviwo ƒe ha gã aɖe ene.
 5 Woado Afetɔ ɖe dzi,
Elabena enɔƒe le dziƒo boo.
Atsɔ ʋɔnu dzɔdzɔe dɔdrɔ̃ kple dzɔdzɔenyenye ayɔ Zion fũu.
 6 Enye gɔmeɖokpe na miaƒe ɣeyiɣiwo;
Eya gbɔe miaƒe xɔname, nunya, sidzedze kple Afetɔ vɔvɔ̃ ƒe agbɔsɔsɔ tso,
—Esiae nye eƒe kesinɔnu.
 7 Kpɔ ɖa! Woƒe kalẽtɔwo le ɣli dom le kpɔdomee;
Ame siwo hea ŋutifafanya nyui vanɛ la le avi fam hehehe.
 8 Mɔ gãwo dzi ɖi gbɔlo;
Ame aɖeke megale mɔwo dzi tom o.
Etu nubabla la;
Egbe nu le duawo gbɔ;
Mebu amegbetɔ ɖe naneke me o.
 9 Anyigba la le konyi fam, eye wòyrɔ.
Ŋukpe lé Lebanon; enyunyɔ.
Saron zu abe tagba ene,
Eye Basan kple Karmel lũ xe.
10 Afetɔ be: “Matso azɔ,
Mado kɔkɔ ɖokuinye azɔ;
Mado gã ɖokuinye azɔ.
11 Miefɔ gbe ƒuƒu ƒe fu, eye ahɔ̃litie miadzi.
Miawo ŋutɔwo miaƒe gbɔgbɔ afiã mi abe dzo ene.
12 Dukɔwo anɔ abe akalo si womè ene.
Woatɔ dzo wo abe ŋuve siwo wolã kɔ ɖi ene.
13 Mi ame siwo le didiƒe, mise nu si wɔ ge mala!
Eye mi ame siwo le kpuiƒe, midze si nye kalẽwɔwɔ!
14 Dzidzi ƒo nu vɔ̃ wɔlawo le Zion;
Xɔsegbelawo dzo nyanyanya:
‘Mía dometɔ kae ate ŋu anɔ afi si dzo flafla le?
Mía dometɔ kae ate ŋu anɔ dzobibi si metsina o la gbɔ?’
15 Ame si zɔna le dzɔdzɔenyenye me ɖaa,
Eye wògblɔa nya si le eteƒe,
Ame si gbea viɖe ƒoɖi si wokpɔ to ame tafatafa me,
Ame si ƒe asiwo gbea zãnuxɔxɔ,
Ame si xea to be yemase ʋukɔkɔɖi ŋu nya o,
Eye wòmiaa eƒe ŋkuwo be yemakpɔ nu baɖa o
16 —Anɔ kɔkɔƒewo;
Eƒe mɔ́ sesẽ anɔ agakpe gãwo dzi.
Woana eƒe aboloe,
Eye eƒe tsi mavɔ akpɔ o.”
17 Wò ŋkuwo akpɔ fia le eƒe atsyɔ̃ me;
Woakpɔ anyigba aɖe le adzɔge ɖaa.
18 Àɖo ŋku ŋɔdzinu la dzi le wò dzi me be:
“Afi kae agbalẽŋlɔla la le?
Afi kae nudala si xɔa adzɔ la le?
Afi kae ame si xlẽa xɔ tsralawo la le?”
19 Màgakpɔ dukɔ mabuame aɖeke o,
Dukɔ si ƒe gbegbɔgblɔ sesẽ, eye womate ŋu ase eme o,
Si ƒe aɖe kukɔna, eye màte ŋu ase eƒe nyawo gɔme o.
20 Kpɔ Zion, du si me míeɖua míaƒe azãwo le la ɖa!
Wò ŋkuwo akpɔ Yerusalem, si nye dziɖeɖinɔƒe,
Agbadɔ si womakaka o.
Womaho eƒe tsyotiwo akpɔ o,
Eye womatso eƒe kawo dometɔ aɖeke o.
21 Ke boŋ Afetɔ, Bubutɔ Gã la,
Anye tɔsisiwo kple tɔʋu gãwo na mí le afi ma.
Tɔdziʋu siwo wokuna kple atabluwo mato edzi o,
Eye tɔdziʋu gã aɖeke mazɔ edzi o.
22 Elabena Afetɔe nye míaƒe Ʋɔnudrɔ̃la,
Afetɔe nye míaƒe Senala,
Afetɔe nye míaƒe Fia;
Eyae aɖe mí.
23 Wò kawo me ado agblɔ;
Womate ŋu alé wò abalati ɖe te o; eye womahe abala me o.
Ɣemaɣi la, woama aboyonu geɖe;
Bunɔwo ke hã aha nu gbogbo aɖe.
24 Dua me tɔ aɖeke magblɔ be, “Mele dɔ lém” o.
Woatsɔ ame siwo le anyigba la dzi ƒe vodada ake wo.

YESAYA 34
1 Mi dukɔwo, mite va ne miasee;
Mi dukɔwo, miƒu to anyi.
Anyigba kple nu siwo katã yɔ edzi,
Anyigba la kple edzinuwo katã nesee.
 2 Elabena Afetɔ do dɔmedzoe ɖe dukɔwo katã ŋu,
Eye wòdo dziku ɖe woƒe aʋakɔwo katã ŋu.
Atsrɔ̃ wo gbidigbidi;
Atsɔ wo ana woawu.
 3 Woatsɔ woƒe ame siwo wowu la aƒu gbe;
Eye woƒe kukuawo ƒe ʋeʋẽ kũu axɔ yame;
Woƒe ʋu ana towo nalólo.
 4 Dziƒoʋakɔ blibo la katã anyunyɔ,
Woaŋlɔ́ dziƒowo abe agbalẽ xatsaxatsa ene.
Woƒe aʋakɔ blibo la katã ayrɔ,
Abe ale si aŋgba yɔyrɔwo duduna le wainka ŋu ene,
Abe ale si gbotsetse léakpɔ̃ gena tso gboti dzi ene.
 5 “Elabena nye yi aƒo ʋu belee le dziƒowo.
Aɖiɖi ɖe Edom dzi le ʋɔnudɔdrɔ̃ me,
Ðe dukɔ si matsrɔ̃ gbidigbidi la dzi.
 6 Yi le Afetɔ si; aƒo ʋu.
Aƒo ami,
Aƒo alẽtsuiwo kple gbɔ̃tsuwo ƒe ʋu,
Agbowo ƒe ayikuwo ƒe ami.
Elabena Afetɔ le vɔ sa ge le Bozra,
Eye wòawu lã gbogbo aɖewo le Edom-nyigba dzi.
 7 Woawu gbenyiwo hã kpe ɖe wo ŋu,
Nyitsuiwo kple nyitsu sesẽwo hã.
Woƒe anyigba aƒo ʋu belee,
Eye woƒe ke aƒo ami.”
 8 Elabena hlɔ̃biagbe le Afetɔ si,
Anye teƒeɖoɖo ƒe ƒe si wòatsɔ axɔ na Zion.
 9 Eƒe tɔsisiwo azu aŋɔ,
Eye eƒe ke azu dzokpe,
Eƒe anyigba azu abe aŋɔ si le bibim ene.
10 Matsi o, zã kple keli;
Eƒe dzudzɔ ade dzi tegbee.
Azu aƒedo tso dzidzime yi dzidzime;
Ame aɖeke mato edzi akpɔ o tegbetegbee.
11 Azu alugewo kple hlɔ̃madewo nɔƒe,
Eye favieʋutowo kple akpaviãwo anɔ edzi;
Ada dzidzeka ɖe edzi be wòazu gbegbe
Kple nudakpe ɖe edzi be wòazu aƒedo.
12 Womatsɔ eƒe bubume aɖeke aɖo fiae o,
Eƒe amegãwo katã nu ayi.
13 Aŋɔka amie ɖe eƒe mɔ́ sesẽwo me,
Dza kple ŋù amie ɖe eƒe mɔ́ sesẽwo me.
Azu agbotoewo nɔƒe
Kple bebeƒe na golowo.
14 Lã siwo nɔa gbegbe kple lã siwo xlɔ̃na sesĩe la ado go le afi ma,
Eye gbegbɔ̃ gɔ̃ hã ayɔ wo nɔewo.
Zãxewo aɖe dzi ɖi, eye woagbɔ ɖe eme le afi ma.
15 Afi mae da si lũa ʋɔ awɔ atɔ ɖo aɖa azi,
Aƒo vi ahaƒo wo nu ƒu ɖe eƒe vɔvɔli te le.
Ɛ̃, ayisuwo aƒo ƒu ɖe afi ma, atsu kple nɔe.
16 Miawo ŋutɔwo midzro Afetɔ ƒe agbalẽ la me, eye mikɔ gbe dzi miaxlẽe:
Wo dometɔ aɖeke mabu o;
Nɔe aɖeke mado kpo atsu kpɔkpɔ o,
Elabena Afetɔ ƒe nue de se la,
Eye eƒe gbɔgbɔe ƒo wo nu ƒu.
17 Eyae dzidze nu na wo,
Eye eya ŋutɔe tsɔ asi dzidze teƒea na wo.
Azu wo tɔ tegbee;
Woanɔ edzi tso dzidzime yi dzidzime.
YESAYA 35
1  Gbegbe kple kuɖiɖinyigba akpɔ dzidzɔ,
Tagba atso aseye, eye wòaƒo se abe dzogbenya ene.
 2 Aƒo se;
Akpɔ dzidzɔ eye wòatso aseye.
Woatsɔ Lebanon ƒe ŋutikɔkɔe anɛ,
Woatsɔ Karmel kple Saron ƒe atsyɔ̃ anɛ.
Woakpɔ Afetɔ ƒe ŋutikɔkɔe, mía Mawu ƒe atsyɔ̃.
 3 Mido ŋusẽ alɔ gblɔdɔwo,
Eye mido ŋusẽ klo siwo le ƒoƒom.
 4 Migblɔ na ame siwo tsi dzimaɖi la be:
“Misẽ ŋu. Migavɔ̃ o.
Kpɔ ɖa! Mia Mawu ava kple hlɔ̃biabia,
Mawu ava kple teƒeɖoɖo.
Ava ɖe mi.”
 5 Ɣemaɣi la, ŋkuagbãtɔwo ƒe ŋku aʋu,
Eye tokunɔwo ƒe to aʋu.
 6 Ɣemaɣi la, bunɔwo ati kpo abe zi ene,
Eye aɖetututɔwo ƒe aɖe atso aseye.
Elabena tsi aŋɔ tso gbegbe,
Eye tɔsisi atso tagba.
 7 Bleziblezi azu ta,
Eye kuɖiɖinyigba azu tsidzɔƒe.
Agbotoewo nɔƒe, afi si wotsyɔa akɔ ɖo la
Azu afi si gbe, aɖa kple aƒla mie ɖo.
 8 Mɔ gã aɖe anɔ afi ma,
Ɛ̃, woayɔe be Kɔkɔenyenye ƒe Mɔ.
Ame makɔmakɔ aɖeke mato edzi o.
Anye toƒe na ame siwo zɔna le mɔ la dzi,
Eye bometsila aɖeke matra ava to edzi o.
 9 Dzata aɖeke manɔ afi ma o,
Eye lã wɔadã aɖeke mato edzi o.
Womakpɔ wo le afi ma o;
Ame siwo wogbugbɔ ƒle la koe ato afi ma.
10 Ame siwo Afetɔ xɔ ƒle la atrɔ agbɔ, eye woava Zion kple aseyetsotso.
Dzidzɔ mavɔ anɔ ta na wo wòanye woƒe atsyɔ̃.
Woakpɔ dzidzɔ atso aseye,
Eye nuxaxa kple hũɖeɖe abu ɖe wo.

Genesis 35
1 Emegbe Mawu gblɔ na Yakob be: “Tso nàyi Betel, eye nànɔ afi ma, eye nàɖi vɔsamlekpui na Mawu vavã si ɖe eɖokui fia wò esime nèle sisim le nɔviwò Esau nu la ɖe afi ma.”
2 Eye Yakob gblɔ na eƒemetɔwo kple eŋumewo katã be: “Miɖe dutamawu siwo katã le mia dome la ɖa, mikɔ mia ɖokuiwo ŋu, eye miɖɔli miaƒe awuwo, 
3 eye mina míatso ayi Betel. Maɖi vɔsamlekpui ɖe afi ma na Mawu vavã, ame si tɔ nam le nye xaxagbe henɔ kplim le afi sia afi si meyi la.” 
4 Eya ta wotsɔ dutamawu siwo katã le wo si kple togɛ siwo le to na wo la na Yakob, eye Yakob ɖi wo ɖe ati gã si gogo Sekem dua la te.
5 Esi wodze mɔ yina la, Mawu ƒe ŋɔdzi lé du siwo ƒo xlã wo godoo la, ale be wometi Yakob viwo yome o. 
6 Mlɔeba Yakob kple ame siwo katã le eŋu la va ɖo Luz, si wogayɔna be Betel, le Kanaan-nyigba dzi. 
7 Eye wòɖi vɔsamlekpui ɖe afi ma heyɔ teƒe la be El-Betel, elabena afi mae Mawu vavã la ɖe eɖokui fiae le esime wòsi le nɔvia nu. 
8 Emegbe Debora, ame si na no Rebeka la ku, eye woɖii ɖe Betel lɔƒo le logoti aɖe te. Eya ta ena ŋkɔe be Alon-Bakut.
9 Mawu gaɖe eɖokui fia Yakob esime wòtrɔ tso Padan-Aram gbɔna, eye wòyrae. 
10 Eye Mawu gblɔ nɛ be: “Ŋkɔwòe nye Yakob. Womagayɔ wò be Yakob azɔ o, ke boŋ wò ŋkɔ anye Israel.” Eye wòde asi eyɔyɔ me be Israel. 
11 Eye Mawu gagblɔ nɛ be: “Nyee nye Mawu Ŋusẽkatãtɔ. Dzi nàsɔ gbɔ. Dukɔwo kple dukɔwo ƒe ha gã aɖe ado tso mewò, eye fiawo ado tso mewò. 
12 Matsɔ anyigba si metsɔ na Abraham kple Isak la ana wò, eye matsɔ anyigba la ana wò dzidzimevi siwo ava ɖe yowòme.” 
13 Eye Mawu dzo le egbɔ le afi si wòƒo nu kplii le la heyi dzi.
14 Eya ta Yakob ɖi dzesikpe, si nye ŋkuɖodzikpe, ɖe afi si wòƒo nu kplii le, eye wòkɔ nunovɔsa ɖe edzi hekɔ ami ɖe edzi. 
15 Eye Yakob yɔa teƒe si Mawu ƒo nu kplii le la be Betel.
16 Azɔ woho tso Betel. Eye esi woɖo teƒe aɖe si didi tso Efrat gbɔ la, Rahel de asi kuléle me, ke via dzidzi sesẽ nɛ ŋutɔ. 
17 Esi via dzidzi nɔ sesẽm nɛ la, vixela la gblɔ nɛ be: “Mègavɔ̃ o, elabena ŋutsuvi dzi gee nègale.” 
18 Esime eƒe agbe nu nɔ tsotsom la (elabena enɔ kukum), ena ŋkɔe be Ben-Oni, ke fofoa yɔe be Benyamin. 
19 Ale Rahel ku, eye woɖii esime wole mɔ dzi yina Efrat, si wogayɔna be Betlehem. 
20 Eye Yakob tu dzesikpe ɖe eƒe yɔdo dzi, esiae nye dzesikpe si le Rahel ƒe yɔdo dzi va se ɖe egbe.
21 Ema megbe Israel ho, eye wòva tu eƒe agbadɔ ɖe Eder mɔ́a godo. 
22 Gbe ɖeka esime Israel le avɔgbadɔ me le anyigba ma dzi la, Ruben yi ɖadɔ fofoa ƒe ahiã Bilha gbɔ, eye Israel see. Ke viŋutsu wuieve le Yakob si. 
23 Lea viŋutsuwoe nye Ruben, si nye Yakob ƒe ŋgɔgbevi, eyome Simeon, Lewi, Yuda, Isakar kple Zebulon. 
24 Rahel viŋutsuwoe nye Yosef kple Benyamin. 
25 Rahel ƒe subɔvi Bilha viŋutsuwoe nye Dan kple Naftali. 
26 Eye Lea ƒe subɔvi Zilpa viŋutsuwoe nye Gad kple Aser. Ame siawoe nye Yakob viŋutsu siwo wodzi nɛ le Padan-Aram.
27 Mlɔeba Yakob va fofoa Isak gbɔ le Mamre le Kiriat-Arba si wogayɔna be Hebron, afi si Abraham kple Isak nye amedzro le kpɔ. 
28 Eye Isak nɔ agbe ƒe alafa ɖeka blaenyi. 
29 Emegbe Isak ƒe gbɔgbɔ nu tso eye wòku, eye wotsɔe kpe ɖe eƒe amewo ŋu, etsi, eye agbenɔnɔ ɖi kɔ nɛ; eye via Esau kple Yakob ɖii.

YESAYA 36
1  Le Fia Hizkiya ƒe ƒe wuienelia me la, Asiria-fia Senakerib ho ɖe Yuda du sesẽwo katã ŋu, eye wòxɔ wo. 
2 Asiria-fia dɔ Rabsake kple aʋakɔ gã aɖe tso Lakis ɖo ɖe Fia Hizkiya le Yerusalem. Eye wòva tɔ ɖe dzigbeta la ƒe tɔʋu nu, le avɔnyala ƒe anyigba ƒe agblemɔ gã la to. 
3 Eye Eliyakim, Hilkiya vi, si nye fia ƒe aƒedzikpɔla kple agbalẽŋlɔla Sebna kpakple nuŋlɔla Yoak, Asaf vi, do va wo gbɔ.
4 Eye Rabsake gblɔ na wo be: “Migblɔ na Hizkiya be, ‘Ale fia gã, Asiria fia, gblɔe nye esi: “Nu ka kura gɔ̃ ŋue nèle ŋu ɖom ɖo? 
5 Ègblɔ be, ‘Aɖaŋudzedze kple ŋusẽ le asinye hena aʋawɔwɔ’ ke numenya gbɔlo koe. Azɔ ame ka ŋue nèle ŋu ɖom ɖo, si tae nèdze aglã ɖe ŋunye? 
6 Kpɔ ɖa! Èle ŋu ɖom ɖe aɖa ŋeŋe sia, si nye Egipte, esi ne ame aɖe ziɔ ɖe eŋu la, wòaŋɔ asi me nɛ la, ƒe kpekpeɖeŋu ŋuti. Aleae Egipte-fia Farao le na ame siwo katã ɖoa ŋu ɖe eŋu. 
7 Ne ègblɔ nam be, ‘Afetɔ mía Mawu ŋue míele ŋu ɖom ɖo la,’ ɖe menye eƒe nuxeƒewo kple vɔsamlekpuiwoe Hizkiya ɖe ɖa hegblɔ na Yuda kple Yerusalem be, ‘Vɔsamlekpui sia ŋgɔe miade ta agu ɖo’ oa?”’ 
8 Eya ta ne èlɔ̃ la, wò kple nye aƒetɔ Asiria-fia mitso gbe: Matsɔ sɔ akpe eve ana wò kpɔ be àte ŋu akpɔ sɔdolawo woado wo hã. 
9 Ekema aleke nàwɔ ana nutodziɖula siwo nye nye aƒetɔ ƒe dɔla suetɔwo dometɔ ɖeka nagbugbɔ ɖe megbe hafi nèle ŋu ɖom ɖe Egipte ŋu be wòana tasiaɖamwo kple sɔdolawo yea? 
10 Ðe nyemexɔ mɔɖeɖe tso Afetɔ gbɔ hafi ho ɖe anyigba sia ŋu be matsrɔ̃e oa? Afetɔ ŋutɔe gblɔ nam be, ‘Ho ɖe anyigba sia ŋu ne nàtsrɔ̃e.’”
11 Ale Eliyakim kple Sebna kpakple Yoak gblɔ na Rabsake be: “Míeɖe kuku, ƒo nu kple wò dɔlawo le Aramgbe me, elabena míesee; ke mègaƒo nu kpli mí le Yudagbe me ɖe dukɔ si le glia dzi la ƒe to me o.” 
12 Ke Rabsake ɖo eŋu be: “Ðe wobe mia kple miaƒe aƒetɔ ɖeɖe gbɔe nye aƒetɔ dɔm ɖo, be magblɔ nya siawo naa? Alo menye ame siwo bɔbɔ nɔ glia dzi, ame siwo aɖu woawo ŋutɔwo ƒe mĩ ahano woawo ŋutɔwo ƒe aɖuɖɔ kpli mi la, hã gbɔe wòdɔm ɖo oa?”
13 Eye Rabsake tɔ ɖi hedo ɣli sesĩe gblɔ le Yudagbe me be: “Mise fia gã, Asiria-fia, ƒe nya. 
14 Ale fia la gblɔe nye esi, ‘Migana Hizkiya nable mi o, elabena mate ŋu aɖe mi o. 
15 Eye migana Hizkiya nable mi miaɖo ŋu ɖe Afetɔ ŋu agblɔ be: “Afetɔ aɖe mí godoo, eye womatsɔ du sia ade asi na Asiria-fia o.” 
16 Migaɖo to Hizkiya o, elabena ale Asiria-fia gblɔe nye esi: “Miwɔ ŋutifafa kplim ne miana ta, eye mia dometɔ ɖe sia ɖe aɖu eya ŋutɔ ƒe waintsetse, aɖu eya ŋutɔ ƒe gbotsetse ahano eya ŋutɔ ƒe vudometsi 
17 va se ɖe esime mava kplɔ mi ayi anyigba si le abe mia tɔ ene dzi, anyigba si dzi agblemenuku kple wain yeye le, anyigba si dzi abolo kple waingblewo le. 
18 Migana Hizkiya nable mi agblɔ be, ‘Afetɔ aɖe mí’ o. Ðe dukɔwo ƒe mawuwo dometɔ aɖe te ŋu ɖe eƒe anyigba tso Asiria-fia si me kpɔa? 
19 Afi kae Hamat kple Arpad ƒe mawuwo le? Afi kae Sefarvayim ƒe mawuwo le? Ðe wote ŋu ɖe Samaria tso asinye mea? 
20 Anyigba siawo ƒe mawuwo katã dometɔ kae ɖe woƒe anyigba tso asinye me kpɔ, ne Afetɔ naɖe Yerusalem tso asinye me?”’”
21 Ke wozi kpi, eye womeɖo nya aɖeke ŋu nɛ o, elabena fia la de se be, “Migaɖo nya aɖeke ŋu nɛ o.” 
22 Ke Eliyakim, Hilkiya vi, si nye aƒedzikpɔla kple agbalẽŋlɔla Sebna kpakple nuŋlɔla Yoak, Asaf vi, dze woƒe awuwo heva Hizkiya gbɔ, eye wogblɔ Rabsake ƒe nyawo nɛ.

YESAYA 37
1 Esi Fia Hizkiya se nya sia ko la, edze eƒe awuwo, eye wòta akpanya heva Afetɔ ƒe aƒe la me. 
2 Eye wòdɔ Eliyakim si nye aƒedzikpɔla kple agbalẽŋlɔla Sebna kpakple nunɔlawo ƒe ame tsitsi siwo ta akpanya la, ɖo ɖe nyagblɔɖila Yesaya, Amoz vi la gbɔ. 
3 Eye wogblɔ nɛ be: “Ale Hizkiya gblɔe nye esi, ‘Ŋkeke sia nye xaxa, mokaname kple vlodoŋkeke; elabena viwo ɖo dzidzi me, gake ŋusẽ meli woadzi wo o. 
4 Ðewohĩ Afetɔ wò Mawu ase Rabsake, ame si eƒe aƒetɔ Asiria-fia dɔ be wòava ɖe alɔme le Mawu gbagbe la ŋu la ƒe nyawo, eye wòabia akɔntae le nya siwo Afetɔ wò Mawu se la ta. Eya ta do gbe ɖa ɖe ame susɔe siwo li la ta.’”
5 Eya ta Fia Hizkiya ƒe dɔlawo yi Yesaya gbɔ, 
6 eye Yesaya gblɔ na wo be: “Nya si miagblɔ na miaƒe aƒetɔe nye esi, ‘Ale Afetɔ gblɔe nye esi: “Mègavɔ̃ le nya siwo nèse, siwo nye busunya siwo Asiria-fia ƒe dɔlawo gblɔ ɖe ŋunye la ta o. 
7 Kpɔ ɖa, made susu aɖe tame nɛ, eye wòase nya aɖe ahatrɔ ayi eya ŋutɔ ƒe anyigba dzi; eye mana wòatsi yi nu le eya ŋutɔ ƒe anyigba dzi.”’”
8 Esi Rabsake se be Asiria-fia ho dzo le Lakis la, etrɔ yi egbɔ eye wòkpɔ be enɔ aʋa wɔm kple Libna. 
9 Azɔ Fia la se le Etiopia-fia Tirhaka ŋu be: “Eho va aʋa wɔ ge kpli wò.” Esi wòsee la, egadɔ amewo ɖo ɖe Hizkiya be: 
10 “Ale miagblɔ na Yuda-fia Hizkiya ye nye esi: ‘Mègana wò Mawu si ŋu nèle ŋu ɖom ɖo la nable wò nànɔ gbɔgblɔm be, “Womatsɔ Yerusalem ade asi na Asiria-fia o.” 
11 Kpɔ ɖa! Èse nu si Asiria-fiawo wɔ dukɔwo katã esi wotsrɔ̃ wo ɖikaa, ke ɖe woaɖe wò ya? 
12 Ðe dukɔ siwo tɔgbuinyewo tsrɔ̃ la, ƒe mawuwo ɖe woa? Afi kae Gozan, Haran, Rezef kple Eden vi siwo le Tel-Asar la le? 
13 Afi kae Hamat-fia, Arpad-fia kple du siwo nye Sefarvayim, Hena kple Iwa ƒe fiawo le?’”
14 Eye Hizkiya xɔ agbalẽawo le ame dɔdɔawo si eye wòxlẽe. Emegbe Hizkiya yi Afetɔ ƒe aƒe la me hekeke agbalẽawo ɖe Afetɔ ŋkume. 
15 Eye Hizkiya do gbe ɖa na Afetɔ be: 
16 “Oo aʋakɔwo ƒe Afetɔ, Israel ƒe Mawu, ame si bɔbɔ nɔ kerubiwo tame, wò ɖeɖe koe nye Mawu vavã ɖe anyigbadzifiaɖuƒewo katã dzi. Wòe wɔ dziƒowo kple anyigba. 
17 Oo Afetɔ, ƒu to anyi ne nàsee! Afetɔ, ʋu wò ŋkuwo ne nàkpɔ nu! Eye nàse nya siwo katã Senakerib gblɔ ɖo ɖa be yeatsɔ aɖe alɔme le Mawu gbagbe la ŋu. 
18 Oo Afetɔ, nyateƒee wònye be Asiria-fiawo tsrɔ̃ dukɔwo katã kple woawo ŋutɔwo ƒe dukɔ hã. 
19 Eye wotɔ dzo woƒe mawuwo, elabena menye mawuwo wonye o, ke boŋ amegbetɔ ƒe asinudɔwɔwɔwo, ati kple kpe wonye. Eya tae wote ŋu tsrɔ̃ wo ɖo. 
20 Ke azɔ, Afetɔ mía Mawu, ɖe mí tso esi me, ne anyigbadzifiaɖuƒewo katã nadze sii be wò ɖeɖe koe nye Mawu, Oo Afetɔ.”
21 Eye Yesaya, Amoz vi, ɖo gbedeasi sia ɖe Hizkiya be: “Ale Afetɔ, Israel ƒe Mawu la, gblɔe nye esi, ‘Esi nèdo gbe ɖa nam le Asiria-fia Senakerib ŋu ta la, 22 nya si Afetɔ gblɔ ɖe eŋue nye esi:
“Zion ɖetugbui leaƒe do vlo wò, eko wò.
Èna Yerusalem vinyɔnu ʋuʋu ta ɖe ŋuwò.
23 Ame ka ŋue nèɖe alɔme le hegblɔ busunya ɖo?
Ame ka tae nèdo ɣli ɖo,
Eye ame ka ŋue nèfɔ mo dzi ɖo dadatɔe?
Israel Ƒe Kɔkɔetɔ la ŋue!
24 Èto wò dɔlawo dzi ɖe alɔme le Afetɔ ŋu be:
‘Matsɔ nye aʋatasiaɖam gbogboawo,
Ayi towo dzi,
Ayi Lebanon ƒe nutotroewo me.
Malã eƒe sederti kɔkɔwo kple eƒe sesewu nyuitɔwo aƒu anyi.
Mage ɖe eƒe kɔkɔƒe kekeake, eƒe ave dodowo me.
25 Maɖe vudo ahano tsi;
Nye afɔƒome ana Egipte-tɔsisiwo namie.’
26 Mèsee oa? Nu siae meɖo be mawɔ tso blema ke.
Meɖoe tso gbe aɖe gbe ke.
Azɔ mana wòava eme.
Be nàgbã du sesẽwo woazu glikpowo.
27 Wɔna avɔ le wo me nɔlawo ŋu;
Dzika atso wo ƒo, eye ŋukpe alé wo.
Woazu abe nu miemie le agble me kple gbe fẽwo ene,
Abe xɔtagbe si ɣedzeƒeya fiã ene.
28 Menya wò anyinɔnɔ, wò dodo kple wò gbɔgbɔ,
Kple wò dzikudodo ɖe ŋunye nyuie,
29 Elabena wò dzikudodo ɖe ŋunye kple wò gbeɖeɖe la va ɖo to me nam.
Eya ta made nye ga ŋɔti na wò kple nye numega nu na wò,
Eye makplɔ wò agbugbɔ to mɔ si nèto va la.”
30 “‘Esiae anye dzesi na wò: Miaɖu nuku siwo mie le wo ɖokui si la ƒe tsetse le ƒe sia me, eye ne ƒe trɔ la, miaɖu esiwo gamie tso esiwo mie le wo ɖokui si la me; ke le ƒe etɔ̃lia me la, miaƒã nu aŋe nu, eye miade waingblewo aɖu wo me kutsetsewo. 
31 Yuda ƒe aƒe la me tɔ siwo tsi agbe, siwo susɔ la, ato ke ayi to, eye woatse ku aɖo ta dzi. 
32 Elabena ame susɔeawo ado tso Yerusalem, eye ame siwo tsi agbe la atso Zion To la dzi. Aʋakɔwo ƒe Afetɔ ƒe dzonɔameme awɔ esia ade goe.
33 “‘Eya ta ale Afetɔ gblɔ ɖe Asiria-fia ŋue nye esi:
“Mava du sia me o,
Mada aŋutrɔ ɖeka pɛ hã ɖe eme o
Matsɔ akpoxɔnu akpe kplii o,
Eye maƒu kpo ɖe eŋu hã o.”’
34 ‘Agbugbɔ ato mɔ si wòto va;
Mava du sia me o,’ Afetɔ ye gblɔe.
35 ‘Maʋli du sia ta, eye maɖee le nye ŋutɔ
Kple nye subɔla David ta.’”
36 Eye Afetɔ ƒe dɔla do yi ɖawu ame akpe alafa ɖeka blaenyi vɔ atɔ̃ le Asiriatɔwo ƒe asaɖa la me. Esi amewo fɔ ŋdi kanya la, ame kukuwo sɔŋ ko wokpɔ. 
37 Eya ta Asiria-fia Senakerib trɔ dzo, eye wòyi ɖanɔ Niniwe. 
38 Eye esi wòle ta dem agu le eƒe mawu Nisrok ƒe me la, Adramelek kple Sarezer, siwo nye eya ŋutɔ viaŋutsuwo, wui kple yi, eye wosi yi Ararat-nyigba dzi. Eye via Esar-Hadon zu fia ɖe eteƒe.

YESAYA 38
1  Le ŋkeke mawo me la, Hizkiya dze dɔ de kuku ge kloe. Eya ta nyagblɔɖila Yesaya, Amoz vi, va egbɔ gblɔ nɛ be, “Ale Afetɔ gblɔe nye esi: ‘Wɔ ɖoɖo na wò aƒemetɔwo, elabena èle kuku ge; màhaya o.’” 
2 Enumake Hizkiya trɔ mo ɖe gli ŋu hedo gbe ɖa na Afetɔ be: 
3 “Oo Afetɔ, meɖe kuku, ɖo ŋku ale si mezɔ le ŋkuwòme le nyateƒe kple dzi blibo me, eye mewɔ nu si nyo le ŋkuwòme la dzi.” Eye Hizkiya fa avi hehehe.
4 Afetɔ ƒe gbe va na Yesaya be: 
5 “Trɔ yi nàɖagblɔ na Hizkiya be, ‘Ale Afetɔ, tɔgbuiwò David ƒe Mawu la, gblɔe nye esi: “Mese wò gbedodoɖa. Mekpɔ wò aɖatsiwo. Kpɔ ɖa, matsɔ ƒe wuiatɔ̃ akpe wò agbenɔƒewo, 
6 maɖe wò kple du sia tso Asiria-fia si me, eye maʋli du sia ta. 
7 Esiae nye dzesi na wò tso Afetɔ gbɔ, be Afetɔ awɔ nya si wògblɔ la dzi: 
8 Kpɔ ɖa, mana vɔvɔli si ɣe na wòdze Ahaz ƒe atrakpuiawo dzi la nagbugbɔ ɖe megbe afɔ ewo.”’” Ale ɣe la gbugbɔ ɖe megbe afɔ ewo tso atrakpui siwo dzi wòva ɖo la.
9 Yuda-fia Hizkiya ƒe nya si wòŋlɔ, esime wòdze dɔ, eye wòhaya tso eƒe dɔlélea me lae nye esi:
10 Megblɔ be: “Le nye agbemeŋkekewo ƒe domedome la,
Mage ɖe Tsiẽƒe ƒe agbowo me.
Woaxɔ nye agbenɔƒe susɔeawo le asinye.”
11 Megblɔ be: “Nyemakpɔ Yah, Yah, le agbagbeawo ƒe anyigba dzi o.
Nyemagakpɔ amegbetɔwo azɔ o,
Ne mele ame siwo dome nu sia nu nu yi le la gbɔ.
12 Woho nye nɔƒe hetsɔe dzoe le gbɔnye
Abe alẽkplɔlawo ƒe agbadɔ ene.
Meŋlɔ́ nye agbe abe ale si avɔlɔ̃la ŋlɔ́a avɔe ene.
Etsom ɖa abe ale si avɔlɔ̃la tsoa kawo le agbati me ene.
Ètsɔam dea asi zã kple keli.
13 Mefa dzi na ɖokuinye va se ɖe ŋdi.
Egbãa nye ƒuwo katã abe dzata ene;
Ètsɔam dea asi zã kple keli.
14 Mele fafam abe sagbadre kple tsãlɛ ene;
Mele xɔxlɔ̃m abe ahɔnɛ ene.
Nye ŋkuwo kpɔ dzi ʋuu nu te wo ŋu:
‘Oo, Afetɔ mele nu xam ŋutɔ,
Kpe ɖe ŋunye!’
15 Nya kae magblɔ?
Eƒo nu nam eye wòwɔe hã.
Le nye agbemeŋkekewo katã me la, mazɔ ɖokuibɔbɔtɔe
Le nye vevesesewo ta.
16 ‘Oo Afetɔ, nu siawo tae ame nɔa agbe ɖo,
Eye nu siawo mee nye gbɔgbɔ le agbe le.
Àgana lãmesẽm, eye àxɔm ɖe agbe.
17 Kpɔ ɖa, veve sɔŋ xɔ ɖe tomefafa teƒe nam;
Gake esi nèlɔ̃m ta
Èɖem tso tsɔtsrɔ̃ ƒe do me.
Ètsɔ nye nu vɔ̃wo katã ƒu gbe ɖe megbewò.
18 Elabena Tsiẽƒe mate ŋu ado wò ɖe dzi o,
Ku mate ŋu akafu wò o.
Aʋlimeyilawo mate ŋu anɔ mɔ kpɔm na wò nyateƒetɔnyenye o.
19 Agbagbeawo, agbagbeawo koe akafu wò,
Abe ale si mete ŋu le ewɔm egbe sia ene.
Fofowo agblɔ wò nyateƒetɔnyenye na wo viwo.
20 Oo Afetɔ, xɔ nam,
Eye míatsɔ kasaŋkuwo aƒo nye hawo
Le míaƒe agbemeŋkekewo katã me le Afetɔ ƒe aƒe la me.’”
21 Eye Yesaya gblɔ be: “Mitsɔ gbotsetse ƒuƒu kɔ vɛ, eye mitsɔe ɖo ƒoƒoe la dzi, ne wòahaya.” 
22 Do ŋgɔ la, Hizkiya bia be: “Nu kae nye dzesi be magayi Afetɔ ƒe aƒe la me?”

YESAYA 39
1  Ɣemaɣi la, Babilon-fia Merodak-Baladan, Baladan vi, ɖo agbalẽwo kple nunanawo ɖe Hizkiya, elabena ese be edze dɔ, ke ehaya. 
2 Eye Hizkiya xɔ wo nyuie hetsɔ nu siwo le eƒe kesinɔnudzraɖoƒe siwo nye klosalo, sika, balsam-mi kple ami xɔasi bubuwo, nu siwo le eƒe aʋawɔnuwo dzraɖoƒe blibo la, kple nu sia nu si le eƒe kesinɔnudzraɖoƒe fia wo. Naneke meli si Hizkiya metsɔ fia wo le eƒe aƒe kple eƒe dziɖuƒe blibo la katã me o.
3 Emegbe nyagblɔɖila Yesaya va Fia Hizkiya gbɔ va biae be: “Nya kae ame siawo gblɔ, eye afi kae wotso?” Hizkiya ɖo eŋu be: “Anyigba didi aɖe dzie wotso va, tso keke Babilon ke.” 
4 Eye wòbiae be: “Nu kae wokpɔ le aƒewò me?” Hizkiya ɖo eŋu be: “Wokpɔ nu siwo katã le aƒenye me. Naneke mele nye kesinɔnudzraɖoƒe si nyemetsɔ fia wo o.”
5 Eye Yesaya gblɔ na Hizkiya be: “Se aʋakɔwo ƒe Afetɔ ƒe nya, 
6 ‘Kpɔ ɖa! Ŋkekewo li gbɔna, esime woalɔ nu siwo katã le wò aƒe me kple nu siwo katã tɔgbuiwòwo dzra ɖo va se ɖe egbe sia la adzoe ayi Babilon.’ ‘Womagblẽ naneke ɖi o,’ Afetɔ ye gblɔe. 
7 ‘Woakplɔ wò ŋutɔ viwòŋutsu siwo nàdzi la dometɔ aɖewo adzoe, eye woazu fiaŋumewo le Babilon-fia ƒe fiasã me.’”
8 Eye Hizkiya ɖo eŋu na Yesaya be: “Afetɔ ƒe nya si nègblɔ la nyo.” Eye wògagblɔ be: “Elabena ŋutifafa anɔ anyi eye nuwo ali ke le nye agbenɔɣi.”

YESAYA 40
1  Mia Mawu la be: “Mifa akɔ, mifa akɔ na nye dukɔ.
 2 Miƒo nu wòade dzi gbɔ na Yerusalem,
Eye migblɔ nɛ be eƒe dzizizidɔ la wu enu;
Exe eƒe fɔɖiɖi ŋuti fe la vɔ.
Elabena exɔ eƒe nu vɔ̃wo ŋuti fetu blibo la tso Afetɔ gbɔ.”
 3 Ame aɖe le ɣli dom le gbedzi be:
“Midzra Afetɔ ƒe mɔ dzi ɖo!
Mita mɔ gã dzɔdzɔe ɖe gbegbe na mía Mawu la.
 4 Woana baliwo katã nakɔ kpo,
Eye woana to sia to kple togbɛ sia togbɛ nabɔbɔ ɖe anyi.
Kpoteƒe azu zɔzrɔ̃eƒe,
Eye teƒe glidzaglidza azu sɔsɔeƒe.
 5 Afetɔ ƒe ŋutikɔkɔe adze,
Eye ŋutilãwo katã akpɔe le ɣeyiɣi ɖeka me,
Elabena Afetɔ ƒe nue gblɔe.”
 6 Se ɖa! Ame aɖe le gbɔgblɔm be: “Do ɣli!”
Eye ame bubu bia be: “Mado nu ka ƒe ɣli?”
“Ŋutilãwo katã le abe gbe mumu ene,
Eye woƒe nuteƒewɔwɔ katã le abe seƒoƒo le gbe me ene.
 7 Gbe mumu ƒuna,
Seƒoƒo yrɔna,
Elabena Afetɔ ƒe gbɔgbɔ gbɔ ɖe wo dzi.
Nyateƒee, gbe mumue dukɔ la nye.
 8 Gbe mumu ƒuna,
Seƒoƒo yrɔna,
Ke mía Mawu ƒe nya ya nɔa anyi tegbee.”
 9 Lia to kɔkɔ,
Wò, nyɔnu si tsɔ nya nyui gbɔna na Zion.
Kɔ gbe dzi sesĩe,
Wò, nyɔnu si tsɔ nya nyui gbɔna na Yerusalem,
Kɔ gbe dzi, mègavɔ̃ o.
Ðe gbeƒã na Yuda duwo be: “Mia Mawue nye esi.”
10 Kpɔ ɖa! Aƒetɔ Dziɖulagã Afetɔ gbɔna kple ŋusẽ,
Eye eƒe alɔ aɖu fia nɛ.
Kpɔ ɖa! Egbɔna kple teƒeɖoɖo,
Eye fetu si wòxena la le eŋgɔ.
11 Akplɔ eƒe lãhawo abe alẽkplɔla ene.
Aƒo alẽviawo nu ƒu ɖe eƒe abɔwo dome,
Eye wòakɔ wo ɖe akɔnu.
Akplɔ esiwo le no nam la ɖɔɖɔɖɔ.
12 Ame kae dzidze tsiwo ɖe eƒe asiʋlo me
Eye wòtsɔ asi ɖeka dzidze dziƒowo,
Eye wòlɔ anyigbadzikewo ɖe nudonu me
Alo tsɔ nudanu da towo
Heda togbɛwo le nudagbɛ me?
13 Ame kae dzidze Afetɔ ƒe gbɔgbɔ,
Eye ame kae anye eƒe aɖaŋuɖola ne wòafia nui?
14 Ame kae wòde adaŋu kplii, ne wòase nu gɔme,
Alo ame kae fiaa nui le dzɔdzɔenyenye ƒe mɔ ŋu,
Alo fiaa sidzedzee,
Alo fiaa gɔmesese vavãtɔ ƒe mɔe?
15 Kpɔ ɖa! Dukɔwo le abe tsigege toŋtoŋ le tɔkpo ŋu ene,
Eye wobu wo abe ʋuʋudedi si le nudanu ŋu ene.
Kpɔ ɖa! Ekɔa ƒukpowo ɖe dzi abe ʋuʋudedi ko ene.
16 Lebanon ƒe atiwo gɔ̃ hã mesɔ gbɔ hena dzododo o,
Eye eƒe gbemelãwo mesɔ gbɔ woatsɔ asa numevɔe o.
17 Dukɔwo katã le abe ɖe womeli o ene le eŋkume,
Ebua wo abe nu maɖinu kple tofloko ene.
18 Ame kae miate ŋu atsɔ Mawu asɔ kplii?
Eye nɔnɔme kae miate ŋu atsɔ asɔ kplii?
19 Aɖaŋudɔwɔla kɔ̀ legba,
Nutula fa sika ɖe eŋu,
Eye wòwɔ klosalokɔsɔkɔsɔwo.
20 Etia ati,
Ati si manyunyɔ o.
Edi aɖaŋudɔwɔla bibi aɖe
Be wòatsɔe akpa nu kpakpɛ si maʋã o la nɛ.
21 Ðe mienyae oa?
Ðe miesee oa?
Ðe womegblɔe na mi tso gɔmedzedzea me ke oa?
Ðe miese egɔme tso esime woɖo anyigba gɔme anyi oa?
22 Ame aɖe le anyigba nogoo la tame,
Eye edzinɔlawo le abe ʋetsuviwo ene.
Ehea dziƒowo me abe avɔ falɛfalɛ ene,
Eye wòkekea wo abe agbadɔ si me wòanɔ ene.
23 Eɖia gbɔ amegãwo,
Eye wòna anyigba la dzi ʋɔnudrɔ̃lawo ke hã zu tofloko.
24 Womekpɔ do wo haɖe o,
Womekpɔ ƒã wo haɖe o,
Woƒe ati mekpɔ to ke ɖe anyigba me haɖe o.
Eye ne woɖo ƒuƒu wo ko la, woƒuna,
Eye ya lɔa wo ɖe nu abe ahɔ̃liti ene.
25 Kɔkɔetɔ la be: “Ame kae miatsɔm asɔ kpli, ne nye kplii míasɔ?”
26 “Mifɔ mo dzi ne miakpɔ dziƒo.
Ame kae wɔ nu siawo?
Eyae nye ame si kplɔa woƒe aʋakɔ la doa goe le woƒe xexlẽme nu;
Eyɔa wo dometɔ ɖe sia ɖe ŋkɔ.
Wo dometɔ aɖeke mesusɔna o
Le eƒe ŋusẽ geɖe kple eƒe alɔkame sesẽ la ta.
27 “Oo Yakob, nu ka tae nèle nu ƒom, Oo Israel, nu ka tae nèle gbɔgblɔm be:
‘Nye mɔwo le ɣaɣla ɖe Afetɔ,
Eye Mawu metsoa afia dzɔdzɔe nam o?
28 Mènyae oa? Mèsee oa?
Afetɔ, Ame si wɔ anyigba ƒe mlɔenuwo la, Mawu mavɔtɔ wònye.
Ðeɖi metea eŋu o, eye nu metia kɔ nɛ o.
Eƒe nunya me dzodzro meli o.
29 Edoa ŋusẽ ame si ŋu ɖeɖi te
Eye wònaa ŋusẽ geɖe ame beliwo.
30 Nu ati kɔ na sɔhɛwo, ɖeɖi ate wo ŋu,
Eye ɖekakpuiwo akli nu adze anyi,
31 Gake ŋusẽ yeye aɖo ame siwo kpɔa mɔ na Afetɔ ya ŋu.
Woadzo ayi dzi abe hɔ̃ ene.
Woaƒu du gake ɖeɖi mate wo ŋu o;
Woazɔ azɔli gake nu mati kɔ na wo o.”

YESAYA 41
1 “Mi ƒukpowo, mizi ɖoɖoe miaɖo tom;
Ŋusẽ yeye negaɖo dukɔwo ŋu.
Mina woate va ne woaƒo nu.
Mina míakpe ta adrɔ̃ nya.
 2 Ame kae nyɔ ame tso ɣedzeƒe?
Eye wòyɔe le dzɔdzɔenyenye me va Eƒe afɔ nu,
Ne wòatsɔ dukɔwo ade asi nɛ
Eye wòana wòabɔbɔ fiawo ɖe anyi?
Ame kae na wozu kewɔ le eƒe yi ŋgɔ,
Eye eƒe dati na wozu gbe ƒuƒu le ya nu?
 3 Etia wo yome, eye naneke mexea mɔ nɛ
Le mɔ si dzi meto kpɔ o la dzi o.
 4 Ame kae wɔ esia,
Eye wòyɔ dzidzimewo tso gɔmedzedzea me ke?
Nye, Afetɔ, nyee nye Gbãtɔ;
Eye nenema ko maganɔ na ame mlɔetɔwo hã.”
 5 Ƒukpowo kpɔe, eye dzidzi ƒo wo.
Anyigba ƒe mlɔenuwo dzo nyanyanya.
Woƒo takpli heva.
 6 Wo dometɔ ɖe sia ɖe kpe ɖe ehavi ŋu,
Eye ame sia ame gblɔ na nɔvia be: “Sẽ ŋu.”
 7 Ale aɖaŋudɔwɔla do ŋusẽ nutula;
Ame si tsɔ yɔxɔmezu ƒo ga gbabɛ la hã
Do ŋusẽ ame si le zu dam le zukpe dzi.
Egblɔ le nu si trem wole la ŋu be: “Enyo.”
Eye woƒo gatagbadzɛwo ɖee be wòagamu o.
 8 “Ke wò, Israel, nye subɔla nènye;
Nye ame tiatia Yakob,
Xɔ̃nye Abraham ƒe dzidzimevi,
 9 Wò ame si mekplɔ tso anyigba ƒe mlɔenuwo,
Wò ame si meyɔ tso eƒe didiƒe kekeake.
Megblɔ na wò be: ‘Nye subɔla nènye;
Metia wò, eye nyemegbe wò o.
10 Mègavɔ̃ o, elabena meli kpli wò.
Mègatsi dzi o, elabena nyee nye wò Mawu.
Mado ŋusẽ wò; makpe ɖe ŋuwò.
Matsɔ nye dzɔdzɔenyenye ƒe nuɖusi alé wò ɖe te.’
11 Kpɔ ɖa! Ame siwo katã do dɔmedzoe ɖe ŋuwò la aɖu ŋukpe, eye woaɖi gbɔ wo.
Ame siwo le dzre wɔm kpli wò la azu tofloko, eye woatsrɔ̃.
12 Àdi ame siwo le avu wɔm kpli wò la, ke màkpɔ wo o.
Ame siwo le aʋa wɔm kpli wò la nu ayi, woazu tofloko.
13 Elabena nye, Afetɔ wò Mawu, melé wò nuɖusi ɖe asi,
Nye ame si le gbɔgblɔm na wò be: ‘Mègavɔ̃ o. Makpe ɖe ŋuwò.’
14 Mègavɔ̃ o, wò, nyévi Yakob,
Mi Israel ŋutsuwo, makpe ɖe mia ŋu,” Afetɔ, Israel Ƒe Kɔkɔetɔ, mia Gbugbɔƒlela, lae gblɔe.
15 “Kpɔ ɖa! Metsɔ wò wɔ luƒotasiaɖam,
Luƒonu yeye si nu aɖu nueveewo le.
Àfanya towo ahagbã wo gudugudu
Eye àwɔ togbɛwo abe tsro ene.
16 Àgbɔ wo,
Eye ya akplɔ wo adzoe;
Ahom aka wo ahlẽ.
Ke àkpɔ dzidzɔ ɖe Afetɔ ŋu.
Eye àƒo adegbe ɖe Israel Ƒe Kɔkɔetɔ la ŋu.”
17 “Ame dahe kple hiãtɔ le tsi dim, ke ɖeke meli o.
Tsikɔwuame na woƒe aɖewo dzi ƒu.
Nye Afetɔ matɔ na wo.
Nye, Israel ƒe Mawu la, nyemagblẽ wo ɖi o.
18 Mana tɔwo nasi le togbɛ ƒeƒlewo tame,
Eye tsidzɔƒewo anɔ baliwo me.
Mana gbegbe nazu ta,
Eye kuɖiɖinyigba nazu tsidzɔƒewo.
19 Mado sederti,
Akasiati, mirte kple gbemiti ɖe gbegbe.
Mado sesewu,
Fɔfɔli kple kpomi ɖe tagba,
20 Ale be dukɔwo katã nakpɔe, eye woadze sii,
Woalé ŋku ɖe eŋu ahase egɔme
Be Afetɔ ƒe asie wɔ esia,
Eye Israel Ƒe Kɔkɔetɔ lae wɔe.”
21 Afetɔ be: “Mihe miaƒe nyawo ɖe go.”
Yakob ƒe Fia la be: “Mihe mia ɖokuitaʋlinyawo ɖe go.”
22 “Mina kpeɖodzi nanɔ eŋu, ne miagblɔ nu siwo gbɔna dzɔdzɔ ge la na mí.
Migblɔ nu siwo dzɔ va yi la na mí,
Ne míade ŋugble le wo ŋu ahanya ale si nuwo va yii.
Alo migblɔ nu siwo gbɔna la na mí míase.
23 Migblɔ nu siwo ava dzɔ le etsɔme na mí,
Ne míadze sii be mawuwoe mienye.
Ɛ̃, miwɔ nyui alo vɔ̃,
Be míakpɔe wòadzi ŋɔ na mí.
24 Kpɔ ɖa! Mienye nu siwo meli o,
Eye miaƒe dɔwɔwɔwo nye nu dzodzro.
Ame sia ame si tia mi la, ŋunyɔnu wònye.
25 “Menyɔ ame aɖe tso dziehe, eye ele vava ge.
Atso ɣedzeƒe, eye wòayɔ nye ŋkɔ.
Afanya dziɖulawo abe anyie wonye ene,
Afanya wo abe ale si zemela nyaa anyi ene.
26 Ame kae gblɔ esia tso gɔmedzedzea me ne míadze sii,
Alo tso gbe aɖe gbe ke ne míagblɔ be: ‘Etɔ dzɔ’?
Ame aɖeke megblɔe o!
Ame aɖeke meɖe gbeƒãe o!
Ame aɖeke mese nya aɖeke tso mia gbɔ o!”
27 Nyee nye ame gbãtɔ, si gblɔ na Zion be: “Kpɔ ɖa! Woawoe nye esi!”
Eye megblɔ na Yerusalem be mana ame aɖe nahe du nyui vɛ.
28 Metsa ŋku, ke ame aɖeke meli o;
Aɖaŋuɖola aɖeke mele wo dome o.
Eye mebiaa nya wo be woaɖo eŋu nam.
29 Kpɔ ɖa! Wo katã wonye tofloko sɔŋ.
Woƒe dɔwɔwɔwo nye nu dzodzro.
Woƒe galegbawo nye ya kple nu maɖinuwo.

YESAYA 42
1  Kpɔ ɖa! Nye subɔla, ame si melé ɖe te!
Nye ame tiatia, ame si ƒe nu dze ŋunye!
Metsɔ nye gbɔgbɔ de eme.
Ahe dzɔdzɔenyenye vɛ na dukɔwo.
 2 Mado ɣli alo ado aƒa o,
Eye mana woase eƒe gbe le kpɔdomee o.
 3 Maɖe aƒla ŋeŋe la le enu o,
Eye mele ɖovu bibi si le tsitsim la tsi ge o.
Ahe dzɔdzɔenyenye vɛ le nyateƒe me.
 4 Ðeɖi mate eŋu o, eye eƒe lãme magbɔdzɔ o, va se ɖe esime wòɖo dzɔdzɔenyenye anyi le anyigba dzi;
Ƒukpowo le mɔ kpɔm na eƒe se la.
 5 Ale Mawu vavã Afetɔ,
Dziƒowo Wɔla, Mawu Gã si hea wo me,
Ame si keke anyigba kple edzinuwo ɖe enu,
Ame si naa agbegbɔgbɔ edzinɔlawo
Kple gbɔgbɔ ame siwo zɔa edzi la, gblɔe nye esi:
 6 “Nye Afetɔ ye yɔ wò le dzɔdzɔenyenye me,
Eye melé wò asi.
Makpɔ tawò, eye mana nànye nubabla na dukɔwo,
Kple kekeli na dukɔwo,
 7 Ne nàʋu ŋku na ŋkuagbãtɔwo,
Ne nàɖe gamenɔlawo tso gaxɔ me
Kple ame siwo bɔbɔ nɔ viviti me la tso gaxɔ me.
 8 Nyee nye Afetɔ. Ŋkɔnyee;
Nyematsɔ nye ŋutikɔkɔe ana ame bubu aɖeke o,
Alo atsɔ nye kafukafu ana legbawo o.
 9 “Kpɔ ɖa nya gbãtɔwo va eme,
Azɔ mele yeyewo gblɔm.
Megblɔ wo na mi hafi woava dzɔ.”
10 Midzi ha yeye na Afetɔ,
Midzi eƒe kafukafuhawo tso anyigba ƒe mlɔenuwo,
Mi ame siwo toa atsiaƒu dzi kple mi atsiaƒumenuwo,
Mi ƒukpowo kple wo dzi nɔlawo.
11 Gbegbe kple eƒe duwo nakɔ gbe dzi,
Kɔƒe siwo dome Kedar le hã nekɔ gbe dzi.
Agakpedzinɔlawo netso aseye.
Wonedo ɣli sesĩe tso towo tame.
12 Mina woatsɔ ŋutikɔkɔe ana Afetɔ,
Eye woaɖe gbeƒã eƒe kafukafu le ƒukpowo dzi.
13 Afetɔ ado abe kalẽtɔ ene.
Ade dzo eɖokui me abe aʋawɔla ene.
Ado ɣli, ɛ̃, ado aʋaɣli;
Aɖu eƒe futɔwo dzi.
14 “Mezi ɖoɖoe eteƒe didi.
Mezi kpi, eye meɖu ɖokuinye dzi.
Maŋè eye malɔ gbɔgbɔtsixe ɖe ƒo anɔ gbɔgbɔm fuxefuxe
Abe nyɔnu si le ku lém ene.
15 Magblẽ towo kple togbɛwo,
Eye mana wo dzi gbewo katã naƒu.
Mana tɔsisiwo nazu ƒukpowo,
Eye mana tawo namie.
16 Makplɔ ŋkuagbãtɔwo to mɔ si womenya o la dzi;
Mana woato toƒe si womenya o.
Mana viviti si le wo ŋgɔ la nazu kekeli,
Eye teƒe glidzaglidza nazu sɔsɔeƒe.
Nu siae mawɔ na wo, eye nyemagblẽ wo ɖi o.”
17 Ame siwo ɖoa ŋu ɖe legbawo ŋu,
Ame siwo le gbɔgblɔm na galegbawo be: “Miawoe nye míaƒe mawuwo” la,
Woagbugbɔ wo ɖe megbe, eye ŋu akpe wo vevie.
18 Mi tokunɔwo, mise nu;
Eye mi ŋkuagbãtɔwo, mifɔ mo dzi miakpɔ nu.
19 Ame kae nye ŋkuagbãtɔ, ɖe menye nye subɔlae oa,
Eye ame kae nye tokunɔ abe nye dɔla si medɔ la ene?
Ame kae nye ŋkuagbãtɔ abe ame si woɖo eteƒe na ene,
Eye ame kae nye ŋkuagbãtɔ abe Afetɔ ƒe subɔla ene?
20 Èkpɔ nu geɖe, ke mèlé ŋku ɖe wo ŋu o.
Èke to, gake mèse naneke o.
21 Edze Afetɔ ŋu
Be yeado gã yeƒe se la ahadoe ɖe dzi le eƒe dzɔdzɔenyenye la ta.
22 Ke dukɔ si woha, eye woda adzoe lae wonye,
Wo katã wotsi do me, eye woɣla wo ɖe gaxɔwo me.
Woha wo, ke ame aɖeke meli axɔ na wo o,
Woda adzo wo, ke ame aɖeke meli agblɔ be: “Gbugbɔ wo vɛ!” o.
23 Mia dometɔ kae alé to ɖe nya sia ŋu?
Ame kae aƒu to anyi ahalé ŋku ɖe nu siwo gbɔna dzɔdzɔ ge la ŋu?
24 Ame kae tsɔ Yakob de asi be woaha,
Eye wòtsɔ Israel de asi na adzodalawo?
Ðe menye Afetɔ, Ame si ŋu míewɔ nu vɔ̃ ɖo ye oa?
Wogbe eƒe mɔwo dzi zɔzɔ,
Eye womeɖo to eƒe se la o.
25 Eya ta etrɔ eƒe dɔmedzoe,
Eƒe dziku, kple aʋawɔwɔ ƒe fuwɔame kɔ ɖe Israel dzi.
Aʋa la ƒe dzo fiã nu sia nu si ƒo xlãe, ke mede dzesii o.
Dzoa lé flaflafla ɖe eŋu, ke mede dzi gbɔ nɛ o.

YESAYA 43
1  Azɔ ale Afetɔ,
Oo Yakob, Wɔwòla, Oo Israel, Mèwòla, gblɔe nye esi:
“Mègavɔ̃ o, elabena megbugbɔ wò ƒle.
Metsɔ wò ŋkɔ yɔ wò.
Tɔnye nènye.
 2 Ne èto tsi me la, manɔ kpli wò,
Eye ne èto tɔsisiwo me la, womalé wò o.
Ne èzɔ dzo me la, mamè wò loo,
Alo dzoƒaɖe nafiã wò o.
 3 Elabena nyee nye Afetɔ wò Mawu,
Israel Ƒe Kɔkɔetɔ, wò Xɔnametɔ la.
Metsɔ Egipte na tafee ɖe tawò,
Eye metsɔ Etiopia kple Seba ɖɔli wò.
 4 Elabena èxɔ asi le ŋkunyeme,
Mede bubu ŋuwò, eye melɔ̃ wò.
Eya ta matsɔ amegbetɔwo ana ɖe tewòƒe
Kple dukɔwo ana ɖe wò agbe ta.
 5 Mègavɔ̃ o, elabena meli kpli wò.
Makplɔ wò dzidzimeviwo tso ɣedzeƒe vɛ,
Eye maƒo mia nu ƒu tso ɣetoɖoƒe.
 6 Magblɔ na dziehe be: ‘Ðe asi le wo ŋu!’
Eye magblɔ na anyiehe be: ‘Mègasika wo ɖi o.
Kplɔ vinyeŋutsuwo tso didiƒe vɛ kple vinyenyɔnuwo tso anyigba ƒe mlɔenu vɛ,
 7 Ame siwo katã ŋu woyɔ nye ŋkɔ ɖo,
Ame siwo mewɔ hena nye ŋutɔ nye bubu,
Ame siwo memè, eye mewɔ.’
 8 Kplɔ dukɔ si ŋku li na gake mekpɔa nu o,
Kple ame siwo to li na gake womesea nu o la do goe.
 9 Dukɔwo katã neƒo ƒu,
Eye amewo neƒo takpli.
Wo dometɔ kae ate ŋu agblɔ esia?
Alo ɖe woate ŋu ana míase nu gbãtɔ siwo adzɔa?
Wonekplɔ woƒe ɖasefowo vɛ, ne woaɖee fia be woƒe nya dzɔ,
Alo woasee ahagblɔ be: ‘Nyateƒee!’”
10 Afetɔ be: “Miawoe nye nye ɖasefowo
Ɛ̃, nye subɔla si metia,
Ne mianyae, eye miaxɔ dzinye ase,
Eye mianyae be Ame ma ko menye.
Womewɔ Mawu aɖeke do ŋgɔ nam o,
Eye ɖeke hã medo megbe nam o.
11 Nyee nye Afetɔ, eye xɔnametɔ aɖeke meli kpe ɖe ŋunye o.”
12 “Megblɔ nya ɖi, mexɔ na ame, eye mena wosee,
Esime mawu tutɔ aɖeke menɔ mia dome o.”
Afetɔ be: “Miawoe nye nye ɖasefowo, eye nyee nye Mawu.
13 Ame ma ko menye ɣeawokatãɣi;
Ame aɖeke mate ŋu axɔ naneke le asinye o.
Ne mewɔ nu la, ame kae ate ŋu atrɔe?”
14 Ale Afetɔ, mia Gbugbɔƒlela, Israel ƒe Kɔkɔetɔ la, gblɔe nye esi:
“Le mia ta madɔ ame ɖo ɖe Babilon woaɖiɖi gaxɔwo ƒe gametiwo ɖe anyi,
Eye Kaldeatɔ siwo le woƒe tɔdziʋuwo me la ado konyifaɣli.
15 Nyee nye Afetɔ, miaƒe Kɔkɔetɔ la, Israel Wɔla, miaƒe Fia.”
16 Ale Afetɔ,
Ame si ɖe mɔ to atsiaƒu me,
Eye wòɖe toƒe ɖe tɔ dzeagbowo gɔ̃ hã me,
17 Ame si kplɔa aʋatasiaɖam kple sɔ,
Aʋakɔ kple kalẽtɔwo donɛ la gblɔe nye esi:
“Woaɖo baba ɖe anyi, eye womafɔ o.
Woatsi kplo abe ale si akaɖimeɖovu tsinae ene.”
18 “Migaɖo ŋku gbe aɖe gbe nuwo dzi o,
Eye miganɔ tsãnuwo ŋu bum o.
19 Kpɔ ɖa! Mele nu yeye aɖe wɔm.
Ele mo dom ɖa fifia gɔ̃ hã xoxo,
Miekpɔe dze sii oa?
Maɖe mɔ to gbedzi,
Eye mana tɔsisiwo nato gbedadaƒo.
20 Gbemelãwo ade bubu ŋunye,
Agbotoewo kple golowo hã,
Elabena mena tsi le gbegbe,
Tɔsisiwo le gbedadaƒo,
Be nye dukɔ, nye ame tiatia la nano,
21 Dukɔ si mewɔ na ɖokuinye,
Ne wòaɖe gbeƒã nye kafukafu.
22 Ke Oo Yakob, mèyɔm o,
Elabena nye nya ti wò, Oo Israel.
23 Mètsɔ wò alẽwo sa numevɔ nam o,
Eye mètsɔ wò vɔsawo kafum o.
Nyemezi dziwò be nàtsɔ nunana vɛ nam o,
Alo tsɔ dzudzɔ ʋeʋĩ dodo ɖe fu na wò o.
24 Mètsɔ wò ga ƒle gbekee ʋeʋĩ aɖeke vɛ nam o,
Eye mètsɔ wò vɔsawo ƒe amiwo ɖi ƒoe nam o.
Ke boŋ ètsɔ wò nu vɔ̃wo do agba nam,
Eye nètsɔ wò vodadawo ɖe fu nam.
25 Nyee nye Ame si le wò dzidadawo tutum ɖa le nye ŋutɔ ɖokuinye ta,
Eye nyemaɖo ŋku wò nu vɔ̃wo dzi o.
26 Ðo ŋku edzi nam; na míahe nya kple mía nɔewo;
Ðe ɖokuiwò nu, ne nàɖee fia be ye tɔ dzɔ.
27 Tɔgbuiwò gbãtɔ wɔ nu vɔ̃,
Eye wò nyanuɖelawo da vo ɖe ŋunye.
28 Eya ta magblẽ kɔ ɖo na kɔkɔeƒe la ƒe amegãwo,
Matsɔ Yakob ade asi woatsrɔ̃,
Eye matsɔ Israel ade asi na dzudzu.

YESAYA 44
1  “Azɔ nye subɔla Yakob
Kple nye ame tiatia Israel, see.
 2 Ale Afetɔ,
Wɔwòla kple Mewòla,
Ame si kpe ɖe ŋuwò tso dɔ me ke la, gblɔe nye esi:
‘Nye subɔla Yakob
Kple wò, nye ame tiatia, Yesurun, mègavɔ̃ o.
 3 Elabena mana tsi tsikɔwuitɔwo,
Eye mana tɔ nasi to anyigba ƒuƒu dzi.
Matrɔ nye gbɔgbɔ akɔ ɖe wò dzidzimeviwo dzi
Kple nye yayra ɖe viwòwo dzi.
 4 Woamie abe gbe ene,
Abe amuti le tɔwo to ene.
 5 Ame si agblɔ be: “Afetɔ tɔ menye.”
Ame kemɛ ayɔ Yakob ƒe ŋkɔ ɖe eɖokui ŋu,
Eye ame bubu aŋlɔ ɖe eƒe asi ŋu be: “Afetɔ tɔ.”
Eye wòatsɔ ŋkɔ Israel.’
 6 Ale Afetɔ,
Israel ƒe Fia kple mia Gbugbɔƒlela, aʋakɔwo ƒe Afetɔ gblɔe nye esi:
‘Nyee nye gbãtɔ kple mlɔetɔ.
Mawu aɖeke meli kpe ɖe ŋunye o.’
 7 Ame kae le abe nye ene?
Neɖe gbeƒãe, neɖee gblɔ, eye wòaɖee fiam!
Tso esime meɖo blematɔwo gɔme anyi,
Wonegblɔ nu siwo gbɔna dzɔdzɔ ge
Kple nu siwo ava va eme.
 8 Ŋɔ megadzi mi o,
Eye dzidzi megaƒo mi o.
Ðe nyemena mia dometɔ ɖe sia ɖe see do ŋgɔ oa, eye nyemeɖe gbeƒãe oa?
Miawoe nye nye ɖasefowo.
Ðe Mawu aɖe li kpe ɖe ŋunyea?
Ao, Agakpe aɖeke meli o; nyemenya ɖeke o.’”
 9 Legbamèlawo katã la toflokowo wonye,
Eye viɖe aɖeke manɔ woƒe nu lɔlɔ̃awo ŋu o.
Woƒe ɖaseƒo siawo mekpɔa nu o, eye womenyaa naneke o,
Eya ta ŋu akpe wo mèlawo.
10 Ame kae mè mawu aɖe alo kɔ̀ legba
Si ŋu viɖe aɖeke mele o?
11 Kpɔ ɖa! Ŋu akpe eƒe hadɔwɔlawo katã!
Amegbetɔ dzro koe aɖaŋudɔwɔlaawo nye.
Wo katã neƒo ƒu, ne woava tɔ ɖi.
Ŋɔdzi alé wo, eye ŋu akpe wo katã.
12 Gbede dea ga dzo me hetsɔa eƒe dɔwɔnu wɔa dɔ le eŋu.
Etsɔa zu tunɛ,
Eye wòtsɔa eƒe alɔ sesẽ wɔa dɔ le eŋu.
Ke dɔ wunɛ, eye ŋusẽ vɔna le eŋu;
Menoa tsi o, eya ta ɖeɖi tea eŋu.
13 Atikpala da dzidzeka; etsɔa ɣe dzĩ taa nu.
Etsɔa fi kpanɛ, eye wòtsɔa nudzidzega tanɛ.
Ewɔnɛ ɖe ame ƒe nɔnɔme me,
Ne wòanya kpɔ abe amegbetɔ ene,
Ne wòanɔ xɔ me.
14 Ame aɖe lãa sedertiwo.
Etia ati aɖe ƒomevi, logoti,
Eye wòlé be nɛ wòtsi le avemetiwo dome.
Edo oren-ti, eye tsi dza ɖe edzi wòtsi.
15 Ezu dzodonu na amegbetɔ.
Etsɔ eƒe ɖe do dzoe heƒu;
Etsɔ eƒe ɖe do dzoe mè abolo.
Ke etsɔ eƒe ɖe hã wɔ mawui, hede ta agu nɛ.
Etsɔe wɔ legba hebɔbɔ ɖe eŋkume.
16 Etsɔ eƒe afã do dzoe;
Emè lã le eƒe afã la dzi ɖu ɖi ƒo.
Eƒu dzo hegblɔ be:
“Ehɛ̃! Dzoa kpɔkpɔ na dzo ɖo lãme nam.”
17 Etsɔ susɔea wɔ mawui, etsɔe wɔ eƒe legbae.
Eye wòbɔbɔna dea ta agu nɛ
Hedoa gbe ɖa nɛ be:
“Ðem, elabena wòe nye nye mawu.”
18 Womenya naneke o, eye womesea naneke gɔme o,
Elabena woƒe ŋkuwo nyè tre, ale be womele nu kpɔm o,
Eye woƒe dzi mele nu gɔme sem o.
19 Wo dometɔ aɖeke mebua tame,
Alo dzea si nu alo sea nu gɔme ne wòagblɔ be,
“Metsɔ afã do dzoe,
Memè abolo le eƒe akawo dzi, eye memè lã le edzi heɖu tso.
Ðe matsɔ susɔea awɔ ŋunyɔnuia?
Atikpoe made ta agu na?” hã o.
20 Dzofi ɖumee wòle.
Eƒe dzi si woble la kplɔe trae.
Mate ŋu aɖe eɖokui o, eye megblɔ be:
“Ðe menye aʋatsoe melé ɖe nye nuɖusi me oa?”
21 “Ðo ŋku nu siawo dzi, Oo Yakob, Oo Israel,
Elabena nye subɔla nènye.
Nyee mè wò. Nye subɔla nènye.
Oo Israel, nyemaŋlɔ wò be o.
22 Matutu wò dzidadawo ɖa abe alilikpoe metsɔ tsyɔ wo dzi ene,
Kple wò nu vɔ̃wo ɖa abe alilikpo dodoe metsɔ tsyɔ wo dzi ene.
Trɔ va gbɔnye elabena magbugbɔ wò aƒle.
23 “Mi dziƒowo, mitso aseye,
Elabena Afetɔe wɔ esia!
Mi anyigba ƒe gogloƒewo, migli kple dzidzɔ!
Mi towo, mitso aseye!
Wò, ave kple mi emetiwo katã, mitso aseye!
Elabena Afetɔ gbugbɔ Yakob ƒle,
Eye wòɖe eƒe atsyɔ̃ fia le Israel.”
24 Ale Afetɔ, Ame si gbugbɔ wò ƒle,
Ame si mè wò tso dɔ me ke la, gblɔe nye esi:
“Nyee nye Afetɔ, ame si wɔ nuwo katã.
Nye ɖekae he dziƒowo me.
Eye mekeke anyigba me.
Ame kae kpe ɖe ŋunye?
25 Megblẽa nya ƒuƒlu gblɔlawo ƒe dzesiwo me,
Eye nyee nye Ame si doa bometsila afakalawo;
Ame si tɔtɔa nunyalawo,
Kple Ame si trɔa woƒe sidzedze wòzua bometsitsi;
26 Ame si nana eƒe subɔla ƒe nya vaa eme,
Ame si nana nya siwo eƒe dɔlawo gblɔ ɖi la vaa eme bliboe;
Ame si gblɔ le Yerusalem ŋu be, ‘Woanɔ eme,’
Eye wògblɔ le Yuda duwo ŋu be, ‘Woagbugbɔ wo atso,
Eye mafɔ eƒe glikpowo ɖe tsitrenu’;
27 Ame si gblɔ na tɔ goglo la be: ‘Mie,
Eye mana wò tɔsisiwo katã namie’;
28 Ame si gblɔ le Kores ŋu be: ‘Nye lãkplɔvi wònye,
Awɔ nye didiwo katã dzi ade goe’;
Ame si gblɔ le Yerusalem ŋu be, ‘Woagbugbɔe atso,’
Eye wògblɔ le gbedoxɔ la ŋu be, ‘Woaɖo egɔme anyi.’”

YESAYA 45
1  Ale Afetɔ gblɔ na Kores, eƒe amesiamina,
Ame si ƒe nuɖusi melé,
Ne mabɔbɔ dukɔwo ɖe anyi le eŋkume,
Ne maxɔ aʋawɔnuwo le fiawo si,
Ne maʋu ʋɔtru agaveewo le eŋkume,
Ale be agboawo natsi madomado lae nye esi:
 2 “Nye ŋutɔ madze ŋgɔwò,
Eye mana togbɛwo nazu sɔsɔeƒe.
Magbã akɔbliʋɔtruwo gudugudu,
Eye maŋe gametiwo.
 3 Matsɔ kesinɔnu siwo le blukɔ me
Kple kesinɔnu siwo wodzra ɖo ɖe ɣaɣlaƒe la ana wò,
Ne nàdze sii be nyee nye Afetɔ,
Israel ƒe Mawu, Ame si tsɔ wò ŋkɔ le yɔwòm.
 4 Nye subɔla Yakob kple nye ame tiatia Israel tae
Metsɔ wò ŋkɔ yɔ wò ɖo.
Metsɔ bubuŋkɔ na wò togbɔ be mèdze sim o hã.
 5 Nyee nye Afetɔ, eye bubu aɖeke megali o.
Nye ɖeɖe koe nye Mawu, ɖeke megali o.
Mado ŋusẽ wò togbɔ be mèdze sim o hã,
 6 Ne amewo nanyae
Le ɣedzeƒe kple ɣetoɖoƒe
Be ame aɖeke meli kpe ɖe ŋunye o.
Nyee nye Afetɔ, bubu aɖeke megali o.
 7 Nyee wɔ kekeli, eye nyee wɔ viviti,
Nyee wɔa ŋutifafa, eye nyee hea gbegblẽ vɛ;
Nye Afetɔ, nyee wɔ nu siawo katã.
 8 Mi dziƒowo, midza;
Alilikpowo nedza dzɔdzɔenyenye.
Anyigba neke nu, ne xɔname namie,
Eye dzɔdzɔenyenye nemie kplii.
Nye Afetɔ ye wɔe.”
 9 Baba na ame si le dzre hem kple Ewɔla,
Elabena ze kakɛ dzro ko wònye,
Le ze kakɛ bubuwo dome le anyigba!
Ðe tsu agblɔ na zemela be: “Nu ka wɔm nèlea?”
Eye ɖe wò asinudɔwɔwɔ agblɔ be: “Mèto asi oa”?
10 Baba na ame si bia fofoa be: “Nu kae nye esi nèdzi?”
Eye wòbia dadaa be: “Nu ka dzim nèle?”
11 Ale Afetɔ, Israel Ƒe Kɔkɔetɔ kple Emèla, gblɔe nye esi:
“Ðe miabia nu siwo gbɔna dzɔdzɔ ge lam,
Eye miabia nyam le vinyewo ŋu alo aɖe gbe nam le nye asinudɔwɔwɔwo ŋua?
12 Nyee wɔ anyigba hewɔ ame ɖe edzi.
Nye ŋutɔ nye asiwoe metsɔ he dziƒo me,
Eye nyee ɖea gbe na eŋunuwo katã.”
13 “Menyɔ ame aɖe le dzɔdzɔenyenye me,
Eye mana eƒe mɔwo katã nadzɔ.
Eyae atso nye du la,
Eye wòaɖe asi le nye aboyomewo ŋu, menye le ga alo zãnuxɔxɔ ta o,” aʋakɔwo ƒe Afetɔ ye gblɔe.
14 Ale Afetɔ gblɔe nye esi:
“Egipte ƒe viɖe kple Etiopia ƒe adzɔnuwo kpakple Sabatɔ tsralaawo
Ava gbɔwò ahazu tɔwò.
Woanɔ kɔsɔkɔsɔwo me adze yowòme.
Woava bɔbɔ na wò.
Woado gbe ɖa na wò agblɔ be: ‘Nyateƒee, Mawu li kpli wò,
Eye ame bubu aɖeke megali o; Mawu bubu aɖeke megali o.’”
15 Nyateƒee, Mawu si ɣlaa eɖokui nènye,
Oo Israel ƒe Mawu nènye, Xɔnametɔ nènye.
16 Ŋukpe alé wo katã, eye woado vlo wo;
Legbamèlawo katã aɖu ŋukpe anɔ yiyim.
17 Ke Afetɔ atsɔ xɔname mavɔ axɔ na Israel ya.
Ŋukpe malé mi alo woado vlo mi tegbee o.
18 Elabena ale Afetɔ,
Dziƒowɔla, Eya, ame si nye Mawu vavã la,
Anyigba la Mèla kple Ewɔla, Ame si ɖo egɔme anyi,
Menye ɖeko wòwɔe dzodzro o, ke boŋ ɖe wòmèe be woanɔ edzi la, gblɔe nye esi:
“Nyee nye Afetɔ, bubu aɖeke megali o.
19 Nyemeƒo nu le ɣaɣlaƒe, le anyigba doblukɔ dzi o;
Eye nyemegblɔ na Yakob ƒe dzidzimevi la be:
‘Midim dzodzro o.’
Nyee nye Afetɔ, ame si gblɔa nya dzɔdzɔe kple nya si le eteƒe.
20 Miƒo takpli ne miava.
Mi ame siwo si tso dukɔwo me, miwɔ ɖeka miava.
Ame siwo lé woƒe legbawo ɖe ta
Kple ame siwo doa gbe ɖa na mawu si mate ŋu axɔ na ame o la, menya naneke o.
21 Miƒo nu, eye miagblɔ miaƒe nya.
Miwɔ ɖeka, mialé nyawo kpɔ.
Ame kae gblɔ esia ɖi tso gbe aɖe gbe ke?
Eye wòɖe gbeƒãe tso blema ke?
Menye nye, Afetɔ, ye oa?
Mawu bubu aɖeke mekpe ɖe ŋunye o;
Mawu dzɔdzɔetɔ kple Xɔnametɔ menye, bubu aɖeke meli kpe ɖe ŋunye o.
22 Mi anyigba ƒe mlɔenu nɔlawo katã, mitrɔ ɖe ŋunye, ne miakpɔ ɖeɖe;
Elabena nyee nye Mawu, eye bubu aɖeke megali o.
23 Metà nye ŋutɔ ɖokuinye;
Nya la do tso nye nu me le dzɔdzɔenyenye me,
Eye magbugbɔ o:
Ame sia ame adze klo nam,
Aɖe sia aɖe aka atam nam le nyateƒe me
24 Agblɔ be: ‘Nyateƒee, dzɔdzɔenyenye vavãtɔ kple ŋusẽ le Afetɔ me.
Ame siwo katã do dziku ɖe eŋu la ava eŋkume kple ŋukpe.
25 Afetɔ mee woatso afia dzɔdzɔe na Israel ƒe dzidzimeviwo katã le,
Eye eya mee woaƒo adegbe le.’”

YESAYA 46
1  Bel tsyɔ akɔ anyi, Nebo do dɔgɔ̃e.
Wotsɔ woƒe legbawo do agba na lãwo, ɖe agbatsɔlãwo dzi,
Wotsɔ wo do agbae ɖe lã siwo ŋu ɖeɖi te la dzi.
 2 Wo katã wobɔbɔ tsyɔ akɔ anyi;
Ke mawu siawo mate ŋu axɔ na agba la o,
Eye woawo ŋutɔwo yi aboyo me.
 3 “Oo Yakob ƒe aƒe, kple mi Israel ƒe aƒe la ƒe ame susɔeawo katã miɖo tom,
Mi ame siwo ŋu mekpe ɖo tso mia dziɣi, eye metsɔ mi tso vidzidɔ me ke.
 4 Ame ma ke manye va se ɖe esime miaku amegã;
Eye matsɔ mi va se ɖe miaƒe wɔƒoɣi.
Mayi edzi atsɔ mi eye maxɔ na mi.
 5 Ame kae miatsɔm asɔ kplii, alo ana masɔ ta kplii,
Ne míaɖi mía nɔewo?
 6 Ame aɖewo dudua sika tso woƒe akplo me ɖe anyi;
Eye wodaa klosalo le nudanu me.
Wotsɔnɛ naa gbede, eye wòtsɔnɛ wɔa mawui.
Eye wodzea klo dea ta agu nɛ.
 7 Wokɔnɛ ɖe abɔta;
Wokɔnɛ dana ɖe enɔƒe, eye ɖeko wònɔa afi ma.
Meʋãna le enɔƒe o.
Wodoa ɣli nɛ, gake metɔna o;
Mexɔna na ame aɖeke le xaxa me o.
 8 Miɖo ŋku esia dzi, ne dzi naɖo mia ƒo.
Mi vɔ̃wɔlawo, mina wòade dzi gbɔ na mi.
 9 Miɖo ŋku blemanuwo dzi,
Be nyee nye Mawu, ɖeke megali o,
Nyee nye Mawu, ɖeke mesɔ kplim o;
10 Ame si gblɔa nu si ava dzɔ la tso gɔmedzedzea me ke,
Kple nu siwo womewɔ haɖe o la fiana tso gbe aɖe gbe ke.
Megblɔ be: ‘Nye tameɖoɖo ava eme,
Eye mawɔ nu sia nu si medi la.’
11 Meyɔ xe ƒonu tso ɣedzeƒe
Kple ame tso anyigba didi aɖe dzi be wòawɔ nye tameɖoɖo dzi.
Megblɔe, eye mana wòava eme hã.
Meɖo tame, eye mawɔe hã.
12 Miɖo tom, mi dzimesẽlawo,
Mi ame siwo le adzɔge tso dzɔdzɔenyenye gbɔ.
13 Mehe nye dzɔdzɔenyenye va kpuiƒe;
Mele adzɔge o,
Eye nye xɔname matsi megbe o.
Mana xɔname le Zion, eye nye atsyɔ̃ anɔ Israel ŋu.”

YESAYA 47
1  Oo Babilon ɖetugbui leaƒe,
Ði ɖe anyi, ne nàbɔbɔ nɔ ke me.
Bɔbɔ nɔ anyigba, afi si fiazikpui aɖeke mele o,
Wò Kaldea vinyɔnu.
Elabena womagayɔ wò azɔ be vi malɔ̃nugbɔa kple ame si wowɔ vi na o.
 2 Tsɔ té nàtu wɔ.
Ðe wò motsyɔnu ɖi.
Ðe awudziwui la ɖi, klo nu le afɔ ŋu.
Tso tɔsisiawo.
 3 Wò ama adze.
Woakpɔ wò ŋukpeƒe.
Mabia hlɔ̃, eye ame aɖeke maxe mɔ nam o.
 4 “Ame si gbugbɔ mí ƒle.
—Eŋkɔe nye aʋakɔwo ƒe Afetɔ—
Eyae nye Israel Ƒe Kɔkɔetɔ la.”
 5 Oo, Kaldea vinyɔnu,
Zi ɖoɖoe kpoo nàbɔbɔ nɔ anyi, eye nàyi ɖe blukɔ me;
Womagayɔ wò azɔ be Fiaɖuƒewo Ƒe Aƒenɔ o.
 6 Medo dɔmedzoe ɖe nye dukɔ ŋu.
Megblẽ kɔ ɖo na nye domenyinu la,
Eye metsɔ wo de asi na wò.
Ke mèkpɔ nublanui na wo o.
Ètsɔ kɔkuti kpekpe ɖo amegãɖeɖi gɔ̃ hã dzi.
 7 Ègblɔ be: “Manye Aƒenɔ ɖaa tegbee.”
Mèna nu siawo de dzi gbɔ na wò o;
Mèbu ale si nuwo ava wu enui la ŋu o.
 8 Azɔ see, wò, nyɔnu agbeɖula,
Si nɔ anyi ɖi bɔkɔɔ, si gblɔna le eƒe dzi me be:
“Nye koe, ame bubu aɖeke megali o.
Nyemazu ahosi o.
Eye viwo maku nam akpɔ o.”
 9 Ke nu eve siawo adzɔ ɖe dziwò zi ɖeka kpata, le ŋkeke ɖeka dzi:
Viwòwo aku, eye àzu ahosi.
Nu siawo katã adzɔ ɖe dziwò
Le wò dzosasa geɖeawo kple wò gbesa gbogboawo ta.
10 Èɖo ŋu ɖe wò vɔɖivɔ̃ɖi ŋu.
Ègblɔ be: “Ame aɖeke mele kpɔyem o.”
Wò nunya kple wò sidzedzee kplɔ wò trae,
Eye nègblɔ le wò dzi me be: “Nye koe, ame bubu aɖeke megali o.”
11 Gbegblẽ ava dziwò,
Eye wò gbesa aɖeke mate ŋu atsi enu o.
Hiã atu wò, eye màte ŋu axe mɔ ɖe enu o.
Gbegblẽ si tɔgbi medzɔ ɖe dziwò kpɔ o la aƒo ɖe dziwò kpoyi.
12 Lé wò gbesawo kple wò dzosasa geɖeawo,
Siwo ŋu nèku kutri le tso wò ɖevime ke me ɖe asi.
Ðewohĩ woaɖe vi na wò;
Ðewohĩ àte ŋu atsɔ wo ado ŋɔdzi na ame.
13 Wò aɖaŋuɖola geɖeawo ƒe nu ti kɔ na wò.
Na woatso azɔ, ne woaxɔ na wò,
Ame siwo subɔa dziƒowo, ame siwo léa ŋku ɖe ɣletiviwo ŋu,
Ame siwo gblɔa nu siwo gbɔna dzɔdzɔ ge ɖe dziwò la ɖi
Le dzinu yeyewo dzi.
14 Kpɔ ɖa! Wole abe ahɔ̃liti ene.
Dzo afiã wo.
Womate ŋu aɖe wo ɖokui tso dzoƒaɖe ƒe ŋusẽ la nu o.
Womenye dzoka xɔxɔ si woaƒu o,
Eye womenye dzo si gbɔ woanɔ anyi ɖo o.
15 Aleae wò gbesalawo anɔ na wò,
Ame siwo nètso hloloe kplii tso wò ɖevime ke.
Woatsa tsaglãla, eye wo dometɔ ɖe sia ɖe alé eƒe mɔ tsɔ.
Ame aɖeke manɔ anyi axɔ na wò o.

YESAYA 48
1  Mise nya sia, Yakob ƒe aƒe,
Mi ame siwo yɔa Israel ƒe ŋkɔ ɖe mia ɖokui ŋu,
Eye miedzɔ tso Yuda ƒe tsiwo me,
Mi ame siwo tsɔ Afetɔ ƒe ŋkɔ le atam kam,
Eye mieyɔa Israel ƒe Mawu la ŋkɔ,
Togbɔ be menye le nyateƒe kple dzɔdzɔenyenye me o hã.
 2 Elabena woyɔa du kɔkɔe la ɖe wo ɖokuiwo ŋu,
Eye wodia Israel ƒe Mawu,
Si ŋkɔe nye aʋakɔwo ƒe Afetɔ, ƒe kpekpeɖeŋu.
 3 “Megblɔ blemanyawo na mi tso gbe aɖe gbe ke.
Nye ŋutɔ nye nu mee wodo tso,
Eye mena wosee.
Mewɔe zi ɖeka kpata, eye wova eme.
 4 Elabena menya ale si wò dzi me sẽe,
Wò kɔ lia abe gakpo ene, eye wò ŋgonu nye akɔbli,
 5 Megblɔe na wò tso gbe aɖe gbe ke.
Mena nèsee hafi wova dzɔ,
Ne màgagblɔ be: ‘Nye legbae wɔe;
Nye nu kpakpɛ kple nye galegbae na wòdzɔ o.’
 6 Èsee, eye nèkpɔ nu siawo katã.
Ðe màɖe gbeƒãe oa?
Tso fifia dzi la, maɖe gbeƒã nu yeyewo na mi,
Nu ɣaɣla siwo wodzra ɖo, siwo mienya o la.
 7 Fifiae mele wo wɔm, eye menye tso blema o,
Miese wo ŋkɔ kpɔ abe egbea ene o,
Ne màgagblɔ be: ‘Kpɔ ɖa! Menya wo xoxo’ o.
 8 Ao, mèsee kpɔ o, mènyae o,
Eye wò to meʋu tsã o.
Elabena menyae be ame mawɔnuteƒee nènye,
Eye woyɔa wò be ‘vodala tso esime wodzi wò.’
 9 Ke malé nye dziku nu le nye ŋkɔ ta,
Malé ɖokuinye le ŋuwò le nye kafukafu ta,
Eye nyematsrɔ̃ wò o.
10 Kpɔ ɖa! Medza ŋuwò, ke menye abe klosalo ene o.
Medo wò kpɔ le fuwɔame ƒe nulólokpo me.
11 Mawɔe le nye ŋutɔ tanye, ɛ̃ nye ŋutɔ tanyee mawɔe ɖo,
Elabena nu ka tae maɖe mɔ woado vlom?
Nyematsɔ nye ŋutikɔkɔe na ame bubu aɖeke o.
12 Oo Yakob kple wò Israel, si meyɔ, miɖo tom.
Ame ma koe meganye. Nyee nye gbãtɔ; eye nye kee nye mlɔetɔ.
13 Nye ŋutɔe tsɔ nye asi ɖo anyigba gɔme anyi,
Eye nye nuɖusie he dziƒowo me.
Ne meyɔ wo la, wo katã wova tsia tsitre ɖi.
14 Mi katã miƒo ƒu, ne miasee.
Wo dometɔ kae gblɔ nya siawo?
Afetɔ lɔ̃ eya amea.
Awɔ nu si wòlɔ̃ la ɖe Babilon ŋu,
Eye eƒe alɔ ava Kaldeatɔwo dzi.
15 Nyee ƒo nu, eye meyɔe.
Mekplɔe vɛ, eye eƒe mɔwo adze edzi.
16 Mite ɖe ŋunye, ne miase nya sia.
Tso gɔmedzedzea me ke la, nyemeƒo nu le bebeme o.
Mele eteƒe esime wòva eme.”
Azɔ Aƒetɔ Dziɖulagã Afetɔ dɔm kple eƒe gbɔgbɔ.
17 Ale Afetɔ, Ame si gbugbɔ wò ƒle, Israel Ƒe Kɔkɔetɔ la, gblɔe nye esi:
“Nye Afetɔe nye wò Mawu,
Nyee nye ame si fiaa nu wò be wòaɖe vi na wò,
Ame si kplɔa wò toa mɔ si dzi wòle be nàto.
18 Ne ɖe nàɖo to nye sededewo ɖe!
Anye ne wò ŋutifafa anɔ abe tɔsisi ene,
Eye wò dzɔdzɔenyenye anɔ abe ƒutsotsoewo ene.
19 Anye ne wò dzidzimeviwo asɔ gbɔ abe ke ene,
Eye viwòwo asɔ gbɔ abe kekuiwo ene hafi.
Womaɖe woƒe ŋkɔ ɖa alo atsrɔ̃e ɖa le ŋkunyeme o.”
20 Mido go tso Babilon!
Misi le Kaldeatɔwo gbɔ!
Mitsɔ dzidzɔɣli ɖe gbeƒãe! Mina woasee!
Mina wòade anyigba ƒe mlɔenu ke.
Migblɔ be: “Afetɔ gbugbɔ eƒe subɔla Yakob ƒle.
21 Esi wòkplɔ wo to gbegbe la, tsikɔ mewu wo o.
Ena tsi do tso agakpe me na wo;
Efe agakpe hena tsi si tso eme bababa.”
22 Afetɔ be: “Ŋutifafa aɖeke meli na ame vɔ̃ɖiwo o.”

YESAYA 49
1  Mi ƒukpowo, miɖo tom,
Eye mi dukɔ siwo le didiƒe ʋĩi, milé to ɖe ŋunye.
Afetɔ yɔm hafi wodzim.
Eyɔ nye ŋkɔ tso esime menɔ danye ƒe dɔ me ke.
 2 Ewɔ nye nu abe yi ɖaɖɛ ene;
Eɣlam ɖe eƒe asi ƒe vɔvɔli te.
Etsɔm wɔ aŋutrɔ ɖaɖɛ;
Eɣlam ɖe eƒe daku me.
 3 Egblɔ nam be: “Oo Israel, nye subɔla nènye,
Wò ame si dzi mato aɖe nye atsyɔ̃ afia.”
 4 Ke megblɔ be: “Meku kutri dzodzro.
Megblẽ nye ŋusẽ ɖe yame dzodzro.
Ke hã vavãe, Afetɔ si mee nye nyawo le,
Eye nye fetu le nye Mawu gbɔ.”
 5 Azɔ Afetɔ, Ame si mèm tso dɔ me menye eƒe subɔla la
Gblɔ nam be makplɔ Yakob agbɔe na ye,
Ne Israel naƒo ƒu ɖe ye gbɔ.
Bubu anɔ ŋunye le Afetɔ ŋkume,
Eye nye Mawu azu nye ŋusẽ.
 6 Eye wògblɔ be: “Menye nu tsɛ wònye be nànye nye subɔla,
Afɔ Yakob ƒe toawo ɖe tsitrenu,
Eye nàkplɔ Israel ƒe ame siwo ta wokpɔ la agbɔe o.
Metsɔ wò na be nànye dukɔwo ƒe kekeli hã,
Ale be nye xɔname nade anyigba ƒe mlɔenu ke.”
7 Ale Afetɔ, Ame si gbugbɔ Israel ƒle, eƒe Kɔkɔetɔ la, gblɔ na ame si wodo vloe, ame si dukɔ la nyɔŋui, ame si nye dziɖulawo ƒe subɔvie nye esi:
“Fiawo akpɔe, eye woatso ɖe tsitrenu,
Amegãwo abɔbɔ
Le Afetɔ, Ame si nye nuteƒewɔla,
Israel Ƒe Kɔkɔetɔ si tia wò la ta.”
 8 Ale Afetɔ gblɔe nye esi:
“Metɔ na wò le amenuveɣi,
Eye mekpe ɖe ŋuwò le xɔxɔgbe;
Mekpɔ tawò, ne matsɔ wò ana nànye nubabla na dukɔ la,
Ne nàgaɖo anyigba la te,
Ne nàna domenyinu siwo zu gbegbe la nagasu wo si,
 9 Ne nàgblɔ na gamenɔlawo be, ‘Mido go!’
Eye na ame siwo le viviti me be, ‘Miva gota!’
Woaɖu gbe le mɔ to,
Eye woƒe gbeɖuƒe anɔ toƒewo katã.
10 Dɔ kple tsikɔ mawu wo o,
Eye dzoxɔxɔ alo ɣe maɖu wo o.
Elabena ame si kpɔ nublanui na wo la akplɔ wo,
Eye wòakplɔ wo ato tsidzɔƒewo.
11 Mana nye towo katã nazu mɔ,
Eye nye mɔ gãwo akɔ dzi.
12 Kpɔ ɖa, ame siawo atso didiƒe ava,
Eye ɖewo atso dziehe kple ɣetoɖoƒe ava,
Eye bubuwo hã atso Sinim-nyigba dzi.”
13 Mi dziƒowo, migli kple dzidzɔ, anyigba, tso aseye.
Towo netso aseye ahagli kple dzidzɔ.
Elabena Afetɔ fa akɔ na eƒe dukɔ la,
Eye wòkpɔ nublanui na eƒe ame siwo le fu kpem.
14 Ke Zion le gbɔgblɔm be:
“Afetɔ gblẽm ɖi, eye Afetɔ ŋlɔm be.”
15 Ðe nyɔnu aŋlɔ eƒe vidzĩ be,
Alo wòagbe nublanuikpɔkpɔ na eƒe dɔmevia?
Ne nyɔnu siawo aŋlɔ be hã la, nye ya nyemaŋlɔ wò be gbeɖe o.
16 Kpɔ ɖa! Meŋlɔ wò ɖe nye asi me.
Wò gliwo le ŋkunyeme ɖaa.
17 Viwòwo ɖe abla va.
Ame siwo gbã wò hegblẽ dowòme la adzo le gbɔwò.
18 Fɔ mo dzi nàtsa ŋku godoo eye nàkpɔ nu.
Wo katã wole ƒu ƒom ɖekae.
Wogbɔna gbɔwò.
Afetɔ be: “Zi ale si mele agbe la,
Àdo wo katã abe atsyɔ̃ɖonu ene,
Eye àdo wo abe ale si ŋugbetɔ doa nui ene.
19 Togbɔ be nɔwòƒewo zu aƒedo kple gbegbe, eye wò anyigba gblẽ hã la,
Azɔ la, anɔ sue akpa na ame siwo le afi ma,
Eye miwòlawo anɔ adzɔge ʋĩi.
20 Vi siwo wodzi le viwòwo ƒe ku megbe la agblɔ nàse be:
‘Teƒe sia xaxa nam akpa.
Di teƒe nam manɔ.’
21 Eye àgblɔ le wò dzi me be:
‘Esi wònye nyɔnu si ƒe viwo ku menye, eye metsi ko,
Woɖe aboyom, eye mezu gamenɔla ɖe,
Ke ame kae dzi vi siawo nam?
Ame kae nyi ame siawo?
Kpɔ ɖa! Nye ɖeka ko wogblẽ ɖi,
Ke afi kae ame siawo tso?’”
22 Ale Aƒetɔ Dziɖulagã Afetɔ gblɔe nye esi:
“Kpɔ ɖa! Mado nye asi ɖe dzi na dukɔwo,
Eye mado nye dzesiti ɖe dzi na dukɔwo.
Woakɔ viwòŋutsuwo ɖe abɔ dome avɛ,
Eye woakɔ viwònyɔnuwo ɖe abɔta avɛ.
23 Fiawo anye viwòwo dzi kpɔlawo,
Eye woƒe fianyɔnuwo ana no wo na wò.
Woabɔbɔ atsyɔ mo anyi ɖe ŋkuwòme,
Eye woaɖuɖɔ ke le wò afɔ ŋu,
Ne nàdze sii be, nyee nye Afetɔ,
Eye be nyemana ŋu nakpe ame siwo le mɔ kpɔm nam la o.”
24 Ðe woate ŋu axɔ ame siwo wolé la le kalẽtɔ sia,
Alo ɖe woate ŋu axɔ na ame siwo ŋutasẽla ɖe aboyoe laa?
25 Gake ale Afetɔ gblɔe nye esi:
“Woakplɔ ame siwo kalẽtɔ ɖe aboyoe la adzoe,
Eye woaxɔ na ame siwo ŋutasẽla lé la.
Mawɔ avu kple ame si le avu wɔm kpli wò,
Eye maxɔ na viwòwo.
26 Mana ame siwo sẽa ŋuta le ŋuwò la naɖu woawo ŋutɔwo ƒe lã,
Eye woano woawo ŋutɔwo ƒe ʋu amu abe wain yeye ene.
Eye amewo katã anyae be, nyee nye Afetɔ,
Wò Xɔnametɔ, kple Ame si gbugbɔ wò ƒle,
Yakob Ƒe Ŋusẽtɔ la.”

YESAYA 50
1  Ale Afetɔ gblɔe nye esi:
“Afi kae mia dada si megbe la ƒe srɔ̃gbegbalẽ le?
Alo nye fetɔ kae metsɔ mi dzra na?
Kpɔ ɖa! Miawo ŋutɔwo miaƒe vodadawo tae wotsɔ mi dzra ɖo,
Eye miawo ŋutɔwo miaƒe dzidadawo tae wogbe mia dada ɖo.
 2 Nu ka tae esi meva la, ame aɖeke meli o?
Nu ka tae esi meyɔ ame la, ame aɖeke metɔ o?
Ðe nye alɔ to ɖe eme, ale be mate ŋu aɖe ame oa,
Alo ɖe ŋusẽ mele asinye be maxɔ na ame oa?
Kpɔ ɖa! Meblu ɖe atsiaƒu ta wòmie;
Mena tɔsisiwo zu gbegbe.
Wo me lãwo ƒaƒã, elabena tsi mie le wo ŋu,
Eye woku le tsikɔwuame ta.
 3 Meta blukɔ na dziƒowo,
Eye metsyɔ akpanya na wo.”
 4 Aƒetɔ Dziɖulagã Afetɔ tsɔ nusrɔ̃viwo ƒe aɖe nam,
Ne manya nya si tututu magblɔ na ame si ŋu ɖeɖi te.
Enyɔam ŋdi sia ŋdi;
Eʋua to nam, ne mase nu abe nusrɔ̃vi ene.
 5 Aƒetɔ Dziɖulagã Afetɔ ʋu to nam,
Eye nyemedze aglã o.
Nyemetrɔ ɖe afi bubu o.
 6 Metrɔ nye dzime na ame siwo ƒom,
Eye metrɔ nye tome na ame siwo nyɔa fu.
Nyemeɣla nye mo ɖe vlododo kple taɖeɖe o.
 7 Ke Aƒetɔ Dziɖulagã Afetɔ akpe ɖe ŋunye.
Esia tae ŋu makpem o.
Esia tae mena nye mo sẽ abe ahliha ene,
Eye menyae be ŋu makpem o.
 8 Ame si tsoa afia dzɔdzɔe nam la le kpuiƒe.
Ame kae ate ŋu atsɔ nya ɖe ŋunye?
Nena míatso ɖe mía nɔewo ŋu.
Ame kae tsɔ nya ɖe ŋunye?
Nete ɖe ŋunye.
 9 Kpɔ ɖa! Aƒetɔ Dziɖulagã Afetɔ akpe ɖe ŋunye.
Ame kae abu fɔm?
Kpɔ ɖa! Wo katã woanyunyɔ abe avɔ ene.
Agbagblaʋui aɖu wo.
10 Mia dometɔ kae vɔ̃a Afetɔ
Heɖoa to eƒe subɔla ƒe gbe?
Ame kae zɔ viviti tsiɖitsiɖi me afi si kekeli aɖeke mele o?
Neɖo ŋu ɖe Afetɔ ƒe ŋkɔ ŋu, eye wòaziɔ ɖe eƒe Mawu ŋu.
11 “Kpɔ ɖa! Mi ame siwo katã doa dzo,
Eye mienana dzoxiwo hlẽna,
Mizɔ le miaƒe dzo ƒe kekeli
Kple dzoxi siwo lé dzo la nu.
Nu si miakpɔ tso asinye mee nye be:
Miamlɔ vevesese ɖeɖe ko me.

YESAYA 51
1  “Mi ame siwo tia dzɔdzɔenyenye yome,
Mi ame siwo le Afetɔ dim la, miɖo tom.
Milé ŋku ɖe agakpe si me woɖe mi tsoe
Kple kpegbãƒe si me woɖe mi tsoe la ŋu.
 2 Miɖe ŋku ɖe mia fofo Abraham
Kple Sara si dzi mi la.
Elabena eya ɖekae li esime meyɔe,
Eye meyrae wòdzi ɖe edzi.
 3 Elabena Afetɔ afa akɔ na Zion.
Afa akɔ na eƒe aƒedowo katã,
Eye wòawɔ eƒe gbegbe wòanɔ abe Eden-bɔ ene
Kple eƒe tagba abe Afetɔ ƒe abɔ ene.
Woatso aseye ahakpɔ dzidzɔ le eme,
Eye akpedada kple haƒoƒo aɖi le eme.
 4 Oo, nye dukɔ, lé to ɖe ŋunye,
Nye dukɔ, miƒu to anyi ɖe ŋunye.
Elabena sedede atso gbɔnye,
Eye maɖo nye ʋɔnu dzɔdzɔe dɔdrɔ̃ anyi abe kekeli ene na dukɔwo.
 5 Nye dzɔdzɔenyenye tu aƒe.
Nye xɔname ado,
Eye nye alɔwo adrɔ̃ ʋɔnu dukɔwo.
Nyee ƒukpowo akpɔ mɔ na,
Eye woakpɔ nye alɔ sinu.
 6 Mifɔ mo dzi miakpɔ dziƒowo,
Eye mide mo to miakpɔ anyigba.
Elabena dziƒowo akaka eye wo nu ayi abe dzudzɔ ene;
Anyigba anyunyɔ abe avɔ ene,
Eye edzinɔlawo aku abe muwo ene.
Ke nye xɔname anɔ anyi tegbee,
Eye nye dzɔdzɔenyenye nu mayi akpɔ o.
 7 Mi ame siwo nya dzɔdzɔenyenye,
Dukɔ si ƒe dzi me nye se la le, miɖo tom.
Migavɔ̃ amegbetɔ si kuna ƒe vlodoame o,
Eye woƒe amedzudzu megadzi ŋɔ na mi o.
 8 Elabena agbagblaʋui aɖu wo abe avɔ ene,
Eye tsiƒomee aɖu wo abe lãfuvɔ ene.
Ke nye dzɔdzɔenyenye anɔ anyi tegbee,
Eye nye xɔname anɔ anyi le dzidzimewo katã me.”
 9 Nyɔ! Nyɔ! Oo Afetɔ ƒe alɔ,
Ne nàta ŋusẽ.
Nyɔ abe le blemaŋkekewo me ene, abe le dzidzime siwo va yi la ŋɔli ene.
Ðe menye wòe ŋe Rahab kakɛkakɛe,
Eye nèƒo nu ɖe ƒumelã klitsu la oa?
10 Ðe menye wòe na atsiaƒu, tɔ goglo la, me tsiwo mie oa?
Ame si na atsiaƒu gɔme zu mɔ, be ame siwo wogbugbɔ ƒle la nato edzi oa?
11 Ame siwo Afetɔ ɖe la atrɔ agbɔ.
Woava Zion kple aseyetsotso,
Eye woakpɔ dzidzɔ tegbee.
Woatso aseye ahakpɔ dzidzɔ,
Eye nuxaxa kple hũɖeɖe abu ɖe wo.
12 “Nye ŋutɔe nye Ame si le akɔ fam na mi.
Nu ka tae nàvɔ̃ amegbetɔ, si gbɔna kuku ge,
Kple amegbetɔvi, si ayrɔ abe gbe mumu ko ene?
13 Nu ka tae nàŋlɔ Wɔwòla Afetɔ,
Ame si he dziƒowo me, eye wòɖo anyigba gɔme anyi ya be?
Vɔvɔ̃ léa wò gbe sia gbe le ameteɖeanyila ƒe dziku ta,
Abe ɖe wòate ŋu atsrɔ̃ wò ene.
Afi kae ameteɖeanyila ƒe dziku la le?
14 Woaɖe ga ame si do dɔgɔ̃e le kɔsɔkɔsɔwo me la kpuie,
Maku ahayi yɔdo me,
Alo abolo nahiãe o.
15 Ke nye Afetɔe nye wò Mawu,
Ame si blua atsiaƒu be eƒe tsotsoewo nadze agbo
—Eŋkɔe nye aʋakɔwo ƒe Afetɔ.
16 Matsɔ nye nyawo ade nuwò,
Eye matsɔ nye asi ƒe vɔvɔli atsyɔ dziwò,
Ne maɖo dziƒowo wo teƒe ahaɖo anyigba gɔme anyi,
Eye magblɔ na Zion be: ‘Nye dukɔ nènye.’
17 Nyɔ! Nyɔ! Oo Yerusalem, fɔ,
Wò ame si no Afetɔ ƒe dɔmedzoekplu tso eƒe asi me.
Èno kplu la;
Èno kplu si nana wozɔna sagasaga la ƒiaƒiaƒia.
18 Vi siwo katã wòdzi la dometɔ aɖeke meli akplɔe o,
Eye vi siwo wònyi la dometɔ aɖeke meli alé eƒe alɔnu o.
19 Nu eve siawoe dzɔ ɖe dziwò.
Ame kae ase veve ɖe nuwò?
Gbegblẽ kple tsɔtsrɔ̃, dɔwuame kple yi!
Ame kae afa akɔ na wò?
20 Viwòwo ku ƒenyi.
Womlɔ kpɔdomeewo katã ƒe dzogoewo dzi
Abe sẽ siwo mɔ̃ ɖe ene.
Abe ame siwo Afetɔ ƒe dziku helĩhelĩ, wò Mawu ƒe mokaname, ɖi ƒo na ene.”
21 Eya ta ɖo to nàse nya sia,
Oo, nyɔnu fukpela si mu aha evɔ mèno wain hafi o.
22 Ale wò Aƒetɔ, Afetɔ wò Mawu, ame si ʋlia eƒe dukɔ ta, gblɔe nye esi:
“Kpɔ ɖa! Maxɔ kplu si nana wozɔna sagasaga,
Kplu, si nye nye dɔmedzoekplu la le asiwò;
Màganoe akpɔ o.
23 Matsɔe ade ame siwo wɔ funyafunya wò la si me,
Ame siwo gblɔ na wò be, ‘Bɔbɔ, ne míazɔ dziwò ayi,’
Ale be nètsɔ wò dzime wɔ anyigbae
Abe mɔ ene na wo be woazɔ edzi.”

YESAYA 52
1  Nyɔ! Oo Zion, Nyɔ! Ne nàta wò ŋusẽ!
Oo, du kɔkɔe Yerusalem, do wò awu dzeaniwo!
Elabena aʋamatsomatsotɔ kple ame makɔmakɔ magava mewò azɔ o.
 2 Oo Yerusalem, ʋuʋu ke le ɖokuiwò ŋu, tso nàbɔbɔ nɔ anyi.
Oo, Zion vinyɔnu si woɖe aboyoe, ɖe ga si wode kɔ na wò la ɖi.
 3 Elabena ale Afetɔ gblɔe nye esi:
“Wotsɔ mi dzra naneke maxɔmaxɔe,
Eye menye ga tsɔ ge woala agbugbɔ aƒle mi o.”
 4 Elabena ale Aƒetɔ Dziɖulagã Afetɔ gblɔe nye esi:
“Egipte ye nye dukɔ la yi ɖanye amedzro le gbã;
Emegbe Asiria te wo ɖe anyi yakatsyɔ.”
 5 Afetɔ be: “Azɔ nu kae mawɔ le nɔnɔmea ŋu?
Elabena wokplɔ nye amewo dzoe naneke manamanae.
Afetɔ be: Wo dzi ɖulawo le aseye tsom,
Eye wole vlo dom nye ŋkɔ gbe sia gbe.
 6 Esia ta nye dukɔ adze si nye ŋkɔ;
Esia ta woadze sii gbe ma gbe be nyee nye Ame si le nu ƒom.
Kpɔ ɖa! Nyee!”
 7 Du nyui xɔla ƒe afɔwo nya kpɔ le towo dzi loo,
Eya, ame si ɖea gbeƒã ŋutifafa,
Ame si hea nu si nyo wu ŋuti nya nyui vanɛ,
Ame si ɖea gbeƒã xɔname,
Ame si gblɔ na Zion be: “Wò Mawu zu Fia!”
 8 Se ɖa! Wò gbetakpɔlawo ƒe gbe de dzi.
Wo katã wokɔ woƒe gbewo dzi do dzidzɔɣli;
Elabena ne Afetɔ kplɔ Zion gbɔe la, woakpɔe kple woƒe ŋkuwo.
 9 Mi Yerusalem ƒe aƒedowo, mi katã mido dzidzɔɣli,
Elabena Afetɔ fa akɔ na eƒe dukɔ la; egbugbɔ Yerusalem ƒle.
10 Afetɔ klo nu le eƒe alɔ kɔkɔe la ŋu le dukɔwo katã ŋkume;
Eye anyigba ƒe mlɔenuwo katã akpɔ mía Mawu ƒe xɔxɔdɔwo.
11 Mite ɖa, mite ɖa, miʋu tso afi ma, migaka asi nu makɔmakɔ aɖeke ŋu o!
Mido go le eme, miwɔ mia ɖokui kɔkɔe,
Mi Afetɔ ƒe nutsɔlawo.
12 Elabena miatsɔ dzitsitsi aʋu adzo o,
Eye menye sisi ge miala adzo o,
Elabena Afetɔ adze mia ŋgɔ,
Eye Israel ƒe Mawu la axe megbe na mi.
13 Kpɔ ɖa! Nye dɔla awɔ nu le gɔmesese deto me.
Woadoe ɖe dzi,
Woado kɔkɔe, eye woado gãe.
14 Ale si ame geɖewo ƒe nu ku le eŋuti la,
—Elabena eƒe dzedzeme vloe wu ame bubuwo katã tɔ sãsãsã,
Eye eƒe kpɔkpɔme vloe wu amegbetɔviwo tɔ kura—
15 Nenema kee wòado voɖi na dukɔ geɖewo.
Fiawo ƒe nu ade ga le eŋkume,
Elabena nu si ŋu nya womegblɔ na wo kpɔ o lae woakpɔ,
Eye nu si womese kpɔ o la ŋue woatrɔ susu ɖo.

YESAYA 53
1  Ame kae xɔ nya si wose tso mía gbɔ la dzi se?
Eye ame kae woɖe Afetɔ ƒe alɔ fia?
 2 Adzè abe atilɔ fẽ ene le eŋkume, abe ke si dzè tso anyigba ƒuƒu me ene.
Medze bubumee o, eye atsyɔ̃ hã medze le eŋu o;
Ne míekpɔe la, eƒe dzedzeme menaa eƒe nu nyoa mía ŋu o.
 3 Amewo do vloe, eye wogbee,
Enye ŋutsu si to vevesese me eye wònya nu si dɔléle nye.
Ele ko abe ɖe woɣla eƒe ŋkume ɖe mí ene.
Wodo vloe, eye míebui ɖe naneke me o.
 4 Le nyateƒe me la, eyae de ta míaƒe dɔlélewo te,
Eye wòtsɔ míaƒe vevesesewo ɖo eɖokui dzi.
Ke míawo ya míebui abe ame si wowɔ fui, ame si Mawu ƒo, eye wòna wòkpe fu ene.
 5 Ke míaƒe dzidada tae woƒo nu ɖee ɖo;
Wogbãe gudugudu le míaƒe vodadawo ta.
Wohe to nɛ be míakpɔ ŋutifafa,
Eye eƒe abiwoe na woda gbe le mía ŋu.
 6 Mí katã míetra mɔ abe alẽwo ene,
Mía dometɔ ɖe sia ɖe lé eƒe mɔ tsɔ,
Ke Afetɔ na mí katã míaƒe vodada va edzi.
 7 Wotee ɖe anyi, eye wòɖe mɔ wowɔ fui,
Ke meke nu o.
Wokplɔe abe alẽ ene yi wuwuƒe;
Abe ale si alẽnɔ zia ɖoɖoe le eƒe fukolawo ŋkume ene,
Ke meke nu o.
 8 Wozi edzi, eye wodrɔ̃ ʋɔnui hekplɔe yii;
Eye ame kae atsi dzi ɖe eƒe dzidzimeŋunyawo ŋu?
Elabena woɖee ɖa le agbagbeawo ƒe anyigba dzi;
Woƒoe le nye dukɔ ƒe dzidada ta.
 9 Esi wòku la, woɖe yɔdo nɛ ɖe ame vɔ̃ɖiwo
Kple kesinɔtɔwo dome,
Evɔ mewɔ nu gbegblẽ aɖeke o,
Eye beble aɖeke menɔ eƒe nu me o hafi.
10 Ke enye Afetɔ ƒe lɔlɔ̃nu be yeagbãe gudugudu; eɖe mɔ wòkpe fu.
Mawu, ne àtsɔ eƒe agbe aɖo anyi abe fɔɖivɔsa ene la,
Akpɔ eƒe dzidzimeviwo, ana eƒe ŋkekewo nadzi ɖe edzi,
Eye Afetɔ ƒe didi ava eme to edzi.
11 Nu siwo wòakpɔ ana eƒe dzi nadze eme le eƒe fukpekpe ta.
Ame dzɔdzɔe, nye subɔla la ƒe sidzedze,
Ana tenɔnɔ dzɔdzɔe nasu ame geɖewo si,
Eye atsɔ woƒe vodadawo aɖo eɖokui dzi.
12 Esia ta mana gomee ɖe ame geɖewo dome,
Eye wòama aboyonu kple kalẽtɔwo,
Elabena etsɔ eƒe agbe de ku me,
Eye wobui kpe ɖe vodalawo ŋu;
Ede ta ame geɖewo ƒe nu vɔ̃ te,
Eye wòxɔ nya ɖe vodalawo nu.

YESAYA 54
1  “Wò konɔ si medzi vi o, tso aseye!
Wò nyɔnu si melé ku kpɔ o, tso aseye, nàgli kple dzidzɔ,
Elabena nyɔnu si wogblẽ ɖi la ƒe viwo sɔ gbɔ
Wu nyɔnu si gbɔ srɔ̃a le la ƒe viwo,” Afetɔ ye gblɔe.
 2 “Keke wò agbadɔ ƒe nɔƒe ɖe enu.
Keke wò avɔgbadɔ gã la ƒe agbadɔvɔwo me.
Mègahe asi ɖe megbe o. Didi wò agbadɔkawo ɖe enu,
Eye nàƒo wò tsyotiwo ɖe to sesĩe.
 3 Elabena àkeke ɖe ɖusi kple mia me.
Wò dzidzimeviwo axɔ dukɔwo woazu wo tɔ,
Eye woanɔ du siwo zu aƒedo la me.
 4 Mègavɔ̃ o, elabena womado ŋukpe wò o;
Mègabu ɖokuiwò ame ɖigbɔe o, elabena màɖu ŋukpe o.
Elabena àŋlɔ wò ɖetugbuimeŋukpe la be,
Eye màgaɖo ŋku wò ahosinyenye ƒe ŋukpe la dzi azɔ o.”
 5 “Elabena Wɔwòla Gã la le abe srɔ̃wò ene,
Eŋkɔe nye aʋakɔwo ƒe Afetɔ,
Eye Israel ƒe Kɔkɔetɔ lae nye Ame si gbugbɔ wò ƒle.
Woayɔe be anyigba blibo la katã ƒe Mawu.
 6 Elabena Afetɔ yɔ wò abe srɔ̃nyɔnu si wogblẽ ɖi, eye wòle nu xam ene
Abe ame si ɖe srɔ̃ le ɖetugbuime eye wogbee la ene,” wò Mawu ye gblɔe.
 7 “Elabena megblẽ wò ɖi vie ko,
Ke matsɔ nublanuikpɔkpɔ gã aƒo nuwò ƒu ake.
 8 Esi nye dɔmedzoe nyra la, meɣla nye ŋkume ɖe wò vie,
Ke matsɔ lɔlɔ̃ si nu metsina o la akpɔ nublanui na wò,” Afetɔ, Ame si gbugbɔ wò ƒle, ye gblɔe.
 9 “Esia le nam abe Noa ƒe ŋkekeawo ene.
Ale si ko meka atam be Noa ƒe tsiɖɔɖɔa magaɖe anyigba azɔ o la,
Nenema kee meka atam be nyemagado dziku ɖe ŋuwò alo aka mo na wò azɔ o.
10 Elabena ne woɖe towo ɖa,
Eye togbɛwo ʋã hã la,
Nye amenuveve mate ɖa le ŋuwò o,
Eye nye ŋutifafanubabla la maʋã o,” Afetɔ, Ame si kpɔ nublanui na wò, ye gblɔe.
11 “Oo, nyɔnu si wowɔ fui, si ahom nyama, eye womefa akɔ nɛ o,
Kpɔ ɖa, matsɔ anyi sesẽ aɖo wò kpewo,
Eye matsɔ safir-kpewo aɖo gɔwòme anyi.
12 Maɖo rubi-kpe xɔasiwo ɖe wò xɔtagliwo dzi,
Matsɔ kpe keklẽwo awɔ wò agbowo,
Eye maɖo kpe xɔasiwo ɖe wò liƒowo katã dzi.
13 Afetɔ afia nu viwòwo katã,
Eye viwòwo ƒe ŋutifafa asɔ gbɔ.
14 Woatsɔ dzɔdzɔenyenye ali ke wò.
Ànɔ adzɔge ʋĩi na teteɖeanyi,
Elabena màvɔ̃ na naneke o,
Eye naneke madzi ŋɔ na wò o.
15 Ne ame aɖe dze dziwò la,
Manye nyee dɔe o.
Ame sia ame si adze dziwò la adze anyi le tawò.”
16 “Kpɔ ɖa! Nyee wɔ gbede,
Ame si yɔa ʋu ɖe akadzo te,
Eye wòtua lãnu.
Nye kee wɔ nugblẽla, ne wòagblẽ nu.
17 Lãnu sia lãnu si woatu ɖe ŋuwò la madze edzi o,
Eye àbu fɔ aɖe sia aɖe si atso ɖe ŋuwò le ʋɔnu.
Esiae nye Afetɔ subɔlawo ƒe domenyinu,
Eye woƒe dzɔdzɔenyenye tso gbɔnye,” Afetɔ ye gblɔe.

YESAYA 55
1  Miva, mi tsikɔwuitɔwo katã, miva tsi gbɔ!
Mi ame siwo si ga mele o! Miva ƒle nu miaɖu!
Ɛ̃, miva dze wain kple notsi, menye kple ga o, eye womedo asi aɖeke ɖe eŋu o.
 2 Nu ka tae miele fe xem ɖe nu si menye abolo o ta,
Eye miazã ga ɖe nu si meɖia ƒo o ŋu?
Milé to ɖe ŋunye nyuie, ne miaɖu nu si nyo,
Eye miakpɔ dzidzɔ ɖe nu damiwo ŋu.
 3 Miƒu to anyi, eye miva gbɔnye.
Miɖo to, ekema mianɔ agbe,
Eye mabla nu mavɔ kpli mi,
Le ɖekawɔwɔ me kple lɔlɔ̃ mavɔ si ŋugbe medo na David, si ŋu kakaɖedzi le.
 4 Kpɔ ɖa! Metsɔe ɖo ɖasefo na dukɔwo,
Metsɔe ɖo kplɔla kple dziɖula na dukɔwo.
 5 Kpɔ ɖa! Àyɔ dukɔ si mènya o la avɛ,
Eye dukɔ si menya wò o la me tɔwo anɔ du dzi ava gbɔwò
Le Afetɔ wò Mawu kple Israel ƒe Kɔkɔetɔ la ta,
Elabena ade bubu ŋuwò.
 6 Midi Afetɔ, zi ale si miate ŋu ake ɖe eŋu.
Miyɔe, zi ale si wòtsɔ kpuiƒe.
 7 Ame vɔ̃ɖi neɖe asi le eƒe mɔ ŋu,
Eye vɔ̃wɔla neɖe asi le eƒe susuwo ŋu;
Netrɔ ɖe Afetɔ ame si akpɔ nublanui nɛ la ŋu,
Netrɔ ɖe mía Mawu la ŋu, elabena atsɔ ake geɖe.
 8 “Elabena nye susuwo menye miaƒe susuwo o,
Eye nye mɔwo menye miaƒe mɔwo o,” Afetɔ ye gblɔe.
 9 “Elabena ale si dziƒowo kɔ boo wu anyigbae la,
Nenemae nye mɔwo kɔ wu miaƒe mɔwo,
Eye nye susuwo kɔ wu miaƒe susuwoe.
10 Elabena ale si ko tsi kple sno dzana tso dziƒo,
Eye womegbugbɔna yina o, negbe ɖe wode tsi anyigba, na wòmie nu hewɔ nu,
Eye wona nuku nuƒãla kple abolo be woaɖu hafi la,
11 Nenema kee nye nya si do tso nye nu me la anɔ.
Magbugbɔ ava gbɔnye ƒuƒlu o,
Negbe ɖeko wòawɔ nu si medi,
Eye wòawɔ nu si gbe meɖoe ɖo la ade goe hafi.
12 Elabena miaʋu adzo kple dzidzɔ,
Eye woakplɔ mi agbɔe le ŋutifafa me.
Towo kple togbɛwo akpɔ dzidzɔ ahatso aseye le mia ŋgɔ,
Eye gbemetiwo katã asi akpe.
13 Sesewuwo amie ɖe ŋuvewo teƒe,
Gbemitiwo amie ɖe dzawo teƒe.
Eye wòana Afetɔ ƒe ŋkɔ nanyɔ,
Eye wòanye dzesi mavɔ si nu mayi akpɔ gbeɖe o.”

YESAYA 56
1  Ale Afetɔ gblɔe nye esi:
“Milé nya dzɔdzɔe me ɖe asi, eye miwɔ nu dzɔdzɔe,
Elabena esusɔ vie ko nye xɔname nava,
Eye woaɖe nye dzɔdzɔenyenye afia.
 2 Dzidzɔtɔe nye ame si wɔa alea
Kple amegbetɔvi si léa eme ɖe asi goŋgoŋ,
Ame si léa Sabat la me ɖe asi eye megblẽa kɔ ɖo nɛ o,
Eye wòkpɔa eƒe asi dzi be wòagawɔ vɔ̃ aɖeke ƒomevi o.
 3 Amedzro si va wɔ ɖeka kple Afetɔ la megagblɔ be,
‘Afetɔ aɖem ɖa le eƒe dukɔ la ŋu godoo’ o.
Eye ame tata hã megagblɔ be, ‘Kpɔ ɖa! Ati ƒuƒue menye’ o.”
4 Elabena Afetɔ be, ame tata siwo léa nye sabatwo me ɖe asi, siwo tia nu si dzea ŋunye, eye woléa nye nubabla me ɖe asi goŋgoŋ la:
 5 “Mana ŋkuɖodzinu kple ŋkɔ wo ɖe nye aƒe kple nye gliwo me,
Si nyo wu viŋutsuwo kple vinyɔnuwo.
Ŋkɔ mavɔ si matsrɔ̃ o,
Si nu mayi o.
 6 Amedzro siwo va wɔ ɖeka kple Afetɔ be yewoasubɔe,
Be yewoalɔ̃ Afetɔ ƒe ŋkɔ la,
Ne yewoazu esubɔlawo,
Ame siwo katã léa Sabat la me ɖe asi eye womegblẽa kɔ ɖo nɛ o,
Eye woléa nye nubabla me ɖe asi goŋgoŋ la,
 7 Nye hã makplɔ wo ava nye to kɔkɔe la gbɔ,
Eye mana woakpɔ dzidzɔ le nye gbedoxɔ la me.
Woƒe numevɔsawo kple vɔsa bubuwo adze ŋunye le nye vɔsamlekpui la dzi.
Elabena woayɔ nye aƒe la be dukɔwo katã ƒe gbedoɖaƒe.”
8 Ale Aƒetɔ Dziɖulagã Afetɔ, ame si le Israel ƒe ame siwo ka hlẽ nu ƒom ƒu la, gblɔe nye esi:
“Magaƒo ame bubuwo nu ƒu ɖe eŋu kpe ɖe eƒe ame siwo nu woƒo ƒu xoxo la ŋu.”
 9 Mi gbemelãwo katã
Mi avemelãwo katã miva ɖu nu.
10 Eƒe gbetakpɔlawo nye ŋkuagbãtɔwo, wo dometɔ aɖeke medea dzesi nu o.
Wo katã wonye avu aɖetututɔwo, wometea ŋu wóna o.
Wole gbɔgbɔm fuxefuxe, womlɔ anyi ɖi; wolɔ̃a akɔlɔ̃edɔdɔ.
11 Wonye avu siwo dzroa nu vevie;
Womeɖia ƒo gbeɖe o.
Wonye lãkplɔvi siwo mesea nu gɔme o.
Wo katã wolé woƒe mɔ tsɔ;
Eye wo dometɔ ɖe sia ɖe dia eya ŋutɔ ƒe viɖe ƒoɖi gblɔna be:
12 “Miva, ne maku wain vɛ,
Eye míano aha muame wòaɖi kɔ na mí.
Etsɔ hã anɔ abe egbe ene, eye anyo wui sãa!”

YESAYA 57
1  Ame dzɔdzɔe nu yi,
Ke medea dzi gbɔ na ame aɖeke o.
Woɖea nuteƒewɔlawo ɖa,
Ke ame aɖeke medze sii be woɖe ame dzɔdzɔe ɖa
Le vɔ̃ la ta o.
 2 Eyi ɖe ŋutifafa me.
Ame siwo katã ƒe zɔzɔme ŋu fɔɖiɖi mele o la ɖina ɖe eme le woƒe abawo dzi.
 3 “Mi nyɔnu afakala ƒe viwo,
Mi ahasitɔ kple gbolo ƒe viwo,
Mite va afii:
 4 Ame ka ŋue miele fefem le?
Ame ka ŋue mieke nu ɖo baa, eye miedo aɖe ɖa biɖaa ɖo?
Ðe menye vodalawo
Kple aʋatsokalawo ƒe viwo,
 5 Ame siwo ƒe lãme le fiefiẽm ɖe legbawo ŋu le ati gãwo te,
Le ati dama ɖe sia ɖe te,
Ame siwo wua ɖeviwo le baliwo me
Le agakpetowo te lae mienye oa?
 6 Ètia balimekpe zɔzrɔ̃ewo na ɖokuiwò.
Woawoe nye tɔwò gome.
ȃoa aha ɖi na wo, eye nènaa nu wo gɔ̃ hã.
Ðe nu siawo adze ŋunyea?
 7 Èɖo wò aba ɖe to si kɔ bobobo la dzi.
Eye nèyi afi ma ɖasa vɔ le edzi.
 8 Ètsɔ wò ŋkuɖodzinu ɖo wò ʋɔtru kple ʋɔtruti godo.
Èdzo le gbɔnye yi ɖaklo nu le ɖokuiwò ŋu,
Èyi ɖakeke wò aba ɖe nu.
Eye nèbla nu kpli wo.
Woƒe aba dzi mɔmlɔ dze ŋuwò.
Eye nèkpɔ woƒe ŋutsu.
 9 Ètsɔ ami yi Melek gbɔ,
Hekpe ɖe ami ʋeʋĩ gbogbo aɖe ŋu.
Èɖo wò ame dɔdɔwo ɖe didiƒe ke,
Ale wɔ nèɖi yi Tsiẽƒe.
10 Èdagba le wò mɔ gbogboawo dzi.
Gake mègblɔ be, ‘Dɔ vloe!’ o.
Ŋusẽ yeye gaɖo ŋuwò.
Esia tae mèna ta o.
11 Ame kae le ŋɔ dzim na wò, eye ame ka vɔ̃m nèle
Si ta nèle alakpa dam?
Mèɖo ŋku dzinye o.
Naneke mede dzi gbɔ na wò o.
Ðe nyemezi kpi hehe ɖe megbe oa?
Eya ta nègbem vɔvɔ̃ ɖo.
12 Maɖe wò ‘dzɔdzɔenyenye’ kple wò dɔwɔwɔwo ɖe go,
Ke womaɖe vi na wò o.
13 Ne èdo ɣli be woakpe ɖe ye ŋu la,
Legba siwo nèli kɔ ɖi la maɖe wò o.
Ya akplɔ wo katã adzoe,
Ŋɔtimegbɔgbɔ dzro akplɔ wo adzoe,
Ke ame si sim tso la anyi anyigba la dome,
Eye wòaxɔ nye to kɔkɔe la wòazu etɔ.
14 Woagblɔ be, ‘Mido mɔ, mido mɔ! Midzra mɔa dzi ɖo!
Miɖe nukikliwo katã ɖa le mɔ me na nye dukɔ.’”
15 Elabena ale Ame si kɔ heƒo nuwo katã ta, eye wòli tegbee,
Ame si ƒe ŋkɔ le kɔkɔe la, gblɔe nye esi:
“Mele teƒe kɔkɔ kple kɔkɔeƒe,
Gake meli kple ame siwo wogbã gudugudu kple ɖokuibɔbɔlawo,
Ne magbɔ agbe ɖokuibɔbɔlawo
Kple ame siwo wogbã gudugudu la ƒe dzi.
16 Elabena nyematsi tsitre ɖe wo ŋu tegbee o,
Eye nyemado dɔmedzoe ɖaa o;
Elabena nu ate ame ƒe gbɔgbɔ ŋu le tanye,
Nu ate nu siwo mewɔ siwo me agbegbɔgbɔ le la gɔ̃ hã ŋu.
17 Medo dziku ɖe eƒe viɖe ƒoɖi yome titi vɔ̃ɖitɔe ta,
Eya ta meƒoe, meɣla nye ŋkume, eye medo dɔmedzoe.
Ke edze go helé eƒe dzi ƒe mɔ tsɔ.
18 Mekpɔ eƒe mɔwo,
Gake mada gbe le eŋu, akplɔe,
Eye magbugbɔ afa akɔ na eya kple eƒe konyifalawo.”
19 “Matsɔ kafukafu ade nu na amewo.
Ŋutifafa anɔ anyi ɖaa na ame si le didiƒe kple ame si le kpuiƒe,
Eye mada gbe le eŋu,” Afetɔ ye gblɔe.
20 “Ke ame vɔ̃ɖiwo le abe atsiaƒu dzeagbo, si mate ŋu anɔ anyi kpoo o,
Eye eme tsiwo ɖea ƒumegbe kple ba ɖe go la ene.
21 Nye Mawu be, Ŋutifafa aɖeke meli na ame vɔ̃ɖiwo o.”

YESAYA 58
1  “He vekati nàdo ɣli; mègadzudzɔ o!
Wò gbe nede dzi abe kpẽ ene,
Eye nàgblɔ nye dukɔ ƒe aglãdzedze nɛ,
Gblɔ Yakob ƒe aƒe la ƒe nu vɔ̃wo nɛ.
 2 Wole diyem gbe sia gbe,
Eye wowɔa nu abe ɖe wodi be yewoanya nye mɔwo
Abe dukɔ si wɔa nu dzɔdzɔe,
Eye womegblẽ woƒe Mawu ƒe ʋɔnu dzɔdzɔe dɔdrɔ̃ ɖi o ene.
Wobiaa ʋɔnu dzɔdzɔe dɔdrɔ̃ tso asinye,
Eye wokpɔa dzidzɔ be yewoate ɖe Mawu ŋu.”
 3 Wobia be: “‘Nu ka tae míetsi nu dɔ, eye mèkpɔe o?
Eye míewɔ fu mía ɖokuiwo gake mède dzesii o?’
Elabena miewɔa nu si dzea miawo ŋutɔwo mia ŋu le gbe si gbe mietsi nu dɔ,
Eye mietea miaƒe dɔwɔlawo ɖe to.
 4 Miaƒe nutsitsidɔ la wua enu kple dzrewɔwɔ kpakple avuwɔwɔ
Eye mietua kɔ ame tagbɔsesẽtɔe.
Miate ŋu atsi nu adɔ abe ale si miele ewɔm egbea ene eye woase miaƒe gbe le dziƒo o.
 5 Ðe nutsitsidɔ si dzea ŋunye la,
Anye ŋkeke si dzi ame awɔ fu eɖokui,
Abɔbɔ ta ɖe anyi abe keti ene,
Ahamlɔ akpanya dzi kple dzofi me laa?
Esia yɔmee miele be nutsitsidɔ kple ŋkeke si dzea Afetɔ ŋua?
 6 Ao, nutsitsidɔ si dzea ŋunyee nye esi:
Be woaɖe vɔ̃ɖinyenye ƒe kunyowuwo ɖa,
Woatu kɔkuti ƒe kawo,
Woana ablɔɖe ame siwo wote ɖe anyi,
Eye woaŋe kɔkuti ɖe sia ɖe ɖe eve;
 7 Be nàma wò abolo kple dɔwuitɔ,
Eye nàkplɔ hiãtɔ kple aƒemanɔsitɔ ava aƒewò me
Eye ne èkpɔ ame aɖe wòle amama la, nàdo awu nɛ,
Eye nàgaɣla ɖokuiwò ɖe nɔviwò o.
 8 Ekema wò kekeli adze abe agudzedze ene,
Eye àhaya kaba.
Wò dzɔdzɔenyenye adze ŋgɔwò,
Eye Afetɔ ƒe ŋutikɔkɔe axe megbe na wò.
 9 Ekema àyɔ Afetɔ, eye wòatɔ na wò,
Àdo ɣli be wòakpe ɖe ye ŋu, eye wòagblɔ be, ‘Nyee nye esi!’
Ne èɖe kɔkuti la ɖa le dowòme,
Eye nèdzudzɔ asifiafia ame kple ameŋugblẽnyawo gbɔgblɔ,
10 Ne ètsɔ nu si dzroa wò la na dɔwuitɔ,
Eye nèkpɔ ame siwo wole fu wɔmee ƒe hiahiã gbɔ na wo la,
Ekema wò kekeli aklẽ le viviti me gɔ̃ hã,
Eye wò blukɔ anɔ abe ŋdɔkutsu dzatsɛ ene.
11 Afetɔ akplɔ wò ɖaa,
Ana nu si nèhiã la wò le kuɖiɖinyigba dzi;
Ana ŋusẽ nagaɖo wò ƒuwo ŋu,
Eye àzu abe abɔ si wode tsii nyuie ene,
Abe tsidzɔƒe si ƒe tsiwo memiena gbeɖe o ene.
12 Woagbugbɔ atso blemaƒedowo le tawò,
Eye àgbugbɔ aɖo dzidzime siwo va yi la ƒe gɔmeɖokpewo.
Woayɔ wò be gli gbagbãwo ɖɔɖola,
Mɔtata siwo to woatso aƒewo ɖo anɔ wo me la dzraɖola.
13 Nenye be le Sabat la ta mèti wò ŋutɔ wò didiwo yome le nye ŋkeke kɔkɔe la dzi o,
Eye nèyɔ Sabat la be dzidzɔ gbago, Afetɔ ƒe ŋkeke kɔkɔe si ŋu wode bubui,
Eye nède bubu eŋu, mèlé wò ŋutɔ wò mɔ tsɔ o, eye mèdi nu si dzea wò ŋutɔ ŋuwò hegblɔ nya dzodzro aɖeke o la,
14 Ekema àkpɔ dzidzɔ ɖe Afetɔ ŋu,
Eye mana nàde anyigba ƒe kɔkɔƒewo.
Mana nàɖu tɔgbuiwò Yakob ƒe domenyinu,
Elabena Afetɔ ƒe nue gblɔe.”

YESAYA 59
1  Kpɔ ɖa! Afetɔ ƒe alɔ meto ɖe eme be mate ŋu axɔ na ame o,
Eye eƒe to meku be mate ŋu ase nu o.
 2 Ke boŋ miaƒe vodadawoe ma mia kple mia Mawu dome.
Miaƒe nu vɔ̃woe na wòɣla ŋkume ɖe mi,
Eye wògbe toɖoɖo mi.
 3 Elabena miaƒe asiwo ƒo ʋu,
Eye vodada le miaƒe asibidɛwo ŋu.
Miaƒe nuyiwo daa alakpa, eye miaƒe aɖewo gblɔa nya tovowo.
 4 Ame aɖeke meli si biaa dzɔdzɔenyenye ta sena o,
Eye ame aɖeke metoa nyateƒe le ʋɔnu o.
Woɖoa ŋu ɖe nu dzodzrowo ŋu, eye wogblɔa nya siwo meɖea vi aɖeke o.
Wofɔa fuɖename ƒe fu, eye wodzia nu vɔ̃ɖi.
 5 Woƒoa da vɔ̃ɖi ƒe azi,
Eye wolɔ̃a yiyiɖɔ.
Ame sia ame si ɖu da la ƒe azi la aku,
Eye dzakpata ado tso azi si wogbã la me.
 6 Woƒe yiyiɖɔ la mazu avɔ o,
Eye womate ŋu atsyɔ nu si wowɔ la o.
Woƒe dɔwɔwɔwo vɔ̃ɖi,
Eye wotsɔa woƒe asiwo wɔa ŋutasẽnuwo.
 7 Woƒe afɔwo tsɔna ɖe nu vɔ̃ɖi wɔwɔ ŋu,
Eye wole abla ɖem be yewoakɔ ʋu maɖifɔ ɖi.
Woƒe susuwo nye susu vɔ̃ɖiwo;
Gbegblẽ kple xaxa le woƒe mɔwo dzi.
 8 Womenya ŋutifafamɔ la o,
Eye nu dzɔdzɔe wɔwɔ aɖeke mele wo toƒe o.
Wona woƒe mɔwo glɔ̃;
Ame siwo toa wo dzi la dometɔ aɖeke manya ŋutifafa o.
 9 Esia tae ʋɔnu dzɔdzɔe dɔdrɔ̃ le adzɔge na mí,
Eye nu dzɔdzɔe wɔwɔ megogo mí o.
Míele mɔ kpɔm na kekeli, ke kpɔ ɖa, vivitie li;
Míele mɔ kpɔm na keklẽ, ke blukɔ me ko zɔm míele.
10 Míele asi tsam le gli ŋu abe ŋkuagbãtɔwo ene,
Míele asi tsam abe ame siwo ƒe ŋku tsi ene.
Míekli nu le ŋdɔkutsu dzatsɛ abe zã me ene;
Míele ko abe ame kukuwo ene le ame kakowo dome.
11 Mí katã míele gbe tem abe sisiblisiwo ene,
Eye míele xɔxlɔ̃m nublanuitɔe abe ahɔnɛwo ene.
Míele mɔ kpɔm na ʋɔnu dzɔdzɔe dɔdrɔ̃, ke ɖeke meli o;
Míele mɔ kpɔm na xɔname, ke ele adzɔge ʋĩi tso mía gbɔ.
12 Elabena míaƒe aglãdzedzewo sɔ gbɔ le ŋkuwòme;
Eye míaƒe nu vɔ̃wo dometɔ ɖe sia ɖe le ɖase ɖim le mía ŋu.
Elabena míedze si míaƒe aglãdzedzewo,
Eye míaƒe vodadawo la, míenya wo keŋ.
13 Míeda vo, eye míegbe nu le Afetɔ gbɔ;
Míetrɔ megbe de mía Mawu la,
Míegblɔ teteɖeanyi kple aglãdzedze ŋu nya,
Míefɔ aʋatso ƒe fu, eye míegblɔ alakpanya tso dzi me.
14 Wonya ʋɔnu dzɔdzɔe dɔdrɔ̃ ɖo ɖe megbe,
Eye nu dzɔdzɔe wɔwɔ le adzɔge ʋĩi ke;
Elabena nyateƒe kli nu le ablɔ me,
Eye nu dzɔdzɔe wɔwɔ mete ŋu ge ɖe eme o.
15 Nyateƒe bu,
Eye woha ame sia ame si trɔ ɖa le nu vɔ̃ɖi wɔwɔ ŋu.
Afetɔ kpɔ esia eye medzɔ dzi nɛ o.
Elabeba ʋɔnu dzɔdzɔe dɔdrɔ̃ meli o.
16 Ekpɔe be ame aɖeke meli o,
Ewɔ nuku nɛ be avuléla aɖeke meli o,
Eya ta eƒe alɔ xɔ nɛ,
Eye eya ŋutɔ ƒe dzɔdzɔenyenye kpe ɖe eŋu.
17 Ale wòdo dzɔdzɔenyenye abe gawu ene,
Eye wòɖɔ xɔxɔ ƒe gakuku ɖe ta.
Edo hlɔ̃biabia abe awu ene
Eye wòdo dzonɔameme abe awudziwui ene.
18 Aɖo eteƒe na wo ɖe woƒe nuwɔnawo nu:
Dɔmedzoe ava eƒe ketɔwo dzi, eye wòaɖo eteƒe na eƒe futɔwo.
Axe nu si ƒukpowo dze na la ŋuti fe na wo.
19 Woade asi Afetɔ ƒe ŋkɔ la vɔvɔ̃ me tso ɣetoɖoƒe
Kple eƒe ŋutikɔkɔe vɔvɔ̃ me tso ɣedzeƒe,
Elabena ava do abe tɔ si le sisim sesĩe,
Si Afetɔ ƒe gbɔgbɔ lɔ ɖe nu ene.
20 “Gbugbɔƒlela ava Zion,
Agbugbɔ ame siwo trɔ tso woƒe dzidadawo me le Yakob la aƒle,” Afetɔ ye gblɔe.
21 “Ke esiae nye nye nu, si mebla kpli wo,” Afetɔ ye gblɔe. “Womaɖe nye gbɔgbɔ si le dziwò kple nye nya siwo mede nuwò la ɖa le wò nu me, alo le viwòwo ƒe nu me loo alo tɔgbuiyɔviwòwo ƒe nu me o, tso fifia yi mavɔmavɔ me,” Afetɔ ye gblɔe.

YESAYA 60
1  “Oo nyɔnu, tso nàklẽ, elabena wò kekeli do,
Afetɔ ƒe ŋutikɔkɔe klẽ ɖe dziwò.
 2 Elabena kpɔ ɖa, viviti axɔ anyigba dzi,
Eye blukɔ tsiɖitsiɖi atsyɔ dukɔwo;
Ke wò la, Afetɔ aklẽ ɖe dziwò,
Eye woakpɔ eƒe ŋutikɔkɔe le dziwò.
 3 Dukɔwo ava wò kekeli la gbɔ,
Eye fiawo ava wò atsyɔ̃ ƒe keklẽ la gbɔ.
 4 Fɔ mo dzi nàtsa ŋku godoo!
Woƒo wo katã nu ƒu; wogbɔna gbɔwò.
Viwòŋutsuwo tso didiƒe gbɔna
Eye wokɔ viwònyɔnuwo ɖe axadame.
 5 Ɣemaɣi la, àkpɔe, eye dzi adzɔ wò,
Wò dzi ati kpo, eye wòakpɔ dzidzɔ,
Elabena woatsɔ atsiaƒumekesinɔnuwo ava gbɔwò;
Dukɔwo ƒe nu xɔasiwo ava na wò.
 6 Kposɔwo ƒe hawo axɔ wò anyigba dzi,
Midian kple Efa ƒe kposɔtsuiwo.
Ame siwo katã tso Seba la ava;
Woatsɔ sika kple lifi ɖe asi avɛ.
Eye woaɖe gbeƒã Afetɔ ƒe kafukafu.
 7 Woakplɔ Kedar ƒe lãhawo katã vɛ na wò.
Nebayot ƒe agbowo asubɔ wò.
Woava nye vɔsamlekpui la dzi ahadze ŋunye,
Eye maɖo atsyɔ̃ na nye aƒe dzeani la.
 8 Ame kawoe nye esiawo dzo va yina abe alilikpowo ene,
Abe ahɔnɛwoe yina woƒe kpowo gbɔ ene?
 9 Elabena nyee ƒukpowo le mɔ kpɔm na;
Tarsis tɔdziʋuwo anɔ ŋgɔ
Be wòakplɔ viwòŋutsuwo tso didiƒe,
Tsɔ kpe ɖe woƒe klosalo kple sika ŋu,
Vɛ na Afetɔ wò Mawu ƒe ŋkɔ kple Israel ƒe Kɔkɔetɔ la,
Elabena ade bubu ŋuwò.
10 Amedzrowo aɖo wò gliwo,
Eye woƒe fiawo asubɔ wò,
Elabena meƒo wò le nye dziku me,
Ke makpɔ nublanui na wò le nye amenuveve me.
11 Wò agbowo anɔ ʋuʋu ɖaa;
Womado wo le ŋkeke me alo le zã me o,
Ne woatsɔ dukɔwo ƒe kesinɔnuwo avɛ na wò,
Eye woƒe fiawo anɔ ŋgɔ na wo.
12 Elabena dukɔ sia dukɔ kple fiaɖuƒe sia fiaɖuƒe si masubɔ wò o la nu ayi,
Eye woatsrɔ̃ dukɔ mawo gbidigbidi.
13 Woatsɔ Lebanon ƒe ŋutikɔkɔe,
Siwo nye sesewu, fɔfɔli kple kpomi siaa avɛ,
Ne woaɖo atsyɔ̃ na nye kɔkɔeƒe ƒe nɔƒe la;
Eye made bubu nye afɔnɔƒe la ŋu.
14 Ame siwo te wò ɖe to la ƒe viwo ava bɔbɔ ɖe ŋkuwòme,
Ame siwo katã le vlo dom wò la abɔbɔ ɖe wò afɔnu
Eye woayɔ wò be Afetɔ ƒe du,
Israel ƒe Kɔkɔetɔ la ƒe Zion.
15 Togbɔ be wogblẽ wò ɖi helé fu wò, eye ame aɖeke megatoa mewò yina o hã la,
Matsɔ wò awɔ adegbeƒonu tegbee,
Kple aseyetsotso tso dzidzime yi dzidzime.
16 Àno dukɔwo ƒe notsi,
Eye àno fiawo ƒe no;
Eye àdze sii be nye, Afetɔe nye wò Xɔnametɔ,
Eye Yakob ƒe Ŋusẽtɔ lae nye Ame si gbugbɔ wò ƒle.
17 Mahe sika vɛ ɖe akɔbli teƒe,
Eye mahe klosalo vɛ ɖe gayibɔ teƒe,
Akɔbli ɖe ati teƒe
Kple gayibɔ ɖe kpewo teƒe;
Maɖo ŋutifafa dzikpɔlae na wò,
Eye matsɔ dzɔdzɔenyenye aɖo wò dɔdzikpɔlae.
18 Womagase ŋutasesẽ ŋkɔ le wò anyigba dzi azɔ o,
Eye womagase gbegblẽ kple tsɔtsrɔ̃ ŋkɔ le wò liƒowo dzi o.
Àyɔ wò gliwo be Xɔname kple wò agbowo be Kafukafu.
19 Ɣe maganye kekeli na wò le ŋkeke me azɔ o,
Eye ɣleti magaɖi be xexea me nakɔ na wò o,
Elabena Afetɔ azu kekeli mavɔ na wò,
Eye wò Mawu anye wò atsyɔ̃.
20 Wò ɣe magaɖo to azɔ o,
Eye wò dzinu magaɖo xɔ azɔ o,
Elabena Afetɔ azu kekeli mavɔ na wò,
Eye wò konyifaŋkekewo awu enu.
21 Wò dukɔ la me tɔwo katã anye ame dzɔdzɔewo;
Woawoe anyi anyigba la dome tegbee.
Woawoe nye nu miemie si meċ,
Nye asinudɔwɔwɔ, ne woaɖo atsyɔ̃ nam.
22 Ame ʋɛwo azu akpe,
Eye ame suewo azu dukɔ sesẽ.
Nye Afetɔ ŋutɔ, mado tsɔtsɔe le ewɔɣi.”

YESAYA 61
1  Aƒetɔ Dziɖulagã Afetɔ ƒe gbɔgbɔ le dzinye,
Elabena Afetɔ si ami nam be magblɔ nya nyui na ame fafawo.
Edɔm be mada gbe le ame siwo ƒe dzi gbã la ŋu,
Ne maɖe gbeƒã ablɔɖe na ame siwo woɖe aboyoe
Eye maʋu ŋku na gamenɔlawo,
 2 Ne maɖe gbeƒã Afetɔ ƒe amenuveƒe
Kple mía Mawu ƒe hlɔ̃biaŋkeke la,
Ne mafa akɔ na konyifalawo katã,
 3 Ne mana nu ame siwo le konyi fam ɖe Zion ta,
Ne mana tatsyɔnu wo ɖe dzofi teƒe,
Dzidzɔmi ɖe konyifafa teƒe,
Kafukafuwu ɖe gbɔgbɔ si nu ti kɔ na teƒe.
Eye woayɔ wo be dzɔdzɔenyenye ƒe ati gãwo,
Ame siwo Afetɔ do be wòanye ŋutikɔkɔe nɛ.
 4 Woagbugbɔ blemaƒedowo atso;
Woafɔ blemaglikpowo ɖe tsitrenu,
Eye woagbugbɔ du gbagbãwo atso,
Eye woawɔ teƒe siwo zu aƒedo tso dzidzime yi dzidzime la yeyee.
 5 “Du bubu me tɔwo atso akplɔ miaƒe lãhawo,
Eye amedzroviwo anye miaƒe agbledelawo kple waingbledelawo.
 6 Ke miawo la, woayɔ mi be Afetɔ ƒe nunɔlawo;
Woayɔ mi be mía Mawu ƒe subɔlawo.
Miaɖu dukɔwo ƒe nu xɔasiwo,
Eye miatsɔ woƒe bubu aƒo adegbe le mia ɖokui ŋu.
 7 Nye dukɔ axɔ gome teƒe eve nu ɖe woƒe ŋukpe la teƒe,
Eye woatso aseye le woƒe gome la ta ɖe vlododo teƒe.
Ɛ̃, woaxɔ gome teƒe eve nu le woƒe anyigba dzi.
Dzidzɔ mavɔ anye wo tɔ gome.
 8 Elabena nye, Afetɔ, melɔ̃a nya dzɔdzɔe;
Melé fu adzodada kple nu madzɔmadzɔ wɔwɔ.
Matu woƒe dɔwɔwɔ ŋu fe na wo pɛpɛpɛ,
Eye mabla nu mavɔ kpli wo.
 9 Woanya wo viwo le dukɔwo dome
Kple woƒe dzidzimeviwo le dukɔwo dome.
Ame siwo katã kpɔ wo la adze si wo be
Dzidzimevi siwo Afetɔ yrae wonye.”
10 Matso aseye ɖe Afetɔ ŋu.
Nye ameti bliboa akpɔ dzidzɔ ɖe nye Mawu ŋu.
Elabena edo xɔname ƒe awuwo nam;
Edo dzɔdzɔenyenye ƒe awu ʋlaya nam,
Abe ale si ŋugbetɔsrɔ̃ blaa ta wòɖia nunɔla tɔ ene,
Abe ŋugbetɔ si tsɔ atsyɔ̃ɖonuwo wɔa leke na eɖokui ene.
11 Elabena ale si anyigba la miea nu,
Eye abɔ nana nu siwo woƒã ɖe eme la miena la,
Nenemae Aƒetɔ Dziɖulagã Afetɔ
Ana dzɔdzɔenyenye kple kafukafu namie le dukɔwo katã ŋkume.

YESAYA 62
1  Nyemazi ɖoɖoe o le Zion ta,
Eye nyemazi kpi o le Yerusalem ta,
Va se ɖe esime eƒe dzɔdzɔenyenye naklẽ abe kekeli ene,
Eye eƒe xɔname nabi abe akakati ene.
 2 “Oo nyɔnu, dukɔwo akpɔ wò dzɔdzɔenyenye,
Eye fiawo akpɔ wò ŋutikɔkɔe.
Eye woayɔ ŋkɔ yeye,
Si Afetɔ ŋutɔ ƒe nu ayɔ la, na wò.
 3 Ànye atsyɔ̃fiakuku le Afetɔ si me
Kple fia ƒe tablanu le wò Mawu si me.
 4 Womagayɔ wò azɔ be nyɔnu si wogblẽ ɖi o,
Eye womagayɔ wò anyigba azɔ be gbegbe o.
Ke boŋ woayɔ wò be Nye Dzidzɔ Le Eme,
Eye woayɔ wò anyigba be Srɔ̃tɔ.
Elabena Afetɔ akpɔ dzidzɔ ɖe ŋuwò,
Eye wò anyigba anɔ abe srɔ̃tɔ ene.
 5 Elabena ale si ko ɖekakpui ɖea ɖetugbui leaƒe la,
Nenemae viwòwo aɖe wò.
Ale si ŋugbetɔsrɔ̃ tsoa aseye ɖe ŋugbetɔ ŋui la,
Nenemae wò Mawu atso aseye ɖe ŋuwò.
 6 Oo Yerusalem, meɖo dzɔlawo wò gliwo dzi.
Womazi ɖoɖoe ŋkeke blibo kple zã blibo akpɔ o.
Mi ame siwo yɔa Afetɔ ŋkɔ,
Migagbɔ ɖe eme o,
 7 Eye migana gbɔdzɔe eya amea o, va se ɖe esime wòɖo Yerusalem gɔme anyi,
Ɛ̃, va se ɖe esime wòtsɔe wɔ kafukafui ɖe anyigba dzi.”
 8 Afetɔ tsɔ eƒe nuɖusi, eƒe alɔ sesẽ la, ka atam be:
“Nyemagatsɔ wò agblemenuku ana wò futɔwo woaɖu azɔ o,
Eye amedzroviwo magano wò wain yeye si ŋu nèku kutri ɖo la azɔ o.
 9 Ke boŋ ame siwo xa nukuawo la, woawoe aɖui, eye woakafu Afetɔ;
Eye ame siwo xa wain la anoe le nye xɔxɔnu kɔkɔewo.”
10 Mito agboawo me, mito wo me.
Midzra mɔ dzi ɖo na dukɔ la.
Mido mɔ, mido mɔ gã la.
Miɖe kpewo ɖa le edzi.
Mikɔ dzesiti dzi na dukɔwo.
11 Afetɔ ɖe gbeƒã wòde anyigba ƒe mlɔenuwo be:
“Migblɔ na Zion vinyɔnu la be,
‘Kpɔ ɖa! Wò xɔname gbɔna.
Kpɔ ɖa! Egbɔna kple teƒeɖoɖo,
Eye fetu si wòxena la le eŋgɔ.’”
12 Woayɔ wo be dukɔ kɔkɔe, ame siwo Afetɔ gbugbɔ ƒle,
Eye woayɔ wò be Du Si Wodina Vevie, Du Si Womegblẽ Ði O.

YESAYA 63
1  Ame kae nye esia gbɔna tso Edom,
Eye wòle awu siwo ƒe amadede dze nyuie me tso Bozra,
Ame si le atsyɔ̃wu me,
Eye wòle yiyim le eƒe ŋusẽ geɖe la me?
“Nye, Ame si ƒoa nu le dzɔdzɔenyenye me,
Ame si si ŋusẽ geɖe le be wòaxɔ na ame lae.”
 2 Nu ka ŋuti wò awuwo biã ale,
Eye wò awuwo le abe ame si le wain fanyam le wainfiãnu me la tɔ ene?
 3 “Nye ɖekae fanya waintsetse le wainfiãnu me,
Ame aɖeke metso dukɔwo me va kpe ɖe ŋunye o.
Mefanya wo le nye dziku me,
Eye metu afɔ wo dzi le nye dɔmedzoe me.
Woƒe ʋu hlẽ ɖe nye awuwo ŋu,
Eye nye nudodowo katã me gblẽ.
 4 Elabena meɖo hlɔ̃biaŋkeke le nye dzi me,
Eye ƒe si magbugbɔ nye amewo aƒle la ɖo.
 5 Metsa ŋku, ke kpeɖeŋutɔ aɖeke meli o;
Nye mo wɔ yaa be ame aɖeke meli ana kpekpeɖeŋum o.
Eya ta nye alɔ xɔ nam,
Eye nye dɔmedzoe kpe ɖe ŋunye.
 6 Mefanya dukɔwo le nye dziku me,
Mena wono nye dɔmedzoe mu,
Eye mekɔ woƒe ʋu ɖe anyigba.”
 7 Maƒo nu tso Afetɔ ƒe amenuvedɔwo ŋu,
Afetɔ ƒe dɔ siwo dze na kafukafu,
Le nu siwo katã Afetɔ wɔ na mí la ta,
Nyui gbogbo siwo wòwɔ na Israel ƒe aƒe la
Le eƒe nublanuikpɔkpɔ kple eƒe amenuveve geɖeawo nu.
 8 Elabena egblɔ be: “Vavã, nye dukɔe wonye, vi siwo magbe nuteƒewɔwɔ o lae wonye.”
Ale wòzu Xɔnametɔ na wo.
 9 Le woƒe vevesesewo katã me la, eya hã se veve.
Eye eya ŋutɔ ƒe dɔla xɔ na wo.
Eya ŋutɔ gbugbɔ wo ƒle le eƒe lɔlɔ̃ kple eƒe dɔmetɔtrɔ me,
Eye wòde asi wo te hekɔ wo le blemaŋkekewo katã me.
10 Ke wodze aglã, eye wodo nuxaxa na eƒe gbɔgbɔ kɔkɔe la.
Ale wòtrɔ zu woƒe futɔ;
Eye wòwɔ aʋa kpli wo.
11 Ale woɖo ŋku blemaŋkekewo dzi,
Eƒe subɔla Mose ƒe ŋkekeawo dzi hebia be:
“Afi kae ame si kplɔ wo to atsiaƒu la me kple eƒe alẽha la ƒe kplɔlawo le?
Afi kae Ame si tsɔ eƒe gbɔgbɔ kɔkɔe de eya amea me,
12 Ame si na eƒe ŋutikɔkɔe ƒe abɔ la nɔ kple Mose ƒe nuɖusi,
Ame si ma tsiwo me le wo ŋgɔ,
Ne wòawɔ ŋkɔ mavɔ na eɖokui,
13 Ame si na wozɔ to tsi dzeagbowo me,
Womekli nu o,
Abe sɔ le gbadzaƒe ene la le?
14 Afetɔ ƒe gbɔgbɔ na wogbɔ ɖe eme
Abe ale si ko lãhawo yia bali mee ene.”
Aleae nèkplɔ wò dukɔ la,
Ale be nàwɔ ŋkɔ gã na ɖokuiwò.
15 Do ŋku ɖa tso dziƒo ne nàkpɔ nu,
Tso wò bubuteƒe kɔkɔ si le kɔkɔe la.
Afi kae wò dzonɔameme, wò ŋusẽ geɖe,
Wò dɔmetɔtrɔ kple wò nublanuikpɔkpɔ le?
Wote ɖa le ŋunye.
16 Elabena wòe nye mía Fofo;
Togbɔ be Abraham menya mí o,
Eye Israel mekpɔ mí dze si o hã la,
Afetɔ, wòe nye mía Fofo.
Ŋkɔwòe nye mía Gbugbɔƒlela tso gbe aɖe gbe ke.
17 Oo Afetɔ, nu ka tae nèna míele tatram le wò mɔwo dzi?
Nu ka tae nèna míaƒe dzi me sẽ be míevɔ̃a wò o?
Gatrɔ va le wò subɔlawo ta,
Le to siwo nye wò domenyinu ta.
18 Ɣeyiɣi vi aɖe koe anyigba la nɔ wò dukɔ kɔkɔe la si me.
Míaƒe ketɔwo nya avuzi le wò kɔkɔeƒe la dzi.
19 Elabena ɣeyiɣi didi aɖee nye esia míezu abe ame siwo dzi mèɖu kpɔ o
Kple ame siwo ŋu womeyɔ wò ŋkɔ ɖo kpɔ o la ene.

YESAYA 64
1  Oo ne ɖe nàdze dziƒowo ahaɖi ɖe anyi,
Ale be towo nadzo kpekpekpe le tawò,
 2 Abe ale si dzo bia nake wuwluiwo,
Eye dzoa nana tsi fiẽna ene ɖe,
Ekema wò ketɔwo adze si wò ŋkɔ,
Eye dukɔwo adzo nyanyanya le ŋkuwòme!
 3 Esime nèwɔ nu dziŋɔ siwo míekpɔ mɔ na o la,
Èɖi ɖe anyi, eye towo dzo kpekpekpe le ŋkuwòme.
 4 Tso gbe aɖe gbe ke ame aɖeke mesee o, eye mede to me na ame aɖeke o,
Eye ŋku aɖeke mekpɔ Mawu aɖeke o, negbe wò,
Ame si kpena ɖe ame siwo le mɔ kpɔm nɛ la ŋu.
 5 Èdo go ame si wɔa nu dzɔdzɔe dzidzɔtɔe,
Ame siwo ɖoa ŋku dziwò hezɔa wò mɔwo dzi.
Kpɔ ɖa! Èdo dziku, esime míenɔ nu vɔ̃ wɔm atraɖii,
Míewɔe eteƒe didi.
Ðe woaɖe mía?
 6 Mí katã míezu abe ame makɔmakɔwo ene,
Eye nu dzɔdzɔe siwo katã míewɔna la le abe gbelégodui ene.
Mí katã míayrɔ abe aŋgba ene,
Eye míaƒe vodadawo alɔ mí ɖe nu abe ya ene.
 7 Ame aɖeke meli, si yɔa wò ŋkɔ o,
Ame aɖeke metsia dzi be yeaku ɖe ŋuwò o,
Elabena èɣla wò ŋkume ɖe mí,
Eye nèna míevɔ le míaƒe vodadawo ta.
 8 Azɔ Afetɔ, wòe nye mía Fofo.
Míawo la, tsu míenye, eye wòe nye mía Mèla;
Wò asinudɔwɔwɔ mí katã míenye.
 9 Oo Afetɔ, mègado dziku akpa o,
Eye mègaɖo ŋku míaƒe vodada la dzi tegbee o.
Kpɔ mí ɖa, míeɖe kuku, wò dukɔ mí katã míenye.
10 Wò du kɔkɔeawo zu gbegbe.
Zion zu gbegbe,
Eye Yerusalem tsi anyi aƒedoe.
11 Wotɔ dzo
Míaƒe kɔkɔenyenye kple bubu ƒe aƒe
Si me mía tɔgbuiwo kafu wò le la;
Eye nu siwo ŋu míedea asixɔxɔe la katã dome gblẽ.
12 Oo Afetɔ, ɖe nàzi kpi anɔ nu siawo katã kpɔma?
Ðe nàzi kpi ahaɖe mɔ woawɔ fu mí vevie alea gbegbea?

YESAYA 65
1 “Mena ame siwo mebia tanye se o la dim;
Mena ame siwo medim o la ke ɖe ŋunye.
Megblɔ na dukɔ si meyɔa nye ŋkɔ o la be, ‘Nyee nye esi, nyee nye esi!’
 2 Meke nye abɔwo me ŋkeke bliboa katã ɖo ɖe dukɔ sẽto,
Ame siwo le zɔzɔm le mɔ manyomanyo dzi,
Eye wodze woawo ŋutɔwo ƒe susuwo yome;
 3 Dukɔ si me tɔwo le dziku dom nam le ŋkunyeme ɖaa,
Eye wosaa vɔ le abɔwo me hedoa dzudzɔ le anyikpewo dzi.
 4 Ame siwo bɔbɔ nɔa ameɖiƒewo,
Eye wotsia teƒe ɣaɣlawo dɔna,
Woɖua halã,
Eye nu makɔmakɔwo ƒe detsi hã le woƒe zewo me.
 5 Wole gbɔgblɔm be, ‘Nɔ adzɔge; Mègate ɖe ŋunye o,
Elabena mele kɔkɔe wu wò.’
Ame siawoe nye dzudzɔ le ŋɔti me nam, dzo si le bibim ŋkeke blibo la katã.
 6 Kpɔ ɖa! Woŋlɔe ɖi le ŋkunyeme;
Nyemazi kpi o,
Ke boŋ maɖo eteƒe na wo,
Maɖo eteƒe na wo wòasu wo nyuie
 7 Le woawo ŋutɔwo kple wo tɔgbuiwo siaa ƒe vodadawo ta.
Elabena wodo dzudzɔ le towo dzi,
Eye wodo vlom le togbɛwo dzi,
Gbã la, madzidze woƒe fetu na wo bliboe,” Afetɔ ye gblɔe.
 8 Ale Afetɔ gblɔe nye esi:
“Ale si ko wokpɔa wain yeye le waintsetsekpo me,
Eye wogblɔna be, ‘Mègagblẽ edome o, elabena nu nyui aɖe le eme’ la,
Nenemae mawɔ le nye subɔlawo ta;
Nyematsrɔ̃ wo katã o.
 9 Mana dzidzimevi aɖe nado tso Yakob me,
Eye nye towo ƒe domenyila nado tso Yuda me;
Nye ame tiatiawo anyi tonyigba la dome,
Eye nye subɔlawo anɔ afi ma.
10 Saron azu gbeɖuƒe na alẽwo,
Eye Akor Bali la azu nyiwo ƒe gbɔɖemeƒe
Na nye dukɔ si adim.
11 Ke miawo la, miele ame siwo gblẽ Afetɔ ɖi la dome,
Ame siwo ŋlɔ nye to kɔkɔe la be,
Ame siwo ɖoa kplɔ̃ na Aklama,
Kple ame siwo kua wain si wotɔtɔ kplu banaa na Dzɔgbese.
12 Eya ta matsɔ mi ade asi na yi,
Eye mi katã miado dɔgɔ̃e woawu,
Elabena meyɔ mi, ke mietɔ o,
Meƒo nu na mi, ke miesee o,
Miewɔa nu si nye vɔ̃ le ŋkunyeme,
Eye nu si medzea ŋunye o lae mietia.”
13 Eya ta ale Aƒetɔ Dziɖulagã Afetɔ gblɔe nye esi:
“Kpɔ ɖa! Nye subɔlawo aɖu nu, ke miawo la, dɔ awu mi.
Kpɔ ɖa! Nye subɔlawo ano nu, ke miawo la, tsikɔ awu mi.
Kpɔ ɖa! Nye subɔlawo akpɔ dzidzɔ, ke miawo la, ŋu akpe mi.
14 Kpɔ ɖa! Nye subɔlawo atso aseye le dzi ƒe dzidzɔkpɔkpɔ ta,
Ke miawo la, miado ɣli le dzi ƒe vevesese ta,
Eye miado konyifaɣli le gbɔgbɔ ƒe teteɖeanyi ta.
15 Ŋkɔ si miagblẽ ɖi la anye esi nye ame tiatiawo azã atsɔ ado ɖiŋu na ame,
Eye Aƒetɔ Dziɖulagã Afetɔ awu mia dometɔ ɖe sia ɖe,
Ke ayɔ ŋkɔ bubu na eƒe subɔlawo ya;
16 Ale be ame sia ame si di be woayra ye le anyigba dzi la,
Nyateƒe Mawu la ayrae,
Eye ame sia ame si ka atam le anyigba dzi la,
Atsɔ nyateƒe Mawu la aka atam.
Elabena woaŋlɔ gbe aɖe gbe xaxawo be;
Woaɣla ɖe nye ŋkuwo.
17 Kpɔ ɖa, mele dziƒo yeye kple anyigba yeye wɔm;
Eye tsãnuwo magava susu me na ame,
Alo ava ame ƒe dzi me o.
18 Eya ta mitso aseye, eye mikpɔ dzidzɔ tegbee ɖe nu si wɔm mele la ŋu.
Elabena kpɔ ɖa, mele Yerusalem wɔm hena aseyetsotso,
Eye eƒe dukɔ la hena dzidzɔkpɔkpɔ.
19 Matso aseye ɖe Yerusalem ŋu, eye makpɔ dzidzɔ ɖe nye dukɔ ŋu;
Womagase avifafa alo konyifafa le eme azɔ o.”
20 “Vidzĩ aɖeke maganɔ afi ma si anɔ agbe ŋkeke ʋɛ aɖewo ko o,
Eye ame tsitsi si ƒe ŋkekewo mede o hã maganɔe o;
Elabena woabu ame si xɔ ƒe alafa ɖeka hafi ku la ŋutsuvi dzaa ko;
Eye ne nu vɔ̃ wɔla xɔ ƒe alafa ɖeka hã la, fiƒode ava edzi.
21 Woatu xɔ anɔ eme,
Eye woade waingble aɖu eme kutsetse.
22 Womatu xɔ ame bubu nanɔ eme o,
Womaƒã nu ame bubu naɖu o.
Elabena ale si ati tsinae la, nenemae nye amewo ƒe agbemeŋkekewo anɔ,
Eye nye ame tiatiawo ase vivi na woawo ŋutɔwo ƒe asinudɔwɔwɔwo bliboe.
23 Womadze agbagba dzodzro o,
Eye womadzi vi vɔ̃ nadzɔ ɖe edzi o,
Elabena Afetɔ ƒe ame yayrawo ƒe dzidzimeviwo wonye,
Eye wo viwo le wo ŋu.
24 Matɔ hafi woayɔm;
Ne wogale nuƒoƒo dzi la, masee.
25 Amegãxi kple alẽvi aɖu gbe le wo nɔewo gbɔ,
Dzata aɖu gbe abe nyi ene,
Eye da ƒe nuɖuɖu anye kewɔ.
Womawɔ vɔ̃ aɖeke o, eye womahe gbegblẽ aɖeke ava nye to kɔkɔe blibo la dzi o,” Afetɔ ye gblɔe.

YESAYA 66
1 Ale Afetɔ gblɔe nye esi:
“Dziƒowo nye nye fiazikpui, eye anyigba nye nye afɔɖodzinu.
Ekema xɔ ka ƒomevie miate ŋu atu nam,
Eye teƒe kae anye gbɔɖemeƒe nam?”
 2 Afetɔ be: “Nye ŋutɔ nye asie wɔ nu siawo katã,
Ale be nu siawo katã li.
Ke malé ŋku ɖe ame si
Nye ɖokuibɔbɔla, ame si ƒe gbɔgbɔ dzi nu te ɖo, eye wòdzona nyanyanya ɖe nye nya ŋu la ŋuti.
 3 Ame si wu nyitsu la sɔ kple ame si wu ame.
Ame si tsɔ alẽ sa vɔe la sɔ kple ame si ŋe kɔ le avu nu.
Ame si sa nunavɔ la sɔ kple ame si tsɔ haʋu sa vɔe.
Ame si tsɔ ŋkuɖodzilifi do dzudzɔe la sɔ kple ame si wɔ akunya tsɔ yra ame.
Woawo ŋutɔwo tia woƒe mɔ,
Eye ŋunyɔnuwo doa dzidzɔ na wo.
 4 Eya ta madi mɔ siwo dzi mato ahe to na wo,
Eye mahe nu siwo dzia ŋɔ na wo la ava wo dzi;
Elabena esi meyɔ ame la, ame aɖeke metɔ o;
Esi meƒo nu la, ame aɖeke meɖo to o;
Wowɔ nu si nye vɔ̃ le ŋkunyeme ɖaa,
Eye nu si medzea ŋunye o lae wotia be yewoawɔ.”
 5 Mi ame siwo le dzodzom nyanyanya ɖe Afetɔ ƒe nya ŋu, mise eƒe gbe:
“Mia nɔvi siwo léa fu mi, eye woɖea mi ɖe aga le nye ŋkɔ ta la, gblɔ be, ‘Woakafu Afetɔ!’
Ke Mawu ado na mi, eye wòahe dzidzɔ vɛ na mi,
Gake woawo ya woaɖu ŋukpe.”
 6 Hoowɔwɔ le ɖiɖim tso dua me, eye gbe aɖe le ɖiɖim tso gbedoxɔa me!
Afetɔ, ame si le to si eƒe futɔwo dze na la hem na wo la, ƒe gbee.
 7 Edzi vi hafi va lé ku.
Edzi ŋutsuvi hafi fu va ɖui gɔ̃ hã.
 8 Ame kae se nu sia tɔgbi kpɔ?
Ame kae kpɔ nu siawo tɔgbi kpɔ?
Ðe woadzi anyigba aɖe le ŋkeke ɖeka dzia?
Alo ɖe woadzi dukɔ aɖe zi ɖeka kpoyia?
Gake esi Zion ya lé ku ko la, edzi viawo zi ɖeka kpoyi.
 9 Afetɔ be: “Ðe maʋu vidzidɔ nu, evɔ nyemana woadzi via oa?”
Wò Mawu la be: “Alo ɖe mana vi nado gbɔna, evɔ maxe mɔa?”
10 Mi ame siwo katã lɔ̃ Yerusalem la, mikpɔ dzidzɔ eye mitso aseye kplii.
Mi ame siwo katã faa konyi ɖe eta, mitso aseye kplii,
11 Elabena miano eƒe akɔfafa ƒe no wòaɖi kɔ na mi;
Mianoe nyuie eye miase vivi le eƒe ŋutikɔkɔe geɖe la me.
12 Elabena ale Afetɔ gblɔe nye esi:
“Kpɔ ɖa, mana ŋutifafa naɖo egbɔ abe tɔsisi ene,
Eye dukɔwo ƒe ŋutikɔkɔe ava nɛ abe tɔʋu si gba go ene,
Miano eƒe no, eye wòakɔ mi ɖe axadame,
Eye wòakɔ mi ɖe ata ta.
13 Ale si vidada faa akɔ na via la,
Nenemae manɔ akɔ fam na mi;
Eye woafa akɔ na mi le Yerusalem ta.
14 Miakpɔe, eye miaƒe dzi atso aseye,
Ŋusẽ aɖo miaƒe ƒuwo ŋu abe gbe dama ene.
Afetɔ aɖe eƒe asi afia esubɔlawo,
Ke abu fɔ eƒe futɔwo.”
15 “Elabena Afetɔ gbɔna abe dzo ene,
Eye eƒe tasiaɖamwo le abe ahom ene,
Ne wòaɖo eteƒe na wo le dɔmedzoe me,
Eye wòaka mo na wo le dzoƒaɖe me.
16 Elabena Afetɔ atsɔ dzo adrɔ̃ ʋɔnui,
Atsɔ eƒe yi ɖe ŋutilãwo katã ŋu,
Eye ame siwo Afetɔ awu la asɔ gbɔ.
17 “Ame siwo kɔa wo ɖokuiwo ŋu, eye wowɔa wo ɖokui dzadzɛ, be yewoage ɖe abɔwo me, eye wokplɔa nu si le eƒe titina la ɖo, ame siwo ɖua halã, ŋunyɔnuwo kple afiwo la katã nu ayi,” Afetɔ ye gblɔe. 
18 “Esi menya woƒe dɔwɔwɔwo kple woƒe tamesusuwo ta la, megbɔna be maƒo dukɔwo kple gbegbɔgblɔwo katã nu ƒu; eye woava kpɔ nye ŋutikɔkɔe.”
19 “Maɖo dzesi aɖe ɖe wo dome, eye madɔ ame siwo si la dometɔ aɖewo ɖe dukɔwo, ɖe Tarsis, Pul kple Lud, siwo nye aŋutrɔdalawo, Tubal kple Yavan, ɖe ƒukpo siwo le didiƒe, ame siwo mese ŋunye nya alo kpɔ nye ŋutikɔkɔe kpɔ o; eye woaɖe gbeƒã nye ŋutikɔkɔe le dukɔwo dome. 
20 Woakplɔ nɔviwòwo katã tso dukɔwo katã dome, eye woanɔ sɔwo dzi, woanɔ tasiaɖamwo kple tasiaɖam siwo tame wogba la me, eye woanɔ tedzisɔwo kple kposɔ ɖeablɛwo dzi, ava nye to kɔkɔe la dzi, ava Yerusalem, wòanye nunana na Afetɔ, abe ale si Israel-viwo tsɔa nunana ɖe nu dzadzɛwo me vaa Afetɔ ƒe mee ene,” Afetɔ ye gblɔe.
21 “Eye matsɔ wo dometɔ aɖewo aɖo nunɔlawo kple Lewi viwo,” Afetɔ ye gblɔe.
22 “Elabena ale si ko dziƒo yeye kple anyigba yeye siwo wɔm mele la anɔ anyi le ŋkunyemee la, nenemae miaƒe dzidzimeviwo kple miaƒe ŋkɔ hã anɔ anyi ɖaa,” Afetɔ ye gblɔe.
23 “Eye wòava eme be, le dzinu yeye sia dzinu yeye kple sabat sia sabat dzi la,
Ŋutilãwo katã ava de ta agu ɖe ŋkunyeme,” Afetɔ ye gblɔe.
24 “Eye woado ayi aɖakpɔ ame siwo da vo ɖe ŋunye la ƒe kukuawo;
Elabena woƒe nyéwo maku o,
Eye woƒe dzo la matsi o,
Eye woazu ŋunyɔnu na amegbetɔwo katã.”

LEAVE A REPLY

Please enter your comment!
Please enter your name here