Yeremiya

YEREMIYA
Jeremiah

1  Esiae nye Yeremiya, Hilkiya, si nye nunɔla siwo nɔ Anatot le Benyamin-nyigba dzi la dometɔ ɖeka ƒe vi, ƒe nyawo. 
2 Afetɔ ƒe gbe va nɛ le Yuda-fia Yosiya, Amon vi, ŋɔli le eƒe fiaɖuɖu ƒe ƒe wuietɔ̃lia me. 
3 Gbedeasia gava nɛ le Yuda-fia Yehoyakim, Yosiya vi, ŋɔli va se ɖe Yuda-fia Zedekiya, Yosiya vi, ƒe ƒe wuiɖekɛlia ƒe nuwuwu heva se ɖe esime woɖe aboyo Yerusalem le ɣleti atɔ̃lia me.
4 Afetɔ ƒe gbe va nam be:
 5 “Hafi mava mè wò ɖe dɔ me la, menya wò,
Eye hafi woadzi wò la, mekɔ ŋuwò.
Metsɔ wò ɖo nyagblɔɖilae na dukɔwo.”
 6 Ke megblɔ be: “Oo, Aƒetɔ Dziɖulagã Afetɔ!
Nyemenya nuƒoƒo o, elabena ŋutsuvi dzaa ko menye.”
 7 Ke Afetɔ gblɔ nam be:
“Mèganɔ gbɔgblɔm be, ‘Ŋutsuvi dzaa ko menye’ o.
Ke boŋ ame siwo katã gbɔ madɔ wò ɖo la, yi;
Eye nàgblɔ nu siwo katã ƒe se mede na wò la.
 8 Woƒe dzedzeme megaɖi vɔvɔ̃ na wò o,
Elabena ‘meli kpli wò be maɖe wò,’ Afetɔ ye gblɔe.”
9 Eye Afetɔ do eƒe asi ɖa tɔ nu nam. Eye Afetɔ gblɔ nam be: “Metsɔ nye nyawo de wò nu me. 
10 Kpɔ ɖa, metsɔ wò ɖo dukɔwo kple fiaɖuƒewo nu egbe sia, ne nàho nu ahamu nu, nàtsrɔ̃ nu ahagbã nu, eye nàɖo nu te ahaƒã nu.”
11 Afetɔ ƒe gbe gava nam be: “Yeremiya, nu ka kpɔm nèle?” Eye meɖo eŋu be: “Yevuziti ƒe alɔ kpɔm mele.”
12 Eye Afetɔ gblɔ nam be: “Èkpɔe tututu, elabena mele ŋute ɖe nye nya la ŋu, ne mawɔe ade goe.”
13 Afetɔ ƒe gbe gava nam zi evelia be: “Nu ka kpɔm nèle?” Eye megblɔ be: “Mele ze aɖe si le fiefiem la kpɔm, eye eƒe nugbɔ viã ɖa tso dziehe.” 14 Eye Afetɔ gblɔ nam be:
“Vɔ̃ la atso ka tso dziehe
Aƒo ɖe anyigba la dzi nɔlawo katã dzi.
15 Elabena ‘mele dziehefiaɖuƒewo ƒe ƒomewo katã yɔ ge,’ Afetɔ ye gblɔe;
‘Eye woava; wo dometɔ ɖe sia ɖe ali eƒe fiazikpui anyi
Ðe Yerusalem ƒe agbowo nu,
Eye woava ɖe to ɖe eƒe gliwo katã
Kple Yuda duwo katã.
16 Madrɔ̃ ʋɔnu wo eye mabu fɔ wo ɖe woƒe vɔɖivɔ̃ɖi ta,
Elabena wogblẽm ɖi
Hele dzudzɔ dom na mawu bubuwo,
Eye wole ta dem agu na woƒe asinudɔwɔwɔwo.’
17 Ke nɔ dzadzraɖo ɖi,
Eye nàtso aɖagblɔ nu siwo katã ƒe se dem mele na wò la na wo.
Womegadzi ŋɔ na wò o,
Ne menye nenema o la, mana ŋɔdzi nalé wò le wo ŋkume.
18 Elabena metsɔ wò wɔ du sesẽ,
Gasɔti kple akɔbligli egbea ɖe anyigba blibo la nu,
Ðe Yuda-fiawo kple Yuda-megãwo,
Eƒe nunɔlawo kple dukɔ la me tɔwo nu.
19 Woawɔ avu kpli wò,
Gake womanɔ te ɖe nuwò o,
Elabena ‘meli kpli wò be maɖe wò,’ Afetɔ ye gblɔe.”

YEREMIYA 2
1  Afetɔ ƒe gbe va nam be: 
2 “Yi ɖaɖe gbeƒã ɖe Yerusalem ƒe to me be, ‘Ale Afetɔ gblɔe nye esi:
“Meɖo ŋku wò ɖetugbuime nuteƒewɔwɔ,
Lɔlɔ̃ si nɔ asiwò esime wodo ɖeɖe ŋugbe na wò,
Ale si nèdze yonyeme le gbea dzi,
Le anyigba si dzi womeƒã nu ɖo o la dzi.
 3 Israel nɔ kɔkɔe na Afetɔ, eƒe agblemenuku gbãtɔ wònye.”’
‘Ame siwo katã ɖui la ɖia fɔ.
Gbegblẽ vaa wo dzi,’ Afetɔ ye gblɔe.”
 4 Oo, Yakob ƒe aƒe,
Kple mi Israel ƒe aƒe la ƒe ƒomeawo, mise Afetɔ ƒe nya.
 5 Ale Afetɔ gblɔe nye esi:
“Vodada kae mia fofowo kpɔ le ŋunye
Hafi wote ɖe aga sãa le ŋunye,
Eye wodze legba dzodzrowo yome, ale be woawo ŋutɔwo hã wozu nu dzodzrowo?
 6 Womebia be, ‘Afi kae Afetɔ,
Ame si kplɔ mí tso Egipte-nyigba dzi,
Ame si kplɔ mí to gbea dzi,
To anyigba si nye gbegbe, si dzi ʋewo le la dzi,
To kuɖiɖinyigba kple anyigba si do blukɔ tsiɖitsiɖi dzi,
To anyigba si dzi ame aɖeke metona o,
Kple anyigba si dzi amegbetɔ aɖeke mele o la le?’ hã o.
 7 Mlɔeba mekplɔ mi va anyigba si dzi atikutsetsebɔ le la dzi,
Ne miaɖu eƒe kutsetse kple edzi nu nyuiwo.
Ke mieva gblẽ kɔ ɖo na nye anyigba la;
Eye miedo ŋunyɔ nye domenyinu la.
 8 Nunɔlawo mebia be, ‘Afi kae Afetɔ le?’ hã o.
Ame siwo nye Sea fialawo hã menyam o,
Lãkplɔviwo dze aglã ɖe ŋunye,
Nyagblɔɖilawo gɔ̃ hã gblɔ nya ɖi le Baal ƒe ŋkɔ me
Eye wodze mawu maɖinuwo yome.
 9 Afetɔ be, ‘Eya ta magahe nya kpli mi,
Eye mahee kple mia viwo ƒe viwo.’
10 ‘Miyi Kitim ƒutanyigbawo dzi miakpɔ.
Ɛ̃, midɔ ame ɖe Kedar, ne mialé ŋku ɖe nuwo ŋu nyuie;
Ne miakpɔ be nu sia tɔgbi dzɔ kpɔ hã.
11 Ðe dukɔ aɖe tsɔ eƒe mawuwo ɖɔli nu siwo menye mawu o kpɔa?
Ke nye dukɔ ya tsɔ nye ŋutikɔkɔe ɖɔli nu si ŋu viɖe aɖeke mele o.
12 Mi dziƒowo, miaƒe nu neku le esia ta;
Miadzo nyanyanya kple ŋɔdzi gã,’ Afetɔ ye gblɔe,
13 ‘Elabena nye dukɔ wɔ nu baɖa ƒomevi eve:
Wogblẽ nye, ame si nye agbetsivudo la ɖi,
Eye woɖe tsido na wo ɖokui,
Tsido siwo gɔme ŋɔ, siwo me tsi mate ŋu anɔ o.’
14 ‘Subɔvie Israel nye loo alo kluvi si wodzi ɖe aƒe mee wònyea?
Nu ka tae wotsɔe de asi woha?
15 Dzatatsuiwo tea gbe ɖe eŋu;
Woɖea gbe.
Wona eƒe anyigba la zu ŋɔdzinu.
Wotɔ dzo eƒe duwo, ale be ame aɖeke megale wo me o.
16 Nof kple Tahpanes viwo gɔ̃ hã aɖu nu le wò ta dzi.
17 Ðe menye wò ŋutɔe na nu sia dzɔ ɖe dziwò,
Esi nègblẽ Afetɔ wò Mawu la ɖi
Esime wònɔ kplɔwòm le mɔ la dzi oa?
18 Azɔ nu ka tae nèdi be yeadze Egipte mɔ,
Be nàyi aɖano Sihor tsi?
Nu ka tae nèdi be yeadze Asiria mɔ,
Be nàyi aɖano Tɔsisi la me tsi?
19 Wò nu vɔ̃ɖi wɔwɔ neɖɔ wò ɖo,
Eye wò nuteƒemawɔmawɔ negbe nya na wò.
Eya ta nyae, eye nàkpɔ ale si wòvɔ̃ɖii kple ale si wòvenae,
Be nègblẽ Afetɔ wò Mawu la ɖi;
Mèvɔ̃m o,’ Aƒetɔ Dziɖulagã, aʋakɔwo ƒe Afetɔ ye gblɔe.
20 ‘Elabena meŋe wò kɔkuti la gbe aɖe gbe ke,
Eye metso wò kunyowuwo.
Ke ègblɔ be, “Nyemasubɔ wò o,”
Elabena èmlɔ anyi dra ɖe togbɛ kɔkɔwo katã
Kple ati damawo katã te hele gbolo wɔm.
21 Medo wò abe wainka dzĩ nyuitɔ, si nye wainka vavãtɔ ene;
Eya ta aleke wɔ nètrɔ zu wainka gbegblẽwo ƒe alɔ le ŋkunyeme?’
22 ‘Ne èle tsi kple adzalẽ gbogbo aɖe hã la,
Wò vodada anye ɖi kokoko le ŋkunyeme,’ Aƒetɔ Dziɖulagã Afetɔ ye gblɔe.
23 Aleke wɔ nàgblɔ be, ‘Nyemegblẽ kɔ ɖo na ɖokuinye o.
Nyemedze Baalwo yome o’?
Kpɔ wò mɔ le bali la me ɖa.
Lé ŋku ɖe nu si nèwɔ la ŋu.
Èle abe kposɔnɔ ɖidu
Si le du sim tso afii yi afi mɛ le eƒe mɔ dzi ene.
24 Èle abe gbetedzi si gbegbenɔnɔ ma,
Eye wòle ya ʋẽm se le eƒe fieŋufieŋu me ene.
Ne eƒe asiyɔɣi ɖo la, ame kae ate ŋu axe mɔ nɛ?
Atsu siwo katã le eyome tim la makplɔe ɖo ɖeɖi nate wo ŋu o.
Ne eƒe asiyɔɣi ɖo ko la, woakpɔe.
25 Kpɔ wò afɔ dzi, be wòagatsi ƒeƒle o,
Kple wò ve me dzi, be tsikɔ nagawui o.
Gake èɖo eŋu be, ‘Dzodzroe!
Kpao! Melɔ̃ dutatɔwo,
Woawo yomee madze.’
26 Ale si ŋu kpea fiafi ne asi tui la,
Nenemae ŋukpe lé Israel ƒe aƒe la,
Woawo ŋutɔwo, woƒe fiawo kple woƒe amegãwo,
Woƒe nunɔlawo kple woƒe nyagblɔɖilawo siaa.
27 Wogblɔna na ati be, ‘Wòe nye fofonye,’
Eye na kpe be, ‘Wòe dzim.’
Ke wotrɔ ʋume dem, eye menye ŋkume o.
Eye ne woɖo xaxa me la, woagblɔ be,
‘Tso nàxɔ na mí!’
28 Azɔ afi kae wò mawu siwo nèwɔ na ɖokuiwò la le?
Ne woate ŋu axɔ na wò le wò xaxaɣi la, ekema na woatso,
Elabena Yuda, ale si wò duwo sɔ gbɔe la, nenemae wò mawuwo hã sɔ gbɔe.
29 Afetɔ be: ‘Nu ka ŋuti miele dzre hem kplim?
Nu ka ŋuti mi katã miedze aglã ɖe ŋunye?’
30 Meƒo mia viwo dzodzro.
Wodo toku amehehe.
Miaƒe yi ɖu miaƒe nyagblɔɖilawo,
Abe dzata nuvuvula ene.
31 Oo dzidzime, milé ŋku ɖe Afetɔ ƒe nya ŋu.
Ðe mezu gbegbe na Israel loo
Alo anyigba doblukɔ tsiɖitsiɖia?
Nu ka tae nye dukɔ sia gblɔ be, ‘Míetsana faa.
Míagatrɔ ava gbɔwò azɔ o’?
32 Ðe ɖetugbui leaƒe aŋlɔ eƒe atsyɔ̃ɖonuwo be,
Eye ŋugbetɔ aŋlɔ eƒe akɔtablanu bea?
Ke nye dukɔ ya ŋlɔm be, ŋkekeawo mele xexlẽ me o.
33 Oo nyɔnu, aleke nèbi ɖe ahiãdidi me ale!
Èbi ɖe nu baɖa wɔwɔ me.
34 Wokpɔ ame maɖifɔ dahewo ƒe ʋu le wò awuwo ŋu,
Togbɔ be nyemekpɔ wo wonɔ fi fim o hã;
Ʋu xɔ wò awuwo katã me keŋ.
35 Ke ègblɔ be, ‘Nyemeɖi fɔ o.
Eƒe dziku nu fa ɖe ŋunye.’
Fifia madrɔ̃ ʋɔnu wò
Elabena ègblɔ be, ‘Nyemewɔ nu vɔ̃ o.’
36 Nu ka tae nèbua ale si nètrɔa wò mɔwoe la nu tsɛe?
Ŋu akpe wò ɖe Egipte hã ŋu,
Abe ale si ŋu kpe wò ɖe Asiria ŋui ene.
37 Esia hã ta àkpla asi ta hafi adzo,
Elabena Afetɔ gbe ame siwo ŋu nèle dzi ɖom ɖo la,
Womana nu nadze edzi na wò o.”

YEREMIYA 3
1 Amewo biana be: “Ne ŋutsu aɖe gbe srɔ̃a, eye nyɔnua yi ɖaɖe ŋutsu bubu la, ɖe wòagagbugbɔ ayi nyɔnua gbɔa?”
Ðe manye kɔgbegblẽ ɖo na anyigba ma keŋkeŋ oa?
“Wò la, èwɔ gbolo kple wò zɔhɛ geɖeawo,
Ðe nàtrɔ ava gbɔnye azɔa?” Afetɔ ye gblɔe.
 2 “Fɔ mo dzi nàkpɔ togbɛ ƒeƒlewo dzi ɖa.
Afi kae womedɔ gbɔwò le kpɔ o?
Èbɔbɔ nɔ mɔ to le wo lalam,
ènɔ anyi abe tsatsala le gbegbe ene
Eye nètsɔ wò gbolowɔwɔ kple wò nu vɔ̃ɖi wɔwɔ
Gblẽ kɔ ɖo na anyigba la.
 3 Eya tae tsi gbe dzadza,
Eye adatsi hã medza o.
Mo kplala li na wò abe srɔ̃nyɔnu gbolowɔla ene;
Ŋu mekpea wò o.
 4 Azɔ nèle ɣli dom nam be,
‘Fofonye, wòe nye nye ɖetugbuimezɔhɛ!
 5 Ðe ame alé dziku ɖe dɔme ɖaa,
Alo ɖe wòalé ame ɖe dɔme ɖikaa?’
Alea nègblɔ,
Ke nèwɔa nu baɖa siwo katã nàte ŋui.”
6 Afetɔ gblɔ nam le Fia Yosiya ŋɔli be: “‘Èkpɔ nu siwo Israel mawɔnuteƒe la wɔa? Eyi to kɔkɔwo katã dzi kple ati damawo katã te, eye wòwɔ gbolo le afi ma. 
7 Ke esi wòwɔ nu siawo katã megbe gɔ̃ hã la, megblɔna nɛ be wòatrɔ ɖe ŋunye, gake metrɔ o; eye Yuda kpɔ nu si nɔvianyɔnu mawɔnuteƒe la nɔ wɔwɔm. 
8 Esi mekpɔe la, megbe Israel mawɔnuteƒe la le eƒe ahasiwɔwɔ ta, eye mena srɔ̃gbegbalẽe. Ke hã nɔvia Yuda alakpanuwɔla la mevɔ̃ o; ke boŋ eya hã yi ɖawɔ gbolo. 
9 Ebu eƒe gbolowɔwɔ la nu tsɛe, eye wògblẽ anyigba la hewɔ ahasi kple atiwo kpakple kpewo. 
10 Togbɔ be esiawo katã dzɔ hã la, nɔvia alakpanuwɔla Yuda hã metrɔ ɖe ŋunye kple eƒe dzi blibo o, ke boŋ ewɔ alakpanu,’ Afetɔ ye gblɔe.”
11 Eye Afetɔ gagblɔ nam be: “Israel mawɔnuteƒe la wɔ nu dzɔdzɔe wu Yuda alakpanuwɔla la. 
12 Yi ɖaɖe gbeƒã nya siawo ɖo ɖe dziehe gome be:
‘Oo, Israel dzego, trɔ va,’ ale Afetɔ gblɔe nye esi: ‘Nyemaɖo adã ɖe mia ŋu o, elabena nuteƒewɔlae menye,’ Afetɔ ye gblɔe. ‘Nyemalé dziku ɖe dɔme ɖaa o. 
13 Ðeko de dzesi wò vodada, elabena Afetɔ wò Mawu ŋue nèda vo ɖo. Èma wò nunyonamewo na ame tutɔwo le ati damawo katã te, ke mieɖo to nye gbe o,’ Afetɔ ye gblɔe.
14 Afetɔ be: “Mi vi dzegowo, mitrɔ va. Elabena nyee nye miaƒe aƒetɔ ŋutɔŋutɔ; maxɔ mi, maɖe ame ɖeka tso du ɖeka me kple ame eve tso ƒome ɖeka me ahakplɔ mi ava Zion. 
15 Mana kplɔlawo mi ɖe nye dzi ƒe didi nu, eye woatsɔ sidzedze kple gɔmesese deto anyi mi. 
16 Miasɔ gbɔ, eye miadzi ɖe edzi le anyigba la dzi le ŋkeke mawo me,” Afetɔ ye gblɔe. “Miagagblɔ azɔ be, ‘Afetɔ ƒe nubablaɖaka!’ o, eye esia magava ame ƒe dzi me azɔ o, miagaɖo ŋku edzi alo wòadzro mi o, eye miagakpae azɔ o. 
17 Ɣemaɣi la, woayɔ Yerusalem be Afetɔ ƒe fiazikpui; eye woaƒo dukɔwo katã nu ƒu ɖe Yerusalem ne woakafu Afetɔ ƒe ŋkɔ le afi ma, eye womagazɔ le woƒe dzimesesẽ vɔ̃ɖi la nu azɔ o.”
18 “Le ŋkeke mawo me la, Yuda ƒe aƒe kple Israel ƒe aƒe azɔ aduadu, eye woawɔ ɖeka ado tso dziehenyigba dzi ava anyigba si metsɔ na wo tɔgbuiwo wòzu woƒe domenyinu la dzi. 
19 Megblɔ le tame be, ‘Mikpɔ ale si metsɔ mi ɖo viŋutsuwo dome hetsɔ anyigba nyui, domenyinu nyuitɔ kekeake le dukɔwo dome na mi ɖa!’ Eye mebu hã be, miayɔm be, ‘Fofonye!’ eye miatrɔ le yonyeme o.’ 
20 ‘Oo, Israel ƒe aƒe, ale si nyɔnu alakpanuwɔla dzona le srɔ̃a gbɔe la, nenemae miewɔ alakpanu ɖe ŋunye,’ Afetɔ ye gblɔe.”
21 Wose gbe aɖe le togbɛ ƒeƒlewo dzi,
Avifafa kple Israel-viwo ƒe kokoƒoƒoe,
Elabena wona woƒe mɔwo glɔ̃;
Woŋlɔ Afetɔ woƒe Mawu la be.
22 “Mi vi dzegowo, mitrɔ va.
Ne mada gbe le miaƒe godzedze la ŋu.”
“Míawoe nye esi! Míeva gbɔwò,
Elabena wò Afetɔe nye mía Mawu.
23 Vavãe, togbɛwo kple hoowɔwɔ le towo dzi nye alakpa ɖeɖe sɔŋ.
Nyateƒee, Afetɔ mía Mawu la koe ate ŋu axɔ na Israel.
24 Ke ŋukpenanu la ɖu nu siwo mia fofowo ku kutri kpɔ la keŋkeŋ tso míaƒe ɖevime ke:
Woƒe alẽwo, woƒe nyiwo,
Wo viŋutsuwo kple wo vinyɔnuwo.
25 Mina míamlɔ míaƒe ŋukpe me,
Eye míaƒe ŋukpe natsyɔ mía dzi,
Elabena Afetɔ mía Mawu ŋue
Mía kple mía fofowo míewɔ nu vɔ̃ ɖo tso míaƒe ɖevime ke va se ɖe egbe sia,
Eye míeɖo to Afetɔ mía Mawu ƒe gbe o.”

YEREMIYA 4
1  Afetɔ be: “Oo Israel, ne èbe yeatrɔ gbɔ,
Ne èbe yeatrɔ va gbɔnye,
Eye ne àɖe wò legba nyɔŋuwo ɖa le nye ŋkuta la,
Ekema màganye tsatsala o.
 2 Eye ne èka atam be,
‘Zi ale si Afetɔ le agbe!’ eye nèwɔe le nyateƒe, ʋɔnudɔdrɔ̃ dzɔdzɔe kple nuteƒewɔwɔ me la,
Ekema dukɔwo ayra wo ɖokuiwo to eya amea dzi,
Eye eya mee woaƒo adegbe le.”
3 Elabena ale Afetɔ gblɔ na Yudatɔwo kple Yerusalem ye nye esi:
“Mide agble ɖe anyigba wɔnu dzi,
Eye miganɔ nu ƒãm ɖe ŋùwo me o.
 4 Mi Yudatɔwo kple Yerusalem nɔlawo,
Mitso aʋa na mia ɖokuiwo na Afetɔ,
Eye mitso aʋa na miaƒe dziwo,
Ne nye dɔmedzoe nagafla abe dzo ene,
Eye wòabi le miaƒe nu vɔ̃ɖi wɔwɔwo ta,
Eye ame aɖeke mate ŋu atsii o.”
 5 Migblɔe le Yuda, eye miɖe gbeƒãe le Yerusalem.
Mido ɣli, eye miku lãdzo le anyigba la katã dzi.
Mido ɣli sesĩe miagblɔ be: “Miƒo takpli
Ne míasi ayi du sesẽawo me.
 6 Mido dzesiti ɖe dzi ɖo ɖe Zion.
Midi bebeƒe, eye migatɔ ɖi o,”
Elabena mehe gbegblẽ tso dziehe gbɔna, gbegblẽ si teƒe makɔ o.
 7 Edo abe dzata si do tso eƒe avekɔe me ene;
Dukɔwo gblẽla la ho.
Eho tso enɔƒe be wòana wò anyigba la nazu ŋɔdzinu.
Wò duwo azu aƒedo, eye ame aɖeke manɔ wo me o.
 8 Eya ta mita akpanya.
Mifa konyi, eye mifa avi sesĩe,
Elabena dɔmedzoe helĩhelĩ si Afetɔ do ɖe mía ŋu la nu mefa o.
 9 Afetɔ be: “Ava eme gbe ma gbe be, dzi aɖe le fia
Kple amegãwo ƒo;
Nunɔlawo alulu, eye nyagblɔɖilawo ƒe nu aku.”
10 Eye megblɔ be: “Aléle, Oo, Aƒetɔ Dziɖulagã Afetɔ! Vavãe, èflu dukɔ sia kple Yerusalem, esi nègblɔ be, ‘Mianɔ ŋutifafa me,’ evɔ yi le vehlo dzi na mí.”
11 Ɣemaɣi la, woagblɔ na dukɔ sia kple Yerusalem be:
“Ya xɔdzo aɖe ƒo tso togbɛ ƒeƒlewo dzi to gbegbe gbɔna ɖe
Nye dukɔ ƒe vinyɔnu gbɔ;
Menye be woatsɔ agbɔ nui alo ana nu me nadza o.
12 Ya sesẽ si teƒe mekɔ o, si ƒo tso teƒe siawo la tso gbɔnye.
Azɔ madrɔ̃ ʋɔnu wo.
13 Kpɔ ɖa! Aho ava abe alilikpo dodo ene,
Eye eƒe tasiaɖamwo le abe ahom ene.
Eƒe sɔwo ƒua du wu hɔ̃.
Baba na mí, elabena míetsrɔ̃ vɔ!
14 Oo Yerusalem, klɔ nu vɔ̃ɖi wɔwɔ ɖa le wò dzi ŋu, ne woaxɔ na wò.
Ɣekaɣi nàdzudzɔ susu vɔ̃wo bubu ase ɖo?
15 Elabena gbe aɖe le ɖiɖim tso Dan,
Eye wòle gbeƒã ɖem gbegblẽ tso Efrayim tonuto la me.
16 Migblɔe na dukɔwo;
Miɖe gbeƒãe be egbɔna Yerusalem dzi.”
“Dzɔlawo tso anyigba didi aɖe dzi gbɔna,
Eye woana woƒe ɣli nade dzi ɖe Yuda duwo ŋu.
17 Woɖe to ɖe Yerusalem le goawo katã me abe agbleŋudzɔlawo ene,
Elabena edze aglã ɖe ŋunye,” Afetɔ ye gblɔe.
18 “Woaɖo wò zɔzɔme kple wò nuwɔnawo teƒe na wò.
Aleke gbegbe wò gbegblẽ la ave kaɖikaɖie nye esi;
Elabena ede keke wò dzi gbɔ ke!”
19 Oo, mele veve sem, mele veve sem!
Vevesesea nu sẽ heɖo nye dzi me ke.
Nye dzi le tsotsom kpokpokpo le menye.
Nyemate ŋu azi ɖoɖoe o,
Elabena mese lãdzo ƒe ɖiɖi,
Mese aʋaɣli.
20 Wohe nyatakaka vɛ be gbegblẽ kplɔ gbegblẽ ɖo,
Elabena wogblẽ anyigba blibo la katã.
Kasia wogblẽ nye agbadɔwo,
Eye wogblẽ nye agbadɔvɔwo le aɖabaƒoƒo ɖeka me.
21 Ɣekaɣi manɔ dzesiti la kpɔkpɔ dzi,
Eye manɔ lãdzo ƒe ɖiɖi sem ase ɖo?
22 “Elabena nye dukɔ tsi bome;
Womedze sim o.
Vi manyanuwoe wonye, eye womesea nu gɔme o.
Wobi ɖe nu vɔ̃ɖi wɔwɔ me,
Ke womedze si nu nyui wɔwɔ ya o.”
23 Meɖe ŋku ɖe anyigba, eye kpɔ ɖa, ele ƒuƒlu heɖi gbɔlo.
Meɖe ŋku ɖe dziƒowo, ke woƒe kekeli megali o.
24 Meɖe ŋku ɖe towo, eye kpɔ ɖa, wole dzodzom kpekpekpe,
Eye togbɛwo katã le ʋuʋum.
25 Meɖo ŋku anyi, eye kpɔ ɖa, amegbetɔ aɖeke meli o,
Eye dziƒoxewo katã si.
26 Meɖo ŋku anyi, eye kpɔ ɖa, atikutsetsebɔ la zu gbegbe,
Eye wogbã eƒe duwo katã.
Afetɔe wɔ esia
Le eƒe dɔmedzoe helĩhelĩ la ta.
27 Elabena ale Afetɔ gblɔe nye esi: “Anyigba blibo la azu gbegbe,
Gake nyematsrɔ̃ nuwo katã keŋkeŋ o.
28 Esia tae anyigba la afa konyi,
Eye dziƒowo ado viviti.
Elabena meƒo nu, meɖo tame,
Eye nyematrɔ susu loo alo agbe ewɔwɔ o.
29 Dua me nɔlawo katã se sɔdolawo kple aŋutrɔdalawo ƒe hoowɔwɔ,
Eye ame sia ame si.
Woge ɖe avewo me,
Eye wolia agakpewo.
Wogblẽ duawo katã ɖi,
Eye ame aɖeke megale wo me o.”
30 Esi wodo aƒedo wò azɔ ɖe, nu ka wɔ ge nàla?
Tsã la, èdoa awu dzĩ
Hetsɔa sikanuwo ɖoa atsyɔ̃ na ɖokuiwò,
Eye nèɖoa tu ɖe ŋku.
Ke dzodzroe nèwɔ leke na ɖokuiwò,
Elabena ame siwo wò nu léa dzi na la gbe wò;
Azɔ wole wò ku dim.
31 Elabena mese gbe aɖe abe nyɔnu si le dɔ lém la tɔ ene,
Ŋeŋe si le abe nyɔnu si le eƒe ŋgɔgbevi dzim la tɔ ene,
Zion vinyɔnu si gbɔgbɔtsixe tsi ƒo na la ƒe gbee.
Eke eƒe abɔwo me gblɔ be:
“Baba nam, elabena amewulawo na nu ti kɔ nam!”

YEREMIYA 5
1 Mitsa le Yerusalem kpɔdomeewo.
Mitsa ŋku, eye miade dzesi nu.
Eye mitsa le eƒe ablɔwo me
Miakpɔe ɖa be ame aɖe li si wɔa nu dzɔdzɔe,
Eye wòdia nuteƒewɔwɔ yome mɔ hã;
Ekema matsɔe ake dua.
 2 Ne wogblɔ be, “Zi ale si Afetɔ le agbe!” gɔ̃ hã la,
Alakpatam ko wònye kam wole.
 3 Oo Afetɔ, ɖe wò ŋkuwo media nuteƒewɔwɔ oa?
ȃo wo, gake mede lãme na wo o.
Ètsrɔ̃ wo, gake wogbe toɖoɖo amehehe.
Wona woƒe ŋkume sẽ wu agakpe,
Eye wogbe tɔtrɔ.
 4 Ale megblɔ be: “Nyateƒee, ame tsɛwoe wonye.
Wowɔ bometsinu, elabena womenya Afetɔ ƒe mɔ,
Woƒe Mawu ƒe se la o.
 5 Azɔ mayi ame ŋkutawo gbɔ aɖaƒo nu kpli wo,
Elabena woawo ya woanya Afetɔ ƒe mɔ,
Woƒe Mawu ƒe se la.
Ke wo katã woŋe kɔkuti la,
Eye wotso kaawo.”
 6 Esia tae dzata dona tso ave me va dzea wo dzi,
Amegãxi dona tso gbegbe va vuvua wo,
Eye lãklẽ dea xa ɖe woƒe duwo ŋu.
Evuvua ame sia ame si do tso wo me.
Elabena woƒe dzidadawo sɔ gbɔ;
Woƒe nuteƒemawɔmawɔ do agbogbo.
 7 Aleke wɔ matsɔ nu sia ake wò?
Viwòwo gblẽm ɖi,
Eye wotsɔ nu si menye Mawu o la le atam kam.
Mekpɔa woƒe hiahiãwo gbɔ na wo,
Gake wole ahasiwɔwɔ dzi,
Eye wolɔna hoo yia gbolo ƒe me.
 8 Wole abe sɔtsu siwo ƒe lãme le fiefiẽm ɖe asiyɔyɔ ŋu ene,
Wo dometɔ ɖe sia ɖe le gbe tem ɖe ehavi srɔ̃ ŋu.
 9 Afetɔ be: “Ðe nyemabia akɔnta le nu siawo ta oa?
Ðe nyemabia hlɔ̃ dukɔ sia tɔgbi oa?”
10 “Miho ɖe eƒe waingblewo ŋu, eye migblẽ wo dome,
Gake migatsrɔ̃ wo keŋkeŋ o.
Milã eƒe alɔdzewo ɖa le eŋu,
Elabena menye Afetɔ tɔe wonye o.
11 Elabena Israel ƒe aƒe kple Yuda ƒe aƒe la
Wɔ alakpanu ɖe ŋunye,” Afetɔ ye gblɔe.
12 “Wogbe nu le Afetɔ gbɔ, eye wole gbɔgblɔm be,
‘Mawɔ naneke mí o.
Vɔ̃ aɖeke madzɔ ɖe mía dzi o;
Eye míakpɔ yi alo dɔwuame kple ŋku o.’
13 Nyagblɔɖilawo zu tofloko,
Eye nya la mele wo me o.
Nenɔ na wo alea!”
14 Eya ta ale aʋakɔwo ƒe Afetɔ gblɔe nye esi:
“Esi ame siawo le nya sia gblɔm ta la,
Kpɔ ɖa, mana nye nya siwo le nuwò la nazu dzo,
Dukɔ sia azu nake,
Eye wòafiã wo.”
15 Afetɔ be: “Oo, Israel ƒe aƒe, kpɔ ɖa, makplɔ dukɔ aɖe tso didiƒe ava ƒo ɖe mia dzi.
Dukɔ ma li tso gbe aɖe gbe ke.
Enye blemadukɔ,
Eye wònye dukɔ si ƒe gbegbɔgblɔ mènya o,
Eye màte ŋu ase woƒe nuƒoƒo gɔme hã o.
16 Woƒe daku le abe yɔdo si le nuvo ene;
Wo katã wonye aʋakalẽtɔwo.
17 Woaɖu nu siwo nèŋe kple wò abolo siaa.
Woavuvu viwòŋutsuwo kple viwònyɔnuwo.
Woaɖu wò alẽwo kple wò nyiwo.
Woaɖu wò wainka kple wò gboti.
Woatsɔ yi atsrɔ̃ wò du sesẽ siwo ŋu nèle dzi ɖom ɖo la.”
18 “Ke le ŋkeke mawo me gɔ̃ hã la, nyematsrɔ̃ mi ɖa keŋkeŋ o,” Afetɔ ye gblɔe. 
19 “Eye ne wobia be, ‘Nu ka tae Afetɔ mía Mawu wɔ nu siawo katã mí ɖo?’ hã la, nàɖo eŋu na wo be, ‘Ale si ko miegblẽm ɖi, eye miesubɔ dutamawu le miaƒe anyigba dzi la, nenema kee miasubɔ dukɔ bubu me tɔwo le anyigba si menye mia tɔ o la hã dzi.’”
20 Migblɔe le Yakob ƒe aƒe la me,
Eye miɖe gbeƒãe le Yuda be:
21 “Dukɔ tsibome manyanu, mise nya sia:
Ŋku li na wo gake womekpɔa nu o;
To li na wo gake womesea nu o.
22 Afetɔ be, ‘Ðe miagbem vɔvɔ̃,
Eye miadzo nyanyanya le tanye oa?
Nyee tsɔ ke do liƒo na atsiaƒu,
Wònye ɖoɖo mavɔ si dzi magbɔ o.
Ne eƒe tsotsoewo le mimlim hã la, womate ŋui o;
Eye ne wodze agbo hã la, womate ŋu agbɔ edzi ayi o.
23 Ke dzi dzeaglã sẽto le dukɔ sia si;
Wote ɖe aga helé woawo ŋutɔwo ƒe mɔ tsɔ.
24 Ke womegblɔ le woƒe dzi me be,
“Azɔ mina míavɔ̃ Afetɔ mía Mawu,
Ame si nana tsi dzana,
Eye wònaa keletsi kple adatsi ɖe edzaɣi,
Ame si kpɔa nuŋeɣi ƒe kwasiɖawo ta na mí la” o.
25 Miaƒe vodadawoe gblẽ nu siawo me na mi;
Eye miaƒe nu vɔ̃woe te nu nyui mi.
26 Elabena ame vɔ̃ɖiwo le nye dukɔ la dome.
Wole adeklo dzi abe ale si xevimɔ̃trelawo nɔa adeklo dzi ene.
Wotre mɔ̃ vɔ̃ da ɖi.
Amegbetɔwoe woɖe.
27 Ale si xewo yɔa xadza me fũu la,
Nenemae alakpadada yɔ woƒe xɔwo me fũu.
Esia tae ŋusẽ ɖo wo ŋu, eye wozu kesinɔtɔwo.
28 Woda ami, eye wo ŋuti zrɔ̃ dredredre;
Nu vɔ̃ɖi wɔwɔ yɔ wo gbagba.
Womexɔa tsyɔ̃evi ƒe nya ɖe akɔ,
Ne nu nadze edzi na wo o;
Eye womedrɔ̃a nya dzɔdzɔe na ame dahewo o.’”
29 Afetɔ be: “Ðe nyemabia akɔnta le nu siawo ta oa?”
“Ðe nyemabia hlɔ̃ dukɔ sia tɔgbi oa?
30 Wowɔ ŋɔdzinu kple ŋunyɔnu le anyigba la dzi:
31 Nyagblɔɖilawo gblɔa alakpanya ɖi;
Eye nunɔlawo zãa woƒe ŋusẽ tsɔ ɖua aƒetɔ ɖe amewo dzi.
Eye wòdze nye dukɔ ŋu alea.
Ke nu kae miawɔ ne nuwuwu la va?”

YEREMIYA 6
1  Benyamin viwo lee! Misi tso Yerusalem miayi aɖadi sitsoƒe.
Miku lãdzo le Tekoa;
Eye misi dzokakati ɖe Bet-Hakerem!
Elabena vɔ̃ gbɔna, ɛ̃, gbegblẽ gã aɖe ho tso dziehe gbɔna.
 2 Zion vinyɔnu la ɖi nyɔnu dzetugbe si wowɔ vi na.
 3 Lãkplɔviwo kple woƒe lãhawo aho va.
Woatu woƒe agbadɔwo ɖe eŋu godoo,
Wo dometɔ ɖe sia ɖe ƒe lãha le gbe ɖum le eƒe kpɔkplɔ te.
 4 “Midzra ɖo ne míaho aʋa ɖe eŋu!
Mitso míaɖadze edzi le ŋdɔkutsu dzatsɛ!”
“Baba na mí, elabena zã do vɔ,
Elabena ɣetrɔ ƒe vɔvɔli le kekem ɖe enu!”
 5 “Mitso míaɖadze edzi le zã me,
Ne míagbã eƒe mɔ́ sesẽwo.”
 6 Elabena ale aʋakɔwo ƒe Afetɔ gblɔe nye esi:
“Milã atiwo, eye miƒu kpo ɖe Yerusalem ŋu.
Eyae nye du si woabia akɔntae.
Ameteteɖeanyi ɖeɖe sɔŋ koe yɔe.
 7 Ale si vudo nana eme tsi fanae la,
Nenemae wòna eƒe nu vɔ̃ɖi wɔwɔ fa ɖii.
Wose ŋutasesẽ kple gbegblẽ ŋkɔ le eme;
Dɔléle kple dɔvɔ̃ le ŋkunyeme ɖaa.
 8 Oo Yerusalem, kpɔ ɖokuiwò dzi nyuie, ne menye nenem o la, wò nu anyɔ ŋu nam matrɔ ɖa le ŋuwò;
Mawɔ wò gbegbe kple anyigba ɖigbɔlo.”
 9 Ale aʋakɔwo ƒe Afetɔ gblɔe nye esi:
“Woaxa Israel ƒe ame susɔeawo abe ale si woxaa waintsetse mlɔeawoe ene.
Gado wò asi ɖa abe ame si le waintsetse xam le wainka ŋu ene.”
10 “Ame kae maƒo nu na ahaxlɔ̃ nui?
Ame kae aɖo to?
Kpɔ ɖa! Woƒe to me xe, eya tae womeléa to ɖe nya ŋu o.
Kpɔ ɖa! Afetɔ ƒe nya zu alɔmeɖenu na wo;
Medoa dzidzɔ na wo o.
11 Eya ta Afetɔ ƒe dɔmedzoe yɔm fũu,
Eléle ɖe dɔme tim.”
“Trɔe kɔ ɖe ɖeviwo dzi le ablɔ me
Kple ɖekakpui siwo kpe ta la dzi,
Na wòakɔ ɖe ŋutsu kple srɔ̃a,
Ame tsitsi kple amegãɖeɖi siaa dzi.
12 Woatsɔ woƒe aƒewo ana ame bubuwo
Hekpe ɖe woƒe agblewo kple wo srɔ̃wo ŋu.
Elabena mado nye asi ɖe anyigba la dzi nɔlawo ŋu,” Afetɔ ye gblɔe.
13 “Elabena wo katã woklẽa ŋu ɖe viɖe madzɔmadzɔ kpɔkpɔ ŋuti, tso ɖeviwo dzi va se ɖe tsitsiawo dzi;
Tso nyagblɔɖilawo dzi va ɖo nunɔlawo dzi, wo katã wotafaa ame.
14 Wole nye dukɔ la ƒe gbagbãƒe ɖɔm ɖo ɖewoɖewoe le gbɔgblɔm be,
‘Ŋutifafa li! Ŋutifafa li!’
Evɔ ŋutifafa aɖeke meli hafi o.
15 Ðe ŋunyɔnu si wowɔ la na ŋukpe lé woa?
Ŋu mekpe wo kura o!
Womenya ale si woana woƒe mo natsi dãa gɔ̃ hã o!
Eya ta woatsi aʋatsilawo dome,
Ne mehe to na wo la, woakli nu,” Afetɔ ye gblɔe.
16 Ale Afetɔ gblɔe nye esi:
“Mitɔ ɖe mɔdogoeƒewo, miakpɔ nu.
Mibia blemamɔwo ta se,
Mibia afi si mɔ nyuitɔ la le, ne miato edzi,
Ne miakpɔ gbɔdzɔe,”
Gake wogblɔ be: “Míele edzi to ge o.”
17 “Meɖo gbetakpɔlawo ɖe mia nu, ame siwo gblɔ be,
‘Milé to ɖe lãdzo ƒe ɖiɖi ŋu!’”
Gake wogblɔ be: “Míele to lé ge ɖe eŋu o.”
18 “Eya ta mi dukɔwo, misee!
Eye mi amehawo,
Midze si nu si gbɔna dzɔdzɔ ge ɖe wo dzi.
19 Oo anyigba, see!
Mahe gbegblẽ ava dukɔ sia dzi
Wòanye woƒe tame vɔ̃ ɖoɖowo me tsonu,
Elabena womelé to ɖe nye nyawo ŋu o,
Eye wogbe nye se la.”
20 “Nu kae lifi si nètsɔ tso Seba la nye nam,
Eye nu kae gbekee si tso anyigba didi aɖe dzi la awɔ nam?
Miaƒe numevɔsawo medzea ŋunye o,
Eye miaƒe vɔsawo medoa dzidzɔ nam o.”
21 Eya ta ale Afetɔ gblɔe nye esi:
“Kpɔ ɖa, maɖo nu ɖi na dukɔ sia wòakli,
Eye woaklii adze anyi,
Fofowo kple viwo siaa aklii,
Aƒelika kple eƒe zɔhɛ siaa aklii,
Eye wo katã woatsrɔ̃.”
22 Ale Afetɔ gblɔe nye esi:
“Kpɔ ɖa! Dukɔ aɖe tso dziehenyigba dzi gbɔna,
Eye woanyɔ dukɔ gã aɖe tso anyigba ƒe mlɔenuwo.
23 Woatsɔ da kple akplɔ ɖe asi.
Dukɔ si sẽa ŋuta wònye, eye womekpɔa nublanui o.
Woƒe gbe aɖi hoo abe atsiaƒu ƒe gbeɖeɖe ene,
Eye woado sɔwo.
Woabla akpa ɖe ŋuwò abe aʋawɔla ene, Oo Zion vinyɔnu.”
24 Míese eŋu nya.
Míaƒe asiwo do agblɔ.
Ŋɔdzi lé mí,
Eye míese veve abe nyɔnu si le ku lém ene.
25 Migado yi agble me o,
Eye migato mɔ dzi hã o,
Elabena yi le futɔ la si;
Ŋɔdzi li godoo.
26 Oo, nye dukɔ vinyɔnu,
Ta akpanya, eye nànɔ mimlim le dzofi me.
Xa nu eye nàfa avi hehehe abe ame si viŋutsu ɖeka hɔ̃ ku na ene,
Elabena nugblẽla la gbɔna mía dzi dze ge kpoyi.
27 “Metsɔ wò ɖo galólolae le nye dukɔ la dome,
Ne nàdo nu kpɔ tsitotsito,
Ale be nàlé ŋku ɖe woƒe zɔzɔme ŋu, eye nàdoe kpɔ.
28 Totrilawo ƒe totrilawo wo katã wonye,
Eye wonɔa ame ŋu gblẽm nɔa yiyim.
Wole abe akɔbli kple gayibɔ ene;
Wo katã wonye nu fitifiti wɔlawo.
29 Yɔxɔmeʋuwo fiã,
Gake tsumi koe do tso woƒe dzo me.
Wolóloe ʋuu gake dzodzroe,
Eye womete ŋu ɖe ame vɔ̃ɖiwo ɖa le wo dome o.
30 Woayɔ wo be klosalo si wogbe,
Elabena Afetɔ gbe wo.”

YEREMIYA 7
1  Afetɔ ƒe gbe si va na Yeremiyae nye esi: 
2 “Tsi tre ɖe Afetɔ ƒe aƒe ƒe agbo la me, eye nàɖe gbeƒã nya sia le afi ma be, ‘Mi Yudatɔ siwo katã gena ɖe agbo siawo me be miade ta agu na Afetɔ, mise Afetɔ ƒe nya. 
3 Ale aʋakɔwo ƒe Afetɔ, Israel ƒe Mawu la, gblɔe nye esi: “Miɖɔ miaƒe zɔzɔme kple miaƒe nuwɔnawo ɖo, ekema mana mianɔ teƒe sia. 
4 Migaɖo dzi ɖe alakpanyawo ŋu anɔ gbɔgblɔm be, “Afetɔ ƒe gbedoxɔ, Afetɔ ƒe gbedoxɔ, Afetɔ ƒe gbedoxɔe nye esia!’ o. 
5 Elabena ne mieɖɔ miaƒe zɔzɔme kple miaƒe nuwɔnawo ɖo vavã; ne miedrɔ̃ nya le ame kple ehavi dome ɖe eteƒe; 
6 ne miete amedzro, tsyɔ̃evi alo ahosi ɖe anyi o; ne miekɔ ʋu maɖifɔ ɖe anyi le teƒe sia o; eye miedze mawu bubuwo yome hena miaƒe gbegblẽ o la; 
7 ekema mana mianɔ teƒe sia, le anyigba si metsɔ na mia tɔgbuiwo la dzi ɖaa tegbee.”’”
8 “Ke miele dzi ɖom ɖe alakpanyawo ŋu, gake womaɖe vi aɖeke kura o. 
9 Miele fi fim, le ame wum, le ahasi wɔm, le alakpatam kam, le vɔwo sam na Baal hedze mawu bubu siwo mienya o yome tso, 
10 hafi va tsia tsitre ɖe ŋkunyeme le aƒe sia si ŋu woyɔa nye ŋkɔ ɖo la me nɔa gbɔgblɔm be, ‘Woaxɔ na mí godoo,’ evɔ miele ŋunyɔnu siawo katã wɔmaa? 
11 Ðe aƒe sia si ŋu woyɔa nye ŋkɔ ɖo la zu adzodalawo ƒe do le mia ŋkumea? Kpɔ ɖa, nye ŋutɔ mekpɔe,” Afetɔ ye gblɔe.
12 “‘Ke azɔ miyi nɔnyeƒe si nɔ Silo, afi si mena nye ŋkɔ nɔ tsã, ne miakpɔ nu si mewɔe le nye dukɔ Israel ƒe nu vɔ̃ɖi wɔwɔ ta ɖa.’
 13 Afetɔ be, ‘Miewɔa nu siawo katã, togbɔ be meƒo nu na mi zi geɖe, gake mieɖo to o, eye meyɔa mi, gake mietɔna o. 
14 Eya ta mawɔ aƒe sia si ŋu nye ŋkɔ le, si ŋu miele dzi ɖom ɖo, kple teƒe sia si metsɔ na mia kple mia tɔgbuiwo la, abe ale si tututu mewɔ Silo ene. 
15 Matsɔ mi aƒu gbe le nye ŋkuta, abe ale si ko metsɔ mia nɔvi siwo katã nye Efrayim ƒe dzidzimeviwo ƒu gbee ene.’
16 “Ke wò la, mègado gbe ɖa ɖe dukɔ sia ta o. Mègaƒo koko alo ado gbe ɖa alo aɖe kuku hã nam ɖe wo ta o, elabena nyemasee na wò o. 
17 Ðe mèle nu siwo wɔm wole le Yuda duwo me kple Yerusalem ƒe ablɔwo dzi la kpɔm oa? 
18 Viwo le nake fɔm, fofowo le dzo dom, nyɔnuwo le amɔwɔ blum, ne woamè vɔsabolo na Dziƒofianyɔnu la, eye woƒoa aha ɖi na mawu bubuwo, be woatsɔ ado dziku nam. 
19 Afetɔ be, ‘Nyee wole nu vevi wɔmee loo? Alo menye woawo ŋutɔwo boŋue le nu vevi wɔm wo ɖokui hena woƒe ŋukpe oa?’ 
20 Eya ta ale Aƒetɔ Dziɖulagã Afetɔ gblɔe nye esi, ‘Kpɔ ɖa! Matrɔ nye dziku kple nye dɔmedzoe helĩhelĩ akɔ ɖe teƒe sia dzi, ɖe amegbetɔwo, aƒemelãwo, gbemetiwo kple anyigbadzikutsetsewo dzi; abi nu, eye womatsii o.’
21 “Ale aʋakɔwo ƒe Afetɔ, Israel ƒe Mawu la, gblɔe nye esi, ‘Mitsɔ miaƒe numevɔsa kpe ɖe miaƒe vɔsa bubuwo ŋu, eye miawo ŋutɔwo miɖu lã la. 
22 Elabena gbe si gbe mekplɔ mia tɔgbuiwo tso Egipte-nyigba dzi la, nyemeƒo nu kpli wo alo de se na wo be woasa numevɔ nam alo asa vɔ bubuwo nam o. 
23 Ke boŋ nya siae metsɔ de se na wo be: “Miɖo to nye gbe, ekema manye miaƒe Mawu, eye miawo mianye nye dukɔ; mizɔ mɔ siwo ƒe se mede na mi la katã dzi, ne eme nanyo na mi.”’ 
24 Ke wogbe esese, eye womeƒu to anyi o; ke boŋ wozɔ le woawo ŋutɔwo ƒe ɖoɖowo nu, le woƒe dzimesesẽ vɔ̃ɖi la nu, ale be wotrɔ yi megbe, menye ŋgɔ o 
25 tso gbe si gbe mia tɔgbuiwo dzo le Egipte-nyigba dzi va se ɖe egbe sia. Eya ta meɖoa nye subɔla nyagblɔɖilawo katã ɖe mi, gbe sia gbe tso ŋkeke yi ŋkeke. 
26 Ke wogbe toɖoɖom, eye womeƒu to anyi o. Ke boŋ wosẽ dzi me, eye woƒe nuwɔna vɔ̃ɖi wu wo tɔgbuiwo tɔ!
27 “Àgblɔ nya siawo katã na wo, gake womaɖo to wò o; àyɔ wo, gake womatɔ na wò o. 
28 Gblɔ na wo be, ‘Esiae nye dukɔ si mesea Afetɔ woƒe Mawu ƒe gbe o, eye meɖoa to amehehe o. Nyateƒetoto nu yi, eye womegasenɛ le wo nu o.’
29 “Lũ wò ɖa si nègblẽ ɖi la nàtsɔ aƒu gbe, eye nàdzi konyifaha le togbɛ ƒeƒlewo tame, elabena Afetɔ gbe dzidzime sia eye wòagblẽ dzidzime sia si do dziku nɛ la ɖi. 
30 Afetɔ be, ‘Elabena Yuda viwo wɔ nu si nye vɔ̃ le ŋkunyeme. Woli woƒe legba nyɔŋuwo ɖe aƒe si ŋu woyɔa nye ŋkɔ ɖo la me, ne woagblẽ kɔ ɖo nɛ. 
31 Wowɔ nuxeƒewo ɖe Tofet le Hinom Vi Ƒe Bali la me, ne woatɔ dzo wo viŋutsuwo kple wo vinyɔnuwo, nu si nyemeɖo na wo o, eye meva dzi me nam kpɔ gɔ̃ hã o.’
32 “‘Eya ta kpɔ ɖa, ŋkekewo li gbɔna,’ Afetɔ ye gblɔe, ‘esime womagayɔe be Tofet alo Hinom Vi Ƒe Bali o, ke boŋ Amewubali. Elabena woaɖi ame ɖe Tofet va se ɖe esime teƒe aɖeke maganɔ anyi o. 
33 Dukɔ sia ƒe kukuawo azu nuɖuɖu na dziƒoxewo kple anyigbadzilãwo, eye ame aɖeke mado vɔvɔ̃ na wo anya wo ɖa o. 
34 Mana aseyetsotso kple dzidzɔɣli, ŋugbetɔsrɔ̃ ƒe gbe kple ŋugbetɔ ƒe gbe nu natso le Yuda duwo me kple Yerusalem ƒe ablɔwo dzi; elabena anyigba la azu gbegbe.’”

YEREMIYA 8
1  Afetɔ be: “Ɣemaɣi la, woaho Yuda-fiawo ƒe ƒuwo, eƒe amegãwo ƒe ƒuwo, nunɔlawo ƒe ƒuwo, nyagblɔɖilawo ƒe ƒuwo kple Yerusalem nɔlawo ƒe ƒuwo tso woƒe yɔdowo me. 
2 Woasia wo ɖe ɣe, ɣleti kple dziƒonu siwo katã wolɔ̃, eye wosubɔ wo hedze wo yome, eye wobia nu wo se hede ta agu na wo nu. Womaƒo wo nu ƒu o, eye womaɖi wo hã o. Woazu abe aɖu ene le anyigba dzi.”
3 “Ƒome vɔ̃ɖi sia ƒe ame susɔe siwo kpɔtɔ le teƒe siwo maka wo ahlẽ ɖo la, alɔ̃ ku wu agbe,” aʋakɔwo ƒe Afetɔ ye gblɔe.
4 “Gblɔ na wo be, ‘Ale Afetɔ gblɔe nye esi:
“Ðe woadze anyi, eye womagafɔ oa?
Ne ame ɖeka trɔ tso eƒe mɔ dzi la, ɖe ame kemɛa hã matrɔ oa?
 5 Nu ka tae dukɔ sia, si nye Yerusalem, le nuteƒemawɔmawɔ dzi ɖaa?
Woku ɖe amebeble ŋu goŋgoŋ;
Wogbe be yewomatrɔ agbɔ o.
 6 Meƒu to anyi, nɔ to ɖom, gake woƒe nuƒoƒo mele eteƒe o.
Ame aɖeke meli, si trɔ dzi me tso eƒe nu vɔ̃ɖi wɔwɔ me hegblɔ be, ‘Nu kae nye esia mewɔ?’ hã o.
Ame sia ame le nu si wɔm ame akpa gãtɔ le la wɔm, abe sɔ si lũ ɖe aʋa me ene.
 7 Damixe le dziƒo gɔ̃ hã nya eƒe azã;
Akpakpa, sagbadre kple tsãlɛ hã dzea si woƒe gbɔgbɔɣi.
Ke nye dukɔ ya menya Afetɔ ƒe ʋɔnudɔdrɔ̃ o.”’
 8 ‘Aleke wɔ mianɔ gbɔgblɔm be, “Nunyalawo míenye, eye Afetɔ ƒe se la le mía gbɔ”?
Evɔ le nyateƒe me la, agbalẽfialawo ƒe alakpanuŋlɔti trɔe wòzu aʋatso sɔŋ.
 9 Ŋukpe lé nunyalawo.
Ŋɔdzi lé wo, eye asi atu wo.
Kpɔ ɖa! Afetɔ ƒe nyae wogbe,
Ekema nunya ka gɔ̃e le wo si?
10 Eya ta matsɔ wo srɔ̃wo ana ŋutsu bubuwo,
Kple woƒe agblewo ana ame bubuwo;
Elabena wo katã wole viɖe ƒoɖi yome tim, tso ɖeviwo dzi va se ɖe tsitsiawo dzi;
Tso nyagblɔɖilawo dzi va ɖo nunɔlawo dzi la, wo katã wole nu fitifiti wɔm.
11 Wole nye dukɔ la ƒe gbagbãƒe ɖɔm ɖo ɖewoɖewoe le gbɔgblɔm be,
“Ŋutifafa li! Ŋutifafa li!”
Evɔ ŋutifafa aɖeke meli hafi o.
12 Ðe ŋunyɔnu si wowɔ la na ŋukpe lé woa?
Ŋu mekpe wo kura o!
Womenya ale si woana woƒe mo natsi dãa gɔ̃ hã o!
Eya tae woatsi aʋatsilawo dome.
Ne mehe to na wo la, woakli nu,’ Afetɔ ye gblɔe.
13 Afetɔ be, ‘Ne meƒo wo nu ƒu la, maɖe wo ɖa keŋkeŋ.
Waintsetse aɖeke manɔ wainka ŋu o, gbotsetse aɖeke manɔ gboti dzi o, eye aŋgbawo ayrɔ.
Nu siwo mana wo la age le wo si.’”
14 “Nu ka tae míegale anyinɔƒe ko?
Miƒo takpli ne míage ɖe du sesẽawo me, ne míatsrɔ̃ ɖe afi ma.
Elabena Afetɔ mía Mawu la atsrɔ̃ mí,
Etsɔ tsi si me aɖi le na mí be míano,
Elabena míewɔ nu vɔ̃ ɖe Afetɔ ŋu.
15 Míele mɔ kpɔm na ŋutifafa, ke nu nyui aɖeke meva o,
Míele mɔ kpɔm na gbedada, ke kpɔ ɖa, ŋɔdzi li!
16 Wose eƒe sɔwo ƒe gbɔgbɔ fuxefuxe tso Dan.
Eƒe sɔtsuwo ƒe xɔxlɔ̃ na
Anyigba blibo la de asi ʋuʋu me.
Wova eye woɖu anyigba la kple edzinuwo keŋkeŋ,
Du la kple emenɔlawo siaa.”
17 “Elabena kpɔ ɖa, mele dawo,
Da vɔ̃ɖiwo dɔm ɖe mia dome, siwo ŋu gbesa meɖina o,
Eye woaɖu mi,” Afetɔ ye gblɔe.
18 Naneke mate ŋu atsi nye nuxaxa nu o;
Nye dzi dze dɔ.
19 Nye dukɔ vinyɔnu ƒe ɣlidodo be woaxɔ na ye la ɖi
Tso anyigba didi aɖe dzi be:
“Ðe Afetɔ mele Zion oa?
Alo ɖe eƒe fia mele eme oa?”
“Nu ka tae wotsɔ woƒe legbawo,
Woƒe dutamawu dzodzroawo do dziku nam?”
20 “Nuŋeɣi va yi, eye dzomeŋɔli wu enu,
Ke womexɔ na mí o!”
21 Nye dukɔ vinyɔnu ƒe anyidzedze na megbã gudugudu;
Melé blanui.
Dzidzi ƒom.
22 Ðe balsam-mi aɖeke mele Gilead oa?
Alo ɖe gbedala aɖeke mele afi ma oa?
Ekema nu ka tae nye dukɔ mehaya kpɔ o?

YEREMIYA 9
1  Oo, ne ɖe nye ta anye tsi,
Eye nye ŋkuwo anye aɖatsivudo ɖe!
Anye ne mafa avi zã kple keli
Le nye dukɔ ƒe ame siwo wowu la ta!
 2 Oo, ne ɖe mɔzɔlawo ƒe dzeƒe le asinye le gbegbe ɖe!
Anye ne magblẽ nye dukɔ la ɖi adzo le wo gbɔ,
Elabena ahasiwɔlawo
Kple alakpanuwɔlawo ƒe ha wo katã wonye.
 3 Wovua woƒe aɖekawo me abe dati ene;
Alakpadada xɔ anyigba la dzi keŋ, ke menye nuteƒewɔwɔ o.
“Wotsoa nu vɔ̃ɖi wɔwɔ gbɔ yia nu vɔ̃ɖi wɔwɔ gbɔ,
Eye wogbe toɖoɖom,” Afetɔ ye gblɔe.
 4 “Mia dometɔ ɖe sia ɖe nekpɔ eɖokui dzi ɖe ehavi ŋu,
Eye mègaɖo ŋu ɖe nɔviwò gɔ̃ hã ŋu o.
Elabena nɔvi sia nɔvi nye amedeasila
Eye havi sia havi nye amegɔmezɔla.
 5 Wo dometɔ ɖe sia ɖe baa ehavi,
Wo dometɔ aɖeke metoa nyateƒe o.
Wotsɔ aʋatsokaka mla woƒe aɖe.
Wowɔ nu vɔ̃ ʋuu wòte ɖeɖi wo ŋu.
 6 Amebeble mee nèbɔbɔ nɔ.
Wogbe sidzedzem le woƒe amebeble ta,” Afetɔ ye gblɔe.
 7 Eya ta ale aʋakɔwo ƒe Afetɔ gblɔe nye esi:
“Malólo wo, eye mado wo akpɔ,
Elabena nu bubu kae magawɔ na nye dukɔ vinyɔnu la?
 8 Woƒe aɖe nye aŋutrɔ wuame si blea ame.
Ame tsɔa eƒe nu gblɔa ŋutifafanya na ehavi,
Ke edea xa ɖi le dzi me.”
 9 Afetɔ be: “Ðe nyemabia akɔnta wo le nu siawo ta oa?
Ðe nyemabia hlɔ̃ dukɔ sia tɔgbi oa?
10 Mafa avi, mafa konyi ɖe towo ta,
Eye madzi konyifaha ɖe gbegbelãnyiƒewo ta,
Elabena wofiã, ale be ame aɖeke megatoa afi ma o,
Eye womegasea lãhawo ƒe gbe o.
Dziƒoxewo kple lãwo siaa si; woʋu dzo.
11 Mana Yerusalem nazu glikpo, agbotoewo nɔƒe,
Mana Yuda duwo nazu aƒedo, eye ame aɖeke manɔ wo me o.
12 Ame kae nye nunyala, ne wòase nu sia gɔme?
Ame kae Afetɔ ke nu ƒo nu na, ne wòaɖe gbeƒãe?
Nu ka tae anyigba la tsrɔ̃?
Nu ka tae wòfiã zu gbegbe
Eye ame aɖeke megatoa edzi o?”
13 Afetɔ ɖo eŋu be: “Elabena wogblẽ nye se si metsɔ ɖo wo ŋkume la ɖi, womeɖo to nye gbe o, eye womezɔ ɖe enu o. 
14 Ke boŋ wodze woƒe dzimesesẽ kple Baal ƒe legbawo yome, abe ale si wo fofowo fia wo ene. 
15 Eya ta ale aʋakɔwo ƒe Afetɔ, Israel ƒe Mawu la, gblɔe nye esi, ‘Kpɔ ɖa, mana dukɔ sia naɖu atsa, eye makpe tsi si me aɖi le na wo woano. 
16 Maka wo ahlẽ ɖe dukɔ siwo woawo ŋutɔwo loo alo wo fofowo menya o la dome, eye maɖo yi ɖe wo yome, va se ɖe esime matsrɔ̃ wo keŋkeŋ.’
17 “Ale aʋakɔwo ƒe Afetɔ gblɔe nye esi,
‘Mise nu gɔme.
Miyɔ nyɔnu konyifahadzilawo ɖa, ne woava;
Miɖo ame ɖe nyɔnu konyifala bibiwo hã, ne woava,
18 Ne woaɖe abla ava dzi konyifaha na mí,
Ne míaƒe ŋkuwo nafa aɖatsi yoyoyo,
Eye míaƒe aɖabawo naɖuɖu tsi.
19 Elabena wose konyifaɣli le Zion be:
“Aleke wodo aƒedo mí ale!
Aleke ŋukpe lé mí ale!
Elabena míegblẽ anyigba la ɖi; eye wogbã míaƒe aƒewo ƒu anyi.”
20 Mi nyɔnuwo, mise Afetɔ ƒe nya.
Eye eƒe numenya nege ɖe to me na mi.
Mifia konyifaha sia mia vinyɔnuwo,
Eye mia dometɔ ɖe sia ɖe nefia konyifaha ehavi.
21 Elabena ku to míaƒe fesrewo nu ge ɖe eme;
Ege ɖe míaƒe mɔ́ sesẽwo me,
Ne wòatsrɔ̃ ɖeviwo ɖa le kpɔdomeewo
Kple ɖekakpuiwo ɖa le ablɔwo me.’
22 Gblɔ be, ‘Ale Afetɔ gblɔe nye esi:
“Amegbetɔwo ƒe kukuawo atsi anyi abe aɖu le agble me ene,
Woanɔ abe nuku babla si le nuŋela megbe,
Eye ame aɖeke meli aƒo wo nu ƒu o la ene.”’”
23 Ale Afetɔ gblɔe nye esi:
“Nunyala megaƒo adegbe le eƒe nunya ŋu o;
Ŋusẽtɔ megaƒo adegbe le eƒe ŋusẽ ŋu o;
Eye kesinɔtɔ megaƒo adegbe le eƒe kesinɔnuwo ŋu o.”
24 “Ke boŋ ame si ƒoa adegbe la, neƒo adegbe be,
Gɔmesese su ye si, eye yedze sim
Be nyee nye Afetɔ, Ame si nyoa dɔme, drɔ̃a ʋɔnu dzɔdzɔe hewɔa nu dzɔdzɔe le anyigba dzi;
Elabena nu siawoe dzea ŋunye,” Afetɔ ye gblɔe.
25 Afetɔ be: “Kpɔ ɖa! Ŋkekewo li gbɔna, eye mabia akɔnta ame sia ame si wotso aʋa na gake wògakpɔtɔ nye aʋamatsomatsotɔ, 
26 Egiptetɔwo, Yudatɔwo, Edomtɔwo, Amonitɔwo, Moabtɔwo kpakple logloƒlɔla siwo katã le gbegbe; elabena dukɔwo katã nye aʋamatsomatsotɔwo, eye Israel ƒe aƒe blibo la meɖe woƒe dzi ƒe boloyiwo ɖa o.”

YEREMIYA 10
1  Oo Israel ƒe aƒe, mise nya si Afetɔ gblɔ ɖe mia ŋu. 2 Ale Afetɔ gblɔe nye esi:
“Migasrɔ̃ dukɔwo ƒe mɔwo o,
Eye dziƒoŋudzesiwo megadzi ŋɔ na mi,
Le esi wodzia ŋɔ na dukɔwo ta o.
 3 Elabena dukɔwo ƒe kɔnuwo la, alakpanue.
Ati ko wonye aɖaŋudɔwɔla tso le ave me
Hetsɔ dɔwɔnu kpa.
 4 Wofaa klosalo kple sika ɖe eŋu tsɔ ɖoa atsyɔ̃ nɛ.
Wotsɔa zu kple gatagbadzɛwo klãnɛ be magamu o.
 5 Wole abe nu si wotsɔ nyaa xeviwo le aŋanyigble me ene, womeƒoa nu o;
Ðe wokɔa wo, elabena womezɔna o.
Migavɔ̃ wo o, elabena womate ŋu awɔ vɔ̃ aɖeke o,
Eye nyuiwɔwɔ aɖeke hã mele wo ŋu o.”
 6 Oo Afetɔ, ame aɖeke mede nuwò o.
Èlolo, wò ŋkɔ tri akɔ eye ŋusẽ le eŋu.
 7 Oo, dukɔwo ƒe Fia, ame kae mavɔ̃ wò o, elabena wòe dze nɛ;
Elabena le dukɔwo ƒe nunyalawo katã kple woƒe fiaɖuƒewo katã dome la
Ame aɖeke meli de nuwò o.
 8 Wo katã wonye ame mabutamewo kple bometsilawo.
Ati kpakpɛ ƒe mɔfiame nye beble sɔŋ.
 9 Wotsɔ klosalo gbabɛwo tso Tarsis vɛ, eye wotsɔ sika tso Ufaz,
Wonye aɖaŋudɔwɔla kple nutula ƒe asinudɔwɔwɔwo.
Woƒe awuwo nye ka blɔtɔ kple alẽfu si wode ama aɖabɛ dzĩtɔe.
Aɖaŋudɔwɔla bibiwoe wɔ wo katã.
10 Ke Afetɔe nye Mawu vavã.
Eyae nye Mawu gbagbe la kple Fia mavɔ.
Anyigba aʋuʋu le eƒe dziku ta,
Eye dukɔ aɖeke manɔ te ɖe eƒe dziku nu o.
11 Ale miagblɔ na woe nye esi:
“Mawu siwo mewɔ dziƒo kple anyigba o la
Nu ayi le anyigba la dzi kple dziƒoa te.”
12 Eyae nye Ame si tsɔ eƒe ŋusẽ wɔ anyigba,
Ame si tsɔ eƒe nunya ɖo anyigba wɔnu la gɔme anyi
Kple Ame si tsɔ eƒe gɔmesese keke dziƒowo me.
13 Ne eɖe gbe la,
Tsi siwo le dziƒowo dzea agbo,
Enana alilikpowo tsoa anyigba ƒe mlɔenuwo yia dzi.
Ewɔ dzikedzo na tsidzadza,
Eye wòkplɔa ya doa goe tso eƒe nudzraɖoƒewo.
14 Amegbetɔwo katã wɔa movinu ale gbegbe be sidzedze bu ɖe wo.
Ŋukpe alé ganutulawo katã le woƒe legbawo ŋu;
Elabena aʋatsoe eƒe galegba la nye,
Eye gbɔgbɔ aɖeke mele wo me o.
15 Tofloko kple dɔwɔwɔ si ŋu woaɖe alɔme le wonye.
Ne ɣeyiɣi de be woabia akɔnta wo la, wo nu ayi.
16 Yakob ƒe Gome ya mele abe nu siawo ene o,
Elabena eyae nye nuwo katã mèla,
Eye Israel ye nye eƒe domenyinu ƒe atikplɔ.
Eŋkɔe nye aʋakɔwo ƒe Afetɔ.
17 Oo, nyɔnu si woɖe to ɖo,
Fɔ agba si nèdo la le anyigba.
18 Elabena ale Afetɔ gblɔe nye esi:
“Kpɔ ɖa, fifia ya la, matsɔ anyigbadzinɔlawo aƒu gbe,
Eye mana woaxa nu.”
19 Baba nam le nye anyidzedze la ta!
Gbedada mele nye abi la ŋu o.
Megblɔ be: “Nyateƒee, dɔléle sia dze nam, ɖeko mado dzi atsɔe.
20 Wogblẽ nye agbadɔ la dome, eye wotso nye agbadɔkawo.
Vinyewo dzo le gbɔnye, eye womegali o.
Ame aɖeke megali ahe nye agbadɔ me alo atsi nye agbadɔvɔwo o.
21 Elabena lãkplɔviwo nye movitɔwo,
Eye womedi Afetɔ yome mɔ o.
Esia tae womewɔ nu nunyatɔe o,
Eye lã siwo kplɔm wole la katã ka hlẽ.”
22 Ƒu to anyi! Nya aɖe le ɖiɖim! Egbɔna!
Hoowɔwɔ gã aɖe tso dziehenyigba dzi,
Ne wòana Yuda duwo nazu gbegbe kple agbotoewo nɔƒe.
23 Oo Afetɔ, menyae nyuie be amegbetɔ ƒe mɔ mele eya ŋutɔ si me o.
Eye ŋusẽ mele amegbetɔ si be eya ŋutɔ nafia mɔ eƒe zɔzɔme o.
24 Oo Afetɔ, ɖɔm ɖo, le dzɔdzɔenyenye me,
Ke menye le wò dziku me o, ne nàgana nunye nayi o.
25 Trɔ wò dɔmedzoe ƒo ɖe dukɔ siwo metsɔa ɖeke le eme na wò o
Kple ƒome siwo meyɔa wò ŋkɔ o la dzi.
Elabena wovuvu Yakob,
Ɛ̃, woɖui, eye wole didim be yewoatsrɔ̃e ɖa keŋkeŋ,
Eye wona eƒe anyigba zu aƒedo.

YEREMIYA 11
1  Afetɔ ƒe gbe si va na Yeremiya lae nye esi:
2 “Mise nubabla sia me nyawo!
“Gblɔe na Yudatɔwo kple Yerusalem nɔlawo, 
3 eye nàgblɔ na wo be, ‘Ale Afetɔ, Israel ƒe Mawu la, gblɔe nye esi: “Aɖi ame si meɖoa to nubabla sia me nyawo o la ŋu, 
4 nya siwo ƒe se mede na mia tɔgbuiwo le gbe si gbe mekplɔ wo tso Egipte-nyigba dzi, tso galólokpo me ye nye be, ‘Miɖo to nye gbe, eye miwɔ nu siwo katã ƒe se mede na mi; ekema mianye nye dukɔ, eye manye mia Mawu, 
5 ne mawɔ atam si meka na mia tɔgbuiwo be matsɔ anyigba si dzi notsi kple anyitsi le sisim le ana wo la dzi, abe ale si wòle egbe sia ene.’”’”
Eye megblɔ be: “Oo, Afetɔ, Amen.”
6 Eye Afetɔ gblɔ nam be: “Ðe gbeƒã nya siawo katã le Yuda duwo me kple Yerusalem kpɔdomeewo be: ‘Mise nubabla sia me nyawo, eye miwɔ wo dzi. 
7 Elabena mexlɔ̃ nu mia tɔgbuiwo vevie le gbe si gbe mekplɔ wo tso Egipte-nyigba dzi va se ɖe egbe sia; mexlɔ̃a nu wo enuenu be: “Miɖo to nye gbe.” 
8 Ke womeɖo to o, eye womeƒu to anyi o, ke boŋ wo dometɔ ɖe sia ɖe zɔ le eya ŋutɔ ƒe dzimesesẽ vɔ̃ɖi la nu. Eya ta mehe nya siwo katã le nubabla sia me siwo ŋu mede se le na wo hafi womewɔ wo dzi o la va wo dzi.’”
9 Eye Afetɔ gblɔ nam be: “Yudatɔwo kple Yerusalem nɔlawo ɖo nugbe. 
10 Wotrɔ ɖe wo tɔgbui siwo gbe be yewomaɖo to nye nyawo o ƒe vodadawo ŋu. Woawo hã wodze mawu bubuwo yome hesubɔ wo. Israel ƒe aƒe kple Yuda ƒe aƒe la tu nye nu, si mebla kple wo tɔgbuiwo la. 
11 Eya ta ale Afetɔ gblɔe nye esi, ‘Kpɔ ɖa, mahe vɔ̃ ava wo dzi, eye womate ŋu asi le enu o. Ne woyɔm be maxɔ na yewo la, nyemaɖo to wo o. 
12 Eye Yuda duwo kple Yerusalem nɔlawo ayi aɖayɔ mawu siwo wosaa vɔ na be woakpe ɖe yewo ŋu, gake womate ŋu axɔ na wo le woƒe xaxaɣi la o. 
13 Elabena Yuda, wò mawuwo va sɔ gbɔ abe wò duwo ke ene, eye ale si Yerusalem ƒe ablɔwo sɔ gbɔe la, nenemae nèɖi vɔsamlekpuiwo na ŋukpenanu la, be miasa vɔ le wo dzi na Baal.’
14 “Ke wò la, mègado gbe ɖa ɖe dukɔ sia ta o. Mègaƒo koko alo ado gbe ɖa ɖe wo ta o, elabena ne wodo ɣli yɔm le woƒe xaxaɣi la, nyemaɖo to wo o.
15 Nu ka dimee nye lɔlɔ̃tɔ le le aƒenye me
Esi wo dometɔ geɖe wɔ tame vɔ̃ siwo woɖo dzi?
Ne vɔ̃ va dziwò la, ɖe woatsɔ vɔsalã kɔkɔewo atsi enua?
Ðe nàtso aseye ɣemaɣia?
16 Afetɔ yɔa wò tsã be amiti dama
Si kutsetse nyuiwo ɖo atsyɔ̃ na.
Edo dzo wòle bibim ɖe eŋu le hoowɔwɔ gã aɖe me,
Eye woŋe eƒe alɔwo.
17 “Aʋakɔwo ƒe Afetɔ, Ame si do wò la, ŋutɔ gblɔ be vɔ̃ ava dziwò le nu vɔ̃ɖi siwo Israel ƒe aƒe kple Yuda ƒe aƒe wɔ, esi wodo dzudzɔ na Baal tsɔ do dziku nam la ta.”
18 Afetɔ gblɔe nam, ne manya;
Èna mekpɔ woƒe nuwɔnawo ɣemaɣi.
19 Ke mele abe alẽvi fafa, si wokplɔ yina wuwu ge ene.
Nyemenya kura be ŋunyee woɖo tame vɔ̃ ɖo o, esi wogblɔ be:
“Mina míagblẽ ati la kple eƒe tsetse siwo le edzi la dome,
Eye míatsrɔ̃e ɖa le agbagbeawo ƒe anyigba dzi,
Ne woagaɖo ŋku eƒe ŋkɔ dzi azɔ o.”
20 Ke aʋakɔwo ƒe Afetɔ drɔ̃a ʋɔnu dzɔdzɔe;
Edzroa dzimesusuwo kple dzia me kpɔ.
Na makpɔ ale si nàbia hlɔ̃ woe la teƒe,
Elabena asiwò me metsɔ nye nya de.
21 Eya ta ale Afetɔ gblɔ ɖe Anatottɔ siwo di be yewoaɖe wò agbe ɖa hele gbɔgblɔm be, “Mègagblɔ nya ɖi le Afetɔ ƒe ŋkɔ me o, ne màgaku le mía si me o” la ŋue nye esi; 
22 ɛ̃, ale aʋakɔwo ƒe Afetɔ gblɔe nye esi: “Kpɔ ɖa, mabia akɔnta wo. Ðekakpuiwo atsi yi nu, eye wo viŋutsuwo kple wo vinyɔnuwo aku le dɔwuame ta. 
23 Ame aɖeke masusɔ na wo o, elabena mahe vɔ̃ ava Anatottɔwo dzi, le ƒe si me mabia akɔnta wo.”

YEREMIYA 12
1  Oo Afetɔ, ne metsɔ nye nya ɖo ŋkuwòme la, tɔwò dzɔna,
Ne meƒo nu kpli wò le wò ʋɔnudrɔ̃nyawo ŋu la, tɔwò dzɔna.
Gake nu ka tae ame vɔ̃ɖiwo ƒe mɔ dzea edzi na wo,
Eye ame siwo katã wɔa alakpanu la li bɔkɔɔ?
 2 Èdo wo, eye woto ke.
Wotsi hetse ku.
Èle nu na wo, ke èle adzɔge ʋĩi tso woƒe dzimesusuwo ya gbɔ.
 3 Ke wò Afetɔ, èdze sim nyuie; èkpɔam;
Èdzro nye dzi me kpɔ eye nèkpɔ be eku ɖe ŋuwò.
Ðe wo ɖe vovo, abe alẽ siwo wole wuwu ge ene,
Eye nàɖe wo ɖe aga hena wuwugbe.
 4 Ɣekaɣi anyigba la ayrɔ,
Eye nu miemiewo naƒu le gbedzi ase ɖo?
Le edzinɔlawo ƒe nu vɔ̃ɖi wɔwɔ ta
Wotsrɔ̃ lãwo kple xewo ɖa le edzi.
Elabena wogblɔ be: “Makpɔ ale si wòava nɔ na mí mlɔeba o.”
 5 Ne èke duɖime kple afɔzɔlawo, eye ɖeɖi te ŋuwò ɖe,
Ke aleke nàte ŋu ake duɖime kple sɔwo?
Ne èka ɖe ɖokuiwò dzi le ŋutifafanyigba dzi la,
Aleke nàwɔ le Yordan ƒe ave dodowo me?
 6 Elabena wò ŋutɔ nɔviwòwo, fofowò ƒemetɔwo ke hã
Wɔ alakpanu ɖe ŋuwò.
Wole ɣli dom ɖe tawò.
Mègaxɔ wo dzi se o
Ne wole nya ŋɔnɔewo gblɔm na wò gɔ̃ hã.
 7 “Megbe nu le nye aƒe gbɔ; meɖe asi le nye domenyinu ŋu.
Metsɔ ame si gbɔ nyemelɔ̃a nu le o la de asi na eƒe futɔwo.
 8 Nye domenyinu va le nam abe dzata le ave me ene.
Ele gbe tem ɖe ŋunye.
Esia tae melé fui ɖo.
 9 Nye domenyinu le nam abe xe ƒonu ŋɔŋɔe ene;
Xe ƒonu bubuwo ɖe to ɖee be yewoadze edzi.
Mi gbemelãwo katã, miva ƒo ƒu,
Ne miaɖu nu.
10 Lãkplɔvi geɖewo gblẽ nye waingble la dome;
Wonya avuzi le nye anyigba dzi.
Wona nye anyigba, si doa dzidzɔ nam la, zu gbegbe ɖeɖe sɔŋ.
11 Wona wòzu gbegbe.
Eyrɔ;
Ezu gbegbe le ŋkunyeme.
Anyigba blibo la katã zu gbegbe,
Gake meʋã dzi na ame aɖeke o.
12 Nugblẽlawo to mɔ siwo katã le gbedzi va do,
Elabena Afetɔ ƒe yi le nu ɖum tso anyigba ƒe mlɔenu yi anyigba ƒe mlɔenu.
Ŋutifafa meli na ame aɖeke o.
13 Woƒã lu, ke ŋùe woxa.
Wowɔ dɔ ʋuu ɖeɖi te wo ŋu belibeli, ke womekpɔ viɖe aɖeke o.
Ŋu akpe wo ɖe woƒe agblemenukuwo ŋu
Le Afetɔ ƒe dɔmedzoe helĩhelĩ la ta.”
14 Ale Afetɔ gblɔ ɖe aƒelika vɔ̃ɖi siwo le asi kam domenyinu si metsɔ na nye dukɔ Israel, be wòaxɔe wòanye etɔ ŋue nye esi: “Kpɔ ɖa, mele wo hom ɖa tso woƒe anyigba dzi, eye maho Yuda ƒe aƒe la ɖa le wo dome. 
15 Ke ne meho wo ɖa vɔ la, magakpɔ nublanui na wo, eye makplɔ wo agbɔe, wo dometɔ ɖe sia ɖe ayi eƒe domenyinu gbɔ, eye wo dometɔ ɖe sia ɖe ayi eƒe anyigba dzi.”
16 “Ne wosrɔ̃ nye dukɔ ƒe mɔ hetsɔ nye ŋkɔ ka atam be, ‘Zi ale si Afetɔ le agbe!’ abe ale si ko woawo hã fia nye dukɔ tsã be woatsɔ Baal aka atam ene la, ekema woaɖo wo te ɖe nye dukɔ la dome. 
17 Ke ne dukɔ mawo dometɔ aɖe gbe toɖoɖo la, ekema mahoe ɖa ahatsrɔ̃e,” Afetɔ ye gblɔe.

YEREMIYA 13
1  Ale Afetɔ gblɔ namee nye esi: “Yi nàɖaƒle aklalalidziblanu nàtsɔ abla ali dzi, ke mègadee tsi me o.” 
2 Ale meyi ɖaƒle alidziblanu la abe ale si Afetɔ gblɔe ene hetsɔ bla ali dzi.
3 Eye Afetɔ ƒe gbe gava nam zi evelia be: 4 “Tsɔ alidziblanu si nèƒle si le ali na wò la nàyi Frat-tɔsisi la nu, eye nàɣlae ɖe agado me le afi ma.” 5 Ale meyi ɖaɣlae ɖe Frat nu, abe ale si Afetɔ de se nam ene.
6 Ke le ŋkeke geɖe megbe la, Afetɔ gblɔ nam be: “Tso nàyi Frat nu, eye nàtsɔ alidziblanu si mede se na wò be nàɣla ɖe afi ma la vɛ.”
7 Ale meyi Frat nu ɖaku alidziblanu la le teƒe si meɣlae ɖo, eye kpɔ ɖa, alidziblanu la nyunyɔ; meganyo na naneke o.
8 Eye Afetɔ ƒe gbe va nam be: 9 “Ale Afetɔ gblɔe nye esi, ‘Alea kee magblẽ Yuda ƒe dada kple Yerusalem ƒe dada vivivo la mee. 
10 Dukɔ vɔ̃ɖi sia si gbe toɖoɖo nye nyawo, eye wole zɔzɔm le woƒe dzimesesẽ nu hedze mawu bubuwo yome, eye wosubɔ wo hede ta agu na wo la, hã azu abe alidziblanu sia si meganyo na naneke o la ene.’ 
11 Afetɔ be, ‘Elabena ale si ko ame tsɔa alidziblanu blaa ali dzii la, nenemae mebla Israel ƒe aƒe blibo la kple Yuda ƒe aƒe blibo la ɖe ɖokuinye ŋu ne woazu dukɔ, ŋkɔ, kafukafu kple atsyɔ̃ nam. Ke womeɖo tom o.’
12 “Eye nàgblɔ nya sia hã na wo be, ‘Ale Afetɔ, Israel ƒe Mawu la, gblɔe nye esi: “Miku wain ɖe ze gã ɖe sia ɖe me wòayɔ.”’ Ke woaɖo eŋu na wò be, ‘Ðe míenya be ele be woaku wain ɖe ze gã ɖe sia ɖe me wòayɔ oa?’ 
13 Ekema nàgblɔ na wo be, ‘Ale Afetɔ gblɔe nye esi: “Kpɔ ɖa, matsɔ ahamumu ayɔ anyigba sia dzi nɔlawo katã, fia siwo bɔbɔ nɔ David ƒe fiazikpui dzi, nunɔlawo, nyagblɔɖilawo kple Yerusalem nɔlawo katã fũu.”’ 
14 Afetɔ be: “Maxlã wo ɖe wo nɔewo, fofowo kple viwo siaa. Nye dɔme matrɔ ɖe wo ŋu o, nyemase veve ɖe wo nu o, eye nyemakpɔ nublanui na wo agbe wo tsɔtsrɔ̃ o.”
15 Misee, eye miƒu to anyi.
Miganɔ mia ɖokuiwo dom ɖe dzi o, elabena Afetɔ ye ƒo nu.
16 Mitsɔ ŋutikɔkɔe na Afetɔ mia Mawu la
Hafi wòava na viviti nado,
Hafi miaƒe afɔwo nava nɔ nu klim le towo dzi le anyinutsyɔɣi.
Mianɔ mɔ kpɔm na kekeli,
Ke ana viviti nado;
Eye wòana wòazu blukɔ tsiɖitsiɖi.
17 Ke ne miegbe esese la,
Ekema mafa avi le ɣaɣlaƒe le miaƒe dada ta.
Mafa avi hehehe, eye nye ŋkuwo afa aɖatsi yoyoyo,
Elabena wokplɔ Afetɔ ƒe lãha la yi aboyo me.
18 Gblɔ na fia la kple nyɔnufia la be, ‘Mibɔbɔ nɔ teƒe si bɔbɔ ɖe anyi wu
Elabena miaƒe atsyɔ̃fiakuku la age le ta na mi.’
19 Wotu anyieheduwo ƒe agbowo, ale be ame aɖeke meʋua wo o.
Woɖe aboyo Yuda blibo la, woɖe aboyoe keŋkeŋ.
20 Fɔ mo dzi nàkpɔ ame siwo tso dziehe gbɔna ɖa.
Afi kae lãha si wotsɔ na wò, wò alẽha nyo la le?
21 Nya kae nàgblɔ ne wò tohehe la
Tso xɔlɔ̃ vevi siwo nèdze tso gɔmedzedzea me ke gbɔ?
Ðe màse veve abe nyɔnu si le ku lém ene oa?
22 Eye ne ègblɔ le wò dzi me be, ‘Nu ka tae nu siawo dzɔ ɖe dzinye ɖo?’ la,
Nyae be wò vodada gbogboawo tae woklo avɔ le ŋuwò,
Eye wò afɔkpodzi se veve vevie ɖo.
23 Ðe Kustɔ ate ŋu atrɔ eƒe ŋutigbalẽa, alo ɖe lãklẽ ate ŋu atrɔ eƒe agbalẽ ŋɔtaŋɔta la?
Ne woate ŋui la, ekema mi, ame siwo wofia nu vɔ̃ɖi wɔwɔ la,
Miawo hã miate ŋu awɔ nu nyui.
24 Eya ta maka mi ahlẽ abe tsro si gbegbeya lɔ ɖe nu ene.
25 Afetɔ be: “Esiae nye tɔwò gome si medzidze na wò,
Elabena èŋlɔm be, eye nèɖoa dzi ɖe aʋatsokaka ŋu.
26 Eya ta maklo avɔ le ŋuwò akɔ ɖe mo na wò,
Eye woakpɔ wò ŋukpeƒe,
27 Wò ahasiwɔwɔ, wò gbetete le fieŋufieŋu ta,
Wò gbolowɔwɔ nyɔŋu la hã adze.
Mekpɔ wò ŋunyɔnuawo
Le togbɛwo dzi kple gbe me siaa.
Oo Yerusalem, baba na wò!
Va se ɖe ɣekaɣie ŋuwò agbe kɔkɔ?”

YEREMIYA 14
1  Esiae nye Afetɔ ƒe gbe si va na Yeremiya le kuɖiɖi ŋuti:
 2 Yuda le konyi fam, eye eƒe agbowo nyunyɔ.
Wolé blanui hebɔbɔ nɔ anyigba,
Eye ɣli de dzi le Yerusalem.
 3 Woƒe amegãwo dɔ woƒe subɔviwo ɖe tsiduƒe.
Wova tsiʋeawo gbɔ, gake womekpɔ tsi aɖeke o.
Wotrɔ gbɔ kple woƒe ze ƒuƒluwo.
Ŋukpe lé wo, woƒe mo tsi dãa,
Eye wotsyɔ nu ta.
 4 Esi anyigbaa fe kplokplokplo
Le esi tsi megadza ɖe anyigba dzi kpɔ o ta la,
Ŋu kpe agbledelawo eye wotsyɔ nu ta.
 5 Zinɔ le gbe me ke hã dzi vi gblẽ ɖi,
Elabena gbe meli o.
 6 Gbetedziwo tsi tsitre ɖe togbɛ ƒeƒlewo tame.
Wole ya nom abe agbotoewo ene;
Nu te woƒe ŋkuwo ŋu, elabena gbe aɖeke meli o.
 7 Togbɔ be míaƒe vodadawo le ɖase ɖim le mía ŋu hã la,
Oo Afetɔ, wɔ nane le wò ŋkɔ la ta.
Elabena míaƒe nuteƒemawɔmawɔ sɔ gbɔ,
Ŋuwòe míewɔ nu vɔ̃ ɖo.
 8 Oo, Israel ƒe mɔkpɔkpɔ, eƒe Xɔnametɔ le xaxaɣi,
Nu ka tae nèzu abe amedzro ene le anyigba la dzi,
Abe mɔzɔla si va be yeatsi adɔ ko ene?
 9 Nu ka tae nèzu abe ŋutsu si nu ɖi ɖo
Kple kalẽtɔ si mate ŋu axɔ na ame o ene?
Oo Afetɔ, wònye èle mía dome,
Eye woyɔ wò ŋkɔ ɖe mía ŋu hafi.
Mègagblẽ mí ɖi o.
10 Ale Afetɔ gblɔ le dukɔ sia ŋue nye esi: “Wolɔ̃a tsaglãlatsatsa; womekpɔ woƒe zɔzɔme dzi o. Eya ta woƒe nu medze Afetɔ ŋu o. Azɔ aɖo ŋku woƒe vodada dzi, eye wòabia akɔnta wo ɖe woƒe nu vɔ̃wo ta.”
11 Eye Afetɔ gblɔ nam be: “Mègado gbe ɖa ɖe dukɔ sia ta be eme nanyo na wo o. 
12 Ne wotsi nu dɔ la, nyemesea woƒe kokoƒoƒo o; eye ne wosa numevɔ kple nuɖuvɔ nam la, womedzea ŋunye o; elabena matsɔ yi, dɔwuame kple dɔvɔ̃ atsrɔ̃ wo.”
13 Eye megblɔ be: “Oo, Aƒetɔ Dziɖulagã Afetɔ, kpɔ ɖa, nyagblɔɖilawo le gbɔgblɔm na wo be, ‘Miele yi aɖeke kpɔ ge o, eye dɔwuame mava mia dzi o, ke boŋ ŋutifafa vavãtɔe mana mi le teƒe sia.’”
14 Eye Afetɔ gblɔ nam be: “Alakpanya sɔŋ gblɔm nyagblɔɖilawo le ɖi le nye ŋkɔ me. Nyemedɔ wo o, nyemede se na wo o, eye nyemeƒo nu kpli wo hã o. Alakpaŋutega, afakaka dzodzro, kple woƒe dzi ƒe amebeble gblɔm wole ɖi na mi. 
15 Eya ta ale Afetɔ gblɔ ɖe nyagblɔɖila siwo le nya gblɔm ɖi le nye ŋkɔ me, evɔ nyemedɔ wo o, eye wole gbɔgblɔm be yi alo dɔwuame aɖeke mava anyigba sia dzi o la, ŋue nye esi: ‘Yi kple dɔwuame ana nyagblɔɖila mawo natsrɔ̃. 
16 Eye woatsɔ ame siwo wole nya gblɔm ɖi na la aƒu gbe ɖe Yerusalem kpɔdomeewo le dɔwuame kple yi ta, eye ame aɖeke maɖi wo o—woawo ŋutɔwo, wo srɔ̃wo, wo viŋutsuwo kple wo vinyɔnuwo siaa—elabena matrɔ vɔ̃ si wodze na la akɔ ɖe wo dzi.’
17 “Eye nàgblɔ nya sia na wo be:
‘Nye ŋkuwo nefa aɖatsi zã kple keli, eye woagadzudzɔ o,
Elabena wogbã nye dukɔ vinyɔnu si nye ɖetugbui leaƒe la gudugudu,
Eye wode abi eŋu vevie.
18 Ne meyi gbe me la,
Mekpɔ ame siwo tsi yi nu le afi ma!
Eye ne meva dua me la,
Kpɔ ɖa, dɔwuame na amewo le dɔ lém!
Elabena nyagblɔɖilawo kple nunɔlawo siaa tsa tsaglãla yi anyigba si womenya o la dzi.’”
19 Ðe nègbe Yuda keŋkeŋua, alo ɖe Zion le ŋu nyɔm na wòa?
Nu ka tae nèƒo mí ale gbegbe be hayahaya megale mía ŋu o?
Míele mɔ kpɔm na ŋutifafa, ke nu nyui aɖeke meva o,
Míele mɔ kpɔm na gbedada, ke kpɔ ɖa, ŋɔdzi li!
20 Oo Afetɔ, míedze si míaƒe nu vɔ̃ɖi wɔwɔwo
Kple mía tɔgbuiwo ƒe vodadawo,
Elabena míewɔ nu vɔ̃ ɖe ŋuwò.
21 Le wò ŋkɔ la ta, mègagbe mí o;
Mègado vlo wò ŋutikɔkɔefiazikpui la o.
Ðo ŋui, eye mègatu nu, si nèbla kpli mí la o.
22 Ðe dukɔwo ƒe legba dzodzroawo dometɔ aɖe ate ŋu ana tsi nadzaa,
Alo ɖe dziƒowo ŋutɔ dzaa tsia?
Oo Afetɔ, mía Mawu, ɖe menye wòe wɔnɛ oa?
Wòe míele mɔ kpɔm na,
Elabena wòe wɔ nu siawo katã.

YEREMIYA 15
1  Eye Afetɔ gblɔ nam be: “Ne Mose kple Samuel va tɔ ɖe ŋkunyeme hã la, nyemave dukɔ sia nu o. Nya wo ɖa le ŋkunyeme. Na woadzo. 
2 Eye ne wobia wò be, ‘Afi kae míadzo ayi?’ hã la, nàɖo eŋu na wo be, ‘Ale Afetɔ gblɔe nye esi:
“Ame si dze na dɔvɔ̃ la, neyi ɖatsi dɔvɔ̃ si me!
Eye ame si dze na yi la, neyi ɖatsi yi nu!
Ame si dze na dɔwuame la, neyi ɖatsi dɔwuame si me!
Eye ame si dze na aboyo la, neyi aboyo me!”’
3 Ale Afetɔ gblɔe nye esi: “Maɖo vɔ̃ ene ƒomevi ɖe wo ŋu: Yi, ne wòawu ame, avuwo, ne woahe wo lelele ayii, dziƒoxewo kple anyigbadzilãwo, ne woaɖu wo ahatsrɔ̃ wo. 
4 Mawɔ wo woazu ŋɔdzinu na anyigbadzifiaɖuƒewo katã, le nu si Manase, Hizkiya vi, Yuda-fia wɔ le Yerusalem la ta.
 5 Oo Yerusalem, ame ka ƒe dɔmee atrɔ ɖe ŋuwò,
Ame kae ase veve ɖe nuwò,
Eye ame kae ava bia wò agbe ta ase?’
 6 Ale Afetɔ gblɔe nye esi: ‘Wogblẽm ɖi.
Wotrɔa megbe deam.
Mado nye asi ɖa ɖe wo ŋu, eye mahe gbegblẽ ava wo dzi.
Nublanuikpɔkpɔ tim azɔ.
 7 Matsɔ nugbɔnu agbɔ wo le anyigba la ƒe agbowo nu.
Maɖe vi ɖa le wo ŋu.
Matsrɔ̃ nye dukɔ la,
Le esi wogbe be yewomatrɔ tso yewoƒe mɔwo dzi o ta.
 8 Woƒe ahosiwo asɔ gbɔ wu ƒutake le ŋkunyeme.
Makplɔ nugblẽla aƒu vidada kple ɖekakpui le ŋdɔkutsu dzatsɛ.
Mahe dzimaɖitsitsi kple ŋɔdzi ava wo dzi kpoyi.
 9 Nu te nyɔnu si dzi vi adre la ŋu belibeli;
Gbɔgbɔtsixe tsi eƒo.
Eƒe ɣe ɖo to le keli me,
Ale ŋukpe lée, eye eƒe mo tsi dãa.’
‘Mana woƒe ame susɔeawo
Natsi woƒe futɔwo ƒe yi nu,’ Afetɔ ye gblɔe.”
10 Oo danye, baba nam, be nèdzim,
Nye ame si le dzre kple avu dzi kple anyigba blibo la katã.
Nyemedo nugbana o, eye ame aɖeke medo nugbana nam o;
Gake wo katã wole ɖiŋu dom nam.
11 Afetɔ be: “Mawɔ nyui na wò kokoko;
Matso wò axɔ ne gbegblẽ ƒo ɖi,
Maxɔ na wò le xaxaɣi tso futɔ la si me godoo.
12 Ðe woate ŋu aŋe gayibɔ,
Gayibɔ si tso dziehe, kple akɔbli kakɛkakɛa?
13 Mana woaha wò nu xɔasiwo kple wò kesinɔnuwo femaxee
Le nu vɔ̃ siwo katã nèwɔ le wò anyigbawo katã dzi la ta.
14 Matsɔ wo ana wò futɔwo
Ne woalɔ wo ayi anyigba si mènya o la dzi.
Elabena nye dziku fla abe dzo ene,
Eye mia ŋue wòle bibim ɖo.”
15 Ènyae, Oo Afetɔ,
Ðo ŋku dzinye, trɔ ɖe ŋunye,
Eye nàbia hlɔ̃ yonyemetilawo nam.
Mègana nunye nayi le wò dzigbɔgbɔ blewu ta o.
Ðo ŋui be tawòe ŋukpe sia le dzinye ɖo.
16 Esi wò nyawo ka asinye la, meɖu wo;
Eye wò nya la na nye dzi kpɔ dzidzɔ hetso aseye,
Elabena wò ŋkɔe woyɔ ɖe ŋunye, Oo aʋakɔwo ƒe Afetɔ.
17 Nyemebɔbɔ nɔ dzidzɔkpɔlawo ƒe ha me le aseye tsom o.
Nye ɖeka mebɔbɔ nɔ aga le wò alɔ ta,
Elabena ètsɔ dziku yɔ menye fũu.
18 Nu ka tae nye vevesese li ɖaa, eye nye abi gbe kuku?
Woda gbe le eŋu do kpoe.
Ðe nànɔ nam abe tɔʋu si blea ame
Si ŋu womate ŋu aɖo ŋu ɖo o enea?
19 Eya ta ale Afetɔ gblɔe nye esi:
“Ne ètrɔ ɖe ŋunye la, magaɖo wò te,
Àsubɔ le ŋkunyeme.
Eye ne èɖe nu xɔasi ɖe aga tso nu maɖinuwo gbɔ la,
Ekema àzu nye nù.
Woatrɔ ɖe ŋuwò,
Ke wò ya màtrɔ ɖe wo ŋu o.”
20 “Mawɔ wò nànye akɔbligli sesẽ na dukɔ sia.
Woawɔ avu kpli wò,
Gake womanɔ te ɖe nuwò o.
Elabena meli kpli wò, be maxɔ na wò, eye maɖe wò,” Afetɔ ye gblɔe.
21 “Maɖe wò tso ame vɔ̃ɖiwo si me,
Eye maxɔ wò le ŋutasẽlawo si me.”

YEREMIYA 16
1  Afetɔ ƒe gbe gava nam be:
2 “Mègaɖe srɔ̃ o, eye mègadzi ŋutsuviwo kple nyɔnuviwo ɖe teƒe sia o. 
3 Elabena ale Afetɔ gblɔ ɖe ŋutsuvi kple nyɔnuvi siwo dzim wole ɖe teƒe sia, kple wo dada siwo dzi wo kpakple wo fofo siwo dzi wo ɖe anyigba sia dzi la ŋue nye esi:
4 ‘Dɔvɔ̃ awu wo, womafa na wo o, eye womaɖi wo hã o; woazu abe aɖu ene le anyigba la dzi. Yi kple dɔwuame atsrɔ̃ wo, eye woƒe kukuawo azu nuɖuɖu na dziƒoxewo kpakple anyigbadzilãwo.’
 5 Elabena ale Afetɔ gblɔe nye esi,
‘Mègayi aƒe si me konyifalawo ɖo nuɖukplɔ̃ ɖo o,
Eye mègayi ɖafa konyi ahado baba na wo o.’
‘Elabena meɖe nye ŋutifafa
Kple amenuveve kpakple nublanuikpɔkpɔ ɖa le dukɔ sia dzi,’ Afetɔ ye gblɔe.
 6 Amegãwo kple ame tsɛwo siaa aku ɖe anyigba sia dzi.
Ame aɖeke maɖi wo loo,
Alo afa na wo o,
Eye ame aɖeke masi eɖokui alo alũ ta kokoe le wo ta o.
 7 Ame aɖeke mana nuɖuɖu konyifalawo
Atsɔ afa akɔ na wo le ame si ku na wo la ta o;
Eye ame aɖeke mana akɔfakplu si me aha le hã wo
Woano le wo fofo alo wo dada ƒe ku ta o.
 8 Eye mègayi aglotuƒe
Ne nàbɔbɔ nɔ anyi aɖu nu ahano nu kpli wo o.’
9 “Elabena ale aʋakɔwo ƒe Afetɔ, Israel ƒe Mawu la, gblɔe nye esi, ‘Kpɔ ɖa, mana aseyetsotso kple dzidzɔɣli, ŋugbetɔsrɔ̃ ƒe gbe kple ŋugbetɔ ƒe gbe nu natso le teƒe sia le mia ŋkume le mia ŋɔli.’
10 “Ne ègblɔ nya siawo katã na dukɔ sia, eye wobia wò be, ‘Nu ka tae Afetɔ gblɔ vɔ̃ gã sia katã ɖe mía ŋu? Vo kae míeda, eye nu vɔ̃ kae míewɔ ɖe Afetɔ mía Mawu la ŋu?’ hã la, 
11 Ekema nàɖo eŋu na wo be, ‘Ale Afetɔ gblɔe nye esi: “Elabena mia tɔgbuiwo gblẽm ɖi, eye wodze mawu bubuwo yome, wosubɔ wo hede ta agu na wo. Ke wogblẽm ɖi, eye womelé nye se la me ɖe asi o. 
12 Ke miawo miewɔ nu gbegblẽ wu mia tɔgbuiwo, eye mia dometɔ ɖe sia ɖe dze eƒe dzimesesẽ vɔ̃ɖi yome, eye miegbe toɖoɖom. 
13 Eya ta matsɔ mi aƒu gbe tso anyigba sia dzi aɖo ɖe anyigba si mia tɔgbuiwo loo alo miawo ŋutɔwo mienya o la dzi, eye miasubɔ mawu bubuwo le afi ma zã kple keli, elabena nyemave mia nu o.”’
14 “Afetɔ be, ‘Gake ŋkekewo li gbɔna, esime womagagblɔ azɔ be, “Zi ale si Afetɔ, ame si kplɔ Israel-viwo tso Egipte-nyigba dzi la le agbe!” o, 
15 ke boŋ woagblɔ be: “Zi ale si Afetɔ, ame si kplɔ Israel-viwo tso dziehenyigba dzi kple anyigba siwo katã dzi wòka wo hlẽ ɖo dzi la le agbe!” eye makplɔ wo agbɔe va woƒe anyigba si metsɔ na wo tɔgbuiwo la dzi.’
16 Afetɔ be: ‘Madɔ tɔƒodela geɖewo ɖa,
Eye woaɖe wo.
Emegbe madɔ adela geɖewo ɖa,
Eye woayɔ wo ɖe nu le towo kple togbɛwo katã dzi
Kpakple agatowo katã me.
17 Elabena nye ŋku le nu siwo katã wowɔna la ŋu.
Womeɣla ɖem o,
Eye woƒe vodadawo hã mele ɣaɣla ɖe nye ŋkuwo o.
18 Gbã la, maxe woƒe vodadawo kple woƒe nu vɔ̃wo ŋuti fe la katã na wo,
Elabena wotsɔ woƒe legba nyɔŋu siwo me agbe mele o la, gblẽ kɔ ɖo na nye anyigba la.
Eye wotsɔ woƒe ŋunyɔnuwo yɔ nye domenyinu la dzi fũu.’”
19 Oo Afetɔ, nye ŋusẽ kple nye mɔ́ sesẽ,
Nye sitsoƒe le xaxagbe,
Gbɔwòe dukɔwo atso anyigba ƒe mlɔenuwo ava
Eye woagblɔ be: “Alakpa,
Tofloko kple nu maɖinuwo sɔŋ koe mía tɔgbuiwo tsɔ nyi domee.”
20 Ðe amegbetɔ ate ŋu awɔ mawuwo na eɖokui
Esime womenye mawu aɖeke oa?
21 “Eya ta mana woadze sii,
Azɔ mana woadze si nye ŋusẽ kple nye ŋutete,
Eye woadze sii be ŋkɔnyee nye Afetɔ.”

YEREMIYA 17
1  “Wotsɔ ganuŋlɔnu ŋlɔ Yuda ƒe nu vɔ̃ ɖi.
Wotsɔ lotamekpe tsutsuẽ ɖee ɖe woƒe dzi dzi
Kple woƒe vɔsamlekpuiwo ƒe dzowo ŋu.
 2 Esime wo viwo hã ɖo ŋku woƒe vɔsamlekpuiwo kple woƒe Asera*
Siwo le ati damawo te, kple togbɛ kɔkɔwo
 3 Kpakple to siwo le anyigbaa dzi.
Matsɔ wò nunɔamesiwo, wò kesinɔnuwo katã, ana woaha,
Ɛ̃, hekpe ɖe wò nuxeƒewo ŋu le nu vɔ̃ si nèwɔ le wò anyigbawo dzi la ta.
 4 Wò ŋutɔe ɖe asi le domenyinu si metsɔ na wò la ŋu.
Mana nàsubɔ wò futɔwo le anyigba si mènya o la dzi,
Elabena èna nye dɔmedzoe bi abe dzo ene.*
Anɔ bibi dzi ɖaa.”
 5 Ale Afetɔ gblɔe nye esi:
“Aɖi ŋutsu* si ɖoa ŋu ɖe amegbetɔ dzro ŋu,
Eye wòɖoa dzi ɖe amegbetɔ ƒe ŋusẽ ŋu,*
Eye eƒe dzi te ɖa xaa tso Afetɔ gbɔ la, ŋu kpékpekpe.
 6 Anɔ abe ati ɖekɛ le tagba ene.
Ne nyui va la, makpɔe o,
Ke boŋ anɔ teƒe siwo ƒu kplakplakpla le gbegbe
Kple dzenyigba si dzi ame mele o dzi.
 7 Woayra ŋutsu* si ɖoa ŋu ɖe Afetɔ ŋu,
Ame si tsɔ Afetɔ wɔ eƒe nu ɖoŋuɖeŋua.
 8 Anɔ abe ati si wodo ɖe tɔ to,
Eye wòɖea ke ɖe tɔʋu ŋu la ene.
Ne dzoxɔxɔ va la, masee o,
Ke boŋ eƒe aŋgbawo ada ama.
Matsi dzimaɖi le ƒe si me ku ɖi o,
Eye madzudzɔ tsetse hã o.
 9 Ame ƒe dzi la, alakpatɔ* wònye wu nuwo katã, eye enu menya léna o.*
Ame kae ate ŋu adze sii?
10 Nye, Afetɔ, medzroa dziwo me,
Eye medoa dzimesusuwo* kpɔna,
Ne maɖo eteƒe na ame sia ame ɖe eƒe zɔzɔme nu,
Ðe eƒe nuwɔnawo me tsonuwo nu.
11 Ame si le kesinɔnuwo nu ƒom ƒu to mɔ fitifiti dzi* la,
Le abe tegli si ƒoa azi siwo menye eya ŋutɔe ɖa wo o la nu ƒu ene.
Woagblẽe ɖi le eƒe agbemeŋkekewo ƒe domedome,
Eye le eƒe nuwuwu la, azu bometsila.”
12 Ŋutikɔkɔefiazikpui si wodo ɖe dzi tso gɔmedzedzea me ke
Lae nye míaƒe kɔkɔeƒe ƒe nɔƒe la.
13 Oo Afetɔ, Israel ƒe mɔkpɔkpɔ,
Ame siwo katã gblẽa wò ɖi la aɖu ŋukpe.
Woaŋlɔ ame siwo de megbe le ŋuwò* la ƒe ŋkɔ ɖe kewɔ me,
Elabena wogblẽ Afetɔ, agbetsivudo la ɖi.
14 Oo Afetɔ, da gbe le ŋunye, ekema mahaya.
Xɔ nam, ekema makpɔ xɔxɔ,
Elabena wòe mekafuna.
15 Kpɔ ɖa! Amewo le gbɔgblɔm nam be:
“Afi kae Afetɔ ƒe nya la le?
Neva dzro!”
16 Ke nyemegbe be maganye lãkplɔvi le yowòme o,
Eye ŋkeke vɔ̃e la medzrom o.
Wò ŋutɔ ènya nya siwo nye nuyiwo gblɔ la;
Ŋkuwòmee megblɔ wo katã le!
17 Mèganye ŋɔdzi nam o.
Wòe nye nye sitsoƒe le vɔ̃dzɔgbe.
18 Na ŋu nakpe yonyemetilawo,
Ke megana ŋu nakpem o.
Na ŋɔdzi nalé wo,
Ke megana ŋɔdzi nalém o.
He gbegblẽ ƒe ŋkeke la va wo dzi,
Gbã wo gudugudu eye nàtsrɔ̃ wo keŋkeŋ.*
19 Ale Afetɔ gblɔ nam ye nye esi: “Yi ɖatɔ ɖe dukɔ la me viwo ƒe agbo si nu Yuda-fiawo tona yina gbɔna kple Yerusalem ƒe agbowo katã me. 
20 Eye nàgblɔ na wo be, ‘Mi Yuda-fiawo kple Yuda blibo la katã kpakple mi Yerusalem nɔlawo katã, mi ame siwo toa agbo siawo nu gena ɖe eme, mise Afetɔ ƒe nya. 
21 Ale Afetɔ gblɔe nye esi: “Mikpɔ mia ɖokuiwo* dzi nyuie, eye migatsɔ agba aɖeke to Yerusalem ƒe agboawo nu age ɖe eme le Sabat ŋkeke dzi o. 
22 Migatsɔ agba aɖeke do goe le miaƒe aƒewo me le Sabat ŋkeke dzi o; eye migawɔ dɔ aɖeke o. Miwɔ Sabat ŋkeke la kɔkɔe, abe ale si mede se na mia tɔgbuiwo ene. 
23 Gake womeɖo to alo ƒu to anyi o, ke boŋ wodze aglã,* wogbe toɖoɖo, eye wodo toku amehehe.”’
24 “‘Afetɔ be: “Ne mieɖo tom, eye mietsɔ agba aɖeke to du sia ƒe agbowo nu ge ɖe eme le Sabat ŋkeke dzi o, eye miekɔ Sabat ŋkeke la ŋu, miewɔ dɔ aɖeke le edzi o la, 
25 ekema fiawo kple amegãwo, ame siwo bɔbɔ nɔ David ƒe fiazikpui dzi la, aɖo tasiaɖam, eye woawo kple woƒe amegãwo, Yuda ŋutsuwo kple Yerusalem nɔlawo woado sɔ ato du sia ƒe agbowo nu age ɖe eme; eye amewo anɔ du sia me tegbee. 
26 Amewo atso Yuda duwo kple teƒe siwo ƒo xlã Yerusalem, tso Benyamin-nyigba dzi, tso bali me, tso tonuto la me kple Negeb, eye woatsɔ numevɔsawo, vɔsa bubuwo, nuɖuvɔsawo, lifi kple akpedavɔsawo ava Afetɔ ƒe aƒe la me.
27 “‘“Ke ne miegbe toɖoɖom, eye miekɔ Sabat ŋkeke la ŋu o, ke boŋ mietsɔ agba to Yerusalem ƒe agbowo nu le Sabat ŋkeke dzi la, ekema matɔ dzo Yerusalem ƒe agbowo eye wòafiã eƒe mɔ́ sesẽwo, eye womatsii o.”’”

YEREMIYA 18
1  Afetɔ ƒe gbe si va na Yeremiya ye nye esi: 2 “Tso nàyi zemela ƒe aƒe me, eye mana nàse nye nyawo le afi ma.”
3 Ale meyi zemela ƒe me, eye kpɔ ɖa, ele dɔ wɔm le zemenu dzi. 
4 Gake ze si zemela la tsɔ tsu le mèmem la gblẽ ɖe esi me. Eya ta etsɔe wɔ ze bubui abe ale si wòdze zemela la ŋu be yeawɔ ene.
5 Eye Afetɔ ƒe gbe gava nam be: 
6 “Ale Afetɔ gblɔe nye esi, ‘Oo Israel ƒe aƒe, ɖe nyemate ŋu awɔ mi abe ale si zemela sia wɔna ene oa? Oo Israel ƒe aƒe, ale si tsu le le zemela si mee la, nenemae miele le asinye me. 
7 Ɣesiaɣi si megblɔ ɖe dukɔ alo fiaɖuƒe aɖe ŋu be mahoe ɖa, magbãe, eye matsrɔ̃e, 
8 eye dukɔ ma ɖe asi le eƒe nu vɔ̃ɖi wɔwɔ si ŋu nya megblɔ la ŋu la, ekema matrɔ susu* eye nyemagahe vɔ̃ si meɖo ɖe eŋu la ava edzi o.
 9 Ke ɣesiaɣi si megblɔ le dukɔ alo fiaɖuƒe aɖe ŋu be matsoe, eye maɖoe te, 
10 gake wòwɔ nu si nye vɔ̃ le ŋkunyeme, eye meɖo to nye gbe o la, ekema matrɔ susu* eye nyemagawɔ nyui si meɖo be mawɔ nɛ la nɛ o.’
11 “Eya ta meɖe kuku, gblɔ na Yudatɔwo kple Yerusalem nɔlawo be, ‘Ale Afetɔ gblɔe nye esi: “Kpɔ ɖa, meɖo gbegblẽ ɖe mia ŋu, eye meɖo nugbe ɖe mia ŋu. Meɖe kuku, mitrɔ tso miaƒe mɔ vɔ̃ dzi, eye miɖɔ miaƒe zɔzɔme kple miaƒe nuwɔnawo ɖo.”’”
12 Gake woɖo eŋu be: “Kpao! Míawɔ nu si míawo ŋutɔwo míesusu, eye mía dometɔ ɖe sia ɖe awɔ nu ɖe eƒe dzi vɔ̃ɖi kuatri la nu.”
13 Eya ta ale Afetɔ gblɔe nye esi:
“Meɖe kuku, miawo ŋutɔwo miyi ɖabia le dukɔwo dome.
Ame kae se nya siawo tɔgbi kpɔ?
Israel ɖetugbui leaƒe la wɔ ŋunyɔnu si tɔgbi meli o.
14 Ðe sno siwo le Lebanon Towo ƒe agakpewo ŋu la anyi avɔa?
Alo ɖe tsi fafɛ siwo le sisim tso didiƒe la amie keŋkeŋua?
15 Ke hã, nye dukɔ ŋlɔm be.
Elabena wosa vɔ* na nu maɖinu,
Eye wona amewo kli nu le woƒe mɔ siwo nye blematoƒewo la dzi,
Ne woazɔ mɔ dzeɖexɛ siwo dzi mezrɔ o eye wòle glidzaglidza* la dzi,
16 Ale be woƒe anyigba la nazu nu wɔmoyaa,
Kple nu si ŋu woalia aku ɖo tegbee.
Ame sia ame si ato eŋu la ƒe nu aku eye wòaʋuʋu ta.
17 Maka wo ahlẽ le futɔ la ŋgɔ abe ale si ɣedzeƒeya lɔa nu ɖe nu ene.
Gbe si gbe vɔ̃ aƒo go wo la, matrɔ megbe ade wo, ke menye ŋkume o.”
18 Ke wogblɔ be: “Miva, mina míaɖo nugbe ɖe Yeremiya ŋu, elabena se* la mabu ɖe míaƒe nunɔlawo loo, aɖaŋudede nabu ɖe nunyalawo loo, alo nya nabu ɖe nyagblɔɖilawo o. Miva míaƒo nu tsi tre ɖe eŋu,* eye míado toku nya sia nya si wòagblɔ.”
19 Oo Afetɔ, lé to ɖe ŋunye,
Eye nàse nu siwo gblɔm ame siwo tsi tre ɖe ŋunye la le.
20 Ðe woatsɔ vɔ̃ aɖo nyui teƒea?
Elabena woɖe ʋe na nye agbe.*
Ðo ŋku ale si metsi tsitre ɖe ŋkuwòme heƒo nu nyui le wo ŋu,
Be mana wò dɔmedzoe nu nafa ɖe wo ŋu la dzi.
21 Eya ta tsɔ wo viŋutsuwo de asi na dɔwuame,
Eye nàtsɔ wo ade asi na yi.
Wo srɔ̃wo ƒe viwo neku, eye wonezu ahosiwo.
Dɔvɔ̃ newu woƒe ŋutsuwo,
Eye woƒe ɖekakpuiwo netsi yi nu le aʋa me.
22 Wonese avifafa le woƒe aƒewo me
Ne èkplɔ adzohawo va ƒo ɖe wo dzi kpoyi.
Elabena woɖe ʋe be yewoatsɔ aɖem,
Eye wotre mɔ̃ na nye afɔwo.
23 Ke wò Afetɔ,
Ènya adaŋu siwo katã wode ɖe ŋunye be yewoawum la nyuie.
Mègatsyɔ nu woƒe vodada la dzi o,
Eye mègatutu woƒe nu vɔ̃ ɖa le ŋkuwòme o.
Na woakli nu le ŋkuwòme,
Ne ètso ɖe wo ŋu le wò dɔmedzoedogbe.

YEREMIYA 19
1  Ale Afetɔ gblɔe nye esi: “Yi ɖaƒle ze le zemela si, eye nàkplɔ dukɔ la ƒe ametsitsi aɖewo kple nunɔlawo ƒe ametsitsi aɖewo kpe ɖe ɖokuiwò ŋu, 
2 eye nàyi Hinom Vi Ƒe Bali, si le Zemegboa ŋgɔdze la me. Eye nàɖe gbeƒã nya siwo magblɔ na wò la le afi ma. 
3 Eye nàgblɔ be: ‘Oo, mi Yuda-fiawo kple mi Yerusalem nɔlawo, mise Afetɔ ƒe nya. Ale aʋakɔwo ƒe Afetɔ, Israel ƒe Mawu la, gblɔe nye esi:
“‘“Mahe gbegblẽ ava teƒe sia dzi, eye ame sia ame si asee la ƒe to me aɖi yeŋ. 
4 Elabena wogblẽm ɖi, eye wona nyemegakpɔ teƒe sia dze sii o. Wodo dzudzɔ na mawu bubu siwo woawo ŋutɔwo, wo tɔgbuiwo kple Yuda-fiawo menya o la le eme, eye wotsɔ ame maɖifɔwo ƒe ʋu yɔ teƒe sia fũu. 
5 Wowɔ nuxeƒewo na Baal, ne woatɔ dzo wo viwo atsɔ asa numevɔ na Baal, nu si nyemeɖo na wo alo ƒo nu tso eŋu na wo o, eye meva dzi me nam kpɔ gɔ̃ hã o.”’*
6 “Afetɔ be, ‘Eya ta kpɔ ɖa, ŋkekewo li gbɔna, esime womagayɔ teƒe sia be Tofet kple Hinom Vi Ƒe Bali azɔ o, ke boŋ Amewubali. 
7 Magblẽ Yuda kple Yerusalem ƒe ɖoɖowo me le teƒe sia, mana woatsi woƒe futɔwo ƒe yi nu, eye woatsi ame siwo le woƒe agbe* yome tim la si me. Matsɔ woƒe kukuawo ana dziƒoxewo kple anyigbadzilãwo woaɖu. 
8 Mana du sia nazu nu wɔmoyaa kple nu si ŋu woalia aku ɖo. Ame sia ame si ato eŋu la ƒe mo awɔ yaa, eye wòalia aku le eƒe fuwɔamewo katã ta. 
9 Mana woaɖu wo viŋutsuwo kple wo vinyɔnuwo ƒe lã; wo dometɔ ɖe sia ɖe aɖu ehavi ƒe lã, le esi woɖe to ɖe wo kpakple xaxa siwo ava wo dzi esime woƒe futɔwo kple ame siwo le woƒe agbe* yome tim mimi wo ɖo la ta.”’
10 “Eye gbã ze la le ŋutsu siwo yi kpli wò la ŋkume, 
11 eye nàgblɔ na wo be, ‘Ale aʋakɔwo ƒe Afetɔ gblɔe nye esi: “Aleae magbã dukɔ sia kple du siae, abe ale si wogbãa ze, eye womegatea ŋu trenɛ o la ene; woaɖi ame ɖe Tofet va se ɖe esime teƒe aɖeke maganɔ anyi woaɖi ame ɖo o.”’
12 “Afetɔ be: ‘Aleae mawɔ teƒe sia kple edzinɔlawo, eye mawɔ du sia abe Tofet ene. 
13 Yerusalem xɔwo kple Yuda-fiawo ƒe xɔwo, ɛ̃, xɔ siwo katã tame wosaa vɔwo le na dziƒonuwo katã, eye woƒoa nunovɔsawo ɖi na mawu bubuwo le la, azu nu makɔmakɔ abe Tofet ene.’”
14 Esi Yeremiya gbɔ tso Tofet, afi si Afetɔ ɖoe ɖo be wòaɖagblɔ nya ɖi le la, eva tsi tsitre ɖe Afetɔ ƒe aƒe la ƒe xɔxɔnu hegblɔ na dukɔ blibo la be: 
15 “Ale aʋakɔwo ƒe Afetɔ, Israel ƒe Mawu la, gblɔe nye esi, ‘Kpɔ ɖa, mahe gbegblẽ siwo katã ŋu nya megblɔ ɖe du sia ŋu la ava du sia kple eŋu duwo katã dzi, elabena wodze aglã hedo toku nye nyawo.’”

YEREMIYA 20
1  Ke nunɔla Pashur, Imer vi, ame si nye dzikpɔlawo ƒe tatɔ le Afetɔ ƒe aƒe la me la, nɔ to ɖom esime Yeremiya nɔ nya siawo gblɔm ɖi. 
2 Eye Pashur ƒo nyagblɔɖila Yeremiya hebɔ pãe ɖe Benyamin-gbo Dzigbetɔ, si le Afetɔ ƒe aƒea me la me. 
3 Ke esi ŋu ke eye Pashur ɖe Yeremiya le pã me la, Yeremiya gblɔ nɛ be:
“Afetɔ tsɔ ŋkɔ na wò be Ŋɔdzi Li Godoo, ke menye Pashur o. 
4 Elabena ale Afetɔ gblɔe nye esi, ‘Mana nàzu ŋɔdzi na ɖokuiwò kple xɔ̃wòwo katã, woatsi woƒe futɔwo ƒe yi nu, eye wò ŋkuwo akpɔ eteƒe; matsɔ Yuda blibo la ade asi na Babilon-fia, eye wòaɖe aboyo wo ayi Babilon ahawu wo kple yi. 
5 Matsɔ du sia ƒe kesinɔnuwo katã, eƒe nunɔamesiwo katã kple eƒe nu xɔasiwo katã ade asi, eye matsɔ Yuda-fiawo ƒe kesinɔnuwo katã ade asi na woƒe futɔwo. Woaha wo atsɔ wo ayi Babilon. 
6 Ke woaɖe aboyo wò Pashur kple aƒewòmetɔwo katã. Àyi Babilon, àku ɖe afi ma, eye afi mae woaɖi wò kple xɔ̃wòwo katã ɖo, elabena ègblɔ alakpanya ɖi na wo.’”
 7 Oo Afetɔ, èblem, eye mena woblem.
Èzã wò ŋusẽ ɖe ŋunye, eye nèkpe dzinye.
Mezu alɔmeɖenu ŋkeke blibo la katã,
Eye ame sia ame koam.
 8 Elabena ɣesiaɣi si mebe maƒo nu la, ele be manɔ ɣli dom anɔ gbeƒã ɖem be,
“Ŋutasesẽ kple adzodada!”
Elabena Afetɔ ƒe nya zu dzu kple vlododo nam ŋkeke blibo la katã.
 9 Eya ta megblɔ be, “Nyemele eŋkɔ yɔ ge o,
Eye nyemagaƒo nu le eƒe ŋkɔ me azɔ o.”
Gake enɔna abe dzobibi nue wotu nu ɖo le nye ƒuwo me ene,
Etsɔtsɔ tiam,
Eye wògloam.
10 Elabena mese nya baɖa si gblɔm ame geɖewo le;
Ŋɔdzi ƒo xlãm.
Wobe: “Miɖe egɔme ɖe go; ne míaɖe egɔme ɖe go!”
Ame sia ame si doa gbe nam be, “Ŋutifafa na wò!” la, le didim be madze anyi hegblɔna be:
“Ðewohĩ awɔ vodada gã aɖe,
Eye míakpe edzi ahabia hlɔ̃e.”
11 Ke Afetɔ li kplim abe aʋakalẽtɔ sesẽ ene.
Esia tae yonyemetilawo akli nu, eye womaɖu dzinye o.
Ŋu akpe wo vevie, elabena woado kpo nu.
Ŋukpe mavɔ, si womaŋlɔ be o lae wòanye na wo.
12 Ke wò, aʋakɔwo ƒe Afetɔ, wòe doa ame dzɔdzɔe kpɔna;
Èdzea si dzimesusuwo* kple dzi la.
Na makpɔ ale si nàbia hlɔ̃ woe la teƒe,
Elabena asiwò mee metsɔ nye nya de.
13 Midzi ha na Afetɔ! Mikafu Afetɔ!
Elabena eɖe ame dahe* tso nu vlo wɔlawo si me.
14 Aɖi ŋkeke si dzi wodzim la ŋu kpékpekpe!
Yayra meganɔ gbe si gbe danye dzim la dzi o!
15 Aɖi ame si he du nyui vɛ na fofonye be,
“Wodzi vi, wodzi ŋutsuvi na wò!”
Eye wòdo dzidzɔ nɛ la ŋu kpékpekpe.
16 Ame ma nenɔ abe du si Afetɔ trɔ bu anyi, eye mevee o la ene.
Nese ɣlidodo le ŋdi kple ŋɔdziɣli le ŋdɔkutsu dzatsɛ.
17 Nu ka tae mewum ɖe vidzidɔ me,
Ne danye nazu yɔdo nam,
Eye nye fu natsi eƒo tegbee o?
18 Nu ka tae medo tso vidzidɔ me,
Be manɔ ayaɖuɖu kple nuxaxa dzi ɖaa,
Eye nye ŋkekewo nawu enu ɖe ŋukpe me?

YEREMIYA 21
1 Afetɔ ƒe gbe va na Yeremiya, esime Fia Zedekiya dɔ Pashur, Malkiya vi, kple nunɔla Zefaniya, Maaseya vi, ɖo ɖe egbɔ ne woagblɔ nɛ bena: 
2 “Meɖe kuku, bia gbe Afetɔ na mí, elabena Babilon-fia Nebukadnezar ho aʋa ɖe mía ŋu. Ðewohĩ Afetɔ awɔ eƒe nu wɔnuku aɖe ɖe mía nu, ne wòaho adzo le mía gbɔ.”
3 Yeremiya gblɔ na wo be: “Ale miagblɔ na Zedekiya ye nye esi, 
4 ‘Ale Afetɔ, Israel ƒe Mawu la, gblɔe nye esi: “Kpɔ ɖa, matrɔ miaƒe aʋawɔnu siwo le mia si mietsɔ le aʋa wɔm kple Babilon-fia kple Kaldeatɔ siwo ɖe to ɖe mi le glia godo la ɖe mia ŋu. Eye maƒo wo nu ƒu ɖe du sia titina. 
5 Nye ŋutɔ matsɔ asi si medo ɖa kple alɔkame sesẽ, awɔ avu kpli mi le dziku, dɔmedzoe kple nyanyra si teƒe mekɔ o me. 
6 Eye mawu du sia me nɔlawo, amegbetɔwo kple lãwo siaa. Dɔvɔ̃ si nu sẽe matsɔ awu woe.”’
7 “Afetɔ be: ‘Emegbe matsɔ Yuda-fia Zedekiya, eƒe subɔviwo, kple du sia me tɔwo—ame siwo dɔvɔ̃, yi kple dɔwuame mewu o la—ade asi na Babilon-fia Nebukadnezar kple woƒe futɔwo kpakple ame siwo le didim be yewoaɖe woƒe agbe ɖa. Atsɔ yi awu wo. Mase veve ɖe wo nu o, eƒe dɔme matrɔ ɖe wo ŋu o, eye makpɔ nublanui na wo o.’
8 “Eye nàgblɔ na dukɔ sia be, ‘Ale Afetɔ gblɔe nye esi: “Kpɔ ɖa, metsɔ agbemɔ kple kumɔ ɖo mia ŋkume. 
9 Ame siwo atsi du sia me la, yi, dɔwuame kple dɔvɔ̃ awu wo. Ke ame si ado ayi atsɔ eɖokui ana Kaldeatɔ siwo ɖe to ɖe mi la atsi agbe, eye eƒe agbe azu aboyonu nɛ.”’
10 “‘Afetɔ be: “Metɔ ŋku du sia be mahe vɔ̃ ava edzi, ke menye nyui o. Woatsɔe ade asi na Babilon-fia, eye wòatɔ dzoe.”
11 “‘Mi Yuda-fia ƒe aƒemetɔwo, mise Afetɔ ƒe nya, 12 Oo David ƒe aƒe, ale Afetɔ gblɔe nye esi:
“Mitso afia dzɔdzɔe ŋdi sia ŋdi,
Eye miɖe ame si woda adzoe la tso adzodala si me,
Ne nye dziku nagafla abe dzo ene,
Eye wòabi woade etsi ge do kpoe
Le miaƒe nuwɔna vɔ̃ɖiawo ta o.”’
13 Afetɔ be: ‘Oo balimenɔla,
Oo agakpe si le anyigba sɔsɔe dzi, kpɔ ɖa, metso ɖe ŋuwò.
Ke mi ame siwo le gbɔgblɔm be, “Ame kae aɖi abu ava dze mía dzi?
Eye ame kae age ɖe mía nɔƒe?”
14 Mabia akɔnta mi
Ðe miaƒe nuwɔnawo me tsonuwo nu, Afetɔ ye gblɔe.
Matɔ dzo eƒe ave la,
Eye wòafiã nu siwo katã ƒo xlãe.’”

YEREMIYA 22
1 Ale Afetɔ gblɔe nye esi: “Yi Yuda-fia ƒe me, eye nàgblɔ nya sia. 
2 Ale nàgblɔe nye esi, ‘Oo Yuda-fia, wò ame si bɔbɔ nɔ David ƒe fiazikpui dzi, wò kple wò subɔviwo kple wò dukɔ, si toa agbo siawo nu gena ɖe eme, mise Afetɔ ƒe nya. 
3 Ale Afetɔ gblɔe nye esi: “Midrɔ̃ ʋɔnu ɖe eteƒe, miwɔ nu dzɔdzɔe. Miɖe ame si woda adzoe la le adzodala si me. Migawɔ fu amedzrovi o, eye migawɔ ŋlɔmi le tsyɔ̃evi alo ahosi ŋu o. Migakɔ ʋu maɖifɔ aɖeke ɖe teƒe sia o. 
4 Elabena ne miewɔ nya sia dzi pɛpɛpɛ la, ekema fia siwo bɔbɔ nɔ David ƒe fiazikpui dzi la aɖo tasiaɖam, eye woado sɔ ato aƒe sia ƒe agbowo nu age ɖe eme, woawo ŋutɔ kple woƒe subɔviwo kpakple woƒe dukɔa me tɔwo siaa.”’
5 “Afetɔ be, ‘Ke ne mieɖo to nya siawo o la, ekema metà ɖokuinye be, aƒe sia azu aƒedo.’
6 “Elabena ale Afetɔ gblɔ ɖe Yuda-fia ƒe aƒe ŋue nye esi,
‘Èle abe Gilead
Kple Lebanon tame ene nam.
Ke hã, mana nàzu gbegbe;
Eye ame maganɔ wò duwo dometɔ aɖeke me o.
 7 Maɖo nugblẽlawo ɖe ŋuwò,
Wo dometɔ ɖe sia ɖe kple eƒe aʋawɔnuwo.
Woalã wò sederti nyuitɔwo
Eye woamu adze dzo me.
8 “‘Dukɔ geɖewo ava to du sia ŋu ayi, eye woabia wo nɔewo be: “Nu ka tae Afetɔ wɔ du gã sia alea?” 
9 Eye woaɖo eŋu be: “Esi wogblẽ Afetɔ woƒe Mawu ƒe nubabla la ɖi, eye wode ta agu na mawu bubuwo hesubɔ wo tae.”’
10 Migafa avi na ame si ku la o,
Eye migase veve ɖe eta o.
Mifa avi hehehe ɖe ame si wokplɔ yina aboyo me la boŋ ta,
Elabena magatrɔ agbɔ ava kpɔ anyigba si dzi wodzii ɖo la azɔ o.
11 “Elabena ale Afetɔ gblɔ ɖe Yuda-fia Yosiya vi Salum, si le fia ɖum ɖe fofoa Yosiya teƒe, gake wòdzo le teƒe sia ŋue nye esi: ‘Magatrɔ ava afi ma o. 
12 Ke boŋ afi si woɖe aboyoe yi la, afi mae wòaku ɖo, eye magakpɔ anyigba sia azɔ o.’
13 Baba na ame si le eƒe xɔ tum to mɔ madzɔmadzɔ dzi,
Eye wòle eƒe dziƒoxɔ tum to anukwaremaɖimaɖi me,
Ame si na ehavi wɔ dɔ nɛ dzodzro,
Eye wògbe fexexe nɛ;
14 Ame si le gbɔgblɔm be: ‘Matu xɔ gãwo
Kple dziƒoxɔ siwo me keke la na ɖokuinye.
Made fesrewo eŋu,
Eye maklã sedertiʋuƒo ɖe eme ahasi aŋɔ dzĩ nɛ.’
15 Ðe nàkpɔtɔ anye fia le esi nèƒo ame bubuwo ta le sedertiwo zazã me ta?
Fofowò hã ɖu nu, no nu,
Gake edrɔ̃ ʋɔnu ɖe eteƒe hewɔ nu dzɔdzɔe.
Eye eme nyo nɛ.
16 Ekpɔ fukpelawo kple ame dahewo ƒe nya gbɔ ɖe eteƒe.
Esia tae eme nyo nɛ ɖo.
‘Ðe menye emae nye sidzedzem oa?’ Afetɔ ye gblɔe.
17 ‘Ke wò ŋkuwo kple wò dzi le viɖe madzɔmadzɔ kpɔkpɔ,
Ame maɖifɔ ƒe ʋu kɔkɔɖi,
Ametafatafa kple sesẽnuxɔxɔ ko ŋu.’
18 “Eya ta ale Afetɔ gblɔ ɖe Yuda-fia Yehoyakim, Yosiya vi ŋue nye esi,
‘Amewo mafa nɛ ahagblɔ na wo nɔewo be,
“Ao, nɔvinyeŋutsu! Ao, nɔvinyenyɔnu!” o.
Womafa nɛ be:
“Ao, aƒetɔ! Ao, fia bubutɔ!” o.
19 Woaɖii abe tedzi ene,
Woatee le anyigba atsɔ aƒu gbe
Ðe Yerusalem ƒe agbowo godo.’
20 Lia yi Lebanon nàdo ɣli,
Wò gbe nede dzi le Basan.
Do ɣli tso Abarim,
Elabena wogbã ame siwo katã lɔ̃ wò vevie la gudugudu.
21 Meƒo nu kpli wò esime nèli bɔkɔɔ.
Ke ègblɔ be: ‘Nyemaɖo to o.’
Aleae nèwɔa nui tso keke wò ɖevime ke,
Elabena mèɖo to nye gbe o.
22 Ya akplɔ wò lãkplɔviwo katã adzoe,
Eye ame siwo lɔ̃a wò vevie la ayi aboyo me.
Ɣemaɣi la, ŋu akpe wò, eye woado vlo wò le vɔ̃ siwo katã va dziwò la ta.
23 Wò ame si le Lebanon,
Eye nèwɔ atɔ ɖe sedertiwo me,
Aleke gbegbe nàɖe hũ ne vevesese ƒo ɖe dziwò,
Eye àse veve abe nyɔnu si le ku lém ene lae nye esi!”
24 “Afetɔ be: ‘Zi ale si mele agbe la, ne wò Yuda-fia Koniya, Yehoyakim vi, ye nye ŋkɔsigɛ le nye nuɖusi hã la, maɖe wò ɖa le afi ma! 
25 Eye matsɔ wò ade asi na ame siwo le didim be yewoaɖe wò agbe ɖa kple ame siwo le ŋɔ dzim na wò la, eye matsɔ wò ade asi na Babilon-fia Nebukadnezar kple Kaldeatɔwo. 
26 Matsɔ wò kple dawò si dzi wò la aƒu gbe ɖe anyigba bubu dzi, afi si womedzi mi ɖo o, eye afi mae miaku ɖo. 
27 Eye womagagbɔ va anyigba si dzi vava le wo dzrom vevie la dzi gbeɖe o.
28 Ze gbagbã, si ɖi gbɔe Koniya sia nyea,
Ze si ƒe nu menyoa ame ŋu o ye ŋutsu sia nyea?
Nu ka tae woatsɔ eya ŋutɔ kple eƒe dzidzimeviwo aƒu gbe
Ðe anyigba si womenya o la dzi?’
29 Oo anyigba, anyigba, anyigba, se Afetɔ ƒe nya.
30 Ale Afetɔ gblɔe nye esi:
‘Miŋlɔ ŋutsu sia ŋkɔ ɖi be medzi vi o,
Be enye ŋutsu si naneke madze edzi na le eƒe agbe me o,
Elabena nu madze edzi na eƒe dzidzimevi aɖeke,
Ne wòanɔ anyi ɖe David ƒe fiazikpui dzi ahaɖu fia le Yuda akpɔ o.’”

YEREMIYA 23
1 Afetɔ be: “Baba na lãkplɔvi siwo le alẽ siwo le nye lãnyiƒe la tsrɔ̃m hele wo kam hlẽ!”
2 Ale Afetɔ, Israel ƒe Mawu la, gblɔ ɖe lãkplɔvi siwo le nye dukɔ kplɔm la ŋue nye esi: “Miawoe ka nye alẽawo hlẽ; mienya wo de gbe, eye mielé be na wo o.”
“Eya ta matrɔ ɖe mia ŋu le miaƒe nuwɔna vɔ̃ɖiwo ta,” Afetɔ ye gblɔe.
3 “Nye ŋutɔ maƒo nye alẽ susɔeawo nu ƒu tso anyigba siwo dzi menya wo ɖo ɖa la dzi, magakplɔ wo ava woƒe gbeɖuƒe, eye woadzi asɔ gbɔ. 
4 Maɖo lãkplɔvi siwo akplɔ wo beléletɔe la wo nu. Womagavɔ̃ azɔ o, ŋɔ magadzi wo azɔ o, eye wo dometɔ aɖeke mabu o,” Afetɔ ye gblɔe.
5 Afetɔ be: “Kpɔ ɖa! Ŋkekewo li gbɔna, esime mana atilɔ dzɔdzɔe aɖe nadze na David. Aɖu fia, eye wòaɖe gɔmesese deto afia, adrɔ̃ ʋɔnu ɖe eteƒe ahawɔ nu dzɔdzɔe le anyigba la dzi. 
6 Woaɖe Yuda le eŋɔli, eye Israel anɔ anyi le dedienɔnɔ me. Ŋkɔ si woayɔ nɛ ye nye: Afetɔe Nye Míaƒe Dzɔdzɔenyenye.”
7 Afetɔ be: “Gake ŋkekewo li gbɔna, esime womagagblɔ azɔ be, ‘Zi ale si Afetɔ, ame si kplɔ Israel-viwo tso Egipte-nyigba dzi la le agbe!’ o, 
8 ke boŋ woagblɔ be, ‘Zi ale si Afetɔ, ame si kplɔ Israel ƒe dzidzimeviwo tso dziehenyigba kple anyigba siwo katã dzi wòka wo hlẽ ɖo dzi la, le agbe,’ eye woanɔ woawo ŋutɔwo ƒe anyigba dzi.”
9 Ke nye dzi gbã le menye
Ðe nyagblɔɖilawo ŋu.
Nye ƒuwo katã le ƒoƒom.
Mele abe ahamula
Kple ŋutsu si dzi wain kpɔ ŋusẽ ɖo ene,
Le Afetɔ kple eƒe nya kɔkɔewo ta.
10 Elabena ahasiwɔlawo yɔ anyigba la dzi fũu;
Fiƒode na anyigba la le konyi fam,
Eye lãnyiƒe siwo le gbegbe la ƒu kplakplakpla.
Woƒe mɔwo vɔ̃ɖi, eye wozãa woƒe ŋusẽ le mɔ gbegblẽ nu.
11 “Nyagblɔɖilawo kple nunɔlawo siaa ŋu mekɔ o.
Eye mekpɔ woƒe nu vɔ̃ɖi wɔwɔ le nye ŋutɔ nye aƒe me gɔ̃ hã,” Afetɔ ye gblɔe.
12 “Eya ta woƒe mɔ dzi aɖiɖi eye wòado blukɔ;
Woatutu wo woadze anyi.
Elabena mahe vɔ̃ ava wo dzi
Le ƒe si me mabia akɔnta wo,” Afetɔ ye gblɔe.
13 “Mekpɔ ŋunyɔnuwɔwɔ le Samaria nyagblɔɖilawo ŋu.
Wogblɔ nya ɖi le Baal ƒe ŋkɔ me,
Eye wokplɔ nye dukɔ Israel trae.
14 Eye mekpɔ ŋunyɔnuwo le nyagblɔɖila siwo le Yerusalem la dome.
Wole ahasiwɔwɔ dzi, eye wole aʋatsokaka dzi;
Wodoa ŋusẽ nu vɔ̃ɖi wɔlawo,
Eye wometrɔ tso woƒe nu vɔ̃ɖi wɔwɔ me o.
Wo katã le nam abe Sodom ene,
Eye emenɔlawo le abe Gomora ene.”
15 Eya ta ale aʋakɔwo ƒe Afetɔ gblɔ ɖe nyagblɔɖilawo ŋue nye esi:
“Kpɔ ɖa, mana woaɖu atsa,
Eye makpe tsi si me aɖi le na wo woano.
Elabena nyagblɔɖila siwo le Yerusalem gbɔe xɔsegbegbe tso kaka ɖe anyigba blibo la dzi.”
16 Ale aʋakɔwo ƒe Afetɔ gblɔe nye esi:
“Migaɖo to nyagblɔɖila siwo le nya gblɔm ɖi na mi la ƒe nyawo o.
Wole mia flum.
Woawo ŋutɔwo ƒe dzimeŋutega gblɔm wole,
Menye Afetɔ ƒe nu me wòtso o.
17 Wole gbɔgblɔm edziedzi na ame siwo medea bubu ŋunye o la be:
‘Afetɔ be: “Mianɔ ŋutifafa me.”’
Eye wole gbɔgblɔm na ame siwo katã le zɔzɔm le woƒe dzimesesẽ nu la be:
‘Vɔ̃ aɖeke madzɔ ɖe mia dzi o.’
18 Elabena ame kae nɔ Afetɔ xɔlɔ̃ veviwo ƒe ha me
Be wòakpɔ nu ahase eƒe nya?
Ame kae ƒu to anyi ɖe eƒe nya ŋu be yeasee?
19 Kpɔ ɖa! Afetɔ ƒe ahom atu le dziku helĩhelĩ me;
Abe yali ene ahabla ɖe ame vɔ̃ɖiwo ƒe ta kɔtɔɔ.
20 Afetɔ ƒe dziku nu mafa o
Va se ɖe esime wòwɔ nu si wòɖo ɖe dzi me de goe hafi.
Le ŋkekeawo ƒe nuwuɣi la, miase egɔme.
21 Nyemedɔ nyagblɔɖilawo o gake wole du dzi.
Nyemeƒo nu kpli wo o gake wole nya gblɔm ɖi.
22 Ne ɖe wonɔ xɔ̃nye veviwo ƒe ha me la,
Anye ne wona nye dukɔ se nye nyawo,
Eye wona wotrɔ tso woƒe mɔ vɔ̃ dzi kple woƒe nuwɔna vɔ̃ɖiwo me.”
23 Afetɔ be: “Kpuiƒe ƒe Mawu koe menye, eye nyemenye adzɔge ƒe Mawu oa?”
24 “Ðe ame aɖe ate ŋu abe ɖe ɣaɣlaƒe, eye nyemakpɔe oa?” Afetɔ ye gblɔe.
“Ðe menye nyee yɔ dziƒowo kple anyigba taŋ oa?” Afetɔ ye gblɔe.
25 “Mese nya siwo nyagblɔɖila siwo le alakpanyawo gblɔm ɖi le nye ŋkɔ me la le gbɔgblɔm be: ‘Meku drɔ̃e! Meku drɔ̃e!’ 
26 Ɣekaɣie esia ayi edzi le nyagblɔɖila siwo gblɔa alakpanyawo ɖi ƒe dzi me ase ɖo? Woƒe dzi ƒe ameblenyawo gblɔm wole ɖi. 
27 Wodi be yewoatsɔ yewoƒe drɔ̃e siwo wo dometɔ ɖe sia ɖe lĩna na ehavi la ana nye dukɔ naŋlɔ nye ŋkɔ be, abe ale si wo fofowo ŋlɔ nye ŋkɔ be le Baal ta ene. 
28 “Nyagblɔɖila si ku drɔ̃e la, nelĩ drɔ̃e la; ke ame si si nye nya le la, negblɔ nye nya la le nyateƒe me.”
“Tsro gbɔ nya kae tsɔ nuku gbɔ?” Afetɔ ye gblɔe.
29 Afetɔ be: “Ðe nye nya mele abe dzo ene, eye wòle abe yɔxɔmezu si gbãa agakpe gudugudu ene oa?”
30 Afetɔ be: “Eya ta kpɔ ɖa, metso ɖe nyagblɔɖila siwo le nye nya fim le wo nɔewo gbɔ la ŋu.”
31 Afetɔ be: “Kpɔ ɖa, metso ɖe nyagblɔɖila siwo tsɔ woƒe aɖe le gbɔgblɔm be, ‘Eƒe nyae!’ la ŋu.”
32 Afetɔ be: “Kpɔ ɖa, metso ɖe nyagblɔɖila siwo kua alakpadrɔ̃ewo helĩa wo, eye wokplɔa nye dukɔa tranae le woƒe alakpanyawo kple woƒe adegbeƒoƒo ta la ŋu.”
Afetɔ be: “Menye nyee dɔ wo alo de se na wo o. Eya ta maɖe vi aɖeke na dukɔ sia o.”
33 “Eye ne dukɔ sia alo nyagblɔɖila alo nunɔla aɖe bia wò be, ‘Nu kae nye Afetɔ ƒe agba la?’ hã la, ekema nàɖo eŋu na wo be, ‘“Miawoe nye agba la! Matsɔ mi aƒu gbe,” Afetɔ ye gblɔe.’ 
34 Ke nyagblɔɖila alo nunɔla alo ame si le gbɔgblɔm be, ‘Afetɔ ƒe agba!’ la, nye hã matrɔ ɖe ame ma kple eƒe aƒemetɔwo ŋu. 
35 Ale mia dometɔ ɖe sia ɖe le ehavi kple nɔvia biamee nye esi: ‘Aleke Afetɔ ɖo eŋui? Eye nya kae Afetɔ gblɔ?’ 
36 Ke migagblɔ be Afetɔ ƒe agbae azɔ o, elabena ame sia ame ŋutɔ ƒe nya nye agba, eye mietrɔ Mawu gbagbe la, aʋakɔwo ƒe Afetɔ, mía Mawu la, ƒe nyawo.
37 “Ale nàgblɔ na nyagblɔɖila lae nye esi: ‘Aleke Afetɔ ɖo eŋu na wòe? Eye nya kae Afetɔ gblɔ? 
38 Eye esi mieyi edzi le gbɔgblɔm be, “Afetɔ ƒe agba!” ta la, ale Afetɔ gblɔe nye esi: “Esi miele gbɔgblɔm be, ‘Nya sia nye Afetɔ ƒe agba,’ evɔ megblɔ na mi be, ‘Migagblɔ be, “Afetɔ ƒe agba” o!’ ta la, 
39 kpɔ ɖa! Matsɔ mi aƒu gbe le ŋkunyeme akpe ɖe du si metsɔ na mia kple mia tɔgbuiwo la ŋuti. 
40 Eye mahe ŋukpe mavɔ kple vlododo mavɔ, si womaŋlɔ be akpɔ gbeɖe o la, ava mia dzi.”’”

YEREMIYA 24
1 Esi Babilon-fia Nebukadnezar ɖe aboyo Yuda-fia Yekoniya, si nye Yehoyakim vi kple Yuda-megãwo, aɖaŋudɔwɔlawo kpakple gbedewo tso Yerusalem yi Babilon megbe la, Afetɔ na mekpɔ gbotsetse kusi eve siwo wotsɔ da ɖe Afetɔ ƒe gbedoxɔa ŋgɔ. 
2 Gbotsetse nyuiwo le kusi ɖeka me, abe gbotsetse ŋgɔgbeawo ene; ke gbotsetse siwo le kusi evelia me ya gblẽ ŋutɔ, wogblẽ ale gbegbe be womele ɖuɖu me o.
3 Eye Afetɔ biam be: “Yeremiya, nu ka kpɔm nèle?” Meɖo eŋu be: “Gbotsetsewoe; gbotsetse nyuitɔawo nyo ŋutɔ, gake gbegblẽawo gblẽ ale gbegbe be womele ɖuɖu me o.”
4 Eye Afetɔ ƒe gbe va nam be: 
5 “Ale Afetɔ, Israel ƒe Mawu la, gblɔe nye esi: ‘Ale si gbotsetse nyui siawo le la, nenemae mabu Yuda ƒe aboyome siwo menya le teƒe sia ɖo ɖe Kaldeatɔwo ƒe anyigba dzi lae. 
6 Nye ŋku anɔ wo ŋu hena woƒe nyonyo, eye mana woagbugbɔ ava anyigba sia dzi. Matu wo, eye nyemagbã wo o, mado wo, eye nyemaho wo o. 
7 Mana dzi wo, ne woatsɔ adze sim be nyee nye Afetɔ. Woanye nye dukɔ, eye manye woƒe Mawu, elabena woatrɔ ɖe ŋunye kple woƒe dzi blibo.
8 “‘Ale Afetɔ gblɔ le gbotsetse gbegblẽ siwo gblẽ ale gbegbe be womele ɖuɖu me o la ŋue nye esi: “Nenemae mabu Yuda-fia Zedekiya, eƒe amegãwo kple Yerusalem ƒe ame susɔe siwo kpɔtɔ ɖe anyigba sia dzi kple ame siwo le Egipte-nyigba dzi lae. 
9 Mana vɔ̃ gã aɖe nadzɔ ɖe wo dzi eye woazu ŋɔdzinu na anyigbadzifiaɖuƒewo katã, woazu vlodonu kple lodonu, alɔmeɖenu kple ɖiŋudonu le teƒe siwo katã maka wo ahlẽ ɖo. 
10 Maɖo yi, dɔwuame kple dɔvɔ̃ ɖe wo ŋu, va se ɖe esime woatsrɔ̃ avɔ le anyigba si metsɔ na woawo kple wo tɔgbuiwo la dzi.”’”

YEREMIYA 25
1 Esiae nye gbe si va na Yeremiya ɖe Yuda dukɔ blibo la ŋu le Yuda-fia Yehoyakim, Yosiya vi, ƒe ƒe enelia, si nye Babilon-fia Nebukadnezar ƒe ƒe gbãtɔ me. 
2 Nya si nyagblɔɖila Yeremiya gblɔ le Yuda dukɔ blibo la kple Yerusalem nɔlawo katã ŋue nye esi:
3 “Afetɔ ƒe gbe va nam tso Yuda-fia Yosiya, Amon vi ƒe ƒe wuietɔ̃lia me va se ɖe egbe sia, ƒe blaeve vɔ etɔ̃ sɔŋue nye esi mele nuƒoƒo dzi na mi enuenu, gake miegbe toɖoɖo. 
4 Afetɔ dɔ eƒe subɔla nyagblɔɖilawo katã ɖe mi, edɔa wo enuenu, ke miegbe toɖoɖo, eye mieƒu to anyi be miasee hã o. 
5 Wogblɔna na mi be: ‘Mitrɔ dzro, mia dometɔ ɖe sia ɖe netrɔ tso eƒe mɔ vɔ̃ dzi kple eƒe nuwɔna vɔ̃ɖiwo me, ne mianɔ anyigba si Afetɔ tsɔ na mia kple mia tɔgbuiwo tso gbe aɖe gbe ʋĩi ke be wòanye mia tɔ la dzi eteƒe nadidi. 
6 Migadze mawu bubuwo yome, be miasubɔ wo, ade ta agu na wo ahatsɔ miaƒe asinudɔwɔwɔ ado dziku nam o; ne menye nenema o la, mahe gbegblẽ ava mia dzi.’
7 “Afetɔ be: ‘Ke miegbe toɖoɖom. Mietsɔ miaƒe asinudɔwɔwɔ do dziku nam eye miehe gbegblẽ va mia ɖokuiwo dzi.’
8 “Eya ta ale aʋakɔwo ƒe Afetɔ gblɔe nye esi, ‘“Esi miegbe toɖoɖo nye nyawo ta la,
9 madɔ woaɖakplɔ dziehe ƒomeawo katã, kple nye subɔvi Babilon-fia Nebukadnezar, eye makplɔ wo ava ƒu anyigba sia kple edzinɔlawo kple dukɔ siawo katã siwo ƒo xlã wo; matsrɔ̃ wo, eye mana woazu ŋɔdzinu, nu si ŋu woalia aku ɖo, kple aƒedo tegbee,” Afetɔ ye gblɔe. 
10 “Mana aseyetsotso ƒe ɖiɖi kple dzidzɔɣli, ŋugbetɔsrɔ̃ ƒe gbe kple ŋugbetɔ ƒe gbe, tétutu ƒe ɖiɖi kple akaɖi ƒe keklẽ nu natsi le wo dome. 
11 Anyigba blibo sia azu aƒedo kple ŋɔdzinu, eye dukɔ siawo asubɔ Babilon-fia ƒe blaadre sɔŋ.”’
12 “‘Eye ne ƒe blaadre la wu enu la, mabia akɔnta Babilon-fia kple dukɔ ma ɖe woƒe vodada ta, mabia akɔnta Kaldeatɔwo ƒe anyigba, eye mana wòazu aƒedo kple gbegbe tegbee,’ Afetɔ ye gblɔe. 
13 ‘Mana nye nya siwo katã megblɔ ɖe anyigba sia ŋu, siwo katã woŋlɔ ɖe agbalẽ sia me, siwo Yeremiya gblɔ ɖe dukɔwo katã ŋu la, nava eme ɖe edzi. 
14 Elabena dukɔ geɖewo kple fia gãwo hã wɔ nye dukɔ kluviwoe, eya ta maɖo eteƒe na wo le woƒe nuwɔna kple woƒe asinudɔwɔwɔwo nu.’”
15 Elabena ale Afetɔ, Israel ƒe Mawu la, gblɔ namee nye esi: “Xɔ dɔmedzoe ƒe wainkplu sia le asinye, eye nàna dukɔ siwo katã gbɔ mele dɔwòm ɖo la nanoe. 
16 Woanoe eye woanɔ ya mum sagasaga ahanɔ nu wɔm abe aɖaʋatɔwo ene le yi si maɖo ɖe wo dome la ta.”
17 Ale mexɔ kplu la le Afetɔ si, eye mena dukɔ siwo katã gbɔ Afetɔ dɔm ɖo la noe: 
18 medze egɔme tso Yerusalem, Yuda duwo kple eƒe fiawo kpakple eƒe amegãwo dzi, ne woazu aƒedo, ŋɔdzinu, nu si ŋu woalia aku ɖo kple ɖiŋudonu, abe ale si wòle dzɔdzɔ ge kpuie ene; 
19 emegbe Egipte-fia Farao, eƒe subɔviwo, eƒe amegãwo kple eƒe dukɔ blibo la, 
20 kple dukɔ vovovo me tɔ siwo tsaka; Uz-nyigba dzi fiawo katã; Filistitɔwo ƒe anyigba dzi fiawo katã, Askelon, Gaza, Ekron kple Asdod ƒe ame susɔeawo; 
21 Edom, Moab kple Amonitɔwo; 
22 Tiro-fiawo katã, Sidon-fiawo katã kple ƒukpodzinɔlawo ƒe fiawo; 23 Dedan, Tema, Buz kple logloƒlɔlawo katã; 
24 Arabiatɔwo ƒe fiawo katã kple dukɔ vovovo me tɔ siwo tsaka le gbegbe ƒe fiawo katã; 
25 Zimri-fiawo katã, Elam-fiawo katã kple Media-fiawo katã; 
26 dziehefiawo katã, esiwo le kpuiƒe kple didiƒe, anoe ɖe wo nɔewo yome, kple anyigbadzifiaɖuƒe bubu siwo katã le anyigba dzi; eye Sesak-fia ŋutɔ hã anoe ɖe wo yome.
27 “Eye nàgblɔ na wo be, ‘Ale aʋakɔwo ƒe Afetɔ, Israel ƒe Mawu la, gblɔe nye esi: “Minoe miamu, miɖe xe, eye miadze anyi ale be fɔfɔ naganɔ mia ŋu o, le yi si ɖom mele ɖe mia dome la ta.”’ 
28 Eye ne wogbe be yewomaxɔ kplu la le asiwò ano o la, ekema gblɔ na wo be, ‘Ale aʋakɔwo ƒe Afetɔ gblɔe nye esi: “Mianoe kokoko! 
29 Elabena du si ŋu woyɔ nye ŋkɔ ɖo ŋue madze vɔ̃wɔwɔ gɔme ɖo, eye miawo ya miatsi tomahemahea?”’
“‘Miatsi tomahemahee o, elabena mele yi yɔm ɖe anyigbadzinɔlawo katã ŋu,’ aʋakɔwo ƒe Afetɔ ye gblɔe.
30 “Ke wò la, gblɔ nya siawo katã ɖi, eye nàgblɔ na wo be:
‘Afetɔ aɖe gbe tso dziƒo,
Eye wòana eƒe gbe naɖi tso eƒe nɔƒe kɔkɔe la.
Aɖe gbe ɖe eƒe nɔƒe ŋu.
Ado ɣli abe ame siwo le wain fanyam le wainfiãnu me ene,
Adzi aʋadziɖuha ɖe anyigbadzinɔlawo katã ŋu.’
31 ‘Hoowɔwɔ ade anyigba ƒe mlɔenu ke,
Elabena Afetɔ tsɔ nya ɖe dukɔwo ŋu.
Eya ŋutɔ adrɔ̃ ʋɔnu amegbetɔwo katã.
Atsɔ ame vɔ̃ɖiwo ade asi na yi,’ Afetɔ ye gblɔe.
32 Ale aʋakɔwo ƒe Afetɔ gblɔe nye esi:
‘Kpɔ ɖa! Vɔ̃ tso dukɔ gbɔ yi dukɔ gbɔ,
Eye ahom sesẽ aɖe atu tso anyigba ƒe mlɔenuwo.
33 “‘Ame siwo Afetɔ wu le ŋkeke ma dzi la anɔ anyi tso anyigba ƒe mlɔenu va se ɖe anyigba ƒe mlɔenu. Womafa na wo o, womaƒo wo nu ƒu alo aɖi wo o. Woazu abe aɖu ene le anyigba dzi.’
34 Mi alẽkplɔlawo, mifa avi sesĩe!
Mi lãha la ƒe bubumewo, miƒo togotogoe le ke me,
Elabena miaƒe ŋkeke de be woawu mi, eye woaka mi ahlẽ,
Mianɔ abe agba xɔasi si ge hegbã ene!
35 Sitsoƒe aɖeke manɔe na alẽkplɔlawo o,
Eye lãha la ƒe bubumewo mate ŋu asi o.
36 Mise ɖa! Alẽkplɔlawo ƒe ɣli
Kple lãha la ƒe bubumewo ƒe avi le ɖiɖim sesĩe,
Elabena Afetɔ le woƒe lãnyiƒewo gblẽm.
37 Eye agbe megale tomefafateƒewo o
Le Afetɔ ƒe dziku helĩhelĩ la ta.
38 Egblẽ eƒe nɔƒe ɖi abe dzatatsui ene,
Elabena woƒe anyigba zu ŋɔdzinu
Le yi gblẽnu
Kple eƒe dziku helĩhelĩ la ta.”

YEREMIYA 26
1 Le Yuda-fia Yehoyakim, Yosiya vi, ƒe fiaɖuɖu ƒe gɔmedzedzea me la, gbe sia tso Afetɔ gbɔ va be: 
2 “Ale Afetɔ gblɔe nye esi, ‘Yi ɖatɔ ɖe Afetɔ ƒe aƒe ƒe xɔxɔnu, eye nàgblɔ nya siawo ɖe Yuda duwo me nɔla siwo katã vana be yewoade ta agu le Afetɔ ƒe aƒe me la ŋu. Gblɔ nya siwo katã ƒe se mede na wò la; mègaɖe nya aɖeke le eme o. 
3 Ðewohĩ woasee, eye ame sia ame atrɔ tso eƒe mɔ vɔ̃ dzi, ekema matrɔ susu, eye nyemagahe vɔ̃ si meɖo ɖe wo ŋu le woƒe nuwɔna vɔ̃ɖiwo ta la ava wo dzi o. 
4 Gblɔ na wo be: “Ale Afetɔ gblɔe nye esi, ‘Ne mieɖo tom hezɔ ɖe nye se si mede na mi la nu o, 
5 eye mieɖo to nye subɔla nyagblɔɖila siwo medɔna ɖe mi enuenu ƒe nyawo o, ke miegbe toɖoɖo wo la, 
6 ekema mawɔ aƒe sia abe Silo ene, eye mana du sia nazu ɖiŋudonu na anyigbadzidukɔwo katã.’”’”
7 Eye nunɔlawo kple nyagblɔɖilawo kpakple dukɔ blibo la see Yeremiya le nya siawo gblɔm le Afetɔ ƒe aƒe la me. 
8 Eya ta esi Yeremiya gblɔ nya siwo katã Afetɔ de esi be wòagblɔ na dukɔ blibo la vɔ la, nunɔlawo kple nyagblɔɖilawo kpakple dukɔ blibo la lée hegblɔ be: “Àku kokoko. 
9 Nu ka tae nègblɔ nya ɖi le Afetɔ ƒe ŋkɔ me be, ‘Aƒe sia anɔ abe Silo ene, woagbã du sia, eye ame aɖeke maganɔ eme o’?” Eye dukɔ blibo la ƒo zi ɖe Yeremiya ŋu le Afetɔ ƒe aƒe la me.
10 Esi Yuda-megãwo se nya siawo la, wodo tso fia ƒe aƒe la me va Afetɔ ƒe me heva bɔbɔ nɔ Afetɔ ƒe aƒe ƒe agbo yeye la nu. 
11 Eye nunɔlawo kple nyagblɔɖilawo gblɔ na amegãwo kple dukɔ blibo la be: “Ŋutsu sia dze ku, elabena egblɔ nya ɖi ɖe du sia ŋu abe ale si miawo ŋutɔwo miesee kple miaƒe to ene.”
12 Eye Yeremiya gblɔ na amegãwo katã kple dukɔ blibo la be: “Afetɔe dɔm be magblɔ nya siwo katã miese la ɖi ɖe aƒe sia kple du sia ŋu. 
13 Eya ta miɖɔ miaƒe zɔzɔme kple miaƒe nuwɔnawo ɖo, eye miɖo to Afetɔ mia Mawu ƒe gbe, ekema Afetɔ atrɔ susu eye mahe vɔ̃ si wògblɔ ɖi ɖe mia ŋu la ava mia dzi o. 
14 Ke nye la, mele mia si me. Miwɔm ale si dze, eye wònyo mia ŋu. 
15 Gake minyae be ne miewum la, ekema miehe ʋu maɖifɔ va mia ɖokuiwo kple du sia kpakple emenɔlawo dzi, elabena le nyateƒe me la, Afetɔe dɔm ɖe mia gbɔ be magblɔ nya siawo katã ɖe miaƒe to me.”
16 Eye amegãwo kple dukɔ blibo la gblɔ na nunɔlawo kple nyagblɔɖilawo be: “Ŋutsu sia medze ku o, elabena Afetɔ mía Mawu ƒe ŋkɔ mee wòƒo nu na mí le.”
17 Gawu la, anyigba la dzi ametsitsi aɖewo hã tso gblɔ na dukɔa ƒe ha blibo la be: 
18 “Mika, si tso Moreset, gblɔ nya ɖi le Yuda-fia Hizkiya ŋɔli, eye wògblɔ na Yuda dukɔ blibo la be, ‘Ale aʋakɔwo ƒe Afetɔ gblɔe nye esi:
“Woaŋlɔ Zion abe agble ene,
Yerusalem azu glikpo,
Eye Gbedoxɔ la ƒe to azu togbɛ toave.”’
19 “Ðe Yuda-fia Hizkiya kple Yuda blibo la wuia? Ðe mevɔ̃ Afetɔ, eye wòɖe kuku na Afetɔ be wòave yewo nu, ale be Afetɔ trɔ susu, eye mehe vɔ̃ si wògblɔ ɖe wo ŋu la va wo dzi oa? Eya ta vɔ̃ gã aɖee nye esia míedi be míahe ava mía ɖokuiwo dzi.
20 “Ŋutsu aɖe hã nɔ nya gblɔm ɖi le Afetɔ ƒe ŋkɔ me, si ŋkɔe nye Uriya, Semaya si tso Kiriat-Yearim la ƒe vi. Eye wògblɔ nya ɖi ɖe du sia kple anyigba sia ŋu wòsɔ kple Yeremiya ƒe nyawo. 
21 Eye Fia Yehoyakim kple eƒe kalẽtɔwo katã kpakple amegãwo katã se eƒe nyawo, eye fia la di be yeawui. Esi Uriya see la, enumake vɔvɔ̃ ɖoe wòsi yi Egipte. 
22 Ke Fia Yehoyakim dɔ ame ɖo ɖe Egipte; edɔ Elnatan, Akbor vi, kple ŋutsu bubu aɖewo ɖo ɖe Egipte. 
23 Wokplɔ Uriya tso Egipte vɛ na Fia Yehoyakim, eye wòwui kple yi hetsɔ eƒe kukua ƒu gbe ɖe dukɔ la me viwo ƒe ameɖibɔ me.”
24 Ke Ahikam, Safan vi, kpe ɖe Yeremiya ŋu, ale be wometsɔe de asi na dukɔ la be woawu o.

YEREMIYA 27
1 Le Yuda-fia Yehoyakim, Yosiya vi, ƒe fiaɖuɖu ƒe gɔmedzedzea me la, Afetɔ ƒe gbe sia va na Yeremiya bena: 
2 “Ale Afetɔ gblɔ nam ye nye esi, ‘Gbi ka, eye nàwɔ kɔkutiwo atsɔ aku kɔ. 
3 Eye nàtsɔ wo ade dɔla siwo va Yuda-fia Zedekiya gbɔ le Yerusalem la si aɖo ɖe Edom-fia, Moab-fia, Amonitɔwo ƒe fia, Tiro-fia kple Sidon-fia. 
4 Eye nàde gbe wo si aɖo ɖe woƒe aƒetɔwo be:
“‘“Ale aʋakɔwo ƒe Afetɔ, Israel ƒe Mawu la, gblɔe nye esi; ale miagblɔ na miaƒe aƒetɔwoe nye esi, 
5 ‘Nyee tsɔ nye ŋusẽ gã kple nye alɔ si medo ɖa la wɔ anyigba, amegbetɔ kple lã siwo le anyigba dzi; eye ame si melɔ̃ la, eyae metsɔnɛ nana. 
6 Azɔ metsɔ anyigba siawo katã de asi na nye subɔvi Babilon-fia Nebukadnezar; metsɔ gbemelãwo hã nɛ be woasubɔe. 
7 Dukɔwo katã asubɔ eya kple via kpakple tɔgbuiyɔvia va se ɖe esime eƒe anyigba ƒe ɣeyiɣi nade, esime eya ŋutɔ hã azu kluvi na dukɔ geɖewo kple fia gãwo.’
8 “‘“‘Eye ne dukɔ alo fiaɖuƒe aɖe gbe be yemasubɔ Babilon-fia Nebukadnezar alo ade kɔ Babilon-fia ƒe kɔkuti te o la, matsɔ yi, dɔwuame kple dɔvɔ̃ ahe to na dukɔ ma va se ɖe esime mato eƒe asi dzi atsrɔ̃ wo woavɔ,’ Afetɔ ye gblɔe.
9 “‘“‘Eya ta migaɖo to miaƒe nyagblɔɖilawo, afakalawo, drɔ̃ekulawo, akunyawɔlawo kple dzosalawo, ame siwo le gbɔgblɔm na mi be, “Miele Babilon-fia subɔ ge o” la o. 
10 Elabena alakpanya gblɔm wole ɖi na mi, ne woana woakplɔ mi adzoe le miaƒe anyigba dzi ayi didiƒe; ne maka mi ahlẽ, eye mia nu nayi.
11 “‘“‘Ke dukɔ si ade kɔ Babilon-fia ƒe kɔkuti te ahasubɔe la, mana wòanɔ eƒe anyigba dzi, eye wòade agble ɖe edzi ahanɔ edzi,’ Afetɔ ye gblɔe.”’”
12 Megblɔ nya siawo ke na Yuda-fia Zedekiya hã be: “Mide kɔ Babilon-fia ƒe kɔkuti te, eye misubɔ eya kple eƒe dukɔ la, ne mianɔ agbe. 
13 Nu ka tae wò kple wò dukɔ la miaku ɖe yi, dɔwuame kple dɔvɔ̃ si me, abe ale si Afetɔ gblɔe ɖe dukɔ si gbe be yemasubɔ Babilon-fia o la ŋu ene? 
14 Migaɖo to nyagblɔɖila siwo le gbɔgblɔm na mi be, ‘Miele Babilon-fia subɔ ge o’ la ƒe nyawo o, elabena alakpanya gblɔm wole ɖi na mi.
15 “Afetɔ be: ‘Elabena menye nyee dɔ wo o, ke boŋ alakpanya gblɔm wole ɖi le nye ŋkɔ me, ne maka mi ahlẽ, eye miawo ŋutɔwo kple nyagblɔɖila siwo le nya gblɔm ɖi na mi la siaa nu nayi.’”
16 Eye megblɔ na nunɔlawo kple dukɔ blibo sia be: “Ale Afetɔ gblɔe nye esi, ‘Migaɖo to miaƒe nyagblɔɖila siwo le nya gblɔm ɖi na mi be: “Kpɔ ɖa! Esusɔ vie woatsɔ Afetɔ ƒe aƒe la me nuwo tso Babilon agbɔe, la ƒe nyawo o!” elabena alakpanya gblɔm wole ɖi na mi. 
17 Migaɖo to wo o. Misubɔ Babilon-fia, ne mianɔ agbe. Nu ka tae du sia nazu aƒedo? 
18 Ke ne nyagblɔɖilawoe wonye, eye Afetɔ ƒe nya le wo si vavã la, ekema meɖe kuku, mina woaƒo koko na aʋakɔwo ƒe Afetɔ, ne woagalɔ nu siwo susɔ ɖe Afetɔ ƒe aƒe la me kple Yuda-fia ƒe aƒe la me kpakple Yerusalem la ayi Babilon o.’
19 “Elabena ale aʋakɔwo ƒe Afetɔ gblɔ ɖe sɔtiawo, gazɔ gã la, kekeawo kple nu mamlɛ siwo susɔ ɖe du sia me la ŋu, 
20 nu siwo Babilon-fia Nebukadnezar melɔ dzoe, esime wòɖe aboyo Yuda-fia Yekoniya, Yehoyakim vi, tso Yerusalem yi Babilon hekpe ɖe Yuda kple Yerusalem ƒe bubumewo katã ŋu o; 
21 ɛ̃, ale aʋakɔwo ƒe Afetɔ, Israel ƒe Mawu la, gblɔ ɖe nu siwo susɔ ɖe Afetɔ ƒe me kple Yuda-fia ƒe me kpakple Yerusalem la ŋue nye esi: 
22 ‘“Woalɔ wo ayi Babilon, eye woanɔ afi ma va se ɖe gbe si gbe matrɔ susu ɖe wo ŋu. Magbugbɔ wo agbɔe, eye magaɖo wo teƒe sia,”’ Afetɔ ye gblɔe.”

YEREMIYA 28
1  Le ƒe ma me, le Yuda-fia Zedekiya ƒe fiaɖuɖu ƒe gɔmedzedze, le ƒe enelia ƒe ɣleti atɔ̃lia me la, nyagblɔɖila Hananiya, Azur vi si tso Gibeon, gblɔ nam le Afetɔ ƒe aƒe la me le nunɔlawo kple dukɔ blibo la ŋkume be: 
2 “Ale aʋakɔwo ƒe Afetɔ, Israel ƒe Mawu la, gblɔe nye esi, ‘Maŋe Babilon-fia ƒe kɔkuti la. 
3 Le ƒe eve me la, magbugbɔ Afetɔ ƒe aƒe la me nu siwo katã Babilon-fia Nebukadnezar lɔ tso teƒe sia yi Babilon la agbɔ va teƒe sia.’” 
4 “‘Makplɔ Yuda-fia Yekoniya, Yehoyakim vi kple Yuda ƒe aboyome siwo katã yi Babilon la agbɔ va teƒe sia, elabena maŋe Babilon-fia ƒe kɔkuti la,’ Afetɔ ye gblɔe.”
5 Eye nyagblɔɖila Yeremiya ɖo eŋu na nyagblɔɖila Hananiya le nunɔlawo kple dukɔ blibo la, ame siwo tsi tsitre ɖe Afetɔ ƒe aƒea me la ŋkume. 
6 Nyagblɔɖila Yeremiya gblɔ be: “Amen! Afetɔ newɔe alea! Afetɔ nena nya siwo nègblɔ ɖi la nava eme, ne wòahe Afetɔ ƒe aƒe la me nuwo kple aboyomeawo katã tso Babilon agbɔ va teƒe sia! 
7 Gake meɖe kuku, se nya sia si gblɔ ge mala ɖe wò to me kple dukɔ blibo la ƒe to me. 
8 Tso gbe aɖe gbe ke la, nyagblɔɖila siwo do ŋgɔ na nye kpli wò la gblɔ aʋawɔwɔ, gbegblẽ kple dɔvɔ̃ ŋu nya ɖi ɖe dukɔ geɖewo kple fiaɖuƒe gãwo ŋu. 
9 Ne nyagblɔɖila aɖe gblɔ ŋutifafanya ɖi, eye nyagblɔɖila la ƒe nya la va eme la, ekema woadze sii be Afetɔe dɔ nyagblɔɖila la vavã.”
10 Eye nyagblɔɖila Hananiya ɖe kɔkuti la le kɔ na nyagblɔɖila Yeremiya heŋee. 
11 Eye Hananiya gblɔ le dukɔ blibo la ŋkume be: “Ale Afetɔ gblɔe nye esi, ‘Alea tututue maŋe Babilon-fia Nebukadnezar ƒe kɔkuti le kɔ na dukɔwo katã le ƒe eve me.’” Eye nyagblɔɖila Yeremiya lé eƒe mɔ dzo.
12 Esime nyagblɔɖila Hananiya ŋe kɔkuti la le kɔ na nyagblɔɖila Yeremiya megbe la, Afetɔ ƒe nya sia va na Yeremiya be: 
13 “Heyi ɖagblɔ na Hananiya be, ‘Ale Afetɔ gblɔe nye esi: “Atikɔkutie nèŋe, ke gakɔkutie nàwɔ ɖe eteƒe.” 
14 Elabena ale aʋakɔwo ƒe Afetɔ, Israel ƒe Mawu la, gblɔe nye esi: “Made gakɔkuti kɔ na dukɔ siawo katã, ne woasubɔ Babilon-fia Nebukadnezar; woasubɔe godoo. Matsɔ gbemelãwo gɔ̃ hã ade asi nɛ.”’”
15 Eye nyagblɔɖila Yeremiya gblɔ na nyagblɔɖila Hananiya be: “Oo Hananiya, meɖe kuku, see! Menye Afetɔ ye dɔ wò o, gake nèna dukɔ sia le dzi ɖom ɖe alakpanyawo ŋu. 
16 Eya ta ale Afetɔ gblɔe nye esi, ‘Kpɔ ɖa! Maɖe wò ɖa le anyigba la dzi. Àku le ƒe sia me, elabena ède aglãdzedze ɖe Afetɔ ŋu ƒe dzi ƒo.’”
17 Ale nyagblɔɖila Hananiya ku le ƒe ma me le ɣleti adrelia me.

YEREMIYA 29
1  Esiae nye agbalẽ si nyagblɔɖila Yeremiya ŋlɔ le Yerusalem ɖo ɖe aboyomeawo ƒe ametsitsi susɔeawo, nunɔlawo, nyagblɔɖilawo kple dukɔ blibo la, ame siwo Nebukadnezar ɖe aboyoe tso Yerusalem yi Babilon la me nyawo. 
2 Esia va eme le esi woɖe aboyo Fia Yekoniya kple nyɔnufia la, fiaŋumewo, Yuda kple Yerusalem ƒe amegãwo, aɖaŋudɔwɔlawo kple gbedewo dzoe le Yerusalem megbe. 
3 Etsɔ agbalẽ la de Elasa, Safan vi kple Gemariya, Hilkiya vi, ame siwo Yuda-fia Zedekiya dɔ ɖe Babilon-fia Nebukadnezar gbɔ le Babilon la si. Emenyawoe nye esi:
4 “Ale aʋakɔwo ƒe Afetɔ, Israel ƒe Mawu la, gblɔ na aboyomeawo katã, ame siwo wòna woɖe aboyoe tso Yerusalem yi Babilon lae nye esi, 
5 ‘Mitso aƒe mianɔ wo me. Mitso abɔ miaɖu wo me kutsetse. 
6 Miɖe srɔ̃, eye midzi ŋutsuviwo kple nyɔnuviwo; miɖe srɔ̃ na mia viŋutsuwo, eye mitsɔ mia vinyɔnuwo na woaɖe, ne woadzi ŋutsuviwo kple nyɔnuviwo. Midzi ɖe edzi le afi ma, eye migazu ʋɛ o. 
7 Midi ŋutifafa na du si me mena woɖe aboyo mi yii la hã, eye mido gbe ɖa na Afetɔ ɖe eta, elabena ne ŋutifafa le dua me la, ekema miawo ŋutɔwo hã mianɔ ŋutifafa me. 
8 Elabena ale aʋakɔwo ƒe Afetɔ, Israel ƒe Mawu la, gblɔe nye esi: “Migana miaƒe nyagblɔɖila kple miaƒe afakala siwo le mia dome nable mi o, eye migaɖo to woƒe drɔ̃e siwo kum wole la o. 
9 Elabena ‘alakpanya gblɔm wole ɖi na mi le nye ŋkɔ me. Menye nyee dɔ wo o,’ Afetɔ ye gblɔe.”’”
10 “Elabena ale Afetɔ gblɔe nye esi, ‘Ne ƒe blaadre la de le Babilon la, ekema matrɔ susu ɖe mia ŋu, eye mawɔ ŋugbe si medo na mi la dzi ahakplɔ mi agbɔe ava teƒe sia.’
11 “Afetɔ be, ‘Elabena menya tame si meɖo ɖe mia ŋu la nyuie, ŋutifafa ƒe tamee, ke menye vɔ̃ tɔ o, ne mana mɔkpɔkpɔ mi eye etsɔme nanyo na mi. 
12 Miayɔm, miava do gbe ɖa nam, eye maɖo to mi.’
13 “‘Miadim, eye miake ɖe ŋunye, elabena miadim tso dzi blibo me. 
14 Mana miake ɖe ŋunye,’ Afetɔ ye gblɔe. ‘Maƒo miaƒe aboyomewo nu ƒu tso dukɔwo katã me kple teƒe siwo katã meka mi hlẽ ɖo la,’ Afetɔ ye gblɔe. ‘Eye makplɔ mi ava teƒe si mena woɖe aboyo mi tsoe la.’
15 “Ke miegblɔ be, ‘Afetɔ ɖo nyagblɔɖilawo na mí le Babilon.’
16 “Elabena ale Afetɔ gblɔ na fia si le David ƒe fiazikpui dzi kple dukɔ blibo si le du sia me, mia nɔvi siwo meyi aboyo me kpli mi o, lae nye esi, 
17 ‘Ale aʋakɔwo ƒe Afetɔ gblɔe nye esi: “Kpɔ ɖa, maɖo yi, dɔwuame kple dɔvɔ̃ ɖe wo ŋu, eye mawɔ wo abe gbotsetse vóvo siwo mele ɖuɖu me o la ene.”’
18 “‘Matsɔ yi, dɔwuame kple dɔvɔ̃ ati wo yome, eye mana woazu ŋɔdzinu na anyigbadzifiaɖuƒewo katã, woazu ɖiŋudonu, nu wɔmoyaa, nu si ŋu woalia aku ɖo kple vlodonu le dukɔ siwo katã gbɔ manya wo aɖo ɖo la dome, 
19 elabena womeɖo to nye nya siwo mede nye subɔla nyagblɔɖilawo si ɖo ɖe wo enuenu la o,’ Afetɔ ye gblɔe.
“‘Ke miegbe toɖoɖo,’ Afetɔ ye gblɔe.
20 “Eya ta mi aboyomeawo katã, mi ame siwo menya tso Yerusalem ɖo ɖe Babilon, mise Afetɔ ƒe nya. 
21 Ale aʋakɔwo ƒe Afetɔ, Israel ƒe Mawu la, gblɔ ɖe Ahab, Kolaya vi kple Zedekiya, Maaseya vi, ame siwo le alakpanya gblɔm ɖi na mi le nye ŋkɔ me la ŋue nye esi, ‘Kpɔ ɖa, matsɔ wo ade asi na Babilon-fia Nebukadnezar, eye wòawu wo le mia ŋkume. 
22 Woatsɔ nu si dzɔ ɖe wo dzi la ado ɖiŋui le Yuda ƒe aboyomewo katã dome le Babilon be: “Afetɔ newɔ wò abe Zedekiya kple Ahab, ame siwo Babilon-fia mè le dzo me la ene!” 
23 elabena wowɔ ŋukpenanu le Israel, wole ahasi wɔm kple wo haviwo srɔ̃wo, eye wole alakpanya gblɔm le nye ŋkɔ me, evɔ nyemeɖo esia na wo o.
“‘“Nye la, menyae, eye menye ɖasefo,” Afetɔ ye gblɔe.’”
24 “Eye nàgblɔ na Semaya si tso Nehelam be, 
25 ‘Ale aʋakɔwo ƒe Afetɔ, Israel ƒe Mawu la, gblɔe nye esi: “Èɖo agbalẽwo ɖe dukɔ blibo si le Yerusalem kple nunɔla Zefaniya, Maaseya vi, kpakple nunɔlawo katã le wò ŋkɔ me be, 
26 ‘Afetɔ tsɔ wò ɖo nunɔlae ɖe nunɔla Yehoyada teƒe, be nàzu dzikpɔla le Afetɔ ƒe aƒe la me ɖe ame sia ame si ƒe tagbɔ gblẽ, eye wòle nu wɔm abe nyagblɔɖila ene la nu, nàbɔ pãe ahade ga kɔ kple asi nɛ. 
27 Ke nu ka tae mèka mo na Yeremiya si tso Anatot, ame si le nu wɔm abe nyagblɔɖila ene le mia dome o? 
28 Elabena eɖo du ɖe mí le Babilon gɔ̃ hã be: “Eteƒe adidi! Mitso aƒe mianɔ wo me. Mitso abɔ miaɖu wo me kutsetse, . . .”’”’”
29 Esi nunɔla Zefaniya xlẽ agbalẽ sia ɖe nyagblɔɖila Yeremiya ƒe to me la, 
30 Afetɔ ƒe gbe va na Yeremiya be: 
31 “Ðo ame ɖe aboyomeawo katã be, ‘Ale Afetɔ gblɔ le Semaya si tso Nehelam ŋue nye esi: “Esi Semaya gblɔ nya ɖi na mi, evɔ menye nyee dɔe o, eye wòdi be yeana miaɖo ŋu ɖe alakpanyawo ŋu ta la, 
32 ale Afetɔ gblɔe nye esi, ‘Kpɔ ɖa, matrɔ ɖe Semaya si tso Nehelam kple eƒe dzidzimeviwo ŋu. Eƒe ame aɖeke makpɔtɔ ɖe dukɔ sia dome o; eye makpɔ nyui si wɔ ge mala na nye dukɔ la teƒe o, elabena ede aglãdzedze ɖe Afetɔ ŋu ƒe dzi ƒo,’ Afetɔ ye gblɔe.’”’”

YEREMIYA 30
1 Afetɔ ƒe gbe si va na Yeremiya lae nye esi: 
2 “Ale Afetɔ, Israel ƒe Mawu la, gblɔe nye esi, ‘Ŋlɔ nya siwo katã magblɔ na wò la ɖe agbalẽ me. 
3 Elabena Afetɔ be, “kpɔ ɖa, ŋkekewo li gbɔna, esime maƒo nye dukɔ la ƒe aboyomewo, Israel kple Yuda, nu ƒu,” Afetɔ ye gblɔe, “eye makplɔ wo agbɔe ava anyigba si metsɔ na wo tɔgbuiwo la dzi wòagazu wo tɔ.”’”
4 Nya siawoe Afetɔ gblɔ na Israel kple Yuda.
 5 Ale Afetɔ gblɔe nye esi:
“Míese vɔvɔ̃ɣli,
Ŋɔdzi li, eye ŋutifafa aɖeke meli o.
 6 Meɖe kuku, mibia se, ne miakpɔe ɖa be ɖe ŋutsu dzia vi hã.
Ke nu ka tae mekpɔ ŋutsu sesẽwo katã wolé ƒodo ɖe asi
Abe nyɔnu si le ku lém ene?
Nu ka tae mowo katã fu tititi?
 7 Aléle! Elabena ŋkeke ma dzi ŋɔ.
Ðeke magasɔ kplii o,
Xaxaɣi wòanye na Yakob.
Gake woaɖee le eme.”
8 Aʋakɔwo ƒe Afetɔ be: “Gbe ma gbe la, maŋe kɔkuti le kɔ na wo, matso woƒe kawo, eye womaganye kluvi na amedzrowo azɔ o. 
9 Woasubɔ Afetɔ woƒe Mawu kple woƒe fia David, ame si maɖo na wo la.”
10 Afetɔ be: “Ke wò, nye subɔla Yakob, mègavɔ̃ o,
Israel, ŋɔ megadzi wò o.
Elabena kpɔ ɖa, maɖe wò tso didiƒe,
Eye maɖe wò dzidzimeviwo tso anyigba si dzi woɖe aboyo wo yii la dzi.
Yakob atrɔ agbɔ, eye woanɔ anyi bɔkɔɔ le dziɖeɖi me,
Eye ame aɖeke mado voɖi na wo o.”
11 Afetɔ be: “Elabena meli kpli wò, be maɖe wò.
Gake matsrɔ̃ amewo le dukɔ siwo katã dome meka wò hlẽ ɖo la me;
Ke nyematsrɔ̃ amewo le wò ya dowòme o.
Mahe to na wò ale si dze,
Eye nyemagbe tohehe na wò gbeɖe o.”
12 Elabena ale Afetɔ gblɔe nye esi:
“Gbedada mele nu vevi si wɔ wò la ŋu o.
Wò abi la mate ŋu aku o.
13 Ame aɖeke made nu eme na wò o.
Gbedada mele wò abiawo ŋu o,
Eye màte ŋu ahaya o.
14 Ame siwo katã lɔ̃a wò vevie la ŋlɔ wò be.
Womegale diwòm o.
Elabena meƒo wò abe wò futɔe ƒo wò ene,
Mehe to na wò abe tagbɔsesẽtɔ ene,
Le wò fɔɖiɖi gbogboawo kple wò nu vɔ̃ geɖeawo ta.
15 Nu ka tae nèle ɣli dom le nu vevi si wɔ wò la ta?
Gbedada mele wò vevesese la ŋu o!
Wò fɔɖiɖi gbogboawo kple wò nu vɔ̃ geɖeawo tae
Mewɔ nu sia wò ɖo.
16 Eya ta woavuvu ame siwo katã vuvu wò la;
Eye woaɖe aboyo wò ketɔwo katã.
Woada adzo ame siwo da adzo wò,
Eye mana woaha ame siwo katã ha wò la.”
17 Afetɔ be: “Mana nàhaya, eye mayɔ dɔ wò abiawo,
Togbɔ be woyɔa wò be, ame si wonya de gbe,
‘Zion, si dim ame aɖeke mele o’ hã.”
18 Ale Afetɔ gblɔe nye esi:
“Kpɔ ɖa, maƒo Yakob ƒe agbadɔwo me aboyomeawo nu ƒu,
Eye makpɔ nublanui na eƒe avɔgbadɔwo.
Woagbugbɔ du la atso ɖe eƒe kpo dzi,
Eye mɔ́ sesẽ la anɔ teƒe si wòle be wòanɔ.
19 Akpedada aɖi le wo nu, eye nukolawo ƒe gbe aɖi tso wo dome.
Mana woadzi ɖe edzi, eye womazu ʋɛ o;
Mana woasɔ gbɔ kpaŋkpaŋ,
Eye womaganye ame maɖinuwo o.
20 Viawo anɔ abe ale si wonɔ tsã ene,
Eye eƒe ameha la ali ke sesĩe le ŋkunyeme.
Eye matu nu kple ame siwo katã te wo ɖe anyi la.
21 Eƒe bubume anye wo dometɔ ɖeka,
Eye eƒe dziɖula ado tso eme.
Mana wòate va ahagogom.”
“Elabena ame kae ake atse ate ɖe ŋunye?” Afetɔ ye gblɔe.
22 “Mianye nye dukɔ, eye manye mia Mawu.”
23 Kpɔ ɖa! Afetɔ ƒe ahom tu le dziku helĩhelĩ me,
Enye yali sesẽ si abla ɖe ame vɔ̃ɖiwo ƒe ta ŋu kɔtɔɔ.
24 Afetɔ ƒe dziku helĩhelĩ la nu mafa o,
Va se ɖe esime wòwɔ nu si wòɖo ɖe dzi me de goe hafi.
Le ŋkekeawo ƒe nuwuɣi la, miase egɔme.

YEREMIYA 31
1  Afetɔ be: “Ɣemaɣi la, manye Mawu na Israel ƒe ƒomeawo katã; eye woawo hã woanye nye dukɔ.”
 2 Ale Afetɔ gblɔe nye esi:
“Wove dukɔ la ƒe ame siwo metsi yi nu le gbea dzi o la nu
Esime Israel zɔ yina eƒe gbɔɖemeƒe.”
 3 Afetɔ ɖe eɖokui fiam le didiƒe ke gblɔ be:
“Metsɔ lɔlɔ̃ mavɔ lɔ̃ wò.
Esia tae meve nuwò eye mehe wò ɖe ɖokuinye ŋu ɖo.
 4 Oo Israel ɖetugbui leaƒe, magbugbɔ wò aɖo te, ekema woagbugbɔ wò atso.
Àgatsɔ wò axatsɛwo,
Eye àɖo to me aɖu ɣe dzidzɔtɔe.
 5 Àgade waingble ɖe Samaria-towo dzi;
Agbledelawo ade waingble, eye woaɖu wo me kutsetsewo.
 6 Elabena ŋkeke li gbɔna, esime dzɔla siwo le Efrayim tonuto me la ado ɣli be:
‘Mitso, mina míayi Zion, le Afetɔ mía Mawu la gbɔ.’”
 7 Elabena ale Afetɔ gblɔe nye esi:
“Mitso aseye ɖe Yakob ŋu,
Mido dzidzɔɣli elabena miekɔ ta gbɔ dukɔwo ŋu.
Miɖe gbeƒãe; mina kafukafu naɖi, eye migblɔ be:
‘Oo Afetɔ, xɔ na wò dukɔ, xɔ na Israel ƒe ame susɔeawo.’
 8 Mekplɔ wo tso dziehenyigba dzi gbɔna,
Eye maƒo wo nu ƒu tso anyigba ƒe mlɔenuwo ke.
Ŋkunɔwo kple bunɔwo,
Funɔwo kple nyɔnu siwo le ku lém la katã anɔ wo dome.
Woanye ameha gã aɖe atrɔ agbɔ ava afi sia.
 9 Woanɔ avi dzi ava.
Makplɔ wo, esime woanɔ koko ƒom be mave yewo nu.
Makplɔ wo ato mɔ sɔsɔe si dzi womakli nu le o la dzi
Ayi tɔʋuwo to.
Elabena menye Fofo na Israel, eye Efrayim ye nye nye ŋgɔgbevi.”
10 Mi dukɔwo, mise Afetɔ ƒe nya,
Eye miɖe gbeƒãe le ƒukpo siwo le didiƒe ʋĩi la dzi be:
“Ame si ka Israel hlẽ la aƒo wo nu ƒu.
Eye wòakpɔ edzi, abe ale si lãkplɔvi wɔna na eƒe lãha ene.
11 Elabena Afetɔ axɔ Yakob aƒle,
Eye wòaɖee tso ame si sesẽ wui la si me.
12 Woava tso aseye le Zion ƒe togbɛ la dzi,
Eye woakpɔ dzidzɔ ɖe Afetɔ ƒe nyuiwɔwɔ ŋu,
Ðe nuku, wain yeye kple ami ŋu,
Ðe alẽwo kple nyiwo ƒe viwo ŋu.
Woanɔ abe abɔ si wode tsii nyuie ene,
Eye nu magati kɔ na wo azɔ o.”
13 “Ɣemaɣi la, ɖetugbuiwo,
Ðekakpuiwo kple ame tsitsiwo siaa aɖu ɣe akpɔ dzidzɔ.
Mana woƒe konyifafa nazu aseyetsotso.
Mafa akɔ na wo ahana woakpɔ dzidzɔ ɖe konyifafa teƒe.
14 Matsɔ nu geɖewo aɖi ƒo na nunɔlawo,
Eye nye nyuiwɔwɔ aɖi ƒo na nye dukɔ la,” Afetɔ ye gblɔe.
15 “Ale Afetɔ gblɔe nye esi:
‘Wose konyifagbe kple avifafa vevie le Rama:
Rahel le fafam na viaŋutsuwo.
Egbe be woagafa akɔ na ye le ye viwo ŋuti o,
Elabena womegali o.’”
16 Ale Afetɔ gblɔe nye esi:
“‘Dzudzɔ avifafa, eye wò ŋkuwo megafa aɖatsi o,
Elabena teƒeɖoɖo li na wò dɔwɔwɔ,
Woagatrɔ agbɔ tso futɔ la ƒe anyigba dzi,’ Afetɔ ye gblɔe.
17 Afetɔ be: ‘Mɔkpɔkpɔ li na wò le etsɔme,
Eye viwòwo atrɔ gbɔ va woawo ŋutɔwo ƒe anyigba dzi.’”
18 “Mesee Efrayim le nu xam le nu si dzɔ ɖe edzi la ta be:
‘Èɖɔm ɖo, eye mena nèɖɔm ɖo
Abe nyivi si womemla o ene.
Kplɔm gbɔe, ekema matrɔ ɖe ŋuwò,
Elabena wòe nye Afetɔ nye Mawu.
19 Elabena ete ɖe dzinye eye metrɔ gbɔ;
Eye esi meva se nuwo gɔme la, meƒo aklito.
Ŋu kpem, eye meɖi gbɔ,
Elabena nye ɖevimeŋukpe le ŋunye.’”
20 “Ðe Efrayim menye vi vevi, vi si gbɔ nyemelɔ̃a nu le oa?
Elabena zi ale si mehe nya ɖe eŋu la, megaɖoa ŋku edzi kokoko.
Esia tae nye dɔme trɔ ɖe eŋu.
Makpɔ nublanui nɛ godoo,” Afetɔ ye gblɔe.
21 “Ði mɔfiakpewo ɖe mɔ to na ɖokuiwò,
Eye nàtu dzesikpewo na ɖokuiwò.
Wò ŋku nenɔ mɔ gã si dzi wòle be nàto la ŋu.
Oo, Israel ɖetugbui, trɔ gbɔ, trɔ gbɔ va wò du siawo me.
22 Oo, vinyɔnu mawɔnuteƒe, ɣekaɣie nàtsa tsaglãla ase ɖo?
Elabena Afetɔ wɔ nu yeye aɖe le anyigba dzi:
Nyɔnu anɔ ŋutsu yome vevie.”
23 Ale aʋakɔwo ƒe Afetɔ, Israel ƒe Mawu la, gblɔe nye esi: “Ne meƒo woƒe aboyomewo nu ƒu la, woagagblɔ nya sia le Yuda-nyigba dzi kple eƒe duwo me be: ‘Oo dzɔdzɔenyenye nɔƒe, Oo to kɔkɔe, Afetɔ neyra wò.’ 
24 Amewo anɔ Yuda kple eƒe duwo katã me ɖekae hekpe ɖe agbledelawo kpakple ame siwo kplɔa lãhawo ŋu. 
25 Elabena mana ame siwo ŋu ɖeɖi te la nakpɔ gbɔdzɔe, eye mana ame sia ame si nu ti kɔ na la naɖi ƒo.”
26 Ale menyɔ heʋu ŋku; ke nye alɔ̃ vivi nam.
27 Afetɔ be: “Kpɔ ɖa! Ŋkekewo li gbɔna, esime maƒã amegbetɔ kple lãwo abe nuku ene ɖe Israel ƒe aƒe kple Yuda ƒe aƒe la me.”
28 Afetɔ be: “Ale si ko nye ŋku nɔ wo ŋu, be maho wo, amu wo, agbã wo, atsrɔ̃ wo ahagblẽ wo domee la, nenema kee nye ŋku anɔ wo ŋu, be maɖo wo te, eye mado wo. 
29 Le ŋkeke mawo me la, womagagblɔ be, ‘Fofowo ɖu waintsetse siwo le lalãm, eye aɖu nyɔ viwo’ azɔ o. 
30 Ke boŋ ame sia ame aku le eya ŋutɔ ƒe vodada ta. Ame si ɖu waintsetse siwo le lalãm la, eyae aɖu anyɔ.”
31 Afetɔ be: “Kpɔ ɖa! Ŋkekewo li gbɔna, esime mabla nu yeye kple Israel ƒe aƒe la kpakple Yuda ƒe aƒe la. 
32 Manɔ abe nu, si mebla kple wo tɔgbuiwo le gbe si gbe melé woƒe alɔnu kplɔ wo tso Egipte-nyigba dzi, ‘nye nubabla si wotu, evɔ nyee nye woƒe aƒetɔ ŋutɔŋutɔ hafi,’ la ene o, Afetɔ ye gblɔe.”
33 “Elabena esiae nye nu, si mabla kple Israel ƒe aƒe la le ŋkeke mawo megbe. Matsɔ nye se la ade wo me, eye maŋlɔe ɖe woƒe dzi me. Manye woƒe Mawu, eye woawo woanye nye dukɔ,” Afetɔ ye gblɔe.
34 “Ame aɖeke magafia nu ehavi kple nɔvia agblɔ be, ‘Dze si Afetɔ!’ o, elabena wo katã woadze sim, tso ɖeviwo dzi va se ɖe tsitsiawo dzi,” Afetɔ ye gblɔe. “Elabena matsɔ woƒe vodada ake, eye nyemagaɖo ŋku woƒe nu vɔ̃wo dzi azɔ o.”
35 Ale Afetɔ,
Ame si naa ɣe klẽna le ŋkeke me,
Eye wòwɔ se na ɣleti kple ɣletiviwo be woaklẽ le zã me,
Ame si blua atsiaƒu be eƒe tsotsoewo nadze agbo,
Ame si ŋkɔe nye aʋakɔwo ƒe Afetɔ gblɔe nye esi:
36 “‘Ne ɖoɖo siawo do kpo nu le ŋkunyeme la,
Ema ko hafi ame siwo nye Israel ƒe dzidzimeviwo la nu atsi, eye womaganye dukɔ le ŋkunyeme azɔ o,’ Afetɔ ye gblɔe.”
37 Ale Afetɔ gblɔe nye esi: “‘Ne woate ŋu adzidze dziƒo si le dzi, eye woate ŋu adzro anyigba la ƒe agunuwo me kpɔ la, ema ko hafi nye hã magbe Israel ƒe dzidzime blibo la le nu siwo katã wowɔ la ta,’ Afetɔ ye gblɔe.”
38 Afetɔ be: “Kpɔ ɖa! Ŋkekewo li gbɔna, esime woatso du la na Afetɔ tso Hananel ƒe Mɔ́ la gbɔ va se ɖe Dzogoedzigbo la nu. 
39 Eye dzidzeka la ato Gareb togbɛ la gbɔ tẽe atrɔ aɖo ta Goa. 
40 Eye nu kukuwo kple dzofi ƒe bali bliboa kple toŋugblewo katã va ɖo keke Kidron-tɔʋu la nu ke va se ɖe Sɔgbo la ƒe dzogoe dzi ɖo ta ɣedzeƒe la, anye nu kɔkɔe na Afetɔ. Womahoe o, eye womagagbãe akpɔ gbeɖe o.”

YEREMIYA 32
1 Esiae nye Afetɔ ƒe gbe si va na Yeremiya le Yuda-fia Zedekiya ƒe ƒe ewolia, si nye Nebukadnezar ƒe ƒe wuienyilia me. 
2 Ɣemaɣi la, Babilon-fia ƒe aʋakɔwo ɖe to ɖe Yerusalem; eye wode nyagblɔɖila Yeremiya gaxɔ me ɖe Dzɔlawo ƒe Xɔxɔnu, si le Yuda-fia ƒe me. 
3 Elabena Yuda-fia Zedekiya dee gaxɔ me gblɔ be: “Nu ka tae nèle nya gblɔm ɖi alea be, ‘Ale Afetɔ gblɔe nye esi, “Matsɔ du sia ade asi na Babilon-fia, eye wòaxɔe, 
4 Yuda-fia Zedekiya ŋutɔ hã mado le Kaldeatɔwo si me o, elabena woatsɔe ade asi na Babilon-fia godoo, aƒo nu kplii, eye woakpɔ wo nɔewo ŋkume kple ŋkume”; 
5 Afetɔ be: “Akplɔ Zedekiya ayi Babilon, eye wòanɔ afi ma va se ɖe esime matrɔ susu ɖe eŋu; togbɔ be miele aʋa wɔm kple Kaldeatɔwo hã la, miaɖu dzi o.’”
6 Yeremiya gblɔ be: “Afetɔ ƒe gbe va nam be, 
7 ‘Kpɔ ɖa, fofowò nɔvi Salum viŋutsu Hanamel gbɔna gbɔwò agblɔ na wò be: “Ƒle nye agble si le Anatot, elabena wòe nye ame gbãtɔ si kpɔ mɔ agbugbɔe aƒle.”’”
8 Ale fofonye nɔvi viŋutsu Hanamel va gbɔnye le Dzɔlawo ƒe Xɔxɔnu la, abe ale si Afetɔ gblɔe ene, eye wògblɔ nam be: “Meɖe kuku, ƒle nye agble si le Anatot le Benyamin-nyigba dzi, elabena wòe dze be nànyi edome, eye wòe dze agbugbɔe aƒle. Ƒlee na ɖokuiwò.” Ale mede dzesii be Afetɔ ƒe nyae wònye.
9 Ale meƒle agble si le Anatot la le fofonye nɔvi viŋutsu Hanamel si. Eye meda ga la tsɔ nɛ: sekel adre kple klosalo ewo. 
10 Eye meŋlɔe ɖe agbalẽ me, tre enu, eye meɖe ɖasefowo heda ga la le nudanu me. 11 Metsɔ anyigbaƒlegbalẽ si nu wotre kple esi nu wometre o, abe ale si se la kple ɖoɖoawo bia ene, 
12 eye metsɔ anyigbaƒlegbalẽ la na Baruk, Neriya vi, Mahseya vi, le fofonye nɔvi viŋutsu Hanamel kple ɖasefo siwo de asi anyigbaƒlegbalẽa te kple Yudatɔ siwo katã bɔbɔ nɔ Dzɔlawo Ƒe Xɔxɔnu la ŋkume.
13 Eye mede se na Baruk le wo ŋkume be: 
14 “Ale aʋakɔwo ƒe Afetɔ, Israel ƒe Mawu la, gblɔe nye esi: ‘Tsɔ agbalẽ siawo, anyigbaƒlegbalẽ sia si nu wotre kple agbalẽ kemɛa si nu wometre o la, eye nàtsɔ wo ade ze me, ne woanɔ anyi eteƒe nadidi.’ 
15 Elabena ale aʋakɔwo ƒe Afetɔ, Israel ƒe Mawu la, gblɔe nye esi: ‘Woagaƒle aƒewo, agblewo kple waingblewo le anyigba sia dzi.’”
16 Esi metsɔ anyigbaƒlegbalẽ la na Neriya vi Baruk megbe la, medo gbe ɖa na Afetɔ be: 
17 “Ao Aƒetɔ Dziɖulagã Afetɔ! Wòe tsɔ wò ŋusẽ gã kple wò alɔ si nèdo ɖa la wɔ dziƒowo kple anyigba. Naneke mekpe na wò akpa o, 
18 Wò, Ame si vea ame akpewo nu, eye nèɖoa fofowo ƒe vodada teƒe na wo megbeviwo, Mawu vavã la, Mawu gã, Ŋusẽtɔ, si ŋkɔe nye aʋakɔwo ƒe Afetɔ. 
19 Ame si ƒe adaŋudede kpe, eye eƒe nuwɔnawo sɔ gbɔ, wò, ame si ƒe ŋkuwo kpɔa amegbetɔwo ƒe mɔwo katã, ne nàwɔ na ame sia ame ɖe eƒe zɔzɔme kple eƒe nuwɔnawo nu. 
20 Wò, ame si wɔ dzesiwo kple nukunuwo le Egipte-nyigba dzi eye wogale nyanya va se ɖe egbe sia eye nèwɔ ŋkɔ na ɖokuiwò le Israel kple amegbetɔwo dome, abe ale si wòle egbe sia ene. 
21 Eye nètsɔ dzesiwo, nukunuwo, asi sesẽ, alɔ si nèdo ɖa kple ŋɔdzi gã kplɔ wò dukɔ Israel tso Egipte-nyigba dzi.
22 “Emegbe nètsɔ anyigba sia si ŋu nèka atam be yeatsɔ ana wo tɔgbuiwo, anyigba si dzi notsi kple anyitsi le sisim le la na wo. 
23 Eye wova xɔe wòzu wo tɔ, gake wogbe toɖoɖo wò gbe, eye womezɔ le wò se la nu o. Womewɔ nu siwo ƒe se nède na wo la dometɔ aɖeke o; eya ta nèna vɔ̃ siawo katã dzɔ ɖe wo dzi. 
24 Kpɔ ɖa, amewo va ƒu kpo ɖe dua ŋu be yewoaxɔe, eye woatsɔ du sia ade asi na Kaldeatɔ siwo le aʋa wɔm kplii la, le yi, dɔwuame kple dɔvɔ̃ ta; nya siwo katã nègblɔ la va eme, abe ale si nèle ekpɔm ene. 
25 Gake Oo Aƒetɔ Dziɖulagã Afetɔ, ègblɔ nam be, ‘Tsɔ ga nàƒle agble, eye nàɖe ɖasefowo,’ evɔ wole dua tsɔ ge ade asi na Kaldeatɔwo.”
26 Eye Afetɔ ƒe gbe va na Yeremiya be: 
27 “Kpɔ ɖa, nyee nye Afetɔ, amegbetɔwo katã ƒe Mawu. Ðe nane sesẽ nam akpa? 
28 Eya ta ale Afetɔ gblɔe nye esi, ‘Kpɔ ɖa, matsɔ du sia ade asi na Kaldeatɔwo kple Babilon-fia Nebukadnezar, eye wòaxɔe. 
29 Kaldeatɔ siwo le aʋa wɔm kple du sia la ava tɔ dzo du sia wòafiã, hekpe ɖe xɔ siwo tame wodoa dzudzɔ ɖo na Baal, eye woƒoa aha ɖi na mawu bubuwo, be woatsɔ ado dziku nam la ŋu.’
30 “‘Elabena Israel-viwo kple Yudatɔwo le nu vɔ̃ɖi wɔwɔ dzi le ŋkunyeme tso woƒe ɖevime ke; Israel-viwo tsɔ woƒe asinudɔwɔwɔ le dziku dom nam,’ Afetɔ ye gblɔe. 
31 ‘Maɖee ɖa le nye ŋkuta elabena dziku kple dɔmedzoe dodo dzi koe du sia le nam tso gbe si gbe wotsoe va se ɖe egbe sia, 
32 le Israel-viwo kple Yudatɔwo, woawo ŋutɔwo, woƒe fiawo, woƒe amegãwo, woƒe nunɔlawo kple woƒe nyagblɔɖilawo, Yudatɔwo kple Yerusalem nɔlawo, ƒe nu vɔ̃ɖi siwo katã wowɔ be woatsɔ ado dziku nam la ta. 
33 Wotrɔa megbe deam, eye menye ŋkume o; togbɔ be mefiaa nu wo enuenu hã la, wo dometɔ aɖeke meɖoa to ne wòaxɔ amehehe o. 
34 Wotsɔ woƒe ŋunyɔnuwo ɖo aƒe si ŋu woyɔa nye ŋkɔ ɖo la me, ne woagblẽ kɔ ɖo nɛ. 
35 Wotu nuxeƒewo hã na Baal ɖe Hinom Vi Ƒe Bali la me, ne woatɔ dzo wo viŋutsuwo kple wo vinyɔnuwo na Molek, nu si nyemeɖo na wo o eye meva dzi me nam hã kpɔ be woawɔ ŋunyɔnu sia atsɔ able Yuda ade nu vɔ̃ me o.’
36 “Eya ta ale Afetɔ, Israel ƒe Mawu la, gblɔ ɖe du sia si ŋu miawo miele gbɔgblɔm le be woatsɔe ade asi na Babilon-fia to yi, dɔwuame kple dɔvɔ̃ dzi la ŋue nye esi, 
37 ‘Kpɔ ɖa, maƒo wo nu ƒu tso anyigba siwo katã dzi meka wo hlẽ ɖo le nye dziku, nye dɔmedzoe kple nye nyanyra me la dzi; makplɔ wo agbɔe ava teƒe sia, eye mana woanɔ anyi dedie. 
38 Woanye nye dukɔ, eye manye woƒe Mawu. 
39 Mana dzi ɖeka kple mɔ ɖeka wo, ne woavɔ̃m ɣeawokatãɣi, ne eme nanyo na woawo ŋutɔwo kple wo megbeviwo. 
40 Mabla nu mavɔ kpli wo, ale be nyemadzudzɔ nyuiwɔwɔ na wo o; madee woƒe dzi me be woavɔ̃m, ne woagate ɖa le ŋunye o. 
41 Makpɔ dzidzɔ le nyuiwɔwɔ na wo ŋu, eye mali ke wo ɖe anyigba sia dzi, tso nye dzi blibo kple nye luʋɔ blibo me.’”
42 “Elabena ale Afetɔ gblɔe nye esi, ‘Ale si ko mehe vɔ̃ gã siawo katã va dukɔ sia dzii la, nenemae mawɔ nyui siwo katã ƒe ŋugbe dom mele la hã na wo. 
43 Woaƒle agblewo le anyigba sia dzi, anyigba si ŋu miele gbɔgblɔm le be: “Ezu gbegbe, eye amegbetɔ kple lãwo megale edzi o. Wotsɔe de asi na Kaldeatɔwo.”’
44 “‘Woatsɔ ga aƒle agblewo, eye woawɔ agbalẽ ɖe wo dzi, woatre wo nu, eye woaɖe ɖasefowo le Benyamin-nyigba dzi, le Yerusalem nutowo me, le Yuda duwo me, le tonuto la ƒe duwo me, le balimeduwo me kple anyieheduwo me, elabena makplɔ woƒe aboyomewo agbɔe,’ Afetɔ ye gblɔe.”

YEREMIYA 33
1 Eye Afetɔ ƒe gbe va na Yeremiya zi evelia, esime wosikae ɖe Dzɔlawo ƒe Xɔxɔnu la be: 
2 “Ale Afetɔ, anyigba Wɔla, Afetɔ, Ame si mèe heɖo egɔme anyi sesĩe; eya, ame si ŋkɔe nye Afetɔ la, gblɔe nye esi, 
3 ‘Yɔm, ekema matɔ na wò, eye magblɔ nu gã siwo gɔme womate ŋu ase o, eye mènya o la, na wò.’”
4 “Elabena ale Afetɔ, Israel ƒe Mawu la, gblɔ ɖe du sia me xɔwo kple Yuda-fiawo ƒe xɔ siwo wogbã ƒu anyi, le kpoƒuƒuawo kple yi ta, 
5 kple ame siwo va be yewoawɔ aʋa kple Kaldeatɔwo, eye woatsɔ woawo ŋutɔwo, ame siwo mewu le nye dziku kple nye dɔmedzoe me la, ƒe kukuawo ayɔ teƒe siawo, wo, ame siwo ƒe nu vɔ̃ɖi wɔwɔ ta meɣla nye ŋkume ɖe du sia ɖo la, ŋue nye esi: 
6 ‘Kpɔ ɖa, mana woahaya, eye woƒe lãme nasẽ; mada gbe le wo ŋu, eye mana ŋutifafa kple nyateƒe wo fũu. 
7 Makplɔ Yuda ƒe aboyomeawo kple Israel ƒe aboyomeawo agbɔe, eye maɖo wo te abe tsã ene. 
8 Makɔ wo ŋu tso nu vɔ̃ siwo katã wowɔ ɖe ŋunye ƒe fɔɖiɖi me, eye matsɔ nu vɔ̃ siwo wowɔ ɖe ŋunye kple woƒe dzidadawo katã ƒe fɔɖiɖi ake wo. 
9 Azu dzidzɔŋkɔ, kafukafu kple atsyɔ̃ nam le anyigbadzidukɔ siwo katã ase nyui siwo katã wɔm mele na wo ŋu nya la dome. Ŋɔdzi alé wo, eye woadzo nyanyanya le nyui siwo katã mawɔ nɛ kple ŋutifafa si manae la ta.’”
10 “Ale Afetɔ gblɔe nye esi: ‘Teƒe sia si ŋu miegblɔ le be, ezu aƒedo, eye amegbetɔ kple lãwo megale afi ma o, Yuda duwo kple Yerusalem kpɔdomeewo tsi ƒuƒlu, eye amegbetɔ kple lã aɖeke megale eme o la, woagase 
11 aseyetsotso kple dzidzɔɣli, ŋugbetɔsrɔ̃ ƒe gbe kple ŋugbetɔ ƒe gbe, eye woase amewo ƒe gbe woanɔ gbɔgblɔm be: “Mikafu aʋakɔwo ƒe Afetɔ, elabena Afetɔ nyo; eƒe lɔlɔ̃ si nu metsina o la li tegbee!”’
“‘Woatsɔ akpedanunana ava Afetɔ ƒe aƒe la me abe tsã ene, elabena makplɔ anyigba la ƒe aboyomeawo agbɔe,’ Afetɔ ye gblɔe.”
12 “Ale aʋakɔwo ƒe Afetɔ gblɔe nye esi: ‘Lãnyiƒe aganɔ teƒe zuaƒedo sia, si amegbetɔ alo lãwo megale o kple eƒe duwo katã me na lãkplɔviwo, eye woana woƒe lãhawo nagbɔ ɖe eme le afi ma.’
13 “‘Alẽhawo agato wo xlẽlawo ƒe asi te ava yi le tonuto la ƒe duwo me, le balimeduwo me, le anyieheduwo me, le Benyamin-nyigba dzi, le Yerusalem nutowo me kple Yuda duwo me,’ Afetɔ ye gblɔe.”
14 “Afetɔ be: ‘Kpɔ ɖa! Ŋkekewo li gbɔna, esime mawɔ ŋugbe nyui si medo ɖe Israel ƒe aƒe kple Yuda ƒe aƒe ŋu la dzi. 
15 Le ŋkeke mawo me le ɣemaɣi la, mana atilɔ dzɔdzɔe nadze na David, adrɔ̃ ʋɔnu dzɔdzɔe, eye wòawɔ nu dzɔdzɔe le anyigba la dzi. 
16 Le ŋkeke mawo me la, woaɖe Yuda, eye Yerusalem anɔ anyi dedie. Ŋkɔ si woayɔ nɛ ye nye: Afetɔe Nye Míaƒe Dzɔdzɔenyenye.’”
17 “Elabena ale Afetɔ gblɔe nye esi: ‘David ƒe dzidzimevi si abɔbɔ nɔ Israel ƒe aƒe ƒe fiazikpui dzi la nu matso o, 
18 eye ame si asa numevɔ, atsɔ nuɖuvɔsa ado dzudzɔe, eye wòasa vɔ bubuwo ɣesiaɣi la, nu matso le nunɔla siwo nye Lewi viwo dome le ŋkunyeme o.’”
19 Eye Afetɔ ƒe gbe gava na Yeremiya be: 
20 “Ale Afetɔ gblɔe nye esi, ‘Ne miate ŋu atu nye nubabla le ŋkeke kple zã ŋu, ale be ŋkeke kple zã magava le woƒe ɣeyiɣi dzi o la, 
21 ema ko hafi woate ŋu atu nu, si mebla kple nye subɔla David, ale be eƒe dzidzimevi aɖeke manɔ anyi si anɔ eƒe fiazikpui dzi aɖu fia o; eye woate ŋu atu nye nu, si mebla kple nye subɔla Lewi vi siwo nye nunɔlawo hã. 
22 Ale si ko dziƒonuwo mele xexlẽ me o, eye ƒutake mele dzidze me o la, nenemae mana nye subɔla David ƒe dzidzimeviwo kple Lewi vi siwo le subɔsubɔdɔ wɔm nam la hã nadzi ɖe edzii.’”
23 Eye Afetɔ ƒe gbe gava na Yeremiya be: 
24 “Mède dzesi nya si gblɔm dukɔ sia me tɔwo le be, ‘Ƒome eve siwo Afetɔ tia la, egale wo gbe ge’ oa? Womedea bubu nye dukɔ la ŋu o, eye womegabunɛ be enye dukɔ o.
25 “Ale Afetɔ gblɔe nye esi: ‘Ale si meɖo nye nubabla anyi ɖe ŋkeke kple zã ŋu, eye mewɔ sewo na dziƒo kple anyigba la, 
26 nenemae nyemagbe Yakob kple nye subɔla David ƒe dzidzimeviwo hã akpɔ o, eye nyemado kpo dziɖulawo ɖeɖe tso eƒe dzidzimeviwo me aɖo Abraham, Isak kple Yakob ƒe dzidzimeviwo nu o. Elabena maƒo woƒe aboyomeawo nu ƒu, eye makpɔ nublanui na wo.’”

YEREMIYA 34
1 Afetɔ ƒe gbe si va na Yeremiya esime Babilon-fia Nebukadnezar kple eƒe aʋakɔ blibo la kpakple anyigbadzifiaɖuƒe siwo katã le ete, kple dukɔwo katã nɔ aʋa wɔm kple Yerusalem kpakple eƒe duwo katã, lae nye esi:
2 “Ale Afetɔ, Israel ƒe Mawu la, gblɔe nye esi, ‘Yi ɖagblɔ na Yuda-fia Zedekiya be: “Ale Afetɔ gblɔe nye esi, ‘Matsɔ du sia ade asi na Babilon-fia, eye wòatɔ dzoe. 
3 Màdo le esi me o, elabena woalé wò atsɔ ade asi nɛ. Àkpɔ Babilon-fia la kple wò ŋutɔ wò ŋkuwo, mia kplii miaƒo nu, eye àyi Babilon.’ 
4 Ke Yuda-fia Zedekiya, se Afetɔ ƒe nya, ‘Ale Afetɔ gblɔ le ŋuwòe nye esi: “Màtsi yi nu o. 
5 Àku le ŋutifafa me, woado dzo atsɔ ade bubu ŋuwò abe ale si wodo dzo na fofowòwo, fia siwo nɔ anyi do ŋgɔ na wò la ene, eye woafa na wò be, ‘Ao, aƒetɔ!’ elabena ‘nyee gblɔ nya sia,’ Afetɔ ye gblɔe.”’”’”
6 Eye nyagblɔɖila Yeremiya gblɔ nya siawo katã na Yuda-fia Zedekiya le Yerusalem, 
7 esime Babilon-fia ƒe aʋakɔwo le aʋa wɔm kple Yerusalem kple Yuda du siwo susɔ, siwo nye Lakis kple Azeka; elabena woawo koe nye du sesẽ siwo kpɔtɔ le Yuda duwo dome.
8 Esiae nye Afetɔ ƒe gbe si va na Yeremiya esime Fia Zedekiya bla nu kple ame siwo katã le Yerusalem, ne wòaɖe gbeƒã ablɔɖe na wo 
9 be ame sia ame naɖe asi le eƒe kluvi siwo nye Hebritɔwo ŋu, ŋutsuwo kple nyɔnuwo siaa, ale be ame aɖeke magana nɔvia Yudatɔ nanye eƒe kluvi o. 
10 Eya ta amegãwo katã kple dukɔ la ɖo to. Woɖo nubabla me be yewo dometɔ ɖe sia ɖe naɖe asi le eƒe kluvi kple kosi ŋu, eye wolɔ̃ be yewomagana woanye kluvi na yewo azɔ o. Woɖo to heɖe asi le wo ŋu. 
11 Ke emegbe wogakplɔ kluvi kple kosi siwo ŋu woɖe asi le la gbɔe hezi wo dzi wogazu kluviwo na wo. 
12 Eya ta Afetɔ ƒe gbe tso Afetɔ gbɔ va na Yeremiya be:
13 “Ale Afetɔ, Israel ƒe Mawu la gblɔe nye esi, ‘Mebla nu kple mia tɔgbuiwo le gbe si gbe mekplɔ wo tso Egipte-nyigba dzi tso kluviƒe me hegblɔ be: 
14 “Ne ƒe adre wu enu la, mia dometɔ ɖe sia ɖe neɖe asi le nɔvia Hebritɔ si wodzra nɛ, eye wòsubɔe ƒe ade la ŋu; ɖe asi le eŋu wòadzo le gbɔwò.” Ke mia tɔgbuiwo meɖo tom o, eye womeƒu to anyi hã o. 
15 Ke nyitsɔ laa la, miawo ŋutɔwo mietrɔ, eye miewɔ nu si le dzɔdzɔe le ŋkunyeme esi mieɖe gbeƒã ablɔɖe na mia havi, eye miebla nu le ŋkunyeme le aƒe si ŋu woyɔa nye ŋkɔ ɖo la me. 
16 Emegbe miegatrɔ hegblẽ kɔ ɖo na nye ŋkɔ la, eye mia dometɔ ɖe sia ɖe gagbugbɔ eƒe kluvi kple eƒe kosi, siwo ŋu mieɖe asi le abe ale si wodii ene la gbɔe, eye miezi wo dzi wogazu kluviwo kple kosiwo.’
17 “Eya ta ale Afetɔ gblɔe nye esi: ‘Mieɖo tom o, eye mia dometɔ aɖeke meɖe gbeƒã ablɔɖe na nɔvia kple ehavi o.’ Eya ta ale Afetɔ gblɔe nye esi: ‘Kpɔ ɖa, maɖe gbeƒã ablɔɖe na mi, be miatsi yi, dɔvɔ̃ kple dɔwuame si me, eye mana mianye ŋɔdzinu na anyigbadzifiaɖuƒewo katã. 
18 Ŋutsu siwo tu nye nubabla la eye womewɔ nu, si wobla le ŋkunyeme dzi o, esi wofe nyivi me ɖe eve heto wo dome, 
19 ame siwo nye Yuda-megãwo kple Yerusalem-megãwo, fiaŋumewo, nunɔlawo kple dukɔ la me tɔ siwo katã to nyivi la ƒe akpa eveawo dome la: 
20 matsɔ wo ade asi na woƒe futɔwo kple ame siwo le didim be yewoaɖe woƒe agbe ɖa la, woƒe kukuawo azu nuɖuɖu na dziƒoxewo kple anyigbadzilãwo. 
21 Matsɔ Yuda-fia Zedekiya kple eƒe amegãwo ade asi na woƒe futɔwo, matsɔ wo ade asi na ame siwo le didim be yewoaɖe woƒe agbe ɖa la, eye matsɔ wo ade asi na Babilon-fia ƒe aʋakɔ siwo ho dzo le mia ŋu la.’
22 “Afetɔ be: ‘Kpɔ ɖa, made se, eye makplɔ wo agbɔe ava du sia me, woawɔ aʋa kplii axɔe ahatɔ dzoe; mana Yuda duwo nazu aƒedo, eye ame aɖeke maganɔ wo me o.’”

YEREMIYA 35
1 Afetɔ ƒe gbe si va na Yeremiya le Yuda-fia Yehoyakim, Yosiya vi, ŋɔli lae nye esi: 
2 “Yi Rekab viwo ƒe me, eye nàƒo nu kpli wo ahakplɔ wo ava Afetɔ ƒe aƒe la ƒe nuɖuxɔawo dometɔ ɖeka me; eye nàna wain wo woano.”
3 Ale mekplɔ Yaazaniya, Yeremiya vi, Habaziniya vi kple nɔviawo, viawo katã, kple Rekab viwo ƒe aƒe blibo la katã 
4 yi Afetɔ ƒe aƒe la me. Mekplɔ wo va Mawu vavã la ƒe ame Hanan, Yigdaliya vi, ƒe viwo ƒe nuɖuxɔ si le amegãwo ƒe nuɖuxɔ xa le Maaseya, Salum vi, si nye agbonudzɔla ƒe nuɖuxɔ tame la me. 
5 Eye metsɔ kplu kple wainkplu siwo wain yɔ taŋ ɖo Rekab viwo ƒe aƒe la me ŋutsuwo ŋkume hegblɔ na wo be: “Mino wain.”
6 Ke woɖo eŋu be: “Míele wain no ge o, elabena mía tɔgbui Yehonadab, Rekab vi, de se sia na mí be, ‘Miawo ŋutɔwo kple mia viwo siaa migano wain gbeɖe o. 
7 Migatu xɔ o, eye migaƒã nu o; migade waingble o, eye ɖeke meganɔ mia si o. Ke boŋ minɔ avɔgbadɔwo me le miaƒe agbemeŋkekewo katã me, ne mianɔ agbe didi le anyigba si dzi mienye amedzrowo le la dzi.’ 
8 Eya ta míeɖoa to mía tɔgbui Yehonadab, Rekab vi, le nu siwo katã ƒe se wòde na mí la me, ale be míawo ŋutɔwo, mía srɔ̃wo, mía viŋutsuwo kple mía vinyɔnuwo siaa míenoa wain gbeɖe o.
9 Míetua xɔ be míanɔ wo me o, eye waingble, agble alo nuku aɖeke mele mía si o. 
10 Míenɔa avɔgbadɔwo me, eye míeɖoa to hewɔa nu siwo katã ƒe se mía tɔgbui Yehonadab de na mí la dzi. 
11 Ke esi Babilon-fia Nebukadnezar ho ɖe anyigba la ŋu la, míegblɔ be: ‘Miva míayi Yerusalem ne míasi le Kaldeatɔwo ƒe aʋakɔ la kple Siriatɔwo ƒe aʋakɔ la nu,’ esia tae míele Yerusalem ɖo.”
12 Eye Afetɔ ƒe gbe va na Yeremiya be: 
13 “Ale aʋakɔwo ƒe Afetɔ, Israel ƒe Mawu la, gblɔe nye esi, ‘Yi ɖabia Yudatɔwo kple Yerusalem nɔlawo be: Afetɔ be: “Ðe womexlɔ̃ nu mi enuenu be miaɖo to nye nyawo oa?  
14 Yehonadab, Rekab vi, de se na eƒe dzidzimeviwo be woagano wain o, eye wowɔ eƒe nya dzi, eye womenoa wain o va se ɖe egbe sia, wònye toɖoɖo wo tɔgbui ƒe sedede la. Ke nye la, meƒo nu na mi enuenu, gake mieɖo tom o. 
15 Eye meɖoa nye subɔla nyagblɔɖilawo katã ɖe mi enuenu gblɔna be: ‘Mitrɔ dzro, mia dometɔ ɖe sia ɖe netrɔ tso eƒe mɔ vɔ̃ dzi, ne miawɔ nu si le eteƒe! Migadze mawu bubuwo yome be miasubɔ wo o. Ekema mianɔ anyigba si metsɔ na mia kple mia tɔgbuiwo la dzi.’ Ke mieƒu to anyi o, eye mieɖo tom o. 
16 Yehonadab, Rekab vi, ƒe dzidzimeviwo wɔ wo tɔgbui ƒe se si wòde na wo la dzi, ke dukɔ sia ya meɖo tom o.”’”
17 “Eya ta ale aʋakɔwo ƒe Afetɔ, Israel ƒe Mawu la, gblɔe nye esi: ‘Kpɔ ɖa, mahe vɔ̃ siwo katã megblɔ ɖe Yuda kple Yerusalem nɔlawo ŋu la ava wo dzi, elabena meƒo nu na wo, ke womeɖo tom o, eye meyɔ wo, ke wometɔ o.’”
18 Eye Yeremiya gblɔ na Rekab viwo ƒe aƒe la be: “Ale aʋakɔwo ƒe Afetɔ, Israel ƒe Mawu la, gblɔe nye esi: ‘Esi mieɖo to mia tɔgbui Yehonadab ƒe sedede la helé eƒe seawo katã me ɖe asi, eye miewɔ abe ale si tututu wòde se na mi ene ta la, 
19 ale aʋakɔwo ƒe Afetɔ, Israel ƒe Mawu la, gblɔe nye esi: “Yehonadab, Rekab vi, ƒe dzidzimevi si asubɔ le ŋkunyeme la nu matso akpɔ o.”’”

YEREMIYA 36
1 Le Yuda-fia Yehoyakim Yosiya vi, ƒe ƒe enelia me la, gbe tso Afetɔ gbɔ va na Yeremiya be: 
2 “Tsɔ agbalẽ nàŋlɔ nya siwo katã megblɔ na wò ɖe Israel kple Yuda kpakple dukɔwo katã ŋu tso gbe si gbe mede asi nuƒoƒo me kpli wò, tso Yosiya ŋɔli va se ɖe egbe sia la, ɖe eme. 
3 Ðewohĩ ne Yuda ƒe aƒe la me tɔwo se vɔ̃ siwo katã meɖo be mahe va wo dzi la, woatrɔ tso woƒe mɔ vɔ̃wo dzi, eye matsɔ woƒe vodadawo kple woƒe nu vɔ̃wo ake wo.”
4 Yeremiya yɔ Baruk, Neriya vi, eye Yeremiya gblɔ Afetɔ ƒe nya siwo katã wògblɔ nɛ la na Baruk, eye wòŋlɔ wo ɖe agbalẽ xatsaxatsa la me.
5 Eye Yeremiya de se na Baruk be: “Wosikam. Nyemate ŋu ayi Afetɔ ƒe aƒe la me o. 
6 Eya ta wòe ayi aɖaxlẽ Afetɔ ƒe nya siwo megblɔ na wò nèŋlɔ ɖe agbalẽ xatsaxatsa sia me la woase. Xlẽe ɖe dukɔ la ƒe to me le Afetɔ ƒe aƒe la me le nutsidɔgbe; ale nàxlẽe na Yuda blibo si tso woƒe duwo me va la. 
7 Ðewohĩ woƒe biabia be Afetɔ nave yewo nu la ade egbɔ, eye wo dometɔ ɖe sia ɖe atrɔ tso eƒe mɔ vɔ̃wo dzi, elabena dziku kple dɔmedzoe si Afetɔ gblɔ be yeado ɖe dukɔ sia ŋu la nu sẽ ŋutɔ.”
8 Eye Baruk, Neriya vi, wɔ abe ale si nyagblɔɖila Yeremiya de se nɛ ene; exlẽ Afetɔ ƒe nyawo tso agbalẽa me le Afetɔ ƒe aƒe la me amewo se.
9 Ke le Yuda-fia Yehoyakim, Yosiya vi, ƒe ƒe atɔ̃lia ƒe ɣleti asiekelia me la, ame siwo katã le Yerusalem kple ame siwo katã tso Yuda duwo me va Yerusalem la ɖe gbeƒã be yewoatsi nu adɔ le Afetɔ ŋkume. 
10 Eye Baruk kɔ gbe dzi xlẽ Yeremiya ƒe nyawo tso agbalẽ xatsaxatsa la me ɖe dukɔ blibo la ƒe to me le Afetɔ ƒe aƒe la me, le nugbugbɔŋlɔla Gemariya, Safan vi, ƒe nuɖuxɔ me le xɔxɔnu dzigbetɔ la me, le Afetɔ ƒe aƒe ƒe agbo yeye la nu.
11 Esi Mikaya, Gemariya vi, Safan vi, se Afetɔ ƒe nya siwo katã le agbalẽa me la, 
12 eyi fia ƒe me le agbalẽŋlɔla ƒe xɔ la me. Eye amegãwo katã bɔbɔ nɔ afi ma: agbalẽŋlɔla Elisama, Delaya, Semaya vi, Elnatan, Akbor vi, Gemariya, Safan vi, Zedekiya, Hananiya vi, hekpe ɖe amegã bubuawo katã ŋu. 
13 Eye Mikaya gblɔ nya siwo katã wòse esime Baruk xlẽ agbalẽ xatsaxatsaa me nyawo ɖe dukɔ la ƒe to me la, na wo.
14 Eye amegãwo katã dɔ Yehudi, Netaniya vi, Selemiya vi, Kusi vi, ɖe Baruk gbɔ be: “Tsɔ agbalẽ si nèxlẽ ɖe dukɔ la ƒe to me la ɖe asi nàva.” Ale Baruk, Neriya vi, tsɔ agbalẽ xatsaxatsa la ɖe asi heva wo gbɔ. 
15 Eye wogblɔ nɛ be: “Míeɖe kuku, bɔbɔ nɔ anyi, ne nàkɔ gbe dzi axlẽe ɖe to me na mí.” Ale Baruk kɔ gbe dzi xlẽe na wo.
16 Esi wose nyaawo katã la, dzidzi ƒo wo wode asi wo nɔewo ƒe ŋkume kpɔkpɔ me, eye wogblɔ na Baruk be: “Ele be míana fia nase nya siawo katã godoo.” 
17 Eye wobia Baruk be: “Míeɖe kuku, gblɔe na mí, aleke newɔ te ŋu ŋlɔ nya siawo? Ðe Yeremiya gblɔ wo na wò nèŋlɔa?” 
18 Baruk ɖo eŋu na wo be: “Eyae ke nu gblɔ nya siawo katã nam, eye metsɔ agbalẽŋlɔtsi ŋlɔe ɖe agbalẽ xatsaxatsa sia me.” 
19 Eye amegãawo gblɔ na Baruk be: “Yi ɖaɣla ɖokuiwò, wò kple Yeremiya, ale be ame aɖeke naganya afi si miele o.”
20 Eye wova fia la gbɔ le xɔxɔnu la, gake wotsɔ agbalẽ la da ɖe agbalẽŋlɔla Elisama ƒe xɔ me, eye wogblɔ nya siwo katã wose la na fia la.
21 Eye fia la dɔ Yehudi ɖa be wòaɖatsɔ agbalẽ la vɛ. Eye wòyi ɖatsɔe tso agbalẽŋlɔla Elisama ƒe xɔ la me vɛ. Eye Yehudi xlẽe ɖe fia la kple amegã siwo katã tɔ ɖe fiaa gbɔ la ƒe to me. 
22 Fia la bɔbɔ nɔ vuvɔŋɔlixɔ la me le ɣleti asiekelia me, eye sonu si me wodo dzo ɖo la le eŋkume. 
23 Eye ne Yehudi nya xlẽ agbalẽa ƒe akpa siwo me womae ɖo la etɔ̃ alo ene ko la, fia la tsɔa agbalẽŋlɔlawo ƒe hɛ lãnɛ tsɔ dea dzo si le sonua me la me, va se ɖe esime wòtsɔ agbalẽ bliboa katã de sonumedzoa me. 
24 Ke dzidzi meƒo wo o; fia la kple eƒe subɔvi siwo katã se nya siawo hã medze woƒe awuwo o. 
25 Togbɔ be Elnatan, Delaya kple Gemariya ɖe kuku na fia la be wòagatɔ dzo agbalẽ la o hã, meɖo to wo o. 
26 Eye fia la de se na fia ƒe vi Yeramel, Seraya, Azriel vi kple Selemiya, Abdeel vi be woayi aɖalé agbalẽŋlɔla Baruk kple nyagblɔɖila Yeremiya avɛ, ke Afetɔ tsɔ wo ɣla.
27 Esi fia la tɔ dzo agbalẽ si me nya siwo Yeremiya gblɔ na Baruk wòŋlɔ la le megbe la, Afetɔ ƒe gbe gava na Yeremiya be: 
28 “Gatsɔ agbalẽ bubu, eye nàŋlɔ nya siwo katã le agbalẽ gbãtɔ si Yuda-fia Yehoyakim tɔ dzoe me la ɖe eme. 
29 Eye nàgblɔ ɖe Yuda-fia Yehoyakim ŋu be, ‘Ale Afetɔ gblɔe nye esi: “Ètɔ dzo agbalẽ sia hegblɔ be, ‘Nu ka tae nèŋlɔ ɖe eme be: “Babilon-fia ava godoo, eye wòatsrɔ̃ anyigba sia ahana amegbetɔwo kple lãwo navɔ le edzi”?’ 
30 Eya ta ale Afetɔ gblɔ ɖe Yuda-fia Yehoyakim ŋue nye esi, ‘Ame aɖeke manɔ esi abɔbɔ nɔ David ƒe fiazikpui dzi o, eye woagblẽ eƒe kukua ɖi ŋdɔkutsu naɖu le ŋkeke me, eye ahũ nadza aƒoe le zã me. 
31 Mabia akɔnta eya kple eƒe dzidzimeviwo kpakple eƒe subɔviwo le woƒe vodada ta, eye mahe vɔ̃ siwo katã megblɔ ɖe wo ŋu la ava woawo kple Yerusalem nɔlawo kpakple Yudatɔwo dzi, elabena womeɖo to o.’”’”
32 Eye Yeremiya tsɔ agbalẽ xatsaxatsa bubu na agbalẽŋlɔla Baruk, Neriya vi la, eye wògaŋlɔ nya siwo katã Yeremiya gagblɔ nɛ siwo nɔ agbalẽ si Yuda-fia Yehoyakim tɔ dzoe me la ɖe eme. Eye wogatsɔ nya mawo tɔgbi geɖe kpee.

YEREMIYA 37
1 Fia Zedekiya, Yosiya vi, zu fia ɖe Koniya, Yehoyakim vi teƒe; eyae Babilon-fia Nebukadnezar tsɔ ɖo fiae ɖe Yuda-nyigba dzi. 
2 Ke eya kple eŋumewo kpakple dukɔ la me tɔwo meɖo to Afetɔ ƒe nya siwo wògblɔ to nyagblɔɖila Yeremiya dzi o.
3 Eye Fia Zedekiya dɔ Yehukal, Selemiya vi kple Zefaniya, nunɔla Maaseya vi, ɖe nyagblɔɖila Yeremiya gbɔ be: “Míeɖe kuku, do gbe ɖa na Afetɔ mía Mawu la ɖe mía ta.” 
4 Yeremiya dona yia dukɔ la dome gagbɔna, elabena womedee gaxɔ me haɖe o. 
5 Ke Farao ƒe aʋakɔ ho tso Egipte, eye Kaldeatɔ siwo ɖe to ɖe Yerusalem la se wo ŋkɔ. Ale woho dzo le Yerusalem ŋu. 
6 Eye Afetɔ ƒe gbe va na nyagblɔɖila Yeremiya be: 
7 “Ale Afetɔ, Israel ƒe Mawu la, gblɔe nye esi, ‘Ale miagblɔ na Yuda-fia, si dɔ mi ɖe gbɔnye be miabia gbem lae nye esi: “Kpɔ ɖa! Farao ƒe aʋakɔ si gbɔna mia gbɔ be yewoana kpekpeɖeŋu mi la agbugbɔ ayi woƒe anyigba dzi le Egipte. 
8 Kaldeatɔwo agbugbɔ ava eye woawɔ aʋa kple du sia axɔe, eye woatɔ dzoe.” 
9 Ale Afetɔ gblɔe nye esi, “Migable mia ɖokui anɔ gbɔgblɔm be, ‘Kaldeatɔwo adzo le mía ŋu godoo’ o, elabena womele dzodzo ge o. 
10 Ne miesi Kaldeatɔwo ƒe aʋakɔ si le aʋa wɔm kpli mi la katã, eye abixɔlawo koe susɔ le wo dome hã la, woatso le woƒe agbadɔwo me ava tɔ dzo du sia.”’”
11 Esi Kaldeatɔwo ƒe aʋakɔ la ho dzo le Yerusalem ŋu le Farao ƒe aʋakɔa ta la, 
12 Yeremiya tso Yerusalem yina Benyamin-nyigba dzi be yeaxɔ yeƒe gome le afi ma le yeƒe amewo dome. 
13 Esi wòɖo Benyamin-gbo la nu la, dzɔlawo ƒe amegã si ŋkɔe nye Yiriya, Selemiya vi, Hananiya vi la, lé nyagblɔɖila Yeremiya hegblɔ be: “Kaldeatɔwo ƒe akpa dzie nèbe yeayi!” 
14 Ke Yeremiya gblɔ be: “Aʋatsoe! Nyemebe mayi Kaldeatɔwo ƒe akpa dzi o.” Ke meɖo toe o. Ale Yiriya lé Yeremiya hekplɔe yi na amegãwo. 
15 Eye amegãwo do dziku ɖe Yeremiya ŋu vevie, eye woƒoe hetsɔe de gaxɔ me ɖe agbalẽŋlɔla Yehonatan ƒe xɔ si wotsɔ wɔ gaxɔe la me. 
16 Wotsɔ Yeremiya de gaxɔ si nye tomexɔ la me, eye Yeremiya tsi afi ma ŋkeke geɖe.
17 Eye Fia Zedekiya dɔ ame woɖakplɔe vɛ, eye fia la bia gbee le adzame le eƒe me. Ebiae be, “Ðe Afetɔ ƒe gbedeasi aɖe lia?” Yeremiya ɖo eŋu be: “Ɛ̃, ɖe li!” eye wògblɔ be, “Woatsɔ wò ade asi na Babilon-fia!”
18 Azɔ hã, Yeremiya bia Fia Zedekiya be: “Nu vɔ̃ kae mewɔ ɖe wò kple wò subɔviwo kpakple dukɔ sia ŋu hafi miedem gaxɔ me? 
19 Ke afi kae miaƒe nyagblɔɖila siwo gblɔ nya ɖi na mi be, ‘Babilon-fia maho ɖe mia kple anyigba sia ŋu o’ la le? 
20 Azɔ nye aƒetɔ fia, meɖe kuku, see. Meɖe kuku, ve nunye. Mègagbugbɔm yi agbalẽŋlɔla Yehonatan ƒe xɔ me, ne maku ɖe afi ma o.” 
21 Ale Fia Zedekiya de se eye wode ga Yeremiya ɖe Dzɔlawo ƒe Xɔxɔnu la; wonaa abolo ɖekae gbe sia gbe tso abolomelawo ƒe ablɔ me, va se ɖe esime abolowo katã vɔ le dua me. Eye Yeremiya tsi Dzɔlawo ƒe Xɔxɔnu la.

YEREMIYA 38
1 Eye Sefatiya, Matan vi, Gedaliya, Pashur vi, Yukal, Selemiya vi kple Pashur, Malkiya vi se nya siwo Yeremiya gblɔ na dukɔ blibo la be: 
2 “Ale Afetɔ gblɔe nye esi, ‘Ame si atsi du sia me la, atsi yi, dɔwuame kple dɔvɔ̃ si me. Ke ame si ana ta Kaldeatɔwo la, atsi agbe, eƒe agbe azu aboyonu nɛ, eye wòanɔ agbe.’ 
3 Ale Afetɔ gblɔe nye esi: ‘Wole du sia tsɔ ge ade asi na Babilon-fia ƒe aʋakɔ la kokoko, eye wòaxɔe.’”
4 Eye amegãwo gblɔ na fia la be: “Míeɖe kuku, na woawu ŋutsu sia, elabena nya mawo, siwo gblɔm wòle na aʋawɔla siwo susɔ ɖe du sia me kple dukɔ blibo la na dzi ɖe le wo ƒo. Elabena ŋutsu sia mele dukɔ sia ƒe ŋutifafa dim o, ke eƒe gbegblẽ boŋ.” 
5 Eye Fia Zedekiya gblɔ be: “Kpɔ ɖa! Ele mia si me. Elabena fia mate ŋu axe mɔ na mi o.”
6 Eye wokplɔ Yeremiya yi ɖade fia ƒe vi Malkiya ƒe vudo si le Dzɔlawo ƒe Xɔxɔnu la me. Eye wotsɔ ka ɖiɖi Yeremiya ɖe eme. Ke tsi mele vudoa me o, negbe ba ko, eye Yeremiya ɖo to ɖe ba la me.
7 Eye Etiopiatɔ Ebed-Melek, si nye aƒedzikpɔla le fia ƒe aƒe la me se be wotsɔ Yeremiya de vudo la me. Ke fia la bɔbɔ nɔ Benyamin-gbo la nu, 
8 eya ta Ebed-Melek do tso fia ƒe aƒe la me yi ɖagblɔ na fia la be: 
9 “Oo nye aƒetɔ fia, nu si ŋutsu siawo wɔ ɖe nyagblɔɖila Yeremiya ŋu la vɔ̃ɖi! Wotsɔe de vudo me, eye aku ɖe afi ma, elabena abolo aɖeke megale dua me o.”
10 Eye fia la de se na Etiopiatɔ Ebed-Melek be: “Kplɔ ŋutsu blaetɔ̃ tso afi sia kpe ɖe ɖokuiwò ŋu, ne miaɖe nyagblɔɖila Yeremiya le vudoa me hafi wòava ku.” 
11 Eya ta Ebed-Melek kplɔ ŋutsuawo kpe ɖe eɖokui ŋu, eye woyi fia ƒe aƒe la me, le xɔ si le kesinɔnudzraɖoƒe la te, eye wòtsɔ ɖovuwo kple avɔ xoxowo le afi ma hetsɔ ka ɖiɖi wo ɖo ɖe Yeremiya le vudoa me. 
12 Eye Etiopiatɔ Ebed-Melek gblɔ na Yeremiya be: “Meɖe kuku, tsɔ ɖovuawo kple avɔawo de axatome nàtsɔ kaawo ade wo te.” Eye Yeremiya wɔe nenema, 
13 eye wotsɔ kaawo he Yeremiya do goe tso vudoa me. Eye Yeremiya tsi Dzɔlawo ƒe Xɔxɔnu la.
14 Fia Zedekiya dɔ ame woyi ɖakplɔ nyagblɔɖila Yeremiya va egbɔe le Afetɔ ƒe aƒe la ƒe mɔnu etɔ̃lia, eye fia la gblɔ na Yeremiya be: “Mele nya aɖe bia ge wò. Mègaɣla naneke ɖem o.” 
15 Yeremiya ɖo eŋu na Zedekiya be: “Ne megblɔe na wò la, àwum. Eye ne meɖo aɖaŋu na wò hã la, mèle to ɖo gem o.” 
16 Eye Fia Zedekiya ka atam na Yeremiya le adzame be: “Zi ale si Afetɔ, ame si na agbe mí le agbe la, nyemawu wò o, eye nyematsɔ wò ade asi na ame siwo le didim be yewoaɖe wò agbe ɖa la o.”
17 Eye Yeremiya gblɔ na Zedekiya be: “Ale aʋakɔwo ƒe Afetɔ, Israel ƒe Mawu la, gblɔe nye esi, ‘Ne èna ta Babilon-fia ƒe amegãwo la, ekema woakpɔ wò agbe ta, womatɔ dzo du sia o, eye wò kple wò aƒemetɔwo miatsi agbe. 
18 Ke ne màna ta Babilon-fia ƒe amegãwo o la, ekema woatsɔ du sia ade asi na Kaldeatɔwo woatɔ dzoe, eye màdo le wo si me o.’”
19 Eye Fia Zedekiya gblɔ na Yeremiya be: “Mele vɔvɔ̃m na Yudatɔ siwo yi ɖade Kaldeatɔwo dzi, elabena ne wotsɔm de asi na wo la, woawɔ funyafunyam.” 
20 Ke Yeremiya gblɔ be: “Womatsɔ wò ade asi na wo o. Meɖe kuku, ɖo to Afetɔ ƒe gbe le nya si gblɔm mele na wò la me, ekema eme anyo na wò, eye àtsi agbe. 
21 Ke ne ègbe be yemana ta o la, nu si Afetɔ ɖe fiam lae nye esi: 
22 Kpɔ ɖa, wokplɔ nyɔnu siwo katã kpɔtɔ ɖe Yuda-fia ƒe me la yina Babilon-fia ƒe amegãwo gbɔ, eye wole gbɔgblɔm be,
‘Ame siwo ŋu nèɖo ŋu ɖo la ble wò, eye woɖu dziwò.
Wona wò afɔ ɖo ba.
Eye woka le ŋuwò to mɔ bubu dzo.’
23 Wokplɔ srɔ̃wòwo katã kple viwòwo do goe yina na Kaldeatɔwo, eye wò ŋutɔ hã màdo le wo si me o, ke boŋ Babilon-fia ƒe asi asu dziwò, eye woatɔ dzo du sia le tawò.”
24 Eye Zedekiya gblɔ na Yeremiya be: “Mègana ame aɖeke nanya naneke tso nya siawo ŋu o, ne nàgaku o. 
25 Eye ne amegãwo se be meƒo nu kpli wò, eye wova gbɔwò va bia wò be, ‘Míeɖe kuku, gblɔ nya si nègblɔ na fia la na mí. Mègaɣla naneke ɖe mí o, ekema míawu wò o. Nya kae fia la gblɔ na wò?’ la, 
26 ekema nàgblɔ na wo be: ‘Ðe meyi ɖaɖe kuku na fia la be wòana woave nunye, ne wòagagbugbɔm aɖo ɖe Yehonatan ƒe xɔ la me, ne maku ɖe afi ma o.’”
27 Emegbe amegãwo katã va Yeremiya gbɔ hebia gbee. Ke eya hã gblɔ nya siwo katã fia la de se nɛ be wòagblɔ la na wo. Ale womegagblɔ nya aɖeke nɛ o, elabena ame aɖeke mese dzeɖoɖoa o. 
28 Yeremiya tsi Dzɔlawo ƒe Xɔxɔnu la, va se ɖe gbe si gbe woxɔ Yerusalem, enɔ afi ma esime woxɔ Yerusalem.

YEREMIYA 39
1 Le Yuda-fia Zedekiya ƒe ƒe asiekelia ƒe ɣleti ewolia me la, Babilon-fia Nebukadnezar kple eƒe aʋakɔ blibo la va Yerusalem heɖe to ɖee.
2 Le Zedekiya ƒe ƒe wuiɖekɛlia me, le ɣleti enelia ƒe ŋkeke asiekelia dzi la, wogbã dua ƒe gli. 
3 Eye Babilon-fia ƒe amegãwo katã va bɔbɔ nɔ Domegbo la nu: Nergal-Sarezer si nye Samgar la, Nebo-Sarsekim si nye Rabsaris la, Nergal-Sarezer si nye Rabmag la, hekpe ɖe Babilon-fia ƒe amegã susɔeawo katã ŋu.
4 Esi Yuda-fia Zedekiya kple aʋawɔlawo katã kpɔ wo ko la, wosi dzo le dua me le zã me to fia ƒe abɔ me mɔ, to agbo si le gli eveawo dome la nu; eye woto mɔ si ɖo ta Araba. 
5 Ke Kaldeatɔwo ƒe aʋakɔwo ti wo yome, eye wova tu Zedekiya le Yeriko tagba. Wolée hekplɔe vɛ na Babilon-fia Nebukadnezar le Ribla, le Hamat-nyigba dzi, afi si wòdrɔ̃ ʋɔnui le.
6 Babilon-fia na wowu Zedekiya viwo le eya ŋutɔ ŋkume le Ribla, eye Babilon-fia na wowu Yuda bubumewo katã. 
7 Egbã ŋku na Zedekiya, eye wòde akɔblikunyowui, be yeakplɔe ayi Babilon.
8 Eye Kaldeatɔwo tɔ dzo fia ƒe aƒe la kple dukɔ la ƒe aƒewo, eye wogbã Yerusalem gliawo ƒu anyi. 
9 Ke fiaŋudzɔlawo ƒe amegã Nebuzaradan ɖe aboyo dukɔ la me tɔ susɔe siwo kpɔtɔ ɖe dua me kple ame siwo na ta heva egbɔ kpakple ame mamlɛawo katã yi Babilon.
10 Ke fiaŋudzɔlawo ƒe amegã Nebuzaradan gblẽ dukɔ la ƒe ame dahe siwo si naneke mele o la, dometɔ aɖewo ɖe Yuda-nyigba dzi. Gbe ma gbe la, etsɔ waingblewo kple agblewo na wo be woawɔ dɔ le wo me.
11 Eye Babilon-fia Nebukadnezar de se na fiaŋudzɔlawo ƒe amegã Nebuzaradan le Yeremiya ŋu be: 
12 “Kplɔe, eye wò ŋku nenɔ eŋu, mègawɔ vɔ̃ aɖekee o, ke boŋ wɔ nu sia nu si wòbia wò la nɛ.”
13 Eya ta fiaŋudzɔlawo ƒe amegã Nebuzaradan kple Nebusazban, si nye Rabsaris la, Nergal-Sarezer, si nye Rabmag la, kple Babilon-fia ƒe ame ŋkutawo katã dɔ ame ɖa, 
14 eye woyi ɖakplɔ Yeremiya tso Dzɔlawo ƒe Xɔxɔnu la vɛ, eye wotsɔe de asi na Gedaliya, Ahikam vi, ame si nye Safan vi, be wòakplɔe ayi eƒe me. Ale wònɔ dukɔ la dome.
15 Esime wosika Yeremiya ɖe Dzɔlawo ƒe Xɔxɔnua la, Afetɔ ƒe gbe va nɛ be: 
16 “Yi nàgblɔ na Etiopiatɔ Ebed-Melek be, ‘Ale aʋakɔwo ƒe Afetɔ, Israel ƒe Mawu la, gblɔe nye esi: “Kpɔ ɖa, mana nye nyawo nava eme ɖe du sia ŋu hena vɔ̃, menye na nyui o, eye àkpɔ nu siawo gbe ma gbe.”’
17 “Afetɔ be: ‘Maɖe wò gbe ma gbe eye womatsɔ wò ade asi na ame siwo le ŋɔ dzim na wò la o.’
18 “‘Elabena mana nàtsi agbe godoo, eye màtsi yi nu o. Wò agbe azu aboyonu na wò, elabena èɖo ŋu ɖe ŋunye,’ Afetɔ ye gblɔe.”

YEREMIYA 40
1 Esiae nye Afetɔ ƒe gbe si va na Yeremiya, esi fiaŋudzɔlawo ƒe amegã Nebuzaradan ɖe asi le eŋu le Rama. Ede kunyowu Yeremiya, kplɔe yi afi ma, eye wònɔ Yerusalem kple Yudatɔ siwo katã woɖe aboyoe yina Babilon la dome. 
2 Fiaŋudzɔlawo ƒe amegã ɖe Yeremiya ɖe aga gblɔ nɛ be: “Afetɔ wò Mawue gblɔ vɔ̃ sia ɖe teƒe sia ŋu, 
3 eye Afetɔ na wòva eme, eye wòna wòdzɔ abe ale si wògblɔe ene, elabena miewɔ nu vɔ̃ ɖe Afetɔ ŋu, eye mieɖo to eƒe gbe o. Eya tae nu sia dzɔ ɖe mia dzi ɖo. 
4 Azɔ meɖe kunyowuwo le alɔnu na wò egbe. Ne enyo ŋuwò be nàyi Babilon kplim la, ekema va míayi, eye makpɔ dziwò. Ke ne menyo ŋuwò be nàyi Babilon kplim o la, ekema mègayi o. Kpɔ ɖa! Anyigba blibo la le ŋkuwòme. Afi sia afi si nyo ŋuwò nèdi be yeayi la, yi faa.”
5 Hafi Yeremiya natrɔ be yeadzo la, Nebuzaradan gblɔ be: “Gbugbɔ yi Gedaliya, Ahikam vi, Safan vi, ame si Babilon-fia tsɔ ɖo Yuda duwo nu la gbɔ, eye nànɔ egbɔ le dukɔ la dome; alo afi sia afi si dze ŋuwò be yeayi la, yi faa.” Eye fiaŋudzɔlawo ƒe amegã la na nuɖuɖu kple nunanae, eye wòɖe asi le eŋu wòdzo. 
6 Ale Yeremiya va Gedaliya, Ahikam vi gbɔ le Mizpa, eye wònɔ egbɔ le ame siwo kpɔtɔ ɖe anyigbaa dzi la dome.
7 Emegbe aʋakplɔla siwo katã le gbedzi kple woƒe amewo se be Babilon-fia tsɔ Gedaliya, Ahikam vi, ɖo anyigba la nu, eye wòtsɔe ɖo ŋutsuwo, nyɔnuwo, ɖeviwo kple dukɔ la me tɔ dahewo, ame siwo womeɖe aboyoe yi Babilon o la nu. 
8 Eya ta woawo kple woƒe amewo va Gedaliya gbɔ le Mizpa. Ame siwo vae nye: Ismael, Netaniya vi, Karea vi siwo nye Yohanan kple Yonatan, Seraya, Tanhumet vi, Netofatɔ Efai ƒe viwo kple Yezaniya, Maakattɔ la ƒe vi. 
9 Eye Gedaliya, Ahikam vi, Safan vi, ka atam na wo kple woƒe amewo be: “Kaldeatɔwo subɔsubɔ megadzi ŋɔ na mi o. Minɔ anyigba la dzi, eye misubɔ Babilon-fia, ekema eme anyo na mi. 
10 Ke nye la, manɔ Mizpa, ne manɔ mia teƒe le Kaldeatɔ siwo ava mía gbɔ la ŋkume. Ke miawo la, miƒo wain kple dzomeŋɔlikutsetsewo kpakple ami nu ƒu miatsɔ ade miaƒe nuwo me, eye minɔ miaƒe du siwo miexɔ la me.”
11 Eye Yudatɔ siwo katã le Moab kple Amonitɔwo dome kple esiwo le Edom kpakple ame siwo le anyigba bubuwo katã dzi la hã se be Babilon-fia susɔ ame aɖewo ɖe Yuda, eye wòtsɔ Gedaliya, Ahikam vi, Safan vi ɖo wo nu. 
12 Eya ta Yudatɔwo katã trɔ gbɔ tso teƒe siwo woka hlẽ ɖo la, eye wova Yuda-nyigba dzi le Gedaliya gbɔ le Mizpa. Eye woƒo wain kple dzomeŋɔlikutsetsewo nu ƒu kpaŋkpaŋ.
13 Yohanan, Karea vi kple aʋakplɔla siwo katã le gbedzi la va Gedaliya gbɔ le Mizpa. 
14 Eye wogblɔ nɛ be: “Mènyae be Amonitɔwo ƒe fia Baalis dɔ Ismael, Netaniya vi, ɖa be wòaɖe wò agbe ɖa oa?” Ke Gedaliya, Ahikam vi mexɔ wo dzi se o.
15 Eye Yohanan, Karea vi, gblɔ na Gedaliya le adzame le Mizpa be: “Medi be mayi aɖawu Ismael, Netaniya vi, eye ame aɖeke manya o. Nu ka tae wòaɖe wò agbe ɖa, ne Yudatɔ siwo ƒo ƒu ɖe gbɔwò la katã naka ahlẽ, eye Yuda ƒe ame susɔeawo nu nayi?” 
16 Ke Gedaliya, Ahikam vi, gblɔ na Yohanan, Karea vi be: “Mègawɔ nu sia o, elabena alakpa dam nèle ɖe Ismael si.”

YEREMIYA 41
1 Le ɣleti adrelia me la, Ismael, Netaniya vi, Elisama vi, si tso fiaƒomea me, eye wònye fia ƒe amegãwo dometɔ ɖeka kple ame ewo bubu siwo kpe ɖe eŋu la va Gedaliya, Ahikam vi, gbɔ le Mizpa. Esi wonɔ nu ɖum ɖekae le Mizpa la, 
2 Ismael, Netaniya vi kple ame ewo siwo le eŋu la tso heda yi Gedaliya, Ahikam vi, Safan vi la. Ale wòwu ame si Babilon-fia tsɔ ɖo anyigba la nu. 
3 Eye Ismael wu Yudatɔ siwo katã le Gedaliya gbɔ le Mizpa hekpe ɖe Kaldeatɔwo ƒe aʋawɔla siwo le afi ma la ŋu.
4 Le ŋkeke evelia le Gedaliya wuwu megbe, esi ame aɖeke mekpɔ see o la, 
5 ŋutsu blaenyi tso Sekem, Silo kple Samaria va. Ŋutsu siawo lũ ge, eye wodze woƒe awuwo hesi wo ɖokuiwo, eye wotsɔ nuɖuvɔsa kple lifi ɖe asi be woatsɔ ava Afetɔ ƒe aƒe la me. 
6 Eye Ismael, Netaniya vi, do tso Mizpa le avi dzi yina wo kpe ge. Esi wòdo go wo ko la, egblɔ na wo be: “Miva Gedaliya, Ahikam vi gbɔ.” 
7 Ke esi woɖo dua me ko la, Ismael, Netaniya vi kple ŋutsu siwo le eŋu la wu wo, eye wòtsɔ wo ƒu gbe ɖe vudo la me.
8 Ke wo dometɔ ewo gblɔ na Ismael be: “Mègawu mí o, elabena míeɣla lu, ƒo, ami kple anyitsi gbogbo aɖe ɖe gbe me.” Ale megaxa wu wo kpe ɖe wo nɔviwo ŋu o. 
9 Ke vudo si me Ismael tsɔ ŋutsu siwo katã wòwu la ƒe kukuawo ƒu gbe ɖo la nye vudo gã aɖe si Fia Asa ɖe le Israel-fia Baasa ta. Eya mee Ismael, Netaniya vi lɔ ame siwo wowu la kɔ ɖo.
10 Eye Ismael ɖe aboyo dukɔ la ƒe ame susɔe siwo le Mizpa, fia vinyɔnuwo kple ame siwo katã kpɔtɔ ɖe Mizpa, ame siwo fiaŋudzɔlawo ƒe amegã Nebuzaradan tsɔ de Gedaliya, Ahikam vi, si be wòakpɔ wo dzi. Ismael, Netaniya vi, ɖe aboyo wo, eye wòdzo be yeayi go kemɛ dzi le Amonitɔwo gbɔ.
11 Esi Yohanan, Karea vi kple aʋakplɔla siwo katã le eŋu la se nu vɔ̃ɖi siwo katã Ismael, Netaniya vi, wɔ la, 
12 wokplɔ ŋutsuawo katã, eye woyi aʋa wɔ ge kple Ismael, Netaniya vi, eye wova tui le Gibeon tɔ gã la to.
13 Esi ame siwo katã le Ismael ŋu la kpɔ Yohanan, Karea vi kple aʋakplɔla siwo katã le eŋu la, dzi dzɔ wo. 
14 Eye ame siwo katã Ismael ɖe aboyoe tso Mizpa la trɔ le eyome yi Yohanan, Karea vi, la gbɔ. 
15 Ke Ismael, Netaniya vi kple ŋutsu siwo nɔ eŋu dometɔ enyi si le Yohanan nu yi Amonitɔwo gbɔ.
16 Eye Yohanan, Karea vi kple aʋakplɔla siwo katã le eŋu la kplɔ Mizpatɔ susɔeawo katã, ame siwo woxɔ tso Ismael, Netaniya vi si, esi Ismael wu Gedaliya, Ahikam vi megbe la dzoe. Wokplɔ ŋutsuwo, aʋawɔlawo, nyɔnuwo, ɖeviwo kple fiaŋumewo tso Gibeon. 
17 Eye woyi ɖanɔ Kimham ƒe dzeƒe si le Betlehem gbɔ, ne woayi mɔzɔzɔa dzi ayi Egipte 
18 le Kaldeatɔwo ta. Elabena wole wo vɔ̃m, le esi Ismael, Netaniya vi, wu Gedaliya, Ahikam vi, ame si Babilon-fia tsɔ ɖo anyigba la nu ta.

YEREMIYA 42
1 Eye aʋakplɔlawo katã kple Yohanan, Karea vi, Yezaniya, Hosaya vi kpakple dukɔ blibo la katã, tso ɖeviwo dzi va se ɖe tsitsiawo dzi va 
2 gblɔ na nyagblɔɖila Yeremiya be: “Míeɖe kuku, ve mía nu, eye nàdo gbe ɖa na Afetɔ wò Mawu la ɖe mía ta, ɖe ame susɔe siawo katã ta, elabena mí ame ʋɛ siawo koe kpɔtɔ le ame gbogboawo dome, abe ale si wò ŋutɔ nèle ekpɔm ene. 
3 Afetɔ wò Mawu la nafia mɔ si míato kple nu si míawɔ la mí.”
4 Nyagblɔɖila Yeremiya ɖo eŋu na wo be: “Mesee, mado gbe ɖa na Afetɔ mia Mawu la abe ale si miegblɔe ene; eye nya sia nya si Afetɔ atsɔ aɖo eŋu na mi la, eyae magblɔ na mi. Nyemaɣla nya aɖeke ɖe mi o.”
5 Wogblɔ na Yeremiya be: “Afetɔ nenye ɖasefo anukwaretɔ kple nuteƒewɔla ɖe mía ŋu, ne míewɔ abe ale si tututu Afetɔ wò Mawu la gblɔ na wò be nàgblɔ na mí ene o. 
6 Eɖanye nyui alo vɔ̃ o, Afetɔ mía Mawu, ame si gbɔ míele dɔwòm ɖo la ƒe gbee míaɖo toe, be eme nanyo na mí le esi míeɖo to Afetɔ mía Mawu ƒe gbe ta.”
7 Le ŋkeke ewo megbe la, Afetɔ ƒe gbe va na Yeremiya. 
8 Eya ta edɔ woɖayɔ Yohanan, Karea vi kple aʋakplɔla siwo katã le eŋu kpakple dukɔ blibo la, tso ɖeviwo dzi va se ɖe tsitsiawo dzi vɛ. 
9 Egblɔ na wo be: “Ale Afetɔ, Israel ƒe Mawu, ame si gbɔ miedɔm ɖo be matsɔ miaƒe biabia ayi eŋkume be wòave mia nu la, gblɔe nye esi: 
10 ‘Ne mienɔ anyigba sia dzi la, ekema nye hã matu mi, eye nyemagbã mi o, mado mi, eye nyemaho mi o; eye vɔ̃ si mehe va mia dzi la ate ɖe dzinye. 
11 Migavɔ̃ na Babilon-fia si vɔ̃m miele la o.’ “Afetɔ be: ‘Migavɔ̃e o, elabena meli kpli mi, be maxɔ na mi, eye maɖe mi tso esi me. 
12 Makpɔ nublanui na mi, eye eya hã akpɔ nublanui na mi ahana miatrɔ va miawo ŋutɔwo miaƒe anyigba dzi.
13 “‘Ke ne miebe, “Kpao, míele anyigba sia dzi nɔ ge o!” eye miegbe toɖoɖo Afetɔ mia Mawu ƒe gbe 
14 hele gbɔgblɔm be, “Kpao, ke boŋ míayi Egipte-nyigba dzi, afi si míakpɔ aʋawɔwɔ aɖeke teƒe, eye míase lãdzo ƒe ɖiɖi le o, afi si abolodɔ mawu mí le o; afi mae míanɔ” la, 
15 ekema mi Yuda ƒe ame susɔeawo, mise Afetɔ ƒe gbe. Ale aʋakɔwo ƒe Afetɔ, Israel ƒe Mawu la, gblɔe nye esi: “Ne mieɖoe kplikpaa be yewoayi Egipte, eye mieyi be yewoaɖanɔ afi ma la, 
16 ekema yi si tututu vɔ̃m miele la atu mi le Egipte-nyigba dzi afi ma, eye dɔwuame si tututu le ŋɔ dzim na mi la anɔ mia yome ayi Egipte afi ma, eye afi mae miaku ɖo. 
17 Eye ame siwo katã aɖoe kplikpaa be yewoayi Egipte aɖanɔ afi ma la, woawoe atsi yi, dɔwuame kple dɔvɔ̃ si me. Woƒe ame aɖeke matsi agbe alo asi o, le vɔ̃ si he ge mala ava wo dzi la ta.”’
18 “Elabena ale aʋakɔwo ƒe Afetɔ, Israel ƒe Mawu la, gblɔe nye esi: ‘Ale si ko metrɔ nye dziku kple nye dɔmedzoe kɔ ɖe Yerusalem nɔlawo dzi la, nenema kee matrɔ nye dɔmedzoe akɔ ɖe miawo hã mia dzi ne mieyi Egipte, miazu fiƒode kple ŋɔdzinu, ɖiŋudonu kple vlodonu, eye miagakpɔ teƒe sia kple ŋku akpɔ o.’
19 “Oo Yuda ƒe ame susɔeawo, Afetɔ gbe na mi. Migayi Egipte o. Minyae nyuie be mexlɔ̃ nu mi egbea 
20 be miaƒe vodada ahe ku vɛ na mi. Elabena miawo ŋutɔwoe dɔm ɖe Afetɔ mia Mawu la gbɔ be: ‘Do gbe ɖa na Afetɔ mía Mawu ɖe mía ta, eye nàgblɔ nu sia nu si Afetɔ mía Mawu gblɔ la na mí, ne míawɔe.’ 
21 Eye megblɔ wo na mi egbea, ke miele to ɖo ge Afetɔ mia Mawu la ƒe gbe, alo awɔ nya siwo wògblɔ nam be magblɔ na mi la dzi o. 
22 Eya ta minyae nyuie be miatsi yi, dɔwuame kple dɔvɔ̃ si me le teƒe si le mia dzrom miebe yewoayi aɖanɔ la.”

YEREMIYA 43
1 Esi Yeremiya gblɔ Afetɔ woƒe Mawu ƒe nya siawo katã na dukɔ bliboa, nya sia nya si Afetɔ woƒe Mawu dɔe be wòagblɔ na wo vɔ la, 
2 Azariya, Hosaya vi kple Yohanan, Karea vi kpakple dadalawo katã gblɔ na Yeremiya be: “Alakpa dam nèle! Afetɔ mía Mawu medɔ wò be nàgblɔ be: ‘Migayi Egipte aɖanɔ afi ma o.’ 
3 Ke boŋ Baruk, Neriya vi ye le ʋu yɔm ɖe tewò ɖe mía ŋu, ne woatsɔ mí ade asi na Kaldeatɔwo, ale be woawu mí alo aɖe aboyo mí ayi Babilon.”
4 Eya ta Yohanan, Karea vi kple aʋakplɔlawo katã kpakple dukɔ blibo la meɖo to Afetɔ ƒe gbe be woanɔ Yuda-nyigba dzi o. 
5 Ale Yohanan, Karea vi kple aʋakplɔlawo katã kplɔ Yuda ƒe ame susɔe siwo trɔ gbɔ tso dukɔ siwo katã me woka wo hlẽ ɖo be yewoava nɔ Yuda-nyigba dzi la. 
6 Wokplɔ ŋutsuwo, nyɔnuwo, ɖeviwo, fia vinyɔnuwo kple ame sia ame si fiaŋudzɔlawo ƒe amegã Nebuzaradan gblẽ ɖe Gedaliya, Ahikam vi, Safan vi gbɔ, hekpe ɖe nyagblɔɖila Yeremiya kple Baruk, Neriya vi ŋu dzoe. 
7 Ale woyi Egipte-nyigba dzi, elabena womeɖo to Afetɔ ƒe gbe o, eye wova keke Tahpanhes ke.
8 Eye Afetɔ ƒe gbe va na Yeremiya le Tahpanhes be: 
9 “Tsɔ kpe gãwo nàɖi ɖe Farao ƒe aƒe si le Tahpanhes la ƒe mɔnu le anyikpe siwo woɖo ɖe anyigba la te le Yuda ŋutsuwo ŋkume. 
10 Eye nàgblɔ na wo be: ‘Ale aʋakɔwo ƒe Afetɔ, Israel ƒe Mawu la, gblɔe nye esi: “Kpɔ ɖa, madɔ ame woaɖakplɔ nye subɔvi Babilon-fia Nebukadnezar vɛ, mali eƒe fiazikpui ɖe kpe siawo, siwo meɣla la dzi, eye wòakeke eƒe fiaɖuƒe ƒe agbadɔ ɖe wo dzi. 
11 Ava si Egipte-nyigba. Ame si dze na dɔvɔ̃ la, woatsɔe ade asi na dɔvɔ̃ wòaku. Ame si dze na aboyoɖeɖe la, woaɖe aboyoe, eye ame si dze na yi la, woatsɔe ade asi na yi. 
12 Matɔ dzo Egipte mawuwo ƒe xɔwo, eye wòatɔ dzo wo ahaɖe aboyo wo. Ado Egipte-nyigba abe ale si ko lãkplɔvi doa awui ene, eye wòadzo le afi ma le ŋutifafa me. 
13 Agbã sɔti siwo le Bet-Semes le Egipte-nyigba dzi la gudugudu, eye wòatɔ dzo Egipte mawuwo ƒe xɔwo.”’”

YEREMIYA 44
1 Afetɔ ƒe gbe si va na Yeremiya hena Yudatɔ siwo katã le Egipte-nyigba dzi, ame siwo le Migdol, Tahpanhes, Nof kple Patros-nyigba dzi lae nye esi: 
2 “Ale aʋakɔwo ƒe Afetɔ, Israel ƒe Mawu la, gblɔe nye esi, ‘Miawo ŋutɔwo miekpɔ vɔ̃ siwo katã mehe va Yerusalem kple Yuda duwo katã dzi, wozu aƒedo egbe sia, eye ame aɖeke mele wo me o. 
3 Nu vɔ̃ɖi siwo wowɔ tsɔ do dziku nam, esi woyi ɖasa vɔ na mawu bubu siwo woawo loo alo miawo kple mia tɔgbuiwo mienya o, eye wosubɔ wo la tae. 
4 Meɖo nye subɔla nyagblɔɖilawo katã ɖe mi enuenu gblɔ be: “Meɖe kuku, miganɔ ŋunyɔnu sia, si melé fui la wɔm o.” 
5 Ke womeɖo to loo alo ƒu to anyi, ne woatrɔ tso woƒe nu vɔ̃ɖi wɔwɔ me, ale be woagasa vɔ na mawu bubuwo azɔ o. 
6 Ale metrɔ nye dɔmedzoe kple nye dziku kɔ ɖi, eye wòbi le Yuda duwo kple Yerusalem kpɔdomeewo, eye wozu aƒedo kple gbegbe, abe ale si wole egbe sia ene.’
7 “Eya ta ale aʋakɔwo ƒe Afetɔ, Israel ƒe Mawu la, gblɔe nye esi, ‘Nu ka tae miahe vɔ̃ gã sia ava mia ɖokuiwo dzi, ale be ŋutsu kple nyɔnu, ɖevi kple vidzĩ siaa natsrɔ̃ le mia dome le Yuda, eye ame aɖeke magasusɔ na mi o? 
8 Nu ka tae miatsɔ miaƒe asinudɔwɔwɔwo ado dziku nam, esi miesa vɔ na mawu bubuwo le Egipte-nyigba si dzi mieyi be miaɖanɔ la dzi? Miatsrɔ̃, eye miazu ɖiŋudonu kple vlodonu le anyigbadzidukɔwo katã dome. 
9 Ðe mieŋlɔ mia tɔgbuiwo ƒe nu vɔ̃ɖi, Yuda-fiawo kple wo srɔ̃wo ƒe nu vɔ̃ɖi, miawo ŋutɔwo kple mia srɔ̃wo ƒe nu vɔ̃ɖi, siwo miewɔ le Yuda-nyigba dzi kple Yerusalem kpɔdomeewo la bea? 
10 Va se ɖe egbe sia la, miebɔbɔ mia ɖokui o, ŋɔ medzi mi o, eye miezɔ ɖe nye se kple nye ɖoɖo siwo metsɔ na mia kple mia tɔgbuiwo la dzi o.’
11 “Eya ta ale aʋakɔwo ƒe Afetɔ, Israel ƒe Mawu la, gblɔe nye esi, ‘Kpɔ ɖa, meɖoe be mahe vɔ̃ ava mia dzi, ne matsrɔ̃ Yuda blibo la ɖa. 
12 Mana Yuda ƒe ame susɔe siwo ɖoe kplikpaa be yewoayi Egipte-nyigba dzi aɖanɔ afi ma la katã natsrɔ̃ le Egipte-nyigba dzi. Woatsi yi nu, eye dɔwuame ana wo nu nayi, tso ɖeviwo dzi va se ɖe tsitsiawo dzi, woaku ɖe yi kple dɔwuame si me. Woazu fiƒode, ŋɔdzinu, ɖiŋudonu kple vlodonu. 
13 Matsɔ yi, dɔwuame kple dɔvɔ̃ ahe to na Egipte-nyigba dzi nɔlawo, abe ale si mehe to na Yerusalem ene. 
14 Yuda ƒe ame susɔe siwo yi be yewoaɖanɔ Egipte-nyigba dzi la dometɔ aɖeke masi alo atsi agbe atrɔ ava Yuda-nyigba dzi o. Adzro wo be yewoatrɔ ayi aɖanɔ afi ma, gake womate ŋui o, negbe aʋasila ʋɛ aɖewo ko.’”
15 Eye ŋutsu siwo katã nyae be yewo srɔ̃wo saa vɔ na mawu bubuwo kple wo srɔ̃ siwo katã le tsitre ɖe afi ma siwo nye ameha gã aɖe kpakple dukɔ blibo si le Egipte-nyigba dzi le Patros la, ɖo eŋu na Yeremiya be: 
16 “Míele to ɖo ge nya si nègblɔ na mí le Afetɔ ƒe ŋkɔ me la o. 
17 Ke boŋ míawɔ nya sia nya si do tso míaƒe nu me la dzi, ne míasa vɔ na Dziƒofianyɔnu la, eye míaƒo aha ɖi nɛ, abe ale si míawo ŋutɔwo kple mía tɔgbuiwo, míaƒe fiawo kple míaƒe amegãwo wɔ le Yuda duwo me kple Yerusalem kpɔdomeewo, esime míeɖua abolo ɖia ƒo, eye eme nyona na mí, eye vɔ̃ aɖeke medzɔna ɖe mía dzi o la ene. 
18 Tso esime míedzudzɔ vɔsasa na Dziƒofianyɔnu la, eye míegaƒoa aha ɖi nɛ o la, nu sia nu ƒe hiã tu mí, eye yi kple dɔwuame tsrɔ̃ mí keŋ.”�
19 Eye nyɔnuawo gblɔ kpee be: “Esi míesa vɔwo na Dziƒofianyɔnu la heƒo aha ɖi nɛ la, mía srɔ̃wo megbee mietona wɔa vɔsabolo vivi siwo míewɔna ɖe eƒe nɔnɔme me heƒoa aha ɖi nɛa?”
20 Eye Yeremiya gblɔ na dukɔ blibo la, ŋutsuawo, wo srɔ̃awo kple ame siwo katã le nya ŋu ɖom nɛ la be: 
21 “Vɔ siwo miawo ŋutɔwo, mia tɔgbuiwo, miaƒe fiawo, miaƒe amegãwo kple dukɔ la me tɔwo sa le Yuda duwo me kple Yerusalem kpɔdomeewo la dzie Afetɔ ɖo ŋkui, eye wòva dzi me nɛ! 
22 Mlɔeba etsɔtsɔ ti Afetɔ, le miaƒe nuwɔna vɔ̃ɖiawo kple ŋunyɔnu siwo miewɔ la ta; eya tae miaƒe anyigba la zu gbegbe, ŋɔdzinu kple ɖiŋudonu, eye ame aɖeke mele edzi o, abe ale si wòle egbe sia ene. 
23 Esi miesa vɔ siawo, eye miewɔ nu vɔ̃ ɖe Afetɔ ŋu, mieɖo to Afetɔ ƒe gbe o, eye miezɔ le eƒe se kple ɖoɖowo kpakple ŋkuɖodzinyawo nu o la, esia tae vɔ̃ sia dzɔ ɖe mia dzi ɖo, abe ale si wòle egbe sia ene.”
24 Yeremiya gagblɔ na dukɔ blibo la kple nyɔnuawo katã be: “Mi Yudatɔ siwo katã le Egipte-nyigba dzi, mise Afetɔ ƒe nya. 
25 Ale aʋakɔwo ƒe Afetɔ, Israel ƒe Mawu la, gblɔe nye esi: ‘Nu si mia kple mia srɔ̃nyɔnuawo mieke nu gblɔ lae mietsɔ miaƒe asiwo wɔ, elabena miegblɔ be: “Míawɔ adzɔgbe si míeɖe be míasa vɔ na Dziƒofianyɔnu la, eye míaƒo aha ɖi nɛ la dzi godoo.” Mi nyɔnu siawo miele miaƒe adzɔgbeɖeɖeawo dzi wɔ ge kokoko.’
26 “Eya ta mi Yudatɔ siwo katã le Egipte-nyigba dzi, mise Afetɔ ƒe nya, ‘Afetɔ be: “Kpɔ ɖa, metà nye ŋkɔ gã la be Yudatɔ aɖeke magayɔ nye ŋkɔ aka atam le Egipte-nyigba blibo la katã dzi azɔ agblɔ be, ‘Zi ale si Aƒetɔ Dziɖulagã Afetɔ le agbe!’ o. 
27 Kpɔ ɖa, nye ŋku le wo ŋu hena vɔ̃wɔwɔ, eye menye na nyuiwɔwɔ o; yi kple dɔwuame ana Yudatɔ siwo katã le Egipte-nyigba dzi la nu nayi va se ɖe esime woatsrɔ̃ avɔ. 
28 Ame ʋɛ aɖewo koe asi le yi nu atrɔ tso Egipte-nyigba dzi agbɔ va Yuda-nyigba dzi. Eye Yuda ƒe ame susɔe siwo katã yi Egipte-nyigba dzi be yewoaɖanɔ afi ma la adze si ame si ƒe nyawo va eme, be tɔnyee loo alo woawo tɔe hã!”’”
29 “Afetɔ be, ‘Esiae anye dzesi na mi be mahe to na mi le teƒe sia, ne miadze sii be vɔ̃ si megblɔ ɖe mia ŋu la ava eme godoo. 
30 Ale Afetɔ gblɔe nye esi: “Kpɔ ɖa, matsɔ Egipte-fia Farao Hofra ade asi na eƒe futɔwo kple ame siwo le didim be yeaɖe eƒe agbe ɖa la si, abe ale si ko metsɔ Yuda-fia Zedekiya de asi na eƒe futɔ kple ame si le didim be yeaɖe eƒe agbe ɖa, si nye Babilon-fia Nebukadnezar la ene.”’”

YEREMIYA 45
1 Nya siwo nyagblɔɖila Yeremiya gblɔ na Baruk, Neriya vi, esime Yeremiya gblɔ nya siawo nɛ wòŋlɔ ɖe agbalẽ me le Yuda-fia Yehoyakim, Yosiya vi, ƒe ƒe enelia me lae nye esi:
2 “Baruk, ale Afetɔ, Israel ƒe Mawu la, gblɔ ɖe ŋuwòe nye esi, 
3 ‘Ègblɔ be: “Baba nam, elabena Afetɔ tsɔ nuxaxa kpe ɖe vevesese ŋu nam! Meɖe hũ nu ti kɔ nam, eye nyemekpɔ gbɔɖemeƒe aɖeke o.”’
4 “Ale nàgblɔ nɛ ye nye esi, ‘Ale Afetɔ gblɔe nye esi: “Kpɔ ɖa! Mele nu si metu la, gbãm ƒu anyi, eye mele nu si medo la, hom—ava anyigba blibo la dzi. 
5 Ke wò ya èle nu gãwo dim na ɖokuiwò. Mègadi nu mawo o.”’
“Afetɔ be: ‘Elabena mahe gbegblẽ ava ŋutilãwo katã dzi, ke mana wò agbe nazu aboyonu na wò le teƒe siwo katã nàyi.’”

YEREMIYA 46
1 Esiae nye Afetɔ ƒe gbe si va na nyagblɔɖila Yeremiya ɖe dukɔwo ŋu: 
2 Hena Egipte, ɖe Egipte-fia Farao Neko ƒe aʋakɔ si le Frat-tɔsisia nu, ame si dzi Babilon-fia Nebukadnezar ɖu le Karkemis, le Yuda-fia Yehoyakim, Yosiya vi ƒe ƒe enelia me la ŋu:
 3 “Midzra akpoxɔnu suewo kple akpoxɔnu gãwo ɖo,
Ne miayi aʋa.
 4 Mi sɔdolawo, mibla akpa na sɔwo, mide sɔwo dzi.
Eye miɖɔ gakuku miava tɔ ɖi.
Minyre akplɔwo eye miado miaƒe gawuwo.
 5 ‘Nu ka ŋuti dzidzi ƒo wo mekpɔ?
Wogbugbɔ ɖe megbe, woɖu woƒe aʋawɔlawo dzi.
Vɔvɔ̃ ɖo wo wosi, eye woƒe aʋawɔlawo metrɔ kpɔ megbe o.
Ŋɔdzi li godoo,’ Afetɔ ye gblɔe.
 6 ‘Ame ɖeablɛ mate ŋu asi o, eye kalẽtɔwo mate ŋu ade afɔ du me o.
Wokli nu le dziehe le Frat-tɔsisi la to
Hedze anyi.’
 7 Ame kae nye esia gbɔna abe Nil-tɔsisi ene,
Abe tɔsisi siwo me tsiwo dze agbo ene?
 8 Egipte gbɔna abe Nil-tɔsisi ene, eye eƒe tsiwo le
Abe tɔsisi si dze agbo ene,
Egblɔ be, ‘Maho aɖagbagba ɖe anyigba la dzi.
Matsrɔ̃ du la kple emenɔlawo siaa.’
 9 Mi sɔwo, miho yi!
Mi tasiaɖamwo, minyè zi ge ɖe eme!
Kalẽtɔwo neho,
Kus kple Put, ame siwo si me akpoxɔnu le,
Kple Ludtɔwo, ame siwo nye aŋutrɔdalawo, eye wovua da me.
10 “Ŋkeke ma nye Aƒetɔ Dziɖulagã, aʋakɔwo ƒe Afetɔ tɔ, enye hlɔ̃biaŋkeke si dzi wòabia hlɔ̃ eƒe ketɔwo le. Yi aɖu nu aɖi ƒo, eye wòano woƒe ʋu wòaɖi kɔ nɛ, elabena Aƒetɔ Dziɖulagã, Afetɔ, aʋakɔwo ƒe Mawu la, le vɔ sa ge le dziehenyigba dzi le Frat-tɔsisi la nu.
11 Oo Egipte ɖetugbui leaƒe,
Yi Gilead nàxɔ balsam-mi.
Dzodzroe nèle atike geɖe wɔm,
Elabena màhaya akpɔ o.
12 Dukɔwo se ale si wodo vlo wò,
Eye wò ɣlidodo xɔ anyigba la katã dzi.
Elabena kalẽtɔ kli kalẽtɔ,
Ale be wo ame evea siaa dze anyi.”
13 Nya si Afetɔ gblɔ na nyagblɔɖila Yeremiya ku ɖe ale si Babilon-fia Nebukadnezar gbɔna Egipte-nyigba si ge ŋu lae nye esi:
14 “Migblɔe le Egipte, eye miɖe gbeƒãe le Migdol,
Miɖe gbeƒãe le Nof kple Tahpanhes.
Migblɔ be: ‘Tso nàdzra ɖo nàva tɔ ɖi,
Elabena yi aɖu nu le ŋuwò godoo va kpe.
15 Nu ka tae wò ŋusẽtɔwo nu yi ale?
Womete ŋu nɔ te o,
Elabena Afetɔ tutu wo ƒu anyi.
16 Wo dometɔ geɖe kli nu dze anyi.
Wogblɔ na wo nɔewo be:
“Tso! Na míagbugbɔ ayi míaƒe dukɔ kple mía denyigba dzi
Le yi sẽŋuta la ta.”’
17 Eye wogblɔ le afi ma be:
‘Ɣli ƒuƒlu dola koe Egipte-fia Farao nye.
Ena mɔnukpɔkpɔa to eŋu.’
18 Ale Fia si ŋkɔe nye aʋakɔwo ƒe Afetɔ gblɔe nye esi: ‘Zi ale si mele agbe la,
Ava, abe ale si Tabor le towo dome
Kple Karmel le atsiaƒu nu ene.
19 Oo Egipte vinyɔnu,
Do aboyomeyigba.
Elabena Nof azu ŋɔdzinu;
Woatɔ dzoe, ale be ame aɖeke maganɔ eme o.
20 Egipte le abe nyinɔe dzeani aɖe ene,
Gake nu dzodzoe téamewo atso dziehe ava ƒo ɖe edzi.
21 Asrafo siwo wòda, eye wole eme la, hã le abe nyivi damiwo ene,
Ke woawo hã wogbugbɔ ɖe megbe hesi.
Womete ŋu nɔ te o,
Elabena woƒe xaxagbe ɖo,
Eye akɔntabiaɣi de.’
22 ‘Eŋkɔ le ɖiɖim abe da si le yiyim gɔdɔgɔdɔ̃ tɔ ene,
Elabena woɖee ɖe enu kple fíawo
Abe ŋutsu siwo le atiwo tsom ene.
23 Woaƒo eƒe ave la, togbɔ be womate ŋu ayi eme o hã,’ Afetɔ ye gblɔe.
‘Elabena wosɔ gbɔ wu ʋetsuviwo, womele xexlẽ me o.
24 Ŋukpe alé Egipte vinyɔnu la.
Woatsɔe ade asi na dziehedukɔ la.’
25 “Aʋakɔwo ƒe Afetɔ, Israel ƒe Mawu la, gblɔ be: ‘Kpɔ ɖa, matrɔ ɖe Amon si le No ŋu, ɖe Farao ŋu, ɖe Egipte ŋu, ɖe eƒe mawuwo ŋu, ɖe eƒe fiawo ŋu—ɛ̃, matrɔ ɖe Farao kple ame siwo katã le ŋu ɖom ɖe eŋu la ŋu.’
26 “‘Matsɔ wo ade asi na ame siwo le didim be yewoaɖe woƒe agbe ɖa, eye matsɔ wo ade asi na Babilon-fia Nebukadnezar kple eƒe subɔviwo. Gake emegbe woaganɔ eme abe tsãŋkekewo ene,’ Afetɔ ye gblɔe.
27 ‘Ke wò, nye subɔla Yakob, mègavɔ̃ o,
Oo Israel, dzidzi megaƒo wò o.
Elabena maɖe wò tso didiƒe
Kple wò dzidzimeviwo tso anyigba si dzi woɖe aboyo wo yii la dzi.
Yakob atrɔ agbɔ ava nɔ anyi kpoo, eye womaɖe fu nɛ o,
Eye ame aɖeke mado voɖi nɛ o.
28 Afetɔ be, ‘Wò nye subɔla Yakob, mègavɔ̃ o, elabena meli kpli wò.’
Matsrɔ̃ amewo le dukɔ siwo katã dome meka wò hlẽ ɖo la me,
Ke nyematsrɔ̃ wò ya o.
Mahe to na wò ale si dze,
Gake nyemagbe tohehe na wò o.”

YEREMIYA 47
1 Esiae nye Afetɔ ƒe gbe si va na nyagblɔɖila Yeremiya ɖe Filistitɔwo ŋu hafi Farao va si Gaza. 
2 Ale Afetɔ gblɔe nye esi:
“Kpɔ ɖa! Tsi tso dziehe gbɔna.
Azu tɔɖɔɖɔ.
Aɖɔ aɖe anyigba la kple edzinuwo katã,
Du la kple emenɔlawo.
Amewo ado ɣli,
Eye anyigba la dzi nɔla ɖe sia ɖe afa avi vevie.
 3 Ne wose eƒe sɔtsuwo ƒe afɔzi,
Eƒe aʋatasiaɖamwo ƒe hoowɔwɔ
Kple eƒe tasiaɖamfɔwo ƒe ɖiɖi la,
Fofowo matrɔ ɖe wo viwo ŋu be yewoakpe ɖe wo ŋu o,
Elabena woƒe asiwo ado agblɔ,
 4 Elabena ŋkeke si gbɔna la atsrɔ̃ Filistitɔwo katã;
Atsrɔ̃ Tiro kple Sidon ƒe kpeɖeŋutɔ ɖe sia ɖe si susɔ.
Elabena Afetɔ atsrɔ̃ Filistitɔwo,
Ame siwo nye Kaftor ƒukpo dzi nɔlawo ƒe ame susɔeawo.
 5 Gaza ƒe ta abebe.
Wona ɖoɖoe zi le Askelon nu.
Oo mi ame siwo susɔ ɖe woƒe bali me,
Ɣekaɣie mianɔ ŋuti sim na mia ɖokui ase ɖo?
 6 Ao! Afetɔ ƒe yi!
Ɣekaɣi hafi nànɔ anyi kpoo?
Trɔ yi wò aku me.
Gbɔ ɖe eme, eye nànɔ anyi kpoo.
 7 Aleke wɔ wòanɔ anyi kpoo
Esi Afetɔ ɖe gbe nɛ?
Be wòaho ɖe Askelon kple ƒuta ŋu,
Afi mae wòdɔe ɖo.”

YEREMIYA 48
1  Ðe Moab ŋu: Ale aʋakɔwo ƒe Afetɔ, Israel ƒe Mawu la, gblɔe nye esi:
“Baba na Nebo, elabena wotsrɔ̃e!
Woxɔ Kiriatayim, eye ŋukpe lée.
Wogbã mɔ́ sesẽ la wòzu ŋukpe gã.
 2 Womegakafua Moab o.
Woɖo nugbe ɖe eŋu le Hesbon be:
‘Miva míatsrɔ̃e be wòaganye dukɔ azɔ o.’
“Oo Madmen, ɖoɖoe nezi le wò hã nuwò.
Elabena yi kplɔ wò ɖo.
 3 Ɣli le ɖiɖim tso Horonayim,
Le tsɔtsrɔ̃ kple anyidzedze gã ta.
 4 Wogbã Moab.
Viawo le ɣli dom.
 5 Wole avi fam le Luhit todzimɔ la dzi.
Eye wose konyifaɣli le Horonayim ƒe abu nu le gbegblẽ la ta.
 6 Misi, miɖe miaƒe agbe!
Minɔ abe sesewuti le gbedadaƒo ene.
 7 Esi nèle dzi ɖom ɖe wò dɔwɔwɔwo kple wò kesinɔnuwo ŋu ta la,
Woaxɔ wò hã.
Eye Kemos ayi aboyo me
Hekpe ɖe eƒe trɔ̃nuawo kple eƒe amegãwo ŋu.
 8 Nutsrɔ̃la la ava dze du sia du dzi,
Eye du aɖeke mado le eme o.
Bali la nu ayi,
Eye woatsrɔ̃ anyigba sɔsɔe la gbidii, abe ale si Afetɔ gblɔe ene.
 9 “Mina mɔfiadzesi Moab,
Elabena ne woatsrɔ̃e la, eƒe amewo asi,
Eƒe duwo azu ŋɔdzinu,
Eye ame aɖeke manɔ wo me o.
10 Aɖi ame si le Afetɔ ƒe dɔ la wɔm ɖewoɖewoe la ŋu kpékpekpe!
Aɖi ame si he eƒe yi ɖe megbe be yemakɔ ʋu ɖi o la ŋu kpékpekpe!
11 Moabtɔwo li bɔkɔɔ tso keke woƒe ɖevime ke,
Wole abe wain si ɖo ƒã ɖi ene,
Wometrɔ wo tso goe me kɔ ɖe goe bubu me o,
Eye womeyi aboyo me kpɔ o.
Esia tae woƒe vivi gale wo ŋu,
Eye woƒe ʋeʋẽ lilili hã metrɔ o ɖo.
12 “Afetɔ be: ‘Eya ta kpɔ ɖa, ŋkekewo li gbɔna, esi maɖo ŋutsuwo ɖa ne woatrɔ wo aƒu gbe. Woatrɔ wo abu anyi, ne woƒe goewo natsi ƒuƒlu, eye woagbã woƒe ze gãwo gudugudu. 
13 Ŋukpe alé Moabtɔwo ɖe Kemos ŋu, abe ale si ko ŋukpe lé Israel ƒe aƒe la ɖe Betel si ŋu woɖo dzi ɖo la ŋu ene.
14 Aleke wɔ mianɔ gbɔgblɔm be, “Kalẽtɔwo míenye, eye míele klalo na aʋawɔwɔ”?’
15 ‘Wotsrɔ̃ Moab,
Woho ɖe eƒe duwo ŋu.
Wowu woƒe ɖekakpui vavãwo,’
Fia si ŋkɔe nye aʋakɔwo ƒe Afetɔ ye gblɔe.
16 Moabtɔwo ƒe gbegblẽ tu aƒe,
Eye woƒe anyidzedze le du dzi gbɔna.
17 Ame siwo katã ƒo xlã wo,
Kple ame siwo katã nya woƒe ŋkɔ la, afa na wo.
Migblɔ be: ‘Oo, aleke woŋe ŋusẽ ƒe atikplɔ, si nye atsyɔ̃tikplɔ lae nye esi!’
18 Oo Dibon vinyɔnu, ɖi le wò ŋutikɔkɔe me
Eye nànɔ anyi ɖi tsikɔ nawu wò,
Elabena Moab tsrɔ̃la ho ɖe ŋuwò,
Atsrɔ̃ wò mɔ́ sesẽawo.
19 Oo Aroer nɔla, va tɔ ɖe mɔ to nànɔ nu kpɔm.
Bia ŋutsu si de afɔ du me kple nyɔnu si sí va yina la be, ‘Nya kae le dzɔdzɔm?’
20 Ŋu kpe Moab, eye ŋɔdzi lée.
Mifa avi vevie, eye mido aƒa.
Miɖe gbeƒãe le Arnon be wotsrɔ̃ Moab.
21 “Ʋɔnudɔdrɔ̃ va gbadzaƒenyigba, Holon, Yahaz kple Mefaat dzi; 
22 eva Dibon, Nebo kple Bet-Diblatayim dzi; 
23 eva Kiriatayim, Bet-Gamul kple Bet-Meon dzi; 
24 eva Keriot kple Bozra dzi; eva Moab-nyigba ƒe du siwo le didiƒe kple kpuiƒe la katã dzi.
25 ‘Woŋe Moab ƒe ŋusẽ,
Eye woŋe eƒe alɔ,’ Afetɔ ye gblɔe.
26 ‘Mina wòamu aha, elabena etɔ asi akɔ ɖe Afetɔ ŋu.
Moab mli le eƒe xeɖeɖe me,
Eye wòzu alɔmeɖenu.
27 Ðe Israel mezu alɔmeɖenu na wò oa?
Fiafiwo domee wolée lea?
Hafi nèle ta ʋuʋum le nu ƒom tsi tsitre ɖe eŋua?
28 Mi Moab nɔlawo, migblẽ duawo ɖi miayi aɖanɔ agakpe dzi,
Eye minɔ abe ahɔnɛ si wɔ atɔ ɖe agado nu ene.’”
29 “Míese Moab ƒe dada ŋkɔ be, edoa eɖokui ɖe dzi ŋutɔ,
Ewɔa eɖokui glodzoeglodzoe, edana, edzraa eɖokui, eye wòvua eƒe dzi gblotoo.”
30 “Afetɔ be: ‘Menya eƒe dɔmedzoedodo,
Gake eƒe numeɖiɖi la manɔ ɖeke me o.
Wɔna aɖeke mele wo ŋu o.
31 ‘Esia tae mafa avi vevie ɖe Moab ŋu,
Mafae ɖe Moab blibo la ŋu,
Eye maɖe hũ ɖe Kir-Heres ŋutsuwo ŋu.
32 Oo Sibma ƒe wainka, mafa na wò
Wu ale si wofa na Yazer.
Wò wainka siwo wɔ nyuie la to atsiaƒu dzi yi.
Woɖo atsiaƒu nu, woɖo Yazer.
Nutsrɔ̃lawo va dze
Wò dzomeŋɔlikutsetse kple wò waintsetse siwo nèxa la dzi.
33 Dzidzɔkpɔkpɔ kple aseyetsotso nu tso le atikutsetsebɔwo me
Kple Moab-nyigba dzi.
Mena wain megale sisim le wainfiãnuwo me o.
Ame aɖeke magafiã wain kple aseyetsotso azɔ o.
Woƒe ɣlidodo maganye dzidzɔɣli o.’”
34 “‘Ɣli ɖi le Hesbon de keke Eleale ke.
Woƒe gbe de keke Yahaz ke,
Eɖi le Zoar de Horonayim eye wòɖo Eglat-Selisiya.
Nimrim ƒe tɔʋuwo ke hã azu gbegbe.
35 Mana ame si tsɔa vɔsanu vaa nuxeƒe
Kple ame si saa vɔ na eƒe mawu la,
Nu natso le Moab,’ Afetɔ ye gblɔe.
36 ‘Esia tae nye dzi axa nu ɖe Moab ŋu abe dzekuku ene,
Eye nye dzi axa nu ɖe Kir-Heres ŋutsuwo ŋu abe dzekuku ene.
Elabena kesinɔnu si wokpɔ la atsrɔ̃.
37 Elabena tawo katã bebe,
Eye wofɔ gewo katã dzi.
Wosi asiwo katã ŋu,
Eye wosa akpanya ɖe ali!’”
38 “‘Avifafa le ɖiɖim
Le Moab ƒe xɔwo katã tame
Kple eƒe ablɔwo katã me.
Elabena megbã Moab
Abe ze manyomanyo ene,’ Afetɔ ye gblɔe.
39 ‘Oo, aleke wodo ŋɔdzi nɛ ale! Mifa avi!
Aleke Moab gbugbɔ ɖe megbe kple ŋukpe ale!
Moab zu alɔmeɖenu
Kple bibi na ame siwo katã ƒo xlãe.’”
40 “Elabena ale Afetɔ gblɔe nye esi:
‘Kpɔ ɖa! Ale si hɔ̃ dea agba anyi va ƒoa nu la,
Nenemae wòakeke eƒe aʋalawo me ava dze Moab dzi.
41 Woaxɔ duawo,
Eye woaxɔ eƒe mɔ́ sesẽawo.
Le ŋkeke ma dzi la, Moab ƒe aʋawɔlawo ƒe dzi
Anɔ abe nyɔnu si le ku lém ƒe dzi ene.’”
42 “‘Woatsrɔ̃ Moab gbidigbidi, eye maganye dukɔ o,
Elabena etɔ asi akɔ ɖe Afetɔ ŋu.
43 Oo Moab nɔla,
Ŋɔdzi, ʋe kple mɔ̃ka le ŋgɔ na wò,’ Afetɔ ye gblɔe.
44 ‘Ame si asi le ŋɔdzi nu la age adze ʋe me,
Eye ame si ado le ʋea me la, mɔ̃ aɖee.’
‘Elabena mana ƒe si me mahe to na Moab la naɖo,’ Afetɔ ye gblɔe.
45 ‘Sisilawo va tɔ ɖe Hesbon ƒe vɔvɔli te wɔnamanɔŋutɔe.
Elabena dzo ado tso Hesbon,
Eye dzoƒaɖe atso Sihon.
Afiã Moab ƒe ŋgonu
Kple ʋunyaʋunyaviwo ƒe tagowo.’
46 ‘Oo Moab, baba na wò!
Kemos ƒe amewo nu yi.
Elabena woɖe aboyo viwòŋutsuwo
Eye wokplɔ viwònyɔnuwo yi aboyo me.
47 Gake maƒo Moab ƒe aboyomeawo nu ƒu le ŋkekeawo ƒe nuwuɣi,’ Afetɔ ye gblɔe.
‘Esiae nye ʋɔnudɔdrɔ̃ si ava Moab dzi ŋu nyawo seƒe.’”

YEREMIYA 49
1 Ðe Amonitɔwo ŋu, ale Afetɔ gblɔe nye esi:
“Ðe viŋutsu aɖeke mele Israel si oa?
Ðe domenyila aɖeke mele esi oa?
Nu ka tae Malkam xɔ Gad wòzu etɔ?
Eye nu ka tae eƒe amewo le Israel ƒe duwo me?”
 2 “Afetɔ be: ‘Eya ta kpɔ ɖa, ŋkekewo li gbɔna,
Esime mana aʋaɣli naɖi ɖe Amonitɔwo ƒe du Raba ŋu.
Azu anyiglãgo ɖeɖe sɔŋ,
Eye woatɔ dzo eŋu duwo.’
‘Israel axɔ ame siwo nyae de gbe la ƒe anyigbawo wòazu etɔ,’ Afetɔ ye gblɔe.
 3 “‘Hesbon, fa avi vevie, elabena woda adzo Ai!
Oo Raba ŋu duwo, mido ɣli.
Mita akpanya.
Mifa avi vevie, eye minɔ tsatsam le lãwo ƒe glikpɔwo dome,
Elabena woakplɔ Malkam ayi aboyo me
Hekpe ɖe eƒe trɔ̃nuawo kple eƒe amegãwo ŋu.
 4 Nu ka tae nèle adegbe ƒom le bali la ŋu,
Le wò bali si me tsi le sisim le la ŋu, Oo, vinyɔnu mawɔnuteƒe,
Wò ame si le dzi ɖom ɖe wò kesinɔnuwo ŋu,
Le gbɔgblɔm be: “Ame kae ava dze dzinye?”’”
 5 “Aƒetɔ Dziɖulagã, aʋakɔwo ƒe Afetɔ be: ‘Kpɔ ɖa, mehe ŋɔdzinu aɖe
Tso ame siwo katã ƒo xlã wò la gbɔ gbɔna dziwò.
Woaka mi ahlẽ le goawo katã me,
Eye ame aɖeke maƒo ame siwo si la nu ƒu o.’”
 6 “‘Ke emegbe la, maƒo Amonitɔwo ƒe aboyomeawo nu ƒu,’ Afetɔ ye gblɔe.”
7 Ðe Edom ŋu, ale aʋakɔwo ƒe Afetɔ gblɔe nye esi:
“Ðe nunya aɖeke megale Teman oa?
Ðe aɖaŋuɖoɖo nyui bu ɖe nugɔmeselawoa?
Ðe woƒe nunya ƒaƒãa?
 8 Misi, migbugbɔ ɖe megbe!
Oo Dedan nɔlawo, miyi ɖabe ɖe to me!
Elabena mahe gbegblẽ ava Esau dzi,
Ne ɣeyiɣi de be matrɔ susu ɖe eŋu.
 9 Ne waintsetsexalawo ƒo ɖe dziwò la,
Ðe womagblẽ nuku aɖewo ɖi be amewo nafɔ oa?
Ne fiafiwo va le zã me la,
Woagblẽ nu dome va se ɖe afi aɖe ko.
10 Ke maɖe ama Esau.
Maklo nu le afi si wòbe ɖo la dzi,
Ale be mate ŋu aɣla eɖokui o.
Woatsrɔ̃ viawo, nɔviawo kple eƒe aƒelikawo,
Eye enu ayi.
11 Gblẽ wò tsyɔ̃eviwo ɖi,
Eye maxɔ wo ɖe agbe,
Eye wò ahosiwo aɖo ŋu ɖe ŋunye.”
12 Elabena ale Afetɔ gblɔe nye esi: “Kpɔ ɖa! Ne ame siwo womebu fɔe be woano kplua o noe la, ɖe woagblẽ wò ya ɖi tomahemahea? Womagblẽ wò ɖi tomahemahee o, ke boŋ ànoe godoo.”
13 Afetɔ be: “Elabena metà ɖokuinye be, Bozra azu ŋɔdzinu, vlodonu, aƒedo kple ɖiŋudonu ɖeɖe sɔŋ; eƒe duwo katã azu gbegbe ɖikaa.”
14 Mese nya aɖe tso Afetɔ gbɔ,
Woɖo ame ɖe dukɔwo dome be:
“Miƒo takpli miaho ɖe eŋu;
Midzra ɖo ɖe aʋa ŋu.”
15 “Kpɔ ɖa, mena nèle sue le dukɔwo dome,
Eye nèzu vlodonu le amegbetɔwo dome.
16 Ŋɔdzi si nèdo na amewo
Kple wò dzi ƒe dada ble wò,
Wò ame si le agato me,
Eye nèle togbɛ kɔkɔtɔ kekeake dzi.
Ne èwɔ atɔ ɖe kɔkɔƒe abe hɔ̃ ene hã la,
Matutu wò aƒu anyi tso afi ma,” Afetɔ ye gblɔe.
17 “Edom azu ŋɔdzinu. Ame sia ame si ato eŋu ava yi la ƒe nu aku, eye wòalia aku ɖe fuwɔame siwo katã va edzi la ta. 
18 Ame aɖeke manɔ afi ma o, eye ame aɖeke matso aƒe ɖe afi ma o, abe ale si ko wotrɔ Sodom kple Gomora kpakple du siwo ƒo xlã wo la bu anyii ene,” Afetɔ ye gblɔe.
19 “Kpɔ ɖa! Ame aɖe ado abe ale si dzata dona tso ave dodo siwo le Yordan ŋu me ene atso ɖe gbeɖuƒe siwo le dedie la ŋu, ke mana wòasi le egbɔ le aɖabaƒoƒo ɖeka me. Ame si wotia la, eyae matsɔ aɖo enu. Elabena ame kae de nunye, eye ame kae aʋli ho kplim? Lãkplɔvi kae ate ŋu atɔ ɖe ŋkunyeme? 
20 Eya ta mise Afetɔ ƒe nyametsotso le Edom ŋu kple tame siwo wòɖo ɖe Teman nɔlawo ŋu:�
Vavãe, woahe lãha la ƒe viwo adzoe.
Eye wòana woƒe nɔƒe nazu aƒedo le wo ta.
21 Anyigba ʋuʋu le woƒe anyidzedze ƒe ɖiɖi ta.
Ɣli ɖi!
Wose eƒe ɖiɖi le keke Ƒudzĩ la nu ke.
22 Kpɔ ɖa! Ame aɖe ayi dzi ʋĩi abe hɔ̃ ene ade agba anyi,
Eye wòakeke eƒe aʋalawo me aɖadze Bozra dzi.
Gbe ma gbe la, Edom ƒe aʋawɔlawo ƒe dzi
Anɔ abe nyɔnu si le ku lém ƒe dzi ene.”
23 Ðe Damasko ŋu:
“Ŋukpe lé Hamat kple Arpad,
Elabena wose nya vɔ̃.
Vɔvɔ̃ na dzi ɖe le wo ƒo.
Atsiaƒu tsi dzodzodzoe, mate ŋu adze akɔ anyi o.
24 Dzi ɖe le Damasko ƒo.
Etrɔ be yeasi, gake dzidzi ƒoe.
Ele nu xam hele veve sem
Abe nyɔnu si le ku lém ene.
25 Aleke wòdzɔe be womegblẽ kafukafudu,
Si nye aseyetsodu la ɖi o?
26 Elabena eƒe ɖekakpuiwo aku atsi eƒe ablɔwo me,
Eye eƒe aʋawɔlawo katã nu ayi gbe ma gbe,” aʋakɔwo ƒe Afetɔ ye gblɔe.
27 “Matɔ dzo Damasko ƒe gli la,
Eye wòafiã Ben-Hadad ƒe mɔ́ sesẽwo.”
28 Nya ɖe Kedar kple Hazor-fiaɖuƒe siwo dzi Babilon-fia Nebukadnezar ɖu la ŋu:
Ale Afetɔ gblɔe nye esi: “Miho yi Kedar,
Eye mitsrɔ̃ Ɣedzeƒeviwo.
29 Woaxɔ woƒe agbadɔwo kple woƒe alẽhawo,
Woƒe agbadɔvɔwo kple woƒe nuwo katã.
Woakplɔ woƒe kposɔwo adzoe,
Eye woado ɣli ɖo ɖe wo be, ‘Ŋɔdzi li godoo va kpe!’”
30 Afetɔ be: “Mi Hazor nɔlawo, misi yi didiƒe!
Miyi ɖaɣla ɖe agu me.
Elabena Babilon-fia Nebukadnezar de adaŋu ɖe mia ŋu,
Eye wòɖo tame aɖe ɖe mia ŋu.”
31 Afetɔ be: “Mitso, miho ɖe dukɔ si le ŋutifafa me,
Eye wòli bɔkɔɔ la ŋu!”
“Agbo kple gameti mele eŋu o; wosa ɖe aga.
32 Woƒe kposɔwo azu nuhaha,
Eye woƒe lãha gbogboawo azu aboyonu.
Maka logloƒlɔlawo
Ahlẽ ɖe ya sia ya nu,
Eye mahe gbegblẽ tso goawo katã me ava wo dzi,” Afetɔ ye gblɔe.
33 “Hazor azu agbotoewo nɔƒe,
Azu gbegbe tegbee.
Ame aɖeke manɔ afi ma o,
Eye ame aɖeke matso aƒe ɖe afi ma o.”
34 Esiae nye Afetɔ ƒe gbe si va na nyagblɔɖila Yeremiya ɖe Elam ŋu, le Yuda-fia Zedekiya ƒe fiaɖuɖu ƒe gɔmedzedzea me: 
35 “Ale aʋakɔwo ƒe Afetɔ gblɔe nye esi: ‘Kpɔ ɖa, maŋe Elam ƒe dati, si nye woƒe ŋusẽ tsoƒe. 
36 Makplɔ ya eneawo tso dziƒo ƒe go eneawo dzi ava ƒo ɖe Elam dzi, maka wo ahlẽ ɖe ya siawo katã nu. Eye dukɔ aɖeke manɔ anyi, si me Elam ƒe ame siwo ka hlẽ la mayi o.’”
37 “Mana ŋɔdzi nalé Elamtɔwo le woƒe futɔwo kple ame siwo le didim be yewoaɖe woƒe agbe ɖa la ŋkume; mahe vɔ̃, si nye dziku helĩhelĩ, ava wo dzi. Madɔ yi ɖe wo yome va se ɖe esime metsrɔ̃ wo vɔ keŋkeŋ,” Afetɔ ye gblɔe.
38 Afetɔ be: “Mali nye fiazikpui ɖe Elam, eye matsrɔ̃ fia kple amegãwo siaa ɖa le afi ma.”
39 “Ke le ŋkeke mlɔeawo me la, maƒo Elam ƒe aboyomeawo nu ƒu,” Afetɔ ye gblɔe.

YEREMIYA 50
1 Nya si Afetɔ gblɔ to nyagblɔɖila Yeremiya dzi ɖe Babilon ŋu, ɖe Kaldeatɔwo ƒe anyigba ŋue nye esi:
 2 “Migblɔe le dukɔwo dome, eye miɖe gbeƒãe.
Mido dzesiti ɖe dzi, eye miɖe gbeƒãe.
Migaɣla naneke o!
Migblɔ be: ‘Woxɔ Babilon.
Ŋukpe lé Bel.
Dzidzi ƒo Merodak.
Wodo ŋukpe eƒe legbawo.
Dzidzi ƒo eƒe legba nyɔŋuawo.’
 3 Elabena dukɔ aɖe ho ɖe eŋu tso dziehe.
Ena eƒe anyigba zu ŋɔdzinu;
Ame aɖeke megale edzi o.
Amegbetɔwo kple lãwo siaa si;
Wosi dzo.”
4 Afetɔ be: “Le ŋkeke mawo me le ɣemaɣi la, Israel viwo kple Yuda viwo awɔ ɖeka. Woanɔ avi fam anɔ yiyim, eye woadi Afetɔ woƒe Mawu la. 
5 Woatrɔ mo ɖe Zion anɔ eƒe mɔ ta biam se, eye woanɔ gbɔgblɔm be: ‘Miva míabla nu mavɔ, si womaŋlɔ be o la, kple Afetɔ.’ 
6 Nye dukɔ la zu lãha si me lãwo le bubum le. Wo kplɔlawoe kplɔ wo trae. Wokplɔ wo yi towo dzi, wole tsatsam tso to dzi yi togbɛ dzi. Woŋlɔ woƒe nɔƒe be. 
7 Ame siwo katã ke ɖe wo ŋu la ɖu wo, eye woƒe futɔwo gblɔ be: ‘Míeɖi fɔ o, elabena woawo ŋutɔwoe wɔ nu vɔ̃ ɖe Afetɔ, si nye dzɔdzɔenyenyenɔƒe kple Afetɔ wo tɔgbuiwo ƒe mɔkpɔkpɔ la ŋu.’”
 8 “Misi dzo le Babilon,
Midzo le Kaldeatɔwo ƒe anyigba dzi,
Eye minɔ abe agbowo le alẽha ŋgɔ ene.
 9 Elabena kpɔ ɖa, manyɔ dukɔ gãwo ƒe ha aɖe tso dziehenyigba dzi,
Eye makplɔ wo ava ƒu Babilon.
Woava dze aʋa ɖe eŋu;
Afi mae woaxɔe le.
Woƒe aŋutrɔwo le abe aʋawɔla
Si ƒe aŋutrɔwo wua vi na ame,
Eye wometrɔna gbɔna ƒuƒlu o la tɔ ene.
10 Kaldea azu nuhaha.
Ame siwo katã ahae la aɖi ƒo,” Afetɔ ye gblɔe.
11 “Elabena esime miele nye domenyinu la ham la,
Miekpɔ dzidzɔ, eye mietso aseye.
Mieɖi adzrɔ abe nyinɔe le gbe fẽwo me ene,
Eye mienɔ xɔxlɔ̃m abe sɔtsuwo ene.
12 Wodo ŋukpe mia dada.
Nyɔnu si dzi mi la ƒe mo tsi dãa.
Kpɔ ɖa! Eyae nye dukɔwo ƒe suetɔ,
Gbegbe si tsi mele o kple tagba.
13 Le Afetɔ ƒe dɔmedzoe la ta ame aɖeke manɔ eme o;
Azu aƒedo ɖikaa.
Ame sia ame si ato Babilon ŋu ava yi la ƒe nu aku,
Eye wòalia aku le fuwɔame siwo katã va edzi la ta.
14 Mi aŋutrɔdalawo katã,
Midze aʋa ɖe Babilon ŋu le goawo katã me.
Mitee, migave nu le aŋutrɔ ŋu o,
Elabena Afetɔ ŋue wòwɔ nu vɔ̃ ɖo.
15 Mido aʋaɣli ɖe eŋu le goawo katã me.
Ena ta.
Eƒe sɔtiwo ŋe, wogbã eƒe gliwo ƒu anyi,
Elabena Afetɔ ƒe hlɔ̃biabia wònye.
Mibia hlɔ̃e.
Miwɔ nɛ abe ale si wòwɔ ene.
16 Mitsrɔ̃ nuƒãla
Kple ame si zãa hɛ gobɛ le nuŋeɣi la siaa ɖa le Babilon.
Eye wo dometɔ ɖe sia ɖe atrɔ ayi eya ŋutɔ ƒe dukɔ gbɔ,
Eye wo dometɔ ɖe sia ɖe asi ayi eƒe anyigba dzi le yi ƒe fuwɔame la ta.
17 “Alẽ si wonya de gbee Israel nye. Dzatawoe nyae de gbe. Gbã la, Asiria-fiae vuvui; ke azɔ Babilon-fia Nebukadnezar gbã eƒe ƒuwo. 
18 Eya ta ale aʋakɔwo ƒe Afetɔ, Israel ƒe Mawu la, gblɔe nye esi: ‘Kpɔ ɖa, mahe to na Babilon-fia kple eƒe anyigba, abe ale si mehe to na Asiria-fia ene. 
19 Makplɔ Israel agbɔ va eƒe gbeɖuƒe, eye wòaɖu gbe le Karmel kple Basan ahaɖi ƒo le Efrayim kple Gilead tonuto la me.’”
20 Afetɔ be: “Le ŋkeke mawo me le ɣemaɣi la,
Woadi Israel ƒe vodada la,
Ke womakpɔe o;
Womakpɔ Yuda ƒe nu vɔ̃wo o,
Elabena matsɔ ake ame siwo makpɔtɔ ɖi la.”
21 Afetɔ be: “Tso ɖe Meratayim-nyigba ŋu, ho ɖe wo kple Pekod nɔlawo ŋu.
Wu wo, eye nàtsrɔ̃ wo gbidigbidi,
Eye nàwɔ nu siwo katã ƒe se mede na wò la.
22 Aʋaɣli le ɖiɖim le anyigba la dzi,
Gbegblẽ gã wònye.
23 Aleke anyigba blibo la ƒe yɔxɔmezu la gbã hekaka ale!
Aleke Babilon zu ŋɔdzinu le dukɔwo dome ale!
24 Oo Babilon, meɖo mɔ̃ na wò, eye wòɖe wò,
Ke mèdze sii o.
Asi tu wò, eye wolé wò,
Elabena Afetɔ ŋue nètsi tsitre ɖo.
25 Afetɔ ʋu eƒe nudzraɖoƒe,
Eye wòɖe eƒe dɔmedzoe ƒe aʋawɔnuwo ɖe go.
Elabena dɔ aɖe le Aƒetɔ Dziɖulagã, aʋakɔwo ƒe Afetɔ si,
Le Kaldeatɔwo ƒe anyigba dzi.
26 Mitso didiƒe ʋĩi miaho ɖe eŋu.
Miʋu eƒe nukudzraɖoƒeawo.
Milɔe ƒo ƒu, abe ale si wolia kɔ agblemenuku ene,
Mitsrɔ̃e gbidigbidi.
Ame aɖeke megasusɔ ɖi nɛ o.
27 Miwu eƒe nyitsuiwo katã.
Mikplɔ wo yi lãwuƒee.
Baba na wo, elabena woƒe ŋkeke ɖo,
Woƒe akɔntabiaɣi ɖo!
28 Sisilawo,
Ame siwo kpɔtɔ tso Babilon-nyigba dzi la ƒe gbe le ɖiɖim,
Ne woagblɔ le Zion be Afetɔ mía Mawu le hlɔ̃ biam,
Ele hlɔ̃ biam ɖe eƒe gbedoxɔ la ta.
29 Miyɔ aŋutrɔdalawo,
Ame siwo katã vua da me la, ɖe Babilon ŋu.
Miɖe to ɖee godoo va kpe, migana ame aɖeke nasi o.
Miɖo eƒe nuwɔna teƒe nɛ.
Miwɔe nɛ abe ale si eya hã wɔe na ame bubuwo ene.
Elabena edo eɖokui ɖe dzi ɖe Afetɔ ŋu,
Ðe Israel ƒe Kɔkɔetɔ la ŋu.
30 Eya ta eƒe ɖekakpuiwo aku atsi eƒe ablɔwo me,
Eye eƒe aʋawɔlawo katã atsrɔ̃ gbe ma gbe,” Afetɔ ye gblɔe.
31 Aƒetɔ Dziɖulagã, aʋakɔwo ƒe Afetɔ be: “Kpɔ ɖa! Metso ɖe ŋuwò, Oo wò, dadala,
Elabena wò ŋkeke aɖo, ɣeyiɣi ade be mabia akɔnta wò.
32 Oo wò, dadala, akli nu adze anyi,
Eye ame aɖeke manɔ anyi afɔ wò ɖe tsitrenu o.
Matɔ dzo wò duwo,
Ne wòafiã nu sia nu le ŋuwò kpe ɖo.”
33 Ale aʋakɔwo ƒe Afetɔ gblɔe nye esi:
“Wote Israel viwo kple Yuda viwo ɖe anyi,
Eye ame siwo katã ɖe aboyo wo la và wo goŋgoŋ.
Wogbe asiɖeɖe le wo ŋu.
34 Gake wo Gbugbɔƒlela la tri akɔ,
Eŋkɔe nye aʋakɔwo ƒe Afetɔ.
Adrɔ̃ woƒe nya na wo ɖe eteƒe,
Ne wòana gbɔdzɔe anyigba la,
Eye wòade zi Babilon nɔlawo dome.”
35 Afetɔ be: “Yi ava Kaldeatɔwo,
Babilon nɔlawo kple eƒe amegãwo kpakple eƒe nunyalawo dzi.
36 Yi ava nya ƒuƒlu gblɔlawo dzi, eye woawɔ bometsinu.
Yi ava eƒe aʋawɔlawo dzi, eye dzidzi aƒo wo.
37 Yi ava woƒe sɔwo kple woƒe aʋatasiaɖamwo dzi,
Ava dukɔ vovovo me tɔ siwo tsaka le eme la dzi,
Eye woazu nyɔnugbɔmewo.
Yi ava eƒe kesinɔnuwo dzi, eye woaha wo.
38 Gbegblẽ ava eƒe tsiwo dzi, eye woamie.
Elabena legbawo ƒe anyigba wònye,
Eye ŋɔdzinu siwo wokpɔna na wole aɖaʋanu wɔm.
39 Eya ta lã siwo nɔa gbegbe la anɔ lã siwo xlɔ̃na sesĩe la gbɔ,
Eye golowo anɔ eme.
Ame maganɔ eme akpɔ o,
Eye maganye teƒe si amewo atso aƒe ɖo o tso dzidzime yi dzidzime.”
40 “Ame aɖeke manɔ afi ma o, eye ame aɖeke matso aƒe ɖe afi ma o, abe ale si Mawu trɔ Sodom kple Gomora kpakple du siwo ƒo xlã wo la bu anyii ene,” Afetɔ ye gblɔe.
41 “Kpɔ ɖa! Dukɔ aɖe tso dziehe;
Eye dukɔ gã aɖe kple fia gãwo ho
Tso anyigba ƒe mlɔenuwo gbɔna.
42 Da kple akplɔ le wo si.
Woƒe tagbɔ sẽ, eye womakpɔ nublanui o.
Woƒe ɣli le abe atsiaƒu ƒe gbeɖeɖe ene,
Esi wole woƒe sɔwo dzi.
Wobla akpa abe ŋutsu ene na aʋawɔwɔ heho ɖe ŋuwò, Oo Babilon vinyɔnu.
43 Babilon-fia se wo ŋu nya,
Eye eƒe asiwo do agblɔ.
Vɔvɔ̃ ɖoe!
Ese veve helĩhelĩ, abe nyɔnu si le ku lém ene.
44 Kpɔ ɖa! Ame aɖe ado abe ale si dzata dona tso ave dodo siwo le Yordan ŋu me ene atso ɖe gbeɖuƒe siwo le dedie la ŋu, ke mana woasi le egbɔ le aɖabaƒoƒo ɖeka me. Ame si wotia la, eyae matsɔ aɖo enu. Elabena ame kae de nunye, eye ame kae aʋli ho kplim? Lãkplɔvi kae ate ŋu atɔ ɖe ŋkunyeme? 
45 Eya ta mise Afetɔ ƒe nyametsotso le Babilon ŋu kple tame si wòɖo ɖe Kaldeatɔwo ƒe anyigba ŋu.
Vavãe, woahe lãha la ƒe viwo adzoe.
Eye woana woƒe nɔƒe nazu aƒedo le wo ta.
46 Ɣli si aɖi be woxɔ Babilon la ana anyigba naʋuʋu,
Eye woase konyifaɣli le dukɔwo dome.”

YEREMIYA 51
1 Ale Afetɔ gblɔe nye esi:
“Kpɔ ɖa, mana ya gblẽnu aɖe naƒo
To Babilon kple Leb-Kamai nɔlawo dzi.
 2 Madɔ nugbɔlawo ɖe Babilon
Ne woagbɔe, eye woaɖi gbɔlo eƒe anyigba;
Woatso goawo katã me aho ɖe eŋu le gbegblẽ ƒe ŋkeke la dzi.
 3 Aŋutrɔdala megavu da me o.
Eye ame aɖeke meganɔ eƒe gawu me atso o.
Migakpɔ nublanui na eƒe ɖekakpuiwo o.
Mitsrɔ̃ eƒe aʋakɔ blibo la katã.
 4 Woadze anyi aku ɖe Kaldea-nyigba dzi,
Woxɔ abi vevie le eƒe kpɔdomeewo.
 5 Elabena Israel kple Yuda ƒe Mawu, aʋakɔwo ƒe Afetɔ, megblẽ wo ɖi wonye ahosi o.
Gake Israel ƒe Kɔkɔetɔ la kpɔe be fɔɖiɖi yɔ woƒe anyigba dzi taŋ.
 6 “Misi dzo le Babilon,
Eye ame sia ame neɖe eƒe agbe.
Migatsrɔ̃ le eƒe vodada ta o.
Elabena Afetɔ ƒe ɣeyiɣi de be wòabia hlɔ̃e.
Ele eƒe nuwɔna teƒe ɖom nɛ.
 7 Babilon nye sikakplu le Afetɔ si me;
Ena anyigba blibo la mu aha.
Dukɔwo no eƒe wain la mu;
Esia tae dukɔwo dze aɖaʋa ɖo.
 8 Zi ɖeka kasia Babilon mu dze anyi hegbã.
Mifa avi vevie ɖe eŋu!
Mitsɔ balsam-mi vɛ hena eƒe veveseseawo; ɖewohĩ ahaya.”
 9 “Míedze agbagba be míada gbe le Babilon ŋu, ke hayahaya mele eŋu o.
Miɖe asi le eŋu, eye mina mía dometɔ ɖe sia ɖe nadzo yi wo de.
Elabena eƒe ʋɔnudɔdrɔ̃ de keke dziƒowo ke,
Eye wòyi ɖatɔ alilikpowo.
10 Afetɔ tso afia na mí.
Miva míaɖe gbeƒã Afetɔ mía Mawu ƒe dɔwo le Zion.”
11 “Minyre aŋutrɔwo; mitsɔ akpoxɔnu kotoowo.
Afetɔ nyɔ Media-fiawo ƒe gbɔgbɔ,
Elabena eɖo tame be yeatsrɔ̃ Babilon.
Elabena Afetɔ ƒe hlɔ̃biabiae, hlɔ̃biabia ɖe eƒe gbedoxɔ nue.
12 Mido dzesiti ɖe dzi ɖe Babilon ƒe gliwo ŋu.
Mina dzɔlawo nasɔ gbɔ ɖe edzi, miɖo dzɔlawo wo nɔƒewo.
Midzra xadelawo ɖo.
Elabena Afetɔ ɖo tame,
Eye awɔ nu si wògblɔ ɖe Babilon nɔlawo ŋu ade goe.”
13 “Oo nyɔnu si bɔbɔ nɔ tsi geɖewo dzi,
Eye kesinɔnuwo bɔ ɖe asiwò,
Wò nuwuwu ɖo azɔ, eye wò viɖekpɔkpɔ ƒe seƒe ɖo.
14 Aʋakɔwo ƒe Afetɔ tà eɖokui be:
‘Matsɔ amewo ayɔ mewò taŋ, abe ʋetsuviwo ene,
Eye woƒe aʋadziɖuɣli aɖi ɖe ŋuwò.’
15 Eyae nye Ame si tsɔ eƒe ŋusẽ wɔ anyigba,
Ame si tsɔ eƒe nunya ɖo anyigba wɔnu la gɔme anyi,
Kple Ame si tsɔ eƒe gɔmesese keke dziƒowo me.
16 Ne eɖe gbe la,
Tsiwo dzea agbo le dziƒowo,
Eye wònana alilikpowo tsoa anyigba ƒe mlɔenuwo yia dzi.
Ewɔ dzikedzo na tsidzadza,
Eye wòkplɔa ya doa goe tso eƒe nudzraɖoƒewo.
17 Amegbetɔwo katã wɔa movinu ale gbegbe be sidzedze bu ɖe wo.
Ŋukpe alé ganutulawo katã le woƒe legbawo ŋu;
Elabena aʋatsoe eƒe galegba la nye,
Eye gbɔgbɔ aɖeke mele wo me o.
18 Tofloko kple dɔwɔwɔ si ŋu woaɖe alɔme le wonye.
Ne ɣeyiɣi de be woabia akɔnta wo la, wo nu ayi.
19 Yakob ƒe Gome mele abe nu siawo ene o,
Elabena eyae nye nuwo katã mèla,
Eya kee wɔ eƒe domenyinu ƒe atikplɔ.
Eŋkɔe nye aʋakɔwo ƒe Afetɔ.”
20 “Aʋawɔkpò kple aʋawɔnue nènye nam,
Elabena wòe matsɔ agbã dukɔwo,
Wòe matsɔ atsrɔ̃ fiaɖuƒewo.
21 Wòe matsɔ agbã sɔ kple edola.
Wòe matsɔ agbã aʋatasiaɖam kple edola.
22 Wòe matsɔ agbã ŋutsu kple nyɔnu.
Wòe matsɔ agbã ame tsitsi kple ɖevi.
Wòe matsɔ agbã ɖekakpui kple ɖetugbui.
23 Wòe matsɔ agbã lãkplɔvi kple eƒe lãha.
Wòe matsɔ agbã agbledela kple eƒe agbleŋlɔlãwo.
Wòe matsɔ agbã nutodziɖulawo kple dumegã kpeɖeŋutɔwo.
24 Maɖo Babilon kple Kaldea nɔlawo katã ƒe nu vɔ̃ɖi siwo wowɔ
Le Zion le mia ŋkume la teƒe na wo,” Afetɔ ye gblɔe.
25 “Kpɔ ɖa, metso ɖe ŋuwò, wò to gblẽnu,
Si gblẽ anyigba blibo la katã.
Mado nye asi ɖa ɖe ŋuwò, màmli wò tso agakpewo dzi,
Eye mana nàzu to fiafiã,” Afetɔ ye gblɔe.
26 “Womagatsɔ wò kpe aɖeke awɔ dzogoedzikpe alo gɔmeɖokpe azɔ o,
Elabena àzu gbegbe tegbee,” Afetɔ ye gblɔe.
27 “Mido dzesiti ɖe dzi le anyigba la dzi.
Miku lãdzo le dukɔwo dome.
Miɖo dukɔwo ɖe eŋuti.
Miyɔ Ararat, Mini kple Askenaz-fiaɖuƒewo ɖe eŋu.
Miɖo amegã si xɔa asrafo yeyewo ɖe eŋu.
Mikplɔ sɔawo vɛ abe ʋetsuviwo ene.
28 Miɖo dukɔwo ɖe eŋuti,
Miɖo Media-fiawo, woƒe nutodziɖulawo kple dumegã kpeɖeŋutɔwo katã
Kpakple anyigba siwo katã dzi ɖum wole la ɖe eŋu.
29 Anyigba aʋuʋu, eye wòadzo nyanyanya,
Elabena woawɔ tame si Afetɔ ɖo ɖe Babilon ŋu la dzi
Be Babilon-nyigba la nazu ŋɔdzinu, eye ame aɖeke naganɔ edzi o.
30 Babilon ƒe aʋawɔlawo dzudzɔ aʋawɔwɔ.
Wobɔbɔ nɔ woƒe mɔ́ sesẽwo me.
Ŋusẽ vɔ le wo ŋu.
Wozu abe nyɔnuwo ene.
Wotɔ dzo eƒe aƒewo.
Woŋe eƒe gametiwo.
31 Duxɔla va do go duxɔla,
Eye ame dɔdɔ va do go ame dɔdɔ,
Ne woayi aɖagblɔ na Babilon-fia be woxɔ eƒe du la le goawo katã me,
32 Woxɔ tɔtsoƒeawo,
Wotɔ dzo aƒlatɔdziʋuwo,
Eye dzidzi ƒo aʋawɔlawo.”
33 Elabena ale aʋakɔwo ƒe Afetɔ, Israel ƒe Mawu la, gblɔe nye esi:
“Babilon vinyɔnu la le abe nukuƒoƒe ene.
Ɣeyiɣi de be woatu afɔ edzi.
Esusɔ vie ko nuŋeɣi naɖo nɛ.”
34 Babilon-fia Nebukadnezar vuvum keŋkeŋ;
Ena metɔtɔ.
Etsɔm wɔ go ƒuƒlui.
Emim abe da gã aɖe ene;
Etsɔ nye nu nyuiwo yɔ eƒe dɔgbo.
Ekpalam ƒu gbe.
35 Zion nɔla agblɔ be: ‘Ŋuta si wosẽ le ŋunye kple nye ŋutilã ŋu la neva Babilon ƒe ta dzi.’
Yerusalem agblɔ be: ‘Nye ʋu nenɔ Kaldea nɔlawo ƒe ta dzi.’”
36 Eya ta ale Afetɔ gblɔe nye esi:
“Kpɔ ɖa, maxɔ wò nya ɖe akɔ,
Eye mabia hlɔ̃ na wò.
Mana eƒe atsiaƒu namie, eye mana eƒe vudowo namie.
37 Babilon azu glikpo,
Agbotoewo nɔƒe,
Ŋɔdzinu kple nu si ŋu woalia aku ɖo,
Eye ame aɖeke manɔ eme o.
38 Wo katã woaɖe gbe abe dzatatsuiwo ene.
Woate gbe abe dzataviwo ene.”
39 “Ne dzo ɖo lãme na wo la, maɖo kplɔ̃ na wo, eye mana woamu aha,
Ne woatso aseye;
Ekema woadɔ alɔ̃ tegbetegbe,
Eye womanyɔ akpɔ o,” Afetɔ ye gblɔe.
40 “Makplɔ wo abe alẽviwo ene ayi lãwuƒee,
Abe agbowo kple gbɔ̃wo ene.”
41 “Oo, aleke asi su Sesak dzi ale,
Aleke woxɔ du si anyigba blibo la kafuna ale!
Aleke Babilon zu ŋɔdzinu le dukɔwo dome ale!
42 Atsiaƒu ɖɔ gbagba ɖe Babilon dzi.
Eƒe tsotsoe gbogboawo nyè tsyɔ edzi.
43 Eƒe duwo zu ŋɔdzinu, wozu kuɖiɖinyigba kple gbegbe.
Wozu aƒedo, eye ame aɖeke mato afi ma ayi o.
44 Matrɔ ɖe Bel ŋu le Babilon,
Eye maɖe nu si wòmi la le eƒe nu me.
Dukɔwo magaƒo zi ɖe eŋu azɔ o.
Eye Babilon ƒe gli la amu.
45 “Nye dukɔ, mido go le eme!
Eye mia dometɔ ɖe sia ɖe neɖe eƒe agbe tso Afetɔ ƒe dɔmedzoe helĩhelĩ la nu!
46 Migana nya si woase le anyigba la ŋu naɖe dzi le mia ƒo alo ana vɔvɔ̃ nalé mi o.
Miase nya ma le ƒe ɖeka me,
Eye miagase nya bubu le ƒe si kplɔe ɖo me,
Be ŋutasesẽ anɔ anyigba la dzi, eye be dziɖula atso ɖe dziɖula ŋu.
47 Eya ta kpɔ ɖa, ŋkekewo li gbɔna,
Esime matrɔ ɖe Babilon ƒe legbawo ŋu.
Ŋu akpe eƒe anyigba blibo la,
Eye eƒe ame siwo katã woawu la atsi dua me.
48 Dziƒo kple anyigba kpakple wo me nuwo katã
Atso aseye le Babilon ta,
Elabena nutsrɔ̃lawo atso dziehe ava ƒo ɖe edzi,” Afetɔ ye gblɔe.
49 “Menye Israel ƒe amewo koe Babilon na wotsi aʋa o,
Ke boŋ anyigbadzitɔwo katã ƒe amewo hã tsi aʋa le Babilon.
50 Mi ame siwo si le yi nu, midzo, migatɔ o!
Miɖo ŋku Afetɔ dzi le adzɔge,
Eye miaƒe susu nenɔ Yerusalem ŋu.”
51 “Wodo ŋukpe mí, elabena míese vlodoame kple to.
Ŋukpe tsyɔ mo na mí,
Elabena ame tutɔwo ge ɖe Afetɔ ƒe aƒe la ƒe kɔkɔeƒewo.”
52 Afetɔ be: “Eya ta kpɔ ɖa, ŋkekewo li gbɔna,
Esime matrɔ ɖe eƒe legbawo ŋu,
Eye ame siwo xɔ abi la anɔ ŋeŋem le eƒe anyigba blibo la dzi.”
53 “Ne Babilon lia yi dziƒowo,
Eye wòli ke eƒe mɔ́ kɔkɔwo hã la,
Nutsrɔ̃lawo atso gbɔnye ava ƒo ɖe edzi,” Afetɔ ye gblɔe.
54 “Mise ɖa! Ɣli le ɖiɖim tso Babilon,
Tsɔtsrɔ̃ ƒe ɣli gã aɖe le ɖiɖim tso Kaldea-nyigba dzi,
55 Elabena Afetɔ le Babilon tsrɔ̃m,
Atsi eƒe hoowɔwɔ gã la nu,
Eye woƒe tsotsoewo adze agbo abe tsi geɖewo ene.
Woƒe gbe ade dzi woase.
56 Elabena nutsrɔ̃la la adze Babilon dzi;
Woalé eƒe aʋawɔlawo,
Woaŋe woƒe datiwo,
Elabena teƒeɖoɖo ƒe Mawue Afetɔ nye.
Aɖo eteƒe godoo.
57 Mana aha eƒe amegãwo kple eƒe nunyalawo,
Eƒe nutodziɖulawo kple eƒe dumegã kpeɖeŋutɔwo kpakple eƒe aʋawɔlawo woano amu,
Woadɔ alɔ̃ tegbetegbe,
Eye womanyɔ akpɔ o,” Fia si ŋkɔe nye aʋakɔwo ƒe Afetɔ ye gblɔe.
58 Ale aʋakɔwo ƒe Afetɔ gblɔe nye esi:
“Togbɔ be Babilon ƒe gli la keke hã la, woagbãe gudugudu,
Eye togbɔ be eƒe agbowo kɔ hã la, woatɔ dzo wo.
Amewo adagba ɖe yame;
Eye dukɔwo aku kutri na dzo.”
59 Esiae nye nya si nyagblɔɖila Yeremiya tsɔ de se na Seraya, Neriya vi, Mahseya vi, esime wònɔ Yuda-fia Zedekiya ŋu yina Babilon le eƒe fiaɖuɖu ƒe ƒe enelia me; Seraya nye dzeƒeŋuɖoɖowɔla. 
60 Eye Yeremiya ŋlɔ vɔ̃ siwo katã le Babilon dzi va ge, nya siawo, siwo katã wòŋlɔ ɖe Babilon ŋu la, ɖe agbalẽ ɖeka me. 
61 Eye Yeremiya gblɔ na Seraya be: “Ne èɖo Babilon, eye nèkpɔ dua ko la, ekema nàkɔ gbe dzi axlẽ nya siawo katã. 
62 Eye nàgblɔ be: ‘Oo Afetɔ, wòe gblɔ ɖe teƒe sia ŋu be, woatsrɔ̃e, ale be ame aɖeke maganɔ eme o, eɖanye amegbetɔ alo lã gɔ̃ hã o, ke boŋ be azu aƒedo tegbee.’ 
63 Eye ne èxlẽ agbalẽ sia vɔ la, bla kpe ɖe eŋu nàtsɔe aƒu gbe ɖe Frat-tɔsisi la me. 
64 Eye nàgblɔ be: ‘Aleae Babilon ayi to, eye magaho ɖe dzi akpɔ o le vɔ̃ si mahe ava edzi la ta; eye wɔna avɔ le wo ŋu.’”
Yeremiya ƒe nyawo seƒee nye esi.

YEREMIYA 52
1 Zedekiya xɔ ƒe blaeve vɔ ɖekɛ, esime wòzu fia, eye wòɖu fia ƒe wuiɖekɛ le Yerusalem. Dadaa ŋkɔe nye Hamutal, eye wònye Yeremiya si tso Libna vinyɔnu. 
2 Ewɔ nu si nye vɔ̃ le Afetɔ ŋkume, abe ale si Yehoyakim wɔ ene. 
3 Esi Afetɔ do dziku tae nu siawo dzɔ le Yerusalem kple Yuda va se ɖe esime wòɖe wo ɖa le eƒe ŋkuta. Eye Zedekiya dze aglã ɖe Babilon-fia ŋu. 
4 Le Zedekiya ƒe fiaɖuɖu ƒe ƒe asiekelia me, le ɣleti ewolia ƒe ŋkeke ewolia dzi la, Babilon-fia Nebukadnezar kple eƒe aʋakɔ bliboa ho ɖe Yerusalem ŋu. Woɖe to ɖee, eye woƒu kpo ɖe eŋu godoo va kpe. 
5 Woɖe to ɖe dua va se ɖe Fia Zedekiya ƒe ƒe wuiɖekɛlia me.
6 Le ɣleti enelia ƒe ŋkeke asiekelia dzi la, dɔwuame la nu sẽ le dua me, eye nuɖuɖu aɖeke meli na dua me tɔwo o. 
7 Mlɔeba woŋɔ dua ƒe gli, eye le zã me la, aʋawɔlawo katã to agbo si le gli eve dome le fia ƒe abɔ xa la ƒe mɔ hesi dzo, esime Kaldeatɔwo ƒo xlã dua; eye woto mɔ si ɖo ta Araba. 
8 Ke Kaldeatɔwo ƒe aʋakɔa ti fia la yome, eye wova tu Zedekiya le Yeriko tagba, eye eƒe aʋakɔ bliboa ka le eŋu. 
9 Wolé fia la hekplɔe va Babilon-fia gbɔ le Ribla le Hamat-nyigba dzi eye wòdrɔ̃ ʋɔnui. 
10 Eye Babilon-fia wu Zedekiya viŋutsuwo le eŋkume, ewu Yuda-megãwo katã hã le afi ma le Ribla. 
11 Eye Babilon-fia gbã ŋku na Zedekiya, ede akɔblikunyowui, eye wòkplɔe yi Babilon hetsɔe de gaxɔ me va se ɖe eƒe kugbe.
12 Le ɣleti atɔ̃lia ƒe ŋkeke ewolia dzi, si nye Babilon-fia Nebukadnezar ƒe ƒe wuiasiekelia me la, fiaŋudzɔlawo ƒe amegã Nebuzaradan, si nye Babilon-fia ƒe dɔla, va Yerusalem. 
13 Etɔ dzo Afetɔ ƒe aƒe kple fia ƒe aƒe kpakple aƒe siwo katã le Yerusalem, eye wòtɔ dzo aƒe gãwo katã hã. 
14 Kaldeatɔwo ƒe aʋakɔ blibo si le fiaŋudzɔlawo ƒe amegã ŋu la gbã Yerusalem gliwo katã ƒu anyi.
15 Ke fiaŋudzɔlawo ƒe amegã Nebuzaradan ɖe aboyo dukɔ la ƒe ame tsɛwo dometɔ aɖewo kple dukɔ la ƒe ame siwo wogblẽ ɖe megbe ɖe dua me. Ekplɔ ame siwo na ta heva Babilon-fia gbɔ kpakple aɖaŋudɔwɔla bibi susɔeawo hã dzoe. 
16 Ke fiaŋudzɔlawo ƒe amegã Nebuzaradan gblẽ dukɔa me tɔ dahe aɖewo ɖi be woanye waingbledelawo kple dzizizidɔwɔlawo.
17 Kaldeatɔwo gbã akɔblisɔti siwo le Afetɔ ƒe aƒe la me kple kekeawo kpakple akɔbligazɔ si le Afetɔ ƒe aƒe la me, eye wolɔ akɔbli la yi Babilon. 
18 Eye wotsɔ dzofilɔgbaawo, sofiawo, dzotsinuawo, agba goboeawo, kpluawo kple akɔblinu siwo katã wozãna na subɔsubɔdɔ wɔwɔ le gbedoxɔa me la dzoe. 
19 Fiaŋudzɔlawo ƒe amegã la lɔ gagbawo, dzoɖenuawo, agba goboeawo, dzofilɔgbaawo, akaɖitiawo, kpluawo kple vɔsagbaawo hã dzoe, sika nyuitɔ kple klosalo nyuitɔ wotsɔ wɔ nu siawo katãe. 
20 Nu siwo Fia Salomo wɔ na Afetɔ ƒe aƒe la: Sɔti eveawo, gazɔ gã la kple akɔblinyitsu wuieve siwo le gazɔ la te kple kekeawo ya ƒe akɔbli mele dada me o.
21 Sɔtiawo dometɔ ɖe sia ɖe kɔ abɔklugui wuienyi, eye ka abɔklugui wuieve ate ŋu akpee ɖo, eƒe titrime le asibidɛ ene ƒe kekeme, eye to le eme. 
22 Akɔblie wotsɔ wɔ sɔti la ƒe tawoe; eye ta ɖeka ƒe kɔkɔme nye abɔklugui atɔ̃; gaɖɔ kple yevuboɖa siwo le ta la ŋu godoo va kpe katã nye akɔbli. Eye nu siawo tɔgbi kple yevuboɖaawo le sɔti evelia hã ŋu. 
23 Yevuboɖaawo le blaasieke vɔ ade le axawo dzi, eye yevuboɖaawo katã le alafa ɖeka le gaɖɔ la ŋu godoo va kpe.
24 Fiaŋudzɔlawo ƒe amegã la lé nunɔlawo ƒe tatɔ Seraya kple Zefaniya si nye nunɔla evelia kpakple agbonudzɔla etɔ̃awo hã. 
25 Elé fiaŋume ɖeka si le aʋawɔlawo nu la le dua me kple fiaŋume adre siwo ŋu woke ɖo le dua me, kple aʋafia ƒe agbalẽŋlɔla, ame si yɔa dukɔ la ɖe aʋawɔwɔ ŋu, kpakple dukɔ la me ŋutsu blaade siwo wokpɔ le dua me. 
26 Fiaŋudzɔlawo ƒe amegã Nebuzaradan lé wo yi Babilon-fia gbɔ le Ribla. 
27 Eye Babilon-fia wu wo le Ribla le Hamat-nyigba dzi. Ale woɖe aboyo Yuda tso eƒe anyigba dzi.
28 Ame siwo Nebukadnezar ɖe aboyoe la woe nye esi: le ƒe adrelia me la, eɖe aboyo Yudatɔ akpe etɔ̃ kple blaeve vɔ etɔ̃.
29 Le Nebukadnezar ƒe ƒe wuienyilia me la, eɖe aboyo ame alafa enyi blaetɔ̃ vɔ eve tso Yerusalem.
30 Le Nebukadnezar ƒe ƒe blaeve vɔ etɔ̃lia me la, fiaŋudzɔlawo ƒe amegã Nebuzaradan ɖe aboyo Yudatɔwo, wole ame alafa adre blaene vɔ atɔ̃.
Ameawo katã le akpe ene alafa ade.
31 Le aboyoɖeɖe Yuda-fia Yehoyakin ƒe ƒe blaetɔ̃ vɔ adrelia me, le ɣleti wuievelia ƒe ŋkeke blaeve vɔ atɔ̃lia dzi la, Babilon-fia Evil-Merodak ɖe Yuda-fia Yehoyakin le gaxɔ me, le ƒe si me wòzu fia. 
32 Eƒo nu kplii tufafatɔe, eye wòɖoe ɖoƒe kɔkɔ wu fia bubu siwo katã le Babilon kplii. 
33 Eya ta Yehoyakin ɖe eƒe gaxɔmewuwo ɖi; eye wòɖua nu le fia la gbɔ ɣesiaɣi le eƒe agbemeŋkekewo katã me. 
34 Eye Babilon-fia naa nuɖuɖu si wòhiã gbe sia gbe lae le eƒe agbemeŋkekewo katã me va se ɖe eƒe kugbe.

LEAVE A REPLY

Please enter your comment!
Please enter your name here