Psalomowo

Psalm 1

1 Dzidzɔtɔe nye ame si mezɔna ɖe ame vɔ̃ɖiwo ƒe aɖaŋuɖoɖo nu o,
Metsia tsitre ɖe nu vɔ̃ wɔlawo ƒe mɔ dzi o
Eye menɔa anyi ɖe fewuɖulawo ƒe ha me o.
2 Ke boŋ ekpɔa dzidzɔ ɖe Afetɔ ƒe se la ŋu,
Eye wòxlẽa eƒe se la kple gbe blewu zã kple keli.
3 Eya amea anɔ abe ati si wodo ɖe tɔʋu to ene,
Ati si tsena le etseɣi,
Eye eƒe aŋgbawo melũa xe o.
Nu sia nu si wòwɔna la adze edzi.
4 Ame vɔ̃ɖiwo ya mele alea o,
Ke boŋ wole abe tsro si ya ƒona dzonae ene
5 Esia tae ame vɔ̃ɖiwo manɔ te le ʋɔnudɔdrɔ̃ me o;
Eye nu vɔ̃ wɔlawo manɔ te ɖe ame dzɔdzɔewo ƒe ha me o.
6 Elabena Afetɔ nya ame dzɔdzɔewo ƒe mɔ,
Ke ame vɔ̃ɖiwo ƒe mɔ ya nu ayi keŋkeŋ.

PSALMOWO 2


1 Nu ka tae dukɔwo le nyanyram,
Eye amehawo le adaŋu dem dzodzro?
2 Anyigbadzifiawo tso,
Eye amegãwo ƒo takpli
Hetso ɖe Afetɔ kple eƒe amesiamina la ŋu.
3 Wole gbɔgblɔm be: “Mina míatso woƒe kɔsɔkɔsɔwo,
Eye míatu woƒe kawo ɖa le mía ɖokui ŋu!”
4 Ame si woɖo zi dzi le dziƒowo la ako nu;
Afetɔ aɖe alɔme le wo ŋu.
5 Ɣemaɣi la, aƒo nu kpli wo le dziku me,
Eye wòado ŋɔdzi na wo le eƒe dɔmedzoe helĩhelĩ me,
6 Agblɔ be: “Nye ŋutɔ meɖo nye fia
Ðe nye to kɔkɔe Zion dzi.”
7 Mina maɖe gbeƒã Afetɔ ƒe sedede la;
Egblɔ nam be: “Vinyee nènye;
Mezu fofowò egbe.
8 Biam, ne matsɔ dukɔwo ana wò wòanye wò domenyinu,
Kple anyigba ƒe seƒewo ana wò wòazu tɔwò.
9 Àtsɔ gatikplɔ ato wo nyanyanya,
Eye àgbã wo gudugudu abe ze ene.”
10 Eya ta mi fiawo, midze nunya;
Mi anyigbadziʋɔnudrɔ̃lawo, mina woaɖɔ mi ɖo.
11 Mitsɔ vɔvɔ̃ subɔ Afetɔ,
Eye mitsɔ mawuvɔvɔ̃ tso aseye.
12 Mide bubu via ŋu, be Mawu nagado dɔmedzoe,
Ne miatsrɔ̃ ɖa le mɔ la dzi o,
Elabena eƒe dziku flana kaba.
Dzidzɔtɔwoe nye ame siwo katã sinɛ tsona.

PSALMOWO 3
1 Oo Afetɔ, nu ka tae nye futɔwo sɔ gbɔ ale?
Nu ka tae ame geɖewo tso ɖe ŋunye?
2 Ame geɖe le gbɔgblɔm le ŋunye be:
“Mawu maxɔ nɛ akpɔ o.” (Sela)
3 Ke wò, Afetɔ ye nye akpoxɔnu ƒo xlãm,
Nye bubu kple Ame si fɔa nye ta ɖe dzi.
4 Makɔ gbe dzi ayɔ Afetɔ,
Atɔ nam tso eƒe to kɔkɔe la dzi. (Sela)
5 Mamlɔ anyi adɔ alɔ̃;
Eye manyɔ dedie,
Elabena Afetɔ le megbe nam.
6 Nyemavɔ̃ ame akpeakpe
Siwo ɖe to ɖem godoo la o.
7 Oo Afetɔ, tso! Oo nye Mawu, xɔ nam!
Elabena èle glãgbɔ ƒo ge na nye futɔwo katã;
Àŋe aɖu na ame vɔ̃ɖiwo.
8 Afetɔ si me xɔname le.
Wò yayra le wò dukɔ la dzi. (Sela)

PSALMOWO 4
1 Oo, nye Mawu dzɔdzɔe, ne meyɔ wò la, tɔ nam.
Ne meɖo xaxa me la, ʋu mɔ* nam ne mado le eme.
Ve nunye, eye nàse nye gbedodoɖa.
2 Mi amegbetɔviwo, va se ɖe ɣekaɣie miado vlo nye bubu?
Va se ɖe ɣekaɣie mialɔ̃ yakanuwo ahanɔ alakpanuwo yome? (Sela)
3 Minyae be Afetɔ awɔ nu ɖe ame si wɔa nuteƒe nɛ la ŋu etɔxɛe;*
Afetɔ asee ne meyɔe.
4 Mido dziku, ke migawɔ nu vɔ̃ o.
Migblɔ miaƒe nya le dzi me le miaƒe aba dzi, eye mizi kpi kpoo. (Sela)
5 Misa dzɔdzɔenyenyevɔwo,
Eye miɖo ŋu ɖe Afetɔ ŋu.
6 Ame geɖewo le gbɔgblɔm be: “Ame kae afia nu nyui aɖe mí?”
Oo Afetɔ, na wò mo ƒe kekeli naklẽ ɖe mía dzi.
7 Wòe na nye dzi kpɔ dzidzɔ geɖe
Wu dzidzɔ si amewo kpɔna ne agblemenuku kple wain bɔ ɖe wo si.
8 Mamlɔ anyi adɔ alɔ̃ le ŋutifafa me,
Elabena Oo, Afetɔ, wò koe nana menɔa dedie.

PSALMOWO 5
1 Oo Afetɔ, ƒu to anyi ɖe nye nyawo ŋu;

Lé to ɖe nye hũɖeɖewo ŋu.

 2 Se nye ɣlidodowo,

Oo, nye Fia kple nye Mawu, elabena wòe mele gbe dom ɖa na.

 3 Oo Afetɔ, àse nye gbe le ŋdi;

Magblɔ nye dzimenyawo na wò le ŋdi, eye manɔ asiwò nu kpɔm.

 4 Elabena menye Mawu si kpɔa dzidzɔ ɖe vɔ̃ɖinyenye ŋue nènye o;

Ame vɔ̃ɖi aɖeke manɔ gbɔwò o.

 5 Dadala aɖeke manɔ te ɖe ŋkuwòme o.

Èlé fu nu vɔ̃ɖi wɔlawo katã;

 6 Àtsrɔ̃ ame siwo daa alakpa.

Afetɔ tsri ŋutasẽlawo kple ameblelawo.

 7 Ke nye ya, mava aƒewò me le wò lɔlɔ̃ gã si nu metsina o la ta;

Matrɔ ɖe wò gbedoxɔ kɔkɔe la ŋu ade ta agu na wò le mawuvɔvɔ̃ me.

 8 Oo Afetɔ, kplɔm le wò dzɔdzɔenyenye la nu le nye futɔwo ta;

Na wò mɔ dzi nakɔ nam.

 9 Elabena womate ŋu aka ɖe woƒe numenya aɖeke dzi o;

Vɔɖivɔ̃ɖi yɔ wo me fũu;

Woƒe vehlo le abe yɔdo si le nuvo ene;

Wotsɔa woƒe aɖe vivia nu me.

10 Eya ta Mawu abu fɔ wo;

Woawo ŋutɔwo ƒe ayemɔwo axlã wo ɖe anyi.

Na woanya wo ɖa le woƒe dzidada gbogboawo ta,

Elabena wodze aglã ɖe ŋuwò.

11 Ke ame siwo katã si wò tso la akpɔ dzidzɔ;

Woanɔ aseyetsotso dzi ɖaa.

Àtɔ kpɔ ɖe wo ŋu godoo,

Ame siwo lɔ̃a wò ŋkɔ la atso aseye ɖe ŋuwò.

12 Elabena Afetɔ, àyra ame dzɔdzɔe;

Wò ŋudzedzekpɔkpɔ anɔ abe akpoxɔnu gã aɖe ene le wo ŋu.

PSALMOWO 6
1 Oo Afetɔ, mègaka mo nam le dziku me o,

Eye mègaɖɔm ɖo le dɔmedzoe me o.

 2 Oo Afetɔ, ve nunye elabena eglom vɔ.

Oo Afetɔ, da gbe le ŋunye, elabena nu te nye ƒuwo ŋu.

 3 Ɛ̃, metsi dzodzodzoe ŋutɔ,

Oo Afetɔ, mebe, va se ɖe ɣekaɣi?

 4 Oo Afetɔ, trɔ va, xɔ nam;

Ðem le wò lɔlɔ̃ si nu metsina o la ta.

 5 Elabena womegayɔa wò ŋkɔ le ku me o;

Ame kae akafu wò le Tsiẽƒe?

 6 Meɖe hũ ʋuu ɖeɖi te ŋunye;

Mefa aɖatsi zã bliboa katã nye aba ƒo tsi belee;

Mefa avi kakaka nye dɔƒe ƒo tsi bekee.

 7 Nuxaxa na nu te nye ŋkuwo ŋu;

Edzi tsyɔ le ame siwo katã le fu wɔmem la ta.

 8 Mi nu vlo wɔlawo katã, mite ɖa le gbɔnye,

Elabena Afetɔ ase nye avigbe la.

 9 Afetɔ ase nye kokoƒoƒo;

Afetɔ ase nye gbedodoɖa.

10 Ŋukpe alé nye futɔwo katã eye woatɔtɔ;

Woagbugbɔ ɖe megbe eye woƒe mo atsi dãa enumake.

PSALMOWO 7
1 Oo Afetɔ nye Mawu, wòe mesi tso.

Ðem tso yonyemetilawo katã si me, eye nàxɔ nam.

 2 Ne menye nenema o la, woavuvum ʋayaʋaya abe ale si dzata vuvua nui ene,

Eye woalém adzoe le esi xɔnametɔ aɖeke meli o ta.

 3 Oo Afetɔ, nye Mawu, ne tɔnye medzɔ le esia me o,

Ne mewɔ nu madzɔmadzɔ aɖe,

 4 Ne meda vo ɖe ame si wɔ nyui nam la ŋuti,

Alo meha nye futɔ madzemadzee la,

 5 Ekema futɔ la neti yonyeme eye eƒe asi nesu dzinye;

Ne wòafanyam ɖe anyigba,

Eye wòate nye bubu ɖe ke me. (Sela)

 6 Oo Afetɔ, tso le wò dziku me;

Tso ɖe nye futɔwo ƒe nyanyra ŋu;

Dzɔ ŋunye, ne nàna woatso afia dzɔdzɔe nam.

 7 Na dukɔwo naƒo xlã wò;

Eye nàtso dziƒo ʋĩi aho ɖe wo ŋu.

 8 Afetɔ adrɔ̃ ʋɔnu dukɔwo.

Oo Afetɔ, tso afia nam le nye dzɔdzɔenyenye nu,

Le nye fɔmaɖimaɖi la nu.

 9 Meɖe kuku, na ame vɔ̃ɖiwo ƒe nu vɔ̃ɖi wɔwɔ nu natso.

Ke na ame dzɔdzɔe la nali ke,

Elabena wòe nye Mawu dzɔdzɔetɔ la, ame si dzroa dziwo kple seselelãme ememetɔwo kpɔna.

10 Mawue nye nye akpoxɔnu, eya, si nye dzi dzɔdzɔe tɔwo Xɔla.

11 Mawu nye ʋɔnudrɔ̃la dzɔdzɔe,

Eye Mawu gblɔa eƒe ʋɔnudrɔ̃nyawo ɣesiaɣi.

12 Ne ame aɖe gbe dzimetɔtrɔ la, enyrea eƒe yi;

Evu eƒe da me, eye wòna wòsɔ gbe na dada.

13 Edzra eƒe lãnuwo ɖo ɖi,

Ena eƒe aŋutrɔ bibiawo sɔ gbe.

14 Kpɔ ame si fɔ nu vɔ̃ɖi wɔwɔ ƒe fu la ɖa;

Efɔ xaxa ƒe fu, eye wòdzi alakpa.

15 Eɖe ʋe, eye wòku eme wògoglo;

Gake eya ŋutɔ ge dze ʋe si wòɖe la me.

16 Vɔ̃ la atrɔ ava eya ŋutɔ ƒe ta dzi;

Eye eƒe ŋutasesẽ ava dze eya ŋutɔ ƒe dzodome.

17 Makafu Afetɔ le eƒe dzɔdzɔenyenye ta;

Eye madzi kafukafuha na Afetɔ, Dziƒoʋĩtɔ la, ƒe ŋkɔ.

PSALMOWO 8
1 Oo Afetɔ, mía Aƒetɔ, aleke gbegbe wò ŋkɔ de dzi le anyigba blibo la katã dzie nye esi;

Èna wò ŋutikɔkɔe gbɔ dziƒowo ta!

 2 Ðeviwo kple vi nonowo ƒe nu mee nèli ŋusẽ anyi ɖo

Le wò futɔwo ta,

Be nàna ɖoɖoe nazi le futɔ la kple hlɔ̃biala la nu.

 3 Ne mekpɔ wò dziƒowo, dɔ siwo nètsɔ wò asibidɛwo wɔ,

Ɣleti kple ɣletivi siwo nèwɔ la,

 4 Nu kae amegbetɔ nye, be nèɖoa ŋku edzi,

Kple amegbetɔvi, be nèléa be nɛ?

 5 Èwɔe wòbɔbɔ ɖe anyi vie wu ame siwo le abe Mawu ene,

Eye nèɖɔ bubu kple atsyɔ̃ nɛ.

 6 Ètsɔe ɖo wò asinudɔwɔwɔwo nu;

Ètsɔ nu sia nu de eƒe afɔ te:

 7 Alẽwo kple nyiwo katã,

Kple gbemelãwo hã,

 8 Dziƒoxewo kple ƒumelãwo,

Nu sia nu si zɔa atsiaƒu me.

 9 Oo Afetɔ, mía Aƒetɔ, aleke gbegbe wò ŋkɔ de dzi le anyigba blibo la katã dzie nye esi!

PSALMOWO 9
1 Oo Afetɔ, makafu wò kple nye dzi blibo;

Maɖe gbeƒã wò nukudɔwɔwɔwo katã.

 2 Makpɔ dzidzɔ atso aseye ɖe ŋuwò;

Oo Dziƒoʋĩtɔ, madzi kafukafuha na wò ŋkɔ.

 3 Ne nye futɔwo gbugbɔ ɖe megbe la,

Woakli nu adze anyi, eye wo nu ayi le ŋkuwòme.

 4 Elabena èʋli tanye le nye nya dzɔdzɔe ta;

Èbɔbɔ nɔ wò fiazikpui dzi hedrɔ̃ ʋɔnu dzɔdzɔe.

 5 Èka mo na dukɔwo, eye nètsrɔ̃ ame vɔ̃ɖiwo,

Ètutu woƒe ŋkɔ ɖa tegbetegbee.

 6 Futɔwo tsrɔ̃ ɖikaa;

Ètrɔ woƒe duwo bu anyi,

Womagaɖo ŋku wo dzi akpɔ gbeɖe o.

 7 Ke Afetɔ ya anɔ eƒe fiazikpui dzi tegbee;

Eli eƒe fiazikpui anyi ɖe ʋɔnu dzɔdzɔe dɔdrɔ̃ ŋu.

 8 Adrɔ̃ ʋɔnu xexea le dzɔdzɔenyenye me;

Atso afia dzɔdzɔe na dukɔwo.

 9 Afetɔ anye mɔ́ sesẽ na ame siwo wote ɖe anyi la,

Mɔ́ sesẽ wòanye le xaxaɣiwo.

10 Ame siwo nya wò ŋkɔ la aɖo ŋu ɖe ŋuwò;

Oo Afetɔ, màgblẽ ame siwo dia yowòme mɔ la ɖi akpɔ o.

11 Midzi kafukafuha na Afetɔ, Ame si le Zion;

Migblɔ nu siwo wòwɔ la le dukɔwo dome.

12 Elabena woƒe Hlɔ̃biala la ɖoa ŋku wo dzi;

Maŋlɔ ame siwo le fu kpem la ƒe ɣlidodo be gbeɖe o.

13 Oo Afetɔ, ve nunye; kpɔ fu si kpem mele le nye futɔwo si me ɖa,

Wò, ame si kɔm ɖe dzi tso ku ƒe agbowo me,

14 Ne maɖe gbeƒã wò nuwɔwɔ siwo dze na kafukafu le Zion vinyɔnu ƒe agbowo me,

Ne matso aseye le wò xɔname ŋuti.

15 Dukɔwo ge dze do si woawo ŋutɔwo ɖe la me;

Ðɔ si woɖo la ɖe afɔ na woawo ŋutɔwo.

16 Wonya Afetɔ ɖe eƒe ʋɔnudɔdrɔ̃wo ta.

Ame vɔ̃ɖi ƒe asinudɔwɔwɔ zu mɔ̃ ɖe eya ŋutɔ.

Higayon. (Sela)

17 Ame vɔ̃ɖiwo ayi Tsiẽƒe,

Ɛ̃, dukɔ siwo katã ŋlɔa Mawu be la ayi.

18 Gake womaŋlɔ ame dahewo ya be ɖaa o;

Eye ame fafawo ƒe mɔkpɔkpɔ hã mazu dzodzro o.

19 Oo Afetɔ, tso! Mègana amegbetɔ ƒe alɔ nade dzi o.

Na woadrɔ̃ ʋɔnu dukɔwo le ŋkuwòme.

20 Oo Afetɔ, na dzidzi naƒo wo,

Ne dukɔwo nadze sii be amegbetɔ dzro koe yewonye. (Sela)

PSALMOWO 10
1 Oo Afetɔ, nu ka tae nèle adzɔge ʋĩi?

Nu ka tae nèɣla ɖokuiwò le xaxaɣiwo?

 2 Ame vɔ̃ɖi tiaa wɔnamanɔŋutɔ yome dadatɔe,

Gake woalée le eya ŋutɔ ƒe nugbe si wòɖo la me.

 3 Elabena ame vɔ̃ɖi tsɔa eƒe ɖokuitɔdidi ƒoa adegbee,

Eye wòkafua ŋuklẽla;

Medea bubu aɖeke Afetɔ ŋu o.

 4 Ame vɔ̃ɖi ƒe dada vivivo nana mebiaa Mawu ta sena o;

Eƒe susu koe nye be, “Mawu aɖeke meli o.”

 5 Eƒe mɔwo dzea edzi nɛ ɣesiaɣi,

Gake wò ʋɔnudɔdrɔ̃wo kɔ gbɔ eƒe gɔmesese ŋu;

Ke eya ɖea alɔme le eƒe ketɔwo katã ŋu.

 6 Egblɔna le eƒe dzi me be: “Nyemaʋã gbeɖe o;

Vɔ̃ madzɔ ɖe dzinye akpɔ o,

Tso dzidzime yi dzidzime.”

 7 Ðiŋudodo, amebeble kple ŋɔdzidodo yɔ nu me nɛ fũu;

Nya veamewo kple nya tɔamewo sɔŋ koe le eƒe aɖe te.

 8 Edea xa ɖe kɔƒewo xa;

Enɔa xa me wua ame maɖifɔ.

Enɔa ŋu tsam na ame si mele ɖeke me nyam o la.

 9 Edea xa ɖe ɣaɣlaƒe abe dzata le eƒe bebeƒe ene.

Ede xa ɖi be yealé amemanɔsitɔ.

Ehea eƒe ɖɔ tsɔ léa amemanɔsitɔ la.

10 Egbãnɛ hemiminɛ ɖe anyigba;

Ame siwo menya o la dze eƒe fewo me nublanuitɔe.

11 Egblɔna le eƒe dzi me be: “Mawu ƒe ŋku dzo le edzi.

Etrɔ mo ɖe aga.

Mele ekpɔ ge akpɔ o.”

12 Oo Afetɔ, tso. Oo Mawu, kɔ wò asi dzi.

Mègaŋlɔ ame tsiasiwo be o.

13 Nu ka tae ame vɔ̃ɖi medea bubu Mawu ŋu o?

Egblɔna le eƒe dzi me be: “Màbia akɔntam o.”

14 Gake èle fukpekpe kple xaxa teƒe kpɔm.

Wò ŋkuwo le nu siawo katã ŋu, eye wole asiwò me.

Ŋuwòe amemanɔsitɔ la trɔna ɖo;

Xɔnametɔ nènye na tsyɔ̃eviwo.

15 Ŋe alɔ na ame vɔ̃ɖi kple nu tovo wɔla la,

Ekema ne èdi eƒe nu vɔ̃ɖi wɔwɔwo la,

Màgakpɔ ɖeke kura o.

16 Afetɔ ye nye Fia tegbetegbee.

Dukɔwo tsrɔ̃ ɖa le anyigba la dzi.

17 Oo Afetɔ, àɖo to ame fafawo ya ƒe dzimedidiwo.

Àdo ŋusẽ woƒe dzi, eye wò to anɔ wo ŋu.

18 Àtso afia na tsyɔ̃eviwo kple ame siwo woƒo ƒu anyi la,

Ne amegbetɔ si kuna nagado voɖi na wo azɔ o.

PSALMOWO 11
1 Afetɔe mesi tso.

Aleke miele gbɔgblɔm nam be:

“Si dzo abe xevi ene nàyi miaƒe to dzi!

 2 Kpɔ ale si ame vɔ̃ɖiwo vu da me ɖa;

Wotsɔ woƒe aŋutrɔ ɖo daka dzi,

Ne woanɔ viviti me até dzi dzɔdzɔe tɔwo.

 3 Esi wogbã gɔmeɖoanyiwo ɖe,

Nu kae ame dzɔdzɔe ate ŋu awɔ?”

 4 Afetɔ le eƒe gbedoxɔ kɔkɔe la me.

Afetɔ ƒe fiazikpui le dziƒowo.

Eƒe ŋkuwo le nuwo kpɔm, eƒe ŋku siwo le nu sia nu ŋu la doa amegbetɔviwo kpɔna.

 5 Afetɔ doa ame dzɔdzɔe kple ame vɔ̃ɖi siaa kpɔna;

Eléa fu ame sia ame si lɔ̃a ŋutasẽnuwɔwɔ.

 6 Atrɔ dzoka xɔxɔwo akɔ ɖe ame vɔ̃ɖiwo dzi;

Dzo kple dzokpe kpakple ya xɔdzo ye anye woƒe kplumenu.

 7 Elabena Afetɔ le dzɔdzɔe; elɔ̃a nu dzɔdzɔe.

Ame dzɔdzɔewoe akpɔ eŋkume.

PSALMOWO 12
1  Oo Afetɔ, xɔ nam, elabena nuteƒewɔla aɖeke megali o;

Anukwaretɔwo bu le amegbetɔviwo dome.

 2 Wodaa alakpa na wo nɔewo;

Wotsɔa woƒe nu blea ame, eye alakpadzi mee woƒe nyawo tsona.

 3 Afetɔ aɖe numevivitɔwo katã ɖa,

Kple aɖe siwo gblɔa nya gã nya gãwo,

 4 Ame siwo gblɔna be: “Míaƒe aɖe ana míaɖu dzi.

Míetsɔa míaƒe nu gblɔa nya si dze mía ŋu;

Ame kae aɖu aƒetɔ ɖe mía dzi?”

 5 Afetɔ be: “Esi wole nublanuitɔwo tem ɖe to,

Eye ame dahewo le hũ ɖem ta la,

Matso azɔ.

Maxɔ na wo tso ame siwo doa vlo wo la si me.”

 6 Afetɔ ƒe nyawo dza;

Wole abe klosalo si wolólo le kpo me, si ŋu wodza zi gbɔ zi adre la ene.

 7 Oo Afetɔ, wòe adzɔ wo ŋu;

Wòe akpɔ wo dometɔ ɖe sia ɖe ta tso dzidzime sia si me tegbee.

 8 Ame vɔ̃ɖiwo le tsatsam faa le afi sia afi

Le esi amegbetɔviwo doa nu ɖigbɔ wɔwɔ ɖe ŋgɔ ta.

PSALMOWO 13
1 Oo Afetɔ, va se ɖe ɣekaɣi nàŋlɔm be? Tegbeea?

Va se ɖe ɣekaɣi nàɣla wò ŋkume ɖem?

 2 Va se ɖe ɣekaɣi matsi dzimaɖi

Eye nuxaxa nanɔ nye dzi me gbe sia gbe?

Va se ɖe ɣekaɣi nye futɔ nakpe dzinye?

 3 Kpɔm ɖa, Oo Afetɔ nye Mawu, ne nàtɔ nam.

Na nye ŋku dzi nakɔ, ne magadɔ alɔ̃ le ku me o,

 4 Ne nye futɔ nagagblɔ be, “Meɖu edzi!” o.

Mègana nye ketɔwo natso aseye ɖe nye anyidzedze ŋu o.

 5 Ke nye ya, wò lɔlɔ̃ si nu metsina o ŋue meɖoa ŋu ɖo;

Nye dzi atso aseye le wò xɔnamedɔwo ŋuti.

 6 Madzi ha na Afetɔ, elabena ewɔ nyui geɖe nam.

PSALMOWO 14
1 Bometsila gblɔna le eƒe dzi me be:

“Afetɔ aɖeke meli o.”

Wowɔa nu gbegblẽ, wowɔa ŋunyɔnuwo;

Ame aɖeke meli si wɔa nu nyui o.

 2 Ke Afetɔ léa ŋku ɖe amegbetɔviwo ŋu tso dziƒo

Be yeakpɔe ɖa be ame aɖe li si sea nu gɔme, eye wòbiaa Afetɔ ta sena hã.

 3 Wo katã wodze ɖe aga;

Wo katã wogblẽ.

Ame aɖeke meli si wɔa nu nyui o,

Ðeka hɔ̃ hã meli o.

 4 Ðe nu tovo wɔlawo dometɔ aɖeke medzea si nu oa?

Wole nye dukɔ la ɖum hamham abe abolo ene.

Womeyɔa Afetɔ o.

 5 Ke ŋɔdzi gã alé wo,

Elabena Afetɔ li kple ame dzɔdzɔewo ƒe dzidzime.

 6 Nu tovo wɔlawo le agbagba dzem be yewoagblẽ ame tsɛ ƒe ɖoɖowo me,

Ke Afetɔe nye eƒe sitsoƒe.

 7 Oo, ne ɖe xɔname atso Zion ava na Israel ɖe!

Ne Afetɔ gakplɔ eƒe aboyomewo gbɔe la,

Ekema Yakob nekpɔ dzidzɔ, Israel netso aseye.

PSALMOWO 15
1 Oo Afetɔ, ame kae adze wò agbadɔ me?

Ame kae anɔ wò to kɔkɔe la dzi?

 2 Ame si ƒe zɔzɔme ŋu fɔɖiɖi mele o,

Si wɔa nu dzɔdzɔe

Eye wòtoa nyateƒe le eƒe dzi me.

 3 Ame si metsɔa eƒe aɖe gblẽa ame ŋu o,

Mewɔa vɔ̃ ɖe ehavi ŋu o,

Eye medaa exɔlɔ̃wo ɖe anyi o.

 4 Ame si gbɔ ame vloewo meɖia naneke le o,

Ke edea bubu ame siwo vɔ̃a Afetɔ ya ŋu.

Megbea eƒe ŋugbedodo dzi wɔwɔ o, ne esia agblẽ nu le eya ŋutɔ ŋu gɔ̃ hã.

 5 Ame si medoa ga na ame xɔa deme ɖe edzi o,

Eye mexɔa zãnu ɖe ame maɖifɔ ŋuti o.

Ame si wɔa nu siawo la, maʋã akpɔ o.

PSALMOWO 16
1 Oo Mawu, kpɔ tanye, elabena wòe mesi tso.

 2 Megblɔ na Afetɔ be: “Wòe nye Afetɔ, wò ɖeka ko gbɔe nu nyuiwo tsona nam.

 3 Ame kɔkɔe siwo le anyigba dzi,

Siwo nye bubumewo ƒe nu nyoa ŋunye vevie.”

 4 Vevesesewo dzina ɖe edzi na ame siwo dzea mawu bubuwo yome.

Nyemaƒo woƒe ʋuvɔsa ɖi na wo o,

Eye nye nu mayɔ woƒe ŋkɔwo o.

 5 Afetɔe nye nye gome, domenyinu si wodzidze nam kple nye kplu.

Wòe kpɔa nye domenyinu la ta.

 6 Wodzidze nyuiƒewo nam.

Nyateƒee, nye domenyinu la dze ŋunye.

 7 Makafu Afetɔ, ame si ɖo aɖaŋu nam.

Le zã me hã, nye dzimesusuwo ɖɔam ɖo.

 8 Metsɔa Afetɔ ɖoa ŋkunyeme ɖaa.

Esi wòle nye ɖusime ta la, nyemaʋã akpɔ o.

 9 Eya ta nye dzi le dzidzɔ kpɔm, nye ameti bliboa le aseye tsom.

Eye manɔ dedie.

10 Elabena màgblẽm ɖe Tsiẽƒe o.

Màna wò nuteƒewɔla la nakpɔ yɔdo o.

11 Èna menya agbemɔ la,

Dzidzɔ bɔ ɖe ŋkuwòme;

Vivisese le wò ɖusime tegbee.

PSALMOWO 17
1 Oo Afetɔ, se nye nya dzɔdzɔe;

Lé to ɖe nye ɣlidodo be nàkpe ɖe ŋunye la ŋu;

Ƒu to anyi ɖe nye gbedodoɖa si me alakpa mele o la ŋu.

 2 Tso afia dzɔdzɔe nam;

Wò ŋkuwo nekpɔ nu si le dzɔdzɔe.

 3 Èdo nye dzi kpɔ, èdzro menye le zã me;

Èlólom;

Àkpɔe be susu vɔ̃ aɖeke mele menye o,

Nye nu mada vo o.

 4 Le amegbetɔwo ƒe nuwɔwɔwo me la,

Metsɔ wò numenyawo kpɔ ɖokuinye dzi, ne maƒo asa na adzodalawo ƒe mɔwo.

 5 Na nye afɔ nali ɖe wò mɔwo dzi,

Ale be nye afɔwo nagaɖiɖi o.

 6 Oo Mawu, mele yɔwòm, elabena àtɔ nam.

Ƒu to anyi ɖe ŋunye. Se nye nyawo.

 7 Ðe wò lɔlɔ̃ si nu metsina o la fia nukutɔe,

Wò, ame si nye Xɔnametɔ na ame siwo di sitsoƒe le wò nuɖusi me,

Wò, ame si ɖea wo tso ame siwo dzea aglã ɖe ŋuwò la si me.

 8 Lé be nam abe wò gadaglamakui ene;

Ɣlam ɖe wò aʋala ƒe vɔvɔli te.

 9 Kpɔ tanye tso ame vɔ̃ɖi siwo dze dzinye la si me,

Tso ame siwo lé fum heɖe to ɖem la si me.

10 Womekpɔa nublanui na ame o;

Wokea nu gblɔa dadanyawo;

11 Fifia woxaxa mí ɖo;

Woƒe ŋkuwo le mía ŋu, ne woaxlã mí ɖe anyi.

12 Wo dometɔ ɖe sia ɖe le abe dzata si le didim vevie be yeavuvu nu,

Abe dzatavi si de xa ɖi la ene.

13 Oo Afetɔ, tso, ne nàkpe kpli wo, ne nàƒu wo anyi;

Tsɔ wò yi la ɖem tso ame vɔ̃ɖi la si me;

14 Oo Afetɔ, tsɔ wò asi xɔ nam,

Xɔ nam tso xexe sia me tɔ siwo kpɔ wo tɔ gome le agbe sia me la si me,

Wo, ame siwo nètsɔ wò nu nyuiwo yɔ ko na

Eye wogblẽa domenyinu ɖi na wo vi geɖeawo.

15 Ke nye la, makpɔ wò mo le dzɔdzɔenyenye me;

Ne menyɔ le ŋkuwòme la, esia ɖia ƒo nam.

PSALMOWO 18
1 Oo Afetɔ, nye ŋusẽ, nyemelɔ̃a nu le gbɔwò o.

 2 Afetɔe nye nye agakpe, nye mɔ́ sesẽ, kple nye Xɔnametɔ.

Nye Mawue nye nye agakpe, eyae mesi tso,

Nye akpoxɔnu kple nye xɔxɔ ƒe dzo, nye dedienɔƒe.

 3 Meyɔ Afetɔ, ame si dze na kafukafu,

Aɖem tso nye futɔwo si me.

 4 Ku ƒe kawo ɖe to ɖem;

Yakamewo ƒe tsiɖɔɖɔwo do ŋɔdzi nam.

 5 Tsiẽƒe ƒe kawo ƒo xlãm;

Ku ƒe mɔ̃tetrewo ƒo gom.

 6 Meyɔ Afetɔ le nye xaxawo me,

Eye mele ɣlidodo dzi na nye Mawu be wòaxɔ nam.

Ese nye gbe tso eƒe gbedoxɔ me,

Eye nye ɣlidodo be wòaxɔ nam la ɖo eƒe to me.

 7 Ale anyigba ʋãnya, eye wòʋuʋu kpekpekpe;

Towo ƒe anyinɔwo ʋuʋu

Eye wodzo kpekpekpe, elabena wodo dziku nɛ.

 8 Dzudzɔ de dzi tso eƒe ŋɔti me,

Eye dzo flafla do tso eƒe nu me;

Dzoka xɔxɔwo tso egbɔ.

 9 Eviã dziƒowo eye wòɖi ɖe anyi.

Eye blukɔ le eƒe afɔ te.

10 Enɔ kerubi dzi dzo va.

Eɖiɖi kaba le gbɔgbɔ ƒe aʋalawo dzi.

11 Etsyɔ blukɔ,

Tsiziwo kple alilikpo dodowo ƒo xlãe,

Abe agbadɔ ene.

12 Keklẽ si le eŋgɔ la mee

Kpetsi kple dzoka xɔxɔwo do tso va to alilikpoawo me.

13 Afetɔ ɖe gbe le dziƒowo;

Dziƒoʋĩtɔ la na eƒe gbe ɖi

Le kpetsi kple dzoka xɔxɔwo me.

14 Eda eƒe aŋutrɔwo tsɔ ka wo hlẽ;

Eɖo eƒe dzikedzowo ɖa eye wòna wotɔtɔ.

15 Tɔwo gɔme dze;

Eye anyigba la ƒe agunuwo tsi ƒeƒle le wò bublu la ta, Oo Afetɔ,

Le esi wò ŋɔtimegbɔgbɔ gbɔ ɖe wo la ta.

16 Edo asi ɖa tso dzi lém;

Eye wòhem tso tsi goglowo me.

17 Eɖem tso nye futɔ sesẽ la si me,

Tso ame siwo lé fum, siwo sesẽ wum la si me.

18 Wodze dzinye le gbe si gbe vɔ̃ dzɔ ɖe dzinye,

Ke Afetɔe nye nye ziɔɖeŋu.

19 Ekplɔm do goe yi dedienɔƒe;

Eɖem, elabena nye nu nyo eŋu.

20 Afetɔ ɖoa eteƒe nam le nye dzɔdzɔenyenye nu;

Eɖoa eteƒe nam elabena nye asiwo me dza.

21 Elabena melé Afetɔ ƒe mɔwo me ɖe asi,

Eye nyemetrɔ le nye Mawu yome wònye vɔ̃ mewɔ ɖe eŋu o.

22 Eƒe ʋɔnudɔdrɔ̃wo katã le ŋkunyeme;

Nyemedo vlo eƒe sewo o.

23 Manye ame maɖifɔ le eŋkume,

Eye makpɔ ɖokuinye dzi ɖe vodada ŋuti.

24 Afetɔ neɖo eteƒe nam le nye dzɔdzɔenyenye nu,

Le esi nye asi me dza le eŋkume ta.

25 Èwɔa nuteƒe na ame si wɔa nuteƒe;

Èwɔa nu fɔmaɖitɔe ɖe ame maɖifɔ ŋu;

26 Èdza na ame si dza,

Ke àdze aye ɖe ame si ƒe mɔ glɔ̃ ŋu.

27 Elabena èxɔna na ame tsɛwo;

Ke èbɔbɔa dadalawo ɖe anyi.

28 Oo Afetɔ, wòe nana nye akaɖi klẽna,

Nye Mawu si nana nye viviti me kɔna.

29 Elabena wò kpekpeɖeŋu ana manya adzoha ɖe nu;

Le Mawu ƒe ŋusẽ me la, mate ŋu aflɔ gli.

30 Mawu vavã la ƒe mɔ de blibo;

Afetɔ ƒe nya dza.

Akpoxɔnu wònye na ame siwo katã sinɛ tsona.

31 Elabena Mawu kae li kpe ɖe Afetɔ ŋu?

Eye ame kae ganye agakpe? Ðe menye mía Mawu la ɖeɖe koe oa?

32 Mawu vavã lae doa ŋusẽm,

Ana nye mɔ nade blibo.

33 Ena nye afɔwo le abe zinɔ tɔ ene;

Ena metsi tsitre ɖe teƒe kɔkɔwo.

34 Efia aʋawɔwɔ nye asiwo;

Ale be nye alɔwo nate ŋu abi akɔblidati.

35 Ètsɔ wò xɔxɔ ƒe akpoxɔnu nam,

Wò nuɖusi léam ɖe te,

Eye wò ɖokuibɔbɔ doa gãm.

36 Èkeke nye afɔɖoƒewo;

Nye afɔwo maɖiɖi o.

37 Mati nye futɔwo yome, eye matu wo,

Nyematrɔ o, va se ɖe esime wotsrɔ̃ keŋkeŋ hafi.

38 Magbã wo gudugudu, ale be fɔfɔ maganɔ wo ŋu o;

Woadze anyi ɖe nye afɔ te.

39 Àtsɔ ŋusẽ abla akpa nam ɖe aʋa la ŋu;

Àna nye futɔwo nadze anyi ɖe tenye.

40 Àna nye futɔwo nasi le nunye,

Eye mana ame siwo lé fum la nu nayi.

41 Wodoa ɣli be woaxɔ na yewo, ke xɔnametɔ aɖeke meli o;

Wodoa ɣli na Afetɔ, ke metɔna na wo o.

42 Mato wo memie woanɔ abe ʋuʋudedi le ya nu ene;

Matsɔ wo aƒu gbe abe kpɔdomeeba ene.

43 Àɖem tso ame siwo dia vodada le ŋunye la si me.

Àɖom dukɔwo ƒe tatɔe.

Dukɔ si nyemenya o la asubɔm.

44 Nya si woase le ŋunye ɖeɖe ana woaɖo tom;

Amedzroviwo ava bɔbɔ ɖe ŋkunyeme.

45 Dzi aɖe le amedzroviwo ƒo;

Eye woanɔ ƒoƒom kpakpakpa ado tso woƒe bebeƒewo ava.

46 Afetɔ le agbe! Woakafu nye Agakpe la,

Woado nye xɔxɔ ƒe agakpe ƒe Mawu la ɖe dzi.

47 Mawu vavã lae biaa hlɔ̃ nam;

Ebɔbɔa dukɔwo ɖe tenye.

48 Eɖeam tso nye futɔ siwo do dziku la si me;

Èdoam ɖe dzi megbɔa ame siwo tso ɖe ŋunye la ta;

Èɖeam tso ŋutasẽla la si me.

49 Oo Afetɔ, esia tae makafu wò le dukɔwo dome ɖo,

Eye madzi kafukafuha na wò ŋkɔ la.

50 Ewɔa xɔxɔdɔ gãwo na eƒe fia la;

Eye wòɖea lɔlɔ̃ si nu metsina o fiaa eƒe amesiamina la,

Eɖenɛ fiana David kple eƒe dzidzimevi la tegbee.

PSALMOWO 19
1 Dziƒowo le Mawu ƒe ŋutikɔkɔe ɖem fia;

Eye dziŋgɔli le gbeƒã ɖem eƒe asinudɔwɔwɔ.

 2 Tso ŋkeke yi ŋkeke wotoa nya,

Eye tso zã yi zã woɖea sidzedze ɖe go.

 3 Nuƒoƒo aɖeke meɖina o, eye nya aɖeke hã medona o;

Womesea gbe aɖeke le wo nu o.

 4 Gake wo ŋkɔ ɖina le anyigba blibo la dzi,

Eye woƒe nyawo de anyigba ƒe mlɔenu ke.

Etu agbadɔ ɖe dziƒo na ɣe;

 5 Ele abe ŋugbetɔsrɔ̃ si do tso eƒe xɔ me gbɔna ene;

Etsoa aseye abe kalẽtɔ si le du ƒum le eƒe mɔ dzi ene.

 6 Edzèna tso dziƒo ƒe go si me,

Eye wòzɔna godoo yia eƒe go kemɛ me,

Naneke meɣlana ɖe eƒe dzoxɔxɔ o.

 7 Afetɔ ƒe se de blibo, enana ŋusẽ gaɖoa ame ŋu.

Afetɔ ƒe ŋkuɖodzinya le eteƒe, enana bometsila dzea nunya.

 8 Afetɔ ƒe ɖoɖowo dzɔ, wodoa dzidzɔ na dzi;

Afetɔ ƒe sedede dza, enana ŋku dzi kɔna.

 9 Afetɔ vɔvɔ̃ dza, eye wònɔa anyi ɖaa.

Afetɔ ƒe afiatsotsowo le eteƒe, wo katã wodzɔ.

10 Asixɔxɔ le wo ŋu wu sika,

Wu sika nyuitɔ geɖe;

Eye wovivina wu anyitsi, wu anyitsi si le tsyɔtsyɔm tso anyixe me.

11 Woawoe wotsɔ xlɔ̃ nu wò subɔla;

Fetu gã le wo me léle ɖe asi me.

12 Ame kae ate ŋu akpɔ eya ŋutɔ ƒe vodadawo adze sii?

Tsɔ nye nu vɔ̃ siwo mewɔ le manyamanya me la kem.

13 Na wò subɔla nàƒo asa na ɖokuiŋudzedze;

Mègana wòakpɔ ŋusẽ ɖe dzinye o.

Ekema manɔ blibo,

Eye vodada gãwo ƒe fɔɖiɖi manɔ ŋunye o.

14 Na nye numenyawo kple nye dzimesusuwo

Nadze ŋuwò, Oo Afetɔ, nye Agakpe kple nye Xɔnametɔ.

PSALMOWO 20
1 Afetɔ netɔ na wò le xaxagbe.

Yakob ƒe Mawu ƒe ŋkɔ nenye takpɔkpɔ na wò.

 2 Neɖo kpekpeɖeŋu ɖe wò tso kɔkɔeƒe la

Eye wòado ŋusẽ wò tso Zion.

 3 Neɖo ŋku wò nunavɔsawo katã dzi;

Eye wò numevɔsa nedze eŋu. (Sela)

 4 Nena nu si wò dzi di la wò

Eye wòana wò ɖoɖowo katã nadze edzi na wò.

 5 Míatso aseye le wò xɔxɔdɔwo ŋuti;

Míado míaƒe dzesiti ɖe dzi le mía Mawu ƒe ŋkɔ me.

Afetɔ nawɔ wò biabiawo katã dzi na wò.

 6 Azɔ menyae be Afetɔ xɔna na eƒe amesiamina la.

Etɔna nɛ tso eƒe dziƒo kɔkɔe la ke,

Eye wòtsɔa eƒe ɖusibɔ sesẽ la xɔna nɛ.

 7 Ame aɖewo ɖoa ŋu ɖe tasiaɖamwo ŋu, eye bubuwo ɖe sɔwo ŋu,

Ke míawo ya la, míeyɔa Afetɔ mía Mawu ŋkɔ.

 8 Womu dze anyi,

Ke míawo ya la, míetso, eye míeli ke sesĩe.

 9 Oo Afetɔ, xɔ na fia la!

Atɔ na mí le gbe si gbe míeyɔe.

PSALMOWO 21
1 Oo Afetɔ, wò ŋusẽ mee fia la kpɔa dzidzɔ le;

Eye aleke gbegbe wòle aseye tsom le wò xɔxɔdɔwo tae nye esi!

 2 Èwɔ eƒe dzimedidiwo dzi nɛ,

Eye mègbe nu si wòke nu bia la nanae o. (Sela)

 3 Elabena ètsɔ yayra nyuiwo va kpee;

Èɖɔ sikafiakuku nyuitɔ nɛ.

 4 Ebia agbe tso asiwò, eye nètsɔe nɛ,

Èna agbe didii ɖaa tegbee.

 5 Wò xɔnamedɔwo na ŋutikɔkɔe gã aɖe eya amea,

Èɖo bubu kple atsyɔ̃ eŋu.

 6 Èɖoe wònye yayratɔ tegbee;

Èna wòkpɔa dzidzɔ le esi aseyetsotso bɔ ɖe ŋkuwòme ta.

 7 Elabena Afetɔ ŋue fia la ɖoa ŋu ɖo;

Le Dziƒoʋĩtɔ la ƒe lɔlɔ̃ si nu metsina o ta, maʋã akpɔ o.

 8 Wò asi atu wò futɔwo katã;

Wò nuɖusi asu wò ketɔwo dzi.

 9 Àna woanɔ abe kpodzo ene le ɣeyiɣi si nèɖo be yeatrɔ ɖe wo ŋu la dzi.

Afetɔ ami wo le eƒe dɔmedzoe me, eye dzo afiã wo.

10 Àtsrɔ̃ wo viwo ɖa le anyigba la dzi,

Kple woƒe dzidzimeviwo ɖa le amegbetɔviwo dome.

11 Elabena woɖo nu si nye vɔ̃ ɖe ŋuwò;

Woɖo tame vɔ̃ siwo madze edzi na wo o.

12 Elabena àna woagbugbɔ ɖe megbe,

Esi nèvu da me hedzidzee ɖe wo dzi ta.

13 Oo Afetɔ, tso le wò ŋusẽ me.

Míadzi kafukafuha le wò gãnyenye ŋuti.

PSALMOWO 22
1 Nye Mawu, nye Mawu, nu ka ŋuti nègblẽm ɖi?

Nu ka ŋuti mètsɔ gbɔnye axɔ nam o,

Eye nèle adzɔge ʋĩi esi mele lãgbelãgbe dom?

 2 Oo, nye Mawu, meyɔa wò le ŋkeke me, gake mètɔna nam o;

Le zã me hã, ɖoɖoe mezina le nunye o.

 3 Ke wò la, èle kɔkɔe,

Eye Israel ƒe kafukafu ƒo xlã wò godoo.

 4 Ŋuwòe mía fofowo ɖo ŋu ɖo;

Ŋuwòe woɖo dzi ɖo, eye nèxɔ na wo.

 5 Wòe wodo ɣli na, eye nèɖe wo;

Ŋuwòe woɖo ŋu ɖo, eye ŋu mekpe wo o.

 6 Ke nye la, nyévi ko menye, menye amegbetɔ o,

Amewo ɖea alɔme le ŋunye hedoa vlom.

 7 Ame siwo katã kpɔam la ɖua fewu le ŋunye;

Wogbigbia nu ɖe ŋunye heʋuʋua ta gblɔna be:

 8 “Etsɔ eɖokui na Afetɔ. Nexɔ nɛ!

Neɖee, elabena eƒe nu nyo eŋu!”

 9 Ke wòe hem tso vidzidɔ me,

Wòe na menɔ dedie le danye ƒe no nu.

10 Wotsɔm de asi na wò tso esime wodzim;

Wòe nye nye Mawu tso danye ƒe dɔ me ke.

11 Mèganɔ adzɔge tso gbɔnye o, elabena xaxa tum

Eye xɔnametɔ bubu aɖeke megali nam o.

12 Nyitsu geɖewo ɖe to ɖem;

Basan-nyitsu sesẽwo ƒo xlãm.

13 Woke woƒe nu baa ɖe ŋunye,

Abe dzata si le gbe tem hele eƒe nuléle vuvum ene.

14 Wotrɔm kɔ ɖi abe tsi ene;

Eye nye ƒuwo katã gli le wo kpeƒewo.

Nye dzi zu abe anyixe ene;

Elólo le dɔ me nam.

15 Wɔna vɔ le ŋunye abe ze gbagbã ene;

Nye aɖe lé ɖe nye nyéwo ŋu;

Eye nètsɔm ɖo kudo nu.

16 Avuwo ɖe to ɖem;

Ame vɔ̃ɖiwo ƒe ha xaxam ɖo.

Wodze nye asiwo kple nye afɔwo dzi abe dzata ene.

17 Mate ŋu axlẽ nye ƒuwo katã.

Amewo kpɔe, eye wofɔ ŋku ɖe dzinye.

18 Woma nye awuwo ɖe wo nɔewo dome,

Eye wodzidze nu ɖe nye awu dzi.

19 Ke wò, Oo Afetɔ, mèganɔ adzɔge o.

Oo, nye ŋusẽ; netsɔ nàva kpe ɖe ŋunye.

20 Ðem tso yi nu,

Ðe nye agbe xɔasi la tso avuwo si me;

21 Ðem tso dzata ƒe nu me kple gbenyiwo ƒe dzowo nu;

Tɔ nam, eye nàɖem.

22 Maɖe gbeƒã wò ŋkɔ na nɔvinyewo;

Makafu wò le amehawo dome.

23 Mi ame siwo vɔ̃a Afetɔ, mikafui!

Mi Yakob ƒe dzidzimeviwo katã, mitsɔ ŋutikɔkɔe nɛ!

Eye mi Israel ƒe dzidzimeviwo katã, mivɔ̃e.

24 Elabena medo vlo alo nyɔ ŋu hiãtɔ la ƒe fukpekpe o;

Meɣla eƒe ŋkume ɖee o.

Eye esi wòdo ɣli nɛ be wòaxɔ na ye la, esee.

25 Makafu wò le ameha gãwo dome;

Maxe nye adzɔgbeɖefewo le ame siwo vɔ̃nɛ la ŋkume.

26 Ame fatuwo aɖu nu aɖi ƒo;

Ame siwo dia Afetɔ la akafui.

Mise vivi le agbe me tegbee.

27 Anyigba ƒe mlɔenuwo katã aɖo ŋku Afetɔ dzi, eye woatrɔ ɖe eŋu.

Dukɔwo ƒe ƒomewo katã ade ta agu ɖe ŋkuwòme.

28 Elabena Afetɔ tɔe nye fianyenye la;

Eye wòle fia ɖum ɖe dukɔwo dzi.

29 Ame siwo katã nu dze edzi na le anyigba la dzi aɖu nu ade ta agu ɖe eŋkume;

Ame siwo katã yina ketu me la ava dze klo le eŋkume;

Eye wo dometɔ aɖeke mate ŋu axɔ eɖokui ɖe agbe o.

30 Woƒe dzidzimeviwo asubɔe;

Woaƒo nu tso Afetɔ ŋu na dzidzime si ava dzɔ la.

31 Woava gblɔ eƒe dzɔdzɔenyenye ŋu nya.

Woagblɔ nu siwo wòwɔ la na wo megbeviwo.

PSALMOWO 23
1 Afetɔe nye Kplɔlanye.

Naneke mahiãm o.

 2 Gbeɖuƒe damawo wòna metsyɔ akɔ ɖo;

Gbɔɖemeƒe tɔwo nu wòkplɔam yinɛ.

 3 Ena megbɔ ɖe eme.

Ekplɔam to toƒe dzɔdzɔewo le eƒe ŋkɔ la ta.

 4 Togbɔ be mezɔa bali doblukɔ tsiɖitsiɖi me hã,

Nyemevɔ̃a vɔ̃ aɖeke o,

Elabena èli kplim;

Wò atikplɔ kple wò atizɔti faa akɔ nam.

 5 Èɖo kplɔ̃ ɖe akɔnyeme le nye ketɔwo ŋkume.

Èsi ami ɖe ta nam;

Nye kplu yɔ banaa.

 6 Ɛ̃, nyuiwɔwɔ kple amenuveve adze yonyeme le nye agbemeŋkekewo katã me,

Eye manɔ Afetɔ ƒe me ɖaa.

PSALMOWO 24
1 Afetɔ tɔe nye anyigba la kple edzinuwo katã,

Xexe blibo la kple emenɔlawo katã.

 2 Elabena eɖo egɔme anyi ɖe atsiaƒuwo dzi

Eye wòlii anyi sesĩe ɖe tɔsisiwo dzi.

 3 Ame kae alia Afetɔ ƒe to la,

Eye ame kae atsi tsitre ɖe eƒe kɔkɔeƒe la?

 4 Ame si ƒe asi me dza, eye eƒe dzi me kɔ,

Ame si meyɔa Nye Agbe tsɔ taa nu dzodzro o,

Eye mekaa alakpatam o.

 5 Eya axɔ yayra tso Afetɔ gbɔ,

Kple dzɔdzɔenyenye tso eƒe xɔname Mawu la gbɔ.

 6 Esiae nye dzidzime si biaa eta sena,

Ame siwo dia wò ŋkume, Oo Yakob ƒe Mawu. (Sela)

 7 Oo, mi agbowo, mikɔ ta dzi;

Mi blemaʋɔtruwo, miʋu,

Ne Ŋutikɔkɔefia la nage ɖe eme!

 8 Ame kae nye Ŋutikɔkɔefia sia?

Afetɔ, ŋusẽtɔ kple kalẽtɔ lae,

Afetɔ, aʋakalẽtɔ lae.

 9 Oo, mi agbowo, mikɔ ta dzi;

Mi blemaʋɔtruwo, miʋu,

Ne Ŋutikɔkɔefia la nage ɖe eme!

10 Ame ka gɔ̃e Ŋutikɔkɔefia sia nye?

Aʋakɔwo ƒe Afetɔ lae—eyae nye Ŋutikɔkɔefia la. (Sela)

PSALMOWO 25
1 Oo Afetɔ, ŋuwòe metrɔ ɖo.

 2 Nye Mawu, ŋuwòe meɖo ŋu ɖo;

Mègana ŋu nakpem o.

Mègana nye futɔwo natso aseye ɖe ŋunye o.

 3 Vavãe, ŋu makpe ame siwo da woƒe mɔkpɔkpɔ ɖe dziwò la dometɔ aɖeke o,

Ke ŋu akpe ame siwo wɔa alakpanu dzodzro la ya.

 4 Oo Afetɔ, na manya wò mɔwo;

Fia wò toƒewom.

 5 Na mazɔ le wò nyateƒe la me, eye nàfia num,

Elabena wòe nye nye xɔname Mawu la.

Wòe mele mɔ kpɔm na ŋkeke blibo la.

 6 Oo Afetɔ, ɖo ŋku wò nublanuikpɔkpɔ kple wò lɔlɔ̃ si nu metsina o

Si nèɖena fiana ɣeawokatãɣi la dzi.

 7 Mègaɖo ŋku nye ɖevimenuvɔ̃wo kple nye dzidadawo dzi o.

Ðo ŋku dzinye le wò lɔlɔ̃ si nu metsina o la ta,

Le wò nyuiwɔwɔwo ta, Oo Afetɔ.

 8 Afetɔ nyo, eye wòle dzɔdzɔe.

Esia tae wòfiaa mɔ si wòle be nu vɔ̃ wɔlawo nato anɔ agbe la wo.

 9 Akplɔ ɖokuibɔbɔlawo le nu dzɔdzɔe wɔwɔ me,

Eye wòafia eƒe mɔ ɖokuibɔbɔlawo.

10 Afetɔ ƒe mɔwo katã nye amenuveve kple nuteƒewɔwɔ sɔŋ

Na ame siwo léa eƒe nubabla kple eƒe ŋkuɖodzinyawo me ɖe asi.

11 Oo Afetɔ, xa ɖe wò ŋkɔ la ta

Nàtsɔ nye vodada akem, togbɔ be ekpe ŋutɔ hã.

12 Ame kae vɔ̃a Afetɔ?

Ame mae wòafia mɔ si wòatia lae.

13 Eyae akpɔ nu nyuiwo,

Eye eƒe dzidzimeviwo anyi anyigba la dome.

14 Tsi metoa Afetɔ kple ame siwo vɔ̃nɛ la dome o,

Eye wònana wonyaa eƒe nubabla la.

15 Nye ŋkuwo le Afetɔ ŋu ɣeawokatãɣi,

Elabena eyae aɖe nye afɔ le ɖɔ me.

16 Trɔ ɖe ŋunye, ne nàve nunye,

Elabena metsi akogo, eye metsi asi.

17 Nye dzimexaxawo dzi ɖe edzi;

Ðem tso nye xaxawo me.

18 Kpɔ nye fukpekpe kple nye hiã ɖa,

Ne nàtsɔ nye nu vɔ̃wo katã akem.

19 Kpɔ ale si nye futɔwo sɔ gbɔe ɖa

Kple ale si wolé fum kaɖikaɖii ɖa.

20 Kpɔ nye agbe ta, eye nàɖem.

Mègana ŋu nakpem o, elabena wòe mesi tso.

21 Na nuteƒewɔwɔ kple nu dzɔdzɔe wɔwɔ nakpɔ tanye,

Elabena wòe mele mɔ kpɔm na.

22 Oo Mawu, ɖe Israel tso eƒe xaxawo katã me.

PSALMOWO 26
1 Oo Afetɔ, tso afia nam, elabena mezɔ le fɔmaɖimaɖi me;

Meɖo dzi ɖe Afetɔ ŋu maʋamaʋãe.

 2 Oo Afetɔ, dzro menye, eye nàdom kpɔ;

Dza nye dzimesusuwo kple nye dzi ŋu.

 3 Elabena wò amenuveve le ŋkunyeme ɖaa,

Eye mezɔ le wò nyateƒe la me.

 4 Nyemenɔa ameblelawo ƒe ha me o,

Eye nyemedea ha kple ame siwo ɣlaa ame si ƒomevi wonye la o.

 5 Melé fu ame vlowo ƒe ha,

Eye metsri ame vɔ̃ɖiwo ƒe hadede.

 6 Maklɔ nye asi fɔmaɖitɔe,

Eye maƒo xlã wò vɔsamlekpui la, Oo Afetɔ,

 7 Ne mana nye akpedaha naɖi

Eye maɖe gbeƒã wò nukudɔwo katã.

 8 Afetɔ, melɔ̃ wò aƒe, afi si nèle,

Kple teƒe si wò ŋutikɔkɔe le.

 9 Mègakplɔm ƒu gbe kpe ɖe nu vɔ̃ wɔlawo ŋu o

Eye mègaɖe nye agbe ɖa kpe ɖe ŋutasẽlawo ŋu o,

10 Wo, ame siwo ŋukpenanuwɔwɔ le asi ŋu na,

Eye zãnuxɔxɔ yɔ nuɖusi me na.

11 Ke nye la, mazɔ le nye fɔmaɖimaɖi me.

Ðem, eye nàve nunye.

12 Nye afɔ le teƒe sɔsɔe;

Makafu Afetɔ le ameha gãwo dome.

PSALMOWO 27
1 Afetɔe nye nye kekeli kple nye xɔname.

Ame kae mavɔ̃?

Afetɔe nye mɔ́ sesẽ na nye agbe.

Ame kae adzi ŋɔ nam?

 2 Ne ame vlowo dze dzinye be yewoavuvum la,

Nye ketɔwo kple nye futɔwo ŋutɔwoe akli nu adze anyi.

 3 Ne aʋakɔ ƒu asaɖa anyi ɖe ŋunye hã la,

Dzika matso ƒonye o.

Ne woho aʋa ɖe ŋunye hã,

Dzi akpɔtɔ anɔ ƒonye.

 4 Nu ɖeka mebia Afetɔ

—Eyae mele mɔ kpɔm na,

Be manɔ Afetɔ ƒe me le nye agbemeŋkekewo katã me,

Ne makpɔ Afetɔ ƒe atsyɔ̃,

Eye malé ŋku ɖe eƒe gbedoxɔ la ŋu ahakpɔ ŋudzedze ɖe eŋu.

 5 Elabena atsɔm aɣla ɖe eƒe nɔƒe le vɔ̃dzɔgbe;

Aɣlam ɖe bebeƒe le eƒe agbadɔ me;

Akɔm aɖo agakpe kɔkɔ dzi.

 6 Azɔ la, nye ta kɔ dzi gbɔ nye futɔ siwo ƒo xlãm godoo la ta;

Matsɔ aseyetsotso asa vɔwo le eƒe agbadɔ me;

Madzi kafukafuha na Afetɔ.

 7 Oo Afetɔ, ne medo ɣli yɔ wò la, see;

Ve nunye, eye nàtɔ nam.

 8 Nye dzi gblɔ nam le ŋuwò be:

“Midi ŋkunyeme.”

Oo Afetɔ, madi ŋkuwòme.

 9 Mègaɣla wò ŋkume ɖem o.

Mègatrɔ wò subɔla ɖo ɖa le dziku me o.

Wòe nye nye kpeɖeŋutɔ;

Oo Mawu, nye xɔnametɔ, mègagblẽm ɖi alo agbe nu le gbɔnye o.

10 Ne fofonye kple danye gblẽm ɖi hã la,

Afetɔ ya axɔm.

11 Oo Afetɔ, fia wò mɔm,

Eye nàkplɔm to toƒe dzɔdzɔe le nye futɔwo ta.

12 Mègatsɔm de asi na nye ketɔwo o,

Elabena aʋatsoɖasefowo tso ɖe ŋunye,

Eye wotsɔ ŋutasesẽ le ŋɔdzi dom nam.

13 Afi kae manɔ ne ɖe xɔse mele asinye

Be makpɔ Afetɔ ƒe nyuiwɔwɔ teƒe le agbagbeawo ƒe anyigba dzi o?

14 Kpɔ mɔ na Afetɔ;

Sẽ ŋu eye nàlé dzi ɖe ƒo.

Ɛ̃, kpɔ mɔ na Afetɔ.

PSALMOWO 28
1 Oo Afetɔ, nye Agakpe, wò yɔm mele;

Mègado tokum o.

Ne èzi kpi kpɔm la,

Manɔ abe aʋlimeyilawo ene.

 2 Se nye kokoƒogbe ne medo ɣli na wò,

Eye mewu nye asiwo dzi ɖo ɖe wò gbedoxɔa ƒe kɔkɔeƒe la.

 3 Mègakplɔm kpe ɖe ame vɔ̃ɖiwo kple ame siwo tsɔ nu vɔ̃ɖi wɔwɔ ɖo dɔe la ŋu o,

Ame siwo ƒoa nu kple wo xɔlɔ̃wo fafɛ, evɔ vɔɖivɔ̃ɖi le dzi me na wo.

 4 Ðo eteƒe na wo ɖe woƒe nuwɔnawo nu,

Ðe woƒe nu vɔ̃ɖi wɔwɔwo nu.

Ðo eteƒe na wo ɖe woƒe asinudɔwɔwɔwo nu,

Ðe woƒe nuwɔnawo nu.

 5 Elabena womeléa ŋku ɖe Afetɔ ƒe dɔwɔwɔwo,

Kple eƒe asinudɔwɔwɔ ŋu o.

Eya ta aƒu wo anyi, eye magafɔ wo ɖe te o.

 6 Woakafu Afetɔ,

Elabena ese nye kokoƒoƒo be woakpe ɖe ŋunye.

 7 Afetɔe nye nye ŋusẽ kple nye akpoxɔnu;

Eya ŋue nye dzi le ŋu ɖom ɖo.

Exɔ nam, eya ta nye dzi le aseye tsom;

Eya ta madzi ha akafui.

 8 Afetɔe nye eƒe dukɔ la ƒe ŋusẽ;

Eyae nye mɔ́ sesẽ si xɔna na eƒe amesiamina la geɖe.

 9 Xɔ na wò dukɔ, eye nàyra wò domenyinu la.

Kplɔ wo, eye nàkɔ wo ɖe akɔnu ɖaa tegbee.

PSALMOWO 29
1 Mi ŋusẽtɔwo, mitsɔ nu si Afetɔ dze na la nɛ,

Mitsɔ nu si Afetɔ dze na la nɛ le eƒe ŋutikɔkɔe kple ŋusẽ ta.

 2 Mitsɔ bubu si dze na Afetɔ ƒe ŋkɔ la nɛ.

Mide ta agu ɖe Afetɔ ŋkume le atsyɔ̃ɖoɖo kɔkɔe me.

 3 Afetɔ ƒe gbe ɖi le tsiwo dzi;

Ŋutikɔkɔe Mawu la ɖe gbe.

Afetɔ le tsi geɖewo tame.

 4 Ŋusẽ le Afetɔ ƒe gbe ŋu;

Ŋutikɔkɔe le Afetɔ ƒe gbe ŋu.

 5 Afetɔ ƒe gbe ŋea sedertiwo;

Ɛ̃, Afetɔ ŋea Lebanon ƒe sedertiwo wluiwluiwlui,

 6 Enana Lebanon tia kpo abe nyivi ene,

Eye Sirion tia kpo abe gbenyivi ene.

 7 Afetɔ ƒe gbe kea dzo mia;

 8 Afetɔ ƒe gbe na gbedzi ʋuʋu;

Afetɔ na Kades gbedzi ʋuʋu.

 9 Afetɔ ƒe gbe nana zinɔwo léa ku dzia vi

Eye wònana avewo lũa xe.

Ame siwo katã le eƒe gbedoxɔ me le gbɔgblɔm be: “Ŋutikɔkɔe na Mawu!”

10 Afetɔ bɔbɔ nɔ eƒe fiazi dzi le tsiɖɔɖɔwo dzi;

Afetɔ bɔbɔ nɔ anyi abe Fia ene tegbee.

11 Afetɔ ana ŋusẽ eƒe dukɔ la.

Afetɔ atsɔ ŋutifafa ayra eƒe dukɔ la.

PSALMOWO 30
1 Oo Afetɔ, mado wò ɖe dzi, elabena wòe hem do goe;

Eye mèna nye futɔwo tso aseye le tanye o.

 2 Oo Afetɔ, nye Mawu, medo ɣli na wò, eye nèda gbe le ŋunye.

 3 Oo Afetɔ, wòe kɔm doe tso Tsiẽƒe;

Èxɔm ɖe agbe; mèna meyi aʋli me o.

 4 Midzi kafukafuha na Afetɔ, mi eƒe nuteƒewɔlawo,

Mikafu eƒe ŋkɔ kɔkɔe la;

 5 Elabena ne edo dziku ɖe ame ŋu hã, enu mesena yina o,

Ke eƒe amenuveve ya nɔa anyi le ame ƒe agbenɔɣi katã.

Avi ate ŋu adzɔ le fiẽ, ke aseyetsotso vaa aƒe le ŋdi.

 6 Ke nye la, megblɔ le nye dziɖeɖiɣi be:

“Nyemaʋã akpɔ o.”

 7 Oo Afetɔ, esi nève nunye la, èna meli ke sesĩe abe to ene.

Gake esi nèɣla wò ŋkume la, dzidzi ƒom.

 8 Oo Afetɔ, wò yɔm mele;

Afetɔ, wòe mele koko ƒom na be nàve nunye.

 9 Viɖe kae wòanye ne meku, ne meyi yɔdo me?

Ðe ʋuʋudedi akafu wòa? Ðe wòaɖe gbeƒã wò nuteƒewɔwɔa?

10 Oo Afetɔ, see, eye nàve nunye.

Oo Afetɔ, kpe ɖe ŋunye.

11 Ètrɔ nye konyifafa zu ɣeɖuɖu;

Èɖe nye akpanya le ŋunye, eye nèta dzidzɔ nam abe avɔ ene,

12 Ale be madzi ha akafu wò, eye ɖoɖoe mazi le nunye o.

Oo Afetɔ, nye Mawu, makafu wò tegbee.

PSALMOWO 31
1 Oo Afetɔ, wòe mesi tso.

Mègana ŋu nakpem gbeɖe o.

Ðem le wò dzɔdzɔenyenye la ta.

 2 Ƒu to anyi ɖe ŋunye.

Va kaba nàxɔ nam.

Nànye agakpe sesẽ nam,

Nànye mɔ́ sesẽ, ne nàɖem.

 3 Elabena wòe nye nye agakpe kple nye mɔ́ sesẽ;

Ànɔ ŋgɔ nam ahakplɔm le wò ŋkɔ la ta.

 4 Àɖem le ɖɔ si woɖo nam le adzame la me,

Elabena wòe nye nye sitsoƒe.

 5 Asiwò mee metsɔ nye gbɔgbɔ de.

Oo Afetɔ, nyateƒe Mawu, èɖem.

 6 Melé fu ame siwo ku ɖe legba dzodzro maɖinuwo ŋu,

Ke nye la, Afetɔ ŋue meɖoa ŋu ɖo.

 7 Matso aseye le wò lɔlɔ̃ si nu metsina o la ta,

Elabena wò ŋku le nye fukpekpewo ŋu;

Ènya nye nuxaxawo nyuie.

 8 Mètsɔm de asi na futɔ la o,

Ke boŋ èna mele afi si le dedie.

 9 Oo Afetɔ, ve nunye, elabena meɖo xaxa me.

Nuxaxa na nu te nye ŋkuwo ŋu, eye nu te nye ameti bliboa hã ŋu.

10 Nuxaxa yɔ nye agbe me fũu

Eye nye ƒewo yɔ kple hũɖeɖe sɔŋ.

Nye ŋusẽ dzi ɖe kpɔtɔ le nye vodada ta;

Eye nu te nye ƒuwo ŋu.

11 Mezu alɔmeɖenu na nye ketɔwo katã,

Vevietɔ na hanyeviwo.

Eye mezu bibi na nye ame nyanyɛwo;

Ne wokpɔm le kpɔdomee ko la, wodea afɔ du me.

12 Woɖem ɖa le woƒe dzi me eye woŋlɔm be, abe ɖe meku ene;

Mezu abe ze gbagbã ene.

13 Elabena mese ameŋugblẽnya geɖewo;

Ŋɔdzi ɖe to ɖem.

Ne woƒo takpli ɖe ŋunye la,

Woɖoa nugbe be yewoaɖe nye agbe ɖa.

14 Gake ŋuwòe meɖoa ŋu ɖo, Oo Afetɔ.

Megblɔ be: “Nye Mawue nènye.”

15 Nye ŋkekewo le asiwò me.

Ðem tso nye futɔwo kple yonyemetilawo si me.

16 Kɔ mo ɖe wò subɔla la,

Eye nàɖem le wò amenuveve la ta.

17 Oo Afetɔ, ne meyɔ wò la, mègana ŋu nakpem o.

Na ŋu nakpe ame vɔ̃ɖiwo;

Ðoɖoe nezi le wo nu le Tsiẽƒe.

18 Na alakpanuyiwo nade ga,

Nuyi siwo tsɔa dada kple amemabumabu gblɔa nya vlowo ɖe ame dzɔdzɔe ŋu la.

19 Wò nyuiwɔwɔ sɔ gbɔ loo!

Èdzrae ɖo ɖi na ame siwo vɔ̃a wò la,

Eye nèɖee fia ame siwo si wò tso la, le amegbetɔviwo katã ŋkume.

20 Àɣla wo ɖe ɣaɣlaƒe si le ŋkuwòme,

Tso ame siwo le nugbe ɖom ɖe wo ŋu la si me.

Àɣla wo ɖe wò agbadɔ me

Tso amewo ƒe aɖeɖiƒoame gbɔ.

21 Woakafu Afetɔ,

Elabena eɖe eƒe amenuveve fiam le du si woɖe to ɖo la me.

22 Ke nye la, vɔvɔ̃ ɖom, eye megblɔ be:

“Woatsrɔ̃m ɖa keŋkeŋ le ŋkuwòme.”

Gake èse nye kokoƒogbe esi medo ɣli na wò.

23 Milɔ̃ Afetɔ, mi ame siwo katã wɔa nuteƒe nɛ!

Afetɔ kpɔa nuteƒewɔlawo ta,

Ke enana dadalawo kpɔa wo tɔ nua gakpɔnɛ ɖe edzi.

24 Misẽ ŋu, eye milé dzi ɖe ƒo,

Mi ame siwo katã le Afetɔ si nu kpɔm.

PSALMOWO 32

1 Dzidzɔtɔe nye ame si ƒe dzidada wotsɔ ke, ame si ƒe nu vɔ̃ dzi wotsyɔ nui.

 2 Dzidzɔtɔe nye ame si Afetɔ mebua vodada na o,

Ame si me beble aɖeke mele o.

 3 Esi mezi ɖoɖoe la, nye ŋeŋe atraɖii ŋkeke bliboa na nye ƒuwo nyunyɔ.

 4 Elabena wò asi sẽ ɖe dzinye zã kple keli.

Ŋusẽ vɔ le menye keŋ abe ale si dzomeŋɔli ƒe dzoxɔxɔ gbãgbãgbã noa tsii ene. (Sela)

 5 Meʋu nye nu vɔ̃ me na wò mlɔeba;

Nyemetsyɔ nu nye vodada dzi o.

Megblɔ be: “Maʋu nye dzidadawo me na Afetɔ.”

Eye nètsɔ nye nu vɔ̃wo ŋuti fɔɖiɖi kem. (Sela)

 6 Esia ta nuteƒewɔlawo katã ado gbe ɖa na wò,

Zi ale si woate ŋu akpɔ wò ko.

Ekema tsiɖɔɖɔwo gɔ̃ hã made wo gbɔ o.

 7 Bebeƒe nènye nam;

Àkpɔ tanye tso xaxa me.

Àtsɔ ɖeɖe ƒe aseyetsotso aƒo xlãm. (Sela)

 8 “Mana gɔmesese deto nasu asiwò, eye mafia mɔ si nàto la wò.

Nye ŋku anɔ ŋuwò eye maɖo aɖaŋu na wò.

 9 Miganɔ abe sɔ alo tedzisɔ si nunya mele tagbɔ na o,

Si wòle be woatsɔ ka kple numega amla,

Hafi wòate ɖe ame ŋu la ene o.”

10 Ame vɔ̃ɖi ƒe vevesesewo sɔa gbɔ;

Ke ame si ɖoa ŋu ɖe Afetɔ ŋu ya la, eƒe amenuveve ƒoa xlãe.

11 Mi ame dzɔdzɔewo, mikpɔ dzidzɔ ɖe Afetɔ ŋu eye mitso aseye;

Mi dzi dzɔdzɔe tɔwo katã, migli kple dzidzɔ.

PSALMOWO 33
1 Oo, mi ame dzɔdzɔewo, migli kple dzidzɔ ɖe Afetɔ ŋu.

Esɔ be nu dzɔdzɔe wɔlawo nakafui.

 2 Mitsɔ saŋku da akpe na Afetɔ;

Miƒo ha nɛ le kasaŋku kaewotɔwo dzi.

 3 Midzi ha yeye nɛ;

Mitsɔ aseyetsotso ƒo kasaŋku nɛ aɖaŋutɔe.

 4 Elabena Afetɔ ƒe nya le dzɔdzɔe,

Eye eƒe nuwɔwɔwo katã le eteƒe.

 5 Elɔ̃a dzɔdzɔenyenye kple nya dzɔdzɔe.

Anyigba dzi yɔ fũu kple Afetɔ ƒe amenuveve.

 6 Afetɔ ƒe numenya nue wòwɔ dziƒowo,

Eye eƒe numegbɔgbɔ la nue wòwɔ wo ŋu nuwo katã.

 7 Enana atsiaƒutsiwo ƒoa ƒu ɖi abe tsita ene;

Eye wòdzraa tsi dzeagbowo ɖo ɖe nudzraɖoƒewo.

 8 Anyigba blibo la nevɔ̃ Afetɔ.

Anyigbadzinɔlawo katã nevɔ̃e eye woade bubu deto eŋu.

 9 Elabena eƒo nu, eye wòva eme;

Ede se, eye wòli ɖi goŋgoŋ.

10 Afetɔ gblẽ dukɔwo ƒe adaŋudedewo me;

Etɔtɔ dukɔwo ƒe ɖoɖowo me.

11 Ke Afetɔ ƒe nyametsotsowo ya li tegbee;

Eƒe dzimesusuwo li tso dzidzime yi dzidzime.

12 Dzidzɔtɔwoe nye dukɔ si ƒe Mawu Afetɔ nye,

Dukɔ si wòtia be wòanye ye ŋutɔ ye tɔ.

13 Afetɔ kpɔa nu tso dziƒowo;

Ekpɔa amegbetɔviwo katã.

14 Ele enɔƒe

Eye eƒe ŋku le anyigbadzinɔlawo katã ŋu.

15 Eyae wɔa amewo katã ƒe dzi;

Eye wòléa ŋku ɖe woƒe dɔwɔwɔwo katã ŋu.

16 Fia ƒe aʋadziɖuɖu mele aʋakɔ kpaŋkpaŋ me o;

Eye kalẽtɔ ƒe ŋusẽ triakɔ meɖenɛ o.

17 Ŋuɖoɖo ɖe sɔwo ŋu hena aʋadziɖuɖu nye tofloko;

Eƒe ŋusẽ triakɔ la mexɔna na ame godoo o.

18 Kpɔ ɖa! Afetɔ ƒe ŋku le ame siwo vɔ̃nɛ la ŋu,

Ame siwo kpɔa mɔ na eƒe amenuveve,

19 Be wòaɖe wo tso ku si me

Eye wòalé woƒe agbe ɖe te le dɔŋɔli.

20 Míele mɔ kpɔm na Afetɔ.

Míaƒe kpeɖeŋutɔ kple míaƒe akpoxɔnu wònye.

21 Eya mee míaƒe dzi kpɔa dzidzɔ le;

Elabena eƒe ŋkɔ kɔkɔe la ŋue míeɖoa dzi ɖo.

22 Oo Afetɔ, wò amenuveve nenɔ kpli mí,

Esi míele mɔ kpɔm na wò.

PSALMOWO 34 
1 Makafu Afetɔ ɣeawokatãɣi;

Eƒe kafukafu anɔ nu nam ɖaa.

 2 Matsɔ Afetɔ aƒo adegbe;

Ame fafawo asee, eye dzi adzɔ wo.

 3 Mido kɔkɔ Afetɔ kplim;

Eye mina míawɔ ɖeka ado eƒe ŋkɔ ɖe dzi.

 4 Medi Afetɔ yome mɔ, etɔ nam.

Eɖem tso nu siwo katã vɔ̃m mele la me.

 5 Dzidzɔ ɖo mo na ame siwo le esinu kpɔm;

Woƒe mo metsi dãa o.

 6 Esi hiãtɔ sia yɔe la, Afetɔ see.

Eɖee tso eƒe hiãwo katã me.

 7 Afetɔ ƒe dɔla ƒua asaɖa anyi ɖe ame siwo vɔ̃nɛ la ŋu godoo va kpe,

Eye wòɖea wo.

 8 Miɖɔe kpɔ, eye miakpɔe be Afetɔ nyo;

Dzidzɔtɔe nye ame si sinɛ tsona.

 9 Mivɔ̃ Afetɔ, mi eƒe ame kɔkɔewo katã,

Elabena hiã metua ame siwo vɔ̃nɛ la o.

10 Hiã tua dzata sesẽwo gɔ̃ hã eye dɔ wua wo,

Ke ame siwo dia Afetɔ la, nu nyui aɖeke mahiã wo o.

11 Vinyewo, miva, miɖo tom,

Ne mafia Afetɔ vɔvɔ̃ mi.

12 Mia dometɔ kae lɔ̃a agbe

Eye wòle didim vevie be yeakpɔ ŋkeke nyui geɖewo?

13 Ekema nekpɔ eƒe aɖe dzi le vɔ̃ ŋu,

Kple eƒe nuyiwo dzi le amebeble ŋu.

14 Trɔ ɖa le vɔ̃ ŋu, ne nàwɔ nyui;

Di ŋutifafa, eye nàti eyome.

15 Afetɔ ƒe ŋkuwo le ame dzɔdzɔewo ŋu,

Eye eƒe towo le woƒe ɣlidodowo ŋu.

16 Ke Afetɔ tɔa ŋku nu vɔ̃ɖi wɔlawo,

Ne wòatutu nu sia nu si ana woaɖo ŋku wo dzi la ɖa le anyigba la dzi.

17 Wodo ɣli, Afetɔ see;

Eye wòɖe wo tso woƒe xaxawo katã me.

18 Afetɔ tsɔ ɖe ame siwo ƒe dzi gbã gudugudu la gbɔ;

Exɔna na ame siwo ƒe gbɔgbɔ ŋu nu te la.

19 Ame dzɔdzɔe ƒe fukpekpewo sɔ gbɔ,

Ke Afetɔ ɖenɛ le wo katã me.

20 Ekpɔa eƒe ƒuwo katã ta;

Womeŋe wo dometɔ ɖeka pɛ hã o.

21 Vɔ̃ aɖi kpe ame vɔ̃ɖi wòaku;

Eye woabu fɔ ame siwo léa fu ame dzɔdzɔe la.

22 Afetɔ ɖea esubɔlawo ƒe agbe;

Womabu fɔ ame siwo sinɛ tsona la dometɔ aɖeke o.

PSALMOWO 35
1 Oo Afetɔ, ʋli tanye le nye futɔwo si me;

Wɔ avu kple ame siwo le avu wɔm kplim.

 2 Tsɔ wò akpoxɔnu sue kple akpoxɔnu gã,

Ne nàtso ava xɔ nam.

 3 Tsɔ wò akplɔ kple fía, ne nàkpe kple yonyemetilawo.

Gblɔ nam be: “Nyee nye wò xɔname.”

 4 Ŋukpe kple vlododo neva ame siwo le nye agbe dim la dzi.

Ame siwo le vɔ̃ ɖom ɖe ŋunye la nagbugbɔ ɖe megbe, eye woƒe mo natsi dãa.

 5 Wonenɔ abe tsro le ya nu ene;

Eye Afetɔ ƒe dɔla nenya wo ɖe nu.

 6 Woƒe mɔ dzi nedo viviti eye wòanɔ ɖiɖim,

Esi Afetɔ ƒe dɔla yɔ wo ɖe nu.

 7 Elabena yakatsyɔ woɖo ɖɔ ɖi nam le adzame;

Eye woɖe ʋe nam, evɔ nyemewɔ naneke o hafi.

 8 Gbegblẽ neƒo ɖe edzi kpoyi;

Eye eya ŋutɔ ƒe ɖɔ si wòɖo la neɖee;

Nege dze eme ne wòatsrɔ̃.

 9 Ke nye ya matso aseye ɖe Afetɔ ŋu;

Makpɔ dzidzɔ ɖe eƒe xɔxɔdɔwo ŋu.

10 Nye ƒuwo katã agblɔ be:

“Oo Afetɔ, ame kae le abe wò ene,

Wò ame si ɖea ame beli la tso ame si sesẽ wui la si me,

Eye nèxɔna na wɔnamanɔŋutɔ kple hiãtɔ la tso ame siwo daa adzo wo la si me?”

11 Ðasefo siwo ɖo susu vɔ̃ la zɔ va ŋgɔgbe,

Nu siwo ŋu nyemenya naneke le o la biamee wole.

12 Wotsɔa vɔ̃ ɖoa nyui teƒe nam,

Ale be wona metsi asi.

13 Evɔ ne wole dɔ lém la, nye ya metaa akpanya;

Metsia nu dɔna hewɔa fu ɖokuinye,

Eye ne nye gbedodoɖa va tsi gbɔnye eŋumaɖomaɖoe la,

14 Menɔa yiyim nɔa nu xam abe xɔ̃nye alo nɔvinyeŋutsu fam mele ene;

Meléa blanui hedea mo to abe ame si le dadaa fam ene.

15 Gake esi mekli nu la, woawo ya wokpɔ dzidzɔ, eye woƒo takpli;

Wokpe ta ɖe ŋunye hede xa ɖi be yewoaƒom aƒu anyi;

Wogblẽ ŋunye keŋ, eye ɖoɖoe mezina le wo nu o.

16 Mawumavɔ̃lawo ɖua fewu le ŋunye vlodoametɔe,

Wole aɖukli ɖum ɖe ŋunye,

17 Oo Afetɔ, ɣekaɣi nànɔ eteƒe kpɔm ase ɖo?

Ðem tso woƒe amedzidzedzewo me,

Ðe nye agbe xɔasi la tso dzatawo si me.

18 Ekema mada akpe na wò le ame geɖewo ƒe ha dome;

Makafu wò le ameha geɖewo dome.

19 Mègana ame siwo lé fum dzodzro la nakpɔ dzidzɔ le tanye o;

Eye mègana ame siwo tsrim dzodzro la nate ŋku ɖem o.

20 Elabena menye ŋutifafanyae wogblɔna o,

Ke boŋ woɖoa nugbe ɖe ame fafa siwo le anyigbaa dzi la ŋu.

21 Woke woƒe nu baa le nunye tsom,

Le gbɔgblɔm be: “Ehɛ̃! Ehɛ̃! Míekpɔe kple míaƒe ŋkuwo.”

22 Oo Afetɔ, èle eteƒe kpɔm. Mègazi kpi o.

Oo Afetɔ, mèganɔ adzɔge tso gbɔnye o.

23 Oo nye Mawu, Afetɔ, nyɔ, ne nàtso aʋli tanye,

Eye nàxɔ nya ɖe nunye.

24 Oo Afetɔ nye Mawu, drɔ̃ ʋɔnum ɖe wò dzɔdzɔenyenye nu;

Eye mègana dzi nadzɔ wo le tanye o.

25 Mègana woagblɔ na wo ɖokui be, “Ehɛ̃! esia dim míele” o.

Mègana woagblɔ be, “Míemii” o.

26 Na ame siwo katã le dzidzɔ kpɔm be gbegblẽ va dzinye la,

Naɖu ŋukpe eye woƒe mo natsi dãa.

Na ŋukpe kple vlododo nanyè tsyɔ ame siwo doa wo ɖokui ɖe dzi ɖe ŋunye la.

27 Ke na ame siwo dzɔa dzi le nye dzɔdzɔenyenye ŋu la nagli kple dzidzɔ;

Eye woanɔ gbɔgblɔm ɖaa be:

“Woado Afetɔ, ame si dzɔa dzi le eƒe subɔla ƒe ŋutifafa ŋu la, ɖe dzi.”

28 Ekema nye aɖe aƒo nu le wò dzɔdzɔenyenye ŋu,

Eye wòakafu wò ŋkeke blibo la.

PSALMOWO 36
1 Ame vɔ̃ɖi ƒe dzidada ƒoa nu nɛ le eƒe dzi me ke;

Mawuvɔvɔ̃ aɖeke mele mo nɛ o.

 2 Elabena eya ŋutɔ kafua eɖokui ale gbegbe be,

Metea ŋu kpɔa eƒe vodada dzea sii, ne wòatsrii o.

 3 Vɔ̃ɖinyenye kple beble yɔ nu me nɛ fũu;

Nunya si hiã wòatsɔ awɔ nu nyui la mele esi o.

 4 Eɖoa nu vɔ̃ɖi le eƒe aba dzi.

Mɔ vɔ̃ dzi koe wònɔna;

Eye megbea nu le vɔ̃ gbɔ o.

 5 Oo Afetɔ, wò amenuveve kɔ yi ɖatɔ dziƒo ke,

Wò nuteƒewɔwɔ de dzi ɖo alilikpowo me ke.

 6 Wò dzɔdzɔenyenye le abe to gã nyadriwo ene;

Wò ʋɔnudɔdrɔ̃wo le abe tɔ goglowo ene.

Oo Afetɔ, èxɔna na amegbetɔwo kple lãwo siaa.

 7 Oo Mawu, wò lɔlɔ̃ si nu metsina o la xɔ asi loo!

Wò aʋalawo ƒe vɔvɔli tee

Amegbetɔviwo dia sitsoƒe le.

 8 Wono wò aƒemenu nyuitɔwo wòɖi kɔ na wo,

Eye nèna wono wò dzidzɔtɔsisiwo.

 9 Gbɔwòe agbedzɔƒe le;

Wò kekeli mee míele kekeli kpɔm le.

10 Na wò lɔlɔ̃ si nu metsina o la nanɔ kple ame siwo nya wò,

Eye nàɖe wò dzɔdzɔenyenye afia dzi dzɔdzɔe tɔwo.

11 Mègana dadalawo ƒe afɔ nafanyam loo

Alo ame vɔ̃ɖiwo ƒe asi nanyam de gbe o.

12 Nu vɔ̃ɖi wɔlawoe nye ema ɖo baba le afi ma;

Wotutu wo ƒu anyi, eye fɔfɔ megale wo ŋu o.

PSALMOWO 37
1 Dzi megaku wò le nu vlo wɔlawo ta o,

Eye mègaʋã ŋu nu tovo wɔlawo o.

 2 Elabena woayrɔ kaba abe gbe ene

Eye woayrɔ abe aŋgba fẽ ene.

 3 Ðo ŋu ɖe Afetɔ ŋu, eye nàwɔ nu nyui;

Nɔ anyigba la dzi, eye nàwɔ nuteƒe.

 4 Afetɔ ƒe nu nenyo ŋuwò vevie,

Ekema ana nu siwo wò dzi di la wò.

 5 Tsɔ wò mɔwo gblẽ ɖe Afetɔ si me;

Ðo ŋu ɖe eŋu, ekema eya ŋutɔ awɔe na wò.

 6 Ana wò dzɔdzɔenyenye naklẽ abe ŋdikekeli ene,

Kple wò nya dzɔdzɔe abe ŋdɔkutsu dzatsɛ ene.

 7 Zi kpi le Afetɔ ŋkume kpoo,

Eye nànɔ esinu kpɔm.

Dzi megaku wò ɖe ame si

Ƒe mɔ vɔ̃wo dzea edzi nɛ la ŋu o.

 8 Wò dɔmedzoe nu nefa, eye nàdzudzɔ dzikudodo;

Dzi megaku wò ne nàtrɔ ɖe vɔ̃wɔwɔ ŋu o.

 9 Elabena woatsrɔ̃ ame vlowo,

Ke ame siwo kpɔa mɔ na Afetɔ lae anyi anyigba la dome.

10 Esusɔ vie ko ame vɔ̃ɖiwo maganɔ anyi o;

Àdi wo le wo nɔƒe,

Ke womaganɔ afi ma o.

11 Ke ame fafawo anyi anyigba la dome,

Eye dzi adzɔ wo geɖe ɖe ŋutifafa gbogbo la ŋuti.

12 Ame vɔ̃ɖi le nugbe ɖom ɖe ame dzɔdzɔe la ŋu;

Eye wòle aɖukli ɖum ɖe eŋu.

13 Ke Afetɔ akoe,

Elabena enyae be eƒe ŋkeke li gbɔna.

14 Ame vɔ̃ɖiwo ɖe woƒe yi ɖe go, eye wovu woƒe da me

Be yewoaƒu wɔnamanɔŋutɔ kple ame dahe anyi,

Ne woawu ame siwo ƒe mɔ dzɔ la.

15 Gake woawo ŋutɔwo ƒe yi aƒo ɖe woƒe dzi;

Eye woƒe datiwo aŋe.

16 Nu ʋɛ si le ame dzɔdzɔe si la nyo wu

Nu gbogbo siwo le ame vɔ̃ɖi geɖewo si.

17 Elabena ame vɔ̃ɖiwo ƒe alɔ aŋe,

Ke Afetɔ alé ame dzɔdzɔewo ya ɖe te.

18 Nu siwo me tom ame maɖifɔwo le la le nyanya na Afetɔ,

Eye woƒe domenyinu anɔ anyi ɖaa tegbee.

19 Ŋu makpe wo le vɔ̃dzɔgbewo o;

Eye nu abɔ ɖe wo si taŋ le dɔŋɔli.

20 Ke ame vɔ̃ɖiwo ya atsrɔ̃;

Afetɔ ƒe futɔwo nu ayi abe gbeɖuƒe damawo ene,

Woabu vĩ abe dzudzɔ ene.

21 Ame vɔ̃ɖi la doa nugbana, eye mexenɛ o,

Ke ame dzɔdzɔe nyoa dɔme henaa nu ame.

22 Ame siwo Mawu yra la, anyi anyigba la dome,

Ke ame siwo wòƒo ƒi de la, woatsrɔ̃ wo.

23 Afetɔ fiaa mɔ ame ƒe afɔɖeɖewo

Nenye be amea ƒe mɔwo dze eŋu.

24 Ne edze anyi hã la, maɖo baba ɖi o,

Elabena Afetɔ léa eƒe asi ɖe te.

25 Menɔ ɖevime tsã, azɔ metsi,

Ke nyemekpɔ wogblẽ ame dzɔdzɔe ɖi loo,

Alo be viawo ɖo abologbe kpɔ o.

26 Edoa nu gbana na amewo faa ɣesiaɣi,

Ale yayra le mɔ dzi na viawo.

27 Te ɖa tso nu vɔ̃ɖi gbɔ eye nàwɔ nu nyui,

Ekema ànɔ anyi tegbee.

28 Elabena Afetɔ lɔ̃a nya dzɔdzɔe,

Eye magblẽ ame siwo wɔa nuteƒe nɛ la ɖi o.

Akpɔ wo ta tegbee;

Ke woatsrɔ̃ ame vɔ̃ɖiwo ƒe dzidzimeviwo.

29 Ame dzɔdzɔewo anyi anyigba la dome,

Eye woanɔ edzi tegbee.

30 Nunya dona tso ame dzɔdzɔe nu,

Eye eƒe aɖe gblɔa nya dzɔdzɔe.

31 Eƒe Mawu ƒe se la le eƒe dzi me;

Eƒe afɔ magli o.

32 Ame vɔ̃ɖi le ame dzɔdzɔe la ɖiam,

Eye wòle didim be yeawui.

33 Ke Afetɔ maɖe asi le eŋu nɛ o

Eye ne wodrɔ̃ ʋɔnui la, maɖi fɔ o.

34 Kpɔ mɔ na Afetɔ, eye nànɔ eƒe mɔ dzi,

Ekema ado wò ɖe dzi, ne nànyi anyigba la dome.

Ne wole ame vɔ̃ɖiwo tsrɔ̃m la, àkpɔ eteƒe.

35 Mekpɔ ame vɔ̃ɖi ŋutasẽla,

Evu eɖokui dranyi abe ati dama si dzɔ kple ke ene.

36 Kaka makpɔ ko enu yi, eye megali o;

Medii gadii, ke nyemekpɔe o.

37 Lé ŋku ɖe ame maɖifɔ la ŋu,

Eye nàkpɔ ame dzɔdzɔe la ɖa,

Elabena eƒe etsɔme anye ŋutifafa sɔŋ.

38 Ke woatsrɔ̃ sedzidalawo katã;

Eye etsɔme aɖeke manɔ anyi na ame vɔ̃ɖiwo o.

39 Ame dzɔdzɔewo ƒe xɔname tso Afetɔ gbɔ;

Eyae nye woƒe mɔ́ sesẽ le xaxaɣi.

40 Afetɔ akpe ɖe wo ŋu, eye wòaxɔ na wo.

Axɔ na wo tso ame vɔ̃ɖiwo si me, eye wòaɖe wo,

Elabena wosii tso.

PSALMOWO 38
1 Oo Afetɔ, mègaka mo nam le dziku me o,

Eye mègaɖɔm ɖo le dɔmedzoe me o.

 2 Elabena wò aŋutrɔwo ƒo ɖem yi ememe,

Eye wò asi sẽ ɖe dzinye.

 3 Nye ameti bliboa medze dɔ le wò dɔmedzoe ta.

Nye ƒuwo me mefa nam o le nye nu vɔ̃wo ta.

 4 Elabena nye vodadawo kɔ gbɔ tanye;

Wole abe agba kpekpe si wu tsɔtsɔ nam ene.

 5 Nye abiwo le ʋeʋẽm hele tsi tsyɔm yoo,

Le nye bometsitsi ta.

 6 Metɔtɔ, eye medo dɔgɔ̃e;

Melé blanui le yiyim ŋkeke blibo la katã.

 7 Elabena nye lãme ʋu dzo hɛ̃e;

Eye nye ameti bliboa dze dɔ.

 8 Nye lãme tu, eye megbã gudugudu;

Nye dzi le veve sem hena mele ŋeŋem sesĩe.

 9 Oo Afetɔ, nye didiwo katã le ŋkuwòme,

Eye nye hũɖeɖewo mele ɣaɣla ɖe wò o.

10 Nye dzi le tsotsom kpokpokpo, ŋusẽ vɔ le ŋunye,

Eye nye ŋkuwo dzi tsyɔ.

11 Xɔ̃nyewo kple nye zɔhɛwo ƒo asa nam le nye fuwɔame la ta,

Eye nye ame nyanyɛwo hã le adzɔge nam.

12 Ame siwo le nye agbe yome tim la tre mɔ̃ nam;

Ame siwo le vɔ̃ dim nam la le nu ƒom le nye gbegblẽ ŋu;

Wole alakpanyawo gblɔm ŋkeke blibo la katã.

13 Ke mele abe tokunɔ ene, nyemele naneke sem o;

Eye mele abe aɖetututɔ ene, nyemake nu o.

14 Mele abe tokunɔ,

Si ƒe nu me nya aɖeke mele wòatsɔ aɖo nya ŋui o la ene.

15 Elabena Oo Afetɔ, asiwònu kpɔm mele,

Oo Afetɔ nye Mawu, ètɔ nam.

16 Elabena megblɔ be: “Mègana woatso aseye le tanye

Alo ado wo ɖokuiwo ɖe dzi ɖe ŋunye ne nye afɔ ɖiɖi o.”

17 Elabena nye anyidzedze gbɔ megadidi o,

Eye vevesese dzi ko mele.

18 Meʋu nye vodada me;

Nye nu vɔ̃wo na metsi dzimaɖi.

19 Ke nye futɔwo tri akɔ hesesẽ,

Eye ame siwo léa fum dzodzro hã sɔ gbɔ ŋutɔ.

20 Wotsɔ vɔ̃ ɖo nyui teƒe nam;

Wotso ɖe ŋunye le esi meti nyui yome ta.

21 Oo Afetɔ, mègagblẽm ɖi o.

Oo Mawu, mèganɔ adzɔge tso gbɔnye o.

22 Va kaba nàva xɔ nam,

Oo Afetɔ, nye xɔnametɔ.

PSALMOWO 39
1 Mebe: “Malé ŋku ɖe nye zɔzɔme ŋu,

Be nyemawɔ nu vɔ̃ kple nye aɖe o.

Made ga nye nu,

Zi ale si ame vɔ̃ɖi la le ŋkunyeme.”

 2 Ðoɖoe zi le nunye klenee;

Mezi ɖoɖoe le nya nyui gɔ̃ hã ŋu,

Ke hã nye vevesesewo nu sẽ ɖe edzi.

 3 Nye dzi ʋu dzo le dɔ me nam.

Zi ale si mele eŋu bum la, zi nenemae wògaʋua dzo ɖe edzii.

Azɔ meke nu gblɔ be:

 4 “Oo Afetɔ, na manya nye nuwuwu,

Kple nye agbemeŋkekewo ƒe didime,

Ne manya ale si nye agbe le kpuie.

 5 Ɛ̃, èwɔ nye ŋkekewo wole ʋɛe;

Eye nye agbenɔƒewo menye naneke le ŋkuwòme o.

Vavãe, ne edze abe ɖe amegbetɔ li ke ene hã la, ƒuƒu ko wònye. (Sela)

 6 Vavãe, amegbetɔ le yiyim abe vɔvɔli ene.

Ele dagbadagbam dzodzro.

Eli kɔ kesinɔnuwo ɖi gleglegle, evɔ menya ame ka si me woava yi o.

 7 Ke azɔ Oo Afetɔ, nu kae mele mɔ kpɔm na?

Wò ɖeɖe koe mele mɔ kpɔm na.

 8 Ðem tso nye dzidadawo katã me.

Mègana mazu alɔmeɖenu na bometsila o.

 9 Mezi ɖoɖoe;

Nyemete ŋu ke nu o,

Elabena gbɔwòe esia tso.

10 Ðe xaxa si nèna wòva dzinye la ɖa.

Nu te ŋunye belibeli, elabena wò asi le dzinye.

11 Ètsɔ tohehe ɖɔ ame ɖo le eƒe vodada ta;

Eye nègblẽ eƒe nu nyuiwo dome abe agbagblaʋui ye ɖui ene.

Vavãe, ƒuƒu ko amegbetɔwo katã nye. (Sela)

12 Oo Afetɔ, se nye gbedodoɖa,

Eye nàƒu to anyi ɖe nye ɣlidodo ŋu.

Mègaɖe ŋku ɖa le nye aɖatsiwo ŋu o.

Elabena amedzro ko menye na wò,

Eye ɖe metso eme va yina, abe tɔgbuinyewo katã ko ene.

13 Ðe ŋku ɖa le ŋunye, ne makpɔ dzidzɔ vie,

Hafi nunye nayi, eye nyemaganɔ anyi o.”

PSALMOWO 40
1 Mekpɔ mɔ na Afetɔ vevie,

Eya ta eƒu to anyi ɖe ŋunye, eye wòse nye ɣlidodo.

 2 Ehem tso do globo me,

Tso ba finyafinya me.

Eye wòtsɔ nye afɔwo ɖo agakpe dzi;

Ena nye afɔ li ɖi sesĩe.

 3 Ede ha yeye nu nam,

Kafukafuha wònye na mía Mawu.

Ame geɖewo akpɔe, eye vɔvɔ̃ aɖo wo

Eye woaɖo dzi ɖe Afetɔ ŋu.

 4 Dzidzɔtɔe nye ame si ɖoa dzi ɖe Afetɔ ŋu,

Eye metrɔna ɖe dadala mabuamewo ŋu loo, alo ɖe ame siwo dze alakpa yome la ŋu o.

 5 Oo Afetɔ nye Mawu,

Nu siwo nèwɔ na mí la sɔ gbɔ loo!

Wò nukudɔwo kple wò susu siwo nèɖe ku ɖe mía ŋu la sɔ gbɔ.

Ame aɖeke mede nuwò o;

Ne mebe maƒo nu tso wo ŋu alo agblɔ wo ŋu nya la,

Womele xexlẽ me o!

 6 Menye vɔsawo kple nunanawoe nèdina o,

Ke boŋ èʋu to nam be mase nu.

Mèbia numevɔsa kple nuvɔ̃vɔsa o.

 7 Esia tae megblɔ be: “Kpɔ ɖa, meva ɖo,

Agbalẽ xatsaxatsa la mee woŋlɔ nu ɖo le ŋunye.

 8 Oo nye Mawu, wò lɔlɔ̃nu wɔwɔe nye nye dzidzɔ,

Eye wò se la le menye.

 9 Meɖe gbeƒã dzɔdzɔenyenye ŋuti nya nyui la le ameha gãwo dome.

Kpɔ ɖa! Nyememia nu o,

Oo Afetɔ, wò ŋutɔ ènyae nyuie.

10 Nyemetsyɔ nu wò dzɔdzɔenyenye dzi le nye dzi me o.

Meɖe gbeƒã wò nuteƒewɔwɔ kple wò xɔname.

Nyemeɣla wò lɔlɔ̃ vavã la kple wò nyateƒe la le ameha gãwo dome o.”

11 Oo Afetɔ, mègate wò nublanuikpɔkpɔ lam o.

Na wò lɔlɔ̃ vavã la kple wò nyateƒe la nakpɔ tanye ɖaa.

12 Xaxa siwo ɖe to ɖem la mele xexlẽ me o.

Nye vodada gbogboawo kɔ gbɔ tanye ale gbegbe be nyemegate ŋu le nye mɔ kpɔm o;

Wosɔ gbɔ wu nye taɖa,

Eye dzi ɖe le ƒonye.

13 Oo Afetɔ, lɔ̃ nàɖem dzro!

Oo Afetɔ, va kaba nàva kpe ɖe ŋunye.

14 Na ame siwo le didim be yewoaɖe nye agbe ɖa la,

Naɖu ŋukpe eye woƒe mo netsi dãa.

Na ame siwo le vɔ̃e dim nam la,

Nagbugbɔ ɖe megbe kple ŋukpe gã.

15 Na ame siwo le gbɔgblɔm be, “Ehɛ̃, Ehɛ̃!” la,

Woƒe nu neku le woƒe ŋukpe ta.

16 Ke na ame siwo dia wò la

Natso aseye ahakpɔ dzidzɔ ɖe ŋuwò.

Eye ame siwo lɔ̃a wò xɔxɔdɔwo la nanɔ gbɔgblɔm ɖaa be:

“Woado Afetɔ ɖe dzi.”

17 Ke nye la, wɔna vɔ le ŋunye eye hiã tum;

Afetɔ, ɖo ŋku dzinye.

Wòe nye nye kpeɖeŋutɔ kple nye xɔnametɔ;

Oo nye Mawu, mègatsi megbe o.

PSALMOWO 41
1 Dzidzɔtɔe nye ame si bua ame tsɛ ŋu;

Afetɔ axɔ nɛ le xaxaɣi.

 2 Afetɔ adzɔ eŋu, eye wòaxɔe ɖe agbe.

Woabui dzidzɔtɔe le anyigba dzi;

Màtsɔe ade asi na eƒe futɔwo ƒe didi akpɔ o.

 3 Afetɔ alée ɖe te le dɔba dzi;

Àɖɔli eƒe aba keŋkeŋ le eƒe dɔléɣi.

 4 Elabena megblɔ be: “Oo Afetɔ, ve nunye.

Da gbe le ŋunye, elabena mewɔ nu vɔ̃ ɖe ŋuwò.”

 5 Ke nye futɔwo le nya vɔ̃ gblɔm le ŋunye be:

“Ɣekaɣi gɔ̃ wòaku, ne eƒe ŋkɔ natsrɔ̃ ɖa?”

 6 Ne wo dometɔ aɖe va kpɔm ɖa la, alakpadzie wòtsɔ ƒoa nui.

Eva dia ameŋugblẽnyawo;

Eye ne enya do go ko la, eyina ɖakakanɛ.

 7 Nye futɔwo katã le dalĩ dom na wo nɔewo;

Wole vɔ̃e susum ɖe ŋunye be:

 8 “Dɔ dziŋɔ aɖe dze edzi;

Fifia esi wòtsi anyimlɔƒe la, megale fɔfɔ ge akpɔ o.”

 9 Ame si le ŋutifafa me kplim, ame si dzi meka ɖo,

Si ɖua nye abolo la kɔ eƒe afɔkpodzi dzi ɖe ŋunye.

10 Ke wò, Oo Afetɔ, ve nunye, ne nàna mafɔ,

Ne maɖo eteƒe na wo.

11 Esia me manyae le be nye nu nyoa ŋuwò:

Ne nye futɔ la metso aseye ɖe ŋunye o.

12 Ke nye la, èlém ɖe te le nye fɔmaɖimaɖi ta;

Àtsɔm aɖo ŋkuwòme tegbee.

13 Woakafu Afetɔ, Israel ƒe Mawu

Tso mavɔ me yi mavɔ me.

Amen, ɛ̃, Amen.

PSALMOWO 42
1 Ale si tɔʋu me tsi dzroa zinɔ vevie la,

Nenemae nèle dzroyem vevie, Oo Mawu.

 2 Mawu, ɛ̃, Mawu gbagbe la ŋuti tsikɔ le wuyem vevie.

Ɣekaɣi mado ɖe Mawu ŋkume?

 3 Nye aɖatsiwo zu nuɖuɖu nam zã kple keli;

Wole alɔme ɖem le ŋunye ŋkeke blibo la be: “Afi ka gɔ̃ wò Mawu la le?”

 4 Meɖo ŋku nu siawo dzi, eye metrɔ nye luʋɔ kɔ ɖi,

Elabena nye kple amehawoe yina tsã;

Menɔa wo ŋgɔ míezɔna yia Mawu ƒe aƒe la me,

Esime aseyetsotso kple akpedada dea dzi kɔtɔɔ,

Le ŋkekenyuiɖulawo ƒe ha la dome.

 5 Nu ka tae mɔkpɔkpɔ bu ɖem?

Nu ka ŋuti metsi dzodzodzoe le ɖokuinye me alea?

Makpɔ Mawu sinu,

Elabena magakafu eya si nye nye Xɔnametɔ Gã la ake.

 6 Nye Mawu, mɔkpɔkpɔ bu ɖem.

Esia tae meɖoa ŋku dziwò,

Le Yordan-nyigba dzi kple Hermon Towo tame,

Le Mizar To la dzi.

 7 Ne wò tsitsetsewo le kɔkɔm ɖi bababa la,

Tɔ goglo yɔa tɔ goglo.

Wò tsitsotsoe gãwo ŋe ɖe dzinye.

 8 Afetɔ ave nunye le ŋkeke me,

Eƒe ha anɔ nunye le zã me, wòanye gbedodoɖa na Mawu si na agbem.

 9 Magblɔ na Mawu, nye agakpe be:

“Nu ka tae nèŋlɔm be?

Nu ka tae malé blanui anɔ yiyim le nye futɔ la ƒe teteɖeanyi ta?”

10 Nye futɔwo tsɔ fuléle kaɖikaɖi le alɔme ɖem le ŋunye;

Wole alɔme ɖem le ŋunye ŋkeke blibo la be: “Afi ka gɔ̃ wò Mawu la le?”

11 Nu ka tae mɔkpɔkpɔ bu ɖem?

Nu ka ŋuti metsi dzodzodzoe le ɖokuinye me alea?

Makpɔ Mawu sinu,

Elabena magakafu eya si nye nye Xɔnametɔ Gã kple nye Mawu la ake.

PSALMOWO 43
1 Oo Mawu, tso afia nam,

Eye nàdrɔ̃ nye kple dukɔ mawɔnuteƒe la dome nya nam.

Xɔ nam tso ameblela kple nu madzɔmadzɔ wɔla si me.

 2 Elabena wòe nye nye Mawu, nye mɔ́ sesẽ.

Nu ka tae nètsɔm ƒu gbe?

Nu ka tae malé blanui anɔ yiyim le nye futɔ la ƒe teteɖeanyi ta?

 3 Ðo wò kekeli kple wò nyateƒe ɖa.

Na woawo nakplɔm;

Na woakplɔm ayi wò to kɔkɔe la kple wò avɔgbadɔ gã la gbɔ.

 4 Ekema mayi Mawu ƒe vɔsamlekpui la gbɔ,

Mayi Mawu, si nye nye aseyetsotso la gbɔ.

Oo Mawu, nye Mawu, matsɔ saŋku akafu wò.

 5 Nu ka tae mɔkpɔkpɔ bu ɖem?

Nu ka ŋuti metsi dzodzodzoe le ɖokuinye me alea?

Makpɔ Mawu sinu,

Elabena magakafu eya si nye nye Xɔnametɔ Gã kple nye Mawu la ake.

PSALMOWO 44
1 Oo Mawu, míesee kple míaƒe to,

Mía tɔgbuiwo gblɔe na mí,

Wogblɔ nu siwo nèwɔ le wo ŋɔli,

Le blemaŋkekewo me la na mí.

 2 Ètsɔ wò asi nya dukɔwo ɖa

Eye nètsɔ mía tɔgbuiwo ɖo wo teƒe.

Èfanya dukɔwo eye nènya wo ɖa.

 3 Menye woawo ŋutɔwo ƒe yie wotsɔ xɔ anyigba la o,

Eye menye woawo ŋutɔwo ƒe alɔe xɔ na wo o.

Ke boŋ wò nuɖusi kple wò alɔ kpakple wò mo ƒe kekeli ye,

Elabena woƒe nu nyo ŋuwò.

 4 Oo Mawu, wòe nye nye Fia;

Ðe gbe ne dziɖuɖu* nava na Yakob.

 5 Wò ŋusẽ mee míanya míaƒe ketɔwo aɖo ɖe megbe le;

Wò ŋkɔ mee míafanya ame siwo tso ɖe mía ŋu la le.

 6 Elabena menye nye dati ŋue mele ŋu ɖom ɖo o,

Eye nye yi mate ŋu axɔ nam o.

 7 Wòe ɖe mí tso míaƒe ketɔwo si me,

Wòe na ŋukpe lé ame siwo ɖia gbɔ mí la.

 8 Mawue míakafu ŋkeke blibo la,

Eye miakafu wò ŋkɔ tegbee. (Sela)

 9 Ke fifia ya ètsɔ mí ƒu gbe, ède ŋukpe mo na mí,

Eye mèho yi kple míaƒe aʋakɔwo o.

10 Èna míesi le míaƒe futɔwo nu;

Eye míaƒe ketɔwo ha mí ale si wodi.

11 Ètsɔ mí de asi abe alẽwo ene ne woavuvu;

Eye nèka mí hlẽ ɖe dukɔwo dome.

12 Ètsɔ wò dukɔ dzra ho kpɔtsɔe;

Eye mèkpɔ viɖe aɖeke le wo dzadzra me o.

13 Ètsɔ mí wɔ vlodonu na mía haviwo,

Alɔmeɖenu kple nu ɖikokoe na ame siwo ƒo xlã mí.

14 Ètsɔ mí wɔ vlodonu* le dukɔwo dome,

Eye dukɔwo ʋuʋua ta ne wokpɔ mí.

15 Ŋu kpeam ŋkeke bliboa katã,

Eye nye ŋukpe nyè tsyɔm,

16 Le woƒe alɔmeɖeɖe kple dzugbe siwo sem mele la ta,

Le míaƒe futɔ la ƒe hlɔ̃biabia ta.

17 Nu siawo katãe dzɔ ɖe mía dzi, ke míeŋlɔ wò be o,

Eye míetu wò nubabla la o.

18 Míaƒe dzi metrɔ le yowòme o;

Eye míaƒe afɔwo metra le wò mɔ dzi o.

19 Ke èto mí nyanyanya le agbotoewo nɔƒe;

Eye nètsɔ blukɔ tsyɔ mía dzi.

20 Ne ɖe míeŋlɔ mía Mawu ƒe ŋkɔ be

Alo míeke míaƒe asiwo me na mawu tutɔ la,

21 Ðe Mawu manya esia oa?

Elabena enya dzimenu ɣaɣlawo.

22 Tawòe wole mía wuwu dzi ŋkeke bliboa katã;

Wobu mí abe alẽ siwo woyina wuwu ge ene.

23 Tso. Oo Afetɔ, nu ka tae nèle alɔ̃ dɔm?

Nyɔ! Mègatsɔ mí ƒu gbe tegbee o.

24 Nu ka tae nèɣla wò mo?

Nu ka tae nèŋlɔ míaƒe fukpekpe kple míaƒe teteɖeanyi la be?

25 Elabena wobɔbɔ mí* ɖe anyi va se ɖe ke me ke;

Womimi mí te ɖe anyigba.

26 Tso nàkpe ɖe mía ŋu!

Xɔ na mí, le wò lɔlɔ̃ si nu metsina o la ta.

PSALMOWO 45
1 Nya nyui aɖe le fiefiẽm le nye dzi me wlɔwlɔwlɔ.

Mebe: “Fia aɖe ŋue nye ha la ku ɖo.”

Nye aɖe nenɔ abe nugbugbɔŋlɔla bibi ƒe nuŋlɔti ene.

 2 Wòe dze ɖeka wu le amegbetɔviwo dome.

Nya dzetoe dona le nu me na wò.

Esia tae Mawu yra wò tegbee ɖo.

 3 Oo ŋusẽtɔ, ta wò yi,

Le wò bubu kple wò atsyɔ̃ɖoɖo me.

 4 Nɔ wo atsyɔ̃ɖoɖo me nàho ayi aɖaɖu dzi;

Ho yi le nyateƒe kple ɖokuibɔbɔ kpakple dzɔdzɔenyenye ta,

Eye wò nuɖusi awɔ nu dziŋɔwo.

 5 Wò aŋutrɔwo le ɖaɖam, wona dukɔwo le anyi dzem le ŋgɔwò;

Woƒo ɖe fia ƒe futɔwo ƒe dzi me floi.

 6 Mawue nye wò fiazikpui ɖaa tegbee;

Wò fiaɖuƒe ƒe fiatikplɔ nye nu dzɔdzɔe wɔwɔ ƒe fiatikplɔ.

 7 Èlɔ̃ nu dzɔdzɔe wɔwɔ, eye nèlé fu nu vɔ̃ɖi wɔwɔ.

Esia tae Mawu, wò Mawu, si dzidzɔmi na wò wu hawòtiwo.

 8 Mire, aloe kple kasia ƒe ʋeʋẽ lilili le wò awuwo katã me;

Kasaŋkuƒoƒo do dzidzɔ na wò le nyiɖufiasã gã la me.

 9 Fia vinyɔnuwo le wò nyɔnu bubumewo dome.

Fia srɔ̃ le Ofir sikanuwo me tɔ ɖe wò ɖusime.

10 Oo vinyɔnu, ɖo to nàsee, eye nàƒu to anyi;

Eye wò ŋku nedzo le wò dukɔ kple fofowò ƒe aƒe la dzi.

11 Wò tugbedzedze alé dzi na fia la,

Elabena eyae nye wò aƒetɔ,

Eya ta bɔbɔ nɛ.

12 Tiro vinyɔnu atsɔ nunana vɛ;

Eye kesinɔtɔ gãwo adi amenuveve tso gbɔwò.

13 Fia vinyɔnu si le fiasã la me la, nye atsyɔ̃ɖoɖo sɔŋ.

Sika ye wotsɔ do atsyã na eƒe awuwo.

14 Woakplɔe ava fia la gbɔ le atsyɔ̃ɖowu dzeani me.

Woakplɔ exɔlɔ̃ ɖetugbui leaƒe siwo le eyome la ava gbɔwò.

15 Woatsɔ dzidzɔ kple aseyetsotso akplɔ wo vɛ;

Woage ɖe fiasã la me.

16 Viwòŋutsuwo anɔ tɔgbuiwòwo teƒe.

Àtsɔ wo aɖo amegãwoe ɖe anyigba blibo la dzi.

17 Mana woanya wò ŋkɔ le dzidzime siwo katã ava va la me.

Esia tae dukɔwo akafu wò ɖaa tegbee.

PSALMOWO 46
1 Mawu nye míaƒe sitsoƒe kple míaƒe ŋusẽ,

Eyae nye xɔnametɔ si li ɖaa le xaxaɣiwo.

 2 Esia tae míavɔ̃ o, togbɔ be anyigba la ƒe nɔnɔme le tɔtrɔm hã,

Togbɔ be towo mu dze atsiaƒu ƒe gogloƒewo hã,

 3 Togbɔ be eƒe tsiwo dze agbo, eye wotso futukpɔ hã,

Togbɔ be towo ʋuʋu le eƒe agbodzedze me hã. (Sela)

 4 Tɔsisi aɖe li si ƒe alɔdzewo doa dzidzɔ na Mawu ƒe du la,

Dziƒoʋĩtɔ la ƒe avɔgbadɔ gã kɔkɔe la.

 5 Mawu le du la me; eya ta mamu akpɔ o.

Mawu axɔ nɛ kaba le fɔŋli.

 6 Dukɔwo dze agbo, fiaɖuƒewo mu;

Ekɔ gbe dzi, eye anyigba lólo.

 7 Aʋakɔwo ƒe Afetɔ li kpli mí;

Yakob ƒe Mawu lae nye míaƒe mɔ́ sesẽ. (Sela)

 8 Miva kpɔ Afetɔ ƒe nuwɔwɔwo,

Ale si wòna nu wɔmoyaawo dzɔ le anyigba dzii ɖa.

 9 Etsia aʋawɔwɔwo nu le anyigba bliboa dzi.

Eŋea dati, eflia akplɔ kakɛkakɛe,

Eye wòtɔa dzo aʋatasiaɖamwo.

10 “Mina ta, eye minyae be nyee nye Mawu.

Woadom ɖe dzi le dukɔwo dome;

Woadom ɖe dzi le anyigba dzi.”

11 Aʋakɔwo ƒe Afetɔ li kpli mí;

Yakob ƒe Mawu lae nye míaƒe mɔ́ sesẽ. (Sela)

PSALMOWO 47
1 Mi dukɔwo katã, misi akpe.

Mitso aseye ɖe Mawu ŋu kple ɣli.

 2 Elabena ŋɔdzi le Afetɔ Dziƒoʋĩtɔ la ŋu;

Fia gã wònye ɖe anyigba blibo la katã dzi.

 3 Ebɔbɔ dukɔwo ɖe mía te;

Etsɔ anyigbadzidukɔwo de míaƒe afɔ te.

 4 Etia míaƒe domenyinu na mí,

Si nye Yakob, ame si wòlɔ̃na la, ƒe adegbeƒonu. (Sela)

 5 Mawu lia yi dzi kple aseyetsotso;

Afetɔ yi dzi kple kpẽwo ƒe ɖiɖi.

 6 Midzi kafukafuha na Mawu, midzi kafukafuha.

Midzi kafukafuha na míaƒe Fia la, midzi kafukafuha.

 7 Elabena Mawue nye anyigba blibo la ƒe Fia;

Midzi kafukafuha, eye midze nunya.

 8 Mawu zu Fia ɖe dukɔwo dzi.

Mawu bɔbɔ nɔ eƒe fiazikpui kɔkɔe la dzi.

 9 Dukɔwo ƒe amegãwo ƒo ƒu

Kple Abraham ƒe Mawu ƒe dukɔ la.

Elabena anyigba la dzi ɖulawo nye Mawu tɔ.

Eɖo kpo ŋutɔ.

PSALMOWO 48
1 Afetɔ lolo, eye wòdze kafukafu ŋutɔ

Le mía Mawu ƒe du la me, le eƒe to kɔkɔe la dzi.

 2 To la kɔ henya kpɔ ŋutɔ, eye wònye dzidzɔdonu na anyigba blibo la katã,

Zion To si le dziehe kekeake lae,

Eyae nye Fia Gã la ƒe du.

 3 Mawu ɖee fia le dua

Ƒe mɔ́ sesẽwo me be yenye sitsoƒe.

 4 Elabena kpɔ ɖa, fiawo ƒo ƒu,

Wowɔ ɖeka ho va.

 5 Esi wokpɔ dua la, woƒe nu ku.

Dzidzi ƒo wo eye wode afɔ du me.

 6 Wodzo nyanyanya le afi ma,

Wose veve abe nyɔnu si le ku lém ene.

 7 Ètsɔ ɣedzeƒeya gbã Tarsis ʋuwo gudugudu.

 8 Míekpɔe abe ale si tututu míesee ene,

Míekpɔe le aʋakɔwo ƒe Afetɔ ƒe du la me, le mía Mawu ƒe du la me.

Mawu ŋutɔ ali kee tegbee. (Sela)

 9 Oo Mawu, míedea ŋugble le wò lɔlɔ̃ si nu metsina o ŋu,

Le wò gbedoxɔ la me.

10 Oo Mawu, wò kafukafu de anyigba ƒe mlɔenuwo

Abe wò ŋkɔ la ke ene.

Wò nuɖusi yɔ fũu kple dzɔdzɔenyenye.

11 Zion To nekpɔ dzidzɔ,

Yuda duwo netso aseye le wò ʋɔnudɔdrɔ̃wo ŋuti.

12 Mizɔ Zion ŋu godoo; miƒo xlãe va kpe;

Mixlẽ eƒe xɔ tsralawo.

13 Miaƒe ŋku nenɔ eƒe kpoƒuƒuwo ŋu.

Milé ŋku ɖe eƒe mɔ́ sesẽwo ŋu,

Ne miatsɔe atu xo na dzidzime siwo gbɔna.

14 Elabena Mawu siae nye mía Mawu ɖaa tegbee.

Eyae akplɔ mí tegbetegbee.

PSALMOWO 49
1 Mi dukɔwo katã, misee.

Miƒu to anyi, mi xexea me nɔlawo katã,

 2 Mi ame tsɛwo kple amegãwo,

Mi kesinɔtɔwo kple ame dahewo siaa.

 3 Nye nu agblɔ nya siwo me nunya le,

Eye nye dzimesusuwo aɖe gɔmesese afia.

 4 Maƒu to anyi ɖe lododo ŋu;

Maɖe nye adzowo gɔme ɖe saŋku ƒe ɖiɖi ŋu.

 5 Nu ka ŋuti mavɔ̃ le xaxaɣiwo,

Esime ame siwo le didim be yewoaƒum anyi la ƒe nu vɔ̃ɖi wɔwɔ ƒo xlãm?

 6 Ame siwo le dzi ɖom ɖe woƒe nunɔamesiwo ŋu

Eye wotsɔ woƒe kesinɔnu gbogboawo le adegbe ƒomee la,

 7 Wo dometɔ aɖeke mate ŋu axɔ na nɔvia akpɔ o

Eye mate ŋu axe etafe na Mawu o,

 8 (Fexexe ɖe woƒe agbe ta xɔ asi ale gbegbe be,

Womate ŋui akpɔ gbeɖe o);

 9 Ne wòanɔ agbe tegbee eye makpɔ yɔdo o.

10 Ekpɔe be nunyalawo gɔ̃ hã kuna;

Bometsilawo kple abunetɔwo siaa nu yina,

Eye wogblẽa woƒe kesinɔnuwo ɖi na ame bubuwo.

11 Woƒe dzimedidie nye be yewoƒe aƒewo nanɔ anyi ɖaa,

Be yewoƒe avɔgbadɔwo nanɔ anyi tso dzidzime yi dzidzime.

Woyɔ woƒe ŋkɔwo ɖe woƒe anyigbawo ŋu.

12 Gake ne bubu le amegbetɔ ŋu hã la, manɔ anyi ɖaa o;

Ðeko wòle abe lã siwo nu yina la ene.

13 Aleae movitɔwo ƒe mɔwo nɔna

Eye aleae ame siwo nɔa wo yome, siwo ɖoa dzi ɖe woƒe nya gbɔlowo ŋu la hã tɔ nɔna. (Sela)

14 Tsiẽƒe ko woli na, abe alẽ siwo li na wuwu ene.

Kue akplɔ wo;

Ame dzɔdzɔewo aɖu wo dzi le ŋdi.

Woanyunyɔ eye wo nu ayi keŋkeŋ;

Tsiẽƒee anye aƒe si me woamlɔ, ke menye woƒe aƒe gãwo me o.

15 Ke Mawu aɖem tso Tsiẽƒe ƒe ŋusẽ si me,

Elabena axɔm. (Sela)

16 Ne ame aɖe zu kesinɔtɔ la, mègavɔ̃ o,

Eye ne atsyɔ̃ si le eƒe aƒe ŋu dzi ɖe edzi hã, mègavɔ̃ o,

17 Elabena ne eku la, mate ŋu atsɔ naneke ɖe asi o;

Eye eƒe atsyɔ̃ la mayi kplii o.

18 Elabena ekafua eɖokui le eƒe agbenɔɣi.

(Amewo akafu wò ne nu dze edzi na wò.)

19 Ke hã tɔgbuiawo gbɔ ko wòamlɔ mlɔeba.

Womagakpɔ kekeli akpɔ o.

20 Ne bubu le ame aɖe ŋu, evɔ wògbe esia gɔmesese la,

Ðeko wòle abe lã siwo nu yina la ene.

PSALMOWO 50
1 Afetɔ, Mawu ŋusẽtɔ la, ƒo nu;

Eyɔa anyigbadzinɔlawo

Tso ɣe ƒe dzedze va se ɖe eƒe toɖoɖo.

 2 Zion, si nye nyonyowo ƒe nyonyo ye Mawu klẽ tso.

 3 Mía Mawu gbɔna, eye mate ŋu azi ɖoɖoe o.

Dzo le bibim le eŋgɔ,

Eye ahom le tutum le eŋu godoo.

 4 Eyɔ dziƒowo le dzi ʋĩi kple anyigba la,

Ne wòadrɔ̃ ʋɔnu eƒe dukɔ la:

 5 “Miƒo nye nuteƒewɔlawo nu ƒu nam,

Ame siwo sa vɔ tsɔ bla nu kplim.”

 6 Dziƒowo ɖea gbeƒã eƒe dzɔdzɔenyenye,

Elabena Mawu ŋutɔe nye Ʋɔnudrɔ̃la. (Sela)

 7 “Oo nye dukɔ, see, mele nu ƒo ge;

Oo Israel, maɖi ɖase ɖe ŋuwò.

Nyee nye Mawu, wò Mawu.

 8 Menye wò vɔsawo tae mele mo kam na wò ɖo o,

Eye menye wò numevɔsa blibo siwo le ŋkunyeme ɖaa hã tae o.

 9 Nyemele nyitsu si le aƒewò me dim be malé,

Alo le gbɔ̃ siwo le wò lãkpɔ me la dim o.

10 Elabena tɔnyee avemelãwo katã nye,

Kple lã siwo le to akpe nanewo dzi.

11 Menya xevi ɖe sia ɖe si le towo dzi;

Eye lã gbogbo siwo le gbe me hã, tɔnyee wonye.

12 Ne dɔ le wuyem la, nyemagblɔe na wò o ɖe,

Elabena tɔnyee anyigba wɔnu la kple edzi nuwo katã nye.

13 Ðe maɖu nyitsuwo ƒe lã

Ahano gbɔ̃tsuwo ƒe ʋua?

14 Tsɔ akpedavɔsawo na Mawu,

Eye nàxe wò adzɔgbeɖefewo na Dziƒoʋĩtɔ la;

15 Yɔm le xaxagbe.

Maxɔ na wò, eye àdom ɖe dzi.”

16 Ke Mawu agblɔ na ame vɔ̃ɖi be:

“Mɔ kae nèkpɔ axlẽ nye ɖoɖowo afia

Alo alé nye nubabla ɖe nu?

17 Elabena èlé fu amehehe,

Eye nètrɔa megbe dea nye nyawo.

18 Ne èkpɔ fiafi la, eƒe nu nyoa ŋuwò,

Eye nèdea ha kple ahasiwɔlawo.

19 Ètsɔa wò nu kakaa nya vɔ̃,

Eye amebeble lé ɖe wò aɖe dzi.

20 Ènɔa anyi ƒoa nu gbegblẽ le wò ŋutɔ nɔviwò ŋu;

Eye nèʋua go dawòvi ƒe vodada.

21 Esi nèwɔ nu siawo la, mezi kpi,

Eya ta èsusu be ɖe mele abe wò ene.

Ke azɔ la, maka mo na wò,

Eye matsɔ nya ɖe ŋuwò.

22 Mi ame siwo ŋlɔa Mawu be, meɖe kuku, mibu nya siawo ŋu,

Ne magavuvu mi ʋayaʋaya, eye xɔnametɔ aɖeke manɔe na mi o.

23 Ame si saa akpedavɔ nam la, eyae doam ɖe dzi,

Eye ame si ƒe zɔzɔme toa mɔ ɖeka la,

Mana wòakpɔ Mawu ƒe xɔname.”

PSALMOWO 51
1 Oo Mawu, ve nunye le wò lɔlɔ̃ si nu metsina o la ta.

Tutu nye dzidadawo ɖa le wò nublanuikpɔkpɔ geɖe la ta.

 2 Le tsi nam keŋkeŋ tso nye vodada me,

Eye nàklɔ ŋunye tso nye nu vɔ̃ me.

 3 Elabena nye dzidadawo la, medze si wo keŋ,

Eye nye nu vɔ̃ le ŋkunyeme ɖaa.

 4 Ŋuwòe mewɔ nu vɔ̃ ɖo—wò koŋ ŋue mewɔe ɖo,

Nu si nye vɔ̃ le ŋkuwòmee mewɔ.

Le esia ta ne èƒo nu la, tɔwò adzɔ,

Eye ne ètso afia la, enɔa eteƒe.

 5 Kpɔ ɖa! Vodada mee wodzim ɖo,

Eye nu vɔ̃ mee danye fɔ nye fu ɖo.

 6 Kpɔ ɖa! Nyateƒetoto si tso dzi me kee nèdina;

Fia num ne madze nunya le ememe ke.

 7 Tsɔ isop gbe klɔ ŋunye tso nye nu vɔ̃ me, ne ŋunye nadza;

Le tsi nam ne mafu tititi wu sno.

 8 Na mase dzidzɔ kple aseyetsotso ŋkɔ,

Ne nye ƒu siwo nègbã gudugudu la nagli kple dzidzɔ.

 9 Ðe ŋku ɖa le nye nu vɔ̃wo ŋu,

Eye nàtutu nye vodadawo katã ɖa.

10 Oo Mawu, wɔ dzi dzadzɛ ɖe menye,

Eye nàde gbɔgbɔ yeye si li ke la menye.

11 Mègatsɔm ƒu gbe le ŋkuwòme o;

Eye mègaxɔ wò gbɔgbɔ kɔkɔe la hã le asinye o.

12 Gbugbɔ wò xɔname ƒe dzidzɔ de menye;

Eye nànyɔ wò lɔlɔ̃nu wɔwɔ ƒe gbɔgbɔ ɖe menye.

13 Mafia wò mɔwo dzidalawo,

Ne nu vɔ̃ wɔlawo natrɔ ava gbɔwò.

14 Oo Mawu, Mawu, nye xɔnametɔ, ɖem tso ʋufɔɖiɖi me,

Ne nye aɖe naɖe gbeƒã wò dzɔdzɔenyenye kple dzidzɔ.

15 Oo Afetɔ, ʋu nu nam,

Ne nye nu naɖe gbeƒã wò kafukafu.

16 Elabena menye vɔsae dzea ŋuwò o, anye ne masa vɔ na wò;

Menye numevɔsae dzea ŋuwò o.

17 Vɔsa siwo dzea Mawu ŋue nye gbɔgbɔ si gbã;

Oo Mawu, màdo vlo dzi si gbã hetugu la o.

18 Wɔ nyui na Zion le wò ŋudzedzekpɔkpɔ la nu;

Ðo Yerusalem ƒe gliwo.

19 Ekema dzɔdzɔenyenyevɔsawo,

Numevɔsawo kple vɔsa blibowo adze ŋuwò;

Ekema woatsɔ nyitsuwo asa vɔe le wò vɔsamlekpui la dzi.

PSALMOWO 52
1 Oo ŋusẽtɔ, nu ka tae nètsɔ nu vɔ̃ɖi wɔwɔ le adegbe ƒom?

Mawu ƒe lɔlɔ̃ si nu metsina o la li ŋkeke blibo la katã.

 2 Wò aɖe si le ɖaɖam abe talũhɛ ene la,

Ðoa nu gbegblẽ hewɔa alakpanu.

 3 Èlɔ̃ vɔ̃ wu nyui,

Eye nèlɔ̃ aʋatsokaka wu nyateƒetoto. (Sela)

 4 Oo wò, alakpaɖe,

Nya siwo gblẽa nu sɔŋ ko nèlɔ̃na!

 5 Esia tae Mawu atsɔ wò aƒu anyi tegbee;

Ahe wò ado goe tso wò agbadɔ me;

Aho wò kple ke tso agbagbeawo ƒe anyigba dzi. (Sela)

 6 Ame dzɔdzɔewo akpɔe, woƒe nu aku,

Eye woakoe agblɔ be:

 7 “Mikpɔ ŋutsu si metsɔ Mawu wɔ eƒe sitsoƒee o,

Ke boŋ wòɖoa ŋu ɖe eƒe kesinɔnu gbogboawo ŋu

Eye wòɖoa dzi ɖe eƒe aɖaŋu vɔ̃wo ŋu la ɖa.”

 8 Ke nye ya la, manɔ abe amiti dama ene le Mawu ƒe aƒe me;
Maɖo ŋu ɖe Mawu ƒe lɔlɔ̃ si nu metsina o la ŋu tegbee.
 9 Makafu wò ɖaa, elabena èwɔe de goe;
Makpɔ mɔ na wò ŋkɔ, elabena enyo

Le ame siwo wɔa nuteƒe na wò la ŋkume.

PSALMOWO 53
1 Bometsila gblɔna le eƒe dzi me be:

“Afetɔ aɖeke meli o.”

Wowɔa nu madzɔmadzɔwo, nu tovo siwo nyɔa ŋu;

Ame aɖeke meli si wɔa nu nyui o.

 2 Ke Mawu léa ŋku ɖe amegbetɔviwo ŋu tso dziƒo

Be yeakpɔe ɖa be ame aɖe li si sea nu gɔme, eye wòbiaa Afetɔ ta sena hã.

 3 Wo katã wote ɖe aga;

Wo katã wogblẽ keŋ.

Ame aɖeke meli si wɔa nu nyui o,

Ðeka hɔ̃ hã meli o.

 4 Ðe nu tovo wɔlawo dometɔ aɖeke medzea si nu oa?

Wole nye dukɔ la ɖum hamham abe abolo ene.

Womeyɔa Afetɔ hã o.

 5 Ke ŋɔdzi gã alé wo,

Ŋɔdzi si tɔgbi melé wo kpɔ o,

Elabena Mawu aka ame si ho ɖe ŋuwò la ƒe ƒuwo ahlẽ.

Àna ŋukpe nalé wo, elabena Afetɔ gbe wo.

 6 Oo, ne ɖe xɔname atso Zion ava na Israel ɖe!

Ne Afetɔ gakplɔ eƒe aboyomewo gbɔe la,

Ekema Yakob nekpɔ dzidzɔ, Israel netso aseye.

PSALMOWO 54
1 Oo Mawu, xɔ nam le wò ŋkɔ la ta,

Eye nàtsɔ wò ŋusẽ la aʋli tanye.

 2 Oo Mawu, se nye gbedodoɖa;

Lé to ɖe nye numenyawo ŋu.

 3 Elabena ame tutɔwo tso ɖe ŋunye,

Eye ŋutasẽlawo le nye agbe yome tim.

Mawuvɔvɔ̃ aɖeke mele mo na wo o. (Sela)

 4 Kpɔ ɖa! Mawue nye nye xɔnametɔ;

Afetɔ li kple ame siwo léam ɖe te.

 5 Atsɔ nye futɔwo ŋutɔ ƒe vɔɖivɔ̃ɖi aɖo eteƒe na wo;

Na wo nu nayi le wò nuteƒewɔwɔ ta.

 6 Masa vɔ na wò tso dzi me faa.

Oo Afetɔ, makafu wò ŋkɔ, elabena enyo.

 7 Elabena Mawu ɖem tso xaxawo katã me;

Nye ŋku atsa le nye futɔwo dzi le dziɖuɖu me.

PSALMOWO 55
1 Oo Mawu, se nye gbedodoɖa;

Eye mègado toku nye kokoƒoƒo be nàkpɔ nublanui nam o.

 2 Lé to ɖe ŋunye, eye nàtɔ nam.

Mede vovo ge do kpoe le nye dzimaɖitsitsiwo ta;

Ðeko nye ame bliboa metɔtɔ

 3 Le nya siwo gblɔm futɔ la le,

Kple ame vɔ̃ɖi la ƒe amemiamia ta.

Elabena wolɔ fukpekpe kɔ ɖe dzinye,

Eye wodo dziku helém ɖe dɔme.

 4 Nye dzi le veve sem vevie le menye,

Eye ku ƒe ŋɔdzi lém.

 5 Vɔvɔ̃ ɖom, mele dzodzom nyanyanya,

Eye mele ƒoƒom kpakpakpa.

 6 Megblɔna ɖaa be: “Ne ɖe aʋala le asinye abe ahɔnɛ ene ɖe!

Anye ne madzo ayi aɖanɔ afi si le dedie.

 7 Kpɔ ɖa! Anye ne masi ayi didiƒe ʋĩi.

Anye ne mayi aɖanɔ gbedzi. (Sela)

 8 Mawɔ kaba asi ayi bebeƒe,

Masi le ya ʋuduʋudu la nu, le ahom sesẽ la nu.”

 9 Oo Afetɔ, na woatɔtɔ, gblẽ woƒe ɖoɖowo me,

Elabena mele ŋutasesẽ kple dzrewɔwɔ teƒe kpɔm le dua me.

10 Wozɔa dua ƒe gliwo dzi kpe ɖo zã kple keli;

Ke nu vevi wɔame kple fuɖename le eme.

11 Gbegblẽ xɔ aƒe ɖe eme;

Eye ameteteɖeanyi kple amebeble megbea eƒe ablɔwo me nɔnɔ o.

12 Ðe wònye futɔ aɖee le vlo domem la,

Anye ne mado dzi atsɔe.

Ðe wònye nye ketɔe tso ɖe ŋunye la,

Anye ne masi le egbɔ aɖabe.

13 Gake wò, ame si le abe nye ke ene,

Nye ŋutɔ xɔ̃nye si menya nyuie lae.

14 Tsi metoa nye kplii dome tsã o;

Míenɔa amehawo dome yia Mawu ƒe aƒe la me.

15 Tsɔtsrɔ̃ neva wo dzi!

Woneyi Tsiẽ agbagbee;

Elabena vɔ̃ɖinyenye xɔ aƒe ɖe wo dome, eye wòle dzi me na wo.

16 Ke nye la, Mawue mayɔ;

Eye Afetɔe axɔ nam.

17 Nu tena ɖe dzinye eye meɖea hũ le fiẽ, ŋdi kple ŋdɔ,

Eye wòsea nye gbe.

18 Aɖem eye wòana makpɔ gbɔdzɔe tso ame siwo le avu wɔm kplim la si me,

Elabena ame geɖewoe tso ɖe ŋunye.

19 Mawu asee, eye wòatu nu kpli wo,

Eya ame si bɔbɔ nɔ fiazikpui dzi tso blemablema ke. (Sela)

Woawo la, wogbe tɔtrɔ,

Wo, ame siwo mevɔ̃a Mawu o.

20 Etso ɖe ame siwo le ŋutifafa me kplii la ŋuti;

Eye wòtu eƒe nubabla la.

21 Eƒe numenyawo zrɔ̃ drẽdrẽdrẽ wu notsi kpekẽ,

Evɔ aʋawɔwɔ le eƒe dzi me.

Eƒe nyawo le bɔlɔbɔlɔ wu ami,

Ke yi siwo woɖe ɖe goe wonye.

22 Dro wò agba ɖe Afetɔ dzi,

Ekema alé wò ɖe te.

Mana ame dzɔdzɔe nadze anyi akpɔ o.

23 Ke wò la, Oo Mawu, àtsɔ wo aƒu gbe ɖe do ƒe gogloƒe ke.

Hlɔ̃dolawo kple nu fitifiti wɔlawo manɔ woƒe agbeŋkekewo ƒe afã o.

Ke nye ya maɖo dzi ɖe ŋuwò.

PSALMOWO 56
1 Oo Mawu, ve nunye, elabena amegbetɔ tso ɖe ŋunye.

Woxaxam ɖo hele avu wɔm kplim ŋkeke bliboa.

 2 Nye futɔwo klẽ aɖu ɖe ŋunye ŋkeke bliboa;

Ame siwo tsɔ dada le avu wɔm kplim la sɔ gbɔ.

 3 Ne vɔvɔ̃ ɖom la, meɖoa dzi ɖe ŋuwò.

 4 Mawu—ame si ƒe nya mekafuna—

Mawu ŋue meɖoa dzi ɖo; nyemavɔ̃ o.

Nu kae amegbetɔ ate ŋu awɔm?

 5 Wogblẽa nu me nam ŋkeke bliboa;

Woƒe susu koe nye be yewoagblẽ nu le ŋunye.

 6 Wode xa ɖi be yewoadze dzinye;

Woƒe ŋku le nye afɔɖeɖewo ŋu,

Wole didim be yewoaɖe nye agbe ɖa.

 7 Gbe wo le woƒe nu vɔ̃ɖi wɔwɔ ta.

Oo Mawu, xlã dukɔwo ɖe anyi le wò dziku me.

 8 Èŋlɔ nye tsaglãlatsatsawo ɖi.

Kɔ nye aɖatsiwo ɖe wò lãgbalẽgolo me.

Ðe mèŋlɔ wo ɖe wò agbalẽ me oa?

 9 Nye futɔwo agbugbɔ ɖe megbe le gbe si gbe mayɔ wò.

Meka ɖe edzi be: Mawu le dzinye.

10 Mawu—ame si ƒe nya mekafuna—

Afetɔ—ame si ƒe nya mekafuna—

11 Mawu ŋue meɖoa dzi ɖo; nyemavɔ̃ o.

Nu kae amegbetɔ gbɔlo ate ŋu awɔm?

12 Oo Mawu, meɖe adzɔgbe na wò, si dzi wòle be mawɔ ɖo;

Masa akpedavɔwo na wò.

13 Elabena èɖem tso ku me

Eye mèna nye afɔ kli nu o,

Ne mayi edzi azɔ le Mawu ŋkume le agbagbeawo ƒe kekeli me.

PSALMOWO 57
1 Ve nunye, Oo Mawu, ve nunye,

Elabena wòe mesi tso;

Wò aʋala ƒe vɔvɔli tee mebe ɖo, va se ɖe esime xaxawo nu nava yi.

 2 Meyɔ Mawu Dziƒoʋĩtɔ la,

Meyɔ Mawu vavã la, ame si nana nye xaxawo nu yina.

 3 Aɖo xɔname ɖa tso dziƒo ne wòaɖem.

Atɔtɔ ame si klẽ aɖu ɖe ŋunye la. (Sela)

Mawu adɔ eƒe amenuveve kple nuteƒewɔwɔ ɖa.

 4 Dzatawo ɖe to ɖem;

Ame siwo di be yewoavuvum la domee meva mlɔ,

Ame siwo ƒe aɖuwo nye akplɔ kple aŋutrɔ

Eye woƒe aɖe nye yi ɖaɖɛ.

 5 Oo Mawu, do gã ɖokuiwò wòagbɔ dziƒowo ŋu;

Wò ŋutikɔkɔe nexɔ anyigba blibo la dzi.

 6 Woɖo ɖɔ na nye afɔ;

Wotem ɖe to.

Woɖe ʋe ɖe ŋgɔnye,

Ke woawo ŋutɔwo ge dze eme. (Sela)

 7 Oo Mawu, nye dzi le te sesĩe,

Nye dzi le te sesĩe.

Madzi ha eye maƒo ha.

 8 Nye bubu, nyɔ.

Oo kasaŋku, nyɔ; Oo saŋku, wò hã nyɔ.

Mana fɔŋli nanyɔ.

 9 Oo Afetɔ, makafu wò le amehawo dome;

Madzi kafukafuha na wò le dukɔwo dome.

10 Elabena wò lɔlɔ̃ si nu metsina o la sɔ gbɔ, eye wòkɔ yi ɖatɔ dziƒowo,

Eye wò nuteƒewɔwɔ yi ɖatɔ dziŋgɔli.

11 Oo Mawu, do gã ɖokuiwò wòagbɔ dziƒowo ŋu;

Wò ŋutikɔkɔe nexɔ anyigba blibo la dzi.

PSALMOWO 58
1 Ðe miate ŋu aƒo nu tso dzɔdzɔenyenye ŋu ne miezi ɖoɖoea?

Mi amegbetɔviwo, ɖe miate ŋu adrɔ̃ ʋɔnu dzɔdzɔea?

 2 Nu madzɔmadzɔ boŋ mieɖona le miaƒe dziwo me,

Eye miaƒe asiwo wɔa ŋutasẽnuwo le anyigba la dzi!

 3 Ame vɔ̃ɖiwo tra mɔ tso wo dziɣi ke;

Wodze aglã henye alakpatɔwo tso wo dziɣi ke.

 4 Woƒe numenyawo le abe da ƒe aɖi ene;

Woƒe to ku abe ƒli si xe nu tome ene.

 5 Mesea gbesalawo ƒe gbe o,

Aleke kee gbesalawo ɖabi ɖe gbesasa me o.

 6 Oo Mawu, ŋe aɖu le nu me na wo!

Oo Afetɔ, ŋe glãƒu na dzata siawo!

 7 Wo nu neyi abe tɔsisi si mie ene.

Nevu eƒe da me eye eƒe aŋutrɔwo naté wo woadze anyi.

 8 Wonenɔ abe abɔbɔ si le nyinyim le yiyim la ene;

Abe vi si ku hafi wodzi si mekpɔ ɣe kpɔ o la ene.

 9 Hafi miaƒe zewo nase ŋùti si wotsɔ do dzoe ɖe wo te ƒe dzoxɔxɔ ŋkɔ la,

Mawu akplɔ ŋùti mumua kple esi le bibim la siaa adzoe abe ahom ye lɔ wo ɖe nu ene.

10 Ame dzɔdzɔe akpɔ dzidzɔ, elabena ekpɔ hlɔ̃biabia teƒe;

Aklɔ eƒe afɔwo ɖe ame vɔ̃ɖi ƒe ʋu me.

11 Ekema amewo agblɔ be: “Nyateƒee, teƒeɖoɖo li na ame dzɔdzɔe.

Nyateƒee, Mawu aɖe li si drɔ̃a ʋɔnu le anyigba dzi.”

PSALMOWO 59
1 Oo nye Mawu, ɖem tso nye futɔwo si me;

Kpɔ tanye tso ame siwo tso ɖe ŋunye la si me.

 2 Ðem tso nu vɔ̃ɖi wɔlawo si me,

Eye nàxɔ nam tso ŋutasẽlawo si me.

 3 Kpɔ ɖa, wode xa ɖi nam;

Ame sesẽwo dze dzinye,

Oo Afetɔ, evɔ nyemedze agɔ alo wɔ nu vɔ̃ aɖeke hã hafi o.

 4 Togbɔ be nyemeda vo aɖeke o hã la, wole du dzi hele klalo be yewoadze dzinye.

Mele yɔwòm, eya ta tso nàva kpɔ ɖa.

 5 Elabena wò aʋakɔwo ƒe Afetɔ ye nye Israel ƒe Mawu.

Nyɔ, nàtrɔ susu ɖe dukɔwo katã ŋu.

Mègave yomemɔfiala vɔ̃ɖiwo nu o. (Sela)

 6 Wovana fiẽ sia fiẽ;

Wonɔa wowóm abe avuwo ene eye wotsana kpea dua ɖo.

 7 Kpɔ ɖa! Wodudua nya kɔna ɖi bababa;

Woƒe nuyiwo le abe yi ene,

Eye wogblɔna be: “Ame kae le esem?”

 8 Ke wò, Afetɔ, àko wo;

Àɖe alɔme le dukɔwo katã ŋu.

 9 Oo nye Ŋusẽ, manɔ asiwò nu kpɔm;

Elabena Mawue nye nye mɔ́ sesẽ.

10 Mawu si vea nunye geɖe la ŋutɔ akpe ɖe ŋunye;

Mawu ana matsa ŋku le nye futɔwo dzi le dziɖuɖu me.

11 Mègawu wo o, ne nye dukɔ la ƒe ŋku nanɔ edzi.

Le wò ŋusẽ me, na woatsa tsaglãla;

Eye nàna woadze anyi, Oo Afetɔ, míaƒe akpoxɔnu.

12 Le esi wotsɔa woƒe nu wɔa nu vɔ̃, le nya si dona le woƒe nu me la ta,

Woƒe dada nezu ɖɔ wòaɖe wo,

Le ɖiŋudodo kple amebeble si dona le wo nu ta.

13 Na wo nu nayi le wò dziku me;

Na wo nu nayi, ne woaganɔ anyi o;

Na woadze sii be Mawu le dzi ɖum ɖe Yakob dzi va se ɖe anyigba ƒe mlɔenuwo ke. (Sela)

14 Na woatrɔ ava fiẽ sia fiẽ;

Na woanɔ wowóm abe avuwo ene atsa akpe dua ɖo.

15 Na woanɔ tsaglãla tsam anɔ nu si woaɖu la dim;

Womegaɖi ƒo o, eye womegakpɔ dzeƒe hã o.

16 Ke nye la, madzi ha le wò ŋusẽ ŋu;

Le ŋdi la, matsɔ dzidzɔ aɖe gbeƒã wò lɔlɔ̃ si nu metsina o la.

Elabena wòe nye nye mɔ́ sesẽ,

Kple nye dedienɔƒe le xaxaɣi.

17 Oo nye Ŋusẽ, wòe madzi kafukafuha na,

Elabena Mawue nye nye mɔ́ sesẽ, Mawu si lɔ̃am vevie.

PSALMOWO 60
1 Oo Mawu, ègbe mí; èkaka kpɔ le mía ŋu.

Èdo dɔmedzoe ɖe mía ŋu; gake fifia la, gbugbɔ mí xɔ dzro!

 2 Èna anyigba ʋuʋu; èna wòfe.

Tre eƒe fefeƒeawo, elabena ele giglim.

 3 Èna wò dukɔ la to nɔnɔme sesẽwo me.

Èna míeno wain mu le yiyim sagasaga.

 4 Na dzesi ame siwo vɔ̃a wò,

Ne woasi ahade axa na dati la. (Sela)

 5 Ne woaxɔ na wò ame lɔlɔ̃awo,

Tsɔ wò nuɖusi ɖe mí, eye nàtɔ na mí.

 6 Mawu ƒo nu le eƒe kɔkɔenyenye me be:

“Matso aseye, matsɔ Sekem ana wòanye domenyinu,

Eye madzidze Sukot Bali la na nye amewo.

 7 Tɔnyee nye Gilead abe ale si Manase hã nye tɔnye ene,

Efrayim nye gakuku na nye ta;

Gbeɖela ƒe atikplɔe Yuda nye nam.

 8 Moab nye nye asiklɔgba.

Mada nye afɔkpa ɖe Edom dzi.

Mado aʋadziɖuɣli ɖe Filistia ŋu.”

 9 Ame kae akplɔm ayi du si ŋu woɖe to ɖo la me?

Ame kae anɔ ŋgɔ nam mayi keke Edom ke?

10 Oo Mawu, ɖe menye wò, ame si gbe mí lae oa,

Ðe menye mía Mawu, ame si megahona kple míaƒe aʋakɔwo o lae oa?

11 Kpe ɖe mía ŋu le míaƒe xaxa me,

Elabena amegbetɔ ƒe xɔname mele ɖeke me o.

12 Mawue ana ŋusẽ naɖo mía ŋu,

Eye eyae afanya míaƒe futɔwo.

PSALMOWO 61
1 Oo Mawu, se nye kokoƒoƒo.

Lé to ɖe nye gbedodoɖa ŋu.

 2 Mado ɣli na wò tso anyigba ƒe mlɔenu ke,

Ne nu te nye dzi ŋu.

Kplɔm yi agakpe si kɔ wum la dzi.

 3 Elabena wòe nye nye sitsoƒe,

Kple nye mɔ́ sesẽ, si kpɔa tanye tso futɔ la si me.

 4 Manɔ wò agbadɔ me ɖaa;

Mabe ɖe wò aʋalawo te anɔ dedie. (Sela)

 5 Elabena Oo Mawu, èse nye adzɔgbeɖeɖewo.

Èna ame siwo vɔ̃a wò ŋkɔ la ƒe domenyinum.

 6 Àdzi fia la ƒe agbemeŋkekewo ɖe edzi nɛ,

Eye eƒe agbenɔƒewo anɔ anyi tso dzidzime yi dzidzime.

 7 Anɔ zi dzi le Mawu ŋkume ɖaa;

Na wò amenuveve kple nuteƒewɔwɔe, ne woakpɔ eta.

 8 Ekema madzi kafukafuha na wò ŋkɔ la tegbee,

Eye maxe nye adzɔgbeɖefewo gbe sia gbe.

PSALMOWO 62
1 Nyateƒee, mezi kpi kpoo le Mawu sinu kpɔm.

Eya gbɔe nye xɔname tsona.

 2 Nyateƒee, eyae nye nye agakpe, nye xɔnametɔ, nye mɔ́ sesẽ,

Eya ta nyemaʋã akpa o.

 3 Va se ɖe ɣekaɣie mianɔ ame ɖeka dzi dzem, be yewoawui?

Mi katã vɔvɔ̃ le mia ŋu abe gli si tre azã ene, abe glikpɔ si le mumum ene.

 4 Elabena wode adaŋu ne woamui aƒu anyi tso eƒe ɖoƒe kɔkɔ la;

Alakpadada vivia wo nu.

Wotsɔa woƒe nu yraa ame, evɔ wodoa ɖiŋu na ame le dzi me. (Sela)

 5 Nyateƒee, mezi kpi kpoo le Mawu sinu kpɔm,

Elabena eya gbɔe nye mɔkpɔkpɔ tsona.

 6 Nyateƒee, eyae nye nye agakpe, nye xɔnametɔ, nye mɔ́ sesẽ,

Eya ta nyemaʋã gbeɖe o.

 7 Mawu gbɔe nye xɔname kple nye bubu atso.

Mawue nye nye agakpe kple nye sitsoƒe.

 8 Oo mi dukɔwo, miɖo dzi ɖe eŋu ɣeawokatãɣi.

Mitrɔ miaƒe dzi ƒo ɖe eŋkume.

Mawue nye míaƒe sitsoƒe. (Sela)

 9  Ƒuƒu koe amegbetɔviwo nye,

Amegbetɔƒomea nye sitsoƒe dzodzrowo.

Ne woda wo katã le nudanu me la, wole wodzoe wu ƒuƒu.

10 Migaɖo ŋu ɖe ametafatafa ŋu o

Alo ada miaƒe mɔkpɔkpɔ ɖe adzodada dzi o.

Ne miaƒe kesinɔnu dzi ɖe edzi la, migaɖo dzi ɖe eŋu o.

11 Mawu ƒo nu zi ɖeka, zi evee mese nya sia:

Be Mawu tɔe nye ŋusẽ.

12  Azɔ hã, Oo Afetɔ, wò lɔlɔ̃ nu metsina o,

Elabena èɖoa eteƒe na ame sia ame ɖe eƒe nuwɔnawo nu.

PSALMOWO 63
1 Oo Mawu, wòe nye nye Mawu, mele diwòm.

Ŋutiwò tsikɔ le wuyem.

Ale si mele diwòm na nu te ŋunye belibeli

Le kuɖiɖinyigba si dzi ƒu kplakplakpla, si dzi tsi aɖeke mele o la dzi.

 2 Ale mekpɔ wò le kɔkɔeƒe la;

Mekpɔ wò ŋusẽ kple wò ŋutikɔkɔe.

 3 Elabena wò amenuveve nyo wu agbe,

Nye nuyiwo akafu wò.

 4 Esia ta makafu wò le nye agbenɔɣi katã;

Eye mawu nye asiwo dzi le wò ŋkɔ me.

 5 Nu nyuiwo kple nu damiwo ɖi ƒo nam,

Eya ta matsɔ aseyetsonuyiwo akafu wò.

 6 Meɖoa ŋku dziwò le nye aba dzi;

Le zã ƒe ŋudzɔɣiwo la, medea ŋugble le ŋuwò.

 7 Elabena wòe kpena ɖe ŋunye,

Eye metsoa aseye le wò aʋala ƒe vɔvɔli te.

 8 Meku ɖe ŋuwò;

Ètsɔ wò nuɖusi vàm goŋgoŋ.

 9 Ke ame siwo di be yewoatsrɔ̃ nye agbe la,

Anyigba tume kee woava do ɖo.

10 Woatsɔ wo ade asi na yi;

Woazu nuɖuɖu na agbotoewo.

11 Ke fia la akpɔ dzidzɔ ɖe Mawu ŋu.

Ame sia ame si kaa atam le eŋkɔ me la akafui kple dzidzɔ,

Elabena woamia nu na aʋatsokalawo.

PSALMOWO 64
1  Oo Mawu, ne meƒo koko na wò la, see.

Kpɔ nye agbe ta tso futɔ la ƒe ŋɔdzidodo me.

 2 Kpɔ tanye tso ame vɔ̃ɖiwo ƒe nugbeɖoɖo me,

Tso nu vlo wɔlawo ƒe ha la si me,

 3 Wonyre woƒe aɖewo abe yi ene;

Eye wodzidze woƒe nya tɔamewo ɖe ame dzi abe aŋutrɔ ene,

 4 Ne woanɔ bebeƒe ada ame maɖifɔ la;

Wodanɛ zi ɖeka ʋĩm vɔvɔ̃manɔmee.

 5 Woléa woƒe tame vɔ̃ ɖoɖowo me ɖe asi;

Woƒoa nu tso ale si woatre mɔ̃ le adzame ŋu.

Wogblɔna be: “Ame kae akpɔe?”

 6 Wodia nu gbegblẽ wɔwɔ ƒe mɔnu yeyewo;

Wotsɔa ayedzedze ɖoa nugbe le adzame;

Eye wo dometɔ ɖe sia ɖe ƒe dzimesusuwo goglo ŋutɔ.

 7 Gake Mawu ƒe aŋutrɔ alɔ wo le vo me;

Woaxɔ abi vevie enumake.

 8 Woawo ŋutɔwo ƒe aɖe aƒu wo anyi;

Ame siwo katã akpɔ wo la, aʋuʋu ta.

 9 Eye vɔvɔ̃ aɖo amewo katã,

Woaɖe gbeƒã nu si Mawu wɔ,

Eye woase eƒe nuwɔnawo gɔme nyuie.

10 Ame dzɔdzɔe akpɔ dzidzɔ ɖe Afetɔ ŋu, eye wòasii atso;

Ame siwo katã ƒe dzi le dzɔdzɔe la, akafui kple dzidzɔ.

PSALMOWO 65
1  Oo Mawu, kafukafu le lalawòm le Zion;

Wòe míaxe míaƒe adzɔgbeɖefe na.

 2 Oo Gbedodoɖasela, gbɔwòe ame ƒomeviwo katã ava.

 3 Nye vodadawo kpe wum,

Gake ètsyɔ nu míaƒe dzidadawo dzi.

 4 Dzidzɔtɔe nye ame si nètia eye nèhee vɛ

Be wòanɔ wò xɔxɔnuwo.

Wò aƒemenu nyuiwo aɖi ƒo na mí,

Wò gbedoxɔ kɔkɔe la me nuwo aɖi ƒo na mí.

 5 Àto wò nukudɔ dzɔdzɔewo dzi atɔ na mí,

Oo Mawu, míaƒe xɔnametɔ;

Wòe nye ame siwo le anyigba ƒe mlɔenuwo ke,

Kple ame siwo le ƒugodo le didiƒe ʋĩi ke la, ƒe Ŋuɖoɖeŋu.

 6 Ètsɔ wò ŋusẽ li ke towo sesĩe;

Èta wò ŋusẽ gã la abe avɔ ene.

 7 Ètsia atsiaƒuwo ƒe agbodzedze nu,

Ètsia ƒutsotsoewo ƒe nyanyra kple dukɔwo ƒe ʋunyaʋunyawɔwɔ nu.

 8 Dzidzi aƒo ame siwo le didiƒe ʋĩi le wò dzesiwo ta;

Àna aseyetsotso naɖi le amewo nu tso afi si ɣe dzena tsona yi afi si wòɖoa to lena.

 9 Èléa be na anyigba la,

Ènana wòwɔa nu eye wònyoa nu ale gbegbe.

Tsi yɔ Mawu ƒe tɔʋuwo taŋ;

Èna agblemenuku sɔ gbɔ na amewo,

Elabena alea nèdzra anyigba la ɖoe.

10 Wòe dea tsi kpowo dome nyuie le agblewo me, eye nègbã kpoteƒewo wozu sɔsɔe;

Èna tsi dza ɖe edzi wòbɔbɔ; èyra eƒe nu miemiewo.

11 Ètsɔ wò nyuiwɔwɔ ɖo atsyɔ̃e na ƒe la;

Eye nu nyuiwo gbagba ɖe wò toƒewo.

12 Lãnyiƒe siwo le gbegbe la yɔ gbagba,

Eye aseyetsotso xɔ togbɛwo dzi keŋ.

13 Alẽhawo yɔ lãnyiƒewo kpaŋ,

Eye agblemenuku yɔ baliwo me fũu.

Wole aseye tsom, ɛ̃, wole ha dzim.

PSALMOWO 66
1  Mi anyigbawo katã, mido dzidzɔɣli na Mawu.

 2 Midzi kafukafuha miatsɔ ado kɔkɔ eƒe ŋkɔ si ŋu bubu le la,

Mina eƒe kafukafu nade dzi.

 3 Migblɔ na Mawu be: “Wò dɔwɔwɔwo dzi ŋɔ loo!

Wò futɔwo adzo nyanyanya abɔbɔ ɖe ŋkuwòme

Le wò ŋusẽ triakɔ la ta.

 4 Anyigba blibo la katã ade ta agu na wò;

Eye woadzi kafukafuha na wò;

Woadzi kafukafuha na wò ŋkɔ.” (Sela)

 5 Miva, ne miakpɔ Mawu ƒe dɔwɔwɔwo.

Nu dziŋɔwoe wòwɔ na amegbetɔviwo.

 6 Etrɔ atsiaƒu wòzu ƒuƒuiƒe;

Afɔ wotsɔ tso tɔsisi lae.

Afi mae míetso aseye ɖe eŋu le.

 7 Ele dzi ɖum le eƒe ŋusẽ me tegbee.

Eƒe ŋkuwo le dukɔwo ŋu.

Tosẽlawo megado wo ɖokuiwo ɖe dzi o. (Sela)

 8 Mi dukɔwo, mikafu mía Mawu la,

Eye mina eƒe kafukafu naɖi.

 9 Ekpɔ míaƒe agbe ta;

Eye mena míaƒe afɔ ɖiɖi o.

10 Oo Mawu, èdo mí kpɔ;

Èdza mía ŋu abe ale si wodzaa klosalo ŋui ene.

11 Èkplɔ mí de ɖɔ me;

Èda agba kpekpe ɖe mía dzi.

12 Èna amegbetɔ si kuna la ɖu mía dzi;

Míeto dzo me, eye míeto tɔ me;

Eye nèɖe mí hekplɔ mí yi gbɔɖemeƒe.

13 Matsɔ numevɔsa blibowo ava aƒewò me;

Maxe nye adzɔgbeɖefewo na wò,

14 Esiwo do tso nye nu me,

Kple ŋugbe siwo meke nu do esi meɖo xaxa me.

15 Matsɔ lã damiwo asa numevɔ na wò,

Eye matsɔ agbowo ado dzudzɔ na wò.

Matsɔ nyitsuwo kple gbɔ̃tsuwo asa vɔ na wò. (Sela)

16 Miva see, mi ame siwo katã vɔ̃a Mawu,

Eye magblɔ nu si wòwɔ nam la na mi.

17 Eyae meke nu yɔ

Eye metsɔ nye aɖe kafui.

18 Ne ɖe meɖo nu vɔ̃ɖi ɖe dzi me la,

Anye ne Afetɔ maɖo tom o.

19 Gake Mawu ɖo tom;

Ese nye gbedodoɖa.

20 Woakafu Mawu, ame si megbe nye gbedodoɖa o

Eye mete eƒe lɔlɔ̃ vavã ɖa le gbɔnye o.

PSALMOWO 67
1 Mawu ave mía nu, eye wòayra mí;

Ana eƒe mo naklẽ na mí (Sela)

 2 Ale be woanya wò mɔ le anyigba bliboa dzi,

Kple wò xɔxɔdɔwo le dukɔwo katã dome.

 3 Oo Mawu, dukɔwo nekafu wò;

Dukɔwo katã nekafu wò.

 4 Anyigbadzinɔlawo akpɔ dzidzɔ ahatso aseye,

Elabena àdrɔ̃ ʋɔnu dukɔwo ɖe eteƒe.

Àkplɔ anyigbadzidukɔwo. (Sela)

 5 Oo Mawu, dukɔwo nekafu wò;

Dukɔwo katã nekafu wò.

 6 Anyigba awɔ nu;

Mawu, mía Mawu, ayra mí.

 7 Mawu ayra mí,

Eye anyigba ƒe mlɔenuwo katã avɔ̃e.

PSALMOWO 68
1 Mawu netso, ne eƒe futɔwo naka hlẽ,

Eye ame siwo léa fui la nasi le eŋkume.

 2 Ale si ya kplɔa dzudzɔ dzonae la, nenemae nàkplɔ wo adzoe;

Ale si anyixe lólona le dzo nui la,

Nenemae ame vɔ̃ɖiwo nu ayi le Mawu ŋkume.

 3 Ke ame dzɔdzɔewo ya akpɔ dzidzɔ;

Woatso aseye le Mawu ŋkume;

Eye woagli kple dzidzɔ.

 4 Midzi ha na Mawu; midzi kafukafuha* na eƒe ŋkɔ.

Midzi ha na Ame si to gbedzi* gbɔna,

Eŋkɔe nye Yah!* Mitso aseye le eŋkume!

 5 Tsyɔ̃eviwo fofo kple ahosiwo takpɔlae*

Mawu nye, le eƒe kɔkɔeƒe la.

 6 Mawu naa nɔƒe ame tsiakogowo;

Eɖea ga gamenɔlawo henaa nu dzea edzi na wo.

Ke tosẽlawo* ya atsi kuɖiɖinyigba dzi.

 7 Oo Mawu, esi nènɔ ŋgɔ na wò dukɔ,

Esi nèzɔ to gbegbe la, (Sela)

 8 Anyigba ʋuʋu;

Dziƒo dza tsi le Mawu ŋkume;

Sinai sia hã ʋuʋu le Mawu, Israel ƒe Mawu la ŋkume.

 9 Oo Mawu, èna tsi dza bababa,

Ègado ŋusẽ wò ame* siwo ŋu ɖeɖi te belibeli la.

10 Wonɔ wò agbadɔwo me;

Oo Mawu, le wò nyuiwɔwɔ ta nèkpɔ ame dahewo dzi.

11 Afetɔ ŋutɔe ɖe gbe;

Nyɔnu nya nyui gblɔlawo de ha kpaŋ.

12 Aʋakɔwo ƒe fiawo de afɔ du me, wode afɔ du me!

Nyɔnu si le aƒe me la hã xɔ aboyonuawo ƒe ɖe.

13 Togbɔ be mi ŋutsuwo miemlɔ asaɖa ƒe dzowo* gbɔ hã la,

Ahɔnɛ ƒe aʋala siwo ŋu wofa klosalo ɖo,

Kple eƒe fu siwo ŋu wofa sika nyuitɔ ɖo lae miakpɔ.

14 Esi Ŋusẽkatãtɔ la ka eƒe fiawo hlẽ la,

Sno dza le Zalmon.*

15 Basan towo nye Mawu ƒe to;*

To kɔkɔwoe Basan towo nye.

16 Mi to kɔkɔwo, nu ka tae miele ŋu biãm

To si dzi Mawu tia be yeanɔ la?

Ɛ̃, afi mae Afetɔ anɔ tegbee.

17 Mawu ƒe aʋatasiaɖamwo le akpe nanewo, wonye akpe teƒe akpewo.

Afetɔ ŋutɔ tso Sinai va kɔkɔeƒe la.

18 Èlia yi dzi ʋĩi;

Èkplɔ aboyomewo yii;

Èxɔ nunana siwo nye amewo,

Ɛ̃, tosẽlawo gɔ̃ hã, be yeanɔ wo dome, Oo Yah, Mawu.

19 Woakafu Afetɔ, ame si tsɔa míaƒe agbawo na mí gbe sia gbe,

Mawu vavã si nye míaƒe xɔnametɔ la. (Sela)

20 Mawu vavã la nye Mawu si xɔna na ame;

Eye Aƒetɔ Dziɖulagã Afetɔe ɖea ame tso ku si me.

21 Nyateƒee, Mawu agbã ta na eƒe futɔwo,

Kple dzodome na ame sia ame si kpɔtɔ le eƒe fɔɖiɖi me.*

22 Afetɔ be: “Makplɔ wo tso Basan agbɔe;

Makplɔ wo tso atsiaƒu ƒe gogloeƒewo agbɔe,

23 Ne nàklɔ wò afɔ ɖe ʋu me,

Ne wò avuwo ƒe aɖe nakpɔ wo tɔ gome le futɔwo ŋu.”

24 Oo Mawu, wokpɔ wò aʋadziɖuɖu ƒe gbɔlɔhawo,

Nye Mawu, nye Fia, ƒe aʋadziɖuɖu ƒe gbɔlɔhawo zɔ va kɔkɔeƒe la.

25 Hadzilawo dze ŋgɔ, kasaŋkuƒolawo xe megbe;

Ðetugbui axatsɛƒolawo le wo titina.

26 Mikafu Mawu le ameha gãwo dome;*

Mikafu Afetɔ, mi ame siwo dzɔ tso Israel ƒe Tsidzɔƒe la.

27 Benyamin, si nye woƒe suetɔ la, le wo dzi ɖum,

Yuda-megãwo kple woƒe ame hahooawo,

Kpakple Zebulon-megãwo kple Naftali-megãwo hã.

28 Wò Mawu ɖoe be ŋusẽ naɖo ŋuwò.

Oo Mawu, wò, ame si wɔe na mí, ɖe wò ŋusẽ fia.

29 Le wò gbedoxɔ si le Yerusalem ta,

Fiawo atsɔ nunanawo avɛ na wò.

30 Blu ɖe gbemelã siwo le aɖawo me,

Ðe nyitsuwo kple nyiviwo ƒe ha la ta,

Va se ɖe esime dukɔwo natsɔ ɖokuibɔbɔ alɔ klosalo vɛ.*

Ka dukɔ siwo lɔ̃a aʋawɔwɔ la ya hlẽ.

31 Woatsɔ gadzẽnuwo atso Egipte avɛ;*

Kus aɖe abla atsɔ nunanawo ɖe asi avɛ na Mawu.

32 Oo, anyigbadzifiaɖuƒewo, midzi ha na Mawu,

Midzi kafukafuha* na Afetɔ, (Sela)

33 Na Ame si bɔbɔ nɔ dziƒowo ƒe dziƒo si li tso tititi.

Kpɔ ɖa! Eɖe gbe, ena eƒe gbe sesẽ la ɖi.

34 Miɖe gbeƒã Mawu ƒe ŋusẽ.

Eƒe gãnyenye le Israel dzi,

Eye eƒe ŋusẽ le dziŋgɔli* me.

35 Ŋɔdzi le Mawu ŋu le eƒe kɔkɔeƒe gã la.*

Israel ƒe Mawu wònye,

Ame si naa ŋusẽ kple ŋutete dukɔ la.

Woakafu Mawu.

PSALMOWO 69
1 Oo Mawu, xɔ nam, elabena nye agbe ɖo afɔku me le tsiawo me.

 2 Meɖo ba yi to, afi si afɔɖoƒe aɖeke mele o.

Mege ɖe tɔ goglowo me,

Eye tɔsisi kplɔm yina.

 3 Medo ɣli ʋuu ɖeɖi te ŋunye;

Nye gbe me xe.

Mele mɔ kpɔm na nye Mawu ʋuu nu te nye ŋkuwo ŋu.

 4 Ame siwo lé fum dzodzro la

Sɔ gbɔ wu nye taɖa.

Ame siwo di be ɖoɖoe nazi le nunye,

Siwo nye nye futɔ vɔ̃ɖiwo la, va sɔ gbɔ ŋutɔ.

Wozi dzinye meɖe asi le nu si nyemefi o la ŋu.

 5 Oo Mawu, ènya nye bometsitsi,

Eye nye fɔɖiɖiwo mele ɣaɣla ɖe wò o.

 6 Mègana ame siwo kpɔa mɔ na wò la naɖu ŋukpe le tanye o,

Oo, Aƒetɔ Dziɖulagã, aʋakɔwo ƒe Afetɔ.

Mègana ame siwo dia wò la naɖu ŋukpe le tanye o,

Oo, Israel ƒe Mawu.

 7 Elabena tawòe wole vlo domem ɖo;

Eye ŋukpe lém.

 8 Mezu amedzro na nɔvinyeŋutsuwo,

Kple ame tutɔ na danyeviwo.

 9 Elabena ŋuʋaʋã ɖe wò aƒe ŋu le bibim le menye abe dzo ene,

Eye ame siwo le vlo dom wò la ƒe vlodoamewo va dzinye.

10 Esi mebɔbɔ ɖokuinye ɖe anyi hetsi nu dɔ la,

Vlododo ko wòzu nam.

11 Esi meta akpanya la,

Alɔmeɖenu ko meva zu na wo.

12 Ame siwo bɔbɔ nɔ dugbo la me le nu ƒom le ŋunye,

Eye ahanomunɔwo kpa ha dem.

13 Ke nye gbedodoɖa ɖo gbɔwò,

Oo Afetɔ, eɖo gbɔwò le amenuveɣi.

Oo Mawu, tɔ nam le wò lɔlɔ̃ si nu metsina gbeɖe o la nu,

Le wò xɔxɔdɔ siwo medana le edzi o la nu.

14 Ðem tso ba me;

Mègana mayi to o.

Ðem tso ame siwo lé fum la si me,

Eye nàɖem tso tɔ goglowo me.

15 Mègana tɔɖɔɖɔ nakplɔm dzoe,

Alo tɔ goglowo namim loo,

Alo aʋli natu eƒe nu ɖe dzinye o.

16 Oo Afetɔ, tɔ nam, elabena wò lɔlɔ̃ si nu metsina o la nyo ŋutɔ.

Trɔ ɖe ŋunye le wò nublanuikpɔkpɔ sɔgbɔ la ta,

17 Eye mègaɣla wò mo ɖe wò subɔla o.

Tɔ nam kaba, elabena meɖo xaxa me.

18 Te ɖe ŋunye nàxɔ nam;

Ðem, le nye futɔwo ta.

19 Wò ŋutɔ ènya nye vlododo, nye ŋukpe kple ale si woɖi gbɔm.

Wò ŋkuwo le nye futɔwo katã ŋu.

20 Vlododo gbã dzi nam, eye hayahaya mele eŋu o.

Menɔ mɔ kpɔm be ame aɖe ase veve ɖe nunye, ke ɖeke meli o,

Mekpɔ mɔ na akɔfalawo hã, ke nyemekpɔ ɖeke o.

21 Ke boŋ wotsɔ aɖi nam ɖe nuɖuɖu teƒe,

Eye esi tsikɔ wum la, wona aha tsitsim be mano.

22 Na woƒe kplɔ̃ nazu ɖɔ na wo,

Eye woƒe dzidzedzekpɔkpɔ nazu mɔ̃ aɖe wo.

23 Na woƒe ŋkuwo dzi natsyɔ ne woagakpɔ nu o,

Eye na woƒe aliwo nanɔ ƒoƒom tititi ɖaa.

24 Trɔ wò dziku kɔ ɖe wo dzi,

Eye wò dɔmedzoe netu wo.

25 Woƒe nɔƒewo nezu aƒedo;

Ame aɖeke meganɔ woƒe agbadɔwo me o.

26 Elabena wole ame si nèƒo la yome tim,

Eye woléa ame siwo ŋu nède abii la ƒe vevesesewo ɖe nu nɔa yiyim.

27 Bu fɔ wo nàgabu fɔ wo ɖe edzi,

Eye mègana wò dzɔdzɔenyenye ƒe gome aɖeke wo o.

28 Na woatutu woƒe ŋkɔ ɖa le agbagbeawo ƒe agbalẽ la me,

Eye womegaŋlɔ woƒe ŋkɔ ɖe ame dzɔdzɔewo dome o.

29 Ke nye la, mele fu kpem, le veve sem.

Oo Mawu, wò xɔname nekpɔ tanye.

30 Madzi kafukafuha na Mawu ƒe ŋkɔ,

Eye matsɔ akpedada adoe ɖe dzi.

31 Esia adze Afetɔ ŋu wu nyitsu,

Wu nyitsu si ƒe dzowo do, eye afɔkli me fe nɛ.

32 Ame fafawo akpɔe eye dzi adzɔ wo.

Mi ame siwo le Mawu dim la, miaƒe dzi negbɔ agbe.

33 Elabena Afetɔ ɖoa to ame dahewo,

Eye mado vlo eƒe ame siwo woɖe aboyoe la o.

34 Dziƒo kple anyigba nekafui,

Atsiaƒuwo kple nu siwo katã ʋãna le wo me la hã nekafui.

35 Elabena Mawu axɔ na Zion,

Eye wòagbugbɔ Yuda duwo atso,

Woanɔ afi ma, eye wòazu wo tɔ.

36 Eƒe subɔlawo ƒe dzidzimeviwo atsɔe anyi domee,

Eye ame siwo lɔ̃a eƒe ŋkɔ la anɔ eme.

PSALMOWO 70
1  Oo Mawu, xɔ nam;

Oo Afetɔ, va kaba nàva kpe ɖe ŋunye.

 2 Na ame siwo le didim be yewoaɖe nye agbe ɖa la,

Naɖu ŋukpe eye woƒe mo netsi dãa.

Na ame siwo le vɔ̃e dim nam la,

Nagbugbɔ ɖe megbe kple ŋukpe gã.

 3 Na ame siwo le gbɔgblɔm be, “Ehɛ̃, Ehɛ̃!” la,

Natrɔ adzo kple ŋukpe.

 4 Ke na ame siwo katã dia wò la,

Natso aseye ahakpɔ dzidzɔ ɖe ŋuwò.

Eye ame siwo lɔ̃a wò xɔxɔdɔwo la, nanɔ gbɔgblɔm ɖaa be:

“Woado Mawu ɖe dzi!”

 5 Ke nye la, wɔna vɔ le ŋunye eye hiã tum;

Oo Mawu, wò afɔ netsɔ ɖe ŋunye.

Wòe nye nye kpeɖeŋutɔ kple nye xɔnametɔ;

Oo Afetɔ, mègatsi megbe o.

1  Oo Afetɔ, wòe mesi tso.

Mègana ŋu nakpem gbeɖe o.

 2 Xɔ nam eye nàɖem le wò dzɔdzɔenyenye nu.

Ƒu to anyi ɖe ŋunye, eye nàxɔ nam.

 3 Zu agakpe sesẽ nam,

Afi si mate ŋu asi abe ɖo ɖaa.

Ðe gbe, ne woaxɔ nam,

Elabena wòe nye nye agakpe kple nye mɔ́ sesẽ.

 4 Oo nye Mawu, ɖem tso ame vɔ̃ɖi la si me,

Tso ame madzɔmadzɔ kple ameteɖeanyila la ƒe fego me.

 5 Elabena Aƒetɔ Dziɖulagã Afetɔ, wòe nye nye mɔkpɔkpɔ;

Ŋuwòe meɖo dzi ɖo tso nye ɖevime ke.

 6 Ŋuwòe meziɔ ɖo tso esime wodzim;

Wòe ɖem tso danye ƒe dɔ me ke.

Wòe mekafuna ɖaa.

 7 Mezu abe nukunu ene na ame geɖewo,

Ke wòe nye nye mɔ́ sesẽ.

 8 Wò kafukafu yɔ nu me nam fũu;

Meƒoa nu le wò atsyɔ̃ ŋu ŋkeke blibo la katã.

 9 Mègatsɔm ƒu gbe le nye amegãkuɣi o;

Mègagblẽm ɖi ne ŋusẽ vɔ le ŋunye o.

10 Nye futɔwo le nu ƒom tsi tre ɖe ŋunye,

Eye ame siwo di be yewoaɖe nye agbe ɖa la le adaŋu dem le wo nɔewo dome,

11 Le gbɔgblɔm be: “Mawu gblẽe ɖi.

Mina míati eyome ne míalée, elabena ame aɖeke meli axɔ nɛ o.”

12 Oo Mawu, mèganɔ adzɔge le ŋunye o.

Oo nye Mawu, ɖe abla nàva kpe ɖe ŋunye.

13 Na ame siwo tso ɖe ŋunye la,

Naɖu ŋukpe eye wo nu neyi.

Ame siwo le vɔ̃e dim nam la,

Vlododo kple gbɔɖiɖi nenyè tsyɔ wo.

14 Ke nye la, manɔ mɔ kpɔm na wò ɖaa;

Eye makafu wò agakafu wò ɖe edzi.

15 Nye nu agblɔ wò dzɔdzɔenyenye,

Kple wò xɔxɔdɔwo ŋkeke blibo la,

Togbɔ be nyemate ŋu axlẽ wo o hã.

16 Oo, Aƒetɔ Dziɖulagã Afetɔ,

Mava aɖe gbeƒã wò ŋusẽdɔwo;

Maƒo nu le wò dzɔdzɔenyenye ŋu, le tɔwò ɖeɖe ko ŋu.

17 Oo Mawu, èfia num tso nye ɖevime ke,

Eye mele gbeƒã ɖem wò nukudɔwo va se ɖe fifi.

18 Oo Mawu, ne metsi ƒo wɔ gɔ̃ hã la, mègagblẽm ɖi o.

Na maɖe gbeƒã wò ŋusẽ na dzidzime si gbɔna

Kple wò ŋusẽ na megbeviwo katã.

19 Oo Mawu, wò dzɔdzɔenyenye de dzi boo;

Oo Mawu, èwɔ nu gã nu gãwo;

Ame kae de nuwò?

20 Togbɔ be èna mekpɔ xaxa kple vɔ̃ geɖe teƒe hã la,

Gagbɔ agbem;

Eye nàhem do goe tso anyigba tume.

21 Na mazu gã ɖe edzi,

Tɔ kpɔ ɖe ŋunye, eye nàfa akɔ nam.

22 Ekema matsɔ kasaŋku akafu wò

Elabena nuteƒewɔlae nènye, Oo nye Mawu.

Madzi ha akafu wò kple saŋku,

Oo, Israel ƒe Kɔkɔetɔ.

23 Nye nuyiwo atso aseye ne mele kafukafuha dzim na wò,

Elabena wòe ɖe nye agbe.

24 Nye aɖe aƒo nu le wò dzɔdzɔenyenye ŋu ŋkeke blibo la katã,

Elabena ŋukpe alé ame siwo le vɔ̃e dim nam la, eye woƒe mo ada tu.

PSALMOWO 72
1   Oo Mawu, tsɔ wò ʋɔnudɔdrɔ̃ ŋuti mɔfiamewo na fia la,

Kple wò dzɔdzɔenyenye na fiavi la.

 2 Na wòaxɔ wò dukɔ la ƒe nya ɖe akɔ le dzɔdzɔenyenye me,

Eye wòatso afia dzɔdzɔe na wò ame tsɛwo.

 3 Towo nehe ŋutifafa vɛ na dukɔ la,

Eye togbɛwo hã nehe dzɔdzɔenyenye vɛ.

 4 Neʋli dukɔ la ƒe ame tsɛwo ta,

Nexɔ na ame dahewo ƒe viwo,

Eye wòafanya ametafala.

 5 Ŋkeke ale si ɣe li la, woavɔ̃ wò

Eye ŋkeke ale si ɣleti li la, woavɔ̃ wò,

Tso dzidzime yi dzidzime.

 6 Anɔ abe tsidzadza ene ɖe gbe si woƒo la dzi,

Abe gbafi si dea tsi anyigba ene.

 7 Ame dzɔdzɔewo adzi ɖe edzi le eƒe ŋkekewo me,

Eye ŋutifafa axɔ aƒe va se ɖe esime dzinu maganɔ anyi o.

 8 Eteviwo anɔ anyi tso atsiaƒu nu yi atsiaƒu nu,

Tso Tɔsisi la nu va se ɖe anyigba ƒe mlɔenuwo ke.

 9 Gbegbenɔlawo abɔbɔ ɖe eŋkume,

Eye eƒe futɔwo aɖuɖɔ ke.

10 Tarsis-fiawo kple ƒukpowo dzi fiawo axe adzɔ nɛ.

Seba-fiawo kple Saba-fiawo atsɔ nunanawo avɛ nɛ.

11 Fiawo katã abɔbɔ ɖe eŋkume,

Eye dukɔwo katã asubɔe.

12 Elabena aɖe ame dahe si le ɣli dom be woaxɔ na ye la,

Kple ame tsɛ kpakple ame si si xɔnametɔ aɖeke mele o la.

13 Ase veve ɖe ame tsɛ kple ame dahe nu,

Eye wòaɖe ame dahewo ƒe agbe.

14 Aɖe wo tso teteɖeanyi kple ŋutasesẽ me,

Eye woƒe ʋu axɔ asi le eŋkume.

15 Nenɔ agbe, eye woana Seba sikae.

Woado gbe ɖa ɖe eta ɖaa,

Eye woayrae ŋkekeawo katã.

16 Agblemenukuwo ado agbogbo ɖe anyigba la dzi;

Woaxɔ towo tame keŋ.

Fia la ƒe agblemenuwo awɔ vlɔvlɔvlɔ abe esiwo le Lebanon ene,

Eye dua me tɔwo awɔ mlɔmlɔmlɔ abe amagbewo le anyigba dzi ene.

17 Eƒe ŋkɔ nenɔ anyi tegbee,

Eye zi ale si ɣe li la, eƒe ŋkɔ nede du.

Dukɔwo neyra wo ɖokuiwo to eya amea dzi;

Eye dukɔwo katã neyɔe be dzidzɔtɔ.

18 Woakafu Afetɔ Mawu, Israel ƒe Mawu la,

Ame si ɖeɖe ko wɔa nu wɔnukuwo.

19 Woakafu eƒe ŋkɔ si ŋu bubu le la tegbee,

Eye eƒe ŋutikɔkɔe neyɔ anyigba blibo la katã dzi.

Amen, ɛ̃, Amen.

20 David, Isai vi ƒe gbedodoɖawo wu nu.

PSALMOWO 73
1 Nyateƒee, Mawu wɔ nyui na Israel, na ame siwo dza le dzi me.

 2 Ke nye la, nye afɔ da kloe,

Nye afɔ ɖiɖi kloe.

 3 Elabena meʋã ŋu dadalawo,

Esi mekpɔ be ame vɔ̃ɖiwo le ŋutifafa me.

 4 Womesea veve aɖeke yia ku mee o;

Woƒe lãme le sesĩe.

 5 Womekpea fu abe ame bubuwo ene o,

Eye womeɖoa xaxa me abe amegbetɔ bubuawo ene o.

 6 Eya tae dada zu woƒe kɔgɛ;

Eye wotsyɔ ŋutasesẽ abe avɔ ene.

 7 Woƒe dzidzedzekpɔkpɔ na woƒe ŋkuwo do hɔ̃;

Nu dze edzi na wo wu ale si wokpɔ mɔe.

 8 Woɖea alɔme le amewo ŋu heƒoa nu tso nu vɔ̃ɖiwo ŋu;

Wotsɔa ameteteɖeanyi doa ŋɔdzi na amewo dadatɔe.

 9 Woƒoa nu abe dziƒo kee wole ene,

Eye woƒe aɖe gblɔa nya sia nya le anyigba ƒe afi sia afi faa.

10 Eya ta eƒe amewo trɔna ɖe wo ŋu,

Va noa woƒe tsi gbogboawo ƒe ɖe.

11 Wogblɔna be: “Aleke Mawu awɔ anya?

Ðe Dziƒoʋĩtɔ la adze sia?”

12 Ɛ̃, aleae ame vɔ̃ɖiwo le, wole dziɖeɖi me ɣesiaɣi.

Wodzia kesinɔnuwo ɖe edzi.

13 Nyateƒee, dzodzroe mena nye dzi dza,

Eye meklɔ nye asi le fɔmaɖimaɖi me.

14 Mexaa nu ŋkekeawo katã;

Eye mexɔa mokaname ŋdi sia ŋdi.

15 Gake ne ɖe meƒo nu abe woawo ene la,

Anye ne mede wò amewo asi.

16 Esi mebu tame be mase esia gɔme la,

Eɖe fu nam vevie,

17 Va se ɖe esime mege ɖe Mawu ƒe kɔkɔeƒe gã la,

Eye meva dze si ale si wòava nɔ na wo le etsɔme.

18 Nyateƒee, ètsɔ wo ɖo ɖiɖiƒe.

Èna wodze anyi eye fɔfɔ megale wo ŋu o.

19 Aleke wotsrɔ̃ kpata ale!

Aleke woƒe nuwuwu va ŋɔdzitɔe zi ɖeka kpoyi ale!

20 Oo Afetɔ, ale si drɔ̃e nɔna ne ame nyɔ tso alɔ̃ me la,

Nenemae ne ètso la, àɖe wo ɖa.

21 Ke nye dzi xa nu,

Eye mese veve le ememe ke.

22 Mezu bometsila kple numanyala;

Menɔ abe lã ene le ŋkuwòme.

23 Ke fifia mele gbɔwò ɖaa;

Èlé nye nuɖusi ɖe asi.

24 Ètsɔ wò nuxlɔ̃amenyawo kplɔm,

Eye emegbe àkplɔm ayi ŋutikɔkɔe me.

25 Ame kae le dziƒo nam?

Nyemele naneke dim le anyigba dzi kpe ɖe ŋuwò o.

26 Ne wɔna vɔ le nye ŋutilã kple nye dzi ŋu hã,

Mawu akpɔtɔ anye agakpe na nye dzi, kple nye gome tegbee.

27 Nyateƒee, ame siwo katã te ɖe aga le ŋuwò la atsrɔ̃.

Àna ame siwo katã gbe nuteƒewɔwɔ hetrɔ le yowòme la nu nayi.

28 Ke nye la, enyo nam be mate ɖe Mawu ŋu.

Metsɔ Aƒetɔ Dziɖulagã Afetɔ wɔ nye sitsoƒe,

Ne maɖe gbeƒã wò dɔwɔwɔwo katã.

PSALMOWO 74
1  Oo Mawu, nu ka tae nètsɔ mí ƒu gbe ɖikaa?

Nu ka tae wò dɔmedzoe le bibim ɖe lãha siwo le wò lãnyiƒe ŋu?

 2 Ðo ŋku wò ame siwo nèƒle tso blema ke la dzi,

To si nèxɔ ƒle wòzu wò domenyinu.

Ðo ŋku Zion To, afi si nènɔ la dzi.

 3 Trɔ ɖe teƒe siwo zu aƒedo ɖaa la ŋu.

Futɔ la gblẽ nu sia nu le kɔkɔeƒe la.

 4 Wò futɔwo ƒe gbe de dzi le wò takpeƒe la.

Woda woawo ŋutɔwo ƒe dzesiwo ɖe afi ma.

 5 Wonɔ abe ame siwo kɔ fía dzi ɖe ave dodo ŋu ene.

 6 Wotsɔ fía kple gakpo kaka eŋunu siwo katã ŋu wowɔ aɖaŋunuwo ɖo la.

 7 Wotɔ dzo wò kɔkɔeƒe la.

Wogblẽ kɔ ɖo na avɔgbadɔ si ŋu wò ŋkɔ le la, eye wokakae va se ɖe eƒe agunu ke.

 8 Woawo kple woƒe dzidzimeviwo katã gblɔ le woƒe dzi me be:

“Ele be woatɔ dzo Mawu ƒe takpeƒewo katã le anyigba la dzi.”

 9 Míele dzesi aɖeke kpɔm o;

Nyagblɔɖila aɖeke megali o,

Eye ame aɖeke mele mía dome si nya ɣeyiɣi didi si esia axɔ o.

10 Oo Mawu, ɣekaɣi ketɔ la anɔ vlo dom wò ase ɖo?

Ðe futɔ la agbe bubudede wò ŋkɔ la ŋu tegbeea?

11 Nu ka tae nèhe wò asi, wò nuɖusi, ɖe megbe?

Doe ɖa tso wò akɔnu ne nàtsrɔ̃ wo.

12 Ke Mawue nye nye Fia tso blema ke,

Ame si wɔa xɔnamedɔwo le anyigba la dzi.

13 Ètsɔ wò ŋusẽ de zitɔtɔ atsiaƒu me;

Ègbã ta na ƒumelã klitsuwo le tsiawo me.

14 Ègbã Leviatan ƒe tawo gudugudu;

Ètsɔe wɔ nuɖuɖu na dukɔ la, na gbegbenɔlawo.

15 Wòe ŋɔ mɔ na tsidzɔƒewo kple tɔʋuwo;

Wòe na tɔ siwo sina ɖaa la mie.

16 Tɔwòe nye ŋkeke, eye tɔwòe nye zã hã.

Wòe wɔ kekeli kple ɣe.

17 Wòe ɖo anyigba ƒe liƒowo katã anyi;

Wòe wɔ dzomeŋɔli kple vuvɔŋɔli.

18 Oo Afetɔ, ɖo ŋku futɔ la ƒe vlododowo,

Kple ale si dukɔ tsibome aɖe gbe bubudede wò ŋkɔ ŋui la dzi.

19 Mègatsɔ wò akpakpa ƒe agbe de asi na gbemelãwo o.

Mègaŋlɔ wò ame siwo le fu kpem la ƒe agbe be ɖikaa o.

20 Ðo ŋku nu, si nèbla kpli mí la dzi,

Elabena anyigba la ƒe teƒe dovivitiwo zu ŋutasẽlawo nɔƒe.

21 Mègana ame si wote ɖe anyi la natrɔ kple ŋukpe o;

Na wɔnamanɔŋutɔ kple ame dahe la nakafu wò ŋkɔ.

22 Oo Mawu, tso, ne nàʋli ɖokuiwò ta.

Ðo ŋu ale si movitɔ la doa vlo wò ŋkeke blibo la.

23 Mègaŋlɔ nya siwo gblɔm wò futɔwo le la be o.

Ame siwo tsia tsitre ɖe ŋuwò la ƒe hoowɔwɔ le dzi dem ɣesiaɣi.

PSALMOWO 75
1  Míeda akpe na wò, Oo Mawu, míeda akpe;

Elabena wò ŋkɔ tsɔ kpuiƒe,

Eye amewo le gbeƒã ɖem wò nukudɔwɔwɔwo.

 2 Ègblɔ be: “Ne meɖo ɣeyiɣi la,

Medrɔ̃ ʋɔnu ɖe eteƒe.

 3 Esi anyigba la kple edzinɔlawo katã lólo gbanaa la,

Nyee li ke eƒe sɔtiwo.” (Sela)

 4 Megblɔ na adegbeƒolawo be, “Miganɔ adegbe ƒom o,”

Na ame vɔ̃ɖiwo be, “Migado miaƒe ŋusẽ ɖe dzi o.

 5 Migado miaƒe ŋusẽ ɖe dzi glodzoo o,

Eye miganɔ nu ƒom dadatɔe o.

 6 Elabena menye ɣedzeƒe alo ɣetoɖoƒe alo anyiehe

Ye dodoɖedzi tsona vana na ame o.

 7 Elabena Mawu nye ʋɔnudrɔ̃la.

Ebɔbɔa ame si ɖe anyi, eye wòdoa ame kemɛ ɖe dzi.

 8 Elabena kplu aɖe le Afetɔ si me;

Wain si wotɔtɔ nyuie la le fu tem le eme.

Atrɔ aha si le eme la akɔ ɖi godoo,

Eye ame vɔ̃ɖi siwo katã le anyigba la dzi anoe, eye woaɖuɖɔ ahaƒã si le egɔme la hã.”

 9 Ke nye la, maɖe gbeƒãe tegbee;

Madzi kafukafuha na Yakob ƒe Mawu la.

10 Elabena eyae gblɔ be: “Maɖe ame vɔ̃ɖiwo ƒe ŋusẽwo katã ɖa,”

Ke ame dzɔdzɔewo ya ƒe ŋusẽ ade dzi.

PSALMOWO 76
1  Wonya Mawu le Yuda;

Exɔ ŋkɔ le Israel.

 2 Eƒe agbadɔ le Salem,

Eye eƒe nɔƒe le Zion.

 3 Afi mae wòŋe aŋutrɔ bibiwo,

Akpoxɔnu kple yi kpakple aʋawɔnuwo le. (Sela)

 4 Èle keklẽm ale gbegbe;

Wò bubu kɔ gbɔ to siwo dzi nuléle bɔ ɖo ŋu.

 5 Woha kalẽtɔ siwo ƒo dzi le la.

Woyi alɔ̃ me;

Wɔna vɔ le aʋakalẽawo katã ŋu.

 6 Oo Yakob ƒe Mawu, esi nènya blu ko la,

Tasiaɖamdola kple sɔ siaa yi alɔ̃ me ʋĩi.

 7 Wò ɖeka ko ŋue ŋɔdzi le.

Ame kae ate ŋu anɔ te ɖe wò dɔmedzoe helĩhelĩ la nu?

 8 Èna wose wò afiatsotso tso dziƒo;

Anyigba vɔ̃, eye ɖoɖoe zi le enu

 9 Esime Mawu tso ɖe ʋɔnudɔdrɔ̃ ŋu,

Be yeaxɔ na ame fafa siwo katã le anyigba la dzi. (Sela)

10 Elabena amegbetɔ ƒe dɔmedzoe ahe kafukafu vɛ na wò;

Woƒe dɔmedzoe susɔea azu atsyɔ̃ na wò.

11 Miɖe adzɔgbe na Afetɔ mia Mawu la, eye miwɔ edzi,

Ame siwo katã le eŋu godoo netsɔ woƒe nunana vɛ le mawuvɔvɔ̃ me.

12 Eyae abɔbɔ kplɔlawo ƒe dada ɖe anyi;

Enana ŋɔdzi léa anyigbadzifiawo.

PSALMOWO 77
1 Mafa avi na Mawu sesĩe;

Mawue mafa avi na, eye aɖo tom.

 2 Medi Afetɔ le gbe si gbe meɖo xaxa me.

Le zã me la, meke nye abɔwo me nɛ ʋuu.

Megbe be woagafa akɔ nam o.

 3 Ne meɖo ŋku Mawu dzi la, meɖea hũ;

Metsia dzimaɖi, eye ŋusẽ vɔna le ŋunye. (Sela)

 4 Èke nye ŋkuyiwo ɖe te;

Metɔtɔ, eye gbɔgblɔ bu ɖem.

 5 Nye susu yi blemaŋkekewo dzi,

Meɖo ŋku gbe aɖe gbe ƒewo dzi.

 6 Meɖoa ŋku ha siwo meƒona la dzi le zã me;

Medea ŋugble le nye dzi me;

Eye medzroa wo me tsitotsito.

 7 Ðe Afetɔ atsɔ mí aƒu gbe tegbeea?

Eye magave mía nu gbeɖegbeɖe oa?

 8 Ðe eƒe lɔlɔ̃ si nu metsina o la nu yi keŋkeŋua?

Ðe eƒe ŋugbedodo azu dzodzro na dzidzimeawo katã?

 9 Ðe Mawu ŋlɔ eƒe amenuveve bea?

Alo ɖe eƒe dziku wɔe be wòdzudzɔ nublanuikpɔkpɔa? (Sela)

10 Ðe wòle be manɔ gbɔgblɔm be, “Etena ɖe dzinye vevie be,

Dziƒoʋĩtɔ la trɔ eƒe nɔnɔme ɖe mía ŋu” mahã?

11 Maɖo ŋku Yah ƒe dɔwɔwɔwo dzi;

Maɖo ŋku nu wɔnuku siwo nèwɔ le blema ke la dzi.

12 Made ŋugble le wò dɔwɔwɔ blibo la katã ŋu

Eye mabu tame le wò nuwɔnawo ŋu.

13 Oo Mawu, wò mɔwo le kɔkɔe.

Oo Mawu, mawu kae lolo de nuwò?

14 Wòe nye Mawu vavã si wɔa nukunuwo.

Èɖe wò ŋusẽ fia dukɔwo.

15 Ètsɔ wò ŋusẽ xɔ na wò dukɔ la,

Ame siwo nye Yakob kple Yosef viwo. (Sela)

16 Tsiwo kpɔ wò, Oo Mawu;

Tsiwo kpɔ wò, eye wonyra.

Eye tɔ goglowo hã dze agbo.

17 Alilikpowo dza tsi bababa.

Dzi ɖe gbe tso alilikpowo me,

Eye wò aŋutrɔwo le ʋɔ lũm le goawo katã me.

18 Wò dziɖegbe ɖina abe tasiaɖamwo ƒe hoowɔwɔ ene;

Dzikedzowo klẽ ɖe anyigba la dzi;

Anyigba dzo kpekpekpe, eye wòʋuʋu.

19 Wò mɔ to atsiaƒu me,

Wò toƒe to tɔ geɖewo me;

Ke hã, womedzea si wò afɔteƒewo o.

20 Èkplɔ wò dukɔ la abe alẽha ene,

Le Mose kple Aron ƒe kpɔkplɔ te.

PSALMOWO 78
1  Nye dukɔ, miɖo to miase nye se la;

Miƒu to anyi ɖe nye numenyawo ŋu.

 2 Make nu aƒo nu le lododowo me.

Mato gbe aɖe gbe ƒe adzowo na mi.

 3 Nu siwo míese henya,

Nu siwo mía fofowo tsɔ tu xo na mí la,

 4 Míaɣlae ɖe wo megbeviwo o,

Míatoe na dzidzime si gbɔna,

Míagblɔ Afetɔ ƒe kafukafu kple eƒe ŋusẽdɔwo,

Míagblɔ nukunu siwo wòwɔ la.

 5 Eɖo ŋkuɖodzinu anyi na Yakob viwo,

Eye wòtsɔ se na Israel;

Eɖoe na mía tɔgbuiwo be

Woafia nu siawo wo viwo,

 6 Ne dzidzime si gbɔna,

Vi siwo woava dzi la, nanya wo.

Ne woawo hã nagblɔe na wo viwo.

 7 Ekema woaɖo dzi ɖe Mawu ŋu.

Womaŋlɔ Mawu ƒe dɔwɔwɔwo be o

Ke boŋ woalé eƒe sededewo me ɖe asi.

 8 Ekema womato wo tɔgbuiwo ƒe ʋe me o,

Ame siwo nye dzidzime sẽto dzeaglã,

Dzidzime si ƒe dzi meli ke o,

Eye woƒe gbɔgbɔ meku ɖe Mawu ŋu nuteƒewɔwɔtɔe o.

 9 Togbɔ be Efrayim viwo tsɔ aŋutrɔwo bla aʋakpae hã la,

Wosi le aʋakpegbe.

10 Womelé Mawu ƒe nubabla la me ɖe asi o,

Eye womezɔ ɖe eƒe se la nu o.

11 Woŋlɔ nu siwo wòwɔ hã be,

Woŋlɔ nu dzɔtsu siwo teƒe wòna wokpɔ la be.

12 Ewɔ nu wɔnukuwo le wo tɔgbuiwo ŋkume,

Le Egipte-nyigba dzi, le Zoan nuto la me.

13 Ema atsiaƒu la me, be wòana woatsoe,

Eye wòna tsiawo tɔ ɖi abe gli ene.

14 Etsɔ alilikpo kplɔ wo le ŋkeke me,

Kple dzo keklẽ le zã blibo la me.

15 Efe agakpewo me le gbea dzi,

Eye wòna tsi wo wòsɔ gbɔ abe tɔ goglo me tsi ene wono wòɖi kɔ na wo.

16 Ena tsi do tso agakpe me,

Eye wòna tsiawo si bababa abe tɔsisi ene.

17 Ke woyi edzi gawɔ nu vɔ̃ ɖe eŋu kokoko,

Esi wodze aglã ɖe Dziƒoʋĩtɔ la ŋu le gbedzi;

18 Woke ɖi Mawu le woƒe dziwo me,

Esi wobia nuɖuɖu si dzro wo vevie.

19 Ale woƒo nu tsi tre ɖe Mawu ŋu

Gblɔ be: “Ðe Mawu ate ŋu aɖo kplɔ̃ na mí le gbedzi afi sia?”

20 Kpɔ ɖa! Eƒo agakpe,

Ale be tsi do bababa eye tɔʋuwo ɖɔ gbagba.

Ke wobia be: “Ðe wòate ŋu ana abolo hã mí,

Alo ate ŋu ana lã eƒe dukɔ la wòaɖua?”

21 Esi Afetɔ see la, edo dɔmedzoe;

Ale dzo bi ɖe Yakob ŋu,

Eye eƒe dziku fla ɖe Israel ŋu

22 Elabena womexɔ Mawu dzi se o;

Eye womeka ɖe edzi be ate ŋu axɔ na yewo o.

23 Eya ta eɖe gbe na alilikpowo le dzi,

Eye wòʋu dziƒo ƒe ʋɔtruwo.

24 Ena mana dza na wo woɖu;

Ena nuɖuɖu si tso dziƒo la wo.

25 Amegbetɔwo ɖu ŋusẽtɔwo ƒe abolo;

Ena nuɖuɖu si aɖi ƒo na wo la wo.

26 Ena ɣedzeƒeya ƒo tso dziƒowo,

Eye wòtsɔ eƒe ŋusẽ kplɔ anyieheya vɛ.

27 Ena lã dza ɖe wo dzi abe ʋuʋudedi ene,

Xe dzodzoewo, abe ƒutake ene.

28 Ena wova dze ɖe eƒe asaɖa la me

Ƒo xlã eƒe agbadɔawo godoo va kpe.

29 Ale woɖui funyafunya ɖi ƒo nyuie;

Eye wòna nu si dzroa wo la wo.

30 Gake hafi woaɖi kɔ na woƒe dzodzro sesẽa bliboe,

Eye esi nuɖuɖua kpɔtɔ nɔ nu me na wo la,

31 Mawu ƒe dɔmedzoe bi ɖe wo ŋu.

Ewu woƒe ame sesẽwo;

Eye wòƒo Israel ɖekakpuiwo ƒu anyi.

32 Togbɔ be nu siawo katã dzɔ hã la, woganɔ nu vɔ̃ wɔm ɖe edzi,

Eye womexɔ eƒe nukudɔwo dzi se o.

33 Eya ta ena woƒe agbemeŋkekewo nu yi abe ya si wogbɔ ene,

Eye woƒe ƒewo wu nu le ŋɔdzi me.

34 Ke ne ewu amewo le wo dome ko la, wodiaa eyome mɔ;

Eye wotrɔna hedia Mawu.

35 Woɖoa ŋku edzi be Mawue nye yewoƒe Agakpe,

Be Mawu Dziƒoʋĩtɔ lae nye yewoƒe Xɔnametɔ.

36 Gake wote kpɔ be yewoavivi nu me nɛ,

Be yewoatsɔ yewoƒe aɖe ada alakpa nɛ.

37 Woƒe dzi meku ɖe eŋu bliboe o;

Eye womewɔ eƒe nubabla la dzi nuteƒewɔwɔtɔe o.

38 Gake ekpɔ nublanui na wo;

Etsɔa woƒe vodada kea wo, eye metsrɔ̃a wo keŋkeŋ o.

Eɖoa asi eƒe dziku dzi zi geɖe,

Eye metrɔa eƒe dɔmedzoe katã kɔna ɖi o.

39 Elabena eɖoa ŋui be ŋutilãe wonye,

Be ya si ƒona yina, eye megatrɔna gbɔna o la koe wonye.

40 Zi nenie womehedze aglã ɖe eŋu le gbea dzi,

Eye womedo dziku nɛ le gbedadaƒo o!

41 Wote Mawu kpɔ enuenu,

Eye wodo nuxaxa na Israel ƒe Kɔkɔetɔ la.

42 Womeɖo ŋku eƒe ŋusẽ dzi o,

Le gbe si gbe wòɖe wo tso ketɔ la si me,

43 Ale si wòwɔ dzesiwo le Egipte,

Kple nukunuwo le Zoan nuto la me,

44 Ale si wòtrɔ Nil-tɔʋuwo wozu ʋu

Ale be womegate ŋu no woƒe tɔsisiwo me tsiwo o.

45 Eɖo togbatowo ƒe ha gã aɖe ɖe wo ŋu ne woaɖu wo

Kple akpɔkplɔwo hã ne woagblẽ nu le wo ŋu.

46 Etsɔ woƒe nukuwo na ʋetsuvi gblẽnuwo,

Etsɔ agblemenu siwo ŋu wokpe fu ɖo la de asi na ʋetsuviwo.

47 Etsɔ kpetsi tsrɔ̃ woƒe wainkawo,

Tsikpe gãwo tsrɔ̃ woƒe gbotiwo.

48 Etsɔ woƒe lãwo de asi na kpetsi,

Kple woƒe lãhawo na dzikedzo.

49 Ena eƒe dɔmedzoe bi ɖe wo ŋu,

Ena eƒe dziku helĩhelĩ, dɔmedzoe kple xaxa va wo dzi,

Edɔ mawudɔlawo ƒe hatsotsowo ɖo ɖa be woahe vɔ̃ ava wo dzi.

50 Eɖe mɔ na eƒe dziku.

Meɖe wo tso ku me o;

Eye wòtsɔ wo de asi na dɔvɔ̃.

51 Mlɔeba ewu ŋgɔgbeviwo katã le Egipte,

Ame siwo nye woƒe vidziŋusẽ ƒe gɔmedzedze le Ham ƒe agbadɔwo me.

52 Emegbe ena eƒe dukɔ la ʋu dzo abe alẽha ene,

Eye wòkplɔ wo le gbea dzi abe lãhawo ene.

53 Ekplɔ wo dedie,

Eye naneke medo voɖi na wo o;

Ke atsiaƒu nyè tsyɔ woƒe futɔwo dzi.

54 Ekplɔ wo va eƒe nuto kɔkɔe la me,

Tonuto sia si wòtsɔ eƒe nuɖusi xɔ.

55 Enya dukɔwo ɖa le wo ŋgɔ;

Edzidze anyigba la hemae na wo wòzu woƒe domenyinu;

Eye wòna Israel-toawo nɔ woawo ŋutɔwo ƒe aƒewo me bɔkɔɔ.

56 Ke woyi edzi nɔ ɖi kem Mawu Dziƒoʋĩtɔ la, eye wodze aglã ɖe eŋu;

Womelé eƒe ŋkuɖodzinyawo me ɖe asi o.

57 Wotrɔ le eyome hã, eye wowɔ alakpanu abe wo tɔgbuiwo ke ene.

Wole abe dati doagblɔ si ŋu kakaɖedzi mele o la ene.

58 Wotsɔ woƒe nuxeƒewo do dziku nɛ,

Eye wotsɔ woƒe legbawo do dzivee nɛ.

59 Mawu see, eye dzi kui vevie,

Ale be wògbe Israel keŋkeŋ.

60 Mlɔeba egblẽ avɔgbadɔ si le Silo la ɖi,

Agbadɔ si me wònɔ le amegbetɔwo dome.

61 Ena wotsɔ nu si le tsitre ɖi na eƒe ŋusẽ la yi aboyo me;

Etsɔ eƒe atsyɔ̃ la de asi na ketɔ la.

62 Etsɔ eƒe dukɔ la de asi na yi,

Dzi kui vevie ɖe eƒe domenyinu la ŋu.

63 Dzo fiã eƒe ɖekakpuiwo,

Eye womedzi srɔ̃ɖeha na eƒe ɖetugbui leaƒewo o.

64 Eƒe nunɔlawo tsi yi nu,

Eye avi bu ɖe eƒe ahosiwo.

65 Ale Afetɔ nyɔ abe ale si wonyɔna tso alɔ̃ me ene,

Abe kalẽtɔ si wain kɔ le mo na ene.

66 Enya eƒe futɔwo ɖo ɖe megbe;

Eye wòdo ŋukpe mavɔ wo.

67 Egbe Yosef ƒe agbadɔ la;

Eye metia Efrayim-to la o.

68 Ke boŋ etia Yuda-to la,

Zion To si wòlɔ̃na.

69 Ena eƒe kɔkɔeƒe la li ke abe dziƒowo ene,

Abe anyigba si gɔme wòɖo anyi tegbee ene.

70 Etia eƒe subɔla David,

Eɖee le alẽkpowo me,

71 Alẽ vinɔwo yomee wòɖee le;

Be wòakplɔ eƒe dukɔ Yakob,

Kple eƒe domenyinu Israel.

72 Etsɔ dzi dzɔdzɔe kplɔ wo,

Eye wòkplɔ wò le aɖaŋu me.

PSALMOWO 79
1  Oo Mawu, dukɔwo va dze wò domenyinu la dzi;

Wogblẽ kɔ ɖo na wò gbedoxɔ kɔkɔe la;

Wona Yerusalem zu glikpo.

 2 Wotsɔ wò subɔlawo ƒe kukuawo na dziƒoxewo,

Kple ame siwo wɔa nuteƒe na wò la ƒe lã na gbemelãwo woɖu.

 3 Wokɔ woƒe ʋu ɖi abe tsi ene kpe Yerusalem ɖo,

Eye ame aɖeke mekpɔtɔ aɖi wo o.

 4 Míezu vlodonu na mía haviwo;

Fewuɖunu kple alɔmeɖenu na ame siwo ƒo xlã mí.

 5 Oo Afetɔ, ɣekaɣi dzi aku wò ase ɖo? Tegbeea?

Va se ɖe ɣekaɣi wò dɔmedzoe abi abe dzo ene?

 6 Trɔ wò dɔmedzoe la ƒo ɖe dukɔ siwo menya wò o la dzi,

Ðe fiaɖuƒe siwo meyɔa wò ŋkɔ o la dzi.

 7 Elabena wovuvu Yakob,

Eye wodo aƒedo wo denyigba la.

 8 Mègabu mía tɔgbuiwo ƒe vodada na mí o.

Netsɔ, nàkpɔ nublanui na mí,

Elabena wobɔbɔ mí ɖe anyi kura.

 9 Oo Mawu, míaƒe xɔnametɔ, kpe ɖe mía ŋu,

Le wò ŋkɔ gã la ta;

Ðe mí, eye nàtsɔ míaƒe nu vɔ̃wo ake mí le wò ŋkɔ la ta.

10 Nu ka ŋuti dukɔwo anɔ gbɔgblɔm be: “Afi kae woƒe Mawu la le?”

Na woanyae le dukɔwo dome, eye míawo hã míakpɔ eteƒe,

Be nèbia hlɔ̃ ɖe wò subɔlawo ƒe ʋu si wokɔ ɖe anyi la ta.

11 Gamenɔla ƒe hũɖeɖe nede gbɔwò.

Tsɔ wò ŋusẽ gã la xɔ na ame siwo wotso kufia na la.

12 Oo Afetɔ, ɖo vlo si mía haviwo do wò la teƒe na wo

Zi gbɔ zi adre.

13 Ke mí, wò dukɔ, wò alẽha si le wò lãnyiƒe la,

Míada akpe na wò ɖaa;

Eye míakafu wò tso dzidzime yi dzidzime.

PSALMOWO 80
1  Oo, Israel Kplɔla, ɖo to mí,

Wò, ame si le Yosef kplɔm abe alẽha ene.

Wò, ame si bɔbɔ nɔ kerubiwo dzi,

Klẽ.

 2 Ðe wò ŋusẽ fia,

Le Efrayim kple Benyamin kpakple Manase ŋkume;

Eye va xɔ na mí.

 3 Oo Mawu, gaɖo mí te;

Kɔ mo ɖe mí, ne míakpɔ ɖeɖe.

 4 Aʋakɔwo ƒe Afetɔ, ɣekaɣi wò dukɔ ƒe gbedodoɖa aku dzi na wò vevie ase ɖo?

 5 Èna aɖatsi zu abolo na wo,

Eye nèna aɖatsi zu nunono na wo kaka wòwu ko na wo.

 6 Èna ame siwo ƒo xlã mí le dzre wɔm le mía ta;

Eye míaƒe futɔwo ɖea alɔme le mía ŋu ale si dze wo ŋu.

 7 Oo, aʋakɔwo ƒe Mawu, gaɖo mí te;

Kɔ mo ɖe mí, ne míakpɔ ɖeɖe.

 8 Èho wainka tso Egipte.

Ènya dukɔwo ɖa, eye nètsɔe do.

 9 Èdzra eŋu ɖo,

Eye wòƒo ke ɖe to hevu xɔ anyigba la dzi.

10 Edo vɔvɔli ɖe towo dzi,

Eye wòɖe alɔ ɖe Mawu ƒe sedertiwo dzi.

11 Eƒe alɔwo de keke atsiaƒu nu ke,

Eye eƒe alɔ fẽwo de Tɔsisi la nu.

12 Nu ka tae nèmu glikpɔ le waingble la ŋu,

Ale be ame siwo katã tso eme va yina la nanɔ eƒe tsetsewo gbem?

13 Gbehawo va fanyanɛ,

Eye gbemelãwo va ɖunɛ.

14 Oo, aʋakɔwo ƒe Mawu, trɔ va dzro.

Bi kɔ tso dziƒo nàkpɔ nu!

Kpɔ wainka sia ta,

15 Takpoe si nètsɔ wò nuɖusi do,

Eye wò ŋku nanɔ vi si wò ŋutɔ nèli ke sesĩe la ŋu.

16 Wolãe, eye wotɔ dzoe.

Esi nèka mo na wo la, wotsrɔ̃ ɖa.

17 Wò asi nedo ŋusẽ ame si le wò ɖusime,

Amegbetɔvi si wò ŋutɔ nèli ke sesĩe la.

18 Ekema míate ɖa le ŋuwò o.

Xɔ mí ɖe agbe, ne míayɔ wò ŋkɔ la.

19 Oo aʋakɔwo ƒe Afetɔ, gaɖo mí te;

Kɔ mo ɖe mí, ne míakpɔ ɖeɖe.

PSALMOWO 81
1 Migli kple dzidzɔ ɖe Mawu, si nye míaƒe ŋusẽ la ŋu.

Mitso aseye ɖe Yakob ƒe Mawu la ŋu.

 2 Mido ha ɖa, eye miƒo axatsɛ,

Mina saŋku kple kasaŋku viviwo naɖi.

 3 Miku lãdzo le dzinu yeye dzi,

Mikui ne dzinua sɔ tegblẽe, le míaƒe ŋkekenyuiɖugbe.

 4 Elabena se wònye na Israel,

Yakob ƒe Mawu ƒe ɖoɖo wònye.

 5 Eɖoe anyi be wòanye ŋkuɖodzi na Yosef,

Esime wòho ɖe Egipte-nyigba ŋu.

Gbe si nyemenya o la ɖi mese be:

 6 “Meɖe agba ɖa le eƒe abɔta;

Eye meɖe eƒe asi ɖa le kusi la ŋu.

 7 Èyɔm le xaxa me, eye mexɔ na wò;

Metɔ na wò tso dziɖegbelilikpo me.

Medo wò kpɔ le Meriba tsi la gbɔ. (Sela)

 8 Nye dukɔ, see, ne maxlɔ̃ nu wò.

Oo Israel, ne àɖo tom ko.

 9 Mawu tutɔ aɖeke manɔ dowòme o,

Eye màde ta agu na dutamawu aɖeke o.

10 Nye, Afetɔ, ye nye wò Mawu,

Ame si kplɔ wò tso Egipte-nyigba dzi.

Ke wò nu baa, ne made nu eme na wò wòayɔ.

11 Gake nye dukɔ la meɖo tom o;

Eye Israel medi be yeabɔbɔ ye ɖokui nam o.

12 Ale meɖe asi le wo ŋu na woƒe dzimesesẽ;

Eye wowɔ nu si dze wo ŋu.

13 Oo, ne ɖe nye dukɔ aɖo tom ɖe,

Oo, ne ɖe Israel azɔ nye mɔwo dzi ɖe!

14 Anye ne mabɔbɔ woƒe futɔwo ɖe anyi kaba;

Anye ne matrɔ nye asi ɖe woƒe ketɔwo ŋu.

15 Ame siwo léa fu Afetɔ la anɔ dzodzom nyanyanya ava bɔbɔ ɖe eŋkume,

Eye woƒe tohehe anɔ anyi tegbee.

16 Ke miawo ya, atsɔ lu nyuitɔwo anyi mi,

Eye wòatsɔ kpetomenyitsi aɖi kɔ na mi.”

PSALMOWO 82
1 Mawu nɔ zi me na Mawu ƒe takpekpe la;

Edrɔ̃ ʋɔnu le mawuwo dome, be:

 2 “Ɣekaɣi mianɔ ʋɔnu madzɔmadzɔ drɔ̃m,

Eye mianɔ ame vɔ̃ɖiwo dzi dem ase ɖo? (Sela)

 3 Miʋli ame tsɛ kple tsyɔ̃evi ta.

Mitso afia dzɔdzɔe na wɔnamanɔŋutɔ kple ame si hiã tu la.

 4 Mixɔ na ame tsɛwo kple ame dahewo;

Miɖe wo tso ame vɔ̃ɖiwo si me.”

 5 Womenyaa nu o, eye womesea nu gɔme hã o;

Wole tsatsam le viviti me;

Anyigba ƒe agunuwo katã le ʋuʋum.

 6 “Megblɔ be, ‘mawuwo mienye,

Eye Dziƒoʋĩtɔ la ƒe viwo mi katã mienye.

 7 Ke hã miaku abe ale si ko amegbetɔwo kunae ene;

Eye miadze anyi abe amegã ɖe sia ɖe ko ene!’”

 8 Oo Mawu, tso, ne nàdrɔ̃ ʋɔnu anyigba la,

Elabena tɔwòe dukɔwo katã nye.

PSALMOWO 83
1 Oo Mawu, mègazi kpi o;

Oo Ŋusẽkatãtɔ, mègazi ɖoɖoe loo alo anɔ anyi kpoo o.

 2 Elabena kpɔ ɖa, wò futɔwo le nyanyram;

Ame siwo lé fu wò la le wo ɖokuiwo dom ɖe dzi.

 3 Wole tame vɔ̃ ɖom ɖe wò dukɔ la ŋu le aye me;

Wole nugbe ɖom ɖe ame siwo gbɔ mèlɔ̃a nu le o la ŋu.

 4 Wole gbɔgblɔm be: “Miva míatsrɔ̃ wo ɖa keŋkeŋ, ne woaganye dukɔ azɔ o,

Ne woagaɖo ŋku Israel ƒe ŋkɔ dzi azɔ o.”

 5 Wowɔ ɖeka ɖo nugbe;

Wobla ɖe ŋuwò,

 6 Edom ƒe agbadɔwo kple Ismaeltɔwo, Moabtɔwo kple Hagritɔwo,

 7 Gebal, Amon kple Amalek,

Filistia hekpe ɖe Tiro nɔlawo ŋu.

 8 Asiria hã wɔ ɖeka kpli wo;

Wodoa alɔ Lot viwo. (Sela)

 9 Wɔ wo abe ale si nèwɔ Midiantɔwo ene,

Abe ale si nèwɔ Sisera kple Yabin le Kison-tɔʋu la nu ene.

10 Wotsrɔ̃ gbidii le En-Dor;

Wozu aɖu na anyigba.

11 Wɔ woƒe bubumewo abe Oreb kple Zeeb ene

Kple woƒe amegãwo abe Zeba kple Zalmuna ene,

12 Elabena wogblɔ be: “Mina míaxɔ teƒe si Mawu le la wòazu mía tɔ.”

13 Oo nye Mawu, wɔ wo abe gbe ƒuƒu le ya nu ene,

Abe tsro si ya lɔ ɖe enu ene.

14 Ale si dzo bia avee,

Kple ale si dzoƒaɖe fiãa towoe la,

15 Tsɔ wò ahom sesẽ ti wo yome nenema,

Eye nàtsɔ wò ya ʋuduʋudu ado ŋɔdzi na wo.

16 De ŋukpe mo na wo,

Ne woadi wò ŋkɔ, Oo Afetɔ.

17 Ŋu nekpe wo, eye ŋɔdzi hã nelé wo tegbee;

Woƒe mo netsi dãa, eye wo nu neyi;

18 Na woadze sii be wò, ame si ŋkɔe nye Afetɔ la,

Wò ɖeɖe koe nye Dziƒoʋĩtɔ ɖe anyigba blibo la dzi.

PSALMOWO 84
1 Oo aʋakɔwo ƒe Afetɔ,

Aleke gbegbe wò avɔgbadɔ gã la nyo ŋunye ye nye esi!

 2 Afetɔ ƒe xɔxɔnuwo

Le nye ame bliboa dzrom vevie.

Ɛ̃, ele dzroyem ʋuu wòti kɔ nam.

Nye dzi kple nye ŋutilã le aseye tsom ɖe Mawu gbagbe la ŋu.

 3 Xevi gɔ̃ hã kpɔ nɔƒe le afi ma,

Eye sagbadre wɔ atɔ na eɖokui,

Afi si wònyia viawo le

Le wò vɔsamlekpui gã la gbɔ, Oo aʋakɔwo ƒe Afetɔ,

Nye Fia, kple nye Mawu!

 4 Dzidzɔtɔwoe nye ame siwo le aƒewò me!

Wole kafuwòm ɖaa. (Sela)

 5 Dzidzɔtɔwoe nye ame siwo ƒe ŋusẽ le mewò,

Ame siwo ƒe dzi le mɔ gã siwo yi aƒewò me la ŋu.

 6 Ne woto Baka Bali me la,

Wowɔnɛ wòzua tsidzɔƒe;

Eye kelemetsi tsɔa yayra ɖoa atsyɔ̃ nɛ.

 7 Wonɔa azɔli dzi eye woƒe ŋusẽ nɔa dzidzim ɖe edzi;

Wo dometɔ ɖe sia ɖe dona ɖe Mawu ŋkume le Zion.

 8 Oo aʋakɔwo ƒe Afetɔ, se nye gbedodoɖa;

Oo Yakob ƒe Mawu, see. (Sela)

 9 Mía Mawu kple míaƒe akpoxɔnu, kpɔ ɖa,

Kpɔ wò amesiamina la ƒe mo.

10 Elabena ŋkeke ɖeka le wò xɔxɔnu nyo wu ŋkeke akpe ɖeka le teƒe bubu!

Metiae be matɔ ɖe kpui nu le nye Mawu ƒe aƒe me,

Wu be manɔ ame vɔ̃ɖiwo ƒe agbadɔ me.

11 Elabena Afetɔ Mawu nye míaƒe ɣe kple míaƒe akpoxɔnu;

Amenuveve kple bubue wònana.

Afetɔ mate nu nyui aɖeke

Ame siwo fɔɖiɖi mele woƒe zɔzɔme ŋu o.

12 Oo aʋakɔwo ƒe Afetɔ,

Dzidzɔtɔe nye ame si ɖoa ŋu ɖe ŋuwò.

PSALMOWO 85
1 Oo Afetɔ, ève wò anyigba la nu;

Èkplɔ Yakob ƒe ame siwo woɖe aboyoe la gbɔe.

 2 Ètsɔ wò dukɔ la ƒe vodada ke;

Ètsɔ woƒe nu vɔ̃wo katã ke wo. (Sela)

 3 Èlé wò dɔmedzoe katã nu;

Èɖo asi wò dziku helĩhelĩ la dzi.

 4 Oo Mawu, míaƒe xɔnametɔ, gaɖo mí te,

Eye mègana míaƒe nu naku dzi na wò o.

 5 Ðe dzi aku wò ɖe mía ŋu tegbeea?

Ðe nàlé wò dziku ɖi tso dzidzime yi dzidzimea?

 6 Ðe màgagbɔ agbe mí

Ne wò dukɔ la nakpɔ dzidzɔ ɖe ŋuwò oa?

 7 Oo Afetɔ, ve mía nu,

Eye nàxɔ na mí.

 8 Maɖo to ase nya si gblɔ ge Mawu vavã Afetɔ le,

Elabena agblɔ ŋutifafanya na eƒe dukɔ, na ame siwo wɔa nuteƒe nɛ la;

Ðeko womegatrɔ zu ame siwo kana ɖe wo ɖokuiwo dzi akpa o.

 9 Nyateƒee, eƒe xɔname tsɔ ɖe ame siwo vɔ̃nɛ la gbɔ,

Ne eƒe ŋutikɔkɔe nanɔ míaƒe anyigba la dzi.

10 Amenuveve kple nuteƒewɔwɔ ado go wo nɔewo;

Dzɔdzɔenyenye kple ŋutifafa agbugbɔ nu na wo nɔewo.

11 Nuteƒewɔwɔ amie tso anyigba me,

Eye dzɔdzɔenyenye ado mo ɖa tso dziƒowo.

12 Ɛ̃, Afetɔ ana nu nyuiwo mí,

Eye míaƒe anyigba awɔ nu.

13 Dzɔdzɔenyenye adze eŋgɔ,

Eye wòata mɔ na eƒe afɔtoƒewo.

PSALMOWO 86
1 Oo Afetɔ, ƒu to anyi ne nàtɔ nam,

Elabena mele fu kpem, eye hiã tum.

 2 Kpɔ nye agbe ta, elabena nuteƒewɔla menye.

Ðe wò subɔla si ɖoa ŋu ɖe ŋuwò la,

Elabena wòe nye nye Mawu.

 3 Oo Afetɔ, ve nunye,

Elabena wò yɔm mele ŋkeke bliboa.

 4 Oo Afetɔ, do dzidzɔ na wò subɔla,

Elabena ŋuwòe metrɔ ɖo.

 5 Oo Afetɔ, wò dɔme nyo, eye nèlɔ̃a tsɔtsɔke;

Amenuveve bɔ ɖe asiwò na ame siwo katã yɔa wò la.

 6 Oo Afetɔ, se nye gbedodoɖa;

Eye nàlé to ɖe nye kokoƒoƒo be nàkpe ɖe ŋunye la ŋu.

 7 Mayɔ wò le nye xaxagbe,

Elabena àtɔ nam.

 8 Oo Afetɔ, mawu aɖeke mede nuwò o,

Eye dɔ aɖeke hã mede wò dɔwɔwɔwo nu o.

 9 Dukɔ siwo katã nèwɔ la,

Oo Afetɔ, woava de ta agu ɖe ŋkuwòme,

Eye woado wò ŋkɔ la ɖe dzi.

10 Elabena èlolo, eye nèwɔa nukunuwo;

Wò ɖeɖe koe nye Mawu.

11 Oo Afetɔ, fia wò mɔm.

Mazɔ le wò nyateƒe la me.

Tsɔ nye dzi ɖo nu ɖeka kolia ŋu, ne mavɔ̃ wò ŋkɔ.

12 Oo Afetɔ, nye Mawu, mele kafuwòm tso dzi blibo me,

Eye mado wò ŋkɔ la ɖe dzi ɖaa.

13 Elabena ève nunye geɖe,

Eye nèɖe nye agbe tso Tsiẽƒe ʋĩi ke.

14 Oo Mawu, dadalawo tso ɖe ŋunye;

Ŋutasẽlawo ƒe ha le mɔnu dim be yewoaɖe nye agbe ɖa,

Eye womebu wò ɖe ɖeke me o.

15 Ke wò la, Oo Afetɔ, Mawu nublanuikpɔla kple veveseɖeamenula nènye,

Mèdoa dziku kabakaba o, eye wò lɔlɔ̃ si nu metsina o kple wò nuteƒewɔwɔ sɔ gbɔ.

16 Trɔ ɖe ŋunye, eye nàve nunye.

Do ŋusẽ wò subɔla,

Eye nàxɔ na wò dɔlanyɔnu ƒe vi la.

17 Ðe wò nyuiwɔwɔ ƒe dzesi fiam,

Ne nye futɔwo nakpɔe, eye ŋu nakpe wo.

Elabena Oo Afetɔ, wòe kpe ɖe ŋunye, eye nèfa akɔ nam.

PSALMOWO 87
1 Mawu ɖo eƒe du la gɔme anyi ɖe to kɔkɔewo dzi.

 2 Afetɔ lɔ̃a Zion ƒe agbowo

Wu Yakob ƒe agbadɔwo katã.

 3 Oo, Mawu vavã la ƒe du, wole nu nyui geɖewo gblɔm tso ŋuwò. (Sela)

 4 Mabu Rahab kple Babilon ade ame siwo dze sim la dome;

Kpɔ ɖa, Filistia kple Tiro kpakple Kus hãe nye esi.

Woagblɔ le wo dometɔ ɖe sia ɖe ŋu be: “Afi mae wodzi ame sia le.”

 5 Eye woagblɔ le Zion ŋu be:

“Eya mee wodzi wo dometɔ ɖe sia ɖe ɖo.”

Dziƒoʋĩtɔ la ŋutɔ ali kee sesĩe.

 6 Ne Afetɔ le dukɔ la dem agbalẽ me la, agblɔ le wo ŋu be:

“Afi mae wodzi ame sia le.” (Sela)

 7 Hadzilawo kple ame siwo do to le ɣe ɖum la hã agblɔ be:

PSALMOWO 88
1 Oo Afetɔ, Mawu, nye xɔnametɔ,

Medo ɣli na wò le ŋkeke me,

Eye medo ɖe ŋkuwòme le zã me.

 2 Na nye gbedodoɖa neɖo gbɔwò,

Eye nàƒu to anyi ɖe nye kokoƒoƒo ŋu.

 3 Elabena nye luʋɔ kpɔ vɔ̃ geɖe teƒe,

Eye nye agbe gogo Tsiẽƒe.

 4 Wobum ɖe yɔmeyilawo dome;

Mezu ame si ŋu wɔna vɔ le,

 5 Wogblẽm ɖe kukuawo dome

Abe ame tsiaʋa siwo le yɔdo me ene,

Abe ame siwo dzi mègaɖo ŋkui o,

Siwo woɖe ɖa le wò dzikpɔkpɔ te la ene.

 6 Ètsɔm de do goglotɔ me,

Le viviti me, le aʋli gã aɖe me.

 7 Wò dziku nu sẽ ɖe dzinye,

Eye nètsɔ wò ƒutsotsoewo tem ɖe to. (Sela)

 8 Èna nye ame nyanyɛwo ka hlẽ le ŋunye;

Èna mele ŋu nyɔm na wo.

Mele ga me, eye dodo meli nam o.

 9 Nu te nye ŋkuwo ŋu le nye xaxawo ta.

Oo Afetɔ, meyɔa wò ŋkeke bliboa;

Meke nye abɔwo me na wò.

10 Ðe nàwɔ nukunuwo na ame siwo ku laa?

Kukuawo, ame siwo ŋu ŋusẽ aɖeke megale o lae afɔ akafu wòa? (Sela)

11 Ðe woaɖe gbeƒã wò amenuveve le yɔdo me,

Kple wò nuteƒewɔwɔ le tsɔtsrɔ̃ƒea?

12 Ðe woade dzesi wò nukudɔwo le viviti mea,

Alo wò dzɔdzɔenyenye le anyigba si dzi womeganyaa naneke le o la?

13 Oo Afetɔ, wòe mele ɣli dom na be nàxɔ nam,

Eye nye gbedodoɖawo le ŋkuwòme ŋdi sia ŋdi.

14 Oo Afetɔ, nu ka tae nègbem?

Nu ka tae nèɣla wò ŋkume ɖem?

15 Mele fu kpem tso nye ɖevime ke,

Eye meɖo kudo nu;

Wɔna vɔ le ŋunye le nu dziŋɔ siwo ŋu nèɖe mɔ le wodzɔ ɖe dzinye la ta.

16 Wò dɔmedzoe tsyɔ dzinye;

Wò ŋɔdzidodowo tsrɔ̃m.

17 Woƒo xlãm ŋkeke bliboa abe tsiɖɔɖɔ ene;

Wotso goawo katã me nyè tsyɔm.

18 Èɖe xɔ̃nyewo kple zɔhɛnyewo ɖa le ŋunye yi adzɔge ʋĩi;

Azɔ vivitie zu xɔ̃nye.

PSALMOWO 89
1 Madzi ha le Afetɔ ƒe lɔlɔ̃ si nu metsina o la ŋu ɖaa.

Make nu agblɔ wò nuteƒewɔwɔ ŋu nya na dzidzimeawo katã.

 2 Elabena megblɔ be: “Àɖo wò lɔlɔ̃ si nu metsina o la anyi tegbee,

Eye nèli ke wò nuteƒewɔwɔ ɖe dziƒowo sesĩe.”

 3 “Mebla nu kple nye ame tiatia la;

Meka atam na nye subɔla David be:

 4 ‘Mali ke wò dzidzimevi tegbee,

Eye maɖo wò fiazikpui anyi tso dzidzime yi dzidzime.’” (Sela)

 5 Oo Afetɔ, dziƒowo akafu wò nukudɔwo,

Ɛ̃, woakafu wò nuteƒewɔwɔ le ame kɔkɔewo ƒe ha me.

 6 Elabena ame kae le dziƒo si woatsɔ asɔ kple Afetɔ?

Ame kae le abe Afetɔ ene le Mawu viwo dome?

 7 Wode bubu gã Mawu ŋu le ame kɔkɔewo ƒe adaŋudeha la me;

Elolo eye ŋɔdzi le eŋu ŋutɔ na ame siwo katã ƒo xlãe.

 8 Oo aʋakɔwo ƒe Afetɔ,

Ame kae sesẽ de nuwò, Oo Yah?

Wò nuteƒewɔwɔ ƒo xlã wò godoo.

 9 Wòe ɖu atsiaƒu ƒe agbodzedze dzi;

Ne eƒe tsotsoewo de dzi la, wòe nana wòdzea akɔ anyi.

10 Wòe gbã Rahab gudugudu abe ame si wowu ene.

Ètsɔ wò alɔ sesẽ la ka wò futɔwo hlẽ.

11 Tɔwòe nye dziƒowo, tɔwòe nye anyigba hã;

Anyigba wɔnu la kple edzinuwo katã la, wòe ɖo wo anyi.

12 Wòe wɔ dziehe kple anyiehe;

Tabor To kple Hermon To kafua wò ŋkɔ kple dzidzɔ.

13 Tɔwòe nye alɔ sesẽ;

Ŋusẽ le wò asi ŋu;

Wò nuɖusi de dzi.

14 Èli wò fiazikpui anyi ɖe dzɔdzɔenyenye kple ʋɔnu dzɔdzɔe dɔdrɔ̃ dzi;

Amenuveve kple nuteƒewɔwɔ nɔa ŋkuwòme.

15 Dzidzɔtɔwoe nye dukɔ si nya aseyetsotso.

Oo Afetɔ, wozɔna le wò mo ƒe kekeli me.

16 Wotsoa aseye le wò ŋkɔ me ŋkeke blibo la,

Eye wodoa wo ɖe dzi le wò dzɔdzɔenyenye me.

17 Elabena wòe nye woƒe ŋusẽ ƒe atsyɔ̃,

Eye wò ŋudzedzekpɔkpɔ ɖe mía ŋu na míaƒe ŋusẽ de dzi.

18 Elabena míaƒe akpoxɔnu la nye Afetɔ tɔ,

Míaƒe fia la nye Israel ƒe Kɔkɔetɔ la tɔ.

19 Ɣemaɣi la, èƒo nu na ame siwo wɔa nuteƒe na wò la le ŋutega me gblɔ be:

“Mena ŋusẽ kalẽtɔ aɖe;

Medo ame tiatia aɖe ɖe dzi le dukɔ la dome.

20 Mekpɔ nye subɔla David;

Mesi nye ami kɔkɔe nɛ.

21 Nye asi alée ɖe te,

Eye nye alɔ ado ŋusẽe.

22 Futɔ aɖeke maka adzɔ nɛ o,

Eye ame madzɔmadzɔ aɖeke matee ɖe to o.

23 Mato eƒe adikãtɔwo nyanyanya le eŋgɔ,

Eye maƒo ame siwo lé fui la aƒu anyi.

24 Nye nuteƒewɔwɔ kple amenuveve anɔ kplii,

Eye eƒe ŋusẽ ade dzi le nye ŋkɔ me.

25 Mana eƒe asi nade atsiaƒu dzi,

Eye eƒe nuɖusi nade tɔsisiwo dzi.

26 Agblɔ nam be: “Fofonye nènye,

Nye Mawu kple nye xɔname ƒe Agakpe.’

27 Eye mana wòazu ŋgɔgbevi,

Ne wòakpɔ ŋusẽ ɖe anyigbadzifiawo dzi.

28 Nye amenuveve anɔ kplii tegbee,

Eye nye nu, si mebla kplii anɔ anyi ɖaa.

29 Maɖo eƒe dzidzimevi la anyi tegbee,

Eye eƒe fiazikpui anɔ anyi ŋkeke ale si dziƒo li.

30 Ne viawo gblẽ nye se la ɖi,

Eye womezɔ le nye sewo nu o,

31 Ne woda nye ɖoɖowo dzi,

Eye womelé nye sededewo me ɖe asi o la,

32 Ekema nye hã matsɔ ameƒoti ɖe wo ŋu le woƒe tomaɖomaɖo ta,

Eye maƒo wo ɖe woƒe vodadawo ta.

33 Ke hã, nye amenuveve mate ɖa le egbɔ akpɔ o,

Eye nyemada le nye ŋugbedodo la dzi o.

34 Nyemada le nye nubabla la dzi o,

Eye nyematrɔ nya si do tso nye nu me la o.

35 Meka atam le nye kɔkɔenyenye me zi ɖeka ɖe ɣeyiɣiawo katã nu,

Nyemable David o.

36 Eƒe dzidzimevi anɔ anyi tegbee;

Eye eƒe fiazikpui anɔ anyi ɖaa abe ɣe ene le ŋkunyeme.

37 Ali ke abe dzinu ene tegbee,

Abe ɖasefo nyateƒetɔ si le dziŋgɔli me ene.” (Sela)

38 Ke wò la, ègbee, eye nègbe nu le egbɔ;

Èdo dziku ɖe wò amesiamina la ŋu.

39 Ètu afɔ nu, si nèbla kple wò subɔla la me;

Ègblẽ kɔ ɖo na eƒe fiakuku la esi nètsɔe ƒu gbe ɖe anyigba.

40 Ègbã eƒe glikpɔwo katã;

Èmu eƒe mɔ́ sesẽwo ƒu anyi.

41 Ame siwo katã tso eme va yina la ha eƒe nuwo;

Ezu alɔmeɖenu na eƒe aƒelikawo.

42 Èna eƒe adikãtɔwo kpɔ dziɖuɖu;

Èna eƒe futɔwo katã tso aseye.

43 Èna eƒe yi nu tsi,

Eye mèna wònɔ te ɖe aʋa nu o.

44 Èna eƒe atsyɔ̃ nu yi,

Eye nèxlã eƒe fiazikpui ɖe anyi.

45 Èɖe eƒe ɖekakpuimeŋkekewo dzi kpɔtɔ;

Ètsɔ ŋukpe tsyɔ nɛ. (Sela)

46 Oo Afetɔ, va se ɖe ɣekaɣi nàɣla ɖokuiwò? Tegbeea?

Ðe wò dɔmedzoe ayi edzi anɔ bibim abe dzo enea?

47 Ðo ŋu ale si gbegbe nye agbe le kpuie!

Dzodzroe nèwɔ amegbetɔwoa?

48 Ame kae ate ŋu ayi edzi anɔ agbe eye maku akpɔ o?

Ðe eya ŋutɔ ate ŋu aɖe eɖokui tso Tsiẽƒe si mea? (Sela)

49 Oo Afetɔ, afi kae wò amenuvedɔ tsãtɔ

Siwo ŋu nèka atam le na David le wò nuteƒewɔwɔ me la le?

50 Oo Afetɔ, ɖo ŋu vlo si wodo wò subɔlawo;

Ale si metsɔ dukɔ geɖewo ƒe vlodoame ɖe akɔ;

51 Oo Afetɔ, ale si wò futɔwo le alɔme ɖem;

Ale si woɖu fewu le wò amesiamina ƒe afɔɖeɖewo katã ŋu.

52 Woakafu Afetɔ tegbee. Amen, ɛ̃, Amen.

PSALMOWO 90
1 Oo Afetɔ, wòe nye míaƒe nɔƒe le dzidzimewo katã me.

 2 Hafi towo nava dzɔ,

Alo hafi nàwɔ xexea kple anyigbaa la,

Wòe nye Mawu tso mavɔ me yi mavɔ me.

 3 Ènana amegbetɔ gatrɔna zua kewɔ;

Eye nègblɔna be: “Mi amegbetɔviwo, migbugbɔ yi ke me.”

 4 Elabena ƒe akpe ɖeka le ŋkuwòme abe etsɔ si va yi ko ene,

Abe zã ƒe ŋudzɔɣi ɖeka ko ene.

 5 Èkplɔ wo ƒu gbe; wo nu yi abe alɔ̃dɔdɔ dzro ko ene;

Wole abe gbe fẽ ene le ŋdi.

 6 Ŋdi la, eƒoa se eye wòwɔa yeyee;

Kaka fiẽ naɖo la, eyrɔna heƒuna.

 7 Elabena wò dziku na mía nu yi,

Eye wò dɔmedzoe na ŋɔdzi lé mí.

 8 Ètsɔ míaƒe vodadawo ɖo ŋkuwòme,

Wò mo ƒe kekeli na nu siwo míewɔ le ɣaɣlaƒe la dze go.

 9 Míaƒe ŋkekewo dzi ɖe kpɔtɔ kura le wò dziku helĩhelĩ la ta;

Míaƒe agbenɔƒewo nu va yi abe dalĩdodo ko ene.

10 Míaƒe agbenɔƒewo nye ƒe blaadre,

Alo ƒe blaenyi, ne ŋusẽ tɔxɛ le ame ŋue nye ema.

Ke wo yɔ fũu kple fukpekpe kple nuxaxa;

Wo nu va yina kaba, eye míebuna.

11 Ame kae ate ŋu anya ale si gbegbe wò dziku nu sẽe?

Wò dɔmedzoe nu sẽ, abe vɔvɔ̃ si nèdze na la ke ene.

12 Fia ale si míaxlẽ míaƒe ŋkekewoe la mí,

Ne dzi nyanu nasu mía si.

13 Oo Afetɔ, ɣekaɣi gɔ̃ nàgatrɔ ɖe mía ŋu?

Na wò dɔme natrɔ ɖe wò subɔlawo ŋu.

14 Tsɔ wò lɔlɔ̃ si nu metsina o la ɖi ƒoe na mí le ŋdi,

Ne míagli kple dzidzɔ ahatso aseye le míaƒe agbemeŋkekewo katã me.

15 Do dzidzɔ na mí ɖe ŋkeke siwo nètu nu kpli mí la nu,

Ðe ƒe siwo me míeto xaxa me la nu.

16 Na wò subɔlawo nakpɔ wò dɔwɔwɔwo,

Eye na wo viwo nakpɔ wò atsyɔ̃.

17 Afetɔ mía Mawu ƒe amenuveve nenɔ kpli mí,

Na míaƒe asinudɔwɔwɔwo nadze edzi na mí.

Ɛ̃, na míaƒe asinudɔwɔwɔ nadze edzi nyuie.

PSALMOWO 91
1 Ame sia ame si le Dziƒoʋĩtɔ la ƒe bebeƒe la,

Akpɔ nɔƒe le Ŋusẽkatãtɔ la ƒe vɔvɔli te.

 2 Magblɔ na Afetɔ be: “Nye sitsoƒe kple nye mɔ́ sesẽ nènye,

Nye Mawu si ŋu meɖoa ŋu ɖo.”

 3 Elabena aɖe wò tso xevimɔ̃trela ƒe adoboli me,

Tso dɔvɔ̃ si gblẽa nu la me.

 4 Atsɔ eƒe fuwo atsyɔ dziwò,

Eye àkpɔ sitsoƒe le eƒe aʋalawo te.

Eƒe nuteƒewɔwɔ anye akpoxɔnu gã kple gli sesẽ na wò.

 5 Màvɔ̃ ŋɔdzinu aɖeke le zã me,

Alo aŋutrɔ si le ʋɔ lũm le ŋkeke me,

 6 Alo dɔvɔ̃ si le yiyim le blukɔ me,

Alo tsɔtsrɔ̃ si le nu gblẽm le ŋdɔ me la o.

 7 Akpe adze anyi ɖe axawò,

Eye akpe ewo ɖe wò ɖusime,

Ke wò la, magogo wò o.

 8 Ðeko nàkpɔe kple wò ŋkuwo,

Àkpɔ ale si woahe to na ame vɔ̃ɖiwoe.

 9 Elabena ègblɔ be: “Afetɔe nye nye sitsoƒe,”

Ètsɔ Dziƒoʋĩtɔ la wɔ nɔwòƒe;

10 Vɔ̃ aɖeke mava dziwò o,

Eye dɔvɔ̃ aɖeke hã magogo wò agbadɔ o.

11 Elabena ade se na eƒe dɔlawo le ŋutiwò,

Ne woadzɔ ŋuwò le wò mɔwo katã dzi.

12 Woaxe wò kple woƒe asiwo,

Be nàgatsɔ wò afɔ axlã ɖe kpe o.

13 Àɖo afɔ dzata kple ƒli dzi;

Ànya avuzi le dzatatsui kple da vɔ̃ɖi dzi.

14 Mawu gblɔ be: “Esi melɔ̃a nu le gbɔnye o ta la, nye hã maɖee.

Makpɔ eta, elabena enya nye ŋkɔ.

15 Ayɔm, eye matɔ nɛ.

Manɔ kplii le xaxa me.

Maɖee, eye made bubu eŋu.

16 Matsɔ agbe didi aɖi ƒo nɛ,

Eye mana wòakpɔ nye xɔxɔdɔwo.”

PSALMOWO 92
1 Enyo be woada akpe na wò, Afetɔ,

Eye woadzi ha akafu wò ŋkɔ, Oo Dziƒoʋĩtɔ la,

 2 Ne woaɖe gbeƒã wò lɔlɔ̃ si nu metsina o la le ŋdi,

Kple wò nuteƒewɔwɔ le zã me,

 3 Le kasaŋku kaewotɔ kple kasaŋku suetɔ dzi,

Le saŋku viviwo ƒe ɖiɖi dzi.

 4 Elabena Oo Afetɔ, ètsɔ wò dɔwɔwɔwo do dzidzɔ nam;

Metsoa aseye le wò asinudɔwɔwɔwo ta.

 5 Oo Afetɔ, wò dɔwɔwɔwo lolo loo!

Aleke gbegbe wò susuwo gogloe nye esi!

 6 Abunetɔ aɖeke mate ŋu akpɔ wo adze sii o;

Eye bometsila aɖeke mate ŋu ase esia gɔme o:

 7 Ne ame vɔ̃ɖiwo mie abe gbe ene,

Eye nu vlo wɔlawo katã le se ƒom hã la,

Tsɔtsrɔ̃ ge ko woala ɖikaa.

 8 Ke wò la, Oo Afetɔ, woado wò ɖe dzi tegbee.

 9 Nyateƒee, Oo Afetɔ, kpɔ ale si nèɖu wò futɔwo dzii ɖa,

Ɛ̃, kpɔ ale si wò futɔwo nu ayii ɖa;

Nu vɔ̃ɖi wɔlawo katã aka hlẽ.

10 Ke àdo nye ŋusẽ ɖe dzi abe gbenyi tɔ ene;

Eye masi ami nyuitɔ.

11 Nye ŋku atsa le nye ketɔwo dzi godoo aʋadziɖutɔe;

Nye towo ase nu vlo wɔla siwo tso ɖe ŋunye la ƒe anyidzedze ŋu nya.

12 Ke ame dzɔdzɔe awɔ mlɔmlɔmlɔ abe deti ene

Eye wòakɔ abe sederti le Lebanon ene.

13 Wodo wo ɖe Afetɔ ƒe aƒe la me;

Eye wowɔ mlɔmlɔmlɔ le mía Mawu ƒe xɔxɔnuwo.

14 Woayi edzi anɔ ku tsem le woƒe tsitsime gɔ̃ hã;

Ŋusẽ anɔ wo ŋu, eye woada ama,

15 Eye woaɖe gbeƒãe be Afetɔ le dzɔdzɔe.

Eyae nye nye Agakpe, eye nu madzɔmadzɔ aɖeke mele eme o.

PSALMOWO 93
1 Afetɔ zu Fia!

Eta gãnyenye;

Ɛ̃, Afetɔ ta ŋusẽ;

Etsɔe bla ali dzi goŋgoŋ.

Eli ke anyigba la sesĩe,

Maʋã akpɔ o.

 2 Wò fiazikpui li ke sesĩe tso gbe aɖe gbe ʋĩi ke;

Èli tso mavɔ me yi mavɔ me.

 3 Oo Afetɔ, tɔsisiwo ɖɔ,

Tɔwo ɖɔ hedze agbo;

Tɔwo ɖɔ hele nyanyram.

 4 Afetɔ ƒe gãnyenye de dzi bobobo,

Ede dzi wu tsi geɖewo ƒe hoowɔwɔ,

Ede dzi boo wu ƒutsotsoewo ƒe agbodzedze.

 5 Wò ŋkuɖodzinyawo le eteƒe tututu.

Oo Afetɔ, kɔkɔenyenye dze wò aƒe la ɣeawokatãɣi.

PSALMOWO 94
1 Oo Afetɔ, Mawu hlɔ̃biala,

Oo Mawu hlɔ̃biala, klẽ!

 2 Oo, anyigba ƒe Ʋɔnudrɔ̃la, tso!

Nàtsɔ nu si dze na dadalawo la ɖo eteƒe na wo.

 3 Oo Afetɔ, va se ɖe ɣekaɣi ame vɔ̃ɖiwo,

Ɛ̃, ɣekaɣi ame vɔ̃ɖiwo anɔ aseye tsom ase ɖo?

 4 Dadanyawo dona le wo nu gbẽgbẽgbẽ;

Ame vɔ̃ɖiwo katã le adegbe ƒom.

 5 Oo Afetɔ, wole wò dukɔ la gbãm nyanyanya,

Eye wole wò domenyinu la tem ɖe to.

 6 Wowua ahosiwo kple amedzroviwo,

Eye wowua tsyɔ̃eviwo.

 7 Wogblɔna be: “Yah mele ekpɔm o;

Yakob ƒe Mawu la menya esia o.”

 8 Mi movitɔwo, mise nu gɔme;

Mi bometsilawo, ɣekaɣie miadze nunya?

 9 Eya, ame si wɔ to la, ɖe mase nu oa?

Eya, ame si wɔ ŋku la, ɖe makpɔ nu oa?

10 Eya, ame si ɖɔa dukɔwo ɖo la, ɖe maka mo na ame oa?

Eyae fiaa nunya ame!

11 Afetɔ nya amegbetɔwo ƒe susuwo,

Be ƒuƒu ko wonye.

12 Oo Yah, dzidzɔtɔe nye ame si nèɖɔna ɖo,

Ame si nètsɔa wò se la fiaa nui.

13 Ne nàna wòakpɔ gbɔdzɔe le xaxaɣi,

Va se ɖe esime woaɖe yɔdo na ame vɔ̃ɖiwo.

14 Elabena Afetɔ magbe eƒe dukɔ la o,

Eye magblẽ eya ŋutɔ ƒe domenyinu la ɖi o.

15 Elabena woagaɖo ʋɔnu dzɔdzɔe dɔdrɔ̃ anyi ake,

Eye ame siwo katã ƒe dzi le dzɔdzɔe la azɔ ɖe enu.

16 Ame kae atso ɖe ame vɔ̃ɖiwo ŋu nam?

Ame kae atsi tre ɖe nu vlo wɔlawo ŋu ɖe nunye?

17 Ne menye Afetɔ ye kpe ɖe ŋunye o la,

Anye ne meku xoxoxo.

18 Ne mebe, “Nye afɔ le ɖiɖim” la,

Oo Afetɔ, wò lɔlɔ̃ si nu metsina o la léam ɖe te.

19 Ne metsi dzodzodzoe akpa la,

Èfaa akɔ nam henana mekpɔa gbɔdzɔe.

20 Ðe dziɖula madzɔmadzɔ awɔ ɖeka kpli wò,

Esi wòle se zãm tsɔ le fu wɔm amea?

21 Wodzea ame dzɔdzɔe dzi kutɔkutɔe,

Eye wotsoa kufia na ame maɖifɔ.

22 Ke Afetɔ azu nye mɔ́ sesẽ,

Nye Mawu azu nye sitsoƒe ƒe agakpe.

23 Ana woƒe nu vɔ̃ɖi wɔwɔwo natrɔ ava woawo ŋutɔwo dzi.

Eye wòana woawo ŋutɔwo ƒe vɔɖivɔ̃ɖi nana wo nu nayi.

Afetɔ mía Mawu la ana wo nu nayi.

PSALMOWO 95
1 Miva, mina míagli kple dzidzɔ ɖe Afetɔ ŋu!

Mina míatso aseye ɖe míaƒe xɔname ƒe Agakpe la ŋu.

 2 Mina míatsɔ akpedada ado ɖe eŋkume;

Mina míadzi ha atso aseye ɖe eŋu.

 3 Elabena Mawu gãe Afetɔ nye,

Fia gã wònye ɖe mawuwo katã dzi.

 4 Eya si mee anyigba ƒe gogloeƒewo le;

Etɔe to kɔkɔwo nye.

 5 Etɔe atsiaƒu la nye, elabena eyae wɔe,

Eye eya ŋutɔe tsɔ eƒe asiwo wɔ anyigba ƒuƒui la.

 6 Miva, mina míabɔbɔ ade ta agu;

Mina míadze klo ɖe Afetɔ mía Wɔla la ŋkume.

 7 Elabena eyae nye mía Mawu,

Míawo míenye dukɔ le eƒe lãnyiƒe,

Kple alẽwo le eƒe dzikpɔkpɔ te.

Egbe ne miese eƒe gbe la,

 8 Migasẽ dzi me abe le Meriba ene o,

Abe gbe ma gbe le Masa le gbea dzi ene o,

 9 Esime mia tɔgbuiwo dom kpɔ;

Wotem kpɔ, evɔ wokpɔ nye dɔwɔwɔwo teƒe hafi.

10 Ƒe blaene sɔŋ dzidzime ma ƒe nu nyɔ ŋu nam, eye megblɔ be:

“Dukɔ si ƒe dzi traa mɔ ɣesiaɣie wonye;

Eye womenya nye mɔwo o.”

11 Eya ta meka atam le nye dziku me be:

“Womayi ɖe nye dzudzɔ la me o.”

PSALMOWO 96
1 Midzi ha yeye na Afetɔ.

Anyigbawo katã, midzi ha na Afetɔ!

 2 Midzi ha na Afetɔ; mikafu eƒe ŋkɔ.

Miɖe gbeƒã eƒe xɔname ŋuti nya nyui la gbe sia gbe.

 3 Miɖe gbeƒã eƒe ŋutikɔkɔe le dukɔwo dome,

Kple eƒe nukudɔwɔwɔwo le dukɔwo katã dome.

 4 Afetɔ lolo, eye wòdze kafukafu ŋutɔ.

Vɔvɔ̃ le eŋu wu mawu bubuwo katã.

 5 Dukɔwo ƒe mawuwo katã nye mawu maɖinuwo,

Ke Afetɔe nye ame si wɔ dziƒowo.

 6 Gãnyenye kple atsyɔ̃ɖoɖo le eŋkume;

Ŋusẽ kple nyonyo le eƒe kɔkɔeƒe la.

 7 Mi dukɔwo ƒe ƒomeawo, mitsɔ nu si Afetɔ dze na la nɛ,

Mitsɔ nu si Afetɔ dze na la nɛ le eƒe ŋutikɔkɔe kple ŋusẽ la ta.

 8 Mitsɔ bubu si dze na Afetɔ ƒe ŋkɔ la nɛ;

Mitsɔ nunana ɖe asi miava eƒe xɔxɔnuwo.

 9 Mide ta agu ɖe Afetɔ ŋkume le atsyɔ̃ɖoɖo kɔkɔe me;

Anyigbawo katã, midzo nyanyanya le eŋkume!

10 Migblɔ le dukɔwo dome be: “Afetɔ zu Fia!

Anyigba la li ke sesĩe, maʋã akpɔ o.

Adrɔ̃ ʋɔnu dukɔwo ɖe eteƒe.”

11 Dziƒowo nekpɔ dzidzɔ, eye anyigba netso aseye;

Atsiaƒu kple emenuwo neɖe gbe;

12 Agble kple emenukuwo katã netso aseye.

Avemetiwo katã hã negli kple dzidzɔ le ɣeyiɣi ma ke me

13 Le Afetɔ ŋkume, elabena egbɔna,

Egbɔna ʋɔnu drɔ̃ ge anyigba la.

Adrɔ̃ ʋɔnu anyigbadzinɔlawo le dzɔdzɔenyenye me,

Kple dukɔwo le nuteƒewɔwɔ me.

PSALMOWO 97
1 Afetɔ zu Fia!

Anyigba netso aseye.

Ƒukpo geɖeawo nekpɔ dzidzɔ.

 2 Alilikpo kple blukɔ ƒo xlãe godoo;

Dzɔdzɔenyenye kple ʋɔnu dzɔdzɔe dɔdrɔ̃e nye eƒe fiazikpuia ƒe gɔmeɖoanyi.

 3 Dzo le bibim le eŋgɔ

Eye wòfiãa eƒe futɔwo katã le akpa sia akpa.

 4 Eƒe dzikedzowo klẽ ɖe xexea me;

Anyigba kpɔe, eye wòdzo kpekpekpe.

 5 Towo lólo abe anyixe ene le Afetɔ ŋgɔ,

Le anyigba blibo la katã ƒe Aƒetɔ la ŋgɔ.

 6 Dziƒowo ɖea gbeƒã eƒe dzɔdzɔenyenye,

Eye dukɔwo katã kpɔa eƒe ŋutikɔkɔe.

 7 Ŋu nekpe ame siwo katã subɔa nu kpakpɛwo,

Ame siwo tsɔa mawu maɖinuwo ƒoa adegbee.

Mi mawuwo katã, mide ta agu nɛ.

 8 Zion see, eye dzi dzɔe;

Yuda duwo tsoa aseye

Le wò ʋɔnudɔdrɔ̃wo ta, Oo Afetɔ.

 9 Elabena Oo Afetɔ, wòe nye Dziƒoʋĩtɔ ɖe anyigba blibo la dzi;

ȃo mawuwo katã ta sãsãsã.

10 Oo mi ame siwo lɔ̃a Afetɔ, mitsri vɔ̃.

Ekpɔa ame siwo wɔa nuteƒe nɛ la ƒe agbe ta;

Eɖea wo tso ame vɔ̃ɖiwo si me.

11 Kekeli klẽ na ame dzɔdzɔe la

Eye dzidzɔ yɔ dzi dzɔdzɔetɔwo me.

12 Mi ame dzɔdzɔewo, mikpɔ dzidzɔ ɖe Afetɔ ŋu,

Eye mida akpe nɛ ɖe eƒe ŋkɔ kɔkɔe la ta.

PSALMOWO 98
1 Midzi ha yeye na Afetɔ,

Elabena ewɔ nu dzɔtsuwo.

Etsɔ eƒe nuɖusi, eƒe alɔ kɔkɔe la, wɔ xɔnamedɔwo.

 2 Afetɔ ɖe eƒe xɔname fia;

Eɖe eƒe dzɔdzɔenyenye fia le dukɔwo ŋkume.

 3 Eɖo ŋku eƒe lɔlɔ̃ si nu metsina o kple eƒe nuteƒewɔwɔ na Israel ƒe aƒe la dzi.

Anyigba ƒe mlɔenuwo katã kpɔ mía Mawu ƒe xɔname.

 4 Mi anyigbawo katã, mido dzidzɔɣli na Afetɔ.

Mikpɔ dzidzɔ, mitso aseye, eye midzi kafukafuhawo.

 5 Midzi kafukafuhawo na Afetɔ ɖe saŋku dzi,

Mitsɔ saŋku kple ha viviwo kafui.

 6 Miku kpẽwo kple lãdzowo,

Ne miado dzidzɔɣli le Fia Afetɔ ŋkume.

 7 Atsiaƒu kple emenuwo neɖe gbe,

Anyigba kple edzinɔlawo katã hã.

 8 Tɔsisiwo nesi akpe;

Towo katã netso aseye yoo

 9 Le Afetɔ ŋkume, elabena egbɔna be yeadrɔ̃ ʋɔnu anyigba la.

Adrɔ̃ ʋɔnu anyigbadzinɔlawo le dzɔdzɔenyenye me,

Kple dukɔwo katã ɖe eteƒe.

PSALMOWO 99
1 Afetɔ zu Fia. Dukɔwo nedzo nyanyanya.

Ebɔbɔ nɔ eƒe fiazikpui dzi le kerubiwo tame. Anyigba nedzo kpekpekpe.

 2 Afetɔ nye gã le Zion,

Eye wòɖo kpo ɖe dukɔwo katã dzi.

 3 Woakafu wò ŋkɔ gã la,

Elabena vɔvɔ̃ le eŋu, eye wòle kɔkɔe.

 4 Fia ŋusẽtɔ si lɔ̃a ʋɔnu dzɔdzɔe dɔdrɔ̃e wònye.

Wòe ɖo nu dzɔdzɔe wɔwɔ gɔme anyi.

Wòe ɖo ʋɔnu dzɔdzɔe dɔdrɔ̃ kple dzɔdzɔenyenye anyi ɖe Yakob.

 5 Mido Afetɔ mía Mawu la ɖe dzi, eye mide ta agu ɖe eƒe afɔɖodzinu ŋgɔ;

Elabena ele kɔkɔe.

 6 Mose kple Aron le eƒe nunɔlawo dome,

Eye Samuel le ame siwo yɔa eŋkɔ la dome.

Woyɔa Afetɔ,

Eye wòtɔna na wo.

 7 Eƒoa nu kpli wo le alilikpo dodo me.

Wolé eƒe ŋkuɖodzinyawo kple ɖoɖo siwo wòtsɔ na wo la me ɖe asi.

 8 Oo Afetɔ, mía Mawu, ètɔ na wo.

Mawu si tsɔna kena nènye na wo,

Ke hã, èhe to na wo ɖe woƒe nuwɔna vɔ̃ɖiwo ta.

 9 Mido Afetɔ mía Mawu la ɖe dzi,

Eye mide ta agu ɖe eƒe to kɔkɔe la ŋgɔ,

Elabena Afetɔ mía Mawu la le kɔkɔe.

PSALMOWO 100
1 Mi anyigbadzinɔlawo katã, mido aʋadziɖuɣli na Afetɔ.

 2 Misubɔ Afetɔ kple dzidzɔ.

Mitsɔ aseyetsotso do ɖe eŋkume.

 3 Minyae be Afetɔe nye Mawu.

Eyae wɔ mí, eye etɔ míenye.

Eƒe dukɔ kple alẽ siwo le eƒe lãnyiƒe míenye.

 4 Mitsɔ akpedada ge ɖe eƒe agbowo me,

Mitsɔ kafukafu ge ɖe eƒe xɔxɔnuwo.

Mida akpe nɛ; mikafu eƒe ŋkɔ.

 5 Elabena Afetɔ nyo;

Eƒe lɔlɔ̃ si nu metsina o la li tegbee,

Eye eƒe nuteƒewɔwɔ li tso dzidzime yi dzidzime.

PSALMOWO 101
1  Madzi ha le wò lɔlɔ̃ vavã kple wò ʋɔnu dzɔdzɔe dɔdrɔ̃ ŋu.

Oo Afetɔ, wòe madzi kafukafuha na.

 2 Madze aɖaŋu ahazɔ le fɔmaɖimaɖi me.

Ɣekaɣi nàtrɔ ɖe ŋunye?

Mazɔ le aƒenye me kple dzi si ŋu fɔɖiɖi mele o.

 3 Nyematsɔ nu maɖevi aɖeke aɖo ŋkunyeme o.

Melé fu ame siwo tra tso mɔ dzɔdzɔe dzi la ƒe nuwɔnawo;

Kadodo aɖeke mele nye kpli wo dome o.

 4 Dzi matomɔɖekɛ aɖeke metsɔ ɖe gbɔnye kura o;

Nyemada asi ɖe nu tovo aɖeke dzi kura o.

 5 Ame sia ame si gblẽa ehavi ŋu le adzame la,

Mana ɖoɖoe nazi le enu.

Ame sia ame si si dadaŋkuwo le, eye wòdana le dzi me la,

Nyemade ha kplii o.

 6 Nye ŋkuwo anɔ nuteƒewɔla siwo le anyigba dzi ŋu,

Ne woanɔ gbɔnye.

Ame si ƒe zɔzɔme ŋu fɔɖiɖi mele o lae asubɔm.

 7 Alakpanuwɔla aɖeke manɔ aƒenye me o,

Eye aʋatsokala aɖeke matsi tre ɖe ŋkunyeme o.

 8 Ŋdi sia ŋdi la, mana ɖoɖoe nazi le ame vɔ̃ɖi siwo katã le anyigba dzi la nu,

Ne maɖe nu vɔ̃ wɔlawo katã ɖa le Afetɔ ƒe du la me.

PSALMOWO 102
1 Oo Afetɔ, se nye gbedodoɖa;

Eye nye ɣlidodo hena kpekpeɖeŋu neɖo gbɔwò.

 2 Mègaɣla wò mo ɖem ne meɖo xaxa me o.

Ƒu to anyi ɖe ŋunye;

Ne meyɔ wò la, nàtɔ nam kaba.

 3 Elabena nye ŋkekewo nu le yiyim abe dzudzɔ ene,

Eye nye ƒuwo ʋu dzo hɛ̃e abe mlekpui me ene.

 4 Woƒo nye dzi abe gbe ene, eye wòyrɔ,

Elabena meŋlɔ nye nuɖuɖu gɔ̃ hã be.

 5 Le nye ŋeŋe sesĩe ta,

Nye ŋutilã lé ɖe nye ƒuwo ŋu kpaɖii.

 6 Meɖi aluge si le gbedzi;

Mele abe ʋlukuku si le aƒedowo me ene.

 7 Metsi zãdomadɔlɔ̃e;

Eye mele abe xevi tsiakogo le xɔ ta ene.

 8 Nye futɔwo ɖea alɔme le ŋunye ŋkeke bliboa.

Ame siwo doa vlom la tsɔa nye ŋkɔ wɔa ɖiŋudonui.

 9 Elabena dzofi zu abolo meɖuna,

Eye nye nunono tɔtɔ kple aɖatsi,

10 Le wò dɔmedzoe kple dziku ta,

Elabena ède asi tenye, be yeatsɔm aƒu gbe.

11 Nye ŋkekewo le abe vɔvɔli si nu le yiyim ene,

Eye meyrɔ abe gbe ene.

12 Ke wò la, Oo Afetɔ, ànɔ anyi tegbetegbe,

Eye wò ŋkɔxɔxɔ anɔ anyi tso dzidzime yi dzidzime.

13 Àtso akpɔ nublanui na Zion godoo,

Elabena enuveɣi ɖo;

Ɣeyiɣi ɖoɖi la de.

14 Elabena eƒe xɔtukpewo dzea wò subɔlawo ŋu

Eye eƒe kewo gɔ̃ hã xɔ asi na wo.

15 Dukɔwo avɔ̃ Afetɔ ƒe ŋkɔ,

Eye anyigbadzifiawo katã avɔ̃ wò ŋutikɔkɔe.

16 Elabena Afetɔ agbugbɔ Zion atso;

Ado le eƒe ŋutikɔkɔe me.

17 Atrɔ ɖe wɔnamanɔŋutɔwo ƒe kokoƒoƒo ŋu;

Eye mado vlo woƒe gbedodoɖa o.

18 Woŋlɔ esia ɖi na megbeviwo,

Ale be ame siwo ava dzɔ la nakafu Yah.

19 Elabena ekpɔa nu tso eƒe kɔkɔeƒe si le dzi,

Afetɔ kpɔa anyigba la tso dziƒo,

20 Ne wòase gamenɔla ƒe hũɖeɖe,

Ne wòaɖe ga ame siwo wotso kufia na,

21 Ale be woaɖe gbeƒã Afetɔ ƒe ŋkɔ le Zion,

Kple eƒe kafukafu le Yerusalem,

22 Ne dukɔwo kple fiaɖuƒewo naƒo ƒu,

Asubɔ Afetɔ.

23 Exɔ ŋusẽ le asinye le mɔ ta;

Eye wòɖe nye ŋkekewo dzi kpɔtɔ.

24 Mebe: “Oo nye Mawu,

Mègaɖem ɖa le nye agbemeŋkekewo ƒe domedome o;

Wò Ame si ƒe ƒewo li tso dzidzime yi dzidzime.

25 Gbe aɖe gbe kee nèɖo anyigba gɔme anyi,

Eye dziƒowo nye wò asinudɔwɔwɔ.

26 Wo nu ava yi, ke wò ya ànɔ anyi;

Wo katã woanyunyɔ abe avɔ ene.

Àɖɔli wo abe awudodo ene, eye wo nu ayi.

27 Ke wò la, nenema ko nèle, eye nuwuwu meli na wò ƒewo gbeɖe o.

28 Wò subɔlawo ƒe viwo anɔ anyi dedie,

Eye woƒe dzidzimeviwo ali ke ɖaa le ŋkuwòme.”

PSALMOWO 103
1 Makafu Afetɔ;

Nu sia nu si le menye nekafu eƒe ŋkɔ kɔkɔe la.

 2 Makafu Afetɔ;

Nyemaŋlɔ nu siwo katã wòwɔ la be gbeɖe o.

 3 Etsɔa wò vodadawo katã kea wò

Eye wòdaa gbe le wò dɔlélewo katã ŋu;

 4 Eyae xɔa wò agbe le yɔdo si me,

Eye wòtsɔa amenuveve kple nublanuikpɔkpɔ ɖɔna na wò.

 5 Eyae tsɔa nu nyuiwo ɖia ƒo na wò le wò agbemeŋkekewo katã me,

Ale be nègaɖoa ɖekakpui me abe ale si hɔ̃ ɖɔa li fu ene.

 6 Afetɔ wɔa nu dzɔdzɔe eye wòtsoa afia dzɔdzɔe

Na ame siwo katã wote ɖe anyi.

 7 Ena Mose nya eƒe mɔwo,

Eye wòna Israel-viwo nya eƒe nuwɔnawo.

 8 Afetɔ nye nublanuikpɔla kple veveseɖeamenula,

Medoa dziku kabakaba o, eye eƒe lɔlɔ̃ nu metsina gbeɖe o.

 9 Menɔa vodada dim le ame ŋu ɣesiaɣi o,

Eye meléa dziku ɖe dɔme ɖikaa o.

10 Mewɔa nu ɖe mía ŋu ɖe míaƒe nu vɔ̃wo nu o,

Eye meɖoa eteƒe na mí ɖe míaƒe vodadawo nu o.

11 Elabena ale si dziƒo kɔ boo wu anyigbae la,

Nenemae eƒe amenuveve hã sɔ gbɔ na ame siwo vɔ̃nɛ.

12 Ale si ɣedzeƒe didi tso ɣetoɖoƒe gbɔe la,

Nenemae wòte míaƒe dzidadawo ɖa boo tso mía gbɔe.

13 Ale si vifofo kpɔa nublanui na viawoe la,

Nenemae Afetɔ kpɔa nublanui na ame siwo vɔ̃nɛ.

14 Elabena enya míaƒe wɔwɔme nyuie,

Eɖoa ŋui be kewɔe míenye.

15 Ke amegbetɔ ƒe agbemeŋkekewo le abe gbe ene;

Ewɔna abe seƒoƒo le gbe me ene.

16 Ke ne ya ƒo to edzi ko la, enu yina,

Abe ɖe menɔ afi ma kpɔ o ene.

17 Ke Afetɔ ƒe lɔlɔ̃ si nu metsina o la li tso mavɔ me yi mavɔ me

Na ame siwo vɔ̃nɛ,

Eye eƒe dzɔdzɔenyenye li na wo viwo ƒe viwo,

18 Na ame siwo léa eƒe nubabla me ɖe asi,

Kple ame siwo wɔa eƒe sewo dzi pɛpɛpɛ.

19 Afetɔ li eƒe fiazikpui anyi ɖe dziƒowo;

Eye eƒe fiaɖuƒe ɖua nuwo katã dzi.

20 Mikafu Afetɔ, mi eƒe dɔlawo, mi kalẽtɔ sesẽ

Siwo wɔa eƒe nya dzi hesea eƒe gbe.

21 Mikafu Afetɔ, mi eƒe aʋakɔwo katã,

Mi eƒe subɔla siwo wɔa eƒe lɔlɔ̃nu.

22 Mikafu Afetɔ, mi eƒe nuwɔwɔwo katã,

Le eƒe dziɖuƒewo katã.

Makafu Afetɔ.

PSALMOWO 104
1  Makafu Afetɔ.

Oo Afetɔ, nye Mawu, èlolo ŋutɔ.

Èta gãnyenye kple atsyɔ̃,

 2 Ètsyɔ kekeli abe avɔ ene;

Eye nèkeke dziƒowo me abe agbadɔvɔ ene.

 3 Eɖo eƒe dziƒoxɔ ƒe sɔtiwo ƒe agunu anyi ɖe tsiwo dzi,

Etsɔa alilikpowo wɔa eƒe tasiaɖam,

Eye wòzɔa ya ƒe aʋalawo dzi.

 4 Ewɔ eƒe dɔlawo wonye gbɔgbɔwo,

Kple eƒe subɔlawo wonye dzo flafla.

 5 Eɖo anyigba gɔme anyi ɖe eƒe anyinɔwo dzi;

Maʋã akpɔ o tso mavɔ me yi mavɔ me.

 6 Ètsyɔ tsi goglo nɛ abe avɔ ene.

Tsiwo kɔ gbɔ towo ta.

 7 Esi nèblu la, wosi;

Esi nèɖe gbe la, vɔvɔ̃ lé wo wode afɔ du me;

 8 Towo ho ɖe dzi, eye baliwo nyé ɖe eme,

Va ɖo afi si nèɖo na wo.

 9 Èɖo liƒo na wo, ne woagagbɔ edzi o,

Ne woagatsyɔ anyigba la dzi azɔ o.

10 Ena tsiwo si yi baliwo me;

Wosi to towo domee.

11 Wonaa tsi gbemelãwo katã wonona;

Gbetedziwo ɖia kɔ na woƒe tsikɔwuame.

12 Dziƒoxewo wɔa atɔ ɖe atiwo me le tɔawo to;

Wonɔa atilɔwo dzi nɔa ha dzim.

13 Edea tsi towo tso eƒe dziƒoxɔawo me.

Wò dɔwɔwɔ me kutsetse ɖia ƒo na anyigba.

14 Enana gbe miena na nyiwo

Kple nu miemiewo na amegbetɔwo ƒe zazã,

Ne woakpɔ nuɖuɖu tso anyigba me,

15 Ena wain si doa dzidzɔ na amegbetɔ ƒe dzi,

Ena ami si nana ame ƒe mo zrɔ̃na,

Kple abolo si doa ŋusẽ amegbetɔ ƒe dzi.

16 Afetɔ ƒe atiwo ɖia ƒo,

Lebanon ƒe sederti siwo wòdo,

17 Afi mae xeviwo wɔa atɔ ɖo.

Sesewutiwo mee damixe wɔ nɔƒe ɖo.

18 To kɔkɔwo nye agamegbɔ̃wo nɔƒe;

Agakpewo to me nye hotoklolowo ƒe bebeƒe.

19 Ewɔ dzinu ne wòafia ɣeyiɣiwo;

Ɣe nya ɣeyiɣi si wòɖoa to la nyuie.

20 Èhea viviti vanɛ eye zã dona;

Ɣemaɣie avemelãwo katã dona ɖatsana.

21 Dzataviwo xlɔ̃na nɔa nuléle dim

Eye wodia woƒe nuɖuɖu tso Mawu gbɔ.

22 Ne ɣe dze la,

Wotrɔna yina ɖatsyɔa akɔ ɖe wo nɔƒewo.

23 Amegbetɔ yia eƒe dɔwo gbɔ,

Eye wònɔa dɔ dzi va se ɖe fiẽ.

24 Oo Afetɔ, wò dɔwɔwɔwo sɔ gbɔ loo!

Èwɔ wo katã le nunya me.

Anyigba yɔ fũu kple wò nuwɔwɔwo.

25 Atsiaƒue nye esi, elolo hekeke gbanaa,

Eya mee nu gbagbe siwo mele xexlẽ me o, suewo kple gãwo siaa, ʋãa wo ɖokui le.

26 Edzie tɔdziʋuwo tona,

Èwɔ Leviatan be wòafe le eme.

27 Wo katã wole asiwò nu kpɔm,

Be nàna nuɖuɖu yewo le enaɣi.

28 Nu si nèna wo la, woƒoa enu ƒu.

Ne èʋu wò asi me la, ètsɔa nu nyuiwo ɖia ƒo na wo.

29 Ne èɣla wò ŋkume la, wotɔtɔna.

Ne èxɔ woƒe gbɔgbɔ la, wokuna, eye wogatrɔna zua anyi.

30 Ne èɖo wò gbɔgbɔ ɖa la, wodzɔna,

Eye nègawɔa anyigba la ƒe ŋkume yeyee.

31 Afetɔ ƒe ŋutikɔkɔe anɔ anyi tegbee.

Afetɔ akpɔ dzidzɔ ɖe eƒe dɔwɔwɔwo ŋu.

32 Edoa mo ɖa kpɔa anyigba la, eye wòdzona kpekpekpe;

Ekaa asi towo ŋu, eye wotua dzudzɔ.

33 Madzi ha na Afetɔ le nye agbe me katã;

Madzi kafukafuha na nye Mawu zi ale si mele agbe.

34 Nye tamesusuwo nedze eŋu.

Nye la, makpɔ dzidzɔ ɖe Afetɔ ŋu.

35 Nu vɔ̃ wɔlawo nu ayi le anyigba la dzi,

Eye ame vɔ̃ɖiwo maganɔ anyi o.

Makafu Afetɔ. Mikafu Yah!

PSALMOWO 105
1  Mida akpe na Afetɔ, miyɔ eŋkɔ,

Miɖe gbeƒã eƒe nuwɔwɔwo le dukɔwo dome!

 2 Midzi ha nɛ, midzi kafukafuha nɛ,

Mide ŋugble le eƒe nukudɔwɔwɔwo katã ŋu.

 3 Mitsɔ eƒe ŋkɔ kɔkɔe la ƒo adegbee.

Ame siwo dia Afetɔ la ƒe dzi nekpɔ dzidzɔ.

 4 Mibia Afetɔ kple eƒe ŋusẽ ta se.

Midi eƒe ŋkume ɖaa.

 5 Miɖo ŋku dɔ siwo wòwɔ la dzi,

Eƒe nukunuwo kple eƒe afiatsotsowo,

 6 Mi eƒe subɔla Abraham ƒe dzidzimeviwo,

Mi eƒe ame tiatiawo, Yakob viwo.

 7 Eyae nye Afetɔ mía Mawu.

Eƒe ʋɔnudɔdrɔ̃wo xɔ anyigba la katã dzi.

 8 Eɖoa ŋku eƒe nubabla la dzi ɖaa,

Eɖoa ŋku ŋugbe si wòdo na dzidzime akpewo,

 9 Nu, si wòbla kple Abraham,

Kple atam si wòka na Isak,

10 Atam si dzi wòɖo kpee wònye se na Yakob

Eye wònye nubabla si anɔ anyi ɖaa na Israel,

11 Esi wògblɔ be, “Wòe matsɔ Kanaan-nyigba la ana

Wòanye miaƒe domenyinu” la dzi.

12 Womede ha ɣemaɣi o,

Ɛ̃, wonɔ ʋɛ ŋutɔ, eye wonye amedzrowo le anyigba la dzi.

13 Wonɔ tsatsam tso dukɔ gbɔ yi dukɔ gbɔ,

Tso fiaɖuƒe ɖeka gbɔ yi bubu gbɔ.

14 Meɖe mɔ ame aɖeke te wo ɖe anyi o,

Ke boŋ eka mo na fiawo le wo ta,

15 Esi wògblɔ be, “Migaka asi nye amesiaminawo ŋu o,

Eye migawɔ vɔ̃ aɖeke nye nyagblɔɖilawo o.”

16 Eyɔ dɔwuame va anyigba la dzi;

Exe mɔ ɖe woƒe nuɖuɖutsoƒewo katã nu.

17 Edɔ ŋutsu aɖe ɖe wo ŋgɔ,

Yosef, si wotsɔ dzra kluvii.

18 Wode kunyowu eƒe afɔwo,

Eye wònɔ kɔsɔkɔsɔ me;

19 Va se ɖe esime eƒe nya va eme,

Afetɔ ƒe nya lae dza eŋu.

20 Fia la dɔ ame ɖa be woaɖe gae,

Dukɔwo ƒe dziɖula la na ablɔɖee.

21 Etsɔe ɖo aƒetɔ ɖe eƒe aƒe la nu,

Kple eƒe nuwo katã dzi kpɔla,

22 Ne wòakpɔ ŋusẽ ɖe eƒe amegãwo dzi ale si dze eŋu,

Ne wòafia nunya eƒe ametsitsiwo.

23 Eyome Israel ʋu va Egipte,

Eye Yakob va zu amedzro le Ham-nyigba dzi.

24 Mawu na eƒe dukɔ la dzi ɖe edzi ŋutɔ;

Ena wova sesẽ wu woƒe ketɔwo,

25 Ame siwo ƒe dzi wòtrɔ bubui, ne woalé fu eƒe dukɔ la,

Ne woaɖo nugbe ɖe eƒe subɔlawo ŋu.

26 Edɔ eƒe subɔla Mose,

Kple Aron si wòtia la.

27 Wowɔ eƒe dzesiwo le wo dome,

Eƒe nukunuwo le Ham-nyigba dzi.

28 Eɖo viviti ɖa, eye blukɔ do;

Womegbe eƒe nya dzi wɔwɔ o.

29 Etrɔ woƒe tsiwo wozu ʋu

Eye wòna woƒe tɔmelãwo ku.

30 Woƒe anyigba dzi yɔ fũu kple akpɔkplɔwo,

Keke woƒe fiawo ƒe xɔgãwo me ke hã.

31 Egblɔ be togbatowo nava

Kple muwo hã, ne woaxɔ woƒe nutowo katã me.

32 Ena kpetsi dza ɖe tsidzadza teƒe

Eye wòɖo dzikedzo ɖe woƒe anyigba la dzi.

33 Egblẽ woƒe wainkawo kple woƒe gbotiwo katã,

Eye wòŋe atiwo le woƒe anyigba la dzi.

34 Egblɔ be ʋetsuviwo nado,

Ɛ̃, ʋetrawo do bibibi.

35 Woɖu woƒe anyigbadzinu miemiewo katã,

Eye woɖu woƒe agblemenukuwo keŋkeŋ.

36 Ewu ŋgɔgbeviwo katã le woƒe anyigba dzi,

Ame siwo nye woƒe vidziŋusẽ ƒe gɔmedzedze.

37 Ekplɔ eƒe dukɔ dzoe kple klosalo kpakple sika;

Eye ame aɖeke menɔ eƒe toawo me si kli nu le mɔa dzi o.

38 Esi wodzo la, dzi dzɔ Egipte,

Elabena Israel ƒe ŋɔdzi lé wo.

39 Ekeke alilikpo tsɔ tso wo dome

Kple dzo, be wòaklẽ na wo le zã me.

40 Wobia, eye wòkplɔ tegliwo vɛ na wo;

Enaa abolo wo tso dziƒo wòɖia ƒo na wo.

41 Eʋu agakpe nu, eye tsi do bababa,

Eye wòsi to kuɖiɖinyigba la dzi abe tɔsisi ene.

42 Elabena eɖo ŋku ŋugbe kɔkɔe si wòdo na esubɔla Abraham la dzi.

43 Ale wòkplɔ eƒe dukɔ la dzoe le dzidzɔ me,

Kple eƒe ame tiatiawo le aseyetsotso me.

44 Etsɔ dukɔwo ƒe anyigbawo na wo;

Eye nu siwo dukɔwo wɔ dɔ sesẽ kpɔ la zu woƒe domenyinu,

45 Ne woalé eƒe ɖoɖowo me ɖe asi,

Eye woawɔ eƒe sewo dzi.

Mikafu Yah!

PSALMOWO 106
1  Mikafu Yah!

Mida akpe na Afetɔ, elabena eya amea nyo;

Eƒe lɔlɔ̃ si nu metsina o la li tegbee.

 2 Ame kae ate ŋu agblɔ Afetɔ ƒe nu tsu wɔwɔwo

Alo ate ŋu akafui ɖe eƒe dɔwo katã ta wòade edeƒe?

 3 Dzidzɔtɔwoe nye ame siwo léa dzɔdzɔenyenye me ɖe asi,

Ame siwo wɔa nu dzɔdzɔe ɣeawokatãɣi.

 4 Oo Afetɔ, ɖo ŋku dzinye ne ève wò dukɔ la nu.

Tsɔ wò xɔnamedɔwo kpɔ tanye,

 5 Ne makpɔ gome le nyui si nèwɔna na wò ame tiatiawo la me,

Ne dzi nadzɔm ɖe wò dukɔ la ti,

Ne maƒo adegbe akafu wò kpe ɖe wò domenyinu la ŋu.

 6 Míewɔ nu vɔ̃, abe mía tɔgbuiwo ke ene;

Míeda vo; míewɔ nu vɔ̃ɖi.

 7 Mía tɔgbui siwo nɔ Egipte mekpɔ ŋudzedze ɖe wò nukudɔwo ŋu o.

Womeɖo ŋku wò amenuveve geɖeawo dzi o,

Ke boŋ wodze aglã le ƒu la nu, le Ƒudzĩ la nu.

 8 Gake exa ɖe eƒe ŋkɔ la ta ɖe wo,

Ne wòatsɔ aɖe eƒe gãnyenye afia.

 9 Eblu ɖe Ƒudzĩ la ta, eye wòmie;

Ekplɔ wo to ƒu gɔme abe gbedzi ene;

10 Eɖe wo tso woƒe ketɔwo si me,

Eye wòxɔ wo le woƒe futɔwo si.

11 Tsiawo nyè tsyɔ woƒe ketɔwo dzi;

Wo dometɔ ɖeka hɔ̃ hã mesusɔ o.

12 Eya ta woxɔ eƒe nya la dzi se;

Eye wodzi ha kafui.

13 Gake woŋlɔ nu siwo wòwɔ na wo la be kaba;

Womegbɔ dzi ɖi kpɔ eƒe mɔfiame sinu o.

14 Woɖe mɔ woƒe ɖokuitɔdidi ƒe dzodzrowo kpɔ ŋusẽ ɖe wo dzi le gbea dzi;

Wote Mawu kpɔ le gbedadaƒo.

15 Etsɔ nu si dim wole la na wo,

Ke hã ekplɔ dɔvɔ̃ si nana woɖia ku glaŋ la ƒu wo.

16 Woʋã ŋu Mose le asaɖa la me,

Kple Afetɔ ƒe ame kɔkɔe Aron hã.

17 Ale anyigba la ke nu mi Datan

Eye anyigba la tsyɔ Abiram kple eƒe ha la dzi.

18 Dzo fiã woƒe ameha la;

Dzoƒaɖe fiã ame vɔ̃ɖiawo.

19 Wowɔ nyivi hã le Horeb,

Eye wode ta agu na legba si wokɔ̀;

20 Ale wotsɔ nye ŋutikɔkɔe ɖɔli

Nyitsu si ɖua gbe la ƒe nɔnɔme.

21 Woŋlɔ Mawu woƒe Xɔnametɔ la be,

Ame si wɔ nu gãwo le Egipte,

22 Ame si wɔ nukudɔwo le Ham-nyigba dzi,

Kple nu dziŋɔwo le Ƒudzĩ la nu.

23 Ðe wòbe yeaɖe gbe ne woatsrɔ̃ wo gbidii hafi,

Ke eƒe ame tiatia Mose ye tso wo xɔ

Ale be eƒe dziku helĩhelĩ la nu fa.

24 Wodo vlo anyigba nyui la;

Womexɔ eƒe ŋugbedodo dzi se o.

25 Wonɔ nyatoƒoe tom le woƒe agbadɔwo me;

Womeɖo to Afetɔ ƒe gbe o.

26 Ale wòkɔ eƒe asi dzi ka atam ɖe wo ŋu

Be yeaxlã wo ɖe anyi le gbea dzi;

27 Be yeaxlã woƒe dzidzimeviwo ɖe anyi le dukɔwo dome,

Eye yeaka wo ahlẽ ɖe anyigbawo dzi.

28 Wode ta agu na Baal-Peor,

Eye woɖu nu si wotsɔ sa vɔe na nu siwo me agbe mele o.

29 Wotsɔ woƒe nuwɔnawo do dziku nɛ,

Eye wòɖo fuwɔame ɖe wo dome.

30 Ke esi Finehas tso heɖe afɔ si hiã ko la,

Fuwɔame la nu tso.

31 Wobui dzɔdzɔenyenye nɛ

Tso dzidzime yi dzidzime, tegbee.

32 Wodo dziku nɛ le Meriba tsi la gbɔ,

Ale be le woawo ta eme menyo na Mose o.

33 Wodo vevesese na eƒe gbɔgbɔ,

Ale be wòƒo nu eŋumabumabui.

34 Wometsrɔ̃ dukɔwo gbidigbidi

Abe ale si Afetɔ de se na wo ene o.

35 Ke boŋ wotsaka kple dukɔwo,

Eye wosrɔ̃ woƒe nuwɔnawo.

36 Wonɔ woƒe legbawo subɔm,

Ale wòzu mɔ̃ ɖe wo.

37 Wotsɔa wo viŋutsuwo

Kple wo vinyɔnuwo saa vɔ na gbɔgbɔ vɔ̃wo.

38 Ale wokɔ ʋu maɖifɔ ɖi,

Si nye woawo ŋutɔwo viŋutsuwo kple wo vinyɔnuwo ƒe ʋu,

Ame siwo wotsɔ sa vɔe na Kanaan legbawo;

Eye wotsɔ ʋukɔkɔɖi ƒo ɖi anyigba la.

39 Woƒe nuwɔnawo na wozu ame makɔmakɔwo;

Eye woto woƒe nuwɔnawo dzi wɔ gbɔgbɔmehasi.

40 Ale Afetɔ ƒe dziku fla ɖe eƒe dukɔ la ŋu,

Eye wònyɔ ŋu eƒe domenyinu la.

41 Etsɔ wo de asi na dukɔwo enuenu,

Ne woƒe futɔwo naɖu wo dzi.

42 Woƒe futɔwo te wo ɖe anyi,

Eye wobɔbɔ wo ɖe woƒe ŋusẽ te.

43 Exɔ na wo zi geɖe,

Ke woawo la, wodzea aglã hesẽa to,

Ale wòbɔbɔ wo ɖe anyi le woƒe vodadawo ta.

44 Gake ekpɔa woƒe xaxa,

Eye wòsea woƒe kokoƒoƒo.

45 Le wo ta, eɖoa ŋku eƒe nubabla la dzi,

Elabena eƒe lɔlɔ̃ si nu metsina o la ʋanɛ wòkpɔa nublanui na wo.

46 Enana ame siwo katã ɖe aboyo wo la

Kpɔa nublanui na wo.

47 Oo Afetɔ mía Mawu, xɔ na mí,

Eye nàƒo mía nu ƒu tso dukɔwo dome,

Ne míada akpe ɖe wò ŋkɔ kɔkɔe la ta

Ne míatsɔ aseyetsotso akafu wò.

48 Woakafu Afetɔ, Israel ƒe Mawu la,

Tso mavɔ me yi mavɔ me.

Dukɔ blibo la negblɔ be, “Amen!”

Mikafu Yah!

PSALMOWO 107
1  Mida akpe na Afetɔ, elabena eya amea nyo;

Eƒe lɔlɔ̃ si nu metsina o la li tegbee.

 2 Ame siwo Afetɔ gbugbɔ ƒle la negblɔ nya sia,

Ame siwo wògbugbɔ xɔ le ketɔ la si,

 3 Ame siwo nu wòƒo ƒu tso anyigbawo dzi,

Tso ɣedzeƒe kple ɣetoɖoƒe,

Tso dziehe kple anyiehe.

 4 Wotsa tsaglãla le gbedzi, le gbedadaƒo;

Womekpɔ mɔ si woato ayi du si me woanɔ la o.

 5 Dɔ kple tsikɔ wu wo;

Nu te wo ŋu belibeli.

 6 Wonɔ ɣli dom na Afetɔ le woƒe xaxa me;

Eɖe wo tso woƒe hiã me,

 7 Ekplɔ wo to mɔ dzɔdzɔetɔ dzi,

Ale be woayi du si me woanɔ la me.

 8 Woada akpe na Afetɔ ɖe eƒe lɔlɔ̃ si nu metsina o la ta,

Kple eƒe nukudɔ siwo wòwɔ na amegbetɔviwo la ta.

 9 Elabena eɖi kɔ na tsikɔwuitɔwo

Eye wòtsɔ nu nyuiwo ɖi ƒo na dɔwuitɔwo.

10 Wo dometɔ aɖewo nɔ blukɔ tsiɖitsiɖi me,

Wonɔ fu kpem le ga me eye wobɔ pã wo.

11 Elabena wogbe Mawu ƒe nya;

Eye wodo vlo Dziƒoʋĩtɔ la ƒe nuxlɔ̃ame.

12 Ale be wòtsɔ fukpekpe bɔbɔ woƒe dzi ɖe anyi;

Wodze anyi, eye womekpɔ xɔnametɔ aɖeke o.

13 Woyɔ Afetɔ be wòaxɔ na yewo le woƒe xaxa me;

Eye wòɖe wo tso woƒe hiã me.

14 Ekplɔ wo do goe tso blukɔ tsiɖitsiɖi me,

Eye wòtso woƒe kɔsɔkɔsɔwo.

15 Woada akpe na Afetɔ ɖe eƒe lɔlɔ̃ si nu metsina o la ta,

Kple eƒe nukudɔ siwo wòwɔ na amegbetɔviwo la ta.

16 Elabena egbã akɔbliʋɔtruwo

Eye wòŋe gayibɔgametiwo.

17 Wokpe fu ɖe woƒe bometsitsi ta,

Ðe woƒe dzidadawo kple vodadawo ta.

18 Nuɖuɖu aɖeke megadzroa wo o;

Eye wogogo ku ƒe agbowo nu.

19 Woyɔa Afetɔ be wòaxɔ na yewo le woƒe xaxa me;

Eye wòɖea wo tso woƒe hiã me.

20 Eɖoa eƒe nya ɖa wòdaa gbe le wo ŋu,

Eye wòɖea wo tso ʋe si me wotsi la me.

21 Woada akpe na Afetɔ ɖe eƒe lɔlɔ̃ si nu metsina o la ta,

Kple eƒe nukudɔ siwo wòwɔ na amegbetɔviwo la ta.

22 Woasa akpedavɔ,

Eye woatsɔ aseyetsotso aɖe gbeƒã eƒe dɔwɔwɔwo.

23 Ame siwo nɔa tɔdziʋuwo me zɔa atsiaƒu dzi,

Eye wotsaa asi le tsi gbanaawo dzi la,

24 Woawoe kpɔa Afetɔ ƒe dɔwɔwɔwo,

Kple eƒe nukudɔwo le tɔ goglowo dzi;

25 Ahom sesẽwo tuna le eƒe nya nu,

Ale be wòkɔa ƒutsotsoewo ɖe dzi.

26 Ʋuawo yia dzi boo;

Eye wogadzea tsia me doo.

Dzi ɖena le wo ƒo le esi woɖo afɔku me ta.

27 Wotrona le ya nu sagasaga abe ahanomunɔwo ene,

Eye woƒe aɖaŋu megava nɔa ɖeke me o.

28 Wodoa ɣli na Afetɔ le woƒe xaxa me,

Eye wòxɔna na wo le woƒe hiã me.

29 Enana ahom la dzea akɔ anyi kpoo;

Ale be ƒutsotsoewo dzea eme.

30 Dzi dzɔa wo be wo nu fa,

Eye wòkplɔa wo yia ʋudzeƒe si dim wole.

31 Woada akpe na Afetɔ ɖe eƒe lɔlɔ̃ si nu metsina o la ta,

Kple eƒe nukudɔ siwo wòwɔ na amegbetɔviwo la ta.

32 Woadoe ɖe dzi le dukɔ la ƒe ha me,

Eye woakafui le ame tsitsiwo ƒe takpekpe me.

33 Etrɔa tɔsisiwo wòzua gbegbe

Kple tsidzɔƒewo wòzua kuɖiɖinyigba,

34 Anyigba wɔnu la zua dzenyigba,

Le edzinɔlawo ƒe nu vɔ̃ɖi wɔwɔ ta.

35 Etrɔa gbegbe wòzua tsita,

Kple kuɖiɖinyigba wòzua tsidzɔƒe.

36 Afi mae wònana dɔwuitɔwo nɔna,

Ne woatsò du si me woanɔ.

37 Wodea nukugblewo kple waingblewo,

Eye wokpɔa agblemenuwo fũu.

38 Eyraa wo, ale be wosɔa gbɔ ŋutɔ;

Menana woƒe nyiwo dzi ɖena kpɔtɔna o.

39 Ke wogazua ʋɛ eye wobɔbɔa wo ɖe anyi,

Le teteɖeanyi, xaxa kple nuxaxa geɖe ta.

40 Etrɔa vlododo kɔna ɖe bubumewo dzi

Ale be wònana wotsaa tsaglãla le gbegbe, afi si mɔ aɖeke mele o.

41 Ke eɖea ame dahewo tso teteɖeanyi me,

Eye wònana woƒe ƒomewo dzina ɖe edzi abe alẽha ene.

42 Ame dzɔdzɔewo kpɔe, eye wotso aseye;

Ke ame madzɔmadzɔwo katã mia nu.

43 Ame si nye nunyala alé ŋku ɖe nu siawo ŋu

Eye wòade ŋugble le Afetɔ ƒe amenuveve geɖeawo ŋu nyuie.

PSALMOWO 108
1  Oo Mawu, nye dzi le te sesĩe,

Madzi ha eye maƒo ha kple nye ŋutete katã.*

 2 Oo kasaŋku, nyɔ; Oo saŋku, wò hã nyɔ.

Mana fɔŋli nanyɔ.

 3 Oo Afetɔ, makafu wò le amehawo dome,

Madzi kafukafuha* na wò le dukɔwo dome.

 4 Elabena wò lɔlɔ̃ si nu metsina o la sɔ gbɔ, eye wòkɔ abe dziƒowo ene,

Eye wò nuteƒewɔwɔ yi ɖatɔ dziŋgɔli.

 5 Oo Mawu, do gã ɖokuiwò wòagbɔ dziƒowo ŋu;

Wò ŋutikɔkɔe nexɔ anyigba blibo la dzi.

 6 Ne woaxɔ na wò ame lɔlɔ̃awo,

Tsɔ wò nuɖusi ɖe mí, eye nàtɔ nam.

 7 Mawu ƒo nu le eƒe kɔkɔenyenye me* be:

“Matso aseye, matsɔ Sekem ana wòanye domenyinu,

Eye madzidze Sukot Bali la na nye amewo.

 8 Tɔnyee nye Gilead abe ale si Manase hã nye tɔnye ene,

Efrayim nye gakuku* na nye ta;

Gbeɖela ƒe atikplɔe Yuda nye nam.

 9 Moab nye nye asiklɔgba.*

Mada nye afɔkpa ɖe Edom dzi.

Mado aʋadziɖuɣli ɖe Filistia ŋu.”

10 Ame kae akplɔm ayi du sesẽ la me?

Ame kae anɔ ŋgɔ nam mayi keke Edom ke?

11 Oo Mawu, ɖe menye wò, ame si gbe mí lae oa,

Ðe menye mía Mawu, ame si megahona kple míaƒe aʋakɔwo o lae oa?

12 Kpe ɖe mía ŋu le míaƒe xaxa me,

Elabena amegbetɔ ƒe xɔname mele ɖeke me o.

13 Mawue ana ŋusẽ naɖo mía ŋu,

Eye eyae afanya míaƒe futɔwo.

PSALMOWO 109
1  Oo, nye Mawu si mekafuna, mègazi kpi o.

 2 Elabena ame vɔ̃ɖiwo kple ameblelawo ke nu ɖe ŋunye.

Wotsɔ alakpaɖe ƒo nu tso ŋunye;

 3 Wotsɔ nya veamewo gbɔgblɔ ɖe to ɖem,

Eye wotso ɖe ŋunye, evɔ nyemewɔ naneke hafi o.

 4 Wotsi tsitre ɖe ŋunye ɖe nye lɔlɔ̃ teƒe;

Ke nye ya manɔ gbedodoɖa dzi.

 5 Wotsɔa vɔ̃ ɖoa nyui teƒe nam,

Kple fuléle ɖoa lɔlɔ̃ teƒe nam.

 6 Da ame vɔ̃ɖi ɖe eŋu;

Eye tsitretsiɖeŋula netɔ ɖe eƒe ɖusime ɖaa.

 7 Ne wodrɔ̃ ʋɔnui la, na woabu fɔe;

Eye woabu eƒe gbedodoɖa gɔ̃ hã nu vɔ̃ nɛ.

 8 Eƒe agbemeŋkekewo dzi neɖe kpɔtɔ;

Eye ame bubu nexɔ eƒe dzikpɔkpɔdɔ la.

 9 Viawo nezu tsyɔ̃eviwo,

Eye srɔ̃a nezu ahosi.

10 Viawo nenɔ tsaglãla tsam anɔ nu biam,

Ne woatso woƒe xɔ gbagbãwo me aɖo abologbe.

11 Fetɔ nexɔ eƒe nuwo katã le esi,

Eye ame tutɔwo neha eƒe nunɔamesiwo.

12 Ame aɖeke meganyo dɔme nɛ o,

Eye ame aɖeke megave eƒe tsyɔ̃eviwo nu o.

13 Eƒe dzidzimeviwo nu netso;

Woƒe ŋkɔ netutu ɖa le dzidzime ɖeka me.

14 Afetɔ neɖo ŋku tɔgbuiawo ƒe vodada dzi,

Eye negatutu dadaa ƒe nu vɔ̃ hã ɖa o.

15 Woƒe nu vɔ̃wo nenɔ Afetɔ ŋkume ɖaa;

Eye woaɖe nu sia nu si ana woaɖo ŋku wo dzi le anyigba dzi la ɖa.

16 Elabena meɖo ŋku edzi ve ame nu o,

Ke boŋ eti wɔnamanɔŋutɔ, ame dahe kple ame si ƒe dzi le nu xam la yome

Be yeawui.

17 Elɔ̃a fiƒoƒo de ame, eya tae fiƒode va edzi ɖo;

Melɔ̃na kura be yeayra ame o, eya tae mexɔ yayra aɖeke o ɖo.

18 Eta fiƒode abe avɔ ene.

Eɖo lãme nɛ abe tsi ene,

Eye wòge ɖe eƒe ƒuwo me abe ami ene.

19 Fiƒode nenɔ abe avɔ si wòtana,

Kple alidziblanu si wòtsɔna blaa ali dzi ene ɖaa.

20 Esiae nye ame si le tsitre tsim ɖe ŋunye,

Kple ame siwo le nya vɔ̃wo gblɔm ɖe ŋunye la, ƒe fetu tso Afetɔ gbɔ.

21 Ke wò, Aƒetɔ Dziɖulagã Afetɔ,

Wɔ nyui nam le wò ŋkɔ la ta.

Ðem, elabena wò lɔlɔ̃ si nu metsina o la nyo ale gbegbe.

22 Elabena wɔnamanɔŋutɔ kple ame dahe menye.

Nye dzi xɔ abi vevie le menye.

23 Nunye le yiyim abe ale si vɔvɔli nu yinae ene;

Woʋuʋum ɖa abe ʋetsuvi ene.

24 Nutsitsidɔ na nye klowo gbɔdzɔ keŋ;

Meɖi ku eye vɔvɔm ko mele.

25 Mezu alɔmeɖenu na wo.

Ne wonya kpɔm ko la, woʋuʋua ta.

26 Oo Afetɔ nye Mawu, kpe ɖe ŋunye;

Xɔ nam le wò lɔlɔ̃ si nu metsina o la ta.

27 Ne woadze sii be wò asie wɔ esia;

Be wò, Afetɔ, ye wɔe.

28 Woawo neƒo fi de ame, ke wò la, àyra ame.

Ne wotso ɖe ŋunye la, na woaɖu ŋukpe,

Gake na dzi nadzɔ wò subɔla ya.

29 Na ame siwo tsia tsitre ɖe ŋunye la nata vlododo abe avɔ ene;

Eye woado ŋukpe abe awu ene.

30 Matsɔ nye nu akafu Afetɔ ale si dze;

Eye makafui le amehawo dome.

31 Elabena atɔ ɖe ame dahe ƒe ɖusime

Ne wòaɖee tso ame siwo le fɔ bumee la si me.

PSALMOWO 110
1  Afetɔ gblɔ na nye Aƒetɔ be:

“Bɔbɔ nɔ nye ɖusime,

Va se ɖe esime matsɔ wò futɔwo awɔ wò afɔɖodzinui.”

 2 Afetɔ ado wò ŋusẽ ƒe fiatikplɔ ɖa tso Zion agblɔ be:

“Yi ɖaɖu dzi le wò futɔwo titina.”

 3 Wò dukɔ atsɔ wo ɖokuiwo ana faa le wò aʋakpegbe.

Wò ɖekakpuiwo ƒe ha ado na wò abe zãmu ƒe tagegewo ene

Le atsyɔ̃ɖoɖo kɔkɔe me tso agudzedze ƒe dɔme.

 4 Afetɔ ka atam, eye matrɔ eƒe susu o,* be:

“Nunɔlae nènye

Abe Melkizedek ene tegbee!”

 5 Afetɔ anɔ wò ɖusime;

Agbã fiawo gudugudu le eƒe dɔmedzoedogbe.

 6 Adrɔ̃ ʋɔnu dukɔwo;*

Ana ame kukuwo nayɔ wo me taŋ.

Agbã anyigba gã la* ƒe amegã* la gudugudu.

 7 Tɔʋu si le mɔa dzi la me tsie wòano.*

Eya ta afɔ ta dzi.

PSALMOWO 111
1  Mikafu Yah!

Makafu Afetɔ tso dzi blibo me

Le ame dzɔdzɔewo ƒe ƒuƒoƒo kple ha la dome.

 2 Afetɔ ƒe dɔwɔwɔwo lolo;

Ame siwo katã kpɔa dzidzɔ ɖe wo ŋu la srɔ̃a nu le wo ŋu.

 3 Bubu kple atsyɔ̃ sɔŋ ye nye eƒe dɔwɔwɔ,

Eye eƒe dzɔdzɔenyenye li tegbee.

 4 Enana woɖoa ŋku eƒe nukudɔwo dzi.

Afetɔ nye veveseɖeamenula kple nublanuikpɔla.

 5 Enaa nuɖuɖu ame siwo vɔ̃nɛ.

Eɖoa ŋku eƒe nubabla la dzi tegbee.

 6 Eɖe eƒe nukudɔwo fia eƒe dukɔ la

Esi wòtsɔ dukɔwo ƒe domenyinu na wo.

 7 Eƒe asinudɔwɔwɔwo le eteƒe hele dzɔdzɔe;

Kakaɖedzi le eƒe ɖoɖowo katã ŋu.

 8 Woate ŋu aɖo ŋu ɖe wo ŋu ɖaa tegbee,

Ewɔ wo le nyateƒe kple dzɔdzɔenyenye me.

 9 Ena eƒe dukɔ la kpɔ ɖeɖe.

Ede se be yeƒe nubabla nanɔ anyi tegbee.

Eƒe ŋkɔ le kɔkɔe, eye vɔvɔ̃ le eŋu.

10 Afetɔ vɔvɔ̃e nye nunya ƒe gɔmetoto.

Ame siwo katã wɔa eƒe sewo dzi la dzea nunya.

Eƒe kafukafu li tegbee.

PSALMOWO 112
1  Mikafu Yah!

Dzidzɔtɔe nye ame si vɔ̃a Afetɔ,

Ame si kpɔa dzidzɔ ɖe eƒe sededewo ŋu vevie.

 2 Ŋusẽ anɔ eƒe dzidzimeviwo ŋu le anyigba la dzi,

Woayra ame dzɔdzɔewo ƒe dzidzime.

 3 Nu xɔasiwo kple kesinɔnuwo le eƒe aƒe me,

Eye eƒe dzɔdzɔenyenye li tegbee.

 4 Eklẽna le viviti me abe akaɖi ene na ame dzɔdzɔewo.

Esea veve ɖe ame nu, ekpɔa nublanui na ame, eye wòle dzɔdzɔe.

 5 Eme anyo na ame si nyoa dɔme hedoa nu na ame.

Ewɔa eƒe nuwo katã ɖe eteƒe.

 6 Kè maɖe le ete akpɔ o.

Woaɖo ŋku ame dzɔdzɔe dzi tegbee.

 7 Nya vɔ̃wo sese madzi ŋɔ nɛ o.

Eƒe dzi le te sesĩe, eye wòɖoa ŋu ɖe Afetɔ ŋu.

 8 Dzi le eƒo; mavɔ̃ o;

Eye mlɔeba atsa ŋku le eƒe ketɔwo dzi aʋadziɖuɖutɔe.

 9 Eʋua asi me; enaa nu ame dahewo.

Eƒe dzɔdzɔenyenye li tegbee.

Eƒe ŋusẽ ade dzi le bubu me.

10 Ame vɔ̃ɖi la akpɔe, eye dzi akui.

Aɖu aɖukli, eye wòabu ɖa keŋkeŋ.

Ame vɔ̃ɖiwo ƒe didi nu ayi.

PSALMOWO 113
1  Mikafu Yah!

Mi Afetɔ subɔlawo, mikafui,

Mikafu Afetɔ ƒe ŋkɔ.

 2 Woakafu Afetɔ ƒe ŋkɔ

Tso fifia yi mavɔmavɔ me.

 3 Mikafu Afetɔ ƒe ŋkɔ

Tso ɣedzeƒe va se ɖe ɣetoɖoƒe.

 4 Afetɔ ɖo kpo ɖe dukɔwo katã dzi;

Eƒe ŋutikɔkɔe kɔ gbɔ dziƒowo ta.

 5 Ame kae le abe Afetɔ mía Mawu,

Ame si bɔbɔ nɔ dziƒo ʋĩi la ene?

 6 Ebɔbɔ be yeakpɔ dziƒo kple anyigba,

 7 Efɔa ame tsɛ ɖe tsitre tso ʋuʋudedi me.

Ekɔa ame dahe ɖe dzi tso dzofi me

 8 Ne wòana wòabɔbɔ nɔ bubumewo dome,

Eƒe dukɔ ƒe bubumewo dome.

 9 Enana konɔ kpɔa aƒe nɔa eme,

Eye wòkpɔa dzidzɔ abe viwo dada ene.

Mikafu Yah!

PSALMOWO 114
1  Esime Israel ʋu tso Egipte,

Esime Yakob ƒe aƒe la dzo le dutagbedolawo dome la,

 2 Yuda zu eƒe kɔkɔeƒe,

Israel zu eƒe dziɖuƒe.

 3 Atsiaƒu kpɔe, eye wòsi dzo;

Yordan gbugbɔ ɖe megbe.

 4 Towo ti kpo abe agbowo ene,

Togbɛwo abe alẽviwo ene.

 5 Oo atsiaƒu, nu kae na nèsi dzo?

Oo Yordan, nu ka tae nègbugbɔ ɖe megbe?

 6 Oo towo, nu ka tae miele kpo tim abe agbowo ene,

Eye mi togbɛwo, abe alẽviwo ene?

 7 Oo anyigba, dzidzi neƒo wò le Aƒetɔ la ta,

Le Yakob ƒe Mawu la ta,

 8 Eya, ame si trɔa agakpe wòzua tsita,

Kple kpe sesẽ wòzua tsidzɔƒe.

PSALMOWO 115
1  Míedze nɛ o, Oo Afetɔ, míedze nɛ o,

Ke boŋ wò ŋkɔ lae dze na bubu,

Le wò amenuveve kple wò nuteƒewɔwɔ ta.

 2 Nu ka tae dukɔwo agblɔ be:

“Ke afi kae woƒe Mawu la le?”

 3 Mía Mawu le dziƒo;

Nu sia nu si dze eŋu wòbe yeawɔ la, ewɔnɛ.

 4 Woƒe legbawo nye klosalo kple sika,

Amegbetɔ ƒe asinudɔwɔwɔ wonye.

 5 Nu li na wo, gake womeƒoa nu o;

Ŋku li na wo, gake womekpɔa nu o;

 6 To li na wo, gake womesea nu o;

Ŋɔti li na wo, gake womeʋẽa nu sena o;

 7 Asi li na wo, gake wometea nu kpɔna o;

Afɔ li na wo, gake womezɔa azɔli o;

Womeƒoa nu to veme o.

 8 Ame siwo wɔa wo la anɔ abe woawo ke ene,

Nenema kee nye ame siwo katã ɖoa dzi ɖe wo ŋu la hã.

 9 Oo Israel, ɖo dzi ɖe Afetɔ ŋu

—Eyae nye miaƒe kpeɖeŋutɔ kple miaƒe akpoxɔnu.

10 Oo Aron ƒe aƒe, miɖo dzi ɖe Afetɔ ŋu

—Eyae nye miaƒe kpeɖeŋutɔ kple miaƒe akpoxɔnu.

11 Mi ame siwo vɔ̃a Afetɔ, miɖo dzi ɖe Afetɔ ŋu

—Eyae nye miaƒe kpeɖeŋutɔ kple miaƒe akpoxɔnu.

12 Afetɔ ɖoa ŋku mía dzi, ayra mí;

Ayra Israel ƒe aƒe la;

Ayra Aron ƒe aƒe la.

13 Ayra ame siwo vɔ̃a Afetɔ,

Ðeviwo kple tsitsiawo siaa.

14 Afetɔ ana miadzi ɖe edzi,

Ana mia kple mia viwo miadzi ɖe edzi.

15 Afetɔ neyra mi,

Eya, dziƒo kple anyigba Wɔla la.

16 Dziƒo nye Afetɔ tɔ,

Ke etsɔ anyigba na amegbetɔviwo.

17 Menye ame kukuwoe kafua Yah o;

Eye menye aʋlimeyila siwo nu ɖoɖoe zi le hãe akafui o.

18 Ke boŋ míawoe akafu Yah,

Tso fifia yi mavɔmavɔ me.

Mikafu Yah.

PSALMOWO 116
1  Melɔ̃a Afetɔ

Elabena esea nye ɣlidodo kple nye kokoƒogbe.

 2 Elabena eléa to ɖe ŋunye,

Mayɔe zi ale si mele agbe.

 3 Ku ƒe kawo ɖe to ɖem;

Eye Tsiẽƒe lém.

Mekpe hiã geɖe eye mele nu xam vevie.

 4 Ale meyɔ Afetɔ ƒe ŋkɔ be:

“Oo Afetɔ, xɔ nam!”

 5 Afetɔ sea veve ɖe ame nu, eye wòle dzɔdzɔe;

Mía Mawu nye nublanuikpɔla.

 6 Afetɔ dzɔa ame makpɔnuteƒewo ŋu.

Wɔna vɔ le ŋunye, ke exɔ nam.

 7 Luʋɔnye, gagbɔ ɖe eme,

Elabena Afetɔ wɔ nyui nam.

 8 Èɖem tso ku me,

Nye ŋkuwo tso aɖatsi me, nye afɔ tso nukikli me.

 9 Mazɔ le Afetɔ ŋkume le agbagbeawo ƒe anyigba dzi.

10 Mexɔe se, eya ta meƒo nu;

Wowɔ fum vevie.

11 Esi dzi ɖe le ƒonye la, megblɔ be:

“Ame sia ame nye aʋatsokala.”

12 Nu kae matsɔ aɖo eteƒe na Afetɔ

Ðe nyui siwo katã wòwɔ nam la ta?

13 Makɔ xɔname ƒe kplu la dzi,

Eye mayɔ Afetɔ ƒe ŋkɔ.

14 Maxe nye adzɔgbeɖefewo na Afetɔ

Le eƒe dukɔ blibo la ŋkume.

15 Ame siwo wɔa nuteƒe na Afetɔ

Ƒe ku menye nu tsɛ le eŋkume kura o.

16 Oo Afetɔ, meɖe kuku,

Wò subɔla menye.

Wò subɔla, wò dɔlanyɔnu ƒe vi menye.

Wòe ɖe gam.

17 Wòe masa akpedavɔ na;

Eye wò Afetɔ ƒe ŋkɔe mayɔ.

18 Maxe nye adzɔgbeɖefewo na Afetɔ

Le eƒe dukɔ blibo la ŋkume,

19 Le Afetɔ ƒe aƒe la ƒe xɔxɔnuwo,

Le mewò, Oo Yerusalem.

Mikafu Yah!

PSALMOWO 117
1  Mi dukɔwo katã, mikafu Afetɔ;

Mi dukɔwo katã, midoe ɖe dzi.

 2 Elabena eve mía nu geɖe ŋutɔ;

Afetɔ ƒe nuteƒewɔwɔ li tegbee.

Mikafu Yah!

PSALMOWO 118
1 Mida akpe na Afetɔ, elabena eya amea nyo;

Eƒe lɔlɔ̃ si nu metsina o la li tegbee.

 2 Israel negblɔ azɔ be:

“Eƒe lɔlɔ̃ si nu metsina o la li tegbee.”

 3 Aron ƒe aƒe la negblɔ azɔ be:

“Eƒe lɔlɔ̃ si nu metsina o la li tegbee.”

 4 Ame siwo vɔ̃a Afetɔ la negblɔ azɔ be:

“Eƒe lɔlɔ̃ si nu metsina o la li tegbee.”

 5 Meyɔ Yah le xaxa me;

Yah tɔ nam, eye wòkplɔm va afi si le dedie.

 6 Afetɔ li kplim; nyemavɔ̃ o.

Nu kae amegbetɔ ate ŋu awɔm?

 7 Afetɔ le nye akpa dzi be yeakpe ɖe ŋunye;

Eya ta nye ŋku atsa le nye futɔwo dzi aʋadziɖuɖutɔe.

 8 Enyo be woasi Afetɔ atso

Wu be woaɖo ŋu ɖe amegbetɔwo ŋu.

 9 Enyo be woasi Afetɔ atso

Wu be woaɖo ŋu ɖe amegãwo ŋu.

10 Dukɔwo katã ɖe to ɖem,

Gake Afetɔ ƒe ŋkɔ mee

Menya wo ɖa le.

11 Woɖe to ɖem, ɛ̃, woƒo xlãm le goawo katã me,

Gake Afetɔ ƒe ŋkɔ mee

Menya wo ɖa le.

12 Woƒo kɔ ɖe ŋunye abe anyiwo ene,

Ke wotsi abe aŋɔkadzo ene.

Afetɔ ƒe ŋkɔ mee

Menya wo ɖa le.

13 Wotu asim sesĩe be madze anyi,

Ke Afetɔ tsom xɔ.

14 Yah ye nye nye bebeƒe kple nye ŋusẽ,

Eyae nye nye xɔnametɔ.

15 Aseyetsotso kple dziɖuɣli le ɖiɖim

Le ame dzɔdzɔewo ƒe agbadɔ me.

Afetɔ ƒe nuɖusi le eƒe ŋusẽ ɖem fia.

16 Afetɔ ƒe nuɖusi le dzi dem;

Afetɔ ƒe nuɖusi le eƒe ŋusẽ ɖem fia.

17 Nyemaku o, ke boŋ manɔ agbe,

Ne maɖe gbeƒã Yah ƒe dɔwɔwɔwo.

18 Yah he to nam vevie,

Gake metsɔm de asi na ku o.

19 Miʋu dzɔdzɔenyenye ƒe agbowo nam;

Mage ɖe wo me akafu Yah.

20 Afetɔ ƒe agboe nye esia.

Ame dzɔdzɔewoe age ɖe eme.

21 Makafu wò, elabena ètɔ nam,

Eye nèzu nye xɔnametɔ.

 22 Kpe si xɔtulawo gbe la

Eyae va zu dzogoedzikpe vevitɔ.

 23 Afetɔ gbɔe esia tso;

Eye wònye nu wɔnuku le mía ŋkume.

 24 Esiae nye ŋkeke si Afetɔ wɔ;

Míakpɔ dzidzɔ, eye míatso aseye le eme.

 25 Oo Afetɔ, míeɖe kuku, xɔ na mí!

Oo Afetɔ, na wòadze edzi na mí dzro!

 26 Woayra ame si gbɔna le Afetɔ ƒe ŋkɔ me;

Míeyra mi tso Afetɔ ƒe aƒe la me.

 27 Afetɔe nye Mawu;

Eyae naa kekeli mí.

Mitsɔ atilɔwo ɖe asi miage ɖe ŋkekenyuiɖulawo ƒe gbɔlɔha la me,

Miayi vɔsamlekpui la ƒe dzowo gbɔ.

 28 Wòe nye nye Mawu, makafu wò;

Nye Mawu, mado wò ɖe dzi.

 29 Mida akpe na Afetɔ, elabena eya amea nyo;

Eƒe lɔlɔ̃ si nu metsina o la li tegbee.

PSALMOWO 119
1  Dzidzɔtɔwoe nye ame siwo ƒe zɔzɔme ŋu fɔɖiɖi mele o,

Ame siwo nɔa agbe ɖe Afetɔ ƒe se la nu.

 2 Dzidzɔtɔwoe nye ame siwo léa eƒe ŋkuɖodzinyawo me ɖe asi,

Ame siwo dinɛ tso dzi blibo me.

 3 Womewɔa nu madzɔmadzɔ aɖeke o;

Wozɔa eƒe mɔwo dzi.

 4 Wòe de se

Be woalé wò ɖoɖowo me ɖe asi pɛpɛpɛ.

 5 Ne ɖe manɔ te sesĩe,

Ne malé wò ɖoɖowo me ɖe asi ɖe!

 6 Ekema ŋu makpem o

Nenye be melé ŋku ɖe wò sewo katã ŋu nyuie.

 7 Matsɔ dzi dzɔdzɔe akafu wò

Ne mesrɔ̃ wò ʋɔnudrɔ̃ɖoɖo dzɔdzɔewo.

 8 Malé wò ɖoɖowo me ɖe asi.

Oo, mègagblẽm ɖi keŋkeŋ o.

ב [Bet]

 9 Aleke ɖekakpui ana eƒe mɔwo nadza?

Ne ekpɔ eɖokui dzi hezɔ ɖe wò nya la nu.

 10 Medi wò tso dzi blibo me.

Mègana matra tso wò sededewo gbɔ o.

 11 Medzra wò nyawo ɖo ɖe nye dzi me

Ne magawɔ nu vɔ̃ ɖe ŋuwò o.

 12 Oo Afetɔ, woakafu wò;

Fia wò ɖoɖowom.

 13 Metsɔ nye nuyiwo ɖe gbeƒã

Ʋɔnudrɔ̃ɖoɖo siwo katã do tso wò nu me.

 14 Mekpɔa dzidzɔ ɖe wò ŋkuɖodzinyawo ŋu

Wu kesinɔnu bubu ɖe sia ɖe.

 15 Made ŋugble le wò sededewo ŋu

Eye malé ŋku ɖe wò mɔwo ŋu.

 16 Mekpɔa dzidzɔ ɖe wò sewo ŋu vevie.

Nyemaŋlɔ wò nya la be o.

ג [Gimel]

 17 Wɔ nyui na wò subɔla,

Ne manɔ agbe ahalé wò nya la me ɖe asi.

 18 Ʋu nye ŋkuwo, ne makpɔ

Nu wɔnuku siwo le wò sea me la nyuie.

 19 Amedzro ko menye le anyigba la dzi.

Mègaɣla wò sededewo ɖem o.

 20 Edzroam vevie

Be madi wò ʋɔnudrɔ̃ɖoɖowo ɣeawokatãɣi.

 21 Èka mo na ɖokuiŋudzelawo,

Fiƒodeme siwo tra tso wò sededewo gbɔ.

 22 Ðe ŋukpe kple vlododo ɖa le ŋunye,

Elabena melé wò ŋkuɖodzinyawo me ɖe asi.

 23 Ne amegãwo kpe ta hele nu ƒom le ŋunye hã,

Wò subɔla ya dea ŋugble le wò ɖoɖowo ŋu.

 24 Mekpɔa dzidzɔ ɖe wò ŋkuɖodzinyawo ŋu vevie;

Woawoe nye nye aɖaŋuɖolawo.

ד [Dalet]

 25 Nyee nye esi ɖo baba ɖe anyigba.

Xɔm ɖe agbe le wò nya la nu.

26 Meƒo nu tso nye zɔzɔme ŋu, eye nèɖo tom;

Fia wò ɖoɖowom.

 27 Na mase wò sededewo gɔme,

Ne made ŋugble le wò nukudɔwo ŋu.

 28 Nuxaxa na mede alɔ̃ dɔ ge do kpoe.

Do ŋusẽm le wò nya la nu.

 29 Te aʋatsomɔ ɖa kura tso gbɔnye,

Eye to wò se la dzi nàve nunye.

 30 Metia nyateƒemɔ la.

Mekpɔe dze sii be wò ʋɔnudrɔ̃ɖoɖowo sɔ ŋutɔ.

 31 Meku ɖe wò ŋkuɖodzinyawo ŋu goŋgoŋ.

Oo Afetɔ, mègana ŋu nakpem o.

 32 Manɔ wò sewo yome vevie

Elabena èna wòkpɔ nɔƒe le nye dzi me.

ה [He]

 33 Oo Afetɔ, fia wò ɖoɖowo ƒe mɔm,

Ne mazɔ edzi va se ɖe nuwuwu.

 34 Na gɔmesesem,

Ne malé wò se la me ɖe asi,

Eye mawɔ edzi tso dzi blibo me.

 35 Kplɔm to wò sededewo ƒe mɔ dzi,

Elabena eƒe nu nyoa ŋunye.

 36 Bi nye dzi ɖe wò ŋkuɖodzinyawo ŋu,

Ke menye ɖe ɖokuitɔdidi ŋu o.

 37 Ðe nye ŋku ɖa le nu dzodzrowo kpɔkpɔ ŋu;

Xɔm ɖe agbe le wò mɔwo dzi.

 38 Wɔ wò ŋugbedodo dzi na wò subɔla,

Ale be woavɔ̃ wò.

 39 Ðe ŋukpe si vɔ̃m mele la ɖa,

Elabena wò afiatsotsowo nyo.

 40 Kpɔ ale si wò sededewo le dzroyem vevie ɖa!

Xɔm ɖe agbe le wò dzɔdzɔenyenye nu.

ו [Waw]

 41 Oo Afetɔ, wò amenuveve neɖo gbɔnye,

Wò xɔname hã, le wò ŋugbedodo la nu;

 42 Ne mate ŋu aɖo nya ŋu na ame si le vlo domem,

Elabena wò nyawo ŋue meɖo ŋu ɖo.

 43 Mègaɖe nyateƒenya la ɖa le nunye keŋkeŋ o,

Elabena wò afiatsotso sinu kpɔm mele.

 44 Malé wò se la me ɖe asi ɣesiaɣi,

Ðaa tegbee.

 45 Mazɔ le afi si le dedie,

Elabena medi wò sededewo yome mɔ.

 46 Maƒo nu le wò ŋkuɖodzinyawo ŋu le fiawo ŋkume,

Eye ŋu makpem o.

 47 Melɔ̃ wò sededewo vevie,

Ɛ̃, melɔ̃ wo.

 48 Mado nye abɔwo ɖe dzi, ɖe wò sedede siwo melɔ̃ la ŋu,

Eye made ŋugble le wò ɖoɖowo ŋu.

ז [Zayin]

 49 Ðo ŋku nya si nègblɔ na wò subɔla la dzi,

Esi ŋu nèna mele ŋu ɖom ɖo la.

50 Esiae metsɔ faa akɔ na ɖokuinye le xaxawo me,

Elabena wò nyawo xɔm ɖe agbe.

 51 Dadalawo ɖea alɔme le ŋunye vevie,

Ke hã, nyemete ɖe aga le wò se la ŋu o.

 52 Oo Afetɔ, meɖoa ŋku wò ʋɔnudrɔ̃ɖoɖo siwo li tso blema ke la dzi,

Eye mekpɔa akɔfafa le wo me.

 53 Dzi kuam vevie le ame vɔ̃ɖi

Siwo gblẽ wò sea ɖi la ŋuti.

 54 Wò ɖoɖowo zu ha medzina

Le afi sia afi si mele.

 55 Oo Afetɔ, meɖoa ŋku wò ŋkɔ dzi le zã me,

Ne malé wò se la me ɖe asi.

 56 Aleae mewɔna,

Elabena melé wò sededewo me ɖe asi.

ח [Het]

 57 Afetɔe nye nye gome;

Medo ŋugbe be mawɔ wò nyawo dzi.

 58 Mele koko ƒom na wò tso dzi blibo me;

Ve nunye le wò ŋugbedodo la nu.

 59 Melé ŋku ɖe nye zɔzɔme ŋu,

Ale be nye afɔ natrɔ ɖe wò ŋkuɖodzinyawo ŋu.

 60 Mewɔ kaba, nyemehe ɖe megbe o,

Be malé wò sededewo me ɖe asi.

 61 Ame vɔ̃ɖiwo ƒe kawo ɖe to ɖem,

Ke hã nyemeŋlɔ wò se la be o.

 62 Mefɔna le zãtiƒe be mada akpe na wò

Ðe wò ʋɔnudrɔ̃ɖoɖo dzɔdzɔeawo ta.

 63 Xɔlɔ̃ menye na ame siwo katã vɔ̃a wò

Kple ame siwo léa wò sededewo me ɖe asi.

 64 Oo Afetɔ, wò lɔlɔ̃ si nu metsina o la xɔ anyigba la dzi keŋ;

Fia wò ɖoɖowom.

ט [Tet]

 65 Èwɔ nyui geɖe na wò subɔla la,

Oo Afetɔ, èwɔe le wò nya la nu.

 66 Fia susuŋudɔwɔwɔ nyui kple nunyam,

Elabe wò sededewo ŋue meɖoa dzi ɖo.

 67 Hafi mava ge ɖe fukpekpe me la, metra mɔ enuenu,

Ke azɔ la, melé wò nyawo me ɖe asi.

 68 Ènyo ale gbegbe, eye wò dɔwɔwɔwo hã nyo loo!

Fia wò ɖoɖowom.

 69 Dadalawo sisi alakpa ɖe ŋunye blibaa,

Ke nye la, melé wò sededewo me ɖe asi tso dzi blibo me.

 70 Woƒe dzi ku atri,

Ke nye la, melɔ̃ wò se la vevie.

 71 Enyo be mekpe fu,

Ale be mate ŋu asrɔ̃ nu tso wò ɖoɖowo ŋu.

 72 Se siwo nèɖe gblɔ la nyo nam loo!

Wonyo nam wu sika kple klosalo akpeakpewo.

י [Yod]

 73 Wò asie wɔm hetrɔ asi le ŋunye.

Na gɔmesesem,

Ne masrɔ̃ wò sededewo.

 74 Ame siwo vɔ̃a wò la kpɔa dzidzɔ ne wokpɔm,

Elabena mekpɔa wò nya la sinu.

 75 Oo Afetɔ, menyae be wò ʋɔnudrɔ̃ɖoɖowo le dzɔdzɔe,

Eye èna mekpe fu le wò nuteƒewɔwɔ me.

 76 Meɖe kuku, fa akɔ nam le wò lɔlɔ̃ si nu metsina o la ta,

Le ŋugbe si nèdo na wò subɔla la nu.

 77 Kpɔ nublanui nam, ne manɔ agbe,

Elabena melɔ̃ wò se la vevie.

 78 Na ŋu nakpe dadalawo,

Elabena wowɔ vɔ̃ ɖe ŋunye madzemadzee.

Ke nye la, wò sededewo ŋue made ŋugble le.

 79 Na ame siwo vɔ̃a wò la nagatrɔ ɖe ŋunye,

Ame siwo nya wò ŋkuɖodzinyawo hã.

 80 Na nye dzi nanɔ wò ɖoɖowo ŋu fɔɖiɖi manɔmee,

Ne ŋu nagakpem o.

כ [Kaf]

 81 Wò xɔname dzroam vevie,

Elabena wò nya la sinu kpɔm mele.

 82 Nye ŋkuwo kpɔ mɔ na wò nya vevie,

Mebe: “Ɣekaɣie nàfa akɔ nam?”

 83 Elabena mele abe lãgbalẽgolo le dzudzɔ nu ene,

Ke hã nyemeŋlɔa wò ɖoɖowo be o.

 84 Ŋkeke nenie wò subɔla alala ase ɖo?

Gbe ka gbee nàdrɔ̃ ʋɔnu ame siwo le yonyeme tim?

 85 Dadalawo ɖe ʋe ɖi nam,

Wo, ame siwo mewɔa wò se la dzi o.

 86 Wò sededewo katã le eteƒe.

Amewo le yonyeme tim yakatsyɔ; Oo, kpe ɖe ŋunye!

 87 Esusɔ vie ko wotsrɔ̃m ɖa le anyigba la dzi,

Ke nye la, nyemagblẽ wò sededewo ɖi o.

 88 Xɔm ɖe agbe le wò lɔlɔ̃ si nu metsina o la ta,

Ne malé ŋkuɖodzinya siwo do tso nuwò la me ɖe asi.

ל [Lamed]

 89 Oo Afetɔ, wò nya la li ke ɖe dziƒowo,

Eli ke tegbee.

 90 Wò nuteƒewɔwɔ li tso dzidzime yi dzidzime.

Èɖo anyigba gɔme anyi sesĩe, ne wòanɔ anyi ɖaa.

 91 Woli va se ɖe egbegbe le wò sededewo nu,

Elabena wo katã subɔa wò.

 92 Ðe menye wò se lae melɔ̃ vevie o la,

Anye ne metsrɔ̃ le nye fukpekpewo me.

 93 Nyemaŋlɔ wò sededewo be akpɔ o,

Elabena woawo dzie nèto xɔm ɖe agbe.

 94 Tɔwò menye; ɖem,

Elabena medi wò sededewo yome mɔ.

 95 Ame vɔ̃ɖiwo de xa ɖi nam be yewoatsrɔ̃m,

Ke wò ŋkuɖodzinyawo ŋue meléa ŋku ɖo vevie.

 96 Mekpɔ seɖoƒe na nu deblibowo katã,

Ke seɖoƒe meli na wò sedede ya o.

מ [Mem]

 97 Aleke gbegbe nyemehelɔ̃a wò se lae o!

Medea ŋugble le eŋu ŋkeke blibo la.

 98 Wò sedede na medze nunya wu nye futɔwo,

Elabena ele gbɔnye tegbee.

99 Gɔmesese deto su asinye wu nye nufialawo katã,

Elabena wò ŋkuɖodzinyawo ŋue medea ŋugble le.

100 Mewɔa nu kple gɔmesese si gbɔ ame tsitsiwo tɔ ŋu,

Elabena melé wò sededewo me ɖe asi.

101 Megbe toƒe vɔ̃ɖi ɖe sia ɖe zɔzɔ,

Ale be mate ŋu alé wò nya la me ɖe asi.

102 Nyemete ɖa le wò afiatsotsowo ŋu o,

Elabena wòe fia num.

103 Aleke gbegbe wò nyawo vivi le nye ve mee nye esi!

Wovivi wu anyitsi le nye nu me.

104 Wò sededewo na medze nunya.

Esia tae melé fu aʋatsomɔwo katã ɖo.

נ [Nun]

105 Wò nya nye akaɖi na nye afɔ,

Kple kekeli na nye toƒe.

106 Meka atam, eye nyemagbe edziwɔwɔ o,

Be malé wò se dzɔdzɔeawo me ɖe asi.

107 Mekpe fu geɖe ŋutɔ,

Oo Afetɔ, xɔm ɖe agbe le wò nya la nu.

108 Oo Afetɔ, meɖe kuku, na nye lɔlɔ̃nu faa kafukafuvɔsawo nadze ŋuwò,

Eye nàfia wò afiatsotsowom.

109 Nye agbe ɖoa afɔku me ɖaa,

Ke hã, nyemeŋlɔ wò se la be o.

110 Ame vɔ̃ɖiwo tre mɔ̃ ɖi nam,

Gake nyemetra ɖa tso wò sededewo gbɔ o.

111 Mexɔ wò ŋkuɖodzinyawo wɔ tɔnyee tegbee,

Elabena woawo ŋue nye dzi kpɔa dzidzɔ ɖo.

112 Meɖoe le nye dzi me be mawɔ wò ɖoɖowo dzi,

Mawɔ wo dzi ɖaa va se ɖe nuwuwu.

ס [Samek]

113 Melé fu ame siwo si dzi afãafã le,

Ke melɔ̃ wò se la ya.

114 Beɖoƒe kple akpoxɔnu nènye nam,

Wò nya la sinu kpɔm mele.

115 Mi nu vlo wɔlawo, mite ɖa le gbɔnye,

Ne malé nye Mawu ƒe sededewo me ɖe asi.

116 Lém ɖe te le wò ŋugbedodo la nu,

Ne manɔ agbe;

Mègana ŋu nakpem le nye mɔkpɔkpɔ me o.

117 Lém ɖe te, ne makpɔ agbe;

Ne malé ŋku ɖe wò ɖoɖowo ŋu ɖaa.

118 Ègbe ame siwo katã tra tso wò ɖoɖowo gbɔ,

Elabena ameblelawo kple alakpanuwɔlawoe wonye.

119 Èɖe ame vɔ̃ɖi siwo katã le anyigba dzi la ɖa abe gamĩ ene.

Eya tae melɔ̃a wò ŋkuɖodzinyawo ɖo.

120 Vɔvɔ̃ si le ŋuwò nana nye lãme nɔa ƒoƒom;

Mevɔ̃a wò ʋɔnudɔdrɔ̃wo.

ע [Ayin]

121 Mewɔ nu si le eteƒe kple nu si le dzɔdzɔe.

Mègagblẽm ɖe ame siwo tem ɖe anyi la si me o lo!

122 Da megbe na wò subɔla hena eƒe nyui;

Mègana dadalawo natem ɖe to o.

123 Nu te nye ŋkuwo ŋu le wò xɔname sinu kpɔkpɔ

Kple wò ŋugbedodo dzɔdzɔe la sinu kpɔkpɔ ta.

124 Wɔ nu ɖe wò subɔla ŋu le wò lɔlɔ̃ si nu metsina o la nu,

Eye nàfia wò ɖoɖowom.

125 Wò subɔla menye; na gɔmesesem,

Ne manya wò ŋkuɖodzinyawo.

126 Oo Afetɔ, ɣeyiɣi de be nàɖe afɔ,

Elabena woda wò se la dzi.

127 Esia tae melɔ̃ wò sededewo

Wu sika, wu sika nyuitɔ gɔ̃ hã ɖo.

128 Esia tae mebu wò mɔfiamewo katã be wole dzɔdzɔe;

Melé fu aʋatsomɔ ɖe sia ɖe.

פ [Pe]

129 Wò ŋkuɖodzinyawo wɔ nuku.

Esia tae melé wo me ɖe asi ɖo.

130 Ne woʋu go wò nyawo la, kekeli vana,

Nugɔmesese sua ame makpɔnuteƒewo si.

131 Meke nu ɖe te heɖe hũ,

Elabena wò sededewo le dzroyem vevie.

132 Trɔ ɖe ŋunye, ne nàve nunye,

Abe ale si nèwɔa nu ɖe ame siwo lɔ̃a wò ŋkɔ la ŋui ene.

133 Tsɔ wò nyawo fia mɔ nye afɔɖeɖewo dedie;

Eye mègana nu vɔ̃ɖi aɖeke naɖu dzinye o.

134 Ðem le ameteɖeanyilawo si me,

Ne malé wò sededewo me ɖe asi.

135 Kɔ mo ɖe wò subɔla,

Eye nàfia wò ɖoɖowom.

136 Nye ŋkuwo le aɖatsi fam yoyoyo,

Elabena amewo gbe wò se la dzi wɔwɔ.

צ [Tsade]

137 Oo Afetɔ, èle dzɔdzɔe,

Eye wò ʋɔnudɔdrɔ̃wo le eteƒe.

138 Wò ŋkuɖodzinyawo le dzɔdzɔe

Eye wole eteƒe tututu.

139 Mele ŋu ʋãm ɖe nuwò vevie,

Le esi nye ketɔwo ŋlɔ wò nyawo be ta.

140 Wò nyawo dza ale gbegbe,

Eye wò subɔla lɔ̃nɛ ŋutɔ.

141 Nyemele ɖeke me o, eye wodo vlom;

Ke hã nyemeŋlɔ wò sededewo be o.

142 Wò dzɔdzɔenyenye nye dzɔdzɔenyenye si nɔa anyi tegbetegbee,

Eye wò se la le eteƒe.

143 Togbɔ be xaxa kple hiã tum hã la,

Nyemelɔ̃a nu le wò sededewo gbɔ o.

144 Wò ŋkuɖodzinyawo le dzɔdzɔe ɖaa tegbee.

Na gɔmesesem, ne manɔ agbe.

ק [Kof]

145 Meyɔ wò tso dzi blibo me. Oo Afetɔ, tɔ nam.

Malé wò ɖoɖowo me ɖe asi.

146 Wò yɔm mele; xɔ nam!

Ne malé wò ŋkuɖodzinyawo me ɖe asi.

147 Mefɔna doa ŋgɔ na fɔŋli hedoa ɣli be nàxɔ nam,

Wò nyawo sinu kpɔm mele.

148 Nye ŋkuwo le te do ŋgɔ na zãdzɔɣiwo,

Ne made ŋugble le wò nyawo ŋu.

149 Se nye gbe le wò lɔlɔ̃ si nu metsina o la ta.

Oo Afetɔ, xɔm ɖe agbe le wò ʋɔnudɔdrɔ̃ dzɔdzɔeawo nu.

150 Ŋukpenanuwɔlawo gogom;

Wote ɖe aga boo tso wò se la gbɔ.

151 Oo Afetɔ, ètsɔ kpuiƒe,

Eye wò sededewo katã nye nyateƒe.

152 Menya wò ŋkuɖodzinyawo tso gbe aɖe gbe ke,

Be èɖo wo anyi be woanɔ anyi tegbee.

153 Kpɔ nye fukpekpe ɖa, ne nàɖem,

Elabena nyemeŋlɔ wò se la be o.

154 Ʋli tanye, ne nàɖem;

Xɔm ɖe agbe le wò ŋugbedodo la nu.

155 Xɔname metsɔ ame vɔ̃ɖiwo gbɔ o,

Elabena womedi wò ɖoɖowo yome mɔ o.

156 Oo Afetɔ, wò nublanuikpɔkpɔ sɔ gbɔ.

Xɔm ɖe agbe le wò ʋɔnudɔdrɔ̃ dzɔdzɔeawo nu.

157 Yonyemetilawo kple nye futɔwo sɔ gbɔ;

Gake nyemetra ɖa tso wò ŋkuɖodzinyawo gbɔ o.

158 Ame siwo wɔa nu fitifitiwo nyɔa ŋu nam,

Elabena womelé wò nyawo me ɖe asi o.

159 Kpɔ ale si gbegbe melɔ̃ wò sewoe ɖa!

Oo Afetɔ, xɔm ɖe agbe le wò lɔlɔ̃ si nu metsina o la ta.

160 Wò nyawo katã nye nyateƒe,

Eye wò ʋɔnudɔdrɔ̃ dzɔdzɔeawo katã li ɖaa.

161 Amegãwo le yonyeme tim madzemadzee,

Ke nye dzi kpɔtɔ ku ɖe wò nyawo ŋu kple vɔvɔ̃ gã.

162 Dzi le dzɔyem ɖe wò nyawo ŋu,

Abe ame si kpɔ aboyonu geɖe ene.

163 Melé fu aʋatsokaka, eye menyɔ ŋui,

Ke melɔ̃ wò se la.

164 Mekafua wò zi adre le ŋkeke me,

Le wò ʋɔnudɔdrɔ̃ dzɔdzɔeawo ta.

165 Ame siwo lɔ̃a wò se la kpɔa ŋutifafa geɖe;

Naneke mana woakli nu o.

166 Oo Afetɔ, mekpɔa mɔ na wò xɔnamedɔwo,

Eye mewɔa wò sededewo dzi.

167 Melé wò ŋkuɖodzinyawo me ɖe asi,

Eye melɔ̃ wo vevie ŋutɔ.

168 Melé wò sededewo kple wò ŋkuɖodzinyawo me ɖe asi,

Elabena nye mɔwo katã le nyanya na wò.

ת [Taw]

169 Oo Afetɔ, nye ɣlidodo be nàkpe ɖe ŋunye neɖo gbɔwò,

Na gɔmesesem le wò nya la nu.

170 Nye kokoƒoƒo be nàve nunye neɖo gbɔwò.

Ðem, le wò ŋugbedodo la nu.

171 Nye nuyiwo nedudu kafukafu kɔ ɖi,

Elabena èfiaa wò ɖoɖowom.

172 Nye aɖe adzi ha le wò nyawo ŋu,

Elabena wò sededewo katã le dzɔdzɔe.

173 Wò alɔ nenɔ klalo akpe ɖe ŋunye,

Elabena wò sewoe metia be maɖo toe.

174 Oo Afetɔ, wò xɔname le dzroyem vevie,

Eye mekpɔa dzidzɔ ɖe wò se la ŋu vevie.

175 Na manɔ agbe ne mate ŋu akafu wò;

Eye na wò ʋɔnudɔdrɔ̃wo nakpe ɖe ŋunye.

176 Metra mɔ abe alẽ búbu ene. Di wò subɔla,

Elabena nyemeŋlɔ wò sededewo be o.

PSALMOWO 120
1   Meyɔ Afetɔ le nye xaxawo me,

Eye wòtɔ nam.

 2 Oo Afetɔ, ɖem tso aʋatsonuyiwo si me

Tso alakpaɖe si me.

 3 Oo alakpaɖe,

Nu kae wòawɔ wò, eye to kae wòahe na wò?

 4 Woatsɔ kalẽtɔ ƒe aŋutrɔ ɖaɖɛwo

Kple xati ƒe dzoka xɔxɔwo ahe toe na wò.

 5 Baba nam, elabena menye amedzro nɔ Mesek!

Menɔ Kedar ƒe agbadɔwo me.

 6 Menɔ wo dome wòdidi akpa,

Wo, ame siwo lé fu ŋutifafa.

 7 Nye la, ŋutifafa dim mele, gake ne meke nu ko la,

Woawo dia aʋawɔwɔ.

PSALMOWO 121
1  Mewu mo dzi ɖe toawo ŋu.

Afi kae kpekpeɖeŋu atso ava nam?

 2 Nye kpekpeɖeŋu tso Afetɔ,

Dziƒo kple anyigba Wɔla la gbɔ.

 3 Maɖe mɔ wò afɔ naɖiɖi gbeɖe o.

Ŋuwòdzɔla madɔ akɔlɔ̃e gbeɖe o.

 4 Kpɔ ɖa, ame si le Israel ŋu dzɔm la,

Madɔ akɔlɔ̃e loo alo adɔ alɔ̃ gbeɖe o.

 5 Afetɔ ye nye ŋuwòdzɔla.

Afetɔ ye nye wò vɔvɔli le wò ɖusime.

 6 Ɣe maɖu wò le ŋkeke me loo,

Alo dzinu le zã me o.

 7 Afetɔ akpɔ tawò tso vɔ̃wo katã me.

Akpɔ wò agbe ta.

 8 Afetɔ akpɔ tawò le wò nuwɔna ɖe sia ɖe me.

Tso fifia yi mavɔmavɔ me.

PSALMOWO 122
1 Dzi dzɔm esime wogblɔ nam be:

“Mina míayi Afetɔ ƒeme.”

 2 Oo Yerusalem, míaƒe afɔwo tɔ ɖe

Wò agbowo me.

 3 Wotsò Yerusalem wòle abe

Du si wotsiã ɖe enu ene.

 4 Afi mae Israel-toawo yina,

Yah ƒe toawo,

Ne wòanye ŋkuɖodzi na Israel,

Be woakafu Afetɔ ƒe ŋkɔ la.

 5 Elabena afi mae woɖo ʋɔnudrɔ̃zikpuiwo anyi ɖo,

David ƒe aƒe la ƒe zikpuiwo.

 6 Mibia ŋutifafa na Yerusalem.

Oo, ame siwo lɔ̃a du sia la, woanɔ anyi bɔkɔɔ.

 7 Ŋutifafa nenɔ wò gliwo me,

Eye dedienɔnɔ nenɔ wò mɔ́ sesẽwo me.

 8 Le nɔvinyewo kple xɔ̃nyewo ta magblɔ be:

“Ŋutifafa nenɔ mewò.”

 9 Le Afetɔ mía Mawu ƒe aƒe la ta,

Madi nyui na wò ɖaa.

PSALMOWO 123
1  Wòe mewu mo dzi na,

Wò, ame si bɔbɔ nɔ fiazi dzi le dziƒo.

 2 Ale si dɔlaŋutsuwo kpɔa woƒe aƒetɔ sinu,

Eye dɔlanyɔnu kpɔa eƒe aƒenɔ sinui la,

Nenemae míele Afetɔ, mía Mawu la sinu kpɔmee,

Va se ɖe esime wòave mía nu.

 3 Ve mía nu, Oo Afetɔ, ve mía nu,

Elabena wodo vlo mí ʋuu wòglo mí.

 4 Ðokuiŋudzelawo ɖe alɔme le mía ŋu ʋuu wòglo,

Eye dadalawo ƒe vlodoame sɔ gbɔ ŋutɔ.

PSALMOWO 124
1 “ Israel negblɔ azɔ be:

“Ðe menye Afetɔe le mía dzi o la,

 2 Ðe menye Afetɔe le mía dzi

Esime amewo tso ɖe mía ŋu o la,

 3 Anye ne womi mí agbagbee

Esime woƒe dɔmedzoe bi ɖe mía ŋu.

 4 Anye ne tsiwo kplɔ mí dzoe,

Anye ne tɔwo si to mía dzi.

 5 Anye ne míebu kura ɖe tɔ dzeagbowo me.

 6 Woakafu Afetɔ,

Elabena meɖe mɔ míezu nuléle le aɖutɛ me na wo o.

 7 Míele abe xevi si sí dzo

Le xevimɔ̃trela ƒe mɔ̃ka me ene;

Mɔ̃ka la tsò,

Eye míesi dzo.

 8 Afetɔ axɔ na mí le eƒe ŋkɔ me,

Eya, si nye dziƒo kple anyigba Wɔla la.”

PSALMOWO 125
1  Ame siwo ɖoa ŋu ɖe Afetɔ ŋu la

Le abe Zion To, si mate ŋu aʋã o

Eye wòli tegbee la ene.

 2 Ale si towo ƒo xlã Yerusalem godoo la,

Nenemae Afetɔ ƒo xlã eƒe dukɔ la,

Tso fifia yi mavɔmavɔ me.

 3 Ame vɔ̃ɖiwo ƒe fiatikplɔ manɔ anyigba si woka na ame dzɔdzɔewo dzi o,

Ne ame dzɔdzɔewo nagatrɔ ɖe nu gbegblẽ wɔwɔ ŋu o.

 4 Oo Afetɔ, wɔ nyui na ame nyuiwo,

Wɔ nyui na ame siwo ƒe dzi le dzɔdzɔe.

 5 Ke ame siwo gatrɔ yi woƒe mɔ gɔglɔ̃wo dzi la,

Afetɔ akplɔ wo akpe ɖe nu vlo wɔlawo ŋu aƒu gbe.

Ŋutifafa nenɔ Israel dzi.

PSALMOWO 126
1  Esime Afetɔ gakplɔ Zion ƒe aboyomewo gbɔe la,

Ewɔ na mí abe drɔ̃e kumee míenɔ ene.

 2 Ɣemaɣi la, nukoko yɔ míaƒe nu me fũu

Eye míaƒe aɖe tso aseye.

Ɣemaɣi la, wogblɔ le dukɔwo dome be:

“Nu gãwoe Afetɔ wɔ na wo.”

 3 Afetɔ wɔ nu gãwo na mí,

Dzi le mía dzɔm ale gbegbe.

 4 Oo Afetɔ, gaɖo mí aboyomeawo te,

Abe tɔʋu siwo le Negeb ene.

 5 Ame siwo le nu ƒãm kple aɖatsiwo la,

Woaŋe nu kple aseyetsotso.

 6 Ame si doa go yia agble, togbɔ be ele avi dzi,

Eye wòtsɔa nuku si wòaƒã ɖe asi la,

Atrɔ agbɔ kple aseyetsotso,

Eye wòatsɔ nuku bablawo ɖe asi agbɔe godoo.

PSALMOWO 127
1  Ne Afetɔ metu xɔ o la,

Dzodzroe etulawo le agbagba dzem le eŋu.

Ne Afetɔ medzɔ dua ŋu o la,

Dzodzroe dzɔla le ŋudzɔ.

 2 Dzodzroe miefɔna fɔŋli,

Tsoa hloloe ʋuu va se ɖe fiẽ,

Le abolo si miaɖu la ko ŋuti,

Elabena ekpɔa ame siwo wòlɔ̃na la ƒe hiahiãwo gbɔ na wo, eye wònana wokpɔa alɔ̃ dɔna.

 3 Kpɔ ɖa! Viŋutsuwo nye domenyinu tso Afetɔ gbɔ;

Vidzidɔ me kutsetse nye fetu tso egbɔ.

 4 Ale si aŋutrɔwo le kalẽtɔ si mee la,

Nenemae ɖekakpuime viŋutsuwo le.

 5 Dzidzɔtɔe nye ŋutsu si wole daku me na taŋ.

Ŋu makpe wo o,

Elabena woate ŋu akpe nya kple futɔwo le dugbo la me.

PSALMOWO 128
1  Dzidzɔtɔe nye ame si vɔ̃a Afetɔ,

Ame si zɔa eƒe mɔwo dzi.

 2 Àɖu wò ŋutɔ wò asinudɔwɔwɔ ƒe kutsetse.

Dzi adzɔ wò, eye eme anyo na wò.

 3 Srɔ̃wò anɔ abe wainka si tsena kplanya ene le aƒewò me;

Viwòwo anɔ abe amiti fẽwo ene le wò kplɔ̃ ŋu godoo.

 4 Kpɔ ɖa! Aleae woayra ŋutsu

Si vɔ̃a Afetɔ.

 5 Afetɔ ayra wò tso Zion.

Àkpɔ Yerusalem ƒe nyonyo le wò agbemeŋkekewo katã me

 6 Eye àkpɔ viwòwo ƒe viwo.

Ŋutifafa nenɔ Israel dzi.

PSALMOWO 129
1 “Tso keke nye ɖekakpuime kee wotso ɖe ŋunye”

—Israel negblɔ azɔ be—

 2 “Tso keke nye ɖekakpuime kee wotso ɖe ŋunye;

Gake womeɖu dzinye o.

 3 Agbleŋlɔlawo ŋlɔ nu to nye dzime;

Wodidi woƒe boliƒo ɖe enu.”

 4 Ke Afetɔ le dzɔdzɔe;

Elã ame vɔ̃ɖiwo ƒe kawo.

 5 Ame siwo katã léa fu Zion la,

Ŋu akpe wo, eye woagbugbɔ ɖe megbe.

 6 Woanɔ abe gbe si mie ɖe xɔ ta,

Si yrɔna hafi woava yi eho ge la ene,

 7 Si meyɔa nuŋela ƒe asi me loo

Alo ame si le nuku bablawo lɔm la ƒe abɔwo dome o.

 8 Ame siwo tso eme va yina la magblɔ be:

“Afetɔ ƒe yayra nenɔ mia dzi,

Míeyra mi le Afetɔ ƒe ŋkɔ me” o.

PSALMOWO 130
1  Oo Afetɔ, gogloeƒe kee meyɔ wò le.

 2 Oo Afetɔ, se nye gbe.

Lé to ɖe nye kokoƒogbe ŋu.

 3 Oo Yah, ne vodadawo ŋue nèléa ŋku ɖo la,

Oo Afetɔ, anye ne ame kae ate ŋu anɔ te?

 4 Elabena gbɔwòe tsɔtsɔke vavãtɔ le,

Ne woavɔ̃ wò.

 5 Mele mɔ kpɔm na Afetɔ, nye ameti bliboa mele mɔ kpɔm nɛ;

Mele eƒe nya la sinu kpɔm.

 6 Mele Afetɔ sinu kpɔm vevie,

Wu ale si zãdzɔlawo kpɔa mɔ na ŋdi,

Ɛ̃, wu ale si zãdzɔlawo kpɔa mɔ na ŋdi.

 7 Israel nenɔ Afetɔ sinu kpɔm,

Elabena Afetɔ ƒe lɔlɔ̃ la nu metsina o,

Eye ɖeɖe bɔ ɖe esi ŋutɔ.

 8 Aɖe Israel tso eƒe vodadawo katã me.

PSALMOWO 131
1  Oo Afetɔ, dada mele nye dzi me o,

Eye nyemeto ŋku gã hã o;

Nyemekplɔ nu gã nu gãwo ɖo loo,

Alo kplɔ nu siwo gbɔ nye ŋutete ŋu la ɖo o.

 2 Kura o, ke boŋ mena nye luʋɔ dze akɔ anyi eye wòli kpoo,

Abe ɖevi si wotso no na, si le dadaa gbɔ ene;

Nye dzi dze eme, abe vi si wotso no na ene.

 3 Israel nekpɔ Afetɔ sinu

Tso fifia yi mavɔmavɔ me.

PSALMOWO 132
1 Oo Afetɔ, ɖo ŋku David,

Kple eƒe fukpekpewo katã dzi;

 2 Ale si wòka atam na Afetɔ,

Ale si wòɖe adzɔgbe na Yakob ƒe Ŋusẽtɔ la be:

 3 “Nyemage ɖe nye agbadɔ, si nye nye aƒe me o.

Eye nyemamlɔ nye dɔƒe, si nye nye aba dzi o;

 4 Nyemana nye ŋku nadɔ alɔ̃,

Alo aɖo aɖaba aɖaba dzi adɔ akɔlɔ̃e o,

 5 Va se ɖe esime makpɔ teƒe na Afetɔ,

Makpɔ nɔƒe nyui aɖe na Yakob ƒe Ŋusẽtɔ la.”

 6 Kpɔ ɖa! Míese eŋkɔ le Efrata;

Míekpɔe le avenyigbawo dzi.

 7 Mina míage ɖe enɔƒe;

Mina míade ta agu ɖe eƒe afɔɖodzinu ŋgɔ.

 8 Oo Afetɔ, tso nàyi wò gbɔɖemeƒe la,

Wò ŋutɔ kple wò Aɖaka si le tsitre ɖi na wò ŋusẽ.

 9 Wò nunɔlawo neta dzɔdzɔenyenye,

Eye wò nuteƒewɔlawo netso aseye.

10 Le wò subɔla David ta

Mègagbe wò amesiamina la o.

11 Afetɔ ka atam na David;

Nyateƒee, mada le edzi o, be:

“Wò dzidzimevi aɖee

Matsɔ aɖo wò fiazikpui dzi.

12 Ne viwòwo awɔ nye nubabla la dzi,

Eye woalé nye ŋkuɖodzinya siwo mafia wo la me ɖe asi la,

Ekema wo viwo hã

Abɔbɔ nɔ wò fiazikpui dzi tegbee.”

13 Elabena Afetɔ tia Zion;

Edi vevie be wòanye nɔƒe na ye:

14 “Afi siae nye nye gbɔɖemeƒe tegbee;

Afi siae manɔ, elabena esia dim mele vevie.

15 Matsɔ nu nyui geɖewo ayrae;

Matsɔ abolo aɖi ƒoe na eƒe ame dahewo.

16 Mata xɔname na eƒe nunɔlawo,

Eye eƒe nuteƒewɔlawo atso aseye.

17 Afi ma mana David ƒe ŋusẽ nadzi ɖe edzi le.

Medzra akaɖi ɖo ɖi na nye amesiamina la.

18 Mado ŋukpe eƒe futɔwo,

Ke eya ƒe fiakuku anɔ keklẽm le ta nɛ.”

PSALMOWO 133
1  Kpɔ ale si wònyo eye wòvivinae ɖa

Ne nɔviwo le afi ɖeka le ɖekawɔwɔ me!

 2 Ele abe ami nyui si wokɔ ɖe tame,

Si le tsyɔtsyɔm ɖe ge me,

Ðe Aron ƒe ge me,

Eye wòle kɔkɔm ɖe eƒe awuwo ƒe kɔme ene.

 3 Ele abe Hermon-zãmu

Si dzana ɖe Zion towo dzi ene.

Afi mae Afetɔ ɖo be yeƒe yayra nanɔ,

Ɛ̃, be agbe tegbee nanɔ.

PSALMOWO 134
1  Mikafu Afetɔ,

Mi Afetɔ subɔlawo katã,

Mi ame siwo nɔa tsitre ɖe Afetɔ ƒe aƒe la me le zã me.

 2 Miwu miaƒe asiwo dzi le kɔkɔenyenye me

Ne miakafu Afetɔ.

 3 Afetɔ, dziƒo kple anyigba Wɔla la,

Neyra mi tso Zion.

PSALMOWO 135
1  Mikafu Yah!

Mikafu Afetɔ ƒe ŋkɔ;

Oo, mi Afetɔ subɔlawo, mikafui,

 2 Mi ame siwo tsia tsitre ɖe Afetɔ ƒe aƒe la me,

Ðe mía Mawu ƒe aƒe la ƒe xɔxɔnuwo.

 3 Mikafu Yah, elabena Afetɔ nyo ale gbegbe.

Midzi kafukafuha na eƒe ŋkɔ, elabena evivina.

 4 Elabena Yah tia Yakob na eɖokui,

Etia Israel, be wòanye yeƒe nunɔamesi tɔxɛ.

 5 Elabena menyae nyuie be Afetɔ lolo;

Mía Aƒetɔ la ƒo mawu bubuwo katã ta.

 6 Nu sia nu si dze Afetɔ ŋu wòbe yeawɔ la, ewɔnɛ,

Le dziƒo kple anyigba, le atsiaƒuwo kple tɔ goglowo katã me.

 7 Enana alilikpowo tsoa anyigba ƒe mlɔenuwo yia dzi;

Ewɔa dzikedzo na tsidzadza;

Ekplɔa ya donɛ tso eƒe nudzraɖoƒewo.

 8 Eya, ame si wu Egipte ƒe ŋgɔgbeviwo,

Amegbetɔwo kple lãwo siaa.

 9 Oo Egipte, eɖo dzesiwo kple nukunuwo ɖe mewò,

Ðe Farao kple eƒe subɔviwo katã ŋu.

10 Eya, ame si da nu dukɔ geɖewo ƒu anyi,

Eye wòwu fia sesẽwo

11 —Amori-fia Sihon

Kple Basan-fia Og,

Eye wòtsrɔ̃ Kanaan fiaɖuƒewo katã.

12 Etsɔ woƒe anyigba wɔ domenyinui,

Etsɔe wɔ domenyinu na eƒe dukɔ Israel.

13 Oo Afetɔ, wò ŋkɔ li ɖaa tegbee.

Oo Afetɔ, woaɖo ŋku wò gãnyenye dzi tso dzidzime yi dzidzime.

14 Elabena Afetɔ aʋli eƒe dukɔ la ta,

Eye eƒe dɔme atrɔ ɖe esubɔlawo ŋu.

15 Dukɔwo ƒe legbawo nye klosalo kple sika,

Amegbetɔ ƒe asinudɔwɔwɔ wonye.

16 Nu li na wo, gake womeƒoa nu o;

Ŋku li na wo, gake womekpɔa nu o;

17 To li na wo, gake womesea nu o.

Eye gbɔgbɔ aɖeke hã mele woƒe nu me o.

18 Ame siwo wɔa wo la anɔ abe woawo ke ene,

Nenema kee nye ame siwo katã ɖoa dzi ɖe wo ŋu la hã.

19 Oo Israel ƒe aƒe, mikafu Afetɔ.

Oo Aron ƒe aƒe, mikafu Afetɔ.

20 Oo Lewi ƒe aƒe, mikafu Afetɔ.

Mi ame siwo vɔ̃a Afetɔ, mikafu Afetɔ.

21 Woakafu Afetɔ tso Zion,

Eya, ame si le Yerusalem.

Mikafu Yah!

PSALMOWO 136
1  Mida akpe na Afetɔ, elabena eya amea nyo;

Eƒe lɔlɔ̃ si nu metsina o la li tegbee.

 2 Mida akpe na mawuwo dzi Mawu la,

Elabe eƒe lɔlɔ̃ si nu metsina o la li tegbee.

 3 Mida akpe na aƒetɔwo dzi Aƒetɔ la,

Elabe eƒe lɔlɔ̃ si nu metsina o la li tegbee.

 4 Eya ɖeɖe koe wɔa nukunu gãwo,

Elabe eƒe lɔlɔ̃ si nu metsina o la li tegbee.

 5 Eya ame si wɔ dziƒowo le aɖaŋu me,

Elabe eƒe lɔlɔ̃ si nu metsina o la li tegbee.

 6 Eya ame si keke anyigba ɖe tsiwo dzi,

Elabe eƒe lɔlɔ̃ si nu metsina o la li tegbee.

 7 Eya ame si wɔ nu keklẽ gãwo,

Elabe eƒe lɔlɔ̃ si nu metsina o la li tegbee,

 8 Ɣe, ne wòaɖu ŋkeke dzi,

Elabe eƒe lɔlɔ̃ si nu metsina o la li tegbee,

 9 Dzinu kple ɣletiviwo, ne woaɖu zã dzi,

Elabe eƒe lɔlɔ̃ si nu metsina o la li tegbee.

10 Eya ame si wu Egiptetɔwo ƒe ŋgɔgbeviwo,

Elabe eƒe lɔlɔ̃ si nu metsina o la li tegbee.

11 Eya ame si kplɔ Israel dzoe le wo dome,

Elabe eƒe lɔlɔ̃ si nu metsina o la li tegbee,

12 Ekplɔ wo dzoe kple asi sesẽ kpakple alɔ si wòdo ɖe dzi,

Elabe eƒe lɔlɔ̃ si nu metsina o la li tegbee.

13 Eya ame si ma Ƒudzĩ la me ɖe eve,

Elabe eƒe lɔlɔ̃ si nu metsina o la li tegbee.

14 Eya ame si na Israel zɔ to ƒu la titina,

Elabe eƒe lɔlɔ̃ si nu metsina o la li tegbee.

15 Eya ame si ʋuʋu Farao kple eƒe aʋakɔ la kɔ ɖe Ƒudzĩ la me,

Elabe eƒe lɔlɔ̃ si nu metsina o la li tegbee.

16 Eya ame si kplɔ eƒe dukɔ la to gbedzi,

Elabe eƒe lɔlɔ̃ si nu metsina o la li tegbee.

17 Eya ame si da nu fia gãwo ƒu anyi,

Elabe eƒe lɔlɔ̃ si nu metsina o la li tegbee.

18 Eya ame si wu fia sesẽwo,

Elabe eƒe lɔlɔ̃ si nu metsina o la li tegbee,

19 Amori-fia Sihon,

Elabe eƒe lɔlɔ̃ si nu metsina o la li tegbee,

20 Kple Basan-fia Og,

Elabe eƒe lɔlɔ̃ si nu metsina o la li tegbee.

21 Eya ame si tsɔ woƒe anyigba wɔ domenyinui,

Elabe eƒe lɔlɔ̃ si nu metsina o la li tegbee,

22 Etsɔe wɔ domenyinu na eƒe subɔla Israel,

Elabe eƒe lɔlɔ̃ si nu metsina o la li tegbee.

23 Eya ame si ɖo ŋku mía dzi esime wobɔbɔ mí ɖe anyi,

Elabe eƒe lɔlɔ̃ si nu metsina o la li tegbee.

24 Eya ame si ɖe mí tso míaƒe futɔwo si me zi geɖe,

Elabe eƒe lɔlɔ̃ si nu metsina o la li tegbee.

25 Eya ame si naa nuɖuɖu nu gbagbewo katã,

Elabe eƒe lɔlɔ̃ si nu metsina o la li tegbee.

26 Mida akpe na dziƒowo ƒe Mawu la,

Elabe eƒe lɔlɔ̃ si nu metsina o la li tegbee.

PSALMOWO 137
1  Babilon-tɔsisiwo nu, afi mae míebɔbɔ nɔ anyi ɖo.

Esi míeɖo ŋku Zion dzi la, míefa avi.

 2 Amuti siwo le dua me la

Ŋutie míeku míaƒe saŋkuwo ɖo.

 3 Elabena afi mae ame siwo ɖe aboyo mí la bia be míadzi ha na yewo le,

Ame siwo le fewu ɖum le mía ŋu la bia be míado dzidzɔ na yewo hegblɔ be:

“Midzi Zion ha na mí.”

 4 Aleke wɔ míadzi Afetɔ ƒe ha

Le dzronyigba dzi?

 5 Oo Yerusalem, ne meŋlɔ wò be la,

Ekema nye ɖusibɔ hã neŋlɔ eƒe aɖaŋu be.

 6 Nye aɖe nelé ɖe aŋɔme nam

Ne nyemeɖo ŋku dziwò o,

Ne nyemena Yerusalem ƒo

Nu siwo koŋ ŋu mekpɔa dzidzɔ ɖo la ta o.

 7 Oo Afetɔ, ɖo ŋkui,

Ðo ŋku nya si Edom viwo nɔ gbɔgblɔm le Yerusalem ƒe anyidzegbe la dzi, be:

“Mimui ƒu anyi! Mimui ƒu anyi va se ɖe gɔmegɔmea ke!”

 8 Oo Babilon vinyɔnu, wò, ame si woava tsrɔ̃ kpuie,

Dzidzɔtɔe anye ame si aɖo eteƒe na wò,

Ðe ale si nètu nu kpli míi la nu.

 9 Dzidzɔtɔe anye ame si alé viwòwo

Axlã ɖe agakpe.

PSALMOWO 138
1  Makafu wò tso dzi blibo me.

Madzi kafukafuha na wò

Le mawuwo ŋkume.

 2 Mabɔbɔ adze ŋgɔ wò gbedoxɔ kɔkɔe la,

Eye makafu wò ŋkɔ,

Le wò amenuveve kple wò nuteƒewɔwɔ ta.

Elabena èdo wò nya kple wò ŋkɔ ɖe dzi ƒo nu sia nu ta.

 3 Gbe si gbe meyɔ wò la, ètɔ nam;

Èna dzi ɖo ƒonye, eye nèdo ŋusẽm.

 4 Oo Afetɔ, anyigbadzifiawo katã akafu wò,

Elabena woase ŋugbe siwo nèdo.

 5 Woadzi ha le Afetɔ ƒe mɔwo ŋu,

Elabena Afetɔ ƒe ŋutikɔkɔe lolo.

 6 Togbɔ be Afetɔ le dzi boo hã la, edzea si ɖokuibɔbɔla la,

Ke ekpɔa dadala ya tso adzɔge ʋĩi ke.

 7 Ne mele xaxa me tom hã la, àxɔm ɖe agbe.

Àdo wò asi ɖa ɖe nye futɔwo ƒe dɔmedzoe ŋu;

Eye wò nuɖusi axɔ nam.

 8 Afetɔ awɔ nuwo katã ade goe nam.

Oo Afetɔ, wò lɔlɔ̃ si nu metsina o la li tegbee;

Mègagblẽ wò asinudɔwɔwɔwo ɖi o.

PSALMOWO 139
1  Oo Afetɔ, èdzro menye, eye nèdze sim nyuie.

 2 Ènya nye anyinɔnɔ kple nye tsitretsitsi.

Èdze si nye susuwo tso adzɔge ʋĩi ke.

 3 Èlé ŋku ɖe nye gododo kple nye anyimɔmlɔ ŋu;

Eye nye mɔwo katã le nyanya na wò nyuie.

 4 Hafi nya aɖe nava nye aɖe dzi la,

Oo Afetɔ, ènya wo katã nyuie xoxo.

 5 Èle ŋunye godoo, le megbe kple ŋgɔ siaa;

Eye nèda wò asi ɖe dzinye.

 6 Esia nyanya gbɔ nye gɔmesese ŋu.

Ekɔkɔ nam akpa nyemate ŋu aɖo afi ma o.

 7 Afi kae madzo le wò gbɔgbɔ la gbɔ ayi,

Eye afi kae masi le ŋkuwòme ayi?

 8 Ne melia yi dziƒo la, èle afi ma,

Eye ne meɖo nye aba ɖe Tsiẽƒe la, kpɔ ɖa, èle afi ma.

 9 Ne metsɔ agudzedze ƒe aʋalawo dzo,

Be mayi aɖanɔ atsiaƒu ƒe mlɔenu ke hã la,

10 Wò asi akplɔm le afi ma hã,

Eye wò nuɖusi além ɖe te.

11 Ne mebe, “Viviti atsyɔ dzinye!” la,

Ekema zã si do ɖem azu kekeli.

12 Viviti gɔ̃ hã medo blukɔ na wò o,

Ke boŋ zã me akɔ na wò abe ŋkeke me ene;

Viviti le na wò ko abe kekeli ene.

13 Elabena wòe wɔ nye ayikuwo;

Ètsɔ nu xe ŋunye le danye ƒe dɔ me.

14 Mekafu wò, elabena ale si nèwɔm la dzi ŋɔ eye wòwɔ nuku.

Wò dɔwɔwɔwo wɔ nuku,

Eye menya esia nyuie.

15 Nye ƒuwo mele ɣaɣla ɖe wò

Esime wowɔm le ɣaɣlaƒe,

Esime wolɔ̃ nye ŋutinuwo ɖe wo nɔewo me le anyigba tume o.

16 Wò ŋkuwo kpɔm esime menye ʋukɔe;

Eye woŋlɔ eŋu nuwo katã ɖe wò agbalẽ me,

Le ŋkeke siwo me wowɔ wo,

Esime wo dometɔ aɖeke medo haɖe o.

17 Eya ta wò susuwo xɔ asi nam loo!

Oo Mawu, aleke gbegbe wosɔ gbɔe nye esi!

18 Ne mebe maxlẽ wo la, wosɔ gbɔ wu kekuiwo.

Ne menyɔ hã, gbɔwò ko mekpɔtɔ le.

19 Oo Mawu, ne ɖe nàtsrɔ̃ ame vɔ̃ɖi la ɖe!

Ekema ŋutasẽlawo ate ɖa le gbɔnye,

20 Wo, ame siwo tsɔa susu vɔ̃ gblɔa nya vlowo ɖe ŋuwò;

Woawoe nye wò ketɔ siwo yɔa wò ŋkɔ la dzodzro.

21 Oo Afetɔ, ɖe nyemelé fu ame siwo léa fu wò la oa,

Eye ɖe nyemenyɔa ŋu ame siwo dzea aglã ɖe ŋuwò la oa?

22 Melé fu wo kaɖikaɖi;

Futɔ ŋutɔŋutɔwoe wozu nam.

23 Oo Mawu, dzro menye ne nàdze si nye dzi.

Dzro menye, ne nàkpɔ ale si metsi dzodzodzoe le susu mee ɖa.

24 Ne nàkpɔe ɖa be mɔ vɔ̃ɖi aɖe le menye hã,

Ne nàkplɔm to mɔ tegbeetɔ la dzi.

PSALMOWO 140
1  Oo Afetɔ, ɖem tso ame vɔ̃ɖiwo si me;

Kpɔ tanye tso ŋutasẽlawo si me,

 2 Ame siwo ɖoa nu vɔ̃ɖi le woƒe dzi me,

Eye wodea dzre aƒe gbe sia gbe.

 3 Wonyre woƒe aɖe wòle ɖaɖam abe da tɔ ene;

Dzakpata ƒe aɖi le woƒe nu me. (Sela)

 4 Oo Afetɔ, ɖem tso ame vɔ̃ɖiwo si me;

Kpɔ tanye tso ŋutasẽlawo si me,

Ame siwo ɖo tame be yewoaƒum anyi.

 5 Dadalawo ɖo mɔ̃ nam le adzame;

Woɖo ɖɔ ɖe mɔ to nam.

Wotre mɔ̃ nam. (Sela)

 6 Megblɔ na Afetɔ be: “Nye Mawu nènye.

Oo Afetɔ, ƒu to anyi ɖe nye kokoƒogbe ŋu.”

 7 Oo Aƒetɔ Dziɖulagã Afetɔ, nye Xɔnametɔ sesẽ,

Ètsyɔ nu ta nam le aʋakpegbe.

 8 Oo Afetɔ, mègawɔ ame vɔ̃ɖiwo ƒe didi dzi na wo o.

Mègana woƒe nugbeɖoɖo la nadze edzi na wo o, ale be woagado wo ɖokuiwo ɖe dzi o. (Sela)

 9 Na nya vɔ̃ siwo gblɔm ame siwo ƒo xlãm le la,

Natrɔ va woawo ŋutɔwo ƒe ta dzi.

10 Na dzoka xɔxɔwo nadza ɖe wo dzi.

Na woatsɔ wo aƒu gbe ɖe dzo me,

Ðe do globowo me, ne woagafɔ azɔ o.

11 Mègana ameŋugblẽla nakpɔ nɔƒe le anyigba la dzi o.

Na vɔ̃ nayɔ ŋutasẽlawo ɖe nu ne wòaƒo wo aƒu anyi.

12 Menyae nyuie be Afetɔ aʋli ame tsɛwo ta,

Eye wòadrɔ̃ nya na ame dahewo.

13 Ame dzɔdzɔewo akafu wò ŋkɔ la godoo;

Nu dzɔdzɔe wɔlawo anɔ ŋkuwòme.

PSALMOWO 141
1  Oo Afetɔ, wò yɔm mele.

Va xɔ nam kaba.

Ne meyɔ wò la, ɖo to nàse nye gbe.

 2 Nye gbedodoɖa nenɔ abe dzudzɔdonu ʋeʋĩ ene le ŋkuwòme,

Ne mewu nye asiwo dzi la, nenɔ abe fiẽnuɖuvɔsa ene.

 3 Oo Afetɔ, ɖo dzɔla nye nuyi ŋu,

Na woadzɔ nye nuyiwo ƒe ʋɔtru ŋu.

 4 Mègana nye dzi natrɔ ɖe nu vɔ̃ɖi aɖeke ŋu,

Ne makplɔ ame vɔ̃ɖiwo ɖo le nu vɔ̃ɖiwo wɔwɔ me o;

Eye mègana maɖu woƒe nuɖuɖu viviwo gbeɖe o.

 5 Ne ame dzɔdzɔe ƒom la, lɔlɔ̃ vavãe wòɖe fiam;

Ne eka mo nam la, tamemi wòanye nam,

Eye nye ta magbee gbeɖe o.

Ne vɔ̃ dzɔ ɖe wo dzi hã la, manɔ gbedodoɖa dzi.

 6 Woatu asi woƒe ʋɔnudrɔ̃lawo tso agakpe dzi aƒu abu me,

Ke dukɔ la ya ase nye nyawo, elabena wovivina.

 7 Ale si wodzoboa anyigba hekakaa keawoe la,

Nenemae wokaka míaƒe ƒuwo ɖe yɔdo nui.

 8 Gake ŋuwòe nye ŋkuwo le, Oo Aƒetɔ Dziɖulagã Afetɔ.

Wòe mesi tso.

Mègana nye agbe nu natso o.

 9 Kpɔ tanye tso mɔ̃ si wotre nam la ƒe aɖuwo me

Kple nu vɔ̃ɖi wɔlawo ƒe mɔ̃tetrewo me.

10 Ame vɔ̃ɖiwo katã adze woawo ŋutɔwo ƒe ɖɔ me,

Ke nye ya mato eŋu ayi dedie.

PSALMOWO 142
1  Medo ɣli yɔ Afetɔ be wòaxɔ nam;

Mekɔ nye gbe dzi na Afetɔ be wòave nunye.

 2 Metrɔ nye dzimaɖitsitsi kɔ ɖe eŋkume;

Meƒo nu le nye xaxawo ŋu le eŋkume,

 3 Esime nu te nye gbɔgbɔ ŋu le menye.

Ɣemaɣi wò ŋkuwo nɔ nye toƒe ŋu.

Wotre mɔ̃ nam keŋ

Ðe mɔ si metona la dzi.

 4 Trɔ nàkpɔ nye ɖusime ɖa,

Àkpɔe be ame aɖeke metsɔa ɖeke le eme nam o.

Afi aɖeke meli masi ayi o;

Nye nya meka ame aɖeke o.

 5 Oo Afetɔ, wò yɔm mele be nàxɔ nam.

Mebe: “Wòe nye nye sitsoƒe,

Wò koe li nam le agbagbeawo ƒe anyigba dzi.”

 6 Lé to ɖe nye kokoƒoƒo ŋu,

Elabena wobɔbɔm ɖe anyi ŋutɔ.

Ðem tso yonyemetilawo si me,

Elabena wotri akɔ wum sãsãsã.

 7 Ðem tso gaxɔ me,

Ne makafu wò ŋkɔ.

Na ame dzɔdzɔewo naƒo ƒu ɖe ŋunye,

Le esi nèwɔ nyui nam ta.

PSALMOWO 143
1  Oo Afetɔ, se nye gbedodoɖa;

Lé to ɖe nye kokoƒoƒo ŋu.

Tɔ nam le wò nuteƒewɔwɔ kple wò dzɔdzɔenyenye ta.

 2 Mègakplɔ wò subɔla va ʋɔnui o,

Elabena agbagbe aɖeke mele dzɔdzɔe le ŋkuwòme o.

 3 Futɔ la ti yonyeme;

Efanya nye agbe ɖe anyigba.

Etem ɖe viviti me abe ame siwo ku xoxoxo la ene.

 4 Nu te nye gbɔgbɔ ŋu;

Nye dzi lulu le menye.

 5 Meɖo ŋku blemaŋkekewo dzi;

Mede ŋugble le wò dɔwɔwɔwo katã ŋu;

Mesusu wò asinudɔwɔwɔwo ŋu.

 6 Meke nye abɔwo me na wò;

Mele mɔ kpɔm na wò abe ale si kuɖiɖinyigba kpɔa mɔ na tsi ene. (Sela)

 7 Oo Afetɔ, tɔ nam kaba;

Ŋusẽ vɔ le ŋunye kura.

Mègaɣla wò mo ɖem o,

Ne maganɔ abe aʋlimeyilawo ene o.

 8 Na mase wò lɔlɔ̃ si nu metsina o la ŋu nya le ŋdi,

Elabena ŋuwòe meɖo ŋu ɖo.

Fia mɔ si mato lam,

Elabena ŋuwòe metrɔ ɖo.

 9 Oo Afetɔ, ɖem tso nye futɔwo si me.

Wòe mesi tso.

10 Fia wò lɔlɔ̃num mawɔ,

Elabena nye Mawu nènye,

Wò gbɔgbɔ la nyo ŋutɔ;

Na wòakplɔm to anyigba sɔsɔe dzi.

11 Oo Afetɔ, xɔm ɖe agbe le wò ŋkɔ la ta.

Ðem tso xaxa me, le wò dzɔdzɔenyenye ta.

12 Na nye futɔwo nu nayi, le wò lɔlɔ̃ si nu metsina o la ta;

Tsrɔ̃ ame siwo katã le fu ɖem nam,

Elabena wò subɔla menye.

PSALMOWO 144
1  Woakafu Afetɔ, nye Agakpe,

Ame si fiaa avuwɔwɔ nye asiwo,

Eye wòfiaa aʋawɔwɔ nye asibidɛwo.

 2 Amenuvela gã kple mɔ́ sesẽ wònye nam,

Nye sitsoƒe kple nye xɔnametɔ,

Nye akpoxɔnu kple ame si gbɔ mebe ɖo,

Ame si bɔbɔ dukɔwo ɖe tenye.

 3 Oo Afetɔ, nu kae amegbetɔ nye, be nètsɔa ɖe le eme nɛ,

Alo amegbetɔvi si kuna, be nèbua eŋu?

 4 Amegbetɔ le abe ƒuƒu dzro ko ene;

Eƒe ŋkekewo le abe vɔvɔli si nu yina ene.

 5 Oo Afetɔ, ɖiɖi wò dziƒowo, ne nàɖi ɖe anyi;

Ka asi towo ŋu, ne woatu dzudzɔ.

 6 Na dzi nake dzo mia, ne futɔwo naka hlẽ;

Da wò aŋutrɔwo ɖe wo dome, ne woatɔtɔ.

 7 Do wò asi ɖa tso dzi;

Xɔ nam, eye nàɖem tso tsi dzeagbowo me,

Tso amedzroviwo si me,

 8 Ame siwo ƒe nu daa alakpa,

Eye wokɔa ɖusibɔ dzi kaa alakpatam.

 9 Oo Mawu, madzi ha yeye na wò.

Matsɔ kasaŋku kaewotɔ aƒo ha akafu wò,

10 Wò, ame si na dziɖuɖu fiawo,

Ame si ɖe eƒe subɔla David tso yi gblẽnu la nu.

11 Xɔ nam, eye nàɖem tso amedzroviwo si me,

Ame siwo ƒe nu daa alakpa,

Eye wokɔa ɖusibɔ dzi kaa alakpatam.

12 Na mía viŋutsuwo nanɔ abe ati fẽ siwo tsi vlɔvlɔvlɔ ene,

Mía vinyɔnuwo nanɔ abe dzogoedzisɔti siwo wokpa hena fiasãtutu ene.

13 Agblemenuku ɖe sia ɖe ƒomevi ayɔ míaƒe avawo taŋ;

Eye míaƒe lãha siwo le lãnyiƒe la adzi ɖe edzi azu akpewo kple akpe nanewo.

14 Ne fu tsi ɖe míaƒe nyiwo ƒo la, naneke magblẽ le wo ŋu loo alo fu nage le wo ƒo o;

Konyifaɣli aɖeke maɖi le míaƒe ablɔwo me o.

15 Dzidzɔtɔe nye dukɔ si wòanɔ na alea!

Dzidzɔtɔe nye dukɔ si ƒe Mawu Afetɔ nye!

PSALMOWO 145
1  Oo, nye Mawu, nye Fia, mado wò ɖe dzi,

Makafu wò ŋkɔ ɖaa tegbee.

 2 Makafu wò gbe sia gbe;

Makafu wò ŋkɔ ɖaa tegbee.

 3 Afetɔ lolo, eye wòdze kafukafu ŋutɔ;

Eƒe gãnyenye me dzodzro meli o.

 4 Woakafu wò dɔwɔwɔwo tso dzidzime yi dzidzime;

Eye woaƒo nu le nu dzɔtsu siwo nèwɔ la ŋu.

 5 Woaƒo nu le wò gãnyenye ƒe atsyɔ̃ ŋu,

Eye made ŋugble le wò nukudɔwo ŋu.

 6 Woaƒo nu le wò dɔwɔwɔ dziŋɔwo ŋu;

Eye maɖe gbeƒã wò gãnyenye.

 7 Woadudu wò nyuiwɔwɔ geɖeawo ŋu nya akɔ ɖi,

Eye woatso aseye le wò dzɔdzɔenyenye ta.

 8 Afetɔ nye veveseɖeamenula kple nublanuikpɔla,

Medoa dziku kabakaba o, eye eƒe lɔlɔ̃ si nu metsina o la sɔ gbɔ.

 9 Afetɔ wɔa nyui na amewo katã,

Eye wòkpɔa nublanui na eƒe nuwɔwɔwo katã.

10 Oo Afetɔ, wò nuwɔwɔwo katã ada akpe na wò,

Eye ame siwo wɔa nuteƒe na wò la akafu wò.

11 Woagblɔ wò fiaɖuɖu ƒe ŋutikɔkɔe ŋu nya,

Eye woaƒo nu le wò ŋusẽ ŋu,

12 Ne woana amegbetɔviwo nanya wò nu dzɔtsuwo,

Kple wò fianyenye ƒe atsyɔ̃ kple ŋutikɔkɔe.

13 Wò fiaɖuɖu nye fiaɖuɖu si anɔ anyi tegbee,

Eye wò dziɖuɖu anɔ anyi tso dzidzime yi dzidzime.

14 Afetɔ léa ame siwo katã le anyi dzem la ɖe te,

Eye wòfɔa ame siwo katã wobɔbɔ ɖe anyi la ɖe tsitrenu.

15 Ŋkuwo katã le asiwò nu kpɔm;

Eye nènaa woƒe nuɖuɖu wo ɖe enaɣi.

16 Èʋua wò asi me,

Eye nètsɔa nu gbagbewo katã ƒe nudidi ɖia ƒo na woe.

17 Afetɔ ƒe mɔwo katã le dzɔdzɔe,

Eye eƒe nuwɔnawo katã le eteƒe.

18 Afetɔ tsɔ ɖe ame siwo katã yɔnɛ la gbɔ,

Ɛ̃, ɖe ame siwo katã yɔnɛ le nyateƒe me la gbɔ.

19 Ewɔa ame siwo vɔ̃nɛ la ƒe didi dzi na wo;

Esea woƒe ɣlidodo, eye wòxɔna na wo.

20 Afetɔ kpɔa ame siwo katã lɔ̃nɛ la ta,

Ke atsrɔ̃ ame vɔ̃ɖiwo katã gbidigbidi.

21 Nye nu akafu Afetɔ;

Nu gbagbe ɖe sia ɖe nekafu eƒe ŋkɔ kɔkɔe la ɖaa tegbee.

PSALMOWO 146
1  Mikafu Yah!

Nye ameti bliboa nekafu Afetɔ.

 2 Makafu Afetɔ le nye agbenɔɣi katã.

Madzi kafukafuha na nye Mawu zi ale si mele agbe.

 3 Migaɖo ŋu ɖe amegãwo ŋu loo,

Alo ɖe amegbetɔvi si mate ŋu axɔ na ame o la ŋu o.

 4 Eƒe gbɔgbɔ nu tsona, eye wògatrɔna zua anyi;

Gbe ma gbe ke eƒe tamesusuwo katã nu yina.

 5 Dzidzɔtɔe nye ame si ƒe xɔnametɔ Yakob ƒe Mawu la nye,

Ame si da eƒe mɔkpɔkpɔ ɖe Afetɔ eƒe Mawu la dzi,

 6 Eya, Ame si wɔ dziƒo kple anyigba,

Atsiaƒu, kple wo me nuwo katã,

Eya, Ame si wɔa nuteƒe ɖaa tegbee,

 7 Ame si tsoa afia na ame siwo tafam wole,

Ame si naa abolo dɔwuitɔwo.

Afetɔ ɖea ga gamenɔlawo.

 8 Afetɔ ʋua ŋku na ŋkuagbãtɔwo;

Afetɔ fɔa ame siwo wobɔbɔ ɖe anyi la ɖe tsitrenu;

Afetɔ lɔ̃a ame dzɔdzɔewo.

 9 Afetɔ kpɔa amedzroviwo ta;

Eléa tsyɔ̃eviwo kple ahosiwo ɖe te,

Ke egblẽa ame vɔ̃ɖiwo ƒe ɖoɖowo me.

10 Afetɔ anye Fia tegbee,

Oo Zion, wò Mawu anye fia tso dzidzime yi dzidzime.

Mikafu Yah!

PSALMOWO 147
1  Mikafu Yah!

Enyo be míadzi kafukafuha na mía Mawu la;

Aleke wòvivina, eye wònyoe nye esi be woakafui!

 2 Afetɔ le Yerusalem du la tsom;

Eƒoa Israel ƒe ame siwo woka hlẽ la nu ƒu.

 3 Edaa gbe le ame siwo ƒe dzi gbã la ŋu;

Eye wòblaa abi na wo.

 4 Enya xexlẽme na ɣletiviwo;

Eye wòyɔa wo katã ŋkɔ.

 5 Mía Aƒetɔ la lolo, eye eƒe ŋusẽ tri akɔ;

Seɖoƒe meli na eƒe gɔmesese o.

 6 Afetɔ kɔa ame fafawo ɖe dzi,

Ke exlãa ame vɔ̃ɖiwo ɖe anyi.

 7 Midzi akpedaha na Afetɔ;

Mitsɔ saŋku ƒo ha na mía Mawu la,

 8 Eya, Ame si tsɔ alilikpowo xea dziƒowo ŋkume,

Ame si nana tsi dzana ɖe anyigba dzi,

Ame si nana gbe miena ɖe towo dzi.

 9 Eyae naa nuɖuɖu lãwo,

Kple akpaviãvi siwo le xɔxlɔ̃m nɛ la.

10 Mekpɔa dzidzɔ ɖe sɔ ƒe ŋusẽ ŋu o;

Eye menye amegbetɔ ƒe afɔ tsɔtsɔe ye dzea eŋu o.

11 Ke boŋ Afetɔ kpɔa dzidzɔ ɖe ame siwo vɔ̃nɛ la ŋu,

Ðe ame siwo kpɔa mɔ na eƒe lɔlɔ̃ si nu metsina o la ŋu.

12 Oo Yerusalem, kafu Afetɔ.

Oo Zion, do wò Mawu la ɖe dzi.

13 Enaa wò dugbowo ƒe gametiwo sesẽna;

Eyraa viwòwo le mewò.

14 Eyae nana ŋutifafa xɔa wò anyigba dzi;

Etsɔa lu nyuitɔ kekeake ɖia ƒo na wò.

15 Eƒe gbeɖeɖe ɖoa anyigba dzi;

Eƒe nya la tsɔna.

16 Enaa sno abe alẽfu ene;

Ekakaa tsi babla ɖi abe dzofi ene.

17 Edaa eƒe tsikpewo abe abolo wluiwluiwo ene.

Ame kae ate ŋu anɔ te ɖe eƒe vuvɔ nu?

18 Eɖea gbe, eye tsikpewo lólona.

Enana eƒe ya ƒona, eye tsiwo sina lalala.

19 Egblɔa eƒe nya na Yakob,

Eƒe ɖoɖowo kple eƒe ʋɔnudɔdrɔ̃ ŋuti mɔfiamewo na Israel.

20 Mewɔ alea na dukɔ bubu aɖeke o;

Eye womenya naneke tso eƒe ʋɔnudɔdrɔ̃ ŋuti mɔfiamewo ŋu o.

Mikafu Yah!

PSALMOWO 148
1  Mikafu Yah!

Mikafu Afetɔ tso dziƒowo;

Mikafui le kɔkɔƒewo.

 2 Mi eƒe dɔlawo katã, mikafui.

Mi eƒe aʋakɔ blibo la katã, mikafui.

 3 Ɣe kple ɣleti, mikafui.

Ɣletivi keklẽwo katã, mikafui.

 4 Mi dziƒowo ƒe dziƒowo, mikafui,

Kple mi alilia tame tsiwo hã.

 5 Wo katã nekafu Afetɔ ƒe ŋkɔ,

Elabena eyae ɖe gbe, eye wodzɔ.

 6 Eléa wo ɖe te tso mavɔ me yi mavɔ me;

Ede se si nu mayi o.

 7 Mikafu Afetɔ tso anyigba dzi,

Mi ƒumelã klitsuwo kple mi tɔ goglowo katã,

 8 Mi dzikedzo kple kpetsi, sno kple alilikpo dodowo,

Kple ahom si wɔa eƒe gbe dzi,

 9 Mi towo kple mi togbɛwo katã,

Mi ati tsekuwo kple mi sedertiwo katã,

10 Mi gbemelãwo kple mi aƒemelãwo katã,

Mi nu siwo tana kple xe dzodzoewo,

11 Mi anyigbadzifiawo kple mi dukɔwo katã,

Mi amegãwo kple mi anyigbadziʋɔnudrɔ̃lawo katã,

12 Mi ɖekakpuiwo kple ɖetugbuiwo siaa,

Mi ame tsitsiwo kple ɖeviwo siaa.

13 Wo katã nekafu Afetɔ ƒe ŋkɔ,

Elabena eƒe ŋkɔ ɖeɖe koe de dzi boo.

Eƒe gãnyenye gbɔ anyigba kple dziƒo ŋu.

14 Eyae ado eƒe dukɔ ƒe ŋusẽ ɖe dzi,

Be wòanye kafukafu na eƒe nuteƒewɔlawo katã,

Na Israel-viwo, dukɔ si te ɖe eŋu kplikplikpli la.

Mikafu Yah!

PSALMOWO 149
1  Mikafu Yah!*

Midzi ha yeye na Afetɔ;

Mikafui le nuteƒewɔlawo ƒe ha la me.

 2 Israel nekpɔ dzidzɔ ɖe Ewɔla Gã la ŋu;

Zion viwo netso aseye ɖe woƒe Fia la ŋu.

 3 Woaɖu ɣe atsɔ akafu eƒe ŋkɔ,

Woatsɔ axatsɛ kple saŋku aƒo ha akafui.

 4 Elabena Afetɔ ƒe dukɔ ƒe nu nyoa eŋu.

Etsɔa xɔname ɖoa atsyɔ̃ na ame fafawo.

 5 Nuteƒewɔlawo netso aseye le woƒe bubu ta;

Wonegli kple dzidzɔ le woƒe abawo dzi.

 6 Mawukafukafuha nanɔ nu na wo,

Eye yi nuevee nanɔ woƒe asiwo me,

 7 Ne woabia hlɔ̃ dukɔwo,

Eye woahe to na amehawo,

 8 Ne woade kɔsɔkɔsɔ woƒe fiawo,

Kple gakunyowu woƒe bubumewo,

 9 Ne woahe ʋɔnudɔdrɔ̃ si woŋlɔ ɖi ɖe wo ŋu la ava wo dzi.

Esiae nye bubu si woade eƒe nuteƒewɔlawo katã ŋu.

Mikafu Yah!*

PSALMOWO 150
1  Mikafu Yah!

Mikafu Mawu le eƒe kɔkɔeƒe la.

Mikafui le alili si wòtsɔ eƒe ŋusẽ wɔ la me.

 2 Mikafui ɖe eƒe dɔ klitsuwo ta.

Mikafui, elabena eƒe gãnyenye ƒo ɖe sia ɖe ta.

 3 Miku lãdzo miatsɔ akafui.

Mitsɔ kasaŋku kple saŋku kafui.

 4 Mitsɔ axatsɛ, eye miado to aɖu ɣe akafui.

Mitsɔ kasaŋkuwo kple dze kafui.

 5 Mitsɔ ayawagba siwo ƒe gbe me kɔ kafui.

Mitsɔ ayawagba siwo ɖina sesĩe kafui.

 6 Nu sia nu si me agbegbɔgbɔ le la nekafu Yah.

Mikafu Yah!

LEAVE A REPLY

Please enter your comment!
Please enter your name here