Nyagblola

Nyagblɔla (Ecclesiastes) – Nyagblola

1  Nyagblɔla, David vi, ame si nye fia le Yerusalem, ƒe nyawo.
 2 Nyagblɔla be: “Toflokowo ƒe tofloko!
Toflokowo ƒe tofloko! Nu sia nu nye tofloko!”
 3 Viɖe ka koŋue amegbetɔ kpɔna tso eƒe dɔ sesẽ
Siwo katã ŋu wògblana ɖo le ɣea te la me?
 4 Dzidzime nu yina, eye dzidzime vana,
Ke anyigba ya li tegbee.
 5 Ɣe dzena, eye wòɖoa to,
Eye wòɖea abla gatrɔna yia afi si wòdzena tso.
 6 Ya ƒona ɖoa ta anyiehe, eye wògatrɔna yia dziehe;
Etrɔna toa eme madzudzɔmadzudzɔe; eye wònɔa eƒe xlãƒoƒo dzi.
 7 Tɔsisiwo katã sina yia atsiaƒu me, ke atsiaƒu meyɔna gbeɖe o.
Afi si tɔwo sina tsona la, afi mae wogatrɔna yina, ale be woagasi atso afi ma.
 8 Nu sia nu tia ame;
Ame aɖeke mate ŋu aƒo nu le wo ŋu avɔ o.
Nukpɔkpɔ meɖia ƒo na ŋku o;
Eye nusese meyɔa to o.
 9 Nu si nɔ anyi va yi la, eya kee gbɔna anyi nɔ ge,
Eye nu si wowɔ kpɔ la, eya kee woagawɔ;
Ale nu yeye aɖeke mele ɣea te o.
10 Ðe nane li si ŋu ame agblɔ le be: “Kpɔ esia ɖa; nu yeye wònye toa”?
Eli xoxoxo, tso gbe aɖe gbe ke;
Enɔ anyi do ŋgɔ na mí.
11 Womeɖoa ŋku blematɔwo dzi o;
Eye womaɖo ŋku ame siwo gbɔna dzɔdzɔ ge hã dzi o;
Wo megbeviwo maɖo ŋku woawo hã dzi o.
12 Nye, nyagblɔla, meɖu fia ɖe Israel dzi le Yerusalem. 
13 Metsɔ nye dzi ɖo anyi be matsɔ nunya adzro nu siwo katã wowɔna le dziƒoa te la me akpɔ—fuɖenameɖokuidɔ siwo Mawu na amegbetɔviwo be woanɔ wɔwɔm.
14 Melé ŋku ɖe dɔ siwo katã wowɔna le ɣea te la ŋu,
Eye kpɔ ɖa, wo katã wonye tofloko kple dagbadagba ɖe yame sɔŋ!
15 Nu si glɔ̃ la, womate ŋu adzɔe o,
Eye nu si meli o la, womate ŋu axlẽe o.
16 Megblɔ le nye dzi me be: “Kpɔ ɖa! Medze nunya wu ame siwo katã nɔ Yerusalem do ŋgɔ nam, eye nye dzi ke ɖe nunya kple sidzedze geɖe ŋu.” 
17 Metsɔ nye dzi ɖo anyi be madze si nunya, madze si aɖaʋadzedze, eye madze si bometsitsi; esia hã dagbadagba ɖe yame ko wònye.
18 Elabena ne nunya dzi ɖe edzi la, dzivee hã dzina ɖe edzi,
Ale be ame sia ame si dzia sidzedze ɖe edzi la, edzia vevesese hã ɖe edzi.

NYAGBLƆLA 2
1  Megblɔ le nye dzi me be: “Mate agbeɖuɖu kpɔ, ne makpɔ nu nyui si ado tso eme.” Ke kpɔ ɖa, esia hã toflokoe!
 2 Megblɔ le nukoko ŋu be, “Aɖaʋae!”
Eye megblɔ le agbeɖuɖu ŋu be, “Vi kae wòaɖe?”
3 Meɖoe le nye dzi me be matsɔ wain ado dzidzɔ na ɖokuinye, ke hã makpɔtɔ adze nunya; meti bometsitsi gɔ̃ hã yome ne makpɔ nu si nyo na amegbetɔviwo be woawɔ le dziƒoa te le woƒe agbemeŋkeke ʋɛawo me. 
4 Mewɔ dɔ gã dɔ gãwo. Metu xɔwo; mede waingblewo. 
5 Metso abɔwo kple tsaɖibɔwo, eye medo ati tseku vovovowo ɖe wo me. 
6 Meɖe tsitawo, ne matsɔ ade tsi avemeti fẽwo. 
7 Kluviwo kple kosiwo va su asinye, eye esiwo wodzi le aƒea me hã nɔ asinye. Nyihawo kple alẽhawo nɔ asinye taŋ wu ame siwo katã nɔ Yerusalem do ŋgɔ nam. 
8 Meƒo klosalo kple sika nu ƒu, fiawo ƒe kesinɔnuwo kple esiwo tso nuto vovovowo me taŋtaŋ. Meɖo ŋutsu hadzilawo kple nyɔnu hadzilawo, eye medi nu si doa dzidzɔ geɖe na amegbetɔviwo: nyɔnu, ɛ̃, nyɔnu geɖewo nɔ asinye. 
9 Ale meɖo kpo gaɖo kpo ɖe edzi wu ame siwo katã nɔ Yerusalem do ŋgɔ nam. Eye nye nunya mege le asinye o.
10 Nyemete naneke si dzrom la ɖokuinye o. Nyemete dzidzɔ aɖeke ƒomevi nye dzi o, elabena nye dzi kpɔ dzidzɔ ɖe dɔ sesẽ siwo katã mewɔ la ŋu; esiae nye tɔnye gome tso nye hloloetsotsowo katã me. 
11 Ke esi mede ŋugble le dɔ siwo katã nye asiwo wɔ kple dɔ siwo katã ŋu megbla ɖo wɔ ŋu la, mekpɔe be wo katã wonye tofloko kple dagbadagba ɖe yame; viɖe gbagbe aɖeke mele wo me le ɣea te o.
12 Eye metrɔ be malé ŋku ɖe nunya, aɖaʋadzedze, kple bometsitsi ŋu. (Elabena nu kae ame si ava ɖe fia yome la, ate ŋu awɔ? Nu si amewo wɔ va yi xoxo la koe.) 
13 Eye mekpɔ be nunya ƒo bometsitsi ta sãa, abe ale si ko kekeli ƒo viviti tae ene.
14 Nunyala to ŋku ɖe ta; ke bometsila ya zɔa viviti me. Eye meva kpɔe hã be nu ɖeka tɔgbi ye dzɔna ɖe wo katã dzi. 
15 Ale megblɔ le nye dzi me be: “Nu si adzɔ ɖe bometsila dzi la kee ava dzɔ ɖe nye hã dzinye.” Ekema nu kae mekpɔ tso nye nunya gbogboawo me? Eye megblɔ le nye dzi me be: “Esia hã toflokoe.” 
16 Elabena womeɖoa ŋku nunyala loo alo bometsila dzi ɖaa o. Woaŋlɔ wo katã be keŋkeŋ le ŋkeke siwo gbɔna me. Eye aleke nunyala le kuku gee? Abe ale si ko bometsila le kuku ge ene.
17 Ale melé fu agbenɔnɔ, elabena mekpɔe be, dɔ siwo wowɔna le ɣea te la nye fuɖenameɖokui sɔŋ, elabena tofloko kple dagbadagba ɖe yame ko wo katã wonye. 
18 Eye melé fu dɔ sesẽ siwo katã ŋu mevu ɖo wɔ le ɣea te, elabena ɖeko magblẽ wo ɖi na ame si ava ɖe yonyeme la tsã. 
19 Eye ame kae nya ne nunyala loo alo bometsilae wòava nye? Gake eyae ava kpɔ ŋusẽ ɖe dɔ siwo katã metsɔ kutrikuku kple nunya wɔ le ɣea te la dzi. Esia hã toflokoe. 
20 Ale dzi ɖe le ƒonye ɖe dɔ sesẽ siwo katã ŋu mevu ɖo wɔ le ɣea te la ŋu. 
21 Elabena ne ame tsɔ nunya kple sidzedze kpakple aɖaŋu wɔ dɔ sesĩe hã la, ame si mekpe fu aɖeke le eŋu o la si mee eƒe gome la ayi. Esia hã tofloko kple vɔ̃ gã aɖe wònye.
22 Nu ka tututue amegbetɔ kpɔna tso eƒe hloloetsotso kple dɔ siwo katã ŋu wòvu ɖo wɔ le ɣea te la me? 
23 Elabena le eƒe ŋkekewo katã me la, dɔ siwo wòwɔna nye vevesese kple dzivee sɔŋ, eye le zã me hã, eƒe dzi megbɔna ɖe eme o. Esia hã toflokoe.
24 Naneke menyo na amegbetɔ wu be, wòaɖu nu ano nu, eye wòakpɔ dzidzɔ le dɔ sesẽ siwo wòwɔna la ta o. Nye la, mekpɔ be Mawu vavã la ƒe asi mee esia hã tso, 
25 elabena ame kae ɖua nu noa nu nyuie wum?
26 Mawu tsɔ nunya, sidzedze kple dzidzɔkpɔkpɔ na ame si ƒe nu nyo eŋu, ke nu vɔ̃ wɔla ya, ede dɔ asi nɛ be wòaƒo nuwo nu ƒu ahali kɔ wo ɖi, ale be Mawu vavã la natsɔ wo ana ame si ƒe nu nyo eŋu. Esia hã tofloko kple dagbadagba ɖe yame wònye.

NYAGBLƆLA 3
1  Ɣeyiɣi li na nu sia nu,
Eye ɣeyiɣi li na nu sia nu wɔwɔ le dziƒoa te:
 2 Vidziɣi li, eye kuɣi li;
Nuƒãɣi li, eye nuŋeɣi li;
 3 Amewuɣi li, eye gbedaɣi li;
Nugbãɣi li, eye nutuɣi li;
 4 Avifaɣi li, eye nukoɣi li;
Konyifaɣi li, eye ɣeɖuɣi li;
 5 Kpekakaɣi li, eye kpeƒoƒuɣi li;
Asikplakɔɣi li, eye asimakplakɔɣi li;
 6 Nudiɣi li, eye nubuɣi li;
Nudzraɖoɣi li, eye nuƒugbeɣi li;
 7 Nuvuvuɣi li, eye nutɔɣi li;
Ðoɖoeziɣi li, eye nuƒoɣi li;
 8 Lɔlɔ̃ɣi li, eye fuléɣi li;
Aʋawɔɣi li, eye ŋutifafaɣi li.
9 Viɖe kae ame kpɔna tso eƒe kutrikukuwo katã me? 
10 Mekpɔ dɔ si Mawu na amegbetɔwo be woanɔ wɔwɔm la. 
11 Ewɔ nuwo katã nyuie ɖe wo wɔɣi. Ede mavɔmavɔ gɔ̃ hã dzi me na wo; ke hã amegbetɔ manya mɔnu le dɔ siwo Mawu vavã la wɔ la ŋu tso gɔmedzedze va se ɖe nuwuwu o.
12 Meƒo nya ta be, nu nyui aɖeke meli ame nawɔ wu be wòakpɔ dzidzɔ ahawɔ nyui le eƒe agbenɔɣi o,
13 eye be ame sia ame naɖu nu ano nu, eye wòakpɔ dzidzɔ le eƒe dɔ sesẽ wɔwɔwo katã me. Mawu ƒe nunanae wònye.
14 Meva dze sii be, nu sia nu si Mawu vavã la wɔ la, anɔ anyi ɖaa. Naneke meli woatsɔ akpee loo alo aɖe le eme o. Mawu vavã lae wɔe alea, be amewo navɔ̃ ye.
15 Nu sia nu si li la, enɔ anyi kpɔ, eye nu si ava va la, li xoxoxo; ke Mawu vavã la dia nu si yome tim wole la gɔme.
16 Megakpɔ esia hã le ɣea te: Vɔ̃ɖinyenye xɔ ɖe ʋɔnu dzɔdzɔe dɔdrɔ̃ teƒe, eye nu vɔ̃ɖi wɔwɔ xɔ ɖe nu dzɔdzɔe wɔwɔ teƒe. 
17 Ale megblɔ le nye dzi me be: “Mawu vavã la le ʋɔnu drɔ̃ ge ame dzɔdzɔe kple ame vɔ̃ɖi siaa, elabena ɣeyiɣi li na nu sia nu kple dɔ sia dɔ.”
18 Megagblɔ le amegbetɔwo ŋu le nye dzi me be, Mawu vavã la ado wo kpɔ, ne woadze sii be, ɖeko yewole abe lãwo ke ene, 
19 elabena nu ɖeka tɔgbi ye dzɔna ɖe amegbetɔwo kple lãwo siaa dzi. Ale si esiawo kunae la, nenemae ekemɛawo hã kunae; gbɔgbɔ ɖekae le wo katã si. Eya ta amegbetɔ mexɔ asi wu lã o, elabena nu sia nu nye tofloko.
20 Wo katã woyina teƒe ɖeka. Anyi me wo katã wotso, eye anyie wo katã woagatrɔ azu. 
21 Ame kae nya ne amegbetɔwo ƒe gbɔgbɔ yia dzi, eye lãwo ƒe gbɔgbɔ yia anyi me? 
22 Eye mekpɔ be, naneke menyo wu be amegbetɔ nakpɔ dzidzɔ tso eƒe dɔwɔwɔwo me o, elabena emae nye eƒe viɖe; elabena ame kae ate ŋu ana wòakpɔ nu si ava dzɔ le eƒe ku megbe?

NYAGBLƆLA 4
1  Megalé ŋku ɖe ameteteɖeanyi siwo katã yia edzi le ɣea te la ŋu. Mekpɔ ame siwo tem wole ɖe anyi la ƒe aɖatsiwo, ke akɔfala aɖeke meli na wo o. Ŋusẽ le ame siwo te wo ɖe anyi la si, ale be womekpɔ akɔfala aɖeke o. 
2 Eye mekpɔe be ame siwo ku xoxo la tɔ nyo wu agbagbeawo tɔ. 
3 Ke ame siwo medzɔ haɖe ne woayi nuxaxadonamenu siwo wɔm wole le ɣea te kpɔ ge o ya tɔ ganyo wu wo ame evea siaa tɔ.
4 Eye megakpɔ be, hoʋiʋli kple ame nɔewoe dɔa amewo wokua kutri geɖe hewɔa aɖaŋudɔ gbogboawo; esia hã tofloko kple dagbadagba ɖe yame wònye.
5 Bometsila de asi asitɛ me, evɔ wòle ku ɖim.
6 Gbɔɖeme asiʋlo ɖeka nyo wu dɔ sesẽ wɔwɔ kple dagbadagba ɖe yame asiʋlo eve.
7 Megatrɔ susu ɖe nu bubu aɖe si hã nye tofloko le ɣea te la ŋu: 
8 Ame aɖe ya ɖeka koe li, eye ame aɖeke mele esi o; vi alo nɔvi hã mele esi o, gake eƒe dɔ sesẽ wɔwɔwo mewua enu gbeɖe o. Kesinɔnuwo meɖia ƒo na eƒe ŋku o. Gake ɖe wòbiaa eɖokui be, “Ame ka ta gɔ̃e mehele dɔ sesẽ wɔm hele nu nyuiwo tem ɖokuinye ɖo”? Esia hã tofloko kple fuɖenameɖokuidɔ ko wònye.
9 Ne ame le eve la, enyo wu ame ɖeka, elabena woakpɔ fetu nyui ɖe woƒe dɔ sesẽ wɔwɔ ta. 
10 Elabena ne wo dometɔ ɖeka dze anyi la, evelia afɔe ɖe tsitre. Ke aleke wòanɔ na ame si dze anyi eye ame aɖeke meli afɔe ɖe tsitre o la?
11 Gawu la, ne ame eve mlɔ wo nɔewo xa la, woléa dzo ɖe wo nɔewo ŋu, ke aleke ame ɖeka ate ŋu alé dzo ɖe eɖokui ŋu? 
12 Eye ne ame aɖe ate ŋu aɖu ame ɖeka dzi hã la, ame eve ya ate ŋu anɔ te ɖe enu. Eye ka etɔ̃ si wogbi mate ŋu atso bɔbɔe o.
13 Ðekakpuivi dahe nyanu nyo wu fia tsitsi tsibome, si megasea aɖaŋuɖoɖo o. 
14 Edo tso gaxɔ me heva zu fia, evɔ ahedada mee wodzii ɖo le ame ma ƒe fiaɖuƒe la me hafi. 
15 Mede ŋugble le agbagbeawo katã, siwo zɔna le ɣea te, kple ale si nuwo va yii na ɖekakpuivi si va xɔ ɖe ame kemɛa teƒe la ŋu. 
16 Togbɔ be edzidelawo de ha kpaŋ hã la, ame siwo ava va emegbe makpɔ dzidzɔ ɖe eŋu o. Esia hã tofloko kple dagbadagba ɖe yame wònye.

NYAGBLƆLA 5
1  Ne èyina Mawu vavã la ƒe me la, lé ŋku ɖe wò afɔɖeɖewo ŋu nyuie; anyo be nàyi ake to nyuie ase nya, wu be nàyi aɖasa vɔ abe ale si bometsilawo wɔna ene, elabena womenya be nu si wɔm yewole nye vɔ̃ o.
2 Wò nu megatsɔ blablabla o, eye mègatsɔ dzitsitsi ƒo nu le Mawu vavã la ŋkume o, elabena Mawu vavã la le dziƒo, ke wòa nèle anyigba. Esia tae wòle be wò nyawo nanɔ ʋɛ ɖo. 
3 Elabena dzimaɖitsitsi ɖe dɔ ŋu fũu akpae nana wokua drɔ̃e, eye nu kpoloe ƒoƒoe ɖea ha bometsila. 
4 Ne èɖe adzɔgbe na Mawu la, mègahe edziwɔwɔ ɖe megbe o, elabena bometsilawo ƒe nu menyoa eŋu o. Adzɔgbe si nèɖe la, wɔ edzi. 
5 Ne mèɖe adzɔgbe o la, enyo wu be nàɖe adzɔgbe, gake màwɔ edzi o. 
6 Mègana wò nu nakplɔ wò ade nu vɔ̃ me o, eye mègagblɔ le mawudɔla ŋkume be yemeɖoe hafi o. Nu ka tae nàna Mawu vavã la nado dɔmedzoe le wò nuƒoƒo ta, eye wòagblẽ wò asinudɔwɔwɔ dome? 
7 Elabena ale si ko dzimaɖitsitsi ɖe dɔ ŋu fũu akpa nana wokua drɔ̃e la, nenema kee nu kpoloe ƒoƒo hã meɖea vi aɖeke o. Ke vɔ̃ Mawu vavã la.
8 Ne èkpɔe be wote ame dahe ɖe anyi, wobaɖa afɔ na nya dzɔdzɔe eye wotu afɔ nu dzɔdzɔe wɔwɔ me le miaƒe nutoa me la, megawɔ nuku na wò o. Elabena amegã si le ɖoƒe kɔkɔ ma la, ame si le ɖoƒe si kɔkɔ wu etɔ la li le ekpɔm, eye ame bubu siwo kɔ boo wu woawo hã li.
9 Azɔ hã, wo katã wokpɔa viɖe tso anyigba la ƒe kutsetsewo me; anyigba la dzi nukuwo ɖea vi na fia la ŋutɔ hã.
10 Ame si lɔ̃a ga la, ga maɖi ƒo nɛ akpɔ o, eye ame si lɔ̃a kesinɔnuwo la, viɖe maɖi ƒo nɛ akpɔ o. Esia hã toflokoe.
11 Ne nu nyuiwo dzi ɖe edzi la, eɖulawo hã dzina ɖe edzi. Eye viɖe kae nua tɔ kpɔna tsoa eme, ne menye be wòakpɔe kple ŋku ko o?
12 Subɔvi ɖaɖu nu ʋɛ loo alo ɖaɖu nu sɔgbɔ o, alɔ̃ vivina nɛ, ke nu gbogbo siwo le kesinɔtɔ si la menana wòdɔa alɔ̃ o.
13 Vɔ̃ gã si mekpɔ le ɣea tee nye be, nu gbogbo si kesinɔtɔ dzra ɖo ɖi la hea gbegblẽ vaa eya ŋutɔ dzi. 
14 Dɔ aɖe si me afɔku le lae na kesinɔnu mawo dome gblẽ, eye ne eva dzi viŋutsu la, naneke megale esi wòagblẽ ɖi nɛ o.
15 Ale si ame le amama hafi tso dadaa ƒe dɔ me va la, nenemae wòaganɔ ayii. Eye mate ŋu atsɔ nu siwo wòkpɔ tso eƒe dɔ sesẽ wɔwɔwo me la ƒe ɖeke ɖe asi ayii o.
16 Esia hã nye vɔ̃ gã aɖe: Ale si ko ame le hafi va la, nenema ko wòaganɔ ayi, ke viɖe kae le eme na ame si le dɔ sesẽ wɔm ɖe yame? 
17 Azɔ hã, eɖua nu le viviti me gbe sia gbe, le dzibibi, dɔléle kple dziku geɖe me.
18 Nu si mekpɔ be enyo eye wòsɔ ye nye esi: be ame naɖu nu ano nu eye wòakpɔ dzidzɔ le dɔ sesẽ siwo katã ŋu wògbla ɖo wɔ le ɣea te le eƒe agbemeŋkeke ʋɛ siwo Mawu vavã la tsɔ nɛ me la me, elabena esiae nye eƒe fetu. 
19 Azɔ hã, ne Mawu vavã la na kesinɔnu kple ŋutilãmenu ame aɖe, eye wòna ŋusẽe be wòawɔ wo ŋu dɔ la, ele be wòaxɔ eƒe fetu ahakpɔ dzidzɔ le eƒe dɔ sesẽ wɔwɔ me. Mawu ƒe nunanae esia hã nye. 
20 Elabena ƒãa hafi wògabua eƒe agbemeŋkekewo ƒe yiyi ŋu, le esi Mawu vavã la na eƒe susu katã le eƒe dzi ƒe dzidzɔkpɔkpɔ ŋu ta.

NYAGBLƆLA 6
1  Vɔ̃ bubu aɖe li si megakpɔ le ɣea te, si dzɔna ɖe amegbetɔwo dzi edziedzi: 
2 Mawu vavã la na kesinɔnu, ŋutilãmenu kple bubu ame aɖe, ale be nu siwo dzronɛ la katã sua esi; gake Mawu vavã la menana wòɖunɛ o, ke ame tutɔ boŋue va ɖunɛ. Esia nye tofloko kple fuwɔame gã aɖe. 
3 Ne ame aɖe dzi vi alafa, eƒe agbenɔƒewo sɔ gbɔ, eye wòtsi xɔ ƒe geɖe, gake metsɔ eƒe nu nyuiwo ɖi ƒoe na eɖokui hafi yi yɔdo me o la, ekema magblɔ be vi si ku hafi wodzi nyo wui. 
4 Elabena dzodzroe vi sia dzɔ hetrɔ yi viviti me, eye eƒe ŋkɔ bu ɖe viviti me. 
5 Togbɔ be mekpɔ ɣe gɔ̃ hã kpɔ loo alo nya naneke o hã la, etɔ me nyo wu ame kemɛa tɔ. 
6 Nenye be ame nɔ agbe ƒe akpe ɖeka zi gbɔ zi eve, gake mekpɔ dzidzɔ aɖeke le agbe me o ɖe, viɖe kae wònye? Menye teƒe ɖeka ko yim amewo katã le oa?
7 Amegbetɔ ƒe dɔ sesẽ wɔwɔwo katã la, eƒe nu ko wòwɔnɛ na; gake meɖia ƒo ɣeaɖekeɣi o. 
8 Elabena nu ka mee nunyala le ŋgɔ na bometsila le, alo viɖe kae ame dahe kpɔna ne enya ale si wòanɔ te ɖe agbea nu? 
9 Enyo be woakpɔ dzidzɔ ɖe nu si ame ƒe ŋku kpɔ ŋu wu be woanɔ nudzodzrowo yome. Esia hã tofloko kple dagbadagba ɖe yame ko wònye.
10 Nu sia nu si li la, wona ŋkɔe xoxo, eye wonya ale si amegbetɔ le; eye mate ŋu ahe nya kple ame si sesẽ wui la o. 
11 Ne nyawo sɔ gbɔ fũu la, nya gbɔlowo hã sɔa gbɔ fũu; eye viɖe kae amegbetɔ kpɔna tsoa eme? 
12 Ame kae nya nu nyuitɔ si wòle be amegbetɔ nawɔ le eƒe agbemeŋkeke ʋɛ siwo nye tofloko, siwo nu va yina abe vɔvɔli ene la me? Elabena ame kae ate ŋu agblɔ nu si ava dzɔ le ɣea te le ame ƒe ku megbe la nɛ?

NYAGBLƆLA 7
1  Ŋkɔ nyui nyo wu ami xɔasi, eye kugbe nyo wu dzigbe. 
2 Kuƒemeyiyi nyo wu aglotuƒeyiyi, elabena afi kemɛa nye amegbetɔwo katã ƒe nuwuƒe, eye ele be wòade dzi gbɔ na agbagbeawo. 
3 Nuxaxa nyo wu nukoko, elabena ne mo lé blanui la, ewɔa dɔ ɖe ame ƒe dzi dzi wu. 
4 Nunyalawo ƒe dzi le aƒe si me konyifafa le, ke bometsilawo ƒe dzi le aƒe si me aglotutu le.
5 Nunyala ƒe mokaname sese nyo wu bometsilawo ƒe kafukafuha sese. 
6 Elabena ale si ŋùti wóna kpotokpoto le ze gɔmee la, nenemae bometsila ƒe nukoko le; esia hã toflokoe. 
7 Gake ameteteɖeanyi ate ŋu ado aɖaʋa nunyala, eye zãnuxɔxɔ gblẽa ame ƒe dzi.
8 Nu ƒe nuwuwu nyo wu eƒe gɔmedzedze. Dzigbɔɖitɔ nyo wu dadala. 9 Mègayɔ ɖe dzikudodo ŋu o, elabena bometsilawo ƒe akɔtae dziku nɔna.
10 Mègabia be, “Nu ka tae tsãŋkekewo nyo wu fifitɔwo?” hã o, elabena mèle biabiam le nunya me o.
11 Nunya si ŋu domenyinu kpe ɖo la, nu nyui aɖee wònye, eye viɖenue wònye na ame siwo kpɔa ɣe ƒe keklẽ. 
12 Elabena nunya kpɔa ame ta, abe ale si ko ga hã kpɔa ame ta ene, ke nu si nyo le sidzedze ŋue nye be: Nunya kpɔa ame si si wòle la ƒe agbe ta.
13 Lé ŋku ɖe Mawu vavã la ƒe dɔwo ŋu, elabena ame kae ate ŋu adzɔ nu si wòglɔ̃ la? 
14 Ne ŋkekea me nyo la, wò nuwɔnawo naɖee afia be eme nyo, ke ne ŋkekea me menyo o hã, dze sii be Mawue wɔ eya hã abe ekemɛa ke ene, ne amegbetɔ naganya nu si tututu ava dzɔ ɖe edzi emegbe la ƒe ɖeke o.
15 Mekpɔ nu sia nu le nye agbemeŋkeke ƒuƒluawo me—mekpɔ ame dzɔdzɔe siwo nu yina togbɔ be wowɔa nu dzɔdzɔe kple ame vɔ̃ɖi siwo nɔa agbe didi togbɔ be wovɔ̃ɖi hã.
16 Mègawɔ ɖokuiwò ame dzɔdzɔe akpa o, eye mèganya nu wòagbɔ eme akpa hã o. Nu ka tae nàgblẽ ɖokuiwò dome? 
17 Mègawɔ nu vɔ̃ɖi wòagbɔ eme o, eye mèganye bometsila hã o. Nu ka tae nàku kukpo? 
18 Enyo be nàlé nuxlɔ̃ame si wona wò me ɖe asi, eye mègana ekemɛa hã nage le asiwò o; elabena ame si vɔ̃a Mawu la alé wo ame evea me ɖe asi.
19 Nunya doa ŋusẽ nunyala wu ŋusẽtɔ ewo siwo le du me. 
20 Elabena ame dzɔdzɔe aɖeke mele anyigba dzi, si wɔa nu nyui sɔŋ eye mewɔa nu vɔ̃ o.
21 Azɔ hã, mègatsɔ wò dzi ɖo nya sia nya si amewo gblɔna la ŋu o; ne menye nenema o la, àva se wò subɔvi wòanɔ ɖiŋu dom na wò; 
22 elabena wò ŋutɔ hã ènyae nyuie le wò dzi me be yedo ɖiŋu na amewo kpɔ zi geɖe.
23 Metsɔ nunya do nu siawo katã kpɔ, eye megblɔ be: “Madze nunya.” Gake nyemete ŋui o. 
24 Nu si li la, egbɔ metsɔ o, eye eme goglo ale gbegbe. Ame kae ate ŋu ase egɔme? 
25 Nye la, metsɔ nye dzi ɖo anyi be madze si nunya, madzro eme, eye madii, ne makpɔ susu si ta nuwo le alea, ne manyae be movidzɔdzɔ nye vɔɖivɔ̃ɖi, eye tsukuku nye bometsitsi. 
26 Eye mekpɔ nu sia be: Nu si vena wu kue nye nyɔnu si zu adoboli, eƒe dzi nye ɖɔ, eye eƒe asiwo nye kunyowu. Ame si ƒe nu dzea Mawu vavã la ŋu la asi le enu, ke nu vɔ̃ wɔla ya adze esi me.
27 Nyagblɔla be: “Kpɔ ɖa! Esia ŋue meke ɖo; medzro nuwo me ɖekaɖeka, ne maƒo nya ta, 
28 gake nyemeke ɖe nu si dim menɔ atraɖii la ŋu o. Mekpɔ ŋutsu ɖeka le ame akpe ɖeka dome, ke nyemekpɔ nyɔnu ɖeka le wo katã dome o. 
29 Esia ko mekpɔ, be: Mawu vavã la wɔ amegbetɔwo wole dzɔdzɔe, ke woawo ŋutɔwoe ti ayedzedze geɖe yome.”

NYAGBLƆLA 8
1  Ame kae le abe nunyala ene? Ame kae nya kuxi gbɔ kpɔnu? Nunya nana ame ƒe mo klẽna, eye eƒe moyɔyɔ gɔ̃ hã trɔna zua mokɔkɔ.
2 Mebe: “Le bubudede Mawu ƒe atamkaka ŋu ta la, wɔ ɖe fia ƒe sedede dzi. 
3 Mègatsi klokloklo be yeadzo le eŋkume o. Mègade nu vɔ̃ɖi dzi o, elabena nu sia nu si dze eŋu wòbe yeawɔ la, ate ŋu awɔe, 
4 le esi ŋusẽ geɖe le fia ƒe nya ŋu ta; eye ame kae ate ŋu agblɔ nɛ be, ‘Nu kae wònye wɔm nèle?’”
5 Ame si léa sedede me ɖe asi la, womawɔ vɔ̃ aɖekee o, eye ame si si dzi nyanu le la dzea si ɣeyiɣi nyuitɔ kple mɔnu nyuitɔ. 
6 Elabena ɣeyiɣi kple mɔnu li na nu sia nu, le esi amegbetɔwo ƒe xaxawo sɔ gbɔ ŋutɔ ta. 
7 Elabena ame aɖeke menya nu si gbɔna dzɔdzɔ ge o, eye ame kae ate ŋu agblɔ ale si tututu wòadzɔe?
8 Ale si ko ame aɖeke mekpɔ ŋusẽ ɖe gbɔgbɔ dzi ne wòaɖo asi gbɔgbɔ dzi o la, nenema kee ame aɖeke mekpɔ ŋusẽ ɖe kugbe hã dzi o. Ale si ko womeɖea asi le ame ŋu le aʋa me o la, nenema kee nu vɔ̃ɖi wɔwɔ maɖe nu vɔ̃ɖi wɔlawo o.
9 Nu siawo katã teƒee mekpɔ esi metsɔ nye dzi ɖo nu siwo katã wowɔna le ɣea te la ŋu, le ɣeyiɣi siawo katã me la, amegbetɔ ɖua fia ɖe amegbetɔ dzi hena eƒe gbegblẽ. 
10 Mekpɔ ame vɔ̃ɖiwo ɖiƒe, wo, ame siwo yia kɔkɔeƒe la tsã gagbɔna, gake woŋlɔ wo be le du si me wowɔ nu siawo le la me. Esia hã toflokoe.
11 Esi wometsoa afia le nu vɔ̃ɖi wɔwɔ ŋu kaba o tae dzi ɖoa amegbetɔviwo ƒo ɖe nu vɔ̃ɖi wɔwɔ ŋu ɖo. 
12 Ne nu vɔ̃ wɔla wɔa nu vɔ̃ɖi zi alafa gake nɔa agbe didi hã la, nye ya menyae be eme anyo na ame siwo vɔ̃a Mawu vavã la godoo, elabena wovɔ̃a eya amea. 
13 Ke eme manyo na ame vɔ̃ɖi ya o, eye madidi eƒe agbenɔƒe siwo le abe vɔvɔli ene la hã ɖe edzi o, elabena mevɔ̃a Mawu o.
14 Nu dzodzro aɖe yia edzi le anyigba dzi, si nye be: Ame dzɔdzɔe aɖewo li, siwo ŋu wowɔa nu ɖo abe nu vɔ̃ɖi wɔlawoe wonye ene, eye ame vɔ̃ɖi aɖewo li, siwo ŋu wowɔa nu ɖo abe nu nyui wɔlawoe wonye ene. Mebe esia hã toflokoe.
15 Eya ta mekafu dzidzɔkpɔkpɔ, elabena naneke menyo na amegbetɔ le ɣea te wu be wòaɖu nu ano nu ahakpɔ dzidzɔ o; ele be esia nakplɔe esi wòle dɔ wɔm veviedodotɔe le eƒe agbemeŋkeke siwo Mawu vavã la nɛ le ɣea te la me.
16 Metsɔ nye dzi ɖo anyi be madze nunya, eye makpɔ dɔ siwo katã wowɔna le anyigba dzi, eye metsia alɔ̃madɔmadɔe zã kple keli gɔ̃ hã. 
17 Eye melé ŋku ɖe Mawu vavã la ƒe dɔwo katã ŋu, eye mekpɔ be amegbetɔ mate ŋu anya ta le nu siwo katã yia edzi le ɣea te la nu o. Aleke kee amegbetɔwo ɖaku kutrii o, womanya ta le enu o. Eye ne wobe yewoƒe nunya ana yewoake ɖe eŋu hã la, womate ŋu ase egɔme wòade edeƒe o.

NYAGBLƆLA 9
1  Metsɔ nu siawo katã de nye dzi me, eye meƒo nya ta be, ame dzɔdzɔewo kple nunyalawo kpakple woƒe dɔwɔwɔwo le Mawu vavã la si me. Amegbetɔwo menya lɔlɔ̃ kple fuléle siwo katã nɔ anyi do ŋgɔ na wo la o. 
2 Nu ɖeka tɔgbi ye dzɔna ɖe amewo katã dzi, ɖe ame dzɔdzɔe kple ame vɔ̃ɖi dzi, ɖe ame nyui kple ame dzadzɛ kpakple ame si mele dzadzɛ o dzi, ɖe ame siwo saa vɔ kple ame siwo mesaa vɔ o siaa dzi. Nu nyui wɔla kple nu vɔ̃ wɔla sɔ; ame si kaa atam kple ame si ɖɔa ŋu ɖo hafi kaa atam la sɔ. 
3 Esiae nye dzigbãnya aɖe si dzɔna le ɣea te: Esi wònye nu ɖeka tɔgbi ye dzɔna ɖe amewo katã dzi mlɔeba tae amegbetɔviwo ƒe dzi yɔ fũu kple nu baɖa wɔwɔ ɖo; eye tsukunuwɔwɔ le dzi me na wo le woƒe agbenɔɣi kaka wotsɔ kuna!
4 Ame sia ame si le agbagbeawo dome la, mɔkpɔkpɔ le esi, elabena avu gbagbe nyo wu dzata kuku. 
5 Elabena agbagbeawo nyae be yewogbɔna kuku ge, ke kukuawo meganya naneke kura o; eye fetu aɖeke megali na wo o, elabena womegaɖoa ŋku wo dzi o. 
6 Woƒe amelɔlɔ̃ kple fuléle kpakple ŋuʋaʋã hã nu yi xoxo, eye womegakpɔa gome aɖeke kura le nu siwo katã yia edzi le ɣea te la me o.
7 Heyi nàɖu wò abolo kple dzidzɔ, eye nàno wò wain kple dzi kpɔdzidzɔ, elabena wò dɔwɔwɔwo dze Mawu vavã la ŋu xoxo. 
8 Wò awuwo nefu tititi ɣeawokatãɣi, eye mègagbe ami dede tame o. 
9 Ðu agbe kple srɔ̃wò lɔlɔ̃a le wò agbemeŋkeke ƒuƒlu siwo katã Mawu na wò le ɣea te la me, si nye wò toflokogbenɔnɔ la katã me, elabena emae nye tɔwò gome le agbe me, le wò kutrikuku le ɣea te la me. 
10 Nu sia nu si wò asi ate ŋu awɔ la, wɔe kple wò ŋusẽ katã, elabena dɔwɔwɔ alo ɖoɖowɔwɔ alo sidzedze alo nunya mele Tsiẽƒe, afi si yi ge nàla o.
11 Megakpɔ nu bubu aɖe hã le ɣea te, be dziɖuɖu le duɖimekeke me mele afɔ ɖeablɛ me ɣesiaɣi o, dziɖuɖu le aʋa me mele kalẽwɔwɔ me ɣesiaɣi o, nuɖuɖukpɔkpɔ mele nunyanya me ɣesiaɣi o, kesinɔnukpɔkpɔ mele tagbɔ ɖaɖɛ me ɣesiaɣi o, eye dzidzedzekpɔkpɔ mele sidzedze me ɣesiaɣi o, elabena azãgbe kple nuɖiɖeame li na wo katã. 
12 Elabena amegbetɔ menya eƒe ɣeyiɣi o. Ale si ko ɖɔ vɔ̃ ɖea tɔmelãwo, eye mɔ̃ ɖea xewoe la, nenemae vɔ̃ lilia amegbetɔwo, ne edzɔ ɖe wo dzi kpoyi.
13 Megakpɔ nu sia hã le nunya ŋu le ɣea te, eye wòwɔ dɔ ɖe dzinye: 
14 Du sue aɖe li, eye ŋutsu ʋɛ aɖewo koe le eme; ke fia sesẽ aɖe ho ɖe eŋu, eye wòɖe to ɖee heƒu kpo gãwo ɖe eŋu. 
15 Ŋutsu dahe nyanu aɖe le dua me, si tsɔ eƒe nunya xɔ na dua. Ke ame aɖeke meɖo ŋku ŋutsu dahe ma dzi o. 
16 Eye megblɔ na ɖokuinye be: ‘Nunya nyo wu ŋusẽ; gake wodoa vlo ame dahe ƒe nunya, eye womeɖoa to eƒe nyawo o.’
17 Enyo be woase nunyala ƒe nya si wògblɔ kple gbe bɔbɔe wu ame si le fia ɖum ɖe bometsilawo dzi la ƒe ɣli.
18 Nunya nyo wu aʋawɔnuwo, ke nu vɔ̃ wɔla ɖeka pɛ ate ŋu agblẽ nu nyui geɖewo dome.

NYAGBLƆLA 10
1  Ale si nu dzodzoe kukuwo nana ami ʋeʋĩ ɖala ƒe ami ʋẽna kũu hegblẽna la, nenema kee bometsitsi vi aɖe gblẽa nunya kple bubu dome.
2 Nunyala ƒe dzi kplɔnɛ toa mɔ dzɔdzɔe dzi, ke bometsila ƒe dzi kplɔnɛ toa mɔ gɔglɔ̃ dzi. 
3 Nunya mele tagbɔ na bometsila ne wòakplɔe le eƒe mɔwo dzi o, enana ame sia ame kpɔnɛ be bometsilae wònye.
4 Ne dziɖula do dɔmedzoe ɖe ŋuwò la, mègaɖe afɔ le tewòƒe o, elabena tufafa tsia nu vɔ̃ gãwo nu.
5 Mekpɔ nu gbãdziname aɖe le ɣea te, si nye vodada si tɔgbi dziɖulawo wɔna: 
6 Wotsɔ bometsilawo ɖo ɖoƒe kɔkɔ geɖewo, ke kesinɔtɔwo boŋ le anyi me.
7 Mekpɔ subɔviwo le sɔ dzi, gake bubumewo le afɔ zɔm abe subɔviwo ene.
8 Ame si le ʋe ɖem la, eyae age dze eme; eye ame si le glikpɔ kakam la, eyae da aɖu.
9 Kpegbãlae kpe sina, eye nakedzelae xɔa abi.
10 Ne lãnu tsi kpo, eye womenyre enu o la, ekema ame azã ŋusẽ geɖe. Gake nunya nana wokpɔa dzidzedze.
11 Ne da ɖu ame hafi wosa gbe dee la, ekema gbesala bibi la mekpɔ viɖe aɖeke tso eme o.
12 Nunyala ƒe numenyawo nyea amenuvenyawo, ke bometsila ƒe nuyiwo gblẽa nu le eya ŋutɔ ŋu. 
13 Edzea eƒe nyawo gɔme kple bometsinyawo, eye eƒe nuƒoƒo wua enu kple aɖaʋanya gblẽnuwo. 
14 Evɔ bometsila ƒoa nu kpoloe.
Amegbetɔ menya nu si gbɔna dzɔdzɔ ge o; ame kae ate ŋu agblɔ nu si ava dzɔ le emegbe la nɛ?
15 Bometsila ƒe dagbadagba nana ɖeɖi tea eŋu, elabena menya ale si wòawɔ ake ɖe mɔ si yi dua me gɔ̃ hã ŋu o.
16 Baba na dukɔ si ƒe fia nye ɖevi, eye eƒe amegãwo nɔa nuɖukplɔ̃ ŋu tso ŋdi kanya! 
17 Dzidzɔ ka gbegbee wòanye na dukɔ si ƒe fia nye bubume ƒe vi, eye eƒe amegãwo ɖua nu le eɖuɣi be woakpɔ ŋusẽ, ke menye be woano aha amu o!
18 Kuviawɔwɔ vivivo nana xɔ ƒe daɖedziwo nyéna ɖe eme, eye alɔgblɔdɔwɔwɔ nana xɔ ɖuɖuna.
19 Abolo nana wokoa nu, eye wain nana agbe vivina; ke gae wotsɔ kpɔa nuhiahiãwo katã gbɔ.
20 Mègado ɖiŋu na fia le wò susu me gɔ̃ hã o, eye mègado ɖiŋu na kesinɔtɔ le wò xɔgã me ke hã o; elabena dziƒoxe aɖe atsɔ nya la ayii, alo nu dzodzoe aɖe ayi aɖato nya si nègblɔ.

NYAGBLƆLA 11
1  Da wò abolo ɖo ɖe tɔwo dzi, elabena àgakpɔe le ŋkeke geɖe megbe. 
2 Na nu ame adre, alo ame enyi gɔ̃ hã, elabena mènya vɔ̃ kae le anyigba dzi va ge o.
3 Ne tsi sɔ gbɔ ɖe alilikpowo me la, edzana ɖe anyigba dzi; eye ne ati mu dze anyiehe alo dziehe gome la, afi si wòmu dze la, afi mae wòtsina.
4 Ame si le ŋku lém ɖe yaƒoƒo ŋu la maƒã nu o, eye ame si le ŋku lém ɖe alilikpowo ŋu la maŋe nu o.
5 Ale si ko mènya ale si gbɔgbɔ wɔa dɔ le ɖevi si le funɔ ƒe dɔ me ƒe ƒuwo me o la, nenema kee mènya Mawu vavã si wɔa nuwo katã la ƒe dɔwɔwɔwo o.
6 Ƒã wò nukuwo le ŋdi, eye wò alɔ megadzudzɔ o va se ɖe fiẽ; elabena mènya kae awɔ nyuie o, eɖanye esi alo ekemɛ o, alo ne wo kple eve lae le nyonyo ge o.
7 Kekeli vivina, eye wònyo be ŋku nakpɔ ɣe. 
8 Elabena nenye be amegbetɔ nɔ agbe ƒe geɖe la, nekpɔ dzidzɔ le ŋkekeawo katã me. Ke neɖo ŋku edzi hã be vivitidogbewo asɔ gbɔ; esiwo katã gbɔna la nye tofloko sɔŋ.
9 Ðekakpui, kpɔ dzidzɔ le wò ɖekakpuime, na wò dzi nakpɔ dzidzɔ le wò ɖekakpuiŋkekewo me. Zɔ ɖe wò dzi ƒe didiwo kple wò ŋku ƒe mɔfiafia nu; gake nyae be Mawu vavã la akplɔ wò ava ʋɔnui le nu siawo katã ta. 
10 Eya ta ɖe dzivedonamenuwo ɖa le wò dzi dzi, eye nàtsri nu siwo agblẽ nu le ŋuwò, elabena sɔhɛmenɔnɔ kple ɖekakpuimenɔnɔ la, toflokoe wonye.

NYAGBLƆLA 12
1  Eya ta ɖo ŋku Wɔwòla Gã la dzi le wò sɔhɛmenɔɣi, hafi ne fukpeɣiwo nava, eye ƒe siwo ŋu nàgblɔ le be, “Womedze ŋunye o” la naɖo; 
2 hafi ne ɣe, kekeli, ɣleti kple ɣletiviwo nava do viviti, eye alilikpowo nakplɔ tsidzadza gã ɖo; 
3 ɣemaɣi aƒeŋudzɔlawo nɔa ƒoƒom, eye ŋutsu kakowo xana gobaa, nyɔnu wɔtulawo dzudzɔa wɔtutu elabena womegasɔ gbɔ o, eye nyɔnu fesrenukpɔlawo ƒe mo doa viviti; 
4 esime ʋɔtru siwo woʋuna ɖo ɖe ablɔ me la nɔa dodo, esime té ƒe ɖiɖi yia to, esime xevi ƒe xɔxlɔ̃ nyɔa ame, eye nyɔnu hadzilawo ƒe gbe yia to. 
5 Ɣemaɣi la, kɔkɔƒe ɖia vɔvɔ̃ na ame, eye ŋɔdzinuwo nɔa mɔ dzi. Yevuziti ƒoa se, eye ʋetsuvi nɔa eɖokui tem xloloxlolo, eye lĩ gbãna, elabena amegbetɔ le azɔli dzi ɖo ta eƒe aƒe mavɔ la me, eye konyifalawo nɔa yiyim le kpɔdomee; 
6 hafi ne klosaloka natso, eye sikagba nagbã, ze si le tɔ to nagbã, eye tsido ƒe tsidumɔ̃ nakaka. 
7 Ekema kewɔ la gbugbɔna yia anyi si wònye tsã la me, eye gbɔgbɔ la hã gbugbɔna yia Mawu vavã, ame si tsɔe na la gbɔ.
8 Nyagblɔla la be, “Toflokowo ƒe tofloko! Nu sia nu nye tofloko!”
9 Menye ɖeko nyagblɔla la dze nunya o, ke efiaa nu si wònya la hã dukɔa, eye wòde ŋugble heku nuwo me tsitotsito, ale be wòte ŋu ƒo lododo geɖewo nu ƒu. 
10 Nyagblɔla la dze agbagba di nya viviwo eye wòŋlɔ nyateƒenya siwo de pɛpɛpɛ.
11 Nunyalawo ƒe nyawo le abe nyikplɔti si nu le tsutsuẽ ene, eye woƒe nyagbɔgblɔwo katã ƒona ɖe nu sesĩe abe gatagbadzɛwo ene; kplɔla ɖeka gbɔe nya siawo tso. 
12 Hekpe ɖe nu siawo ŋu la, vinye, na woaxlɔ̃ nu wò: Agbalẽ geɖe yome nɔnɔ mekpɔa seɖoƒe o, eye wo sɔsrɔ̃ vivivo ɖe wòtea ɖeɖi ŋutilã ŋu.
13 Nyawo katã ƒe taƒonyae nye be: Vɔ̃ Mawu vavã la, eye nàlé eƒe sewo me ɖe asi, elabena nu sia koe wodi tso amegbetɔwo katã si. 
14 Elabena Mawu vavã la le dɔwɔwɔ ɖe sia ɖe ƒomevi he ge ava ʋɔnui, esiwo le ɣaɣla hã, eɖanye nyui alo vɔ̃ o.

LEAVE A REPLY

Please enter your comment!
Please enter your name here