Ʋɔnudrɔ̃lawo

ƲƆNUDRƆ̃LAWO
Judges

1 Le Yosua ƒe ku megbe la, Israel-viwo bia gbe Afetɔ be: “Mía dometɔ kae aho aɖawɔ aʋa kple Kanaantɔwo?” 
2 Afetɔ ɖo eŋu be: “Yuda neho yi. Kpɔ ɖa, metsɔ anyigba la le asi dem nɛ.” 
3 Eye Yuda gblɔ na nɔvia Simeon be: “Va kplɔm yi anyigba si wotsɔ nam la dzi míaɖawɔ aʋa kple Kanaantɔwo. Emegbe nye hã makplɔ wò ayi anyigba si wotsɔ na wò la dzi.” Ale Simeon yi kplii.
4 Esi Yuda ho yi la, Afetɔ tsɔ Kanaantɔwo kple Perizitɔwo de asi na wo, eye wowu ame akpe ewo le Bezek. 
5 Wokpɔ Adoni-Bezek le Bezek, wowɔ aʋa kplii le afi ma, eye woɖu Kanaantɔwo kple Perizitɔwo dzi. 
6 Esi Adoni-Bezek si yina la, woti eyome ɖalée, eye wolã eƒe asidegblefetsuwo kple afɔdegblefetsuwo. 
7 Eye Adoni-Bezek gblɔ be: “Fia blaadre siwo wolã asidegblefetsuwo kple afɔdegblefetsuwo na la fɔa nuɖuɖu le nye kplɔ̃ te. Ale si tututu mewɔ la, eya teƒe Mawu ɖo nam.” Emegbe wokplɔe yi Yerusalem, eye wòku ɖe afi ma.
8 Azɔ Yuda ŋutsuwo wɔ aʋa kple Yerusalem eye woxɔe; wosii kple yi eye wotɔ dzo dua. 
9 Emegbe Yuda ŋutsuwo ho yi ɖawɔ aʋa kple Kanaantɔ siwo le tonuto la me kple esiwo le Negeb kpakple esiwo le Sefela. 
10 Ale Yuda ho ɖe Kanaantɔ siwo nɔ Hebron la ŋu (tsã la, woyɔa Hebron be Kiriat-Arba), eye woɖu Sesai, Ahiman kple Talmai dzi.
11 Eye woho tso afi ma ɖe Debirtɔwo ŋu. (Tsã la, woyɔa Debir be Kiriat-Sefer.) 
12 Eye Kaleb gblɔ be: “Ame si asi Kiriat-Sefer eye wòaxɔe la, matsɔ vinyenyɔnu Aksa nɛ wòaɖe.” 
13 Eye Otniel, Kaleb ƒe tsɛ Kenaz ƒe vi xɔe. Ale wòtsɔ vianyɔnu Aksa nɛ wòɖe. 
14 Eye esi nyɔnua kple srɔ̃a yina aƒe me la, nyɔnua ƒoe ɖe srɔ̃a nu be yeabia agble ye fofo. Eye nyɔnu la ɖi le eƒe tedzi dzi. Eye Kaleb biae be: “Nu ka dim nèle?” 
15 Eɖo eŋu nɛ be: “Meɖe kuku yram, elabena èna anyigbam le anyiehe; tsɔ Gulot-Mayim hã nam.” Ale Kaleb tsɔ Dzigbe Gulot kple Anyigbe Gulot nɛ.
16 Eye Mose to, Kenitɔ la, ƒe dzidzimeviwo ʋu tso devedu la me kpe ɖe Yudatɔwo ŋu yi Yuda gbedzi, le Arad ƒe anyiehe. Eye woyi afi ma ɖanɔ dukɔ la dome. 
17 Ke Yuda kple nɔvia Simeon yi ɖadze Kanaantɔ siwo le Zefat la dzi hetsrɔ̃ dua gbidigbidi. Eya ta wona ŋkɔ du la be Horma. 
18 Emegbe Yuda xɔ Gaza kple eƒe anyigba, Askelon kple eƒe anyigba, kpakple Ekron kple eƒe anyigba. 
19 Eye Afetɔ nɔ kple Yuda, ale be wòxɔ tonuto la, gake mete ŋu nya ame siwo le gbadzaƒe la ɖa o, elabena aʋatasiaɖam siwo ƒe afɔtiwo ŋu lãnuwo le la le wo si. 
20 Wotsɔ Hebron na Kaleb, abe ale si tututu Mose do ŋugbee ene, eye wònya Anak viŋutsu etɔ̃awo ɖa le afi ma.
21 Ke Benyamin viwo menya Yebusitɔ siwo nɔ Yerusalem la ɖa o, ale wɔ Yebusitɔwo le Benyamin viwo dome le Yerusalem va se ɖe egbe.
22 Yosef ƒe aƒe la ho ɖe Betel ŋu, eye Afetɔ nɔ kpli wo. 
23 Yosef ƒe aƒe la nɔ ŋku tsam le Betel (tsã la, woyɔa du la be Luz), 
24 eye ŋkutsalaawo kpɔ ŋutsu aɖe do tso dua me. Eye wogblɔ nɛ be: “Míeɖe kuku, fia mɔ si míato age ɖe dua me la mí, ekema míave nuwò.” 
25 Eya ta ŋutsua fia mɔ si woato age ɖe dua me la wo; eye woyi ɖasi du la kple yi, ke woɖe asi le ŋutsua kple eƒe ƒomea me tɔwo katã ŋu. 
26 Ŋutsua dzo yi Hititɔwo ƒe anyigba dzi eye wòtso du hena ŋkɔe be Luz, esiae nye du la ŋkɔ va se ɖe egbe.
27 Manase mexɔ Bet-Sean kple eŋu duwo, Taanak kple eŋu duwo, Dortɔwo kple woƒe duwo, Yibleamtɔwo kple woƒe duwo, kpakple Megidotɔwo kple woƒe duwo o. Kanaantɔwo do dzi nɔ anyigba sia dzi kpiŋ. 
28 Esi ŋusẽ va ɖo Israel ŋu la, wona Kanaantɔwo wɔ dzizizidɔ na wo, negbe ɖeko womenya wo ɖa keŋkeŋ o.
29 Efrayim hã menya Kanaantɔ siwo le Gezer la ɖa o. Kanaantɔwo tsi wo dome le Gezer.
30 Zebulon menya Kitrontɔwo kple Nahaloltɔwo ɖa o. Kanaantɔwo tsi wo dome, gake Zebulon na wowɔ dzizizidɔ na wo.
31 Aser menya ame siwo le Ako, Sidon, Ahlab, Akzib, Helba, Afik kple Rehob la ɖa o. 
32 Ale wɔ Aser viwo nɔ Kanaantɔ siwo nɔ anyigbaa dzi la dome, elabena Aser menya wo ɖa o.
33 Naftali menya ame siwo le Bet-Semes kple Bet-Anat ɖa o, ke boŋ wonɔ Kanaantɔ siwo nɔ anyigbaa dzi la dome. Bet-Semestɔwo kple Bet-Anattɔwo zu dzizizidɔwɔlawo na wo.
34 Amoritɔwo na Dan viwo tsi tonuto la me, eye womeɖe mɔ na wo be woava gbadzaƒe la o. 
35 Eya ta Amoritɔwo ɖoe kplikpaa nɔ Heres To la dzi kple Aiyalon kpakple Saalbim. Gake esi ŋusẽ ɖo Yosef ƒe aƒe la ŋu la, wozi wo dzi wowɔ dɔ sesẽ na wo.
36 Amoritɔwo ƒe anyigba tso Akrabim-todzimɔ la gbɔ kple Sela hemlo ɖo ta dzi.

ƲƆNUDRƆ̃LAWO 2
1 Eye Afetɔ ƒe dɔla tso Gilgal yi Bokim eye wògblɔ be: “Mekplɔ mi tso Egipte va anyigba si ŋu meka atam ɖo na mia tɔgbuiwo la dzi. Eye megblɔ hã be: ‘Nyematu nu, si mebla kpli mi la gbeɖe o. 
2 Migabla nu kple anyigba sia dzi nɔlawo o, eye migbã woƒe vɔsamlekpuiwo ƒu anyi.’ Ke mieɖo to nye gbe o. Nu ka ŋuti miewɔ alea ɖo? 
3 Eya ta nye hã megblɔ be: ‘Nyemanya wo ɖa le mia ŋgɔ o, woazu mɔ̃ na mi, eye woatsɔ woƒe mawuwo akplɔ mi atrae.’”
4 Esi Afetɔ ƒe dɔla la gblɔ nya siawo na Israel-viwo katã la, dukɔ la fa avi hoo. 5 Eya ta wona ŋkɔ teƒe la be Bokim, eye wosa vɔ le afi ma na Afetɔ.
6 Esi Yosua na dukɔa dzo la, Israel-viwo dometɔ ɖe sia ɖe yi anyigba si dome wònyi la dzi ne wòaxɔe. 
7 Eye dukɔ la yi edzi subɔ Afetɔ le Yosua ƒe agbemeŋkekewo katã kple ame tsitsi siwo ganɔ agbe le Yosua ƒe ku megbe, siwo kpɔ dɔ gã siwo katã Afetɔ wɔ na Israel teƒe la, ƒe agbenɔɣi katã. 
8 Eye Afetɔ ƒe subɔla Yosua, Nun vi la, ku esi wòxɔ ƒe alafa ɖeka kple ewo. 
9 Eye woɖii ɖe anyigba si dome wònyi la dzi le Timna-Heres le Efrayim tonuto la me le Gaas To la ƒe dziehe gome. 
10 Dzidzime ma katã ku eye wotsɔ wo kpe ɖe wo tɔgbuiwo ŋu, eye dzidzime bubu va ɖe wo yome, ame siwo medze si Afetɔ alo nya dɔ siwo wòwɔ na Israel la o.
11 Eya ta Israel-viwo wɔ nu si nye vɔ̃ le Afetɔ ŋkume, eye wosubɔ Baalwo. 
12 Ale wogblẽ Afetɔ, wo fofowo ƒe Mawu, ame si kplɔ wo tso Egipte-nyigba dzi la ɖi. Wodze mawu bubuwo, siwo nye dukɔ siwo ƒo xlã wo godoo la ƒe mawuwo yome, eye wode ta agu na wo tsɔ do dziku na Afetɔ. 
13 Wogblẽ Afetɔ ɖi hesubɔ Baal kple Astoret legbawo. 
14 Afetɔ ƒe dɔmedzoe bi ɖe Israel ŋu, ale be wòtsɔ wo de asi na adzohawo woda adzo wo. Etsɔ wo dzra na woƒe futɔ siwo ƒo xlã wo la, eye womegate ŋu nɔ te ɖe woƒe futɔwo nu o. 
15 Afi sia afi si woyi la, Afetɔ ƒe asi sẽna ɖe wo dzi, ale be vɔ̃ tua wo, abe ale si Afetɔ gblɔ na wo kple ale si Afetɔ ka atam na woe ene, eye woɖo xaxa me ŋutɔ. 
16 Eya ta Afetɔ ɖoa ʋɔnudrɔ̃lawo na wo, ame siwo ɖea wo tso adzohawo si me.
17 Gake wogbe toɖoɖo ʋɔnudrɔ̃lawo gɔ̃ hã, wowɔa ahasi kple mawu bubuwo, eye wodea ta agu na wo. Wotrɔ ɖa kaba tso mɔ si dzi wo tɔgbuiwo, ame siwo ɖo to Afetɔ ƒe sededewo, zɔ la dzi. Womewɔ nu abe wo tɔgbuiwo ene o. 
18 Ɣesiaɣi si Afetɔ ɖo ʋɔnudrɔ̃la na wo la, Afetɔ nɔa anyi kple ʋɔnudrɔ̃laa, eye wòɖea wo tso woƒe futɔwo si me le ʋɔnudrɔ̃la la ƒe ŋkekewo katã me; elabena ewɔa nublanui na Afetɔ ne ame siwo te wo ɖe anyi kple ame siwo sẽ ŋuta le wo ŋu na wole hũ ɖem.
19 Ke ne ʋɔnudrɔ̃la la ku la, wogawɔa nu gbegblẽ ɖe edzi wu wo fofowo, wodzea mawu bubuwo yome, eye wosubɔa wo hedea ta agu na wo. Womeɖea asi le woƒe nuwɔnawo kple woƒe tosesẽ la ŋu o. 
20 Mlɔeba Afetɔ ƒe dɔmedzoe bi ɖe Israel ŋu wògblɔ be: “Esi dukɔ sia tu nu, si mebla kpli wo tɔgbuiwo, eye womeɖo to nye gbe o ta la, 
21 nye hã nyemanya dukɔ siwo Yosua kpɔtɔ ɖi hafi ku la dometɔ ɖeka pɛ hã ɖa le wo ŋgɔ o. 
22 Ne matsɔ wo ado Israel kpɔ be woalé ŋku ɖe Afetɔ ƒe mɔ ŋu ahazɔ edzi, abe ale si tututu wo fofowo lé ŋku ɖe eŋu ene loo, alo womalé ŋku ɖe eŋu o hã.” 
23 Eya ta Afetɔ ɖe mɔ dukɔ siawo tsi anyi. Menya wo ɖa zi ɖeka o, eye metsɔ wo de asi na Yosua o.

ƲƆNUDRƆ̃LAWO 3
1 Dukɔ siwo Afetɔ kpɔtɔ ɖi be yeatsɔ ado Israel-vi siwo katã mekpɔ aʋa siwo wowɔ kple Kanaantɔwo teƒe o la kpɔ 
2 (ewɔ esia be Israel-viwo ƒe dzidzime siwo ava emegbe la nakpɔ aʋa teƒe, ne wòatsɔ afia aʋawɔwɔ ame siwo mekpɔ aʋa teƒe kpɔ o) la woe nye: 
3 Filistitɔwo ƒe kplɔla atɔ̃awo, Kanaantɔwo, Sidontɔwo, kple Hivitɔwo, siwo katã le Lebanon Towo dzi tso Baal-Hermon To gbɔ va se ɖe Lebo-Hamat ke. 
4 Wotsɔ wo do Israel kpɔ ne woakpɔe ɖa be Israel aɖo to Afetɔ ƒe se siwo wòde na wo fofowo to Mose dzi hã. 
5 Eya ta Israel-viwo nɔ Kanaantɔwo, Hititɔwo, Amoritɔwo, Perizitɔwo, Hivitɔwo kple Yebusitɔwo dome. 
6 Woɖe wo vinyɔnuwo, eye wotsɔ wo vinyɔnuwo na wo viŋutsuwo woɖe, eye wosubɔ woƒe mawuwo.
7 Ale Israel-viwo wɔ nu si nye vɔ̃ le Afetɔ ŋkume, woŋlɔ Afetɔ woƒe Mawu la be, eye wosubɔ Baalwo kple Aserawo. 
8 Eya ta Afetɔ ƒe dɔmedzoe bi ɖe Israel ŋu, ale be wòtsɔ wo dzra na Mesopotamia-fia Kusan-Risatayim. Israel-viwo subɔ Kusan-Risatayim ƒe enyi. 
9 Esi Israel-viwo yɔ Afetɔ be wòaxɔ na yewo la, Afetɔ ɖo xɔla na Israel-viwo, si nye Otniel, Kaleb ƒe tsɛ Kenaz ƒe vi, be wòaɖe wo. 
10 Eye Afetɔ ƒe gbɔgbɔ va edzi, ale wòzu Israel ƒe ʋɔnudrɔ̃la. Esi wòho aʋa la, Afetɔ tsɔ Mesopotamia-fia Kusan-Risatayim de asi nɛ, eye wòɖu Kusan-Risatayim dzi. 
11 Ema megbe la, anyigba la kpɔ gbɔdzɔe ƒe blaene. Emegbe Otniel, Kenaz vi la ku.
12 Eye Israel-viwo gade asi nu si nye vɔ̃ wɔwɔ me le Afetɔ ŋkume. Eya ta Afetɔ ɖe mɔ Moab-fia Eglon ɖu Israel dzi, elabena wowɔ nu si nye vɔ̃ le Afetɔ ŋkume. 
13 Azɔ hã, ekplɔ Amonitɔwo kple Amalektɔwo va ƒu wo. Wodze Israel dzi eye woxɔ devedu la. 
14 Israel-viwo subɔ Moab-fia Eglon ƒe wuienyi. 
15 Eye Israel-viwo yɔ Afetɔ be wòaxɔ na yewo. Eya ta Afetɔ ɖo xɔla na wo, si nye Ehud, Gera vi, enye Benyamintɔ miawɔla aɖe. Le ɣeyiɣi aɖe megbe la, Israel-viwo tsɔ adzɔ si woka na wo la de esi ɖo ɖe Moab-fia Eglon. 
16 Ehud tu adekpui nuevee, si didi abɔklugui ɖeka, eye wòtae ɖe ɖusiklito le eƒe awu te. 
17 Etsɔ adzɔ la vɛ na Moab-fia Eglon. Eglon nye ame lolo dami aɖe.
18 Esi Ehud tsɔ adzɔa na vɔ la, eya kple ame siwo tsɔ adzɔa vɛ la trɔ dzo. 
19 Ke esi woɖo kpetatawo gbɔ le Gilgal la, etrɔ va gblɔ na fia la be: “Oo fia, nya ɣaɣla aɖe le asinye na wò.” Eya ta fia la gblɔ be: “Ðoɖoe nezi!” Ale eƒe subɔviwo katã do go le egbɔ. 
20 Eye Ehud va egbɔ, esime eya ɖeka nɔ eƒe xɔtaxɔ si me wòxɔa ya fafɛ le la me. Eye Ehud gblɔ be: “Mexɔ gbedeasi aɖe tso Mawu gbɔ vɛ na wò.” Ale wòtso le eƒe fiazikpui la dzi. 
21 Azɔ Ehud do eƒe miasi ɖa ɖe adekpui la le ɖusiklito heƒo ɖe dɔme nɛ flo. 
22 Eye adekpui la kple eƒe asiléƒea siaa bu ɖe eme, eye ami nyè tsyɔ adekpui la, elabena meɖe adekpui la le dɔme nɛ o, eye mĩ do go. 
23 Ehud to akpata la me do, etu xɔtaxɔ la ƒe ʋɔtruawo le emegbe, eye wòde ga wo me. 
24 Esi wòdzo la, fia ƒe subɔviwo va eye wokpɔ be wode ga xɔtaxɔ la ƒe ʋɔtruwo me. Eya ta wogblɔ be: “Anya nɔ afɔdzi le xɔ emetɔ me le yaxɔƒe la.” 
25 Wolala ʋuu va se ɖe esime wotsi yaa, gake esi wokpɔe be mele xɔtaxɔ la ƒe ʋɔtruawo ʋum o la, wotsɔ safui ʋu wo, eye wokpɔ woƒe aƒetɔ la ku ɖe anyigba!
26 Ehud si dzo esime wonɔ hehem ɖe megbe, eye wòto kpetatawo gbɔ va do ɖe Seira dedie. 
27 Esi wòɖo afi ma la, eku kpẽ le Efrayim tonuto la me; eye Israel-viwo ɖi tso toawo dzi dze eyome, eye eya ŋutɔ dze wo ŋgɔ. 
28 Eye wògblɔ na wo be: “Midze yonyeme, elabena Afetɔ tsɔ miaƒe futɔ siwo nye Moabtɔwo de asi na mi.” Eye wodze eyome heva xe mɔ le Yordan tɔtsoƒewo be Moabtɔwo nagatso tɔa o, eye womeɖe mɔ na ame aɖeke be wòatsoe o. 
29 Ɣemaɣi la, wowu Moabtɔ siwo anɔ ame akpe ewo, wo katã wonye ŋutsu kakowo kple kalẽtɔwo; ame ɖeka hɔ̃ hã mesi o. 
30 Wobɔbɔ Moab ɖe Israel ƒe asi te gbe ma gbe; eye anyigba la kpɔ gbɔdzɔe ƒe blaenyi sɔŋ.
31 Samgar, Anat vi va ɖe eyome, etsɔ nyikplɔti wu Filistitɔ alafa ade; eya hã ɖe Israel.

ƲƆNUDRƆ̃LAWO 4
1 Ke le Ehud ƒe ku megbe la, Israel-viwo gawɔ nu si nye vɔ̃ le Afetɔ ŋkume. 
2 Eya ta Afetɔ tsɔ wo dzra na Kanaan-fia Yabin, si ɖu fia le Hazor. Eƒe aʋafiae nye Sisera, ame si nɔ dukɔwo ƒe Haroset. 
3 Israel-viwo do ɣli na Afetɔ, elabena aʋatasiaɖam siwo ƒe afɔtiwo ŋu lãnuwo le alafa asieke le Yabin si, eye wòte Israel-viwo ɖe anyi vevie ƒe blaeve sɔŋ.
4 Ke nyɔnunyagblɔɖila Debora, Lapidot srɔ̃, nɔ ʋɔnu drɔ̃m Israel ɣemaɣi. 
5 Enɔa Debora ƒe deti te le Rama kple Betel dome le Efrayim tonuto la me; eye Israel-viwo yia egbɔ wòdrɔ̃a ʋɔnu na wo. 
6 Edɔ woyi ɖayɔ Barak, Abinoam vi, tso Kedes-Naftali vɛ, eye wògblɔ nɛ be: “Ðe Afetɔ, Israel ƒe Mawu la, mede se oa? ‘Ho yi Tabor To la dzi, nàɖe ame akpe ewo tso Naftali viwo kple Zebulon viwo dome kpe ɖe ɖokuiwò ŋu. 
7 Makplɔ Sisera, Yabin ƒe aʋafia kple eƒe aʋatasiaɖamwo kpakple eƒe aʋakɔ la vɛ na wò le Kison-tɔsisi la nu, eye matsɔe ade asi na wò.’”
8 Ke Barak gblɔ nɛ be: “Ne àyi kplim la, ekema mayi; ke ne màyi kplim o la, nye hã nyemayi o.” 
9 Eɖo eŋu be: “Mayi kpli wò godoo. Ke hã, aʋa si kpe ge miele la ƒe bubu mava na wò o, elabena nyɔnu aɖe si mee Afetɔ atsɔ Sisera ade.” Ale Debora tso yi Kedes kpe ɖe Barak ŋu. 
10 Barak yɔ Zebulon kple Naftali va ƒo ƒu ɖe Kedes, eye ŋutsu akpe ewo dze eyome. Debora hã yi kplii.
11 Edzɔ be Kenitɔ Heber dzo le Kenitɔ siwo nye Mose to Hobab ƒe dzidzimeviwo gbɔ, eye wòva tu eƒe agbadɔ ɖe ati gã la xa le Zaananim le Kedes.
12 Wova gblɔ na Sisera be Barak, Abinoam vi, yi Tabor To la dzi. 
13 Enumake Sisera ƒo eƒe aʋatasiaɖamwo katã—aʋatasiaɖam siwo ƒe afɔtiwo ŋu lãnuwo le alafa asieke—kple eƒe aʋakɔ blibo la nu ƒu tso dukɔwo ƒe Haroset, eye woho yi Kison-tɔsisi la nu. 
14 Azɔ Debora gblɔ na Barak be: “Tso, elabena egbee Afetɔ atsɔ Sisera ade asi na wò. Ðe Afetɔ medze ŋgɔwò oa?” Ale Barak ɖi tso Tabor To la dzi, eye ŋutsu akpe ewoawo dze eyome. 
15 Eye Afetɔ tsɔ yi de tɔtɔ Sisera kple eƒe aʋatasiaɖamwo katã kple aʋakɔ blibo la katã dome le Barak ŋgɔ. Mlɔeba Sisera ɖi le eƒe tasiaɖam la me heto afɔ si. 
16 Barak nya aʋatasiaɖamawo kple aʋakɔ la ɖe nu va se ɖe dukɔwo ƒe Haroset ke. Ale Sisera ƒe aʋakɔ blibo la tsi yi nu; wo dometɔ ɖeka hɔ̃ hã mekpɔtɔ o.
17 Ke Sisera to afɔ si yi nyɔnu aɖe si ŋkɔe nye Yael, Kenitɔ Heber srɔ̃ ƒe agbadɔ gbɔ, elabena ŋutifafa le Hazor-fia Yabin kple Kenitɔ Heber ƒe aƒe la dome. 
18 Eye Yael do yi ɖakpe Sisera gblɔ nɛ be: “Nye aƒetɔ, ge ɖe eme, va dze gbɔnye. Mègavɔ̃ o.” Eya ta eyi eƒe agbadɔ la me, eye wòtsyɔ kuntru nɛ. 
19 Eye wògblɔ na nyɔnua be: “Meɖe kuku, na tsi vi aɖem mano, elabena tsikɔ le wuyem.” Eya ta eʋu lãgbalẽgolo si me notsi le, eye wòna ɖee wòno, emegbe wògatsɔ kuntru la tsyɔ nɛ. 
20 Egblɔ nɛ be: “Yi ɖatɔ ɖe agbadɔ la nu, eye ne ame aɖe va bia wò be: ‘Ŋutsu aɖe le afi sia?’ hã la, gblɔ be: ‘Ao!’”
21 Ke Yael, Heber srɔ̃ tsɔ agbadɔtsyoti kple zu ɖe asi. Eye esi ɖeɖi te Sisera ŋu belibeli wòyi alɔ̃ me ʋĩi la, ete ɖe eŋu dzaa eye wòƒo tsyoti la ɖe tonu nɛ heƒoe wòdo ɖe anyigba, ale wòku.
22 Barak ti Sisera yome yi afi ma, eye Yael do yi ɖakpee hegblɔ nɛ be: “Va mafia ame si dim nèle la wò.” Ale eya kplii woge ɖe eme, eye wòkpɔ Sisera wòku ɖi, tsyoti la ƒo ɖe tonu nɛ.
23 Ale Mawu bɔbɔ Kanaan-fia Yabin ɖe anyi le Israel-viwo ŋkume gbe ma gbe. 
24 Eye Israel-viwo ƒe asi nɔ sesẽm ɖe Kanaan-fia Yabin dzi va se ɖe esime wotsrɔ̃ Kanaan-fia Yabin ɖa keŋkeŋ.

ƲƆNUDRƆ̃LAWO 5
1 Debora kple Barak, Abinoam vi, dzi ha sia gbe ma gbe be:
 2 “Mikafu Afetɔ,
Elabe wogblẽ taɖa ɖi ʋluya le Israel,
Elabe dukɔ la tsɔ eɖokui na faa!
 3 Mi fiawo, misee; mi dziɖulawo, miƒu to anyi!
Mele ha dzi ge na Afetɔ.
Madzi kafukafuha na Afetɔ, Israel ƒe Mawu la.
 4 Afetɔ, esi nèdo tso Seir,
Esi nèho tso Edom-nyigba dzi la,
Anyigba ʋuʋu, tsi dza tso dziƒowo bababa,
Alilikpowo ɖuɖu tsi yoyoyo.
 5 Towo lólo le Afetɔ ŋkume,
Sinai kekeake hã lólo le Afetɔ, Israel ƒe Mawu la ŋkume.
 6 Le Samgar, Anat vi ŋɔli,
Le Yael ŋɔli la, mɔwo dzi ɖi gbɔlo;
Mɔzɔlawo katã toa gbememɔwo.
 7 Amewo megale Israel ƒe kɔƒewo me o;
Womegali o va se ɖe esime nye, Debora, metso,
Va se ɖe esime metso abe vidada ene le Israel.
 8 Wotia mawu yeyewo;
Aʋa nɔ agbowo me ɣemaɣi.
Womekpɔ akpoxɔnu alo akplɔ aɖeke
Le ame akpe blaene dome le Israel o.
 9 Nye dzi ku ɖe Israel ƒe kplɔlawo ŋu,
Ame siwo tsɔ wo ɖokui na faa yi kple dukɔ la.
Mikafu Afetɔ!
10 Mi ame siwo do tedzinɔ hẽwo,
Mi ame siwo bɔbɔ nɔ kuntru nyuiwo dzi,
Kple mi ame siwo zɔa mɔ dzi,
Mibu eŋu kpɔ!
11 Wose tsikulawo ƒe gbe le lãwo ƒe tsinoƒe;
Wole Afetɔ ƒe nu dzɔdzɔe wɔwɔwo gblɔm le afi ma,
Eƒe ame siwo le Israel kɔƒewo me ƒe nu dzɔdzɔe wɔwɔwo.
Ɣemaɣie Afetɔ ƒe amewo ɖi va agboawo nu.
12 Nyɔ, nyɔ, Oo Debora!
Nyɔ, nyɔ, nàdzi ha!
Tso, Barak, Abinoam vi, nàkplɔ wò aboyomewo adzoe!
13 Eye ame siwo susɔ la ɖi va bubumewo gbɔ;
Afetɔ ƒe dukɔ la ɖi va gbɔnye ɖe kalẽtɔ la ŋu.
14 Efrayim mee wodzɔ tso, wo ame siwo le bali la me,
Wodze yowòme, Oo Benyamin, wole wò amewo dome.
Kplɔlawo ɖi abu tso Makir,
Eye ame siwo si aʋawɔlawo tiala ƒe atikplɔ le la tso Zebulon.
15 Isakar ƒe amegãwo nɔ Debora ŋu,
Ale si Isakar wɔ la, nenemae Barak hã wɔ.
Wodɔe wòto afɔ yi bali la me.
Wodzro dziwo me kpɔ vevie le Ruben ƒe hatsotsowo dome.
16 Nu ka tae nèbɔbɔ nɔ sɔkpa si ŋu kotoku eve le dzi,
Hele to ɖom lãkplɔlawo ƒe dze si kum wole na lãhawo?
Ruben ƒe hatsotsowo de adaŋu vevie.
17 Gilead tsi Yordan godo;
Eye nu ka tae Dan tsi tɔdziʋuwo gbɔ?
Aser nɔ anyi ɖi ɖe ƒuta,
Eye wòtsi eƒe tɔdziʋudzeƒewo.
18 Zebulon nye dukɔ si tsɔ eƒe agbe ke ku faa;
Naftali hã wɔ nenema le gbadzaƒe si le towo dzi.
19 Fiawo va wɔ aʋa;
Kanaan fiawo kpe aʋa
Le Taanak, le Megido-tɔ la nu ɣemaɣi.
Womekpɔ klosalo aɖeke ha o.
20 Ɣletiviwo wɔ aʋa tso dziƒo;
Wonɔ woƒe mɔwo dzi kpe aʋa kple Sisera.
21 Kison-tɔʋu la kplɔ wo dzoe,
Blematɔʋu, Kison-tɔʋu la.
Oo nye luʋɔ, ètu afɔ ŋusẽtɔwo dzi.
22 Ɣemaɣie sɔwo ƒe afɔziwo nɔ ɖiɖim kpitikpitikpiti,
Esi eƒe sɔtsuwo nɔ du dzi vevie.
23 Afetɔ ƒe dɔla be: ‘Neɖi Meroz ŋu,
‘Ɛ̃, neɖi emenɔlawo ŋu,
Elabe womeva kpe ɖe Afetɔ ŋu o,
Womekplɔ kalẽtɔwo ɖo va kpe ɖe Afetɔ ŋu o.’
24 Woyra Yael, Kenitɔ Heber srɔ̃
Geɖe wu le nyɔnuwo dome;
Woyrae geɖe wu le nyɔnu agbadɔmenɔlawo dome.
25 Tsie wòbia; ke notsie wònae.
Eku notsi kpekẽ ɖe bubumewo ƒe kplu me vɛ.
26 Edo asi ɖa tsɔ tsyoti,
Edo nuɖusi ɖa tsɔ dɔwɔla ƒe zu.
Eye wòda zu ɖe Sisera dzi, egbã ta nɛ,
Eye wògbã eƒe tonuƒuiwo heŋɔe.
27 Etsra wɔɔ ɖe eƒe afɔnu; etsi anyigba kpoo;
Etsra ɖe eƒe afɔnu, etsi anyigba;
Afi si wòtsra ɖo la, afi mae wòku ɖo.
28 Nyɔnu aɖe le nu kpɔm to fesre nu,
Sisera dadae nɔ nu kpɔm to adzrala me,
‘Nu ka tae eƒe tasiaɖam meva ɖo kpɔ o?
Nu ka tae eƒe tasiaɖamfɔwo ƒe ɖiɖi tsi megbe ale?’
29 Eƒe nyɔnu bubume siwo dze nunya wu ɖoa eŋu nɛ;
Eye eya ŋutɔ hã gblɔna na eɖokui be:
30 ‘Woanya nɔ aboyonu siwo wokpɔ la mam,
Nyɔnuvi ɖeka, nyɔnuvi eve na aʋawɔla ɖe sia ɖe,
Sisera ƒe aboyonu nanye avɔ siwo wode amae, aboyonu la nanye avɔ si wode amae,
Kple awu si me wolɔ̃ atsyã ɖo, avɔ si wode amae ɖeka, awu siwo me wolɔ̃ atsyã ɖo eve
Na nuhalawo ƒe kɔ.’
31 Oo Afetɔ, wò futɔwo katã nu neyi,
Gake na ame siwo lɔ̃a wò la nanɔ abe ɣe si dze le eƒe atsyɔ̃ɖoɖo gã me ene.”
Eye anyigba la kpɔ gbɔdzɔe ƒe blaene sɔŋ.

ƲƆNUDRƆ̃LAWO 6
1 Ke Israel-viwo gawɔ nu si nye vɔ̃ le Afetɔ ŋkume, eya ta Afetɔ tsɔ wo de asi na Midian ƒe adre. 
2 Midian ƒe asi kpe Israel dzi. Eye le Midian ta Israel-viwo wɔ bebeƒewo na wo ɖokuiwo ɖe towo dzi, ɖe agadowo me kple teƒe siwo yiyi sesẽ. 
3 Ne Israel ƒã nu la, Midian, Amalek kple Ɣedzeƒetɔwo va dzea wo dzi. 
4 Wova ƒua asaɖa anyi ɖe wo ŋu, eye wogblẽa anyigba la dzi nukuwo dome va se ɖe Gaza ke, eye womegblẽa nuɖuɖu, alẽ, nyi alo tedzi aɖeke ɖi na Israel o. 
5 Elabena ɖe wova dona bibibi kple woƒe lãhawo kpakple woƒe agbadɔwo abe ʋetsuviwo ene, eye woawo ŋutɔwo kple woƒe kposɔwo mele xexlẽme o, ɖe wovaa anyigba la dzi be yewoagblẽe. 
6 Ale Israel va da ahe kolikoli le Midian ta; eye Israel-viwo yɔ Afetɔ be wòaxɔ na yewo.
7 Esi Israel-viwo yɔ Afetɔ be wòaxɔ na yewo le Midian ta la, 
8 Afetɔ dɔ nyagblɔɖila aɖe ɖo ɖe Israel-viwo wòva gblɔ na wo be: “Ale Afetɔ, Israel ƒe Mawu la, gblɔe nye esi, ‘Mekplɔ mi dzoe le Egipte, eye meɖe mi tso kluvinyenyeƒe me. 
9 Ale meɖe mi tso Egipte kple ame siwo katã tea mi ɖe anyi la si me, eye menya miaƒe futɔwo ɖa le mia ŋgɔ hetsɔ woƒe anyigba na mi. 
10 Eye megblɔ na mi hã be: “Nyee nye Afetɔ mia Mawu. Migavɔ̃ Amoritɔ siwo ƒe anyigba dzi miele la ƒe mawuwo o.” Ke mieɖo tom o.’”
11 Emegbe Afetɔ ƒe dɔla va bɔbɔ nɔ ati gã si le Ofra, si nye Yoas, Abi-Ezer vi tɔ la te. Via Gideon nɔ lu ƒom le wainfiãƒe be Midiantɔwo nagakpɔe o. 
12 Afetɔ ƒe dɔlaa ɖe eɖokui fiae gblɔ be: “Afetɔ li kpli wò, wò aʋakalẽtɔ.” 
13 Ke Gideon gblɔ nɛ be: “Meɖe kuku, nye aƒetɔ, ne Afetɔ li kpli mí ɖe, nu ka tae nu siawo katã dzɔ ɖe mía dzi ɖo? Eye afi kae eƒe nukudɔ siwo ŋu mía fofowo ƒo nu le na mí hegblɔ be, ‘Ðe Afetɔ meɖe mí tso Egipte oa?’ la le? Azɔ Afetɔ gblẽ mí ɖi, eye wòtsɔ mí de asi na Midian.” 
14 Afetɔ dze ŋgɔe hegblɔ be: “Yi le ŋusẽ si le asiwò la me, eye àɖe Israel tso Midian si me. Alo menye nyee dɔ wò oa?” 
15 Gake Gideon ɖo eŋu nɛ be: “Meɖe kuku, Afetɔ. Aleke mawɔ aɖe Israel? Kpɔ ɖa! Hlɔ̃ si me metso ye nye suetɔ le Manase, eye nyee nye ame tsɛtɔ kekeake le fofonye ƒe me.” 
16 Ke Afetɔ gblɔ nɛ be: “Manɔ kpli wò, eye àsi Midiantɔwo abe ame ɖekae wonye ene.”
17 Eye wògblɔ nɛ be: “Ne ève nunye la, ekema ɖe dzesi aɖe fiam, ne manya be wòe le nu ƒom kplim. 
18 Meɖe kuku, mègadzo le afi sia o, va se ɖe esime matrɔ ava gbɔwò atsɔ nye nunana aɖo akɔwòme.” Eɖo eŋu nɛ be: “Manɔ afi sia va se ɖe esime nàtrɔ agbɔ.” 
19 Eye Gideon yi ɖawu gbɔ̃vi ɖeka, eye wòtsɔ wɔ efa ɖeka mè amɔwɔ maʋamaʋã boloe. Efɔ lã la de kusi me, eye wòku detsi la ɖe nuɖaze me tsɔ yi nɛ le ati gã la te, eye wòtsɔe ɖo ekɔme.
20 Eye Mawu vavã la ƒe dɔla gblɔ nɛ be: “Tsɔ lã la kple amɔwɔ maʋamaʋã bolo la da ɖe kpe gã ma dzi, eye nàtrɔ detsia kɔ ɖi.” Eye wòwɔe nenema. 
21 Eye Afetɔ ƒe dɔla tsɔ atikplɔ si le esi la ƒe nugbɔ tɔ lã la kple amɔwɔ maʋamaʋã boloa, eye dzo do tso agakpe la me fiã lã la kple amɔwɔ maʋamaʋã bolo la. Eye Afetɔ ƒe dɔlaa bu vĩi le eŋkume. 
22 Gideon kpɔe azɔ be Afetɔ ƒe dɔlae.
Enumake Gideon do ɣli be: “Aléle, Aƒetɔ Dziɖulagã Afetɔ, elabena mekpɔ Afetɔ ƒe dɔla ŋkume kple ŋkume!” 
23 Ke Afetɔ gblɔ nɛ be: “Ŋutifafa na wò. Mègavɔ̃ o; mèle kuku ge o.” 
24 Eya ta Gideon ɖi vɔsamlekpui na Afetɔ ɖe afi ma, eye woyɔa vɔsamlekpui la be Afetɔ-Salom va se ɖe egbe sia. Egakpɔtɔ le Abi-Ezertɔwo ƒe Ofra.
25 Le zã ma me la, Afetɔ gblɔ nɛ be: “Lé fofowò ƒe nyitsui ɖeka, nàlé nyitsui evelia si xɔ ƒe adre, nàgbã Baal ƒe vɔsamlekpui si nye fofowò tɔ la, eye nàlã Asera-ti si le exa la ƒu anyi. 
26 Eye nàɖo kpewo atsɔ aɖi vɔsamlekpui na Afetɔ wò Mawu la ɖe mɔ́ sesẽ sia dzi, eye nàtsɔ nyitsui evelia asa numevɔ ɖe Asera-ti si nàlã la ƒe nakeawo dzi.” 
27 Ale Gideon ɖe eƒe subɔviwo dometɔ ewo, eye wòyi ɖawɔe abe ale si tututu Afetɔ gblɔ nɛ ene. Ke evɔ̃ fofoa ƒemetɔwo kple dua me ŋutsuwo ale gbegbe be, mewɔe le ŋkeke me o, ke boŋ eyi ɖawɔe le zã me.
28 Esi dua me ŋutsuwo fɔ ŋdi kanya la, wokpɔ be wogbã Baal ƒe vɔsamlekpui la ƒu anyi, wolã Asera-ti si le exa la hã, eye wotsɔ nyitsui evelia sa vɔe ɖe vɔsamlekpui si woɖi la dzi. 
29 Wobia wo nɔewo be: “Ame kae wɔ nu sia?” Esi woku nyaa me la, wogblɔ be: “Gideon, Yoas vi lae wɔ nu sia.” 
30 Eya ta dua me ŋutsuwo gblɔ na Yoas be: “Kplɔ viwò la do goe ne míawui, elabena egbã Baal ƒe vɔsamlekpui la ƒu anyi, eye wòlã Asera-ti si le exa la hã.” 
31 Eye Yoas gblɔ na ame siwo katã tsɔ nyaa tui la be: “Miawoe aʋli Baal taa? Miawoe axɔ nɛa? Ame sia ame si aʋli eta la, woawui ŋdi sia. Ne mawue wònye la, ekema neʋli eɖokui ta, le esi ame aɖe gbã eƒe vɔsamlekpui ƒu anyi ta.” 
32 Eye wòna ŋkɔ Gideon gbe ma gbe be Yerubaal hegblɔ be: “Baal neʋli eɖokui ta, le esi ame aɖe gbã eƒe vɔsamlekpui ƒu anyi ta.”
33 Eye Midiantɔwo, Amalektɔwo kple Ɣedzeƒetɔwo katã ƒo woƒe aʋawɔlawo nu ƒu; eye wotso tɔ la heva ƒu asaɖa anyi ɖe Yezreel Bali la me. 
34 Afetɔ ƒe gbɔgbɔ va Gideon dzi, eye wòku kpẽ, eye Abi-Ezer viwo ƒo ƒu dze eyome. 
35 Edɔ amewo ɖo ɖe Manase blibo la katã, eye woawo hã ƒo ƒu dze eyome. Eye wòdɔ amewo ɖo ɖe Aser, Zebulon kple Naftali hã, eye wova do goe.
36 Eye Gideon gblɔ na Mawu vavã la be: “Ne dzinye to ge nàla aɖe Israel, abe ale si nèdo ŋugbee ene la, 
37 ke makeke alẽgbalẽ ɖe nukuƒoƒe la. Ne zãmu dza ɖe alẽgbalẽa ɖeɖe ko dzi, gake anyigba si ƒo xlãe godoo la katã le ƒuƒuie la, ekema madze sii be dzinye to ge nàla aɖe Israel, abe ale si nèdo ŋugbee ene.” 
38 Eva eme nenema tututu. Esi wòfɔ ŋdi kanya hefiã alẽgbalẽa la, zãmu si wòfiã le alẽgbalẽa me la yɔ nuɖugba gã aɖe. 
39 Ke Gideon gblɔ na Mawu vavã la be: “Mègana wò dɔmedzoe nabi ɖe ŋunye o, ke boŋ ɖe mɔ nam magaƒo nu zi ɖeka pɛ ko. Meɖe kuku, na magatsɔ alẽgbalẽ la awɔ dodokpɔ ɖeka pɛ ko. Meɖe kuku, na alẽgbalẽa ɖeɖe ko nanɔ ƒuƒuie, ke zãmu naƒo anyigba la katã.” 
40 Eye nenemae Mawu wɔ le zã ma me; alẽgbalẽ la ɖeɖe nɔ ƒuƒuie, ke zãmu ƒo anyigba la katã.

ƲƆNUDRƆ̃LAWO 7
1 Eye Yerubaal, si nye Gideon, kple ame siwo katã le eŋu la fɔ ŋdi kanya va ƒu asaɖa anyi ɖe Harod-tsidzɔƒe la gbɔ, eye Midiantɔwo ƒe asaɖa la le woƒe dziehe le More togbɛ la gbɔ le bali la me. 
2 Afetɔ gblɔ na Gideon be: “Ame siwo le ŋuwò la sɔ gbɔ akpa, be matsɔ Midiantɔwo ade asi na wo. Ne menye nenema o la, Israel ava ƒu asi akɔ ɖe ŋunye agblɔ be: ‘Nye ŋutɔ nye asie xɔ nam.’ 
3 Eya ta meɖe kuku, gblɔ na ameawo be: ‘Ame si ke le vɔvɔ̃m eye dzi mele eƒo o la negbugbɔ yi aƒe.’” Ale Gideon do wo kpɔ. Ame akpe blaeve vɔ eve trɔ dzo, eye ame akpe ewo susɔ.
4 Ke Afetɔ gagblɔ na Gideon be: “Ameawo gasɔ gbɔ akpa kokoko. Kplɔ wo yi tɔ la to, ne mado wo kpɔ na wò le afi ma. Ne megblɔ na wò be, ‘Ame sia ayi kpli wò’ la, eya neyi kpli wò, gake ne megblɔ na wò be, ‘Ame sia mayi kpli wò o’ la, eya megayi o.”
5 Ale wòkplɔ ameawo yi tɔ la to.
Eye Afetɔ gblɔ na Gideon be: “Ðe ame siwo katã ɖuɖɔ tsi la abe avu ene kple ame siwo katã dze klo kpe nu ɖe eme noe la ɖe vovo.” 
6 Ke ame siwo ku tsia kple asi no la le ame alafa etɔ̃. Ame mamlɛawo katã dze klo kpe nu ɖe tsia me noe.
7 Afetɔ gblɔ na Gideon be: “Matsɔ ame alafa etɔ̃ siwo ku tsia kple asi no la axɔ na mi, eye matsɔ Midiantɔwo ade asi na mi. Ke na ame mamlɛawo katã natrɔ ayi aƒe.” 
8 Eya ta woxɔ mɔdzinuɖuɖuwo kple kpẽawo le ameawo si, eye wòɖo Israel ŋutsu mamlɛawo ɖe aƒe, ame alafa etɔ̃awo koe wòkpɔtɔ ɖi. Ke Midiantɔwo ƒe asaɖaa le balia me le anyime ɖaa.
9 Le zã ma me la, Afetɔ gblɔ nɛ be: “Tso nàdze asaɖa la dzi, elabena metsɔe de asi na wò. 
10 Ke ne èle vɔvɔ̃m na wo dzi dzedze la, kplɔ wò dɔla Pura miayi asaɖa la me. 
11 Ðo to nya si gblɔm wole, eye dzi aɖo ƒowò nàdze asaɖa la dzi.” Eya ta eya kple eƒe dɔla Pura ɖi yi aʋakɔ siwo ho va la ƒe asaɖa nu.
12 Ke Midiantɔwo, Amalektɔwo kple Ɣedzeƒetɔwo katã xɔ bali la me kpaŋkpaŋkpaŋ abe ʋetsuviwo ene; eye woƒe kposɔwo mele xexlẽme o, wosɔ gbɔ abe ƒutake ene. 
13 Esi Gideon va la, ŋutsu aɖe le drɔ̃e lĩm na ehavi be: “Drɔ̃e si meku lae nye esi. Ƒobolo nogoe aɖe mli togotogoe va Midiantɔwo ƒe asaɖa la me. Eva ɖo agbadɔ aɖe gbɔ helɔe sesĩe ale gbegbe be wòmu. Ɛ̃, elɔ agbadɔa wòtrɔ ta tu hemu gbloo.” 
14 Eye ehavia gblɔ be: “Menye nu bubu aɖekee o, ke boŋ Israeltɔ Gideon, Yoas vi la, ƒe yie. Mawu tsɔ Midiantɔwo kple woƒe asaɖa blibo la katã de asi nɛ.”
15 Esi Gideon nya se drɔ̃e la kple egɔmeɖeɖe ko la, ebɔbɔ de ta agu. Emegbe egbugbɔ va Israel ƒe asaɖa la me gblɔ be: “Mitso, elabena Afetɔ tsɔ Midiantɔwo ƒe asaɖa la de asi na mi.” 
16 Ema ŋutsu alafa etɔ̃ la ɖe aʋalɔgo etɔ̃ me, eye wòtsɔ kpẽ kple ze ƒuƒlu siwo me akakatiwo le la de wo katã si. 
17 Eye wògblɔ na wo be: “Minɔ kpɔyem, eye miwɔ nu si tututu mawɔ. Ne meva ɖo woƒe asaɖaa gbɔ la, miwɔ abe ale si tututu mewɔ ene. 
18 Ne meku kpẽa, eye ame siwo katã le ŋunye hã kui la, miawo hã miku kpẽawo le asaɖa la ŋu godoo, eye miado ɣli be: ‘Afetɔ tɔe, Gideon tɔe!’”
19 Gideon kple ame alafa ɖeka siwo le eŋu la va asaɖa la nu le zãdomeŋudzɔɣi ƒe gɔmedzedze, esi woɖɔli dzɔlawo teti ko. Woku kpẽawo, eye wogbã ze siwo le wo si la. 
20 Eye aʋalɔgo etɔ̃awo ku kpẽawo hegbã zeawo. Wolé akakatiawo ɖe mia, eye wolé kpẽawo ɖe ɖusi, eye wodo ɣli be: “Afetɔ kple Gideon ƒe yie!” 
21 Ɣemaɣi katã la, wo dometɔ ɖe sia ɖe tɔ ɖe eteƒe le asaɖa la ŋu godoo, eye aʋakɔ blibo la katã de afɔ du me nɔ ɣli dom nɔ sisim. 
22 Ame alafa etɔ̃awo le kpẽawo kum, eye Afetɔ na wo dometɔ ɖe sia ɖe trɔ eƒe yi ɖe nɔvia ŋu le asaɖa blibo la katã me; eye aʋakɔ la si va se ɖe Bet-Sita, ɖo ta Zerera va do ɖe keke Abel-Mehola ƒe golɔgoewo ke le Tabat gbɔ.
23 Eye woyɔ Israel ŋutsuwo tso Naftali, Aser kple Manase blibo la va ƒo ƒu, eye wonya Midiantɔwo ɖe nu. 
24 Gideon dɔ ame ɖo ɖe Efrayim tonuto blibo la katã me gblɔ be: “Miyi ɖadze Midiantɔwo dzi, eye miɖaxe mɔ le tɔtsoƒewo va se ɖe keke Bet-Bara kple Yordan nu ke.” Ale woyɔ Efrayim ŋutsuwo katã ƒo ƒu, eye woyi ɖaxe mɔ le tɔtsoƒeawo va se ɖe keke Bet-Bara kple Yordan nu ke. 
25 Wolé Midiantɔwo ƒe amegã eve siwo nye Oreb kple Zeeb hã; wowu Oreb le Oreb-gakpe la dzi, eye wowu Zeeb le Zeeb ƒe wainfiãƒe. Wonya Midiantɔwo ɖe nu, eye wotsɔ Oreb kple Zeeb ƒe tawo vɛ na Gideon le Yordan nuto la me.

ƲƆNUDRƆ̃LAWO 8
1 Eye Efrayim ŋutsuwo biae be: “Nu kae nye esia nèwɔ ɖe mía ŋu? Nu ka tae mèyɔ mí esi nèyina aʋa kpe ge kple Midiantɔwo o?” Eye wohe nya ɖe eŋu vevie. 
2 Gake egblɔ na wo be: “Nu kae mewɔ fifia si de mia tɔ nu? Ðe waintsetse siwo tsi anyi Efrayim fɔ la menyo wu Abi-Ezer ƒe wainxaxa oa? 
3 Mia si mee Mawu tsɔ Midian-megã siwo nye Oreb kple Zeeb de, eye nu kae mewɔ si de mia tɔ nu?” Esi wògblɔ nya sia la, woƒe dzi fa.
4 Eye Gideon va Yordan nu eye wòtso tɔa. Ðeɖi te eya kple ŋutsu alafa etɔ̃ siwo le eŋu la ŋu, gake wogati woƒe futɔawo yome kokoko. 
5 Eya ta egblɔ na Sukottɔwo be: “Meɖe kuku, mina nuɖuɖu ame siwo le yonyeme la, elabena ɖeɖi te wo ŋu, evɔ mele Midian-fia siwo nye Zeba kple Zalmuna yome tim.” 
6 Ke Sukot-megãwo gblɔ be: “Ðe wò asi su Zeba kple Zalmuna dzi xoxo hafi míana nuɖuɖu wò aʋakɔ la?” 
7 Eye Gideon ɖo eŋu be: “Le nya ma ɖeɖe si miegblɔ ta, ne Afetɔ tsɔ Zeba kple Zalmuna de asi nam la, matsɔ aŋɔka kple ŋù siwo le gbedadaƒo la aƒo mi vevie.” 
8 Edzo le afi ma yi Penuel, eye wògabia nuɖuɖu woawo hã, ke Penueltɔwo ɖo eŋu nɛ abe Sukottɔwo ke ene. 
9 Eya ta egblɔ na Penueltɔwo hã be: “Ne metrɔ gbɔ le ŋutifafa me la, magbã mɔ́ sesẽ sia aƒu anyi.”
10 Ke Zeba kple Zalmuna kpakple woƒe aʋawɔla siwo anɔ abe ame akpe wuiatɔ̃ ene la le Karkor. Ame siawo koe susɔ le Ɣedzeƒetɔwo ƒe aʋakɔ blibo la me, elabe ame akpe alafa ɖeka blaeve siwo ta yi la tsi aʋa. 
11 Gideon yi ɖato agbadɔmenɔlawo ƒe mɔ le Noba kple Yogbeha ƒe ɣedzeƒe, eye wòva dze aʋakɔ la dzi esime woɖe ŋu ɖi. 
12 Esi Zeba kple Zalmuna si la, eti wo yome eye wòva lé Zeba kple Zalmuna siwo nye Midian-fia eveawo, eye zi tɔ le asaɖa blibo la me ale gbegbe.
13 Emegbe Gideon, Yoas vi, trɔ tso aʋa la gbɔna, eye wòto Heres-todzimɔ. 
14 Elé ɖekakpui aɖe si tso Sukot la le mɔa dzi, eye wòbia gbee. Eye ɖekakpuia ŋlɔ Sukot-megãwo kple eƒe ametsitsiwo ŋkɔwo nɛ; wole ŋutsu blaadre vɔ adre. 
15 Eye wòyi Sukottɔwo gbɔ hegblɔ be: “Zeba kple Zalmuna, siwo ta mieɖe alɔme le ŋunye le gblɔ be, ‘Ðe wò asi su Zeba kple Zalmuna dzi xoxo hafi míana nuɖuɖu wò ame siwo ŋu ɖeɖi tea?’ mahã la woe nye esi.” 
16 Eye wòlé dumemetsitsiawo, eye wòtsɔ aŋɔka kple ŋù siwo wotsɔ tso gbedadaƒo la fia nunya Sukot ŋutsuawo. 
17 Egbã Penuel mɔ́ la ƒu anyi, eye wòwu dua me ŋutsuwo.
18 Eye wòbia Zeba kple Zalmuna be: “Ŋutsu kawo ƒomevie miewu le Tabor?” Woɖo eŋu be: “Wole abe wò ene, wo dometɔ ɖe sia ɖe ɖi fia vi.” 
19 Eye wògblɔ be: “Nɔvinyeŋutsuwoe, danye ƒe viwoe. Zi ale si Afetɔ le agbe la, ne ɖe miena wotsi agbe la, anye ne nyemawu mi o.” 
20 Eye wògblɔ na eƒe ŋgɔgbevi Yeter be: “Tso nàwu wo.” Ke ɖekakpui la meɖe eƒe yi o, ele vɔvɔ̃m, elabena ɖekakpui dzaa ko wònye. 
21 Eya ta Zeba kple Zalmuna gblɔ be: “Wò ŋutɔ tso nàwu mí, elabena ŋutsu ƒe ŋusẽ mee wokpɔa eƒe ŋutsunyenye le.” Ale Gideon tso, eye wòwu Zeba kple Zalmuna, eye wòɖe atsyɔ̃ɖonu gobɛ siwo le kɔ na woƒe kposɔwo.
22 Emegbe Israel ŋutsuwo gblɔ na Gideon be: “Ðu fia ɖe mía dzi, wò ŋutɔ kple viwòŋutsu kpakple wò tɔgbuiyɔvi siaa, elabena wòe ɖe mí tso Midian si me.” 
23 Ke Gideon gblɔ na wo be: “Nyemaɖu fia ɖe mia dzi o, eye vinye hã maɖu fia ɖe mia dzi o. Afetɔe aɖu fia ɖe mia dzi.” 
24 Eye Gideon gagblɔ na wo be: “Mabia nu ɖeka mi: mia dometɔ ɖe sia ɖe neɖe ŋɔtigɛ ɖeka le eƒe aboyonuwo me nam.” (Sikaŋɔtigɛwo nɔ ame siwo wosi la si, elabena Ismaeltɔwoe wonye.) 
25 Woɖo eŋu nɛ be: “Míana wò faa.” Ale wokeke avɔ aɖe ɖi, eye wo dometɔ ɖe sia ɖe ɖe ŋɔtigɛ ɖeka le eƒe aboyonuawo me da ɖe edzi. 
26 Sikaŋɔtigɛ si wòbia la ƒe kpekpeme va le sekel akpe ɖeka alafa adre, womebu atsyɔ̃ɖonu gobɛawo, togɛwo, Midian-fiawo ƒe alẽfuwu dzĩwo kple woƒe kposɔwo ƒe kɔgawo ɖe eme o.
27 Gideon tsɔe wɔ kɔmewu, eye wòtsɔe da ɖe wo dedu Ofra me be woakpɔ; eye Israel blibo yia afi ma ɖasubɔnɛ heto esia dzi wɔ gbɔgbɔmehasi, eye wòzu mɔ̃ ɖe Gideon kple eƒe aƒe la.
28 Ale wobɔbɔ Midiantɔwo ɖe anyi le Israel ŋkume, eye womegatso ɖe wo ŋu kpɔ o; eye anyigba la kpɔ gbɔdzɔe ƒe blaene sɔŋ le Gideon ŋɔli.
29 Eye Yerubaal, Yoas vi, trɔ yi eƒe me, eye wònɔ afi ma.
30 Wodzi ŋutsuvi blaadre na Gideon, elabena srɔ̃ geɖe nɔ esi. 
31 Eƒe ahiãvi si le Sekem hã dzi ŋutsuvi nɛ, eye wòna ŋkɔe be Abimelek. 
32 Eye Gideon, Yoas vi la ku esime wònɔ agbe tsi nyuie, eye woɖii ɖe fofoa Yoas ƒe yɔdo me le Abi-Ezertɔwo ƒe Ofra.
33 Esi Gideon nya ku ko la, Israel-viwo gade asi Baalwo subɔsubɔ me ake heto esia me wɔ gbɔgbɔmehasi, eye wotsɔ Baal-Berit wɔ woƒe mawui. 
34 Israel-viwo meɖo ŋku Afetɔ woƒe Mawu, ame si ɖe wo tso woƒe futɔ siwo ƒo xlã wo la katã si me la dzi o; 
35 eye womeve Yerubaal, ame si nye Gideon, ƒe aƒe la nu le nyui siwo katã wòwɔ na Israel la ta o.

ƲƆNUDRƆ̃LAWO 9
1 Le ɣeyiɣi aɖe megbe la, Abimelek, Yerubaal vi, yi Sekem le nyruiawo gbɔ, eye wògblɔ na wo kple tɔgbuia ƒe ƒome blibo la be: 
2 “Meɖe kuku, mibia Sekem kplɔlawo katã be: ‘Kae nyo na mi wu, be Yerubaal viŋutsu blaadreawo katã naɖu fia ɖe mia dzi loo alo be ŋutsu ɖeka ko naɖu fia ɖe mia dzi? Eye miɖo ŋku edzi be nye la miawo ŋutɔ miaƒe ƒu kple ŋutilãe menye.’”
3 Eya ta nyruiawo gblɔ nya siawo katã na Sekem kplɔlawo ɖe enu, ale woƒe dzi trɔ ɖe Abimelek ŋu be yewoadze eyome, elabena wogblɔ be: “Míawo ŋutɔwo mía nɔvie.” 
4 Eya ta woɖe klosalo blaadre tso Baal-Berit ƒe trɔ̃xɔ me nɛ, eye Abimelek tsɔe di kuviatɔwo kple gbevuwo be woanɔ ye ŋu. 
5 Emegbe eyi fofoa ƒe me le Ofra, eye wòwu nɔviaŋutsu siwo nye Yerubaal viŋutsu blaadreawo ɖe kpe ɖeka dzi. Yotam, si nye Yerubaal viŋutsu ɖevitɔ la koe tsi agbe, elabena eɣla eɖokui.
6 Eye Sekem kplɔlawo kple Bet-Milo nɔlawo katã va ƒo ƒu, eye wotsɔ Abimelek ɖo fiae le ati gã la gbɔ le sɔti si le Sekem la gbɔ.
7 Esi wogblɔe na Yotam la, enumake eyi ɖatɔ ɖe Gerizim To la tame, eye wòdo ɣli sesĩe gblɔ na wo be: “Miɖo tom, mi Sekem kplɔlawo, ne Mawu naɖo to mi:
8 “Gbe ɖeka atiwo yi be yewoaɖo fia ɖe yewo nu. Eya ta wogblɔ na amiti be: ‘Ðu fia ɖe mía dzi.’ 
9 Ke amiti gblɔ na wo be: ‘Ðe maɖe asi le nye ami si wozãna tsɔ kafua Mawu kple amegbetɔwo la ŋu ayi aɖanɔ ya ƒom le ati bubuwo tamea?’ 
10 Eye atiawo gblɔ na gboti be: ‘Va ɖu fia ɖe mía dzi.’ 
11 Ke gboti gblɔ na wo be: ‘Ðe magblẽ nye vivi kple nye kutsetse nyui la ɖi ayi aɖanɔ ya ƒom le ati bubuwo tamea?’ 
12 Emegbe atiawo gblɔ na wainka be: ‘Va ɖu fia ɖe mía dzi.’ 
13 Wainka ɖo eŋu na wo be: ‘Ðe magblẽ nye wain yeye, si doa dzidzɔ na Mawu kple amegbetɔwo la ɖi ayi aɖanɔ ya ƒom le atiwo tamea?’ 
14 Mlɔeba atiawo katã gblɔ na ŋuve be: ‘Va ɖu fia ɖe mía dzi.’ 
15 Ŋuve ɖo eŋu na atiawo be: ‘Ne nyateƒee wònye be miebe yewoasi ami nam ne maɖu fia ɖe mia dzi la, ekema miva be ɖe nye vɔvɔli te. Ke ne menye nenema o la, ekema dzo nedo tso ŋuve me wòafiã Lebanon ƒe sedertiwo.’
16 “Azɔ nuteƒe kple nu dzeamee wònye miewɔ be mietsɔ Abimelek ɖo fiaea? Eye nyui wònye miewɔ na Yerubaal kple eƒe aƒe la? Eye ɖe mieɖo eteƒe nɛ abe ale si wòdze nɛ enea? 
17 Esi fofonye wɔ aʋa na mi la, etsɔ eƒe agbe de afɔku me heɖe mi tso Midiantɔwo si me. 
18 Gake egbe la, mietso ɖe fofonye ƒe aƒe la ŋu, eye miewu viaŋutsu blaadre sɔŋ ɖe kpe ɖeka dzi. Eye mietsɔ Abimelek, eƒe kosi ƒe vi, ɖo fiae ɖe Sekem kplɔlawo nu le esi wònye mia nɔvi ta. 
19 Ɛ̃, ne nuteƒe kple nu dzeamee wònye miewɔ ɖe Yerubaal kple eƒe aƒea ŋu egbe la, ekema mikpɔ dzidzɔ ɖe Abimelek ŋu, eye eya hã nekpɔ dzidzɔ ɖe mia ŋu. 
20 Ke ne menye nenemae o la, ekema dzo nedo tso Abimelek me ne wòafiã Sekem kplɔlawo kple Bet-Milo, eye dzo nedo tso Sekem kplɔlawo kple Bet-Milo me ne wòafiã Abimelek.”
21 Eye Yotam si yi Beer ɖanɔ afi ma le nɔvia Abimelek ta.
22 Abimelek ɖu fia ɖe Israel dzi ƒe etɔ̃. 
23 Eye Mawu na fuléle ɖo Abimelek kple Sekem kplɔlawo dome, eye wotrɔ Abimelek to eme. 
24 Esia dzɔ ale be woabia ŋuta si wosẽ le Yerubaal viŋutsu blaadreawo ŋu la ƒe hlɔ̃, ne woƒe ʋu nava wo nɔvi Abimelek dzi le wo wuwu ta, kple Sekem kplɔlawo dzi le esi wokpe ɖe eŋu wòwu nɔviawo ta. 
25 Eya ta Sekem kplɔlawo ɖe amewo wode xa ɖe towo dzi ɖe eŋu, eye wodaa adzo ame sia ame si va toa wo gbɔ le mɔ ma dzi. Eye wova gblɔe na Abimelek.
26 Eye Gaal, Ebed vi, kple nɔviawo va Sekem, eye Sekem kplɔlawo ɖo ŋu ɖe eŋu. 
27 Woyi agblewo me ɖaxa woƒe waintsetsewo, wofiã wo tsɔ wɔ wain, eye woɖu azã, emegbe wova woƒe mawu la ƒe me, woɖu nu no nu, eye wodo ɖiŋu na Abimelek. 
28 Emegbe Gaal, Ebed vi gblɔ be: “Ame kae nye Abimelek, eye ame kae nye Sekem, ne míasubɔe? Ðe menye eyae nye Yerubaal vi, eye Zebul nye eƒe dumegã oa? Misubɔ Hamor, Sekem fofo, ƒe amewo boŋ! Ke nu ka tae míasubɔe ɖo? 
29 Ne ɖe dukɔ sia le nye kpɔkplɔ te la, anye ne meɖe Abimelek le zi dzi.” Eye wògblɔ na Abimelek be: “Dzi wò aʋakɔ ɖe edzi, eye nàdo va kpem.”
30 Esi dumegã Zebul se Gaal, Ebed vi, ƒe nyawo la, dzi kui vevie. 
31 Eya ta edɔ amewo le adzame ɖo ɖe Abimelek gbɔ be woagblɔ nɛ be: “Kpɔ ɖa! Gaal, Ebed vi, kple nɔviawo va Sekem, eye wole to gblẽm na dua be woatso ɖe ŋuwò. 
32 Eya ta wò kple wò amewo miva le zã me, ne miade xa ɖe gbe me. 
33 Ne ŋu ke eye ɣe nya dze ko la, tso kaba nàdze dua dzi; eye ne Gaal kple eŋumewo ho ɖe ŋuwò la, wɔ nu sia nu si nàte ŋui ne nàɖu edzi.”
34 Ale Abimelek kple ame siwo katã le eŋu la fɔ zã, eye wole aʋalɔgo ene me va de xa ɖe Sekem dua ŋu. 
35 Esi Gaal, Ebed vi, do va tɔ ɖe dua ƒe agbo nu la, Abimelek kple ame siwo le eŋu la tso le afi si wode xa ɖo. 
36 Esi Gaal kpɔ ameawo la, egblɔ na Zebul be: “Kpɔ ɖa! Amewo ɖi tso toawo dzi gbɔna.” Ke Zebul gblɔ nɛ be: “Towo ƒe vɔvɔli kpɔm nèle be amewoe.”
37 Emegbe Gaal gagblɔ be: “Kpɔ ɖa! Amewo ɖi tso anyigba la ƒe kɔkɔƒe gbɔna, eye aʋalɔgo ɖeka to Meonenim ƒe ati gã gbɔ mɔ gbɔna.” 
38 Eye Zebul ɖo eŋu nɛ be: “Menye wòe ɖi nu me be: ‘Ame kae nye Abimelek, ne míasubɔe?’ hã oa? Alo menye ame siawoe nègbe oa? Ho azɔ nàyi aɖakpe aʋa kpli wo.”
39 Eya ta Gaal dze Sekem kplɔlawo ŋgɔ woyi ɖawɔ aʋa kple Abimelek. 
40 Abimelek nyae ɖe nu, eye Gaal si le enu, eye wowu ame geɖe kɔ ɖi va se ɖe keke dugbo la nu ke.
41 Eye Abimelek tsi Aruma, ke Zebul nya Gaal kple nɔviawo ɖa le Sekem. 
42 Le ŋufɔke la, ameawo do go yi agble, eye ame aɖewo va gblɔe na Abimelek. 
43 Ale wòkplɔ eƒe ameawo, ema wo ɖe aʋalɔgo etɔ̃ me, eye wòde xa ɖe gbe me. Esi wòkpɔ be ameawo le dodom tso dua me la, edze wo dzi eye wòwu wo. 
44 Abimelek kple aʋalɔgo si le eŋu la wɔ kaba yi ɖatɔ ɖe dugbo la nu, eye aʋalɔgo eve dze ame siwo katã le agble la dzi, eye wowu wo. 
45 Abimelek wɔ aʋa kple dua ŋkeke ma katã, eye wòxɔ dua. Ewu emenɔlawo, eye wògbã dua hewu dze ɖe edzi.
46 Esi kplɔla siwo katã le Sekem mɔ́ la me se nya sia la, enumake woyi ɖe El-Berit ƒe aƒe ƒe xɔ tamegoba la me. 
47 Esi wova gblɔe na Abimelek be kplɔla siwo le Sekem mɔ́ la me va ƒo ƒu la, 
48 Abimelek kple ame siwo katã le eŋu la yi Zalmon To la dzi. Eye Abimelek tsɔ fía lã atilɔ tsɔ ɖo abɔta. Egblɔ na eŋumewo be: “Nu si mewɔ miekpɔ la, netsɔ, miawo hã miawɔe nenema!” 
49 Eya ta ameawo katã lã atilɔ hedze Abimelek yome. Eye wotsɔ atilɔawo va kɔ ɖe xɔ tamegoba la ŋu, eye wotɔ dzo xɔa ɖe wo dzi. Ale Sekem mɔ́ me nɔlawo katã hã ku; woanɔ ŋutsu kple nyɔnu akpe ɖeka.
50 Eye Abimelek ho yi Tebez; eɖe to ɖe Tebez eye wòxɔe. 
51 Ke mɔ́ sesẽ aɖe le dua titina, eye dua me tɔwo katã, ŋutsuwo kple nyɔnuwo kple dumegãwo katã si yi afi ma. Wodo ʋɔa ɖe wo ɖokuiwo nu, eye wolia mɔ́ sesẽ la yi etame. 
52 Eye Abimelek yi mɔ́ sesẽ la gbɔ ɖadze aʋa ɖe eŋu. Eva mɔ́ sesẽ la ƒe mɔnu be yeatɔ dzoe. 
53 Ke nyɔnu aɖe ɖe asi le tévi ŋu tso dzi wòva dze ta na Abimelek, eye wògbã ta nɛ. 
54 Eya ta eyɔ eƒe adekplɔvi gblɔ nɛ be: “Ðe wò yi ne nàwum, ne womagagblɔ le ŋunye be: ‘Nyɔnue wui’ o.” Enumake eƒe adekplɔvi la ƒo yi ɖee wòku.
55 Esi Israel ŋutsuwo kpɔ be Abimelek ku la, wo katã wotrɔ yi woƒe aƒewo me. 
56 Ale Mawu ɖo vɔ̃ si Abimelek wɔ ɖe fofoa ŋu hewu nɔviaŋutsu blaadreawo teƒe nɛ. 
57 Eye Mawu he vɔ̃ siwo katã Sekem ŋutsuwo hã wɔ va woawo ŋutɔwo ƒe ta dzi. Ale Yotam, Yerubaal vi, ƒe fiƒodea ɖi wo ŋu.

ƲƆNUDRƆ̃LAWO 10
1 Le Abimelek megbe la, Tola, Pua vi, Dodo vi, ame si tso Isakar-to la me, do be yeaxɔ na Israel. Enɔ Samir le Efrayim tonuto la me. 
2 Edrɔ̃ ʋɔnu na Israel ƒe blaeve vɔ etɔ̃. Emegbe Tola ku, eye woɖii ɖe Samir.
3 Eya megbe Gileadtɔ Yair do, eye wòdrɔ̃ ʋɔnu na Israel ƒe blaeve vɔ eve. 
4 Viŋutsu blaetɔ̃ nɔ esi, wodoa tedzi blaetɔ̃, eye du blaetɔ̃ nɔ wo si, woyɔa du siawo be Havot-Yair va se ɖe egbe; wole Gilead-nyigba dzi. 
5 Emegbe Yair ku, eye woɖii ɖe Kamon.
6 Israel-viwo gawɔ nu si nye vɔ̃ le Afetɔ ŋkume, eye wosubɔ Baalwo, Astoretwo, Aram mawuwo, Sidon mawuwo, Moab mawuwo, Amonitɔwo ƒe mawuwo kple Filistitɔwo ƒe mawuwo. Ale wogblẽ Afetɔ ɖi, eye womesubɔe o. 
7 Eya ta Afetɔ ƒe dɔmedzoe bi ɖe Israel ŋu, ale be wòtsɔ wo dzra na Filistitɔwo kple Amonitɔwo. 
8 Ale wosẽ ŋuta le Israel-viwo ŋu hete wo ɖe anyi vevie le ƒe ma me—wote Israel-vi siwo katã le Yordan ƒe go kemɛ dzi le Amoritɔwo ƒe anyigba si le Gilead la dzi ɖe anyi ƒe wuienyi sɔŋ. 
9 Amonitɔwo tsoa Yordan-tɔsisia hã va wɔa aʋa kple Yuda, Benyamin kple Efrayim ƒe aƒe la; eye Israel ɖo xaxa gã aɖe me. 
10 Eye Israel-viwo yɔ Afetɔ be wòaxɔ na yewo hegblɔ be: “Míewɔ nu vɔ̃ ɖe ŋuwò, elabena míegblẽ mía Mawu la ɖi hesubɔ Baalwo.”
11 Ke Afetɔ gblɔ na Israel-viwo be: “Ðe nyemeɖe mi tso Egiptetɔwo, Amoritɔwo, Amonitɔwo, Filistitɔwo, 
12 Sidontɔwo, Amalektɔwo kple Midiantɔwo si me esime wote mi ɖe anyi oa? Esi miedo ɣli yɔm la, meɖe mi tso wo si me. 
13 Ke miegblẽm ɖi hesubɔ mawu bubuwo. Esia tae nyemagaɖe mi azɔ o. 
14 Miyi ɖayɔ mawu siwo mietia la ne woakpe ɖe mia ŋu. Woneɖe mi le miaƒe xaxaɣi.” 
15 Ke Israel-viwo gblɔ na Afetɔ be: “Míewɔ nu vɔ̃. Wɔ mí ale si dze ŋuwò. Gake míeɖe kuku, ɖe mí egbe sia.” 
16 Eye woɖe dutamawuwo ɖa le wo dome hesubɔ Afetɔ, ale be megate ŋu do dzi tsɔ Israel-viwo ƒe fukpekpewo o.
17 Emegbe la, Amonitɔwo kpe ta, eye wova ƒu asaɖa anyi ɖe Gilead. Eya ta Israel-viwo hã ƒo ƒu heva ƒu asaɖa anyi ɖe Mizpa. 
18 Eye Gileadtɔwo kple woƒe amegãwo gblɔ na wo nɔewo be: “Ame kae adze ŋgɔ akpe aʋa kple Amonitɔwo? Eyae azu tatɔ ɖe Gileadtɔwo katã nu.”

ƲƆNUDRƆ̃LAWO 11
1 Gileadtɔ Yefta nye aʋakalẽtɔ sesẽ aɖe; enye gbolo aɖe ƒe vi, eye Yefta fofoe nye Gilead. 
2 Gilead srɔ̃ dzi ŋutsuvi bubuwo hã nɛ. Esi srɔ̃a ƒe viwo tsi la, wonya Yefta hegblɔ nɛ be: “Domenyinu aɖeke masu asiwò le mía fofo ƒe me o, elabena nyɔnu bubu ƒe vie nènye.” 
3 Eya ta Yefta si le nɔviawo nu, eye wòva nɔ Tob-nyigba dzi. Eye ŋutsu dɔaɖekemawɔlawo va wɔ ɖeka kple Yefta, eye wodze eyome.
4 Le ɣeyiɣi aɖe megbe la, Amonitɔwo kpe aʋa kple Israel. 5 Esi Amonitɔwo kpe aʋa kple Israel la, enumake Gilead-metsitsiwo yi be yewoaɖakplɔ Yefta tso Tob-nyigba dzi vɛ. 
6 Wogblɔ na Yefta be: “Va nye míaƒe aʋafia, ne míawɔ aʋa kple Amonitɔwo.” 
7 Ke Yefta bia Gilead-metsitsiwo be: “Menye miawoe lé fum vevie henyam le fofonye ƒe me oa? Ke nu ka tae mieva gbɔnye azɔ esi mieɖo xaxa me?” 
8 Eye Gilead-metsitsiwo gblɔ na Yefta be: “Esia ta míeva gbɔwò ɖo. Ne èyi kpli mí ɖawɔ aʋa kple Amonitɔwo la, àzu mí Gileadtɔwo katã ƒe kplɔla.” 
9 Eya ta Yefta gblɔ na Gilead-metsitsiawo be: “Ne miekplɔm gbɔe meyi ɖawɔ aʋa kple Amonitɔwo, eye Afetɔ ɖu wo dzi nam la, ekema mazu miaƒe kplɔla!” 
10 Eye Gilead-metsitsiawo ɖo eŋu na Yefta be: “Afetɔ nanye ɖasefo le mí kpli wò dome ne míewɔ nya si nègblɔ la dzi o.” 
11 Eya ta Yefta yi kple Gilead-metsitsiawo, eye dukɔ la tsɔe ɖo woƒe kplɔla kple aʋafia. Eye Yefta gbugbɔ gblɔ nya siwo wògblɔ la katã le Afetɔ ŋkume le Mizpa.
12 Eye Yefta dɔ ame ɖo ɖe Amonitɔwo ƒe fia gbɔ be: “Nu kae mewɔ ɖe ŋuwò hafi nèho aʋa ɖe nye anyigba ŋu?” 
13 Amonitɔwo ƒe fia gblɔ na Yefta ƒe ame dɔdɔawo be: “Elabena Israel xɔ nye anyigba esime woʋu tso Egipte va, woxɔe tso Arnon va se ɖe Yabok va ɖo keke Yordan nu ke. Eya ta azɔ la, gbugbɔe nam kpoo.” 
14 Ke Yefta gadɔ ame ɖo ɖe Amonitɔwo ƒe fia ake 15 be woagblɔ nɛ be:
“Ale Yefta gblɔe nye esi: ‘Israel mexɔ Moabtɔwo ƒe anyigba kple Amonitɔwo ƒe anyigba o, 
16 elabena esime Israel ʋu tso Egipte la, woto gbedzi va ɖo Ƒudzĩ la nu heva Kades. 
17 Eye Israel dɔ ame ɖo ɖe Edom-fia, be woagblɔ nɛ be: “Meɖe kuku, na míato wò anyigba dzi ayi,” ke Edom-fia meɖo toe o. Edɔ ame ɖo ɖe Moab-fia hã, ke eya hã melɔ̃ o. Eye Israel tsi Kades. 
18 Esi woto gbea dzi la, wotso Edom-nyigba kple Moab-nyigba ɖi. Woto Moab-nyigba ƒe ɣedzeƒe gome heva ƒu asaɖa anyi ɖe Arnon nuto la me; womege ɖe Moab ƒe anyigba dzi o, elabena Arnon ye do liƒo na Moab.
19 “‘Emegbe Israel dɔ ame ɖo ɖe Amoritɔwo ƒe fia Sihon, si nye Hesbon-fia, eye Israel gblɔ nɛ be: “Meɖe kuku, na míato wò anyigba dzi ayi míawo ŋutɔwo mía nɔƒe.” 
20 Ke Sihon meka ɖe Israel-viwo dzi ne wòana woato eƒe anyigba dzi ayi o, eya ta Sihon ƒo eƒe amewo katã nu ƒu heva ƒu asaɖa anyi ɖe Yahaz, eye wòwɔ aʋa kple Israel. 
21 Eye Afetɔ, Israel ƒe Mawu la, tsɔ Sihon kple eƒe amewo katã de asi na Israel, ale be woɖu wo dzi, eye Israel xɔ Amoritɔ siwo nye anyigba ma dzi tɔwo la ƒe anyigba katã. 
22 Ale woxɔ Amoritɔwo ƒe anyigba la katã wòzu wo tɔ tso Arnon-tɔsisia nu va se ɖe Yabok-tɔsisia nu, tso gbea dzi va se ɖe Yordan nu.
23 “‘Afetɔ, Israel ƒe Mawu lae nya Amoritɔwo ɖa le eƒe dukɔ Israel ŋgɔ, azɔ wòa nèbe yeanya wo ɖa? 
24 Menye nu sia nu si wò mawu Kemos na wò lae nye tɔwò oa? Eya ta ame sia ame si mía Mawu Afetɔ nya ɖa le mía ŋgɔ lae míanya ɖa. 
25 Azɔ wòe nyo wu Moab-fia Balak, Zipor vi la? Ðe wòhe nya kple Israel alo wɔ aʋa kplii kpɔa? 
26 Esi Israel nɔ Hesbon kple eŋu duwo, Aroer kple eŋu duwo, kpakple du siwo katã le Arnon ŋu la me ƒe alafa etɔ̃ sɔŋ ɖe, nu ka tae mète kpɔ be yeagbugbɔ xɔe le wo si ɣemaɣi o? 
27 Nyemewɔ nu vɔ̃ ɖe ŋuwò o, eya ta tɔwò medzɔ be nèho aʋa ɖe ŋunye o. Afetɔ, Ʋɔnudrɔ̃la la, nadrɔ̃e le Israel-viwo kple Amonitɔwo dome egbea.’”
28 Ke Amonitɔwo ƒe fia la meɖo to Yefta ƒe nya siwo wògblɔ ɖo ɖee la o.
29 Ale Afetɔ ƒe gbɔgbɔ va Yefta dzi, eye wòto Gilead kple Manase yi Mizpe si le Gilead, eye wòtso Mizpe si le Gilead ɖo ta Amonitɔwo gbɔ.
30 Eye Yefta ɖe adzɔgbe na Afetɔ gblɔ be: “Ne ètsɔ Amonitɔwo de asi nam la, 
31 ekema ame si ado tso nye aƒe ƒe agbo nu ava kpem ne megbɔ tso Amonitɔwo gbɔ le ŋutifafa me la, azu Afetɔ tɔ, eye matsɔ ame ma ana abe numevɔsa ene.”
32 Ale Yefta yi ɖawɔ aʋa kple Amonitɔwo, eye Afetɔ tsɔ wo de asi nɛ. 
33 Esi wo hewu wo dometɔ gbogbo aɖewo ŋutɔ tso Aroer yi keke Minit—exɔ du blaeve—va se ɖe Abel-Keramim ke. Ale wobɔbɔ Amonitɔwo ɖe anyi le Israel-viwo ŋkume.
34 Mlɔeba esi Yefta trɔ gbɔna eƒe me le Mizpa la, kpɔ ɖa, vianyɔnue nye ema do go le axatsɛ ƒom hele ɣe ɖum gbɔna ekpe ge! Ke eya koe nye vi ɖeka hɔ̃ si le esi. Viŋutsu alo vinyɔnu bubu aɖeke megale esi kpe ɖe eŋu o. 
35 Esi wòkpɔe la, edze eƒe awuwo hegblɔ be: “Ao, vinye! Ègbã dzi nam, elabe èzu ame si menya de gbe. Elabe meɖe adzɔgbe na Afetɔ, eye nyemagate ŋu atrɔe o.”
36 Ke egblɔ nɛ be: “Fofonye, ne èke nu na Afetɔ la, ekema wɔm abe ale si nèdo ŋugbee ene, elabena Afetɔ bia hlɔ̃ wò futɔ Amonitɔwo na wò.” 
37 Eye wògblɔ na fofoa be: “Wɔ nu sia ko nam: Ðe mɔ nam ɣleti eve manɔ ɖokuinye si, ne nye kple xɔ̃nyewo míayi toawo dzi aɖafa nye ɖetugbui leaƒe nyenye.”
38 Eye wògblɔ nɛ be: “Heyi!” Ale wòɖe mɔ nɛ wòdzo ɣleti eve, eye eya kple exɔlɔ̃awo yi ɖafa eƒe ɖetugbui leaƒe nyenye le toawo dzi. 
39 Esi ɣleti eveawo wu enu la, etrɔ gbɔ va fofoa gbɔ, eye wòwɔ adzɔgbe si wòɖe le eŋu la dzi. Ke medɔ kple ŋutsu kpɔ o. Eye wòzu kɔnu le Israel be, 
40 ƒe sia ƒe la, Israel ɖetugbuiwo yina ɖakafua Gileadtɔ Yefta ƒe vinyɔnu la, ŋkeke ene le ƒe ɖeka me.

ƲƆNUDRƆ̃LAWO 12
1 Azɔ Efrayim ŋutsuwo kpe ta, eye wotso tɔ la va Zafon, eye wogblɔ na Yefta be: “Nu ka ŋuti nètso tɔ yi ɖawɔ aʋa kple Amonitɔwo, gake mèyɔ mí be míayi kpli wò o? Míatɔ dzo wò aƒe ɖe dziwò.” 
2 Ke Yefta gblɔ na wo be: “Nye kple nye dukɔ míekpe aʋa dziŋɔ aɖe kple Amonitɔwo. Meyɔ mi be miava kpe ɖe ŋunye, gake mieva ɖem le wo si me o. 
3 Esi mekpɔe be miegbɔna xɔxɔ ge nam o la, meɖoe be matsɔ nye agbe ade afɔku me ahaho ɖe Amonitɔwo ŋu, eye Afetɔ tsɔ wo de asi nam. Ke nu ka tae mieva egbea be miawɔ aʋa kplim?”
4 Enumake Yefta ƒo Gilead ŋutsuwo katã nu ƒu, eye wowɔ aʋa kple Efrayim; eye Gilead ŋutsuwo ɖu Efrayimtɔ siwo gblɔ be, “Mi Gileadtɔ siwo le Efrayim kple Manase la, sisilawo koe mienye tso Efrayim” la dzi. 
5 Gileadtɔwo va xe mɔ le Yordan tɔtsoƒewo le Efrayim ŋgɔ; eye ne Efrayim ŋutsuwo si va yina la, wogblɔna be, “Mina matso tɔ la”; eye Gilead ŋutsuwo biaa wo dometɔ ɖe sia ɖe be, “Efrayimtɔe nènyea?” Ne eɖo eŋu be, “Ao!” la, 
6 wogblɔna nɛ be, “Taflatsɛ, gblɔ be Sibolet.” Ke egblɔna be, “Zibolet,” elabena metea ŋu yɔa nyaa nyuie o. Eye wolénɛ wuna ɖe Yordan tɔtsoƒe la. Ale Efrayimtɔ akpe blaene vɔ eve tsi yi nu ɣemaɣi.
7 Yefta drɔ̃ ʋɔnu na Israel ƒe ade; emegbe Yefta, Gileadtɔ la ku, eye woɖii ɖe wo dedu me le Gilead.
8 Le eyome la, Ibzan si tso Betlehem drɔ̃ ʋɔnu na Israel. 
9 Viŋutsu blaetɔ̃ kple vinyɔnu blaetɔ̃ le esi. Ena vianyɔnuawo yi ɖaɖe ŋutsu siwo tso hlɔ̃ bubuwo me, eye wòna wokplɔ nyɔnu blaetɔ̃ vɛ na viaŋutsuwo woɖe. Edrɔ̃ ʋɔnu na Israel ƒe adre. 
10 Emegbe Ibzan ku, eye woɖii ɖe Betlehem.
11 Le eyome Elon, Zebulontɔ la, drɔ̃ ʋɔnu na Israel. Edrɔ̃ ʋɔnu Israel ƒe ewo. 
12 Emegbe Elon, Zebulontɔ la ku, eye woɖii ɖe Aiyalon le Zebulon-nyigba dzi.
13 Le eyome la, Abdon, Piratontɔ Hilel vi, drɔ̃ ʋɔnu na Israel. 
14 Viŋutsu blaene kple tɔgbuiyɔvi blaetɔ̃ le esi, eye wodoa tedzi blaadre. Edrɔ̃ ʋɔnu na Israel ƒe enyi. 
15 Emegbe Abdon, Piratontɔ Hilel vi la ku, eye woɖii ɖe Piraton le Efrayim-nyigba dzi le Amalektɔwo ƒe to la dzi.

ƲƆNUDRƆ̃LAWO 13
1 Israel-viwo gawɔ nu si nye vɔ̃ le Afetɔ ŋkume, eye Afetɔ tsɔ wo de asi na Filistitɔwo ƒe blaene.
2 Ɣemaɣi la, ŋutsu aɖe tso Zora, eŋkɔe nye Manoa tso Dan viwo ƒe ƒomea me. Srɔ̃a tsi ko, eye vi mele esi o. 
3 Gbe ɖeka Afetɔ ƒe dɔla ɖe eɖokui fia nyɔnu la hegblɔ nɛ be: “Kpɔ ɖa, ètsi ko, eye vi mele asiwò o. Gake èle fu fɔ ge adzi ŋutsuvi. 
4 Ke kpɔ nyuie be màgano wain alo aha muame aɖeke o, eye mègaɖu nu makɔmakɔ aɖeke o. 
5 Kpɔ ɖa, èle fu fɔ ge adzi ŋutsuvi, eye talũhɛ maka ta ŋu nɛ o, elabena ɖevi la anye Mawu ƒe Naziritɔ tso edziɣi; eye axɔ ŋgɔ aɖe Israel tso Filistitɔwo si me.”
6 Eye nyɔnua yi ɖagblɔ na srɔ̃a be: “Mawu vavã la ƒe ame aɖe va gbɔnye, eɖi Mawu vavã la ƒe dɔla, eye ŋɔdzi le eŋu ŋutɔ. Nyemebia afi si wòtso lae o, eye meyɔ eŋkɔ hã nam o. 
7 Ke egblɔ nam be: ‘Kpɔ ɖa, èle fu fɔ ge adzi ŋutsuvi. Eya ta mègano wain alo aha muame aɖeke o, eye mègaɖu nu makɔmakɔ aɖeke o, elabena ɖevi la anye Mawu ƒe Naziritɔ tso edziɣi va se ɖe eƒe kugbe.’”
8 Eye Manoa ƒo koko na Afetɔ vevie be: “Afetɔ, meɖe kuku. Taflatsɛ na Mawu vavã la ƒe ame si nèdɔ ɖa fifi laa la nagava mía gbɔ ake, ne wòafia nu si míawɔ na ɖevi si woadzi la mí.” 
9 Eya ta Mawu vavã la ɖo to Manoa, eye Mawu vavã la ƒe dɔla gava nyɔnua gbɔ ake esime wòbɔbɔ nɔ agble me; srɔ̃a Manoa mele egbɔ o. 
10 Nyɔnua ƒu du kaba yi ɖagblɔ na srɔ̃a be: “Kpɔ ɖa! Ŋutsu si va gbɔnye nyitsɔ la gaɖe eɖokui fiam.”
11 Eye Manoa tso kplɔ srɔ̃a ɖo. Esi wòva ŋutsua gbɔ la, ebiae be: “Wòe ƒo nu kple srɔ̃nyea?” Eɖo eŋu be: “Nyee.” 
12 Eye Manoa gblɔ be: “Wò nyawo neva eme! Aleke míanyi ɖevi lae, eye dɔ kae wòawɔ?” 
13 Eye Afetɔ ƒe dɔla la gblɔ na Manoa be: “Ele be srɔ̃wò nakpɔ eɖokui dzi nyuie le nu sia nu si megblɔ nɛ la ŋu. 
14 Megaɖu naneke si tso waintsetse me o, megano wain alo aha muame aɖeke o, eye megaɖu nu makɔmakɔ aɖeke hã o. Nu sia nu si ƒe se mede nɛ la, newɔ edzi pɛpɛpɛ.”
15 Azɔ Manoa gblɔ na Afetɔ ƒe dɔla la be: “Meɖe kuku, lala vie, ne míaɖa gbɔ̃vi aɖe na wò.” 
16 Ke Afetɔ ƒe dɔla la gblɔ na Manoa be: “Ne melala hã la, nyemaɖu wò nu si nàɖa o; gake ne èdi be yeasa numevɔ na Afetɔ la, àte ŋu asa vɔa.” Manoa menya be Afetɔ ƒe dɔlae wònye o. 
17 Eye Manoa bia Afetɔ ƒe dɔla la be: “Ŋkɔwò ɖe, ale be ne wò nyaa va eme la, ne míade bubu ŋuwò?” 
18 Ke Afetɔ ƒe dɔla la ɖo eŋu nɛ be: “Nu ka ŋuti nèle nye ŋkɔ ta biam, evɔ ŋkɔ wɔnuku wònye?”
19 Manoa tsɔ gbɔ̃vi la kple nuɖuvɔsa la sa vɔ na Afetɔ le agakpe la dzi. Eye Mawu wɔ nukunu aɖe Manoa kple srɔ̃a kpɔ. 
20 Esi dzoƒaɖe la de dzi tso vɔsamlekpuia dzi la, Afetɔ ƒe dɔla la to vɔsamlekpuia ƒe dzoƒaɖea me yi dzi le Manoa kple srɔ̃a ŋkume wokpɔ. Eye wotsyɔ mo anyi enumake. 
21 Afetɔ ƒe dɔla la megaɖe eɖokui fia Manoa kple srɔ̃a kpɔ o. Ale Manoa kpɔe dze sii be Afetɔ ƒe dɔlae wònye. 
22 Eya ta Manoa gblɔ na srɔ̃a be: “Míaku godoo, elabena Mawue míekpɔ.” 
23 Ke srɔ̃a gblɔ nɛ be: “Ne ɖe Afetɔ di be yeawu mí la, anye ne maxɔ numevɔsa kple nuɖuvɔsa la tso mía si o, maɖe nu siawo katã afia mí o, eye magblɔ nya siawo dometɔ aɖeke na mí o.”
24 Emegbe nyɔnua dzi ŋutsuvi, eye wòna ŋkɔe be Samson; esi ŋutsuvia tsi la, Afetɔ yrae. 
25 Le ɣeyiɣi aɖe megbe la, Afetɔ ƒe gbɔgbɔ de asi dɔwɔwɔ me ɖe edzi le Mahane-Dan si le Zora kple Estaol dome.

ƲƆNUDRƆ̃LAWO 14
1 Samson yi Timna, eye wòkpɔ Filisti-nyɔnu aɖe le Timna. 
2 Eye wòyi ɖagblɔ na fofoa kple dadaa be: “Mekpɔ Filisti-nyɔnu aɖe le Timna, eye medi be miaɖee nam.” 
3 Ke fofoa kple dadaa biae be: “Màte ŋu akpɔ nyɔnu aɖeke le wò ƒometɔwo kple míaƒe dukɔ bliboa dome aɖe oa? Ðe wòle be nàyi aɖaɖe srɔ̃ le Filistitɔ aʋamatsomatsotɔwo domea?” Ke Samson gblɔ na fofoa be: “Ðee nam, elabe eya ƒe nue nyo ŋunye.” 
4 Ke fofoa kple dadaa menya be Afetɔ gbɔe esia tso, eye mɔnu dimee wòle le Filistitɔwo ŋu o, elabena Filistitɔwoe nɔ Israel dzi ɖum ɣemaɣi.
5 Ale Samson kple fofoa kpakple dadaa woyi Timna. Esi wòva ɖo Timna ƒe waingblewo me la, kpɔ ɖa, dzata aɖe le gbe tem va do goe. 
6 Eye Afetɔ ƒe gbɔgbɔ do ŋusẽe, eye wòtsɔ asi gbɔlo fee ɖe eve, abe ale si ko ame atsɔ asi gbɔlo afe gbɔ̃vi ɖe eve ene. Ke megblɔ nu si wòwɔ la na fofoa alo dadaa o. 
7 Eye wòyi ɖaƒo nu kple nyɔnu la; eƒe nu ganyo Samson ŋu kokoko.
8 Esi wòtrɔ yina be yeakplɔ nyɔnua ava aƒee la, edze yi afi si dzata kukua le be yeakpɔe ɖa, eye wòkpɔ anyiwo kple anyitsi le dzata kukua me. 
9 Eya ta eha anyitsia ɖe asi me, eye wòle enyim le yiyim. Esi wòva tu fofoa kple dadaa la, ena ɖe wo wonyi. Ke megblɔ na wo be dzata kukua mee yeha anyitsia le o.
10 Fofoa yi nyɔnu la ƒe me, eye Samson ɖo kplɔ̃ le afi ma, elabena nenemae ɖekakpuiwo wɔna. 
11 Esi wokpɔe la, woɖe ehati blaetɔ̃ be woanɔ eŋu. 
12 Eye Samson gblɔ na wo be: “Meɖe kuku, mato adzo na mi. Ne mieɖe egɔme nam le kplɔ̃ɖoŋkeke adreawo me la, ekema matsɔ aklala biɖibiɖi wu blaetɔ̃ kple atsyɔ̃ɖowu blaetɔ̃ ana mi. 
13 Ke ne miete ŋu ɖe egɔme nam o la, ekema miawo boŋ miana aklala biɖibiɖi wu blaetɔ̃ kple atsyɔ̃ɖowu blaetɔ̃m. Woɖo eŋu nɛ be: “To wò adzo la na mí, míedi be míasee.” 
14 Eye wògblɔ na wo be:
“Nuɖuɖu tso nuɖula me,
Eye nu vivi tso ŋusẽtɔ me.”
Womete ŋu ɖe adzo la gɔme o ŋkeke etɔ̃ sɔŋ. 
15 Eye le ŋkeke enea gbe la, wogblɔ na Samson srɔ̃ be: “Ble srɔ̃wòa nu, ne wòaɖe adzoa gɔme na mí. Ne menye nenema o la, míatɔ dzo wò kple fofowò ƒe aƒe. Ðe miekpe mí va afi sia be yewoaxɔ míaƒe nunɔamesiwoa?” 
16 Eya ta Samson srɔ̃ fa avi nɛ gblɔ be: “Ðeko nèlé fum, mèlɔ̃m o. Èto adzo na mía deviwo, ke mèɖe egɔme nam o.” Eɖo eŋu nɛ be: “Kpɔ ɖa, nyemeɖe egɔme na nye ŋutɔ fofonye kple danye gɔ̃ hã o. Ðe maɖe egɔme na wò ya?” 
17 Ke enɔ avi fam nɛ le kplɔ̃ɖoŋkeke adreawo ƒe ŋkeke siwo susɔ la me. Mlɔeba le ŋkeke adrea gbe la, eɖe egɔme nɛ, elabena enɔ eƒom ɖe enu. Eye nyɔnua yi ɖaɖe adzo la gɔme na wo detɔwo. 
18 Eya ta le ŋkeke adrea gbe, hafi ɣe naɖo to la, dua me ŋutsuwo va gblɔ nɛ be:
“Nu kae vivina wu anyitsi,
Eye nu kae sesẽ wu dzata?”
Eɖo eŋu na wo be:
“Ne menye nye nyinɔe mietsɔ ŋlɔ nui o la,
Anye ne miete ŋu ɖe nye adzo la gɔme o.”
19 Eye Afetɔ ƒe gbɔgbɔ do ŋusẽe, eye wòyi Askelon ɖawu ŋutsu blaetɔ̃ hetsɔ awu siwo wòɖe le wo ŋu la na adzogɔmeɖelaawo. Eye wòdo dziku vevie hetrɔ dzo yi fofoa ƒe me.
20 Ke wotsɔ Samson srɔ̃ na ehati siwo nɔ eŋu le eƒe srɔ̃ɖegbea dometɔ ɖeka wòɖe.

ƲƆNUDRƆ̃LAWO 15
1 Ɣeyiɣi aɖe megbe le luxaɣi la, Samson tsɔ gbɔ̃vi aɖe ɖe asi yina srɔ̃a kpɔ ge ɖa. Egblɔ be: “Medi be mayi srɔ̃nye gbɔ le xɔgã me.” Ke nyɔnua fofo meɖe mɔ nɛ be wòage ɖe eme o. 
2 Ke boŋ fofoa gblɔ be: “Mebu xaa be ɖe nèlé fui kura. Eya ta metsɔe na hawòti si nɔ ŋuwò le wò srɔ̃ɖegbea wòɖe. Ðe nɔvianyɔnu ɖevitɔ medze tugbe wui oa? Meɖe kuku, ɖe eya boŋ.” 
3 Ke Samson gblɔ na wo be: “Fifia ya Filistitɔwo mate ŋu abu fɔm ne mewɔ nu vevi wo o.”
4 Eya ta Samson yi ɖalé abei alafa etɔ̃. Etsɔ akakati, eye wòlé abei eve ɖe sia ɖe ƒe asike kpe heblae, eye wòbla akakati ɖeka ɖe asike eve ɖe sia ɖe dome. 
5 Esi dzo tɔ akakatiawo, eye wòɖe asi le abeiawo ŋu ɖo ɖe Filistitɔwo ƒe nukugblewo me. Etɔ dzo nu sia nu, nuku bablawo, nuku siwo le bo dzi, waingblewo kple amitibɔwo.
6 Filistitɔwo bia be: “Ame kae wɔ nu sia?” Woɖo eŋu na wo be: “Samson, Timnatɔ la ƒe toyɔvi ye, elabena toa tsɔ srɔ̃a na ehati si nɔ eŋu le eƒe srɔ̃ɖegbea wòɖe.” Eye Filistitɔwo yi ɖatɔ dzo nyɔnua kple fofoa. 
7 Eye Samson gblɔ na wo be: “Ne aleae miewɔ la, mabia hlɔ̃ mi kokoko hafi adzudzɔ.” 
8 Eye wòdza wo kɔ ɖi ɖekaɖeka hewu ame gbogbo aɖewo; emegbe edzo yi ɖanɔ Etam-gakpe la ƒe agado aɖe me.
9 Emegbe Filistitɔwo ho va ƒu asaɖa anyi ɖe Yuda, eye wokaka ɖe Lehi. 
10 Eye Yuda ŋutsuwo bia wo be: “Nu ka ŋuti mieho ɖe mía ŋu?” Woɖo eŋu be: “Samson lé gee míeva, ne míawɔe abe ale si tututu wòwɔ míi ene.” 
11 Eya ta Yuda ŋutsu akpe etɔ̃ yi ɖe Etam-gakpe la ƒe agado la me hebia Samson be: “Mènya be Filistitɔwoe le mía dzi ɖum oa? Ke nu ka tae nèwɔ nu sia ɖe mía ŋu?” Eɖo eŋu na wo be: “Ale si tututu wowɔm la, nenemae mewɔ wo.” 
12 Ke wogblɔ nɛ be: “Ðe míeva be míalé wò ade asi na Filistitɔwo.” Eye Samson gblɔ na wo be: “Mika atam nam be miawo ŋutɔwo miate kpɔ be yewoawɔ nu vevim o.” 
13 Wogblɔ nɛ be: “Ao, ke boŋ ɖeko míabla wò atsɔ ade asi na wo; ke míawu wò o.”
Ale wotsɔ ka yeye eve blae hekplɔe do goe tso agado la me. 
14 Esi wòva ɖo Lehi la, Filistitɔwo tso aseye esi wokpɔe. Eye Afetɔ ƒe gbɔgbɔ do ŋusẽe, ale be ka siwo le eƒe alɔwo zu abe ɖetika siwo dzo ƒo ene, eye wotso le eƒe alɔnu. 
15 Ekpɔ tedzitsu ƒe glãƒu mumu aɖe; edo asi ɖa tsɔe wu ŋutsu akpe ɖeka. 
16 Eye Samson gblɔ be:
“Tedzitsu ƒe glãƒue metsɔ wu wo li kɔ ɖi gleglegle!
Tedzitsu ƒe glãƒue metsɔ wu ame akpe ɖeka.”
17 Eye esi wògblɔ nya siawo vɔ ko la, etsɔ glãƒu la ƒu gbe, eye wòna ŋkɔ teƒea be Ramat-Lehi. 
18 Ke tsikɔ wui vevie, eye wòyɔ Afetɔ gblɔ be: “Wòe tsɔ ɖeɖe gã sia to wò subɔla dzi. Ke azɔ la, ɖe tsikɔ awum maku, eye mage ɖe aʋamatsomatsotɔwo si mea?” 
19 Eye Mawu fe teƒe aɖe si nyé ɖe eme le Lehi, eye tsi do tso afi ma. Esi wònoe la, ŋusẽ ɖo eŋu, eye agbe gaɖo eme. Esia tae wòna ŋkɔ teƒea be En-Hakore, si le Lehi va se ɖe egbe sia.
20 Edrɔ̃ ʋɔnu na Israel le Filistitɔwo ŋɔli ƒe blaeve.

ƲƆNUDRƆ̃LAWO 16
1 Gbe ɖeka Samson yi Gaza, ekpɔ gbolo aɖe le afi ma, eye wòyi egbɔ. 
2 Wova gblɔ na Gazatɔwo be: “Samson va afi sia.” Eya ta woɖe to ɖe teƒea hede xa ɖi nɛ zã bliboa katã le dua ƒe agbo nu. Wozi ɖoɖoe zã bliboa katã hegblɔ na wo nɔewo be: “Ne ŋu ke la, míawui.”
3 Ke Samson mlɔ anyi va se ɖe zã titina. Efɔ le zã titina eye wòho du la ƒe agbo kple agbo la ƒe ati eveawo hekpe ɖe gameti la ŋu. Ekɔ wo ɖe abɔta yi to si dze ŋgɔ Hebron la tame.
4 Le ema megbe la, nyɔnu aɖe si le Sorek Bali me, si ŋkɔe nye Delila la ƒe nu lé dzi nɛ. 
5 Eya ta Filistitɔwo ƒe kplɔlawo va nyɔnua gbɔ gblɔ nɛ be: “Ble enu nàdze si nu si naa ŋusẽ triakɔ ma gbegbee kple ale si míawɔ akpe edzi ablae ahabɔbɔe ɖe anyi. Eye mía dometɔ ɖe sia ɖe ana klosalo akpe ɖeka alafa ɖeka wò ɖe esia ta.”
6 Emegbe Delila gblɔ na Samson be: “Meɖe kuku, gblɔ afi si nèkpɔ wò ŋusẽ gã la tsoe kple nu si woate ŋu atsɔ abla wò abɔbɔ wò ɖe anyi la nam.” 
7 Samson gblɔ nɛ be: “Ne wotsɔ datimeka mumu adre siwo meƒu haɖe o blam la, magbɔdzɔ azu abe ame bubuwo ke ene.” 
8 Eya ta Filistitɔwo ƒe kplɔlawo tsɔ datimeka mumu adre siwo meƒu o la vɛ nɛ, eye wòtsɔ wo blae. 
9 Azɔ wode xa ɖe xɔgã me, eye wòdo ɣli gblɔ nɛ be: “Samson, Filistitɔwo ƒo ɖe dziwò loo!” Kasia etso datimekawo abe ale si ko ɖetika tsona bɔbɔe ne dzo ƒoe ene. Eye womete ŋu nya eƒe ŋusẽ la tsoƒe o.
10 Emegbe Delila gblɔ na Samson be: “Kpɔ ɖa! èflum, eye nèda alakpa nam. Azɔ meɖe kuku, gblɔ nu si woate ŋu atsɔ abla wòe la nam.” 
11 Eye wògblɔ nɛ be: “Ne wotsɔ ka yeye siwo wometsɔ wɔ dɔ aɖeke kpɔ o blam la, magbɔdzɔ azu abe ame bubuwo ke ene.” 
12 Eya ta Delila tsɔ ka yeyewo blae, eye wògblɔ be: “Samson, Filistitɔwo ƒo ɖe dziwò loo!” (Ɣemaɣi katã la, wode xa ɖe xɔgã me nɛ.) Eye wòtso kaawo le abɔ abe ka lɛ aɖe ko ene.
13 Esia megbe la, Delila gblɔ na Samson be: “Èdo movitɔm eye nèda alakpa nam va se ɖe fifi. Gblɔ nu si woate ŋu atsɔ abla wò la nam.” Eye wògblɔ nɛ be: “Ne ètsɔ avɔlɔ̃ka lɔ̃ ɖakɔ gbigbi adre siwo le ta nam.” 
14 Eya ta etsɔ agbatrɔti trɔ ɖakɔawo, eye wògblɔ nɛ be: “Samson, Filistitɔwo ƒo ɖe dziwò loo!” Ale wòfɔ tso alɔ̃ me heho agbatrɔti la kple avɔlɔ̃ka la.
15 Eye wògblɔ nɛ be: “Aleke wɔ nèbe, ‘yelɔ̃m’ evɔ wò dzi meku ɖe ŋunye o? Zi etɔ̃ sɔŋ nèflum, eye mègblɔ afi si wò ŋusẽ triakɔ la tso nam o.” 
16 Esi wòɖea fu nɛ atraɖii, eye wòƒoa nya ɖe enu gbe sia gbe ta la, eva gloe wòdi be yeaku boŋ. 
17 Eya ta egblɔ eƒe dzimenya nɛ be: “Talũhɛ meka nye ta ŋu kpɔ o, elabena Mawu ƒe Naziritɔ menye tso gbe si gbe wodzim. Ne wolũ ta nam la, ekema nye ŋusẽ la ado le menye, eye magbɔdzɔ azu abe ame bubuwo ke ene.”
18 Esi Delila kpɔ be egblɔ eƒe dzimenya na ye la, edɔ ame enumake be woaɖayɔ Filistitɔwo ƒe kplɔlawo vɛ, eye wògblɔ be: “Miva azɔ, elabena egblɔ eƒe dzimenya nam.” Ale Filistitɔwo ƒe kplɔlawo va egbɔ, eye wotsɔ ga la ɖe asi vɛ. 
19 Ena wòdɔ alɔ̃ ɖe eƒe ata dzi; eye wòyɔ ŋutsu aɖe wòva lũ ɖakɔ adre siwo le ta nɛ. Esia megbe la, nyɔnu la nɔ ŋusẽ kpɔm ɖe edzi, elabena eƒe ŋusẽ la le dodom le eme. 
20 Eye wòdo ɣli gblɔ be: “Samson, Filistitɔwo ƒo ɖe dziwò loo!” Enyɔ tso alɔ̃ me gblɔ be: “Mado go abe tsã ene, eye maʋuʋu ɖokuinye avo.” Ke menya be Afetɔ dzo le ye gbɔ o. 
21 Eye Filistitɔwo lée ho eƒe ŋkuwo le to me nɛ. Wokplɔe yi Gaza hede akɔblikunyowu evee, eye wòzu wɔtula le gaxɔ me. 
22 Ke esi wolũ ta nɛ megbe la, eƒe ɖa gade asi toto me.
23 Filistitɔwo ƒe kplɔlawo ƒo ƒu be yewoasa vɔ gã aɖe na yewoƒe mawu Dagon ahatu aglo, elabena wogblɔ be: “Mía mawu tsɔ míaƒe futɔ Samson de asi na mí!” 
24 Esi dukɔ la kpɔe la, wokafu woƒe mawu la be: “Mía mawu tsɔ míaƒe futɔ, ame si gblẽ míaƒe anyigba eye wòwu míaƒe ame gbogbo aɖewo la de asi na mí.”
25 Esi woƒe dzi le dzidzɔ kpɔm ta la, wogblɔ be: “Miyɔ Samson vɛ ne wòado nukokoe na mí.” Ale woyɔ Samson tso gaxɔ la me vɛ be wòaɖe modzaka na yewo; eye wona wòtɔ ɖe sɔtiawo dome. 
26 Eye Samson gblɔ na ŋutsuvi si lé eƒe asi le ekplɔm la be: “Na malé sɔti siwo dzi xɔa le la, ne maziɔ ɖe wo ŋu.” 
27 (Ke ŋutsuwo kple nyɔnuwo yɔ xɔ la taŋ. Filistitɔwo ƒe kplɔlawo katã le afi ma, eye ŋutsu kple nyɔnu siwo ade akpe etɔ̃ la le xɔa ta le Samson ƒe nukokoedoname la kpɔm.)
28 Eye Samson yɔ Afetɔ gblɔ be: “Aƒetɔ Dziɖulagã Afetɔ, meɖe kuku ɖo ŋku dzinye; Oo Mawu, meɖe kuku do ŋusẽm zi ɖeka sia ko, eye na mabia hlɔ̃ Filistitɔwo ɖe nye ŋku eveawo dometɔ ɖeka ta.”
29 Ale Samson lé titinasɔti eve siwo dzi xɔa le la goŋgoŋ, eƒe ɖusi le ɖeka ŋu, eye eƒe miasi le evelia ŋu. 
30 Eye Samson do ɣli be: “Maku kple Filistitɔwo!” Eye wòtutu wo kple eƒe ŋusẽ katã, eye xɔ la mu dze kplɔlaawo kple ame siwo katã le xɔa me la dzi. Ale wòwu ame geɖe le eƒe kuɣi wu ame siwo wòwu le eƒe agbenɔɣi.
31 Emegbe nɔviawo kple fofoa ƒe ƒometɔwo katã va kɔe dzoe. Wotsɔe yi ɖaɖi ɖe fofoa Manoa ƒe yɔdo me le Zora kple Estaol dome. Edrɔ̃ ʋɔnu na Israel ƒe blaeve.

ƲƆNUDRƆ̃LAWO 17
1 Ŋutsu aɖe tso Efrayim tonuto la me, si ŋkɔe nye Mika. 
2 Egblɔ na dadaa be: “Wò klosalo akpe ɖeka alafa ɖeka si wotsɔ, eye nèdo ɖiŋu ɖe eŋu mese la, kpɔ ɖa, klosalo la le gbɔnye. Nyee tsɔe.” Eye dadaa gblɔ be: “Afetɔ neyra vinye la.” 
3 Ale wògbugbɔ klosalo akpe ɖeka alafa ɖeka la na dadaa, gake dadaa gblɔ be: “Makɔ klosalo si le asinye la ŋu na Afetɔ hena vinye la, ne woatsɔe awɔ nu kpakpɛ kple galegba. Azɔ megbugbɔe na wò.”
4 Esi wògbugbɔ klosalo la na dadaa la, dadaa ɖe klosalo alafa eve tsɔ na klosalonutula. Etsɔe wɔ nu kpakpɛ kple galegba; eye wotsɔ wo da ɖe Mika ƒe me. 
5 Mawuxɔ aɖe le Mika si, eye wòwɔ kɔmewu kple terafim legbawo heɖo viaŋutsuwo dometɔ ɖeka be wòanye nunɔla na ye. 
6 Le ŋkeke mawo me la, fia aɖeke menɔ Israel o. Ame sia ame wɔa nu si sɔ le eya ŋutɔ ŋkume.
7 Ðekakpui aɖe tso Betlehem le Yuda, eye wòtso Yuda ƒomea me. Enye Lewitɔ va nɔ afi ma vie. 
8 Ðekakpui la dzo le Betlehem, le Yuda, be yeayi aɖadi teƒe aɖe anɔ. Ezɔ mɔ va ɖo Mika ƒe aƒe gbɔ le Efrayim tonuto la me. 
9 Eye Mika biae be: “Afi kae nètso?” Eɖo eŋu nɛ be: “Lewitɔ menye tso Betlehem le Yuda, eye meyina be maɖadi teƒe aɖe anɔ.” 
10 Eye Mika gblɔ nɛ be: “Tsi gbɔnye, nànye fofo kple nunɔla nam, eye mana klosalo ewo wò ƒe sia ƒe hekpe ɖe nudodo kple nuɖuɖu ŋu.” Ale Lewitɔ la ge ɖe eme. 
11 Lewitɔ la lɔ̃ be yeatsi ŋutsua gbɔ, eye ɖekakpui la va zu abe viawo dometɔ ɖeka ene. 
12 Eye Mika ɖo Lewitɔ la be wòanye nunɔla na ye, eye wònɔ Mika ƒe me. 
13 Eya ta Mika gblɔ be: “Azɔ menyae nyuie be Afetɔ awɔ nyui nam, elabena Lewitɔ la zu nunɔla nam.”

ƲƆNUDRƆ̃LAWO 18
1 Le ŋkeke mawo me la, fia aɖeke menɔ Israel o. Ɣemaɣi la, Dan viwo ƒe to la le anyigba dim, ne woanɔ edzi; elabena va se ɖe ɣemaɣi la, womexɔ domenyinu le Israel-toawo dome o.
2 Dan viwo dɔ woƒe ƒomea me tɔ atɔ̃, siwo nye ŋutsu kalẽtɔwo tso Zora kple Estaol, be woayi aɖatsa le anyigba la dzi ahatsa ŋku le edzi. Eye wogblɔ na wo be: “Miheyi ɖatsa le anyigba la dzi.” Esi wova ɖo Mika ƒe me le Efrayim tonutoa me la, wotsi afi ma dɔ. 
3 Esi wogogo Mika ƒe aƒea la, wodze si ɖekakpui Lewitɔ la ƒe gbe, eya ta woyi egbɔ ɖabiae be: “Ame kae kplɔ wò va afi sia? Nu ka wɔm nèle le teƒe sia? Nu kae na nèva tsi afi sia?” 
4 Eɖo eŋu na wo be: “Ale kple ale Mika wɔ nam, eye wòxɔm be manye nunɔla na ye.” 
5 Eye wogblɔ nɛ be: “Míeɖe kuku, bia gbe Mawu kpɔ be mɔ si dzi míele la adze edzi hã.” 
6 Eye nunɔla la gblɔ na wo be: “Miheyi le ŋutifafa me. Afetɔ li kpli mi le miaƒe mɔzɔzɔ la me.”
7 Ale ŋutsu atɔ̃awo yi mɔzɔzɔa dzi va ɖo Lais. Wokpɔ ale si dua me nɔlawo le wo ɖokui si, abe ale si ko Sidontɔwo le ene. Wole tomefafa me heɖe dzi ɖi, eye dziɖula ŋutasẽla aɖeke meva ɖe fu na wo le anyigba la dzi kpɔ o. Wo gbɔ didi tso Sidontɔwo gbɔ, eye kadodo mele wo kple dukɔ bubu aɖeke dome o.
8 Esi wotrɔ va wo nɔviwo gbɔ le Zora kple Estaol la, wo nɔviawo bia wo be: “Aleke miedee?” 
9 Woɖo eŋu be: “Mina míaho ɖe wo ŋu, elabena míekpɔ be anyigba la nyo ŋutɔ. Nu ka tae miele hehem ɖe megbe? Netsɔ, miyi anyigba la dzi ne miaxɔe wòazu mia tɔ. 
10 Ne mieyi la, miakpɔe be dukɔ la ɖe dzi ɖi, eye anyigba la keke ŋutɔ. Mawu tsɔe de asi na mi, enye teƒe si anyigbadzinu ɖe sia ɖe le.”
11 Ale Dan viwo ƒe ƒomea me ŋutsu alafa ade bla aʋakpa, eye wodze mɔ tso Zora kple Estaol. 
12 Woyi ɖaƒu asaɖa anyi ɖe Kiriat-Yearim le Yuda. Esia tae woyɔa teƒe ma si le Kiriat-Yearim ƒe ɣetoɖoƒe la be Mahane-Dan va se ɖe egbe. 
13 Woho tso afi ma yi Efrayim tonuto la me, eye wova Mika ƒe aƒe gbɔ.
14 Eye ŋutsu atɔ̃ siwo yi ɖatsa ŋku le Lais-nyigba dzi la gblɔ na wo nɔviwo be: “Mienya be kɔmewu, terafiwo, nu kpakpɛ kple galegba le aƒe siawo mea? Mibu nu si miawɔ la ŋu.” 
15 Ale wotɔ ɖe afi ma eye woyi ɖekakpui Lewitɔ la gbɔ le Mika ƒe me, eye wobia eƒe fɔfɔme ta se. 
16 Ɣemaɣi la, Dan-ŋutsu alafa ade siwo bla aʋakpa la tɔ ɖe agboa nu. 
17 Eye ŋutsu atɔ̃ siwo yi ɖatsa ŋku le anyigbaa dzi la ge ɖe aƒea me ɖatsɔ nu kpakpɛ la, kɔmewu la, terafim legbaawo kple galegba la. (Nunɔlaa kple ŋutsu alafa ade siwo bla aʋakpa la tɔ ɖe agboa nu.) 
18 Woge ɖe Mika ƒe me ɖatsɔ nu kpakpɛa, kɔmewua kple terafiawo kpakple legba si wokɔ̀ la. Eye nunɔla la bia wo be: “Nu ka wɔm miele?” 
19 Ke wogblɔ nɛ be: “Zi ɖoɖoe. Tsyɔ asi nu, eye nàyi kpli mí azu fofo kple nunɔla na mí. Kae nyo wu, be nànye nunɔla na ame ɖeka ƒe aƒe loo alo be nàzu nunɔla na to kple ƒome blibo le Israel?” 
20 Esia dze nunɔla la ŋu, ale wòtsɔ kɔmewua kple terafiam legbaawo kpakple nu kpakpɛa, eye wòyi kple dukɔ la.
21 Ale wotrɔ be yewoayi mɔzɔzɔa dzi, wona wo viwo kple lãhawo kpakple nu veviwo dze wo ŋgɔ. 
22 Esi wogblẽ Mika ƒe aƒe la ɖe megbe sãa la, ŋutsu siwo nye Mika ƒe aƒelikawo ƒo ƒu, eye wodze Dan viwo yome ɖatu wo. 
23 Esi wodo ɣli yɔ Dan viwo la, wotrɔ dze ŋgɔ wo eye wobia Mika be: “Nya kae dzɔ? Nu ka tae nèƒo amewo nu ƒu?” 
24 Eɖo eŋu be: “Mietsɔ nye mawu siwo mewɔ la, eye miekplɔ nunɔla hã dzo yina. Ke nu kae gasusɔ nam? Aleke wɔ miele biayem be, ‘Nya kae dzɔ ɖe dziwò’ mahã?” 
25 Dan viwo ɖo eŋu be: “Mègado ɣli ɖe mía ta o; ne menye nenema o la, ŋutsu siwo do dɔmedzoe la adze mia dzi, eye esia ana nàbu wò agbe kple wò aƒemetɔwo ƒe agbe.” 
26 Eye Dan viwo galé woƒe mɔ; ke esi Mika kpɔe be wosesẽ wu ye la, etrɔ yi aƒe me.
27 Esi wotsɔ nu siwo Mika wɔ, eye wokplɔ eƒe nunɔla la dzoe vɔ la, woyi Lais le dukɔ si li le tomefafa me heɖe dzi ɖi la gbɔ. Wowu wo kple yi, eye wotɔ dzo du la. 
28 Ame aɖeke meli axɔ na wo o, elabena wo gbɔ didi tso Sidon, kadodo mele wo kple dukɔ bubu aɖeke dome o, eye du la le Bet-Rehob Bali la me. Eye wogbugbɔ du la tso henɔ eme. 
29 Azɔ hã, wona ŋkɔ du la be Dan le wo fofo Dan, si wodzi na Israel la, ƒe ŋkɔ nu. Ke tsã la woyɔa du la be Lais. 
30 Emegbe Dan viwo li nu kpakpɛ la na wo ɖokui, eye Yonatan, si nye Mose vi Gersom ƒe vi kple viaŋutsuwo va zu nunɔlawo na Dan viwo ƒe to la, va se ɖe ŋkeke si dzi wokplɔ anyigba la dzi nɔlawo yi aboyo me. 
31 Eye woli nu kpakpɛ si Mika wɔ la ɖe afi ma le ŋkeke siwo katã me Mawu vavã la ƒe aƒe la nɔ Silo.

ƲƆNUDRƆ̃LAWO 19
1 Le ŋkeke mawo me, esi fia aɖeke menɔ Israel o la, Lewitɔ aɖe si nɔ Efrayim tonuto la ƒe nutotroewo me ɣemaɣi dze ahiã ɖetugbui aɖe si tso Betlehem le Yuda la. 
2 Gake eƒe ahiãvi la mewɔ nuteƒe nɛ o, eye wòdzo le ŋutsua gbɔ ɖanɔ fofoa ƒe me le Betlehem le Yuda. Ðetugbuia nɔ afi ma ɣleti ene. 
3 Eye srɔ̃a dze eyome be yeaɖaƒo nu nɛ wòatrɔ agbɔ va ye gbɔ; ekplɔ eƒe subɔviŋutsu kple tedzi eve ɖe asi yii. Eye ɖetugbuia kplɔe yi fofoa ƒe me. Esi ɖetugbuia fofo kpɔe la, exɔe kple dzidzɔ. 
4 Eya ta toa, si nye ɖetugbui la fofo na wòtsi egbɔ ŋkeke etɔ̃; woɖua nu noa nu, eye wòtsia afi ma dɔna.
5 Le ŋkeke enea gbe, esi wofɔ ŋdi kanya la, etso be yeadzo, ke ɖetugbuia fofo gblɔ na toyɔvia be: “Ðu nane be wòado ŋusẽ wò, emegbe miate ŋu adzo.” 
6 Eya ta wobɔbɔ nɔ anyi, eye wo ame evea woɖu nu no nu; emegbe ɖetugbuia fofo gblɔ na ŋutsua be: “Meɖe kuku, tsi dɔ, eye nàdo dzidzɔ na ɖokuiwò.” 
7 Esi ŋutsu la tso be yeadzo la, toa nɔ kuku ɖem nɛ, ale wògatsi afi ma dɔ.
8 Esi wòfɔ le ŋkeke atɔ̃lia ƒe ŋdi kanya be yeadzo la, ɖetugbuia fofo gblɔ nɛ be: “Meɖe kuku, ɖu nane be wòado ŋusẽ wò.” Eye woganɔ anyi va se ɖe esime fiẽsi nɔ ɖoɖom. Eye wo ame evea wonɔ nu ɖum. 
9 Esi ŋutsua tso be yeadzo kple yeƒe ahiãvi kpakple yeƒe subɔvi la, toa, si nye ɖetugbuia fofo gblɔ nɛ be: “Kpɔ ɖa! Fiẽ ɖo vɔ. Meɖe kuku, tsi dɔ. Zã do vɔ. Tsi afi sia dɔ, eye nàdo dzidzɔ na ɖokuiwò. Etsɔ la, miate ŋu afɔ ŋdi kanya adze mɔ ayi aƒe.” 
10 Ke ŋutsua melɔ̃ be yeagatsi adɔ ake o, eya ta edze mɔ va ɖo keke Yebus, si nye Yerusalem ke. Tedzitsu eve siwo wobla akpa na kple eƒe ahiãvi kpakple eƒe subɔvi la le eŋu.
11 Esi wogogo Yebus la, ɣe la yina to ɖo ge. Eya ta subɔvi la gblɔ na eƒe aƒetɔ be: “Míadze ɖe Yebusitɔwo ƒe du sia me atsi afi sia adɔ oa?” 
12 Ke eƒe aƒetɔ gblɔ nɛ be: “Míadze ɖe ame tutɔ siwo menye Israel-viwo o la ƒe du aɖeke me o. Ke boŋ míayi ŋgɔ aɖo Gibea.” 
13 Eye wògblɔ na eƒe subɔvi la be: “Na míadze agbagba aɖo teƒe siawo dometɔ ɖeka; míatsi Gibea alo Rama adɔ.” 
14 Eya ta woyi mɔzɔzɔa dzi, eye ɣe nɔ to ɖom esi wogogo Benyamin viwo ƒe du si nye Gibea.
15 Eya ta wotɔ ɖe afi ma, eye woyi Gibea be yewoatsi adɔ. Esi woge ɖe dua me la, wobɔbɔ nɔ dua ƒe ablɔ me, gake ame aɖeke mekplɔ wo yi eƒe me be woatsi adɔ o. 
16 Mlɔeba la, ŋutsu tsitsi aɖe tso agble gbɔ le fiẽ me. Enye Efrayim tonuto la me tɔ, eye wòle Gibea ɣeyiɣi aɖee nye ema; gake dua me tɔwo nye Benyamin viwo. 
17 Esi ŋutsu tsitsia fɔ kɔ dzi kpɔ mɔzɔlaa le dua ƒe ablɔ me la, ebiae be: “Afi ka yim nèle, eye afi kae nètso?” 
18 Eɖo eŋu nɛ be: “Míetso Betlehem le Yuda yina Efrayim tonutoa ƒe nutotroewo me, eye afi mae metso. Meva yi Betlehem le Yuda, eye metrɔ yina Afetɔ ƒe aƒe la me, gake ame aɖeke meva kplɔm be madze ye gbɔ o. 
19 Gbe kple nuɖuɖu li na míaƒe tedziawo, eye abolo kple wain hã li na nye kple nyɔnu la kple míaƒe subɔvi la. Naneke mehiã mí o.” 
20 Ke ŋutsu tsitsi la gblɔ be: “Ŋutifafa na wò! Makpɔ nu sia nu si hiã mi la gbɔ. Ðeko migatsi ablɔ me dɔ o.” 
21 Ale wòkplɔe yi eƒe me, eye wòna nuɖuɖu tedziawo. Eye woklɔ afɔ ɖu nu no nu.
22 Ke esi wonɔ dzidzɔ dom na wo ɖokuiwo la, dua me ŋutsu yakame aɖewo va ɖe to ɖe aƒea, wonɔ ʋɔa ƒom gbagbagba nɔ gbɔgblɔm na ŋutsu tsitsi si nye aƒea tɔ be: “Kplɔ ŋutsu si va aƒewò me la do goe, ne míadɔ kplii.” 
23 Eye aƒea tɔ do yi ɖagblɔ na wo be: “Ao, nɔvinyewo, migawɔ nu vɔ̃ɖi sia o. Meɖe kuku gbɔnyee ŋutsu sia va dze. Migawɔ ŋukpenanu sia o. 
24 Vinyenyɔnu ɖetugbui leaƒe kple ŋutsu sia ƒe ahiãvie nye esi. Makplɔ wo ado goe vɛ na mi, ne miaɖi gbɔ wo, ne nenemae miedi. Ðeko migawɔ ŋukpenanu sia ɖe ŋutsu sia ŋu o.”
25 Gake ŋutsuawo gbe toɖoɖoe. Eya ta ŋutsua lé eƒe ahiãvi la kplɔe do goe yi na wo le xexe. Wodɔ egbɔ, eye wowɔ funyafunyae zã blibo la katã va se ɖe esime ŋu ke. Le fɔŋli la, woɖe asi le eŋu. 
26 Le ŋdi kanya la, nyɔnua va dze anyi ɖe ŋutsu si ƒe aƒe me eƒe aƒetɔ le la ƒe ʋɔtru nu, eye wòtsi afi ma va se ɖe esime xexea me kɔ. 
27 Esi eƒe aƒetɔ fɔ ŋdi, eye wòʋu ʋɔtruawo do go be yeayi yeƒe mɔzɔzɔa dzi la, ekpɔ eƒe ahiãvi la wòtsra ɖe aƒe la ƒe mɔnu, eye eƒe asiwo le kpuia dzi. 
28 Eye wògblɔ nɛ be: “Tso mídzo.” Ke meɖo eŋu o. Eya ta ŋutsua kɔe ɖo tedzi la dzi, eye wòdze mɔ ɖo ta aƒe.
29 Esi wòva ɖo aƒe me la, etsɔ lãwuhɛ, eye wòfli eƒe ahiãvia ɖe eƒe ƒunuɖeƒewo ɖe akpa wuieve me eye wòɖo akpa ɖeka ɖe Israel-to ɖe sia ɖe. 
30 Ame siwo katã kpɔe la gblɔ be: “Nu sia tɔgbi medzɔ kpɔ o, eye womekpɔ eteƒe kpɔ tso gbe si gbe Israel-viwo ʋu tso Egipte-nyigba dzi va se ɖe egbe sia o. Mibu eŋu, mide adaŋu, ne miagblɔ nu si míawɔ la na mí.”

ƲƆNUDRƆ̃LAWO 20
1 Eya ta Israel-viwo katã tso Dan va se ɖe Beer-Seba kple Gilead-nyigba dzi va kpe ta ɖekae ɖe Afetɔ ŋkume le Mizpa. 
2 Eye dukɔ la ƒe tatɔwo kple Israel-toawo katã va tɔ ɖe Mawu ƒe amewo ƒe takpekpe la me le wo nɔƒewo, eye aʋawɔla afɔzɔla siwo ta yi la le akpe alafa ene.
3 Benyamin viwo se be Israel-viwo ho va Mizpa.
Eye Israel-viwo gblɔ be: “Migblɔe míse, aleke nu dziŋɔ sia dzɔe?” 
4 Eye Lewitɔ si nye nyɔnu si wowu la srɔ̃ ɖo eŋu be: “Nye kple nye ahiãvi míeva Gibea, si nye Benyamin viwo ƒe du me, be míatsi adɔ. 
5 Gibeatɔwo tso ɖe ŋunye, eye wova ɖe to ɖe aƒe si me menɔ la le zã me. Nyee woɖo be yewoawu hafi, ke wodɔ nye ahiãvi gbɔ wòku. 
6 Eya ta mekɔ nye ahiãvi la ƒe kukua, eye meflii heɖo akpa aɖe ɖe Israel-nyigba la ƒe teƒe sia teƒe, elabena wowɔ ŋukpenanu kple vlodonu le Israel. 
7 Azɔ mi Israel-viwo katã, migblɔ miaƒe susu, eye miaɖo aɖaŋu le afi sia.”
8 Eya ta ameawo katã tso kple tame ɖeka gblɔ be: “Mía dometɔ aɖeke mayi eƒe agbadɔ me alo atrɔ ayi eƒe me o. 
9 Azɔ nu si míawɔ Gibea ye nye esi. Míadzidze nu, aho ɖe eŋu. 
10 Míaɖe ŋutsu ewo le alafa me, ŋutsu alafa ɖeka le akpe ɖeka me, kple ŋutsu akpe ɖeka le akpe ewo me le Israel-toawo katã me, ne woayi aɖadi nuɖuɖu na aʋawɔlawo, ne woaho ɖe Gibea si nye Benyamin viwo ƒe du la ŋu, le ŋukpenanu si wowɔ le Israel la ta.” 
11 Ale Israel ŋutsuwo katã ƒo ƒu, eye wobla ɖekae ɖe du la ŋu.
12 Eye Israel-toawo dɔ ame ɖo ɖe Benyamin-to la me tɔwo katã be: “Nu dziŋɔ kae nye esi wowɔ le mia dome? 
13 Azɔ la, miɖe ŋutsu yakame siwo le Gibea la na ne míawu, ne míaɖe nu vɔ̃ɖi la ɖa le Israel.” Ke Benyamin viwo gbe toɖoɖo wo nɔvi Israel-viwo.
14 Eye Benyamin viwo tso woƒe duwo me va ƒo ƒu ɖe Gibea be yewoakpe aʋa kple Israel-viwo. 
15 Gbe ma gbe la, Benyamin viwo ƒo ŋutsu akpe blaeve vɔ ade siwo ta yi la nu ƒu tso woƒe duawo me hekpe ɖe Gibea ŋutsu tiatia alafa adre hã ŋu. 
16 Aʋawɔla siawo dometɔ alafa adre nye miawɔla tiatiawo. Ame siawo dometɔ ɖe sia ɖe tea ŋu daa akafo wòlɔa ɖakui ɖeka gɔ̃ hã, eye medaa dadagbo o.
17 Eye Israel ŋutsu siwo nu woƒo ƒu, siwo ta yi la, le akpe alafa ene, ke Benyamin ya mele eme o, eye wo dometɔ ɖe sia ɖe nye aʋawɔla bibi. 
18 Woho yi Betel be yewoabia gbe Mawu. Eye Israel-viwo bia be: “Mía dometɔ kae atre hoho ayi aɖawɔ aʋa kple Benyamin viwo?” Afetɔ ɖo eŋu be: “Yuda netre hoho.”
19 Ale Israel-viwo fɔ ŋdi va ƒu asaɖa anyi ɖe Gibea ŋu.
20 Eye Israel ŋutsuwo ho yi aʋa wɔ ge kple Benyamin; Israel ŋutsuawo le aʋalɔgowo me va dze aʋa ɖe wo ŋu le Gibea. 
21 Eye Benyamin viwo do tso Gibea va wu Israel ŋutsu akpe blaeve vɔ eve gbe ma gbe. 
22 Ke dzi ganɔ Israel ƒe aʋawɔlawo ƒo, eye wogadze aʋa ɖe afi si wodze aʋa ɖo le ŋkeke gbãtɔ dzi la. 
23 Eye Israel-viwo yi ɖafa avi le Afetɔ ŋkume va se ɖe fiẽ, eye wobia gbe Afetɔ be: “Mígaho aʋa ɖe mía nɔvi Benyamin viwo ŋu akea?” Afetɔ ɖo eŋu be: “Miho ɖe wo ŋu.”
24 Eya ta Israel-viwo te tu Benyamin viwo le ŋkeke evelia dzi. 
25 Ke Benyamin do tso Gibea va kpe wo le ŋkeke evelia dzi, eye wògawu ŋutsu akpe wuienyi bubu siwo katã ta yi la le Israel-viwo dome. 
26 Eye Israel-viwo katã yi Betel. Wofa avi hebɔbɔ nɔ afi ma le Afetɔ ŋkume, wotsi nu dɔ gbe ma gbe va se ɖe fiẽ, eye wosa numevɔwo kple ŋutifafavɔwo le Afetɔ ŋkume. 
27 Emegbe Israel-viwo bia gbe Afetɔ, elabena Mawu vavã la ƒe nubablaɖaka la le afi ma le ŋkeke mawo me. 
28 Ke Finehas, Eleazar vi, Aron vi, subɔna le aɖaka la ŋgɔ le ŋkeke mawo me. Wobia be: “Mígaho ɖe mía nɔvi Benyamin viwo ŋu akea, alo mítasia?” Afetɔ ɖo eŋu be: “Miyi, elabena etsɔ la, matsɔ wo ade asi na mi.” 
29 Eye Israel na amewo de xa ɖe Gibea ŋu godoo va kpe.
30 Israel-viwo ho ɖe Benyamin viwo ŋu le ŋkeke etɔ̃a gbe, eye wodze aʋa ɖe Gibea ŋu abe tsã ene. 
31 Esi Benyamin viwo do go yi be yewoaɖakpe kple aʋawɔlawo la, woble wo yi adzɔge tso dua gbɔ. Eye abe ale si wowɔ tsã ene la, wogadze wo dzi hewu ameawo dometɔ aɖewo le mɔ gã si ɖo ta Betel kple esi ɖo ta Gibea la dzi, Israel ŋutsu siwo ade blaetɔ̃ ku ɖe gbea dzi. 
32 Eya ta Benyamin viwo gblɔ be: “Míegale wo sim le mía ŋgɔ abe tsã ene.” Ke Israel-viwo ya gblɔ be: “Míasi le wo nu, eye míable wo ayi adzɔge tso dua gbɔ ayi mɔ gãwo dzi.” 
33 Israel ŋutsuwo katã tso le wo nɔƒewo va dze aʋa ɖe Baal-Tamar, ɣemaɣi la Israel ŋutsu siwo de xa ɖi ya do tso wo nɔƒewo le Gibea nutoa me. 
34 Ale ŋutsu tiatia akpe ewo tso Israel blibo la va Gibea ŋgɔ, eye aʋa la nu sẽ ŋutɔ. Ke Benyamin viwo menya be vɔ̃ gogo yewo o.
35 Afetɔ si Benyamin le Israel ŋgɔ, eye Israel-viwo wu Benyamin ŋutsu akpe blaeve vɔ atɔ̃ alafa ɖeka, siwo katã ta yi gbe ma gbe.
36 Gake Benyamin viwo susui be yewoaɖu Israel ŋutsuwo dzi esi wosi le Benyamin nu, gake ɖe wosi le wo nu elabena woɖo ŋu ɖe ame siwo de xa ɖe Gibea ŋu la ŋu. 
37 Ke xadelawo wɔ kaba ho ɖo ta Gibea. Wokaka ɖe dua me, eye wowu dua me nɔlawo katã kple yi.
38 Ke Israel ŋutsuwo ɖo gbe ɖi kple xadelawo be woana dzudzɔ nade dzi le dua me wòanye dzesi na yewo.
39 Esi Israel-viwo si le aʋaa nu la, Benyamin ŋutsuwo dze wo dzi wu ame siwo anɔ blaetɔ̃ le Israel ŋutsuwo dome, eye wogblɔ be: “Edze ƒãa be míegale wo dzi ɖum abe ale si wònɔ le aʋa kemɛa me ene.” 
40 Gake dzudzɔ babla de dzi le dua me wònye dzesi na wo. Eye esi Benyamin ŋutsuwo trɔ kpɔ megbe la, wokpɔ du bliboa katã le bibim eye dzudzɔ de dzi kɔtɔɔ. 
41 Azɔ Israel ŋutsuwo trɔ ɖe wo ŋu, eye dzidzi ƒo Benyamin ŋutsuwo, elabena wokpɔe be vɔ̃ tu yewo. 
42 Ale wosi le Israel ŋutsuwo nu ɖo ta gbedzi, ke aʋa la yɔ wo ɖe nu, eye ame siwo do tso dua me la va kpe ɖe wo nɔviwo ŋu wowu wo. 
43 Woɖe to ɖe Benyamin viwo, wonya wo ɖe nu megbemakpɔmakpɔe. Wotsrɔ̃ wo eteƒe mekɔ o le Gibea ŋgɔ tututu le ɣedzeƒe gome. 
44 Mlɔeba Benyamin ŋutsu akpe wuienyi tsi aʋa, wo katã wonye aʋakalẽtɔwo.
45 Benyamin viwo trɔ hesi ɖo ta gbedzi yi Rimon-gakpe la gbɔ, eye Israel-viwo wu wo dometɔ akpe atɔ̃ le mɔ gãwo dzi, eye wonya wo ɖe nu va se ɖe keke Gidom ke; eye wogawu ŋutsu akpe eve kpee. 
46 Benyamin vi siwo katã tsi aʋa gbe ma gbe la le ame akpe blaeve vɔ atɔ̃, wo katã wonye aʋakalẽtɔ siwo ta yi. 
47 Ke ŋutsu alafa ade trɔ hesi yi gbedzi yi Rimon-gakpe la gbɔ, eye wonɔ Rimon-gakpe la dzi ɣleti ene.
48 Israel ŋutsuwo trɔ ɖe Benyamin viwo ŋu, eye wowu duawo me nɔlawo kple yi, amegbetɔwo kple lãwo siaa, nu sia nu si kpɔtɔ le dua me ko. Azɔ hã, wotɔ dzo du siwo katã wokpɔ le afi siwo woto la.

ƲƆNUDRƆ̃LAWO 21
1 Azɔ Israel ŋutsuwo ka atam le Mizpa be: “Mía dometɔ aɖeke matsɔ vianyɔnu ana Benyamin ŋutsu wòaɖe o.” 
2 Eya ta dukɔ la va Betel, eye wobɔbɔ nɔ afi ma le Mawu vavã la ŋkume va se ɖe fiẽ, eye wodo ɣli hefa avi sesĩe. 
3 Eye wonɔ gbɔgblɔm be: “Oo Afetɔ, Israel ƒe Mawu, nu ka ŋuti nu sia dzɔ le Israel? Nu ka tae to ɖeka bu egbea le Israel?” 
4 Le ŋufɔke la, dukɔ la fɔ ŋdi kanya, eye woɖi vɔsamlekpui ɖe afi ma be woasa numevɔwo kple ŋutifafavɔwo.
5 Eye Israel-viwo gblɔ be: “Ame kae le Israel-toawo katã dome si meva kpe ta ɖe Afetɔ ŋkume o?” elabena woka atam vevie be woawu ame sia ame si mava Afetɔ gbɔ le Mizpa o la godoo. 
6 Israel-viwo xa nu le nu si dzɔ ɖe wo nɔvi Benyamin viwo dzi la ta. Wogblɔ be: “To ɖeka tsrɔ̃ ɖa le Israel egbea. 
7 Aleke míawɔ akpɔ nyɔnu na ame siwo susɔ la, elabe míeka atam le Afetɔ ŋkume be míatsɔ mía vinyɔnu aɖeke ana wo woaɖe o?”
8 Wobia be: “Israel-toawo dometɔ kae meva Afetɔ gbɔ le Mizpa o?” Eva eme be ame aɖeke metso Yabes-Gilead va asaɖa la me, afi si ha la le o. 
9 Esi woxlẽ dukɔa la, wokpɔ be Yabes-Gileadtɔ aɖeke mele afi ma o! 
10 Eya ta ha la dɔ ame akpe wuieve le aʋakalẽtɔ sesẽwo dome ɖe afi ma. Woɖe gbe na wo be: “Miheyi ɖawu Yabes-Gilead nɔlawo kple yi, nyɔnuwo kple ɖeviwo gɔ̃ hã. 
11 Nu si miawɔe nye esi: Mitsrɔ̃ ŋutsu sia ŋutsu kple nyɔnu siwo katã dɔ ŋutsu gbɔ kpɔ la gbidigbidi.” 
12 Ke wokpɔ nyɔnuvi alafa ene siwo nye ɖetugbui leaƒewo, siwo medɔ ŋutsu gbɔ kpɔ o la, le Yabes-Gileadtɔwo dome. Eye wokplɔ wo va asaɖa la me le Silo, le Kanaan-nyigba dzi.
13 Eye ha blibo la dɔ ame ɖo ɖe Benyamin vi siwo le Rimon-gakpea dzi, eye wodo ŋugbe na wo be yewoawɔ ŋutifafa kpli wo. 
14 Eya ta Benyamin viwo trɔ gbɔ ɣemaɣi. Eye wotsɔ nyɔnu siwo woxɔ ɖe agbe le Yabes-Gilead nyɔnuwo dome la na wo, ke womede wo nu o. 
15 Eye dukɔ la xa nu le nu si dzɔ ɖe Benyamin dzi la ta, elabena Afetɔ de mama Israel-toawo dome. 
16 Eye ha la ƒe ametsitsiwo gblɔ be: “Aleke míawɔ akpɔ nyɔnu na ŋutsu siwo susɔ la esi wotsrɔ̃ nyɔnuwo katã le Benyamin?” 
17 Woɖo eŋu be: “Ele be domenyinu nasu Benyamin ƒe agbetsilawo si, ne to ɖeka nu nagayi le Israel dome o. 
18 Gake míate ŋu atsɔ mía vinyɔnuwo ana wo o, elabena Israel-viwo ka atam be: ‘Aɖi ame si ana nyɔnu Benyamin la ŋu.’”
19 Eye wogblɔ be: “Kpɔ ɖa! Woɖua Afetɔ ƒe ŋkekenyui ƒe sia ƒe le Silo, le Betel ƒe dziehe, le mɔ gã si tso Betel yi Sekem la ƒe ɣedzeƒe, le Lebona ƒe anyiehe.” 
20 Eya ta wogblɔ na Benyamin viwo be: “Miyi ɖade xa ɖe waingbleawo me. 
21 Ne miekpɔ Silo ɖetugbuiwo do va be yewoado to aɖu ɣe la, ekema miawo hã miado tso waingbleawo me ava, eye mia dometɔ ɖe sia ɖe nalé Silo ɖetugbui ɖeka wòazu srɔ̃a, eye miatrɔ ayi Benyamin-nyigba dzi. 
22 Ne wo fofowo alo wo nɔviŋutsuwo he nya ɖe mía ŋu la, ekema míawo hã míagblɔ na wo be: ‘Mive mía nu le wo ta, elabena míekpɔ nyɔnu lé le aʋa na ŋutsuawo dometɔ ɖe sia ɖe wòzu srɔ̃a o, eye miate ŋu atsɔ nyɔnu na wo woaɖe evɔ miaɖi fɔ o.’”
23 Ale Benyamin viwo wɔe nenema pɛpɛpɛ, eye wo dometɔ ɖe sia ɖe lé nyɔnu ɖeka le nyɔnu siwo le ɣe ɖum la dome dzoe wòzu srɔ̃a. Emegbe wogbugbɔ yi woƒe anyigba si dome wonyi la dzi, eye wogbugbɔ duawo tso henɔ wo me.
24 Israel-viwo kaka le afi ma ɣemaɣi, eye ame sia ame yi to si me wòtso kple eƒe ƒome gbɔ, wo dometɔ ɖe sia ɖe dzo le afi ma yi anyigba si dome wònyi la dzi.
25 Ɣemaɣi la, fia aɖeke menɔ Israel o. Ame sia ame wɔa nu si sɔ le eya ŋutɔ ŋkume.

LEAVE A REPLY

Please enter your comment!
Please enter your name here