Mose IV

MOSE ƑE AGBALẼ ENELIA    [Numbers]

1 Le Israel-viwo ƒe ʋuʋu tso Egipte-nyigba dzi ƒe ƒe evelia me, le ɣleti evelia ƒe ŋkeke gbãtɔ dzi la, Afetɔ gblɔ na Mose le Sinai gbedzi le takpegbadɔ la me be: 
2 “Mixlẽ Israel-viwo ƒe ha blibo la, ŋutsuwo katã ɖekaɖeka le woƒe ƒomeawo kple wo fofowo ƒe aƒekɔwo nu. 
3 Wò kple Aron miŋlɔ Israel-vi siwo katã xɔ ƒe blaeve kple edzivɔ, siwo ate ŋu ayi aʋa ƒe ŋkɔwo le woƒe hatsotsowo nu.
4 “Ðe ŋutsu ɖeka tso toawo dometɔ ɖe sia ɖe me kpe ɖe ɖokuiwò ŋu; wo dometɔ ɖe sia ɖe nanye wo fofowo ƒe aƒekɔ ƒe tatɔ. 
5 Ŋutsu siwo anɔ ŋuwò la ƒe ŋkɔwoe nye esi: Sedeur vi Elizur tso Ruben-to la me; 
6 Zurisadai vi Selumiel tso Simeon-to la me; 7 Aminadab vi Nahason tso Yuda-to la me; 
8 Zuar vi Netanel tso Isakar-to la me; 
9 Helon vi Eliab tso Zebulon-to la me; 
10 ame siwo tso Yosef viwo domee nye Amihud vi Elisama tso Efrayim-to la me; Pedahzur vi Gamaliel tso Manase-to la me; 
11 Gideoni vi Abidan tso Benyamin-to la me; 
12 Amisadai vi Ahiezer tso Dan-to la me; 
13 Okran vi Pagiel tso Aser-to la me; 14 Deuel vi Eliyasaf tso Gad-to la me; 
15 Enan vi Ahira tso Naftali-to la me. 
16 Ame siawoe nye ha la me tɔ siwo woyɔ. Wonye wo fofowo ƒe toawo ƒe tatɔ siwo le Israel ƒe ame akpewo nu.”
17 Ale Mose kple Aron ɖe ŋutsu siawo, siwo ŋkɔ woyɔ la. 
18 Woƒo ha blibo la katã nu ƒu le ɣleti evelia ƒe ŋkeke gbãtɔ dzi, be woaŋlɔ ame siwo katã xɔ ƒe blaeve kple edzivɔ la ƒe ŋkɔwo ɖekaɖeka le woƒe ƒomewo kple wo fofowo ƒe aƒekɔwo nu, 
19 abe ale si tututu Afetɔ de se na Mose ene. Ale wòŋlɔ woƒe ŋkɔwo le Sinai gbedzi.
20 Woxlẽ ŋutsu siwo katã xɔ ƒe blaeve kple edzivɔ siwo ate ŋu ayi aʋa le Israel ƒe ŋgɔgbevi Ruben ƒe dzidzimeviwo dome la ƒe ŋkɔwo ɖekaɖeka, le woƒe ƒomewo kple wo fofowo ƒe aƒekɔwo nu. 
21 Ame siwo ƒe ŋkɔ woŋlɔ le Ruben-toa me la le ame akpe blaene vɔ ade alafa atɔ̃.
22 Woxlẽ ŋutsu siwo katã xɔ ƒe blaeve kple edzivɔ siwo ate ŋu ayi aʋa le Simeon ƒe dzidzimeviwo dome la ƒe ŋkɔwo ɖekaɖeka, le woƒe ƒomewo kple wo fofowo ƒe aƒekɔwo nu. 
23 Ame siwo ƒe ŋkɔ woŋlɔ le Simeon-toa me la le ame akpe blaatɔ̃ vɔ asieke alafa etɔ̃.
24 Woxlẽ ŋutsu siwo katã xɔ ƒe blaeve kple edzivɔ siwo ate ŋu ayi aʋa le Gad ƒe dzidzimeviwo dome la ƒe ŋkɔwo ɖekaɖeka, le woƒe ƒomewo kple wo fofowo ƒe aƒekɔwo nu. 
25 Ame siwo ƒe ŋkɔ woŋlɔ le Gad-toa me la le ame akpe blaene vɔ atɔ̃ alafa ade blaatɔ̃.
26 Woxlẽ ŋutsu siwo katã xɔ ƒe blaeve kple edzivɔ siwo ate ŋu ayi aʋa le Yuda ƒe dzidzimeviwo dome la ƒe ŋkɔwo ɖekaɖeka, le woƒe ƒomewo kple wo fofowo ƒe aƒekɔwo nu. 
27 Ame siwo ƒe ŋkɔ woŋlɔ le Yuda-toa me la le ame akpe blaadre vɔ ene alafa ade.
28 Woxlẽ ŋutsu siwo katã xɔ ƒe blaeve kple edzivɔ siwo ate ŋu ayi aʋa le Isakar ƒe dzidzimeviwo dome la ƒe ŋkɔwo ɖekaɖeka, le woƒe ƒomewo kple wo fofowo ƒe aƒekɔwo nu. 
29 Ame siwo ƒe ŋkɔ woŋlɔ le Isakar-toa me la le ame akpe blaatɔ̃ vɔ ene alafa ene.
30 Woxlẽ ŋutsu siwo katã xɔ ƒe blaeve kple edzivɔ siwo ate ŋu ayi aʋa le Zebulon ƒe dzidzimeviwo dome la ƒe ŋkɔwo ɖekaɖeka, le woƒe ƒomewo kple wo fofowo ƒe aƒekɔwo nu. 
31 Ame siwo ƒe ŋkɔ woŋlɔ le Zebulon-toa me la le ame akpe blaatɔ̃ vɔ adre alafa ene.
32 Woxlẽ ŋutsu siwo katã xɔ ƒe blaeve kple edzivɔ siwo ate ŋu ayi aʋa le Yosef ƒe dzidzimevi siwo tso Efrayim ƒe ƒomea me la ƒe ŋkɔwo ɖekaɖeka, le woƒe ƒomewo kple wo fofowo ƒe aƒekɔwo nu. 
33 Ame siwo ƒe ŋkɔ woŋlɔ le Efrayim-toa me la le ame akpe blaene alafa atɔ̃.
34 Woxlẽ ŋutsu siwo katã xɔ ƒe blaeve kple edzivɔ siwo ate ŋu ayi aʋa le Manase ƒe dzidzimeviwo dome la ƒe ŋkɔwo ɖekaɖeka, le woƒe ƒomewo kple wo fofowo ƒe aƒekɔwo nu. 
35 Ame siwo ƒe ŋkɔ woŋlɔ le Manase-toa me la le ame akpe blaetɔ̃ vɔ eve alafa eve.
36 Woxlẽ ŋutsu siwo katã xɔ ƒe blaeve kple edzivɔ siwo ate ŋu ayi aʋa le Benyamin ƒe dzidzimeviwo dome la ƒe ŋkɔwo ɖekaɖeka, le woƒe ƒomewo kple wo fofowo ƒe aƒekɔwo nu. 
37 Ame siwo ƒe ŋkɔ woŋlɔ le Benyamin-toa me la le ame akpe blaetɔ̃ vɔ atɔ̃ alafa ene.
38 Woxlẽ ŋutsu siwo katã xɔ ƒe blaeve kple edzivɔ siwo ate ŋu ayi aʋa le Dan ƒe dzidzimeviwo dome la ƒe ŋkɔwo ɖekaɖeka, le woƒe ƒomewo kple wo fofowo ƒe aƒekɔwo nu. 
39 Ame siwo ƒe ŋkɔ woŋlɔ le Dan-toa me la le ame akpe blaade vɔ eve alafa adre.
40 Woxlẽ ŋutsu siwo katã xɔ ƒe blaeve kple edzivɔ siwo ate ŋu ayi aʋa le Aser ƒe dzidzimeviwo dome la ƒe ŋkɔwo ɖekaɖeka, le woƒe ƒomewo kple wo fofowo ƒe aƒekɔwo nu. 
41 Ame siwo ƒe ŋkɔ woŋlɔ le Aser-toa me la le ame akpe blaene vɔ ɖekɛ alafa atɔ̃.
42 Woxlẽ ŋutsu siwo katã xɔ ƒe blaeve kple edzivɔ siwo ate ŋu ayi aʋa le Naftali ƒe dzidzimeviwo dome la ƒe ŋkɔwo ɖekaɖeka, le woƒe ƒomewo kple wo fofowo ƒe aƒekɔwo nu. 
43 Ame siwo ƒe ŋkɔ woŋlɔ le Naftali-toa me la le ame akpe blaatɔ̃ vɔ etɔ̃ alafa ene.
44 Ame siawoe nye ame siwo ŋkɔ Mose kple Aron kpakple Israel ƒe tatɔ wuieve siwo le eŋu la ŋlɔ; tatɔawo dometɔ ɖe sia ɖe le wo fofowo ƒe aƒekɔ la teƒe. 
45 Woŋlɔ ame siwo katã xɔ ƒe blaeve kple edzivɔ siwo ate ŋu ayi aʋa le Israel-viwo dome le wo fofowo ƒe aƒekɔwo nu la katã ƒe ŋkɔwo. 
46 Ame siwo woxlẽ la katã va le ame akpe alafa ade kple etɔ̃ alafa atɔ̃ blaatɔ̃.
47 Ke womeŋlɔ Lewi viwo ya ƒe ŋkɔwo le wo fofowo ƒe to la nu kpe ɖe wo ŋu o. 
48 Afetɔ gblɔ na Mose be: 
49 “Lewi-toa me tɔwo ƒe ŋkɔ koe màŋlɔ o, eye mègaxlẽ wo kpe ɖe Israel-viwo ŋu o. 
50 Tsɔ Lewi viwo ɖo agbadɔ si me Ðaseɖiɖiɖaka la le kple eŋu dɔwɔnuwo katã kpakple eŋu nuwo katã nu. Woawoe atsɔ avɔgbadɔ la kple eŋu dɔwɔnuwo katã, woawoe akpɔ eŋu dɔwo gbɔ, eye woawoe aƒu asaɖa anyi ɖe avɔgbadɔ la ŋu godoo va kpe. 
51 Ɣesiaɣi si woaho avɔgbadɔa la, Lewi viwoe ahoe; eye ne woagatu avɔgbadɔa ake la, Lewi viwoe atui; ame bubu ɖe sia ɖe si ate ɖe eŋu la, woawui.
52 “Israel-viwo dometɔ ɖe sia ɖe naƒu asaɖa anyi ɖe woƒe teƒewo, ame sia ame ɖe to etɔ̃ hatsotso si me wòle la nu le woƒe hatsotsowo nu. 
53 Ke Lewi viwo naƒu asaɖa anyi ɖe agbadɔ si me Ðaseɖiɖiɖaka la le ŋu godoo, ne nye dziku nagafla ɖe Israel ƒe ha la ŋu o; Lewi viwoe akpɔ agbadɔ si me Ðaseɖiɖiɖaka la le ŋuti dɔwo gbɔ.”
54 Eye Israel-viwo wɔ abe ale si tututu Afetɔ de se na Mose ene. Nenema pɛpɛpɛ wowɔe.

Numbers 2
1 Azɔ Afetɔ gblɔ na Mose kple Aron be: 
2 “Israel-viwo dometɔ ɖe sia ɖe naƒu asaɖa anyi ɖe teƒe si woɖo na to etɔ̃ hatsotso si me wòle la nu, le wo fofowo ƒe aƒekɔwo ƒe dzesiti gbɔ. Woaƒu asaɖa anyi adze ŋgɔ takpegbadɔ la godoo va kpe.
3 “To etɔ̃ siwo nu Yuda-toa le la naƒu asaɖa anyi ɖe ɣedzeƒe gome le woƒe hatsotsowo nu. Yuda viwo ƒe tatɔe nye Aminadab vi Nahason. 
4 Eƒe aʋawɔla siwo ŋkɔ woŋlɔ la le ame akpe blaadre vɔ ene alafa ade. 
5 Isakar-to la naƒu asaɖa anyi ɖe exa. Isakar viwo ƒe tatɔe nye Zuar vi Netanel. 
6 Eƒe aʋawɔla siwo ŋkɔ woŋlɔ la le ame akpe blaatɔ̃ vɔ ene alafa ene. 
7 Eye Zebulon-to la nakpe ɖe wo ŋu. Zebulon viwo ƒe tatɔe nye Helon vi Eliab. 
8 Eƒe aʋawɔla siwo ŋkɔ woŋlɔ la le ame akpe blaatɔ̃ vɔ adre alafa ene.
9 “Aʋawɔla siwo katã ŋkɔ woŋlɔ le Yuda ƒe asaɖaa ƒe to etɔ̃ hatsotsoa me la le ame akpe alafa ɖeka blaenyi vɔ ade alafa ene. Woawoe aho gbã.
10 “To etɔ̃ siwo nu Ruben-toa le la naƒu asaɖa anyi ɖe anyiehe gome le woƒe hatsotsowo nu. Ruben viwo ƒe tatɔe nye Sedeur vi Elizur. 
11 Eƒe aʋawɔla siwo ŋkɔ woŋlɔ la le ame akpe blaene vɔ ade alafa atɔ̃. 
12 Simeon-to la naƒu asaɖa anyi ɖe exa. Simeon viwo ƒe tatɔe nye Zurisadai vi Selumiel. 
13 Eƒe aʋawɔla siwo ŋkɔ woŋlɔ la le ame akpe blaatɔ̃ vɔ asieke alafa etɔ̃. 
14 Eye Gad-to la nakpe ɖe wo ŋu. Gad viwo ƒe tatɔe nye Reuel vi Eliyasaf. 
15 Eƒe aʋawɔla siwo ŋkɔ woŋlɔ la le ame akpe blaene vɔ atɔ̃ alafa ade blaatɔ̃.
16 “Aʋawɔla siwo katã ŋkɔ woŋlɔ le Ruben ƒe asaɖaa ƒe to etɔ̃ hatsotsoa me la le ame akpe alafa ɖeka blaatɔ̃ vɔ ɖekɛ alafa ene blaatɔ̃, eye woawoe nye hatsotso evelia si aho.
17 “Ne woaho takpegbadɔa adze mɔ la, ekema Lewi viwo nahoe eye woƒe asaɖa la nanɔ asaɖa bubuawo titina.
“Ale si woaƒu asaɖa anyii la, nenema nue woaho ɖo, ame sia ame nanɔ eteƒe, le to etɔ̃ ƒe hatsotso siwo me wole la nu.
18 “To etɔ̃ siwo nu Efrayim-toa le la naƒu asaɖa anyi ɖe ɣetoɖoƒe gome le woƒe hatsotsowo nu. Efrayim viwo ƒe tatɔe nye Amihud vi Elisama. 
19 Eƒe aʋawɔla siwo ŋkɔ woŋlɔ la le ame akpe blaene alafa atɔ̃. 
20 Manase-to la nanɔ exa. Manase viwo ƒe tatɔe nye Pedahzur vi Gamaliel. 
21 Eƒe aʋawɔla siwo ŋkɔ woŋlɔ la le ame akpe blaetɔ̃ vɔ eve alafa eve. 
22 Eye Benyamin-to la nakpe ɖe wo ŋu. Benyamin viwo ƒe tatɔe nye Gideoni vi Abidan. 
23 Eƒe aʋawɔla siwo ŋkɔ woŋlɔ la le ame akpe blaetɔ̃ vɔ atɔ̃ alafa ene.
24 “Aʋawɔla siwo katã ŋkɔ woŋlɔ le Efrayim ƒe asaɖaa ƒe to etɔ̃ hatsotsoa me la le ame akpe alafa ɖeka kple enyi alafa ɖeka, eye woawoe nye hatsotso etɔ̃lia si aho.
25 “To etɔ̃ siwo nu Dan-toa le la naƒu asaɖa anyi ɖe dziehe gome le woƒe hatsotsowo nu. Dan viwo ƒe tatɔe nye Amisadai vi Ahiezer. 
26 Eƒe aʋawɔla siwo ŋkɔ woŋlɔ la le ame akpe blaade vɔ eve alafa adre. 
27 Aser-to la naƒu asaɖa anyi ɖe exa. Aser viwo ƒe tatɔe nye Okran vi Pagiel. 
28 Eƒe aʋawɔla siwo ŋkɔ woŋlɔ la le ame akpe blaene vɔ ɖekɛ alafa atɔ̃. 
29 Eye Naftali-to la nakpe ɖe wo ŋu. Naftali viwo ƒe tatɔe nye Enan vi Ahira. 
30 Eƒe aʋawɔla siwo ŋkɔ woŋlɔ la le ame akpe blaatɔ̃ vɔ etɔ̃ alafa ene.
31 “Aʋawɔla siwo katã ŋkɔ woŋlɔ le Dan ƒe asaɖaa ƒe to etɔ̃ hatsotsoa me la le ame akpe alafa ɖeka blaatɔ̃ vɔ adre alafa ade. Woawoe nye to etɔ̃ hatsotso mamlɛtɔ si aho.”
32 Ame siawoe nye Israel-vi siwo ŋkɔ woŋlɔ le wo fofowo ƒe aƒekɔwo nu. Aʋawɔla siwo ŋkɔ woŋlɔ le asaɖaawo katã me la le ame akpe alafa ade kple etɔ̃ alafa atɔ̃ blaatɔ̃. 
33 Gake womeŋlɔ Lewi viwo ya ŋkɔ kpe ɖe Israel-vi bubuawo ŋu o, abe ale si Afetɔ de se na Mose ene. 
34 Israel-viwo wɔ abe ale si tututu Afetɔ de se na Mose ene. Aleae woƒua asaɖa anyi ɖe woƒe to etɔ̃ hatsotsowo nui, eye alea nue wohona ɖo, ame sia ame kple eƒe ƒome le wo fofowo ƒe aƒekɔwo nu.

Numbers 3
1 Ke ame siawoe nye Aron kple Mose viwo le gbe si gbe Afetɔ ƒo nu kple Mose le Sinai To la dzi. 
2 Aron viŋutsuwo ƒe ŋkɔwoe nye esi: eƒe ŋgɔgbevi Nadab, eyome Abihu, Eleazar kple Itamar. 
3 Ame siawoe nye Aron viŋutsu siwo wosi ami na heɖo nunɔlawoe. 
4 Ke Nadab kple Abihu ku le Afetɔ ŋkume esi wodo dzo si ŋu womeɖe mɔ ɖo o le Afetɔ ŋkume le Sinai gbedzi; vi aɖeke menɔ wo si o. Ke Eleazar kple Itamar ya yi edzi wɔ nunɔladɔ kpe ɖe wo fofo Aron ŋu.
5 Afetɔ gblɔ na Mose be: 
6 “Na Lewi-to la nate va nunɔla Aron gbɔ ne woawɔ subɔsubɔdɔ nɛ. 
7 Woawɔ subɔsubɔdɔ na eya kple ha blibo la katã le takpegbadɔa ŋgɔ, eye woawɔ avɔgbadɔa me dɔwo. 
8 Woakpɔ takpegbadɔa ŋu nuwo katã dzi, eye woawɔ avɔgbadɔa me dɔwo ɖe Israel-viwo nu. 
9 Eye nàtsɔ Lewi viwo ade asi na Aron kple viaŋutsuwo. Woawoe nye ame siwo woɖe tso Israel-viwo dome tsɔ na. 
10 Eye nàɖo Aron kple viaŋutsuwo ne woawɔ woƒe nunɔladɔ, ame sia ame si womeɖe mɔ na o si ate va la, woawui.”
11 Afetɔ gagblɔ na Mose be: 
12 “Kpɔ ɖa, meɖe Lewi viwo tso Israel-viwo dome be woaxɔ ɖe ŋgɔgbeviwo katã teƒe le Israel-viwo dome, ale be Lewi viwo nazu tɔnye. 
13 Elabena ŋgɔgbeviwo katã tɔnyee wonye. Gbe si gbe mewu ŋgɔgbeviwo katã le Egipte-nyigba dzi la, mekɔ amegbetɔwo kple lãwo siaa ƒe ŋgɔgbeviwo ŋu le Israel na ɖokuinye be woazu tɔnye. Nyee nye Afetɔ.”
14 Afetɔ gagblɔ na Mose le Sinai gbedzi be: 
15 “Ŋlɔ Lewi viwo ŋkɔ le wo fofowo ƒe aƒekɔwo kple woƒe ƒomewo nu. Ŋlɔ ŋutsu siwo katã xɔ tso ɣleti ɖeka la ŋkɔ.” 
16 Eye Mose ŋlɔ wo ŋkɔ abe ale si tututu Afetɔ de se nɛ ene. 
17 Lewi viwo ƒe ŋkɔwoe nye esi: Gerson, Kohat, kple Merari.
18 Gerson viwo ƒe ŋkɔwo le woƒe ƒomewo nue nye, Libni kple Simei.
19 Kohat viwo ƒe ŋkɔ le woƒe ƒomewo nue nye Amram, Yizhar, Hebron kple Uziel.
20 Merari viwo ƒe ŋkɔ le woƒe ƒomewo nue nye Mahli kple Musi.
Esiawoe nye Lewi ƒomeawo le wo fofowo ƒe aƒekɔwo nu.
21 Ƒome siwo dzɔ tso Gerson mee nye Libni viwo kple Simei viwo ƒe ƒomewo. Esiawoe nye Gerson viwo ƒe ƒomewo. 
22 Woƒe ŋutsu siwo katã xɔ tso ɣleti ɖeka siwo ŋkɔ woŋlɔ la le ame akpe adre alafa atɔ̃. 
23 Gerson viwo ƒe ƒomeawo ƒu asaɖa anyi ɖe avɔgbadɔ la megbe le ɣetoɖoƒe gome. 
24 Gerson viwo ƒe tatɔ si le wo fofowo ƒe aƒekɔ nue nye Eliyasaf, Lael vi. 
25 Takpegbadɔ la ŋuti dɔ siwo gbɔ Gerson viwo akpɔe nye agbadɔvɔ la, etamegbanu la kple takpegbadɔa ƒe mɔnuvɔ la, 
26 avɔ si wotsɔ tɔ kpɔ ɖe xɔxɔnu la, kple kpɔtɔtɔ si ƒo xlã avɔgbadɔ la kple vɔsamlekpui la ƒe kpɔnuvɔ kpakple eŋu kawo, kple eŋu dɔwo katã.
27 Ƒome siwo dzɔ tso Kohat mee nye Amram viwo, Yizhar viwo, Hebron viwo kple Uziel viwo ƒe ƒomewo. Esiawoe nye Kohat viwo ƒe ƒomeawo. 
28 Ŋutsu siwo katã xɔ tso ɣleti ɖeka la le ame akpe enyi alafa ade; woawoe nye ame siwo kpɔa kɔkɔeƒe la ŋuti dɔwo gbɔ. 
29 Kohat viwo ƒe ƒomeawo ƒu asaɖa anyi ɖe avɔgbadɔ la ƒe anyiehe gome. 
30 Kohat viwo ƒe tatɔ si le wo fofowo ƒe aƒekɔ nue nye Elizafan, Uziel vi. 
31 Woƒe dɔe nye be woakpɔ Aɖaka la, kplɔ̃ la, akaɖiti la, vɔsamlekpuiawo, kɔkɔeƒe la ŋu nu siwo wotsɔna wɔa subɔsubɔdɔe, kple xɔmetsovɔ la kpakple wo ŋu dɔwo katã gbɔ.
32 Lewi viwo ƒe tatɔwo ƒe ŋgɔnɔlae nye nunɔla Aron vi Eleazar, eye eyae kpɔa ame siwo wɔa kɔkɔeƒe la ŋu dɔwo dzi.
33 Ƒome siwo dzɔ tso Merari mee nye Mahli viwo kple Musi viwo ƒe ƒomewo. Esiawoe nye Merari ƒe ƒomeawo. 
34 Woƒe ŋutsu siwo katã xɔ tso ɣleti ɖeka siwo ŋkɔ woŋlɔ la le ame akpe ade alafa eve. 
35 Merari ƒomeawo ƒe tatɔ si le wo fofowo ƒe aƒekɔ nue nye Zuriel, Abihayil vi. Woƒu asaɖa anyi ɖe avɔgbadɔ la ƒe dziehe gome. 
36 Merari viwo ƒe dɔe nye be woakpɔ avɔgbadɔ la ƒe ʋuƒowo, eƒe xɔblatiwo, eƒe sɔtiwo, eƒe anyinɔwo kple eŋu nuwo katã kpakple wo ŋu dɔwo katã gbɔ, 
37 hekpe ɖe xɔxɔnu si ƒo xlãe godoo la ƒe sɔtiwo, woƒe anyinɔwo, woƒe tsyotiwo kple wo ŋu kawo ŋuti.
38 Mose kple Aron kpakple Aron viwo ƒu asaɖa anyi ɖe avɔgbadɔ la ŋgɔ le takpegbadɔ la ƒe ɣedzeƒe gome. Woƒe dɔe nye be woawɔ kɔkɔeƒe la me dɔwo ɖe Israel-viwo nu. Eye ame sia ame si womeɖe mɔ na o si ate va la, woawui.
39 Lewi viwo ƒe ŋutsu siwo katã xɔ tso ɣleti ɖeka, siwo ŋkɔ Mose kple Aron ŋlɔ le woƒe ƒomeawo nu abe ale si Afetɔ de see ene la, le ame akpe blaeve vɔ eve.
40 Afetɔ gagblɔ na Mose be: “Ŋlɔ Israel-viwo ƒe ŋgɔgbeviŋutsu siwo katã xɔ tso ɣleti ɖeka la ŋkɔ kple woƒe xexlẽme ɖi. 
41 Eye nàtsɔ Lewi viwo anam ɖe Israel-viwo ƒe ŋgɔgbeviwo katã teƒe, eye nàtsɔ Lewi viwo ƒe aƒemelãwo anam ɖe Israel-viwo ƒe aƒemelãwo ƒe vi gbãtɔwo katã teƒe—nyee nye Afetɔ.” 
42 Ale Mose ŋlɔ Israel-viwo ƒe ŋgɔgbeviwo katã ŋkɔ, abe ale si tututu Afetɔ de se nɛ ene. 
43 Ŋgɔgbeviŋutsu siwo katã xɔ tso ɣleti ɖeka siwo ŋkɔ woŋlɔ la ƒe xexlẽme va le ame akpe blaeve vɔ eve alafa eve blaadre vɔ etɔ̃.
44 Afetɔ gagblɔ na Mose be: 
45 “Tia Lewi viwo ɖe Israel-viwo ƒe ŋgɔgbeviwo katã teƒe, kple Lewi viwo ƒe aƒemelãwo ɖe woƒe aƒemelãwo teƒe, eye Lewi viwo nazu tɔnye. Nyee nye Afetɔ. 
46 Eye woaxe fe ɖe Israel-viwo ƒe ŋgɔgbevi alafa eve blaadre vɔ etɔ̃, siwo wotsɔ sɔ gbɔ wu Lewi viwo la ta. 
47 Xɔ sekel atɔ̃ ɖe ame ɖeka ta. Nàxɔe ɖe teƒe kɔkɔe la ƒe sekel la nu. Sekel ɖeka le gera blaeve. 
48 Eye nàtsɔ ga la ana Aron kple viaŋutsuwo wòanye ame siwo wotsɔ sɔ gbɔ wu woe la ƒe tafe.” 
49 Eya ta Mose xɔ ame xexlẽme si wotsɔ sɔ gbɔ wu Lewi viwoe la ƒe taƒlega le wo si wònye wo tafe. 
50 Israel-viwo ƒe ŋgɔgbeviwo sie wòxɔ ga la le. Sekel akpe ɖeka alafa etɔ̃ blaade vɔ atɔ̃ ye wòxɔ, le teƒe kɔkɔe la ƒe sekel la nu. 
51 Eye Mose tsɔ ga si wotsɔ xe tafee la na Aron kple viaŋutsuwo le Afetɔ ƒe nya la nu, abe ale si tututu Afetɔ de se na Mose ene.

Numbers 4
1 Afetɔ gblɔ na Mose kple Aron be: 
2 “Mixlẽ Lewi vi siwo nye Kohat viwo le woƒe ƒomewo kple wo fofowo ƒe aƒekɔwo nu. 
3 Mixlẽ wo dometɔ siwo katã xɔ tso ƒe blaetɔ̃ va ɖo ƒe blaatɔ̃, siwo le ƒuƒoƒo si asubɔ le takpegbadɔa me la me.
4 “Esiae nye dɔ si Kohat viwo awɔ le takpegbadɔa me. Nu kɔkɔewo ƒe nu kɔkɔe ŋuti dɔe wònye: 
5 Ne asaɖa la le hoho ge la, ekema Aron kple viaŋutsuwo nava ɖe xɔmetsovɔ la atsɔ atsyɔ Ðaseɖiɖiɖaka la dzi. 
6 Woatsɔ nyogbalẽ atsyɔ edzi, akeke avɔ blɔtɔ ɖe edzi, eye woade eƒe kpoawo eŋu.
7 “Woakeke avɔ blɔtɔ ɖe ŋkumeɖobolokplɔ̃ la hã dzi, eye woatsɔ agba gbadzɛawo, kpluawo, agba goboeawo kple ze siwo wotsɔ ƒoa nunovɔsawo ɖi la ada ɖe edzi; eye abolo si nɔa edzi ɖaa la nanɔ edzi nenema. 
8 Eyome woakeke avɔ dzĩ ɖe wo dzi, atsɔ nyogbalẽ atsyɔ edzi, eye woade eƒe kpoawo eŋu. 
9 Woatsɔ avɔ blɔtɔ atsyɔ akaɖiti la kple eŋu akaɖigbɛawo, ɖovulãnuawo, dzofilɔnuawo kple amigoe siwo wozãna na eŋudɔwɔwɔ la dzi. 
10 Woabla akaɖitia kple eŋu nuwo katã ɖe avɔ si wotsɔ nyogbalẽ wɔ la me, eye woatsɔe aɖo agbati dzi. 
11 Woakeke avɔ blɔtɔ ɖe sikavɔsamlekpui la dzi, atsɔ nyogbalẽ atsyɔ edzi, eye woade eƒe kpoawo eŋu. 
12 Eyome woabla dɔwɔnu siwo katã wotsɔna wɔa subɔsubɔdɔ edziedzi le kɔkɔeƒea la ɖe avɔ blɔtɔ me, atsɔ nyogbalẽ atsyɔ edzi, eye woatsɔ wo aɖo agbati dzi.
13 “Woalɔ dzofi siwo le vɔsamlekpuia me, eye woakeke lãfuvɔ si wode ama aɖabɛ dzĩtɔe la ɖe vɔsamlekpuia dzi. 
14 Eye woatsɔ dɔwɔnu siwo katã wotsɔna wɔa subɔsubɔdɔ le vɔsamlekpuia ŋu, dzoɖenuawo, gafloawo, sofiawo, agba goboeawo kple eŋu nuawo katã ada ɖe edzi, eye woatsɔ nyogbalẽ atsyɔ edzi, eye woade eƒe kpoawo eŋu.
15 “Ne asaɖa la le hoho ge la, Aron kple viaŋutsuwo natsyɔ nu kɔkɔeƒe la kple kɔkɔeƒe la ŋu nuwo katã dzi vɔ hafi Kohat viwo nava tsɔ wo, ale be woagaka asi kɔkɔeƒe la ƒe nuwo ŋu ne woaku o. Esiawoe nye takpegbadɔ la me nu siwo ŋuti dɔ wode Kohat viwo si.
16 “Nunɔla Aron viŋutsu Eleazar ƒe dɔe nye be wòakpɔ akaɖi la ƒe ami, atike ʋeʋĩ, gbe sia gbe nuɖuvɔsa kple ami kɔkɔe la dzi. Akpɔ avɔgbadɔ blibo la kple emenuwo katã kpakple kɔkɔeƒe la kple eŋu nuwo dzi.”
17 Afetɔ gagblɔ na Mose kple Aron be: 
18 “Migana Kohat viwo ƒe ƒomeawo natsrɔ̃ ɖa le Lewi viwo dome o. 
19 Ke boŋ miwɔ nu sia na wo, ne woanɔ agbe, ale be ne wote ɖe nu kɔkɔewo ƒe nu kɔkɔewo ŋu la, woagaku o. Aron kple viaŋutsuwo nayi ɖe eme ava de dɔ si wo dometɔ ɖe sia ɖe awɔ kple agba si wòatsɔ la asi nɛ. 
20 Ke woagava eme ahayi nu kɔkɔeawo kpɔ ge flui gɔ̃ hã o, be woagaku o.”
21 Eye Afetɔ gblɔ na Mose be: 
22 “Xlẽ Gerson viwo le woƒe ƒomewo kple wo fofowo ƒe aƒekɔwo nu. 
23 Nàŋlɔ wo dometɔ siwo katã xɔ ƒe blaetɔ̃ va ɖo ƒe blaatɔ̃, siwo katã le ƒuƒoƒo si asubɔ le takpegbadɔa me la ƒe ŋkɔwo. 
24 Dɔ si wode asi na Gerson viwo ƒe ƒomeawo kple agba siwo woatsɔ lae nye esi: 
25 Woatsɔ avɔgbadɔ la ƒe agbadɔvɔawo, takpegbadɔvɔ la, eŋuvɔwo, nyogbalẽ si wotsɔna tsyɔa etame, takpegbadɔa ƒe mɔnuvɔ la, 
26 avɔ siwo wotsɔ tɔ kpɔ ɖe xɔxɔnu la, kpɔtɔtɔ si ƒo xlã avɔgbadɔ la kple vɔsamlekpui la ƒe kpɔnuvɔ, wo ŋu kawo kple wo ŋu dɔwɔnu siwo katã wozãna edziedzi la. Dɔ siae woawɔ. 
27 Aron kple viaŋutsuwo nakpɔ Gerson viwo ƒe subɔsubɔdɔ kple agba siwo katã woatsɔ la dzi; woawoe ade agba siwo katã wòle be woatsɔ la asi na wo. 
28 Esiawoe nye dɔ si Gerson viwo ƒe ƒomeawo awɔ le takpegbadɔa ŋu, eye nunɔla Aron vi Itamar ye akpɔ dɔ si wode wo si la dzi.
29 “Ke nàŋlɔ Merari viwo ŋkɔ le woƒe ƒomewo kple wo fofowo ƒe aƒekɔwo nu. 
30 Nàŋlɔ ame siwo katã xɔ ƒe blaetɔ̃ va ɖo ƒe blaatɔ̃, siwo katã le ƒuƒoƒo si asubɔ le takpegbadɔa me la ƒe ŋkɔwo. 
31 Dɔ si woade asi na wo be woawɔ le takpegbadɔa ŋue nye be, woatsɔ avɔgbadɔ la ƒe ʋuƒowo, eƒe xɔblatiwo, eƒe sɔtiwo, eƒe anyinɔwo, 
32 kpɔtɔtɔ si le xɔxɔnua ƒe sɔtiwo, woƒe anyinɔwo, woƒe tsyotiwo, wo ŋu kawo kple wo ŋu dɔwɔnuwo katã. Eye miade agba siwo woatsɔ la asi na wo le woƒe ŋkɔwo nu. 
33 Esiae nye subɔsubɔdɔ siwo Merari viwo ƒe ƒomeawo awɔ le takpegbadɔa ŋu, eye nunɔla Aron viŋutsu Itamar ye akpɔ dɔ siawo dzi.”
34 Mose kple Aron kpakple ha la ƒe tatɔwo ŋlɔ Kohat viwo ƒe ŋutsuwo ŋkɔ le woƒe ƒomeawo kple wo fofowo ƒe aƒekɔwo nu, 
35 woŋlɔ ame siwo katã xɔ ƒe blaetɔ̃ va ɖo ƒe blaatɔ̃, siwo katã le ƒuƒoƒo si asubɔ le takpegbadɔa me la ƒe ŋkɔwo. 
36 Wo dometɔ siwo ŋkɔ woŋlɔ le woƒe ƒomeawo nu la le ame akpe eve alafa adre blaatɔ̃. 
37 Ame siawoe nye Kohat viwo ƒe ƒomeawo me tɔ siwo subɔna le takpegbadɔa me, siwo ƒe ŋkɔ Mose kple Aron ŋlɔ abe ale si Afetɔ de se na Mose ene.
38 Woŋlɔ Gerson viwo ƒe ŋkɔwo le woƒe ƒomewo kple wo fofowo ƒe aƒekɔwo nu, 
39 eye wo dometɔ siwo katã xɔ tso ƒe blaetɔ̃ va ɖo ƒe blaatɔ̃ la le ƒuƒoƒo si asubɔ le takpegbadɔa me la dome. 
40 Wo dometɔ siwo ŋkɔ woŋlɔ le woƒe ƒomeawo kple wo fofowo ƒe aƒekɔwo nu la le ame akpe eve alafa ade blaetɔ̃. 
41 Ame siawoe nye Gerson viwo ƒe ƒomeawo me tɔ siwo subɔna le takpegbadɔa me, siwo ƒe ŋkɔ Mose kple Aron ŋlɔ abe ale si Afetɔ de see ene.
42 Woŋlɔ Merari viwo ƒe ŋkɔwo le woƒe ƒomewo kple wo fofowo ƒe aƒekɔwo nu, 
43 eye wo dometɔ siwo katã xɔ tso ƒe blaetɔ̃ va ɖo ƒe blaatɔ̃ la le ƒuƒoƒo si asubɔ le takpegbadɔa me la dome. 
44 Wo dometɔ siwo ŋkɔ woŋlɔ le woƒe ƒomeawo nu la le ame akpe etɔ̃ alafa eve. 
45 Ame siawoe nye Merari viwo ƒe ƒomeawo me tɔ siwo ŋkɔ Mose kple Aron ŋlɔ, abe ale si Afetɔ de se na Mose ene.
46 Mose kple Aron kpakple Israel-viwo ƒe tatɔwoe ŋlɔ Lewi vi siawo katã ƒe ŋkɔwo le woƒe ƒomewo kple wo fofowo ƒe aƒekɔwo nu; 
47 wonye ame siwo xɔ tso ƒe blaetɔ̃ va ɖo ƒe blaatɔ̃, eye wode dɔ asi na wo be woasubɔ ahatsɔ agbawo le takpegbadɔa me. 
48 Wo dometɔ siwo katã ŋkɔ woŋlɔ la le ame akpe enyi alafa atɔ̃ blaenyi. 
49 Woŋlɔ wo ŋkɔ hede dɔ si wo dometɔ ɖe sia ɖe awɔ kple agba si wòatsɔ la asi na wo abe ale si Afetɔ gblɔe na Mose ene; wowɔe abe ale si tututu Afetɔ de se na Mose ene.

Numbers 5
1 Afetɔ gagblɔ na Mose be: 
2 “De se na Israel-viwo be woaɖe anyidɔlélawo katã kple ame sia ame si ŋu tsi le dodom le kpakple ame sia ame si ka asi ame kuku aɖe ŋu heƒo ɖi eɖokui la ɖa le asaɖa la me. 
3 Eɖanye ŋutsu alo nyɔnu o, miɖe wo ɖa. Mina woayi asaɖa la godo, be woagaƒo ɖi dukɔ si dome mele la ƒe asaɖawo o.” 
4 Eya ta Israel-viwo wɔe nenema, eye woɖe wo ɖo ɖe asaɖa la godo. Ale si tututu Afetɔ gblɔ na Mose la, nenemae Israel-viwo wɔe.
5 Afetɔ gagblɔ na Mose be: 
6 “Gblɔ na Israel-viwo be, ‘Ne ŋutsu alo nyɔnu aɖe mewɔ nuteƒe na Afetɔ o, eye wòwɔ nu vɔ̃ siwo amegbetɔwo wɔna la dometɔ aɖe la, ekema ame ma ɖi fɔ. 
7 Neʋu nu vɔ̃ si wòwɔ la me, eye wòaxe fe dedie ɖe nu si ƒe fɔ wòɖi la ta, eye wòagatsɔ fe si wodo nɛ la me mama ɖe atɔ̃ ƒe akpa ɖeka akpee na ame si dzi wòdze agɔ le. 
8 Ke ne ƒometɔ kplikplikpli aɖeke meli si wòaɖo nu si ƒe fɔ wòɖi la teƒe na o la, ekema woatsɔ fe si wòxe la ana Afetɔ eye wòazu nunɔla la tɔ; gake woatsɔ agbo la ya alé avu ɖe fɔɖila la ta.
9 “‘Israel-viwo ƒe nu kɔkɔe siwo katã woadzɔ atsɔ ana nunɔla la nazu etɔ. 
10 Nu kɔkɔe siwo ame sia ame adzɔ la nazu etɔ. Nu sia nu si ame aɖe na nunɔla la azu etɔ.’”
11 Afetɔ gagblɔ na Mose be: 
12 “Gblɔ na Israel-viwo be, ‘Ne ŋutsu aɖe srɔ̃ da afɔ, si fia be mewɔ nuteƒe nɛ o, 
13 eye ŋutsu bubu dɔ kplii, srɔ̃a menya o, ame aɖeke hã menya o, ale be nyɔnu la gblẽ kɔ ɖo na eɖokui, evɔ ɖasefo aɖeke mele eŋu o, eye womelée asiasi hã o: 
14 eye wòva eme be ŋuʋaʋã ɖo ŋutsua me eye megaka ɖe srɔ̃a ƒe nuteƒewɔwɔ dzi o, eye nyɔnua gblẽ kɔ ɖo na eɖokui hã vavã, alo ŋuʋaʋãe ɖo ŋutsua me eye megaka ɖe srɔ̃a ƒe nuteƒewɔwɔ dzi o, evɔ nyɔnua megblẽ kɔ ɖo na eɖokui hafi o la, 
15 ekema ŋutsua nakplɔ srɔ̃a ava nunɔla la gbɔ, eye wòatsɔ nyɔnua ƒe nunana si nye ƒowɔ efa me mama ɖe ewo ƒe akpa ɖeka akpe ɖe eŋu. Makɔ ami ɖe edzi o, eye matsɔ lifi hã ada ɖe edzi o, elabena ŋuʋaʋã ƒe nuɖuvɔsa wònye, nuɖuvɔsa si nana woɖoa ŋku vodada dzie wònye.
16 “‘Nunɔla la nana nyɔnua nava tɔ ɖe Afetɔ ŋkume. 
17 Eye nunɔla la naku tsi kɔkɔe ɖe anyinu me eye wòalɔ ke le anyigba le avɔgbadɔa me akɔ ɖe tsia me. 
18 Nunɔla la nana nyɔnua natɔ ɖe Afetɔ ŋkume, eye wòatu ɖa le ta na nyɔnua ahatsɔ ŋkuɖodzinuɖuvɔsa si nye ŋuʋaʋã ƒe nuɖuvɔsa la ade nyɔnua si, eye nunɔlaa ŋutɔ nalé tsi veve si hea fiƒode vaa ame dzi la ɖe asi.
19 “‘Nunɔla la nana nyɔnua naka atam, eye wòagblɔ na nyɔnua be: “Ne ŋutsu bubu aɖeke medɔ gbɔwò o, eye mèda afɔ hewɔ nu makɔmakɔ aɖeke esime nèkpɔtɔ le atsuƒe o la, ekema tsi veve sia si hea fiƒode vaa ame dzi la nagawɔ nu vevi aɖeke wò o. 
20 Ke ne èda afɔ esime nèkpɔtɔ le atsuƒe, eye nègblẽ kɔ ɖo na ɖokuiwò, ale be ŋutsu bubu dɔ gbɔwò le srɔ̃wo megbe la . . .” 
21 Azɔ nunɔla la nana nyɔnua naka atam agblɔ fiƒodenyawo, eye nunɔla la nagblɔ na nyɔnua be: “Afetɔ nena fiƒode la naɖi ŋuwò nàzu fiƒodeme le wò dukɔ la dome, eye Afetɔ nena wò ali naklẽ, eye ƒodo nadzi ɖe nuwò. 
22 Tsi sia si hea fiƒode vaa ame dzi la naɖo wò dɔkaviwo me, ne wòana ƒodo nadzi ɖe nuwò, eye wò ali naklẽ.” Eye nyɔnu la nagblɔ be: “Amen! Amen!”
23 “‘Eye nunɔla la naŋlɔ fiƒodenya siawo ɖe agbalẽ la me, eye wòakpalae akɔ ɖe tsi veve la me. 
24 Eye wòana nyɔnua nano tsi veve si hea fiƒode vaa ame dzi la, eye tsi si hea fiƒode vaa ame dzi la naɖo eƒe lãme wòahe vevesese ava edzi. 
25 Eyome nunɔla la naxɔ ŋuʋaʋã ƒe nuɖuvɔsa la le nyɔnua si, eye wòanyè nuɖuvɔsa la le Afetɔ ŋkume ahatsɔe ayi vɔsamlekpuia gbɔ. 
26 Eye nunɔla la naku nuɖuvɔsa la ƒe ɖe wòanye ŋkuɖodzinu atsɔ ado dzudzɔ le vɔsamlekpuia dzi, emegbe wòana nyɔnua nano tsi la. 
27 Ne ena wòno tsia, eye wònye nyateƒe be egblẽ kɔ ɖo na eɖokui eye mewɔ nuteƒe na srɔ̃a o la, ekema tsi si hea fiƒode vaa ame dzi la aɖo eƒe lãme wòahe vevesese ava edzi, ƒodo adzi ɖe enu, eƒe ali aklẽ, eye fiƒode anɔ nyɔnu la dzi le eƒe dukɔ la dome. 
28 Gake ne nyɔnua megblẽ kɔ ɖo na eɖokui o, ke boŋ eŋu kɔ la, ekema naneke mawɔe o, eye agate ŋu afɔ fu adzi vi.
29 “‘Esiae nye ŋuʋaʋã ŋuti se, ne nyɔnu aɖe da afɔ eye wògblẽ kɔ ɖo na eɖokui esime wòle atsuƒe, 
30 alo ne ŋuʋaʋã ye ɖo ŋutsu aɖe me, eye megaka ɖe srɔ̃a ƒe nuteƒewɔwɔ dzi o la, ekema nena nyɔnua natɔ ɖe Afetɔ ŋkume, eye nunɔla la nawɔ na nyɔnua alea ɖe se siawo katã nu. 
31 Fɔɖiɖi manɔ ŋutsua dzi o, ke boŋ srɔ̃nyɔnu la ŋutɔ dzie fɔɖiɖia anɔ.’”

Numbers 6
1 Afetɔ gagblɔ na Mose be: 
2 “Gblɔ na Israel-viwo be, ‘Ne ŋutsu alo nyɔnu aɖe ɖe adzɔgbe tɔxɛ, be yeatsɔ ye ɖokui ana Afetɔ azu Naziritɔ la, 
3 ekema wòatsri wain kple aha muame bubuwo. Mekpɔ mɔ ano wain tsitsi alo nu muame aɖeke o. Megano waintsetse me tsi aɖeke hã o, maɖu waintsetse o, eɖanye ɖiɖia alo ƒuƒua o. 
4 Ŋkeke siwo katã me wònye Naziritɔ la, maɖu naneke si wotsɔ waintsetse wɔ o, eɖanye nu si wotsɔ waintsetse maɖimaɖi alo tsroa wɔe o.
5 “‘Ŋkeke siwo katã me wòɖe adzɔgbe be yeanye Naziritɔ la, talũhɛ maka ta nɛ o. Negblẽ eƒe taɖa ɖi wòato ʋluyaa wòanye eƒe kɔkɔenyenye ƒe dzesi, va se ɖe esime ŋkeke siwo wòɖe eɖokui ɖe vovo na Afetɔ la wu enu. 
6 Magogo ame kuku aɖeke le ŋkeke siwo katã wòaɖe eɖokui ɖe vovo na Afetɔ la me o. 
7 Ne fofoa alo dadaa, nɔviaŋutsu alo nɔvianyɔnu gɔ̃ hãe ku la, magblẽ kɔ ɖo na eɖokui o, elabena Naziritɔ si wònye na eƒe Mawu la ƒe dzesi le ta nɛ.
8 “‘Ame kɔkɔe wònye na Afetɔ le ŋkeke siwo katã me wònye Naziritɔ. 
9 Ke ne edzɔ be ame aɖe ku kpata ɖe egbɔ, ale be wògblẽ kɔ ɖo na eƒe ɖa si nye dzesi be woɖee ɖe vovo la, ekema wòalũ ta le gbe si gbe woakɔ eŋu. Wòalũi le ŋkeke adrea gbe. 
10 Eye le ŋkeke enyia gbe la, wòatsɔ akpakpa eve alo ahɔnɛvi eve avɛ na nunɔla la le takpegbadɔa nu. 
11 Nunɔla la natsɔ ɖeka asa nuvɔ̃vɔ, eye wòatsɔ evelia asa numevɔ alé avu ɖe eta le esi ame kuku aɖe na wòɖi fɔ ta. Ale wòakɔ eƒe ta ŋu gbe ma gbe. 
12 Eye wòagaɖe adzɔgbe na Afetɔ agazu Naziritɔ ake, eye wòatsɔ alẽtsui si xɔ ƒe ɖeka avɛ be woatsɔ asa fɔɖivɔ. Ke womaxlẽ ŋkeke siwo va yi la nɛ o, elabena egblẽ kɔ ɖo na eƒe Naziritɔnyenye la.
13 “‘Ke esiae nye se na Naziritɔ: Ne ŋkeke siwo me wòɖoe be yeanye Naziritɔ de la, woakplɔe ava takpegbadɔa nu. 
14 Eye wòatsɔ alẽtsui si sɔ blibo, si xɔ ƒe ɖeka, ana be woatsɔ asa numevɔ na Afetɔ, kple alẽnɔe si sɔ blibo, si xɔ ƒe ɖeka be woatsɔ asa nuvɔ̃vɔ, kpakple agbo si sɔ blibo be woatsɔ asa ŋutifafavɔ, 
15 eye wòatsɔ wɔ memee aƒo amɔwɔ maʋamaʋã bolo kotoe si wode amii, kple amɔwɔ maʋamaʋã kpɔnɔ vivi si ŋu wosisi ami ɖo ahatsɔe ade kusi me avɛ, eye wòatsɔ nu siwo woatsɔ asa nuɖuvɔ kple nunovɔ akpe ɖe wo ŋuti. 
16 Nunɔla la natsɔ nu siawo ava Afetɔ ŋkume, eye wòasa eƒe nuvɔ̃vɔ kple eƒe numevɔ la nɛ. 
17 Atsɔ agbo la kple amɔwɔ maʋamaʋã bolo siwo le kusia me asa ŋutifafavɔ na Afetɔ, eye nunɔla la nasa nuɖuvɔ kple nunovɔ siwo kpe ɖe eŋu la hã.
18 “‘Naziritɔ la nalũ ta le takpegbadɔa nu, eye wòalɔ eƒe taɖa la ade dzo si le ŋutifafavɔsaa te la me. 
19 Ne Naziritɔ la na wolũ eƒe taɖa si nye eƒe Naziritɔnyenye ƒe dzesia vɔ la, ekema nunɔla la natsɔ agbo la ƒe abɔ si woɖa kple amɔwɔ maʋamaʋã bolo kotoe ɖeka le kusia me kpakple amɔwɔ maʋamaʋã kpɔnɔ vivi ɖeka, eye wòatsɔ wo ade esi. 
20 Eye nunɔla la nanyè wo wòanye vɔsa si wonyè le Afetɔ ŋkume. Nu siawo azu nu kɔkɔe na nunɔla la hekpe ɖe akɔ si wonyè kple ata si nye adzɔ la ŋu. Emegbe ko hafi Naziritɔ la ate ŋu ano wain.
21 “‘Esiae nye se na Naziritɔ si ɖe adzɔgbe. Ke hã ne eɖe adzɔgbe be yeana nu bubuwo Afetɔ akpe ɖe eƒe Naziritɔnyenye ƒe nudidiwo ŋu la, ke newɔ abe ale si wòɖe adzɔgbee ene ɖe Naziritɔnyenye ƒe se la nu.’”
22 Eye Afetɔ gblɔ na Mose be: 
23 “Gblɔ na Aron kple viaŋutsuwo be, ‘Ale miayra Israel-viwoe nye esi:
24 “Afetɔ neyra wò, eye wòakpɔ tawò.
25 Afetɔ nakɔ mo ɖe wò, eye wòave nuwò.
26 Afetɔ netrɔ mo ɖe gbɔwò, eye wòana ŋutifafa wò.”’
27 Ale woayɔ nye ŋkɔ atɔ ɖe Israel-viwo ŋu, ne mayra wo.”

Numbers 7
1 Gbe si gbe Mose wu avɔgbadɔa tutu nu la, esi ami nɛ, eye wòkɔ avɔgbadɔa kple emenuwo katã kpakple vɔsamlekpuia kple eŋu nuwo katã ŋu. Esi wòsi ami na nu siawo hekɔ wo ŋu vɔ la, 
2 Israel-viwo ƒe tatɔ siwo le wo fofowo ƒe aƒekɔwo nu tsɔ nunanawo vɛ. Woawoe nye toawo ƒe tatɔ siwo le ame siwo ŋkɔ woŋlɔ la nu, 
3 eye nunana siwo wotsɔ va Afetɔ ŋkumee nye tasiaɖam ade siwo tame wogba, kple nyitsu wuieve; tasiaɖam ɖeka ɖe tatɔ eve nu, kple nyitsu ɖeka ɖe wo dometɔ ɖe sia ɖe nu; eye wotsɔ wo va avɔgbadɔ la ŋgɔ. 
4 Afetɔ gblɔ na Mose be: 
5 “Xɔ wo le wo si ne woazã na takpegbadɔa ŋuti dɔwo wɔwɔ, eye nàma wo na Lewi viwo ɖe ale si wo dometɔ ɖe sia ɖe ƒe dɔwo le la nu.”
6 Ale Mose xɔ tasiaɖam kple nyiawo, eye wòtsɔ wo na Lewi viwo. 
7 Etsɔ tasiaɖam eve kple nyitsu ene na Gerson viwo ɖe ale si woƒe dɔwo le la nu; 
8 eye wòtsɔ tasiaɖam ene kple nyitsu enyi na Merari vi siwo le nunɔla Aron viŋutsu Itamar ƒe dzikpɔkpɔ te ɖe ale si woƒe dɔwo le la nu. 
9 Ke metsɔ ɖeke na Kohat viwo ya o, elabena kɔkɔeƒe la ŋuti subɔsubɔdɔ siwo wowɔna la bia be woatsɔ nu kɔkɔeawo ɖe abɔta.
10 Ke tatɔawo tsɔ woƒe nunanawo vɛ le gbe si gbe wokɔ vɔsamlekpuia ŋu hesi ami nɛ. Esi tatɔawo tsɔ woƒe nunana la va vɔsamlekpuia ŋgɔ la, 
11 Afetɔ gblɔ na Mose be: “Na tatɔawo natsɔ woƒe nunana si woatsɔ akɔ vɔsamlekpuia ŋu la vɛ ɖekaɖeka, ŋkeke sia ŋkeke tatɔ ɖeka natsɔ etɔ vɛ.”
12 Ame si tsɔ eƒe nunana vɛ le ŋkeke gbãtɔ dzie nye Aminadab vi Nahason tso Yuda-to la me. 
13 Nu si wònae nye klosalogba ɖeka, si da sekel alafa ɖeka blaetɔ̃, klosalogba goboe ɖeka, si da sekel blaadre ne wobui ɖe teƒe kɔkɔe la ƒe sekel nu, eye wo kple evea yɔ banaa kple wɔ memee si wotsɔ ami dzabae be woatsɔ asa nuɖuvɔ; 
14 sikakplu ɖeka, si da sekel ewo, eye dzudzɔdonu ʋeʋĩ yɔe banaa; 
15 nyitsui ɖeka, agbo ɖeka, kple alẽtsui ɖeka si xɔ ƒe ɖeka, be woatsɔ asa numevɔ; 16 gbɔ̃tsui ɖeka be woatsɔ asa nuvɔ̃vɔ; 
17 kple nyi eve, agbo atɔ̃, gbɔ̃tsu atɔ̃, kpakple alẽtsui atɔ̃ siwo dometɔ ɖe sia ɖe xɔ ƒe ɖeka, be woatsɔ asa ŋutifafavɔ. Esiae nye Aminadab vi Nahason ƒe nunana.
18 Le ŋkeke evea gbe la, Zuar vi Netanel, si nye Isakar viwo ƒe tatɔ, tsɔ eƒe nunana vɛ. 
19 Nu si wònae nye klosalogba ɖeka, si da sekel alafa ɖeka blaetɔ̃, klosalogba goboe ɖeka, si da sekel blaadre ne wobui ɖe teƒe kɔkɔe la ƒe sekel nu, eye wo kple evea yɔ banaa kple wɔ memee si wotsɔ ami dzabae be woatsɔ asa nuɖuvɔ; 
20 sikakplu ɖeka, si da sekel ewo, eye dzudzɔdonu ʋeʋĩ yɔe banaa; 
21 nyitsui ɖeka, agbo ɖeka, kple alẽtsui ɖeka si xɔ ƒe ɖeka, be woatsɔ asa numevɔ; 
22 gbɔ̃tsui ɖeka be woatsɔ asa nuvɔ̃vɔ; 
23 kple nyi eve, agbo atɔ̃, gbɔ̃tsu atɔ̃, kpakple alẽtsui atɔ̃ siwo dometɔ ɖe sia ɖe xɔ ƒe ɖeka, be woatsɔ asa ŋutifafavɔ. Esiae nye Zuar vi Netanel ƒe nunana.
24 Le ŋkeke etɔ̃a gbe la, Zebulon viwo ƒe tatɔ Eliab, si nye Helon vi, tsɔ etɔ vɛ. 
25 Nu si wònae nye klosalogba ɖeka, si da sekel alafa ɖeka blaetɔ̃, klosalogba goboe ɖeka, si da sekel blaadre ne wobui ɖe teƒe kɔkɔe la ƒe sekel nu, eye wo kple evea yɔ banaa kple wɔ memee si wotsɔ ami dzabae be woatsɔ asa nuɖuvɔ; 
26 sikakplu ɖeka, si da sekel ewo, eye dzudzɔdonu ʋeʋĩ yɔe banaa; 
27 nyitsui ɖeka, agbo ɖeka, kple alẽtsui ɖeka si xɔ ƒe ɖeka, be woatsɔ asa numevɔ; 
28 gbɔ̃tsui ɖeka be woatsɔ asa nuvɔ̃vɔ; 
29 kple nyi eve, agbo atɔ̃, gbɔ̃tsu atɔ̃, kpakple alẽtsui atɔ̃ siwo dometɔ ɖe sia ɖe xɔ ƒe ɖeka, be woatsɔ asa ŋutifafavɔ. Esiae nye Helon vi Eliab ƒe nunana.
30 Le ŋkeke enea gbe la, Ruben viwo ƒe tatɔ Elizur, si nye Sedeur vi, tsɔ etɔ vɛ. 
31 Nu si wònae nye klosalogba ɖeka, si da sekel alafa ɖeka blaetɔ̃, klosalogba goboe ɖeka, si da sekel blaadre ne wobui ɖe teƒe kɔkɔe la ƒe sekel nu, eye wo kple evea yɔ banaa kple wɔ memee si wotsɔ ami dzabae be woatsɔ asa nuɖuvɔ; 
32 sikakplu ɖeka, si da sekel ewo, eye dzudzɔdonu ʋeʋĩ yɔe banaa; 
33 nyitsui ɖeka, agbo ɖeka, kple alẽtsui ɖeka si xɔ ƒe ɖeka, be woatsɔ asa numevɔ; 
34 gbɔ̃tsui ɖeka be woatsɔ asa nuvɔ̃vɔ; 
35 kple nyi eve, agbo atɔ̃, gbɔ̃tsu atɔ̃, kpakple alẽtsui atɔ̃ siwo dometɔ ɖe sia ɖe xɔ ƒe ɖeka, be woatsɔ asa ŋutifafavɔ. Esiae nye Sedeur vi Elizur ƒe nunana.
36 Le ŋkeke atɔ̃a gbe la, Simeon viwo ƒe tatɔ Selumiel, si nye Zurisadai vi, tsɔ etɔ vɛ. 
37 Nu si wònae nye klosalogba ɖeka, si da sekel alafa ɖeka blaetɔ̃, klosalogba goboe ɖeka, si da sekel blaadre ne wobui ɖe teƒe kɔkɔe la ƒe sekel nu, eye wo kple evea yɔ banaa kple wɔ memee si wotsɔ ami dzabae be woatsɔ asa nuɖuvɔ; 
38 sikakplu ɖeka, si da sekel ewo, eye dzudzɔdonu ʋeʋĩ yɔe banaa; 
39 nyitsui ɖeka, agbo ɖeka, kple alẽtsui ɖeka si xɔ ƒe ɖeka, be woatsɔ asa numevɔ; 
40 gbɔ̃tsui ɖeka be woatsɔ asa nuvɔ̃vɔ; 
41 kple nyi eve, agbo atɔ̃, gbɔ̃tsu atɔ̃, kpakple alẽtsui atɔ̃ siwo dometɔ ɖe sia ɖe xɔ ƒe ɖeka, be woatsɔ asa ŋutifafavɔ. Esiae nye Zurisadai vi Selumiel ƒe nunana.
42 Le ŋkeke adea gbe la, Gad viwo ƒe tatɔ Eliyasaf, si nye Deuel vi, tsɔ etɔ vɛ. 
43 Nu si wònae nye klosalogba ɖeka, si da sekel alafa ɖeka blaetɔ̃, klosalogba goboe ɖeka, si da sekel blaadre ne wobui ɖe teƒe kɔkɔe la ƒe sekel nu, eye wo kple evea yɔ banaa kple wɔ memee si wotsɔ ami dzabae be woatsɔ asa nuɖuvɔ; 
44 sikakplu ɖeka, si da sekel ewo, eye dzudzɔdonu ʋeʋĩ yɔe banaa; 
45 nyitsui ɖeka, agbo ɖeka, kple alẽtsui ɖeka si xɔ ƒe ɖeka, be woatsɔ asa numevɔ; 
46 gbɔ̃tsui ɖeka be woatsɔ asa nuvɔ̃vɔ; 
47 kple nyi eve, agbo atɔ̃, gbɔ̃tsu atɔ̃, kpakple alẽtsui atɔ̃ siwo dometɔ ɖe sia ɖe xɔ ƒe ɖeka, be woatsɔ asa ŋutifafavɔ. Esiae nye Deuel vi Eliyasaf ƒe nunana.
48 Le ŋkeke adrea gbe la, Efrayim viwo ƒe tatɔ Elisama, si nye Amihud vi, tsɔ etɔ vɛ. 
49 Nu si wònae nye klosalogba ɖeka, si da sekel alafa ɖeka blaetɔ̃, klosalogba goboe ɖeka, si da sekel blaadre ne wobui ɖe teƒe kɔkɔe la ƒe sekel nu, eye wo kple evea yɔ banaa kple wɔ memee si wotsɔ ami dzabae be woatsɔ asa nuɖuvɔ; 
50 sikakplu ɖeka, si da sekel ewo, eye dzudzɔdonu ʋeʋĩ yɔe banaa; 
51 nyitsui ɖeka, agbo ɖeka, kple alẽtsui ɖeka si xɔ ƒe ɖeka, be woatsɔ asa numevɔ; 
52 gbɔ̃tsui ɖeka be woatsɔ asa nuvɔ̃vɔ; 
53 kple nyi eve, agbo atɔ̃, gbɔ̃tsu atɔ̃, kpakple alẽtsui atɔ̃ siwo dometɔ ɖe sia ɖe xɔ ƒe ɖeka, be woatsɔ asa ŋutifafavɔ. Esiae nye Amihud vi Elisama ƒe nunana.
54 Le ŋkeke enyia gbe la, Manase viwo ƒe tatɔ Gamaliel, si nye Pedahzur vi, tsɔ etɔ vɛ. 
55 Nu si wònae nye klosalogba ɖeka, si da sekel alafa ɖeka blaetɔ̃, klosalogba goboe ɖeka, si da sekel blaadre ne wobui ɖe teƒe kɔkɔe la ƒe sekel nu, eye wo kple evea yɔ banaa kple wɔ memee si wotsɔ ami dzabae be woatsɔ asa nuɖuvɔ; 
56 sikakplu ɖeka, si da sekel ewo, eye dzudzɔdonu ʋeʋĩ yɔe banaa; 
57 nyitsui ɖeka, agbo ɖeka, kple alẽtsui ɖeka si xɔ ƒe ɖeka, be woatsɔ asa numevɔ; 
58 gbɔ̃tsui ɖeka be woatsɔ asa nuvɔ̃vɔ; 
59 kple nyi eve, agbo atɔ̃, gbɔ̃tsu atɔ̃, kpakple alẽtsui atɔ̃ siwo dometɔ ɖe sia ɖe xɔ ƒe ɖeka, be woatsɔ asa ŋutifafavɔ. Esiae nye Pedahzur vi Gamaliel ƒe nunana.
60 Le ŋkeke asiekea gbe la, Benyamin viwo ƒe tatɔ Abidan, si nye Gideoni vi, tsɔ etɔ vɛ. 
61 Nu si wònae nye klosalogba ɖeka, si da sekel alafa ɖeka blaetɔ̃, klosalogba goboe ɖeka, si da sekel blaadre ne wobui ɖe teƒe kɔkɔe la ƒe sekel nu, eye wo kple evea yɔ banaa kple wɔ memee si wotsɔ ami dzabae be woatsɔ asa nuɖuvɔ; 
62 sikakplu ɖeka, si da sekel ewo, eye dzudzɔdonu ʋeʋĩ yɔe banaa; 
63 nyitsui ɖeka, agbo ɖeka, kple alẽtsui ɖeka si xɔ ƒe ɖeka, be woatsɔ asa numevɔ; 
64 gbɔ̃tsui ɖeka be woatsɔ asa nuvɔ̃vɔ; 
65 kple nyi eve, agbo atɔ̃, gbɔ̃tsu atɔ̃, kpakple alẽtsui atɔ̃ siwo dometɔ ɖe sia ɖe xɔ ƒe ɖeka, be woatsɔ asa ŋutifafavɔ. Esiae nye Gideoni vi Abidan ƒe nunana.
66 Le ŋkeke ewoa gbe la, Dan viwo ƒe tatɔ Ahiezer, si nye Amisadai vi, tsɔ etɔ vɛ. 
67 Nu si wònae nye klosalogba ɖeka, si da sekel alafa ɖeka blaetɔ̃, klosalogba goboe ɖeka, si da sekel blaadre ne wobui ɖe teƒe kɔkɔe la ƒe sekel nu, eye wo kple evea yɔ banaa kple wɔ memee si wotsɔ ami dzabae be woatsɔ asa nuɖuvɔ; 
68 sikakplu ɖeka, si da sekel ewo, eye dzudzɔdonu ʋeʋĩ yɔe banaa; 
69 nyitsui ɖeka, agbo ɖeka, kple alẽtsui ɖeka si xɔ ƒe ɖeka, be woatsɔ asa numevɔ; 
70 gbɔ̃tsui ɖeka be woatsɔ asa nuvɔ̃vɔ; 
71 kple nyi eve, agbo atɔ̃, gbɔ̃tsu atɔ̃, kpakple alẽtsui atɔ̃ siwo dometɔ ɖe sia ɖe xɔ ƒe ɖeka, be woatsɔ asa ŋutifafavɔ. Esiae nye Amisadai vi Ahiezer ƒe nunana.
72 Le ŋkeke wuiɖekɛa gbe la, Aser viwo ƒe tatɔ Pagiel, si nye Okran vi, tsɔ etɔ vɛ. 
73 Nu si wònae nye klosalogba ɖeka, si da sekel alafa ɖeka blaetɔ̃, klosalogba goboe ɖeka, si da sekel blaadre ne wobui ɖe teƒe kɔkɔe la ƒe sekel nu, eye wo kple evea yɔ banaa kple wɔ memee si wotsɔ ami dzabae be woatsɔ asa nuɖuvɔ; 
74 sikakplu ɖeka, si da sekel ewo, eye dzudzɔdonu ʋeʋĩ yɔe banaa; 
75 nyitsui ɖeka, agbo ɖeka, kple alẽtsui ɖeka si xɔ ƒe ɖeka, be woatsɔ asa numevɔ; 
76 gbɔ̃tsui ɖeka be woatsɔ asa nuvɔ̃vɔ; 
77 kple nyi eve, agbo atɔ̃, gbɔ̃tsu atɔ̃, kpakple alẽtsui atɔ̃ siwo dometɔ ɖe sia ɖe xɔ ƒe ɖeka, be woatsɔ asa ŋutifafavɔ. Esiae nye Okran vi Pagiel ƒe nunana.
78 Le ŋkeke wuievea gbe la, Naftali viwo ƒe tatɔ Ahira, si nye Enan vi, tsɔ etɔ vɛ. 
79 Nu si wònae nye klosalogba ɖeka, si da sekel alafa ɖeka blaetɔ̃, klosalogba goboe ɖeka, si da sekel blaadre ne wobui ɖe teƒe kɔkɔe la ƒe sekel nu, eye wo kple evea yɔ banaa kple wɔ memee si wotsɔ ami dzabae be woatsɔ asa nuɖuvɔ; 
80 sikakplu ɖeka, si da sekel ewo, eye dzudzɔdonu ʋeʋĩ yɔe banaa; 
81 nyitsui ɖeka, agbo ɖeka, kple alẽtsui ɖeka si xɔ ƒe ɖeka, be woatsɔ asa numevɔ; 
82 gbɔ̃tsui ɖeka be woatsɔ asa nuvɔ̃vɔ; 
83 kple nyi eve, agbo atɔ̃, gbɔ̃tsu atɔ̃, kpakple alẽtsui atɔ̃ siwo dometɔ ɖe sia ɖe xɔ ƒe ɖeka, be woatsɔ asa ŋutifafavɔ. Esiae nye Enan vi Ahira ƒe nunana.
84 Esiawoe nye nunana siwo Israel-viwo ƒe tatɔwo tsɔ vɛ be woatsɔ akɔ vɔsamlekpuia ŋu le gbe si gbe wosi ami nɛ: klosalogba wuieve, klosalogba goboe wuieve, sikakplu wuieve; 
85 klosalogba ɖe sia ɖe da sekel alafa ɖeka blaetɔ̃, eye agba goboe ɖe sia ɖe da sekel blaadre; agbaawo katã da klosalo sekel akpe eve alafa ene ne wobui ɖe teƒe kɔkɔe la ƒe sekel nu; 
86 sikakplu wuieve siwo dzudzɔdonu ʋeʋĩ yɔ banaa la dometɔ ɖe sia ɖe da sekel ewo ne wobui ɖe teƒe kɔkɔe la ƒe sekel nu; kpluawo ƒe sika la katã le sekel alafa ɖeka blaeve. 
87 Lã siwo katã wona be woatsɔ asa numevɔ la le nyitsu wuieve, agbo wuieve, alẽtsui wuieve siwo dometɔ ɖe sia ɖe xɔ ƒe ɖeka hekpe ɖe wo ŋuti nuɖuvɔsawo ŋu, kple gbɔ̃tsui wuieve be woatsɔ asa nuvɔ̃vɔ. 
88 Lã siwo katã wona be woatsɔ asa ŋutifafavɔ la le nyitsu blaeve vɔ ene, agbo blaade, gbɔ̃tsu blaade, alẽtsui blaade siwo dometɔ ɖe sia ɖe xɔ ƒe ɖeka. Esiae nye nu siwo wona be woatsɔ akɔ vɔsamlekpuia ŋu esi wosi ami nɛ vɔ.
89 Ɣesiaɣi si Mose ge ɖe takpegbadɔa me be yeaƒo nu kple Mawu la, esea ame si le nu ƒom kplii la ƒe gbe le Ðaseɖiɖiɖaka la ƒe nutunu la tame; kerubi eveawo domee Mawu ƒoa nu kplii le.

Numbers 8
1 Afetɔ gblɔ na Mose be: 
2 “Gblɔ na Aron be, ‘Ne èsi akaɖigbɛawo la, ɖo akaɖigbɛ adreawo nyuie ne woaklẽ ɖe teƒe si le akaɖitia ŋgɔ.’” 
3 Eye Aron wɔe nenema: Esi akaɖigbɛ siwo le akaɖitia dzi la be woaklẽ ɖe teƒe si le akaɖitia ŋgɔ, abe ale si tututu Afetɔ de se na Mose ene. 
4 Ale si wowɔ akaɖiti lae nye esi: Sikae wotsɔ tui. Ðe wotu ati la kple eŋu seƒoƒoawo wonye nu blibo ɖeka. Ale si Afetɔ ɖee fia Mose le ŋutega me la, nenemae wowɔ akaɖiti lae.
5 Afetɔ gagblɔ na Mose be: 6 “Ðe Lewi viwo le Israel-viwo dome, eye nàkɔ wo ŋu. 
7 Ale si nàkɔ wo ŋue nye esi: Wu tsi si klɔa nu vɔ̃ ɖa la ɖe wo ŋu, eye woatsɔ talũhɛ alũ wo ŋutifuwo katã, woanya woƒe awuwo, eye woakɔ wo ɖokuiwo ŋu. 
8 Woatsɔ nyitsui ɖeka kple eŋuti nuɖuvɔsa si nye wɔ memee si wotsɔ ami dzabae la vɛ, eye nàgaxɔ nyitsui bubu si woatsɔ asa nuvɔ̃vɔe. 
9 Eye nàna Lewi viwo nava takpegbadɔa ŋgɔ, eye nàƒo Israel ƒe ha blibo la katã nu ƒu. 
10 Na Lewi viwo nava Afetɔ ŋkume, eye Israel-viwo nada asi ɖe Lewi viwo dzi. 
11 Eye Aron natsɔ Lewi viwo ana Afetɔ abe Israel-viwo ƒe vɔsa si wonyè ene, eye woasubɔ ahawɔ Afetɔ ƒe dɔ la.
12 “Azɔ Lewi viwo natsɔ woƒe asi aɖo nyitsuawo ƒe tame, eye nàtsɔ nyitsuawo dometɔ ɖeka asa nuvɔ̃vɔ, eye nàtsɔ evelia asa numevɔ na Afetɔ be woalé avu ɖe Lewi viwo ta. 
13 Eyome nàna Lewi viwo natɔ ɖe Aron kple viaŋutsuwo ŋkume, eye nàtsɔ wo ana abe vɔsa si wonyè na Afetɔ ene. 
14 Ðe Lewi viwo ɖe vovo tso Israel-viwo dome, ne Lewi viwo nazu tɔnye. 
15 Emegbe Lewi viwo nava subɔ le takpegbadɔa me. Ale nàkɔ wo ŋu, eye nàtsɔ wo ana abe vɔsa si wonyè ene. 
16 Elabena ɖe woɖe wo tso Israel-viwo dome tsɔ nam. Maxɔ wo na ɖokuinye ɖe Israel-viwo ƒe ŋgɔgbeviwo teƒe. 
17 Elabena Israel-viwo ƒe ŋgɔgbeviwo katã la, tɔnye wonye, amegbetɔwo kple lãwo siaa. Gbe si gbe mewu ŋgɔgbeviwo katã le Egipte-nyigba dzi la, gbe ma gbee mekɔ wo ŋu na ɖokuinye. 
18 Maxɔ Lewi viwo ɖe Israel-viwo ƒe ŋgɔgbeviwo katã teƒe. 
19 Maɖe Lewi viwo tso Israel-viwo dome atsɔ wo ana Aron kple viaŋutsuwo be woawɔ subɔsubɔdɔ ɖe Israel-viwo nu le takpegbadɔa me, eye woalé avu ɖe Israel-viwo ta, ale be Israel-viwo nagate ɖe kɔkɔeƒe la ŋu ne dɔvɔ̃ aɖeke naɖo wo dome o.”
20 Mose kple Aron kpakple Israel ƒe ha blibo la wɔ na Lewi viwo nenema. Ale si tututu Afetɔ de se na Mose le Lewi viwo ŋu la, nenemae Israel-viwo wɔ na woe. 
21 Ale Lewi viwo kɔ wo ɖokuiwo ŋu henya woƒe awuwo, eye Aron tsɔ wo na abe vɔsa si wonyè le Afetɔ ŋkume ene. Eye Aron lé avu ɖe wo ta tsɔ kɔ wo ŋu. 
22 Ema megbe Lewi viwo yi ɖawɔ woƒe subɔsubɔdɔ le takpegbadɔa me le Aron kple viawo ŋkume. Ale si tututu Afetɔ de se na Mose le Lewi viwo ŋu la, nenemae wowɔ na wo.
23 Eye Afetɔ gblɔ na Mose be: 
24 “Ðoɖo si li na Lewi viwoe nye esi: Ne ŋutsu aɖe xɔ tso ƒe blaeve vɔ atɔ̃ la, ekema anɔ ƒuƒoƒo si asubɔ le takpegbadɔa me la dome. 
25 Ke ne exɔ ƒe blaatɔ̃ la, ekema axɔ dzudzɔ, maganɔ ƒuƒoƒo si asubɔ la dome o. 
26 Ate ŋu akpe asi ɖe nɔvia siwo le woƒe dɔwo wɔm le takpegbadɔa me ŋu, gake mawɔ subɔsubɔdɔ aɖeke le afi ma o. Aleae nàna Lewi viwo nawɔ woƒe dɔwoe nye esi.”

Numbers 9
1 Esi Israel-viwo ʋu tso Egipte-nyigba dzi ƒe ƒe evelia ƒe ɣleti gbãtɔ me la, Afetɔ gblɔ na Mose le Sinai gbedzi be: 
2 “Israel-viwo naɖu Ŋutitotovɔsalã la le eƒe ɣeyiɣi dzi. 
3 Miɖui le eƒe ɣeyiɣi ɖoɖi la dzi, le ɣleti sia ƒe ŋkeke wuienelia dzi, le anyinutsyɔɣi. Miɖui ɖe eŋuti sewo kple ɖoɖowo katã nu.”
4 Ale Mose gblɔ na Israel-viwo be woaɖu Ŋutitotovɔsalã la. 
5 Eye woɖu Ŋutitotovɔsalã la le ɣleti gbãtɔ ƒe ŋkeke wuienelia dzi, le anyinutsyɔɣi, le Sinai gbedzi. Ale si tututu Afetɔ de se na Mose la, nenemae Israel-viwo wɔe.
6 Ke ame aɖewo ka asi ame kuku ŋu tsɔ ƒo ɖi wo ɖokuiwo, si wɔe be womete ŋu ɖu Ŋutitotovɔsalã la gbe ma gbe o. Eya ta wova Mose kple Aron gbɔ gbe ma gbe, 
7 eye wogblɔ nɛ be: “Mía ŋu mekɔ o, elabena míeka asi ame kuku ŋu. Nu ka tae nunana tsɔtsɔ vɛ na Afetɔ le ɣeyiɣi la dzi nato mía ŋu le Israel ƒe ha la dome?” 
8 Eye Mose gblɔ na wo be: “Milala, ne mase se si le Afetɔ si na mi.”
9 Afetɔ gblɔ na Mose be: 
10 “Gblɔ na Israel-viwo be, ‘Ne edzɔ be mia dometɔ aɖe alo miaƒe dzidzimevi aɖe ŋu mekɔ o le esi wòka asi ame kuku ŋu ta, alo zɔ mɔ legbe aɖe la, eya hã naɖu Ŋutitotovɔsalã la na Afetɔ. 
11 Woaɖui le ɣleti evelia ƒe ŋkeke wuienelia dzi, le anyinutsyɔɣi. Woatsɔ abolo si wotsɔ amɔwɔ maʋamaʋã mè, kple ama veve, aɖui. 
12 Woagagblẽ ɖeke ɖi ŋu nake ɖe edzi o, eye woagagbã eƒe ƒu aɖeke hã o. Woaɖui ɖe Ŋutitoto la ŋuti sewo katã nu pɛpɛpɛ. 
13 Ke ne ame aɖe ŋu kɔ alo mezɔ mɔ o, gake meɖu Ŋutitotovɔsalãa o la, ekema woatsrɔ̃ ame ma ɖa le eƒe dukɔ la dome, elabena metsɔ Afetɔ ƒe nunana la vɛ le ɣeyiɣi ɖoɖi la dzi o. Woabia nu vɔ̃ si wòwɔ la ŋuti kɔntae.
14 “‘Eye ne amedzro aɖe le mia dome la, ekema eya hã naɖu Ŋutitotovɔsalã la na Afetɔ. Wòawɔe le Ŋutitoto la ŋuti se kple ɖoɖo si le eŋu la nu. Se ɖekae anɔ eŋu na amedzrovi kple dumevi siaa.’”
15 Ke gbe si gbe wotu avɔgbadɔa la, alilikpo tsyɔ avɔgbadɔ si me Ðaseɖiɖiɖakaa le la dzi, ke le fiẽ la, alilikpoa nɔna abe dzo ene le avɔgbadɔa tame va se ɖe ŋdi. 
16 Aleae wònɔna ɖaa: Alilikpo la tsyɔa edzi le ŋkeke me, eye wòdzena le zã me abe dzo ene. 
17 Ɣesiaɣi si alilikpoa ho le agbadɔa tame la, Israel-viwo hã hona enumake, eye afi si alilikpoa va tɔ ɖo la, afi mae Israel-viwo ƒua asaɖa anyi ɖo. 
18 Ne Afetɔ be Israel-viwo naho la, wohona, eye ne Afetɔ be woaƒu asaɖa anyi la, woƒua asaɖa anyi. Ŋkeke ale si alilikpoa gale avɔgbadɔa tame la, woƒua asaɖa anyi hetsia afi ma. 
19 Ne alilikpoa kpɔtɔ le avɔgbadɔa tame ŋkeke geɖe la, Israel-viwo hã kpɔa Afetɔ sinu, eye womehona o. 
20 Ɣeaɖewoɣi la, alilikpoa nɔa avɔgbadɔa tame ŋkeke ʋɛ aɖewo ko. Ne Afetɔ be woaƒu asaɖa anyi la, woƒua asaɖa anyi hetsia afi ma, eye ne Afetɔ be woaho la, wohona. 
21 Ɣeaɖewoɣi hã alilikpoa nɔa anyi tso fiẽ va se ɖe ŋdi ko; eye ne alilikpoa ho le ŋdi la, woawo hã wohona. Eɖanye ŋkeke me loo alo zã mee alilikpoa ho o, woawo hã wohona. 
22 Eɖanye ŋkeke eve, ɣleti ɖeka alo ɣeyiɣi didi aɖee alilikpoa tɔ ɖe avɔgbadɔa tame o, Israel-viwo ƒua asaɖa anyi hetsia afi ma, eye womehona o. Ke ne eho la, ekema woawo hã wohona. 
23 Ne Afetɔ be woaƒu asaɖa anyi la, woƒua asaɖa anyi, eye ne Afetɔ be woaho la, wohona. Wowɔa nu si Afetɔ bia tso wo si la, abe ale si Afetɔ de se na Mose ene.

Numbers 10
1 Afetɔ gblɔ na Mose be: 
2 “Tsɔ klosalo tu kpẽ eve na ɖokuiwò. Woawoe nàku atsɔ aƒo ha la nu ƒu, eye woawoe nàku atsɔ ana asaɖaawo naho. 
3 Ne woku evea siaa la, ekema ha blibo la katã nava ƒo ƒu ɖe gbɔwò le takpegbadɔa nu. 
4 Ne ɖeka ko woku la, ekema Israel ƒe ame akpeawo ƒe tatɔwo nava ƒo ƒu ɖe gbɔwò.
5 “Ne mieku kpẽa eƒe ɖiɖime le tatata la, ekema ame siwo ƒu asaɖa anyi ɖe ɣedzeƒe gome la naho. 
6 Eye ne miegaku kpẽa eƒe ɖiɖime le tatata zi evelia la, ekema ame siwo ƒu asaɖa anyi ɖe anyiehe gome la naho. Ɣesiaɣi si wo dometɔ aɖe aho la, woaku kpẽa alea.
7 “Ke ne miele ha la yɔm be woava kpe ta la, miaku kpẽa, ke migana eƒe ɖiɖime nanɔ tatata o. 
8 Aron viŋutsu siwo nye nunɔlawo naku kpẽawo, eye wo kuku alea nanye ɖoɖo na mi le miaƒe dzidzimewo katã me.
9 “Ne mieho aʋa le miaƒe anyigba dzi ɖe futɔ aɖe si le fu wɔm mi ŋu la, ekema miaku kpẽawo atsɔ ayɔ amewo na aʋa, eye Afetɔ mia Mawu la atrɔ susu ɖe mia ŋu, eye wòaɖe mi tso miaƒe futɔwo si me.
10 “Miku kpẽawo le miaƒe aseyetsoɣiwo—miaƒe azãɖuɣiwo le dzinu yeyewo dzi—ne miele miaƒe numevɔwo kple ŋutifafavɔwo sam; eye esia anye ŋkuɖodzi na mi le mia Mawu ŋkume. Nyee nye Afetɔ mia Mawu.”
11 Le ƒe evelia me, le ɣleti evelia ƒe ŋkeke blaevelia dzi la, alilikpo la ho le agbadɔ si me Ðaseɖiɖiɖakaa le la tame. 
12 Eye Israel-viwo ho le Sinai gbedzi le ɖoɖo si wofia wo la nu, eye alilikpoa va tɔ ɖe Paran gbedzi. 
13 Esiae nye zi gbãtɔ si woho ɖe ɖoɖo si Afetɔ fia wo to Mose dzi la nu.
14 Ale Yuda ƒe asaɖa la ƒe to etɔ̃ ƒokpli la ƒe hatsotsowo ho gbã, eye Nahason, Aminadab vi le ameha siawo nu. 
15 Netanel, Zuar vi le Isakar-to la ƒe ameha la nu. 
16 Eye Eliab, Helon vi le Zebulon-to la ƒe ameha la nu.
17 Esi wokaka avɔgbadɔa la, Gerson viwo kple Merari viwo, ame siwo nye avɔgbadɔa tsɔlawo la ho.
18 Eyome Ruben ƒe asaɖa la ƒe to etɔ̃ ƒokpli la ƒe hatsotsowo ho, eye Elizur, Sedeur vi le ameha siawo nu. 
19 Selumiel, Zurisadai vi le Simeon-to la ƒe ameha la nu. 
20 Eye Eliyasaf, Deuel vi le Gad-to la ƒe ameha la nu.
21 Emegbe Kohat viwo, ame siwo nye nu kɔkɔeawo tsɔlawo la ho. Ele be woatu avɔgbadɔ la vɔ hafi woawo nava ɖo.
22 Eye Efrayim ƒe asaɖa la ƒe to etɔ̃ ƒokpli la ƒe hatsotsowo ho, eye Elisama, Amihud vi le ameha siawo nu. 
23 Gamaliel, Pedahzur vi le Manase-to la ƒe ameha la nu. 
24 Eye Abidan, Gideoni vi le Benyamin-to la ƒe ameha la nu.
25 Eyome Dan ƒe asaɖa la ƒe to etɔ̃ ƒokpli la ƒe hatsotsowo ho be woanye megbexeawo na asaɖawo katã, eye Ahiezer, Amisadai vi le Dan viwo ƒe ameha la nu. 
26 Pagiel, Okran vi le Aser-to la ƒe ameha la nu. 
27 Eye Ahira, Enan vi le Naftali-to la ƒe ameha la nu. 
28 Ðoɖo sia nue Israel-viwo ƒe hatsotsowo hona ɖo le woƒe mɔzɔzɔwo me.
29 Azɔ Mose gblɔ na toa Midiantɔ Reuel ƒe vi Hobab be: “Míeho yina teƒe si ŋu Afetɔ gblɔ le be, ‘Matsɔe ana mi’ la. Yi kpli mí, eye miawɔ nyui na wò, elabena Afetɔ do ŋugbe be yeawɔ nyui na Israel.” 
30 Ke eɖo eŋu nɛ be: “Nyemayi kpli mi o, ke boŋ mayi nye dukɔ kple ƒonyemeawo gbɔ.” 
31 Eye wògblɔ nɛ be: “Míeɖe kuku, mègagblẽ mí ɖi o, elabena ènya afi si míate ŋu aƒu asaɖa anyi ɖo le gbea dzi, eye àte ŋu afia mɔ mí. 
32 Ne èyi kpli mí la, ekema míawo hã míawɔ nyui na wò abe ale si Afetɔ awɔ nyui na míi la ene.”
33 Ale woho tso Afetɔ ƒe to la gbɔ hezɔ mɔ ŋkeke etɔ̃, eye wotsɔ Afetɔ ƒe nubablaɖaka la dze wo ŋgɔ hezɔ ŋkeke etɔ̃ ƒe mɔ, be wòadi gbɔɖemeƒe na wo. 
34 Ne woho la, Afetɔ ƒe alilikpo la nɔa wo tame le ŋkeke me.
35 Ne Aɖaka la ho la, Mose gblɔna be: “Oo Afetɔ, tso, ne wò futɔwo naka hlẽ, eye ame siwo lé fu wò la nasi le ŋgɔwò.” 
36 Eye ne wodroe ɖi la, egblɔna be: “Oo Afetɔ, trɔ gbɔ va Israel ƒe ame akpeakpeawo dome.”

Numbers 11
1 Ke dukɔ la de asi liʋiliʋĩlilĩ me vevie le Afetɔ ŋkume. Esi Afetɔ see la, eƒe dɔmedzoe bi ɖe wo ŋu, eye dzo tso Afetɔ gbɔ va fiã wo dometɔ aɖewo le asaɖa la ƒe mlɔenu. 
2 Esi dukɔ la de asi ɣlidodo me na Mose la, eƒo koko na Afetɔ, eye dzo la tsi. 
3 Ale wona ŋkɔ teƒe la be Tabera, elabena afi mae dzo tso Afetɔ gbɔ va fiã amewo le.
4 Eye ɖokuitɔdidi ƒe dzodzro ho ɖe ame vovovowo ƒe ha si le wo dome la me, eye Israel-viwo hã gade asi avifafa me be: “Ame ka gɔ̃e ana lã mí míaɖu? 
5 Aleke míeheɖo ŋku tɔmelã siwo míeɖuna le Egipte femaxee kpakple aŋanyi, adzamatre, sabala vovovowo kple gbegãdzi dzii ale! 
6 Ke azɔ nu te mía ŋu belibeli. Míele naneke kpɔm le afi sia tsɔ wu mana sia ko o.”
7 Ke mana la le abe korianda ku ene, eye wòfu abe bedolak-ti me tsi ene. 
8 Dukɔ la doa go yina ɖafɔnɛ; wotunɛ le té dzi alo tonɛ le to me, woɖanɛ le ze me alo tsɔnɛ ƒoa abolo nogoe; evivina abe tatali ene. 
9 Ne zãmu dza ɖe asaɖa la me le zã me la, mana la hã dzana.
10 Ke Mose se ale si dukɔ la le avi famee, ƒome ɖe sia ɖe le efam le eƒe agbadɔ nu. Ale Afetɔ do dɔmedzoe vevie, eye nya la ve dɔme na Mose hã ŋutɔ. 
11 Eye Mose gblɔ na Afetɔ be: “Nu ka tae nèdo nuxaxa na wò subɔla? Nu ka tae mève nunye o, ale be nètsɔ dukɔ blibo sia katã ƒe agba dro ɖe dzinye? 
12 Alo nyee fɔ dukɔ sia ƒe fua? Nyee dzi wo hafi nèle gbɔgblɔm nam be: ‘Kɔ wo ɖe wò akɔnu, abe ale si vidzikpɔla kɔa vi nono ene,’ yi anyigba si ŋu nèka atam ɖo na wo tɔgbuiwo la dzia? 
13 Afi kae makpɔ lã le ana dukɔ blibo sia katã? Elabena wole avi fam nam be: ‘Na lã mí míaɖu!’ 
14 Nye ɖeka nyemate ŋu atsɔ dukɔ blibo sia ƒe nyawo o; ewu tsɔtsɔ nam. 
15 Ne aleae nèle nu wɔ ge ɖe ŋunyee la, ekema meɖe kuku, wum fifia. Ne ève nunye la, ke mègana makpɔ dzivedonamenu siawo teƒe azɔ o.”
16 Afetɔ gblɔ na Mose be: “Ƒo Israel ƒe ametsitsi blaadre nu ƒu nam, ŋutsu siwo nènya be wonye dukɔ la ƒe ametsitsiwo kple ŋgɔnɔlawo, eye nàkplɔ wo ayi takpegbadɔa gbɔ, ne wò kpli wo miatɔ ɖe afi ma. 
17 Maɖi ava ƒo nu kpli wò le afi ma; eye maɖe gbɔgbɔ si le dziwò la ƒe ɖe ada ɖe wo dzi, ne woatsɔ dukɔ la ƒe agba akpe wò, ale be agba la naganɔ wò ɖeka ko dzi o. 
18 Gblɔ na dukɔ la be, ‘Mikɔ mia ɖokuiwo ŋu hena etsɔ, elabena miele lã ɖu ge, elabena miefa avi ɖe to me na Afetɔ be: “Ame ka ana lã mí míaɖu? Eme nyo na mí wu le Egipte.” Afetɔ ana lã mi miaɖu agaɖui. 
19 Miaɖui, menye ŋkeke ɖeka alo ŋkeke eve alo ŋkeke atɔ̃ alo ŋkeke ewo alo ŋkeke blaeve o, 
20 ke boŋ ɣleti blibo ɖeka sɔŋ, va se ɖe esime wòado to ŋɔti me na mi, eye wòanyɔ ŋu na mi, elabena miegbe Afetɔ, ame si le mia dome la, eye miefa avi le eŋkume be: “Nu ka ta koŋ míedzo le Egipte ɖo?”’”
21 Eye Mose gblɔ be: “Dukɔ si dome mele la me tɔwo le ŋutsu afɔzɔla akpe alafa ade, eye wòa nèbe: ‘Mana lã wo woaɖu wòasu wo ɣleti blibo ɖeka sɔŋ’! 
22 Alẽ kple nyi nenie woawu na wo wòade wo nu? Alo ƒumelãwo katãe woaɖe na wo be wòade wo nua?”
23 Eye Afetɔ gblɔ na Mose be: “Ðe Afetɔ ƒe asi to ɖe emea? Azɔ àkpɔe ne nya si gblɔm mele la ava eme na wò loo alo mava eme o.”
24 Eya ta Mose do go yi ɖagblɔ Afetɔ ƒe nyawo na dukɔ la. Eye wòƒo dukɔ la ƒe ametsitsi blaadre nu ƒu hena wova tsi tre ƒo xlã takpegbadɔ la. 
25 Eye Afetɔ ɖi va le alilikpo me heƒo nu kplii, eye wòɖe gbɔgbɔ si le edzi la ƒe ɖe da ɖe ametsitsi blaadreawo dometɔ ɖe sia ɖe dzi. Eye wòva eme be, esi gbɔgbɔ la va wo dzi ko la, enumake wode asi nuwɔwɔ me abe nyagblɔɖilawo ene, gake womegawɔ nu nenema emegbe o.
26 Ke ŋutsuawo dometɔ eve tsi asaɖa la me. Woƒe ŋkɔwoe nye Eldad kple Medad. Eye gbɔgbɔ la va woawo hã dzi, elabena wole ame siwo ŋkɔ woŋlɔ la dome, ke womedo go yi takpegbadɔ la gbɔ o. Ale wote nuwɔwɔ abe nyagblɔɖilawo ene le asaɖa la me. 
27 Ke ɖekakpui aɖe ƒu du yi ɖaka eta na Mose be: “Eldad kple Medad le nu wɔm abe nyagblɔɖilawo ene le asaɖa la me!” 
28 Eye Yosua, Nun vi si nye Mose ƒe subɔvi tso eƒe ɖekakpuime ke la gblɔ be: “Nye aƒetɔ Mose, gbee na wo!” 
29 Ke Mose gblɔ nɛ be: “Ŋu ʋãm nèle ɖe nunyea? Ao, ɖe madi be Afetɔ nakɔ eƒe gbɔgbɔ la ɖe Afetɔ ƒe dukɔ la me tɔwo katã dzi ne woanye nyagblɔɖilawo hafi!” 
30 Emegbe Mose kple Israel ƒe ametsitsiawo gbugbɔ yi asaɖa la me.
31 Azɔ Afetɔ na ya sesẽ aɖe ƒo hekplɔ tegliwo tso ƒu gome va kɔ ɖe asaɖa la ŋu godoo va kpe, abe ŋkeke ɖeka ƒe mɔzɔzɔ le akpa si, kple ŋkeke ɖeka ƒe mɔzɔzɔ le akpa kemɛ ene, eye woli kɔ ɖi anɔ abɔklugui eve tso anyigba. 
32 Ale dukɔ la tso hefɔ tegliawo ŋkeke blibo ma kple zã blibo ma kpakple ŋkeke si kplɔe ɖo la katã. Ame aɖeke mefɔe wònɔ ʋɛ wu homer ewo o, eye wosia wo ɖe afi sia afi ƒo xlã asaɖa la godoo va kpe. 
33 Ke lã la kpɔtɔ le aɖutɛ me na wo, eye womeɖui vɔ hafi Afetɔ ƒe dziku fla ɖe dukɔ la ŋu o, eye Afetɔ na amewo ku le dukɔ la dome eteƒe mekɔ o.
34 Ale wona ŋkɔ teƒe la be Kibrot-Hataava, elabena afi mae woɖi ame siwo dzro nu ɖokuitɔdiditɔe ɖo. 
35 Emegbe dukɔ la ho tso Kibrot-Hataava ɖo ta Hazerot, eye wotsi Hazerot.

Numbers 12
1 Ke Miriam kple Aron de asi nuƒoƒo me le Mose ŋu le Kus nyɔnu si wòɖe la ta. 
2 Eye wogblɔ be: “Mose ɖeɖe dzi koe Afetɔ ƒoa nu toea? Alo ɖe meƒoa nu toa míawo hã dzi oa?” Afetɔ nɔ nya siawo sem. 
3 Ke Mose nye ame si fa wu ame siwo katã le anyigba dzi.
4 Enumake Afetɔ gblɔ na Mose, Aron kple Miriam be: “Mi ame etɔ̃a mido go miayi takpegbadɔ la nu.” Eye wo ame etɔ̃a woyi. 
5 Eye Afetɔ ɖi va le alilikpo dodo me, eye wòtɔ ɖe takpegbadɔa nu yɔ Aron kple Miriam. Eye wo ame evea wote yi ŋgɔ. 
6 Eye wògblɔ be: “Meɖe kuku, mise nye nyawo. Ne ame aɖe nye Afetɔ ƒe nyagblɔɖila le mia dome la, ŋutega mee meɖea ɖokuinye fianɛ le, eye drɔ̃e mee meƒoa nu kplii le. 
7 Ke menye aleae mewɔna na nye subɔla Mose ya o! Metsɔ nye aƒe blibo la de esi. 
8 Meƒoa nu kplii ŋkume kple ŋkume eme kɔna eye nyemetoa adzo nɛ o; ekpɔa Afetɔ ƒe nɔnɔme. Ekema nu ka ta mievɔ̃ o, eye mieƒo nu le nye subɔla Mose ŋu?”
9 Ale Afetɔ do dɔmedzoe ɖe wo ŋu eye wòtrɔ dzo le wo gbɔ. 
10 Eye alilikpo la ho tso agbadɔ la tame, eye kpɔ ɖa, anyidɔ ƒo ɖe Miriam ŋu eye eŋuti katã fu kpii abe sno ene! Esi Aron trɔ ɖe Miriam ŋu la, kpɔ ɖa, anyidɔ ƒo ɖe eŋu. 
11 Enumake Aron gblɔ na Mose be: “Taflatsɛ, nye aƒetɔ! Meɖe kuku, mègabu nu vɔ̃ sia na mí o. Míewɔ bometsinu. 
12 Meɖe kuku, mègana wòanɔ abe ame si ku ene, abe ame si ƒe ŋutilã ƒe akpa aɖe nyi hafi do tso dadaa ƒe dɔ me ene o!” 
13 Eye Mose ƒo koko na Afetɔ be: “Oo Mawu, meɖe kuku, da gbe le eŋu dzro! Meɖe kuku!”
14 Afetɔ gblɔ na Mose be: “Ne ɖe fofoa ɖe ta ɖe mo nɛ la, ɖe manye ŋukpe nɛ ŋkeke adre oa? Eya ta na woaɖee ɖe aga wòanɔ asaɖa la godo ŋkeke adre, eye emegbe woagaxɔe.” 
15 Ale woɖe Miriam ɖe aga yi asaɖa la godo ŋkeke adre, eye dukɔ la meho o, va se ɖe esime wogaxɔ Miriam hafi. 
16 Emegbe dukɔ la ho tso Hazerot, eye wova ƒu asaɖa anyi ɖe Paran gbedzi.

Numbers 13
1 Afetɔ gblɔ na Mose be: 
2 “Dɔ ŋutsuwo ɖa ne woayi aɖatsa ŋku le Kanaan-nyigba si metsɔ le Israel-viwo na ge la dzi. Dɔ ŋutsu ɖeka tso woƒe toawo dometɔ ɖe sia ɖe me, eye wo katã nanye tatɔwo.”
3 Ale Mose dɔ wo ɖa tso Paran gbedzi, abe ale si Afetɔ de see ene. Ŋutsuawo katã nye Israel-viwo ƒe tatɔwo. 
4 Woƒe ŋkɔwoe nye esi: Samua, Zakur vi, tso Ruben-to la me; 
5 Safat, Hori vi, tso Simeon-to la me; 
6 Kaleb, Yefune vi, tso Yuda-to la me; 
7 Yigal, Yosef vi, tso Isakar-to la me; 
8 Hosea, Nun vi, tso Efrayim-to la me; 
9 Palti, Rafu vi, tso Benyamin-to la me; 
10 Gadiel, Sodi vi, tso Zebulon-to la me; 
11 Gadi, Susi vi ye tso Yosef-to la me na Manase-to la; 
12 Amiel, Gemali vi, tso Dan-to la me; 
13 Setur, Mikael vi, tso Aser-to la me; 14 Nahbi, Wofsi vi, tso Naftali-to la me; 
15 Geuel, Maki vi, tso Gad-to la me. 
16 Ame siwo Mose dɔ ɖa be woayi aɖatsa ŋku le anyigba la dzi la ƒe ŋkɔwoe nye esiawo. Eye Mose tsɔ ŋkɔ na Hosea, Nun vi be Yosua.
17 Esi Mose dɔ wo be woaɖatsa ŋku le Kanaan-nyigbaa dzi la, egblɔ na wo be: “Mitso afi sia miayi Negeb kple tonuto la me. 
18 Milé ŋku ɖe ale si anyigba la le ŋu, ne miakpɔe ɖa be ame siwo le edzi la nye ame sesẽwo loo alo ame beliwo, be wosɔ gbɔ loo alo womesɔ gbɔ o hã, 
19 eye miakpɔe ɖa be anyigba la nyo loo alo menyo o, be agbadɔwo me ameawo le loo alo du sesẽwo mee wole hã. 
20 Azɔ hã, mikpɔe ɖa be anyigba la wɔa nu loo alo mewɔa nu o, be atiwo le edzi loo alo womeli o. Milé dzi ɖe ƒo, ne miatsɔ anyigba la dzi kutsetse aɖewo avɛ.” Ɣemaɣie waintsetse gbãtɔwo tea ɖiɖi.
21 Eya ta woyi ɖatsa ŋku le anyigba la dzi tso Zin gbedzi yi Rehob va ɖo Lebo-Hamat. 
22 Esi woyi Negeb la, wova Hebron, afi si Ahiman, Sesai kple Talmai vi siwo dzɔ tso Anak me la le. Wotso Hebron dua ƒe adre megbe hafi wova tso Zoan si le Egipte. 
23 Esi wova ɖo Eskol Bali la me la, wotso waintsetse kpo ɖeka le afi ma, eye ame evee ƒo ati ɖe eme hafi te ŋu tsɔe ɖe abɔta; wogbe yevuboɖawo kple gbotsetsewo hã. 
24 Woyɔ teƒe ma be Eskol Bali, le wainkpo si Israel-viwo tso le afi ma la ta.
25 Wotrɔ gbɔ le ŋkeke blaene megbe esi wotsa ŋku le anyigba la dzi vɔ. 
26 Wotrɔ va Mose kple Aron kpakple Israel ƒe ha blibo la gbɔ le Paran gbedzi, le Kades. Eye wotsɔ dɔgbedenyawo vɛ na wo kple ha blibo la katã hetsɔ anyigba la dzi kutsetsewo fia wo. 
27 Eye wogblɔ na Mose be: “Míede anyigba si dzi nèdɔ mí ɖo la dzi, eye notsi kple anyitsi le sisim le edzi vavã, eye edzi kutsetsewo hãe nye esi. 
28 Gake nya lae nye be, anyigba la dzi tɔwo nye ame sesẽwo, eye woƒe duawo sesẽ helolo ŋutɔ. Míekpɔ ame siwo dzɔ tso Anak me hã le afi ma. 
29 Amalektɔwo le Negeb-nyigba dzi, Hititɔwo kple Yebusitɔwo kpakple Amoritɔwo le tonuto la me, eye Kanaantɔwo le atsiaƒu la nu kple Yordan ƒe go ŋu.”
30 Eye Kaleb dze agbagba be yeatsi nya ɖe ameawo nu le Mose ŋkume hegblɔ be: “Mina míayi enumake, ne míaxɔe wòazu mía tɔ, elabena míate ŋu axɔe godoo.” 
31 Ke ŋutsu siwo yi kplii la gblɔ be: “Míate ŋu aho ɖe dukɔ la ŋu o, elabena wosesẽ wu mí.” 
32 Eye woyi edzi nɔ dziɖeleameƒonyawo gblɔm na Israel-viwo tso anyigba si dzi woyi ɖatsa ŋku le la ŋu be: “Anyigba si dzi míede ɖatsa ŋku le la nye anyigba si le edzinɔlawo mim; eye ame siwo katã míekpɔ le afi ma la dzɔ atsu ale gbegbe. 
33 Míekpɔ Nefilim, siwo nye Anak viwo, ame siwo dzɔ tso Nefilimwo me la hã le afi ma, ale be ɖeko míekpɔ mía ɖokuiwo abe ʋetsuviwo ene, eye nenemae woawo hã wokpɔ míi.”

Numbers 14
1 Eye ha blibo la katã wó avi, eye dukɔ la fa avi zã blibo ma katã. 
2 Israel-viwo katã lĩ Mose kple Aron ŋu, eye ha blibo la gblɔ be: “Ne ɖe míeku le Egipte-nyigba dzi, alo ɖe míeku le gbe sia dzi la, ne enyo wu! 
3 Nu ka tae Afetɔ kplɔ mí yina anyigba sia dzi be míatsi yi nu? Mía srɔ̃wo kple mía viwo azu nu woaha. Ðe manyo na mí wu be míagbugbɔ ayi Egipte oa?” 
4 Wogblɔ na wo nɔewo gɔ̃ hã be: “Mina míatia kplɔla bubu, ne míagbugbɔ ayi Egipte!”
5 Ale Mose kple Aron tsyɔ mo anyi ɖe Israel ƒe ha si ƒo ƒu ɖe afi ma la katã ŋkume. 
6 Eye Yosua, Nun vi kple Kaleb, Yefune vi siwo hã yi ɖatsa ŋku le anyigbaa dzi la, dze woƒe awuwo 
7 hegblɔ na Israel ƒe ha blibo la be: “Anyigba si dzi míede ɖatsa ŋku le la, anyigba nyui aɖe ŋutɔe wònye. 
8 Ne míaƒe nu dze Afetɔ ŋu la, ekema akplɔ mí ayi anyigba sia si dzi notsi kple anyitsi le sisim le la dzi godoo ahatsɔe ana mí. 
9 Gake migadze aglã ɖe Afetɔ ŋu o, eye migavɔ̃ anyigba la dzi tɔwo o, elabena womede na mí o. Takpɔnu meli na wo o, ke Afetɔ li kpli míawo ya. Migavɔ̃ wo o.”
10 Ke ha blibo la di be yewoaƒu kpe wo. Eye Afetɔ ƒe ŋutikɔkɔe dze le takpegbadɔ la tame Israel-viwo katã kpɔ kple ŋku.
11 Eye Afetɔ gblɔ na Mose be: “Va se ɖe ɣekaɣie dukɔ sia agbe bubudede ŋunye? Eye va se ɖe ɣekaɣie woagbe dzinye xɔxɔ se le dzesi siwo katã mewɔ le wo dome la megbe? 
12 Na makplɔ dɔvɔ̃ aƒu wo ne woatsrɔ̃ ɖa, ne mawɔ wò nàzu dukɔ si lolo wu hekpɔ ŋusẽ wu wo.”
13 Ke Mose gblɔ na Afetɔ be: “Ekema Egiptetɔ siwo dome nètsɔ wò ŋusẽ kplɔ dukɔ sia dzoe le la asee godoo, 
14 eye woagblɔe na anyigba sia dzi nɔlawo. Wosee hã be wò Afetɔ ŋutɔe le dukɔ sia dome, eye nèɖe ɖokuiwò fia wokpɔ. Wòe nye Afetɔ, wò alilikpo nɔa wo tame, eye nèdzea wo ŋgɔ le alilikpo dodo me le ŋkeke me kple dzobibi me le zã me. 
15 Ne ètsrɔ̃ dukɔ blibo sia zi ɖeka la, ekema dukɔ siwo se wò ŋkɔxɔxɔ ŋu nya la agblɔ be, 
16 ‘Esi Afetɔ mete ŋu kplɔ dukɔ sia yi anyigba si ŋu wòka atam ɖo na wo dzi o tae wòwu wo le gbea dzi ɖo.’ 
17 Azɔ Oo Afetɔ, meɖe kuku, ɖe wò ŋusẽ gã la fia, abe ale si tututu nègblɔe ene be, 
18 ‘Afetɔ, ame si medoa dziku kabakaba o, eye eƒe lɔlɔ̃ nu metsina o, ame si tsɔa vodada kple dzidada kena, ke megbea tohehe gbeɖe o, ame si hea fofowo ƒe vodada ŋuti tohehe vaa viwo dzi, vaa dzidzime etɔ̃lia kple dzidzime enelia dzi.’ 
19 Tsɔ dukɔ sia ƒe vodada la ke dzro le wò lɔlɔ̃ gã si nu metsina o la ta, abe ale si ko nètsɔe ke dukɔ sia tso Egipte va se ɖe fifia ene.”
20 Eye Afetɔ gblɔ be: “Enyo, metsɔe ke wo, abe ale si nègblɔe ene. 
21 Gake zi ale si mele agbe la, nye Afetɔ, nye ŋutikɔkɔe ayɔ anyigba blibo la katã dzi taŋ. 
22 Ke hã, ŋutsu siwo katã kpɔ nye ŋutikɔkɔe kple nye dzesi siwo mewɔ le Egipte kple gbea dzi, gake woyi edzi dom kpɔ zi gbɔ zi ewo sia, eye womeɖo to nye gbe o la, 
23 makpɔ anyigba si ŋu meka atam ɖo na wo fofowo la akpɔ o. Ɛ̃, ame siwo katã gbe bubudede ŋunye la makpɔe o. 
24 Ke makplɔ nye subɔla Kaleb ya ayi anyigba si dzi wòde la dzi godoo, eye eƒe dzidzimeviwo axɔe wòazu wo tɔ, elabena gbɔgbɔ bubue le eya me, eye wòyi edzi dze yonyeme kple dzi blibo. 
25 Esi Amalektɔwo kple Kanaantɔwo le balia me ta la, etsɔ la, miho miatrɔ ato mɔ si ɖo ta Ƒudzĩ la gbɔ ayi gbea dzi.”
26 Afetɔ gagblɔ na Mose kple Aron be: 
27 “Va se ɖe ɣekaɣi gɔ̃e ha vɔ̃ɖi sia anɔ liʋiliʋĩ lĩm le ŋunye? Mese Israel-viwo ƒe liʋiliʋĩ siwo lĩm wole le ŋunye la. 
28 Gblɔ na wo be, ‘“Zi ale si mele agbe la,” Afetɔ ye gblɔe, “ne nyemawɔ mi abe ale si tututu miegblɔ ɖe nye to me ene o fĩ! 
29 Miaƒe kukuawo atsi gbe sia dzi, ɛ̃, mia dometɔ siwo katã xɔ ƒe blaeve kple edzivɔ, siwo ŋkɔ woŋlɔ la katã, mi ame siwo lĩ liʋiliʋĩ le ŋunye la, miatsi gbe sia dzi. 
30 Mia dometɔ aɖeke made anyigba si dzi meka atam be mianɔ la dzi o, negbe Kaleb, Yefune vi kple Yosua, Nun vi ko.
31 “‘“Makplɔ mia vi siwo miebe woazu nu woaha la ayi, eye woawoe akpɔ anyigba si miawo miegbe la. 
32 Ke miawo ya miaƒe kukuawo atsi gbe sia dzi. 
33 Mia viwo azu alẽkplɔlawo le gbea dzi ƒe blaene, eye woakpe fu ɖe miaƒe nuteƒemawɔmawɔ ta, va se ɖe esime mieku vɔ le gbea dzi. 
34 Ŋkeke blaene, siwo mietsɔ yi ɖatsa ŋku le anyigbaa dzi la nue miakpɔ miaƒe vodadawo me tsonu ɖo ƒe blaene, ŋkeke ɖeka ɖe sia ɖe nanye ƒe ɖeka, ne mianya nu si aglãdzedze ɖe ŋunye fia.
35 “‘“Nye, Afetɔ, ye gblɔe. Ne menye aleae mawɔ ha vɔ̃ɖi sia, si tso ɖe ŋunye o fĩ: Wo nu ayi le gbe sia dzi, eye afi siae woaku ɖo. 
36 Eye ŋutsu siwo Mose dɔ ɖa be woaɖatsa ŋku le anyigba la dzi, siwo na ha blibo la katã lĩ liʋiliʋĩ le eŋu esi wova gblɔ dziɖeleameƒonyawo tso anyigbaa ŋu la, 
37 wo ame siwo he du vɔ̃ vɛ tso anyigbaa dzi la, woaƒo wo aƒu anyi woaku le Afetɔ ŋkume. 
38 Ke Yosua, Nun vi kple Kaleb, Yefune vi koe atsi agbe le ame siwo yi ɖatsa ŋku le anyigbaa dzi la dome.”’”
39 Esi Mose gblɔ nya siawo na Israel-viwo katã la, dukɔ la de asi konyifafa me vevie. 
40 Ke wofɔ ŋdi kanya heɖoe be yewoalia ayi to la tame, eye wogblɔ be: “Míewɔ nu vɔ̃, ke hã míele klalo be míayi teƒe si ŋu Afetɔ ƒo nu le na mí la.” 
41 Gake Mose gblɔ na wo be: “Nu ka tae miele Afetɔ ƒe se la dzi dam? Madze edzi o. 
42 Migayi o, elabena Afetɔ mele mia dome o, ne miaƒe futɔwo nagasi mi o. 
43 Elabena Amalektɔwo kple Kanaantɔwo le afi ma be yewoakpe kpli mi, eye miatsi yi nu. Esi mietrɔ le Afetɔ yome ta la, Afetɔ manɔ kpli mi o.”
44 Ke wotri to helia toa, gake Afetɔ ƒe nubablaɖaka la kple Mose ya tsi asaɖa la me. 
45 Eye Amalektɔwo kple Kanaantɔ siwo le toa dzi la ɖi va hesi wo, eye wonya wo ɖe nu va se ɖe Horma ke.

Numbers 15
1 Afetɔ gagblɔ na Mose be: 
2 “Gblɔ na Israel-viwo be, ‘Ne mieva ɖo anyigba si metsɔ le mia na ge be mianɔ edzi la dzi mlɔeba, 
3 eye miebe yewoatsɔ nyi alo alẽ asa dzovɔ na Afetɔ, eɖanye numevɔ alo adzɔgbeɖeɖe tɔxɛ ƒe vɔsa alo lɔlɔ̃nu faa nunana loo alo miaƒe ŋkekenyuiwo dzie míebe yewoasa vɔ be wòanye ʋeʋẽ lilili na Afetɔ o, 
4 ekema ame si na nua la natsɔ wɔ memee efa me mama ɖe ewo ƒe akpa ɖeka si wotsɔ ami hin me mama ɖe ene ƒe akpa ɖeka dzabae la hã avɛ na Afetɔ ne woatsɔ asa nuɖuvɔ. 
5 Eye nàtsɔ wain hin me mama ɖe ene ƒe akpa ɖeka asa nunovɔ akpe ɖe numevɔ la ŋu, alo nàtsɔe akpe ɖe alẽtsui ɖe sia ɖe si nàtsɔ asa vɔe la ŋu. 
6 Alo ne agboe la, ekema nàtsɔ wɔ memee efa me mama ɖe ewo ƒe akpa eve, si wotsɔ ami hin me mama ɖe etɔ̃ ƒe akpa ɖeka dzabae la, asa nuɖuvɔ akpe ɖe eŋu. 
7 Eye nàtsɔ wain hin me mama ɖe etɔ̃ ƒe akpa ɖeka avɛ wòanye nunovɔsa, be wòanye ʋeʋẽ lilili na Afetɔ.
8 “‘Ke ne ètsɔ nyitsu vɛ be woatsɔ asa numevɔ alo adzɔgbeɖeɖe tɔxɛ ƒe vɔ alo ŋutifafavɔ na Afetɔ la, 
9 ekema nàtsɔ wɔ memee efa me mama ɖe ewo ƒe akpa etɔ̃, si wotsɔ ami hin afã dzabae la, asa nuɖuvɔ akpe ɖe nyitsu la ŋu. 
10 Eye nàtsɔ wain hin afã avɛ be woatsɔ asa nunovɔ be wòanye dzovɔsa si aʋẽ lilili na Afetɔ. 
11 Aleae woatsɔe akpe ɖe nyitsu alo agbo alo alẽtsui alo gbɔ̃ ɖe sia ɖe ŋui. 
12 Lã agbɔsɔsɔme ka kee nàtsɔ ana o, aleae nàwɔ wo dometɔ ɖe sia ɖe le woƒe xexlẽme nu. 
13 Aleae Israel vidzidzi ɖe sia ɖe si di be yeasa dzovɔ be wòanye ʋeʋẽ lilili na Afetɔ la, awɔ.
14 “‘Ne amedzrovi aɖe le mia dome alo ame aɖe ʋu va tsi mia gbɔ tso mia tɔgbuiwo ŋɔli, eye wòdi be yeasa dzovɔ be wòanye ʋeʋẽ lilili na Afetɔ la, ekema eya hã nawɔe abe ale si tututu miewɔnɛ ene. 
15 Se ɖekae akplɔ mi kple amedzroviwo siaa. Se mavɔ wòanye le miaƒe dzidzimewo katã me. Mia kple amedzrovi miesɔ le Afetɔ ŋkume. 
16 Se ɖeka kple ʋɔnudrɔ̃ɖoɖo ɖekae anɔ eŋu na mia kple amedzrovi siwo le mia dome la siaa.’”
17 Afetɔ gagblɔ na Mose be: 
18 “Gblɔ na Israel-viwo be, ‘Ne mieɖo anyigba si dzi mekplɔ mi yinɛ la dzi, 
19 eye anyigba la na abolo mi mieɖu la, ekema miadzɔ nu na Afetɔ. 
20 Mitu miaƒe agblemenuku gbãtɔwo ƒe ɖe miatsɔ aƒo abolo kotoewo ne miava dzɔ. Miadzɔe abe ale si mietsɔa nu tso miaƒe nukuƒoƒe va dzɔnae ene. 
21 Mitu miaƒe nuku gbãtɔwo ƒe ɖe miava dzɔ na Afetɔ, miawɔ esia le miaƒe dzidzimewo katã me.
22 “‘Ke ne edzɔ be mieɖe ŋu ɖi eye miewɔ se siawo, siwo katã Afetɔ tsɔ na Mose la dzi o, 
23 ɛ̃, ne miewɔ se siwo katã Afetɔ de na mi to Mose dzi tso gbe si gbe Afetɔ de asi se siwo akplɔ mi le miaƒe dzidzimewo katã me la dede na mi la dzi o, 
24 eye ha la ɖe ŋu ɖi da vo la, ekema ha blibo la natsɔ nyitsui ɖeka asa numevɔ be wòanye ʋeʋẽ lilili na Afetɔ, eye woatsɔ nuɖuvɔsa kple nunovɔsa akpe ɖe eŋu le ɖoɖo si nu wowɔnɛ ɖo la nu, eye woana gbɔ̃tsui ɖeka be woatsɔ asa nuvɔ̃vɔ. 
25 Nunɔla la nalé avu ɖe Israel ƒe ha blibo la katã ta eye woatsɔe ake wo, elabena ɖe woɖe ŋu ɖi, eya ta wona nu be woatsɔ asa dzovɔ na Afetɔ, eye wosa nuvɔ̃vɔ le Afetɔ ŋkume ɖe woƒe vodada la ta. 
26 Woatsɔe ake Israel ƒe ha blibo la katã kple amedzrovi siwo le wo dome la, elabena ɖe wo katã woɖe ŋu ɖi.
27 “‘Eye ne ame aɖe ɖe ŋu ɖi wɔ nu vɔ̃ la, ekema netsɔ gbɔ̃nɔ si xɔ ƒe ɖeka vɛ be woatsɔ asa nuvɔ̃vɔ. 
28 Nunɔla la nalé avu ɖe ame si ɖe ŋu ɖi wɔ nu vɔ̃ le Afetɔ ŋkume la ta. Nelé avu ɖe eta, eye woatsɔe akee. 
29 Se ɖekae anɔ mia si na Israel vidzidziwo kple amedzrovi siwo le mia dome, le nu vɔ̃ si woɖe ŋu ɖi wɔ la ŋuti.
30 “‘Ke ne ame aɖe ɖoe koŋ da vo, eɖanye dumevi alo amedzrovi o, edo vlo Afetɔ, eya ta ele be woatsrɔ̃e ɖa le dukɔ la dome. 
31 Afetɔ ƒe nyae wòdo vloe, eye eƒe se dzie wòda, eya ta woaɖe ame ma ɖa godoo. Eƒe fɔɖiɖi anɔ eya ŋutɔ ƒe ta dzi.’”
32 Esi Israel-viwo le gbea dzi la, wokpɔ ŋutsu aɖe gbe ɖeka wòle nake fɔm le Sabat ŋkeke dzi. 
33 Ame siwo kpɔe wòle nakea fɔm la kplɔe va Mose kple Aron kpakple ha blibo la ŋkume. 
34 Wosikae ɖi, elabena womegblɔ nu si tututu woawɔe la o.
35 Eye Afetɔ gblɔ na Mose be: “Ele be woawu ŋutsu la; ha blibo la naƒu kpee le asaɖa la godo.” 
36 Eya ta ha blibo la kplɔe yi asaɖa la godo, eye woƒu kpee wòku, abe ale si tututu Afetɔ de se na Mose ene.
37 Afetɔ gagblɔ na Mose be: 
38 “Gblɔ na Israel-viwo be, woawo ŋutɔ kple dzidzime siwo katã ava ɖe wo yome la nade gbo woƒe awuwo to eye woalɔ̃ ka blɔtɔ ato gboawo tame. 
39 ‘Gbo siawo nanɔ miaƒe awuwo ŋu, ne miakpɔe ahaɖo ŋku Afetɔ ƒe sededewo katã dzi awɔ wo dzi. Migana miaƒe dzi kple miaƒe ŋku nakplɔ mi ade gbɔgbɔmehasiwɔwɔ me o. 
40 Esia ana miaɖo ŋku nye sededewo katã dzi awɔ wo dzi, be mianɔ kɔkɔe na mia Mawu la. 
41 Nyee nye Afetɔ mia Mawu, ame si kplɔ mi tso Egipte-nyigba dzi, be manye miaƒe Mawu. Nyee nye Afetɔ mia Mawu.’”

Numbers 16
1 Eye Kora, si nye Yizhar vi, Kohat vi, Lewi vi hekpe ɖe Eliab vi siwo nye Datan kple Abiram, kpakple Pelet vi On ŋu—ame etɔ̃ siawo tso Ruben ƒomea me—wo katã wowɔ ɖeka. 
2 Eye wotso ɖe Mose ŋu, woawo kple ŋutsu alafa eve blaatɔ̃ siwo nye Israel-viwo ƒe tatɔwo, ame ŋkutawo, kple ame xɔŋkɔwo le ameha la dome. 
3 Eye wova ƒo ƒu ɖe Mose kple Aron ŋu gblɔ na wo be: “Mia tɔ va glo! Ha blibo la katã le kɔkɔe, eye Afetɔ le wo dome tso. Nu ka tae miedo mia ɖokui ɖe dzi le Afetɔ ƒe ha la dome ale?”
4 Esi Mose see la, enumake etsyɔ mo anyi. 
5 Eye wògblɔ na Kora kple edzidelawo katã be: “Etsɔ ŋdi la, Afetɔ ana woanya ame si nye etɔ, ame si le kɔkɔe, kple ame si ate ɖe eŋu, eye ame si wòatia la, eyae ate ɖe eŋu. 
6 Kora, wò kple ha blibo si le ŋuwò la, ale miawɔe nye esi: mitsɔ dzudzɔdosonuwo 
7 miaɖe dzo ɖe wo me, eye miakɔ dzudzɔdonu ʋeʋĩ ɖe wo dzi ava Afetɔ ŋkume etsɔ, eye ame si Afetɔ atia la, eyae nye ame si le kɔkɔe. Mi Lewi viwo, mia tɔ va glo!”
8 Mose gagblɔ na Kora be: “Mi Lewi viwo, meɖe kuku, misee. 
9 Nu tsɛ wònye le mia ŋkume be, Israel ƒe Mawu la ɖe mi ɖe vovo tso Israel ƒe ha la dome be miate ɖe ye ŋu awɔ Afetɔ ƒe avɔgbadɔ la me dɔwo, mianɔ ha la ŋgɔ asubɔ wo, 
10 eye be wòna wò kple nɔviwò Lewi viwo katã miete ɖe eŋua? Ðe miegale didim be yewoaxɔ nunɔlanyenye la hã? 
11 Esia ta Afetɔ ŋue wò kple ha blibo si le ŋuwò la miele tsitre tsim ɖo. Ke Aron ya, ame kae wònye be miele eŋu lĩm?”
12 Emegbe Mose dɔ be woayi aɖayɔ Datan kple Abiram, siwo nye Eliab viwo avɛ, ke wogblɔ be: “Míegbɔna afi aɖeke o! 
13 Nu tsɛ wònye be nèkplɔ mí tso anyigba si dzi notsi kple anyitsi le sisim le la dzi, be nàva wu le gbea dzia? Fifia, ɖe nègale didim be yeaɖu amegã hã ɖe mía dzia? 
14 Mèkplɔ mí yi anyigba si dzi notsi kple anyitsi le sisim le la dzi, kaka ahayi anyigba kple waingble tsɔ ge na mí wòanye míaƒe domenyinu o. Ðe nèbe yeaho ŋku le to me na ŋutsu siawoa? Míegbɔna afi aɖeke o!”
15 Ale dzi ku Mose vevie, eye wògblɔ na Afetɔ be: “Mègatrɔ kpɔ woƒe nuɖuvɔsa o. Nyemexɔ tedzi ɖeka teti hã le wo si o, eye nyemewɔ vɔ̃ wo dometɔ aɖeke hã o.”
16 Eye Mose gblɔ na Kora be: “Wò kple ha blibo si le ŋuwò la katã kpakple Aron miva Afetɔ ŋkume etsɔ. 
17 Mia dometɔ ɖe sia ɖe natsɔ eƒe dzudzɔdosonu ahakɔ dzudzɔdonu ʋeʋĩ ɖe edzi, eye miatsɔe ava Afetɔ ŋkume; woanye dzudzɔdosonu alafa eve blaatɔ̃, eye wò kple Aron hã mitsɔ miaƒe dzudzɔdosonuwo vɛ.” 
18 Ale wo dometɔ ɖe sia ɖe tsɔ eƒe dzudzɔdosonu, ɖe dzo ɖe eme, eye wokɔ dzudzɔdonu ʋeʋĩ ɖe wo dzi heva tɔ ɖe takpegbadɔa nu; Mose kple Aron hã kpe ɖe wo ŋu. 
19 Esi Kora ƒo edzidelawo nu ƒu ɖe wo ŋu le takpegbadɔa nu la, Afetɔ ƒe ŋutikɔkɔe dze na ha blibo la katã.
20 Eye Afetɔ gblɔ na Mose kple Aron be: 
21 “Mite ɖa le ha sia ŋu, ne matsrɔ̃ wo zi ɖeka.” 
22 Ale wotsyɔ mo anyi gblɔ be: “Oo Mawu, wò Ame si na agbegbɔgbɔ amewo katã, ɖe ame ɖeka pɛ awɔ nu vɔ̃, eye nàdo dziku ɖe ha blibo la katã ŋua?”
23 Eye Afetɔ gblɔ na Mose be: 
24 “Gblɔ na ha la be, ‘Mite ɖa le Kora, Datan kple Abiram ƒe agbadɔwo ŋu!’”
25 Emegbe Mose tso yi Datan kple Abiram gbɔ, eye Israel ƒe ametsitsiwo yi kplii. 
26 Eye wògblɔ na ha la be: “Meɖe kuku, mite ɖa le ame vɔ̃ɖi siawo ƒe agbadɔwo ŋu, eye migaka asi woƒe naneke ŋu o, ne woagatsrɔ̃ mi le woƒe nu vɔ̃wo ta o.” 
27 Enumake wote ɖa le Kora, Datan kple Abiram ƒe agbadɔwo ŋu le akpa sia akpa, eye Datan kple Abiram do go va tɔ ɖe woƒe agbadɔwo nu, eye wo srɔ̃wo, wo viwo kple wo vi suewo le wo ŋu.
28 Eye Mose gblɔ be: “Esia mee mianyae le be, Afetɔ ye dɔm be mawɔ dɔ siawo katã, eye menye nye ŋutɔ koe tso le ewɔm o: 
29 Ne ame siawo aku abe ale si ko amegbetɔwo katã kunae ene, eye woahe to na wo abe ale si ko wohea to na amegbetɔwo katã ene la, ekema menye Afetɔ ye dɔm o. 
30 Ke ne nu madzɔkpɔ aɖee Afetɔ awɔ, eye anyigba ake nu ami wo kple woƒe nuwo katã, eye woayi tsiẽ agbagbee la, ekema mianyae nyuie be ŋutsu siawo mede bubu Afetɔ ŋu o.”
31 Mekpɔ ɖe nu le nya siawo me hafi anyigba la fe kpla le wo te o. 
32 Eye anyigba ke nu mi wo kple woƒe aƒemetɔwo kple Kora dzidelawo kpakple woƒe nuwo katã. 
33 Ale wo kple woƒe amewo katã yi tsiẽ agbagbee, eye anyigba la tu ɖe wo nu, ale be wo nu yi le ha la dome. 
34 Esi Israel-vi siwo katã ƒo xlã wo la se woƒe ɣlidodoa la, wosi, elabena wogblɔ be: “Ðewohĩ anyigba la ava mi míawo hã!” 
35 Eye dzo tso Afetɔ gbɔ va fiã ŋutsu alafa eve blaatɔ̃ siwo le dzudzɔ ʋeʋĩ dom la.
36 Afetɔ gblɔ na Mose be: 
37 “Gblɔ na Aron vi Eleazar be wòafɔ dzudzɔdosonuawo le afi si dzoa bi le la, elabena nu kɔkɔe wonye. Gblɔ nɛ be wòakaka dzoa ɖe adzɔge. 
38 Na woaƒo ŋutsu siwo wɔ nu vɔ̃ eye woku la ƒe dzudzɔdosonuawo gbadzɛ, afa ɖe vɔsamlekpui la ŋu, elabena wotsɔ wo va Afetɔ ŋkume, eye wozu nu kɔkɔewo. Woanye dzesi na Israel-viwo.” 
39 Ale nunɔla Eleazar fɔ akɔblidzudzɔdosonu siwo ame siwo dzoa fiã tsɔ vɛ la, eye woƒo wo gbadzɛ tsɔ fa ɖe vɔsamlekpui la ŋu, 
40 abe ale si tututu Afetɔ gblɔ nɛ to Mose dzi ene. Esia zu ŋkuɖodzinu na Israel-viwo be ame si womeɖe mɔ na o si menye Aron ƒe dzidzimevi o la, dometɔ aɖeke nagava be yeado dzudzɔ ʋeʋĩ le Afetɔ ŋkume o, eye ame aɖeke nagakpɔ Kora kple edzidelawo ƒe nu awɔ o.
41 Esi ŋu nya ke ko la, Israel ƒe ha blibo la de asi liʋiliʋĩlilĩ me le Mose kple Aron ŋu be: “Mi ŋutsu eve siawoe wu Afetɔ ƒe amewo.” 
42 Esi ha la wɔ ɖeka tso ɖe Mose kple Aron ŋu la, woawo trɔ dze ŋgɔ takpegbadɔ la, eye kpɔ ɖa, alilikpo la tsyɔ edzi, eye Afetɔ ƒe ŋutikɔkɔe dze wokpɔ.
43 Mose kple Aron yi takpegbadɔa ŋgɔ, 
44 eye Afetɔ gblɔ na Mose be: 
45 “Mite ɖa le ha sia ŋu, ne matsrɔ̃ wo zi ɖeka.” Eye wotsyɔ mo anyi. 
46 Emegbe Mose gblɔ na Aron be: “Tsɔ dzudzɔdosonu nàɖe dzo le vɔsamlekpuia dzi ɖe eme, kɔ dzudzɔdonu ʋeʋĩ ɖe edzi, eye netsɔ nàyi ha la dome alé avu ɖe wo ta, elabena Afetɔ ƒe dziku gbɔna wo dzi. Dɔvɔ̃ la dze egɔme!” 
47 Enumake Aron tsɔe, abe ale si tututu Mose gblɔe ene, eye wòƒu du yi ha la dome; eye kpɔ ɖa, fuwɔame la dze egɔme xoxo le dukɔ la dome! Eye wòkɔ dzudzɔdonu ʋeʋĩ ɖe dzudzɔdosonua dzi hede asi avuléle me ɖe dukɔ la ta. 
48 Etɔ ɖe ame kukuawo kple agbagbeawo dome, eye mlɔeba fuwɔame la nu tso. 
49 Ame siwo fuwɔamea wu la le ame akpe wuiene alafa adre, ke ame siwo ku le Kora ƒe nya la me ya mele eme o. 
50 Mlɔeba, esi Aron trɔ va Mose gbɔ le takpegbadɔa nu la, fuwɔame la nu tso.

Numbers 17
1 Azɔ Afetɔ gblɔ na Mose be: 
2 “Ƒo nu kple Israel-viwo, eye nàxɔ atikplɔ ɖeka le toawo ƒe tatɔwo dometɔ ɖe sia ɖe si, le wo fofowo ƒe aƒekɔwo nu, wòanye atikplɔ wuieve. Nàŋlɔ wo dometɔ ɖe sia ɖe ƒe ŋkɔ ɖe eƒe atikplɔ ŋu. 
3 Eye nàŋlɔ Aron ƒe ŋkɔ ɖe Lewi ƒe atikplɔ ŋu, elabena atikplɔ ɖekae li na tatɔ ɖe sia ɖe le wo fofowo ƒe aƒekɔwo nu. 
4 Tsɔ atikplɔawo da ɖe takpegbadɔa me le Ðaseɖinu la ŋgɔ, le afi si meɖea ɖokuinye fiaa mi le. 
5 Ame si matia la ƒe atikplɔ adzè, ne matsi Israel-viwo ƒe liʋiliʋĩlilĩ le ŋunye la nu, eye woadzudzɔ liʋiliʋĩlilĩ le miawo hã ŋu.”
6 Ale Mose gblɔ nya siawo na Israel-viwo, eye woƒe tatɔwo katã tsɔ woƒe atikplɔwo vɛ, tatɔ ɖeka atikplɔ ɖeka, le wo fofowo ƒe aƒekɔwo nu; wole atikplɔ wuieve. Aron ƒe atikplɔ hã le woƒe atikplɔawo dome. 
7 Eye Mose tsɔ atikplɔawo da ɖe Afetɔ ŋkume le agbadɔ si me Ðaseɖiɖiɖaka le la me.
8 Esi ŋu ke, eye Mose yi agbadɔ si me Ðaseɖiɖiɖaka le me la, kpɔ ɖa, Aron ƒe atikplɔ si nye Lewi ƒe aƒea tɔ la dzè, eto aŋgba, eye wòƒo se hetse yevuzi ɖiɖiwo. 
9 Eye Mose fɔ atikplɔawo le Afetɔ ŋkume va Israel-viwo katã ŋkume. Wo katã wokpɔe, eye ame sia ame tsɔ eƒe atikplɔ.
10 Eye Afetɔ gblɔ na Mose be: “Gbugbɔ Aron ƒe atikplɔ la da ɖe Ðaseɖinu la ŋgɔ be woadzrae ɖo ɖi wòanye dzesi na vi dzeaglãwo, be woadzudzɔ liʋiliʋĩlilĩ le ŋunye, ne woagaku o.” 
11 Enumake Mose wɔe abe ale si tututu Afetɔ de se nɛ ene. Nenema pɛpɛpɛ wòwɔe.
12 Eye Israel-viwo gblɔ na Mose be: “Azɔ míele kuku ge, mía nu ayi, mí katã míatsrɔ̃ godoo! 
13 Ame sia ame si gogo Afetɔ ƒe avɔgbadɔa la aku! Ðe mí katã míaku avɔ keŋkeŋua?”

Numbers 18
1 Emegbe Afetɔ gblɔ na Aron be: “Ne wò kple viwòŋutsuwo kpakple fofowò ƒe aƒekɔ la mieda se siwo ku ɖe kɔkɔeƒea ŋu dometɔ aɖe dzi la, fɔɖiɖi anɔ mia dzi, eye ne wò kple viwòŋutsuwo mieda se siwo ku ɖe miaƒe nunɔlanyenyea ŋu dometɔ aɖe dzi la, fɔɖiɖi anɔ mia dzi. 
2 Kplɔ nɔviwò siwo tso mia tɔgbuiwo ƒe to, si nye Lewi-to, la me hã va kpe ɖe ɖokuiwò ŋu, ne woakpe ɖe wò kple viwòŋutsuwo ŋu miawɔ subɔsubɔdɔ le agbadɔ si me Ðaseɖiɖiɖakaa le la ŋgɔ. 
3 Eye woawɔ dɔ si nède wo si kple dɔ si le wo dzi le agbadɔa ŋu la katã. Negbe kɔkɔeƒe la me nuwo kple vɔsamlekpui la ŋu koe womate ɖo o, ne woagaku loo alo wò nàku o. 
4 Woanɔ ŋuwò awɔ takpegbadɔa me dɔ siwo le wo dzi la katã, eye ame si womeɖe mɔ na o dometɔ aɖeke nagate ɖe mia ŋu o. 
5 Miwɔ kɔkɔeƒe la me dɔ kple vɔsamlekpui la ŋuti dɔ siwo le mia dzi, ne woagado dɔmedzoe ɖe Israel-viwo ŋu ake o. 
6 Nye ŋutɔe ɖe mia nɔvi Lewi viwo tso Israel-viwo dome ɖe vovo tsɔ na mi. Ame siawoe Afetɔ xɔ be woawɔ takpegbadɔa me dɔwo. 
7 Wò ŋutɔ kple viwòŋutsuwo miawɔ miaƒe nunɔladɔ kple vɔsamlekpui la kpakple nu si le xɔmetsovɔa godo la ŋuti dɔwo pɛpɛpɛ, eye miasubɔ le afi ma. Ðe metsɔ nunɔlanyenye la ke mi be wòanye miaƒe dɔ, eye ame si womeɖe mɔ na o si ate va la, woawui.”
8 Afetɔ gagblɔ na Aron be: “Metsɔ nu siwo wodzɔna nam la dzi kpɔkpɔ de asi na wò. Metsɔ nu kɔkɔe siwo katã Israel-viwo dzɔna la ƒe ɖe na wò kple viwòŋutsuwo be wòanye miaƒe gome ɖaa. 
9 Nu siwo anye tɔwò le nu kɔkɔewo ƒe nu kɔkɔe siwo katã wotsɔ sa dzovɔ la domee nye esi: Vɔsanu ɖe sia ɖe si wotsɔ vɛ nam hekpe ɖe woƒe nuɖuvɔsawo, nuvɔ̃vɔsawo, kple woƒe fɔɖivɔsawo ŋu la, nu kɔkɔewo ƒe nu kɔkɔe wònye na wò kple viwòŋutsuwo. 
10 Teƒe si le kɔkɔe ŋutɔe nàɖui le. Ŋutsu sia ŋutsu kpɔ mɔ aɖui. Nu kɔkɔe wòanye na wò. 
11 Nu siawo hã nye tɔwò: Israel-viwo ƒe nunana siwo wotsɔ vɛ hekpe ɖe woƒe vɔsa siwo katã wonyè la ŋu. Metsɔ wo na wò kple viwòŋutsuwo kple viwònyɔnuwo be wòanye miaƒe gome ɖaa. Ame sia ame si ŋu kɔ le aƒewò me la kpɔ mɔ aɖui.
12 “Metsɔ ami nyuitɔwo katã kple wain yeye nyuitɔwo katã kpakple woƒe agblemenuku gbãtɔ siwo wotsɔ vɛ na Afetɔ la, na wò. 
13 Woƒe anyigbadzikutsetse gbãtɔ siwo katã woatsɔ avɛ na Afetɔ la azu tɔwò. Ame sia ame si ŋu kɔ le aƒewò me la kpɔ mɔ aɖui.
14 “Nu sia nu si wotsɔ ɖe adzɔgbe ɖikaa le Israel la azu tɔwò.
15 “Nu gbagbe ɖe sia ɖe si ʋu dɔ nu, eɖanye amegbetɔwo loo alo lã o, si woatsɔ avɛ na Afetɔ la azu tɔwò. Gake woaxe fe ɖe amegbetɔwo ƒe ŋgɔgbeviwo ta, eye woaxe fe ɖe lã makɔmakɔwo ƒe ŋgɔgbeawo hã ta. 
16 Ne wonya xɔ tso ɣleti ɖeka ko la, woaxe fe ɖe wo ta ɖe asi si wodo ɖe eŋu la nu, si nye klosalo sekel atɔ̃, ne wobui ɖe teƒe kɔkɔe la ƒe sekel nu. Ele gera blaeve. 
17 Gake womaxe fe ɖe nyi ƒe ŋgɔgbea alo alẽ ƒe ŋgɔgbea alo gbɔ̃ ƒe ŋgɔgbea ya ta o. Nu kɔkɔe wonye. Nàhlẽ woƒe ʋu ɖe vɔsamlekpui la ŋu, eye nàtsɔ woƒe ami ado dzudzɔ wòanye dzovɔsa si aʋẽ lilili na Afetɔ. 
18 Woƒe lã nazu tɔwò, abe ale si ko akɔ kple ɖusita si wonyè la nyea tɔwòe ene. 
19 Metsɔ nu kɔkɔe siwo katã Israel-viwo adzɔ na Afetɔ la na wò kple viwòŋutsuwo kple viwònyɔnuwo be wòanye mia tɔ ɖaa. Dzenubabla wònye le Afetɔ ŋkume ɖaa na wò kple wò dzidzimeviwo.”
20 Afetɔ gagblɔ na Aron be: “Màxɔ woƒe anyigba aɖeke wòanye wò domenyinu o, eye woƒe anyigba aɖeke manye wò gome o. Nyee nye wò gome kple wò domenyinu le Israel-viwo dome.
21 “Kpɔ ɖa, metsɔ nu siwo katã le Israel la ƒe ewolia na Lewi viwo be wòanye woƒe domenyinu ɖe subɔsubɔdɔ si wɔm wole, si nye takpegbadɔa ŋuti dɔ la ta. 
22 Israel-viwo nagagogo takpegbadɔ la azɔ, ne woahe nu vɔ̃ ava wo ɖokuiwo dzi ahaku o. 
23 Lewi viwo nasubɔ le takpegbadɔa me, eye ne woda vo la, woawo ŋutɔwo dzie woƒe vodada anɔ. Se wònye le miaƒe dzidzimewo katã me be womaxɔ domenyinu aɖeke le Israel-viwo dome o. 
24 Elabena metsɔ Israel-viwo ƒe nuwo ƒe ewolia si woadzɔ na Afetɔ la, na Lewi viwo be wòanye woƒe domenyinu. Esia tae megblɔ na wo be, ‘Womaxɔ domenyinu aɖeke le Israel-viwo dome o.’”
25 Afetɔ gagblɔ na Mose be: 
26 “Gblɔ na Lewi viwo be, ‘Ne miexɔ Israel-viwo ƒe nu ewolia si metsɔ na mi be wòanye miaƒe domenyinu le wo si la, ekema miawo hã miadzɔ nuwo ƒe ewolia si miexɔ la ƒe ewolia na Afetɔ. 
27 Woabui na mi abe miaƒe nudzɔdzɔ ene, abe nuku siwo tso nukuƒoƒe kple wain si tso wainfiãƒe alo ami si tso amiɖaƒe ene. 
28 Ale miawo ŋutɔwo hã miadzɔ miaƒe nuwo ƒe ewolia siwo miaxɔ le Israel-viwo si la katã ƒe ɖe na Afetɔ, eye miatsɔ nu si miedzɔ na Afetɔ la ana nunɔla Aron. 
29 Miadzɔ nu sia nu si woana mi la ƒe ɖe, miadzɔ eƒe nyuitɔ na Afetɔ wòanye nunana kɔkɔe.’
30 “Eye nàgblɔ na wo be, ‘Ne Lewi viwo dzɔ woƒe nu nyuitɔwo la, ekema woabui na wo abe nuku tso woƒe nukuƒoƒe ene, abe wain tso wainfiãƒe alo ami tso amiɖaƒe ene. 
31 Mia kple miaƒe aƒemetɔwo miate ŋu aɖui le afi sia afi, elabena teƒeɖoɖo wònye na mi ɖe subɔsubɔdɔ si wɔm miele le takpegbadɔa me la ta. 
32 Ne miedzɔ nuawo ƒe nyuitɔwo la, ekema miahe nu vɔ̃ ava mia ɖokuiwo dzi o, eye migagblẽ kɔ ɖo na Israel-viwo ƒe nu kɔkɔewo o, ne miagaku o.’”

Numbers 19
1 Afetɔ gagblɔ na Mose kple Aron be: 
2 “Se si Afetɔ dee nye esi, ‘Gblɔ na Israel-viwo be woakplɔ nyinɔ dzĩ si sɔ blibo, si nu mewɔ afi aɖeke na o, eye womede kɔkuti kɔ nɛ kpɔ o la, avɛ na wò. 
3 Mitsɔe na nunɔla Eleazar wòakplɔ ayi asaɖa la godo, eye woawui le eŋkume. 
4 Eye nunɔla Eleazar nade eƒe asibidɛ ʋua ƒe ɖe me ahlẽ ʋua zi adre ɖo ɖe takpegbadɔ la ŋgɔ lɔƒo. 
5 Eyome woatɔ dzo nyinɔ la le eŋkume. Woatɔ dzo eƒe agbalẽ, eƒe lã, eƒe ʋu kple eƒe dɔmemĩ siaa. 
6 Eye nunɔla la natsɔ sederti, isop gbe, kple ka dzĩ, ne wòada wo ɖe nyinɔ si le fiafiãm la dzi. 
7 Eye nunɔla la nanya eƒe awuwo ahale tsi, emegbe ate ŋu ava asaɖa la me; ke nunɔla la ŋu mekɔ o va se ɖe fiẽ.
8 “‘Ame si tɔ dzo nyinɔ la nanya eƒe awuwo ahale tsi, eye eŋu mekɔ o va se ɖe fiẽ.
9 “‘Eye ŋutsu si ŋu kɔ la nalɔ nyinɔ la ƒe afi la ada ɖe teƒe dzadzɛ aɖe le asaɖa la godo, anye nu si woadzra ɖo ɖi na Israel ƒe ha la be woakɔ ɖe tsi si woazã hena nuŋukɔkɔ la me. Nuvɔ̃vɔsae wònye. 
10 Ame si lɔ nyinɔ la ƒe afi la nanya eƒe awuwo, eye eŋu mekɔ o va se ɖe fiẽ.
“‘Esia nanye se ɖaa na Israel-viwo kple amedzrovi siwo le wo dome la siaa. 
11 Ame sia ame si ka asi ame kuku aɖe ŋu la ŋu mekɔ o ŋkeke adre. 
12 Ame sia natsɔ tsia akɔ eɖokui ŋu le ŋkeke etɔ̃a gbe, eye le ŋkeke adrea gbe la, eŋu akɔ. Ke ne mekɔ eɖokui ŋu le ŋkeke etɔ̃a gbe o la, ekema eŋu makɔ le ŋkeke adrea gbe hã o. 
13 Ame sia ame si ka asi ame kuku aɖe ŋu, eye mekɔ eɖokui ŋu o la, eƒo ɖi Afetɔ ƒe avɔgbadɔ la, eye woatsrɔ̃ ame ma ɖa le Israel. Esi womehlẽ nuŋukɔtsi la ɖe eŋu o ta la, eŋu mekɔ o. Egakpɔtɔ nye ame makɔmakɔ.
14 “‘Se si dzi woawɔ ɖo ne ame aɖe ku ɖe agbadɔ aɖe me lae nye esi: Ame sia ame si ge ɖe agbadɔa me kple ame sia ame si le agbadɔa me ɣemaɣi la ŋu mekɔ o ŋkeke adre. 
15 Nu sia nu si le nuvo, eye nutunu mele enu o la, ŋu mekɔ o. 
16 Ame sia ame si ka asi ame si tsi yi nu alo ame kuku bubu aɖe, ameƒu alo yɔdo aɖe ŋu le gbe me la ŋu mekɔ o ŋkeke adre. 
17 Woaku nuvɔ̃vɔsalã si wotɔ dzoe la ƒe afi la ƒe ɖe akɔ ɖe ze me, eye woakɔ tɔsisi me tsi ɖe edzi na ame si ŋu mekɔ o la. 
18 Eye ŋutsu si ŋu kɔ la natsɔ isop gbe anyrɔ ɖe tsia me awu ɖe agbadɔa, eme nuwo katã, ame siwo katã nɔ afi ma kple ame si ka asi ƒu alo ame si wowu alo ame kuku alo yɔdo ŋu la ŋuti. 
19 Ame si ŋu kɔ la nawui ɖe ame si ŋu mekɔ o la ŋu le ŋkeke etɔ̃a gbe kple ŋkeke adrea gbe, eye wòakɔ eŋu tso nu vɔ̃ me le ŋkeke adrea gbe; eye wòanya eƒe awuwo ahale tsi, eye eŋu akɔ le fiẽ.
20 “‘Ke ne ame aɖe ŋu mekɔ o, gake wògbe eɖokui ŋu kɔkɔ la, ekema woatsrɔ̃ ame ma ɖa le ha la dome, elabena Afetɔ ƒe kɔkɔeƒe lae wòƒo ɖii. Womewu nuŋukɔtsi la ɖe eŋu o, eya ta eŋu mekɔ o.
21 “‘Esia nanye se na wo ɖaa be, ame si wu nuŋukɔtsia nanya eƒe awuwo, eye ame si ka asi nuŋukɔtsia ŋu hã ŋu mekɔ o va se ɖe fiẽ. 
22 Nu sia nu si ŋu ame si ŋu mekɔ o la ka asii la ŋu mekɔ o, eye ame si ka asi nu ma ŋu la hã ŋu mekɔ o va se ɖe fiẽ.’”

Numbers 20
1 Le ɣleti gbãtɔ me la, Israel ƒe ha blibo la va ɖo Zin gbedzi eye dukɔ la ƒu asaɖa anyi ɖe Kades. Afi mae Miriam ku ɖo, eye afi mae woɖii ɖo.
2 Ke tsi mele teƒe ma na ha la o, eye wotso ɖe Mose kple Aron ŋu. 
3 Eye dukɔ la kpe dzre kple Mose gblɔ be: “Ne ɖe míeku esime mía nɔviwo ku le Afetɔ ŋkume la, ne enyo wu! 
4 Nu ka tae miekplɔ Afetɔ ƒe ha la va gbe sia dzi, be mía kple míaƒe lãwo míaku ɖe afi sia? 
5 Eye nu ka tae miekplɔ mí tso Egipte va teƒe vloe sia? Menye teƒe si nuku, gbotsetsewo, waintsetsewo kple yevuboɖawo le o, eye tsi hã mele afi sia míano o.” 
6 Eye Mose kple Aron dzo le ha la ŋkume yi takpegbadɔa nu eye wotsyɔ mo anyi, eye Afetɔ ƒe ŋutikɔkɔe dze na wo wokpɔ.
7 Afetɔ gblɔ na Mose be: 
8 “Tsɔ atikplɔ la, eye wò kple nɔviwò Aron miaƒo ha la nu ƒu, eye nàƒo nu na agakpe la le wo ŋkume, ne wòana tsi mi, eye nàna tsi nado tso agakpe la me na ha la kple woƒe lãwo woano.”
9 Ale Mose tsɔ atikplɔ la le Afetɔ ŋkume, abe ale si tututu wògblɔ nɛ ene. 
10 Eye Mose kple Aron yɔ ha la ƒo ƒu ɖe agakpe la ŋgɔ, eye wògblɔ na wo be: “Mi aglãdzelawo, misee! Ðe míate ŋu ana tsi nado tso agakpe sia me na mia?” 
11 Eye Mose kɔ asi dzi hetsɔ atikplɔ la ƒo agakpe la zi eve, ale tsi do bababa, eye ha la kple woƒe lãwo de asi enono me.
12 Emegbe Afetɔ gblɔ na Mose kple Aron be: “Esi miexɔ dzinye se hekɔ ŋunye le Israel-viwo ŋkume o ta la, miakplɔ ha sia ayi anyigba si matsɔ ana wo la dzi o.” 
13 Esiae nye Meriba tsi, elabena Israel-viwo wɔ dzre kple Afetɔ, eye wòkɔ eɖokui ŋu le wo dome.
14 Emegbe Mose dɔ amewo tso Kades ɖo ɖe Edom-fia gbɔ be: “Ale nɔviwò Israel gblɔe nye esi, ‘Wò ŋutɔ ènya fukpekpe siwo katã me míeto la nyuie. 
15 Mía fofowo yi Egipte, eye míenɔ Egipte ƒe geɖe; Egiptetɔwo wɔ fu mía kple mía fofowo. 
16 Mlɔeba míedo ɣli na Afetɔ, eye wòse míaƒe gbe, eye wòdɔ mawudɔla aɖe ɖa wòkplɔ mí dzoe le Egipte, kpɔ ɖa, fifia míele Kades, du si le wò liƒo ŋu la me. 
17 Míeɖe kuku, na míato wò anyigba dzi ayi. Míato agble alo waingble aɖeke me o, eye míano vudo aɖeke me tsi o. Fia Ƒe Mɔ la dzi míato. Míadze ɖe ɖusime alo miame o, va se ɖe esime míeto wò anyigba la dzi yi.’”
18 Ke Edom ɖo eŋu nɛ be: “Màto nye anyigba dzi o. Ne ètee kpɔ la, mado kple yi ava kpe wò.” 
19 Eye Israel-viwo gblɔ nɛ be: “Míedi be míato mɔ gã la dzi ko ava yi, eye ne mía kple míaƒe lãhawo míeno wò tsi la, ekema míaxe fe ɖe eta. Ðeko míedi be míazɔ to edzi ava yi, esia ko biam míele.” 
20 Ke egblɔ be: “Miato edzi ayi o.” Eye Edom tsɔ aʋakɔ gã aɖe si sesẽ la do go va wo kpe ge. 
21 Ale Edom gbe gbidigbidi be yemaɖe mɔ Israel nato yeƒe anyigba dzi ayi o. Eya ta Israel gɔdɔ̃ mɔ to eŋu.
22 Israel ƒe ha blibo la katã ho tso Kades heva Hor To la gbɔ. 
23 Eye Afetɔ gblɔ na Mose kple Aron le Hor To la gbɔ le Edom-nyigba ƒe liƒo dzi be: 
24 “Woatsɔ Aron akpe ɖe eƒe amewo ŋu; mage ɖe anyigba si matsɔ ana Israel-viwo la dzi o, elabena mi ame evea miewɔ ɖe nye ɖoɖowo dzi ku ɖe Meriba tsi la ŋu o. 
25 Kplɔ Aron kple viaŋutsu Eleazar miayi Hor To la dzi. 
26 Eye nàɖe Aron ƒe awuwo le eŋu ado na via Eleazar, Aron aku le afi ma.”
27 Eye Mose wɔ abe ale si tututu Afetɔ gblɔ ene, wolia Hor To la esi ha blibo la nɔ wo yome kpɔm. 
28 Eye Mose ɖe Aron ƒe awuawo le eŋu tsɔ do na viaŋutsu Eleazar. Emegbe Aron ku le afi ma, le toa tame. Eye Mose kple Eleazar ɖi tso to la dzi. 
29 Esi ha blibo la kpɔe be Aron ku la, Israel ƒe aƒe blibo la katã fa Aron ŋkeke blaetɔ̃ sɔŋ.

Numbers 21
1 Esi Kanaantɔ, Arad-fia si le Negeb se be Israel to Atarim mɔ gbɔna la, eho ɖe Israel ŋu eye wòɖe aboyo wo dometɔ aɖewo. 
2 Eye Israel ɖe adzɔgbe na Afetɔ be: “Ne àtsɔ dukɔ sia ade asi nam la, ekema nye hã matsrɔ̃ woƒe duwo gbidigbidi. 
3 Afetɔ ɖo to Israel ƒe gbe, eye wòtsɔ Kanaantɔwo de asi na wo, ale wotsrɔ̃ wo kple woƒe duawo gbidigbidi. Eya ta wona ŋkɔ teƒe la be Horma.
4 Esi wole mɔa dzi tso Hor To la gbɔ, eye woto mɔ si ɖo ta Ƒudzĩ la gbɔ be yewoagɔdɔ̃ mɔ ato Edom-nyigbaa ŋu la, mɔzɔzɔ la na nu va te dukɔ la ŋu. 
5 Eye dukɔ la ƒo nu le Mawu kple Mose ŋu be: “Nu ka tae miekplɔ mí tso Egipte be míaku ɖe gbea dzi? Elabena abolo kple tsi mele afi sia o, eye nuɖuɖu nyɔŋu sia ti mí azɔ.” 
6 Ale Afetɔ dɔ da vɔ̃ɖiwo ɖe dukɔ la dome, eye woɖu dukɔ la, ale be Israel-vi geɖe ku.
7 Eya ta dukɔ la va Mose gbɔ va gblɔ be: “Míewɔ nu vɔ̃, elabena míeƒo nu le wò kple Afetɔ ŋu. Ðe kuku na Afetɔ, ne wòaɖe daawo ɖa le mía dome.” Ale Mose ɖe kuku ɖe dukɔ la ta. 
8 Eye Afetɔ gblɔ na Mose be: “Wɔ da vɔ̃ɖi la ƒe nɔnɔme nàtsɔ aku ati ŋu. Eye ne da ɖu ame aɖe la, ekema wòafɔ ta dzi akpɔe, ne wòatsi agbe.” 
9 Enumake Mose tsɔ akɔbli wɔ da tsɔ ku ati ŋu, eye ne da ɖu ame aɖe, eye wòfɔ ta dzi kpɔ akɔblida la ko la, etsia agbe.
10 Emegbe Israel-viwo ho heva ƒu asaɖa anyi ɖe Obot. 
11 Emegbe woho tso Obot va ƒu asaɖa anyi ɖe Iye-Abarim le gbedzi, afi si dze ŋgɔ Moab le ɣedzeƒe gome. 
12 Wogaho tso afi ma heva ƒu asaɖa anyi ɖe Zered Bali la nu. 
13 Wogaho tso afi ma heva ƒu asaɖa anyi ɖe Arnon nuto me, le gbedzi le Amoritɔwo ƒe liƒo dzi, elabena Arnon ye nye Moab ƒe liƒo le Moabtɔwo kple Amoritɔwo dome. 
14 Esia tae wogblɔ le Afetɔ ƒe Aʋawɔwɔwo ƒe agbalẽ la me be: “Waheb du si le Sufa kple Arnon Baliwo 
15 kpakple baliawo ƒe aga siwo ɖo ta Ar nutowo me, eye wòdo liƒo na Moab.”
16 Emegbe woho tso afi ma va Beer. Vudo sia ŋue Afetɔ gblɔ na Mose le be: “Ƒo dukɔ la nu ƒu, ne mana tsi wo.”
17 Ɣemaɣi Israel dzi ha sia be:
“Oo vudo, dzi tsi! Mixe haa!
18 Amegãwoe ɖe vudoa; dukɔ la ƒe bubumewoe ɖee,
Gbeɖela ƒe atikplɔ wotsɔ ɖee, woawo ŋutɔwo ƒe atikplɔwoe wotsɔ ɖee.”
Eye woho tso gbe sia dzi yi Matana. 
19 Tso Matana wova Nahaliel, eye tso Nahaliel wova Bamot. 
20 Tso Bamot wova bali si le Moab-nyigba dzi la me, le Pisga To la dzi, afi si dze ŋgɔ Yesimon.
21 Eye Israel dɔ ame ɖe Amori-fia Sihon gbɔ be: 
22 “Na míato wò anyigba dzi ayi. Míadze ɖe agble alo waingble aɖeke me o. Míano vudo aɖeke me tsi o. Fia Ƒe Mɔ la dzi míato, va se ɖe esime míeto wò anyigba dzi yi.” 
23 Ke Sihon meɖe mɔ na Israel be wòato yeƒe anyigba dzi ayi o, ke boŋ Sihon ƒo eƒe dukɔ la nu ƒu, eye wòho yi gbea dzi ɖakpe aʋa kple Israel le Yahaz. 
24 Gake Israel si wo kple yi hexɔ woƒe anyigba, tso Arnon yi Yabok si te ɖe Amonitɔwo ŋu, elabena Yazer ye nye Amonitɔwo ƒe liƒo.
25 Ale Israel xɔ du siawo katã, eye wonɔ Amoritɔwo ƒe duwo katã me, Hesbon kple eŋu duwo katã. 
26 Elabena Hesbon nye Amori-fia Sihon ƒe du. Eyae wɔ aʋa kple Moab-fia tsã hexɔ eƒe anyigba blibo la katã le esi va ɖo keke Arnon ke. 
27 Esia tae ahamasilawo gblɔna be:
“Miva Hesbon. Mina woatso Sihon du la ahaɖo egɔme anyi.
28 Elabena dzo bi tso Hesbon, dzoƒaɖe tso Sihon ƒe du la me.
Efiã Ar le Moab, efiã ame siwo ƒe nuxeƒewo le Arnon.
29 Moab, baba na wò! Oo Kemos ƒe amewo, mia nu ayi!
Ena viaŋutsuwo zu sisilawo, eye Amori-fia Sihon ɖe aboyo vianyɔnuwo.
30 Mina míada akplɔ wo.
Hesbon atsrɔ̃ va se ɖe keke Dibon ke;
Mina míatsrɔ̃e va se ɖe Nofa ke;
Dzo abi ade Medeba ke.”
31 Eye Israel nɔ Amoritɔwo ƒe anyigba dzi. 
32 Eye Mose dɔ ŋutsu aɖewo be woayi aɖatsa ŋku le Yazer. Woxɔ eŋu duwo hexɔ teƒea le Amoritɔ siwo le afi ma la si. 
33 Emegbe wotrɔ tso afi ma heɖo ta Basan. Eye Basan-fia Og kple eƒe dukɔ blibo la ho va kpe aʋa kpli wo le Edrei. 
34 Eye Afetɔ gblɔ na Mose be: “Mègavɔ̃e o, elabena matsɔ eya kple eƒe dukɔ blibo la kpakple eƒe anyigba ade asi na wò; wɔe abe ale si tututu nèwɔ Amori-fia Sihon si nɔ Hesbon la ene.” 
35 Ale wowu eya kple viaŋutsuwo kpakple eƒe dukɔ blibo la, va se ɖe esime eƒe ame aɖeke mesusɔ o, eye woxɔ eƒe anyigba la.

Numbers 22
1 Azɔ Israel-viwo ho heva ƒu asaɖa anyi ɖe Moab tagba, le Yordan godo le Yeriko gbɔ. 
2 Ke Zipor vi Balak kpɔ nu siwo katã Israel wɔ Amoritɔwo, 
3 eye vɔvɔ̃ ɖo Moab ŋutɔ le dukɔ la ŋu, elabena wosɔ gbɔ; eye dzidzi ƒo Moab le Israel-viwo ta. 
4 Eya ta Moab gblɔ na Midiantɔwo ƒe ametsitsiwo be: “Azɔ ameha sia le míaƒe nutoawo ɖu ge abe ale si nyitsu ɖua gbe ene.”Ɣemaɣi la, Zipor vi Balak ye nye Moab-fia. 
5 Eye wòdɔ amewo ɖo ɖe Bileam, Beor vi gbɔ le Petor, wo dedu me le Tɔsisi la nu, be woayɔe vɛ. Eɖo gbe ɖee be: “Kpɔ ɖa! Dukɔ aɖee nye esi ʋu tso Egipte. Wotsyɔ anyigba la ŋkume, eye wote tum! 
6 Eya ta meɖe kuku, va ƒo fi de dukɔ sia nam, elabena wosesẽ wum. Ðewohĩ mate ŋu asi wo ahanya wo ɖa le anyigba la dzi; elabena menyae nyuie be, ame si nèyra la nyea yayratɔ, eye ame si nèƒo fi de la nyea fiƒodeme.”
7 Ale Moabtɔwo kple Midiantɔwo ƒe ametsitsiwo tsɔ afakaho ɖe asi dze mɔ yi Bileam gbɔ hegblɔ Balak ƒe nyawo nɛ. 
8 Eye wògblɔ na wo be: “Mitsi afi sia dɔ, eye magblɔ nya si tututu Afetɔ agblɔ nam la na mi.” Eya ta Moab-megãwo tsi Bileam gbɔ.
9 Eye Mawu va Bileam gbɔ gblɔ be: “Ame kawoe nye esiawo le gbɔwò?” 
10 Bileam gblɔ na Mawu vavã la be: “Zipor vi Balak, si nye Moab-fia, ye ɖo gbe ɖem be: 
11 ‘Kpɔ ɖa! Dukɔ si ʋu tso Egipte gbɔna la tsyɔ anyigba la ŋkume. Eya ta va ƒo fi de wo nam. Ðewohĩ mate ŋu awɔ aʋa kpli wo anya wo ɖa.’” 
12 Ke Mawu gblɔ na Bileam be: “Mègayi kpli wo o. Mègaƒo fi de dukɔ la o, elabena ame yayrawoe wonye.”
13 Bileam fɔ ŋdi, eye wògblɔ na Balak ƒe amegãwo be: “Migbugbɔ yi mia de, elabena Afetɔ gbe be magayi kpli mi o.” 
14 Eye Moab-megãwo trɔ va Balak gbɔ va gblɔ be: “Bileam gbe be yemava kpli mí o.”
15 Ke Balak gadɔ amegãwo ɖa ake, wosɔ gbɔ wu tsã, eye bubu le wo ŋu wu gbãtɔawo. 
16 Eye wova Bileam gbɔ hegblɔ nɛ be: “Ale Balak, Zipor vi gblɔe nye esi, ‘Meɖe kuku, mègana naneke naxe mɔ na wò be nàdo kpo gbɔnye vava o, 
17 elabena made bubu gã aɖe ŋuwò, eye nu sia nu si nàgblɔ nam la, mawɔe. Eya ta va ƒo fi de dukɔ sia nam dzro.’” 
18 Ke Bileam ɖo eŋu na Balak ƒe dɔlawo be: “Ne Balak tsɔ eƒe xɔ si klosalo kple sika yɔ taŋ nam hã la, nyemate ŋu ada Afetɔ nye Mawu ƒe se dzi ahayi nu sue alo nu gã aɖeke wɔ ge o. 
19 Ke meɖe kuku, miawo hã mitsi afi sia dɔ, ne manya nya si Afetɔ agagblɔ nam.”
20 Eye Mawu va Bileam gbɔ le zã me gblɔ nɛ be: “Ne ŋutsu siawo va be yewoayɔ wò kokoko la, ekema tso nàyi kpli wo. Gake nya si magblɔ na wò la koe nàgblɔ.” 
21 Eya ta Bileam fɔ ŋdi, bla akpa na eƒe tedzi, eye wòyi kple Moab-megãwo.
22 Ke Mawu ƒe dziku fla, le esi wòdze mɔ yina ta, eye Afetɔ ƒe dɔla va tɔ ɖe mɔa dzi be yeaxe mɔ nɛ. Bileam bɔbɔ nɔ eƒe tedzi la dzi, eye eƒe subɔvi eve le eŋu. 
23 Esi tedzia kpɔ Afetɔ ƒe dɔla wòtɔ ɖe mɔa dzi heɖe eƒe yi ɖe asi la, tedzia di be yeadze le mɔa dzi ayi gbe me. Ke Bileam de asi tedzi la ƒoƒo me be yeagatrɔe ava mɔa dzi. 
24 Eye Afetɔ ƒe dɔla la va tɔ ɖe mɔ xaxɛ si le waingble eve dome, si ƒe akpa si kple akpa kemɛ glikpɔ le la dzi. 
25 Esi tedzia kpɔ Afetɔ ƒe dɔlaa la, emimi ɖe glia ŋu eye wòmimi Bileam ƒe afɔ ɖe glia ŋu; eye Bileam gaƒoe ake.
26 Eye Afetɔ ƒe dɔla la gayi ŋgɔ va tɔ ɖe teƒe xaxɛ aɖe, afi si mɔ aɖeke mele ne woadze ɖe ɖusi alo mia me o. 
27 Esi tedzia kpɔ Afetɔ ƒe dɔlaa la, etsyɔ akɔ anyi esi Bileam kpɔtɔ bɔbɔ nɔ edzi, ale be Bileam do dɔmedzoe, eye wòtsɔ eƒe atia nɔ tedzia ƒom vevie. 
28 Mlɔeba Afetɔ na tedzia ƒo nu, eye wògblɔ na Bileam be: “Nu kae mewɔ wò hafi nèƒom zi etɔ̃ sɔŋ?” 
29 Bileam gblɔ na tedzia be: “Esi nèdo lãm tae. Ne ɖe yi le asinye la, ne mewu wò xoxo!” 
30 Tedzi la gblɔ na Bileam be: “Menye nyee nye wò tedzi si nèdona le wò agbe me katã va se ɖe egbe sia oa? Ðe mewɔ nu ɖe ŋuwò alea kpɔa?” Eɖo eŋu be: “Ao!” 
31 Eye Afetɔ ʋu Bileam ƒe ŋku wòkpɔ Afetɔ ƒe dɔla wòtɔ ɖe mɔa dzi heɖe eƒe yi ɖe asi. Enumake ebɔbɔ hetsyɔ mo anyi.
32 Eye Afetɔ ƒe dɔla la gblɔ nɛ be: “Nu ka tae nèƒo wò tedzi la zi etɔ̃ sɔŋ? Kpɔ ɖa! Nyee va be matsi tsitre ɖe ŋuwò, elabena afɔ si dzi nèle la mewɔ ɖeka kple nye lɔlɔ̃nu o. 
33 Tedzia kpɔm eye wòdze agbagba be yeadze ɖe aga zi etɔ̃ sɔŋ. Ðe menye eyae dze ɖe aga o la, ne mewu wò xoxoxo, eye mena tedzia tsi agbe.” 
34 Ale Bileam gblɔ na Afetɔ ƒe dɔla la be: “Mewɔ nu vɔ̃, elabena nyemenya be wòe tɔ ɖe mɔa dzi be yeado gom o. Ke azɔ ne menyo ŋuwò o la, ekema magbugbɔ.” 
35 Ke Afetɔ ƒe dɔla la gblɔ na Bileam be: “Yi kple ŋutsuawo, ke nya si magblɔ na wò la koe nàgblɔ.” Eye Bileam yi mɔzɔzɔa dzi kple Balak ƒe amegãwo.
36 Esi Balak se be Bileam gbɔna la, enumake eyi ɖado goe le Moab du si le Arnon-tɔsisia nu le nutoa ƒe liƒo dzi la me. 
37 Eye Balak gblɔ na Bileam be: “Menye ɖe medɔ be woayɔ wò vɛ oa? Nu ka ta mèva gbɔnye xoxoxo o? Alo ɖe nèsusu be nyemate ŋu ade bubu gã ye ŋu oa?” 
38 Bileam gblɔ na Balak be: “Kpɔ ɖa, meva ɖo gbɔwò azɔ. Gake ɖe woaɖe mɔ nam magblɔ nya aɖea? Nya si Mawu ade nu nam la koe magblɔ.”
39 Eya ta Bileam yi kple Balak, eye wova Kiriat-Huzot. 
40 Eye Balak tsɔ nyiwo kple alẽwo sa vɔ heɖo ɖe ɖe Bileam kple amegã siwo le eŋu la. 
41 Esi ŋu ke la, Balak kplɔ Bileam yi Bamot-Baal, be wòate ŋu akpɔ dukɔ blibo la tso afi ma.

Numbers 23
1 Bileam gblɔ na Balak be: “Ði vɔsamlekpui adre ɖe afi sia eye nàna woakplɔ nyitsu adre kple agbo adre vɛ nam.” 
2 Enumake Balak wɔ abe ale si tututu Bileam gblɔ ene. Eye Balak kple Bileam tsɔ nyitsu ɖeka kple agbo ɖeka sa vɔ le vɔsamlekpuiawo dometɔ ɖe sia ɖe dzi. 
3 Eye Bileam gblɔ na Balak be: “Va tɔ ɖe wò numevɔsa la gbɔ, ne maɖe kpɔ. Ðewohĩ Afetɔ agblɔ nya aɖe nam. Nu sia nu si wòaɖe afiam la, magblɔe na wò.” Ale wòyi togbɛ ƒeƒle aɖe dzi.
4 Mawu ɖe eɖokui fia Bileam eye Bileam gblɔ nɛ be: “Meɖi vɔsamlekpui adreawo ɖe akasa nu, eye metsɔ nyitsu ɖeka kple agbo ɖeka sa vɔ le vɔsamlekpuiawo dometɔ ɖe sia ɖe dzi.” 
5 Afetɔ de nya aɖe nu na Bileam, eye wògblɔ nɛ be: “Trɔ yi Balak gbɔ nàgblɔ nya siawo nɛ.” 
6 Ale wòtrɔ va Balak gbɔ hekpɔ eya kple Moab-megãwo katã wotɔ ɖe eƒe numevɔsa la gbɔ. 
7 Eye wòdo hamelo sia nɛ be: “Moab-fia Balak kplɔm tso Aram,
Tso ɣedzeƒetowo dzi be, ‘Va ƒo fi de Yakob nam. Ɛ̃, va do ɖiŋu na Israel.’
8 Aleke wɔ maƒo fi ade ame siwo Mawu meƒo fi de o?
Eye aleke wɔ mado ɖiŋu na ame siwo Afetɔ medo ɖiŋu na o?
9 Mele wo kpɔm tso agakpewo tame, Eye mele wo kpɔm tso togbɛwo dzi. Dukɔ la le wo ɖokui si le afi ma, Womebu wo ɖokui ɖe dukɔ bubuwo dome o.
10 Ame kae ate ŋu axlẽ Yakob si sɔ gbɔ abe kekuiwo ene
Alo ate ŋu axlẽ Israel ƒe akpa enelia gɔ̃ hã?
Madi be maku abe ale si ame dzɔdzɔe kunae ene,
Eye nye nuwuwu nanɔ abe wo tɔ ene.”
11 Eye Balak gblɔ na Bileam be: “Nu kae nye esia nèwɔ ɖe ŋunye? Ðe mekplɔ wò vɛ be nàƒo fi ade nye futɔwo nam, ke kpɔ ɖa, èva yra wo boŋ.” 
12 Eɖo eŋu nɛ be: “Alo menye nya si Afetɔ de nu nam lae wòle be magblɔ oa?”
13 Balak gagblɔ nɛ be: “Meɖe kuku, va míayi teƒe bubu, afi si nàte ŋu atɔ ɖo akpɔ wo le. Dukɔ la ƒe akpa sue aɖe ko nàkpɔ, màkpɔ wo katã o. Nɔ afi ma nàƒo fi ade wo nam.” 
14 Eye wòkplɔe yi Zofim gbedzi, le Pisga To tame, eye wòɖi vɔsamlekpui adre hetsɔ nyitsu ɖeka kple agbo ɖeka sa vɔ le vɔsamlekpuiawo dometɔ ɖe sia ɖe dzi. 
15 Eya ta Bileam gblɔ na Balak be: “Tɔ ɖe afi sia, ɖe wò numevɔsa la gbɔ, ne mayi aɖado ɖe Eŋkume le afi mɛ.” 
16 Eye Afetɔ ɖe eɖokui fia Bileam, eye wòde nya nu nɛ, eye wògblɔ be: “Trɔ yi Balak gbɔ nàgblɔ nya siawo nɛ.” 
17 Ale wòtrɔ va egbɔ hekpɔ eya kple Moab-megãwo wotɔ ɖe eƒe numevɔsa la gbɔ. Eye Balak biae be: “Nya kae Afetɔ gblɔ?” 
18 Eye wòdo hamelo sia nɛ be:
“Balak, tso nàsee.
Oo Zipor vi, ɖo tom.
19 Mawu menye amegbetɔ, ne wòaka aʋatso,
Loo alo amegbetɔ ƒe vi ne wòatrɔ susu o.
Ne egblɔ nya aɖe la, ɖe mawɔ edzi oa?
Ðe wòaƒo nu, eye mawɔ edzi oa?
20 Kpɔ ɖa, woɖoe nam be mayra wo; Eyra wo vɔ, eye nyemate ŋu atrɔe o.
21 Maɖe mɔ gbesa aɖeke naɖi Yakob ŋu o, Eye maɖe mɔ vɔ̃ aɖeke nava Israel dzi o, Afetɔ eƒe Mawu la li kpli wo, Eyae nye woƒe fia si ƒe kafukafu de dzi le wo dome.
22 Mawu kplɔ wo tso Egipte gbɔna. Ele abe gbenyi ƒe dzo ene na wo.
23 Elabena gbesa aɖeke maɖi Yakob ŋu o, Eye womaka afa ɖe Israel ŋu wòadze edzi o. Woate ŋu agblɔ le Yakob kple Israel ŋu fifia be, ‘Kpɔ nu si gbegbe Mawu wɔ ɖa!’
24 Kpɔ ɖa, dukɔ sia anyɔ abe dzata ene, Eye wòatso ɖe afɔ nu abe dzatatsu ene. Matsyɔ akɔ anyi o, va se ɖe esime wòɖu eƒe nuléle hafi,
Eye wòno ame siwo wòwu la ƒe ʋu.”
25 Eye Balak gblɔ na Bileam be: “Ne màte ŋu aƒo fi ade wo kura o la, ekema mègayra wo hã o.” 
26 Bileam ɖo eŋu na Balak be: “Ðe nyemegblɔe na wò be, ‘Nya si Afetɔ agblɔ la dzie mawɔ ɖo’ oa?”
27 Balak gblɔ na Bileam be: “Meɖe kuku, na magakplɔ wò ayi teƒe bubu. Ðewohĩ asɔ le Mawu vavã la ŋkume be nànɔ afi ma aƒo fi ade wo nam.” 
28 Eye Balak kplɔ Bileam yi Peor tame, afi si dze ŋgɔ Yesimon. 
29 Eye Bileam gblɔ na Balak be: “Ði vɔsamlekpui adre ɖe afi sia nam, eye na woakplɔ nyitsu adre kple agbo adre vɛ nam.” 
30 Ale Balak wɔ abe ale si tututu Bileam gblɔe ene, eye wòtsɔ nyitsu ɖeka kple agbo ɖeka sa vɔ le vɔsamlekpuiawo dometɔ ɖe sia ɖe dzi.

Numbers 24
1 Esi Bileam kpɔ be edze Afetɔ ŋu be yeayra Israel la, megayi ɖadi vɔ̃ na wo abe tsã ene o, ke boŋ etrɔ dze ŋgɔ gbea dzi. 
2 Esi Bileam fɔ mo dzi kpɔ Israel ƒe to vovovoawo le woƒe avɔgbadɔwo me la, Mawu ƒe gbɔgbɔ va edzi. 
3 Eye wòdo hamelo sia be: “Bileam, Beor vi ƒe numegbee nye esi,
Ŋutsu si ƒe ŋkuwo le ʋuʋu ɖi la ƒe gbee nye esi,
4 Ame si le Mawu ƒe nyawo sem la ƒe gbe, Ame si kpɔ Ŋusẽkatãtɔ la ƒe ŋutega, Ame si tsyɔ mo anyi esi eƒe ŋkuwo le te:
 5 Oo Yakob, wò agbadɔwo nya kpɔ loo! Oo Israel, wò avɔgbadɔwo dze ani ŋutɔ!
6 Wode didiƒe ke abe baliwo ene, Abe abɔ siwo le tɔsisi to ene,
Abe aloeti siwo Afetɔ do ene, 
Abe sederti siwo le tɔ to ene.
7 Tsi le tsyɔtsyɔm tso eƒe lãgbalẽgolo eveawo me,
Eye wòƒã eƒe nukuwo ɖe tɔ geɖewo to. Eƒe fia hã axɔ ŋkɔ wu Agag, Eye woado eƒe fiaɖuƒe ɖe dzi.
8 Mawu kplɔe tso Egipte gbɔna; Ele abe gbenyi ƒe dzo ene na wo.
Aɖu dukɔ siwo tee ɖe to la keŋ,
Agbã woƒe ƒuwo, eye wòatsɔ eƒe aŋutrɔwo akaka wo.
9 Ele adeklo dzi, etsyɔ akɔ anyi abe dzata ene,
Eye abe dzatatsu ene la, ame kae ake atsɛ aʋuʋui?
Ame siwo yraa wò la nye yayratɔwo,
Eye ame siwo ƒoa fi dea wò la nye fiƒodemewo.”
10 Ale Balak do dɔmedzoe ɖe Bileam ŋu hesi akpe gblɔ na Bileam be: “Ðe meyɔ wò be nàƒo fi ade nye futɔwo nam, eye kpɔ ɖa, èva yra wo zi etɔ̃ sɔŋ boŋ. 
11 Azɔ netsɔ nàtrɔ ayi mia de. Ðe meɖoe be made bubu gã ŋuwò hafi, gake kpɔ ɖa, Afetɔ te bubu la wò.”
12 Bileam ɖo eŋu na Balak be: “Ðe nyemegblɔ na ame siwo nèdɔ ɖe gbɔnye be, 
13 ‘Ne Balak atsɔ eƒe xɔ si klosalo kple sika yɔ fũu nam hã la, nyemate ŋu ada Afetɔ ƒe se dzi awɔ nyui alo vɔ̃ aɖeke le ɖokuinye si o. Nya si Afetɔ agblɔ nam la koe magblɔ’ oa? 
14 Azɔ metrɔ yina mía de. Na magblɔ nu si dukɔ sia ava wɔ wò dukɔ la le ŋkeke siwo gbɔna me la na wò.” 
15 Eye wòdo hamelo sia be: “Bileam, Beor vi ƒe numegbee nye esi,
Ŋutsu si ƒe ŋkuwo le ʋuʋu ɖi la ƒe gbee nye esi,
16 Ame si le Mawu ƒe nyawo sem la ƒe gbe, Ame si dze si Dziƒoʋĩtɔ la,
Ekpɔ Ŋusẽkatãtɔ la ƒe ŋutega
Esime wòtsyɔ mo anyi eye eƒe ŋkuwo le te:
17 Makpɔe, gake menye fifia o; Makpɔe, gake menye enumake o.
Ɣletivi aɖe ado tso Yakob me, Fiatikplɔ aɖe ado tso Israel me.
Agbã ŋgo na Moab,
Eye wòakaka ta le zinyèlawo katã nu.
18 Woaxɔ Edom, Ɛ̃, Seir azu eƒe futɔwo tɔ,
Ne Israel ɖe eƒe ŋusẽ fia.
19 Ame aɖe ado tso Yakob me aɖu futɔwo dzi,
Eye wòatsrɔ̃ ame siwo katã kpɔtɔ ɖe dua me.”
20 Esi wòtrɔ kpɔ Amalek la, egayi eƒe hameloa dzi be:
“Amalek ye nye gbãtɔ le dukɔwo dome,
Ke mlɔeba ava tsrɔ̃.”
21 Esi wòtrɔ kpɔ Kenitɔwo la, egayi eƒe hameloa dzi be:
“Èna wò aƒe li ke sesĩe, eye nètu wò nɔƒe ɖe agakpe dzi.
22 Ke ame aɖe ava tɔ dzo Kain. Ɣeyiɣi didi kae gasusɔ hafi Asiria naɖe aboyo wò?”
23 Eye wògayi eƒe hameloa dzi be: “Baba! Ame kae atsi agbe ne Mawu wɔ nu sia?
24 Tɔdziʋuwo atso Kitim ƒuta, Eye woawɔ fu Asiria,
Ɛ̃, woawɔ fu Eber.
Ke eya hã atsrɔ̃ keŋkeŋ.”
25 Emegbe Bileam tso hetrɔ dzo yi enɔƒe. Eye Balak hã lé eƒe mɔ.

Numbers 25
1 Esi Israel-viwo le Sitim la, dukɔ la de asi ahasiwɔwɔ me kple Moab nyɔnuwo. 
2 Nyɔnuawo va kpe dukɔ la na woƒe mawuwo ƒe vɔsawo, eye dukɔ la yi ɖaɖu nu, eye wode ta agu na woƒe mawuwo. 
3 Ale Israel wɔ ɖeka kpli wo hede ta agu na Baal-Peor; eya ta Afetɔ do dɔmedzoe ɖe Israel ŋu. 
4 Afetɔ gblɔ na Mose be: “Milé dukɔ la ƒe amegãwo eye miahe wo ɖe ati ŋu le ŋdɔkutsu dzatsɛ le Afetɔ ŋkume, ne Afetɔ ƒe dɔmedzoe ɖe Israel ŋu nu nafa.” 
5 Eye Mose gblɔ na Israel ƒe ʋɔnudrɔ̃lawo be: “Mia dometɔ ɖe sia ɖe newu nɔvia si de ta agu na Baal-Peor.”
6 Kasia Israel ŋutsu aɖee nye esi kplɔ Midian nyɔnu aɖe gbɔna nɔviawo dome le Mose kple Israel ƒe ha blibo la ŋkume, esime wole takpegbadɔa nu le avi fam. 
7 Esi nunɔla Aron vi Eleazar viŋutsu Finehas kpɔe la, etso enumake le ha la dome yi ɖatsɔ akplɔ ɖe asi. 
8 Eye wòti Israel ŋutsua yi eƒe agbadɔa me, eye wòtɔ akplɔ Israel ŋutsua kple nyɔnua siaa floi, to nyɔnua ƒe aŋɔme do. Eye fuwɔame la nu tso le Israel-viwo dome. 
9 Ame siwo fuwɔamea wu la le ame akpe blaeve vɔ ene.
10 Eye Afetɔ gblɔ na Mose be: 
11 “Nunɔla Aron viŋutsu Eleazar ƒe vi Finehas na nye dɔmedzoe nu fa ɖe Israel ŋu, elabena eʋã ŋu ɖe nunye le wo dome. Eya ta nyemetsrɔ̃ Israel-viwo keŋkeŋ le nye ŋuʋaʋã me o. 
12 Eya ta gblɔ nɛ be, ‘Mele ŋutifafanu blam kplii. 
13 Anye nunɔlanyenye ƒe nubabla si anɔ anyi ɖaa na eya kple via siwo ava ɖe eyome, elabena eʋã ŋu ɖe eƒe Mawu nu, eye wòlé avu na Israel-viwo.’”
14 Ke Israel ŋutsu si wowu kpe ɖe Midian nyɔnua ŋue nye Zimri, si nye Simeon viwo fofo ƒe aƒekɔ ƒe tatɔ Salu ƒe viŋutsu. 
15 Midian nyɔnu si wowu la ŋkɔe nye Kozbi, si nye Midiantɔ Zur, ame si nye amegã na wo fofowo ƒe aƒekɔwo la, ƒe vinyɔnu.
16 Emegbe Afetɔ gblɔ na Mose be: 
17 “Milé fu Midiantɔwo, eye miwu wo, 
18 elabena woto ayemɔ dzi flu mi kplɔ mi de nu vɔ̃ me le Peor kple Midiantɔwo ƒe amegã ƒe vinyɔnu Kozbi ƒe nudzɔdzɔa me. Eyae nye wo nɔvinyɔnu si wowu le gbe si gbe Peor ƒe nudzɔdzɔa he fuwɔame vɛ.”

Numbers 26
1 Le fuwɔame la megbe la, Afetɔ gblɔ na Mose kple nunɔla Aron viŋutsu Eleazar be: 
2 “Mixlẽ Israel ƒe ha blibo la me tɔ siwo katã xɔ ƒe blaeve kple edzivɔ, siwo katã ate ŋu ayi aʋa le Israel la, le wo fofowo ƒe aƒekɔwo nu.” 
3 Eye Mose kple nunɔla Eleazar ƒo nu kpli wo le Moab tagba, le Yordan nu le Yeriko gbɔ gblɔ be: 
4 “Mixlẽ ame siwo xɔ ƒe blaeve kple edzivɔ, abe ale si tututu Afetɔ de se na Mose ene.”
Ke Israel-vi siwo ʋu tso Egipte-nyigba dzi lae nye esi: 
5 Ruben si nye Israel ƒe ŋgɔgbevi la ƒe viwoe nye: Hanok kple eƒe ƒome; Palu kple eƒe ƒome; 
6 Hezron kple eƒe ƒome; Karmi kple eƒe ƒome. 
7 Ame siwo katã ŋkɔ woŋlɔ le Ruben viwo ƒe ƒomeawo me la le ame akpe blaene vɔ etɔ̃ alafa adre blaetɔ̃.
8 Palu vie nye Eliab. 
9 Eliab viwoe nye Nemuel, Datan kple Abiram. Datan sia kple Abiram nye adaŋudelawo le takpekpewo me, ame siwo kpe ɖe Kora ƒe ha la ŋu wowɔ dzre kple Mose kpakple Aron, esime wowɔ dzre kple Afetɔ.
10 Eye anyigba ke nu mi wo. Ke Kora ya ku esime dzo fiã eya kple ŋutsu alafa eve blaatɔ̃ siwo de edzi la. Ale wozu nuxlɔ̃amekpɔɖeŋu. 
11 Ke Kora viwo ya meku o.
12 Simeon viwoe nye esi le woƒe ƒomewo nu: Nemuel kple eƒe ƒome; Yamin kple eƒe ƒome; Yakin kple eƒe ƒome; 
13 Zera kple eƒe ƒome; Saul kple eƒe ƒome. 
14 Ame siwo katã ŋkɔ woŋlɔ le Simeon viwo ƒe ƒomeawo me la le ame akpe blaeve vɔ eve alafa eve.
15 Gad viwoe nye esi le woƒe ƒomewo nu: Zefon kple eƒe ƒome; Hagi kple eƒe ƒome; Suni kple eƒe ƒome; 
16 Ozni kple eƒe ƒome; Eri kple eƒe ƒome; 
17 Arod kple eƒe ƒome; Areli kple eƒe ƒome. 18 Ame siwo katã ŋkɔ woŋlɔ le Gad viwo ƒe ƒomeawo me la le ame akpe blaene alafa atɔ̃.
19 Yuda viwoe nye Er kple Onan. Ke Er kple Onan ku le Kanaan-nyigba dzi. 
20 Yuda viwoe nye esi le woƒe ƒomewo nu: Sela kple eƒe ƒome; Perez kple eƒe ƒome; Zera kple eƒe ƒome. 
21 Perez viwoe nye Hezron kple eƒe ƒome; Hamul kple eƒe ƒome. 
22 Ame siwo katã ŋkɔ woŋlɔ le Yuda ƒe ƒomeawo me la le ame akpe blaadre vɔ ade alafa atɔ̃.
23 Isakar viwoe nye esi le woƒe ƒomewo nu: Tola kple eƒe ƒome; Puwa kple eƒe ƒome; 
24 Yasub kple eƒe ƒome; Simron kple eƒe ƒome. 
25 Ame siwo katã ŋkɔ woŋlɔ le Isakar ƒe ƒomeawo me la le ame akpe blaade vɔ ene alafa etɔ̃.
26 Zebulon viwoe nye esi le woƒe ƒomewo nu: Sered kple eƒe ƒome; Elon kple eƒe ƒome; Yahlel kple eƒe ƒome. 
27 Ame siwo katã ŋkɔ woŋlɔ le Zebulon viwo ƒe ƒomeawo me la le ame akpe blaade alafa atɔ̃.
28 Yosef viwoe nye Manase kple Efrayim le woƒe ƒomewo nu. 
29 Manase viwoe nye Makir kple eƒe ƒome. Makir dzi Gilead. Gilead hã kple eƒe ƒome. 
30 Ame siawoe nye Gilead viwo: Yezer kple eƒe ƒome; Helek kple eƒe ƒome; 
31 Asriel kple eƒe ƒome; Sekem kple eƒe ƒome; 
32 Semida kple eƒe ƒome; Hefer kple eƒe ƒome. 
33 Ke viŋutsu aɖeke mele Hefer vi Zelofehad si o, negbe vinyɔnuwo ko, eye Zelofehad vinyɔnuawo ŋkɔwoe nye Mahla, Noa, Hogla, Milka kple Tirza. 
34 Ame siwo katã ŋkɔ woŋlɔ le Manase ƒe ƒomeawo me la le ame akpe blaatɔ̃ vɔ eve alafa adre.
35 Ame siawoe nye Efrayim viwo le woƒe ƒomewo nu: Sutela kple eƒe ƒome; Beker kple eƒe ƒome; Tahan kple eƒe ƒome. 
36 Ame siawoe nye Sutela viwo: Eran kple eƒe ƒome. 
37 Ame siwo katã ŋkɔ woŋlɔ le Efrayim viwo ƒe ƒomeawo me la le ame akpe blaetɔ̃ vɔ eve alafa atɔ̃. Ame siawoe nye Yosef viwo le woƒe ƒomewo nu.
38 Benyamin viwoe nye esiawo le woƒe ƒomewo nu: Bela kple eƒe ƒome; Asbel kple eƒe ƒome; Ahiram kple eƒe ƒome; 
39 Sefufam kple eƒe ƒome; Hufam kple eƒe ƒome. 
40 Bela viwoe nye Ard kple Naaman: Ard kple eƒe ƒome; Naaman kple eƒe ƒome. 
41 Ame siwo katã ŋkɔ woŋlɔ le Benyamin viwo ƒe ƒomeawo me la le ame akpe blaene vɔ atɔ̃ alafa ade.
42 Ame siawoe nye Dan viwo le woƒe ƒomewo nu: Suham kple eƒe ƒome. Woawoe nye Dan viwo ƒe ƒomeawo. 
43 Ame siwo katã ŋkɔ woŋlɔ le Suham viwo ƒe ƒomeawo me la le ame akpe blaade vɔ ene alafa ene.
44 Aser viwoe nye esi le woƒe ƒomewo nu: Yimna kple eƒe ƒome; Yiswi kple eƒe ƒome; Beria kple eƒe ƒome; 
45 Beria viwoe nye esi: Heber kple eƒe ƒome; Malkiel kple eƒe ƒome. 
46 Aser vinyɔnu ŋkɔe nye Sera. 
47 Ame siwo katã ŋkɔ woŋlɔ le Aser viwo ƒe ƒomeawo me la le ame akpe blaatɔ̃ vɔ etɔ̃ alafa ene.
48 Naftali viwoe nye esi le woƒe ƒomewo nu: Yahzel kple eƒe ƒome; Guni kple eƒe ƒome; 
49 Yezer kple eƒe ƒome; Silem kple eƒe ƒome. 
50 Ame siwo katã ŋkɔ woŋlɔ le Naftali ƒe ƒomeawo me la le ame akpe blaene vɔ atɔ̃ alafa ene.
51 Ame siwo katã ŋkɔ woŋlɔ le Israel-viwo dome la va le ame akpe alafa ade kple ɖeka alafa adre blaetɔ̃.
52 Emegbe Afetɔ gblɔ na Mose be: 
53 “Woama anyigba la na ame siawo wòazu woƒe domenyinu le woƒe ŋkɔwo ƒe xexlẽme nu. 
54 Ame siwo sɔ gbɔ la ƒe domenyinu nalolo, eye ame siwo mesɔ gbɔ o la ƒe domenyinu nanɔ ʋɛ. Woama domenyinu na wo ɖe ame siwo ŋkɔ woŋlɔ la ƒe agbɔsɔsɔ nu. 
55 Gake woadzidze nu ɖe anyigba la dzi hafi amae. Eye woaxɔ domenyinu la ɖe wo fofowo ƒe toawo ƒe ŋkɔwo nu. 
56 Woadzidze nu hafi ama domenyinu ɖe sia ɖe na ame siwo sɔ gbɔ kple ame siwo mesɔ gbɔ o la siaa.”
57 Ke Lewi vi siwo ƒe ŋkɔwo woŋlɔ le woƒe ƒomewo nu lae nye esi: Gerson kple eƒe ƒome; Kohat kple eƒe ƒome; Merari kple eƒe ƒome; 
58 Ame siawoe nye Lewi viwo ƒe ƒomeawo: Libni kple eƒe ƒome, Hebron kple eƒe ƒome, Mahli kple eƒe ƒome, Musi kple eƒe ƒome, Kora kple eƒe ƒome.
Kohat dzi Amram. 
59 Amram srɔ̃ ŋkɔe nye Yokebed, si nye nyɔnuvi si wodzi na Lewi le Egipte. Eye Yokebed dzi Aron, Mose, kple wo nɔvinyɔnu Miriam na Amram. 
60 Wodzi Nadab, Abihu, Eleazar kple Itamar na Aron. 
61 Ke Nadab kple Abihu ku le esi wodo dzo si ŋu womeɖe mɔ ɖo o le Afetɔ ŋkume ta.
62 Ŋutsu siwo katã xɔ tso ɣleti ɖeka, siwo ƒe ŋkɔ woŋlɔ la va le ame akpe blaeve vɔ etɔ̃. Womeŋlɔ woƒe ŋkɔ ɖe Israel-viwo dome o, elabena womana domenyinu aɖeke wo le Israel-viwo dome o.
63 Ame siawoe nye Israel-vi siwo ŋkɔ Mose kple nunɔla Eleazar ŋlɔ le Moab tagba le Yordan nu le Yeriko gbɔ. 
64 Ke Israel-vi siwo ŋkɔ Mose kple nunɔla Aron ŋlɔ esime wonɔ Sinai gbedzi la dometɔ aɖeke mele ame siawo dome o. 
65 Elabena Afetɔ gblɔ le wo ŋu be: “Woaku le gbea dzi godoo.” Eya ta wo dometɔ aɖeke mesusɔ o, negbe Kaleb, Yefune vi kple Yosua, Nun vi la ko.

Numbers 27
1 Eye Zelofehad, ame si nye Hefer vi, Gilead vi, Makir vi, Manase vi, tso Yosef vi Manase ƒe ƒomea me la, ƒe vinyɔnuwo va. Vianyɔnuawo ƒe ŋkɔwoe nye Mahla, Noa, Hogla, Milka kple Tirza. 
2 Wova tɔ ɖe Mose, nunɔla Eleazar, tatɔawo, kple ha blibo la ŋkume le takpegbadɔa nu gblɔ be: 
3 “Mía fofo ku le gbea dzi, eye menɔ Kora kple eƒe ha si tso ɖe Afetɔ ŋu la dome o, ke eya ŋutɔ ƒe nu vɔ̃ tae wòku ɖo, evɔ viŋutsu aɖeke mele esi o. 
4 Nu ka tae mía fofo ƒe ŋkɔ abu le eƒe ƒomea me le esi viŋutsu aɖeke mele esi o ta? Míeɖe kuku, na anyigba mí ɖe mía fofo nɔviŋutsuwo dome.” 
5 Ale Mose tsɔ woƒe nya la ɖo Afetɔ ŋkume.
6 Eye Afetɔ gblɔ na Mose be: 
7 “Zelofehad vinyɔnuwo ƒe nya la le eme. Eya ta na domenyinu wo ɖe wo fofo nɔviŋutsuwo dome, eye nàna wo fofo ƒe domenyinu la nayi ɖe wo si me. 
8 Gblɔ na Israel-viwo be, ‘Ne ŋutsu aɖe ku, evɔ viŋutsu aɖeke mele esi o la, ekema vianyɔnu nanyi eƒe dome. 
9 Eye ne vinyɔnu aɖeke mele esi o la, ekema nɔviaŋutsuwo nanyi eƒe dome. 
10 Eye ne nɔviŋutsu aɖeke mele esi o la, ekema fofoa nɔviŋutsuwo nanyi eƒe dome. 
11 Eye ne nɔviŋutsu aɖeke mele fofoa si o la, ekema ame si nye eƒe ƒometɔ kplikplikpli nanyi eƒe dome. Esia nanye se kple ɖoɖo na Israel-viwo, abe ale si tututu Afetɔ de se na Mose ene.’”
12 Emegbe Afetɔ gblɔ na Mose be: “Lia Abarim to sia, ne nàkpɔ anyigba si matsɔ ana Israel-viwo la ɖa. 
13 Ne èkpɔe vɔ la, ekema woatsɔ wò hã akpe ɖe tɔgbuiwòwo ŋu, abe ale si ko wotsɔ nɔviwò Aron kpe ɖe wo ŋu ene, 
14 elabena esime ha la wɔ dzre kplim le Zin gbedzi la, miewɔ ɖe nye se dzi hekɔ ŋunye le wo ŋkume esime mena tsi wo o. Esiae nye Meriba tsi le Kades le Zin gbedzi.”
15 Eye Mose gblɔ na Afetɔ be: 
16 “Afetɔ, Mawu si naa agbegbɔgbɔ amewo katã la, natia ame aɖe aɖo ha la nu, 
17 ame si anɔ wo ŋgɔ ayi kpli wo agagbɔ kpli wo, ame si akplɔ wo adoe agakplɔ wo agbɔe, ne Afetɔ ƒe ha la naganɔ abe alẽ siwo nu kplɔla mele o ene o.” 
18 Eye Afetɔ gblɔ na Mose be: “Kplɔ Yosua, Nun viŋutsu si me gbɔgbɔ nyui aɖe le la, nàtsɔ wò asi aɖo edzi. 
19 Eye nàna wòatɔ ɖe nunɔla Eleazar kple ha blibo la ŋkume, eye nàɖoe kplɔlae. 
20 Eye nàna wò ŋusẽ la ƒe ɖee, ne Israel ƒe ha blibo la katã naɖo toe. 
21 Nunɔla Eleazar ŋkumee wòatɔ ɖo ne wòatsɔ Urim la abia nu nɛ le Afetɔ ŋkume atsɔ akpɔ nya gbɔe. Eƒe gbeɖeɖe nue eya kple Israel ƒe ha blibo la ado go le, eye eƒe gbeɖeɖe nue woatrɔ agbɔ le.”
22 Eya ta Mose wɔ abe ale si tututu Afetɔ de se nɛ ene. Eye wòkplɔ Yosua va nunɔla Eleazar kple ha blibo la ŋkume, 
23 eye wòtsɔ eƒe asi ɖo edzi heɖoe kplɔlae, abe ale si tututu Afetɔ gblɔ na Mose ene.

Numbers 28
1 Afetɔ gagblɔ na Mose be: 
2 “De se na Israel-viwo be, ‘Mikpɔ egbɔ be yewotsɔ nye vɔsa, si nye nye nuɖuvɔ vɛ nam. Mitsɔ nye dzovɔsawo vɛ nam le woƒe ɣeyiɣi ɖoɖiwo dzi, be wòanye ʋeʋẽ lilili nam.’
3 “Eye nàgblɔ na wo be, ‘Nu si woatsɔ asa dzovɔ na Afetɔ ye nye esi: miatsɔ alẽtsui eve siwo sɔ blibo, siwo xɔ ƒe ɖekaɖeka asa numevɔ gbe sia gbe. 
4 Miatsɔ alẽtsui ɖeka asa vɔ le ŋdi me, eye miatsɔ alẽtsui evelia asa vɔ le anyinutsyɔɣi, 
5 eye miatsɔ wɔ memee efa me mama ɖe ewo ƒe akpa ɖeka si wotsɔ amiti ƒe ami nyuitɔ hin me mama ɖe ene ƒe akpa ɖeka dzabae la akpe ɖe eŋu asa nuɖuvɔe. 
6 Esiae nye gbe sia gbe numevɔ, abe ale si woɖoe na mi le Sinai To la gbɔ ene, be wòanye dzovɔsa si aʋẽ lilili na Afetɔ, 
7 eye miatsɔ nunovɔ hin me mama ɖe ene ƒe akpa ɖeka akpe ɖe alẽtsui ɖe sia ɖe ŋu. Kɔ nunovɔsa si nye aha muame la ɖe kɔkɔeƒe la na Afetɔ. 
8 Eye miatsɔ alẽtsui kemɛa asa vɔ le anyinutsyɔɣi. Miatsɔ nuɖuvɔ si le abe ŋdi me tɔa ene kple eŋuti nunovɔ akpe ɖe eŋu wòanye dzovɔsa si aʋẽ lilili na Afetɔ.
9 “‘Ke le Sabat ŋkeke dzi la, miatsɔ alẽtsui eve siwo sɔ blibo, siwo xɔ ƒe ɖekaɖeka kple wɔ memee efa me mama ɖe ewo ƒe akpa eve si wotsɔ ami dzabae la asa nuɖuvɔe, hekpe ɖe eŋuti nunovɔ la ŋu. 
10 Esia nanye numevɔ si woasa le Sabat ŋkeke dzi hekpe ɖe numevɔ kple nunovɔ si wosana ɖaa la ŋu.
11 “‘Le ɣleti ɖe sia ɖe ƒe gɔmedzedze la, miatsɔ nyitsui eve kple agbo ɖeka kpakple alẽtsui adre siwo sɔ blibo, siwo dometɔ ɖe sia ɖe xɔ ƒe ɖekaɖeka la, avɛ be woatsɔ asa numevɔ na Afetɔ, 
12 eye miatsɔ wɔ memee efa me mama ɖe ewo ƒe akpa etɔ̃ si wotsɔ ami dzabae la asa nuɖuvɔ akpe ɖe nyitsui ɖe sia ɖe ŋu. Mitsɔ wɔ memee efa me mama ɖe ewo ƒe akpa eve si wotsɔ ami dzabae la sa nuɖuvɔ kpe ɖe agbo ɖeka la ŋu. 
13 Eye miatsɔ wɔ memee efa me mama ɖe ewo ƒe akpa ɖeka si wotsɔ ami dzabae la asa nuɖuvɔ akpe ɖe alẽtsui ɖe sia ɖe ŋu. Numevɔsa si aʋẽ lilili kple dzovɔsa wònye na Afetɔ. 
14 Mitsɔ wain hin afã sa nunovɔ kpe ɖe nyitsui ɖe sia ɖe ŋu, eye miatsɔ hin me mama ɖe etɔ̃ ƒe akpa ɖeka akpe ɖe agbo la ŋu, kple hin me mama ɖe ene ƒe akpa ɖeka akpe ɖe alẽtsui ɖe sia ɖe ŋu. Esiae nye ɣleti sia ɣleti ƒe numevɔsa le ƒe bliboa me. 
15 Azɔ hã, miatsɔ gbɔ̃tsui ɖeka asa nuvɔ̃vɔ na Afetɔ hekpe ɖe numevɔ kple eŋuti nunovɔ si miesana ɖaa la ŋuti.
16 “‘Le ɣleti gbãtɔ ƒe ŋkeke wuienelia dzi la, miaɖu Afetɔ ƒe Ŋutitotozã la. 
17 Eye ɣleti sia ƒe ŋkeke wuiatɔ̃lia anye ŋkekenyui. Miaɖu abolo si wotsɔ amɔwɔ maʋamaʋã mè la ŋkeke adre sɔŋ. 
18 Ŋkeke gbãtɔ anye takpegbe kɔkɔe. Migawɔ dɔ sesẽ aɖeke o. 
19 Miatsɔ nyitsui eve kple agbo ɖeka kpakple alẽtsui adre, siwo dometɔ ɖe sia ɖe xɔ ƒe ɖeka la, asa dzovɔ, si nye numevɔsa na Afetɔ. Lã siwo miatsɔ avɛ la nasɔ blibo. 
20 Mitsɔ wɔ memee efa me mama ɖe ewo ƒe akpa etɔ̃ si wotsɔ ami dzabae la kpe ɖe nyitsu ɖe sia ɖe ŋu, eye miatsɔ wɔ memee efa me mama ɖe ewo ƒe akpa eve akpe ɖe agbo la ŋu. 
21 Miatsɔ efa me mama ɖe ewo ƒe akpa ɖeka akpe ɖe alẽtsui adreawo dometɔ ɖe sia ɖe ŋu, 
22 eye miatsɔ gbɔ̃ ɖeka asa nuvɔ̃vɔ atsɔ alé avu ɖe mia ta. 
23 Miasa vɔ siawo akpe ɖe ŋdi me numevɔ si wosana ɖaa la ŋu. 
24 Miasa vɔ sia ke gbe sia gbe hena ŋkeke adre be wòanye nuɖuɖu, si nye dzovɔ si aʋẽ lilili na Afetɔ. Miatsɔe akpe ɖe numevɔ kple nunovɔ si miesana ɖaa la ŋu. 
25 Ŋkeke adrea gbe nanye takpegbe kɔkɔe na mi. Migawɔ dɔ sesẽ aɖeke o.
26 “‘Gbe si gbe mieŋe agblemenuku gbãtɔwo hetsɔ nuku yeye vɛ be woatsɔ asa nuɖuvɔ na Afetɔ le miaƒe kwasiɖawo ƒe azãɖuɣi la, miawɔ takpekpe kɔkɔe. Migawɔ dɔ sesẽ aɖeke o. 
27 Mitsɔ nyitsui eve, agbo ɖeka kple alẽtsui adre, siwo dometɔ ɖe sia ɖe xɔ ƒe ɖeka la sa numevɔ, ne wòanye ʋeʋẽ lilili na Afetɔ, 
28 eye miatsɔ wɔ memee efa me mama ɖe ewo ƒe akpa etɔ̃ si wotsɔ ami dzabae asa nuɖuvɔ akpe ɖe nyitsu ɖe sia ɖe ŋu, eye miatsɔ efa me mama ɖe ewo ƒe akpa eve akpe ɖe agbo ɖeka la ŋu, 
29 eye miatsɔ efa me mama ɖe ewo ƒe akpa ɖeka akpe ɖe alẽtsui adreawo dometɔ ɖe sia ɖe ŋu, 
30 eye woatsɔ gbɔ̃tsui ɖeka alé avu ɖe mia ta. 
31 Miasa vɔ siawo akpe ɖe numevɔ kple nuɖuvɔ kpakple wo ŋuti nunovɔ siwo miesana ɖaa la ŋu. Lã siwo miatsɔ vɛ la nasɔ blibo.

Numbers 29
1 “‘Le ɣleti adrelia ƒe ŋkeke gbãtɔ dzi la, miawɔ takpekpe kɔkɔe. Migawɔ dɔ sesẽ aɖeke o. Kpẽkugbe wòanye na mi. 
2 Eye miatsɔ nyitsui ɖeka, agbo ɖeka kple alẽtsui adre, siwo dometɔ ɖe sia ɖe xɔ ƒe ɖeka, eye wosɔ blibo la, asa numevɔ be wòanye ʋeʋẽ lilili na Afetɔ; 
3 eye miatsɔ wɔ memee efa me mama ɖe ewo ƒe akpa etɔ̃ si wotsɔ ami dzabae la asa nuɖuvɔ akpe ɖe nyitsu la ŋu, eye miatsɔ efa me mama ɖe ewo ƒe akpa eve akpe ɖe agbo la ŋu, 
4 kple efa me mama ɖe ewo ƒe akpa ɖeka akpe ɖe alẽtsui adreawo dometɔ ɖe sia ɖe ŋu; 
5 eyome woatsɔ gbɔ̃tsui ɖeka asa nuvɔ̃vɔ atsɔ alé avu ɖe mia ta. 
6 Miasa vɔ siawo akpe ɖe numevɔ kple nuɖuvɔ si miesana ɣleti sia ɣleti kpakple numevɔ kple nuɖuvɔ kpakple wo ŋuti nunovɔ si miesana ɖaa la ŋu, be wòanye dzovɔsa si aʋẽ lilili na Afetɔ.
7 “‘Le ɣleti adrelia sia ƒe ŋkeke ewolia dzi la, miawɔ takpekpe kɔkɔe, eye miawɔ fu mia ɖokui. Migawɔ dɔ aɖeke o. 
8 Mitsɔ nyitsui ɖeka, agbo ɖeka, kple alẽtsui adre siwo dometɔ ɖe sia ɖe xɔ ƒe ɖeka la sa numevɔ be wòanye ʋeʋẽ lilili na Afetɔ. Lã siwo miatsɔ avɛ la nasɔ blibo. 
9 Eye miatsɔ wɔ memee efa me mama ɖe ewo ƒe akpa etɔ̃ si wotsɔ ami dzabae la asa nuɖuvɔ kpe ɖe nyitsui la ŋu, eye miatsɔ efa me mama ɖe ewo ƒe akpa eve akpe ɖe agbo ɖeka la ŋu, 
10 eye miatsɔ efa me mama ɖe ewo ƒe akpa ɖeka akpe ɖe alẽtsui adreawo dometɔ ɖe sia ɖe ŋu; 
11 eyome woatsɔ gbɔ̃tsui ɖeka asa nuvɔ̃vɔ akpe ɖe nuvɔ̃vɔsa si wotsɔ lé avui la ŋu, eye miatsɔ numevɔ kple nuɖuvɔ kpakple wo ŋuti nunovɔ si wosana ɖaa la akpe ɖe eŋu.
12 “‘Le ɣleti adrelia ƒe ŋkeke wuiatɔ̃lia dzi la, miawɔ takpekpe kɔkɔe. Migawɔ dɔ sesẽ aɖeke o, eye miaɖu ŋkekenyui na Afetɔ ŋkeke adre sɔŋ. 
13 Mitsɔ nyitsui wuietɔ̃, agbo eve kple alẽtsui wuiene siwo dometɔ ɖe sia ɖe xɔ ƒe ɖeka la, sa numevɔ be wòanye dzovɔ si aʋẽ lilili na Afetɔ. Woanye lã siwo sɔ blibo. 
14 Eye miatsɔ wɔ memee efa me mama ɖe ewo ƒe akpa etɔ̃ si wotsɔ ami dzabae la asa nuɖuvɔ kpe ɖe nyitsui wuietɔ̃awo dometɔ ɖe sia ɖe ŋu, eye miatsɔ efa me mama ɖe ewo ƒe akpa eve akpe ɖe agbo eveawo dometɔ ɖe sia ɖe ŋu, 
15 eye miatsɔ efa me mama ɖe ewo ƒe akpa ɖeka akpe ɖe alẽtsui wuieneawo dometɔ ɖe sia ɖe ŋu; 
16 eyome miatsɔ gbɔ̃tsui ɖeka asa nuvɔ̃vɔ hekpe ɖe numevɔ kple nuɖuvɔ kpakple eŋuti nunovɔ si miesana ɖaa la ŋu.
17 “‘Le ŋkeke evea gbe la, miatsɔ nyitsui wuieve, agbo eve kple alẽtsui wuiene siwo dometɔ ɖe sia ɖe xɔ ƒe ɖeka eye wosɔ blibo la asa vɔe; 
18 eye miatsɔ wo ŋuti nuɖuvɔ kple nunovɔ akpe ɖe nyitsuawo, agboawo, kple alẽtsuiawo ŋu ɖe woƒe xexlẽme nu le vɔsaɖoɖo la nu; 
19 eyome woatsɔ gbɔ̃tsui ɖeka asa nuvɔ̃vɔ akpe ɖe numevɔ kple nuɖuvɔ kpakple eŋuti nunovɔ si miesana ɖaa la ŋu.
20 “‘Le ŋkeke etɔ̃a gbe la, miatsɔ nyitsu wuiɖekɛ, agbo eve kple alẽtsui wuiene siwo dometɔ ɖe sia ɖe xɔ ƒe ɖeka eye wosɔ blibo la asa vɔe; 
21 eye miatsɔ wo ŋuti nuɖuvɔ kple nunovɔ akpe ɖe nyitsuawo, agboawo kple alẽtsuiawo ŋu ɖe woƒe xexlẽme nu le vɔsaɖoɖo la nu; 
22 eyome woatsɔ gbɔ̃ ɖeka asa nuvɔ̃vɔ akpe ɖe numevɔ kple nuɖuvɔ kpakple eŋuti nunovɔ si miesana ɖaa la ŋu.
23 “‘Le ŋkeke enea gbe la, miatsɔ nyitsu ewo, agbo eve kple alẽtsui wuiene siwo dometɔ ɖe sia ɖe xɔ ƒe ɖeka eye wosɔ blibo la asa vɔe; 
24 eye miatsɔ wo ŋuti nuɖuvɔ kple nunovɔ akpe ɖe nyitsuawo, agboawo kple alẽtsuiawo ŋu ɖe woƒe xexlẽme nu le vɔsaɖoɖo la nu; 
25 eyome woatsɔ gbɔ̃tsui ɖeka asa nuvɔ̃vɔ akpe ɖe numevɔ kple nuɖuvɔ kpakple eŋuti nunovɔ si miesana ɖaa la ŋu.
26 “‘Le ŋkeke atɔ̃a gbe la, miatsɔ nyitsu asieke, agbo eve kple alẽtsui wuiene siwo dometɔ ɖe sia ɖe xɔ ƒe ɖeka eye wosɔ blibo la asa vɔe; 
27 eye miatsɔ wo ŋuti nuɖuvɔ kple nunovɔ akpe ɖe nyitsuawo, agboawo kple alẽtsuiawo ŋu ɖe woƒe xexlẽme nu le vɔsaɖoɖo la nu; 
28 eyome woatsɔ gbɔ̃ ɖeka asa nuvɔ̃vɔ akpe ɖe numevɔ kple nuɖuvɔ kpakple eŋuti nunovɔ si miesana ɖaa la ŋu.
29 “‘Le ŋkeke adea gbe la, miatsɔ nyitsu enyi, agbo eve kple alẽtsui wuiene siwo dometɔ ɖe sia ɖe xɔ ƒe ɖeka eye wosɔ blibo la asa vɔe; 
30 eye miatsɔ wo ŋuti nuɖuvɔ kple nunovɔ akpe ɖe nyitsuawo, agboawo kple alẽtsuiawo ŋu ɖe woƒe xexlẽme nu le vɔsaɖoɖo la nu; 
31 eyome woatsɔ gbɔ̃ ɖeka asa nuvɔ̃vɔ akpe ɖe numevɔ kple nuɖuvɔ kpakple eŋuti nunovɔ si miesana ɖaa la ŋu.
32 “‘Le ŋkeke adrea gbe la, miatsɔ nyitsu adre, agbo eve kple alẽtsui wuiene siwo dometɔ ɖe sia ɖe xɔ ƒe ɖeka eye wosɔ blibo la asa vɔe; 
33 eye miatsɔ wo ŋuti nuɖuvɔ kple nunovɔ akpe ɖe nyitsuawo, agboawo kple alẽtsuiawo ŋu ɖe woƒe xexlẽme nu le vɔsaɖoɖo la nu; 
34 eyome woatsɔ gbɔ̃ ɖeka asa nuvɔ̃vɔ akpe ɖe numevɔ kple nuɖuvɔ kpakple eŋuti nunovɔ si miesana ɖaa la ŋu.
35 “‘Le ŋkeke enyia gbe la, miawɔ takpekpe tɔxɛ. Migawɔ dɔ sesẽ aɖeke o. 
36 Mitsɔ nyitsu ɖeka, agbo ɖeka kple alẽtsui adre siwo dometɔ ɖe sia ɖe xɔ ƒe ɖeka eye wosɔ blibo la, sa numevɔ be wòanye dzovɔsa si aʋẽ lilili na Afetɔ; 
37 eye miatsɔ wo ŋuti nuɖuvɔ kple nunovɔ akpe ɖe nyitsu la, agbo la kple alẽtsuiawo ŋu ɖe woƒe xexlẽme nu le vɔsaɖoɖo la nu; 
38 eye woatsɔ gbɔ̃ ɖeka asa nuvɔ̃vɔ akpe ɖe numevɔ kple nuɖuvɔ kpakple eŋuti nunovɔ si miesana ɖaa la ŋu.
39 “‘Nu siawoe miatsɔ asa vɔe na Afetɔ le miaƒe ŋkekenyuiwo dzi hekpe ɖe miaƒe adzɔgbeɖenunana kple lɔlɔ̃nu faa nunana siwo miatsɔ asa numevɔwo, nuɖuvɔwo, nunovɔwo kple ŋutifafavɔwo ŋu.’” 
40 Eye Mose gblɔ se siwo katã Afetɔ de nɛ la na Israel-viwo.

Numbers 30
1 Eye Mose gblɔ na Israel-toawo ƒe tatɔwo be: “Nya si Afetɔ gblɔe nye esi: 
2 Ne ŋutsu aɖe ɖe adzɔgbe na Afetɔ alo ka atam be yeatsri nane na ye ɖokui la, megada eƒe nya la dzi o. Newɔ atam sia atam si wòka la dzi.
3 “Eye ne nyɔnu aɖe ɖe adzɔgbe na Afetɔ, alo ɖe adzɔgbe le fofoa ƒe me le eƒe ɖetugbuime be yeatsri nane, 
4 eye fofoa se eƒe adzɔgbeɖeɖea alo nu si wòbe yeatsri na ye ɖokui, gake fofoa zi kpi, megblɔ nya aɖeke o la, ekema newɔ eƒe adzɔgbeɖeɖeawo alo atam sia atam si wòka be yeatsri nane na ye ɖokui la dzi. 
5 Ke ne fofoa se eƒe adzɔgbeɖeɖeawo alo atam si wòka be yeatsri nane na ye ɖokui eye wògbe nɛ la, ekema mawɔ edzi o. Afetɔ atsɔe akee, elabena fofoa melɔ̃ ɖe edzi nɛ o.
6 “Ke ne ɖetugbui aɖe ɖe adzɔgbe alo tsɔ dzitsitsi ka atam tsɔ bla eɖokui hafi va ɖe srɔ̃, 
7 eye srɔ̃a see gake wòzi kpi, megblɔ nya aɖeke le gbe si gbe wòsee o la, ekema newɔ eƒe adzɔgbeɖeɖeawo alo atam si wòka be yeatsri nane na ye ɖokui la dzi. 
8 Ke ne srɔ̃a melɔ̃ ɖe edzi nɛ o le gbe si gbe wòsee la, ekema ŋutsua te fli ɖe adzɔgbe si wòɖe alo ŋugbe si wòdo dzitsitsitɔe tsɔ bla eɖokui la me, eye Afetɔ atsɔe akee.
9 “Gake ne ahosi alo nyɔnu si srɔ̃a gbe ɖe adzɔgbe la, ekema newɔ nu sia nu si wòtsɔ ɖo eɖokui dzi la dzi.
10 “Ke ne nyɔnua le atsuƒe hafi ɖe adzɔgbe alo ka atam be yeatsri nane na ye ɖokui, 
11 eye srɔ̃a see gake wòzi kpi alo megbee nɛ o la, ekema newɔ eƒe adzɔgbeɖeɖewo katã alo atam sia atam si wòka be yeatsri nane na ye ɖokui la dzi. 
12 Ke ne srɔ̃a te fli ɖe adzɔgbe si nyɔnua ɖe, alo nu si wòka atam be yeatsri na ye ɖokui la me keŋkeŋ le gbe si gbe wòsee la, ekema mawɔ wo dzi o. Srɔ̃a gblẽ wo me, eye Afetɔ atsɔe akee. 
13 Adzɔgbe alo atam sia atam si wòaka be yeatsri nane alo be yeate nane ye ɖokui la, srɔ̃a nalɔ̃ ɖe edzi loo alo wòate fli ɖe eme. 
14 Ke ne srɔ̃a zi kpi, megblɔ nya aɖeke o eye ŋkekewo va yi la, ekema elɔ̃ ɖe eƒe adzɔgbeɖeɖewo katã alo nu siwo katã wòka atam be yeatsri la dzi. Elɔ̃ ɖe wo dzi, elabena ezi kpi eye megbee nɛ le gbe si gbe wòsee o. 
15 Ke ne esee gake wòlala ŋkeke geɖe va yi hafi va gblẽ wo me keŋkeŋ la, ekema nyɔnua ƒe fɔɖiɖi anɔ ŋutsua dzi.
16 “Esiawoe nye ɖoɖo siwo Afetɔ tsɔ na Mose le ŋutsu kple srɔ̃a kpakple vifofo kple vianyɔnu si nye ɖetugbui le fofoa ƒe me la ƒe adzɔgbeɖeɖewo ŋuti.”

Numbers 31
1 Afetɔ gblɔ na Mose be: 
2 “Bia hlɔ̃ Midiantɔwo na Israel-viwo. Emegbe woatsɔ wò akpe ɖe tɔgbuiwòwo ŋu.”
3 Eya ta Mose gblɔ na dukɔ la be: “Mina ŋutsuwo nabla aʋakpa aho ɖe Midian ŋu ne Afetɔ ƒe hlɔ̃biabia nava Midian dzi. 
4 Israel ƒe to ɖe sia ɖe naɖo ame akpe ɖeka ɖe aʋa la.” 
5 Eya ta wotia ame akpe ɖeka le to sia to me le Israel ƒe ame akpeakpeawo dome; ale ame akpe wuieve bla aʋakpa.
6 Mose ɖo ame akpe ɖeka tso toawo dometɔ ɖe sia ɖe me ɖe aʋa la, ena nunɔla Eleazar vi Finehas yi kple aʋakɔ la, eye wòtsɔ nu kɔkɔeawo kple kpẽ siwo woaku atsɔ ana mɔfiame aʋakɔawo la de esi. 
7 Woyi ɖawɔ aʋa kple Midian, abe ale si tututu Afetɔ de se na Mose ene, eye wowu ŋutsuwo katã. 
8 Wowu Midian fia atɔ̃ siwo nye Evi, Rekem, Zur, Hur kple Reba kpe ɖe ame bubuawo ŋu. Wowu Bileam, Beor vi hã kple yi. 
9 Ke Israel-viwo ɖe aboyo Midian nyɔnuwo kple wo vi suewo ya. Woha woƒe aƒemelãwo, woƒe lãhawo kple woƒe nuwo katã hã. 
10 Wotɔ dzo du siwo katã me wole kple woƒe asaɖawo katã. 
11 Eye wolɔ woƒe nuwo katã hekplɔ ame siwo woɖe aboyoe kple aƒemelãwo katã dzoe. 
12 Wokplɔ aboyomeawo hetsɔ nu siwo woha kpakple aboyonuawo va Mose kple nunɔla Eleazar kpakple Israel ƒe ha la ŋkume le asaɖa la gbɔ, le Moab tagba le Yordan nu le Yeriko kasa.
13 Mose kple nunɔla Eleazar kpakple ha la ƒe tatɔwo katã do go yi ɖakpe wo le asaɖa la godo. 
14 Ke Mose do dziku ɖe aʋakplɔla siwo nye tatɔwo le ame akpewo nu kple tatɔwo le ame alafawo nu, siwo trɔ gbɔ tso aʋa la ŋu. 
15 Eye Mose gblɔ na wo be: “Ðe miexɔ nyɔnuwo katã ɖe agbea? 
16 Kpɔ ɖa, woawoe wozã tsɔ ble Israel-viwo, be womewɔ nuteƒe na Afetɔ o le Peor ƒe nudzɔdzɔ la me le Bileam ƒe aɖaŋuɖoɖo nu, eye esia kplɔ dɔvɔ̃ ƒu Afetɔ ƒe ha la. 
17 Eya ta miwu ŋutsuvi siwo katã le ɖeviawo dome, eye miwu nyɔnu siwo katã nya ŋutsu la hã. 
18 Gake mixɔ nyɔnuvi siwo menya ŋutsu o la ɖe agbe. 
19 Ke mitsi asaɖa la godo ŋkeke adre. Ame sia ame si wu ame aɖe alo ame sia ame si ka asi ame si wowu ŋu la, nakɔ eɖokui ŋu le ŋkeke etɔ̃a gbe kple ŋkeke adrea gbe, mia kple miaƒe aboyomeawo siaa. 
20 Eye mikɔ awu sia awu, nu sia nu si wotsɔ lãgbalẽ wɔ, nu sia nu si wotsɔ gbɔ̃fu wɔ, kple atinuwo katã ŋu na mia ɖokuiwo.”
21 Eye nunɔla Eleazar gblɔ na ame siwo de aʋa la be: “Esiae nye se si Afetɔ de na Mose, 
22 ‘Sika, klosalo, akɔbli, gayibɔ, gaɣi kple tsumi, 
23 kple nu sia nu si ate ŋu ato dzo me la, mitsɔe haha dzoe, ne eŋu nakɔ. Ke woagatsɔ nuŋukɔtsi hã akɔ eŋu. Eye nu sia nu si mate ŋu ato dzo me o la, mitsɔ tsi klɔ wo ŋu. 
24 Eye mianya miaƒe awuwo le ŋkeke adrea gbe ne mia ŋu nakɔ, emegbe la, miate ŋu ava asaɖa la me.’”
25 Afetɔ gagblɔ na Mose be: 
26 “Wò kple nunɔla Eleazar kpakple ha la ƒe tatɔ siwo le wo fofowo ƒe aƒekɔawo nu mixlẽ nu siwo woha, amegbetɔ kple aƒemelã siwo woɖe aboyoe la. 
27 Eye nàma nu siwo woha la ɖe akpa eve na ame siwo wodɔ ɖe aʋa la kple ha la me tɔ susɔeawo katã. 
28 Eye nàxɔ luʋɔ ɖeka tso amegbetɔ, nyi, tedzi kple alẽ alafa atɔ̃ ɖe sia ɖe dome le ame siwo de aʋa la si be wòanye adzɔ na Afetɔ. 
29 Miaɖee le nuawo ƒe afã si woxɔ la me atsɔ ana nunɔla Eleazar be wòanye adzɔ na Afetɔ. 
30 Eye le nuawo ƒe afã si Israel-viwo xɔ gome la, nàxɔ amegbetɔ, nyi, tedzi, alẽ kple aƒemelã ɖe sia ɖe ƒomevi ɖeka le blaatɔ̃ ɖe sia ɖe dome atsɔ ana Lewi viwo, ame siwo wɔa Afetɔ ƒe avɔgbadɔ la me dɔwo.”
31 Eye Mose kple nunɔla Eleazar wɔ abe ale si tututu Afetɔ de se na Mose ene. 
32 Aboyonu siwo katã aʋadelawo tsɔ gbɔe la ƒe susɔeawo le alẽ akpe alafa ade blaadre vɔ atɔ̃, 
33 nyi akpe blaadre vɔ eve, 
34 kple tedzi akpe blaade vɔ ɖekɛ. 35 Ke nyɔnuvi siwo menya ŋutsu o la katã le nyɔnu akpe blaetɔ̃ vɔ eve. 
36 Nuawo ƒe afã si ame siwo de aʋa xɔ la le alẽ akpe alafa etɔ̃ blaetɔ̃ vɔ adre alafa atɔ̃. 
37 Eye adzɔ si woɖe na Afetɔ la le alẽ alafa ade blaadre vɔ atɔ̃. 
38 Nyiawo le akpe blaetɔ̃ vɔ ade, eye adzɔ si woɖe na Afetɔ la le nyi blaadre vɔ eve. 
39 Tedziawo le akpe blaetɔ̃ alafa atɔ̃, eye adzɔ si woɖe na Afetɔ la le tedzi blaade vɔ ɖekɛ. 
40 Amewo le akpe wuiade, eye adzɔ si woɖe na Afetɔ la le ame blaetɔ̃ vɔ eve. 
41 Eye Mose tsɔ adzɔ si wona Afetɔ la de asi na nunɔla Eleazar, abe ale si tututu Afetɔ de se nɛ ene.
42 Esi Mose ɖe aʋadelawo tɔ na wo vɔ la, nuawo ƒe afã si susɔ na Israel ƒe ha susɔea ye nye esi: 
43 alẽawo ƒe afã susɔea le akpe alafa etɔ̃ blaetɔ̃ vɔ adre alafa atɔ̃, 
44 nyiawo le akpe blaetɔ̃ vɔ ade, 
45 tedziawo le akpe blaetɔ̃ alafa atɔ̃, 
46 eye amewo le akpe wuiade. 
47 Azɔ le afã si nye Israel-viwo tɔ me la, Mose xɔ amegbetɔ kple aƒemelã ɖeka tso blaatɔ̃ ɖe sia ɖe dome tsɔ na Lewi viwo, ame siwo wɔa dɔ le Afetɔ ƒe avɔgbadɔ la me, abe ale si tututu Afetɔ de se na Mose ene.
48 Eye aʋakplɔla siwo woɖo ame akpewo nu, kple tatɔ siwo le ame akpewo kple ame alafawo nu la, va Mose gbɔ, 
49 eye wogblɔ nɛ be: “Wò dɔlawo xlẽ aʋawɔla siwo le míaƒe dzikpɔkpɔ te la, eye ɖeka hɔ̃ hã mebu le wo dome o. 
50 Eya ta na mía dometɔ ɖe sia ɖe natsɔ nu si wòkpɔ la ƒe ɖe vɛ wòanye nunana na Afetɔ, sikanuwo, afɔgɛwo, alɔnugɛwo, ŋkɔsigɛwo, togɛwo kple atsyɔ̃ɖonuwo, ne woalé avu ɖe mía ta le Afetɔ ŋkume.”
51 Eya ta Mose kple nunɔla Eleazar xɔ sika la kple atsyɔ̃ɖonuawo le wo si. 
52 Sikanu siwo tatɔ siwo le ame akpewo kple ame alafawo nu dzɔ na Afetɔ la katã va le sekel akpe wuiade alafa adre blaatɔ̃. 
53 Ame siwo de aʋa la dometɔ ɖe sia ɖe ha nuwo na eɖokui. 
54 Ale Mose kple nunɔla Eleazar xɔ sika la le tatɔ siwo le ame akpewo nu kple esiwo le ame alafawo nu la si tsɔ va takpegbadɔ la me, be wòanye ŋkuɖodzinu na Israel-viwo le Afetɔ ŋkume.

Numbers 32
1 Ke lãha gbogbo aɖe va le Ruben viwo kple Gad viwo si, ɛ̃, wosɔ gbɔ ŋutɔ. Eye wolé ŋku ɖe Yazer-nyigba kple Gilead-nyigba ŋu, eye wokpɔ be nutoa nyo na lãnyinyi. 
2 Eya ta Gad viwo kple Ruben viwo va gblɔ na Mose kple nunɔla Eleazar kpakple ha la ƒe tatɔwo be: 
3 “Míekpɔ be Atarot, Dibon, Yazer, Nimra, Hesbon, Eleale, Sebam, Nebo kple Beon, 
4 anyigba siwo Afetɔ xɔ le Israel ƒe ha la ŋgɔ la, nye anyigba si nyo na lãnyinyi, eye lãha gbogbo aɖewo le wò dɔlawo si.” 
5 Woyi edzi gblɔ be: “Ne ève mía nu la, ekema na woatsɔ anyigba sia ana wò dɔlawo wòazu wo tɔ. Mègana míatso Yordan o.”
6 Eye Mose gblɔ na Gad viwo kple Ruben viwo be: “Ðe mia nɔviwo ayi aʋa, evɔ miawo ya miatsi afi sia? 
7 Nu ka tae miele didim be miaɖe dzi le Israel-viwo ƒo be woagatso tɔ la ayi anyigba si Afetɔ be yeatsɔ ana wo godoo la dzi o? 
8 Aleae mia fofowo wɔ esime medɔ wo tso Kades-Barnea be woayi aɖakpɔ anyigba la ɖa. 
9 Esi woyi Eskol Balia me, eye wokpɔ anyigbaa la, wova ɖe dzi le Israel-viwo ƒo be woagayi anyigba si Afetɔ be yeatsɔ ana wo la dzi o. 
10 Afetɔ ƒe dziku fla gbe ma gbe, eye wòka atam be: 
11 ‘Ŋutsu siwo ʋu tso Egipte, siwo xɔ ƒe blaeve kple edzivɔ la, makpɔ anyigba si meka atam be matsɔ ana Abraham, Isak kple Yakob la o, elabena womedze yonyeme kple dzi blibo o, 
12 negbe Kaleb, si nye Kenizitɔ Yefune ƒe vi kple Yosua, Nun vi la ko, elabena woawo dze Afetɔ yome kple dzi blibo.’ 
13 Ale Afetɔ ƒe dziku fla ɖe Israel ŋu, eye wòna wotsa tsaglãla le gbea dzi ƒe blaene, va se ɖe esime dzidzime si nɔ nu vɔ̃ɖi wɔm le Afetɔ ŋkume la katã nu yi. 
14 Kpɔ ɖa, miexɔ ɖe mia fofowo teƒe abe nu vɔ̃ wɔlawo ƒe dzidzimeviwo ene be miana Afetɔ nagado dɔmedzoe ɖe Israel ŋu ɖe edzi. 
15 Ne mietrɔ le eyome la, eya hã agagblẽ ameha la ɖe gbea dzi, ekema miawoe he vɔ̃ va dukɔ blibo sia dzi.”
16 Emegbe wogava egbɔ gblɔ be: “Na míatɔ glikpɔwo na míaƒe lãhawo ɖe afi sia, eye míatso duwo na mía viwo. 
17 Ke míawo ŋutɔwo ya míabla aʋakpa anɔ Israel-viwo ŋgɔ, va se ɖe esime míekplɔ wo va ɖo wo nɔƒe, ke mía viwo nanɔ du sesẽwo me ahanɔ dedie tso anyigba la dzi nɔlawo si me. 
18 Míatrɔ ava míaƒe aƒewo me o, va se ɖe esime Israel-viwo dometɔ ɖe sia ɖe xɔ anyigba si nye eƒe domenyinu. 
19 Míaxɔ domenyinu kpli wo le Yordan ƒe go kemɛ dzi o, elabena míaƒe domenyinu le Yordan ƒe akpa si, le ɣedzeƒe gome.”
20 Eye Mose gblɔ na wo be: “Ne miawɔ esia ko: Mibla akpa le Afetɔ ŋkume na aʋa la; 
21 eye ne mia dometɔ ɖe sia ɖe bla akpa eye wòtso Yordan le Afetɔ ŋkume, esime wònya eƒe futɔwo ɖa le eŋgɔ, 
22 va se ɖe esime miexɔ anyigba la le Afetɔ ŋkume, eye emegbe mietrɔ gbɔ la, eya ko hafi miaɖi fɔ le Afetɔ kple Israel ŋkume o. Ekema anyigba sia azu mia tɔ le Afetɔ ŋkume. 
23 Ke ne miewɔe alea o la, ekema miewɔ nu vɔ̃ ɖe Afetɔ ŋu. Eye minyae be miakpɔ miaƒe nu vɔ̃wo me tsonu. 
24 Miate ŋu atso duwo na mia viwo, eye miatɔ kpɔ na miaƒe lãhawo, gake ele be miawɔ ŋugbe si miedo la dzi.”
25 Eye Gad viwo kple Ruben viwo gblɔ na Mose be: “Wò dɔlawo awɔ abe ale si tututu mía aƒetɔ de se ene. 
26 Mía viwo, mía srɔ̃wo, míaƒe lãhawo kple míaƒe aƒemelãwo katã anɔ afi ma le Gilead duwo me, 
27 ke wò dɔlaŋutsu siwo bla akpa la atso tɔa le Afetɔ ŋkume awɔ aʋa la, abe ale si tututu mía aƒetɔ le egblɔm ene.”
28 Eya ta Mose gblɔ woƒe nyawo na nunɔla Eleazar kple Yosua, Nun vi, kpakple Israel-toawo ƒe tatɔ siwo le wo fofowo ƒe aƒekɔwo nu. 
29 Mose gblɔ na wo be: “Ne Gad viwo kple Ruben viwo dometɔ ɖe sia ɖe bla aʋakpa hetso Yordan kpli mi le Afetɔ ŋkume, eye miexɔ anyigba si le mia ŋgɔ la, ekema miatsɔ Gilead-nyigba ana wo wòazu wo tɔ. 
30 Ke ne womebla aʋakpa tso tɔa kpli mi o la, ekema woaxɔ anyigba le mia dome le Kanaan-nyigba la dzi.”
31 Eye Gad viwo kple Ruben viwo ɖo eŋu be: “Nya si Afetɔ gblɔ na wò dɔlawo la dzie míawɔ. 
32 Míabla aʋakpa atso tɔa le Afetɔ ŋkume ayi Kanaan-nyigba dzi, ke míaƒe domenyinu si míaxɔ la nanɔ Yordan ƒe go sia dzi.” 
33 Ale Mose tsɔ Amori-fia Sihon ƒe fiaɖuƒe kple Basan-fia Og ƒe fiaɖuƒe, anyigba la kple edzi duwo kpakple du siwo le nuto mawo me na Gad viwo kple Ruben viwo kpakple Yosef vi Manase-toa ƒe afã la.
34 Eye Gad viwo tso du siwo nye Dibon, Atarot, Aroer, 
35 Atrot-Sofan, Yazer, Yogbeha, 
36 Bet-Nimra kple Bet-Haran, siwo nye du siwo ŋu woɖo gli sesẽwo ɖo, eye wotɔ glikpɔwo na woƒe lãhawo. 
37 Eye Ruben viwo tso du siwo nye Hesbon, Eleale, Kiriatayim, 
38 Nebo kple Baal-Meon, eye wotrɔ du siawo ƒe ŋkɔwo hetsɔ ŋkɔ bubu na wo, eye wotso Sibma hã.
39 Manase vi Makir viwo ho yi Gilead hexɔe, eye wonya Amoritɔ siwo le eme. 
40 Eya ta Mose tsɔ Gilead na Manase vi Makir wònɔ eme. 
41 Eye Manase vi Yair yi ɖaxɔ woƒe kɔƒewo eye wòtsɔ ŋkɔ na wo be Havot-Yair. 
42 Eye Noba ho yi ɖaxɔ Kenat kple eŋu duwo, eye wòtsɔ eya ŋutɔ ƒe ŋkɔ nɛ heyɔe be Noba.

Numbers 33
1 Esiawoe nye teƒe siwo Israel-viwo ƒe hatsotso siwo ʋu tso Egipte-nyigba dzi la to le Mose kple Aron ƒe kpɔkplɔ te. 
2 Mose ŋlɔ teƒeteƒe siwo woto le woƒe mɔzɔzɔa me la ɖi abe ale si Afetɔ de see ene, esiawoe nye teƒe siwo woto: 
3 Woho tso Ramses le ɣleti gbãtɔ ƒe ŋkeke wuiatɔ̃lia dzi. Le Ŋutitoto la ƒe ŋufɔke la, Israel-viwo ƒe alɔ de dzi wodzo le Egiptetɔwo katã ŋkume. 
4 Ɣemaɣi la, Egiptetɔwo nɔ woƒe ŋgɔgbevi siwo Afetɔ wu la ɖim, elabena Afetɔ drɔ̃ ʋɔnu woƒe mawuwo.
5 Eya ta Israel-viwo ho tso Ramses heva ƒu asaɖa anyi ɖe Sukot. 
6 Woho tso Sukot heva Etam, le gbegbe la nu. 
7 Woho tso Etam hetrɔ ɖo ta Pihahirot le Baal-Zefon ŋgɔ, eye wova ƒu asaɖa anyi ɖe Migdol ŋgɔ. 
8 Woho tso Pihahirot heto atsiaƒu la me yi gbea dzi, eye wozɔ mɔ ŋkeke etɔ̃ to Etam gbedzi heva Mara.
9 Woho tso Mara heva Elim. Ke tsidzɔƒe wuieve kple deti blaadre le Elim, eya ta woƒu asaɖa anyi ɖe afi ma. 
10 Woho tso Elim heva Ƒudzĩ la nu. 
11 Woho tso Ƒudzĩ la nu heva Sin gbedzi. 
12 Woho tso Sin gbedzi heva Dofka. 
13 Woho tso Dofka heva Alus. 
14 Woho tso Alus heva Refidim. Ke tsi aɖeke mele afi ma na dukɔ la be woano o. 
15 Woho tso Refidim heva Sinai gbedzi.
16 Emegbe woho tso Sinai gbedzi heva Kibrot-Hataava. 
17 Woho tso Kibrot-Hataava heva Hazerot. 
18 Woho tso Hazerot heva Ritma. 
19 Woho tso Ritma heva Rimon-Perez. 
20 Woho tso Rimon-Perez heva Libna. 
21 Woho tso Libna heva Risa. 
22 Woho tso Risa heva Kehelata. 
23 Woho tso Kehelata heva Sefer To la gbɔ.
24 Woho tso Sefer To la gbɔ heva Harada. 
25 Woho tso Harada heva Makelot. 
26 Woho tso Makelot heva Tahat. 
27 Woho tso Tahat heva Tera. 
28 Woho tso Tera heva Mitka. 
29 Woho tso Mitka heva Hasmona. 
30 Woho tso Hasmona heva Moserot. 
31 Woho tso Moserot heva Bene-Yaakan. 
32 Woho tso Bene-Yaakan heva Hor-Hagidgad. 33 Woho tso Hor-Hagidgad heva Yotbata. 
34 Woho tso Yotbata heva Abrona. 
35 Woho tso Abrona heva Ezion-Geber. 
36 Woho tso Ezion-Geber heva Zin gbedzi, si nye Kades.
37 Woho tso Kades heva Hor To la gbɔ, le Edom-nyigba ƒe liƒo dzi. 
38 Eye nunɔla Aron lia Hor To la abe ale si Afetɔ gblɔe ene, eye wòku ɖe afi ma le Israel-viwo ƒe ʋuʋu tso Egipte-nyigba dzi ƒe ƒe blaenelia me, le ɣleti atɔ̃lia ƒe ŋkeke gbãtɔ dzi. 
39 Aron xɔ ƒe alafa ɖeka blaeve vɔ etɔ̃ esime wòku le Hor To la dzi.
40 Ke Kanaantɔ si nye Arad-fia le Negeb, le Kanaan-nyigba dzi la se be Israel-viwo gbɔna.
41 Le ɣeyiɣi aɖe megbe la, woho tso Hor To la gbɔ heva Zalmona. 
42 Woho tso Zalmona heva Punon. 
43 Woho tso Punon heva Obot. 
44 Woho tso Obot heva Iye-Abarim le Moab ƒe liƒo dzi. 
45 Woho tso Iyim heva Dibon-Gad. 
46 Woho tso Dibon-Gad heva Almon-Diblatayim. 
47 Woho tso Almon-Diblatayim heva Abarim towo gbɔ le Nebo To ŋgɔ. 
48 Mlɔeba woho tso Abarim towo gbɔ heva Moab tagba, le Yordan nu le Yeriko gbɔ. 
49 Eye woƒu asaɖa anyi ɖe Yordan nu tso Bet-Yesimot va se ɖe Abel-Sitim, le Moab tagba.
50 Afetɔ gblɔ na Mose le Moab tagba le Yordan nu, le Yeriko gbɔ be: 
51 “Gblɔ na Israel-viwo be, ‘Miele Yordan tso ge ayi Kanaan-nyigba dzi. 
52 Minya anyigba la dzi nɔlawo katã ɖa le mia ŋgɔ, eye migbã woƒe legba siwo nye kpe kpakpɛwo, kple woƒe galegbawo, eye mikaka woƒe nuxeƒewo katã. 
53 Mixɔ anyigba la wòazu mia tɔ, eye mianɔ edzi, elabena miawoe metsɔ anyigba la na. 
54 Midzidze nu ɖe anyigba la dzi miamae ɖe miaƒe ƒomeawo nu. Mina ame siwo sɔ gbɔ la ƒe domenyinu nalolo, eye ame siwo mesɔ gbɔ o la ƒe domenyinu nanɔ ʋɛ. Afi si nudzidze la adze na wo dometɔ ɖe sia ɖe la, afi mae wòaxɔ. Miaxɔ anyigba la wòazu miaƒe domenyinu le mia fofowo ƒe toawo nu.
55 “‘Ke ne mienya anyigba la dzi nɔlawo ɖa le mia ŋgɔ o la, ekema wo dometɔ siwo miegblẽ ɖi la azu dzudzɔ anɔ ŋku yɔm na mi, kple ŋu anɔ axadame tɔm na mi, woaɖe fu na mi le anyigba si dzi mianɔ la dzi eteƒe makɔ o. 
56 Eye ale si meɖo be matu nu kpli woe la, nenemae mawɔ mi.’”

Numbers 34
1 Eye Afetɔ gagblɔ na Mose be: 
2 “Gblɔ na Israel-viwo be, ‘Ne mieva ɖo Kanaan-nyigba dzi la, esiae anye anyigba si dome mianyi le Kanaan la ƒe liƒowo.
3 “‘Le anyiehe gome la, liƒoa natso Zin gbedzi ato Edom ŋu, eye miaƒe anyieheliƒo la natso Dzeƒu la ƒe mlɔenu le ɣedzeƒe gome. 
4 Miaƒe liƒo la nagɔdɔ̃ tso Akrabim todzimɔ la ƒe anyiehe ayi Zin, eye wòava se Kades-Barnea ƒe anyiehe; eye wòaɖo ta Hazar-Adar ava do ɖe Azmon. 
5 Liƒo la nagɔdɔ̃ le Azmon aɖo ta Egipte-tɔʋu la nu, eye eƒe seƒe nanye Atsiaƒu la nu.
6 “‘Le ɣetoɖoƒe gome la, Ƒu Gã la kple ƒutanyigba la nado liƒo na mi. Esiae anye miaƒe ɣetoɖoƒeliƒo.
7 “‘Ke esiae anye miaƒe dzieheliƒo: Miaɖe liƒo la tso Ƒu Gã la nu ava ɖo Hor To la gbɔ. 
8 Miaɖe liƒo tso Hor To la gbɔ ayi Lebo-Hamat, eye liƒo la nava se Zedad. 
9 Liƒo la naɖo ta Zifron, eye eƒe seƒe nanye Hazar-Enan. Esiae anye miaƒe dzieheliƒo.
10 “‘Azɔ miaɖe liƒo ɖe ɣedzeƒe tso Hazar-Enan ayi Sefam. 
11 Liƒo la natso Sefam ato Ribla ayi Ayin ƒe ɣedzeƒe, eye liƒo la nazɔ to Kineret Ƒu la ƒe ɣedzeƒekpa dzi. 
12 Liƒo la nayi Yordan nu, eye eƒe seƒe nanye Dzeƒu la. Esiae anye miaƒe anyigba la ƒe liƒowo godoo va kpe.’”
13 Eya ta Mose gblɔ na Israel-viwo be: “Esiae nye anyigba si dzi miadzidze nu ɖo ama wòazu mia tɔ, abe ale si tututu Afetɔ de se be woatsɔe ana to asieke kple afã la ene. 
14 Elabena Ruben-to la kple Gad-to la kpakple Manase-toa ƒe afã la xɔ woƒe domenyinu xoxo le wo fofowo ƒe aƒekɔwo nu. 
15 To eve kple afã siawo xɔ woƒe domenyinu xoxo ɖe Yordan ƒe ɣedzeƒe gome le Yeriko gbɔ.”
16 Afetɔ gagblɔ na Mose be: 
17 “Ŋutsu siwo ama anyigba la na mi wòazu mia tɔ la ƒe ŋkɔwoe nye esi: Nunɔla Eleazar kple Yosua, Nun vi. 
18 Azɔ hã, miaɖe amegã ɖeka tso to sia to me be woama anyigba la. 
19 Ŋutsuawo ƒe ŋkɔwoe nye esi: Kaleb, Yefune vi tso Yuda-to la me; 
20 Semuel, Amihud vi tso Simeon-to la me; 
21 Elidad, Kislom vi tso Benyamin-to la me; 
22 amegã Buki, Yogli vi, tso Dan-to la me; 
23 Amegã siwo le Yosef viwo nue nye amegã Haniel, Efod vi, tso Manase-to la me; 
24 kple amegã Kemuel, Siftan vi, tso Efrayim-to la me; 
25 amegã Elizafan, Parnak vi, tso Zebulon-to la me; 
26 amegã Paltiel, Azan vi, tso Isakar-to la me; 
27 amegã Ahihud, Selomi vi, tso Aser-to la me; 
28 amegã Pedahel, Amihud vi, tso Naftali-to la me.” 
29 Ame siawoe Afetɔ de se na be woama anyigba la na Israel-viwo le Kanaan-nyigba dzi.

Numbers 35
1 Afetɔ gagblɔ na Mose le Moab tagba le Yordan nu, le Yeriko gbɔ be: 
2 “Gblɔ na Israel-viwo be woana du Lewi viwo tso woƒe domenyinu si woaxɔ la me, ne woanɔ wo me, eye woatsɔ lãnyiƒe siwo le duawo ŋu hã ana Lewi viwo. 
3 Duawo nanye wo nɔƒe, eye lãnyiƒeawo nanye woƒe alẽwo, nyiwo, woƒe nuwo, kple woƒe lã bubuwo katã nɔƒe. 
4 Duawo ŋuti lãnyiƒe siwo miatsɔ ana Lewi viwo la nadidi abɔklugui akpe ɖeka tso du la ƒe gli gbɔ le eƒe akpa sia akpa. 
5 Miadzidze abɔklugui akpe eve ɖe du la godo le ɣedzeƒekpa dzi, abɔklugui akpe eve le anyiehekpa dzi, abɔklugui akpe eve le ɣetoɖoƒekpa dzi kple abɔklugui akpe eve le dziehekpa dzi, eye du la nanɔ titina. Esiawoe anye lãnyiƒewo na wo le woƒe duawo ŋu.
6 “Mitsɔ du ade na Lewi viwo be woanye sitsoƒeduwo, ale be ame si meɖoe hafi wu ame o la nasi ayi afi ma, eye miatsɔ du blaene vɔ eve bubu ana wo kpe ɖe esiawo ŋu. 
7 Du siwo katã miana Lewi viwo la nanye du blaene vɔ enyi, kple wo ŋuti lãnyiƒewo. 
8 Du siwo Israel-viwo xɔ la mee miaɖe du siawo le ana. Miaxɔ geɖe le ame siwo sɔ gbɔ la si, eye miaxɔ ʋɛ le ame siwo mesɔ gbɔ o la si. Toawo dometɔ ɖe sia ɖe natsɔ eƒe duwo ƒe ɖe ana Lewi viwo le domenyinu si wòaxɔ la nu.”
9 Afetɔ gagblɔ na Mose be: 
10 “Gblɔ na Israel-viwo be, ‘Miele Yordan tso ge ayi Kanaan-nyigba dzi. 
11 Mitia du siwo sɔ la be woanye sitsoƒeduwo na mi, ale be ame si meɖoe hafi wu ame o la, nasi ayi afi ma. 
12 Duawo nanye sitsoƒe na mi tso hlɔ̃biala la si me, ne ame si wu ame la, nagaku o, va se ɖe esime wòva ha la ŋkume be woadrɔ̃ ʋɔnui. 
13 Esiae anye sitsoƒedu ade siwo anɔ mia si la ƒe taɖodzinu. 
14 Du etɔ̃ nanɔ Yordan ƒe go si dzi, eye du etɔ̃ nanɔ Kanaan-nyigba la dzi, be woanye sitsoƒeduwo. 
15 Du ade siawo nanye sitsoƒe na Israel-viwo, amedzroviwo kple ame siwo ʋu va tsi mia dome, ale be ame sia ame si meɖoe hafi wu ame o la, nasi ayi afi ma.
16 “‘Ke ne gakpo aɖee wòtsɔ xlã ɖee wòku la, ekema amewulae wònye. Ele be woawu amewula la. 
17 Eye ne kpe si adze ame wòaku ye wòtsɔ xlã ɖee wòku la, ekema amewulae wònye. Ele be woawu amewula la. 
18 Eye ne kpo si adze ame wòaku ye wòtsɔ xlã ɖee wòku la, ekema amewulae wònye. Ele be woawu amewula la.
19 “‘Hlɔ̃biala lae awu hlɔ̃dola la. Ne edo goe la, ekpɔ mɔ awui. 
20 Ne fuléle tae wòtutui ƒu anyi, alo tame vɔ̃e wòɖo ɖe eŋu hewui, 
21 alo fuléle tae wòtu kɔe wòku la, ekema ele be woawu amea. Amewulae wònye. Hlɔ̃biala la kpɔ mɔ awu hlɔ̃dola la ne edo goe.
22 “‘Ke ne melé fui tsã o, alo ɖoe hafi tutui o, alo da nane wòdzee, evɔ meɖo tame vɔ̃ ɖe eŋu o, 
23 ne mekpɔe o, alo menye ɖe wòɖoe da kpee o, eye menye ɖe wòlé fui alo di be yeawɔ nu vevii o, hafi amea ku la, 
24 ekema ha la nadrɔ̃e le amea kple hlɔ̃biala la dome le ɖoɖo siawo nu. 
25 Eye ha la naɖe ame si wu ame la tso hlɔ̃biala la si me, eye ha la nagbugbɔe aɖo ɖe eƒe sitsoƒedu si me wòsi yi la me, be wòanɔ afi ma va se ɖe esime nunɔlagã si wosi ami kɔkɔe na la ku.
26 “‘Ke ne amewula la do go gbɔ sitsoƒedu si me wòsi yi la ƒe liƒo ŋu, 
27 eye hlɔ̃biala la ke ɖe eŋu le eƒe sitsoƒedu la ƒe liƒo godo, eye wòwui la, ekema meɖi ʋufɔ o. 
28 Elabena ɖe wòle be wòanɔ eƒe sitsoƒedu la me va se ɖe esime nunɔlagã la ku. Ke le nunɔlagã la ƒe ku megbe la, amewula la ate ŋu atrɔ ayi eƒe anyigba dzi. 
29 Esia nanye ʋɔnudrɔ̃ɖoɖo na mi le miaƒe dzidzimewo katã me, le mia nɔƒewo katã.
30 “‘Ame sia ame si wu ame, eye ɖasefowo ɖi ɖase le eŋu la, woawui, elabena amewulae; gake ɖasefo ɖeka pɛ maɖi ɖase woawu ame o. 
31 Migana woaxe fe aɖeke ɖe amewula si dze na ku la ƒe agbe ta o, elabena ele be woawui. 
32 Eye migana woaxe fe ɖe ame si si yi sitsoƒedu me la ta ne wòagbugbɔ ava nɔ anyigba la dzi do ŋgɔ na nunɔlagã la ƒe ku o.
33 “‘Migaƒo ɖi anyigba si dzi miele la o, elabena ʋukɔkɔɖi ƒoa ɖi anyigba la, eye womate ŋu alé avu ɖe ʋu si wokɔ ɖe anyigbaa dzi la ta o, negbe to ame si kɔe ɖe edzi la ƒe ʋu dzi ko. 
34 Migado ŋunyɔ anyigba si dzi miele, afi si mele la o; elabena nye Afetɔ mele Israel-viwo dome.’”

Numbers 36
1 Eye Gilead, si nye Makir vi, Manase vi, tso Yosef ƒomea me la ƒe ƒometatɔwo va gblɔ le Mose kple Israel-viwo ƒe tatɔawo ŋkume 
2 be: “Afetɔ gblɔ na nye aƒetɔ be wòadzidze nu ɖe anyigba la dzi amae na Israel-viwo wòanye woƒe domenyinu; eye Afetɔ gblɔ na nye aƒetɔ be wòatsɔ mía nɔviŋutsu Zelofehad ƒe domenyinu ana vianyɔnuwo. 
3 Ne ŋutsu siwo tso Israel ƒe to bubuawo me ɖe wo la, ekema nyɔnuawo ƒe domenyinu la ado le mía fofowo ƒe domenyinu la me ava kpe ɖe to si me woɖe srɔ̃ le la ƒe domenyinu ŋu, ale be woaɖee le domenyinu si wodzidze nu tsɔ na mí la me. 
4 Eye ne Ablɔɖeƒe la ɖo na Israel-viwo la, ekema woatsɔ nyɔnuawo ƒe domenyinu akpe ɖe to si me woɖe srɔ̃ le la ƒe domenyinu ŋu, ale be woƒe domenyinu la ado le mía fofowo ƒe to la ƒe domenyinu me.”
5 Eye Mose gblɔ se si Afetɔ de la na Israel-viwo be: “Yosef viwo ƒe to la ƒe nya la le eme. 
6 Esiae nye nya si Afetɔ gblɔ le Zelofehad vinyɔnuwo ŋu, ‘Woate ŋu aɖe ame si nyo wo ŋu la faa. Gake wo fofowo ƒe to la ƒe ƒomea me koe woaɖe srɔ̃ le. 
7 Israel-viwo ƒe domenyinu aɖeke nagatso to ɖeka si me ayi to bubu si me o, elabena ele be Israel-viwo dometɔ ɖe sia ɖe nalé tɔgbuiawo ƒe to la ƒe domenyinu ɖe te. 
8 Vinyɔnu ɖe sia ɖe si xɔ domenyinu le Israel ƒe toawo dome la naɖe srɔ̃ tso fofoa ƒe to la me, ale be Israel-viwo tɔgbuiwo ƒe domenyinu nagado le wo si me o. 
9 Domenyinu aɖeke nagatso to ɖeka si me ayi to bubu si me o, elabena ele be Israel ƒe toawo dometɔ ɖe sia ɖe nalé eya ŋutɔ ƒe domenyinu ɖe te.’”
10 Zelofehad vinyɔnuwo wɔ abe ale si tututu Afetɔ de se na Mose ene. 
11 Eya ta Mahla, Tirza, Hogla, Milka kple Noa, siwo nye Zelofehad vinyɔnuwo, ɖe wo fofo nɔviŋutsuwo ƒe viwo. 
12 Woɖe srɔ̃ le Yosef vi Manase ƒe ƒomeawo me, ne woƒe domenyinu la nakpɔtɔ anɔ wo fofo ƒe ƒomea ƒe to la si me.
13 Esiawoe nye se kple ɖoɖo siwo Afetɔ tsɔ na Israel-viwo to Mose dzi le Moab tagba, le Yordan nu, le Yeriko gbɔ.

LEAVE A REPLY

Please enter your comment!
Please enter your name here