Mose III

MOSE ƑE AGBALẼ ETƆ̃LIA [Leviticus]
                                   
1 Eye Afetɔ yɔ Mose heƒo nu kplii tso takpegbadɔ la me be: 
2 “Ƒo nu kple Israel-viwo, eye nàgblɔ na wo be: ‘Ne mia dometɔ aɖe be yeatsɔ aƒemelã aɖe asa vɔ na Afetɔ la, ekema netsɔ nyi, alẽ alo gbɔ̃ sa vɔ lae.
3 “Ne nyie wòbe yeatsɔ asa numevɔe la, netsɔ atsu si sɔ blibo vɛ. Eya ŋutɔ natso eƒe dzi me faa atsɔe ava Afetɔ ŋkume le takpegbadɔ la ƒe mɔnu. 
4 Eye wòatsɔ eƒe asi aɖo numevɔsalã la tame, eye woaxɔe nɛ ahalé avu ɖe eta.
5 “‘Eye woawu nyitsui la le Afetɔ ŋkume, eye Aron viŋutsu siwo nye nunɔlawo natsɔ ʋu la vɛ, eye woahlẽ ʋu la ɖe vɔsamlekpui si le takpegbadɔa ƒe mɔnu la ƒe axawo katã ŋu. 
6 Eye woaɖe agbalẽ le numevɔsalã la ŋu ahaflii. 
7 Aron viŋutsu siwo nye nunɔlawo nado dzo ɖe vɔsamlekpui la dzi, eye woafɔ nake aɖo dzo la dzi. 
8 Eye Aron viŋutsu siwo nye nunɔlawo naɖo vɔsalã si wofli la, ta la kple amiawo ɖe vɔsamlekpuia dzi, ɖe nake siwo le dzo si le vɔsamlekpuia me la dzi. 
9 Eye woatsɔ tsi aklɔ eƒe dɔkaviwo kple eƒe afɔwo, eye nunɔla la natsɔ wo katã ado dzudzɔ ɖe vɔsamlekpui la dzi wòanye numevɔsa, dzovɔsa si nye ʋeʋẽ lilili na Afetɔ.
10 “‘Eye ne alẽ alo gbɔ̃e wòbe yeatsɔ asa numevɔe la, ekema wòatsɔ atsu si sɔ blibo asa vɔ lae. 
11 Woawui le vɔsamlekpui la ƒe dziehekpa dzi le Afetɔ ŋkume, eye Aron viŋutsu siwo nye nunɔlawo nahlẽ eƒe ʋu la ɖe vɔsamlekpui la ƒe axawo katã ŋu. 
12 Eye wòaflii atsɔ akpe ɖe eƒe ta kple amiawo ŋu, eye nunɔla la naɖo wo ɖe vɔsamlekpuia dzi, ɖe nake siwo le dzo si le vɔsamlekpuia me la dzi. 
13 Eye wòatsɔ tsi aklɔ dɔkaviawo kple afɔawo, eye nunɔla la natsɔ wo katã asa vɔe ahado dzudzɔ ɖe vɔsamlekpui la dzi. Numevɔsa wònye, eye wònye dzovɔsa si nye ʋeʋẽ lilili na Afetɔ.
14 “‘Ke ne xewoe wòbe yeatsɔ asa numevɔ na Afetɔ la, ekema wòatsɔ akpakpa alo ahɔnɛvi asa vɔ lae. 
15 Eye nunɔla la natsɔe ava vɔsamlekpuia gbɔ ahatso veme nɛ, eye wòatsɔe ado dzudzɔ ɖe vɔsamlekpui la dzi, ke woaɖuɖu eƒe ʋu ɖe vɔsamlekpuia ƒe axawo ŋu. 
16 Eye wòaɖe xe la ƒe avɔ ahanyɔ eƒe fuwo atsɔ aƒu gbe ɖe vɔsamlekpui la xa le ɣedzeƒe gome, le teƒe si dzofiwo nɔna. 
17 Azɔ wòalé xe la ƒe aʋalawo, eye wòafe xe la. Megafee wòaɖe le enu o. Azɔ nunɔla la natsɔe ado dzudzɔ ɖe vɔsamlekpui la dzi, ɖe nake si le dzoa me la dzi. Numevɔsa wònye, eye wònye dzovɔsa si nye ʋeʋẽ lilili na Afetɔ.

Leviticus 2
1 “‘Ke ne ame aɖe di be yeasa nuɖuvɔ na Afetɔ la, ekema wòatsɔ wɔ memee asa vɔ lae, wòakɔ ami ɖe edzi eye wòatsɔ lifi akpe ɖe eŋu. 
2 Eye wòatsɔe ava Aron viŋutsu siwo nye nunɔlawo gbɔ, eye nunɔla la naku wɔ memee la kple ami la kpakple lifi la katã asiʋlo ɖeka; eye wòatsɔe ado dzudzɔ ɖe vɔsamlekpui la dzi wòanye kpɔɖeŋuvɔsa, wòanye dzovɔsa si nye ʋeʋẽ lilili na Afetɔ. 
3 Ke nuɖuvɔsa susɔea nanye Aron kple viaŋutsuwo tɔ, abe nu kɔkɔewo ƒe nu kɔkɔe tso Afetɔ ƒe dzovɔsawo me ene.
4 “‘Eye ne èbe yeatsɔ nu si womè le kpo me asa nuɖuvɔe la, ekema wòanye esi wotsɔ wɔ memee si wotsɔ ami dzabae la mè, wòanye amɔwɔ maʋamaʋã bolo kotoe alo amɔwɔ maʋamaʋã kpɔnɔ si dzi wosisi ami ɖo.
5 “‘Eye ne èbe yeamè nu le agba me asa nuɖuvɔe la, ekema wòanye wɔ memee si wotsɔ ami dzabae, si me womede amɔwɔʋãnui o. 
6 Woaflii kakɛkakɛe, eye nàkɔ ami ɖe edzi. Nuɖuvɔsa wònye.
7 “‘Eye ne èbe yeatsɔ nu si woɖana le ze me asa nuɖuvɔe la, ekema nàtsɔ wɔ memee kple ami aɖae. 
8 Eye nàtsɔ nuɖuvɔsa si wotsɔ nu siawo ɖae la vɛ na Afetɔ, tsɔe yi na nunɔlaa, eye wòatsɔe ayi vɔsamlekpuia gbɔ. 
9 Eye nunɔla la atsɔ nuɖuvɔsa la ƒe ɖe, wòanye kpɔɖeŋuvɔsa, eye wòatsɔe ado dzudzɔ ɖe vɔsamlekpui la dzi wòanye dzovɔsa si nye ʋeʋẽ lilili na Afetɔ. 
10 Ke nuɖuvɔsa susɔea nanye Aron kple viaŋutsuwo tɔ, abe nu kɔkɔewo ƒe nu kɔkɔe tso Afetɔ ƒe dzovɔsawo me ene.
11 “‘Migade nuʋãnu aɖeke nu siwo miatsɔ asa nuɖuvɔe na Afetɔ la dometɔ aɖeke me o, elabena miekpɔ mɔ atsɔ amɔwɔ ʋaʋã aɖeke kple anyitsi aɖeke kura ado dzudzɔ wòanye dzovɔsa na Afetɔ o.
12 “‘Miate ŋu atsɔ wo vɛ na Afetɔ abe kutsetse gbãtɔwo ene, ke womatɔ dzo wo le vɔsamlekpui la dzi wòanye ʋeʋẽ lilili o.
13 “‘De dze wò nuɖuvɔsawo katã me; mègado kpo wò Mawu ƒe nubabla ƒe dze la dede wò nuɖuvɔsa me o. Dze nakpe ɖe wò nunanawo katã ŋu.
14 “‘Ne èbe yeatsɔ kutsetse gbãtɔwo asa nuɖuvɔe na Afetɔ la, ekema nàtsɔ nuku yeye siwo womè le dzo me, siwo nye nuku yeye siwo wogbã keŋ la vɛ wòanye wò kutsetse gbãtɔwo ƒe nuɖuvɔsa. 
15 Kɔ ami ɖe edzi, eye nàtsɔ lifi ada ɖe edzi. Nuɖuvɔsa wònye. 
16 Eye nunɔla la natsɔ vɔsa la ƒe kpɔɖeŋuvɔsa, si nye nuku si wogbã la kpakple ami la ƒe ɖe hekpe ɖe eŋuti lifi la katã ŋu ado dzudzɔ wòanye dzovɔsa na Afetɔ.

Leviticus 3
1 “‘Ne nyi wòbe yeatsɔ asa ŋutifafavɔe la, esi sɔ blibo ye wòatsɔ ava Afetɔ ŋkume, eɖanye atsu alo nɔe o. 
2 Eye wòatsɔ eƒe asi aɖo eƒe nunana la ƒe tame, eye woawui le takpegbadɔa ƒe mɔnu; eye Aron viŋutsu siwo nye nunɔlawo nahlẽ ʋu la ɖe vɔsamlekpuia ƒe axawo katã ŋu. 
3 Eye wòatsɔ ŋutifafavɔsalã la ƒe ɖe asa dzovɔ na Afetɔ: ami si tsyɔ dɔkaviawo dzi, siwo katã le dɔkaviawo ŋu, 
4 ayiku eveawo kple wo ŋu mi, siwo le alia gbɔ. Eye wòaɖe ami si le aklãa ŋu la kpe ɖe ayikuawo ŋu. 
5 Eye Aron viŋutsuwo natsɔe ada ɖe numevɔsa si le nakea dzi le dzoa me atsɔ ado dzudzɔ ɖe vɔsamlekpuia dzi; dzovɔsa si nye ʋeʋẽ lilili na Afetɔ ye wònye.
6 “‘Eye ne alẽ alo gbɔ̃ wòbe yeatsɔ asa ŋutifafavɔ na Afetɔ la, ekema wòatsɔ lã si sɔ blibo asa vɔ lae, eɖanye atsu alo nɔe o. 
7 Ne alẽtsui wòbe yeatsɔ asa vɔ lae la, ekema wòatsɔe ava Afetɔ ŋkume. 
8 Eye wòatsɔ eƒe asi aɖo eƒe vɔsalã la ƒe tame, eye woawui le takpegbadɔa ƒe mɔnu; eye Aron viŋutsuwo nahlẽ ʋu la ɖe vɔsamlekpuia ƒe axawo katã ŋu. 
9 Neɖe ami si le ŋutifafavɔsalã la ŋu atsɔ asa dzovɔe na Afetɔ. Neɖe asike dami la katã le eƒe dzimeƒua gbɔ lɔƒo kple ami si tsyɔ dɔkaviawo dzi, ami siwo katã le dɔkaviawo ŋu, 
10 ayiku eveawo kple ami siwo le wo ŋu le alia gbɔ lɔƒo. Eye wòaɖe ami si le aklãa ŋu la kpe ɖe ayikuawo ŋu. 
11 Eye nunɔla la natsɔe ado dzudzɔ ɖe vɔsamlekpui la dzi abe dzovɔsanuɖuɖu ene na Afetɔ.
12 “‘Ne gbɔ̃ wòbe yeatsɔ asa vɔ la, ekema wòatsɔe ava Afetɔ ŋkume. 
13 Eye wòatsɔ eƒe asi aɖo eƒe tame, eye woawui le takpegbadɔa ƒe mɔnu, eye Aron viŋutsuwo nahlẽ eƒe ʋu ɖe vɔsamlekpuia ƒe axawo katã ŋu. 
14 Vɔsalã la ƒe akpa si wòatsɔ asa dzovɔ na Afetɔ lae nye, ami si tsyɔ dɔkaviawo dzi, ami siwo katã le dɔkaviawo ŋu, 
15 ayiku eveawo kple ami siwo le wo ŋu le alia gbɔ lɔƒo. Eye wòaɖe ami si le aklãa ŋu la kpe ɖe ayikuawo ŋu. 
16 Eye nunɔla la natsɔe ado dzudzɔ ɖe vɔsamlekpui la dzi abe dzovɔsanuɖuɖu ene, wòanye ʋeʋẽ lilili. Ami la katã nye Afetɔ tɔ.

Leviticus 4
1  Eye Afetɔ gagblɔ na Mose be: 
2 “Gblɔ na Israel-viwo be, ‘Ne ame aɖe wɔ nu vɔ̃ le manyamanya me, ale be wòwɔ nu siwo katã ŋu Afetɔ de se le be woagawɔ o la dometɔ aɖe la, ekema nu si wòle be woawɔe nye esi:
3 “‘Ne nunɔla si wosi ami na la wɔ nu vɔ̃ hena dukɔ la ɖi fɔ la, ekema wòatsɔ nyitsui si sɔ blibo vɛ na Afetɔ be woatsɔ asa nuvɔ̃vɔ ɖe eƒe nu vɔ̃ si wòwɔ la ta. 
4 Netsɔ nyi la va takpegbadɔa ƒe mɔnu le Afetɔ ŋkume, eye wòatsɔ eƒe asi aɖo nyi la ƒe tame, eye wòawu nyi la le Afetɔ ŋkume. 
5 Eyome nunɔla si wosi ami na la natsɔ nyi la ƒe ʋu la ƒe ɖe ava takpegbadɔa me; 
6 eye nunɔla la nade eƒe asibidɛ ʋua me eye wòahlẽ ʋua ƒe ɖe zi adre ɖe kɔkɔeƒe la ƒe xɔmetsovɔa ŋgɔ le Afetɔ ŋkume. 
7 Eye nunɔla la nage ʋu la ƒe ɖe ɖe dzudzɔdomlekpui si le Afetɔ ŋkume le takpegbadɔa me la ƒe dzoawo dzi, eye wòatsɔ nyi la ƒe ʋu susɔea katã akɔ ɖe numevɔsamlekpui si le takpegbadɔa ƒe mɔnu la te.
8 “‘Eyome wòaɖe nyi si wotsɔ sa nuvɔ̃vɔe la ƒe amiawo katã, hekpe ɖe ami si tsyɔ dɔkaviawo dzi la ŋu kple ami siwo katã le dɔkaviawo ŋu, 
9 ayiku eveawo kple ami siwo le wo ŋu le alia gbɔ lɔƒo. Eye wòaɖe aklã ŋu mi la kpe ɖe ayikuawo ŋu. 
10 Nu siwo woɖe le nyi si wotsɔ sa ŋutifafavɔe la ŋu la kee wòaɖe le esia hã ŋu. Eye nunɔla la natsɔ wo ado dzudzɔ ɖe numevɔsamlekpui la dzi.
11 “‘Ke nyi la ƒe agbalẽ, eƒe lã la katã, eƒe ta, eƒe afɔwo, eƒe dɔkaviwo kple eƒe mĩwo, 
12 siwo nye nyi la ƒe lã mamlɛa katã ya la, wòana woatsɔ wo ado goe ayi asaɖa la godo le teƒe dzadzɛ, afi si wokɔa dzofiwo ɖo, eye wòatɔ dzoe le nakedzo dzi. Afi si wokɔa dzofiwo ɖo lae wòatɔ dzoe le.
13 “‘Ke ne Israel-viwo ƒe ha blibo la ɖi fɔ le nu vɔ̃ aɖe si womeɖo hafi wɔ o ta, evɔ womenya be yewowɔ nane si ŋu Afetɔ de se le be woagawɔ o, 
14 eye emegbe wova dze si nu vɔ̃ si wowɔ la, ekema ha la natsɔ nyitsui ava takpegbadɔ la ŋgɔ be woatsɔ asa nuvɔ̃vɔe. 
15 Eye ha la ƒe ametsitsiwo natsɔ woƒe asiwo aɖo nyi la ƒe tame le Afetɔ ŋkume, eye woawu nyi la le Afetɔ ŋkume.
16 “‘Azɔ nunɔla si wosi ami na la natsɔ nyi la ƒe ʋu la ƒe ɖe ava takpegbadɔa me. 
17 Eye nunɔla la nade eƒe asibidɛ ʋua me ahlẽ zi adre ɖe xɔmetsovɔ la ŋgɔ le Afetɔ ŋkume. 
18 Eye wòage ʋua ƒe ɖe ɖe vɔsamlekpui si le Afetɔ ŋkume le takpegbadɔa me la ƒe dzoawo dzi; eye wòatsɔ ʋu susɔea katã akɔ ɖe numevɔsamlekpui si le takpegbadɔa ƒe mɔnu la te. 
19 Eye wòaɖe ami siwo katã le nyia ŋu atsɔ ado dzudzɔ ɖe vɔsamlekpui la dzi. 
20 Eye wòawɔ nyi la abe ale si ko wòwɔ nyi gbãtɔ si wotsɔ sa nuvɔ̃vɔe la ene. Nenemae wòawɔe, eye nunɔla la nalé avu ɖe dukɔ la ta ale be woatsɔe ake wo. 
21 Emegbe wòana woatsɔ nyi la ado goe ayi asaɖa la godo ahatɔ dzoe, abe ale si ko wòtɔ dzo nyi gbãtɔa ene. Ha la ƒe nuvɔ̃vɔsa wònye.
22 “‘Ne amegã aɖe wɔ nu vɔ̃, eye wòwɔ nu siwo katã ŋu Afetɔ eƒe Mawu de se le be woagawɔ o la dometɔ aɖe heɖi fɔ, 
23 alo ne wòva dze si se si dzi wòda la, ekema wòatsɔ gbɔ̃tsui si sɔ blibo avɛ woatsɔ asa vɔe. 
24 Eye wòatsɔ eƒe asi aɖo gbɔ̃tsui la ƒe tame, eye wòawui le afi si wowua numevɔsalã la le, le Afetɔ ŋkume. Nuvɔ̃vɔsa wònye. 
25 Eye nunɔla la nade eƒe asibidɛ nuvɔ̃vɔsalã la ƒe ʋua me age ɖe numevɔsamlekpui la ƒe dzoawo ŋu, eye wòatsɔ eƒe ʋu susɔea akɔ ɖe numevɔsamlekpui la te. 
26 Eye wòatsɔ ami siwo katã le eŋu ado dzudzɔ ɖe vɔsamlekpuia dzi abe ale si wowɔ ŋutifafavɔsalã la ƒe ami la ene; eye nunɔla la nalé avu nɛ ɖe eƒe nu vɔ̃ la ta, ale be woatsɔe akee.
27 “‘Ke ne ame aɖe wɔ nu vɔ̃ le dukɔa me, evɔ meɖoe hafi o, eye wòwɔ nu siwo ŋu Afetɔ de se le be woagawɔ o la dometɔ aɖe heɖi fɔ, 
28 alo wòva dze si nu vɔ̃ si wòwɔ la, ekema wòatsɔ gbɔ̃nɔe si sɔ blibo ava sa vɔ ɖe eƒe nu vɔ̃ si wòwɔ la ta. 
29 Eye wòatsɔ eƒe asi aɖo nuvɔ̃vɔsalã la ƒe tame, eye wòawu nuvɔ̃vɔsalã la le teƒe ma ke si wowua numevɔsalã le. 
30 Eye nunɔla la nade eƒe asibidɛ vɔsalã la ƒe ʋua me age ɖe numevɔsamlekpui la ƒe dzoawo ŋu, eye wòatsɔ eƒe ʋu susɔea katã akɔ ɖe numevɔsamlekpuia te. 
31 Eye wòaɖe ami siwo katã le eŋu, abe ale si ko woɖe ami le ŋutifafavɔsalã la ŋu ene, eye nunɔla la natsɔe ado dzudzɔ ɖe vɔsamlekpuia dzi wòanye ʋeʋẽ lilili na Afetɔ; eye nunɔla la nalé avu ɖe eta, ale be woatsɔe akee.
32 “‘Ke ne alẽvi wòbe yeatsɔ asa nuvɔ̃vɔe la, ekema wòatsɔ alẽnɔe si sɔ blibo vɛ. 
33 Eye wòatsɔ eƒe asi aɖo nuvɔ̃vɔsalã la ƒe tame, eye wòawui wòanye nuvɔ̃vɔsa le teƒe si wowua numevɔsalã le. 
34 Eye nunɔla la nade eƒe asibidɛ nuvɔ̃vɔsalã la ƒe ʋua me age ɖe numevɔsamlekpui la ƒe dzoawo ŋu, eye wòatsɔ eƒe ʋu susɔea katã akɔ ɖe numevɔsamlekpuia te. 
35 Eye wòaɖe ami siwo katã le eŋu la, abe ale si ko woɖea alẽtsui si wotsɔ sa ŋutifafavɔe la ƒe amiawo ene, eye nunɔla la natsɔ wo ada ɖe Afetɔ ƒe dzovɔsawo dzi atsɔ ado dzudzɔ le vɔsamlekpui la dzi; eye nunɔla la nalé avu ɖe eta, le nu vɔ̃ si wòwɔ la ta, eye woatsɔe akee.

Leviticus 5
1 “‘Ne ame aɖe wɔ nu vɔ̃, le esi wòsee woɖe gbeƒã le dutoƒo be woava aɖi ɖase le nu vɔ̃ wɔla aɖe ŋu, eye wònye ɖasefo le eŋu, alo wòkpɔ eteƒe alo nya nu tso eŋu, evɔ meva gblɔe o la, ekema woabia eƒe vodada la ŋuti kɔntae.
2 “‘Alo ne ame aɖe ka asi nu makɔmakɔ aɖe ŋu, eɖanye gbemelã makɔmakɔ aɖe ƒe kukua alo aƒemelã makɔmakɔ aɖe ƒe kukua alo nuwɔwɔ siwo nɔa ha me dometɔ aɖe ƒe kukua ŋu la, eŋu mekɔ o, eɖi fɔ, ne menya o gɔ̃ hã. 
3 Alo ne eka asi ame ƒe nu makɔmakɔ aɖe ŋu, nu sia nu si ŋu mekɔ o si ana eŋu makɔ o la ŋu le manyamanya me, eye wòva nya emegbe la, eɖi fɔ.
4 “‘Alo ne ame aɖe mebu nuwo ŋu nyuie hafi ka atam be yeawɔ nane o, eɖanye vɔ̃ alo nyui o, nu ka ke ƒe atam wòka o, evɔ menya o, gake wòva dze sii emegbe be yewɔe eŋumabumabui la, ekema eɖi fɔ.
5 “‘Eye ne ame aɖe ɖi nu siawo dometɔ ɖeka ƒe fɔ la, ekema wòaʋu nu vɔ̃ la me. 
6 Eye wòalé alẽnɔe alo gbɔ̃nɔe tso eƒe lãha me vɛ na Afetɔ le vo si wòda heɖi fɔ la ta, be woatsɔ asa nuvɔ̃vɔe. Eye nunɔla la alé avu ɖe eta le eƒe nu vɔ̃ la ta.
7 “‘Ke ne mate ŋu ana alẽ o la, ekema wòatsɔ akpakpa eve alo ahɔnɛvi eve ava sa fɔɖivɔ na Afetɔ ɖe nu vɔ̃ si wòwɔ la ta: netsɔ ɖeka sa nuvɔ̃vɔ, eye wòatsɔ evelia asa numevɔ. 
8 Atsɔ wo ava nunɔla la gbɔ, eye nunɔla la natsɔ esi woatsɔ asa nuvɔ̃vɔe la asa vɔ gbã; atso veme nɛ, gake maɖe ta le enu o. 
9 Eye wòahlẽ nuvɔ̃vɔsalã la ƒe ʋua ƒe ɖe ɖe vɔsamlekpui la ŋu, ke wòaɖuɖu ʋu susɔea ɖe vɔsamlekpuia te. Nuvɔ̃vɔsa wònye. 
10 Eye wòatsɔ evelia asa numevɔ ɖe ɖoɖo si nu wowɔnɛ ɖo la nu; eye nunɔla la nalé avu ɖe amea ta le nu vɔ̃ si wòwɔ la ŋuti, eye woatsɔe akee.
11 “‘Ke ne mate ŋu ana akpakpa eve alo ahɔnɛvi eve hã o la, ekema wòatsɔ wɔ memee efa me mama ɖe ewo ƒe akpa ɖeka ana ɖe nu vɔ̃ si wòwɔ la ta, be woatsɔ asa nuvɔ̃vɔe. Megakɔ ami ɖe edzi o, eye megatsɔ lifi da ɖe edzi o, elabena nuvɔ̃vɔsa wònye. 
12 Eye wòatsɔe ava nunɔla la gbɔ, eye nunɔla la naku asiʋlo ɖeka le eŋu wòanye kpɔɖeŋuvɔsa, eye wòatsɔe akɔ ɖe Afetɔ ƒe dzovɔsawo dzi ado dzudzɔ ɖe vɔsamlekpui la dzi. Nuvɔ̃vɔsa wònye. 
13 Eye nunɔla la nalé avu nɛ ɖe eƒe nu vɔ̃ si wòwɔ la ta, eɖanye nu vɔ̃ siawo dometɔ kae wòwɔ o, eye woatsɔe akee. Vɔsanu susɔea azu nunɔla la tɔ abe ale si wòle le nuɖuvɔsa la gome ene.’”
14 Afetɔ gagblɔ na Mose be: 
15 Ne ame aɖe mewɔ nuteƒe o, le esi wòɖe ŋu ɖi wɔ nu vɔ̃ ɖe Afetɔ ƒe nu kɔkɔewo ŋu ta la, ekema wòatsɔ agbo si sɔ blibo, si ƒe home anye klosalo sekel siwo sɔ ɖe teƒe kɔkɔe la ƒe sekel nu la, asa fɔɖivɔ na Afetɔ. 
16 Eye wòaɖo nu vɔ̃ si wòwɔ ɖe kɔkɔeƒea ŋu la teƒe ahatsɔ home la me mama atɔ̃ ƒe ɖeka akpee. Netsɔe na nunɔla la, ne nunɔla la natsɔ fɔɖivɔsa ƒe agbo la alé avu ɖe eta, eye woatsɔe akee.
17 “Eye ne ame aɖe wɔ nu vɔ̃ le esi wòwɔ nu siwo ŋu Afetɔ de se ɖo be woagawɔ o la dometɔ aɖe le manyamanya me gɔ̃ hã la, eɖi fɔ, eye woabia akɔntae le vo si wòda la ŋuti. 
18 Eye wòatsɔ agbo si sɔ blibo tso eƒe alẽha dome ava nunɔla la gbɔ be woatsɔ asa fɔɖivɔe, eƒe home la nasɔ ɖe esi woɖo la nu. Eye nunɔla la nalé avu ɖe eta le vo si wòda le manyamanya me la ta, eye woatsɔe akee. 
19 Fɔɖivɔsa wònye. Afetɔ ŋue wòwɔ nu vɔ̃ ɖo heɖi fɔ.

Leviticus 6
1  Afetɔ gagblɔ na Mose be: 
2 “Ne ame aɖe wɔ nu vɔ̃, ale be mewɔ nuteƒe na Afetɔ o, eye wòble ehavi le nane si woda ɖe egbɔ, alo wobe nedzrae ɖo la me, alo wòfi ehavi alo tafae, 
3 alo wòfɔ nane si bú eye wòsẽ nu, eye wòka aʋatso heta nu le nu vɔ̃ siawo dometɔ aɖe si wòwɔ me la, nu si wòawɔe nye esi: 
4 Ne ewɔ nu vɔ̃ heɖi fɔ la, ekema wòatrɔ nu si wòfi alo nu si wòba ame xɔ alo nu si wòtafa ame xɔ, eɖanye nu ka kee woda ɖe egbɔ o, alo nu búbu, si wòfɔ, 
5 alo nu sia nu si me wòda alakpa heta nu le la ayii, eye wòaɖo eteƒe bliboe ahatsɔ nua ƒe home me mama ɖe teƒe atɔ̃ ƒe ɖeka akpe ɖe eŋuti. Wòatsɔe ana ame si tɔ wònye le gbe si gbe woɖo kpe edzi be eɖi fɔ. 
6 Eye wòatsɔ fɔɖivɔsalã, si anye agbo si sɔ blibo, si asɔ ɖe home si woɖo la nu, ava nunɔla la gbɔ be woatsɔ asa fɔɖivɔ na Afetɔ. 
7 Eye nunɔla la nalé avu ɖe eta le Afetɔ ŋkume, eye woatsɔ nu sia nu si wòwɔ heɖi fɔ la akee.”
8 Afetɔ gagblɔ na Mose be: 
9 “De se na Aron kple viaŋutsuwo be: ‘Esiae nye numevɔsa la ŋuti se: Numevɔsa la nanɔ dzo si le vɔsamlekpuia me la dzi zã bliboa katã va se ɖe ŋdi, eye dzo nanɔ bibim ɖaa le vɔsamlekpuia me. 
10 Nunɔla la nado eƒe nunɔlaklalawu, eye wòado aklalatakpui. Azɔ wòalɔ numevɔsa siwo dzo la bi le vɔsamlekpuia dzi la ƒe dzofiwo akɔ ɖe vɔsamlekpuia xa. 
11 Emegbe wòaɖe eƒe awuwo ahado awu bubuwo, eye wòalɔ dzofiawo ayi teƒe dzadzɛ aɖe le asaɖa la godo. 
12 Dzo nanɔ bibim le vɔsamlekpuia me ɖaa. Dzo megatsi le eme o. Nunɔla la nanɔ nake dem eme ŋdi sia ŋdi, eye wòaɖo numevɔsalã la ɖe edzi ahatsɔ ŋutifafavɔsalãa ƒe amiwo ado dzudzɔ ɖe edzi. 
13 Dzo nanɔ bibim le vɔsamlekpuia me ɖaa. Dzo megatsi le eme o.
14 “‘Ke esiae nye nuɖuvɔsa ŋuti se: Mi Aron viŋutsuwo mitsɔe va Afetɔ ŋkume le vɔsamlekpuia ŋgɔ. 
15 Wo dometɔ ɖeka naku nuɖuvɔsa ƒe wɔ memee la kple eƒe ami la kpakple lifi si le nuɖuvɔsaa dzi la katã ƒe asiʋlo ɖeka atsɔ ado dzudzɔ ɖe vɔsamlekpuia dzi wòanye ʋeʋẽ lilili, si anye kpɔɖeŋuvɔsa na Afetɔ. 
16 Aron kple viaŋutsuwo naɖu susɔea. Amɔwɔ maʋamaʋã bolo wòanye woaɖu le teƒe kɔkɔe la. Woaɖui le takpegbadɔa ƒe xɔxɔnu. 
17 Womade nuʋãnu aɖeke eme hafi amèe o. Nye dzovɔsawo me meɖee le na wo be wòanye wo tɔ. Nu kɔkɔewo ƒe nu kɔkɔe wònye abe nuvɔ̃vɔsa kple fɔɖivɔsa ke ene. 
18 Aron ƒe dzidzimevi ŋutsuwo katã kpɔ mɔ aɖui. Anye woƒe gome ɖaa tso Afetɔ ƒe dzovɔsawo me le miaƒe dzidzimewo katã me. Nu sia nu si aka wo ŋu la azu nu kɔkɔe.’”
19 Afetɔ gagblɔ na Mose be: 
20 “Esiae nye vɔ si Aron kple viaŋutsuwo asa na Afetɔ le gbe si gbe woasi ami na wo dometɔ aɖe: woana wɔ memee efa me mama ewo ƒe akpa ɖeka be woatsɔ asa nuɖuvɔe, woatsɔ afã asa vɔe le ŋdi eye afã le fiẽ. 
21 Woatsɔ ami ablui ahamèe le agba me. Nàblui kple ami nyuie amèe wòanye nuɖuvɔsanu eye nàflii hafi atsɔ asa vɔe be wòanye ʋeʋẽ lilili na Afetɔ. 
22 Eye nunɔla viŋutsu si wosi ami na be wòazu nunɔla ɖe eteƒe la nawɔe. Ðoɖo wònye ɖaa: Woatsɔ vɔsa bliboa ado dzudzɔ na Afetɔ. 
23 Woatɔ dzo nunɔla ƒe nuɖuvɔsa ɖe sia ɖe keŋkeŋ. Womaɖui o.”
24 Eye Afetɔ gagblɔ na Mose be: 
25 “Gblɔ na Aron kple viaŋutsuwo be, ‘Esiae nye nuvɔ̃vɔsa la ŋuti se: Teƒe si wowua numevɔsalãa le la, teƒe ma kee woawu nuvɔ̃vɔsalãa hã ɖo le Afetɔ ŋkume. Nu kɔkɔewo ƒe nu kɔkɔe wònye. 
26 Nunɔla si sa nuvɔ̃vɔ lae aɖui. Teƒe kɔkɔe woaɖui le, le takpegbadɔa ƒe xɔxɔnu.
27 “‘Nu sia nu si aka nuvɔ̃vɔsalãa ŋu la azu nu kɔkɔe, eye ne ame aɖe le ʋua hlẽm eye wòhlẽ ɖe eƒe awu ŋu la, ekema mianya nu si ŋu ʋua hlẽ ɖo la le teƒe kɔkɔe. 
28 Woagbã ze si me woɖae le la. Ke ne akɔblize mee woɖae le la, ekema woaklɔ akɔblize la atsɔ tsi akpalae.
29 “‘Ŋutsu sia ŋutsu si nye nunɔla la kpɔ mɔ aɖui. Nu kɔkɔewo ƒe nu kɔkɔe wònye. 
30 Ke womaɖu nuvɔ̃vɔsalã la, nenye be wotsɔ eƒe ʋu ƒe ɖe yi takpegbadɔ la me be woalé avu le kɔkɔeƒea o. Woatɔ dzoe.

Leviticus 7
1  “‘Esiae nye fɔɖivɔsa ŋuti se: Nu kɔkɔewo ƒe nu kɔkɔe wònye. 
2 Teƒe si wowua numevɔsalã le la, teƒe ma kee woawu fɔɖivɔsalã hã ɖo, eye woahlẽ eƒe ʋua ɖe vɔsamlekpuia ƒe axawo katã ŋu. 
3 Ke woatsɔ eƒe amiawo katã, asike dami la, ami si tsyɔ dɔkaviawo dzi, 
4 ayiku eveawo kple ami siwo le wo ŋu le alia gbɔ asa vɔe. Eye wòaɖe ami si le aklã ŋu kpe ɖe ayikuawo ŋu hã. 
5 Eye nunɔla la natsɔ wo ado dzudzɔ ɖe vɔsamlekpuia dzi wòanye dzovɔsa na Afetɔ. Fɔɖivɔsa wònye. 
6 Ŋutsu sia ŋutsu si nye nunɔla la kpɔ mɔ aɖui, teƒe kɔkɔe lae woaɖui le. Nu kɔkɔewo ƒe nu kɔkɔe wònye. 
7 Se si le nuvɔ̃vɔsaa ŋu la kee anɔ fɔɖivɔsa la hã ŋu; anye nunɔla si tsɔe lé avui la tɔ.
8 “‘Ne nunɔla sa numevɔ na ame aɖe la, ekema numevɔsalã si wòtsɔ va nunɔlaa gbɔ la ƒe agbalẽ anye nunɔla la tɔ.
9 “‘Nuɖuvɔsa siwo katã womè le kpo me kple esiwo katã woɖa le ze me kple nutɔgba me la nye nunɔla si tsɔe sa vɔe la tɔ. Azu etɔ. 
10 Ke woama nuɖuvɔsa siwo woblu kple ami alo esiwo womede amii o la na Aron viŋutsuwo; wo katã woamae sɔsɔe.
11 “Ke esiae nye ŋutifafavɔ si ame aɖe asa na Afetɔ la ŋuti se: 
12 Ne akpedavɔe wòdi be yeasa la, ekema wòatsɔ amɔwɔ maʋamaʋã bolo kotoe siwo wode amii, kple amɔwɔ maʋamaʋã kpɔnɔ siwo dzi wosisi ami ɖo, kpakple wɔ memee si wodzaba kple ami nyuie ƒe abolo kotoe akpe ɖe akpedavɔsalãa ŋu. 
13 Eye wòatsɔ abolo kotoe siwo wotsɔ amɔwɔ ʋaʋã wɔ kple eƒe ŋutifafavɔsalã siwo wòtsɔ vɛ be woanye akpedavɔsa la akpe ɖe eƒe nunana la ŋu vɛ. 
14 Eye wòaɖe ɖeka le eƒe nunana ɖe sia ɖe ŋu vɛ wòanye gome kɔkɔe na Afetɔ; azu nunɔla si hlẽ ŋutifafavɔsalã la ƒe ʋu ɖe vɔsamlekpuia ŋu la tɔ. 
15 Woaɖu eƒe ŋutifafavɔsalã siwo wòtsɔ sa akpedavɔe la le gbe si gbe wòsa vɔ la. Megagblẽ eƒe ɖeke ɖi ŋu nake ɖe edzi o.
16 “‘Ke ne nu si wòtsɔ va vɔ sa ge la nye adzɔgbeɖenunana alo lɔlɔ̃nu faa nunana la, ekema woaɖui le gbe si gbe wòsa vɔa, eye woate ŋu aɖu esi tsi anyi ŋu ke ɖe edzi hã. 
17 Vɔsalã, si tsi anyi va se ɖe ŋkeke etɔ̃a gbe la, woatɔ dzoe. 
18 Ne woɖu eƒe ŋutifafavɔsalã ƒe ɖe le ŋkeke etɔ̃a gbe la, ekema womaxɔe na ame si tsɔe sa vɔ la o. Womabui nɛ o; nu makɔmakɔ wònye, eye ame si ɖu eƒe ɖe la, woabia akɔntae le vo si wòda la ŋuti. 
19 Womaɖu lã si ka nu makɔmakɔ aɖe ŋu la o. Woatɔ dzoe. Ame sia ame si ŋu kɔ la ate ŋu aɖu lã si ŋu kɔ la.
20 “‘Ame si ŋu mekɔ o, gake wòɖu ŋutifafavɔsalã si nye Afetɔ tɔ la, woatsrɔ̃e ɖa le eƒe dukɔmeviwo dome. 
21 Eye ne ame aɖe ŋuti ka nu makɔmakɔ aɖe ŋu, eɖanye ame ƒe nu makɔmakɔ aɖe alo lã makɔmakɔ aɖe alo nu makɔmakɔ nyɔŋu aɖe o, eye wòɖu ŋutifafavɔsalã si nye Afetɔ tɔ la ƒe ɖe la, woatsrɔ̃ ame ma ɖa le eƒe dukɔmeviwo dome.’”
22 Eye Afetɔ gagblɔ na Mose be: 
23 “Gblɔ na Israel-viwo be: ‘Migaɖu nyi alo alẽ alo gbɔ̃ ƒe ami aɖeke o. 
24 Miate ŋu azã lã si ku le eɖokui si alo lã si lã bubu aɖe wu la ƒe ami na nu bubu ɖe sia ɖe wɔwɔ, gake migaɖui gbeɖegbeɖe o. 
25 Ame sia ame si aɖu lã si wòtsɔ sa dzovɔ na Afetɔ ƒe ami la, woatsrɔ̃e ɖa le eƒe dukɔmeviwo dome.
26 “‘Migaɖu ʋu aɖeke le mia nɔƒewo katã o, eɖanye xe alo lã tɔ o. 
27 Ame si aɖu ʋu la, woatsrɔ̃e ɖa le eƒe dukɔmeviwo dome.’”
28 Afetɔ gagblɔ na Mose be: 
29 “Gblɔ na Israel-viwo be: ‘Ame si sa ŋutifafavɔ na Afetɔ la natsɔ eƒe ŋutifafavɔsalã la ƒe ɖe vɛ na Afetɔ. 
30 Eya ŋutɔ natsɔ vɔsalã la ƒe ami kple eƒe akɔ la ava sa dzovɔ na Afetɔ, eye wòanyè ami la kple akɔ la le Afetɔ ŋkume, wòanye vɔsa si wonyè. 
31 Nunɔla la natsɔ ami la ado dzudzɔ ɖe vɔsamlekpuia dzi, gake akɔa ya nanye Aron kple viaŋutsuwo tɔ.
32 “‘Eye miatsɔ miaƒe ŋutifafavɔsalãwo ƒe ɖusita ana nunɔla la wòanye eƒe gome kɔkɔe. 
33 Ðusita la anye Aron viŋutsu si tsɔ ŋutifafavɔsalã ƒe ʋu kple ami sa vɔe la tɔ. 
34 Elabena mexɔ akɔ si nye vɔsa si woanyè la kple ɖusita si nye gome kɔkɔe la tso Israel-viwo ƒe ŋutifafavɔsawo me tsɔ na nunɔla Aron kple viaŋutsuwo, be wòanye ɖoɖo mavɔ na Israel-viwo.
35 “‘Esiae nye nunɔlawo ƒe gome, si Aron kple viaŋutsuwo axɔ le Afetɔ ƒe dzovɔsawo me le gbe si gbe woɖo wo be woawɔ nunɔladɔ na Afetɔ. 
36 Afetɔ de se be woaxɔ gome sia le Israel-viwo si na wo le gbe si gbe woasi ami na wo. Ðoɖo mavɔ wònye na woƒe dzidzimewo.’”
37 Esiae nye numevɔsa, nuɖuvɔsa, nuvɔ̃vɔsa, fɔɖivɔsa, ameɖovɔsa kple ŋutifafavɔsa ŋuti se, 
38 abe ale si tututu Afetɔ de se na Mose le Sinai To la dzi le gbe si gbe wòde se na Israel-viwo be woatsɔ woƒe nunanawo vɛ na Afetɔ le Sinai gbedzi la ene.

Leviticus 8
1 Afetɔ gagblɔ na Mose be: 
2 “Kplɔ Aron kple viaŋutsuwo, eye nàtsɔ awuawo, ami kɔkɔe la, nuvɔ̃vɔsa ƒe nyitsu la, agbo eveawo kple kusi si me amɔwɔ maʋamaʋã bolo le la, 
3 eye nàna ha blibo la katã naƒo ƒu ɖe takpegbadɔa ƒe mɔnu.”
4 Eye Mose wɔ abe ale si tututu Afetɔ de se nɛ ene, eye ha la ƒo ƒu ɖe takpegbadɔa ƒe mɔnu. 
5 Eye Mose gblɔ na ha la be: “Nu siae Afetɔ de se be míawɔ.” 
6 Eye Mose na Aron kple viaŋutsuwo te va, eye wòle tsi na wo. 
7 Emegbe edo awu ʋlaya la na Aron, eye wòtsɔ alidziblanu la bla ali dzi nɛ, edo awu ʋlaya si ŋu abɔ mele o la nɛ, eye wòdo kɔmewu nɛ, etsɔ kɔmewudziblanu la bla edzi hesae sesĩe. 
8 Eye wòtsɔ akɔtaɖonu la ɖo eŋu hetsɔ Urim kple Tumim la de akɔtaɖonu la me. 
9 Azɔ etsɔ tablanu la ɖɔ ɖe ta nɛ hetsɔ sikaga falɛ keklẽ si nye adzɔgbeɖeɖe ƒe dzesi kɔkɔe la ɖo tablanu la dzi le eƒe ŋgonu, abe ale si tututu Afetɔ de se na Mose ene.
10 Azɔ Mose tsɔ ami kɔkɔe la eye wòsi ami na avɔgbadɔ la kple eme nuwo katã, eye wòkɔ wo ŋu. 
11 Emegbe ehlẽ eƒe ɖe ɖe vɔsamlekpuia ŋu zi adre tsɔ si ami na vɔsamlekpuia kple eŋu nuwo katã kpakple ze la kple eƒe zɔ la tsɔ kɔ wo ŋu. 
12 Ekɔ ami kɔkɔe la ƒe ɖe ɖe Aron ƒe tame hesi ami nɛ tsɔ kɔ eŋu.
13 Azɔ Mose na Aron viŋutsuwo te va, eye wòdo awu ʋlayawo na wo, etsɔ alidziblanuwo bla ali dzi na wo, eye wòtsɔ tablavɔ bla ta na wo, abe ale si tututu Afetɔ de se na Mose ene.
14 Azɔ ekplɔ nuvɔ̃vɔsa ƒe nyitsu la vɛ, eye Aron kple viaŋutsuwo tsɔ woƒe asiwo ɖo nuvɔ̃vɔsa ƒe nyitsu la ƒe tame. 
15 Eye Mose wui hede eƒe asibidɛ ʋu la me ge ɖe vɔsamlekpuia ƒe dzo ɖe sia ɖe ŋu, eye wòkɔ vɔsamlekpuia ŋu tso nu vɔ̃ me, ke ekɔ ʋu susɔea ɖe vɔsamlekpuia te tsɔ kɔ eŋu be woalé avu le edzi. 
16 Emegbe Mose ɖe ami siwo katã le dɔkaviawo ŋu kple ami siwo le aklãa ŋu kpakple ayiku eveawo kple ami siwo le wo ŋu tsɔ do dzudzɔ ɖe vɔsamlekpuia dzi. 
17 Eye wòna wotɔ dzo nyitsu la, eƒe agbalẽ, eƒe lã kple eƒe mĩ le asaɖa la godo, abe ale si Afetɔ de se na Mose ene.
18 Ekplɔ numevɔsa ƒe agbo la vɛ, eye Aron kple viaŋutsuwo tsɔ woƒe asiwo ɖo agbo la ƒe tame. 
19 Emegbe Mose wui, eye wòhlẽ ʋu la ɖe vɔsamlekpuia ƒe axawo katã ŋu.
20 Eyome Mose fli agbo la, eye wòtɔ dzo ta la, lãkɔawo kple amiawo. 
21 Etsɔ tsi kpala eƒe dɔkaviawo kple afɔawo, eye Mose tsɔ agbo bliboa do dzudzɔ ɖe vɔsamlekpuia dzi. Numevɔsa si ʋẽna lilili lae wònye. Dzovɔsa wònye na Afetɔ, abe ale si tututu Afetɔ de se na Mose ene.
22 Azɔ ekplɔ agbo evelia, si nye ameɖoɖo ƒe agbo la vɛ, eye Aron kple viaŋutsuwo tsɔ woƒe asiwo ɖo agbo la ƒe tame. 
23 Mose wui, eye wòtsɔ eƒe ʋu la ƒe ɖe sisi ɖe Aron ƒe ɖusitogboe, eƒe ɖusidegblefetsu kple eƒe ɖusifɔdegblefetsu ŋu. 
24 Emegbe Mose na Aron viŋutsuwo te va, eye wòsisi ʋu la ƒe ɖe ɖe woƒe ɖusitogboe, woƒe ɖusidegblefetsu kple woƒe ɖusifɔdegblefetsu ŋu; ke Mose hlẽ ʋu susɔea ɖe vɔsamlekpuia ƒe axawo katã ŋu.
25 Azɔ eɖe ami la, asike dami la, ami siwo katã le dɔkaviawo ŋu, ami siwo le aklãa ŋu, ayiku eveawo kple ami siwo le wo ŋu kpakple ɖusita la. 
26 Eye wòtsɔ amɔwɔ maʋamaʋã bolo kotoe ɖeka, abolo kotoe siwo wode amii la ɖeka kple akpɔnɔ ɖeka le kusi si me amɔwɔ maʋamaʋã bolowo le le Afetɔ ŋkume la me. Eye wòtsɔ wo da ɖe amiawo kple ɖusita la dzi. 
27 Emegbe etsɔ wo katã de Aron kple viaŋutsuwo ƒe asi me, eye wònyè wo abe vɔsa si wonyè le Afetɔ ŋkume ene. 
28 Eye Mose xɔ wo le wo si tsɔ da ɖe numevɔsalã la dzi, eye wòtsɔ wo do dzudzɔ ɖe vɔsamlekpuia dzi. Ameɖovɔsa si ʋẽna lilili lae wònye. Dzovɔsa wònye na Afetɔ.
29 Eye Mose nyè ameɖoɖo ƒe agboa ƒe akɔ la wònye vɔsa si wonyè le Afetɔ ŋkume, eye wòzu Mose tɔ, abe ale si Afetɔ de se na Mose ene.
30 Eye Mose tsɔ ami kɔkɔe la ƒe ɖe kple ʋu si le vɔsamlekpuia dzi la ƒe ɖe hlẽ ɖe Aron kple viaŋutsuawo kpakple woƒe awuwo ŋu. Ale wòkɔ Aron kple eƒe awuwo kpakple viaŋutsu siwo kpe ɖe eŋu la ƒe awuwo ŋu.
31 Azɔ Mose gblɔ na Aron kple viaŋutsuwo be: “Miɖa lã la le takpegbadɔa ƒe mɔnu, eye miɖui le afi ma hekpe ɖe abolo siwo le ameɖokusia me ŋu, abe ale si tututu wode se nam be, ‘Aron kple viaŋutsuwo neɖui’ la ene. 
32 Ke ne lã la kple abolo aɖe susɔ la, mitɔ dzoe. 
33 Migadzo le takpegbadɔa ƒe mɔnu o ŋkeke adre, va se ɖe gbe si gbe mia ɖoɖo ŋkekeawo nade, elabena ŋkeke adree woatsɔ aɖo mi miazu nunɔlawo. 
34 Afetɔ de se be míawɔ nu si míewɔ egbea ne woalé avu ɖe mia ta. 
35 Minɔ takpegbadɔa ƒe mɔnu zã kple keli ŋkeke adre, eye milé Afetɔ ƒe ɖoɖoawo me ɖe asi, be miagaku o; elabena nenemae wode se nam.”
36 Eye Aron kple viaŋutsuwo wɔ nu siwo katã ƒe se Afetɔ de to Mose dzi la.

Leviticus 9
1 Eye le ŋkeke enyia gbe la, Mose yɔ Aron kple viaŋutsuwo kpakple Israel ƒe ametsitsiwo. 
2 Eye wògblɔ na Aron be: “Lé nyivi ɖeka ne woatsɔ asa nuvɔ̃vɔ kple agbo ɖeka ne woatsɔ asa numevɔ; woanye esiwo sɔ bliboe, eye nàtsɔ wo ava Afetɔ ŋkume. 
3 Ke gblɔ na Israel-viwo be: ‘Milé gbɔ̃tsu ɖeka miatsɔ asa nuvɔ̃vɔe, eye milé nyivi ɖeka kple alẽtsui ɖeka, wo dometɔ ɖe sia ɖe naxɔ ƒe ɖeka eye wòasɔ blibo, miatsɔ asa numevɔe. 
4 Eye milé nyitsu ɖeka kple agbo ɖeka miatsɔ asa ŋutifafavɔ le Afetɔ ŋkume, hekpe ɖe nuɖuvɔsa si wode amii ŋu, elabena egbea Afetɔ aɖe eɖokui afia mi.’”
5 Eye wotsɔ nu siwo Mose bia la va takpegbadɔa ŋgɔ. Azɔ ha blibo la katã te va hetsi tsitre ɖe Afetɔ ŋkume. 
6 Eye Mose gblɔ be: “Esiae nye nu si Afetɔ de se be miawɔ, ne Afetɔ naɖe eƒe ŋutikɔkɔe afia mi.” 
7 Eye Mose gblɔ na Aron be: “Te ɖe vɔsamlekpuia ŋu nàsa wò nuvɔ̃vɔ kple wò numevɔ, eye nàlé avu ɖe wò ŋutɔ ɖokuiwò kple wò aƒe la ta; eyome nàtsɔ dukɔ la ƒe nunana la asa vɔ ahalé avu ɖe wo ta, abe ale si Afetɔ de se ene.”
8 Enumake Aron te ɖe vɔsamlekpuia ŋu, eye wòwu nyivi si wòatsɔ asa nuvɔ̃vɔe ɖe eɖokui ta la. 
9 Azɔ Aron viŋutsuwo tsɔ ʋu la vɛ nɛ, eye wòde eƒe asibidɛ ʋua me ge ɖe vɔsamlekpuia ƒe dzowo ŋu, eye wòkɔ ʋu susɔea ɖe vɔsamlekpuia te. 
10 Eye wòtsɔ nuvɔ̃vɔsalã la ƒe ami kple ayikuawo kpakple ami siwo le aklãa ŋu la do dzudzɔ ɖe vɔsamlekpuia dzi, abe ale si Afetɔ de se na Mose ene. 
11 Eye wòtɔ dzo lã la kple eƒe agbalẽa le asaɖa la godo.
12 Emegbe ewu numevɔsalã la, eye Aron viŋutsuwo tsɔ ʋu la de esi, eye wòhlẽe ɖe vɔsamlekpuia ƒe axawo katã ŋu. 
13 Eye wotsɔ numevɔsalã la ƒe akpa vovovoawo kple ta la de esi, eye wòtsɔ wo do dzudzɔ ɖe vɔsamlekpuia dzi. 
14 Ekpala dɔkaviawo kple afɔawo hã tsɔ da ɖe numevɔsalã si le vɔsamlekpuia dzi la dzi hetsɔ wo do dzudzɔe.
15 Azɔ etsɔ dukɔ la ƒe nunana la sa vɔe. Elé gbɔ̃ si dukɔa tsɔ vɛ be woatsɔ asa nuvɔ̃vɔe na yewo la hewui, eye wòtsɔe sa nuvɔ̃vɔ abe gbãtɔa ke ene. 
16 Eyome etsɔ numevɔsalã la vɛ, eye wòtsɔe sa vɔ ɖe ɖoɖo la nu.
17 Eyome etsɔ nuɖuvɔsa la vɛ heku asiʋlo ɖeka, eye wòtsɔe do dzudzɔ ɖe vɔsamlekpuia dzi hekpe ɖe ŋdinumevɔsa la ŋu.
18 Eyome ewu nyitsu kple agbo tsɔ sa ŋutifafavɔwo ɖe dukɔ la ta. Azɔ Aron viŋutsuwo tsɔ ʋu la de esi, eye wòhlẽe ɖe vɔsamlekpuia ƒe axawo katã ŋu. 
19 Ke nyitsu la ƒe amiawo, agbo la ƒe asike dami la, ami siwo tsyɔ dɔmenuawo dzi, ayikuawo, kple ami siwo le aklãa ŋu la, 
20 wotsɔ ami siawo katã da ɖe akɔawo dzi, eye Aron tsɔ amiawo do dzudzɔ le vɔsamlekpuia dzi. 
21 Ke Aron nyè akɔawo kple ɖusita la wònye vɔsa si wonyè le Afetɔ ŋkume, abe ale si Mose de se ene.
22 Azɔ Aron wu eƒe asiwo dzi ɖo ɖe dukɔ la gbɔ heyra wo, eye esi wòsa nuvɔ̃vɔ kple numevɔ kpakple ŋutifafavɔwo vɔ la, eɖi. 
23 Eye Mose kple Aron yi takpegbadɔa me, eye wodo go heyra dukɔ la. Eye Afetɔ ɖe eƒe ŋutikɔkɔe fia dukɔ blibo la katã, 
24 eye dzo tso Afetɔ gbɔ va fiã numevɔsalã la kple ami siwo le vɔsamlekpuia dzi. Esi dukɔ blibo la kpɔe la, wodo ɣli eye wotsyɔ mo anyi.

Leviticus 10
1 Emegbe Nadab kple Abihu, siwo nye Aron viŋutsuwo la, dometɔ ɖe sia ɖe tsɔ eƒe dzudzɔdosonuwo, eye woɖe dzo ɖe wo me, tsɔ dzudzɔdonu ʋeʋĩ da ɖe edzi. Eye wodo dzo si ŋu Afetɔ meɖe mɔ ɖo o, si meɖo na wo o la, le eŋkume. 
2 Ale dzo do tso Afetɔ gbɔ va fiã wo, eye woku le Afetɔ ŋkume. 
3 Eye Mose gblɔ na Aron be: “Nya si Afetɔ gblɔe nye esi, ‘Woakɔ ŋunye le ame siwo te ɖe ŋunye la dome, eye woadom ɖe dzi le dukɔ blibo la katã ŋkume.’” Ke Aron meke nu o.
4 Eye Mose yɔ Misael kple Elizafan, Aron tɔɖia Uziel ƒe viŋutsuwo, gblɔ na wo be: “Miva kɔ mia nɔviawo dzoe le kɔkɔeƒea ŋgɔ yi asaɖa la godo.” 
5 Ale wova kɔ Nadab kple Abihu, ame siwo ƒe awu ʋlayaawo gakpɔtɔ le wo ŋu la, yi asaɖa la godo, abe ale si Mose gblɔe ene.
6 Eye Mose gblɔ na Aron kple viaŋutsu bubu siwo nye Eleazar kple Itamar be: “Migagblẽ miaƒe ɖawo ɖi nyamaa alo adze miaƒe awuwo o, ne miagaku o, eye Mawu nagado dziku ɖe ha blibo la katã hã ŋu o. Mia nɔviwo, Israel ƒe aƒe blibo la, afa avi ɖe ame siwo Afetɔ wu kple dzo la ta. 
7 Migadzo le takpegbadɔa ƒe mɔnu o, be miagaku o, elabena Afetɔ ƒe ami kɔkɔe si wosi na mi la le mia ŋu.” Eye wowɔe abe ale si Mose gblɔe ene.
8 Eye Afetɔ gblɔ na Aron be: 
9 “Ne miegbɔna takpegbadɔa me la, wò ŋutɔ kple viwòŋutsu siwo kpe ɖe ŋuwò siaa migano wain alo aha muame bubu aɖeke o, ne miagaku o. Esia nanye ɖoɖo mavɔ na wò kple wò dzidzimeviwo. 
10 Ne miade vovo nu kɔkɔe kple nu dzro dome, nu si medza o kple nu dzadzɛ dome, 
11 eye miafia ɖoɖo siwo katã Afetɔ gblɔ to Mose dzi la Israel-viwo.”
12 Eye Mose gblɔ na Aron kple viaŋutsu siwo susɔ, siwo nye Eleazar kple Itamar be: “Mitsɔ nuɖuvɔsa si susɔ tso Afetɔ ƒe dzovɔsawo me, eye mitsɔe wɔ amɔwɔ maʋamaʋã boloe ne miaɖu le vɔsamlekpui la xa, elabena nu kɔkɔewo ƒe nu kɔkɔe wònye. 
13 Miɖui le teƒe kɔkɔe, elabena wò gome kple viwòŋutsuwo ƒe gome wònye tso Afetɔ ƒe dzovɔsawo me, eye se siae wode nam. 
14 Ke wò ŋutɔ kple viwòŋutsuwo kpakple viwònyɔnuwo miaɖu lã la ƒe akɔ si nye vɔsa si wonyè kple ɖusita si nye gome kɔkɔe la le teƒe dzadzɛ, elabena wò kple viwòwo ƒe gome wònye tso Israel-viwo ƒe ŋutifafavɔsawo me. 
15 Woatsɔ ɖusita si nye gome kɔkɔe la kple akɔ si nye vɔsa si woanyè la kpakple ami siwo wotsɔ sa dzovɔ vɛ ne woanye vɔsa si wonyè le Afetɔ ŋkume; akɔ la kple ɖusita la nanye wò kple viwò siwo le ŋuwò la ƒe gome tegbee abe ale si Afetɔ de se ene.”
16 Eye Mose di nuvɔ̃vɔsagbɔ̃ la tsitotsito, eye wòkpɔe be wotɔ dzoe xoxo! Ale wòdo dziku ɖe Eleazar kple Itamar, siwo nye Aron viŋutsu mamlɛawo ŋu gblɔ be: 
17 “Nu ka ŋuti mieɖu nuvɔ̃vɔsalã la le teƒe kɔkɔe o, evɔ nu kɔkɔewo ƒe nu kɔkɔe si wòtsɔ na mi be miaxɔ ha la ƒe vodada ɖe akɔ, ne mialé avu ɖe wo ta le Afetɔ ŋkume lae wònye? 
18 Kpɔ ɖa! Wometsɔ eƒe ʋu la va kɔkɔeƒe la o. Ðe wòle be miaɖui le teƒe kɔkɔe la abe ale si wode se nam ene.” 
19 Eye Aron ɖo eŋu na Mose be: “Kpɔ ɖa! Egbee wosa woƒe nuvɔ̃vɔ kple woƒe numevɔ le Afetɔ ŋkume, ke hã nu siawo dzɔ ɖe dzinye. Ne ɖe meɖu nuvɔ̃vɔsalã la egbea la, ɖe wòadze Afetɔ ŋua?” 
20 Esi Mose see la, edze eŋu.

Leviticus 11
1 Eye Afetɔ gblɔ na Mose kple Aron be: 
2 “Migblɔ na Israel-viwo be: ‘Anyigbadzinu gbagbe siwo miate ŋu aɖu la woe nye esi: 
3 Miate ŋu aɖu lã siwo ƒe afɔkli me fe keŋkeŋ, eye wodzɔa nu gaɖuna la.
4 “‘Lã siwo dzɔa nu gaɖuna alo esiwo ƒe afɔkli me fe siwo miaɖu o la woe nye: kposɔ, elabena edzɔa nu gaɖuna, ke eƒe afɔkli me mefe o. Nu makɔmakɔ wònye na mi. 
5 Hotoklolo, elabena edzɔa nu gaɖuna, ke eƒe afɔkli me mefe o. Nu makɔmakɔ wònye na mi. 
6 Fɔmizi, elabena edzɔa nu gaɖuna, ke eƒe afɔkli me mefe o. Nu makɔmakɔ wònye na mi. 
7 Ha, elabena eƒe afɔkli me fe keŋkeŋ, ke medzɔa nu gaɖuna o. Nu makɔmakɔ wònye na mi. 
8 Migaɖu woƒe lã o, eye migaka asi woƒe kukua ŋu o. Wo ŋu mekɔ na mi o.
9 “‘Tɔmelã siwo katã miate ŋu aɖu la woe nye tɔmelã siwo katã ŋu adza kple tsro le le atsiaƒuwo kple tɔsisiwo me. 
10 Ke nu siwo katã nɔa ha me kple nu gbagbe siwo katã le tsi me, siwo katã ŋu adza kple tsro mele o le atsiaƒuwo kple tɔsisiwo me la, ŋunyɔnu wonye na mi. 
11 Ɛ̃, woanye ŋunyɔnu na mi. Migaɖu woƒe lã o, eye minyɔ ŋu woƒe kukuawo hã. 
12 Nu siwo katã ŋu adza kple tsro mele o le tsi me la, ŋunyɔnu wonye na mi.
13 “‘Xe dzodzoe siwo mianyɔ ŋui, eye miaɖu wo o le esi wonye ŋunyɔnu ta la woe nye esi: hɔ̃, akpo kple gbagblaxetsu, 
14 Doɖi kple aʋako ɖe sia ɖe ƒomevi, 
15 akpaviã ƒomeviwo katã, 
16 golo, favieʋuto, tsalɛ̃ kple xe ƒonu ɖe sia ɖe ƒomevi, 
17 ʋlukuku, tsimese, favieʋuto ƒomeviwo, 18 tɔkpakpaxe, aluge kple akaga, 
19 damixe, aŋɔɣi ƒomeviwo, agudzixe kple agutɔ. 
20 Nu dzodzoe siwo katã nɔa ha me hezɔa afɔ ene dzi la, ŋunyɔnu wonye na mi.
21 “‘Nu dzodzoe siwo nɔa ha me hezɔa afɔ ene dzi la dometɔ siwo ko miate ŋu aɖu la woe nye: esiwo tsɔa megbetatiwo tia kpoe. 
22 Wo dometɔ siwo miate ŋu aɖu la woe nye esiawo: ʋetsuvi ƒomeviwo katã, abɔwo, ʋetrawo kple gbagblamewo. 
23 Ke nu dzodzoe bubu siwo nɔa ha me, siwo si afɔ ene le la, katã nye ŋunyɔnu na mi. 
24 Nu siawo ana miazu ame makɔmakɔwo. Ame sia ame si aka asi woƒe kukua ŋu la, eŋu mekɔ o va se ɖe fiẽ. 
25 Eye ame sia ame si atsɔ woƒe kukua la nanya eƒe awuwo, eye eŋu mekɔ o va se ɖe fiẽ.
26 “‘Lã siwo katã ƒe afɔkli me fe, gake meʋu keŋ o, eye womedzɔa nu gaɖuna o la, nu makɔmakɔ wonye na mi. Ame sia ame si ka asi wo ŋu la azu ame makɔmakɔ. 
27 Ke nu gbagbe siwo katã fe li na, le nuwɔwɔ siwo katã zɔa afɔ ene dzi dome la, nu makɔmakɔ wonye na mi. Ame sia ame si aka asi woƒe kukua ŋu la azu ame makɔmakɔ va se ɖe fiẽ. 
28 Ame si tsɔ woƒe kukua la nanya eƒe awuwo, eye eŋu mekɔ o va se ɖe fiẽ. Nu makɔmakɔwo wonye na mi.
29 “‘Lã siwo nɔa ha me le anyigba dzi dometɔ siwo nye nu makɔmakɔ na mi lae nye esi: alegeli, afi, adoglo ƒomeviwo katã, 
30 xɔmenyatri, ana, ve, adoglo si nɔa ke me kple agama. 
31 Lã siawo siwo nɔa ha me la nye nu makɔmakɔwo na mi. Ame sia ame si ka asi woƒe kukua ŋu la ŋu mekɔ o va se ɖe fiẽ.
32 “‘Nu sia nu si dzi wo dometɔ aɖe ƒe kukua age dze la azu nu makɔmakɔ, eɖanye atinu alo awu, lãgbalẽ alo kotoku o. Woade agba ɖe sia ɖe si ŋu dɔ wowɔna la tsi me, eye eŋu mekɔ o va se ɖe fiẽ, emegbe hafi eŋu akɔ. 
33 Ke ne wo dometɔ aɖe ge dze anyinu aɖe me la, ekema nu siwo katã le eme la ŋu mekɔ o, eye miagbã nu la. 
34 Nuɖuɖu sia nuɖuɖu, si dzi anyinu ma me tsi kɔ ɖo la ŋu mekɔ o, eye nunono sia nunono si atso nu ma me la ŋu mekɔ o. 
35 Nu sia nu si dzi woƒe kukuawo ge dze la ŋu mekɔ o, eɖanye abolokpo alo mlekpui o, woagbãe. Wo ŋu mekɔ o, eye woanye nu makɔmakɔwo na mi. 
36 Negbe tsidzɔƒe kple tsido siwo me tsi nɔna koe anye nu siwo ŋu kɔ, ke ame sia ame si aka asi woƒe kukua ŋu la azu ame makɔmakɔ. 
37 Ne woƒe kukuawo ge dze nuku aɖe si ƒã ge wole dzi la, eŋu kɔ. 
38 Ke ne wode nuku aɖe tsi, eye woƒe kukua ƒe akpa aɖe ge dze eme la, nukua ŋu mekɔ na mi o.
39 “‘Ke ne lã siwo mieɖuna la dometɔ aɖe ku la, ame sia ame si ka asi eƒe kukua ŋu la azu ame makɔmakɔ va se ɖe fiẽ. 
40 Ame si ɖu eƒe kukua ƒe ɖe la nanya eƒe awuwo, eye eŋu mekɔ o va se ɖe fiẽ. Ame si kɔ eƒe kukua la nanya eƒe awuwo eye eŋu mekɔ o va se ɖe fiẽ. 
41 Anyigbadzilã suesue siwo nɔa ha me la katã nye ŋunyɔnu na mi. Migaɖu wo o. 
42 Migaɖu lã siwo katã zɔa ƒodo dzi, lã siwo katã zɔa afɔ ene dzi, alo anyigbadzilã suesue siwo nɔa ha me, eye afɔ wuwlui geɖe le wo si la o, elabena ŋunyɔnu wonye. 
43 Migatsɔ lã siwo nɔa ha me la dometɔ aɖeke do ŋunyɔ mia ɖokuiwo o, eye migatsɔ wo ƒo ɖi mia ɖokuiwo ahazu ame makɔmakɔwo o. 
44 Elabena nyee nye Afetɔ mia Mawu, mikɔ mia ɖokuiwo ŋu, eye minɔ kɔkɔe, elabena mele kɔkɔe. Eya ta migatsɔ lã siwo nɔa ha me, siwo ʋãna le anyigba dzi la, dometɔ aɖeke ƒo ɖi mia ɖokuiwo o. 
45 Elabena nyee nye Afetɔ, ame si kplɔ mi tso Egipte-nyigba dzi be manye miaƒe Mawu; minɔ kɔkɔe, elabena mele kɔkɔe.
46 “‘Esiae nye se le lã fɔenewo, nuwɔwɔ siwo dzona, nu gbagbe siwo katã ʋãna le tɔ me kple lã siwo nɔa ha me le anyigba dzi la katã ŋuti, 
47 ne woade vovo nu makɔmakɔ kple nu kɔkɔe dome, nu gbagbe siwo woate ŋu aɖu kple nu gbagbe siwo womaɖu o dome.’”

Leviticus 12
1 Afetɔ gagblɔ na Mose be: 
2 “Gblɔ na Israel-viwo be: ‘Ne nyɔnu aɖe fɔ fu, eye wòdzi ŋutsuvi la, ekema eŋu mekɔ o ŋkeke adre, abe ale si eŋu mekɔ o le ŋkeke siwo me wòɖo asi anyi lae ene. 
3 Le ŋkeke enyia gbe la, woatso aʋa na ɖevia. 
4 Eye nyɔnu la agakɔ eɖokui ŋu tso eƒe ʋu la me ŋkeke blaetɔ̃ vɔ etɔ̃ kpee. Megaka asi nu kɔkɔe aɖeke ŋu o, eye megava kɔkɔeƒe la o, va se ɖe esime wòwu eŋukɔkɔ ƒe ŋkekeawo nu hafi.
5 “‘Ke ne edzi nyɔnuvi la, ekema eŋu mekɔ o ŋkeke wuiene, abe ale si ko eŋu mekɔ o le eƒe asiɖoanyiɣi ene. Akpɔtɔ akɔ eɖokui ŋu tso ʋu la me ŋkeke blaade vɔ ade kpee. 
6 Ne ŋutsuvi alo nyɔnuvie wòdzi, eye eŋukɔkɔ ƒe ŋkekeawo wu enu la, ekema wòatsɔ alẽtsui si mexɔ wu ƒe ɖeka o vɛ na nunɔla le takpegbadɔa ƒe mɔnu be woatsɔ asa numevɔ, kple ahɔnɛvi ɖeka alo akpakpa ɖeka be woatsɔ asa nuvɔ̃vɔ. 
7 Nunɔla la natsɔe ava Afetɔ ŋkume ahalé avu ɖe eta, eye eŋu akɔ tso ʋu si do le eŋu la me. Esiae nye nyɔnu si dzi ŋutsuvi alo nyɔnuvi la ŋuti se. 
8 Ke ne mate ŋu ana alẽ o la, ekema wòatsɔ akpakpa eve alo ahɔnɛvi eve vɛ, woatsɔ ɖeka asa numevɔ, eye woatsɔ evelia asa nuvɔ̃vɔ, eye nunɔla la nalé avu ɖe eta, eye eŋu akɔ.’”

Leviticus 13
1 Afetɔ gagblɔ na Mose kple Aron be: 
2 “Ne nane do ɖe ame aɖe ƒe ŋutigbalẽ ŋu, alo dzi do ɖe eŋu, alo eƒe ŋutigbalẽ ɖe bo, eye wòate ŋu anye anyidɔ ye do ɖe eƒe ŋutigbalẽ ŋu la, ekema woakplɔe ava nunɔla Aron alo viaŋutsu siwo nye nunɔlawo dometɔ ɖeka gbɔ. 
3 Nunɔla la alé ŋku ɖe nu si do ɖe eƒe ŋutigbalẽa ŋu la ŋuti. Ne fu siwo le teƒea le ɣie, eye teƒea nyé ɖe eme wu eƒe ŋutigbalẽa ƒe akpa bubuawo la, ekema anyidɔe. Nunɔla la nalé ŋku ɖe eŋu, eye wòagblɔ be eŋu mekɔ o. 
4 Gake ne ŋutigbalẽ la ɖe bo hefu ɣie, teƒe la menyé ɖe eme wu eƒe ŋutigbalẽa ƒe akpa bubuawo o, eye fu la mele ɣie o la, ekema nunɔla la naɖe ame si ŋu dɔa le la ɖe aga ŋkeke adre. 
5 Nunɔla la alé ŋku ɖe amea ŋu le ŋkeke adrea gbe. Ne dɔa gale nenema ko, eye mekaka ɖe ŋutigbalẽa me o la, ekema nunɔla la nagaɖee ɖe aga ŋkeke adre bubu.
6 “Nunɔla la nagalé ŋku ɖe amea ŋu ake le ŋkeke adrea gbe. Ne dɔa le vɔvɔm le ŋutigbalẽa me eye mekaka ɖe edzi o la, ekema nunɔla la nagblɔ be eŋu kɔ; dzi ko wònye. Amea nenya eƒe awuwo be eŋu nakɔ. 
7 Gake ne amea va nunɔla la gbɔ va yi eye wòkpɔe be eŋu kɔ hafi dzia va kaka ɖe eƒe ŋutigbalẽ me la, ekema ele be wòagava nunɔla la gbɔ ake. 
8 Nunɔla la nalé ŋku ɖe eŋu, ne dzi la kaka ɖe ŋutigbalẽa me la, ekema nunɔla la nagblɔ be eŋu mekɔ o. Anyidɔe.
9 “Ne anyi ƒo ɖe ame aɖe ŋu la, ekema woakplɔe ava nunɔla la gbɔ, 
10 ne nunɔla la nalé ŋku ɖe eŋu. Ne dɔ si do ɖe eƒe ŋutigbalẽ ŋu la fu ɣie, fu siwo le teƒea zu ɣie, eye teƒe si dɔa do ɖo la zu abi la, 
11 ekema anyidɔ xoxoe wònye le eƒe ŋutigbalẽ ŋu, nunɔla la nagblɔ be eŋu mekɔ o. Mehiã be wòagaɖee ɖe aga o, elabena eŋu mekɔ o. 
12 Gake ne nunɔla la kpɔe dze sii keŋ be anyidɔ la kaka eye wòxɔ amea ŋuti katã, tso eƒe tame va ɖo eƒe afɔgɔme, 
13 eye nunɔla la lé ŋku ɖe eŋu hekpɔe be anyidɔ la xɔ eŋuti katã la, ekema wòagblɔ be dɔnɔa ŋu kɔ. Esi eŋuti katã fu ɣie ta la, amea ŋu kɔ. 
14 Gake gbe si gbe wògawɔ abi la, amea ŋu mekɔ o. 
15 Ne nunɔla la kpɔ abia la, agblɔ be eŋu mekɔ o. Abi la ŋu mekɔ o. Anyidɔe. 
16 Gake ne abia gatrɔ zu ɣie la, ekema amea nava nunɔla la gbɔ. 
17 Nunɔla la alé ŋku ɖe eŋu, eye ne ekpɔe be dɔ si do ɖe eŋu zu ɣie la, ekema nunɔla la nagblɔ be dɔnɔa ŋu kɔ.
18 “Ne ƒoƒoe ƒo ame aɖe hemie, 
19 gake nu ɣi aɖe do ɖe ƒoƒoe la teƒe alo wòɖe bo, eye wòfu hede biabiã ge la, ekema amea natsɔ eɖokui afia nunɔla la. 
20 Nunɔla la nalé ŋku ɖe eŋu. Ne teƒea nyé ɖe eme wu ŋutigbalẽa ƒe akpa bubuawo, eye eƒe fu la le ɣie la, ekema nunɔla la nagblɔ be eŋu mekɔ o. Anyie ƒo ɖe ƒoƒoe la teƒe. 
21 Ke ne nunɔla la lé ŋku ɖe eŋu eye wòkpɔ be fu ɣi aɖeke mele eme o, teƒea menyé ɖe eme wu ŋutigbalẽa ƒe akpa bubuawo hã o, eye wòlé akpɔ̃ la, ekema nunɔla la naɖe amea ɖe aga ŋkeke adre. 
22 Eye ne edze ƒãa be dɔa kaka ɖe ŋutigbalẽa me la, ekema nunɔla la nagblɔ be eŋu mekɔ o. Dɔvɔ̃ ye. 
23 Ke ne teƒe si ɖe bo la kpɔtɔ le nenema, mekeke ɖe enu o la, ekema ƒoƒoea ƒe teƒee ho, nunɔla la nagblɔ be eŋu kɔ.
24 “Ne dzo fiã ame aɖe, eye dzobi la teƒe fu hede biabiã ge alo le ɣie keŋ la, 
25 nunɔla la nalé ŋku ɖe eŋu. Ne fu siwo le teƒea zu ɣie, eye teƒea nyé ɖe eme wu ŋutigbalẽa ƒe akpa bubuawo la, ekema anyidɔe do ɖe dzobi la me, eye nunɔla la nagblɔ be eŋu mekɔ o. Anyidɔe. 
26 Gake ne nunɔla la lé ŋku ɖe eŋu eye wòkpɔ be fu ɣi aɖeke mele teƒea o, menyé ɖe eme wu ŋutigbalẽ la ƒe akpa bubuawo hã o, eye wòlé akpɔ̃ la, ekema nunɔla la naɖe amea ɖe aga ŋkeke adre. 
27 Nunɔla la nalé ŋku ɖe eŋu le ŋkeke adrea gbe. Ne edze ƒãa be ekaka ɖe ŋutigbalẽa me la, ekema nunɔla la nagblɔ be eŋu mekɔ o. Anyidɔe. 
28 Ke ne teƒe si ɖe bo la kpɔtɔ le nenema, mekaka ɖe ŋutigbalẽa me o, eye wòlé akpɔ̃ la, ekema nane koe do ɖe dzobi la teƒe, nunɔla la nagblɔ be eŋu kɔ, elabena dzobi teƒe lae ɖi atse.
29 “Ne dɔ aɖe do ɖe ŋutsu alo nyɔnu aɖe ƒe tame alo eƒe glã la, 
30 ekema nunɔla la nalé ŋku ɖe dɔa ŋu. Ne teƒe la nyé ɖe eme wu ŋutigbalẽa ƒe akpa bubuawo, fu siwo le teƒea ƒe amadede trɔ aŋutiɖiɖi eye wòle belibeli la, ekema nunɔla la nagblɔ be amea ŋu mekɔ o; dɔe do ɖe amea ƒe ɖa alo ge me. Anyidɔe ƒo ɖe eƒe tame alo eƒe glã. 
31 Gake ne nunɔla la kpɔ be teƒea menyé ɖe eme wu ŋutigbalẽa ƒe akpa bubuawo o, eye fu yibɔ aɖeke mele eme o la, ekema nunɔla la naɖe dɔnɔa ɖe aga ŋkeke adre. 
32 Nunɔla la nalé ŋku ɖe dɔa ŋu le ŋkeke adrea gbe. Ne dɔa mekaka ɖe edzi o, fua ƒe amadede metrɔ aŋutiɖiɖii o, eye teƒea menyé ɖe eme wu ŋutigbalẽa ƒe akpa bubuawo o la, 
33 ekema woaƒlɔ ɖa nɛ, ke woatsò dɔteƒea ya ɖi, eye nunɔla la naɖe dɔnɔa ɖe aga ŋkeke adre.
34 “Nunɔla la nagalé ŋku ɖe dɔa ŋu le ŋkeke adrea gbe, ne dɔ si le tame kple ge me nɛ la mekeke ɖe enu o, eye teƒea menyé ɖe eme wu ŋutigbalẽa ƒe akpa bubuawo o la, ekema nunɔla la nagblɔ be eŋu kɔ, eye amea nanya eƒe awuwo ne eŋu nakɔ. 
35 Ke ne edze ƒãa be dɔa keke ɖe enu le ŋutigbalẽa me esime wogblɔ be eŋu kɔ megbe la, 
36 ekema nunɔla la nagalé ŋku ɖe amea ŋu, ne dɔa keke ɖe enu la, ekema mehiã be nunɔla la nagakpɔe ɖa be fua ƒe amedede trɔ aŋutiɖiɖi hã o; amea ŋu mekɔ o. 
37 Gake ne ekpɔe be dɔa mekeke ɖe enu o, eye fu yibɔ to ɖe teƒea la, ekema dɔa vɔ. Eŋu kɔ, eya ta nunɔla la nagblɔ be eŋu kɔ.
38 “Ne ŋutsu alo nyɔnu aɖe ƒe ŋutigbalẽ ɖe bo, eye teƒe si ɖe bo la le ɣie la, 
39 nunɔla la nalé ŋku ɖe eŋu. Ne ŋutigbalẽ la ƒe teƒe si ɖe bo la lé akpɔ̃ hele ɣie la, ekema nane koe ƒo ɖe eŋu, menye dɔvɔ̃e o. Eŋu kɔ.
40 “Ne ŋutsu aɖe ƒe ɖa be le eƒe dzodome la, ekema tabebe ye, eŋu kɔ. 
41 Ne ɖa be le ŋgonu nɛ la, ekema eƒe ŋgonue kpã; eŋu kɔ. 
42 Ke ne nane do ɖe eƒe dzodome alo ŋgonu si bebe la, eye wòfu hede biabiã ge la, ekema anyidɔe do ɖe eƒe dzodome alo eƒe ŋgonu. 
43 Nunɔla la nalé ŋku ɖe amea ŋu. Ne dɔ si do ɖe eƒe dzodome alo eƒe ŋgonu, afi si bebe la, fu hede biabiã ge abe ale si anyidɔ dona ɖe ŋutigbalẽ ŋu ene la, 
44 ekema anyidɔlélae. Eŋu mekɔ o. Nunɔla la nagblɔ be eŋu mekɔ o le dɔ si do ɖe eƒe tame la ta. 
45 Ame si ŋu anyidɔa le la nadze eƒe awuwo, eye wòagblẽ eƒe tagbɔ ɖi atsyɔ nu eƒe nutage dzi anɔ ɣli dom be: ‘Ŋunye mekɔ o hee, ŋunye mekɔ o hee!’ 
46 Ŋkeke ale si dɔa le eŋu la, eŋu mekɔ o. Esi eŋu mekɔ o ta la, woaɖee ɖe aga wòayi aɖanɔ asaɖa la godo.
47 “Ke ne anyidɔ ƒe dzesi dze le nudodo aɖe me, eɖanye lãfuwu alo aklalawu o, 
48 alo avɔlɔ̃ka, alo nu si wotsɔ ɖeti alo lãfu lɔ̃, lãgbalẽ, alo nu sia nu si wotsɔ lãgbalẽ wɔ me, 
49 eye dɔa do ɖe awu, lãgbalẽ, avɔlɔ̃ka, alo nu si wolɔ̃ ŋu, alo nu sia nu si wotsɔ lãgbalẽ wɔ la me, eye dzesia ƒe amadede nye aŋutiɖiɖi kple gbemu tsaka, alo wòbiã vie la, ekema anyidɔe, woatsɔe afia nunɔla la. 
50 Nunɔla la nalé ŋku ɖe teƒe si dɔa do ɖo ŋu, eye wòaɖe nu si ŋu dɔa le la ɖe aga ŋkeke adre. 
51 Ne ekpɔ le ŋkeke adrea gbe be dɔa kaka ɖe awua, avɔlɔ̃ka la, nu si wolɔ̃, alo lãgbalẽa me la, eɖanye nu ka kee wozãa lãgbalẽa na o, dɔ vɔ̃ɖie do ɖe eme, eŋu mekɔ o. 
52 Ele be wòatɔ dzo awu la, avɔlɔ̃ka la, nu si wotsɔ lãfu alo ɖeti lɔ̃, alo nu sia nu si wotsɔ lãgbalẽ wɔ si me dɔa do ɖo, elabena dɔ vɔ̃ɖie. Woatɔ dzo nu la.
53 “Ke ne nunɔla la lé ŋku ɖe eŋu, eye wòkpɔ be nua mekeke ɖe enu le awua, avɔlɔ̃ka la, nu si wolɔ̃ alo nu sia nu si wotsɔ lãgbalẽ wɔ la me o la, 
54 ekema nunɔla la nade se be woanya nu si me dɔa le la, eye wòagaɖee ɖe aga ŋkeke adre bubu. 
55 Nunɔla la nalé ŋku ɖe nu si ŋu dɔa le la ŋu le enyanya vɔ megbe. Ne ekpɔ be teƒe si nua do ɖo la gale nenema ko, evɔ mekeke ɖe enu hã o la, ke eŋu mekɔ o. Ele be woatɔ dzoe le esi dɔa ɖu teƒea le eƒe ŋkume alo megbe ta.
56 “Ke ne nunɔla la lé ŋku ɖe nu si ŋu dɔa do ɖo le enyanya vɔ megbe eye wòkpɔ be teƒea lé akpɔ̃ la, ekema wòalã teƒe si dɔa do ɖo la ɖa le awu, lãgbalẽ, avɔlɔ̃ka alo nu si wolɔ̃ la ŋu. 
57 Gake ne egado ɖe awu, avɔlɔ̃ka, nu si wolɔ̃, alo nu sia nu si wotsɔ lãgbalẽ wɔ la me ake la, ekema dɔa le kekem ɖe enu. Ele be woatɔ dzo nu sia nu si me dɔa le. 
58 Ke ne wonya awu la, avɔlɔ̃ka la, nu si wolɔ̃, alo nu sia nu si wotsɔ lãgbalẽ wɔ, eye dɔa bu le eme la, ekema woaganyae zi evelia be eŋu nakɔ.
59 “Esiae nye anyidɔ si le lãfuwu, aklalawu, avɔlɔ̃ka, nu si wolɔ̃, alo nu sia nu si wotsɔ lãgbalẽ wɔ me la ŋuti se, be woanya ne eŋu kɔ loo alo eŋu mekɔ o.”

Leviticus 14
1 Afetɔ gagblɔ na Mose be: 
2 “Esiae anye se si dzi woazɔ ɖo le gbe si gbe woakplɔ anyidɔléla aɖe ava nunɔla la gbɔ be wòaɖo kpe edzi be eŋu kɔ. 
3 Nunɔla la nayi asaɖa la godo aɖalé ŋku ɖe eŋu. Ne anyidɔ la vɔ le anyidɔlélaa ŋu la, 
4 ekema nunɔla la nana wòatsɔ xevi gbagbe eve siwo ŋu kɔ, sederti, ka dzĩ kple isop gbe avɛ be woatsɔ akɔ eŋu. 
5 Nunɔlaa nana woatso xeviawo dometɔ ɖeka ɖe tɔsisi me tsi si le ze me la ŋgɔ. 
6 Ke wòatsɔ xevi gbagbe la, sederti la, ka dzĩ la kple isop gbe la anyrɔ ɖe xeviʋu si woɖuɖu ɖe tɔsisi me tsia me la me. 
7 Eye wòahlẽe ɖe ame si le eɖokui ŋu kɔm tso anyidɔ me la ŋu zi adre, eye wòagblɔ be eŋu kɔ, eye wòaɖe asi le xevi gbagbe la ŋu ɖo ɖe gbe me.
8 “Eyome ame si le eɖokui ŋu kɔm la nanya eƒe awuwo, alũ eŋuti fuwo katã ahale tsi be eŋu nakɔ. Emegbe ekpɔ mɔ ava asaɖa la me, gake wòatsi eƒe agbadɔ godo ŋkeke adre. 
9 Le ŋkeke adrea gbe la, wòalũ ta kple ge kpakple adzugo. Ne elũ eŋuti fuwo katã vɔ la, wòanya eƒe awuwo ahale tsi be eŋu nakɔ.
10 “Le ŋkeke enyia gbe la, wòatsɔ alẽtsui eve siwo sɔ blibo kple alẽnɔe ɖeka si xɔ ƒe ɖeka, si sɔ blibo kple wɔ memee efa me mama ɖe ewo ƒe akpa etɔ̃ si wotsɔ ami dzabae la avɛ wòanye nuɖuvɔsa, hekpe ɖe ami lɔg ɖeka ŋu. 
11 Eye nunɔla si gblɔ be eŋu kɔ la nakplɔ ame si le eɖokui ŋu kɔm la ahatsɔ vɔsanuawo akpe ɖe eŋu ava Afetɔ ŋkume le takpegbadɔ la nu. 
12 Nunɔlaa natsɔ alẽtsuiawo dometɔ ɖeka asa fɔɖivɔ hekpe ɖe ami lɔg ɖeka la ŋu, eye wòanyè wo woazu nunyèvɔsa le Afetɔ ŋkume. 
13 Eyome wòawu alẽtsui la le teƒe kɔkɔe, afi si wowua nuvɔ̃vɔsalã kple numevɔsalã la le, elabena nuvɔ̃vɔsalã la nye nunɔla la tɔ abe fɔɖivɔsalã la ke ene. Nu kɔkɔewo ƒe nu kɔkɔe wònye.
14 “Eye nunɔla la natsɔ fɔɖivɔsalã la ƒe ʋu la ƒe ɖe asisii ɖe ame si le eɖokui ŋu kɔm la ƒe ɖusitogboe, eƒe nuɖusidegblefetsu kple eƒe ɖusifɔdegblefetsu ŋu. 
15 Nunɔla la nakɔ ami lɔg ɖeka la ƒe ɖe ɖe eya ŋutɔ ƒe miasiƒome. 
16 Eye nunɔla la nade eƒe nuɖusisibidɛ ami si le eƒe miasiƒome la me ahlẽe zi adre le Afetɔ ŋkume. 
17 Eyome nunɔla la nasisi ami si le eƒe asiƒome la ƒe ɖe ɖe ame si le eɖokui ŋu kɔm la ƒe ɖusitogboe, eƒe nuɖusidegblefetsu kple eƒe ɖusifɔdegblefetsu ŋu, ɖe teƒe siwo wòsisi fɔɖivɔsalã ƒe ʋua ɖo la dzi. 
18 Nunɔla la natsɔ ami si susɔ ɖe eƒe asiƒome la asi ɖe ta na ame si le eɖokui ŋu kɔm la, be wòalé avu ɖe eta le Afetɔ ŋkume.
19 “Nunɔla la natsɔ nuvɔ̃vɔsalã la asa vɔe atsɔ alé avu ɖe ame si le eɖokui ŋu kɔm tso eƒe ɖiƒoƒo me la ta, eye wòawu numevɔsalã la. 
20 Eyome nunɔlaa nasa numevɔ kple nuɖuvɔ la le vɔsamlekpuia dzi atsɔ alé avu ɖe amea ta be eŋu nakɔ.
21 “Ke ne amea da ahe, eye nu mede edzi boo o la, ekema wòatsɔ alẽtsui ɖeka vɛ be woatsɔ asa fɔɖivɔ, be wòanye nunyèvɔsa si woatsɔ alé avu ɖe eta, kple wɔ memee efa me mama ɖe ewo ƒe akpa ɖeka si wotsɔ ami dzabae be wòanye nuɖuvɔsa, kple ami lɔg ɖeka, 
22 kpakple akpakpa eve alo ahɔnɛvi eve le eƒe ŋutete nu. Woatsɔ ɖeka asa nuvɔ̃vɔ ahatsɔ evelia asa numevɔ. 
23 Le ŋkeke enyia gbe la, wòatsɔ wo vɛ na nunɔlaa le takpegbadɔa nu le Afetɔ ŋkume, be woaɖo kpe edzi be eŋu kɔ.
24 “Nunɔla la natsɔ alẽtsui si woatsɔ asa fɔɖivɔ kple ami lɔg ɖeka la, eye wòanyè wo woazu nunyèvɔsa le Afetɔ ŋkume. 
25 Nunɔla la nawu alẽtsui si woatsɔ asa fɔɖivɔ la, eye wòasisi fɔɖivɔsalã la ƒe ʋu la ƒe ɖe ɖe ame si le eɖokui ŋu kɔm la ƒe ɖusitogboe, eƒe nuɖusidegblefetsu kple eƒe ɖusifɔdegblefetsu ŋu. 
26 Nunɔla la nakɔ ami la ƒe ɖe ɖe eya ŋutɔ ƒe miasiƒome, 
27 eye wòatsɔ eƒe nuɖusisibidɛ ahlẽ ami si le eƒe miasiƒome la ƒe ɖe zi adre le Afetɔ ŋkume. 
28 Eye nunɔla la nasisi ami si le eƒe asiƒome la ƒe ɖe ɖe ame si le eɖokui ŋu kɔm la ƒe ɖusitogboe, eƒe nuɖusidegblefetsu kple eƒe ɖusifɔdegblefetsu ŋu, ɖe teƒe siwo wòsisi fɔɖivɔsalãa ƒe ʋua ɖo la dzi. 
29 Eye nunɔla la nasi ami si susɔ ɖe eƒe asiƒome la ɖe ta na ame si le eɖokui ŋu kɔm la, be wòalé avu ɖe eta le Afetɔ ŋkume.
30 “Atsɔ akpakpaawo loo alo ahɔnɛviawo dometɔ ɖeka, esi amea te ŋu na, 
31 si nye esi nu eƒe ŋutete de la dometɔ ɖeka asa nuvɔ̃vɔ, eye wòatsɔ evelia asa numevɔ hekpe ɖe nuɖuvɔsa la ŋu, be nunɔla la nalé avu ɖe ame si le eɖokui ŋu kɔm la ta le Afetɔ ŋkume.
32 “Esiae nye se si dzi ame si ŋu anyidɔ nɔ evɔ nu mede edzi o la awɔ ɖo le ɣeyiɣi si me wole eŋu kɔm.”
33 Afetɔ gblɔ na Mose kple Aron be: 
34 “Ne mieva Kanaan-nyigba si metsɔ na mi be wòanye mia tɔ dzi, eye mena anyidɔ do ɖe xɔ aɖe ŋu le miaƒe anyigba dzi la, 
35 ekema aƒea tɔ la nava gblɔ na nunɔla la be: ‘Nane do ɖe nye xɔ ŋu abe dɔvɔ̃ ene.’ 
36 Nunɔla la nade se be woafɔ nu sia nu ado goe le xɔa me hafi wòava lé ŋku ɖe dɔa ŋu, ale be wòagava gblɔ be nu siwo katã le xɔa me la zu nu makɔmakɔwo o. Emegbe hafi nunɔla la nayi aɖalé ŋku ɖe xɔ la ŋu. 
37 Ne eva kpɔ dɔa le xɔa ƒe gliwo ŋu eye wòkpɔ be glia ƒe akpa aɖewo nyé ɖe eme wu eƒe akpa bubuwo eye teƒea ƒe amadede nye aŋutiɖiɖi kple gbemu tsaka alo biã vie la, 
38 ekema nunɔla la nado go le xɔa me ayi gota, eye wòatu ʋɔa ŋkeke adre.
39 “Nunɔla la natrɔ ava lé ŋku ɖe eŋu le ŋkeke adrea gbe. Ne anyidɔ la keke ɖe enu le xɔa ƒe gliwo ŋu la, 
40 ekema nunɔla la nade se be woaho kpe siwo ŋu dɔa le atsɔ aƒu gbe ɖe teƒe makɔmakɔ le dua godo. 
41 Eye wòana woaƒlɔ xɔa ƒe gli ŋu keŋ le eme eye woalɔ anyia ava kɔ ɖe teƒe makɔmakɔ le dua godo. 
42 Eyome wòana woaɖo kpe bubuwo ɖe esiwo woho la teƒe, eye woablu anyi bubu atsɔ azrɔ̃ xɔa ŋu.
43 “Ke ne woho kpeawo ɖa, eye wodza gli la ŋu hegbugbɔ zrɔ̃ eŋu hafi dɔa gado ɖe xɔa ŋu ake la, 
44 ekema nunɔla la nava lé ŋku ɖe eŋu. Ne dɔa kaka ɖe xɔa ŋu la, ekema anyidɔ vɔ̃ɖie wònye le xɔa ŋu. Xɔa ŋu mekɔ o. 
45 Nena woagbã xɔ la eye woalɔ kpeawo, ʋuƒoawo kple xɔa ƒe anyi la katã aɖakɔ ɖe teƒe makɔmakɔ le dua godo. 
46 Ke ne ame aɖe ge ɖe xɔa me le ŋkeke siwo me wòle be ʋɔa nanɔ tutu la, eŋu mekɔ o va se ɖe fiẽ; 
47 ame sia ame si mlɔ xɔa me la nanya eƒe awuwo, eye ame sia ame si ɖu nu le xɔa me la nanya eƒe awuwo.
48 “Ke ne wogbugbɔ zrɔ̃ xɔa ŋu vɔ, eye nunɔla la va lé ŋku ɖe eŋu, eye wòkpɔ be dɔa mekaka ɖe xɔa ŋu o la, ekema nunɔla la nagblɔ be xɔa ŋu kɔ, elabena dɔa vɔ le eŋu. 
49 Eye woatsɔ xevi eve, sederti, ka dzĩ kple isop gbe vɛ be woatsɔ akɔ xɔa ŋu. 
50 Atso xeviawo dometɔ ɖeka ɖe tɔsisi me tsi si le ze me la ŋgɔ. 
51 Eye wòatsɔ sederti la, isop gbe la, ka dzĩ la kple xevi gbagbe la anyrɔ ɖe xeviʋu si woɖuɖu ɖe tɔsisi me tsi ŋgɔ la me ahlẽ ɖe xɔ la ŋu zi adre. 
52 Eye wòatsɔ xevi la ƒe ʋu, tɔsisi me tsi la, xevi gbagbe la, sederti la, isop gbe la kple ka dzĩ la aɖe vɔ̃ ɖa le xɔa ŋu ahakɔ eŋu. 
53 Eyome wòaɖe asi le xevi gbagbe la ŋu le dua godo ɖo ɖe gbe me, ne wòalé avu ɖe xɔ la ta be eŋu nakɔ.
54 “Esiawoe nye se siwo ku ɖe anyidɔ ɖe sia ɖe, dɔ si do ɖe ɖa alo ge me, 
55 anyidɔ si do ɖe nudodo aɖe me alo xɔ aɖe ŋu, 
56 nane si do ɖe ame ŋu, dzi si do ɖe ŋutigbalẽ ŋu, alo ŋutigbalẽ si ɖe bo la ŋuti. 
57 Esiawoe nye mɔfiame siwo ana woanya be nane ŋu kɔ loo alo eŋu mekɔ o. Esiae nye anyidɔ ŋuti se.”

Leviticus 15
1 Afetɔ gagblɔ na Mose kple Aron be: 
2 “Migblɔ na Israel-viwo be, ‘Ne ŋutsu aɖe le afu ɖɔm la, ekema tsi si le dodom le eƒe ŋutsu me la na eŋu mekɔ o. 
3 Eŋu mekɔ o, eɖanye be tsia kpɔtɔ le dodom le eŋu loo alo ena eƒe ŋutsu me xe o, eŋu mekɔ o.
4 “‘Aba sia aba si dzi ŋutsu si le afu ɖɔm amlɔ la ŋu mekɔ o, eye nu sia nu si dzi wòanɔ anyi ɖo la ŋu mekɔ o. 
5 Ame si ka asi eƒe aba ŋu la nanya eƒe awuwo ahale tsi, eye eŋu mekɔ o va se ɖe fiẽ. 
6 Ame sia ame si nɔ anyi ɖe nu si dzi afuɖɔla nɔ la nanya eƒe awuwo ahale tsi, eye eŋu mekɔ o va se ɖe fiẽ. 
7 Ame sia ame si ka asi afuɖɔla ŋu la nanya eƒe awuwo ahale tsi, eye eŋu mekɔ o va se ɖe fiẽ. 
8 Ne afuɖɔla aɖe ɖe ta ɖe ame aɖe si ŋu kɔ ŋuti la, ekema amea nanya eƒe awuwo ahale tsi, eye eŋu mekɔ o va se ɖe fiẽ. 9 Sɔkpa ɖe sia ɖe si dzi ŋutsu si le afu ɖɔm anɔ la ŋu mekɔ o. 
10 Eye ame sia ame si aka asi nu bubu ɖe sia ɖe si dzi wònɔ ŋu la, ŋu mekɔ o va se ɖe fiẽ, ame si fɔ nu siawo la nanya eƒe awuwo ahale tsi, eye eŋu mekɔ o va se ɖe fiẽ. 
11 Ne afuɖɔla meklɔ asi hafi ka asi ame aɖe ŋu o la, ekema amea nanya eƒe awuwo ahale tsi, eye eŋu mekɔ o va se ɖe fiẽ. 
12 Woagbã anyinu si ŋu afuɖɔla ka asii la, eye ne atinu ŋue wòka asii la, ekema woaklɔe kple tsi.
13 “‘Ne tsi si le dodom le ŋutsua ŋu nu tso la, ekema wòaxlẽ ŋkeke adre hena eŋukɔkɔ, eye wòanya eƒe awuwo ahale tɔsisi me tsi be eŋu nakɔ. 
14 Le ŋkeke enyia gbe la, wòatsɔ akpakpa eve alo ahɔnɛvi eve ɖe asi ava Afetɔ ŋkume le takpegbadɔa nu, eye wòatsɔ wo ana nunɔla la. 
15 Nunɔlaa natsɔ ɖeka asa nuvɔ̃vɔ, eye wòatsɔ evelia asa numevɔ, eye nunɔla la nalé avu ɖe eta le Afetɔ ŋkume le tsi si do le eŋu la ta.
16 “‘Ne ŋutsu aɖe nyè tsi la, ekema wòale tsi, eye eŋu mekɔ o va se ɖe fiẽ. 
17 Wòanya awu sia awu kple lãgbalẽ sia lãgbalẽ si ŋu eƒe tsinyènye kɔ ɖo la, eye eŋu mekɔ o va se ɖe fiẽ.
18 “‘Ne ŋutsu aɖe dɔ nyɔnu gbɔ eye wònyè tsi la, ekema woale tsi, eye wo ŋu mekɔ o va se ɖe fiẽ.
19 “‘Ne nyɔnu aɖe ɖo asi anyi eye ʋu le dodom le eŋu la, ekema eŋu mekɔ o ŋkeke adre. Ame sia ame si ka asi eŋu la ŋu mekɔ o va se ɖe fiẽ. 
20 Nu sia nu si dzi wòamlɔ le eƒe asiɖoanyiɣia ŋu mekɔ o, eye nu sia nu si dzi wòanɔ la hã ŋu mekɔ o. 
21 Ame sia ame si ka asi eƒe aba ŋu la nanya eƒe awuwo ahale tsi, eye eŋu mekɔ o va se ɖe fiẽ. 
22 Ame sia ame si ka asi nu sia nu si dzi wònɔ anyi ɖo ŋu la nanya eƒe awuwo ahale tsi, eye eŋu mekɔ o va se ɖe fiẽ. 
23 Eɖanye aba alo nu bubu aɖe dzie nyɔnua nɔ anyi ɖo o, ame si ka asi nua ŋu la ŋu mekɔ o va se ɖe fiẽ. 
24 Ne ŋutsu dɔ egbɔ le eƒe asiɖoanyiɣi esi eŋu mekɔ o eye ʋua ɖe ɖe ŋutsua ŋu la, ekema ŋutsua ŋu mekɔ o ŋkeke adre, eye aba sia aba si dzi ŋutsua mlɔ la ŋu mekɔ o.
25 “‘Ne ʋu do le nyɔnu aɖe ŋu ŋkeke geɖe evɔ eƒe asiɖoanyiɣi meɖo o, alo ʋu do le eŋu wòdidi wu ɣeyiɣi si eƒe asiɖoanyi xɔna la, ekema ŋkeke siwo katã me ʋua le eŋu la, eŋu mekɔ o abe ale si wònɔna le eƒe asiɖoanyiɣia ke ene. 
26 Aba sia aba si dzi wòamlɔ le ŋkeke siwo me ʋua le dodom le eŋu la ŋu mekɔ o, abe eƒe asiɖoanyiɣi ƒe aba la ke ene, eye nu sia nu si dzi wòanɔ anyi ɖo la ŋu mekɔ o abe ale si wòle le eƒe asiɖoanyiɣia ke ene. 
27 Ame sia ame si ka asi nuawo ŋu la ŋu mekɔ o, eye wòanya eƒe awuwo ahale tsi, eye eŋu mekɔ o va se ɖe fiẽ.
28 “‘Ke ne ʋu si le dodom le eŋu nu tso la, ekema wòaxlẽ ŋkeke adre, eye emegbe eŋu akɔ. 
29 Le ŋkeke enyia gbe la, wòatsɔ akpakpa eve alo ahɔnɛvi eve avɛ na nunɔla la le takpegbadɔa nu. 
30 Nunɔla la natsɔ ɖeka asa nuvɔ̃vɔ, eye wòatsɔ evelia asa numevɔ, eye nunɔlaa nalé avu ɖe eta le Afetɔ ŋkume le ʋu si do le eŋu si na eŋu mekɔ o la ta.
31 “‘Mina Israel-viwo naɖe wo ɖokuiwo ɖa tso nu siwo ana wo ŋu makɔ o la gbɔ, ne woagagblẽ kɔ ɖo na nye avɔgbadɔ si le wo dome le esi wo ŋu mekɔ o ta ne woaku o.
32 “‘Esiae nye ŋutsu si le afu ɖɔm kple ŋutsu si nyè tsi, si na eŋu mekɔ o la ŋuti se; 
33 kple nyɔnu si ɖo asi anyi, si na eŋu mekɔ o, kpakple ame sia ame si ŋu nane le dodom le, eɖanye ŋutsu alo nyɔnu o, alo ŋutsu si dɔ nyɔnu si ŋu mekɔ o gbɔ la, ŋuti se.’”

Leviticus 16
1 Afetɔ ƒo nu kple Mose le Aron viŋutsu eve siwo ku le esi wote va Afetɔ ŋkume madzemadzee megbe. 
2 Afetɔ gblɔ na Mose be: “Gblɔ na nɔviwò Aron be wòagava kɔkɔeƒe la le xɔmetsovɔ la godo le nutunu si le Aɖakaa nu la ŋgɔ ɣesiaɣi ko o, ne wòagaku o, elabena maɖe ɖokuinye afia le alilikpo me le nutunu la tame.
3 “Nu siwo Aron atsɔ ɖe asi ne egbɔna kɔkɔeƒe lae nye esi: nyitsui ɖeka si woatsɔ asa nuvɔ̃vɔ kple agbo ɖeka si woatsɔ asa numevɔ. 
4 Nedo aklalawu ʋlaya kɔkɔe la kple aklalatakpui eye wòatsɔ alidziblanu la abla ali dzi ahatsɔ aklalatablanu la aɖɔ ɖe ta. Awu kɔkɔewoe wonye. Wòale tsi hafi ado wo.
5 “Eye wòaxɔ gbɔ̃tsui eve le Israel ƒe ha la si atsɔ asa nuvɔ̃vɔ kple agbo ɖeka atsɔ asa numevɔ.
6 “Aron natsɔ eƒe nuvɔ̃vɔsa ƒe nyitsu la avɛ ne wòatsɔ alé avu ɖe eɖokui kple eƒe aƒe la ta.
7 “Eyome wòakplɔ gbɔ̃ eveawo ava Afetɔ ŋkume le takpegbadɔa nu. 
8 Eye Aron nadzidze nu ɖe gbɔ̃ eveawo dzi; ɖeka nanye Afetɔ tɔ, eye evelia nanye Azazel tɔ. 
9 Aron natsɔ gbɔ̃ si dzi nudzidzea dze na Afetɔ la asa nuvɔ̃vɔ. 
10 Ke wòakplɔ gbɔ̃ si dzi nudzidzea dze na Azazel la ava Afetɔ ŋkume agbagbee, ne woalé avu ɖe eta, ale be woaɖoe ɖe Azazel le gbedzi.
11 “Eyome Aron natsɔ eƒe nuvɔ̃vɔsanyitsu si wòtsɔ vɛ la alé avu ɖe eya ŋutɔ kple eƒe aƒe la ta; eye wòawu nuvɔ̃vɔsanyitsu si nye eya ŋutɔ tɔ la.
12 “Eye wòatsɔ dzudzɔdosonu aɖe dzoka xɔxɔwo le vɔsamlekpuia dzi le Afetɔ ŋkume ɖe eme wòayɔ, eye wòaku dzudzɔdonu ʋeʋĩ si woto memie la asiʋlo eve atsɔ ava xɔmetsovɔ la godo. 
13 Azɔ wòakɔ dzudzɔdonu ʋeʋĩ la ɖe dzoa me le Afetɔ ŋkume, eye dzudzɔdonu ʋeʋĩ la ƒe dzudzɔ naxɔ Aɖaka la ƒe nutunu si le Ðaseɖinua dzi la dzi, ne wòagaku o.
14 “Atsɔ eƒe asibidɛ ade nyitsua ƒe ʋu la ƒe ɖe me agee ɖe nutunu la ŋgɔ le ɣedzeƒekpa dzi, eye wòatsɔ eƒe asibidɛ age ʋu la ƒe ɖe ɖe nutunu la ŋgɔ zi adre.
15 “Eyome wòawu nuvɔ̃vɔsagbɔ̃ si nye dukɔa tɔ la atsɔ eƒe ʋu la ava xɔmetsovɔ la godo, eye wòawɔ eƒe ʋu la abe ale si wòwɔ nyitsua ƒe ʋu ene; wòagee ɖe nutunu la ŋgɔ.
16 “Eye wòalé avu ɖe kɔkɔeƒea ta le Israel-viwo ƒe nu makɔmakɔ wɔwɔwo kpakple woƒe vodadawo kple woƒe nu vɔ̃wo katã ta. Alea kee wòawɔ na takpegbadɔ si le wo dome la hã le woƒe nu makɔmakɔ wɔwɔwo ta.
17 “Ne eyi takpegbadɔ la me be wòalé avu le kɔkɔeƒea la, ame bubu aɖeke megayi ɖe eme o va se ɖe esime wòado go. Alé avu ɖe eya ŋutɔ ɖokui kple eƒe aƒe la kpakple Israel ƒe ha blibo la katã ta.
18 “Eye wòado go ava vɔsamlekpui si le Afetɔ ŋkume la gbɔ ahalé avu ɖe eta, eye wòatsɔ nyitsua ƒe ʋua ƒe ɖe kple gbɔ̃ la ƒe ʋua ƒe ɖe asisi ɖe vɔsamlekpuia ƒe dzowo ŋu keŋ. 
19 Azɔ hã wòatsɔ eƒe asibidɛ ahlẽ ʋu la ƒe ɖe zi adre, eye wòakɔ eŋu tso Israel-viwo ƒe nu makɔmakɔ wɔwɔwo me ahawɔe kɔkɔe.
20 “Ne elé avu ɖe kɔkɔeƒe la kple takpegbadɔ la kpakple vɔsamlekpui la ta vɔ la, ekema wòatsɔ gbɔ̃ gbagbe la hã avɛ. 
21 Eye Aron natsɔ eƒe asi eveawo aɖo gbɔ̃ gbagbe la ƒe tame, eye wòaʋu Israel-viwo ƒe vodada, dzidada, kple nu vɔ̃wo katã me akɔ ɖe gbɔ̃ la ƒe ta dzi, eye wòana ŋutsu si wotia da ɖi la nakplɔe aɖo ɖe gbedzi. 
22 Eye wòaɖe asi le gbɔ̃ la ŋu ɖo ɖe gbedzi be wòatsɔ woƒe vodadawo katã ayi gbedadaƒo.
23 “Emegbe Aron nava takpegbadɔa me aɖe aklalawu siwo wòdo yi kɔkɔeƒea la ɖi, eye wòagblẽ wo ɖe afi ma. 
24 Wòale tsi le teƒe kɔkɔe, eye wòado eƒe awuwo; eyome wòado go asa numevɔ ɖe eɖokui ta, eye wòasa numevɔ ɖe dukɔ la hã ta ahalé avu ɖe eya ŋutɔ kple dukɔ la ta. 
25 Eyome wòatsɔ nuvɔ̃vɔsalã la ƒe ami ado dzudzɔ le vɔsamlekpuia dzi.
26 “Ke ame si kplɔ gbɔ̃ la ɖo ɖe Azazel la nanya eƒe awuwo ahale tsi; emegbe ate ŋu ava asaɖa la me.
27 “Atsɔ nuvɔ̃vɔsanyitsu kple nuvɔ̃vɔsagbɔ̃ siwo ƒe ʋu wotsɔ lé avu le kɔkɔeƒe la ayi asaɖa la godo, eye woatɔ dzo woƒe agbalẽ kple woƒe lã kpakple woƒe mĩ. 
28 Ame si tɔ dzo wo la nanya eƒe awuwo ahale tsi; emegbe ate ŋu ava asaɖa la me.
29 “Esia anye se na mi ɖaa: Le ɣleti adrelia ƒe ŋkeke ewolia dzi la, miawɔ fu mia ɖokui, eɖanye dumevi alo amedzrovi si le mia dome o, migawɔ dɔ aɖeke o. 
30 Gbe ma gbe woalé avu ɖe mia ta ne mia ŋu nakɔ. Mia ŋu akɔ le Afetɔ ŋkume tso miaƒe nu vɔ̃wo katã me. 
31 Dzudzɔ blibo ƒe sabat wònye na mi, eye miawɔ fu mia ɖokui. Se wònye na mi ɖaa.
32 “Ame si woasi ami na aɖoe nunɔlae be wòaxɔ ɖe fofoa teƒe la nasa avulévɔ, eye wòado aklalawu siwo nye awu kɔkɔeawo. 
33 Alé avu ɖe kɔkɔeƒe la, takpegbadɔ la, kple vɔsamlekpui la ta, eye wòalé avu ɖe nunɔlawo kple ha blibo la katã ta. 
34 Esia nanye se na mi ɖaa, ne woalé avu ɖe Israel-viwo katã ƒe nu vɔ̃wo ta zi ɖeka le ƒe me.” Eye wòwɔ abe ale si tututu Afetɔ de se na Mose ene.

Leviticus 17
1 Afetɔ gagblɔ na Mose be: 
2 “Ƒo nu kple Aron kple viaŋutsuwo kpakple Israel-viwo katã nàgblɔ na wo be, ‘Se si Afetɔ dee nye esi:
3 “‘“Ne Israel ƒe aƒe la me tɔ aɖe wu nyi, alẽ alo gbɔ̃ le asaɖa la me, alo le asaɖa la godo, 
4 le esi wòatsɔe ava takpegbadɔ la nu, be wòatsɔe asa vɔ na Afetɔ le avɔgbadɔa nu teƒe la, ke ame ma ɖi ʋufɔ. Ekɔ ʋu ɖi, eya ta woatsrɔ̃ ame ma ɖa le eƒe dukɔ la dome. 
5 Ale be Israel-viwo natsɔ woƒe lã siwo woatsɔ asa vɔ le gbe me la avɛ na Afetɔ le takpegbadɔa nu, eye woatsɔe ana nunɔla la, be wòatsɔ asa ŋutifafavɔ na Afetɔ. 
6 Nunɔla la nahlẽ ʋu la ɖe Afetɔ ƒe vɔsamlekpuia ŋu le takpegbadɔa nu, eye wòatsɔ ami la ado dzudzɔ wòanye ʋeʋẽ lilili na Afetɔ. 
7 Womagasa vɔwo na gbɔgbɔ vɔ̃ siwo ɖi gbɔ̃wo, siwo wosubɔna la azɔ o. Esia anye se na mi ɖaa le miaƒe dzidzimewo katã me.”’
8 “Gblɔ na wo be, ‘Ne Israel ƒe aƒe la me tɔ aɖe alo amedzrovi si le mia dome sa numevɔ alo vɔ bubu aɖe, 
9 eye metsɔe va takpegbadɔa nu be wòatsɔ asa vɔ na Afetɔ o la, woaɖe ame ma ƒe agbe ɖa le eƒe dukɔ la dome.
10 “‘Ne Israel ƒe aƒe la me tɔ aɖe alo amedzrovi si le mia dome ɖu ʋu aɖe la, maɖe ŋku atɔ ame si ɖu ʋua, eye matsrɔ̃e ɖa le eƒe dukɔ la dome. 
11 Elabena ŋutilã ɖe sia ɖe ƒe agbe le ʋu la me, eya ta metsɔe na be miatsɔ alé avu le vɔsamlekpui la dzi ɖe mia ɖokuiwo ta, elabena ʋu wotsɔ léa avu, le agbe si le eme la ta. 
12 Esia tae megblɔ na Israel-viwo be: “Mia dometɔ aɖeke megaɖu ʋu o, eye amedzrovi siwo le mia dome la hã dometɔ aɖeke megaɖu ʋu o.”
13 “‘Ne Israel-vi aɖe alo amedzrovi aɖe si le mia dome da ade lé gbemelã alo xe si woɖuna la, ekema wòaɖuɖu eƒe ʋu ɖi, eye wòaxe ke ɖe edzi. 
14 Elabena ŋutilã ɖe sia ɖe ƒe agbee nye eƒe ʋu, le agbe si le eme la ta. Esia tae megblɔ na Israel-viwo be: “Migaɖu ŋutilã aɖeke ƒomevi ƒe ʋu o, elabena ŋutilã ɖe sia ɖe ƒe agbee nye eƒe ʋu. Ame sia ame si ɖui la, woatsrɔ̃e ɖa.” 
15 Ne ame aɖe ɖu lã si ku le eɖokui si alo lã si gbemelã aɖe vuvu la, ekema eɖanye dumevi alo amedzrovi o, ele be wòanya eƒe awuwo, eye eŋu mekɔ o va se ɖe fiẽ; emegbe eŋu akɔ. 
16 Ke ne menya eƒe awuwo o, eye mele tsi hã o la, ekema woabia eƒe vodada la ŋuti kɔntae.’”

Leviticus 18
1 Afetɔ gagblɔ na Mose be: 
2 “Gblɔ na Israel-viwo be, ‘Nyee nye Afetɔ mia Mawu. 
3 Migawɔ nu abe Egipte-nyigba si dzi mienɔ la dzi nɔlawo ene o, eye migawɔ nu abe Kanaan-nyigba si dzi mekplɔ mi yinae la dzi nɔlawo ene o. Eye migazɔ ɖe woƒe ɖoɖowo nu o. 
4 Miwɔ nye ʋɔnudrɔ̃ɖoɖowo dzi, eye milé nye sewo me ɖe asi, ne miazɔ ɖe wo dzi. Nyee nye Afetɔ mia Mawu. 
5 Milé nye sewo kple nye ʋɔnudrɔ̃ɖoɖowo me ɖe asi; elabena ame sia ame si léa wo me ɖe asi la anɔ agbe. Nyee nye Afetɔ.
6 “‘Mia dometɔ aɖeke megadɔ eƒe ƒometɔ kpamkpam aɖeke gbɔ o. Nyee nye Afetɔ. 
7 Mègadɔ fofowò gbɔ o, eye mègadɔ dawò gbɔ o. Dawòe, eya ta mègadɔ egbɔ o.
8 “‘Mègadɔ fofowò srɔ̃ gbɔ o, elabena enye ŋukpedodo fofowò.
9 “‘Mègadɔ nɔviwònyɔnu gbɔ o, eɖanye fofowò vinyɔnu alo dawò vinyɔnu o, woɖadzii ɖe aƒe alo wodzii ɖe gbe o.
10 “‘Mègadɔ viwòŋutsu ƒe vinyɔnu alo viwònyɔnu ƒe vinyɔnu gbɔ o, elabena wò ŋutɔ wò amae.
11 “‘Mègadɔ fofowò srɔ̃ vinyɔnu, si nye fofowò ƒe vi gbɔ o, elabena nɔviwònyɔnue.
12 “‘Mègadɔ fofowò nɔvinyɔnu gbɔ o. Ʋu ɖeka mee eya kple fofowò tso.
13 “‘Mègadɔ dawò nɔvinyɔnu gbɔ o, elabena ʋu ɖeka mee eya kple dawò tso.
14 “‘Mègado ŋukpe fofowò nɔviŋutsu to srɔ̃a gbɔ dɔdɔ me o, elabena miedo ƒome.
15 “‘Mègadɔ toyɔviwò gbɔ o. Viwòŋutsu srɔ̃e, eya ta mègadɔ egbɔ o.
16 “‘Mègadɔ nɔviwòŋutsu srɔ̃ gbɔ o, elabena enye ŋukpedodo nɔviwòŋutsu.
17 “‘Mègadɔ nyɔnu kple vianyɔnu siaa gbɔ o. Mègadɔ viaŋutsu ƒe vinyɔnu alo vianyɔnu ƒe vinyɔnu gbɔ o. Ʋu ɖeka mee wotso, nuwɔna nyɔŋue wònye.
18 “‘Ne srɔ̃wò le agbe la, mègaɖe nɔvianyɔnu kpe ɖe eŋu be wòanye eƒe atsusi o, mègadɔ egbɔ o.
19 “‘Ne nyɔnu ɖo asi anyi la, mègadɔ egbɔ o, elabena eŋu mekɔ o.
20 “‘Mègadɔ hawòvi srɔ̃ gbɔ atsɔ aƒo ɖi ɖokuiwò o.
21 “‘Mègatsɔ viwò sa vɔe na Molek o. Mègawɔ esia be nàƒo ɖi wò Mawu ƒe ŋkɔ o. Nyee nye Afetɔ.
22 “‘Mègadɔ ŋutsu gbɔ abe nyɔnu gbɔ ene o. Ŋunyɔnu wònye.
23 “‘Ŋutsu aɖeke megadɔ kple lã aɖeke atsɔ aƒo ɖi eɖokui o, eye nyɔnu aɖeke megatsɔ eɖokui na lã aɖeke wòayɔ asii o. Mesɔ le dzɔdzɔme nu o.
24 “‘Migatsɔ nuwɔna siawo dometɔ aɖeke ƒo ɖi mia ɖokuiwo o, elabena nu siawo katãe dukɔ siwo nyam mele ɖa le mia ŋgɔ la tsɔ ƒo ɖi wo ɖokuiwoe. 
25 Ale woƒe anyigba la ƒo ɖi, eya ta maɖo woƒe vodada teƒe na wo, eye anyigba la atu edzinɔlawo aƒu gbe. 
26 Ke miawo la, milé nye sewo kple nye ʋɔnudrɔ̃ɖoɖowo me ɖe asi. Migawɔ ŋunyɔnu siawo ƒe ɖeke o, eɖanye dumevi alo amedzrovi si le mia dome o. 
27 Elabena ŋunyɔnu siawo katãe anyigba si dzi yim miele la dzi nɔlawo wɔna, ale be anyigba la gblẽ. 
28 Migagblẽ kɔ ɖo na anyigba la ne wòatu mi aƒu gbe abe ale si tututu wòle dukɔ siwo le mia ŋgɔ la tu ge aƒu gbe ene o. 
29 Ne ame aɖe wɔ ŋunyɔnu siawo dometɔ aɖe la, woatsrɔ̃ ame ma ɖa le eƒe dukɔ la dome. 
30 Miwɔ nu siwo meɖo na mi la, eye migawɔ kɔnu nyɔŋu siwo wowɔ le mia ŋgɔ la dometɔ aɖeke atsɔ aƒo ɖi mia ɖokuiwo o. Nyee nye Afetɔ mia Mawu.’”

Leviticus 19
1 Afetɔ gagblɔ na Mose be: 
2 “Gblɔ na Israel ƒe ha blibo la katã be, ‘Minɔ kɔkɔe, elabena nye, Afetɔ mia Mawu la, mele kɔkɔe.
3 “Mia dometɔ ɖe sia ɖe nade bubu dadaa kple fofoa ŋu, eye milé nye sabat ƒe seawo me ɖe asi. Nyee nye Afetɔ, mia Mawu. 
4 Migatrɔ ɖe mawu maɖinuwo ŋu o, eye migalólo ga tsɔ wɔ mawuwo na mia ɖokuiwo o. Nyee nye Afetɔ, mia Mawu.
5 “‘Ne miesa ŋutifafavɔ na Afetɔ la, miwɔe le mɔ si ana miaƒe nu nadze eŋu nu. 
6 Miɖui le gbe si gbe miesa vɔa kple eƒe ŋufɔke, ke esi tsi anyi va se ɖe ŋkeke etɔ̃a gbe la, mitɔ dzoe. 
7 Gake ne mieɖui le ŋkeke etɔ̃a gbe la, ekema ezu nu makɔmakɔ, madze ŋunye o. 
8 Ame si ɖui la, eɖi fɔ, elabena mede bubu Afetɔ ƒe nu kɔkɔe ŋu o, woatsrɔ̃ ame ma ɖa le eƒe dukɔ la dome.
9 “‘Ne miele agblemenukuwo ŋem le miaƒe anyigba dzi la, mègaŋe esiwo le wò bo to la keŋkeŋ o, eye mègafɔ wò nuku siwo tsi anyi la o. 
10 Mègaxa wò waintsetsewo hã ƒiaƒiaƒia le wò agble me o, eye mègafɔ wò waintsetse siwo dudu ɖe anyi la o. Gblẽ wo ɖi na ame dahewo kple amedzrowo. Nyee nye Afetɔ, mia Mawu.
11 “‘Migafi fi o, migable ame o, eye mia dometɔ aɖeke megaflu ehavi o. 
12 Mègatsɔ nye ŋkɔ ka atam ɖe alakpanya dzi o, be nàgaƒo ɖi wò Mawu ƒe ŋkɔ la o. Nyee nye Afetɔ. 
13 Mègatafa hawòvi o, eye mègada adzoe o. Dɔwɔla ƒe fetu megatsi gbɔwò ŋu nake ɖe edzi o.
14 “‘Mègado ɖiŋu na tokunɔ o, eye mègada nu ɖe ŋkuagbãtɔ ŋgɔ wòakli o, vɔ̃ wò Mawu. Nyee nye Afetɔ.
15 “‘Migadrɔ̃ ʋɔnu madzɔmadzɔ o. Mègate ame dahe ɖe to o, eye mègade kesinɔtɔ dzi o. Drɔ̃ ʋɔnu dzɔdzɔe na hawòvi.
16 “‘Mèganɔ ame ŋu gblẽm anɔ yiyim o. Mègadi be woakɔ hawòvi ƒe ʋu ɖi o. Nyee nye Afetɔ.
17 “‘Mègalé fu nɔviwò le dzi me o. Gbe nya na hawòvi, ne eƒe nu vɔ̃ naganɔ wò kplii ƒe ta dzi o.
18 “‘Mègawɔ wɔɖenui alo alé wò dukɔmeviwo ɖe dɔme o, lɔ̃ hawòvi abe wò ŋutɔ ɖokuiwò ene. Nyee nye Afetɔ.
19 “‘Milé nye sewo me ɖe asi: Mègana wò aƒemelã eve ƒomevi natsaka ayɔ asi wo nɔewo o. Mègatsaka nuku eve ƒomevi aƒã ɖe wò agble me o, eye mègado awu si wotsɔ ka eve ƒomevi tsaka lɔ̃ la o.
20 “‘Ne ŋutsu aɖe dɔ subɔvinyɔnu aɖe si ŋugbe wodo na ŋutsu bubu gbɔ, evɔ womexɔ nyɔnua ƒle alo na ablɔɖee o la, ele be woahe to na wo. Womawu wo o, elabena womena ablɔɖe nyɔnua haɖe o. 
21 Ŋutsua natsɔ agbo ɖeka avɛ na Afetɔ le takpegbadɔa nu be woatsɔ asa fɔɖivɔ. 
22 Nunɔla la natsɔ agbo la asa fɔɖivɔe atsɔ alé avu ɖe eta le Afetɔ ŋkume le nu vɔ̃ si wòwɔ la ta, eye woatsɔ eƒe nu vɔ̃ la akee.
23 “‘Ne mieva ɖo anyigba la dzi eye miedo ati si ƒe tsetse woɖuna la, migaɖu eƒe tsetse o ƒe etɔ̃ sɔŋ; mibui le ɣeyiɣi mawo me abe ati makɔmakɔ kple ati maɖumaɖua ene. 
24 Gake le ƒe enelia me la, eƒe tsetse la katã zu nu kɔkɔe si ŋu miatso aseye ɖo le Afetɔ ŋkume. 
25 Ke le ƒe atɔ̃lia me la, miekpɔ mɔ aɖu eƒe tsetse ale be miaƒe kutsetsewo nasɔ gbɔ ɖe edzi. Nyee nye Afetɔ, mia Mawu.
26 “‘Migaɖu naneke si me ʋu le o. “‘Migaka afa o, eye migawɔ akunya o.
27 “‘Migaƒlɔ miaƒe loglo o, eye migafɔ miaƒe ge dzi ɖewoɖewoe o.
28 “‘Ne ame ku la, migasi ŋuti o, eye migatá nu ɖe ŋuti hã o. Nyee nye Afetɔ.
29 “‘Mègawɔ viwònyɔnu gbolo ahaklo bubu le eŋu o, ne anyigba la nagawɔ gbolo, ale be ŋukpenanuwɔwɔ naxɔ edzi o.
30 “‘Milé nye sabat ƒe sewo me ɖe asi, eye mide bubu nye kɔkɔeƒe la ŋu. Nyee nye Afetɔ.
31 “‘Migayi ŋɔliyɔlawo gbɔ o, eye migabia nu ta se le nukalawo gbɔ o, ne miagazu ame makɔmakɔwo o. Nyee nye Afetɔ, mia Mawu.
32 “‘Tso ɖe tsitrenu le ta ƒowɔ ŋkume, nàde bubu ame tsitsi ŋu, eye nàvɔ̃ wò Mawu. Nyee nye Afetɔ.
33 “‘Ne amedzrovi aɖe le gbɔwò le miaƒe anyigba dzi la, mègawɔ ŋlɔmi le eŋu o. 
34 Amedzrovi si le mia gbɔ la nanɔ abe dumevidzidzi ke ene. Lɔ̃e abe ɖokuiwò ene, elabena miawo hã mienye amedzrowo kpɔ le Egipte-nyigba dzi. Nyee nye Afetɔ, mia Mawu.
35 “‘Migatafa ame le ʋɔnudɔdrɔ̃ me o. Migazã nudzidzenu, nudanu, alo nudonu amebatɔ o. 
36 Nudanu siwo de pɛpɛpɛ, nudakpe siwo de pɛpɛpɛ, nudogba blibo, kple nudotre blibo nanɔ mia si. Nyee nye Afetɔ, mia Mawu, ame si kplɔ mi tso Egipte-nyigba dzi. 
37 Eya ta milé nye sewo kple nye ʋɔnudrɔ̃ɖoɖowo katã me ɖe asi, ne miawɔ wo dzi. Nyee nye Afetɔ.’”

Leviticus 20
1 Afetɔ gagblɔ na Mose be: 
2 “Gblɔ na Israel-viwo be, ‘Ne Israel-vi aɖe alo amedzrovi aɖe si le Israel tsɔ via sa vɔe na Molek la, edze na ku. Dukɔ la naƒu kpee wòaku. 
3 Maɖe ŋku atɔ ame ma, eye matsrɔ̃e ɖa le eƒe dukɔ la dome, le esi wòtsɔ via sa vɔe na Molek tsɔ gblẽ kɔ ɖo na nye kɔkɔeƒe la, eye wòdo vlo nye ŋkɔ kɔkɔe la ta. 
4 Ne dukɔ la ɖoe koŋ ŋe aɖaba ƒu ame ma ƒe nuwɔna dzi, eye womewui o, evɔ wònye etsɔ via sa vɔe na Molek hafi la, 
5 ekema nye ŋutɔ maɖe ŋku atɔ ame ma kple eƒe ƒomea. Matsrɔ̃ eya kple ame siwo katã wɔ ɖeka kplii le ahasiwɔwɔ kple Molek me.
6 “‘Ke ame si yia ŋɔliyɔlawo alo nukalawo gbɔ la, ewɔ gbɔgbɔmehasi, eya ta maɖe ŋku atɔ ame ma atsrɔ̃e ɖa le eƒe dukɔ la dome.
7 “‘Mikɔ mia ɖokuiwo ŋu ne mianɔ kɔkɔe, elabena nyee nye Afetɔ mia Mawu. 
8 Milé nye sewo me ɖe asi ne miawɔ wo dzi. Nyee nye Afetɔ, ame si kɔ mia ŋu.
9 “‘Ne ame aɖe ƒo fi de fofoa alo dadaa la, ele be woawui godoo. Esi wòƒo fi de fofoa kple dadaa ta la, eƒe ʋu anɔ eya ŋutɔ ƒe ta dzi.
10 “‘Ne ŋutsu aɖe wɔ ahasi kple ame bubu srɔ̃ la, ele be woawu ame si wɔ ahasi kple ehavi srɔ̃ la godoo, woawu ŋutsu ahasiwɔla la kple nyɔnu ahasiwɔla la siaa. 
11 Ŋutsu si dɔ fofoa srɔ̃ gbɔ la, edo ŋukpe fofoa. Ele be woawu wo ame evea siaa. Woƒe ʋu anɔ woawo ŋutɔwo ƒe ta dzi. 
12 Ne ŋutsu aɖe dɔ toyɔvia gbɔ la, ele be woawu wo ame evea siaa. Wowɔ nu si mesɔ le dzɔdzɔme nu o. Woƒe ʋu anɔ woawo ŋutɔwo ƒe ta dzi.
13 “‘Ne ŋutsu aɖe dɔ ŋutsu gbɔ abe nyɔnu gbɔ ene la, wo ame evea siaa wɔ ŋunyɔnu. Woawu wo godoo. Woƒe ʋu anɔ woawo ŋutɔwo ƒe ta dzi.
14 “‘Ne ŋutsu aɖe de nyɔnu kple dadaa siaa gbɔ la, nuwɔna nyɔŋue wònye. Woawu ŋutsua kple nyɔnuawo eye woatɔ dzo wo, ne nuwɔna nyɔŋu sia tɔgbi nagayi edzi le mia dome o.
15 “‘Ne ŋutsu aɖe dɔ lã aɖe gbɔ la, ele be woawu ŋutsua kple lã la siaa. 
16 Ne nyɔnu aɖe tsɔ eɖokui na lã aɖe wòyɔ asii la, nyɔnua kple lã la siaa dze na ku. Ele be woawu wo godoo. Woƒe ʋu anɔ woawo ŋutɔwo ƒe ta dzi.
17 “‘Ne ŋutsu de asi nɔvianyɔnu ŋu, eɖanye fofoa vinyɔnu alo dadaa vinyɔnu o hekpɔ eƒe ama, eye nyɔnua hã kpɔ ŋutsua ƒe ama la, ŋukpenanu wònye. Eya ta woawu wo le woƒe dukɔ la ŋkume. Edo ŋukpe nɔvianyɔnu, eya ta eƒe fɔɖiɖi anɔ eƒe ta dzi.
18 “‘Ne ŋutsu aɖe dɔ nyɔnu aɖe gbɔ le eƒe asiɖoanyiɣi la, ekema ŋutsua kple nyɔnua siaa klo nu le nyɔnua ƒe ʋusisi dzi. Woatsrɔ̃ wo ame evea ɖa le woƒe dukɔ la dome.
19 “‘Mègade asi dawò nɔvinyɔnu alo fofowò nɔvinyɔnu ŋu o, elabena enye ŋukpedodo wò ƒometɔ kpamkpam. Ame siwo wɔ nu sia ƒe fɔɖiɖi anɔ woƒe ta dzi. 
20 Ame si dɔ fofoa nɔviŋutsu srɔ̃ gbɔ la do ŋukpe fofoa nɔviŋutsu. Ame siwo wɔ nu sia ƒe fɔɖiɖi anɔ woƒe ta dzi. Woaku vimadzimadzii. 
21 Ne ŋutsu aɖe xɔ nɔviaŋutsu srɔ̃ la, ŋunyɔnu wònye. Edo ŋukpe nɔviaŋutsu, eya ta ele be woatsi ko.
22 “‘Milé nye sewo kple nye ʋɔnudrɔ̃ɖoɖowo katã me ɖe asi ne miawɔ wo dzi, ne anyigba si dzi mekplɔ mi yinae be mianɔ edzi la nagatu mi aƒu gbe o. 
23 Migazɔ ɖe dukɔ siwo nyam mele ɖa le mia ŋgɔ la ƒe ɖoɖowo nu o; elabena nu siawo katãe wowɔ, eya ta wonyɔ ŋu nam. 
24 Eya tae megblɔ na mi be: “Miaxɔ woƒe anyigba wòanye mia tɔ, eye matsɔ anyigba sia si dzi notsi kple anyitsi le sisim le la, ana mi wòazu mia tɔ. Nyee nye Afetɔ mia Mawu, ame si ɖe mi ɖe vovo tso dukɔ bubuwo gbɔ.” 
25 Miade vovototo lã si ŋu kɔ kple esi ŋu mekɔ o dome kpakple xe si ŋu kɔ kple esi ŋu mekɔ o dome. Migatsɔ lã kple xe kpakple nu siwo katã ʋãna le anyigba dzi, si meɖe ɖe vovo be wo ŋu mekɔ o la, do ŋunyɔ mia ɖokuiwo o. 
26 Minɔ kɔkɔe nam, elabena nye, Afetɔ, mele kɔkɔe, eye meɖe mi ɖe vovo tso dukɔ bubuwo gbɔ be mianye tɔnye koŋ.
27 “Ŋutsu alo nyɔnu si nye ŋɔliyɔla alo afakala la dze na ku. Woaƒu kpe wo woaku. Woƒe ʋu anɔ woawo ŋutɔwo ƒe ta dzi.’”

Leviticus 21
1 Afetɔ gagblɔ na Mose be: “Gblɔ na nunɔla siwo nye Aron viwo be, ‘Mia dometɔ aɖeke megaka asi ame kuku aɖeke ŋu atsɔ aƒo ɖi eɖokui le eƒe dukɔ la dome o. 
2 Ke eƒe ƒometɔ kplikplikpli si nye dadaa, fofoa, viaŋutsu, vianyɔnu, nɔviaŋutsu 
3 kple nɔvianyɔnu, si nye ɖetugbui si meɖe srɔ̃ o la ta koe wòate ŋu aƒo ɖi eɖokui ɖo. 
4 Nunɔla megaƒo ɖi eɖokui le eƒe dukɔmevi aɖeke srɔ̃nyɔnu ta atsɔ agblẽ kɔ ɖo na eɖokui o. 
5 Woagaƒlɔ ta kokoe o, woagafɔ woƒe ge dzi o, eye woagasi wo ɖokuiwo ŋuti o. 
6 Woanɔ kɔkɔe na woƒe Mawu, eye woagado vlo woƒe Mawu la ƒe ŋkɔ o, elabena woawoe saa dzovɔwo na Afetɔ, si nye woƒe Mawu ƒe abolo, eya ta woanɔ kɔkɔe. 
7 Womaɖe gbolo alo nyɔnu si wogblẽ alo nyɔnu si srɔ̃a gbe o, elabena ame kɔkɔe ye nunɔla nye na eƒe Mawu. 
8 Eya ta nàkɔ eŋu, elabena eyae saa wò Mawu ƒe nuɖuvɔ. Ame kɔkɔe wòanye na wò, elabena nye, Afetɔ, ame si kɔ mia ŋu la, mele kɔkɔe.
9 “‘Ke ne nunɔla aɖe ƒe vinyɔnu zu gbolo heƒo ɖi eɖokui la, ekema eƒo ɖi fofoa. Woawui ahatɔ dzoe.
10 “‘Ke ame si woatia le nɔviawo dome ahakɔ ami kɔkɔe la ɖe eƒe tame atsɔ aɖoe nunɔlagãe be wòado awuawo la nagakaka ɖa ɖe ta alo adze eƒe awuwo o. 
11 Mate ɖe ame kuku aɖeke ŋu o. Maƒo ɖi eɖokui le fofoa alo dadaa gɔ̃ hã ta o. 
12 Megado go le kɔkɔeƒe la ɖe esia ta o, eye megagblẽ kɔ ɖo na eƒe Mawu ƒe kɔkɔeƒe la hã o, elabena eƒe Mawu ƒe ami kɔkɔe la, si nye adzɔgbeɖeɖe ƒe dzesi la, le eŋu. Nyee nye Afetɔ.
13 “‘Ele be wòaɖe ɖetugbui leaƒe. 
14 Maɖe ahosi, nyɔnu si srɔ̃a gbe, nyɔnu si wogblẽ, alo gbolo o; ke boŋ wòaɖe eƒe dukɔmevi si nye ɖetugbui leaƒe. 
15 Mele be wòahe vlododo ava viawo dzi le eƒe dukɔ la me o, elabena nyee nye Afetɔ, ame si kɔ eŋu.’”
16 Afetɔ gagblɔ na Mose be: 
17 “Gblɔ na Aron be, ‘Ne viaŋutsuwo alo woƒe dzidzimeviwo dometɔ aɖe nye nuwɔametɔ la, mekpɔ mɔ ate va be yeatsɔ yeƒe Mawu ƒe abolo asa vɔe o. 
18 Nuwɔametɔ aɖeke mekpɔ mɔ ate va o: ŋkuagbãtɔ, bunɔ, ame si ƒe ŋkume dɔléle aɖe gblẽ, ame si ƒe abɔ alo afɔ ɖeka didi wu nɔvia, 19 alo ataŋeŋetɔ, abɔŋeŋetɔ, 
20 alo ame si ɖo kpo, ame kpui zegede, ame si nu wɔ ŋku na, ame si dze akpa, ame si ŋu zɔlĩ le alo ame si ƒe voku to. 
21 Nunɔla Aron ƒe dzidzimeviwo dometɔ si nye nuwɔametɔ la mekpɔ mɔ ava sa dzovɔ na Afetɔ o. Mekpɔ mɔ ava be yeatsɔ yeƒe Mawu ƒe nuɖuɖu la asa vɔe o, elabena nuwɔametɔ wònye. 
22 Ate ŋu aɖu eƒe Mawu la ƒe nuɖuɖu kɔkɔetɔ kekeake kple nuɖuɖu kɔkɔe la ƒe ɖe. 
23 Gake mekpɔ mɔ agogo xɔmetsovɔ la o, eye mate ɖe vɔsamlekpui la ŋu o, elabena nuwɔametɔ wònye. Megagblẽ kɔ ɖo na nye kɔkɔeƒe la o, elabena nyee nye Afetɔ, ame si kɔ wo ŋu.’”
24 Eye Mose gblɔ nya siawo na Aron kple viaŋutsuwo kpakple Israel-viwo katã.

Leviticus 22
1 Afetɔ gagblɔ na Mose be: 
2 “Gblɔ na Aron kple viaŋutsuwo be woakpɔ wo ɖokuiwo dzi nyuie le ale si woawɔ Israel-viwo ƒe nu kɔkɔe siwo woatsɔ asa vɔ nam ŋu dɔe la ŋu, ne woagaƒo ɖi nye ŋkɔ kɔkɔe la o. Nyee nye Afetɔ. 
3 Gblɔ na wo be: ‘Le miaƒe dzidzimewo katã me la, ne miaƒe dzidzimevi aɖe si ŋu mekɔ o te ɖe nu kɔkɔe siwo ŋu Israel-viwo akɔ na Afetɔ ŋu la, ekema woatsrɔ̃ ame ma ɖa le nye ŋkuta. Nyee nye Afetɔ. 
4 Aron ƒe dzidzimeviwo dometɔ si le anyidɔ lém alo tsi aɖe le dodom le eŋu la mekpɔ mɔ aɖu nu kɔkɔeawo o, va se ɖe esime eŋu kɔ hafi. Nenema kee nye wo dometɔ si ka asi ame si ŋu mekɔ o le esi wòƒo ɖi eɖokui le ame kuku aɖe ta ŋu, alo ka asi ŋutsu si nyè tsi ŋu, 
5 alo wo dometɔ si ka asi lã suesue siwo nɔa ha me siwo ŋu mekɔ o ŋu, alo ka asi ame si nu bubu aɖe na eŋu mekɔ o la hã ŋu. 
6 Ame si ka asi nu siawo dometɔ aɖe ŋu la ŋu mekɔ o va se ɖe fiẽ, eye maɖu nu kɔkɔeawo ƒe ɖeke o, negbe ɖeko wòale tsi hafi. 
7 Ne ɣe ɖo to la, ekema eŋu kɔ, eye emegbe ate ŋu aɖu nu kɔkɔeawo ƒe ɖe, elabena eƒe nuɖuɖue. 
8 Maɖu lã si ku le eɖokui si alo lã si gbemelã aɖe vuvu atsɔ agblẽ kɔ ɖo na eɖokui o. Nyee nye Afetɔ.
9 “‘Woawɔ nu siwo meɖo na wo la dzi ale be woagada vo ahaku le esi wogblẽ kɔ ɖo na nu kɔkɔewo ta o. Nyee nye Afetɔ, ame si kɔ wo ŋu.
10 “‘Ame si womeɖe mɔ na o mekpɔ mɔ aɖu nu kɔkɔea ƒe ɖeke o. Nunɔla ƒe amedzro alo eƒe apadɔwɔla hã mekpɔ mɔ aɖu nu kɔkɔea ƒe ɖeke o. 
11 Ke ne nunɔla aɖe tsɔ eƒe ga ƒle ame aɖe la, ekema amea ate ŋu aɖui. Kluvi siwo wodzi ɖe eƒe aƒe me hã ate ŋu aɖu nuɖuɖu la. 
12 Ne nunɔla aɖe ƒe vinyɔnu ɖe ame si metso nunɔlawo ƒe ƒomea me o la, ekema nyɔnu la mate ŋu aɖu nu kɔkɔe siwo wodzɔ la o. 
13 Ke ne nunɔla aɖe ƒe vinyɔnu zu ahosi alo wogbee eye vi aɖeke hã mele esi o, eye wòhiã be wòatrɔ ayi fofoa ƒe aƒe me abe ale si wònɔe le eƒe ɖetugbuime ene la, ekema ate ŋu aɖu fofoa ƒe nuɖuɖu la ƒe ɖe; ame si womeɖe mɔ na o mekpɔ mɔ aɖui o.
14 “‘Ke ne ame aɖe ɖu nu kɔkɔea ƒe ɖe le manyamanya me la, ekema wòaɖo nu kɔkɔe la teƒe na nunɔla la, eye wòagatsɔ nua me mama atɔ̃ ƒe ɖeka ƒe home akpee. 
15 Ale woagagblẽ kɔ ɖo na Israel-viwo ƒe nu kɔkɔe siwo wodzɔ na Afetɔ, 16 be woagahe to na wo le esi woɖu nu kɔkɔeawo heɖi fɔ ta o. Nyee nye Afetɔ, ame si kɔ wo ŋu.’”
17 Afetɔ gagblɔ na Mose be: 
18 “Gblɔ na Aron kple viaŋutsuwo kpakple Israel-viwo katã be, ‘Ne Israel-vi alo amedzrovi aɖe si le Israel tsɔ eƒe adzɔgbeɖenunana alo tsɔ eƒe lɔlɔ̃nu faa nunana aɖe vɛ be woatsɔ asa numevɔ na Afetɔ la, 
19 ele be wòanye lãtsui si sɔ blibo, eɖanye nyi, alẽ alo gbɔ̃ o, be miaƒe nu nadze eŋu. 
20 Migatsɔ lã nuwɔe aɖeke vɛ o, elabena miaƒe nu madze eŋu o.
21 “‘Ne ame aɖe be yeasa ŋutifafavɔ na Afetɔ atsɔ axe eƒe adzɔgbeɖefe alo be wòanye lɔlɔ̃nu faa nunana la, ekema wòanye nyi alo alẽ si sɔ blibo, si naneke mewɔ afi aɖeke na o, be wòaxɔe ne amea ƒe nu nadze eŋu. 
22 Migatsɔ lã si ƒe ŋku gbã, esi ŋe, esi xɔ abi, esi nu tè alo esi dze akpa alo esi ŋu zɔlĩ le la dometɔ aɖeke vɛ na Afetɔ o, eye migatsɔ wo dometɔ aɖeke sa vɔe na Afetɔ le vɔsamlekpui la dzi o. 
23 Ke àte ŋu atsɔ nyi alo alẽ si ƒe ŋutinu aɖe didi wu kemɛa alo to ɖe eme la ana abe lɔlɔ̃nu faa nunana ene, ke ne adzɔgbeɖenunanae la, womakpɔ ŋudzedze ɖe eŋu axɔe na mi o. 
24 Migatsɔ lã si ƒe voku woto alo wogbã, esi woha vo le gɔme na alo esi wota la vɛ na Afetɔ o, eye migatsɔ lã mawo sa vɔe le miaƒe anyigba dzi o. 
25 Migaxɔ nu siawo dometɔ aɖeke tso amedzrovi aɖeke si ana wòanye mia Mawu ƒe nuɖuvɔ o, elabena nu gblẽ le wo ŋu eye wozu lã nuwɔewo. Womakpɔ ŋudzedze ɖe eŋu axɔe na mi o.’”
26 Afetɔ gagblɔ na Mose be: 
27 “Ne wodzi nyi alo alẽ alo gbɔ̃ la, woana wòanɔ dadaa ŋu ŋkeke adre, ke ne exɔ ŋkeke enyi alo wu nenema, eye wotsɔe sa dzovɔ na Afetɔ la, woaxɔe ahakpɔ ŋudzedze ɖe eŋu. 
28 Ke migawu nyi alo alẽ kple via siaa gbe ɖeka o.
29 “Ne miele akpedavɔ sam na Afetɔ la, miwɔe le mɔ si ana miaƒe nu nadze eŋu la nu. 
30 Gbe ma gbe kee woaɖui. Migagblẽ ɖeke ɖi ŋu nake ɖe edzi o. Nyee nye Afetɔ.
31 “Milé nye seawo me ɖe asi, eye miawɔ wo dzi. Nyee nye Afetɔ. 
32 Migaƒo ɖi nye ŋkɔ kɔkɔe la o, ke boŋ mikɔ ŋunye le Israel-viwo dome. Nyee nye Afetɔ, ame si kɔ mia ŋu. 
33 Nyee kplɔ mi tso Egipte-nyigba dzi, be manye miaƒe Mawu. Nyee nye Afetɔ.”

Leviticus 23
1 Afetɔ gagblɔ na Mose be: 
2 “Gblɔ na Israel-viwo be, ‘Ŋkekenyui siwo Afetɔ ɖo be miaɖu la nanye takpekpe kɔkɔewo. Miɖe gbeƒã nye ŋkekenyui siawo:
3 “‘Miate ŋu awɔ dɔ ŋkeke ade, ke ŋkeke adrelia anye dzudzɔ blibo ƒe sabat; enye takpegbe kɔkɔe. Migawɔ dɔ aɖeke o. Sabat wònye na Afetɔ le mia nɔƒewo katã.
4 “‘Esiawoe nye ŋkekenyui siwo Afetɔ ɖo be miaɖu; takpegbe kɔkɔe siwo miaɖe gbeƒãe le woƒe ɣeyiɣiwo dzi: 
5 Miɖu Ŋutitotoŋkekenyui na Afetɔ le ɣleti gbãtɔ ƒe ŋkeke wuienelia dzi, le anyinutsyɔɣi.
6 “‘Eye le ɣleti sia ƒe ŋkeke wuiatɔ̃lia dzi la, miɖu Amɔwɔ Maʋamaʋã Bolo Ŋkekenyui na Afetɔ. Miɖu amɔwɔ maʋamaʋã bolo ŋkeke adre sɔŋ. 
7 Ŋkeke gbãtɔ nanye takpegbe kɔkɔe. Migawɔ dɔ sesẽ aɖeke o. 
8 Ke misa dzovɔ na Afetɔ ŋkeke adre sɔŋ. Ŋkeke adrelia nanye takpegbe kɔkɔe. Migawɔ dɔ sesẽ aɖeke o.’”
9 Afetɔ gagblɔ na Mose be: 
10 “Gblɔ na Israel-viwo be, ‘Ne mieva ɖo anyigba si metsɔ le mia na ge la dzi, eye mieŋe nu le edzi la, mitsɔ miaƒe nuŋeŋe gbãtɔawo ƒe babla ɖeka vɛ na nunɔla la, 
11 ne wòanyè babla la le Afetɔ ŋkume be miaƒe nu nadze eŋu. Nunɔla la nanyèe le Sabat ƒe ŋufɔke. 
12 Gbe si gbe mietsɔ nuŋeŋe la vɛ wonyè la, mitsɔ alẽtsui si xɔ ƒe ɖeka, si sɔ blibo la na be wòatsɔ asa numevɔ na Afetɔ. 
13 Mitsɔ wɔ memee efa me mama ɖe ewo ƒe akpa eve si wotsɔ ami dzabae la kpe ɖe eŋu miatsɔ asa dzovɔ be wòaʋẽ lilili na Afetɔ. Eye miatsɔ wain hin me mama ɖe ene ƒe akpa ɖeka akpe ɖe eŋu atsɔ asa nunovɔ. 
14 Migaɖu nuku yeye aɖeke o, woɖatsɔe mè abolo alo tɔe o, va se ɖe ŋkeke sia si dzi miatsɔ mia Mawu ƒe nunana la avɛ. Se wònye na mi ɖaa le miaƒe dzidzimewo katã me le mia nɔƒewo katã.
15 “‘Miaxlẽ sabat adre tso Sabat la ƒe ŋufɔke, gbe si gbe wonyè nuŋeŋe siwo mietsɔ vɛ la. Mixlẽ kwasiɖaawo woade pɛpɛpɛ. 
16 Mixlẽ ŋkeke blaatɔ̃, eye esia adze Sabat adrelia ƒe ŋufɔke dzi, eye miatsɔ nuku yeyewo asa nuɖuvɔ na Afetɔ. 
17 Mitsɔ wɔ memee efa me mama ɖe ewo ƒe akpa eve si me wode amɔwɔʋãnui la mè abolo eve tso mia nɔƒewo vɛ be wòanye kutsetse gbãtɔwo ƒe vɔsa si wonyè na Afetɔ. 
18 Eye miatsɔ alẽtsui adre siwo sɔ blibo, siwo xɔ ƒe ɖekaɖeka kple nyitsui ɖeka kpakple agbo eve akpe ɖe aboloawo ŋu. Miatsɔ wo asa numevɔ na Afetɔ, eye miatsɔ nuɖuvɔ kple nunovɔ akpe ɖe eŋu, wòanye dzovɔsa si aʋẽ lilili na Afetɔ. 
19 Tsɔ gbɔ̃tsui ɖeka na woatsɔ asa nuvɔ̃vɔ kple alẽtsui eve siwo xɔ ƒe ɖekaɖeka la na woatsɔ asa ŋutifafavɔ. 
20 Nunɔla la nanyè wo kple kutsetse gbãtɔawo ƒe aboloawo le Afetɔ ŋkume hekpe ɖe alẽtsui eveawo ŋu, wòanye nunyèvɔsa. Nu kɔkɔe woanye na Afetɔ, eye woazu nunɔla la tɔ. 
21 Miɖe gbeƒã gbe ma gbe be enye takpegbe kɔkɔe. Migawɔ dɔ sesẽ aɖeke o. Se wònye na mi ɖaa le miaƒe dzidzimewo katã me le mia nɔƒewo katã.
22 “‘Ne mieŋe nukuwo le miaƒe anyigba dzi la, mègaŋe esiwo le wò bo to la keŋkeŋ o, eye mègafɔ wò nuku siwo tsi anyi la o. Gblẽ wo ɖi na ame dahewo kple amedzroviwo. Nyee nye Afetɔ mia Mawu.’”
23 Afetɔ yi edzi gblɔ na Mose be: 
24 “Gblɔ na Israel-viwo be, ‘Midzudzɔ mia ɖokuiwo bliboe le ɣleti adrelia ƒe ŋkeke gbãtɔ dzi. Anye miaƒe takpegbe kɔkɔe si dzi woaɖo ŋkui kple kpẽkuku. 
25 Migawɔ dɔ sesẽ aɖeke o; misa dzovɔ na Afetɔ.’”
26 Afetɔ gagblɔ na Mose be: 
27 “Ɣleti adrelia ma ke ƒe ŋkeke ewolia nanye Avuléŋkeke. Anye takpegbe kɔkɔe, miawɔ fu mia ɖokui, eye miasa dzovɔ na Afetɔ. 
28 Migawɔ dɔ aɖeke le ŋkeke sia dzi o, elabena avuléŋkeke si dzi woalé avu ɖe mia ta le Afetɔ mia Mawu la ŋkumee wònye. 
29 Ame sia ame si mawɔ fu eɖokui le ŋkeke sia dzi o la, woatsrɔ̃e ɖa le eƒe dukɔ la dome. 
30 Matsrɔ̃ ame sia ame si awɔ dɔ aɖe le ŋkeke sia dzi la ɖa le eƒe dukɔ la dome. 
31 Migawɔ dɔ aɖeke o. Se wònye na mi ɖaa le miaƒe dzidzimewo katã me le mia nɔƒewo katã. 
32 Dzudzɔ blibo ƒe sabat wònye na mi; miawɔ fu mia ɖokui le ɣletia ƒe ŋkeke asiekelia dzi, le fiẽ. Miɖu sabat la tso fiẽ va se ɖe fiẽ.”
33 Afetɔ yi edzi gblɔ na Mose be: 
34 “Gblɔ na Israel-viwo be, ‘Tso ɣleti adrelia sia ƒe ŋkeke wuiatɔ̃lia dzi la, miaɖu Agbadɔŋkekenyui na Afetɔ ŋkeke adre sɔŋ. 
35 Miwɔ takpekpe kɔkɔe le ŋkeke gbãtɔ dzi, eye migawɔ dɔ sesẽ aɖeke o. 
36 Ŋkeke adre miasa dzovɔ na Afetɔ. Miwɔ takpekpe kɔkɔe le ŋkeke enyia gbe, eye miasa dzovɔ na Afetɔ. Takpekpe tɔxɛ wònye. Migawɔ dɔ sesẽ aɖeke o.
37 “‘Esiawoe nye Afetɔ ƒe ŋkekenyui siwo wòɖo na mi, siwo miaɖe gbeƒãe be wonye takpekpe kɔkɔewo, siwo dzi miasa numevɔ kple nuɖuvɔ kpakple nunovɔwo na Afetɔ woanye dzovɔsawo le gbe sia gbe ɖoɖowɔɖia nu, 
38 hekpe ɖe vɔ siwo miasa le Afetɔ ƒe sabatwo dzi kpakple miaƒe nunanawo, miaƒe adzɔgbeɖenunanawo, kple miaƒe lɔlɔ̃nu faa nunana siwo katã miatsɔ ana Afetɔ la ŋu. 
39 Ne mieƒo nu siwo anyigbaa wɔ la nu ƒu la, ekema miaɖu Afetɔ ƒe ŋkekenyui la le ɣleti adrelia ƒe ŋkeke wuiatɔ̃lia dzi ŋkeke adre sɔŋ. Ŋkeke gbãtɔ nanye dzudzɔ blibo, eye ŋkeke enyilia hã nanye dzudzɔ blibo. 
40 Mitsɔ ati siwo nya kpɔ la dzi kutsetsewo, deʋayawo, ati siwo do nyuie la ƒe alɔwo kple amuti siwo le tɔʋu to la vɛ le ŋkeke gbãtɔ dzi, eye miakpɔ dzidzɔ le Afetɔ mia Mawu ŋkume ŋkeke adre. 
41 Eye wòanye ŋkekenyui miaɖu na Afetɔ ŋkeke adre sɔŋ le ƒea me. Miaɖui le ɣleti adrelia me; se wònye na mi ɖaa le miaƒe dzidzimewo katã me. 
42 Minɔ agbadɔ me ŋkeke adre sɔŋ. Israel vidzidziwo katã nanɔ agbadɔ me, 
43 ne miaƒe dzidzimewo nanyae be agbadɔ mee mena Israel-viwo nɔ esime mekplɔ wo tso Egipte-nyigba dzi. Nyee nye Afetɔ mia Mawu.’”
44 Ale Mose gblɔ ŋkekenyui siwo Afetɔ ɖo be woaɖu la na Israel-viwo.

Leviticus 24
1 Afetɔ gblɔ na Mose be: 
2 “Gblɔ na Israel-viwo be woatsɔ amititsetse ƒe ami nyuitɔ vɛ be woatsɔ ade akaɖi la me, ne akaɖigbɛ la nanɔ sisi ɖaa. 
3 Aron nakpɔ akaɖi la gbɔ le takpegbadɔa me le xɔmetsovɔ si xe Ðaseɖinu la ŋkume la ŋgɔ, be wòanɔ bibim tso fiẽ va se ɖe ŋdi le Afetɔ ŋkume ɖaa. Se wònye na mi ɖaa le miaƒe dzidzimewo katã me. 
4 Nekpɔ akaɖigbɛawo ŋuti dɔwo gbɔ le sikakaɖiti la dzi le Afetɔ ŋkume ɖaa.
5 “Tsɔ wɔ memee mè abolo kotoe wuieve. Tsɔ wɔ efa me mama ɖe ewo ƒe akpa eve ƒo aboloawo dometɔ ɖe sia ɖe. 
6 Nàɖo wo ɖe wo nɔewo dzi le agbaka eve me ɖe sikakplɔ̃ la dzi le Afetɔ ŋkume; ade nanɔ agbaka ɖeka me. 
7 Eye nàtsɔ lifi ɣi nyuitɔ ada ɖe agbaka eveawo dzi, be esia nanye kpɔɖeŋudzovɔsa ƒe abolo na Afetɔ. 
8 Na wòaɖo aboloa ɖe ɖoɖo nu le sabat sia sabat dzi le Afetɔ ŋkume ɖaa. Nubabla wònye le nye kple Israel-viwo dome ɖaa. 
9 Woanye Aron kple viaŋutsuwo tɔ, eye woaɖui le teƒe kɔkɔe, elabena nu kɔkɔewo ƒe nu kɔkɔe wònye nɛ tso Afetɔ ƒe dzovɔsawo me; ɖoɖo mavɔ wòanye.”
10 Ke gbe ɖeka la, dzre dzɔ ɖe Israel nyɔnu aɖe ƒe viŋutsu si wòdzi na Egipte ŋutsu aɖe kpakple Israel ŋutsu aɖe dome le asaɖa la me. 
11 Eye Israel nyɔnua ƒe via gblɔ busunya ɖe Mawu ƒe ŋkɔ la ŋu hedo ɖiŋu nɛ. Eya ta wokplɔe va Mose gbɔ. Dadaa ŋkɔe nye Selomit, eye wònye Dibri si tso Dan-to la me ƒe vinyɔnu. 
12 Eye wosikae ɖi, va se ɖe esime woase nya aɖe tso Afetɔ nu.
13 Eye Afetɔ gblɔ na Mose be: 
14 “Kplɔ ɖiŋudola la yi asaɖa la godo, eye ame siwo katã se nya si wògblɔ la natsɔ woƒe asiwo aɖo eƒe ta dzi, eye ha blibo la katã naƒu kpee. 
15 Eye nàgblɔ na Israel-viwo be, ‘Ne ame aɖe do ɖiŋu na eƒe Mawu la, eƒe nu vɔ̃ anɔ eƒe ta dzi. 
16 Ne ame aɖe gblɔ busunya ɖe Afetɔ ƒe ŋkɔ ŋu la, ku kee wòaku. Ha blibo la katã naƒu kpee. Woawu amedzrovi alo dumevi si agblɔ busunya ɖe Ŋkɔ la ŋu.
17 “‘Ne ame aɖe wu ame la, ele be woawu eya hã. 
18 Ame si wu aƒemelã aɖe la naɖo eteƒe, agbe ɖe agbe teƒe. 
19 Ne ame aɖe wɔ nu vevi ehavi la, woawɔ nu vevi ma ke eya hã. 
20 Ŋeŋe ɖe ŋeŋe teƒe, ŋku ɖe ŋku teƒe, aɖu ɖe aɖu teƒe, nu si wòwɔ amea la, nu ma kee woawɔ eya hã. 
21 Ame si ƒo lã aɖe wòku la naɖo eteƒe, ke ame si ƒo ame wòku la, woawu eya hã.
22 “‘Se ɖekae akplɔ amedzrovi kple dumevi siaa, elabena nyee nye Afetɔ mia Mawu.’”
23 Eye Mose ƒo nu kple Israel-viwo, eye wokplɔ ɖiŋudola la yi asaɖa la godo heƒu kpee. Ale Israel-viwo wɔe abe ale si tututu Afetɔ de se na Mose ene.

Leviticus 25
1 Afetɔ gagblɔ na Mose le Sinai To la dzi be: 
2 “Gblɔ na Israel-viwo be, ‘Ne mieva ɖo anyigba si metsɔ le mia na ge dzi la, mina anyigba la nagbɔ ɖe eme wòanye sabat na Afetɔ. 
3 Ƒe ade nàƒã nu ɖe wò agble me, ƒe ade nàɖe wò wainkawo ŋu, eye nàƒo agblemenuwo nu ƒu. 
4 Ke anyigba la nagbɔ ɖe eme le ƒe adrelia me, wòanye dzudzɔ blibo ƒe sabat na Afetɔ. Mègade agble alo aɖe wò wainkawo ŋu o. 
5 Mègaxa nuku siwo mie ɖe flu me la o, eye mègaxa wò wainka si ŋu womeɖe o la ƒe tsetsewo o. Anyigba la nagbɔ ɖe eme ƒe blibo ɖeka. 
6 Ke anyigba la ana nuɖuɖu mi le eƒe sabat dzi, wò ŋutɔ, wò kluvi, wò kosi, wò dɔwɔla kple amedzrovi si le gbɔwò, 
7 wò aƒemelã kple gbemelã siwo le wò anyigba dzi. Nu siwo katã anyigba la awɔ la nanye nuɖuɖu na mi.
8 “‘Xlẽ sabat-ƒe adre, ƒe adre teƒe adre, eye sabat-ƒe adreawo nanye ƒe blaene vɔ asieke. 
9 Eye nàku lãdzo sesĩe le ɣleti adrelia ƒe ŋkeke ewolia dzi. Enye Avuléŋkeke, si dzi miaku lãdzo le miaƒe duwo katã me. 
10 Miakɔ ƒe blaatɔ̃lia ŋu ahaɖe gbeƒã ablɔɖe le anyigba la dzi na edzinɔlawo katã. Azu Ablɔɖeƒe na mi, ale be mia dometɔ ɖe sia ɖe nagaxɔ eƒe nunɔamesi, eye mia dometɔ ɖe sia ɖe nagatrɔ ayi eƒe ƒometɔwo gbɔ. 
11 Ablɔɖeƒee ƒe blaatɔ̃lia ma anye na mi. Migaƒã nu alo axa nuku siwo mie ɖe flu me alo axa wainka si ŋu womeɖe o la ƒe tsetsewo o. 
12 Elabena Ablɔɖeƒe wònye. Nenɔ kɔkɔe na mi. Miate ŋu aɖu nuku siwo anyigba la ŋutɔ wɔ.
13 “‘Mia dometɔ ɖe sia ɖe nagaxɔ eƒe nunɔamesi le Ablɔɖeƒe la me. 
14 Ne miele nu dzram na mia havi alo miele nu ƒlem le mia havi si la, migatafa mia nɔewo o. 
15 Ne èbe yeaƒle anyigba le hawòvi si la, woabui ɖe ƒe ale si nu va yi tso Ablɔɖeƒea dzi la nu; eye woabu anyigba si wòadzra na wò la ɖe ƒe ale si nu nàŋe agblemenukuawoe la nu. 
16 Ne anyigba la anɔ asiwòme ƒe geɖe la, eƒe asi ayi dzi, eye ne ƒe ʋɛ aɖewo koe la, ke eƒe asi abɔbɔ, elabena nuŋeɣiwo nue woadzrae na wò ɖo. 
17 Mia dometɔ aɖeke megatafa ehavi o, ke boŋ mivɔ̃ mia Mawu la, elabena nyee nye Afetɔ, mia Mawu. 
18 Ne miewɔ nye sewo dzi eye mielé nye ʋɔnudrɔ̃ɖoɖowo me ɖe asi la, mianɔ dedie le anyigba la dzi. 
19 Anyigba la awɔ nu na mi, eye miaɖu nu aɖi ƒo ahanɔ dedie le edzi.
20 “‘Ke ne miabia be, “Nu ka ɖu ge míala le ƒe adrelia me esi wònye be míate ŋu aƒã nu loo alo axa míaƒe agblemenukuwo o?” la, 
21 ekema minyae be, mayra mi le ƒe adelia me, eye anyigba la awɔ nu wòade ƒe etɔ̃ nu. 
22 Miaƒã nu le ƒe enyilia me, eye mianɔ agblemenuku xoxoawo ɖum va se ɖe ƒe asiekelia me. Mianɔ xoxoa ɖum va se ɖe esime nuku yeyeawo nado.
23 “‘Womadzra anyigba la ɖikaa o, elabena tɔnyee anyigba la nye. Elabena amedzroviwo kple anyigba la dzi nɔlawo koe mienye le ŋkunyeme. 
24 Le miaƒe nutowo katã me la, ele be woaʋu mɔnukpɔkpɔ ɖi be ame si dzra anyigba la nagate ŋu agbugbɔe aƒle.
25 “‘Ne hiã tu nɔviwò, eye wòdzra eƒe nunɔamesi ƒe ɖe la, eƒe ƒometɔ kplikplikpli ate ŋu agaxɔ nu si nɔvia tsɔ dzra la aƒle. 
26 Ke ne ame aɖeke meli si agaxɔ eƒe nuwo aƒle o, eye nane va su eya ŋutɔ si wòbe yeagbugbɔe aƒle la, 
27 ekema wòabu ƒe siwo va yi tso esime wòdzrae, eye wòagbugbɔ ƒe siwo susɔ la ƒe ga ana ame si wòdzrae na, eye wòagaxɔ eƒe nunɔamesi la.
28 “‘Ke ne nu mesu esi wòatsɔ axe fea na amea o la, ekema nu si wòdzra la nanɔ eƒlela si me va se ɖe Ablɔɖeƒe la dzi. Le Ablɔɖeƒea me la, nunɔamesia agatrɔ azu nutɔa tɔ, eye wòagaxɔ eƒe nu.
29 “‘Ne ame aɖe dzra aƒe le du si ŋu woɖo gli ɖo me la, ekpɔ mɔ agaxɔe aƒle le ƒe ɖeka me. Gome le esi be wòagbugbɔe aƒle le ƒe blibo ɖeka me. 
30 Ke ne womegbugbɔ aƒe si le du si ŋu woɖo gli ɖo la me ƒle hafi ƒe bliboa wu enu o la, ekema azu eƒlela tɔ ɖikaa na eƒe dzidzimeviwo. Mado le esi me le Ablɔɖeƒe la me o. 
31 Ke woabu aƒe siwo le du siwo ŋu womeɖo gli ɖo o me la abe agbledenyigba ke ene. Wokpɔ mɔ agaxɔe aƒle, eye woaɖe asi le eŋu le Ablɔɖeƒe la me.
32 “‘Ke aƒe siwo le Lewi viwo ƒe duwo me ya la, Lewi viwo kpɔ mɔ agaxɔe aƒle ɣesiaɣi. 
33 Ne womegbugbɔ Lewi vi aɖe ƒe aƒe si wòdzra le eƒe dua me la ƒle o la, ekema woaɖe asi le aƒea ŋu le Ablɔɖeƒe la me, elabena aƒe siwo le Lewi viwo ƒe duwo me la nye woƒe nunɔamesi le Israel-viwo dome. 
34 Azɔ hã, womadzra lãnyiƒe si le woƒe duwo ŋu la o, elabena nunɔamesi wònye na wo ɖaa.
35 “‘Ne hiã tu nɔviwò ale be megate ŋu le eƒe nuhiahiãwo gbɔ kpɔm o la, ekema kpe ɖe eŋu abe ale si nàwɔ na amedzrovi kple ame si ʋu va tsi mia gbɔ la ene, be nàxɔe ɖe agbe. 
36 Mègaxɔ deme le nɔviwò si loo alo adi viɖe le eŋu o, ke boŋ vɔ̃ wò Mawu la; eye nàxɔ nɔviwò si le gbɔwò la ɖe agbe. 
37 Mègado ga nɛ abia deme o, eye ne ètsɔ nuɖuɖu nɛ la, mègaxɔ ɖeke ɖe edzi o. 
38 Nyee nye Afetɔ, mia Mawu, ame si kplɔ mi tso Egipte-nyigba dzi, be matsɔ Kanaan-nyigba la ana mi, ne mianyae be nyee nye mia Mawu.
39 “‘Ne hiã tu nɔviwò, eye wòhiã be wòadzra eɖokui na wò la, mègazãe abe kluvi ene o. 
40 Nenɔ gbɔwò abe apadɔwɔla ene, abe ame si ʋu va tsi gbɔwò ene. Nesubɔ wò va se ɖe Ablɔɖeƒe la dzi. 
41 Emegbe nàɖe asi le eya kple viawo ŋu ne wòatrɔ ayi eƒe ƒometɔwo kple fofoawo ƒe domenyinu gbɔ. 
42 Elabena nye kluvi siwo mekplɔ tso Egipte-nyigba dzi lae wonye. Woagadzra wo ɖokuiwo azu kluviwo na amewo o. 
43 Mègasẽ ŋuta le eŋu o; vɔ̃ wò Mawu la. 
44 Miate ŋu aƒle kluvi kple kosiwo tso dukɔ siwo ƒo xlã mi la me woazu mia tɔ. 
45 Miate ŋu aƒle amedzro siwo le mia gbɔ la ƒe viwo kple wo viwo ƒe vi siwo wodzi le miaƒe anyigba dzi la hã, eye woazu mia tɔ. 
46 Miagblẽ wo ɖi na mia megbeviwo woazu wo tɔ tegbee. Miate ŋu ana woawɔ dɔ na mi. Ke migasẽ ŋuta le mia nɔvi Israel-viwo ŋu ate wo ɖe to o.
47 “‘Ke ne alɔme va le amedzrovi alo ame si ʋu va tsi mia gbɔ la si, eye hiã tu nɔviwò ale be wòva hiã be wòadzra eɖokui na amedzrovi ma alo ame si ʋu va tsi mia gbɔ, alo amedzroa ƒe ƒometɔ aɖe la, 
48 gome le ame si dzra eɖokui la si ɣesiaɣi be woagbugbɔ axɔe aƒle. Nɔviawo dometɔ ɖeka ate ŋu axe fea axɔe. 
49 Fofoa nɔviŋutsu alo fofoa nɔviŋutsu ƒe vi ate ŋu axe fea axɔe, alo eƒe ƒometɔ kplikplikpli ɖe sia ɖe ate ŋu axe fea axɔe.
“‘Alo ne alɔme va le esi la, ekema eya ŋutɔ naxe fea agbugbɔ eɖokui aƒle. 
50 Eya kple eƒlela woaxlẽ ƒeawo tso ƒe si me wòdzra eɖokui nɛ va se ɖe Ablɔɖeƒe la dzi, eye ƒeawo ƒe xexlẽme nue woabu eƒlega la ɖo. Ale si wobua apadɔwɔla ƒe dɔwɔŋkekewoe la, nenemae woabui. 
51 Ne ƒe geɖe gasusɔ la, ekema woabu fe si wòaxe na eƒlela atsɔ axɔ eɖokui la ɖe ƒe siwo susɔ la nu. 
52 Ke ne ƒe ʋɛ aɖewo koe susɔ ne Ablɔɖeƒea naɖo la, ekema woabui ɖe ƒe siwo susɔ la nu, ne wòaxee atsɔ axɔ eɖokui. 
53 Le ƒe siwo katã me wòanɔ egbɔ la, nenɔ kplii abe apadɔwɔla ene; mègazi kpi wòasẽ ŋuta le eŋu o. 
54 Ke ne mate ŋu agbugbɔ eɖokui aƒle le ɖoɖo siawo nu o la, ekema woaɖe asi le eŋu wòadzo le Ablɔɖeƒe la me, eya kple viawo siaa.
55 “‘Elabena nye ŋutɔ nye kluviwoe Israel-viwo nye. Nye kluvi siwo mekplɔ tso Egipte-nyigba dzie wonye. Nyee nye Afetɔ, mia Mawu.

Leviticus 26
1 “‘Migawɔ mawu maɖinuwo na mia ɖokui o, migawɔ nu kpakpɛ alo atu trɔ̃sɔti aɖeke na mia ɖokui o, eye migawɔ kpetata aɖeke aɖo miaƒe anyigba dzi be miade ta agu nɛ o; elabena nyee nye Afetɔ, mia Mawu. 
2 Milé nye sabat ƒe sewo me ɖe asi, eye mide bubu deto nye kɔkɔeƒe la ŋu. Nyee nye Afetɔ.
3 “‘Ne mieyi edzi zɔ ɖe nye ɖoɖowo nu, eye mielé nye sewo me ɖe asi hewɔ wo dzi la, 
4 ekema nye hã mana tsi nadza na mi le edzaɣi, anyigba la awɔ nu, eye ati siwo le edzi la atse nyuie. 
5 Miaƒe nukuƒoɣi adidi aɖo wainxaɣi, eye wainxaɣi adidi aɖo nuƒãɣi. Miaɖu nu aɖi ƒo, eye mianɔ miaƒe anyigba dzi le dedienɔnɔ me. 
6 Mana ŋutifafa naxɔ anyigba la dzi, miamlɔ anyi eye ame aɖeke mado voɖi na mi o. Manya lã wɔadãwo ɖa le anyigba la dzi, eye aʋawɔwɔ ƒe yi aɖeke mato miaƒe anyigba dzi ayi o. 
7 Mianya miaƒe futɔwo ɖe nu, eye woatsi yi nu le mia ŋgɔ. 
8 Mia dometɔ atɔ̃ anya ame alafa ɖeka ɖe nu, eye mia dometɔ alafa ɖeka anya ame akpe ewo ɖe nu, eye miaƒe futɔwo atsi miaƒe yi nu.
9 “‘Mave mia nu, mana miadzi asɔ gbɔ, eye mawɔ nubabla si le nye kpli mi dome la dzi. 
10 Mianɔ ƒe si do ŋgɔ la ƒe nuŋeŋewo ɖum, eye ne yeyea do la, ɖeko miaɖe xoxoawo ɖa be miakpɔ teƒe na yeyea. 
11 Mana nye avɔgbadɔ nanɔ mia dome, eye nyemagbe mi o. 
12 Mazɔ kpli mi, manye miaƒe Mawu, eye miawo mianye nye dukɔ. 
13 Nyee nye Afetɔ, mia Mawu, ame si kplɔ mi tso Egipte-nyigba dzi be miaganye kluvi na wo o. Nyee ŋe kɔkuti ɖa le kɔ na mi be miete ŋu fɔ ta dzi le zɔzɔm.
14 “‘Ke ne mieɖo tom o, eye miewɔ nye sedede siawo katã dzi o, 
15 miegbe nye sewo, eye nye ʋɔnudrɔ̃ɖoɖowo nyɔ ŋu na mi, ale be miewɔ nye sededewo katã dzi o, eye mietu nye nubabla la, 
16 ekema nye hã matsɔ nu siwo gbɔna ahe to na mi: Matsɔ yɔmekpe kple asrã sesẽ awɔ fu mi, si ana miaƒe ŋkuwo natsi, eye nu ate miaƒe agbe ŋu. Dzodzroe miaƒã nukuwo, elabena miaƒe futɔwo aɖu wo keŋkeŋ. 
17 Maɖe ŋku atɔ mi, eye ne miekpe aʋa kple miaƒe futɔwo la, woaɖu mia dzi; miaƒe ketɔwo ate mi ɖe to, eye ne ame aɖeke menya mi ɖe nu o hã, miade afɔ du me.
18 “‘Ke ne nu siawo katã tu mi gake mieɖo tom o la, ekema mahe to na mi ɖe edzi zi gbɔ zi adre ɖe miaƒe nu vɔ̃wo nu. 
19 Matsi miaƒe dada vivivo la nu, eye mana dziƒo nanɔ na mi abe gayibɔ ene, eye anyigba nanɔ na mi abe akɔbli ene. 
20 Miazã miaƒe ŋusẽ ɖe yame, elabena miaƒe anyigba mawɔ nu o, eye ati siwo le edzi la matse ku o.
21 “‘Ke ne miegatrɔ megbe dem kokoko, eye miegbe toɖoɖom la, ekema magahe to na mi ɖe edzi zi gbɔ zi adre, ɖe miaƒe nu vɔ̃wo nu. 
22 Madɔ lã wɔadãwo ɖe mia dome, eye woawu mia viwo, woavuvu miaƒe aƒemelãwo, woana miaƒe xexlẽme dzi naɖe akpɔtɔ, eye miaƒe mɔwo dzi aɖi gbɔlo.
23 “‘Le nu siawo katã megbe ne miegbe toɖoɖo, eye miegatrɔ megbe dem kokoko la, 
24 ekema nye hã magblẽ mi ɖi, eye magahe to na mi zi gbɔ zi adre ɖe miaƒe nu vɔ̃wo nu. 
25 Maɖo yi ɖe mia dome, ne wòabia hlɔ̃ ɖe nubabla si mietu la ta. Ne miesi yi ɖabe ɖe miaƒe duwo me la, maɖo dɔvɔ̃ ɖe mia dome eye matsɔ mi ade asi na miaƒe futɔ. 
26 Ne megblẽ miaƒe abolotsoƒe dome la, ekema nyɔnu ewo amè abolo le kpo ɖeka pɛ me, eye woada miaƒe abolo hafi atsɔ ana mi; miaɖu nu gake miaɖi ƒo o.
27 “‘Ke ne nu siawo katã tu mi gake mieɖo tom o, eye miegatrɔ megbe dem kokoko la, 
28 ekema nye hã mado dɔmedzoe ɖe mia ŋu vevie, eye mahe to na mi zi gbɔ zi adre ɖe miaƒe nu vɔ̃wo nu. 
29 Ale miaɖu mia viŋutsuwo kple mia vinyɔnuwo ƒe lã. 
30 Makaka miaƒe nuxeƒewo, magbã nu siwo dzi miedoa dzudzɔ ʋeʋĩ ɖo, mana miaƒe kukuawo naɖo baba ɖe miaƒe legba nyɔŋu gbagbãwo dzi; eye mianyɔ ŋu nam. 
31 Matsɔ miaƒe duwo ade asi na yi, makaka miaƒe kɔkɔeƒe la, eye miaƒe vɔsawo magaʋẽ ɖem lilili o. 
32 Mana anyigba la nazu gbegbe, eye esia awɔ moya na miaƒe futɔ siwo le edzi. 
33 Maka mi ahlẽ ɖe dukɔwo dome, eye maɖe yi le aku me akplɔ mi ɖo. Miaƒe anyigba aɖi gbɔlo, eye miaƒe duwo azu glikpo.
34 “‘Ɣemaɣi la, anyigba la agbɔ ɖe eme le ɣeyiɣi siwo katã me wòzu gbegbe, esime miawo miele miaƒe futɔwo ƒe anyigba dzi. Ɣemaɣi la, anyigba la agbɔ ɖe eme ɖe sabat siwo tsi eŋu la nu. 
35 Anyigba la agbɔ ɖe eme le ŋkeke siwo katã me wòzu gbegbe, elabena megbɔ ɖe eme le miaƒe sabatwo ɖuɣi esime mienɔ edzi la o.
36 “‘Ke ame siwo atsi agbe le mia dome la, made vɔvɔ̃ woƒe dziwo me le futɔwo ƒe anyigba dzi; ne aŋgba ʋu ya la, eƒe ɖiɖi ana woasi aɖabe, abe yie nya wo ɖe nu ene, eye woadze anyi evɔ ame aɖeke menya wo ɖe nu hafi o. 
37 Togbɔ be ame aɖeke meɖe wo ɖe nu o hã la, woanɔ wo nɔewo lɔm ƒu anyi abe yi nue wole sisim le ene. Eye miate ŋu anɔ te ɖe miaƒe futɔwo nu o. 
38 Mia nu ayi le dukɔwo dome, eye miaƒe futɔwo ƒe anyigba la ami mi keŋkeŋ. 
39 Ke mia dometɔ siwo susɔ la, miaƒaƒã ɖe miaƒe futɔwo ƒe anyigbawo dzi le miaƒe vodadawo ta. Ɛ̃, miaƒaƒã abe ale si mia fofowo ƒaƒã le woƒe vodadawo ta ene. 
40 Eye woaʋu woawo ŋutɔwo ƒe vo si woda ɖe ŋunye kple wo fofowo ƒe nuteƒemawɔmawɔ me, eye woalɔ̃ ɖe edzi be yewomewɔ nuteƒe nam esime yewotrɔ megbe dem o. 
41 Eya ta nye hã metrɔ megbe de wo heɖo wo ɖe woƒe futɔwo ƒe anyigba dzi.
“‘Ðewohĩ ɣemaɣi la, woana woƒe dzi si ku atri la nabɔbɔ, eye woaxe woƒe vodada ŋuti fe. 
42 Eye maɖo ŋku nu, si mebla kple Yakob la dzi; maɖo ŋku nu, si mebla kple Isak kple nu, si mebla kple Abraham la dzi, eye maɖo ŋku anyigba la dzi. 
43 Le ɣeyiɣi siwo katã me woakplɔ wo adzoe le anyigbaa dzi la, anyigba la anɔ gbɔgbɔm ɖe eme ɖe sabat siwo to eŋu la nu, esime wòzu gbegbe, eye ame mele edzi o. Ɣemaɣi woawo ŋutɔwo hã anɔ woƒe vodada ŋuti fe xem, elabena wogbe nye ʋɔnudrɔ̃ɖoɖowo, eye wodo vlo nye sewo. 
44 Ke ne wole woƒe futɔwo ƒe anyigba dzi, eye nu siawo katã dzɔ hã la, nyemagbe nu le wo gbɔ keŋkeŋ alo anyɔ ŋu wo, ale be matsrɔ̃ wo gbidigbidi, ne matu nubabla si le nye kpli wo dome la o; elabena nyee nye Afetɔ, woƒe Mawu. 
45 Le woawo ta maɖo ŋku nu, si mebla kple wo tɔgbui siwo mekplɔ tso Egipte-nyigba dzi le dukɔwo ŋkume la dzi, ne manye woƒe Mawu. Nyee nye Afetɔ.’”
46 Esiawoe nye ɖoɖo kple ʋɔnudrɔ̃ɖoɖo kpakple se siwo Afetɔ ɖo anyi le eya kple Israel-viwo dome le Sinai To la dzi to Mose dzi.

Leviticus 27
1 Afetɔ gagblɔ na Mose be: 
2 “Gblɔ na Israel-viwo be, ‘Ne ame aɖe ɖe adzɔgbe tɔxɛ be yeatsɔ ga home si woxena ɖe ame ta ana Afetɔ la, 
3 ne enye ŋutsu si le ƒe blaeve kple ƒe blaade domee la, ekema eƒe asi nanye klosalo sekel blaatɔ̃ le teƒe kɔkɔe la ƒe sekel la nu. 
4 Ke ne nyɔnue la, ekema eƒe asi nanye sekel blaetɔ̃. 5 Ne ele ƒe atɔ̃ kple ƒe blaeve domee la, ekema ŋutsu ƒe asi nanye sekel blaeve, eye nyɔnu ƒe asi nanye sekel ewo. 
6 Eye ne ele ɣleti ɖeka kple ƒe atɔ̃ domee la, ekema ŋutsu ƒe asi nanye klosalo sekel atɔ̃, eye nyɔnu ƒe asi nanye klosalo sekel etɔ̃.
7 “‘Ke ne exɔ ƒe blaade kple edzivɔ la, ekema ŋutsu ƒe asi nanye sekel wuiatɔ̃, eye nyɔnu ƒe asi nanye sekel ewo. 
8 Ke ne eda ahe ale gbegbe be mate ŋu ana home ma o la, ekema woana amea nava nunɔla la gbɔ, eye nunɔla la nado asi ɖe eŋu. Nunɔla la nado asi ɖe eŋu le adzɔgbeɖelaa ƒe ŋutete nu.
9 “‘Ne lã siwo wotsɔna saa vɔ na Afetɔ ƒe ɖee la, ekema nu sia nu si wòana Afetɔ la nazu nu kɔkɔe. 
10 Mate ŋu aɖɔlii o; matsɔ nyui aɖɔli manyomanyoa alo atsɔ manyomanyo aɖɔli nyuia o. Ke ne ehiã be wòatsɔ lã aɖɔli esi wòtsɔ ɖe adzɔgbee godoo la, ekema esi woɖɔli kple esi wotsɔ ɖɔlii la siaa nazu nu kɔkɔe. 
11 Eye ne lã si ŋu mekɔ o, si womate ŋu atsɔ ava sa vɔ na Afetɔ o ye la, ekema wòakplɔ lã la ava nunɔla la gbɔ. 
12 Eye nunɔlaa nalé ŋku ɖe eŋu akpɔ be enyo loo alo menyo o, ne wòado asi ɖe eŋu. Asi si nunɔla la ado ɖe eŋu la, nenemae wòaxɔ. 
13 Ke ne edi be yeagbugbɔe aƒle kokoko la, ekema wòaxe asi si wodo ɖe eŋu la ahatsɔ home ma me mama ɖe atɔ̃ ƒe akpa ɖeka akpee.
14 “‘Ne ame aɖe kɔ eƒe xɔ ŋu wòzu nu kɔkɔe na Afetɔ la, ekema nunɔla la nakpɔe ɖa be enyo loo alo menyo o, eye wòado asi ɖe eŋu. Asi si nunɔlaa ado ɖe eŋu la, nenemae wòaxɔ. 
15 Ke ne ame si kɔ xɔa ŋu di be yeagaxɔe aƒle la, ekema wòaxe asi si wodo ɖe eŋu la ahatsɔ home ma me mama ɖe atɔ̃ ƒe akpa ɖeka akpee, eye wòazu etɔ.
16 “‘Ne ame aɖe kɔ eƒe agble ƒe akpa aɖe ŋu na Afetɔ la, ekema woado asi ɖe eŋu ɖe nuku agbɔsɔsɔ si woate ŋu aƒã ɖe edzi la nu. Ne ƒo homer ɖekae la, ekema eƒe home nanye klosalo sekel blaatɔ̃. 
17 Ne ekɔ eƒe agble ŋu tso Ablɔɖeƒe la dzi la, ekema asi si wodo ɖe eŋu la, eyae anye eƒe home. 
18 Ne Ablɔɖeƒe la megbee wòkɔ eƒe agble ŋu la, ekema nunɔla la nabu eƒe home la nɛ ɖe ƒe siwo susɔ hafi Ablɔɖeƒe bubu naɖo la nu, eye woaɖe asi si wodo ɖe eŋu la dzi. 
19 Ke ne ame si kɔ agblea ŋu la di be yeagaxɔe aƒle kokoko la, ekema wòaxe asi si wodo ɖe eŋu la ahatsɔ home ma me mama ɖe atɔ̃ ƒe akpa ɖeka akpee, ekema agblea agazu etɔ. 
20 Ke ne mexɔ agblea ƒle o, eye wogadzrae na ame bubu la, ekema magate ŋu axɔe aƒle o. 
21 Ne agblea do le ame si le Ablɔɖeƒea me la, azu nu kɔkɔe na Afetɔ, abe agble si wotsɔ ɖe adzɔgbe na Mawu ene. Azu nunɔla la ƒe domenyinu.
22 “‘Ne ame aɖe kɔ agble aɖe si wòƒle ŋu na Afetɔ, eye agble la menye eƒe domenyinu o la, 
23 ekema nunɔla la nabu asia nɛ ɖe ƒe siwo susɔ hafi Ablɔɖeƒea naɖo la nu, eye wòaxe ga home ma gbe ma gbe. Ga la zu nu kɔkɔe na Afetɔ. 
24 Ke agblea agatrɔ azu ame si si wòƒlee le, ame si ƒe domenyinu wònye, la tɔ le Ablɔɖeƒe la dzi.
25 “‘Woado asiawo katã ɖe teƒe kɔkɔe la ƒe sekel la nu. Sekel ɖeka nanye gera blaeve.
26 “‘Gake womakɔ lãwo ƒe ŋgɔgbeviwo ya ŋu na Afetɔ o, elabena etɔe wonye xoxo. Eɖanye nyi alo alẽ o, Afetɔ tɔe wònye. 
27 Ne lã si ŋu mekɔ o ye wònye la, ekema nua tɔ naxe ga home si woado ɖe eŋu la, eye wòatsɔ home ma me mama ɖe atɔ̃ ƒe akpa ɖeka akpee. Gake ne maxe fea axɔe o la, ekema nunɔla la nadzrae ɖe asi si wòdo ɖe eŋu la nu.
28 “‘Ne ame aɖe tsɔ eƒe domenyinu aɖe ɖe adzɔgbe na Afetɔ ɖikaa la, eɖanye amegbetɔ, lã, alo agble si nye etɔ o, womadzrae o, eye womagbugbɔ axɔe aƒle o. Nu sia nu si wotsɔ ɖe adzɔgbe ɖikaa la, nu kɔkɔewo ƒe nu kɔkɔe wònye na Afetɔ. 
29 Ne wobu fɔ ame aɖe be edze na tsɔtsrɔ̃ la, womaxe fe ɖe eta axɔe o. Ele be woawui godoo.
30 ‘“Nu siwo katã anyigba wɔ, agblemenukuwo loo alo kutsetsewo me mama ewo ƒe akpa ɖeka nye Afetɔ tɔ. Nu kɔkɔe wònye na Afetɔ. 
31 Ne ame aɖe di be yeagbugbɔ axɔ yeƒe nuwo ƒe ewolia aƒle godoo la, ekema wòaxe ga home si wodo ɖe eŋu ahatsɔ home ma me mama ɖe atɔ̃ ƒe akpa ɖeka akpee. 
32 Nyi alo alẽ ƒe ewolia ɖe sia ɖe si ato lãkplɔti te esi wole wo xlẽm la azu nu kɔkɔe na Afetɔ. 
33 Malé ŋku ɖe eŋu akpɔe ɖa be enyo loo alo menyo o, eye maɖɔlii hã o. Ke ne wodi be woaɖɔlii kokoko la, ekema esi woɖɔli kple esi wotsɔ ɖɔlii la siaa nazu nu kɔkɔe. Womagbugbɔ axɔe aƒle o.’”
34 Esiawoe nye se siwo Afetɔ tsɔ na Mose le Sinai To la dzi be wòade na Israel-viwo.

LEAVE A REPLY

Please enter your comment!
Please enter your name here