Lododowo

LODODOWO
Proverbs

1  Israel-fia Salomo, David vi, ƒe lododowoe nye esiawo:
 2 Ne woadze nunya eye woaxɔ amehehe;
Ne woase nya goglowo gɔme;
 3 Ne woaxɔ hehe si naa gɔmesese deto sua ame si,
Ne woawɔ nu dzɔdzɔe, abu nuwo ŋu nyuie ahawɔ nu si le eteƒe;
 4 Ne ame makpɔnuteƒewo nadze aɖaŋu;
Ne ɖekakpui nadze nunya eye tamebubuŋutete nasu esi.
 5 Nunyala asee, eye wòasrɔ̃ nu geɖe akpee;
Eye nugɔmesela axɔ mɔfiame nyuitɔwo,
 6 Ne wòase lododowo, abebubuwo,
Nunyalawo ƒe nyawo kple woƒe adzowo gɔme.
 7 Afetɔ vɔvɔ̃e nye sidzedze ƒe gɔmedzedze.
Bometsilawoe doa vlo nunya kple amehehe.
 8 Vinye, se fofowò ƒe amehehe,
Eye mègagbe dawò ƒe nufiame o.
 9 Elabena seƒoƒotsihe dzeani wònye na wò ta
Kple kɔgɛ nyui na wò kɔ.
10 Vinye, ne nu vɔ̃ wɔlawo le nuwò blem la, mègalɔ̃ ɖe edzi o.
11 Ne wogblɔ be: “Yi kpli mí.
Na míade xa akɔ ʋu ɖi.
Na míanɔ adeklo dzi ɖe ame maɖifɔwo ŋu dzro ko.
12 Na míami wo agbagbee abe ale si Tsiẽƒe mia amee ene,
Míami wo bliboe abe ale si wònɔna na ame siwo yina aʋli me ene.
13 Na míaxɔ woƒe nu veviwo katã;
Míatsɔ aboyonu ayɔ míaƒe xɔwo me taŋ.
14 Va wɔ ɖeka kpli mí,
Ale be míama nu siwo míeda adzoe la sɔsɔe.”
15 Vinye, mègayi kpli wo o.
Mègaɖo afɔ woƒe toƒewo o,
16 Elabena woƒe afɔ tsɔna ɖe nu vɔ̃ɖi wɔwɔ ŋu;
Eye wozãna ɖe ʋukɔkɔɖi ŋu.
17 Ne woɖo ɖɔ ɖi na xevi le xevia ŋkume la, dzodzroe.
18 Esia tae ame siawo dea xa ɖi ɖe ʋukɔkɔɖi ŋu ɖo;
Wobena be yewoaɖe amewo ƒe agbe ɖa.
19 Aleae ame siwo katã dia viɖe ƒoɖi la ƒe mɔwo le,
Ke viɖe ƒoɖi la aɖe ame siwo ƒe asi su edzi la ƒe agbe ɖa.
20 Nunya vavãtɔ le ɣli dom le kpɔdomee.
Eƒe gbe le dzi dem le ablɔwo me.
21 Ele ɣli dom le ablɔ siwo dzi zinyenye le la ƒe dzogoe dzi.
Ele gbɔgblɔm le dua ƒe agbowo nu be:
22 “Va se ɖe ɣekaɣi mi ame manyanuwo mianɔ numanyamanya dzi?
Va se ɖe ɣekaɣi mi fewuɖulawo mianɔ dzidzɔ kpɔm ɖe fewuɖuɖu ŋu?
Eye va se ɖe ɣekaɣi mi bometsilawo mianɔ fu lém sidzedze?
23 Nye mokaname neʋã mi.
Ekema matrɔ nye gbɔgbɔ akɔ ɖi na mi;
Mana mianya nye nyawo.
24 Esi meyɔ mi gake miegbe,
Meke nye abɔwo me na mi gake mia dometɔ aɖeke mede nu eme nam o,
25 Miedo toku nye aɖaŋuɖoɖowo katã,
Eye miegbe nye mokanamewo.
26 Nye hã mako nu ne vɔ̃ dzɔ ɖe mia dzi;
Maɖe alɔme le mia ŋu ne nu si dzia ŋɔ na mi la dzɔ,
27 Ne nu si dzia ŋɔ na mi la va mia dzi abe ahom ene,
Ne vɔ̃ ɖi kpe mi abe ahomya ene,
Eye hiã kple xaxa tu mi.
28 Ɣemaɣi la, woayɔm gake nyematɔ o;
Woadim vevie gake womakpɔm o,
29 Elabena wolé fu sidzedze,
Eye wometia Afetɔ vɔvɔ̃ o.
30 Wogbe nye aɖaŋuɖoɖowo;
Wodo vlo nye mokanamewo katã.
31 Eya ta woakpɔ woƒe nuwɔnawo me tsonuwo,
Eye woƒe adaŋudedewo ayɔ ko na wo.
32 Elabena ame makpɔnuteƒewo la, woƒe tosesẽe awu wo,
Eye bometsilawo ya, kakaɖeameɖokuidzie atsrɔ̃ wo.
33 Ke ame si ɖoa tom la, anɔ anyi dedie,
Aɖe dzi ɖi, eye vɔ̃ madzi ŋɔ nɛ o.”

LODODOWO 2
1  Vinye, ne èxɔ nye nuƒoƒo wɔ tɔwòe,
Eye nèdzra nye sededewo ɖo abe kesinɔnu ene,
 2 Ne èƒu to anyi ɖe nunya ŋu,
Eye nèbi wò dzi ɖe nugɔmesese ŋu;
 3 Ɛ̃, ne èdo ɣli yɔ gɔmesese,
Eye nèkɔ wò gbe dzi ɖe nugɔmesese ŋu;
 4 Ne èdinɛ abe klosalo ene,
Eye nèdia eyome mɔ abe kesinɔnu ɣaɣla ene la,
 5 Ekema àse Afetɔ vɔvɔ̃ gɔme,
Eye wò asi atu sidzedze Mawu.
 6 Elabena Afetɔe naa nunya;
Eƒe nu mee sidzedze kple nugɔmesese dzɔ tso.
 7 Edzraa nunya vavãtɔ ɖo ɖi na nu dzɔdzɔe wɔlawo;
Akpoxɔnu wònye na ame siwo ƒe zɔzɔme ŋu fɔɖiɖi mele o,
 8 Elabena ekpɔa egbɔ be nya dzɔdzɔe to eƒe mɔ,
Eye wòdzɔa ame siwo wɔa nuteƒe nɛ la ƒe toƒe ŋu.
 9 Ekema àse nu si le dzɔdzɔe, nu si sɔ, kple nu si le eteƒe gɔme,
Ɛ̃, àse mɔ nyuiwo katã gɔme.
10 Ne nunya ge ɖe wò dzi me,
Eye sidzedze vivi wò luʋɔ nu la,
11 Ekema tamebubuŋutete adzɔ ŋuwò,
Eye nugɔmesese akpɔ tawò,
12 Ne wòaɖe wò tso mɔ vɔ̃ dzi,
Tso ame si gblɔa nya tovo la si me,
13 Tso ame siwo gblẽa mɔ dzɔdzɔe ɖi
Be woazɔ blukɔ me la si me,
14 Tso ame siwo kpɔa dzidzɔ ɖe vɔ̃wɔwɔ ŋu,
Eye wotsoa aseye ɖe nu tovo siwo gbɔ eme ŋu la si me,
15 Wo, ame siwo ƒe toƒe le gɔdɔ̃gɔdɔ̃,
Eye woƒe nuwɔnawo katã nye amefuflu sɔŋ.
16 Aɖe wò tso nyɔnu dzeha si me,
Tso nyɔnu ahasitɔ aɖeŋanɛtɔ si me;
17 Eya, ame si gblẽ eƒe ɖetugbuimexɔlɔ̃ vevi ɖi,
Eye wòŋlɔ nubabla si le eya kple eƒe Mawu dome la be;
18 Elabena eƒe aƒe kplɔa ame yia ku me,
Eye eƒe toƒewo ɖo ta aʋlimeyila siwo ŋu wɔna vɔ le la gbɔ.
19 Ame siwo katã dɔna kplii la dometɔ aɖeke magatrɔ agbɔ loo
Alo agatrɔ ava agbemɔ la dzi o.
20 Eya ta to ame nyuiwo ƒe toƒe,
Eye nànɔ ame dzɔdzɔewo ƒe mɔ dzi,
21 Elabena ame dzɔdzɔewo koe anɔ anyigba la dzi,
Eye ame maɖifɔwoe asusɔ ɖe edzi.
22 Ke woatsrɔ̃ ame vɔ̃ɖiwo ɖa le anyigba la dzi,
Eye woaho ame maɖianukwarewo ɖa le edzi.

LODODOWO  3
1  Vinye, mègaŋlɔ nye nufiame be o,
Eye wò dzi nèku ɖe nye sededewo ŋu,
 2 Elabena woahe agbe didi,
Agbenɔƒewo kple ŋutifafa vɛ na wò.
 3 Lɔlɔ̃ vavã kple nuteƒewɔwɔ megate ɖa le gbɔwò o.
Tsɔ wo de kɔ;
Ŋlɔ wo ɖe wò dzi ƒe nuŋlɔkpe dzi;
 4 Ekema amenuveve kple gɔmesese nyui asu asiwò
Le Mawu kple amegbetɔwo ŋkume.
 5 Ðo ŋu ɖe Afetɔ ŋu tso dzi blibo me,
Eye mègaɖo ŋu ɖe wò ŋutɔ wò gɔmesese ŋu o.
 6 Lé ŋku ɖe eŋu le wò mɔwo katã dzi,
Ekema ana wò mɔwo nadzɔ.
 7 Mèganye nunyala le ɖokuiwò ŋkume o.
Vɔ̃ Afetɔ, eye nàtsri vɔ̃.
 8 Esia ada gbe le ŋuwò,
Eye wòana wò ƒuwo me nafa miaa.
 9 Tsɔ wò nunɔamesi veviwo
Kple wò agblemenuwo katã ƒe gbãtɔwo de bubu Afetɔ ŋu;
10 Ekema nu ayɔ wò ava taŋtaŋ,
Eye wain yeye ayɔ wò ahazewo agbagba.
11 Vinye, mègagbe Afetɔ ƒe amehehe o,
Eye eƒe mokaname megati wò o,
12 Elabena ame siwo Afetɔ lɔ̃na lae wòkaa mo na,
Abe ale si ko vifofo wɔna na via si gbɔ melɔ̃a nu le o la ene.
13 Dzidzɔtɔe nye ame si ke ɖe nunya ŋu
Kple ame si si nugɔmesese su;
14 Elabena eƒe amesinɔnɔ nyo wu klosalo ƒe amesinɔnɔ,
Eye eƒe viɖe ƒo sika ta.
15 Exɔ asi wu adzagba,
Eye nu siwo dzroa wò la dometɔ aɖeke mede enu o.
16 Elé agbe didi ɖe ɖusi;
Eye wòlé kesinɔnuwo kple bubu ɖe mia.
17 Eƒe mɔwo nye vivisesemɔ,
Eye eƒe toƒewo katã nye ŋutifafa sɔŋ.
18 Agbeti wònye na ame siwo lée ɖe asi,
Eye woayɔ ame siwo vàe goŋgoŋ la be dzidzɔtɔwo.
19 Nunyae Afetɔ tsɔ ɖo anyigba la gɔme anyi.
Nugɔmesesee wòtsɔ li ke dziƒowo.
20 Eƒe sidzedzee na tsi goglowo me ma,
Eye wòna alilikpowo dza zãmu.
21 Vinye, mègana wòadzo le ŋku dzi na wò o.
Lé nunya vavãtɔ me ɖe asi eye nàdzɔ tamebubuŋutete ŋu,
22 Ekema woanye agbe na wò,
Kple atsyɔ̃ɖonu na wò kɔ;
23 Ekema àlé wò mɔ atsɔ dedie,
Eye wò afɔ makli nu gbeɖe o.
24 Ne èmlɔ anyi la, màvɔ̃ naneke o;
Àdɔ alɔ̃, eye alɔ̃ avivi nuwò.
25 Ŋɔdzi si ava kpoyi la mado vɔvɔ̃ na wò o,
Eye ahom si gbɔna ame vɔ̃ɖiwo dzi hã matso dzika ƒo na wò o.
26 Elabena Afetɔ anye wò ŋuɖoɖeŋutɔ;
Aɖe wò afɔ tso mɔ̃tetrewo me.
27 Mègagbe nyuiwɔwɔ na ame siwo wòle be nàwɔe na,
Nenye be ŋutete le ŋuwò na ewɔwɔ o.
28 Mègagblɔ na hawòvi be, “Heyi, eye nàgatrɔ ava, etsɔ ne mana wò,”
Evɔ nu le asiwò nànae fifia hafi o.
29 Mègaɖo vɔ̃ aɖeke ɖe hawòvi ŋu,
Esime wòɖe dzi ɖi le gbɔwò o.
30 Mègawɔ dzre kple ame aɖeke yakatsyɔ
Ne mewɔ vɔ̃ aɖeke wò o.
31 Mègaʋã ŋu ŋutasẽnuwɔla o,
Eye eƒe mɔ aɖeke meganyo ŋuwò o,
32 Elabena Afetɔ nyɔa ŋu ameflula,
Ke tsi metoa Eya kple nu dzɔdzɔe wɔlawo dome o.
33 Afetɔ ƒe fiƒode le ame vɔ̃ɖiwo ƒe aƒe dzi,
Ke eyraa ame dzɔdzɔewo ya ƒe aƒe.
34 Elabena eɖua fewu le fewuɖulawo ŋu,
Ke evea ɖokuibɔbɔlawo ya nu.
35 Bubu anye nunyalawo ƒe domenyinu,
Ke bometsilawo ya, ŋukpenanue nye woƒe adegbeƒonu.

LODODOWO 4
1  Mi viwo, mise mia fofo ƒe amehehe;
Miɖo to, ne gɔmesese nasu mia si,
 2 Elabena mɔfiame nyui nam mele mi;
Migagbe nye nufiame o.
 3 Vi vavã aɖee menye na fofonye,
Eye vi malɔ̃nugbɔe menye na danye.
 4 Efia num eye wògblɔ nam be: “Wò dzi neku ɖe nye nyawo ŋu vevie.
Lé nye sededewo me ɖe asi, ne nànɔ agbe.
 5 Ƒle nunya, eye nàƒle gɔmesese.
Mègaŋlɔe be o, eye mègate ɖa le nye nyawo ŋu o.
 6 Mègagblẽe ɖi o, ekema adzɔ ŋuwò.
Lɔ̃e, ekema akpɔ tawò.
 7 Nunyae nye nu vevitɔ, eya ta dze nunya,
Eye hekpe ɖe nu siwo katã su asiwò ŋu la, ƒle gɔmesese hã.
 8 De asixɔxɔ gã eŋu, ekema ado wò ɖe dzi.
Kpla asi kɔ nɛ, ekema ahe bubu vɛ na wò.
 9 Aɖɔ seƒoƒotsihe nyui ɖe ta na wò;
Atsyɔ̃fiakuku wòanye le ta na wò.”
10 Vinye, see, eye nàxɔ nye nyawo awɔ tɔwòe,
Ekema wò agbenɔƒewo asɔ gbɔ fũu.
11 Mafia nunyamɔ wò;
Eye makplɔ wò to toƒe dzɔdzɔewo.
12 Ne èle zɔzɔm la, naneke maɖo ata me na wò o;
Eye ne èle du ƒum la, màkli nu o.
13 Và amehehe goŋgoŋ; mègana wòado le asiwò me o.
Lé eme ɖe asi, elabena eyae nye wò agbe.
14 Mègaɖo afɔ ame vɔ̃ɖiwo toƒe o,
Eye mègazɔ ame baɖawo ƒe mɔ dzi o.
15 Ƒo asa nɛ, mègato edzi o;
Dze to afi bubu, nàto eŋu ayi.
16 Elabena ne womewɔ vɔ̃ o kpaa, womedɔa alɔ̃ o.
Ne womeƒu ame anyi o la, alɔ̃ buna ɖe wo.
17 Elabena vɔ̃ɖinyenyee nye abolo woɖuna,
Eye ŋutasesẽe nye aha wonona.
18 Ke ame dzɔdzɔewo ƒe toƒe le abe agudzedze ƒe kekeli
Si nɔa kɔkɔm ɖe edzi va se ɖe esime ŋu kena keŋ ene.
19 Ame vɔ̃ɖiwo ƒe mɔ le abe blukɔ ene;
Womenya nu si na wole nu klim o.
20 Vinye, lé to ɖe nye nyawo ŋu;
Ƒu to anyi ɖe nye nuƒoƒo ŋu nyuie.
21 Womegate ɖa le ŋkuwòme o;
Dzra wo ɖo ɖe wò dzi ƒe gogloeƒe ke,
22 Elabena agbe wonye na ame siwo kena ɖe wo ŋu,
Kple lãmesẽ na ameti blibo la.
23 Dzɔ wò dzi ŋu wu nu bubu ɖe sia ɖe,
Elabena eya mee agbe tsona.
24 Nya totrowo meganɔ nu na wò o,
Te alakpanuyi ɖa xaa tso ɖokuiwò gbɔ.
25 Wò ŋkuwo nekpɔ ŋgɔ tẽe,
Ɛ̃, wò ŋku nelé mɔ ɖeka tsɔ le ŋgɔwò tẽe.
26 Ðe toƒe sɔsɔe na wò afɔ,
Ekema kakaɖedzi anɔ wò mɔwo katã ŋu.
27 Mègadze ɖe ɖusi alo mia me o.
Te wò afɔ ɖe aga tso vɔ̃ gbɔ.

LODODOWO 5
1  Vinye, lé to ɖe nye nunya ŋu.
Ƒu to anyi ɖe nye nugɔmesese ŋu nyuie,
 2 Ne nàdzɔ wò tamebubuŋutete ŋu
Eye wò nuyiwo nedzra sidzedze ɖo.
 3 Elabena nyɔnu dzeha ƒe nuyiwo le abe anyixe si le anyitsi tsyɔm ene,
Eye eƒe veme zrɔ̃ drẽdrẽdrẽ wu ami.
 4 Ke mlɔeba la, evena abe atsa ene
Eye wòɖana abe yi nuevee ene.
 5 Eƒe afɔwo ɖi abu yina ku gbɔ.
Eƒe afɔɖeɖewo ɖo ta Tsiẽƒe tẽe.
 6 Mebua agbemɔ ŋu kura o.
Eƒe mɔwo glɔ̃, evɔ eya ŋutɔ menya afi si wòɖo tae o.
 7 Eya ta vinyewo, miɖo tom,
Eye migado toku nye numenyawo o.
 8 Te ɖokuiwò ɖa xaa tso nyɔnu sia tɔgbi gbɔ;
Eye mègagogo eƒe agbo nu o,
 9 Ne nàgatsɔ wò bubu ana ame tutɔ
Alo ase veve le ƒe siwo gbɔna me o;
10 Ne amedzro nagaɖu wò nunɔamesiwo,
Alo nu siwo nèkpe fu kpɔ la nagava tsi ame tutɔ ƒe me o.
11 Ne menye nenema o la, àva nɔ hũ ɖem le wò agbe ƒe nuwuɣi,
Ne wɔna vɔ le wò ŋutilã kple wò ametia ŋu,
12 Eye nàgblɔ be: “Ao, nu ka ŋuti melé fu amehehe!
Nu ka ŋuti nye dzi do vlo mokaname!
13 Nyemese ame siwo le nu fiamem ƒe gbe o,
Eye nyemelé to ɖe nye nufialawo ŋu o.
14 Tsɔtsrɔ̃ ƒe agbo nu kee meva do ɖo
Le ameha blibo la dome.”
15 No tsi tso wò ŋutɔ wò tsido me
Kple tsi dzidzi tso wò ŋutɔ wò vudo me.
16 Ðe wò tsi adzi agbagba ɖe kpɔdomee,
Eye wò tsiwo asi ato ablɔwo mea?
17 Wò ɖeka tɔ ko wòanye,
Ke menye wò kple ame bubu tɔe o.
18 Wò tsidzɔƒe nanye yayra,
Eye nàkpɔ dzidzɔ kple wò ɖekakpuimesrɔ̃,
19 Eya, si nye zinɔ lɔlɔ̃a kple agamegbɔ̃ dzeani la.
Eƒe nowo neɖi kɔ na wò ɣesiaɣi.
Eƒe lɔlɔ̃ nena nànɔ ya mum ɖaa.
20 Ekema vinye, nu ka ŋuti nyɔnu dzeha ana nànɔ ya mum,
Alo nàku asi alime na nyɔnu ahasitɔ?
21 Elabena amegbetɔ ƒe mɔ le nuvo le Afetɔ ŋkume;
Eléa ŋku ɖe eƒe toƒewo katã ŋu.
22 Ame vɔ̃ɖi ŋutɔ ƒe vodadawo azu mɔ̃ aɖee,
Eye eya ŋutɔ ƒe nu vɔ̃ ƒe kawo aɖee.
23 Eya ŋutɔe aku, elabena mexɔ amehehe o,
Eye eƒe bometsitsi vivivo akplɔe atrae.

LODODOWO 6
1  Vinye, ne èda megbe na hawòvi,
Ne èna asi ame tutɔ ɖe nya aɖe dzi,
 2 Ne ŋugbe si nèdo zu mɔ̃ ɖe wò,
Eye wò numenya lé wò la,
 3 Ekema vinye, wɔ esia, ne nàɖe ɖokuiwò,
Elabena ège ɖe hawòvi si me:
Yi egbɔ nàbɔbɔ ɖokuiwò, eye nàƒo koko na hawòvi la vevie.
 4 Wò ŋku megadɔ alɔ̃ o,
Eye wò aɖaba megadɔ akɔlɔ̃e o.
 5 Wò afɔ netsɔ nàɖe ɖokuiwò le esi me abe sãde tso adela si me ene,
Abe xevi tso xevimɔ̃trela si me ene.
 6 Wò kuviatɔ, yi anyidi gbɔ;
Lé ŋku ɖe eƒe nuwɔna ŋu, ne nàdze nunya.
 7 Togbɔ be gbeɖela, amegã, alo dziɖula aɖeke mele esi o hã la,
 8 Edzraa eƒe nuɖuɖu ɖo le dzomeŋɔli,
Eye wòƒoa eƒe nuɖuɖu nu ƒu le nuŋeɣi.
 9 Kuviatɔ, ɣekaɣie nànɔ aba dzi ase ɖo?
Ɣekaɣie nànyɔ tso alɔ̃ me?
10 Gadɔ alɔ̃ vie, gadɔ akɔlɔ̃e sẽe,
Gade asi asitɛ me nàgbɔ ɖe eme vie,
11 Ekema ahedada aɖi ɖe wò abe fiafi ene,
Eye hiã aƒo ɖe dziwò kpoyi abe adzoblasu ene.
12 Yakame kple ame vɔ̃ɖi lé nya totrowo ɖe nu le yiyim;
13 Emiaa ŋku ɖe ame, etitia afɔ ɖe anyigba, eye wòtsɔa eƒe asibidɛwo wɔa dzesi.
14 Nu tovo wɔwɔ le eƒe dzi me,
Eye wòɖoa vɔ̃ ɖe tame ɣesiaɣi hedea dzre aƒe.
15 Eya ta gbegblẽ aƒo ɖe edzi kpoyi;
Agbã zi ɖeka, eye gbedada manɔ eŋu o.
16 Nu adee Afetɔ lé fui;
Ɛ̃, nu adree nye ŋunyɔ nɛ:
17 Dadaŋkuwo, aʋatsoɖe, asi siwo kɔa ʋu maɖifɔ ɖi,
18 Dzi si ɖoa tame vɔ̃, afɔ siwo tsɔna ɖe vɔ̃wɔwɔ ŋu,
19 Aʋatsoɖasefo si daa alakpa ɣesiaɣi,
Kple ame si dea dzre nɔviwo dome.
20 Vinye, lé fofowò ƒe sedede me ɖe asi,
Eye mègagblẽ dawò ƒe nufiame ɖi o.
21 Bla wo ɖe wò dzi ŋu ɖaa;
Eye nàxatsae ɖe wò kɔ ŋu.
22 Ne èle azɔli dzi la, akplɔ wò;
Ne èmlɔ anyi la, adzɔ ŋuwò;
Eye ne ènyɔ la, aƒo nu na wò.
23 Elabena akaɖie sedede la nye,
Eye se la nye kekeli,
Eye agbemɔe mokaname siwo wotsɔ ɖɔa ame ɖo la nye.
24 Woakpɔ tawò tso nyɔnu vɔ̃ɖi si me,
Tso nyɔnu ahasitɔ aɖeŋanɛtɔ si me.
25 Mègana eƒe tugbedzedze nadzro wò le dzi me o,
Eye mègana wòatsɔ eƒe ŋkuwo alé wò o,
26 Elabena gbolo la, ɖe wònaa abolokoe wɔa ame,
Ke ŋutsu bubu srɔ̃ la, ɖe wònaa ame bua eƒe agbe xɔasi la.
27 Ðe ame ate ŋu aɖe dzo ɖe akɔnu, eye eƒe avɔwo nagbe fiafiã?
28 Alo ɖe ame azɔ dzoka xɔxɔwo dzi, eye eƒe afɔwo nagbe fiafiã?
29 Nenema kee wòanɔ na ame si dɔ ehavi srɔ̃ gbɔ;
Ame sia ame si de asi eŋu la, matsi to mahemahee o.
30 Womedoa vlo fiafitɔ
Ne efi fi be yeatsɔ atsi yeƒe dɔwuame nu o.
31 Ke ne asi tui la, aɖo eteƒe zi gbɔ zi adre;
Atsɔ eƒe aƒemenu xɔasiwo katã ana.
32 Ame si wɔ ahasi kple nyɔnu la, tagbɔ mele esi o;
Ame si wɔa nu sia kplɔa eɖokui dea tsɔtsrɔ̃ me.
33 Ƒoƒo kple vlodoamee atso eme nɛ,
Eye womatutu eƒe ŋukpe ɖa o.
34 Elabena ŋuʋaʋãe nana ŋutsu ƒe dɔmedzoe flana;
Eye makpɔ nublanui na ame ne ele hlɔ̃ biam o.
35 Maxɔ avulénu aɖeke o;
Eye nunana gbogbo aɖeke hã mafa dzi nɛ o.

LODODOWO 7
1 Vinye, lé nye nyawo me ɖe asi,
Eye nàdzra nye sededewo ɖo abe kesinɔnu ene.
 2 Lé nye sededewo me ɖe asi, ne nànɔ agbe;
Lé be na nye nufiamewo abe wò ŋku ƒe gadaglamakui ene.
 3 Bla wo ɖe wò asibidɛwo ŋu;
Eye nàŋlɔ wo ɖe wò dzi ƒe nuŋlɔkpe dzi.
 4 Gblɔ na nunya be, “Nɔvinyenyɔnu nènye,”
Eye nàyɔ gɔmesese be, “nye ƒometɔ,”
 5 Ne woakpɔ tawò tso nyɔnu dzeha si me,
Tso nyɔnu ahasitɔ si ɖea ami ɖe eƒe nyawo la si me.
 6 Menɔ nye xɔ ƒe fesre nu
Nɔ nu kpɔm to adzrala me,
 7 Eye esi menɔ ŋku lém ɖe ɖekemanyalawo ŋu la,
Mede dzesi ɖekakpui aɖe si si tagbɔ mele o la le sɔhɛwo dome;
 8 Eto mɔdodo si le nyɔnu aɖe ƒe dzogoe dzi yina,
Eye wòzɔ ɖo ta eƒe aƒe gbɔ
 9 Le fiẽ, esime xexea me nɔ tsyɔtsyɔm,
Esime zã kple blukɔ nɔ dodom.
10 Eye mekpɔ nyɔnu aɖe va do goe,
Edzra ɖo abe gbolo ene, eye ayedzedze le dzi me nɛ.
11 Eƒe gbe dea dzi, eye metsɔa ɖeke le naneke me o.
Metɔna ɖe aƒe me o.
12 Kaka nàkpɔa, eyae nye ema le gota, kasia eyae nye ekem le ablɔ me,
Eye wòdea xa ɖe dzogoewo katã dzi.
13 Elée hegbugbɔ nu nɛ;
Eɖo mo ta, eye wògblɔ nɛ be:
14 “Ele nam be masa ŋutifafavɔwo.
Mexe nye adzɔgbeɖefewo egbea.
15 Esia tae medo va be mado go wò ɖo;
Medi wò, eye meke ɖe ŋuwò azɔ!
16 Meɖo abadzivɔ nyuiwo ɖe nye aba dzi,
Egipte ƒe avɔ ŋɔŋɔewoe wonye.
17 Mewu ami ʋeʋĩ siwo nye mire, aloe kple sinamɔn ɖe nye aba dzi.
18 Va míano lɔlɔ̃ va se ɖe ŋdi wòaɖi kɔ na mí;
Na míawɔ lɔlɔ̃ wòasu mí,
19 Elabena srɔ̃nye mele aƒea me o;
Eyi mɔ dzi, ezɔ mɔ didi aɖe.
20 Etsɔ gakotoku ɖe asi yii.
Gbe si gbe dzinua sɔ tegblẽe ko hafi wòagbɔ va aƒe.”
21 Etsɔ eƒe amenubeble geɖeawo flui.
Etsɔ eƒe aɖe ŋanɛ la ble enu.
22 Kasia edze eyome kɔ̃ɔ, abe nyitsu si wokplɔ yina wuwu ge ene,
Abe bometsila si woyina pã bɔ gee ene,
23 Va se ɖe esime aŋutrɔ naƒo ɖe eƒe aklã;
Ele abe xevi si lũ ɖe mɔ̃ dzi, eye menyae be yeƒe agbe atsi eme o la ene.
24 Eya ta vinyewo, miɖo tom;
Eye milé to ɖe nye nyawo ŋu.
25 Mègana wò dzi natrɔ ɖe eƒe mɔwo ŋu o.
Mègatra yi eƒe toƒewo o,
26 Elabena ame siwo tsi esi me heɖo baba ɖi la sɔ gbɔ,
Eye ame siwo wòwu la mele xexlẽ me o.
27 Eƒe aƒe la, Tsiẽƒe ƒe mɔ wònye;
Eɖo ta ku ƒe xɔgãwo me.

LODODOWO 8
1  Ðe nunya mele ɣli dom oa?
Ðe gɔmesese mekɔ eƒe gbe dzi oa?
 2 Ele tsitre ɖe kɔkɔƒewo le mɔ to,
Le mɔ dogoewo nu.
 3 Ele ɣli dom sesĩe
Le dugbowo xa,
Kple ʋɔtruawo nu be:
 4 “Mi amegbetɔwo, miawo yɔm mele;
Amewo* katãe mekɔ nye gbe dzi na.
 5 Mi ame bebewuwo, midze aɖaŋu;
Eye mi bometsilawo, mina dzi senugɔme nasu mia si.
 6 Misee, elabena nya veviwo gblɔm mele,
Nu si le eteƒe tututue nye nuyiwo gblɔna;
 7 Elabena nyateƒee dona le nunye,
Nye nuyiwo tsri nya vɔ̃ɖi gbɔgblɔ.
 8 Nye numenyawo katã le dzɔdzɔe.
Nya totro alo nya trama aɖeke mele wo me o.
 9 Wo katã dzɔ le nugɔmesela gbɔ,
Eye wosɔ na ame siwo ƒe asi tu sidzedze.
10 Mixɔ nye amehehe ɖe klosalo teƒe,
Eye mixɔ sidzedze ɖe sika nyuitɔ teƒe,
11 Elabena nunya nyo wu adzagba,*
Nu bubu siwo katã dzroa ame la dometɔ aɖeke mede enu o.
12 “Nye—nunya—kple aɖaŋudzedzee nɔa afi ɖeka;
Nye asi tu sidzedze kple tamebubuŋutete.
13 Afetɔ vɔvɔ̃e nye fuléle vɔ̃.
Melé fu ɖokuidodoɖedzi, dada, mɔ vɔ̃ɖi kple alakpanya.
14 Aɖaŋuɖoɖo kple nunya vavãtɔ le asinye;
Gɔmesese kple ŋusẽ bɔ ɖe asinye.
15 Dzinyee fiawo tona ɖua fia,
Eye amegãwo dea se dzɔdzɔewo.
16 Dzinyee amegãwo tona ɖua amegã,
Eye bubumewo drɔ̃a ʋɔnu dzɔdzɔe.
17 Melɔ̃a ame siwo lɔ̃am,
Eye ame siwo diam la kena ɖe ŋunye.
18 Kesinɔnu kple bubu le asinye,
Nunɔamesi siwo megblẽna o* kple dzɔdzɔenyenye hã le gbɔnye.
19 Nye kutsetse nyo wu sika, ɛ̃, enyo wu sika si ŋu wodza,
Eye nu si menana la nyo wu klosalo nyuitɔ.
20 Dzɔdzɔenyenye ƒe mɔ dzie mezɔna,
Le nya dzɔdzɔe toƒewo titina;
21 Menaa domenyinu xɔasiwo sua ame siwo lɔ̃am la si,
Eye medea nu woƒe nudzraɖoƒewo wòyɔna taŋ.
22 Afetɔ wɔm menye eƒe mɔ ƒe gɔmetoto,
Eƒe nuwɔwɔwo ƒe gbãtɔ tso blema ke.
23 Woɖom tso gbe aɖe gbe ʋĩi ke,*
Tso gɔmedzedzea me ke, do ŋgɔ na anyigba la wɔɣi.
24 Wodzim hafi wova wɔ tɔ goglowo,
Esime tsidzɔƒe siwo me tsi yɔ taŋtaŋ la dometɔ aɖeke meli o.
25 Wowɔm hafi wova ɖo towo gɔme anyi,
Wowɔm do ŋgɔ na togbɛwo,
26 Esi womekpɔ wɔ anyigba la kple eƒe gbadzaƒewo,
Alo eƒe anyikɔ gbãtɔwo haɖe o.
27 Mele eteƒe esime wòdzra dziƒowo ɖo;
Esime wòɖe liƒo kotoo ɖe tsi gbanaa la tame,
28 Esime wòna alilikpowo li ke ɖe yame,
Eye wòwɔ tɔ goglo la ƒe tsidzɔƒewo,
29 Esime wòɖo seɖoƒe na atsiaƒu
Be eƒe tsiwo nagagbɔ eƒe sedede dzi o,
Esime wòɖo anyigba la gɔme anyi,
30 Ɣemaɣi menye dɔwɔla bibi nɔ egbɔ.
Elɔ̃m vevie gbe sia gbe;
Eye metsoa aseye le eŋkume ɣeawokatãɣi;
31 Mekpɔa dzidzɔ ɖe eƒe anyigba si wòwɔ be woanɔ edzi la ŋu,
Eye nyemelɔ̃a nu le amegbetɔviwo* gbɔ kura o.
32 Azɔ vinyewo, miɖo tom;
Dzidzɔtɔwoe nye ame siwo léa nye mɔwo me ɖe asi.
33 Miɖo to amehehe, ne miadze nunya,
Eye migagbee gbeɖe o.
34 Dzidzɔtɔe nye ame si ɖoa tom,
Ame si dona ɖe nye ʋɔtruwo nu kaba* gbe sia gbe,
Ame si lalana le nye ʋɔtrutiwo nu;
35 Elabena ame si ƒe asi tum la, eƒe asi tu agbe,
Eye Afetɔ akpɔ ŋudzedze ɖe eŋu.
36 Ke ame si mebuam ɖe ɖeke me o la wɔa nu vevi eɖokui,*
Eye ame siwo katã léa fum la, ku lɔ̃m wole.”

LODODOWO 9
1  Nunya vavãtɔ tu eƒe xɔ;
Ekpa eƒe sɔti adreawo ɖe eŋu.
 2 Etrɔ asi le eƒe lã ŋu;
Etɔtɔ eƒe wain;
Eye wòɖo eƒe kplɔ̃ hã.
 3 Edɔ eƒe dɔlanyɔnuwo ɖa
Ne woado ɣli le dua ƒe kɔkɔƒewo be:
 4 “Ame sia ame si si nuteƒekpɔkpɔ mesu o la, neva dze afii.”
Egblɔ na ame si si tagbɔ mele o hã be:
 5 “Va ɖu nye abolo.
Eye nàno wain si metɔtɔ la.
 6 Ðe asi le numanyamanya ŋu, ne nànɔ agbe;
Eye lé gɔmesese ƒe mɔ tsɔ tẽe.”
 7 Ame si le fewuɖula ɖɔm ɖo la kplɔa ŋukpe ƒua eɖokui,
Eye ame si le mo kam na ame vɔ̃ɖi la awɔ nu vevi eɖokui.
 8 Mègaka mo na fewuɖula o; fu ko wòalé wò.
Ka mo na nunyala boŋ, eye alɔ̃ wò.
 9 Fia nu nunyala, eye aganya nu ɖe edzi.
Fia nu ame dzɔdzɔe, eye agasrɔ̃ nu geɖe akpe esi wònya.
10 Afetɔ vɔvɔ̃e nye nunya ƒe gɔmedzedze,
Eye sidzedze Kɔkɔetɔ lae nye gɔmesese.
11 Elabena nyee ana wò agbemeŋkekewo nasɔ gbɔ,
Eye woadzi wò agbenɔƒewo ɖe edzi.
12 Ne èdze nunya la, wò ŋutɔe nunya sia aɖe vi na,
Gake ne ènye fewuɖula la, wò ɖeɖee akpɔ emetsonua.
13 Nyɔnu movitɔ doa aƒa.
Mebua nu ŋu yia ŋgɔe o, eye menya naneke o.
14 Ebɔbɔ nɔ eƒe aƒe ƒe mɔnu,
Le zikpui dzi le dua ƒe kɔkɔƒe,
15 Le ɣli dom le ame siwo tso eme va yina la yɔm,
Le gbɔgblɔm na ame siwo lé woƒe mɔ tsɔ tẽe la be:
16 “Ame sia ame si si nuteƒekpɔkpɔ mesu o la, neva dze afii.”
Egblɔ na ame siwo katã si tagbɔ mele o hã be:
17 “Tsi si wofi la, ɖe wòvivina,
Eye vivimenuɖuɖu ɖe wòle ŋanaŋana.”
18 Ke womenyae be ku le afi ma o,
Be Tsieƒe ƒe gogloeƒe kee ame siwo wòkpe la le o.

LODODOWO 10
1  Salomo ƒe lododowo.
Vi nyanu doa dzidzɔ na fofoa,
Ke vi tsibome nyea nuxaxa na dadaa.
 2 Kesinɔnu si wokpɔ to mɔ fitifiti dzi la maɖe vi aɖeke o,
Ke dzɔdzɔenyenyee aɖe ame tso ku me.
 3 Afetɔ mana dɔ nawu ame dzɔdzɔe la o,
Ke ame vɔ̃ɖi ya, mana nu si le edzrom la nasu esi o.
 4 Asi si wɔa alɔgblɔdɔ la, hiã atui,
Ke asi si doa vevie nu la hea kesinɔnu vanɛ.
 5 Vi nyanu ƒoa nuwo nu ƒu le dzomeŋɔli,
Ke vi ŋukpenanuwɔla dɔa alɔ̃ yia eme ʋĩi le nuŋeɣi.
 6 Yayrawo ava ame dzɔdzɔe ƒe ta dzi,
Ke ŋutasesẽ ɣla ɖe ame vɔ̃ɖiwo ƒe nu me.
 7 Ŋkuɖoɖo ame dzɔdzɔe dzi anye yayra,
Ke ame vɔ̃ɖi ya ƒe ŋkɔ anyunyɔ.
 8 Ame si si dzi nyanu le la alɔ̃ axɔ nufiame,
Ke woafanya ame si gblɔa bometsinya la.
 9 Ame si ƒe zɔzɔme ŋu fɔɖiɖi mele o la anɔ dedie,
Ke ame si ƒe mɔwo glɔ̃ la asi atui.
10 Ame si miaa ŋku ɖe ame ayetɔe la hea nuxaxa vanɛ,
Eye woafanya ame si gblɔa bometsinya la.
11 Ame dzɔdzɔe ƒe nu la, agbevudo wònye,
Ke ŋutasesẽ ɣla ɖe ame vɔ̃ɖiwo ƒe nu me.
12 Fuléle dea dzre aƒe,
Ke lɔlɔ̃ tsyɔa dzidadawo katã dzi.
13 Nugɔmesela ƒe nuyiwo dzie wokpɔa nunya le,
Ke ameƒoti li na ame si si tagbɔ mele o la ƒe medome.
14 Nunyala dzraa sidzedze ɖo,
Ke bometsila ƒe nuyi hea gbegblẽ vanɛ.
15 Hotsuitɔ ƒe kesinɔnuwoe nye du sesẽ nɛ.
Hiãtɔ ƒe ahedadae nye eƒe gbegblẽ.
16 Ame dzɔdzɔe ƒe dɔwɔwɔ hea agbe vanɛ;
Ke ame vɔ̃ɖi ƒe dɔwɔwɔ hea nu vɔ̃ vanɛ.
17 Ame si xɔa amehehe la nye agbemɔ,
Ke ame si do toku ɖɔɖɔɖo la kplɔa amewo trana.
18 Ame si ɣla fuléle ɖe dzi me la, alakpatɔ wònye,
Eye ame si kakaa ameŋugblẽnya la, bometsilae.
19 Dadaƒu megbea nuƒoƒo vivivo me o,
Ke ame si kpɔa eƒe nuyiwo dzi la, aɖaŋudzelae.
20 Ame dzɔdzɔe ƒe aɖe le abe klosalo nyuitɔ ene,
Ke ame vɔ̃ɖi ƒe dzi mele ɖeke me o.
21 Ame dzɔdzɔe ƒe nuƒo nyia ame geɖe,
Ke bometsilawo kuna le numanyamanya ta.
22 Afetɔ ƒe yayrae wɔa ame kesinɔtɔ,
Eye metsɔa vevesese aɖeke kpena ɖe eŋu o.
23 Ŋukpenanuwɔwɔ nyea fefenu na bometsila,
Ke nunya le nugɔmesela si.
24 Nu si vɔ̃m ame vɔ̃ɖi le la, eyae adzɔ ɖe edzi;
Ke woawɔ ame dzɔdzɔewo ƒe didi dzi na wo.
25 Ne ahom tu va yi la, ame vɔ̃ɖi la nu ayi,
Ke ame dzɔdzɔe ya ali ke abe gɔmeɖoanyi ene tegbee.
26 Ale si aha tsitsi le na aɖu kple dzudzɔ le na ŋku la,
Nenemae kuviatɔ le na ame si dɔ dɔe.
27 Afetɔ vɔvɔ̃ dzia agbenɔƒewo ɖe edzi,
Ke ame vɔ̃ɖiwo ya ƒe agbenɔƒewo dzi atso kpo.
28 Ame dzɔdzɔewo ƒe mɔkpɔkpɔ hea dzidzɔ vanɛ,
Ke ame vɔ̃ɖiwo ƒe mɔkpɔkpɔ nu ayi.
29 Afetɔ ƒe mɔ nye mɔ́ sesẽ na fɔmaɖila,
Gake enye gbegblẽ na vɔ̃wɔlawo.
30 Womana ame dzɔdzɔe nadze anyi akpɔ o,
Gake ame vɔ̃ɖiwo ya maganɔ anyigba la dzi o.
31 Nunya doa go tso ame dzɔdzɔe ƒe nu me,
Ke woalã alakpaɖe la ya ɖa.
32 Ame dzɔdzɔe ƒe nuyi gblɔa nya dzeto,
Ke ame vɔ̃ɖi ƒe nu gblɔa nya tovo.

LODODOWO 11
1  Nudanu amebatɔ nye ŋunyɔ na Afetɔ,
Ke nudanu si de pɛpɛpɛ la dzea eŋu.
 2 Ne ɖokuidodoɖedzi do mo ɖa la, ŋukpe hã dzea eyome godoo,
Ke ame siwo nyaa afi si woƒe ŋutete se ɖo la si mee nunya le.
 3 Nu dzɔdzɔe wɔlawo ƒe fɔmaɖimaɖie fiaa mɔ wo,
Ke ame mawɔnuteƒewo ƒe nu fitifiti wɔwɔe atsrɔ̃ wo.
 4 Viɖe aɖeke manɔ ame ƒe kesinɔnuwo ŋu le dzikudogbe o,
Ke dzɔdzɔenyenyee aɖe ame tso ku me.
 5 Ame maɖifɔ ƒe dzɔdzɔenyenyee taa mɔ dzɔdzɔe nɛ,
Ke ame vɔ̃ɖi ŋutɔ ƒe vɔ̃ɖinyenyee aƒui anyi.
 6 Nu dzɔdzɔe wɔlawo ƒe dzɔdzɔenyenyee aɖe wo,
Ke ame mawɔnuteƒewo ƒe dzodzrowoe dea wo asi.
 7 Ne ame vɔ̃ɖi ku la, eƒe mɔkpɔkpɔ nu yina;
Eye ŋuɖoɖo ɖe eƒe ŋusẽ ŋu hã nu yina.
 8 Woɖea ame dzɔdzɔe tso xaxa me,
Eye ame vɔ̃ɖi xɔna ɖe eteƒe.
 9 Xɔsegbela tsɔa eƒe nu gblẽa ehavi dome,
Ke sidzedzee wotsɔna ɖea ame dzɔdzɔewo.
10 Ame dzɔdzɔewo ƒe nu nyui wɔwɔ nana du kpɔa dzidzɔ,
Ke ne ame vɔ̃ɖiwo nu yi la, aseye ɖina.
11 Nu dzɔdzɔe wɔlawo ƒe yayra doa du ƒe ŋkɔ ɖe edzi,
Ke ame vɔ̃ɖiwo ƒe nu nana wogbãnɛ ƒua anyi.
12 Ame si si tagbɔ mele o la doa vlo ehavi,
Ke nugɔmesela zia kpi.
13 Ameŋugblẽla nɔa tsatsam nɔa go ʋum nya ɣaɣla,
Ke ame si dzi woate ŋu aka ɖo ɣlaa nya.
14 Ne mɔfiafia nyui meli o la, dukɔ dzea anyi,
Ke aɖaŋuɖola geɖewo dzie wotona kpɔa dzidzedze.
15 Ame si da megbe na ame tutɔ wòdo ga la, eme manyo nɛ o,
Ke ame si gbe asinana ɖe ɖoɖo dzi la anɔ dedie.
16 Nyɔnu si wɔ ame la ƒe asi sua bubu dzi,
Ke ŋutsu ŋutasẽlawo ya kesinɔnu koe sua wo si.
17 Ame si nyoa dɔme la le nyui wɔm na eya ŋutɔ ɖokui,
Ke ŋutasẽla hea xaxa vaa eya ŋutɔ ɖokui dzi.
18 Ame vɔ̃ɖi xɔa beblefetu,
Ke ame si ƒãa dzɔdzɔenyenye la xɔa fetu vavã.
19 Ame si léa nu dzɔdzɔe wɔwɔ me ɖe asi la le agbemɔ dzi,
Ke ame si tia nu vɔ̃ɖi wɔwɔ yome la le kumɔ dzi.
20 Ame siwo ƒe dzi metoa mɔ ɖeka o la ƒe nu nyɔa ŋu na Afetɔ,
Ke ame siwo ƒe zɔzɔme ŋu fɔɖiɖi mele o la ƒe nu nyoa eŋu.
21 Ka ɖe nya sia dzi be: Womagbe tohehe na ame vɔ̃ɖi o,
Ke ame dzɔdzɔewo ƒe viwo ya ado le eme.
22 Nyɔnu dzetugbe si gbea susu ŋu dɔ wɔwɔ,
Le abe ha si sikaŋɔtigɛ le ŋɔti na ene.
23 Ame dzɔdzɔewo ƒe dzimedidi hea nyui vanɛ,
Ke ame vɔ̃ɖiwo ƒe mɔkpɔkpɔ hea dziku vanɛ.
24 Ame aɖe naa nu faa, ke egadzina ɖe edzi nɛ;
Ame aɖe hã vea nu ale gbegbe, ke ahe ko wòdana.
25 Eme anyo na dɔmenyotɔ,
Eye ame si naa amewo ƒe dzi dzea eme la, woana eya hã ƒe dzi nadze eme.
26 Ame si miaa asi ɖe bli dzi la, amewo ado ɖiŋu nɛ,
Ke ame si tsɔe na woƒle la, woayrae.
27 Ame si le nyui yome tim la, eƒe nu anyo ame ŋu,
Ke ame si le vɔ̃ dim la, vɔ̃ ava edzi godoo.
28 Ame si le dzi ɖom ɖe eƒe kesinɔnuwo ŋu la adze anyi,
Ke ame dzɔdzɔewo awɔ vlɔvlɔvlɔ abe aŋgba ene.
29 Ame si he vɔ̃ va eƒe aƒe dzi la, ya anye eƒe domenyinu,
Eye bometsila anye subɔla na ame si si dzi nyanu le.
30 Ame dzɔdzɔe ƒe kutsetse nye agbeti,
Eye ame si ɖea luʋɔwo la, nunyalae.
31 Kpɔ ɖa, ne woɖoa eteƒe na ame dzɔdzɔe le anyigba dzi la,
Ke ɖe womaɖo ame vɔ̃ɖi kple nu vɔ̃ wɔla ya ƒe nuwɔna teƒe na wo oa?

LODODOWO 12
1  Ame si lɔ̃a amehehe la, elɔ̃a sidzedze,
Ke ame si lé fu mokaname la, menyaa nu o.
 2 Ame nyui ƒe nu dzea Afetɔ ŋu,
Ke ebua fɔ ame si ɖoa susu vɔ̃wo ɖe tame.
 3 Nu vɔ̃ɖi wɔwɔ mana ame nali ke akpɔ o,
Ke womaho ame dzɔdzɔe ya gbeɖe o.
 4 Srɔ̃nyɔnu zazɛ̃ nye fiakuku na srɔ̃a,
Ke srɔ̃nyɔnu ŋukpenanuwɔla nye ŋuɖui le ƒutome na srɔ̃a.
 5 Ame dzɔdzɔewo ƒe tamesusuwo le eteƒe,
Ke ame vɔ̃ɖiwo ƒe mɔfiafia nye beble ɖeɖe sɔŋ.
 6 Ame vɔ̃ɖiwo ƒe nyawo trea azã ɖi,
Ke nu dzɔdzɔe wɔlawo ƒe nyawo xɔa wo ɖe agbe.
 7 Ne woho ame vɔ̃ɖiwo la, womaganɔ anyi o,
Ke ame dzɔdzɔewo ya ƒe aƒe anɔ te ɖaa.
 8 Woakafu ame si kea eƒe nu le nunya me,
Ke woado vlo ame si ƒe dzi metoa mɔ ɖeka o.
 9 Ame si wobuna ame tsɛe, gake subɔvi le esi la
Nyo wu ame si ƒoa adegbe, gake nuɖuɖu mele esi o.
10 Ame dzɔdzɔe léa be na eƒe aƒemelãwo,
Gake ame vɔ̃ɖiwo ƒe nublanuikpɔkpɔ gɔ̃ hã nye tagbɔsesẽ.
11 Ame si dea eya ŋutɔ ƒe agble la, aɖu nu aɖi ƒo,
Ke ame si tia nu maɖinuwo yome la, tagbɔ mele esi o.
12 Nu si nu vlo wɔlawo lé la le ŋu biãm na ame vɔ̃ɖi,
Ke ame dzɔdzɔe la le abe ati si tsea ku ene.
13 Ame vɔ̃ɖi ƒe nya vlowo nyea mɔ̃ ɖenɛ,
Ke ame dzɔdzɔe ya dona le xaxa me.
14 Ame ƒe nu ƒe kutsetse hea nu nyuiwo vana nɛ taŋtaŋ,
Eye eƒe asinudɔwɔwɔ ahe viɖe geɖe avɛ nɛ.
15 Bometsila ƒe mɔ dzɔna le eya ŋutɔ ŋkume,
Ke nunyala xɔa aɖaŋuɖoɖo.
16 Bometsilae mesaa dzikudodo o,
Ke aɖaŋudzela ya doa toku dzudzu.
17 Ðasefo nyateƒetɔ gblɔa nya si le eteƒe,
Ke aʋatsoɖasefo daa alakpa.
18 Nuƒoƒo eŋumabumabui le abe yitɔame ene,
Ke nunyalawo ƒe aɖe daa gbe le ame ŋu.
19 Nyateƒenuyi ali ke tegbee,
Ke aʋatsoɖe ya nu mesena yina o.
20 Beble le dzi me na ame siwo ɖoa nu vɔ̃ɖi wɔwɔ,
Ke ame siwo doa ŋutifafa ɖe ŋgɔ la kpɔa dzidzɔ.
21 Vɔ̃ aɖeke maɖi kpe ame dzɔdzɔe o,
Ke vɔ̃ aƒo go ame vɔ̃ɖiwo wòade edeƒe.
22 Afetɔ nyɔa ŋu alakpanuyiwo,
Ke ame siwo wɔa nuteƒe la ƒe nu dzea eŋu.
23 Aɖaŋudzela dzraa eƒe sidzedze ɖo,
Ke bometsila ƒe dzi doa boblo eƒe bometsitsi.
24 Veviedola ƒe asie aɖu dzi;
Ke kuviatɔ ƒe asie awɔ kluvidɔ.
25 Nuxaxa le dzi me ɖe wòtea ame ƒe dzi ɖe anyi,
Ke nya nyui nana dzi kpɔa dzidzɔ.
26 Ame dzɔdzɔe ƒe ŋku nɔa eƒe lãnyiƒe ŋu,
Ke ame vɔ̃ɖiwo ƒe mɔ kplɔa wo tranae.
27 Kuviawɔwɔ mekplɔa ame yia adegbe o,
Ke veviedodo la, nu xɔasi wònye na ame.
28 Dzɔdzɔenyenye ƒe mɔ kplɔa ame yia agbe me;
Eƒe mɔ menye kumɔ o.

LODODOWO 13
1  Vi nyanu sea fofoa ƒe amehehe,
Ke fewuɖula mesea nyagbename o.
 2 Ame ƒe nu ƒe kutsetse ana wòakpɔ nu nyuiwo aɖu,
Ke ame mawɔnuteƒewo ƒe dzimedidi nye ŋutasesẽ.
 3 Ame si kpɔa eƒe nuyiwo dzi la kpɔa eƒe agbe ta,
Ame si kea eƒe nuyiwo baa la, dzea gbegblẽ me.
 4 Nu dzroa kuviatɔ vevie, gake makpɔ naneke o,
Ke veviedola aɖi ƒo nyuie.
 5 Ame dzɔdzɔe léa fu alakpanya,
Ke ame vɔ̃ɖi ƒe nuwɔna hea ŋukpe kple vlodoame vanɛ.
 6 Dzɔdzɔenyenye kpɔa ame si ƒe zɔzɔme ŋu fɔɖiɖi mele o la ta,
Ke vɔ̃ɖinyenye ƒua nu vɔ̃ wɔla anyi.
 7 Ame aɖewo doa kesinɔtɔ wo ɖokui, evɔ naneke mele wo si hafi o;
Ame aɖewo hã doa hiãtɔ wo ɖokui, evɔ nu bɔ ɖe wo si hafi.
 8 Kesinɔnu ame tsɔna ɖea eƒe agbe,
Ke hiãtɔ ya mesea ŋɔdzidoname aɖeke o.
 9 Ame dzɔdzɔewo ƒe kekeli klẽna nyuie,
Ke ame vɔ̃ɖiwo ƒe akaɖi atsi.
10 Dzre sɔŋ koe ɖokuiŋudzedze hena vanɛ,
Ke nunya tso aƒe ɖe ame siwo dia aɖaŋuɖoɖo gbɔ.
11 Kesinɔnu siwo wokpɔ kaba la nu mesẽna yina o,
Gake ame si ƒo nuwo nu ƒu ʋɛʋɛʋɛ la tɔ adzi ɖe edzi.
12 Mɔkpɔkpɔ si meva eme kaba o nana dzi sea veve,
Ke didi si va eme la, agbeti wònye.
13 Ame si doa vlo nuxlɔ̃ame la, akpɔ etɔ nua,
Ke ame si dea bubu sedede ŋu la, woaɖo eteƒe nɛ.
14 Nunyala ƒe nufiafia la, agbevudo wònye,
Eɖea ame tso ku ƒe mɔ̃tetrewo me.
15 Gɔmesese nyuitɔ nana wokpɔa ŋudzedze ɖe ame ŋu,
Ke nu fitifiti wɔlawo ƒe mɔ dzi le glidzaglidza.
16 Aɖaŋudzela wɔa nu le nunya me,
Ke bometsila doa boblo eƒe bometsitsi.
17 Dɔtsɔla vɔ̃ɖi dzea vɔ̃ me,
Ke duxɔla wɔnuteƒe daa gbe le ame ŋu.
18 Ame si doa toku amehehe la, ahedada kple ŋukpee ava edzi,
Ke ame si lɔ̃na woɖɔnɛ ɖo la ŋue woade bubui.
19 Didi si va eme la vivia ame nu,
Ke vɔ̃tsitsri menyoa bometsilawo ŋu o.
20 Ame si zɔna kple nunyalawo la, adze nunya,
Ke ame si dea ha kple bometsilawo la, eme manyo nɛ o.
21 Nu vɔ̃ wɔlawo yomee vɔ̃ tina,
Ke nunyoname nyea teƒeɖoɖo na ame dzɔdzɔewo ya.
22 Ame nyui gblẽa domenyinu ɖi na viawo ƒe viwo,
Ke woadzra ame vɔ̃ɖi ƒe kesinɔnuwo ɖo ɖi na ame dzɔdzɔewo.
23 Hiãtɔ ƒe agble naa nuɖuɖu geɖe,
Ke nu madzɔmadzɔ wɔwɔ kplɔnɛ dzonae.
24 Ame si vea nu le eƒe ameƒoti gbɔ la lé fu via,
Ke ame si lɔ̃a via la hea to nɛ ale si dze.
25 Ame dzɔdzɔe ɖua nu wòɖia ƒo nɛ,
Ke ame vɔ̃ɖiwo ya tsia dɔmeɣi.

LODODOWO 14
1  Nyɔnu si dze nunya vavã la tua eƒe aƒe,
Ke nyɔnu tsibome tsɔa eya ŋutɔ ƒe asi gbãnɛ.
 2 Ame si ƒe mɔwo le dzɔdzɔe la vɔ̃a Afetɔ,
Ke ame si toa mɔ fitifitiwo dzi la doa vloe.
 3 Bometsila ƒe nuƒoƒo dadatɔe le abe ameƒoti ene,
Ke nunyalawo ƒe nuyiwo akpɔ wo ta.
 4 Ne nyiwo meli o la, lãto me nɔa dzadzɛ,
Ke nyitsu ƒe ŋusẽe nana wokpɔa agblemenu geɖe.
 5 Ðasefo wɔnuteƒe mada alakpa o,
Ke aʋatsoɖasefo ya daa alakpa ɣesiaɣi.
 6 Fewuɖula dia nunya ʋuu doa kpoe,
Gake sidzedze sua nugɔmesela ya si bɔbɔe.
 7 Te ɖa le bometsila gbɔ,
Elabena màkpɔ nunya aɖeke le eƒe nu me o.
 8 Aɖaŋudzela ƒe nunyae nana wòsea mɔ si dzi wòle la gɔme,
Ke bometsilawo ƒe movidzɔdzɔ blea wo.
 9 Bometsilawo tsɔa woƒe fɔɖiɖi wɔa nukonyae,
Ke nu dzɔdzɔe wɔlawo lɔ̃na ɖe ame nɔewo dome dzadzraɖo dzi.
10 Ame ƒe dzi nya eya ŋutɔ ƒe vevesese,
Eye ame bubu aɖeke mate ŋu ama eƒe dzidzɔ kplii o.
11 Ame vɔ̃ɖiwo ƒe aƒe atsrɔ̃ gbidii,
Ke nu dzɔdzɔe wɔlawo ƒe agbadɔ ali ke ɖaa.
12 Ame aɖewo ƒe mɔ dzɔ le woawo ŋutɔ ŋkume,
Ke eƒe nuwuwu nye ku ƒe mɔ.
13 Ne veve le ame ƒe dzi me hã, wotoa egbɔ koa nu,
Eye dzidzɔ tea ŋu wua enu ɖe nuxaxa me.
14 Ame si ƒe dzi tra mɔ akpɔ eƒe nuwɔnawo me tsonu,
Ke woaɖo eteƒe na ame nyui hã ɖe eƒe nuwɔnawo nu.
15 Ðekemanyala xɔa nya sia nya dzi sena,
Ke aɖaŋudzela léa ŋku ɖe eƒe afɔɖeɖewo katã ŋu.
16 Nunyala ɖɔa ŋu ɖo, eye wòƒoa asa na vɔ̃,
Ke bometsila tsia dzi, eye wòkana ɖe eɖokui dzi.
17 Ame si doa dziku kabakaba la wɔa bometsinu,
Ke woléa fu ame si bua nuwo ŋu nyuie.
18 Ðekemanyala ƒe domenyinue nye bometsitsi,
Ke woɖɔa sidzedze na aɖaŋudzelawo abe kuku ene.
19 Ame vlowo abɔbɔ ɖe ame nyuiwo ŋkume,
Eye nenemae ame vɔ̃ɖiwo hã awɔ le ame dzɔdzɔewo ƒe agbowo nu.
20 Ame dahe haviwo ke hã léa fui,
Gake xɔlɔ̃ bɔ ɖe kesinɔtɔ si.
21 Ame si doa vlo ehavi la le nu vɔ̃ wɔm,
Ke dzidzɔtɔe nye ame si vea ame tsɛwo nu.
22 Ðe ame siwo ɖoa vɔ̃ ɖe tame la metraa mɔ oa?
Ke wotsɔa amenuveve kple nuteƒewɔwɔ ɖoa eteƒe na ame siwo ɖoa nyui ɖe tame.
23 Kutrikuku ɖe dɔwɔwɔ ŋu hea viɖe vanɛ,
Ke nu kpoloe ƒoƒo ɖeɖe la, ɖeko wònaa wodaa ahe.
24 Nunyalawo ƒe fiakukue nye woƒe kesinɔnu;
Ke bometsilawo ƒe movidzɔdzɔe nana wogatsia bome ɖe edzi.
25 Ðasefo nyateƒetɔ xɔa ame ɖe agbe,
Ke aʋatsoɖasefo daa alakpa ɣesiaɣi.
26 Kakaɖedzi sẽŋu le Afetɔ vɔvɔ̃ me,
Eye sitsoƒe wòanye na viawo.
27 Afetɔ vɔvɔ̃ nye agbevudo,
Enana woƒoa asa na ku ƒe mɔ̃tetrewo.
28 Fia ƒe atsyɔ̃ le dukɔ ƒe agbɔsɔsɔ me,
Ke ne teviwo mele dziɖula si o la, edome gblẽna.
29 Ame si medoa dziku kabakaba o la, nugɔmesese bɔ ɖe esi,
Ke ame si megbɔa dzi ɖi o la ɖea eƒe bometsitsi fiana.
30 Dzi fatu naa agbe ametia,
Ke ŋuʋaʋã nye ŋuɖui le ƒuwo me.
31 Ame si le ame tsɛ tafam la doa vlo Ewɔla,
Ke ame si vea ame dahe nu la dea bubu Eŋu.
32 Ame vɔ̃ɖi ƒe vɔ̃wɔwɔ atutui aƒu anyi,
Ke ame dzɔdzɔe akpɔ sitsoƒe le eƒe fɔmaɖimaɖi me.
33 Nunya tso aƒe ɖe nugɔmesela ƒe dzi me,
Ke bometsila doa boblo etɔ.
34 Dzɔdzɔenyenye doa dukɔ ɖe dzi,
Ke nu vɔ̃ dea ŋukpe mo na dukɔwo.
35 Subɔvi si wɔa nu le nunya me la ƒe nue dzea fia ŋu,
Ke edoa dziku ɖe esi wɔa ŋukpenanu ŋu.

LODODOWO 15
1  Nyaŋuɖoɖo fafɛ tsia dziku nu,
Ke gbedaɖeamegbɔ nana dɔmedzoe flana.
 2 Nunyala ƒe aɖe wɔa sidzedze ŋu dɔ nyuie,
Ke bometsitsi dona le bometsilawo nu gbẽgbẽgbẽ.
 3 Afetɔ ƒe ŋku le afi sia afi,
Eléa ŋku ɖe ame vlowo kple ame nyuiwo siaa ŋu.
 4 Aɖe fafɛ la, agbeti wònye,
Ke nya totro nana mɔkpɔkpɔ buna ɖe ame.
 5 Bometsila doa vlo fofoa ƒe amehehe,
Ke aɖaŋudzela lɔ̃na xɔa ɖɔɖɔɖo.
 6 Kesinɔnu bɔ ɖe ame dzɔdzɔe ƒe aƒe me,
Ke nu si su ame vɔ̃ɖi si hea xaxa vaa edzi.
 7 Nunyalawo ƒe nuyiwo kakaa sidzedze,
Ke bometsilawo ƒe dzi ya mele alea o.
 8 Ame vɔ̃ɖiwo ƒe vɔsa nye ŋunyɔ na Afetɔ,
Ke ame dzɔdzɔewo ƒe gbedodoɖa dzea Eŋu.
 9 Ame vɔ̃ɖi ƒe zɔzɔme nye ŋunyɔ na Afetɔ,
Ke ame si tia dzɔdzɔenyenye yome lae wòlɔ̃na.
10 Amehehe tena ɖe ame si gblẽ mɔ la ɖi dzi,
Ke ame sia ame si lé fu mokaname la aku.
11 Tsiẽƒe kple tsɔtsrɔ̃ƒe gɔ̃ hã le nuvo le Afetɔ ŋkume.
Ʋuu keke wòahayi amegbetɔviwo ƒe dzi nye ge!
12 Fewuɖula melɔ̃a ame si ɖɔnɛ ɖo o.
Media aɖaŋuɖoɖo le nunyalawo gbɔ o.
13 Dzi kpɔdzidzɔ nana mo kɔna,
Ke dzi si le veve sem nana nu tea ame ƒe gbɔgbɔ ŋu.
14 Dzi senugɔme dia sidzedze yome mɔ,
Ke movidzɔdzɔ zu nuɖuɖu na bometsilawo ƒe nu.
15 Ame si le fu kpem la ƒe ŋkekewo katã nye vɔ̃,
Ke ame si ƒe dzi le dzidzɔ kpɔm la tua aglo ɣesiaɣi.
16 Nu ʋɛ ƒe amesinɔnɔ si ŋu Afetɔ vɔvɔ̃ kpe ɖo la
Nyo wu kesinɔnu geɖe si ŋu dzimaɖeɖi kpe ɖo.
17 Ama agba ɖeka si ŋu lɔlɔ̃ kpe ɖo la
Nyo wu nyitsu dami si ŋu fuléle kpe ɖo.
18 Dɔmedzoetɔ dɔa avu,
Ke dzigbɔɖitɔ tsia dzre nu.
19 Kuviatɔ ƒe mɔ le abe ŋùkpɔ ene,
Ke ame dzɔdzɔe ƒe toƒe le abe mɔ tata sɔsɔe ene.
20 Vi nyanu doa dzidzɔ na fofoa,
Ke bometsila doa vlo dadaa.
21 Ame si si tagbɔ mele o la, eya nue bometsitsi vivina,
Ke nugɔmesela léa eƒe mɔ tsɔna tẽe.
22 Afi si adaŋudede mele o la, tameɖoɖowo tsia akpo dzi,
Ke afi si aɖaŋuɖola geɖewo le la, nuwo dzea edzi.
23 Ame ƒe nyaŋuɖoɖo nyuie nana wòkpɔa dzidzɔ,
Eye nya si wogblɔ ɖe egblɔɣi la vivina loo!
24 Agbemɔ ɖo ta dzi na ame si dze nunya,
Ne wòaƒo asa na Tsiẽƒe le anyigba tume.
25 Afetɔ agbã dadala ƒe aƒe gudugudu,
Ke ana ahosi ƒe liƒo nanɔ anyi pɛpɛpɛ.
26 Ame vɔ̃ɖiwo ƒe tame vɔ̃ ɖoɖo nye ŋunyɔ na Afetɔ,
Ke nya dzetowo le dzadzɛ le eŋkume.
27 Ame si le viɖe madzɔmadzɔ yome la dea eya ŋutɔ ƒemetɔwo xaxa me,
Ke ame si tsria zãnuxɔxɔ lae anɔ agbe.
28 Ame dzɔdzɔe ƒe dzi bua tame hafi ɖoa nya ŋu,
Ke nya vlowo dona le ame vɔ̃ɖiwo nu gbẽgbẽgbẽ.
29 Afetɔ le adzɔge ʋĩi tso ame vɔ̃ɖiwo gbɔ,
Ke esea ame dzɔdzɔewo ƒe gbedodoɖa.
30 Ne ŋku dzi kɔ la, dzi kpɔa dzidzɔ;
Eye nya nyui dea agbe ƒuwo me.
31 Ame si sea mokaname si hea agbe vanɛ la,
Akpɔ nɔƒe le nunyalawo dome.
32 Ame si doa toku amehehe doa vlo eƒe agbe,
Ke ame sia ame si xɔa mokaname la, gɔmesese sua esi.
33 Afetɔ vɔvɔ̃ nye amehehe si nana wodzea nunya,
Eye ɖokuibɔbɔ doa ŋgɔ na bubu.

LODODOWO 16
1 Amegbetɔ ɖoa nuwo ɖe eƒe dzi me,
Ke Afetɔ gbɔe ŋuɖoɖo si dona le enu tsona.
 2 Ame ƒe mɔwo katã dzɔ le eya ŋutɔ ŋkume,
Ke Afetɔe dzroa dzimesusuwo me kpɔna.
 3 Tsɔ wò dɔ ɖe sia ɖe de asi na Afetɔ,
Ekema wò ɖoɖowo adze dzi.
 4 Afetɔ wɔ nu sia nu hena eƒe tameɖoɖo me vava,
Ale be ame vɔ̃ɖi gɔ̃ hã natsrɔ̃ le vɔ̃dzɔgbe.
 5 Ame sia ame si dana le eƒe dzi me la nye ŋunyɔ na Afetɔ.
Ka ɖe edzi be, womagbe tohehe na ame sia o.
 6 Lɔlɔ̃ si nu metsina o kple nuteƒewɔwɔ ye wotsɔna léa avu ɖe vodada ta,
Eye Afetɔ vɔvɔ̃e nana ame trɔna ɖa le vɔ̃ ŋu.
 7 Ne ame aɖe ƒe zɔzɔme dze Afetɔ ŋu la,
Enana eƒe futɔwo ke hã nɔa ŋutifafa me kplii.
 8 Nu ʋɛ si ŋu dzɔdzɔenyenye kpe ɖo la
Nyo wu nunɔamesi geɖe si ŋu madzɔmadzɔnyenye kpe ɖo.
 9 Amegbetɔ wɔa ɖoɖo ɖe ale si wòazɔe ŋu le eƒe dzi me,
Ke Afetɔe fiaa mɔ eƒe afɔɖeɖewo.
10 Mawu ƒe afiatsotsoe wòle be wòanɔ fia ƒe nuyiwo dzi;
Mele be eƒe nu natrɔ gbo nya dzɔdzɔe o.
11 Nudzidzenu kple nudanu nyui tso Afetɔ gbɔ;
Nudakpe siwo katã le akplo me hã nye eƒe nuwɔwɔ.
12 Nu vɔ̃ɖi wɔwɔ nanye ŋunyɔnu na fiawo,
Elabena dzɔdzɔenyenyee wotsɔna lia ke fiazikpui.
13 Nuyi siwo dzi nya dzɔdzɔewo le lae dzea fiawo ŋu.
Ame si gblɔa nya siwo le eteƒe lae wolɔ̃na.
14 Fia ƒe dziku le abe ku ƒe dɔla ene;
Ke nunyalae tsia enu.
15 Ne fia kɔ mo ɖe ame ŋu la, agbee wònye;
Eye eƒe ŋudzedzekpɔkpɔ ɖe ame ŋu le abe adametsiɖoɖo ene.
16 Ne nunya su ame si la, aleke mehenyo wu sikae o!
Enyo be ame natia gɔmesese wu klosalo.
17 Nuteƒewɔlawo ƒe mɔ tata ƒoa asa na vɔ̃.
Ame si léa ŋku ɖe eƒe zɔzɔme ŋu la kpɔa eƒe agbe ta.
18 Dada doa ŋgɔ na gbegblẽ,
Eye ɖokuidodoɖedzi doa ŋgɔ na anyidzedze.
19 Enyo be ame nabɔbɔ eɖokui le ame fafawo dome,
Wu be woama aboyonu kple dadalawo.
20 Ame si ɖea nugɔmesese deto fiana le nyawo me la, nu adze edzi nɛ,
Eye dzidzɔtɔe nye ame si ɖoa dzi ɖe Afetɔ ŋu.
21 Ame si si dzi nyanu le la, woayɔe be nugɔmesela,
Eye ame si ƒe numenyawo dzea to la nana woxɔa eƒe nyawo dzi sena.
22 Gɔmesese deto la, agbevudo wònye na ame siwo si wòle,
Ke bometsilawo ŋutɔwo ƒe bometsitsie nye woƒe tohehe.
23 Nunyala ƒe dzi nana eƒe nu dzea nunya,
Eye wònana woxɔa eƒe nyawo dzi sena.
24 Nya dzeto la, anyixe wònye,
Evivina na luʋɔ, eye wòdaa gbe le ƒuwo ŋu.
25 Ame aɖewo ƒe mɔ dzɔ le woawo ŋutɔ ŋkume,
Ke eƒe nuwuwu nye ku ƒe mɔ.
26 Nu si le dɔwɔla dzrom lae nana wòwɔa dɔ sesẽ
Elabena eƒe dɔwuamee ƒoa du ɖe ete.
27 Yakame hea nu vɔ̃ɖi ɖe go;
Eye eƒe nuƒo le abe dzo binu ene.
28 Gedila dea dzre aƒe,
Eye ameŋugblẽla maa xɔlɔ̃wo dome.
29 Ŋutasẽla blea ehavi nu,
Eye wòkplɔnɛ toa mɔ manyomanyo dzi.
30 Emiaa ŋku ɖe ame ne ele vɔ̃ ɖom ɖe tame.
Edaa nuyi ɖe nuyi dzi ta, ke hã ewɔa vɔ̃ dea goe pɛpɛpɛ.
31 Ta ƒowɔ nye atsyɔ̃fiakuku,
Ne wokpɔe le dzɔdzɔenyenye ƒe mɔ dzi.
32 Ame si gbɔa dzi ɖi blewu la nyo wu kalẽtɔ,
Eye ame si léa eƒe dziku nu la nyo wu duwo xɔla.
33 Wodzidzea nu ɖe nu dzi le akɔ,
Ke Afetɔ gbɔe nyametsotso ɖe sia ɖe tsona.

LODODOWO 17
1  Abolo ƒuƒlu sue si ŋu tomefafa kpe ɖo la
Nyo wu aƒe si me kplɔ̃ɖoɖo le ɖaa eye dzre kpe ɖe eŋu.
 2 Dɔla nyanu aɖu amegã ɖe vi ŋukpenanuwɔla dzi;
Eye wòama domenyinu kpli wo abe wo nɔviŋutsue wònye ene.
 3 Sonu li ɖe klosalo ŋu, eye kpo li ɖe sika ŋu,
Ke Afetɔe dzroa dziwo me kpɔna.
 4 Ame vɔ̃ɖi léa to ɖe alakpanyawo ŋu,
Eye aʋatsokala ƒua to anyi ɖe aɖe si gblẽa ame ŋu la ŋu.
 5 Ame sia ame si ɖea alɔme le ame dahe ŋu la doa vlo Ewɔla,
Eye ame sia ame si kpɔa dzidzɔ ɖe ame bubu ƒe gbegblẽ ŋu la matsi tomahe o.
 6 Amegãɖeɖiwo ƒe fiakukue nye wo tɔgbuiyɔviwo,
Eye viwo ƒe atsyɔ̃e nye wo fofowo.
 7 Nya dzɔdzɔe medze bometsila o.
Ke aleke alakpanya nahayi dziɖula dze ge!
 8 Nunana le abe kpe xɔasi ene na enala;
Afi sia afi si wòtrɔ ɖo la, ehea nudzedziname vana nɛ.
 9 Ame si tsɔa dzidada kena la le lɔlɔ̃ dim,
Ke ame si léa nya ɖeka ɖe nu la klãa xɔlɔ̃ veviwo dome.
10 Nyagbename wɔa dɔ ɖe nugɔmesela dzi
Wu bometsila ƒoƒo zi alafa.
11 Ame vɔ̃ɖi tɔ koe nye aglãdzedze,
Eya ta dɔla tagbɔsesẽtɔe wodɔna ɖe eŋu.
12 Enyo be woado go sisiblisi si ŋu woɖe viwo le
Wu be woado go bometsila le eƒe movidzɔdzɔ me.
13 Ame si tsɔa vɔ̃ ɖoa nyui teƒe la,
Vɔ̃ mate ɖa le eƒe aƒe me o.
14 Dzregɔmetoto le abe ale si woŋɔa tɔʋui ene;
Eya ta dzudzɔ hafi wòava zu dzre.
15 Ame si tsoa afia na ame vɔ̃ɖi be etɔ dzɔ, kple ame si bua fɔ ame dzɔdzɔe la,
Ŋunyɔ wo ame evea siaa wonye na Afetɔ.
16 Vi kae wòaɖe ne nu si bometsila ate ŋu atsɔ aƒle nunya le esi
Evɔ dzi nyanu mele esi o?
17 Xɔlɔ̃ vavã lɔ̃a ame ɣeawokatãɣi,
Eye ame nɔvi wònye wodzi ɖe xaxagbe ŋu.
18 Ame si nunya mele tagbɔ na o la naa asi ɖe nya dzi helɔ̃na
Be yeanɔ ŋgɔ na ye havi ada megbe nɛ.
19 Ame si lɔ̃a dzrewɔwɔ la, elɔ̃a dzidada.
Ame sia ame si ɖea eƒe agbomɔnu wòkɔkɔna la, ele eya ŋutɔ ƒe gbegblẽ dim.
20 Ame si ƒe dzi metoa mɔ ɖeka o la, nu madze edzi nɛ o,
Eye ame si beble le nu me na la adze vɔ̃ me.
21 Ame si dzi bometsila la, axa nu;
Eye vi tsibome fofo mekpɔa dzidzɔ o.
22 Dzi kpɔdzidzɔ nye atike nyui,
Ke gbɔgbɔ si dzi nu te ɖo vevie la nana ŋusẽ vɔna le ame ŋu.
23 Ame vɔ̃ɖi xɔa zãnu le adzame,
Be yeaglɔ̃ mɔ na nya dzɔdzɔe.
24 Nunya le nugɔmesela ƒe ŋkuta,
Ke bometsila ƒe ŋkuwo tsana yia keke anyigba ƒe mlɔenu ke.
25 Vi tsibome nyea nuxaxa na fofoa,
Kple dzivee na dadaa.
26 Tohehe na ame dzɔdzɔe menyo o,
Eye bubumewo ƒoƒo mesɔ o.
27 Nunyala kpɔa eƒe nuƒoƒo dzi,
Eye nugɔmesela gbɔa dzi ɖi blewu.
28 Woabu bometsila kura gɔ̃ hã nunyalae nenye be ezi ɖoɖoe,
Eye ame si léa eƒe nu la, woabui nugɔmeselae.

LODODOWO 18
1  Ame sia ame si ɖea eɖokui ɖe aga la le eya ŋutɔ ƒe nudzodzrowo yome tim;
Etsia tre ɖe nunyawo katã ŋu.
 2 Bometsila mekpɔa dzidzɔ ɖe gɔmesese ŋu o;
Ke boŋ nu si le eƒe dzi mee wòɖena ɖe go.
 3 Ne ame vɔ̃ɖi va do ko la, ekema vlododo hã va dona,
Eye ŋukpe kple vlodoamee zɔna.
 4 Ame ƒe numenyawo nye tɔ goglo.
Nunya ƒe vudo nye ta si le dzidzim bɔbɔbɔ.
 5 Menyo be woade ame vɔ̃ɖi dzi
Alo woate ame dzɔdzɔe ɖe anyi le ʋɔnu o.
 6 Bometsila ƒe nyawo dea dzre aƒe,
Eye eya ŋutɔ ƒe nue nana wòdzena na ƒoƒo.
 7 Bometsila ƒe nue nye eƒe gbegblẽ,
Eye eƒe numenyawo nye mɔ̃ na eƒe agbe.
 8 Ameŋugblẽla ƒe nyawo le abe nuɖuɖu vivi ene;
Wominɛ wòyina keke dɔgbo me ke.
 9 Ame sia ame si wɔa kuvia le eƒe dɔ ŋu la,
Nugblẽla nɔvi wònye.
10 Afetɔ ƒe ŋkɔ nye mɔ́ sesẽ.
Afi mae ame dzɔdzɔe la sina yina eye wònɔa dedie.
11 Kesinɔtɔ ƒe kesinɔnuwoe nye eƒe du sesẽ;
Eye wòbunɛ be enye gli sesẽ si akpɔ ye ta.
12 Hafi ame nadze anyi la, eƒe dzi dana gbã,
Eye ɖokuibɔbɔ doa ŋgɔ na bubu.
13 Ne ame aɖe ɖo nya ŋu hafi va se eŋu nyateƒenyawo la,
Bometsitsi kple ŋukpe wònye nɛ.
14 Ame ƒe gbɔgbɔ ate ŋu alée ɖe te le eƒe dɔléɣi,
Ke ame kae ate ŋu anɔ te ɖe gbɔgbɔ si dzi nu te ɖo vevie la nu?
15 Sidzedze sua nugɔmesela ƒe dzi si,
Eye nunyalawo ƒe to dia sidzedze yome mɔ.
16 Nunana ʋua mɔ na nunala;
Enana wodona ɖe ame ŋkutawo ŋkume.
17 Ame gbãtɔ si va gblɔ eƒe nya la dzena ame dzɔdzɔe,
Va se ɖe esime ame evelia va bia gbee.
18 Nudzidze tsia dzre nu,
Eye wòtsoa nya me na hoʋlila sesẽwo.
19 Nɔvi si ŋu woda vo ɖo la tri akɔ wu du sesẽ,
Eye dzre aɖewo le abe mɔ́ sesẽ ƒe gameti ene.
20 Ame ƒe nu ƒe kutsetse ana wòaɖi ƒodo;
Nu siwo do tso eƒe nu me la aɖi ƒo nɛ.
21 Ku kple agbe le aɖe la si me;
Ame siwo lɔ̃a ezazã la aɖu eƒe kutsetse.
22 Ame si kpɔ srɔ̃nyɔnu nyui la, eƒe asi su nu nyui dzi,
Eye amenuveve wònye tso Afetɔ gbɔ nɛ.
23 Ame dahe ɖea kuku ne ele nu ƒom,
Ke kesinɔtɔ daa gbe ɖe ame gbɔ.
24 Xɔlɔ̃ aɖewo li siwo gblẽa wo nɔewo dome,
Gake xɔlɔ̃ aɖewo kuna ɖe ame ŋu wu ame nɔvi gɔ̃ hã.

LODODOWO 19
1  Enyo be woanye ame dahe si ƒe zɔzɔme ŋu fɔɖiɖi mele o
Wu be woanye bometsila si daa alakpa.
 2 Sidzedze ƒe ame si manɔmanɔ menyo o,
Eye ame si tsia klokloklo la wɔa nu vɔ̃.
 3 Ame ŋutɔ ƒe bometsitsie nana eƒe mɔ glɔ̃na,
Ke eƒe dzi nyrana ɖe Afetɔ boŋ ŋu.
 4 Kesinɔnuwo hea xɔlɔ̃ geɖe ɖe ame ŋu,
Ke xɔlɔ̃wo kana le ame dahe ŋu.
 5 Aʋatsoɖasefo matsi tomahe o,
Eye ame si daa alakpa ɣesiaɣi la mado le eme o.
 6 Ame geɖewo dina be yewoƒe nu nadze bubume ŋu,
Eye ame sia ame dzea xɔ̃ ame si naa nu ame.
 7 Ame dahe nɔviwo ke hã léa fui;
Aleke wɔ exɔlɔ̃wo ya maka le eŋu o!
Enɔa wo yome ɖea kuku na wo, gake womedea nu eme nɛ o.
 8 Ame si si nunya su la lɔ̃a eɖokui.
Ame si dea asixɔxɔ gɔmesese ŋu la, nu adze edzi nɛ.
 9 Aʋatsoɖasefo matsi tomahe o,
Eye ame si daa alakpa ɣesiaɣi la atsrɔ̃.
10 Agbeɖuɖu medze bometsila o;
Ke aleke wɔ subɔvi nahayi fia ɖu ge ɖe amegãwo dzi?
11 Ame si sea nu gɔme nyuie la, medoa dziku kabakaba o,
Eye atsyɔ̃ wònye nɛ be wòaŋe aɖaba aƒu agɔdzedze dzi.
12 Fia ƒe dziku le abe dzata ƒe gbetete ene,
Ke eƒe amenuveve le abe zãmu si dza ɖe gbewo dzi ene.
13 Vi tsibome hea gbegblẽ vaa fofoa dzi,
Eye srɔ̃nyɔnu dzrewɔla le abe xɔ si le ɖuɖum ɖaa ene.
14 Aƒe kple kesinɔnuwo nye domenyinu tso vifofowo gbɔ,
Ke srɔ̃nyɔnu nyanu la, Afetɔ gbɔe wòtsona.
15 Kuviawɔwɔ ɖe wònana ame dɔa alɔ̃ tsu,
Eye ame si wɔa alɔgblɔdɔ la, dɔ awui.
16 Ame si léa sedede me ɖe asi la kpɔa eƒe agbe ta;
Ame si meléa ŋku ɖe eƒe mɔwo ŋu o la, aku.
17 Ame si vea ame dahe nu la le nu dom na Afetɔ,
Eye aɖo nu si wòwɔ la teƒe nɛ.
18 He to na viwò, esime mɔkpɔkpɔ gali,
Eye mègana eƒe ku ƒe fɔɖiɖi nanɔ dziwò o.
19 Ame si dzi kuna helĩhelĩ la, axe eŋutife;
Ne èbe yeaxɔ nɛ la, ewɔwɔ dzi ko nànɔ.
20 Se aɖaŋuɖoɖo, eye nàxɔ amehehe,
Ne nàdze nunya le etsɔ si gbɔna me.
21 Nu geɖewoe amegbetɔ ɖona ɖe eƒe dzi me,
Gake Afetɔ ƒe adaŋudedee ava eme.
22 Atsyɔ̃e wònye na ame ne elɔ̃a ame tso dzi me;
Eye enyo be woanye hiãtɔ wu be woanye alakpatɔ.
23 Afetɔ vɔvɔ̃ kplɔa ame yia agbe me;
Ame si vɔ̃nɛ la aɖe dzi ɖi; vɔ̃ aɖeke mava edzi o.
24 Kuviatɔ de asi nuɖugba me;
Etsɔtsɔ de nu me gɔ̃ hã zu dɔ nɛ.
25 Ƒo fewuɖula, ekema ame makpɔnuteƒe adze nunya,
Ka mo na nugɔmesela, ekema sidzedze geɖe asu esi.
26 Ame si sẽa ŋuta le fofoa ŋu, eye wònyaa dadaa ɖa la,
Vi ŋukpenanuwɔla kple vlodoamela wònye.
27 Vinye, ne èdzudzɔ toɖoɖo amehehe la,
Àtra ɖa tso nya siwo me nunya le la gbɔ.
28 Ðasefo vloe ɖea alɔme le nya dzɔdzɔe ŋu,
Eye ame vɔ̃ɖiwo mia nu vɔ̃ɖi gbligbligbli.
29 Tohehe li na fewuɖulawo,
Eye ƒoƒo li na bometsilawo ƒe dzime.

LODODOWO 20
1  Fewuɖulae wain nye,  eye aha muame medzea akɔ anyi o; 
Ame sia ame si wokplɔ trae la, menyaa nu o.
 2 Ŋɔdzi si le fia ŋu la le abe dzata ƒe gbetete ene;
Ame si le dziku dom nɛ la dea eya ŋutɔ ƒe agbe afɔku me.
 3 Bubu wònye na ame be wòaƒo asa na dzre,
Ke bometsila ɖe sia ɖe ƒoa eɖokui ɖe eme.
 4 Kuviatɔ medea agble le vuvɔŋɔli o,
Eya ta abia nu le nuŋeɣi, esi naneke mele esi o ta.
 5 Ame ƒe dzimesusu le abe tɔ goglo ene,
Ke nugɔmesela dunɛ.
 6 Ame geɖewo gblɔna be yewoƒe lɔlɔ̃ nu metsina o,
Ke afi kae woakpɔ nuteƒewɔla le?
 7 Ame dzɔdzɔe zɔna le eƒe fɔmaɖimaɖi me.
Dzidzɔtɔwoe emegbeviwo anye.
 8 Ne fia bɔbɔ nɔ ʋɔnudrɔ̃zikpui dzi la,
Eƒe ŋkuwo dea vovo vɔ̃ɖinyenye ɖe sia ɖe ƒomevi me.
 9 Ame kae ate ŋu agblɔ be: “Mena nye dzi ŋu dza;
Ŋunye kɔ tso nye nu vɔ̃ me”?
10 Nudakpe amebatɔ kple nudzidzenu ameflutɔ la,
Ŋunyɔ wo kple evea siaa nye na Afetɔ.
11 Ðevi sue gɔ̃ hã ƒe nuwɔnawoe wotsɔna dzea sii
Be eƒe agbenɔnɔ dza eye wòsɔ.
12 To senu kple ŋku kpɔnu la,
Afetɔe wɔ wo kple evea siaa.
13 Mègana alɔ̃ tsu dɔdɔ navivi nuwò ne nàda ahe o.
Nɔ ŋu, ekema àkpɔ abolo aɖu aɖi ƒo.
14 Nuƒlela be: “Nua menyo o, nua menyo o!”
Ke ne edzo la, eva nɔa eɖokui kafum.
15 Sika li, eye adzagba geɖewo hã li,
Ke aɖe si dzi sidzedze le la, nu xɔasie wònye.
16 Xɔ ame si da megbe na ame tutɔ la ƒe awu le esi;
Eye ne dutanyɔnue wòda megbe na la, ekema xɔ awɔbanu le esi.
17 Abolo si wokpɔ to amefuflu dzi la vivia ame nu,
Ke emegbe kpekui koe ayɔ nu me na amea.
18 Adaŋudede nana ɖoɖowo dzea edzi,
Eye tsɔ mɔfiame nyuitɔ wɔ wò aʋae.
19 Ameŋugblẽla nɔa tsatsam nɔa go ʋum nya ɣaɣla;
Mègade ha kple ame si lɔ̃a ameŋunyagbɔgblɔ o.
20 Ame sia ame si doa ɖiŋu na fofoa kple dadaa la,
Eƒe akaɖi atsi le viviti tsiɖitsiɖi me.
21 Domenyinu si wokpɔ to ŋukeklẽ dzi le gɔmedzedzea la,
Yayra manɔ eme le nuwuwua o.
22 Mègagblɔ be, “Maɖo vɔ̃ teƒe kokoko!” o.
Kpɔ mɔ na Afetɔ, ekema aɖe wò.
23 Nudakpe amebatɔ nye ŋunyɔ na Afetɔ,
Eye nudanu ameflutɔ hã menyo o.
24 Afetɔe fiaa afɔɖoƒe ame.
Ke aleke ame awɔ ase eya ŋutɔ ƒe mɔ gɔme?
25 Mɔ̃ wònye na amegbetɔ ne etsɔ dzitsitsi gblɔ be, “Nu kɔkɔe wònye!”
Eye emegbe hafi wòayi adzɔgbe si wòɖe la ŋu bu ge.
26 Fia nyanu gbɔa ame vɔ̃ɖiwo abe lu ene,
Eye wòhea luƒotasiaɖam toa wo dzi.
27 Afetɔ ƒe akaɖie amegbetɔ ƒe gbɔgbɔ nye,
Edzroa ame ƒe ememe ke kpɔna.
28 Lɔlɔ̃ vavã kple nuteƒewɔwɔe kpɔa fia ta;
Eye lɔlɔ̃ vavãe wòtsɔna léa eƒe fiazikpui ɖe te.
29 Ðekakpuiwo ƒe atsyɔ̃e nye woƒe ŋusẽ,
Eye amegãɖeɖiwo ƒe bubue nye woƒe ta ƒowɔ.
30 Dodro kple abi floa vɔ̃ ɖa le ame ŋu,
Eye ƒoƒo klɔa ame ƒe ememe ke.

LODODOWO 21
1  Fia ƒe dzi le abe tɔʋu ene le Afetɔ si me.
Afi sia afi si Wòlɔ̃ lae wòtrɔnɛ ɖo.
 2 Ame ƒe mɔwo katã dzɔ le eya ŋutɔ ŋkume,
Ke Afetɔe dzroa dziwo me kpɔna.
 3 Nu dzɔdzɔe kple nu si le eteƒe wɔwɔ
Dzea Afetɔ ŋu wu vɔsa.
 4 Dadaŋkuwo kple dzi si vu gblotoo la
Nye ame vɔ̃ɖiwo ƒe akaɖi, evɔ wòhenye nu vɔ̃.
 5 Veviedola ƒe ɖoɖowo hea dzidzedzekpɔkpɔ vanɛ,
Ke ame sia ame si tsia klokloklo la, hiã atui.
 6 Kesinɔnu si wotsɔ alakpaɖe kpɔ la,
Le abe ƒuƒu dzro si nu yina kaba ene, ku ƒe mɔ̃ wònye.
 7 Ame vɔ̃ɖiwo ƒe ŋutasẽnuwɔwɔe akplɔ wo ayi,
Elabena wogbe nu si le eteƒe la wɔwɔ.
 8 Fɔɖila ƒe mɔwo le gɔdɔ̃gɔdɔ̃,
Ke fɔmaɖila ƒe nuwɔnawo toa mɔ ɖeka.
 9 Enyo be woanɔ dzogoe dzi le xɔ ta
Wu be woanɔ aƒe ɖeka me kple srɔ̃nyɔnu dzrewɔla.
10 Vɔ̃wɔwɔ le ame vɔ̃ɖi dzrom vevie;
Mekpɔa nublanui na ehavi o.
11 Ne wohe to na fewuɖula la, ame makpɔnuteƒe dzea nunya,
Eye ne wokpe ɖe nunyala ŋu wòse nuwo gɔme nyuie la, sidzedze sua esi.
12 Dzɔdzɔetɔ la dzea si ame vɔ̃ɖiwo ƒe aƒe;
Eye wòkplɔa ame vɔ̃ɖiwo ƒua gbegblẽ me.
13 Ame sia ame si doa toku ame dahe ƒe ɣlidodo la,
Eya ŋutɔ hã ado ɣli, ke womatɔ nɛ o.
14 Adzamenunana tsia dziku nu,
Eye zãnu si wona le bebeme la tsia dɔmedzoe nu.
15 Dzidzɔe wònye na ame dzɔdzɔe be yeawɔ nu si le eteƒe,
Ke ame siwo tsɔ nu vɔ̃ɖi wɔwɔ ɖo dɔe ya la, ŋɔdzie wònye na wo.
16 Ame si tra tso gɔmesese ƒe mɔ dzi la,
Agbɔ ɖe eme le ame kuku siwo ŋu wɔna vɔ le la ƒe ha me.
17 Ame si lɔ̃a agbeɖuɖu la, hiã atui;
Ame si lɔ̃a wain kple ami la makpɔ ho o.
18 Ame vɔ̃ɖi nye avulénu ɖe ame dzɔdzɔe nu,
Eye ame mawɔnuteƒe ɖe ame si wɔa nu si le eteƒe nu.
19 Enyo be woanɔ gbedadaƒo
Wu be woanɔ srɔ̃nyɔnu dzrewɔla dzikudola gbɔ.
20 Nu xɔasiwo kple ami nɔa nunyala ƒe aƒe me,
Ke bometsila ya agblẽ eƒe nuwo dome.
21 Ame sia ame si tia dzɔdzɔenyenye kple lɔlɔ̃ vavã yome la,
Eƒe asi atu agbe, dzɔdzɔenyenye kple bubu.
22 Nunyala ate ŋu adze kalẽtɔwo ƒe du dzi
Ahagblẽ woƒe ŋusẽ si ŋu woɖoa dzi ɖo la dome.
23 Ame si kpɔa eƒe nu kple eƒe aɖe dzi la
Kpɔa eɖokui ta tso xaxa me.
24 Dadala ɖokuiŋudzela si ƒoa adegbe lae woyɔna be
Ŋutsu dadala si wɔa nu ŋumaɖɔɖotɔe.
25 Kuviatɔ ƒe nudzodzroe wunɛ,
Elabena eƒe asi gbe dɔwɔwɔ.
26 Nu meɖia ƒo nɛ gbe aɖeke gbe o,
Ke ame dzɔdzɔe ya naa nu, eye memiaa asi ɖe nu dzi o.
27 Ame vɔ̃ɖi ƒe vɔsa nye ŋunyɔ;
Ʋuu keke wòahanye be etsɔe vɛ kple susu vɔ̃ɖi!
28 Aʋatsoɖasefo atsrɔ̃,
Ke ame si kea to nyuie la aɖi ɖase dzidzedzetɔe.
29 Ame vɔ̃ɖi ɖoa mo kplala,
Ke nu dzɔdzɔe wɔla ƒe mɔe ali ke.
30 Nunya alo gɔmesese alo tameɖoɖo aɖeke mate ŋu atsi tre ɖe Afetɔ ŋu o.
31 Woblaa akpa na sɔ ɖe aʋawɔgbe ŋu,
Ke Afetɔ si mee xɔname le.

LODODOWO 22
1  Ŋkɔ nyui tiatia nyo wu kesinɔnu geɖe;
Eye bubunɔameŋu nyo wu klosalo kple sika.
 2 Nu ɖeka si me kesinɔtɔ kple hiãtɔ sɔ lee nye be:
Afetɔe nye wo katã wɔla.
 3 Aɖaŋudzela kpɔa afɔku gbɔna eye wòɣlaa eɖokui,
Ke ame makpɔnuteƒe yina ɖadea ta eme, eye wòkpɔa emetsonua.
 4 Ðokuibɔbɔ kple Afetɔ vɔvɔ̃
Hea kesinɔnu, bubu kple agbe vanɛ.
 5 Ŋù kple mɔ̃ le mɔ dzi na ame si ƒe mɔ le gɔdɔ̃gɔdɔ̃,
Ke ame sia ame si kpɔa eƒe agbe ta la, nɔa adzɔge ʋĩi tso wo gbɔ.
 6 Mla ɖevi ɖe mɔ si wòato la ŋu;
Ne eva tsi hã mate ɖa le edzi o.
 7 Kesinɔtɔ ɖua amegã ɖe ame dahe dzi,
Eye ame si doa nu le ame si la zua kluvi na ame si si wòdo nua le.
 8 Ame sia ame si ƒãa nu madzɔmadzɔ la, axa gbegblẽ,
Eye eƒe dɔmedzoe ƒe ameƒoti la nu ayi.
 9 Woayra ame si nyoa dɔme na ame,
Elabena emaa eƒe nuɖuɖu kple ame dahewo.
10 Nya fewuɖula do goe,
Ekema dzre ake;
Eye nyahehe kple dzudzu hã nu atso.
11 Ame si lɔ̃a dzi dzadzɛ eye eƒe numenyawo dzea to la,
Eyae fia adze xɔlɔ̃e.
12 Afetɔ ƒe ŋkuwo kpɔa nunya ta,
Ke etrɔa ame mawɔnuteƒe ƒe nyawo bua anyi.
13 Kuviatɔ be: “Dzata le xexe!
Ava vuvum le ablɔ me!”
14 Nyɔnu dzeha ƒe nu la, ʋe globo wònye.
Ame si Afetɔ bu fɔe la, eyae age dze eme.
15 Bometsitsi bla ɖe ɖevi ƒe dzi ŋu,
Ke ameƒotie aɖee ɖa le eŋu.
16 Ame si tafaa ame dahe be nu geɖe nasu ye si
Kple ame si naa nu kesinɔtɔ la,
Hiã atui.
17 Ƒu to anyi, ne nàse nunyalawo ƒe nyawo,
Ne wò dzi natrɔ ɖe nye sidzedze ŋu,
18 Elabena enyo be nàdzra wo ɖo ɖe ɖokuiwò me,
Ne wo katã nanɔ nuyi dzi na wò ɖaa.
19 Wò la, esi medi be nàɖo ŋu ɖe Afetɔ ŋu tae
Mele nu fiam wò egbe sia ɖo.
20 Ðe nyemeŋlɔ nya
Siwo me aɖaŋuɖoɖo kple sidzedze le la na wò va yi,
21 Ne mafia nya siwo le eteƒe kple nya siwo ŋu kakaɖedzi le la wò,
Ne nàtsɔ ŋuɖoɖo nyuitɔ ayi na ame si dɔ wò la oa?
22 Mègada adzo ame dahe le eƒe ahedada ta o,
Eye mègate ame tsɛ ɖe to le dugbo la nu o,
23 Elabena Afetɔ ŋutɔ axɔ woƒe nya ɖe akɔ,
Eye wòaɖe ame siwo daa adzo wo la ƒe agbe ɖa.
24 Mègade ha kple dɔmedzoetɔ o,
Eye mègado ka kple dzikutɔ o,
25 Ne nàva srɔ̃ eƒe mɔwo,
Eye wòazu mɔ̃ aɖe wò o.
26 Mèganɔ ame siwo naa asi ame tsɔ doa ŋugbe
Be yewoada megbe na fenyilawo la dome o.
27 Ne mèkpɔ naneke tsɔ xe fea o la,
Ðeko woava ɖe aba le tewò!
28 Mègatrɔ blemaliƒo
Siwo tɔgbuiwòwo do tso blema ke la o.
29 Èkpɔ ame si bi ɖe eƒe dɔ ŋua?
Fiawo ŋkumee wòado ɖo;
Mado ɖe ame tsɛwo ŋkume o.

LODODOWO 23
1  Ne èbɔbɔ nɔ anyi be yeaɖu nu kple fia la,
Lé ŋku ɖe nu si wotsɔ ɖo akɔwòme la ŋu nyuie;
 2 Ne nu tsu ɖulae nènye la,
Ekema ɖo hɛ wò vehlo dzi.
 3 Mègana eƒe nuɖuɖu viviawo nadzro wò o,
Elabena beblenuɖuɖue wònye.
 4 Mèganɔ hloloe tsom atraɖii be yeakpɔ kesinɔnu o.
Dze nunya, eye nàdzudzɔ esia.
 5 Kaka wò ŋku nakpɔe la, enu yi xoxo,
Elabena ato aʋala abe hɔ̃ ene adzo ayi dzi ʋĩi.
 6 Mègaɖu ŋɔkula ƒe nu o;
Mègana eƒe nuɖuɖu viviawo nadzro wò o.
 7 Elabena ele eŋuti kɔnta bum.
Agblɔ na wò be, “Ðu nu nàno nu!” ke metso dzi me nɛ o.
 8 Nu si nèɖu la, àdzɔe akɔ ɖi,
Eye wò kafukafunyawo hã azu dzodzro.
 9 Mègaƒo nu ɖe bometsila ƒe to me o,
Elabe ɖeko wòado vlo wò nya siwo me nunya le la.
10 Mègatrɔ blemaliƒowo o,
Eye mèganɔ tsyɔ̃evi ƒe anyigba kam o.
11 Elabena wo Taʋlila tri akɔ;
Ahe nya kpli wò ɖe wo nu.
12 Trɔ wò dzi ɖe amehehe ŋu,
Kple wò to ɖe sidzedze ƒe nyawo ŋu.
13 Mègagbe tohehe na ŋutsuvi o.
Ne èƒoe kple ati la, maku o.
14 Ƒoe kple ati,
Ne nàɖee tso Tsiẽƒe si me.
15 Vinye, ne wò dzi dze nunya la,
Ekema nye hã nye dzi akpɔ dzidzɔ.
16 Ne wò nuyiwo gblɔ nya siwo le eteƒe la,
Ekema matso aseye le ememe ke.
17 Wò dzi megaʋã ŋu nu vɔ̃ wɔlawo o,
Ke boŋ vɔ̃ Afetɔ ɣeawokatãɣi,
18 Elabena eya ko hafi etsɔme anɔ asiwò,
Eye wò mɔkpɔkpɔ nu mayi o.
19 Vinye, see, ne nàdze nunya,
Eye na wò dzi nanɔ mɔ dzɔdzɔe la dzi.
20 Mèganɔ aha tsu nolawo
Kple lã tsu ɖulawo dome o,
21 Elabena ahamula kple nu tsu ɖula la, ada ahe,
Eye akɔlɔ̃edɔdɔ ɖe wònana wotsia ɖovu me.
22 Ðo to fofowò si dzi wò,
Eye mègado vlo dawò le esi wòku nyagã ta o.
23 Ƒle nyateƒe, eye mègatsɔe dzra gbeɖe o,
Nenema kee nye nunya, amehehe kple gɔmesese hã.
24 Ame dzɔdzɔe fofo atso aseye godoo;
Ame sia ame si dzi vi nyanu hã akpɔ dzidzɔ ɖe eŋu.
25 Fofowò kple dawò akpɔ dzidzɔ,
Eye dawò atso aseye.
26 Vinye, tsɔ wò dzi nam,
Eye wò ŋkuwo nekpɔ dzidzɔ ɖe nye mɔwo ŋu.
27 Elabena gbolo la, ʋe globo wònye,
Eye nyɔnu ahasitɔ la, vudo xaxɛ wònye.
28 Edea xa ɖi abe adzodala ene;
Eye wònana ŋutsu mawɔnuteƒewo ƒe xexlẽme dzina ɖe edzi.
29 Ame kae ɖoa xaxa me? Ame kae dea vovo ge do kpoe?
Ame kae nɔa dzre dzi? Ame kae faa konyi?
Ame kae xɔa abi yakatsyɔ? Ame ka ƒe ŋkuwo dzie wɔa dɔ̃ɔ?
30 Ame siwo tsia wain te didi lae;
Ame siwo yina be yewoadi wain si wotɔtɔ lae.
31 Mègaɖe ŋku ɖe wain, ale si wòbiã,
Ale si wòle dzo dam le kplu me, kple ale si wominɛ wɔli la o,
32 Mlɔeba la, eɖua ame abe da ene,
Eye wòsia ame abe dakpui ƒe aɖi ene.
33 Wò ŋkuwo akpɔ nu tutɔwo,
Eye wò dzi agblɔ nya vlowo.
34 Ànɔ abe ame si mlɔ atsiaƒu titina ene,
Abe ame si mlɔ abalati tame ene.
35 Àgblɔ be: “Woƒom, gake nyemesee o;
Wotu kɔm, gake nyemenya o.
Ɣekaɣi gɔ̃ manyɔ?
Magano ɖe akpee.”

LODODOWO 24
1  Mègaʋã ŋu ame vɔ̃ɖiwo o,
Eye megadzro wò be nàde ha kpli wo o,
 2 Elabena woƒe dzi bua ŋutasẽnuwɔwɔ ŋu,
Eye woƒe nuyiwo gblɔa vɔ̃ ko.
 3 Nunyae wotsɔna tua xɔe,
Eye nugɔmesesee wotsɔna lia kee.
 4 Sidzedzee wotsɔna dea
Kesinɔnu veviwo kple nu nyoameŋu vovovowo xɔwo me taŋtaŋ.
 5 Ame si si nunya le la, ŋusẽ le esi,
Eye sidzedzee wotsɔna dzia ŋusẽ ɖe edzii.
 6 Mɔfiame nyuitɔe nàtsɔ awɔ wò aʋae,
Eye aɖaŋuɖola geɖewo dzie wotona kpɔa dziɖuɖu.
 7 Nunya vavãtɔ mate ŋu asu bometsila si o;
Nya aɖeke mele esi wòagblɔ le dugbo la nu o.
 8 Ame si ɖoa vɔ̃ be yeawɔ la,
Woayɔe be susu vɔ̃ ɖolawo ƒe amegã.
 9 Bometsinuwo ɖoɖo ɖe tame nye nu vɔ̃,
Eye fewuɖula nye ŋunyɔ na amewo.
10 Ne dzi ɖe le ƒowò le xaxagbe la,
Ekema wò ŋusẽ dzi aɖe kpɔtɔ.
11 Xɔ na ame siwo wokplɔ yina wuwu ge,
Eye ɖe ame siwo le ya mum sagasaga ɖo ta wo wuƒe la.
12 Ne ègblɔ be, “Míenya naneke tso esia ŋu o” la,
Ðe Ame si dzroa dziwo me kpɔna la ŋutɔ madze sii oa?
Ɛ̃, Eya ame si ƒe ŋku le ŋuwò la anyae,
Eye wòaɖo eteƒe na ame sia ame ɖe eƒe nuwɔna nu.
13 Vinye, no anyitsi, elabena enyo;
Anyitsi si tso anyixe me vivina le veme.
14 Nyae be nenema kee nunya hã nyo na wò.
Ne èke ɖe eŋu la, ekema eme anyo na wò le etsɔme,
Eye wò mɔkpɔkpɔ nu mayi o.
15 Mègaɖo tame vɔ̃ ade xa ɖe ame dzɔdzɔe ƒe aƒe ŋu o;
Mègagblẽ eƒe gbɔɖemeƒe o.
16 Elabena ne ame dzɔdzɔe dze anyi zi adre hã la, agafɔ,
Ke ame vɔ̃ɖiwo ya la, vɔ̃ ahe wo aƒu anyi.
17 Ne wò futɔ dze anyi la, mègakpɔ dzidzɔ o,
Eye ne ekli nu la, wò dzi megatso aseye o;
18 Ne menye nenema o la, Afetɔ akpɔ esia eye manyo eŋu o,
Eye wòadzudzɔ dzikudodo ɖe eŋu.
19 Dzi megaku wò le nu vlo wɔlawo ta o;
Mègaʋã ŋu ame vɔ̃ɖiwo o,
20 Elabena etsɔme aɖeke meli na ame vlowo o;
Ame vɔ̃ɖiwo ƒe akaɖi atsi.
21 Vinye, vɔ̃ Afetɔ kple fia la.
Mègade ha kple tsitretsiɖeŋulawo o,
22 Elabena gbegblẽ ava wo dzi kpoyi.
Eye ame kae nya vɔ̃ si wo kple evea ahe ava wo dzi?
23 Nya siawo hã tso nunyala gbɔ:
Ameŋkumekpɔkpɔ le ʋɔnudɔdrɔ̃ me menyo o.
24 Ame si gblɔna na ame vɔ̃ɖi be, “Tɔwò dzɔ” la,
Amewo ado ɖiŋu nɛ, eye dukɔwo ahe nya ɖe eŋu vevie.
25 Ke ame siwo kaa mo nɛ la, eme anyo na wo,
Eye woatsɔ nu nyuiwo ayra wo.
26 Ame si ɖoa nya ŋu ale si tututu wòle la, woagbugbɔ nu nɛ.
27 Wɔ wò gotadɔwo, eye nàna nu sia nu nasɔ gbe le wò agble me;
Eyome nàtu wò xɔ.
28 Mèganye ɖasefo ɖe hawòvi ŋu dzodzro o.
Mègatsɔ wò nuyiwo ble amewo o.
29 Mègagblɔ be: “Ale si tututu wòwɔm la, nenemae mawɔe;
Maɖo eteƒe nɛ ɖe eƒe nuwɔna nu” o.
30 Meto kuviatɔ ƒe agble ŋu,
Ame si nunya mele tagbɔ na o ƒe waingble ŋu yi.
31 Mekpɔ be gbe to ɖe eme fũu;
Dza xɔ eme keŋ,
Eye eƒe glikpɔ la mu.
32 Melé ŋku ɖe esia ŋu, eye metsɔe de dzi me;
Mekpɔe, eye nu si mesrɔ̃ tso emee nye be:
33 Gadɔ alɔ̃ vie, gadɔ akɔlɔ̃e sẽe,
Gade asi asitɛ me nàgbɔ ɖe eme vie,
34 Ekema ahedada aɖi ɖe wò abe fiafi ene,
Eye hiã aƒo ɖe dziwò kpoyi abe adzoblasu ene.

LODODOWO 25
1  Lododo siawo hã nye Salomo tɔ, eye Yuda-fia Hizkiya ƒe amewoe ŋlɔ wo ɖi:
 2 Enye bubu na Mawu be wòaɣla nya,
Eye fiawo ƒe bubue wònye be woaku nya me.
 3 Ale si dziƒowo kɔ, eye anyigba gogloe la,
Nenemae fiawo ƒe dzi me dzodzro meli o.
 4 Ne woɖe klosalomĩ ɖa le klosalo ŋu la,
Ekema edzana keŋkeŋ.
 5 Ðe ame vɔ̃ɖi ɖa le fia ŋkume,
Ekema eƒe fiazikpui ali ke le dzɔdzɔenyenye me.
 6 Mègadi bubu na ɖokuiwò le fia ŋkume o,
Eye mègaʋli nɔƒe le amegãwo dome o,
 7 Elabena enyo be woagblɔ na wò be: “Va nɔ kɔkɔƒe afii,”
Wu be woabɔbɔ wò ɖe anyi le bubume aɖe ŋkume.
 8 Mègatsi klokloklo nàtsɔ nya ayi ʋɔnui o,
Elabena nu kae nàwɔ emegbe ne hawòvi do ŋukpe wò?
 9 Kpɔ wò kple hawòvi dome nya gbɔ,
Ke mègaʋu go nya ɣaɣla o,
10 Ne ame si see la nagado ŋukpe wò,
Eye nàkaka alakpanya si màte ŋu atrɔ o la o.
11 Nya si wogblɔ ɖe egblɔɣi la
Le abe sikatɔtɔŋuti le klosalogba me ene.
12 Ame si gbea nya na ame le nunya me la
Le abe sikatogɛ kple atsyɔ̃ɖonu si wotsɔ sika nyuitɔ wɔ la ene na to senu.
13 Ale si nunono fafɛ le le nuŋeɣi la,
Nenemae dɔla wɔnuteƒe le na ame siwo dɔe,
Elabena efaa dzi na eƒe aƒetɔ.
14 Ame si ƒoa adegbe be yeana nu gake menanae gbeɖe o la
Le abe alilikpo dodo kple yaƒoƒo si medzaa tsi o la ene.
15 Dzigbɔɖie wotsɔ xɔa nu le fia si,
Eye aɖe fafɛ tea ŋu gbãa ƒu.
16 Ne èkpɔ anyitsi la, noe ɖe wò dɔ ŋu,
Elabena ne ènoe fũu akpa la, àtrui.
17 Mèganɔ afɔɖi ƒom hawòvi ƒe me o,
Ne menye nenema o la, wò nu ava ti kɔ nɛ wòalé fu wò.
18 Ame si ɖia aʋatsoɖase le ehavi ŋu la
Le abe kpo kple yi kpakple aŋutrɔ ɖaɖɛ ene.
19 Dziɖoɖo ɖe ame mawɔnuteƒe ŋu le xaxagbe
Le abe aɖu ŋeŋe kple afɔ si tu la ene.
20 Ame si le ha dzim na dzi xanu la,
Le abe ame si ɖe avɔ ɖi le vuvɔwɔgbe,
Alo aha tsitsi si wokɔ ɖe adzalẽɖaɖi dzi ene.
21 Ne dɔ le wò futɔ wum la, na aboloe wòaɖu;
Eye ne tsikɔ le ewum la, na tsii wòano.
22 Elabena esia anye dzoka xɔxɔ nu ƒoƒoƒu ɖe eƒe ta dzi,
Eye Afetɔ aɖo eteƒe na wò.
23 Dzieheya kplɔa tsidzadza vanɛ,
Eye aɖe si gblɔa amenya dea adã mo na ame.
24 Enyo be woanɔ dzogoe dzi le xɔ ta,
Wu be woanɔ aƒe ɖeka me kple srɔ̃nyɔnu dzrewɔla.
25 Nya nyui xɔxɔ tso duta
Le abe tsi fafɛ na luʋɔ si ŋu ɖeɖi te la ene.
26 Ame dzɔdzɔe si va wɔ ɖeka kple ame vɔ̃ɖi la
Le abe tsidzɔƒe si blu kple vudo si gblẽ ene.
27 Anyitsi nono fũu akpa menyo o,
Eye menye nu dzeame wònye be ame nadi bubu na eɖokui o.
28 Ame si meɖua eƒe dziku dzi o la
Le abe du si ŋu wogbã gli le wòtsi nuvo ene.

LODODOWO 26
1  Abe ale si sno le le dzomeŋɔli kple tsidzadza le le nuŋeɣi ene la,
Nenemae bubu medze bometsila o.
 2 Ale si xevi medzona dzodzro o, eye sagbadre mesaa agba dzodzro o la,
Nenemae fiƒode hã mevana dzodzro o.
 3 Sɔƒoka li na sɔ, numega li na tedzi,
Eye ameƒoti li na bometsila ƒe dzime.
 4 Mègaɖo nya ŋu na bometsila ɖe eƒe movidzɔdzɔ nu
Ne wò hã nàva nɔ abe eya ene o.
 5 Ðo nya ŋu na bometsila ɖe eƒe movidzɔdzɔ nu
Ne wòagabu eɖokui nunyalae o.
 6 Ame si de du asi na bometsila
Le abe ame si lã eya ŋutɔ ƒe afɔ hewɔ nu vevi eɖokui ene.
 7 Ale si atatututɔ ƒe afɔ le la,
Nenemae lododo nɔna le bometsila ƒe nu me.
 8 Ne wode bubu bometsila ŋu la,
Ele abe kpee wobla ɖe akafo me ene.
 9 Ale si ŋù le le ahamula si me la,
Nenemae lododo le le bometsila ƒe nu me.
10 Ame si haya bometsila alo ame si tso eme va yina la,
Le abe aŋutrɔdala si le nu sia nu ko dam la ene.
11 Ale si avu trɔna ɖe eƒe xeɖeɖe ŋui la,
Nenemae bometsila gbugbɔa eƒe bometsinu wɔnae.
12 Èkpɔ ame si le eɖokui bum nunyalaea?
Mɔkpɔkpɔ li na bometsila wui.
13 Kuviatɔ be: “Dzata le mɔ dzi,
Dzata le ablɔ me!”
14 Ale si ʋɔtru trona le eƒe megbega mee la,
Nenemae kuviatɔ nɔa tɔtrɔm le eƒe aba dzii.
15 Kuviatɔ de asi nuɖugba me,
Ke ale si wòatsɔe ade nu mee gɔ̃ hã zu dɔ nɛ.
16 Kuviatɔ bua eɖokui nunyalae
Wu ame adre siwo ƒe nyaŋuɖoɖo me susu le.
17 Ame si tso eme va yina, eye dzi kui ɖe dzre si metsɔ egbɔ o ŋu la,
Le abe ame si lé to na avu ene.
18 Ale si aɖaʋatɔ daa nu sia nu si dea abi ame ŋu kpakple aŋutrɔ hewua amee la,
19 Nenemae ame si flua ehavi hegblɔna be, “Fefem ko mele!” la le.
20 Ne nake meli o la, dzo tsina,
Eye ne ameŋugblẽla meli o la, dzre kena.
21 Ale si aka nana dzo xɔna, eye nake nana dzo bina la,
Nenemae ŋutsu dzrewɔla ƒlɔa dzo ɖe dzre tee.
22 Ameŋugblẽla ƒe nyawo le abe nuɖuɖu vivi ene;
Wominɛ wòyina keke dɔgbo me ke.
23 Nya ŋɔnɔe si tso dzi vɔ̃ɖi me la,
Le abe sonu gaglɛ si ŋu wofa klosalo ɖo ene.
24 Fuléla tsɔa eƒe numenyawo ɣlana ame si ƒomevi wònye,
Evɔ beble sɔŋ ye ɣla ɖe dzi me nɛ.
25 Togbɔ be eƒe nyawo vivina hã la, mègaxɔ edzi se o,
Elabena ŋunyɔnu adre le eƒe dzi me.
26 Ne etsɔ beble tsyɔ eƒe fuléle dzi hã,
Woaklo nu le eƒe vɔɖivɔ̃ɖi dzi le amewo dome.
27 Ame si le ʋe ɖem la, eya ŋutɔ age adze eme,
Eye ame si le kpe mlim la, kpe la atrɔ ava dze eya ŋutɔ dzi.
28 Alakpaɖe léa fu ame si dome wògblẽ,
Eye nuyi si ɖɔa kesekuku na ame hea gbegblẽ vanɛ.

LODODOWO  27
1  Mègaƒo adegbe le etsɔ si gbɔna ŋu o,
Elabena mènya nu si ŋkeke la ahe vɛ o.
 2 Na ame bubu nekafu wò, ke menye wò ŋutɔ wò nu o;
Ame bubuwo nekafu wò, ke menye wò ŋutɔ wò nuyiwo o.
 3 Kpe la, nu kpekpee, eye ke la, agba kpekpee,
Ke bometsila ƒe dzikudoname kpena wu evea siaa.
 4 Dziku sẽa ŋuta, eye dɔmedzoe nyrana,
Ke ame kae ate ŋu anɔ te ɖe ŋuʋaʋã nu?
 5 Mokaname le gaglãgbe nyo wu amelɔlɔ̃ le adzame.
 6 Xɔlɔ̃ ƒe abideameŋu nye nuteƒewɔwɔ,
Gake futɔ ya ƒe nugbugbɔname sɔa gbɔ.
 7 Ƒoɖilae doa vlo anyitsi,
Ke dɔwuitɔ la, nu veve gɔ̃ hã vivina nɛ.
 8 Ame si tra tso eƒe aƒe gbɔ la
Le ko abe xevi si tra tso eƒe atɔ gbɔ ene.
 9 Ale si ami kple lifi doa dzidzɔ na dzii la,
Nenemae aɖaŋuɖoɖo si tso dzi me nana wozua xɔlɔ̃ veviwoe.
10 Mègagblẽ xɔ̃wò alo fofowò xɔlɔ̃ ɖi o,
Eye mègayi nɔviwò ƒe me le gbe si gbe afɔku dzɔ ɖe dziwò o;
Aƒelika si tsɔ ame gbɔ la nyo wu ame nɔvi si le adzɔge ʋĩi.
11 Vinye, dze nunya, be nàdo dzidzɔ na nye dzi,
Ne mate ŋu aɖo nya ŋu na ame si le alɔme ɖem le ŋunye.
12 Aɖaŋudzela kpɔa afɔku gbɔna eye wòɣlaa eɖokui,
Ke ame makpɔnuteƒe yina ɖadea ta eme, eye wòkpɔa emetsonua.
13 Xɔ ame si da megbe na ame tutɔ la ƒe awu le esi;
Eye ne dutanyɔnue wòda megbe na la, ekema xɔ awɔbanu le esi.
14 Ame si le ehavi yram ŋdi kanya kple ɣli la,
Woabui be enye ɖiŋudodo.
15 Srɔ̃nyɔnu dzrewɔla le abe xɔ si le ɖuɖum atraɖii le tsidzagbe ene.
16 Ame si ate ŋu aɖo asi edzi la, ate ŋu aɖo asi yaƒoƒo dzi,
Eye wòate ŋu aku ami ɖe eƒe nuɖusi.
17 Ale si wotsɔa ga nyrea gae la,
Nenemae ame nyrea nɔviae.
18 Ame si léa be na gboti la, eyae aɖu eƒe kutsetse,
Eye ame si léa be na eƒe aƒetɔ la, woade bubu eŋu.
19 Ale si ame ƒe mo dzena le tsi mee la,
Nenemae ame ƒe dzi ɖea ame bubu tɔ fianae.
20 Tsiẽƒe kple tsɔtsrɔ̃ƒe meɖia ƒo gbeɖe o,
Nenema kee amegbetɔ ƒe ŋku hã meɖia ƒo o.
21 Sonu li ɖe klosalo ŋu, eye kpo ɖe sika ŋu,
Nenema kee wodoa ame kpɔna ne wokafui.
22 Ne ètsɔ bometsila de to me hetsɔ tati toe
Abe bli ene hã la,
Eƒe bometsitsi la maɖe ɖa le eŋu o.
23 Wò alẽwo ƒe nɔnɔme nenɔ nyanya na wò nyuie.
Lé be na wò lãhawo nyuie,
24 Elabena kesinɔnuwo menɔa anyi tegbee o,
Eye fiakuku hã menɔa anyi na dzidzimeawo katã o.
25 Gbe mumuwo vɔna, eye gbe fẽwo miena,
Eye woƒoa nu miemie siwo le towo dzi la nu ƒu.
26 Alẽtsuiawo ana nudodo wò,
Eye gbɔ̃tsuawo ana agbleƒlega wò.
27 Gbɔ̃notsi sɔgbɔ anɔ asiwò be nàkpɔ nuɖuɖu,
Be nàkpɔ nuɖuɖu na wò aƒemetɔwo, kple nunyiame na wò dɔlanyɔnuwo.

LODODOWO 28
1  Ame aɖeke menyaa ame vɔ̃ɖiwo ɖe nu hafi wosina o,
Ke ame dzɔdzɔewo ya, dzi le wo ƒo abe dzata ene.
 2 Ne dzidada sɔ gbɔ ɖe anyigba dzi la, dziɖula geɖewo vana ɖe wo nɔewo yome,
Gake to nugɔmesela nyanu ɖeka ƒe kpekpeɖeŋu dzi la, dziɖula anɔ anyi eteƒe nadidi.
 3 Ame dahe si tafaa hiãtɔ la
Le abe tsidzadza si kplɔa nuɖuɖu ɖe sia ɖe dzonae la ene.
 4 Ame siwo gbe nu le se gbɔ la kafua ame vɔ̃ɖiwo,
Ke ame siwo léa se me ɖe asi la doa dziku ɖe wo ŋu.
 5 Nu vlo wɔlawo mate ŋu ase nu si le dzɔdzɔe gɔme o,
Ke ame siwo dia Afetɔ ya ate ŋu ase nu sia nu gɔme.
 6 Ame dahe si ƒe zɔzɔme ŋu fɔɖiɖi mele o la
Nyo wu kesinɔtɔ si wɔa nu fitifiti.
 7 Vi senugɔme léa se la me ɖe asi,
Ke vi si dea ha kple nu tsu ɖulawo la, dea ŋukpe mo na fofoa.
 8 Ame si tsɔa demexɔxɔ kple viɖe ƒoɖi dzia eƒe kesinɔnuwo ɖe edzi la,
Ðeko wòle kɔ lim nuwo ɖi na ame si vea ame dahewo nu.
 9 Ame si doa toku se la,
Eƒe gbedodoɖa ke hã nye ŋunyɔ.
10 Ame si kplɔ nu dzɔdzɔe wɔla to mɔ vɔ̃ dzi la, age adze do si eya ŋutɔ ɖe la me,
Ke fɔmaɖilawo anyi nu nyuiwo dome.
11 Kesinɔtɔ bua eɖokui nunyalae,
Ke ame dahe si si nugɔmesese le la kpɔa ame si ƒomevi wònye.
12 Ne ame dzɔdzɔe ɖu dzi la, atsyɔ̃ɖoɖo teƒe mekɔna o,
Ke ne ame vɔ̃ɖi ƒe alɔ de dzi la, amewo sina bena.
13 Ame si tsyɔa nu eƒe dzidadawo dzi la, madze edzi nɛ o,
Ke ame si ʋua eme, eye wòɖea asi le wo ŋu la, woakpɔ nublanui nɛ.
14 Dzidzɔtɔe nye ame si nɔa ŋudzɔ ɣeawokatãɣi,
Ke ame si sẽa dzi me goŋgoŋ la, gbegblẽ ava edzi.
15 Ame vɔ̃ɖi si le wɔnamanɔŋutɔwo dzi ɖum la
Le abe dzata si le gbe tem kple sisiblisi si lũ ɖe nu dzi ene.
16 Kplɔla si si nugɔmesese mele o la wɔa eƒe ŋusẽ ŋu dɔ ɖe mɔ gbegblẽ nu,
Ke ame si léa fu viɖe ƒoɖi la, adzi eƒe agbenɔƒewo ɖe edzi.
17 Ame si wu ame heɖi ʋufɔ la, sisim ko wòanɔ va se ɖe esime wòayi yɔdo me.
Ame aɖeke megaxɔ nɛ o.
18 Woaxɔ na ame si ƒe zɔzɔme ŋu fɔɖiɖi mele o la,
Ke ame si ƒe mɔwo le gɔdɔ̃gɔdɔ̃ la adze anyi kpata.
19 Ame si dea eƒe agble la, abolo abɔ ɖe esi,
Ke ame si tia nu maɖinuwo yome la, ahedada atso aƒe ɖe egbɔ.
20 Woayra nuteƒewɔla geɖe,
Ke ame si tsi klokloklo ɖe hokpɔkpɔ ŋu la, fɔɖiɖi magbe eŋu nɔnɔ o.
21 Amedzidede menyo o;
Ke ame ate ŋu ada vo le abolo kakɛ dzro ko ta.
22 Ŋubiãla le yɔyɔm ɖe kesinɔnuwo ŋu,
Ke menya be hiã ava tu ye o.
23 Ame si gbea nya na ame la, woave enu geɖe emegbe
Wu ame si ɖɔa kesekuku na ame.
24 Ame si daa adzo fofoa kple dadaa hegblɔna be, “Medze vɔ̃ o” la,
Nugblẽla xɔlɔ̃ wònye.
25 Ŋuklẽla dea dzre aƒe,
Ke ame si ɖoa ŋu ɖe Afetɔ ŋu la, nu adze edzi nɛ.
26 Ame sia ame si ɖoa ŋu ɖe eya ŋutɔ ƒe dzi ŋu la, bometsilae,
Ke ame si zɔna le nunya me la, anɔ dedie.
27 Ame sia ame si naa nu ame dahe la, naneke mahiãe o,
Ke ame si miaa ŋku ɖe woƒe hiahiãwo dzi la, woado ɖiŋu nɛ geɖe.
28 Ne ame vɔ̃ɖiwo ƒe alɔ de dzi la, amewo sina bena,
Ke ne wo nu yi la, ame dzɔdzɔewo dzina ɖe edzi.

LODODOWO 29
1  Ame si woka mo na zi geɖe gake wòlia kɔ la,
Agbã zi ɖeka gudugudu, eye gbedada manɔ eŋu o.
 2 Ne ame dzɔdzɔewo dzi ɖe edzi la, dukɔ kpɔa dzidzɔ,
Ke ne ame vɔ̃ɖi le fia ɖum la, dukɔ ɖea hũ.
 3 Ame si lɔ̃a nunya doa dzidzɔ na fofoa,
Ke ame si dea ha kple gbolowo la gblẽa eƒe kesinɔnuwo dome.
 4 Ʋɔnu dzɔdzɔe dɔdrɔ̃ dzie fia tona lia ke eƒe dukɔ,
Ke ame si lɔ̃a zãnuxɔxɔ la gbãnɛ.
 5 Ame si ɖɔa kesekuku na ehavi la
Le ɖɔ ɖom na ehavi ƒe afɔ.
 6 Ame vɔ̃ɖi ƒe dzidada zua mɔ̃ ɖenɛ,
Ke ame dzɔdzɔe tsoa aseye, eye wòkpɔa dzidzɔ.
 7 Ame dzɔdzɔe tsɔa ɖe le ame dahewo ƒe nyawo me,
Ke ame vɔ̃ɖi ya metsɔa ɖeke le eme na wo o.
 8 Adegbe ƒolawo dea zitɔtɔ du me,
Ke nunyalawo tsia dɔmedzoe nu.
 9 Ne nunyala kple bometsila kpe nya la,
Bometsila fiaa adã, ɖua fewu, eye nunyala mekpɔa dzidzeme o.
10 Ame siwo ʋukɔkɔɖi dzrona la léa fu ame maɖifɔwo,
Eye wodina be yewoaɖe nu dzɔdzɔe wɔla ƒe agbe ɖa.
11 Bometsila dudua eƒe seselelãme katã kɔna ɖi,
Ke nunyala léa enu tufafatɔe.
12 Ne dziɖula léa to ɖe alakpanya ŋu la,
Eŋumewo katã azu ame vɔ̃ɖiwo.
13 Nu ɖeka si nye nyateƒe le ame dahe kple ameteɖeanyila siaa gomee nye be:
Afetɔe nana wo ame evea ƒe ŋkuwo kpɔa kekeli.
14 Ne fia drɔ̃a ʋɔnu ame dahewo ɖe eteƒe la,
Eƒe fiazikpui ali ke ɖaa.
15 Ameƒoti kple mokanamee dzea nunya ame,
Gake vi si womekpla o la dea ŋukpe mo na dadaa.
16 Ne ame vɔ̃ɖiwo dzi ɖe edzi la, dzidada hã dzina ɖe edzi,
Ke ame dzɔdzɔewo akpɔ woƒe anyidzedze teƒe.
17 He viwò, ekema ana gbɔɖeme wò;
Eye wòahe dzidzɔ geɖe vɛ na wò.
18 Ne ŋutega meli o la, amewo wɔa nu si dze wo ŋu,
Ke dzidzɔtɔwoe nye ame siwo léa se la me ɖe asi.
19 Nuƒoƒo ɖeɖe meɖɔa subɔvi ɖo o,
Elabena ese egɔme hafi gbe edziwɔwɔ.
20 Èkpɔ ame si ƒoa nu blablablaa?
Mɔkpɔkpɔ li na bometsila wui.
21 Ne ame aɖe wɔa vi na eƒe subɔvi tso ɖevime la,
Ava zu ame madakpe emegbe.
22 Dɔmedzoetɔ hea dzre vɛ;
Eye dzikutɔ daa vo geɖe.
23 Amegbetɔ ƒe dadae abɔbɔe ɖe anyi,
Ke ame si me ɖokuibɔbɔ ƒe gbɔgbɔ le la ƒe asi asu bubu dzi.
24 Ame si wɔa ɖeka kple fiafitɔ la léa fu eɖokui.
Asee woado kpo be ame nava ʋu go nya, gake agbe egbɔgblɔ.
25 Amegbetɔvɔvɔ̃ la, mɔ̃e wònye ɖea ame,
Ke ame si ɖoa dzi ɖe Afetɔ ŋu la, woakpɔ eta.
26 Ame geɖewoe dina be yewoado ɖe dziɖula ŋkume,
Ke Afetɔ ye tsoa afia na ame.
27 Ame dzɔdzɔe nyɔa ŋu ame si melɔ̃a nya dzɔdzɔe o,
Eye ame vɔ̃ɖi nyɔa ŋu ame si ƒe mɔ le dzɔdzɔe.

LODODOWO 30
1  Agur, Yake vi, ƒe nya vevi siwo wògblɔ na Itiel, na Itiel kple Ukal.
 2 Metsi bome wu amewo katã,
Eye gɔmesese mesu asinye abe ale si wòle be wòasu ame si ene o.
 3 Nyemesrɔ̃ nunya o,
Eye Kɔkɔetɔ la ƒe sidzedze mesu asinye o.
 4 Ame kae lia yi dziƒo gaɖi va anyi?
Ame kae lɔ ya ɖe eƒe asiʋlo eveawo me?
Ame kae bla tsi ɖe eƒe avɔ me?
Ame kae ɖo anyigba ƒe mlɔenuwo anyi?
Eŋkɔ ɖe, eye via ŋkɔ ɖe? Ènyaea?
 5 Mawu ƒe nyawo katã dza.
Akpoxɔnu wònye na ame siwo katã sinɛ tsona.
 6 Mègatsɔ nya aɖeke kpe eƒe nyawo o,
Ne menye nenema o la, aka mo na wò,
Eye woakpɔe be ènye aʋatsokala.
 7 Nu eve biam mele wò.
Mègate wom hafi maku o.
 8 Te alakpa kple aʋatsokaka ɖa xaa tso gbɔnye.
Mègana mada ahe alo anye kesinɔtɔ o.
Ke na maɖu nu si nye tɔnye,
 9 Ne magaɖi ƒo ahagbe nu le gbɔwò agblɔ be, “Ame kae nye Afetɔ?” o,
Eye mègana mada ahe ayi fi fi ge ahado vlo nye Mawu ƒe ŋkɔ la o.
10 Mègagblẽ subɔvi ŋu na eƒe aƒetɔ o,
Ne menye nenema o la, ado ɖiŋu na wò, eye fɔɖiɖi anɔ dziwò.
11 Dzidzime aɖe li, si doa ɖiŋu na fofoa,
Eye meyraa dadaa hã o.
12 Dzidzime aɖe li, si buna be yele dzadzɛ,
Gake womeklɔ eƒe ɖiƒoƒo gɔ̃ hã ɖa le eŋu o.
13 Dzidzime aɖe li, si to ŋku gã
Eye eƒe ŋkuwo kpɔa nu dadatɔe ale gbegbe!
14 Dzidzime aɖe li, si ƒe aɖuwo nye yiwo,
Eye woƒe glãƒuwo nye lãwuhɛwo;
Wovuvua wɔnamanɔŋutɔwo ɖa le anyigba dzi,
Kple ame dahewo ɖa le amegbetɔwo dome.
15 Vinyɔnu eve le agu si, siwo doa ɣli be, “Tsɔe vɛ! Tsɔe vɛ!”
Nu etɔ̃ li, siwo meɖia ƒo gbeɖe o;
Nu ene li, siwo megblɔna gbeɖe be, “Enyo gbɔ!” o.
16 —Tsiẽƒe kple vidzidɔ si tsi ko,
Anyigba si tsi meɖia kɔ na o,
Kple dzo, si megblɔna be, “Enyo gbɔ!” o.
17 Ŋku si ɖea alɔme le fofoa ŋu, eye mebua dadaa ɖe ɖeke me o la,
—Balime akpaviãwo ahoe le etome,
Eye hɔ̃ ƒe viwo aɖui.
18 Nu etɔ̃ li, siwo gbɔ nye gɔmesese ŋu,
Eye nu ene li, siwo nu nyemenya ta le o:
19 Hɔ̃ toƒe le dziƒowo,
Da toƒe le agakpe dzi,
Tɔdziʋu toƒe le atsiaƒu gbanaa dzi,
Kple ŋutsu toƒe le ɖetugbui ŋu.
20 Ale nyɔnu ahasitɔ lee nye esi:
Eɖua nu hetutua nu to;
Eye wògblɔna be, “Nyemewɔ nu gbegblẽ aɖeke o.”
21 Nu etɔ̃ nana anyigba dzona kpekpekpe,
Eye nu ene wua tsɔtsɔ nɛ:
22 Ne kluvi le fia ɖum,
Ne nuɖuɖu bɔ ɖe movitɔ si;
23 Ne nyɔnu si wolé fui va ɖe srɔ̃,
Eye ne dɔlanyɔnu va xɔ ɖe eƒe aƒenɔ teƒe.
24 Nu ene li, siwo woabu ɖe suetɔwo dome le anyigba dzi,
Gake dzɔdzɔmenunya le wo si:
25 Ŋusẽ boo aɖeke mele anyidiwo ŋu o,
Gake woƒoa woƒe nuɖuɖu nu ƒu le dzomeŋɔli.
26 Ŋusẽ boo aɖeke mele hotoklolowo ŋu o,
Gake agakpewo mee wowɔa woƒe nɔƒe ɖo.
27 Fia aɖeke mele ʋetsuviwo nu o,
Gake wo katã hona yina le hatsotso me.
28 Xɔmenyatri ƒe asi léna ɖe nu ŋu,
Eye wònɔa fiasãwo gɔ̃ hã me.
29 Nu etɔ̃ li, siwo zɔa atsyãzɔli,
Eye nu ene li, siwo zɔa fiazɔli:
30 Dzata, si nye kalẽtɔ wu le lãwo dome,
Si medea megbe le ame aɖeke ŋkume o;
31 Adevu; gbɔ̃tsu;
Kple fia si ŋu eƒe aʋakɔwo le.
32 Ne èwɔ movinu hedo ɖokuiwò ɖe dzi
Alo nèɖo esia ɖe tame be yeawɔ la,
Ekema ɖo asi nu.
33 Elabena ne wogbo notsi la, wokpɔa notsi kpekẽ,
Ne wofiã ŋɔti sesĩe la, ʋu dona,
Nenemae ne woƒlɔ dzo ɖe dziku te la, dzre dzɔna.

LODODOWO 31
1  Fia Lemuel ƒe nyawo, nya vevi siwo dadaa tsɔ xlɔ̃ nui lae nye esi:
 2 Oo vinye, nya kae magblɔ na wò,
Oo nye dɔmevi, nya ka gblɔ gee mala,
Oo nye adzɔgbeɖevi, nya kae le asinye na wò?
 3 Mègatsɔ wò ŋusẽ na nyɔnuwo o,
Eye mègawɔ nu siwo gblẽa fiawo dome o.
 4 Oo Lemuel, menye fiawo ƒe dɔ o,
Menye fiawo ƒe dɔ be woano wain o,
Eye menyo be dziɖulawo nagblɔ be, “Nye aha ɖe?” o,
 5 Ne woagano aha ahaŋlɔ se la be,
Eye woatrɔ gbo ame tsɛwo ƒe nya o.
 6 Tsɔ aha muame na ame siwo le tsɔtsrɔ̃m,
Kple wain na ame siwo le nu xam.
 7 Na woanoe, ne woaŋlɔ woƒe ahedada be;
Ne woagaɖo ŋku woƒe xaxa dzi o.
 8 Ƒo nu ɖe ame siwo mate ŋu aɖe wo ɖokuiwo nu o la nu;
Eye nàʋli ame siwo katã le tsɔtsrɔ̃m la ta.
 9 Ke nu nàdrɔ̃ ʋɔnu dzɔdzɔe;
Xɔ nya ɖe wɔnamanɔŋutɔwo kple ame dahewo nu.
10 Ame kae akpɔ srɔ̃nyɔnu zazɛ̃?
Exɔ asi wu adzagba.
11 Srɔ̃a ɖoa dzi ɖe eŋu,
Eye nu vevi aɖeke mebɔnɛ o.
12 Le eƒe agbemeŋkekewo katã me la,
Ewɔa nyui na srɔ̃a ŋutsu, ke menye vɔ̃ o.
13 Edia alẽfuvɔ kple aklala;
Eye wòtsɔa eƒe asiwo wɔa dɔ kple dzidzɔ.
14 Ele abe asitsalawo ƒe asiʋu ene;
Eye wòhea eƒe nuɖuɖu tsoa didiƒe ke vaa aƒee.
15 Efɔna ne ŋu mekpɔ ke vɔ o,
Eye wònaa nuɖuɖu eƒemetɔwo;
Enaa eƒe dɔlanyɔnuwo hã tɔ gome wo.
16 Ebua tame le agble ŋu, eye wòƒlenɛ;
Ekua kutri dea waingble.
17 Edzrana ɖo ɖe dɔ sesẽ wɔwɔ ŋu,
Eye wòdoa ŋusẽ eƒe alɔwo.
18 Ekpɔnɛ be yeƒe asitsatsa le vi ɖem;
Eƒe akaɖi metsina le zã me o.
19 Ðetifutreti le eƒe asi me,
Eye wòtsɔa eƒe asi léa ɖetitrekeke.
20 Edoa eƒe asi ɖe wɔnamanɔŋutɔwo,
Eye wòʋua eƒe asi me na ame dahewo.
21 Mevɔ̃na ɖe eƒe aƒemetɔwo nu le vuvɔ ta o,
Elabena eƒe aƒemetɔwo katã do awu titriwo.
22 Elɔ̃a abadzivɔwo na eɖokui.
Eƒe nudodo nye aklala biɖibiɖi kple alẽfuwu aɖabɛ dzĩtɔ.
23 Wonya srɔ̃a nyuie le dugbo la nu,
Afi si wòbɔbɔ nɔ anyi ɖe dumemetsitsiwo dome le.
24 Etɔa aklalawuwo dzrana,
Eye asitsalawo xɔa alidziblanu tso egbɔ.
25 Ŋusẽ kple atsyɔ̃e nye eƒe avɔ,
Eye kakaɖedzi nɔa esi ɖe etsɔ si gbɔna ŋu.
26 Ekea eƒe nu le nunya me;
Eye dɔmenyo ƒe se le eƒe aɖe dzi.
27 Eléa ŋku ɖe eƒe aƒemetɔwo ƒe nuwɔnawo ŋu nyuie,
Eye meɖua kuviabolo o.
28 Viawo tsona heyɔnɛ be dzidzɔtɔ;
Srɔ̃a tsona hekafunɛ.
29 Nyɔnu zazɛ̃ geɖewo li,
Ke wò la, èƒo wo katã ta.
30 Nyonyo la, beblee, eye tugbedzedze hã nu yina kaba,
Ke nyɔnu si vɔ̃a Afetɔ la, eyae woakafu.
31 Mitsɔ nu si wòwɔ ƒe fetu nɛ,
Eye eƒe dɔwɔwɔwo nekafui le dua ƒe agbowo nu.

LEAVE A REPLY

Please enter your comment!
Please enter your name here