Hiob

Hiob
Job
Prologue
1 Ŋutsu aɖe nɔ Uz-nyigba dzi, si ŋkɔe nye Hiob. Enye ame dzɔdzɔe si wɔa nuteƒe, evɔ̃a Mawu, eye wòtsri nu vɔ̃ɖi. 
2 Wodzi ŋutsuvi adre kple nyɔnuvi etɔ̃ nɛ. 
3 Eƒe lãhawo le alẽ akpe adre, kposɔ akpe etɔ̃, nyi akpe ɖeka kple tedzi alafa atɔ̃ hekpe ɖe subɔvi gbogbo aɖewo ŋu. Ŋutsu sia ƒo Ɣedzeƒetɔwo katã ta.
4 Viaŋutsuwo dometɔ ɖe sia ɖe ɖoa kplɔ̃ le eƒe me le ŋkeke si wòɖo edzi la dzi. Wokpea wo nɔvinyɔnu etɔ̃awo be woava ɖu nu ano nu kple yewo. 
5 Eye ne kplɔ̃ɖoŋkekeawo wu enu keŋ la, Hiob dɔa ame ɖa wòkɔa wo ŋu. Efɔna ŋdi kanya saa numevɔ ɖe wo katã ƒe xexlẽme nu; elabena Hiob gblɔna be: “Ame aɖe menya nu o, vinyewo wɔ nu vɔ̃, eye wogblɔ nya vɔ̃ ɖe Mawu ŋu le woƒe dzi me mahĩ.” Aleae Hiob wɔna ɣesiaɣi.
6 Eva eme gbe ɖeka be Mawu vavã la ƒe viwo va tsi tsitre ɖe Afetɔ ŋkume, eye Satana hã le wo dome va.
7 Eye Afetɔ bia Satana be: “Afi kae nètso?” Satana ɖo eŋu na Afetɔ be: “Metso tsatsa ge le anyigba dzi kple tsa ɖi ge le edzi.” 
8 Afetɔ bia Satana be: “Èlé ŋku ɖe nye subɔla Hiob ŋua? Ame aɖeke mede enu le anyigba dzi o. Enye ame dzɔdzɔe si wɔa nuteƒe, evɔ̃a Mawu, eye wòtsri nu vɔ̃ɖi.” 
9 Satana ɖo eŋu na Afetɔ be: “Dzodzroe Hiob vɔ̃a Mawua? 
10 Ðe menye wòe tɔ kpɔ ɖe eya ŋutɔ kple eƒe aƒe kpakple eƒe nuwo katã ŋu godoo va kpe oa? Èyra eƒe asinudɔwɔwɔwo, eye eƒe lãhawo gbagba ɖe anyigba la dzi. 
11 Gake ne èdo wò asi ɖa gblẽ nu siwo katã le esi dome la, aƒo fi ade wò le wò ŋutɔ wò ŋkume godoo.” 
12 Eye Afetɔ gblɔ na Satana be: “Kpɔ ɖa, eƒe nuwo katã le asiwò me. Ðeko mègade asi eya ŋutɔ ŋu o!” Ale Satana dzo le Afetɔ ŋkume.
13 Gbe ɖeka esi Hiob viŋutsuwo kple vianyɔnuwo nɔ nu ɖum henɔ wain nom le wo nɔvi tsitsitɔ ƒe aƒe me la, 
14 ame dɔdɔ aɖe va Hiob gbɔ va gblɔ nɛ be: “Nyiawo nɔ agble ŋlɔm, eye tedziawo nɔ gbe ɖum le wo xa, 
15 kasia, Sabatɔwo va dze wo dzi helé wo, eye wowu subɔviawo kple yi. Nye ɖeka pɛ koe te ŋu si, be mava gblɔe na wò.”
16 Esi ame sia ganɔ nuƒoƒo dzi la, ame bubu va do hegblɔ be: “Mawu ƒe dzo ge tso dziƒo va dze alẽawo kple subɔviawo dzi hefiã wo keŋkeŋ! Nye ɖeka pɛ koe kpɔtɔ, be mava gblɔe na wò.”
17 Esi ame sia mekpɔ wu eƒe nyaa nu o la, ame bubu va do hegblɔ be: “Kaldeatɔwo ƒe adzoha etɔ̃ va dze kposɔawo dzi helé wo, eye wowu subɔviawo kple yi. Nye ɖeka pɛ koe susɔ, be mava gblɔe na wò.”
18 Esi ame sia hã mekpɔ ɖe nu le eƒe nyaa me o la, ame bubu hã va do hegblɔ be: “Viwòŋutsuwo kple viwònyɔnuwo nɔ nu ɖum henɔ wain nom le wo nɔvi tsitsitɔ ƒe aƒe me. 
19 Kasia, ya sesẽ aɖe ƒo tso gbedzinuto me va lɔ xɔ la ƒe dzogoe eneawo ɖe eme, ale wòmu dze ɖeviawo dzi woku. Nye ɖeka pɛ koe susɔ, be mava gblɔe na wò.”
20 Ale Hiob tso dze eƒe awu, elũ ta, eye wòbɔbɔ tsyɔ mo anyi 
21 gblɔ be:
“Amama menɔ hafi do tso danye ƒe dɔ me,
Eye amamae maganɔ ayi.
Afetɔe na, eye Afetɔe gaxɔe.
Woakafu Afetɔ ƒe ŋkɔ ɖaa.”
22 Le nu siawo katã me la, Hiob mewɔ nu vɔ̃ alo bu fɔ Mawu be ewɔ nu gbegblẽ o.

Hiob 2
1 Emegbe esi ŋkeke la ɖo be Mawu vavã la ƒe viwo nava tsi tsitre ɖe Afetɔ ŋkume la, Satana hã le wo dome va tɔ ɖe Afetɔ ŋkume.
2 Eye Afetɔ bia Satana be: “Afi kae nètso?” Satana ɖo eŋu na Afetɔ be: “Metso tsatsa ge le anyigba dzi kple tsa ɖi ge le edzi.” 
3 Afetɔ bia Satana be: “Èlé ŋku ɖe nye subɔla Hiob ŋua? Ame aɖeke mede enu le anyigba dzi o. Enye ame dzɔdzɔe si wɔa nuteƒe, evɔ̃a Mawu, eye wòtsri nu vɔ̃ɖi. Egalé eƒe nuteƒewɔwɔ me ɖe asi kokoko, togbɔ be nède adã tame nam ɖe eŋu be magblẽ edome naneke mawɔmawɔe hã.” 
4 Ke Satana ɖo eŋu na Afetɔ be: “Ŋutigbalẽ ɖe ŋutigbalẽ teƒe, eye amegbetɔ atsɔ nu sia nu si le esi la ana ɖe eƒe agbe ta. 
5 Gake ne èdo wò asi ɖa ka asi eƒe ƒu kple eƒe ŋutilã ŋu la, aƒo fi ade wò le wò ŋutɔ wò ŋkume godoo.”
6 Eye Afetɔ gblɔ na Satana be: “Kpɔ ɖa, ele asiwò me. Ðeko mègaɖe eƒe agbe ɖa o!” 
7 Ale Satana dzo le Afetɔ ŋkume, eye wòna ƒoƒoe vɔ̃ɖi aɖe te Hiob tso eƒe afɔƒome va se ɖe eƒe dzodome. 
8 Eye wòbɔbɔ nɔ dzofi me hetsɔ sonu gaglɛ nɔ ŋuti kumee.
9 Mlɔeba srɔ̃a gblɔ nɛ be: “Ègalé wò nuteƒewɔwɔ me ɖe asi kokokoa? Gbe Mawu, ne nàku!” 
10 Ke egblɔ nɛ be: “Èle nu ƒom abe nyɔnu bometsila ene. Ðe míaxɔ nu nyuiwo tso Mawu vavã la gbɔ, evɔ míaxɔ gbegblẽawo ya oa?” Le nu siawo katã me la, Hiob mewɔ nu vɔ̃ kple eƒe nuyiwo o.
11 Hiob xɔlɔ̃ etɔ̃, siwo nye Temantɔ Elifaz kple Suatɔ Bildad kpakple Naamatɔ Zofar, wose nya vɔ̃ siwo katã dzɔ ɖe edzi, ale wo dometɔ ɖe sia ɖe tso enɔƒe va. Woɖo gbe ɖi kple wo nɔewo be yewoado go ayi aɖafa na Hiob ahafa akɔ nɛ. 
12 Esi wokpɔe le adzɔge ɖaa la, womekpɔe dze sii o. Ale wowó avi, wo dometɔ ɖe sia ɖe dze eƒe awu, eye wohlẽ ke ɖe yame wòkɔ ɖe woƒe tame. 
13 Eye wobɔbɔ nɔ egbɔ le anyigba ŋkeke adre kple zã adre. Wo dometɔ aɖeke meke nu gblɔ nya ɖeka pɛ hã nɛ o, elabena wokpɔ be enɔ veve sem ale gbegbe.

Hiob 3
1 Le esia megbe la, Hiob ke nu, eye wòƒo fi de eƒe dzigbe. 
2 Hiob gblɔ be:
3 “Gbe si gbe wodzim la netsrɔ̃,
Zã si me wogblɔ be, ‘Wofɔ ŋutsu ƒe fu’ la hã netsrɔ̃!
4 Ŋkeke ma nedo viviti. Mawu si le dziƒo megabia eta se o;
Eye kekeli megaklẽ ɖe edzi o.
 5 Viviti tsiɖitsiɖi nexɔe. Alilikpo dodo netsyɔ edzi.
Nu siwo nana ŋkeke doa viviti la nedo ŋɔdzi nɛ.
 6 Zã ma nedo viviti tsiɖitsiɖi; Dzi megadzɔe le ƒea ƒe ŋkekewo dome o,
Eye woagaxlẽe ɖe ɣletiŋkekewo dome o.
 7 Ɛ̃, zã ma netsi ko;
Dzidzɔɣli aɖeke megaɖi le eme o.
 8 Ame siwo ƒoa fi dea ŋkeke la neƒo fi dee,
Wo ame siwo dea adã tame na Leviatan.
 9 Eƒe ŋukeɣletiviwo nedo viviti;
Nelala kekeli, ke megaklẽ nɛ o,
Eye megakpɔ agudzedze o.
10 Elabena mexe danye ƒe vidzidɔ nu o;
Eye meɣla fuɖename ɖe nye ŋkuwo hã o.
11 Nu ka tae nyemeku le nye dzigbe o?
Nu ka tae nye agbe nu metso esi medo tso vidzidɔ me o?
12 Nu ka tae wokɔm ɖe akɔ Eye nu ka tae wona nom ɖo?
13 Anye ne fifia memlɔ anyi le tomefafa me;
Anye ne medɔ alɔ̃ hele ɖiɖim ɖe eme,
14 Kple anyigbadzifiawo kpakple woƒe adaŋudelawo,
Ame siwo tu teƒe siwo zu aƒedowo fifia la na wo ɖokuiwo,
15 Alo kple amegã siwo si sika le,
Ame siwo ƒe xɔwo me yɔ taŋ kple klosalo.
16 Alo nu ka tae nyemele abe fugege si le ɣaɣla ene,
Abe vidzĩ siwo mekpɔ kekeli aɖeke kpɔ o ene o?
17 Afi mae ame vɔ̃ɖiwo gɔ̃ hã dzudzɔ agbodzedze le;
Afi mae ame siwo nu ti kɔ na la le ɖiɖim ɖe eme le.
18 Afi mae gamenɔlawo katã ŋu vo le;
Womegasea ame siwo zia wo dzi be woawɔ dɔ ƒe bublu o.
19 Ame tsɛwo kple ame ŋkutawo siaa sɔ le afi ma,
Eye kluvi vo tso eƒe aƒetɔ si me.
20 Nu ka tae wònaa kekeli ayaɖula,
Eye wònaa agbe ame siwo le veve sem helĩhelĩ?
21 Nu ka tae ame aɖewo le ku dim, evɔ wògbe vava?
Wole edim vevie wu ale si wodia kesinɔnu le to me gɔ̃ hã,
22 Wo ame siwo tsoa aseye,
Eye woglina kple dzidzɔ ne wokpɔ ɖiƒe.
23 Nu ka tae wònaa kekeli ŋutsu si ƒe mɔwo bu ɖee,
Ame si ŋu Mawu tɔ kpɔ ɖo?
24 Elabena hũɖeɖe xɔ ɖe nuɖuɖu teƒe nam,
Eye nye ŋeŋe kɔna ɖi abe tsi ene.
25 Elabena nu si dzia ŋɔ nam lae dzɔ ɖe dzinye,
Eye nu si vɔ̃m mele la dzɔ ɖe dzinye.
26 Nyemekpɔ ŋutifafa, tomefafa alo gbɔdzɔe aɖeke o,
Negbe xaxawo sɔŋ ko.”

Hiob 4
1 Eye Temantɔ Elifaz ɖo eŋu be:
 2 “Ne ame aɖe di be yeagblɔ nya aɖe na wò la, ɖe dzi aku wòa?
Elabena ame kae agbe nuƒoƒo?
 3 Nyateƒee èxlɔ̃ nu ame geɖewo,
Eye nèdoa ŋusẽ alɔ gblɔdɔwo.
 4 Wò nyawo léa ame siwo katã le anyi dzem la ɖe te,
Eye nèdoa ŋusẽ klo beliwo.
 5 Azɔ esi wòdzɔ ɖe dziwò la, eglo wò;
Etu wò ŋutɔ azɔ, eye dzi ɖe le ƒowò.
 6 Ðe wò mawuvɔvɔ̃ mena dzi ɖo ƒowò oa?
Ðe wò nuteƒewɔwɔ mena mɔkpɔkpɔ wò oa?
 7 Meɖe kuku, bu eŋu kpɔ: Ame maɖifɔ ka nue yi kpɔ?
Ɣekaɣie wotsrɔ̃ ame dzɔdzɔe kpɔ?
 8 Nu si mekpɔe nye be, ame siwo dea nu vɔ̃ɖi wɔwɔ ƒe agble,
Kple ame siwo ƒãa xaxa la, nu ma kee woaŋe.
 9 Mawu ƒe ŋɔtimegbɔgbɔ tsrɔ̃a wo,
Eye ne eƒe dziku fla la, wo nu yina.
10 Dzata ɖea gbe, eye dzatavi xlɔ̃na,
Ke woŋea aɖu na dzata sesẽwo gɔ̃ hã.
11 Dzata kuna ne mekpɔ nu lé o,
Eye dzataviwo kana hlẽna.
12 Wotsɔ nya aɖe vɛ nam dzaa,
Eye nye to se eŋuti dalĩ.
13 Le zãŋutega si na nye susu tɔtɔ ŋutɔ la me,
Esime amewo yi alɔ̃ me ʋĩi,
14 Dzidzi ƒom vevie,
Eye ŋɔdzi lém de nye ƒutome ke.
15 Gbɔgbɔ aɖe va to ŋkunyeme;
Ðadoe ɖo to ɖe ŋunye.
16 Etɔ ɖi,
Ke nyemekpɔ eƒe nɔnɔme dze sii o.
Nɔnɔme aɖe va tɔ ɖe ŋkunyeme;
Ðoɖoe zi toŋtoŋ, eye azɔ mese gbe aɖe be:
17 ‘Ðe amegbetɔ si kuna ate ŋu anye dzɔdzɔetɔ wu Mawua?
Alo ɖe ame ate ŋu anɔ dzadzɛ wu Ewɔla?’
18 Kpɔ ɖa! Meka ɖe eƒe subɔlawo dzi o,
Eye wòkpɔa vodada le mawudɔlawo ŋu.
19 Ʋuu keke wòahayi anyixɔmenɔlawo,
Ame siwo gɔme woɖo anyi ɖe ke me,
Eye wogbãa wo bɔbɔe abe agbagblaʋui ene nye gea?
20 Wogbãa wo gudugudu tso ŋdi va se ɖe fiẽ;
Wo nu yina tegbee, eye ame aɖeke menyana gɔ̃ hã o.
21 Ðe womele abe agbadɔ si ƒe kawo wotso ene oa?
Wokuna le numanyamanya me.

Hiob 5
1 “Meɖe kuku, yɔ ame kpɔ be ɖe ame aɖe atɔ na wò hã? Kɔkɔetɔawo dometɔ ka ŋue nàtrɔ ɖo?
2 Elabena dzikuléle ɖi awu bometsila, Eye ŋubiabiã awu numanyala.
3 Nye la, mekpɔ bometsila wòdo ke, Kasia woƒo fi de eƒe aƒe.
4 Dedienɔnɔ le adzɔge le viawo gbɔ o, Wofanya wo le dugbo la nu, eye xɔnametɔ aɖeke meli na wo o.
5 Dɔwuitɔwo ɖua eƒe nuku si wòxa, Woɖea esi tsi ŋùwo me gɔ̃ hã, Eye mɔ̃ ɖea woƒe nunɔamesiwo.
6 Elabena menye ke mee vɔ̃ miena tso o, Eye menye anyigba tumee xaxa dona tso o.
7 Elabena wodzia amegbetɔ be wòakpe hiã, Abe ale si dzoxi dzona yia dzi godoo ene.
8 Ne nyee wònye la, anye ne matrɔ ɖe Mawu ŋu, Anye ne matsɔ nye nya ade asi na Mawu,
9 Ame si wɔa nu gã siwo me dzodzro meli o, Nu wɔnuku siwo mele xexlẽ me o.
10 Enaa tsi dzana ɖe anyigba dzi, Eye wòdea tsi gbewo.
11 Edoa ame tsɛwo ɖe dzi, Eye wòxɔna na blanuilélawo hekɔa wo ɖe dzi.
12 Egblẽa ayetɔwo ƒe ɖoɖowo me, Ale be woƒe asinudɔwo medzea edzi o.
13 Eléa nunyalawo le woawo ŋutɔwo ƒe ayedzedze me, Ale be ame drãwo ƒe ɖoɖowo me gblẽna.
14 Viviti dona ɖe wo le ŋkeke me, Eye wonɔa asi tsam le ɣeɖota abe zã mee ene.
15 Eɖea wɔnamanɔŋutɔwo tso yi, si le woƒe nu me la nu, Eye wòɖea ame dahe tso ame sesẽ si me,
16 Ale be mɔkpɔkpɔ va sua ame tsɛ la si, Ke ɖoɖoe zina le ame madzɔmadzɔwo ya nu.
17 Kpɔ ɖa! Dzidzɔtɔe nye ame si Mawu kaa mo na; Eya ta mègagbe Ŋusẽkatãtɔ la ƒe amehehe o!
18 Elabena enaa ame sea veve, gake eblaa abi la; Egbãa ame, gake eƒe asi daa gbe le eŋu.
19 Aɖe wò tso xaxa ade me, Eye le adrelia me hã, nu vevi aɖeke mawɔ wò o.
20 Aɖe wò tso ku si me le dɔŋɔli, Eye wòaɖe wò tso yi si me le aʋaŋɔli.
21 Aɣla wò tso aɖeɖiƒoame me, Eye ne gbegblẽ va la, màvɔ̃ o.
22 Àko gbegblẽ kple dɔwuame, Eye màvɔ̃ anyigbadzilã wɔadãwo o.
23 Elabena agblemekpewo mawɔ nu vevi wò o, Eye gbemelãwo hã anɔ ŋutifafa me kpli wò.
24 Ekema ànya be yeƒe agbadɔ le dedie Eye ne ètsa le wò lãnyiƒe godoo la, naneke mabú na wò o.
25 Viwo anɔ asiwò kpaŋkpaŋ, Eye wò dzidzimeviwo asɔ gbɔ abe gbe le anyigba dzi ene.
26 Àkpɔtɔ anɔ ŋusẽ me va se ɖe esime nàyi yɔ me, Abe nuku bablawo le wo xaɣi ene.
27 Kpɔ ɖa! Nu sia mee míedzro, eye aleae wòle hã. Eya ta see, ne nàwɔ edzi.”

Hiob 6
1 Eye Hiob ɖo eŋu be:
2 “Ne ɖe woada nye vevesese le nudanu me bliboe
Eye woatsɔe akpe ɖe nye fukpekpe ŋu ada le nudanu me ɖe!
 3 Elabena ele kpekpem fifia wu ƒutake.
Esia tae mele nu ƒom kple adã ɖo.
 4 Elabena Ŋusẽkatãtɔ la ƒe aŋutrɔwo ƒo ɖem,
Eye nye gbɔgbɔ le woƒe aɖi nom;
Mawu ƒe ŋɔdzidodowo tre ɖe nu ɖe ŋunye.
 5 Ðe gbetedzi xlɔ̃na ne ekpɔ gbe dama le ɖuɖuma,
Alo ɖe nyitsu xlɔ̃na ne ekpɔ nu le ɖuɖuma?
 6 Ðe woaɖu nu vɔvɔ dzemadeea,
Alo ɖe vivi aɖe le atimitsi mea?
 7 Megbe asikaka nu siawo ŋu.
Wole abe ɖi ene le nye nuɖuɖu me.
 8 Oo, ne ɖe nye biabia la ava eme,
Eye Mawu awɔ nye didi dzi nam ɖe!
 9 Ne Mawu ɖe wòalɔ̃ agbãm gudugudu,
Eye wòado eƒe asi ɖa ahaɖem ɖa ɖe!
10 Anye ne ema anye akɔfafa nam;
Anye ne magli kple dzidzɔ le nye vevesese helĩhelĩ la me,
Elabena nyemegbe nu le Kɔkɔetɔ la ƒe nyawo gbɔ o.
11 Ŋusẽ kae gale ŋunye, be mayi edzi anɔ lalam?
Eye nu kae gale ŋgɔ nam, be makpɔtɔ anɔ agbe?
12 Ðe nye ŋusẽ le abe agakpe ƒe ŋusẽ enea?
Alo akɔblie nye ŋutilã nyea?
13 Ðe nane li mawɔ atsɔ akpe ɖe ɖokuinye ŋua,
Esi woɖe nye ziɔɖeŋuwo katã ɖa le ŋunyea?
14 Ame sia ame si gbe lɔlɔ̃ vavã ɖeɖe fia nɔvia la,
Ŋusẽkatãtɔ la hã vɔvɔ̃ mele mo nɛ o.
15 Womate ŋu aɖo dzi ɖe nɔvinyewo ŋu o, elabena wole abe vuvɔŋɔli me tɔʋuwo ene,
Abe vuvɔŋɔli me tɔʋu siwo va miena la ene.
16 Tsikpe na wo me blu,
Eye sno si nyina bè ɖe wo me.
17 Ne kuɖiɣi ɖo la, tsi meganɔa wo me o, womiena ƒiaƒiaƒia;
Ne dzomeŋɔli ɖo la, wo me ƒuna kplakplakpla.
18 Wotrɔ mɔ na woƒe toƒewo;
Wosina yia gbegbe, eye wo nu yina.
19 Tema-sihawo le ŋu tsam na wo;
Saba mɔzɔhawo le mɔ kpɔm na wo.
20 Woɖu ŋukpe elabena woƒe mɔkpɔkpɔ zu dzodzro;
Wova ɖo afi ma, ke ɖeko woƒe mo wɔ yaa.
21 Aleae miawo hã miele nam;
Miekpɔ ale si gbegbe nye fukpekpea dzi ŋɔe, eye vɔvɔ̃ ɖo mi.
22 Ðe megblɔ be miana nanem,
Alo miatsɔ miaƒe kesinɔnuwo ƒe ɖe anama?
23 Ðe mebia be miaɖem tso ketɔ la si me,
Alo miaxɔ nam tso ŋutasẽlawo si mea?
24 Mifia num, ekema mazi ɖoɖoe;
Vo si meda la, miɖee fiam.
25 Nya dzɔdzɔewo mevea ame o ɖe!
Ke viɖe kae le miaƒe mokanamewo ŋu?
26 Nye nyawo ŋue miebe yewoadi vodada lea,
Ame si mɔkpɔkpɔ bu ɖo, si le nu ƒom ɖe yamea?
27 Ekema miadzidze nu ɖe tsyɔ̃evi ya dzi bɔbɔe ŋutɔ,
Eye miadzra mia xɔlɔ̃wo gɔ̃ hã bɔbɔe!
28 Azɔ mitrɔ miakpɔm,
Elabena nyemada alakpa le mia ŋkume o.
29 Meɖe kuku, migbugbɔ bu eŋu—migabu fɔm madzemadzee o—
Ɛ̃, migbugbɔ bu eŋu, nye dzɔdzɔenyenye gakpɔtɔ li.
30 Ðe nya totro aɖe le nye aɖe dzia?
Alo ne meɖɔ nu veve kpɔ la, ɖe nyemadze sii oa?

Hiob 7
1 “Ðe menye hloloetsotso dzi koe amegbetɔwo le le anyigba dzi oa, Eye ɖe eƒe ŋkekewo mele abe apaɖila ƒe ŋkekewo ene oa?
2 Ele vɔvɔli dim vevie abe kluvi ene, Eye wòle eƒe fetu lalam vevie abe apaɖila ene.
3 Ale ɣleti dzodzrowo sɔŋ koe su asinye, Eye zã siwo yɔ fũu kple hiãkame koe wotsɔ nam.
4 Ne memlɔ anyi la, megblɔna be, ‘Ɣekaɣi gɔ̃e mele fɔfɔ ge?’ Gake ŋu gbea keke eye metsia zãdomadɔlɔ̃e henɔa togotogoe ƒom va se ɖe fɔŋli.
5 Nye ŋutilã katã dze nyé, eye wòƒo ke;
Abi xɔ nye ŋutilã katã ŋu hele tsi tsyɔm yoyoyo.
6 Nye ŋkekewo le du ɖim wu avɔlɔ̃ʋu, Eye wo nu yi mɔkpɔkpɔ aɖeke manɔmee.
7 Ðo ŋku edzi be nye agbe nye ƒuƒu dzro ko, Be nye ŋkuwo magakpɔ dzidzɔ akpɔ gbeɖe o.
8 Ŋku si kpɔam fifia la magakpɔm azɔ o, Wò ŋkuwo adim, ke nyemanɔ anyi o.
9 Ale si alilikpo kakana hebunae la, Nenemae ame si yia Tsiẽƒe la, megagbɔna o.
10 Magatrɔ ava eƒe aƒe me azɔ o, Eye eƒe nɔƒe magadze sii azɔ o.
11 Eya ta nyemalé nye nu o. Maƒo nu le nye gbɔgbɔ si le nu xam la ta;
Mafa konyi le nye vevesese helĩhelĩ la me!
12 Atsiaƒue menyea, alo ƒumelã klitsue menye, Hafi nèɖo dzɔla ɖe ŋunyea?
13 Ne megblɔ be, ‘Nye dɔƒe afa akɔ nam;
Nye aba aɖe nye dzimaɖitsitsi dzi akpɔtɔ nam la,
14 Ekema ètsɔa drɔ̃ewo doa vɔvɔ̃ nam
Eye nètsɔa ŋutegawo doa ŋɔdzi nam,
15 Ale be medina be gbɔgbɔ natsi ƒonye,
Ɛ̃, be maku wu nye ŋutilã sia.
16 Menyɔ ŋu nye agbe; nyemegadi be manɔ agbe o.
Ðe asi le ŋunye, elabena nye ŋkekewo le abe ƒuƒu ene.
17 Nu kae amegbetɔ nye, be nàtsɔ ɖe le eme nɛ,
Eye nàtsɔ susu aɖo eŋu?
18 Nu ka tae nànɔ ŋku lém ɖe eŋu ŋdi sia ŋdi
Eye nànɔ edom kpɔ aɖabaƒoƒo sia aɖabaƒoƒo?
19 Mèle ŋku ɖe ge ɖa le ŋunye oa,
Eye mèle asi ɖe ge le ŋunye mami ta teti oa?
20 Ne mewɔ nu vɔ̃ la, nu kae magblẽ le wò, Ame si léa ŋku ɖe amegbetɔwo ŋu la ŋuti?
Nu ka tae nèɖe ŋku tɔm?
Ðe mezu agba na wòa?
21 Nu ka tae màtsɔ nye dzidadawo ake,
Eye màɖe asi le nye vodadawo ŋu o?
Elabena eteƒe madidi o mayi ketu me,
Àdim, ke nyemanɔ anyi o.”

Hiob 8
1 Eye Suatɔ Bildad ɖo eŋu be:
 2 “Va se ɖe ɣekaɣi nànɔ nu ƒom alea?
Wò numenyawo nye ya ʋuduʋudu sɔŋ ko!
 3 Ðe Mawu ate nya dzɔdzɔe ɖe toa,
Alo ɖe Ŋusẽkatãtɔ la atrɔ gbo dzɔdzɔenyenyea?
 4 Ne viwòwo wɔ nu vɔ̃ ɖe eŋu la,
Enana wohea woƒe aglãdzedze ŋuti to na wo;
 5 Gake ne ɖe nàtrɔ ɖe Mawu ŋu
Eye nàƒo koko na Ŋusẽkatãtɔ la be wòave ye nu,
 6 Ne ɖe nèle dzadzɛ hele dzɔdzɔe vavã la,
Anye ne eɖo to wò xoxo
Eye wòagada wò ɖe nɔƒe si nèdze na.
 7 Eye togbɔ be wò gɔmedzedze nɔ nyaŋui hã,
Àva nye gã le etsɔme.
 8 Taflatsɛ bia nya dzidzime siwo do ŋgɔ,
Eye nàlé ŋku ɖe nu siwo ŋu wo fofowo ke ɖo la ŋu kpɔ.
 9 Míawo la, etsɔviwo ko míenye, eye míenya naneke o,
Elabena vɔvɔli koe míaƒe agbemeŋkekewo nye le anyigba dzi.
10 Ðe womafia nu wò
Ahagblɔ nu si wonya la na wò oa?
11 Ðe aƒla atsi nyuie ne mele tsiteƒe oa?
Ðe aɖa awɔ nyuie ne mekpɔ tsi oa?
12 Ne metsi ɖo sisi me haɖe o hã,
Atre ƒuƒu na gbe bubuawo katã.
13 Aleae wònɔna na ame siwo katã ŋlɔ Mawu be,
Elabena ame si mevɔ̃a Mawu o ƒe mɔkpɔkpɔ nu ayi,
14 Eƒe dziɖoɖo ɖe nu ŋu mele ɖeke me o,
Eye eƒe ŋuɖoɖeŋu le belii abe yiyiɖɔ ene.
15 Aziɔ ɖe eƒe xɔ ŋu, ke manɔ te o;
Adze agbagba be yeaku ɖe eŋu, ke mali ɖi o.
16 Ele abe ati si kpɔ tsi hewɔ nyuie le ɣetotoe nu ene,
Eye wòɖe alɔ hevu nyuie le eƒe abɔ me.
17 Eƒe kewo ɖo wo nɔewo me le kpe siwo li kɔ ɖi la me;
Eye wòdia nɔƒe le kpeawo dome.
18 Gake ne wohoe ɖa le eteƒe la,
Ekema teƒea agbe nu le egbɔ ahagblɔ be, ‘Nyemekpɔ wò kpɔ o.’
19 Ɛ̃, aleae enu ayii;
Eye ati bubuwo amie ɖe eteƒe.
20 Mawu megbea nu le nuteƒewɔlawo gbɔ o;
Eye mekpena ɖe nu vɔ̃ɖi wɔlawo ŋu o,
21 Elabena agana nukoko nayɔ wò nu me fũu
Eye wòana aseyetsotso nayɔ wò nuyiwo taŋ.
22 Ekema ŋukpe alé ame siwo léa fu wò,
Eye ame vɔ̃ɖiwo ƒe agbadɔ maganɔ anyi o.”

Hiob 9
1 Hiob ɖo eŋu be:
2 “Nyateƒee, menya be nenemae wòle.
Gake aleke amegbetɔ tɔ adzɔ ne ekpe nya kple Mawu?
 3 Ne ame aɖe di be yeahe nya kplii hã la,
Ame ma mate ŋu aɖo nya ɖeka pɛ hã ŋu nɛ le nya akpe dome o.
 4 Dzi nyanu le esi, eye eƒe ŋusẽ tri akɔ.
Ame kae ate ŋu adze aglã ɖe eŋu, eye nu vevi mawɔe o?
 5 Emlia towo ɖa, ke amewo menyana o;
Etrɔa wo bua anyi le eƒe dziku me.
 6 Eʋuʋua anyigba le enɔƒe,
Ale be eƒe sɔtiwo ʋuʋuna kpekpekpe.
 7 Eɖea gbe na ɣe be wòagaklẽ o
Eye wòxea ɣletiviwo ŋkume;
 8 Eya ɖekae kekea dziƒowo me,
Eye wòzɔa ƒutsotsoe kɔkɔwo dzi.
 9 Ewɔ Ayis, Kesil, kple Kima ɣletivihatsotsowo
Kple anyiehe ɣletivihatsotsowo;
10 Ewɔa nu gã siwo me dzodzro meli o,
Kple nu wɔnuku siwo mele xexlẽ me o.
11 Eto ŋunye va yi, eye nyemete ŋu kpɔe o;
Etso eme va yi, ke nyemedze sii o.
12 Ne edu nu le ame si la, ame kae ate ŋu agbe nɛ?
Ame kae ate ŋu agblɔ nɛ be, ‘Nu kae nye ema wɔm nèle?’
13 Mawu mafa eƒe dziku nu o;
Ame siwo naa kpekpeɖeŋu Rahab gɔ̃ hã abɔbɔ ɖe ete.
14 Ke aleke nyea mawɔ aɖo nya ŋu nɛ?
Afi kae makpɔ nyawo le atsɔ ahe nya kplii?
15 Ne tɔnye dzɔ hã la, nyemate ŋu aɖo nya ŋu nɛ o.
Ðe maƒo koko na nye ʋɔnudrɔ̃la boŋ be wòakpɔ nublanui nam.
16 Ne meyɔe la, ɖe wòatɔ nama?
Nyemexɔe se be alé to ɖe ŋunye o,
17 Elabena etsɔa ahom gbãam gudugudu,
Eye wònaa nye abiwo sɔa gbɔ ɖe edzi yakatsyɔ.
18 Ena mede gbɔgbɔ ge do kpoe;
Eye wòtsɔa veve yɔa ko nam.
19 Ne ŋusẽ ƒe nyae wònye la, ke eyae nye ŋusẽtɔ la.
Eye ne ʋɔnu dzɔdzɔe dɔdrɔ̃e la, ebe: ‘Ame kae ate ŋu atsɔ nya ɖe ŋunye?’
20 Ne tɔnye dzɔ la, nye ŋutɔ nye nu abu fɔm;
Ne melé nye nuteƒewɔwɔ me ɖe asi hã la, abu fɔm.
21 Ne melé nye nuteƒewɔwɔ me ɖe asi hã la, nyemaka ɖe ɖokuinye dzi o;
Megbe nu le nye agbe sia gbɔ.
22 Nya ɖeka koe li. Esia tae megblɔna be,
‘Etsrɔ̃a ame maɖifɔ kple ame vɔ̃ɖi siaa.’
23 Ne tsi aɖɔ kpata awu ame le vo me hã la,
Ame maɖifɔwo ƒe xaxa la aɖi kokoe nɛ.
24 Etsɔ anyigba la de asi na ame vɔ̃ɖiwo;
Etsyɔa nu ŋku dzi na ʋɔnudrɔ̃la siwo le edzi.
Ne menye eyae wɔe o ɖe, ke ame kae?
25 Nye ŋkekewo le du dzi wu duƒula gɔ̃ hã;
Wova yi kabakaba nu nyui aɖeke makpɔmakpɔe.
26 Wova yi mii abe aƒlaʋu ene;
Abe hɔ̃ siwo de agba anyi be yewoaƒo nu ene.
27 Ne mebe, ‘Maɖe susu ɖa le nye dzimaɖitsitsi la dzi,
Madzudzɔ adãdodo ne makɔ mo’ la,
28 Megavɔ̃na kokoko le nye veveseseawo katã ta,
Menyae nyuie be màbum fɔmaɖilae o.
29 Àbum fɔɖilae godoo.
Ke nu ka tae maganɔ agbagba dzem dzodzro?
30 Ne mele sno si lólo ƒe tsi,
Eye meklɔ nye asi ɖe adzalẽtsi me hã la,
31 Àganyrɔm ɖe ʋe me,
Ale be manɔ ŋu nyɔm na nye ŋutɔ nye awuwo gɔ̃ hã.
32 Elabena menye amegbetɔ wònye abe nye ene, ne maɖo nya ŋu nɛ,
Alo ne makplɔe ayi ʋɔnu o.
33 Ame aɖeke meli atso nya me na mí,
Alo anye ʋɔnudrɔ̃la na mí o.
34 Ne ɖe wòadzudzɔm ƒoƒo,
Eye eƒe ŋɔdzi magalém azɔ o la,
35 Anye ne maƒo nu kplii vɔvɔ̃manɔmee,
Elabena nyemenye ame si ƒoa nu kple vɔvɔ̃ o.

Hiob 10
1 “Nye agbe le ŋu nyɔm nam.
Eya ta matrɔ nye dzimaɖitsitsiwo aƒo ɖi bababa.
Maƒo nu le nye vevesese helĩhelĩ la ta!
2 Magblɔ na Mawu be: ‘Mègabu fɔm o.
Na manya nu si tae nèle nu tum kplim ɖo.
3 Ðe wòaɖe vi aɖe na wò be nàwɔ fu ame,
Be nàgbe nu le wò ŋutɔ wò asinudɔwɔwɔ gbɔ
Eye nàkpɔ ŋudzedze ɖe ame vɔ̃ɖi boŋ ƒe adaŋudede ŋua?
4 Menye amegbetɔ ƒe ŋkuwoe le asiwò o ɖe!
Alo ɖe nèkpɔa nu abe ale si amegbetɔ kpɔa nui enea?
5 Ðe wò ŋkekewo le abe amegbetɔ ƒe ŋkekewo enea,
Alo ɖe wò ƒewo le abe amegbetɔwo tɔ ene,
6 Be nànɔ nye vodadawo me kum tsitotsito,
Eye nànɔ ŋku kem ɖe nye nu vɔ̃wo mea?
7 Ènyae nyuie be nyemeɖi fɔ o;
Eye ame aɖeke mate ŋu axɔm le asiwò me o.
8 Wò ŋutɔ wò asiwoe nètsɔ mèm hewɔm,
Ke azɔ èbe yeatsrɔ̃m ɖikaa.
9 Meɖe kuku, ɖo ŋui be anyie nètsɔ mèm,
Ke azɔ èna mègatrɔ zu anyi.
10 Ðe mètrɔm kɔ ɖi bɔbɔbɔ abe notsi ene,
Eye nèna mebla abe notsi babla ene oa?
11 Èfa ŋutigbalẽ kple lãkusi ɖe ŋunye,
Eye nède ƒuwo menye hetsɔ lãmeka titriwo lɔ̃m kpe.
12 Èna agbem eye wò lɔlɔ̃ nam nu metsi o;
Eye nètsɔ beléle tɔxɛ dzɔ nye gbɔgbɔ ŋu.
13 Evɔ nèɖo nu siawo dzaa be yeawɔ.
Menyae nyuie be nu siawo tso gbɔwò.
14 Ne mewɔ nu vɔ̃wo la, wò ŋku anɔ ŋunye,
Eye màtsɔ nye vodada akem o.
15 Ne meɖi fɔ nyateƒe la, ekema baba nam!
Eye ne tɔnye dzɔ hã la, nyemate ŋu afɔ ta dzi o,
Elabena vlododo kple fukpekpe yɔm fũu.
16 Ne mefɔ ta dzi la, àɖem ɖe nu abe dzata ene
Eye àgaɖe wò ŋusẽ afia ɖe ŋutinye.
17 Àɖo ɖasefo yeyewo ɖe ŋunye
Eye àgado dziku ɖe ŋunye ɖe edzi,
Ale be fukpekpe natre ɖe fukpekpe nu nam.
18 Ke nu ka tae nèna medo tso vidzidɔ me ya?
Ðe wòle be maku hafi, anye ne ŋku aɖeke mekpɔm o.
19 Anye ne mele abe ame si menɔ agbe kpɔ o ene;
Anye ne wotsɔm tso danye ƒe dɔ me yi ɖaɖi.’
20 Ðe nye ŋkekewo mele ʋɛ oa? Neɖe asi le ŋunye;
Neɖe ŋku ɖa le dzinye, ne makpɔ gbɔdzɔe vie,
21 Hafi madzo, eye nyemagatrɔ agbɔ o,
Hafi mayi anyigba si do viviti tsiɖitsiɖi dzi,
22 Ayi anyigba si dzi viviti do ɖo tsiɖitsiɖi,
Afi si blukɔ kple tɔtɔ le,
Afi si kekeli gɔ̃ hã nye blukɔ le.”

Hiob 11
1 Naamatɔ Zofar ɖo eŋu be:
 2 “Ðe woagbe nya gbogbo siawo ŋu ɖoɖoa,
Alo ɖe nu kpoloe ƒoƒo ana ame ƒe nya nadzɔa?
 3 Ðe wò nya dzodzro siawo ade ga nu na amewoa?
Ðe ame aɖeke magbe nya na wò ɖe wò alɔmeɖenyawo ta oa?
 4 Èle gbɔgblɔm be, ‘Kpɔtsɔtsɔ mele nye nufiamewo ŋu o,
Eye medza le ŋkuwòme.’
 5 Ke hã, ne ɖe Mawu ŋutɔ ake nu,
Eye wòaƒo nu na wò ɖe!
 6 Ekema aɖe nunya ŋuti nya ɣaɣlawo afia wò,
Elabena nunya vavãtɔ keke ta ŋutɔ.
Ekema ànyae be Mawu ŋlɔa wò vodada aɖewo be.
 7 Ðe nàte ŋu ake ɖe Mawu ƒe nu goglowo ŋu
Alo anya nu sia nu tso Ŋusẽkatãtɔ la ŋua?
 8 Ekɔ gbɔ dziƒo ŋu sãsãsã. Nu kae nàte ŋu awɔ?
Egoglo kura wu Tsiẽƒe. Nu kae nàte ŋu anya le eŋu?
 9 Edidi boo wu anyigba
Eye wòkeke sãa wu atsiaƒu.
10 Ne etso eme va yi eye wòlé ame de gaxɔ me eye wòɖi ʋɔnu la,
Ame kae ate ŋu atso ɖe eŋu?
11 Elabena edzea si ameblelawo.
Ne ekpɔ nu vɔ̃ɖi la, ɖe manya oa?
12 Ne gbetedzi ate ŋu adzi amegbetɔ la,
Eya ko hafi bometsila hã adze nunya.
13 Ne ɖe nàdzra wò dzi ɖo,
Eye nàke wò abɔwo me ado gbe ɖa.
14 Ne nu vɔ̃ɖi le asiwò me la, tsɔe ƒu gbe ɖe adzɔge ke,
Eye nu madzɔmadzɔ aɖeke meganɔ wò agbadɔ me o.
15 Ekema àte ŋu afɔ ta dzi mokakamanɔmee;
Àli ke sesĩe, eye màvɔ̃ o.
16 Ekema àŋlɔ wò hiãkame be;
Àɖo ŋku edzi ko abe tsi siwo si va to ŋuwò yi ene.
17 Wò agbe me akɔ wu ŋdɔkutsu dzatsɛ;
Eye eme viviti anɔ abe ŋdikekeli ene.
18 Kakaɖedzi anɔ asiwò, elabena mɔkpɔkpɔ li,
Àtsa ŋku godoo, eye àmlɔ anyi aɖe dzi ɖi.
19 Àmlɔ anyi, eye ame aɖeke mado vɔvɔ̃ na wò o,
Ke boŋ ame geɖe abia amenuveve tso gbɔwò.
20 Gake ame vɔ̃ɖiwo ya ƒe ŋku atsi;
Womakpɔ bebeƒe aɖeke o,
Eye woƒe mɔkpɔkpɔ koe nye ku.”

Hiob 12
1 Eye Hiob ɖo eŋu be:
 2 “Nyateƒee, miawo koe nyaa nu,
Eye ne mieku ko la, nunya hã nu yi kpli mi!
 3 Nye hã mesea nu gɔme.
Nyemebɔbɔ ɖe anyi wu mi o,
Ame kae menya nu siawo o?
 4 Mezu alɔmeɖenu na xɔ̃nyewo,
Nye, ame si le Mawu yɔm be wòatɔ nam.
Ame dzɔdzɔe si ŋu fɔɖiɖi mele o la zu alɔmeɖenu.
 5 Ame si le dziɖeɖi me la doa vlo hiãkame,
Esusuna be ame siwo ƒe afɔ meli sesĩe o koe hiã tuna.
 6 Adzoblasuwo ƒe agbadɔwo ŋu fa,
Eye ame siwo doa dziku na Mawu la le dedie,
Ame siwo ƒe mawu le woƒe asiwo me.
 7 Taflatsɛ, bia lãwo se, eye woafia nu wò;
Kple dziƒoxewo hã, eye woagblɔe na wò.
 8 Alo trɔ ɖe anyigba ŋu, ekema afia nu wò;
Eye ƒumelãwo atoe na wò.
 9 Wo dometɔ kae menya be
Afetɔ ƒe asie wɔ esia o?
10 Eya si mee nu gbagbewo katã ƒe agbe,
Kple amegbetɔwo katã ƒe gbɔgbɔ le.
11 Ðe to medoa nya kpɔna,
Abe ale si aɖe ɖɔa nu kpɔna ene oa?
12 Menye ame tsitsiwo gbɔe nunya tso aƒe ɖo oa?
Eye menye agbe didie hea gɔmesese vanɛ oa?
13 Eya sie nunya kple alɔkame sesẽ le;
Adaŋudede kple gɔmesese bɔ ɖe esi.
14 Ne egbã nane la, womegatea ŋu tunɛ o;
Nu si wòtu la, ame aɖeke mete ŋu ʋunɛ o.
15 Ne eɖo asi tsidzadza dzi la, ku ɖina;
Eye ne eɖe asi le eŋu la, eɖɔna ɖea anyigba la.
16 Eya sie ŋusẽ kple nunya vavãtɔ le;
Eye etɔe ame si tra mɔ kple ame si kplɔ ame trae la siaa nye;
17 Enana adaŋudelawo tsia afɔ ƒuƒlu,
Eye wònana ʋɔnudrɔ̃lawo tsia bome.
18 Etua ka si fiawo tsɔ bla amewo la ɖa,
Eye wòtsɔa alidziblaka blaa ali dzi na wo.
19 Enana nunɔlawo zɔa afɔ ƒuƒlu,
Eye wòɖea zi le ame siwo ƒe ŋusẽ li ke la te;
20 Edea ga nu na aɖaŋuɖola bibiwo,
Eye wòɖea nunya le tagbɔ na ame tsitsiwo;
21 Etrɔa vlododo kɔna ɖe bubumewo dzi,
Eye wònana ŋusẽtɔwo gbɔdzɔna;
22 Eɖea nu goglo siwo le viviti me la ɖe go,
Eye wòhea blukɔ vaa kekeli nu;
23 Enana dukɔwo zua gã, ne wòatsrɔ̃ wo;
Enana dukɔwo kekea ta, ne wòana woayi aboyo me.
24 Exɔa nugɔmesese le dukɔwo ƒe kplɔlawo si,
Eye wònana wotsaa tsaglãla le gbegbe, afi si mɔ aɖeke mele o.
25 Wotsaa asi blukɔ me, afi si kekeli aɖeke mele o;
Eye wònana wonɔa yiyim sagasaga abe ahamulawo ene.

Hiob 13
1 ““Nyateƒee, nye ŋku kpɔ nu siawo katã,
Nye towo see eye wose wo gɔme.
2 Nu si mienya la, nye hã menyae;
Nyemebɔbɔ ɖe anyi wu mi o.
3 Ke madi be maƒo nu kple Ŋusẽkatãtɔ la ŋutɔ;
Madi be maʋli ɖokuinye ta le Mawu gbɔ.
4 Ke miele ŋunye gblẽm kple alakpanyawo;
Gbedala dzodzrowo mi katã mienye.
5 Ne ɖe miazi ɖoɖoe kura la,
Anye ne woabui nunyae na mi hafi.
6 Meɖe kuku, mise ɖokuinyenuɖenyawo,
Eye milé to ɖe nye nuyiwo ƒe kokoƒoƒowo ŋu.
7 Ðe miagblɔ nya madzɔmadzɔ ɖe Mawu nua,
Eye ɖe miaƒo nu alakpatɔe ɖe enua?
8 Ðe miebe yewoade edzi,
Alo be yewoaxɔ nya ɖe Mawu vavã la nua?
9 Ne edzro mia me kpɔ la, ɖe eme anyo na mia?
Alo ɖe miaflui abe ale si woflua amegbetɔ enea?
10 Aka mo na mi godoo,
Ne miete kpɔ be yewoade ame dzi le adzame;
11 Ðe eƒe gãnyenye mana miadzo haha
Eye eƒe ŋɔdzi nalé mi oa?
12 Miaƒe nya gã nya gãwo nye lodonya gbɔlowo sɔŋ;
Miaƒe ametakpɔnuwo nye anyi dzro ko.
13 Mizi ɖoɖoe le ŋkunyeme, ne maƒo nu.
Eye nu sia nu si be yeadzɔ ɖe dzinye la, nedzɔ!
14 Nu ka tae metsɔ ɖokuinye de afɔku me,
Eye metsɔ nye agbe ɖo nye asiƒome?
15 Togbɔ be awum hã la, makpɔ esinu;
Maʋli ɖokuinye ta le eŋkume.
16 Eya koe axɔ nam,
Elabena mawumavɔ̃la aɖeke mava eŋkume o.
17 Milé to ɖe nye nyawo ŋu nyuie;
Miƒu to anyi miase nye nyagbɔgblɔwo.
18 Kpɔ ɖa! Metsɔ nye nya va tu anyi;
Menyae nyuie be tɔnye adzɔ.
19 Ame kae ate ŋu ahe nya kplim?
Ðeko maku nenye be mezi kpi!
20 Oo Mawu, nu eve ko biam mele tso asiwò,
Ekema nyemaɣla ɖokuinye le ŋkuwòme o:
21 Ðe wò asi si sẽ ɖe dzinye la ɖa,
Eye mègana ŋɔdzi si le ŋuwò la natso dzika ƒo nam o.
22 Wò ya yɔm ko, ne matɔ na wò;
Alo na nye boŋ maƒo nu, ne wò nàɖo eŋu nam.
23 Agɔ kae medze, eye nu vɔ̃ kae mewɔ?
Na manya nye dzidada kple nye nu vɔ̃.
24 Nu ka tae nèɣla wò ŋkume ɖem,
Eye nèle buyem wò futɔe?
25 Ðe nèbe yeado voɖi na aŋgba dzro si ʋu ya la
Alo anya ahɔ̃liti ƒuƒu dzro ɖe nua?
26 Elabena èle nutsotso sesẽwo ŋlɔm ɖi ɖe ŋunye,
Eye nèna mele nye ɖevime vodadawo ŋuti fe xem.
27 Èbɔ pã nye afɔwo,
Èléa ŋku ɖe nye mɔwo katã ŋu tsitotsito;
Eye nède dzesi nye afɔɖoƒewo katã.
28 Eya ta amegbetɔ nyunyɔ abe nu vóvo ene,
Abe avɔ si agbagblaʋui ɖu keŋ ene.

Hiob 14
1 “Amegbetɔ nyɔnu tɔ dzidzia,
Eƒe agbe le kpuie eye wòyɔ fũu kple fukpekpe.
2 Edona abe seƒoƒo ene, eye wòyrɔna;
Eva yina abe vɔvɔli ene, eye wòbuna.
3 Ɛ̃, ame sia tɔgbi ŋue nèke ŋku ɖo,
Eye nèkplɔe yi ʋɔnui.
4 Ame kae ate ŋu ana ame dzadzɛ nado tso ame si mele dzadzɛ o me?
Ame aɖeke mate ŋui o!
5 Ne woɖo eƒe ŋkekewo ko la,
Ekema gbɔwòe eƒe ɣletiwo ƒe xexlẽme le;
Èɖo seƒe nɛ, ne wòagagbɔ eŋu o.
6 Ðe ŋku ɖa le eŋu, ne wòagbɔ ɖe eme,
Va se ɖe esime wòwu eƒe ŋkekewo nu abe ale si apaɖila wua eƒe ŋkeke nui ene.
7 Elabena mɔkpɔkpɔ li na ati gɔ̃ hã.
Ne wolãe la, agadze,
Eye eƒe alɔwo magbe toto o.
8 Ne eƒe ke do xoxo le to me,
Eye eƒe takpo ku ɖe to me hã la,
9 Ne tsi nya ʋẽ ɖee ko la, agadze;
Eye wòagato alɔ abe ati fẽ ene.
10 Ke ne ame ku la, wotsɔnɛ mlɔa anyi wɔnamanɔŋutɔe;
Ne amegbetɔ mia nu la, afi kae woagakpɔe le?
11 Tsiwo nona le atsiaƒu me,
Tɔsisi miena, eye eme ƒuna.
12 Amegbetɔ hã mlɔa anyi, eye megafɔna o.
Womanyɔ o, va se ɖe esime dziƒo nu yi,
Eye womanyɔ wo tso woƒe alɔ̃dɔdɔ me o.
13 Oo, ne ɖe nàɣlam ɖe Tsiẽƒe,
Nàdzram ɖo va se ɖe esime wò dziku nu nafa,
Nàɖo ɣeyiɣi nam, eye nàɖo ŋku dzinye ɖe!
14 Ne ame ku la, ɖe wòagagbɔ agbea?
Le nye dziziziŋkekewo katã me la, manɔ lalam
Va se ɖe esime gbɔdzɔe nava nam.
15 Àyɔm, eye matɔ na wò.
Wò asinudɔwɔwɔ ƒe nu adzro wò vevie.
16 Ke fifia la, èle nye afɔɖeɖewo xexlẽ dzi;
Nye nu vɔ̃ ko ŋue nèléa ŋku ɖo.
17 Ède nye dzidada kotoku me hesa enu goŋgoŋ,
Eye nètre nye vodada la nu.
18 Ale si to gɔ̃ hã ŋena dzea eme hetua wɔ
Eye agakpe glina ɖa le eteƒe,
19 Ale si tsi nyia kpewo kura gɔ̃ hã
Eye tsidzadza kplɔa anyigbakewo dzonɛ la,
Nenemae nègblẽa amegbetɔ si kuna la ƒe mɔkpɔkpɔ mee.
20 Èkpɔa ŋusẽ ɖe edzi va se ɖe esime enu yi;
Ètrɔa eƒe dzedzeme bubui henyanɛ ɖona ɖa.
21 Ne wode bubu viawo ŋu hã, menyana o;
Eye ne woɖi gbɔ wo hã, medzea sii o.
22 Esi eƒe ŋutilã kpɔtɔ li koe wòsea veve;
Eƒe agbenɔɣi koe wòxaa nu.”

Hiob 15
1 Eye Temantɔ Elifaz ɖo eŋu be:
 2 “Ðe nunyala atsɔ nya gbɔlowo sɔŋ aɖo nya ŋua,
Alo ɖe wòatsɔ ɣedzeƒeya ayɔ eƒe dɔ mea?
 3 Mokanamenyawo ɖeɖe maɖe vi aɖeke o,
Eye tsɔɖui aɖeke mele nuƒoƒo gbɔlo me o.
 4 Èna mawuvɔvɔ̃ me gbɔdzɔ,
Eye nèna ŋugbledede le Mawu ŋu yi to.
 5 Elabena wò vodada ye fiaa mɔ nya si nègblɔna,
Eye nètia nuƒoƒo ayetɔe.
 6 Wò ŋutɔ wò nue le fɔ bum wò, menye nyee o;
Wò ŋutɔ wò nuyiwoe nye ɖasefo ɖe ŋuwò.
 7 Wòe nye ame gbãtɔ wodzi loo,
Alo ɖe nètre dzɔdzɔ na togbɛwoa?
 8 Ðe nèsea Mawu ƒe nya ɣaɣlawoa,
Alo wò ɖeka gbɔ koe nunya tso aƒe ɖoa?
 9 Nu ka koŋ nènya, si míawo ya míenya o?
Nu ka gɔmee nèse, si gɔme míawo ya míese o?
10 Ta ƒowɔ kple amegãɖeɖiwo le mía dome,
Ame siwo tsi wu fofowò gɔ̃ hã.
11 Ðe Mawu ƒe akɔfanyawo,
Alo eƒe nya siwo wògblɔ tufafatɔe la, mesɔ gbɔ na wò oa?
12 Nu ka tae nèna wò dzi le blewòm,
Eye nu ka tae wò ŋku biã hɛ̃ le dziku me?
13 Elabena ètrɔ wò dziku ɖe Mawu ŋu,
Eye nèna nya siawo tɔgbi le dodom le nuwò.
14 Nu kae amegbetɔ nye, be wòanɔ dzadzɛ,
Alo be nyɔnu tɔ dzidzia nanye ame dzɔdzɔe?
15 Kpɔ ɖa! Mexɔ eƒe kɔkɔetɔwo ke hã dzi se o,
Eye dziƒowo ŋutɔ hã medza le eŋkume o.
16 Ʋuu keke wòahayi ame nyɔŋu, ame vlo,
Ame si le nu madzɔmadzɔ nom abe tsi ene la nye gea?
17 Magblɔe na wò sea; ɖo tom!
Na magblɔ nu si teƒe mekpɔ la na wò,
18 Nu si nunyalawo se tso wo fofowo gbɔ,
Eye womeɣla eƒe ɖeke o.
19 Woawo koe wotsɔ anyigba la na,
Eye ame tutɔ aɖeke meto wo dome o.
20 Ame vɔ̃ɖi kpea fuwo ƒe fu le eƒe ŋkekewo katã me,
Le ƒe siwo katã wodzra ɖo ɖi na ŋutasẽla la me.
21 Esea gbeɖiɖi dziŋɔwo le eƒe to me;
Adzoblasuwo va dzea edzi le ŋutifafaɣi.
22 Mexɔe se be yeasi le viviti la nu o;
Elabe yi koe le elalam.
23 Ele tsatsam le nuɖuɖu dim—afi kae ɖe le?
Enyae nyuie be vivitidogbe la tu aƒe.
24 Xaxa kple veve doa ŋɔdzi nɛ;
Wokpe edzi abe fia si ho aʋa ene.
25 Elabena edo eƒe asi ɖe Mawu ŋutɔ ŋu
Eye wòte kpɔ be yeatsi tsitre ɖe Ŋusẽkatãtɔ la ŋu;
26 Elũ ɖe edzi kɔlialiatɔe
Kple eƒe akpoxɔnu titri sesẽ la;
27 Eƒe mo da ami kpɔnyɔɔ,
Eye wòda ami srɔsrɔsrɔ ɖe ali gbɔ;
28 Du siwo woava gbã la mee wòle,
Aƒe siwo me amewo manɔ o,
Siwo ava zu glikpowo.
29 Makpɔ ho o, eƒe kesinɔnuwo mali ke o,
Eye eƒe nunɔamesiwo magbagba ɖe anyigba dzi o.
30 Masi le viviti nu o;
Dzoƒaɖe ana eƒe alɔ nayrɔ,
Eye Mawu ƒe numegbɔgbɔ alɔe ɖe nu.
31 Megable eɖokui be yeaɖo dzi ɖe nu si nye tofloko ŋu o,
Elabena nu maɖevi koe wòakpɔ;
32 Ava eme hafi eƒe ŋkeke naɖo,
Eye eƒe atilɔ mada ama akpɔ o.
33 Anɔ abe wainka si dudu eƒe waintsetse gbogbowo kɔ ɖi ene,
Abe amiti si dudu eƒe seƒoƒowo kɔ ɖi ene.
34 Elabena mawumavɔ̃lawo ƒe ha madzi ɖe edzi o,
Eye dzo afiã zãnuxɔlawo ƒe agbadɔwo.
35 Wofɔ fuɖename ƒe fu, wodzi nu vɔ̃ɖi,
Eye beble sɔŋ koe tsi ɖe dɔ me na wo.”

Hiob 16
1 Hiob ɖo eŋu be:
 2 “Mese nya siawo tɔgbi geɖe.
Akɔfala siwo doa nuxaxa na ame koe mi katã mienye!
 3 Ðe nya gbɔlo siawo nu ava tsoa?
Nu kae ve wò be nèle nya ŋu ɖom alea?
 4 Nye hã mate ŋu aƒo nu abe miawo ke ene.
Ne ɖe miele tenyeƒe la,
Anye ne mate ŋu agblɔ nya gã nya gãwo ɖe mia ŋu alea
Eye mate ŋu aʋuʋu ta ɖe mia ŋu hafi.
 5 Gake ɖe matsɔ nye numenyawo ado ŋusẽ mi,
Eye nye akɔfanyawo afa dzi na mi boŋ.
 6 Ne meƒo nu la, nye vevesesea dzi maɖe akpɔtɔ o,
Eye ne mezi ɖoɖoe hã, ɖe wòafa nama?
 7 Ke azɔ ena wɔna vɔ le ŋunye;
Eye wòtsrɔ̃ nye aƒekɔ la katã.
 8 Wò asi su dzinye hã, eye wòzu ɖaseɖiɖi,
Ale be meɖi ku eye nye kuɖiɖi sia tso hele ɖase ɖim ɖe mo nam kã.
 9 Eƒe dɔmedzoe vuvum ʋayaʋaya, eye wòlém ɖe dɔme.
Eɖua aɖukli ɖe ŋunye.
Nye ketɔ la klẽ ŋku ɖe ŋunye.
10 Woke woƒe nu baa ɖe ŋunye,
Eye woƒo tome nam vlodoametɔe;
Wolɔ hoo ɖe ŋunye.
11 Mawu gblẽm ɖe ŋutsuviwo si me,
Eye wòtsɔm de asi na ame vɔ̃ɖiwo.
12 Meli bɔkɔɔ, gake egbãm nyanyanya;
Elé ʋume nam, eye wòtsɔm xlã ɖi megbã ʋayaʋaya;
Etsɔm ɖo nudzidzea na eɖokui.
13 Eƒe aŋutrɔdalawo ƒo xlãm;
Eŋɔ nye ayikuwo nublanuimakpɔmakpɔe;
Egbã nye vevegoe kɔ ɖe anyi.
14 Eŋɔm flofloflo;
Elũ ɖe dzinye abe aʋawɔla ene.
15 Metɔ akpanya do,
Eye meɖi nye bubu ɖe ke me.
16 Mefa avi ʋuu nye mo do ʋusrã,
Eye blukɔ tsyɔ nye aɖabawo dzi,
17 Evɔ nu madzɔmadzɔ aɖeke mele nye asiwo me o
Eye nye gbedodoɖa le dzadzɛ hafi.
18 Oo anyigba, mègatsyɔ nye ʋu dzi o!
Eye gbɔɖemeƒe meganɔe na nye ɣlidodo o!
19 Fifia gɔ̃ hã, nye ɖasefo le dziƒowo;
Ame si aʋli tanye la le dzi ʋĩi.
20 Xɔ̃nyewo le fewu ɖum le ŋunye
Esi nye ŋkuwo le aɖatsi fam na Mawu.
21 Ne ɖe ame aɖe atso nya me le amegbetɔ kple Mawu dome,
Abe ale si wotsoa nya me le ame kple ehavi dome ene ɖe!
22 Elabena ƒe ʋɛ aɖewo koe gasusɔ,
Eye maɖo ta demagbɔnugbe.

Hiob 17
1 “Nu te nye gbɔgbɔ ŋu belibeli, nye ŋkekewo nu yi;
Yɔdo koe le lalayem.
2 Fewuɖulawo ƒo xlãm,
Eye nye ŋkuwo le woƒe aglãdzedzewo teƒe kpɔm.
3 Meɖe kuku, wò ŋutɔ xɔ nya ɖe nunye.
Ame kae gali ana asim ahada megbe nam?
4 Elabena èɣla nunya ɖe woƒe dzi;
Esia tae mèna woƒe alɔ de dzi o.
5 Ame aɖe agblɔ be yeama nu kple ye xɔlɔ̃wo,
Evɔ viawo ƒe ŋku tsi.
6 Etsɔm wɔ alɔmeɖenu na dukɔwo,
Ale be amewo le ta ɖem ɖe mo nam.
7 Vevesese na nye ŋku dzi tsyɔ,
Eye nye ŋutinuwo le abe vɔvɔli ko ene.
8 Ame dzɔdzɔe ƒe mo wɔ yaa le esia ta,
Eye mawumavɔ̃la la ƒe nuwɔna tena ɖe ame maɖifɔ la dzi.
9 Ame dzɔdzɔe léa eƒe mɔwo me ɖe asi,
Eye ame si ƒe asi me dza la kpɔa ŋusẽ geɖe.
10 Ke mi katã migayi miaƒe nyaheheawo dzi ko,
Elabena nye ya nyemekpɔ nunyala aɖeke le mia dome o.
11 Nye ŋkekewo nu yi;
Nye ɖoɖowo kple nye dzimedidiwo me gblẽ keŋ.
12 Wotsɔa zã wɔa ŋkekee,
Eye wogblɔna be, ‘Kekeli megale didiƒe o, le esi viviti do ta.’
13 Ne mele lalam hã la, Tsiẽƒe koe anye nye aƒe;
Viviti mee mele nye aba ɖo ge ɖo.
14 Mayɔ yɔdo be, ‘Wòe nye fofonye!’
Eye mayɔ nyéwo be, ‘Danye kple nɔvinyenyɔnu!’
15 Ekema afi ka gɔ̃e nye mɔkpɔkpɔ le?
Ame kae ate ŋu akpɔe ne mɔkpɔkpɔ aɖe gali nam?
16 Tsiẽƒe ƒe gametiwo gbɔ kee woakpɔe le,
Ne nye kplii siaa míeyi to me ɖekae.”

Hiob 18
1 Suatɔ Bildad ɖo eŋu be:
 2 “Ɣekaɣi gɔ̃ miadzudzɔ nya siawo gbɔgblɔ?
Mise nu gɔme, ekema míate ŋu aƒo nu.
 3 Nu ka ŋuti woabu mí lãwoe,
Eye míezu bometsilawo le mia ŋkume?
 4 Ne èvuvu ɖokuiwò ʋayɛʋayɛ le wò dɔmedzoe me hã,
Ðe woagblẽ anyigba la ɖi le tawò,
Alo ɖe agakpe aho le eteƒea?
 5 Ɛ̃, ame vɔ̃ɖi ƒe akaɖi atsi,
Eye eƒe dzo mabi o.
 6 Kekeli si le eƒe agbadɔ me ado viviti,
Eye akaɖi si le etame hã atsi.
 7 Eƒe azɔlizɔzɔ kãkãkã la me agbɔdzɔ,
Eye eya ŋutɔ ƒe adaŋudede aƒui anyi.
 8 Elabena eƒe afɔ akplɔe ade ɖɔ me,
Eye wòazɔ ade afɔ ɖɔkawo me.
 9 Mɔ̃ alé afɔkpodzi nɛ;
Mɔ̃ka alée sesĩe.
10 Woɣla adoboli ɖe anyigba nɛ,
Eye wotre mɔ̃ ɖe etoƒe.
11 Ŋɔdzinuwo doa voɖi nɛ le goawo katã me
Eye woyɔnɛ ɖe nu kplikplikpli.
12 Ŋusẽ vɔ le eŋu kura,
Afɔku ana wòanɔ ya mum sagasaga.
13 Eƒe lãyi vɔ le eŋu;
Dɔléle vɔ̃ɖitɔ kekeake ɖu eƒe abɔwo kple afɔwo.
14 Wohee do goe le eƒe agbadɔ si me wòle dedie le la me,
Eye wokplɔe yi na ŋɔdziwo ƒe fia.
15 Ame tutɔwoe anɔ eƒe agbadɔ me;
Woakaka dzokpe ɖe eƒe aƒe dzi.
16 Eƒe kewo aƒu le to me,
Eye eƒe alɔwo ayrɔ le dzi.
17 Womagaɖo ŋku edzi le anyigba dzi o,
Eye woaŋlɔ eƒe ŋkɔ be le ablɔwo me.
18 Woatu asii tso kekeli me aɖo ɖe viviti me
Eye woanyae ɖa le anyigba wɔnu la dzi.
19 Vi alo dzidzime aɖeke manɔ esi le eƒe dukɔ la dome o,
Eye ame aɖeke makpɔtɔ nɛ ɖe enɔƒe o.
20 Ne eƒe ŋkeke de la, Ɣetoɖoƒetɔwo ƒe nu aku
Eye dzidzi aƒo Ɣedzeƒetɔwo.
21 Esiae dzɔna ɖe nu gbegblẽ wɔla ƒe agbadɔ dzi
Eye aleae ame si menya Mawu o la ƒe nɔƒe zunae.”

Hiob 19
1 Eye Hiob ɖo eŋu bena:
 2 “Va se ɖe ɣekaɣie mianɔ nuxaxa dom na nye luʋɔ,
Eye miatsɔ nyawo anɔ dzi gbãm nam?
 3 Zi ewo sɔŋ ye nye esia mieka mo nam;
Ŋu mele mia kpem be miele nu tum kplim alea o.
 4 Eye ne nyateƒee wònye be meda vo hã la,
Dzinyee vodada la anɔ.
 5 Ne vavãe miebe yewoakɔ mia ɖokui ɖe dzi agbɔ tanye,
Eye miebe medze na vlododo sia la,
 6 Ekema minyae be, Mawue kplɔm trae,
Eye wòtsɔ eƒe ɖɔ ɖem.
 7 Kpɔ ɖa! Mele ɣli dom be, ‘Ŋutasesẽe!’ ke wometɔ nam o;
Mele ɣli dom be woaxɔ nam, ke wometso afia dzɔdzɔe nam o.
 8 Eɖo gli xe mɔ nam, nyemate ŋu aflɔe o;
Ena viviti do ɖe nye toƒewo keŋ.
 9 Eklo bubu le ŋunye
Eye wòɖe fiakuku le ta nam.
10 Egbãm kɔ ɖi, eye nunye yi kura;
Eye wòho nye mɔkpɔkpɔ abe ati ene.
11 Eƒe dziku fla ɖe ŋunye,
Eye wòle buyem eƒe ketɔe.
12 Eƒe aʋakɔwo ƒo ƒu va ɖe to ɖem,
Eye woƒu asaɖa anyi ɖe nye agbadɔ ŋu godoo.
13 Eɖe nye ŋutɔ nɔvinyewo ɖa le ŋunye,
Eye nye ame nyanyɛwo trɔ ɖa le ŋunye.
14 Xɔ̃nye veviwo gɔ̃ hã megali o,
Eye ame nyanyɛ kekeake hã ŋlɔm be.
15 Amedzro siwo va dze aƒenye me kple nye kosiwo ke hã le buyem ame tutɔe;
Mezu amedzro le wo ŋkume.
16 Meyɔ nye dɔla, gake metɔ o;
Metsɔ nye nu ɖe kuku nɛ be eƒe dɔme natrɔ ɖe ŋunye.
17 Nye nu me le ya ɖem ɖe srɔ̃nye,
Eye mele ʋeʋẽm ɖe nɔvinyewo.
18 Ðeviwo ke hã le vlo domem;
Ne menya tso ko la, wotea fewuɖuɖu le ŋunye.
19 Xɔ̃nye veviwo katã tsrim vevie,
Eye ame siwo melɔ̃na la tso ɖe ŋunye.
20 Nye ŋutigbalẽ kple lãkusi lé ɖe nye ƒuwo ŋu,
Eye meku kloe.
21 Oo, mi xɔ̃nyewo, mikpɔ nye nublanui, mikpɔ nublanui nam dzro,
Elabena Mawue do asi ɖe gbɔnye.
22 Nu ka ŋutie miele yonyeme tim abe Mawu ke ene,
Hele nu tum kplim madzudzɔmadzudzɔe?
23 Oo, ne ɖe woahaŋlɔ nye nyawo ɖi,
Oo, ne ɖe woahade wo agbalẽ me ɖe!
24 Ne ɖe woatsɔ ganuŋlɔti kple tsumi,
Aɖe wo ɖe agakpe dzi tegbee la, ne anyo ŋutɔ!
25 Elabena menyae nyuie be nye xɔnametɔ le agbe;
Ava mlɔeba, eye wòatɔ ɖe anyigba dzi.
26 Togbɔ be nye ŋutigbalẽ gblẽ keŋkeŋ,
Evɔ mekpɔtɔ nye ŋutilã hã la, makpɔ Mawu,
27 Nye ŋutɔ makpɔe,
Nye ŋutɔ nye ŋkuwo akpɔe, menye ame bubu o.
Gake le ememe la eglom!
28 Elabena miele gbɔgblɔm be, ‘Mɔ ka nue míele eyome tim le?’
Esi miebe nya la ƒe kè le gbɔnye.
29 Yi nedo dzikatsoƒoe na miawo ŋutɔwo,
Elabena yi wotsɔna hea toe na vodalawo;
Ne mianyae be ʋɔnudrɔ̃la aɖe li.”

Hiob 20
1 Eye Naamatɔ Zofar ɖo eŋu be:
 2 “Nu siwo le fu ɖem na nye susue ƒoe ɖe nunye be maɖo nya ŋu
Elabena metsi dzodzodzoe le ɖokuinye me.
 3 Mese mokaname aɖe si nye dzu nam;
Eye nye nugɔmesese ƒoe ɖe nunye be maɖo eŋu.
 4 Ðe wòle be nànya esia xoxoxo,
Elabena aleae wòle tso esime wowɔ amegbetɔ ɖe anyigba dzi,
 5 Be ame vɔ̃ɖiwo ƒe aseyetsotso nu mesena yina o,
Eye be ɣeyiɣi kpui aɖe koe mawumavɔ̃la ƒe dzidzɔ nɔa anyi.
 6 Ne eƒe gãnyenye kɔ yi ɖatɔ dziƒo ke,
Eye eƒe ta yi ɖatɔ alilikpowo hã la,
 7 Aɖo agu ɖikaa abe eya ŋutɔ ƒe afɔdzi ene;
Ame siwo kpɔnɛ tsã la agblɔ be, ‘Afi kae wòle?’
 8 Enu ayi abe drɔ̃e ene, eye womagakpɔe o;
Abú kura abe zãmeŋutega ene.
 9 Ŋku si kpɔe la magakpɔe akpɔ o,
Eye eƒe nɔƒe hã magakpɔe azɔ o.
10 Viawo adi be ame dahewo nave yewo nu,
Eye eya ŋutɔ ƒe asi atrɔ kesinɔnuwo ana amewo.
11 Ðekakpuimeŋusẽ kpɔtɔ le eƒe ƒuwo ŋu,
Ke atsɔe ayi ketu me.
12 Ne nu vɔ̃ɖi vivina le nu me nɛ,
Eye wòɣlae ɖe eƒe aɖe te,
13 Ne ele enu vivim eye wògbe asiɖeɖe le eŋu
Eye wòkpɔtɔ le nu me nɛ hã la,
14 Eƒe nuɖuɖu atrɔ azu veve le dɔ me nɛ;
Eye wòatrɔ azu ƒli ƒe aɖi le lãme nɛ.
15 Emi kesinɔnu, ke adzɔe;
Mawu aɖee tso eƒe dɔ me ke.
16 Ano ƒli ƒe aɖi;
Eye dzakpata ƒe tsó awui.
17 Magakpɔ tɔʋuwo akpɔ o,
Magakpɔ tɔʋu siwo me anyitsi kple notsi kpekẽ le sisim le la o.
18 Agbugbɔ nu siwo su esi la ana, eye maɖu wo o;
Maɖu viɖe si wòkpɔ tso eƒe asitsatsa me o.
19 Elabena egbã ame dahewo gudugudu hegblẽ wo ɖi;
Exɔ aƒe si metso o la sesẽe.
20 Gake makpɔ gbɔdzɔe aɖeke le eɖokui me o;
Eye eƒe kesinɔnuwo maxɔ nɛ o.
21 Naneke masusɔ nɛ wòaɖu hamham o;
Esia tae nu madze edzi nɛ eteƒe nadidi o.
22 Ne nu bɔ ɖe esi kpaŋkpaŋ la, hiã atui;
Eye vɔ̃ aƒo ɖe edzi bibibi.
23 Ne eɖu nu ɖi ƒo la,
Ekema Mawu atrɔ eƒe dziku helĩhelĩ akɔ ɖe edzi,
Eye wòadudui akɔ ɖe edzi wòaɖo keke eƒe dɔkawo me ke.
24 Ne esi le gayibɔlãnuwo nu la,
Akɔbliŋutrɔwo aƒo ɖee.
25 Eho aŋutrɔ si ƒo ɖe dzime nɛ,
Ehe lãnu dadzo la doe tso eƒe vevegoe me,
Eye ŋɔdzi lée.
26 Viviti tsiɖitsiɖi le eƒe kesinɔnuwo lalam;
Dzo si ame aɖeke meƒlɔ ɖo o la afiãe keŋkeŋ;
Eye afɔku dziŋɔ le ame si kpɔtɔ ɖe eƒe agbadɔ me la lalam.
27 Dziƒo aklo nu le eƒe vodada dzi;
Eye anyigba atso ɖe eŋu.
28 Tsiɖɔɖɔ akplɔ eƒe aƒe adzoe;
Tsidzadza gãe wòanye le Mawu ƒe dzikudogbe la.
29 Esiae nye ame vɔ̃ɖi ƒe gome tso Mawu gbɔ,
Eƒe domenyinu si Mawu dzra ɖo ɖi nɛ.”

Hiob 21
1 Hiob ɖo eŋu be:
 2 “Milé to ɖe nye nyawo ŋu nyuie;
Eye mina esia boŋ nanye akɔfafa tso mia gbɔ nam.
 3 Migbɔ dzi ɖi nam maƒo nu;
Eye ne meƒo nu vɔ la, ekema miate ŋu aɖe alɔme le ŋunye faa.
 4 Amegbetɔe mele konyi fam naa?
Ne amegbetɔe la, magate ŋu agbɔ dzi ɖia?
 5 Mitrɔ mo ɖe gbɔnye, miaƒe nu neku;
Eye mitsɔ asi ɖo nu.
 6 Ne mebu nu sia ŋu la, eɖea fu nam vevie,
Eye medzona nyanyanya.
 7 Nu ka tae ame vɔ̃ɖiwo yia edzi nɔa agbe,
Wotsina kua amegã, eye woƒe kesinɔnu dzina ɖe edzi?
 8 Wo viwo nɔa wo ŋu ɣesiaɣi,
Eye wokpɔa woƒe dzidzimeviwo.
 9 Woƒe aƒewo le dedie, ŋɔ medzia wo o,
Eye Mawu mehea to na wo kple eƒe ameƒoti o.
10 Woƒe nyitsuwo meyɔa asi dzodzro o;
Woƒe nyinɔwo dzina, eye fu megena le wo ƒo o.
11 Wo viŋutsuwo doa go abe lãha ene,
Eye wo vi suewo nɔa kpo tim nɔa yiyim.
12 Wodzia ha ɖe axatsɛ kple saŋku ŋu
Eye wonɔa dzidzɔ kpɔm ɖe dze ƒe ɖiɖi ŋu.
13 Woɖua agbe le woƒe agbemeŋkekewo me
Eye woyia Tsiẽƒe le ŋutifafa me.
14 Ke wogblɔna na Mawu vavã la be, ‘Ðe asi le mía ŋu!
Míedi kura be míanya wò mɔwo o.
15 Ame kae Ŋusẽkatãtɔ la nye, be míasubɔe?
Viɖe kae wòanye na mí be míadze sii?’
16 Menyae be woƒe dzidzedzekpɔkpɔ mele woawo ŋutɔwo si me o.
Ame vɔ̃ɖiwo ƒe adaŋudede metsɔ gbɔnye o.
17 Zi nenie ame vɔ̃ɖiwo ƒe akaɖi tsina?
Zi nenie afɔku dzɔna ɖe wo dzi?
Eye zi nenie Mawu hea tsɔtsrɔ̃ vaa wo dzi le eƒe dziku me?
18 Ðe wova le abe gbe ƒuƒu si ya lɔ ɖe nu ene kpɔa,
Alo abe tsro si ahom kplɔ dzoe ene kpɔa?
19 Mawu ana vɔ̃wɔla ƒe tohehe natu viawo;
Gake Mawu neɖo eteƒe nɛ, ne wòanya ale si wòle.
20 Eya ŋutɔ ƒe ŋkuwo nekpɔ eƒe gbegblẽ teƒe,
Eya ŋutɔ neno Ŋusẽkatãtɔ la ƒe dɔmedzoe helĩhelĩ la.
21 Elabena ɖe wòagatsɔ ɖe le eƒe aƒemetɔ siwo wògblẽ ɖe megbe la ƒe nya me
Nenye be woɖe eƒe dzinuwo ƒe xexlẽme dzi kpɔtɔa?
22 Ðe ame aɖe ate ŋu afia nunya Mawu,
Esi wònye eyae drɔ̃a ʋɔnu ame siwo le ɖoƒe kɔkɔwoa?
23 Ame aɖe ya aku esi wòkpɔtɔ le ŋusẽ blibo me,
Esime eƒe tome fa, eye wòɖe dzi ɖi bɔkɔɔ,
24 Esime eƒe atawo da ami nyuie,
Eye ŋusẽ le eƒe ƒuwo ŋu.
25 Gake ame bubu ya anɔ nu xam ʋuu atsɔ akui,
Esime eya mese nu nyui aɖeke ƒe vivi kpɔ o.
26 Wo kple evea siaa woayi ketu me,
Eye nyéviwo anyè atsyɔ wo kple evea dzi.
27 Kpɔ ɖa! Menya nu siwo tututu susum miele
Kple tame vɔ̃ siwo ɖom miele be miatsɔ adze agɔ le dzinye.
28 Elabena miebe, ‘Afi kae ame ŋkuta la ƒe aƒe le,
Eye afi kae agbadɔ si me ame vɔ̃ɖiwo nɔ la hã le?’
29 Ðe miebia nya mɔzɔlawo se kpɔ oa?
Eye ɖe miedzro woƒe nuteƒekpɔkpɔwo me nyuie,
30 Be wokpɔa ame vɔ̃ɖi ta le vɔ̃dzɔgbe
Eye woxɔna nɛ le dɔmedzoedogbe oa?
31 Ame kae aɖe eƒe zɔzɔme agblɔ ɖe mo nɛ kã,
Eye ame kae aɖo nu si wòwɔ la teƒe nɛ?
32 Ne wokɔe yi ameɖibɔ me la,
Woanɔ eƒe yɔdo ŋu dzɔm.
33 Bali me anyikɔwo avivi enu,
Eye ameƒomea katã dze eyome,
Abe ame siwo do ŋgɔ nɛ, siwo mele xexlẽ me o la ene.
34 Nu ka tae miatsɔ nya gbɔlowo anɔ akɔ fam nam?
Miaƒe ŋuɖoɖowo nye beble sɔŋ ko!”

Hiob 22
22 Temantɔ Elifaz ɖo eŋu be:
 2 “Ðe ame ate ŋu anye viɖenu na Mawua?
Ðe viɖe le ame si si gɔmesese deto le la ŋu nɛa?
 3 Ðe Ŋusẽkatãtɔ la tsɔa ɖe le wò dzɔdzɔenyenye mea?
Alo ne fɔɖiɖi mele wò zɔzɔme ŋu o la ɖe wòɖea vi nɛa?
 4 Ðe wòahe to na wò,
Eye wòakplɔ wò ayi ʋɔnui le wò mawuvɔvɔ̃ ta?
 5 Ðe menye esi wò nu vɔ̃ɖi wɔwɔwo sɔ gbɔ
Eye seƒe meli na wò vodadawo o tae oa?
 6 Elabena èxɔ awɔbanu le nɔviwòwo si yakatsyɔ,
Eye nèɖe avɔ le amewo ŋu wotsi ama.
 7 Mènaa tsi ame siwo ŋu ɖeɖi te la wonona o,
Eye nètea abolo dɔwuitɔwo.
 8 Anyigba la zu ame si si alɔkpa sesẽ le la tɔ,
Eye ame ŋkutae nɔa edzi.
 9 Ke èɖo ahosiwo ɖa asi gbɔlo,
Eye nèna tsyɔ̃eviwo ƒe alɔ me tu.
10 Esia tae woɖo mɔ̃ ƒo xlã wò,
Eye ŋɔdzi léa wò le vo me;
11 Esia tae viviti do ɖe wò ale gbegbe be mègate ŋu le nu kpɔm o,
Eye tɔɖɔɖɔ va tsyɔ dziwò ɖo.
12 Ðe Mawu mele dziƒo ʋĩi oa?
Eye kpɔ afi si ɣletiviwo katã le ɖa, be wo gbɔ metsɔ o.
13 Ke wòa nègblɔ be: ‘Nu ka gɔ̃e Mawu nya?
Ðe wòate ŋu akpɔ nu to blukɔ me adrɔ̃ ʋɔnua?
14 Alilikpowo xe eŋkume, ale be mele nu kpɔm o,
Ðeko wòɖia tsa le dziƒo gobaa la.’
15 Ðe nèbe yealé mɔ xoxo,
Si dzi ame vɔ̃ɖiwo to la me ɖe asia?
16 Wo, ame siwo wotsrɔ̃ ɖa hafi woƒe ɣeyiɣi de,
Ame siwo ƒe gɔmeɖoanyi tsiɖɔɖɔ kplɔ dzoe?
17 Ame siwo gblɔna na Mawu vavã la be: ‘Ðe asi le mía ŋu!
Nu kae Ŋusẽkatãtɔ la ate ŋu awɔ mí?’
18 Evɔ wònye eyae tsɔ nu nyuiwo yɔ woƒe xɔwo me taŋ hafi.
(Adaŋudede vɔ̃ɖi siawo tɔgbi metsɔ gbɔnye o.)
19 Ame dzɔdzɔewo akpɔe, eye dzi adzɔ wo,
Ame maɖifɔwo aɖe alɔme le wo ŋu be:
20 ‘Wotsrɔ̃ míaƒe ketɔwo ɖa keŋ,
Eye dzo afiã woƒe nu susɔewo keŋkeŋ.’
21 Dze xɔlɔ̃e, ne nànɔ ŋutifafa me;
Ekema nu nyuiwo asu asiwò.
22 Xɔ se si do tso eƒe nu me,
Eye nàdzra eƒe nyawo ɖo ɖe wò dzi me.
23 Ne ètrɔ va Ŋusẽkatãtɔ la gbɔ la, ekema agaɖo wò te;
Ne ète nu madzɔmadzɔ wɔwɔ ɖa xaa tso wò agbadɔ gbɔ,
24 Ne ètsɔ wò sika kɔ ɖe ke me,
Eye nèkɔ Ofir sika ɖe kpewo me le tɔʋe me la,
25 Ekema Ŋusẽkatãtɔ la azu sika na wò,
Kple klosalo nyuitɔ na wò.
26 Ekema Ŋusẽkatãtɔ la ƒe nu anyo ŋuwò vevie,
Eye àwu wò mo dzi na Mawu.
27 Àƒo koko nɛ, eye wòaɖo to wò;
Eye àwɔ wò adzɔgbeɖeɖewo dzi.
28 Nu sia nu si nèɖo be yeawɔ la adze edzi na wò,
Eye kekeli aklẽ ɖe wò mɔwo dzi.
29 Elabena ne èƒo nu dadatɔe la, abɔbɔ wò ɖe anyi,
Ke axɔ na ame si bɔbɔ eɖokui ɖe anyi.
30 Axɔ na ame maɖifɔ la;
Eya ta ne wò asi me dza la, ekema axɔ na wò godoo.”

Hiob 23
1 Hiob ɖo eŋu be:
 2 “Egbe hã mato nyatoƒoe;
Ŋusẽ vɔ le ŋunye le nye hũɖeɖe ta.
 3 Oo, ne ɖe menya afi si makpɔ Mawu le ɖe!
Anye ne mayi keke enɔƒe ke.
 4 Matsɔ nye nya aɖo eŋkume
Eye mana nye nu me nayɔ fũu kple ɖokuitaʋlinyawo;
 5 Makpɔ ale si wòaɖo eŋu nam
Ne mase nya si wòagblɔ nam.
 6 Ðe wòatsɔ eƒe ŋusẽ triakɔ la awɔ avu kplima?
Ao ɖe! Aɖo tom godoo.
 7 Ekema ame dzɔdzɔe aɖɔ wo kplii dome ɖo,
Eye nye Ʋɔnudrɔ̃la agblɔ be tɔnye dzɔ, ne nyaa natɔ ɖe afi ma.
 8 Gake ne meyi ɣedzeƒe la, mele afi ma o;
Ne megatrɔ gbɔ hã, nyemele ekpɔm o.
 9 Ne ele dɔ wɔm le miame la, nyemate ŋu akpɔe o;
Ne edze ɖe ɖusime hã, nyemakpɔe o.
10 Ke hã enya nye mɔwo nyuie.
Ne edom kpɔ vɔ la, ŋunye adza abe sika nyuitɔ ene.
11 Nye afɔ to eƒe toƒewo tututu;
Melé ɖe eƒe mɔwo ŋu, eye nyemedze ɖe aga o.
12 Nyemetrɔ ɖa le se siwo do tso enu la gbɔ o.
Medzra eƒe numenyawo ɖo nyuie wu ale si wodi tso asinye.
13 Ne eɖo nane be yeawɔ la, ame kae ate ŋu axe mɔ nɛ?
Nu si dzroe wòbe yeawɔ la, ewɔnɛ.
14 Elabena awɔ nu siwo katã wòɖo ɖe ŋunye la ade goe,
Eye nu siawo tɔgbi bɔ ɖe esi.
15 Esia tae metɔtɔ le eya amea ta;
Ne mebu eya amea ŋu la, megavɔ̃nɛ ɖe edzi.
16 Mawu na dzi ɖe le ƒonye,
Eye Ŋusẽkatãtɔ la na vɔvɔ̃ ɖom.
17 Gake viviti la mena ɖoɖoe zi le nunye haɖe o,
Nenema kee nye blukɔ si tsyɔ mo nam la hã.

Hiob 24
1“Nu ka tae Ŋusẽkatãtɔ la meɖo ɣeyiɣi ɖi o?
Nu ka tae ame siwo dze sii la menya eƒe ŋkeke o?
2 Ame aɖewo ŋea liƒo ɖe eme;
Wodaa adzo lãhawo hekplɔa wo yia woƒe gbeɖuƒee.
3 Wokplɔa tsyɔ̃eviwo gɔ̃ hã ƒe tedzi dzonɛ
Eye woxɔa ahosi ƒe nyi sesẽe wɔa awɔbanui.
4 Wotua asi ame dahewo ɖa le mɔ dzi;
Eye wɔnamanɔŋutɔ siwo le anyigbaa dzi la sina bena na wo.
5 Ame dahewo ɖoa gbe nɔa nuɖuɖu dim abe gbetedzi le gbedzi ene;
Wotsana le gbegbe nɔa nuɖuɖu dim na wo viwo.
6 Ame bubu ƒe agble mee woxaa nu le,
Eye wofɔa nuku dzɔdzɔ le ame vɔ̃ɖi ƒe waingble me.
7 Womlɔa anyi amama le zã me avɔ makpɔe;
Eye naneke mele wo si woatsyɔ le vuvɔ me o.
8 Tsi ƒoa wo le towo dzi belee;
Esi bebeƒe aɖeke meli o ta la, wokuna ɖe agakpewo ŋu.
9 Woɖea tsyɔ̃evi gɔ̃ hã ɖa le no nu sesẽe;
Eye woɖea avɔ si le ame dahe ŋu gɔ̃ hã wɔa awɔbanui.
10 Ale wotsi ama le yiyim le esi avɔ mele wo si o ta,
Eye wole dɔmeɣi hegatsɔ nuku bablawo ɖe ta.
11 Wodagbana le ŋdɔgbe le gliwo domee;
Wofiãa wain le wainfiãƒewo gake tsikɔ ganɔa wo wum.
12 Kudɔƒolawo le ŋeŋem le dua me;
Eye ame siwo ŋu wode kubii la ƒe ɣli le ɖiɖim,
Gake Mawu mebui be nane gblẽ le eŋu o.
13 Ame aɖewo li siwo tsia tsitre ɖe kekeli ŋu;
Womedzea si eƒe mɔwo o,
Eye womezɔa eƒe toƒewo o.
14 Ne ŋu ke la, amewula tsona;
Eye wòwua wɔnamanɔŋutɔ kple ame dahe,
Ke le zã me la, efia fi.
15 Ŋutsu ahasitɔ ya ƒe ŋku le anyinutsyɔɣi ŋu,
Egblɔna be, ‘Ame aɖeke makpɔm o!’
Eye wòtsyɔa nu mo.
16 Adzogliwo dzea zã ɖe aƒewo ŋu;
Wodoa ʋɔ ɖe wo ɖokuiwo nu le ŋkeke me.
Womelɔ̃a kekeli ƒe nya o.
17 Elabena agudzedze le na wo abe viviti tsiɖitsiɖi ene;
Elabena wonya ale si blukɔ ƒe ŋɔdzi léa amee la nyuie.
18 Gake wo nu yina kaba abe tɔsisie kplɔ wo dzoe ene.
Woaƒo fi ade anyigba ƒe akpa si nye woƒe gome.
Womagatrɔ ayi woƒe waingblewo me o.
19 Ale si kuɖiɖi kple dzoxɔxɔ kplɔa sno si lólo dzonae la,
Nenemae Tsiẽƒe hã kplɔa nu vɔ̃ wɔlawo dzonae!
20 Dadaa aŋlɔe be, nyéviwo aɖui;
Womagaɖo ŋku edzi azɔ o.
Eye woaŋe ame madzɔmadzɔ abe ati ene.
21 Etafaa konɔ,
Eye wòwɔa fu ahosi.
22 Mawu atsɔ eƒe ŋusẽ aɖe ŋusẽtɔwo ɖa;
Togbɔ be wole tsitrenu hã, kakaɖedzi meli be woanɔ agbe o.
23 Mawu ɖea asi le wo ŋu wokana ɖe wo ɖokuiwo dzi hebuna be yewole dedie,
Gake eƒe ŋkuwo le nu sia nu si wowɔna ŋu.
24 Woado wo ɖe dzi ɣeyiɣi kpui aɖe, kasia wo nu ayi.
Wobɔbɔa wo ɖe anyi eye woɖea wo ɖa abe ame bubu ɖe sia ɖe ko ene;
Eye woŋea wo abe ale si woŋea nuku le nuŋeɣi ene.
25 Azɔ ame kae ate ŋu aɖe aʋatso nam,
Alo agblɔ be nye nyawo mele eme o?”

Hiob 25
1 Suatɔ Bildad ɖo eŋu be:
 2 “Dziɖuɖu le esi, eye ŋusẽ triakɔ le esi;
Eɖo ŋutifafa anyi ɖe dziƒo.
 3 Ðe xexlẽme li na eƒe aʋakɔwoa?
Eye ame ka dzie eƒe kekeli meklẽna ɖo o?
 4 Ekema aleke amegbetɔ anye dzɔdzɔetɔ le Mawu ŋkume,
Alo nyɔnu tɔ dzidzia ŋu nadza le eŋkume?
 5 Ne dzinu ke hã mekɔ le eŋkume o,
Eye ɣletiviwo gɔ̃ hã medza le eŋkume o ɖe,
 6 Ke amegbetɔ si kuna, si nye nyévi,
Kple amegbetɔvi si nye ŋɔvi ko ya ɖe?”

Hiob 26
1 Hiob ɖo eŋu be:
 2 “Oo, aleke nèhekpe ɖe ŋusẽmanɔsitɔ ŋue nye esi!
Aleke nèhexɔ na alɔ beli lae nye esi!
 3 Aleke nèheɖo aɖaŋu deŋgɔ na ame manyanui ale!
Eye nèdudu wò nunya vavã kɔ ɖie nye esi!
 4 Ame kae nèle nu ƒom na,
Eye ame kae dɔ wò be nàgblɔ nya siawo?
 5 Ame siwo ku, eye ŋusẽ aɖeke megale wo ŋu o gɔ̃ hã dzona nyanyanya;
Woɖiɖi ɖe anyi wu tsiwo kple wo me nuwo gɔ̃ hã.
 6 Tsiẽƒe le ƒeƒle le Mawu ŋkume,
Eye tsɔtsrɔ̃ƒe le nuvo.
 7 Ekeke dziehedziŋgɔli me ɖe yame,
Eye meku anyigba la ɖe naneke ŋu o;
 8 Eblaa tsiwo ɖe eƒe alilikpowo me,
Ale be alilikpoawo megbãna le woƒe kpekpeme ta o;
 9 Exea eƒe fiazikpui la ŋkume,
Ekekea eƒe alilikpo ɖe edzi.
10 Eɖe liƒo godoo ɖe tsiawo dzi;
Eɖo seƒe ɖi na kekeli kple viviti.
11 Dziƒosɔtiwo ke hã ʋuʋu;
Eye ne eblu la, wodzona kpekpekpe.
12 Eƒe ŋusẽ nana atsiaƒu dzea agbo,
Eye wòtsɔ eƒe nunya gbã ƒumelã klitsu la gudugudu.
13 Etsɔ eƒe yagbɔgbɔ na dziŋgɔli me kɔ;
Eƒe asi ŋɔ da si dzi asi mesuna bɔbɔe o la.
14 Kpɔ ɖa! Esiawoe nye eƒe mɔwo ƒe nugbɔ ko;
Eye nya si míese le eŋu la nye dalĩdodo ko!
Ke ame kae ate ŋu ase eƒe gbeɖeɖe sesẽ la gɔme?”

Hiob 27
1 Hiob gayi eƒe nyawo dzi be:
 2 “Zi ale si Mawu, ame si gbe afiatsotso nam la le agbe,
Eye Ŋusẽkatãtɔ, ame si do vevesese nam la le agbe,
 3 Zi ale si gbɔgbɔ kpɔtɔ le menye
Eye Mawu ƒe gbɔgbɔ le ŋɔti me nam la,
 4 Nye nuyiwo magblɔ nya vlo aɖeke o;
Eye nye aɖe magblɔ alakpanya aɖeke o!
 5 Nyemabu mi ame dzɔdzɔewoe gbeɖe o!
Nyemaɖe asi le nye fɔmaɖimaɖi ŋu va se ɖe esime maku o!
 6 Malé nye dzɔdzɔenyenye me ɖe asi, eye nyemaɖe asi le eŋu akpɔ o;
Zi ale si mele agbe la, nye dzi mabu fɔm o.
 7 Nye futɔwo nenɔ abe ame vɔ̃ɖiwo ene,
Ame siwo tso ɖe ŋunye la nenɔ abe nu gbegblẽ wɔlawo ene.
 8 Elabena mɔkpɔkpɔ kae li na mawumavɔ̃la ne wohoe ɖa,
Alo ne Mawu ɖe eƒe agbe ɖa?
 9 Ðe Mawu ase eƒe ɣlidodo
Ne eɖo xaxa mea?
10 Alo ɖe wòakpɔ dzidzɔ ɖe Ŋusẽkatãtɔ la ŋua?
Ðe wòanɔ Mawu yɔyɔ dzi ɣesiaɣia?
11 Mafia nu mi tso Mawu ƒe ŋusẽ ŋu;
Nyemaɣla Ŋusẽkatãtɔ la ƒe naneke ɖe mi o.
12 Kpɔ ɖa! Ne ŋutegae mi katã miekpɔ la,
Ekema nu ka tae miaƒe nyawo nye nya gbɔlowo sɔŋ?
13 Esiae nye ame vɔ̃ɖiwo ƒe gome tso Mawu gbɔ;
Domenyinu si ŋutasẽlawo axɔ tso Ŋusẽkatãtɔ la gbɔ.
14 Ne viawo dzi ɖe edzi hã la, woatsi yi nu,
Eye eƒe dzidzimeviwo makpɔ nu aɖu wòasu wo o.
15 Dɔvɔ̃ akplɔ ame siwo susɔ nɛ la ayi yɔ me,
Eye woƒe ahosiwo mafa wo o.
16 Ne eli kɔ klosalo ɖi abe ke ene
Eye wòƒo nudodowo nu ƒu abe tsu ene hã la,
17 Aƒo wo nu ƒu baa,
Gake ame dzɔdzɔewoe ado wo,
Eye ame maɖifɔwoe ama eƒe klosalo.
18 Xɔ si wòtu la, anɔ abe agbagblaʋui ƒe azitsro ko ene,
Abe agbadɔ si dzɔla tu la ene.
19 Kesinɔtɔe wòanye hafi amlɔ anyi, ke hã maƒo naneke nu ƒu o;
Ne eʋu ŋku la, eƒe nu sia nu nu ayi.
20 Ŋɔdzi alée le vo me abe tɔɖɔɖɔ ene;
Ahom alɔe ɖe nu le zã me.
21 Ɣedzeƒeya akɔe adzoe;
Eye wòakplɔe adzoe le enɔƒe.
22 Esime wòle agbagba dzem be yeasi le eƒe ŋusẽ nu la,
Ava ƒo ɖe edzi sesĩe, eye makpɔ nublanui nɛ o.
23 Asi akpe ɖe eta,
Eye wòanɔ enɔƒe alia aku ɖe eŋu.

Hiob 28
1 “Klosalokuƒe li,
Eye sikalóloƒe hã li;
2 Wokua gayibɔ le to me,
Eye kpe mee wolóloa akɔbli tsonae.
3 Amegbetɔ xɔa ŋusẽ le viviti si;
Wodia tomenu le goawo katã me keŋkeŋ,
Le blukɔ kple viviti tsiɖitsiɖi me.
4 Woɖe do wòyi to ʋĩi tso amenɔƒe gbɔ,
Teƒe siwo metsɔ afɔ gbɔ o, siwo mele nyanya o;
Afi mae ame siwo wotsi ɖe yame la saa agba ɖiɖina yina.
5 Anyigba la dzie nuɖuɖu miena ɖo;
Ke woguglua anyigbaa tume abe ale si dzo guglua nui ene.
6 Eƒe kpewo mee safir-kpe le,
Eye eƒe kewɔ mee sika le.
7 Xe ƒonu aɖeke menya afi ma mɔ o;
Eye aʋako ƒe ŋku hã mekpɔe kpɔ o.
8 Lã wɔadã meto edzi kpɔ o;
Dzata meka afɔ edzi kpɔ o.
9 Amegbetɔ tsɔa asi gbaa kpe sesẽwo;
Eɖea kè le towo te womuna.
10 Eɖea mɔ ɖe agakpewo tome;
Eye eƒe ŋkuwo kpɔa nu xɔasi ɖe sia ɖe.
11 Exea mɔ na tsi ƒe toƒewo
Eye wòhea nu ɣaɣlawo vaa kekeli nui.
12 Ke nunya ya, afi kae woakpɔe le,
Eye afi kae nye gɔmesese hã tsoƒe?
13 Amegbetɔ aɖeke menya ale si gbegbe wòxɔ asii o,
Eye womekpɔnɛ le agbagbeawo ƒe anyigba dzi o.
14 Tsi goglo la be: ‘Mele menye o!’
Atsiaƒu hã be: ‘Mele gbɔnye o!’
15 Womate ŋu atsɔ sika nyuitɔ aƒlee o;
Eye womate ŋu ada klosalo ɖe eƒe home nu o.
16 Womate ŋu atsɔ Ofir sika aƒlee o,
Alo atsɔ oniks-kpe kple safir-kpe xɔasiwo aƒlee o.
17 Womate ŋu atsɔ sika kple ahuhɔ̃e asɔ kplii o;
Eye womate ŋu atsɔ sikaze nyuitɔ aɖɔlii o.
18 Womayɔ adzagba kple kristalo-kpe ŋkɔ gɔ̃ hã ɖe eŋu o,
Elabena nunya kotoku ɖeka xɔ asi wu dzonu xɔasi kotoku ɖeka.
19 Womate ŋu atsɔ Kus ƒe topaz-kpe asɔ kplii o;
Womate ŋu atsɔ sika nyuitɔ gɔ̃ hã axe fe ɖe eta o.
20 Ke afi ka gɔ̃e nunya dzɔ tso,
Eye afi kae nye gɔmesese hã tsoƒe?
21 Ele ɣaɣla ɖe agbagbeawo katã ƒe ŋkuwo,
Eye wòle ɣaɣla ɖe dziƒoxe dzodzoewo hã.
22 Tsɔtsrɔ̃ kple ku hã be:
‘Wobewobe koe míese kple to.’
23 Mawue nya egbɔ mɔ;
Eya koe nya enɔƒe,
24 Elabena eyae kpɔa anyigba ƒe mlɔenuwo ke,
Eye wòkpɔa nu siwo katã le dziƒoa te.
25 Esi wòɖo ya ƒe ŋusẽ anyi
Eye wòdzidze tsiwo,
26 Esi wòwɔ ɖoɖo na tsidzadza
Eye wòɖe toƒe na ahom kple dziɖegbe la,
27 Ɣemaɣi kee wòkpɔ nunya, eye wòɖee fia;
Eɖoe anyi, eye wòdzro eme kpɔ.
28 Eye wògblɔ na amegbetɔ be:
‘Kpɔ ɖa! Afetɔ vɔvɔ̃e nye nunya,
Eye vɔ̃tsitsri ye nye gɔmesese.’”

Hiob 29
1 Eye Hiob gayi eƒe nyawo dzi be:
 2 “Oo, ɖe wòanɔ nam abe ale si wònɔ le dzinu tsãtɔwo me ene,
Abe ŋkeke siwo me Mawu nɔ tanye kpɔm ene;
 3 Esime wòna eƒe akaɖi klẽ ɖe nye ta dzi,
Eye eƒe kekeli kplɔam to viviti me;
 4 Esime menɔ ame me, ŋusẽ nɔ ŋunye,
Esime menɔ ƒomedodo me kple Mawu le nye agbadɔ me;
 5 Esime Ŋusẽkatãtɔ la gale gbɔnye,
Esime vinyewo katã ƒo xlãm!
 6 Esime nye afɔtoƒewo nyea notsi kpekẽ ɖeɖe sɔŋ,
Eye agakpe dudua ami kɔna ɖi nam bɔbɔbɔ;
 7 Esime medona yia dua ƒe agbo nu
Hebɔbɔna nɔa anyi ɖe zikpui dzi gli le ablɔ me ɖe,
 8 Ne ɖekakpuiwo kpɔm la, wotena yia adzɔge,
Eye ame tsitsiwo ke hã tsona ɖe tsitrenu.
 9 Amegãwo tsoa woƒe nyawo dzi;
Eye woɖoa asi nu.
10 Gbɔgblɔ buna ɖe ame ŋkutawo;
Eye woƒe aɖe léna ɖe aŋɔme na wo.
11 Ame sia ame si se nye nyawo la kafuam,
Eye ame siwo kpɔm la ƒoa nu nyui tso ŋunye.
12 Elabena mexɔna na ame dahe si le ɣli dom,
Tsyɔ̃evi kple ame si xɔnametɔ aɖeke meli na o la.
13 Ame si ɖo kudo nu la ƒe yayra nɔa dzinye,
Eye menaa ahosi ƒe dzi kpɔa dzidzɔ.
14 Metaa dzɔdzɔenyenye abe avɔ ene;
Eye nye nu dzɔdzɔe wɔwɔ le abe awu ʋlaya kple tablanu ene.
15 Ŋku menye na ŋkuagbãtɔ
Eye afɔ menye na bunɔ.
16 Fofo menye na ame dahewo;
Medoa ame manyamanya ƒe ʋɔnunya gɔme.
17 Mefea glã na nu gbegblẽ wɔla la
Eye meɖea nu si dzi wòkpe aɖu ɖo la le aɖutɛ me nɛ.
18 Megblɔna be, ‘Nye ŋutɔ nye aƒe mee maku le,
Eye nye ŋkekewo asɔ gbɔ abe kekui ene.
19 Maɖe kè wòade tsi gbɔ,
Eye zãmu adza ɖe nye alɔwo dzi zã bliboa.
20 Nye bubu anɔ yeye zum ɣesiaɣi,
Eye manɔ aŋutrɔ si le asinye me la dada dzi.’
21 Amewo ɖoa tom hekpɔa asinye nu,
Eye wozia ɖoɖoe sea nye aɖaŋuɖoɖo.
22 Ne meƒo nu vɔ la, nya aɖeke meganɔa wo si woagblɔ o;
Eye nye nyawo gena ɖe woƒe towo me bɔlɔɔ.
23 Wolalaam abe ale si wolalaa tsidzadza ene;
Eye wokea woƒe nu baa abe adatsie wokee na ene.
24 Ne meko alɔgbɔnu na wo la, womexɔnɛ sena o;
Ale si mekɔa mo ɖe wo la nana dzi ɖoa wo ƒo.
25 Nyee fiaa mɔ wo abe woƒe tatɔ ene,
Menɔ abe fia ene le eƒe aʋakɔwo dome,
Abe ame si faa akɔ na konyifalawo ene.

Hiob 30
1 “Ke azɔ la, wole koyem
Wo, ame siwo menye xoxo na,
Ame siwo fofowo nyemalɔ̃ be
Woanɔ nye lãkplɔvuwo gɔ̃ hã ŋu hafi o.
2 Vi kae woƒe alɔkpa sesẽ la ɖe nam?
Woƒe ŋusẽ vɔ.
3 Hiã kple dɔwuame na ŋusẽ vɔ le wo ŋu;
Wokukoa kuɖiɖinyigba
Afi si zu aƒedo kple gbegbe.
4 Wodaa dzegbe le avekɔewo me;
Eye ati dodoewo ƒe kee nye woƒe nuɖuɖu.
5 Wonyaa wo ɖa le ame dome;
Amewo doa ɣli ɖe wo ta abe fiafitɔwo ene.
6 Wova nɔa baliwo,
Dowo kple agadowo me.
7 Wodoa ɣli le avekɔewo me;
Wotigi wo ɖokuiwo ɖe dzawo te.
8 Movitɔ kple yakame ƒe viwoe wonye,
Wonya wo ɖa le anyigba la dzi.
9 Azɔ la, wodoa vlom le woƒe hadzidziwo me;
Eye mezu alɔmeɖenu na wo.
10 Wonyɔa ŋum, wole adzɔge tso gbɔnye;
Eye woɖea ta ɖe mo nam faa.
11 Elabena Mawu na nye ŋusẽ gbɔdzɔ, eye wòbɔbɔm ɖe anyi,
Ale be wowɔa nu sia nu si dze wo ŋu la le ŋkunyeme.
12 Nu vlo wɔha tso ɖe ŋunye le nye ɖusime;
Wona mede afɔ du me
Eye woxe mɔ nam be yewoagblẽ donyeme.
13 Wogblẽ nye toƒewo
Wona nye xaxa la kpe ɖe edzi,
Eye ame aɖeke meli aɖo asi wo dzi hã o.
14 Wolũ ɖe dzinye abe gli gbagbã mee woto ene;
Wolɔ hoo to gbagbãƒewo va ƒo ɖe dzinye.
15 Ŋɔdzi nye tsyɔm;
Woɖe nye bubu ɖa abe yae kplɔe dzoe ene,
Eye nye xɔname nu yi abe alilikpo ene.
16 Azɔ agbe le vɔvɔm le menye,
Hiãŋkekewo tum.
17 Le zã me la, nye ƒuwo me ɖuam ƒuƒuƒu,
Eɖuam madzudzɔmadzudzɔe.
18 Enu sẽ ɖe dzinye ale gbegbe be nye awu trɔ ɖeƒomevii;
Emia ve nam sesĩe abe nye awu ƒe kɔme ene.
19 Mawu tu asim ƒu ba me;
Ale be mezu ke kple afi ɖeɖe.
20 Medoa ɣli be nàxɔ nam, ke mètɔna nam o;
Metso ɖe tsitrenu, ke ɖeko nèle kpɔyem dũu.
21 Ètrɔ zu ŋutasẽla ɖe ŋunye;
Ètsɔ wò alɔkame sesẽ la dze dzinye.
22 Èkɔm ɖe dzi ale be ya kɔm dzoe;
Eye nènyamam le ahom me.
23 Elabena menyae nyuie be àtsɔm ade asi na ku,
Ne mayi xɔ si me agbagbeawo katã ƒoa takpli ɖo la.
24 Gake ame aɖeke megaƒoa ame si gbã gudugudu,
Esi wòle ɣli dom be woaxɔ na ye le xaxaɣi o.
25 Ðe nyemefa avi ɖe ame siwo ɖo xaxa me la ta oa?
Ðe nyemexa nu ɖe ame dahewo ŋuti oa?
26 Menɔ mɔ kpɔm na nyui, ke vɔ̃ boŋ ye va;
Menɔ kekeli sinu kpɔm, ke viviti boŋ ye do.
27 Nye dɔ me le totrom hegbe emedzedze;
Hiãŋkekewo va ƒo ɖe dzinye.
28 Melé blanui le yiyim; nyemekpɔ kekeli aɖeke o.
Metso le ha la dome le ɣli dom be woaxɔ nam.
29 Mezu agbotoewo nɔvi,
Kple golowo ƒe zɔhɛ.
30 Nye ŋutigbalẽ nyɔ tsiɖitsiɖi hele fofom le ŋunye,
Eye nye ƒuwo me ʋu dzo hɛ̃ le dzoxɔxɔ la ta.
31 Konyifafa ko ŋue nye saŋku ɖina ɖo,
Eye nye kpẽ ɖina avigbee.

Hiob 31
1 “Mebla nu kple nye ŋkuwo.
Ekema aleke wɔ nye ŋku aganɔ ɖetugbui ŋu madzemadzee?

 2 Nu kae anye nye gome tso Mawu si le dziƒo la gbɔ,

Alo domenyinu kae atso Ŋusẽkatãtɔ si le dziƒo ʋĩi la gbɔ nam?

 3 Ðe afɔku mele nu gbegblẽ wɔla lalam,

Eye vɔ̃ mele nu vɔ̃ɖi wɔlawo dzɔm oa?

 4 Ðe eya ŋutɔ mele nye zɔzɔme kpɔm,

Eye wòxlẽa nye afɔɖeɖewo katã oa?

 5 Ðe meƒo ɖokuinye ɖe alakpanuwɔna me kpɔa?

Eye ɖe nye afɔ tsɔna ɖe beble ŋua?

 6 Mawu nedam le nudanu dzɔdzɔe me;

Ekema adze si nye fɔmaɖimaɖi.

 7 Ne nye afɔ tra ɖa le mɔ la dzi

Alo nye dzi kplɔ nu si nye ŋkuwo kpɔ ɖo

Alo nye asiwo ƒo ɖi la,

 8 Ekema maƒã nu ame bubu naɖu,

Eye woneho nye nu siwo meċ.

 9 Ne nyɔnu aɖe flu nye dzi,

Eye mede xa ɖe hanyevi ƒe ʋɔtru nu la,

10 Ekema srɔ̃nye netu wɔ na ame tutɔ,

Eye ŋutsu bubuwo nedɔ egbɔ.

11 Elabena ema anye ŋukpenanuwɔwɔ,

Eye wòanye vodada si dze na tohehe le ʋɔnudrɔ̃lawo ŋkume.

12 Anye dzo si abi nu ahagblẽ nu,

Eye wòafiã nye nuwo katã va se ɖe woƒe kè gbɔ ke.

13 Ne mete nye kluvi alo nye kosi ƒe nya dzɔdzɔe ɖe to,

Esi nya ɖo nye kpli wo dome la,

14 Ekema ne Mawu bia gbem la, nu kae mawɔ?

Eye ne ebia akɔntam ɖe, aleke maɖo eŋu nɛ?

15 Ðe menye Ame si wɔm le vidzidɔ me la kee wɔ woawo hã oa?

Eye menye Ame ma kee trɔ asi le mía ŋu hafi wodzi oa?

16 Ne mete ame dahewo ƒe didiwo wo

Eye mena ahosiwo ƒe ŋkuwo lé blanui;

17 Ne nye ɖeka koe ɖua nu si mekpɔ

Eye mekua ŋɔ tsyɔ̃eviwo;

18 (Elabena tso nye ɖevime kee tsyɔ̃evi nɔ gbɔnye tsi abe fofoa gbɔ wònɔ ene,

Eye tso nye ɖevime kee mefiaa mɔ ahosi);

19 Ne mekpɔ ame wòle tsɔtsrɔ̃m le avɔ manɔamesi ta

Alo ame dahe si mekpɔ avɔ atsyɔ o;

20 Ne meyram o,

Evɔ wònye nye alẽfuvɔ de dzo lãme nɛ hafi;

21 Ne menyè asi ɖe tsyɔ̃evi ŋu,

Esi mekpɔe le dugbo la nu be ehiã nye kpekpeɖeŋu la;

22 Ekema nye abɔ nege le abɔgba ŋu,

Eye nye abɔ neŋe ɖe abɔklugui nu.

23 Elabena mevɔ̃ afɔku si tso Mawu gbɔ la,

Eye nyemate ŋu anɔ te ɖe eƒe gãnyenye nu o.

24 Ne meɖo dzi ɖe sika ŋu,

Alo megblɔ na sika nyuitɔ be, ‘Ŋuwòe mele dzi ɖom ɖo!’

25 Ne mekpɔa dzidzɔ le esi nye nunɔamesiwo sɔ gbɔ,

Le esi nu bɔ ɖe asinye kpaŋkpaŋ ta;

26 Ne mekpɔ ale si ɣe le keklẽm,

Alo mekpɔ ale si dzinu le yiyim le atsyɔ̃ me;

27 Eye mena wofi nye dzi le adzame,

Ale be megbugbɔ asi ɖo ɖe wo tsɔ subɔ wo la;

28 Ekema anye vodada si dze na tohehe le ʋɔnudrɔ̃lawo ŋkume,

Elabena afia be megbe Mawu vavã si le dziƒo la.

29 Ðe mekpɔ dzidzɔ ɖe nye futɔ aɖe ƒe tsɔtsrɔ̃ ŋu kpɔa,

Alo dzi dzɔm le esi vɔ̃ dzɔ ɖe edzi ta kpɔa?

30 Nyemena nye nuyi wɔ nu vɔ̃ o,

Eye nyemedi eƒe ku to ɖiŋudodo nɛ me o.

31 Aƒenyemetɔwo gblɔna be,

‘Ame kae ate ŋu afia asi ame aɖe be, eya meɖu eƒe nu ɖi ƒo kpɔ o?’

32 Amedzro aɖeke metsia xexe dɔna o;

Mena nye ʋɔ le ʋuʋu ɖi na mɔzɔlawo.

33 Ðe metsyɔ nu nye dzidadawo dzi abe ale si ame bubuwo wɔnɛ ene,

Ale be meɣla nye vodada ɖe nye awu ƒe kotoku me kpɔa?

34 Ðe mevɔ̃na na ale si amehawo awɔ nui,

Alo ɖe ƒome bubuwo ƒe vlodoame dzia ŋɔ nam,

Ale be mezia ɖoɖoe eye mevɔ̃na be mado ɖe gotaa?

35 Oo, ne ɖe ame aɖe aɖo tom ɖe!

Anye ne made asi nya siwo megblɔ la te.

Ŋusẽkatãtɔ la neɖo eŋu nam!

Ðe madi be nunyetsola naŋlɔ eƒe nutsotsowo ɖe agbalẽ me hafi!

36 Anye ne malée ɖe abɔta;

Mablae ɖe ta abe atsyɔ̃tablanu ene.

37 Mana nye afɔɖeɖe ɖe sia ɖe ŋuti kɔntae;

Mazɔ abe fiavi ene ate ɖe eŋu.

38 Ne nye anyigba afa avi ɖe ŋutinye,

Eye nye agblewo katã afa avi nam hoo;

39 Ne meɖu eme kutsetse femaxee,

Alo mena anyigba la tɔwo tsi dzodzodzoe la;

40 Ekema ŋù nemie ɖe lu teƒe nam

Eye gbe si ʋẽna kũu nemie ɖe ƒo teƒe nam.”

Hiob ƒe gbe dze anyi.

Hiob 32
1 Ale ŋutsu etɔ̃ siawo dzudzɔ nyaŋuɖoɖo na Hiob, elabena Hiob ka ɖe eɖokui dzi be yele dzɔdzɔe. 
2 Ke dzi ku Elihu, Buzitɔ Barakel vi, si tso Ram ƒomea me la vevie. Edo dziku ɖe Hiob ŋu vevie be ebu eɖokui dzɔdzɔetɔe wu Mawu. 
3 Edo dziku ɖe Hiob xɔlɔ̃ etɔ̃awo hã ŋu vevie le esi womekpɔ ŋuɖoɖo gbagbe aɖeke o, ke boŋ wobu fɔ Mawu ta. 
4 Nyawo nɔ Elihu si gake elala be Hiob nawu eƒe nyawo nu, elabena wo katã wonye xoxo nɛ. 
5 Esi Elihu kpɔe be ŋuɖoɖo aɖeke mele ŋutsu etɔ̃awo si o la, dzi kui vevie. 
6 Eye Elihu, Buzitɔ Barakel vi, ƒo nu hegblɔ be:
“Nye ya ɖevi ko menye,
Ke miawo la ame tsitsiwoe mienye.
Esia tae melé ɖokuinye kpoo,
Eye mevɔ̃ be maɖe nu si menya la agblɔ na mi.
 7 Megblɔ be, ‘Tsitsi neƒo nu,
Eye ƒe geɖe neɖe nunya fia.’
 8 Gake Mawu ƒe gbɔgbɔ si le amegbetɔ me,
Ŋusẽkatãtɔ la ƒe gbɔgbɔ, ye naa gɔmesese.
 9 Menye tsitsi koe wɔa ame nunyala o,
Eye menye tsitsiawo koe nya nu si le eteƒe o.
10 Eya ta mebe, ‘Miɖo tom,
Ne nye hã maɖe nu si menya la agblɔ na mi.
11 Kpɔ ɖa! Melala mieƒo nu;
Meɖo to se miaƒe susuwo,
Le ɣeyiɣi siwo katã me mienɔ nya si miagblɔ la dim.
12 Nye to nɔ mia ŋu,
Ke mia dometɔ aɖeke mete ŋu ɖee fia Hiob be edze agɔ,
Alo ɖo eƒe nyawo ŋu nɛ o.
13 Eya ta migagblɔ be, ‘Míeke ɖe nunya ŋu;
Mawue kpe edzi, menye amegbetɔ aɖekee o.’
14 Esi wònye be medo nya aɖeke ɖe gbɔnye o ta la,
Nyemafɔ nya le miaƒe nyawo me atsɔ aɖo eŋu nɛ o.
15 Wotsi yaa, nya aɖeke megale wo si woagblɔ o;
Gbɔgblɔ bu ɖe wo.
16 Melala, ke womegale nu ƒom o;
Ðeko wotɔ ɖi, womegale nya aɖeke gblɔm o.
17 Eya ta nye hã magblɔ tɔnye sinua;
Nye hã magblɔ nu si menya,
18 Elabena nyawo le asinye fũu;
Gbɔgbɔ si le menye ye le eƒom ɖe nunye.
19 Nye dɔ me le abe wain si nu wotu nu ɖo ene,
Abe lãgbalẽgolo yeye si di be yeawó ene.
20 Mina maƒo nu, ne mavo!
Make nye nuyiwo aɖo nya ŋu.
21 Nyemade ame aɖeke dzi o;
Alo aɖɔ kesekuku na ame aɖeke o,
22 Elabena nyemenya ale si woɖɔa kesekuku na amee o;
Anye ne nye Wɔla aɖem ɖa kaba.

Hiob 33
1 “Azɔ Hiob, meɖe kuku, se nye nyawo,

Eye nàlé to ɖe nye nyawo katã ŋu.

 2 Kpɔ ɖa! Make nu azɔ;

Eye nye aɖe aƒo nu.

 3 Nye nyawo aɖe ale si nye dzi me dza afia,

Eye nye nu agblɔ nu si menya le anukware me.

 4 Mawu ƒe gbɔgbɔe wɔm,

Ŋusẽkatãtɔ la ƒe agbegbɔgbɔe na mele agbe.

 5 Ne ele ŋuwò la, ɖo eŋu nam;

Tsɔ wò nyawo va ŋkunyeme; va dze avu ɖi.

 6 Kpɔ ɖa! Ðeko mele abe wò ene le Mawu vavã la ŋkume;

Nye hã tsue wotsɔ mèm.

 7 Eya ta mègana nye ŋɔdzi nalé wò o,

Eye nye nyawo megawu tsɔtsɔ na wò o.

 8 Ke wò nyawo ge ɖe to me nam,

Ɛ̃, wò nyawo ɖi mese be:

 9 ‘Mele dzadzɛ, dzidada aɖeke mele ŋunye o;

Ŋunye kɔ, eye vodada mele ŋunye o.

10 Ke hã, Mawu kpɔa nane le ŋunye godoo;

Ebuam eƒe futɔe.

11 Ebɔa pã nye afɔwo;

Eléa ŋku ɖe nye mɔwo katã ŋu tsitotsito.’

12 Gake medi be mana nànya be, tɔwò medzɔ le nya sia me o:

Mawu nye gã wu amegbetɔ.

13 Nu ka tae nèle nya hem ɖe eŋu?

Esi mele wò nyawo katã ŋu ɖom na wò o taea?

14 Elabena Mawu gblɔa nya zi ɖeka, kple zi eve,

Togbɔ be amewo meɖoa to o hã,

15 Le drɔ̃e me, le zã ƒe ŋutega me,

Esime amewo yi alɔ̃ me ʋĩi

Esime wole alɔ̃ dɔm le woƒe abawo dzi.

16 Ɣemaɣie wòʋua to na wo

Eye wòkua eƒe nufiamewo ɖe to me na wo,

17 Ne wòana amegbetɔ naƒo asa na nu gbegblẽ wɔwɔ

Eye wòakpɔ ame ta be wòagado eɖokui ɖe dzi o.

18 Mawu ɖea eƒe luʋɔ tso yɔdo si me,

Kple eƒe agbe, be wòagatsi yi nu o.

19 Vevesese zua mokaname na ame le eƒe aba dzi

Eye wònaa eƒe ƒuwo nɔa eɖum ƒuƒuƒu,

20 Ale be nuɖuɖu nyɔa ŋu nɛ,

Eye wògbea nuɖuɖu nyuiwo gɔ̃ hã.

21 Lã vɔ le eŋu, ale be meganya le kpɔkpɔm o,

Eye eƒe ƒu siwo medzena tsã o la tsi anyi glaŋ.

22 Eƒe luʋɔ ɖo kudo nu vɔ,

Eye eƒe agbe dze ku ƒe dɔtsɔlawo si me vɔ.

23 Ne dɔla aɖe li nɛ,

Nyanuɖela ɖeka le akpe dome,

Ne wòagblɔ nu si le dzɔdzɔe na amegbetɔ,

24 Ekema Mawu vea enu, eye wògblɔna be:

‘Ðee, ne wòagayi yɔdo me o!

Elabena mekpɔ tafe!

25 Eƒe ŋutilã negazu yeye wu ale si wònɔ le eƒe ɖevime;

Eƒe ɖekakpuimeŋusẽ negaɖo eŋu.’

26 Aɖe kuku na Mawu, eye wòakpɔ ŋudzedze ɖe eŋu,

Eye wòakpɔ Eŋkume ahatso aseye,

Eye Mawu agbugbɔ eƒe dzɔdzɔenyenye aɖo te na amegbetɔ.

27 Ekema ame ma agblɔ na amewo be,

‘Mewɔ nu vɔ̃, eye metrɔ gbo nu si le dzɔdzɔe,

Gake womeɖo eteƒe nam abe ale si dze ene o.

28 Eɖe nye luʋɔ, be wòagayi yɔdo me o,

Eye nye agbe akpɔ kekeli.’

29 Kpɔ ɖa! Nu siawo katãe Mawu wɔna

Na ame zi eve kple zi etɔ̃,

30 Ne wòaxɔe tso yɔdo si me,

Ne agbe ƒe kekeli naklẽ ɖe edzi.

31 Oo Hiob, ƒu to anyi! Ðo tom!

Zi ɖoɖoe, ne mayi nuƒoƒo dzi.

32 Ke ne nya aɖe le asiwò nàgblɔ la, ekema gblɔe nam.

Ƒo nu, elabena medi be maɖee fia be tɔwò dzɔ.

33 Gake ne nya aɖeke mele asiwò o la, ekema ɖo tom;

Zi ɖoɖoe, ne mafia nunya wò.”

Hiob 34
1 Eye Elihu gblɔ yi edzi be:
 2 “Mi nunyalawo, mise nye nyawo;
Eye mi nu geɖe nyalawo, miƒu to anyi ɖe ŋunye.
 3 Elabena to doa nya kpɔna
Abe ale si aɖe ɖɔa nu kpɔna ene.
 4 Mina míada nya dzɔdzɔe akpɔ;
Mina míatso nya me le mía dome le nu si nyo la ŋu.
 5 Elabena Hiob gblɔ be, ‘Tɔnye dzɔ,
Ke Mawu gbe afiatsotso nam.
 6 Aʋatso kam mele esi mebe woatso afia dzɔdzɔe nama?
Gbedada mele nye abi la ŋu o, evɔ wònye nyemedze agɔ aɖeke o hafi.’
 7 Ame kae gale abe Hiob ene,
Si noa alɔmeɖeɖe abe tsi ene?
 8 Ele nu vlo wɔlawo dome
Edea ha kple ame vɔ̃ɖiwo.
 9 Elabena egblɔ be, ‘Meɖea vi aɖeke na amegbetɔ
Ne edze agbagba be yeadze Mawu ŋu o.’
10 Eya ta mi ŋutsu nugɔmeselawo, miɖo tom:
Mawu vavã la mawɔ nu vɔ̃ɖi akpɔ o,
Eye Ŋusẽkatãtɔ la mawɔ nu gbegblẽ gbeɖe o!
11 Elabena eɖoa eteƒe na ame ɖe eƒe nuwɔwɔ nu
Eye wòhea ame ƒe nuwɔnawo me tsonu vaa edzi.
12 Nyateƒe matrɔmatrɔe wònye be, Mawu mewɔa nu vɔ̃ɖi o;
Eye Ŋusẽkatãtɔ la mebaɖaa afɔ na nya dzɔdzɔe o.
13 Ame kae tsɔ anyigbaa de asi nɛ,
Eye ame kae ɖoe xexe blibo la nu?
14 Ne etsɔ eƒe ŋku ɖo wo ŋu,
Ne egbugbɔ ƒo woƒe gbɔgbɔ kple agbegbɔgbɔ nu ƒu ɖe eɖokui gbɔ la,
15 Amegbetɔwo katã atsrɔ̃,
Eye amegbetɔ agatrɔ azu anyi.
16 Eya ta ne gɔmesese le asiwò la, ekema se nya sia;
Lé to ɖe nye nyawo ŋu nyuie.
17 Ðe ame si lé fu nya dzɔdzɔe ate ŋu aɖu dzia?
Alo ɖe nàbu fɔ ŋusẽtɔ si nye nu dzɔdzɔe wɔla?
18 Ðe nàte ŋu agblɔ na fia be, ‘Yakame nènyea,’
Alo na bubumewo be, ‘Ame vɔ̃ɖiwo mienyea’?
19 Ke Ame aɖe li si medea amegãwo dzi o
Eye melɔ̃a kesinɔtɔ ƒe nya wu ame dahe o,
Elabena eƒe asinudɔwɔwɔe wo katã wonye.
20 Wotea ŋu kuna kpata le zãtiƒe;
Woƒona tititi, eye womiaa nu;
Woɖea ŋusẽtɔwo gɔ̃ hã ɖa, ke menye kple amegbetɔ ƒe asi o.
21 Elabena Mawu ƒe ŋku le amegbetɔ ƒe mɔwo ŋu,
Eye wòkpɔa eƒe afɔɖeɖewo katã.
22 Viviti alo blukɔ aɖeke meli,
Si me nu vlo wɔlawo abe ɖo o.
23 Elabena Mawu meɖoa ɣeyiɣi ɖi na ame aɖeke,
Be wòava ʋɔnu le ye ŋkume o.
24 Egbãa ŋusẽtɔwo gudugudu esi mehiã be wòaku nya gɔme hafi o
Eye wònana ame bubuwo xɔna ɖe wo teƒe.
25 Elabena enya nu siwo wɔm wole;
Etua asi wo ƒua anyi le zã me, eye wogbãna gudugudu.
26 Eƒoa wo le woƒe vɔɖivɔ̃ɖi ta,
Le afi si ame sia ame ate ŋu akpɔ wo le,
27 Elabena wotrɔ le eyome
Eye womegatsɔ ɖeke le eƒe mɔ aɖeke me o;
28 Wona ame dahewo do ɣli nɛ,
Ale be wòse wɔnamanɔŋutɔwo ƒe ɣlidodo.
29 Ne Mawu zi ɖoɖoe la, ame kae ate ŋu abu fɔe?
Ne eɣla eƒe mo la, ame kae ate ŋu akpɔe?
Eɖaɣlae ɖe dukɔ loo alo ɖe amegbetɔ o, nya ɖeka ma ke koe,
30 Ne mawumavɔ̃la nagaɖu dzi
Alo be wòatre mɔ̃wo na dukɔ la o.
31 Elabena ɖe ame aɖe agblɔ na Mawu be,
‘Wohe to nam, evɔ nyemewɔ nu gbegblẽ aɖeke hafi o;
32 Ðe nu si kpɔm nyemele o la fiam;
Eye ne nu gbegblẽ aɖee mewɔ la, ekema nyemagawɔe azɔ oa’?
33 Ðe Mawu aɖo eteƒe na wò le wò didi nu esi nègbe eƒe afiatsotsoa?
Wòe atso nya me, menye nyee o.
Azɔ gblɔ nu si nènya nyuie la nam.
34 Ŋutsu nugɔmeselawo
—Ŋutsu siwo si gɔmesese le siwo le to ɖomem la agblɔ be,
35 ‘Hiob menya nya si gblɔm wòle o,
Eye gɔmesese mele eƒe nyawo me o.’
36 Ne ɖe woado Hiob akpɔ wòade edeƒe,
Le esi wòle nya ŋu ɖom abe ame vɔ̃ɖiwo ene ta ɖe!
37 Etsɔ aglãdzedze kpe ɖe eƒe nu vɔ̃ ŋuti;
Esi akpe fewuɖutɔe le mía ŋkume,
Eye wògblɔ nyawo fũu ɖe Mawu vavã la ŋu!”

Hiob 35
1 Elihu gblɔ yi edzi be:
 2 “Èka ɖe edzi tututu be wò nya dzɔ esi nèle gbɔgblɔm be,
‘Tɔnye dzɔ wu Mawu tɔa’?
 3 Elabena èle gbɔgblɔm be, ‘Vi kae wòaɖe na wò?
Ðe wòanyo nam wu ne ɖe mewɔ nu vɔ̃a?’
 4 Maɖo eŋu,
Maɖo eŋu na wò kple xɔwò siwo le gbɔwò.
 5 Fɔ mo dzi nàkpɔ dziƒo,
Kpɔ alilikpo siwo le tawòme boo la ɖa.
 6 Ne èwɔ nu vɔ̃ la, nu kae nàgblẽ le eŋu?
Eye ne wò vodadawo dzi ɖe edzi la, nu kae nèwɔ nɛ?
 7 Ne èle dzɔdzɔe la, nu ka tsɔm nèle nɛ;
Alo nu ka xɔm wòle le asiwò?
 8 Amegbetɔ si le abe wò ene koe wò nu vɔ̃ awɔ nane na,
Eye amegbetɔviwo dzi koe wò dzɔdzɔenyenye awɔ dɔ ɖo.
 9 Amewo doa ɣli le teteɖeanyi ta;
Wodoa ɣli be woaxɔ na yewo le ŋusẽtɔwo ƒe amedziɖuɖu ta.
10 Gake ame aɖeke megblɔna be, ‘Afi kae Mawu, nye Wɔla Gã la,
Ame si nana kafukafuhawo ɖina le zã me la le?’ o.
11 Eyae nye Ame si fiaa nu mí wu anyigbadzilãwo,
Eye wònana míedzea nunya wu dziƒoxe dzodzoewo.
12 Amewo doa ɣli, gake meɖoa eŋu na wo o,
Le ame vɔ̃ɖiwo ƒe dada ta.
13 Mawu ƒe to menɔa kokoƒoƒo gbɔlowo ŋu o;
Eye Ŋusẽkatãtɔ la doa toku wo.
14 Hafi wòa nànɔ gbɔgblɔm be yemele ekpɔm o!
Wò nya la le eŋkume, eya ta kpɔ esinu.
15 Elabena medo dziku bia akɔnta ame loo;
Alo tsɔ wò nuƒoƒo dzimagbɔɖitɔe la vevie o.
16 Hiob ya, ɖe wòke eƒe nu baa dzodzro;
Edudu nyawo kɔ ɖi bababa, ke menya nya si gblɔm wòle o.”

Hiob 36
1 Elihu yi eƒe nyawo dzi be:
 2 “Gagbɔ dzi ɖi nam vie, ne maɖe nu me na wò,
Elabena nyawo gali magblɔ ɖe Mawu nu.
 3 Magblɔ nu sia nu si menya, nyemagblẽ ɖeke ɖi o,
Eye maɖee afia be nye Wɔla la tɔe dzɔ.
 4 Elabena nye nyawo menye alakpa kura o;
Ame si ƒe nunya de blibo la tsɔ ɖe gbɔwò kpuie.
 5 Ŋusẽtɔe Mawu nye, eye megbea ame aɖeke o;
Eya sie gɔmesese deto le.
 6 Maxɔ ame vɔ̃ɖi aɖeke ɖe agbe o,
Ke boŋ atso afia dzɔdzɔe na ame si wote ɖe anyi.
 7 Meɖea ŋku ɖa le ame dzɔdzɔewo ŋu o;
Eɖoa wo zi dzi le fiawo xa, eye wòdoa wo ɖe dzi ɖaa.
 8 Gake ne wode kunyowu wo
Eye fukpekpe ƒe ka bla wo la,
 9 Eɖea nu si wowɔ la fiaa wo,
Si nye vo siwo woda, le dada ta.
10 Eʋua to na wo be woaxɔ ɖɔɖɔɖo
Eye wògblɔna na wo be woatrɔ tso woƒe mɔ vɔ̃wo dzi.
11 Ne woɖo toe hesubɔe la,
Ekema eme anyo na wo le woƒe agbe me katã,
Eye woƒe ƒewo awu enu nyuie.
12 Ke ne womeɖo to o la, ekema woatsi yi nu,
Eye woaku le numanyamanya me.
13 Ame siwo mevɔ̃a Mawu le woƒe dziwo me o la léa dziku ɖe dɔme.
Ne ede ga wo hã, womedoa ɣli be woaxɔ na yewo o.
14 Woƒe agbe nu atso le ɖekakpui dzodzoe me,
Le esi wobɔa ha kple ŋutsu siwo gbɔ ŋutsuwo dɔna le gbedoxɔ me ta.
15 Ke Mawu ɖea ame siwo le fu kpem la tso woƒe fukpekpewo me;
Eye wòʋua to na wo le teteɖeanyiɣi.
16 Ahe wò ɖa tso xaxa me
Ayi gbadzaƒe afi si nàvo le,
Atsɔ nuɖuɖu damiwo aɖo kplɔ̃ na wò atsɔ afa akɔ na wò.
17 Ekema wò dzi adze eme ne wodrɔ̃ ʋɔnu ame vɔ̃ɖiwo;
Ne wotso afia helé nya dzɔdzɔe me ɖe asi.
18 Gake kpɔ nyuie be dɔmedzoe nagahe wò de fewuɖuɖu me o,
Eye mègana zãnu gã nakplɔ wò atrae o.
19 Ðe wò ɣlidodowo
Alo wò dagbadagba aɖe wò tso xaxa mea?
20 Mègatsi dzi ɖe zã ƒe dodo ŋu,
Esime amewo búna le wo nɔƒewo o.
21 Kpɔ nyuie be nàgatrɔ ɖe nu vɔ̃ɖi ŋu o,
Be nàgatsɔ ema aɖɔli fukpekpe o.
22 Kpɔ ɖa! Mawu ƒe ŋusẽ do eya amea ɖe dzi;
Nufiala kae de enu?
23 Ame kae fia mɔe,
Alo gblɔ nɛ be, ‘Nu si nèwɔ la menyo o’?
24 Ðo ŋku edzi nàdo eƒe dɔwɔwɔ ɖe dzi,
Dɔwɔwɔ si ŋu amewo dzi ha le.
25 Ameƒomea katã kpɔ esia kple ŋku,
Amegbetɔwo kpɔnɛ dũu tso adzɔge.
26 Ɛ̃, Mawu lolo wu ale si míate ŋu anya;
Eƒe ƒewo ƒe agbɔsɔsɔ gbɔ míaƒe gɔmesese ŋu.
27 Ehea tsi toŋtoŋwo yia dzii;
Wozua tsidzadza tso eƒe afu me;
28 Ale be alilikpowo dzanɛ;
Eye wodzana ɖe amegbetɔwo dzi bababa.
29 Ðe ame aɖe ate ŋu ase ɖoɖo si nu alilikpowo le,
Kple ale si dzi ɖea gbe tso eƒe agbadɔ me la gɔmea?
30 Kpɔ ale si wòklẽa eƒe dzikedzo ɖe edzii,
Kple ale si wòtsyɔa nu atsiaƒu ƒe gogloƒewo dzii ɖa!
31 Elabena woawoe wòtsɔna léa dukɔwo ɖe te;
Eye wònaa nuɖuɖu wo le agbɔsɔsɔ me.
32 Etsyɔa asi dzikedzo dzi,
Eye wòɖonɛ ɖe afi si wòdi.
33 Eƒe gbeɖeɖe le boblo domee,
Lãhawo gɔ̃ hã le boblo dom ame si gbɔna.

Hiob 37
1 “Esia na nye dzi lã kpo

Eye wòle tsotsom kpokpokpo.

 2 Miɖo to eƒe gbe ƒe gbeɖeɖe

Kple bublu si le dodom tso eƒe nu me la nyuie.

 3 Enana wòɖina le dziƒo bliboa katã te

Eye eƒe dzikedzo dea anyigba ƒe mlɔenuwo.

 4 Gbe ɖina sesĩe ɖe eyome;

Eɖea gbe ŋusẽtɔe,

Eye ne eƒe gbe ɖi la, megaxea mɔ nɛ o.

 5 Mawu ɖea gbe nukutɔe;

Ewɔa nu gã nu gã siwo gbɔ míaƒe gɔmesese ŋu.

 6 Elabena egblɔna na sno be, ‘Dza ɖe anyigba dzi,’

Eye wògblɔna na tsidzadza gãwo be, ‘Ðuɖu kɔ ɖe anyi yoo.’

 7 Mawu ɖoa asi amewo katã ƒe dɔwo dzi,

Ne amegbetɔwo katã nadze si Eƒe dɔwɔwɔwo.

 8 Gbemelãwo sina bena

Eye wonɔa woƒe bebeƒewo.

 9 Ahom tuna tsoa eƒe xɔgã me,

Eye dzieheya kplɔa vuvɔ vanɛ.

10 Mawu ƒe gbɔgbɔ nana be tsiwo blana,

Eye tɔ gbanaawo blana zua tsikpe.

11 Ɛ̃, etsɔa tsi doa agba na alilikpo;

Ekakaa eƒe dzikedzo ɖe alilikpowo me;

12 Wotrɔna ƒoa xlã godoo ɖe eƒe mɔfiafia nu;

Wowɔa nu sia nu si ƒe se wòde na wo le anyigba bliboa dzi.

13 Eɖanye be wòatsɔ ahe to loo, atsɔ ade tsi anyigbaa loo

Alo atsɔ aɖe amenuveve afia o, enana wòvaa eme.

14 Oo Hiob, lé to ɖe esia ŋu;

Tɔ sẽe, ne nàlé ŋku ɖe Mawu ƒe nukudɔwo ŋu nyuie.

15 Ènya ale si Mawu fiaa mɔ alilikpowo

Kple ale si wònana dzi kea dzo tsoa eƒe alilikpowo mea?

16 Ènya ale si alilikpo wɔna lina ɖe yamea?

Esiawoe nye Ame si ƒe nunya de blibo la ƒe nukudɔwo.

17 Nu ka tae wò awuwo me xɔ dzo,

Le ɣeyiɣi si me anyieheya na anyigba dzi fa?

18 Ðe nàte ŋu akpe ɖe eŋu miakeke dziŋgɔli

Si sesẽ abe gahuhɔ̃e ene la mea?

19 Gblɔ nya si míayi aɖagblɔ nɛ la na mí;

Míate ŋu akpɔ nya aɖeke agblɔ o, le esi míele viviti me ta.

20 Ðe woayi aɖagblɔ nɛ be medi be maƒo nua?

Alo ɖe ame aɖe gblɔ nya aɖe si wòhiã be wòasea?

21 Womate ŋu akpɔ kekeli gɔ̃ hã o,

Togbɔ be ele keklẽm le yame hã,

Va se ɖe esime ya ƒo va yi eye wòƒo alilikpoawo ɖa hafi.

22 Keklẽ si le abe sikatsyɔ̃ɖoɖo ene dzena le dziehe wokpɔna;

Mawu ƒe gãnyenye wɔ nuku ŋutɔ.

23 Ŋusẽkatãtɔ la gɔme sese gbɔ míaƒe ŋutete ŋu;

Eƒe ŋusẽ tri akɔ,

Eye eléa ʋɔnu dzɔdzɔe dɔdrɔ̃ kple dzɔdzɔenyenye blibo me ɖe asi ɣeawokatãɣi.

24 Eya ta ele be amegbetɔwo navɔ̃e.

Elabena mevea ame siwo bua wo ɖokuiwo nunyalawoe la nu o.”

Hiob 38
1 Eye Afetɔ ɖo eŋu na Hiob le ahom me be:
 2 “Ame kae nye esia si le nu tsyɔm nye adaŋudede dzi
Hele nu ƒom numanyamanyatɔe?
 3 Meɖe kuku, tso nàbla ali dzi abe ŋutsu ene;
Ne mabia nya wò nàɖo eŋu nam.
 4 Afi kae nènɔ esime meɖo anyigba la gɔme anyi?
Ne ènyae la, ekema gblɔe nam.
 5 Ame kae ɖo eƒe dzidzemewo, ènyaea?
Alo ame kae da dzidzeka nɛ?
 6 Nu ka mee woƒo eƒe anyinɔwo ɖo,
Alo ame kae ɖo eƒe dzogoedzikpe,
 7 Esime ŋukeɣletiviwo gli kple dzidzɔ,
Eye Mawu viwo katã do dzidzɔɣli?
 8 Ame kae do ʋɔ ɖe atsiaƒu nu
Esi wòdo tso vidzidɔ me,
 9 Esime metsyɔ alilikpo nɛ,
Eye mexatsa blukɔ ɖe eŋu abe avɔ ene,
10 Esime meɖo seƒe nɛ
Eye mede gametiwo kple ʋɔtruwo enu,
11 Eye megblɔ be, ‘Afi sia ko nàva se ɖo, màgbɔ eŋu o;
Afi siae wò tsotsoe kpakawo ase ɖo’?
12 Èɖe gbe na ŋu be wòake kpɔ,
Alo èfia agudzedze eƒe nɔƒee kpɔ,
13 Ne wòalé anyigbatogawo
Aʋuʋui be ame vɔ̃ɖiwo nahlẽ ɖa le edzia?
14 Eƒe nɔnɔme trɔna abe tsu si to nutrenu te ene,
Eye edzinuwo dzena nyuie abe nu si woɖe ɖe avɔ dzi ene.
15 Ke woxɔ ame vɔ̃ɖiwo ƒe kekeli le wo si,
Eye woŋe woƒe alɔ si wodo ɖe dzi la.
16 Ðe nède atsiaƒu dzɔƒewo kpɔa,
Alo ɖe nèɖi tsa yi tsi ƒe gogloƒewo kpɔa?
17 Ðe woɖe ku ƒe agbowo fia wò kpɔa,
Alo ɖe nèkpɔ viviti tsiɖitsiɖi ƒe agbowo kpɔa?
18 Èse ale si gbegbe anyigba la kekee gɔmea?
Ne ènya nu siawo katã la, gblɔe mase.
19 Kekeli gbɔ mɔ ɖe?
Afi kae nye viviti nɔƒe,
20 Ne nàkplɔ wo ayi woƒe anyigba dzi,
Eye nànya woƒe aƒe me mɔ?
21 Ðe wodzi wò ɣemaɣi be nàyi esia nya ge
Le esi nètsi xɔ ƒe geɖe taa?
22 Ðe nède sno ƒe nudzraɖoƒewo kpɔa,
Alo ɖe nèkpɔ kpetsi ƒe nudzraɖoƒewo kpɔ,
23 Esiwo medzra ɖo ɖi ɖe xaxaɣi,
Aʋaŋkeke kple aʋakpegbe ŋua?
24 Mɔ ka dzie kekeli tona klẽna,
Eye afi kae ɣedzeƒeya tona ƒona ɖe anyigba dzi?
25 Ame kae ɖe toƒe na tsiɖɔɖɔ,
Eye wòɖe mɔ na dzikedzo kple dziɖegbe,
26 Ne wòana tsi nadza ɖe teƒe si ame aɖeke mele o,
Ðe gbedzi, afi si amegbetɔ aɖeke mele o,
27 Ne wòadzra teƒe siwo zu gbegbe la ɖo nyuie,
Eye wòana gbe namie?
28 Ðe fofo le tsidzadza sia,
Alo ame kae dzi ahũdzadza?
29 Ame ka ƒe dɔ mee tsikpe do tso,
Eye dziƒoketsiwo ya ɖe, ame kae dzi wo
30 Esime tsiwo ŋkume sẽ abe kpe ene,
Eye tsi goglo la ŋgɔ bla zu tsikpe?
31 Ðe nàte ŋu asa Kima ɣletivihatsotso ƒe kawo,
Alo atu Kesil ɣletivihatsotso ƒe kawoa?
32 Ðe nàte ŋu akplɔ ɣletivihatsotso adoe le eƒe ɣeyiɣi dzi
Alo afia mɔ Ayis ɣletivihatsotso la kple viawoa?
33 Ðe nènya dziƒo ƒe sewoa,
Alo ɖe nàte ŋu ana eƒe ŋusẽ naɖu anyigba dzia?
34 Ðe nàte ŋu akɔ gbe dzi ado ɣli na alilikpo
Ne wòana tsi natsyɔ dziwòa?
35 Ðe nàte ŋu adɔ dzikedzowoa?
Ale be woava gblɔ na wò be, ‘Míawoe nye esia!’
36 Ame kae tsɔ nunya de alilikpowo me,
Alo ame kae na gɔmesese yamenu wɔnukuwo?
37 Ame ka sie nunya le be wòaxlẽ alilikpowo,
Alo ame kae ate ŋu atrɔ dziƒotsizewo abu anyi
38 Ale be kewɔ nazu bafifi
Eye anyikɔwo nalé ɖe wo nɔewo ŋu?
39 Ðe nàte ŋu ada ade alé nu na dzata,
Alo afa dɔwuame nu na dzataviwo
40 Ne wotsyɔ akɔ ɖe bebeƒewo
Alo de xa ɖe wo nɔƒewoa?
41 Ame kae dia nuɖuɖu na akpaviã,
Ne viawo le xɔxlɔ̃m na Mawu be wòaxɔ na yewo,
Eye wole tsatsam le esi naneke meli woaɖu o ta?

Hiob 39
1 “ Ðe nènya ɣeyiɣi si agamegbɔ̃ dzia via?

Èkpɔ zinɔ ƒe vidzidzi teƒe kpɔa?

 2 Ðe nèxlẽa ɣleti siwo fu nɔa wo ƒoa?

Alo ɖe nènya ɣeyiɣi si tututu wodzia via?

 3 Wobɔbɔna dzia vi,

Eye woƒe kuléle nu tsona.

 4 Ŋusẽ ɖoa wo viwo ŋu, eye wotsina le gbe me;

Wodzona, eye womegagbɔna vaa wo gbɔ o.

 5 Ame kae na ablɔɖe gbetedzi,

Eye ame kae tu kae?

 6 Metsɔ gbegbe wɔ aƒe nɛ

Eye dzenyigbae nye enɔƒe.

 7 Hoowɔwɔ si ɖina le du me la ɖia kokoe nɛ;

Mesea lãkplɔla ƒe ɣlidodo o.

 8 Etsana dia gbeɖuƒe le togbɛwo dzi

Eye wòdia gbe mumu ɖe sia ɖe yome mɔ.

 9 Ðe gbenyi alɔ̃ asubɔ wòa?

Alo ɖe wòatsi wò lãkpo me adɔa?

10 Ðe nàte ŋu ade ka gbenyi be wòaŋlɔ agble,

Alo ana wòagudu bali me le yowòmea?

11 Ðe nàɖo ŋu ɖe eƒe ŋusẽ geɖe la ŋu

Ahatsɔ wò dɔ gãwo agblẽ ɖe esi mea?

12 Ðe nàɖo ŋu ɖe eŋu wòatsɔ wò agblemenukuwo agbɔe na wò

Ahaƒo enu ƒu ɖe wò nukuƒoƒea?

13 Golo ƒoa eƒe aʋala kpakpakpa dzidzɔtɔe,

Evɔ ɖe woate ŋu atsɔ eƒe aʋala kple eƒe fu asɔ kple damixe tɔa?

14 Elabena egblẽa eƒe azi ɖe anyigba,

Eye wònana ke dea dzo wo me.

15 Eŋlɔna be be woate ŋu aɖo afɔ wo dzi woagbã,

Alo be gbemelã aɖe ate ŋu azɔ wo dzi.

16 Ewɔa ŋlɔmi le viawo ŋu, abe menye etɔwoe wonye o ene;

Mevɔ̃na be yeƒe agbagbadzedze azu dzodzro o.

17 Elabena Mawu na nunya bɔe

Eye mena gɔmesese aɖekee o.

18 Gake ne etso, ƒo aʋala la,

Sɔ kple edola ƒe nu ɖia kokoe nɛ.

19 Wòe na ŋusẽ sɔa?

Wòe ɖo kɔdza kɔ ŋu nɛa?

20 Àte ŋu ana wòati kpo abe ʋetsuvi enea?

Eƒe ŋɔtimetudada dzia ŋɔ.

21 Etsɔa afɔ kaa anyigba le bali me, eye wòtia kpo kple ŋusẽ;

Elũna ɖe aʋa me.

22 Ŋɔdzi ɖia kokoe nɛ, eye mevɔ̃a naneke o.

Megbugbɔna ɖe megbe le yi nu o.

23 Aŋutrɔ ŋkɔ le ɖiɖim le eƒe axadzi;

Nenema kee nye akplɔ kple akplɔvi siwo le dzo dam la hã.

24 Etia kpo kple dzidzɔ helɔnɛ ɖe eme,

Eye megatea ŋu lalana ne aʋakpẽ ɖi o.

25 Ne aʋakpẽ nya ɖi ko la, egblɔna be, ‘Eɖo dzi vɔ!’

Esea aʋa ƒe ʋeʋẽ tso adzɔge ʋĩi

Esea aʋafiawo ƒe gbeɖeɖe kple aʋaɣli.

26 Wò nunya nue xe ƒonu dzona yia dzi ʋĩi,

Eye wòkea eƒe aʋalawo ɖoa ta anyiehea?

27 Alo wò gbeɖeɖe nue hɔ̃ dzona yia dzi

Hewɔa atɔ ɖe kɔkɔƒea?

28 Eye wò gbeɖeɖe nue wònɔa agakpe dzi hetsia afi ma dɔna,

Eye wòtsɔa agakpe tsakliwo tome wɔa eƒe bebeƒea?

29 Afi ma wòtsona dia nuɖuɖu;

Eƒe ŋkuwo kpɔa nu le didiƒe ʋĩi ke.

30 Viawo noa ʋu;

Eye afi si ame tsiaʋawo le la, afi mae wònɔna.”

Hiob 40
1 Afetɔ yi edzi gblɔ na Hiob be:
 2 “Ðe vɔ̃eɖenamela ate ŋu ahe nya kple Ŋusẽkatãtɔ la?
Ame si be yele nya gbem na Mawu la neɖo eŋu.”
3 Hiob ɖo eŋu na Afetɔ be:
 4 “Kpɔ ɖa! Nyemedze o.
Nya kae matsɔ aɖo eŋu na wò?
Meɖo asi nu.
 5 Meƒo nu zi ɖeka, eye meɖe nu le eme;
Meƒo nu zi eve, eye nyemagagblɔ nya aɖeke akpee o.”
6 Eye Afetɔ ƒo nu na Hiob le ahom me be:
 7 “Meɖe kuku, bla ali dzi abe ŋutsu ene,
Ne mabia nya wò nàɖo eŋu nam mase.
 8 Ðe nàte ŋu atsɔ nya ɖe nye dzɔdzɔenyenye ŋua?
Ðe nàbu fɔm ne tɔwò nàdzɔa?
 9 Ðe wò alɔkame sesẽ de Mawu vavã la tɔ nua,
Alo ɖe nàte ŋu aɖe gbe abe eya enea?
10 Ekema tsɔ ŋutikɔkɔe kple gãnyenye ɖo atsyɔ̃e;
Eye nàta bubu kple atsyɔ̃.
11 Trɔ wò dziku helĩhelĩ la ƒo ɖi;
Di dadalawo katã ne nàɖiɖi wo ɖe anyi.
12 Di dadalawo katã ne nàbɔbɔ wo ɖe anyi,
Eye nàfanya ame vɔ̃ɖiwo le afi si wole.
13 Ði wo katã ɖe ke me;
Eye nàbla wo ɖe teƒe ɣaɣla,
14 Ekema nye ŋutɔ malɔ̃ ɖe edzi na wò,
Be wò nuɖusi ate ŋu axɔ na wò.
15 Kpɔ Behemot si mewɔ abe wò ke ene la ɖa.
Eɖua gbe abe nyi ene.
16 Kpɔ ŋusẽ si gbegbe le eƒe ali me
Kple ŋusẽ triakɔ si le eƒe ƒodokawo me ɖa!
17 Elia eƒe asike abe sederti ene;
Eƒe atagbomeka titriwo lɔ̃ ɖe wo nɔewo me.
18 Eƒe ƒuwo le abe akɔbliga siwo me do le ene;
Eƒe afɔwo sesẽ abe gayibɔkpɔtiwo ene.
19 Eyae nye gbãtɔ le Mawu ƒe dɔwo dome.
Ewɔla koe ate ŋu atsɔ yi ɖe eŋu.
20 Elabena nuɖuɖu miena ɖe towo dzi nɛ,
Afi si gbemelãwo katã ɖia adzrɔ le.
21 Ŋùtiwo tee wòmlɔna,
Eye wòbena ɖe aɖawo me, le tɔba me.
22 Ŋùtiwo doa vɔvɔli ɖe edzi,
Amuti siwo le tɔʋuwo to la ƒo xlãe.
23 Ne tɔwo nyra hã, dzika metsoa eƒo o.
Ne Yordan-tɔsisi le ƒoƒom ɖe nu ŋu nɛ hã, eɖea dzi ɖi bɔkɔɔ.
24 Ðe ame aɖe ate ŋu alée esime wòfɔ ŋku ɖe edzi gãa,
Alo aƒo ga ɖe ŋɔti me nɛa?

Hiob 41
1 “Ðe nàte ŋu atsɔ ƒu aɖe Leviatan

Alo atsɔ ka abla eƒe aɖe ate ɖe nu me nɛa?

 2 Ðe nàte ŋu ade ka ŋɔti me nɛ,

Alo atsɔ ƒu aŋɔ eƒe glãa?

 3 Ðe wòaƒo koko na wò zi geɖe,

Alo ɖe wòaƒo nu na wò kple gbe blewua?

 4 Ðe wòabla nu kpli wò,

Ne nàxɔe wòazu wò kluvi le eƒe agbe me katã?

 5 Ðe nàfe kplii abe xevi enea,

Alo ɖe nàde kae na viwònyɔnuviwoa?

 6 Ðe nudzralawo atsɔ woƒe adzɔnuwo aɖɔliia?

Ðe woamae le asitsalawo domea?

 7 Ðe nàte ŋu atsɔ ʋã aŋɔ eƒe ayi

Alo atsɔ akplɔ atɔ eƒe taa?

 8 Ka asi eŋu kpɔ;

Àkpɔe be avu blibo wòanye, eye màgawɔe akpɔ gbeɖe o!

 9 Ne ewɔ na wò be yeate ŋu akpe edzi la, ke èble ɖokuiwò.

Ekpɔkpɔ ɖeɖe dzaa adzi ŋɔ na wò.

10 Ame aɖeke make atsɛ aʋuʋui o.

Ke ame kae ate ŋu anɔ te ɖe nunye?

11 Ame kae tre nunanam, ne maɖo eteƒe nɛ?

Nu siwo katã le dziƒo bliboa te la, tɔnyee.

12 Nyemagbe nuƒoƒo le eƒe ŋutinuwo,

Eƒe ŋusẽ kple eƒe nɔnɔme dzeani la ŋu o.

13 Ame kae aflo eƒe akpa le eŋu?

Ame kae ate ŋu aɖo eƒe glãwo me?

14 Ame kae ate ŋu ake eƒe nu?

Ŋɔdzi le eƒe aɖuwo katã ŋu.

15 Tsro trikpawo ɖo ɖe eƒe dzimegbe,

Wolé ɖe wo nɔewo ŋu kpaɖikpaɖi.

16 Wodre ɖe wo nɔewo ŋu ale gbegbe

Be ya gɔ̃ hã mate ŋu ato wo me o.

17 Ðe sia ɖe lé ɖe nɔvia ŋu;

Woƒo ɖe wo nɔewo me ale gbegbe be womate ŋu ama wo me o.

18 Eƒe nyènye ɖeɖe dzaa kea dzo,

Eye eƒe ŋkuwo klẽna hɛ̃ abe agudzedze ene.

19 Dzoƒaɖewo dona tso eƒe nu me;

Dzoxiwo hlẽna ŋeŋeŋe.

20 Dzudzɔ tuna tso eƒe ŋɔti me

Abe dzokpo si me wodo ketidzo ɖo ene.

21 Eƒe gbɔgbɔ naa aka léa dzo,

Eye dzoƒaɖewo dona tsoa eƒe nu me.

22 Ŋusẽ geɖe le eƒe kɔ me,

Eye ŋɔdzi tia kpo le eŋgɔ.

23 Eƒe ayi mlɔ wo nɔewo dzi;

Wolé ɖe wo nɔewo ŋu kpaɖii be womeʋãna o.

24 Eƒe dzi sẽ abe kpe ene,

Ɛ̃, esẽ abe té si dzi wotua nu le ene.

25 Ne etso la, dzidzi ƒoa ŋusẽtɔwo gɔ̃ hã;

Ne eʋã eɖokui la, woluluna.

26 Ne yi va tui la, mekpea edzi o;

Eye akplɔ, ga biɖoe alo aŋutrɔ hã meɖia naneke nɛ o.

27 Gayibɔ le nɛ abe gbe ƒuƒu ko ene,

Akɔbli abe ati si nyunyɔ ene.

28 Aŋutrɔ menyanɛ ɖe nu o;

Akafokpe le nɛ abe ahɔ̃liti ko ene.

29 Ebua kpo abe ahɔ̃liti ene,

Eye akplɔ ƒe ʋɔlulũ ɖia kokoe nɛ.

30 Eƒe dɔmegbɔ le abe sonu gaglɛ ɖaɖɛwo ene;

Eɖea fli ɖe ba me abe luƒotasiaɖam ene.

31 Enana tɔ gɔme fiẽna wlɔwlɔwlɔ abe nuɖaze me ene;

Eblua atsiaƒu abe amiɖaze me ene.

32 Enana etoƒe le tɔ dzi klẽna le eyome;

Ale tɔa dzi funa kpii abe ta ƒowɔ ene.

33 Etɔgbi aɖeke mele anyigba dzi o,

Nuwɔwɔ si ŋɔ medzina o lae wònye.

34 Eklẽa ŋku ɖe nu sia nu si doa eɖokui ɖe dzi la.

Fia wònye ɖe lã klitsuwo katã dzi.”

Hiob 42
1 Eye Hiob ɖo eŋu na Afetɔ be:
 2 “Azɔ menyae be àte ŋu awɔ nu sia nu
Eye naneke meli nàɖo, si màte ŋu awɔ o.
 3 Ègblɔ be, ‘Ame kae nye esia si le nu tsyɔm nye adaŋudede dzi numanyamanyatɔe?’
Nyateƒee, meƒo nu, esi nyemese nuwo gɔme o,
Elabena wonye nu siwo wɔ nuku ale gbegbe, siwo nyemenya o.
 4 Ègblɔ be, ‘Meɖe kuku, ɖo to, ne maƒo nu.
Mabia nya wò nàɖo eŋu nam.’
 5 Wogblɔ nya le ŋuwò mese,
Ke azɔ la, nye ŋkuwo kpɔ wò.
 6 Esia tae melɔ̃ ɖe edzi be nyemegblɔe nyuie o,
Eye metrɔ dzi me le ke kple afi me.”
7 Esi Afetɔ gblɔ nya siawo na Hiob vɔ la, Afetɔ gblɔ na Temantɔ Elifaz be:
“Medo dziku ɖe wò kple xɔ̃wò eveawo ŋu vevie, elabena miegblɔ nyateƒea tso ŋunye abe ale si nye subɔla Hiob wɔe ene o. 
8 Eya ta milé nyitsu adre kple agbo adre miayi nye subɔla Hiob gbɔ, ne miasa numevɔ ɖe mia ɖokuiwo ta. Eye nye subɔla Hiob nado gbe ɖa ɖe mia ta. Eya ƒe kukuɖeɖee mase hafi nyemaɖo eteƒe na mi ɖe miaƒe bometsitsi la nu o, elabena mieto nyateƒe le ŋunye abe ale si nye subɔla Hiob wɔe ene o.”
9 Eya ta Temantɔ Elifaz, Suatɔ Bildad, kple Naamatɔ Zofar yi ɖawɔ abe ale si tututu Afetɔ gblɔ na wo ene. Eye Afetɔ se Hiob ƒe gbedodoɖa.
10 Esi Hiob do gbe ɖa ɖe exɔlɔ̃awo ta vɔ la, Afetɔ ɖe Hiob ƒe xaxawo ɖa eye wòna Hiob gazu kesinɔtɔ. Afetɔ ɖo nu siwo katã nɔ esi tsã la teƒe nɛ zi gbɔ zi eve. 
11 Eye nɔviaŋutsuwo kple nɔvianyɔnuwo katã kpakple eƒe ame nyanyɛwo katã va egbɔ heɖu nu kplii le eƒe aƒe me. Wodo baba nɛ hefa akɔ nɛ le vɔ̃ siwo katã ŋu Afetɔ ɖe mɔ ɖo wova edzi la ta. Eye wo dometɔ ɖe sia ɖe na ga kple sikasigɛe.
12 Ale Afetɔ yra Hiob le eƒe agbenɔƒe mamlɛawo me wu ale si wònɔ le gɔmedzedzea, ale be alẽ akpe wuiene, kposɔ akpe ade, nyi eveve teƒe akpe ɖeka kple tedzinɔ akpe ɖeka va su Hiob si. 
13 Wogadzi viŋutsu adre kple vinyɔnu etɔ̃ nɛ. 
14 Ena ŋkɔ nyɔnuvi gbãtɔ be Yemima, evelia be Kezia, etɔ̃lia be Keren-Hapuk. 
15 Womekpɔ nyɔnu dzetugbe aɖeke le anyigba la katã dzi kpɔ abe Hiob vinyɔnuawo ene o, eye wo fofo na domenyinu wo ɖe wo nɔviŋutsuwo dome.
16 Le nu siawo megbe la, Hiob ganɔ agbe ƒe alafa ɖeka blaene, eye wòkpɔ viawo kple tɔgbuiyɔviawo va se ɖe dzidzime enelia dzi. 
17 Hiob tsi, eye agbenɔnɔ ɖi kɔ nɛ hafi wòku.

LEAVE A REPLY

Please enter your comment!
Please enter your name here