GEC EWE Hymn

Stanza 1
Mawu, nye Mawu léa be nam;
Nu ka ta mafa konyi?
Etsɔa nu si sesẽ nam la,
Dana ɖe eɖokui dzi.
Ne nye nu vɔ̃
Vem ŋutɔ la,
Mawu agave nunye,
Ana ŋuifafam ɖaa ko.

Stanza 2
Mawu nyea akpoxɔnu nam
Le dziyaƒoƒo gã me.
Ne abosam le fu ɖem nam
Kple ‘ƒe ŋusẽ katã hã,
Mawu ŋusẽ
Te ko mele;
Eƒe ŋɔdzidodowo
Maɖe dzi le ƒonye o.

Stanza 3
Mawu, nye dzo, si klẽna nam
Le nye mɔwo katã dzi;
Ewɔa nu dzɔtsu geɖe nam,
Kplɔam to fu kple dzidzɔ me.
Eƒe nya nye
Nye ɣletivi,
Si nɔa keklẽm nam nyuie ɖaa
Le viviti katã me.

Stanza 4
Mawu enye nye kpe gbadzaa,
Si dzi metsi tre ɖo ɖaa.
Ne towo mu dz’a-nyi hã la,
Nyemadz’a-nyi akpɔ o.
Ne ƒu gblẽ keŋ
‘Ye wòdz’a-gbo,
Ya nyama nye seke hã,
Nye ʋu manyrɔ akpɔ o.

Stanza 5
Mawu, nye gome dzea ŋunye,
Nu nyui aɖeke mehiãm o.
Nu ka ta matsi dzimaɖi
Atsi dzodzodzoe dzro ko?
Ame si si
Mawu le la,
Kpɔa kesinɔnu gãtɔ
L’a-fi sia kple dziƒo hã.

Stanza 6
Mawu ŋutɔ nye nye ɖela,
Si ɖem to Via Yesu me.
Nye ɖela, si lɔ̃m vevie la,
Kpe fu heku ɖe tanye.
Dzidzenu la
Dzidzenam nyuie.
Ne mexɔ esia se la,
Nu ka lagblẽ nye ɖeɖe?

Stanza 7
Mawu, ŋunyebula yram ɖaa,
Ne amewo le dzuyem
Ye wole ɖiŋu dom nam hã,
Ava ve me gb’a-ɖe gbe
Be nye Mawu
Adrɔ̃ ʋɔnu.
Ekema woava dze si
Mawu ƒe dzɔdzɔenyenye.

Stanza 8
Mawu enye nye dɔyɔla,
Yɔa dɔm le dɔléle me.
Eya nye fofonye vavã,
Léa be nam abe via ‘ne.
Eƒe nya la
Gblɔ nam bena,
Ne amewo gblẽm ɖi hã,
Mawu anɔ kpakplim ɖaa.

Stanza 9
Mawu enye nu sia nu nam
L’a-nyigba dzi kple dziƒo.
Mawu tre lɔlɔ̃ nam xoxo;
Nye hã malɔ̃e ɖe ‘teƒe,
Ava se ɖe
Gbe si gbe ke
Mava kpɔ eƒe ŋkume,
Le dzidzɔ manyagblɔ me.

LEAVE A REPLY

Please enter your comment!
Please enter your name here