GEC EWE Hymn

GEC Hymn 124

Stanza 1
Yesu yi ɖe Amito dzi
Kple eƒe nusrɔ̃lawo,
Gblẽ xexeme ɖe megbe ʋiĩ
Kple eƒe fukpekpewo.

Stanza 2
Esi wotsi ‘tre le toa dzi,
Enyo wo ŋu vevie ŋ’tɔ,
Ale si ya ƒo ɖe wo dzi,
Xeviwo hã dzi ha nɛ.

Stanza 3
Kasiaa, dziŋgɔli me va ʋu,
‘Lilikpo tso me va ‘nyi;
Nusrɔ̃lawo va ɖe kuku,
Be wòayra ɖe yewo dzi.

Stanza 4
Enumake la wod’a-si
Exɔxɔ me tso wo gbɔ;
Esime wòle dziƒo yim,
Eƒe ŋku ganɔ wo dzi.

Stanza 5
Kpɔ ɖa, egale dzedzem ʋiĩ,
Sigble ɣletivi ene.
Kasiaa, wòbu ɖe wo keŋkeŋ
Hevi ɖe alilĩ me.

Stanza 6
Dziƒonɔlawo do dzaa nɛ
Eye dzi dzɔ wo katã;
Wova dzi ha vivi geɖe
Kafui be: Haleluya.

Stanza 7
Mawu do vivi ɖe ‘ŋuti,
Tsɔe ɖo ‘ƒe nuɖusime,
Ena wònɔ zikpui la dzi,
Sigbe dziƒofia ene.

Stanza 8
Míele ekpɔm kple mía ŋku o,
Ke eya le mía kpɔm ɖa.
Yesu magagblẽ mí ɖi o,
Ne míele kuku ge la.

Stanza 9
Va nakplɔ mí yi ɖe dziƒo,
Ne míakpɔ wò ŋkume ɖa,
Mía kple dziƒohadzihawo
Adzi ha: Haleluya!

LEAVE A REPLY

Please enter your comment!
Please enter your name here