GEC EWE Hymn

GEC Ewe Hymn 386

Stanza 1
Nye gbɔgbɔ, nɔ klalo ɖaa,
Nɔ ŋudzɔ, do gbe ɖa,
Bena ɣeyiɣi vɔ̃ la
Nagalili wò o!
Tetekpɔ ɖina ɖe
Ame dzɔdzɔewo hã,
Ne woɖe ŋu ɖi ko.

Stanza 2
Ke nyɔ tso nu vɔ̃ la me
Kple wò dzi blibo la!
Nyae be, tohehe sesẽ
Dzea nu vɔ̃ la yome.
Eye hiã kple ku siaa
Woatu wò le vɔ̃ me,
Woazu gbegblẽ mavɔ̃.

Stanza 3
Nyɔ, be nàkpɔ wò ɖela
Ƒe ŋutikɔkɔe ɖa!
Ne menye nenem o la,
Àva bu wò keklẽ.
Ŋku, siwo le ʋuʋu,
Dim Mawu le na mí
Ðe ‘ƒe nunana ŋu.

Stanza 4
Nyɔ, bene xexe sia me
Nagazi dziwò o,
Alo wòatsɔ aɖaŋu
Akplɔ wò ayi o!
Nyɔ, dze si nɔvi, si
Nye alakpatɔ la,
Gadze eyome o!

Stanza 5
Nyɔ, kpɔ ɖokuiwò dzi nyuie!
Dzɔ wò dzi ŋuti ɖaa!
‘Me si mekpɔ nyuie o la,
Ado vlo ‘ƒe Mawu.
Didi vɔ̃ geɖewo
Ɣlana ɖe mía dzi me,
Blea mí dea nu vɔ̃ me.

Stanza 6
Nɔ gbedodoɖa hã dzi
Le ŋudzɔnɔ me!
Elabena Mawu ko
Ate ŋu aɖe wò
Tso agba kpekpe la
Kple kuvialɔ̃dɔdɔ,
Si gblẽa ame la me.

Stanza 7
Ɛ̃, gbedodoɖa míatsɔ
Axɔ nu tso egbɔ.
To gbedodoɖa me ko
Míateŋ’ anɔ agbe.
Eya ko míatsɔ ‘ɖu
Mía futɔwo katã
Kple mía ŋutilã dzi.

Stanza 8
Eya ta, nɔvinyewo,
Mina míanɔ ŋudzɔ!
Elabe hiã kple ŋɔdzi
Le tetem ɖe mía ŋu.
Ɣeyiɣi la le kpuie
Na Mawu ƒe ʋɔnu,
Si wòadrɔ̃ xexeame.

LEAVE A REPLY

Please enter your comment!
Please enter your name here