GEC EWE Hymn

Stanza 1
Miva míkafu Mawu;
Nunyala kple ŋusẽtɔ gã.
Dɔmenyotɔ vavãtɔ,
‘Me si tɔgbi megali o.
Mawu wɔa nu dzɔtsuwo;
Ame ka axe mɔ
Na eƒe ŋusẽ gã si
Wòtsɔ wɔa nu nyui sɔŋ?
Ekeke dziŋgɔli me
Abe agbadɔ ‘ne
Etsɔ ‘ƒe numenya ko
Wɔ xexe blibo la.

Stanza 2
Ŋusẽ katã nye tɔwò,
Kpekpeɖeŋu hã tsoa gbɔwò.
Wò dɔwɔwɔwo katã
Le kafuwòm, mía Mawu gã.
Míawo hã míekpɔa dzidzɔ
Le kafuhawo dzim.
O Fofo, dziɖula gã,
Wòe kpɔa mí katã ta;
Èl’a-gbe, le wò dɔ dzi,
Wò ŋu míeɖoa dzi ɖo,
Ame si lé xexeame
Kple ‘menuwo ɖ’a-si.

Stanza 3
Akpedada kple bubu
Míetsɔ vɛ na wò, mía Mawu.
Mí, viwò beli siawo,
L’a-seye tsom wò ŋusẽ ta.
Na be míatsɔ dzideƒo
Kple dzigbɔɖi vavã
Anɔ te sesiẽ ɖaa si,
Le fu kple xaxa me!
Ekema ne míeɖu dzi
To wò ŋusẽ me la,
Míadzi akpedahawo
Yi ɖe mavɔ me ke.

LEAVE A REPLY

Please enter your comment!
Please enter your name here