GEC EWE Hymn

GEC Ewe Hymn 139

Stanza 1
Gbɔgbɔ Kɔkɔe, va nɔ mía me,
Bena míatrɔ zu nɔwòƒe,
O kekeli tso dziƒo!
Na bena wò keklẽ kɔkɔe
Naklẽ ɖe míaƒe dzi me ɖaa,
Be ne míagatra mɔ o!
Dzidzɔ, dzudzɔ,
Ŋutifafa, agbe vavã
Le asiwò;
Eya ŋuti míeva gbɔwò.

Stanza 2
Gbɔgbɔ, wò ko nye nunyala,
Wòe nye mía nufiala vavã,
Gblɔ ‘kɔfanyawo na mí;
Na xɔse kple dzideƒo mí,
Be míate ŋu agblɔ wò nya
Na mía nɔviwo katã!
Va na nunya,
Do ŋusẽ mí, bena míanye
Tɔwò ɖaa si,
Anɔ agbe na wò bubu!

Stanza 3
Tsɔ mawunya do ŋusẽ mí,
Be míanɔ tsitre kalẽtɔe
Le ŋɔdzi kple xaxa me!
Na míatsɔ dzideƒo blibo
Aɖu futɔ ƒe ŋusẽ dzi
Le wò dzikpɔkpɔ nyui te!
Kpe ɖe mía ŋu,
Do ŋusẽ mí, bena míakpɔ
Akɔfafa
Le dzɔgbevɔ̃ewo katã me!

Stanza 4
Na be míanɔ agbe dzadzɛ
Le xexe gbegblẽ sia hã me!
Do ŋusẽ míaƒe gbɔgbɔ,
Be tso esia dzi yina la
Míagbe xexeme ƒe dzidzɔ
Kple eƒe nudzodzrowo!
Xɔ mí, ɖe mí
Tso nu vɔ̃ me, be nàkplɔ mí
Tso afi sia
Yi ɖe dziƒofiaɖuƒe me!

LEAVE A REPLY

Please enter your comment!
Please enter your name here