Ezra

EZRA
Cyrus helps the exiles to return

1 Le Persia-fia Kores ƒe ƒe gbãtɔ me, be Afetɔ ƒe nya si wògblɔ to Yeremiya dzi nava eme la, Afetɔ nyɔ Persia-fia Kores ƒe gbɔgbɔ, wòɖe gbeƒã le eƒe fiaɖuƒe blibo la me, eye wòŋlɔe ɖe agbalẽ me hã be:
2 “Ale Persia-fia Kores gblɔe nye esi, ‘Afetɔ, dziƒowo ƒe Mawu la, tsɔ anyigbadzifiaɖuƒewo katã nam, eye wòde dɔ asi nam be matu xɔ na ye ɖe Yerusalem, le Yuda. 
3 Eƒe dukɔ blibo la me tɔ ɖe sia ɖe si le mia dome la, eƒe Mawu nenɔ kplii. Neyi Yerusalem le Yuda ne wòagbugbɔ Afetɔ, Israel ƒe Mawu la, ƒe xɔ si nɔ Yerusalem la atu—eyae nye Mawu vavã la. 
4 Ame sia ame si nye amedzro, afi ka kee wòɖale o, eƒe aƒelikawo nekpe ɖe eŋu, ne woana klosalo, sika, nunɔamesiwo kple aƒemelãwoe, hekpe ɖe lɔlɔ̃nu faa nunana ŋu hena Mawu vavã la ƒe aƒe si le Yerusalem.’”
5 Ale Yuda kple Benyamin viwo ƒe tatɔ siwo le wo fofowo ƒe aƒekɔwo nu, nunɔlawo kple Lewi viwo—ame sia ame si ƒe dzi Mawu vavã la ʋã la—dzra ɖo be yewoayi aɖagbugbɔ Afetɔ ƒe xɔ si nɔ Yerusalem la atu. 
6 Ke woƒe aƒelikawo tsɔ klosalonuwo, sika, nunɔamesiwo, aƒemelãwo kple nu xɔasiwo do alɔ wo hekpe ɖe nu siwo katã wona faa la ŋu.
7 Fia Kores hã ɖe Afetɔ ƒe aƒe la me nu siwo Nebukadnezar lɔ tso Yerusalem heva da ɖe eƒe mawu ƒe me la do goe. 
8 Persia-fia Kores ɖe wo do goe le kesinɔnuwo dzi kpɔla Mitredat ƒe dzikpɔkpɔ te, eye wòxlẽ wo de asi na Sesbazar, si nye Yuda ƒe amegã.
9 Ke nuawo ƒe xexlẽme yi ale: sikagba siwo le abe kusiwo ene blaetɔ̃, klosalogba siwo le abe kusiwo ene akpe ɖeka, ŋudɔwɔnu bubu blaeve vɔ asieke, 
10 sikagba goboe sue blaetɔ̃, klosalogba goboe sue alafa ene kple ewo, kple ŋudɔwɔnu bubu akpe ɖeka. 
11 Sikanuawo kple klosalonuawo katã le akpe atɔ̃ alafa ene. Sesbazar lɔ nu siawo katã ɖe asi esime aboyomeawo tso Babilon gbugbɔ va Yerusalem.

EZRA 2
1 Babilon dziɖuƒea me tɔ siwo gbɔ tso aboyo me, ame siwo Babilon-fia Nebukadnezar ɖe aboyoe yi Babilon eye wotrɔ gbɔ va Yerusalem kple Yuda, eye ame sia ame yi eya ŋutɔ ƒe du me la woe nye esi, 
2 ame siwo gbɔ kple Zerubabel, Yesua, Nehemiya, Seraya, Reelaya, Mordekai, Bilsan, Mispar, Bigvai, Rehum kple Baana.
Israel dukɔ la me ŋutsuwo ƒe xexlẽmee nye esi: 
3 Paros viwo le ame akpe eve alafa ɖeka blaadre vɔ eve; 
4 Sefatiya viwo le ame alafa etɔ̃ blaadre vɔ eve; 
5 Arak viwo le ame alafa adre blaadre vɔ atɔ̃; 
6 Pahat-Moab vi siwo tso Yesua kple Yoab viwo dome le ame akpe eve alafa enyi wuieve; 
7 Elam viwo le ame akpe ɖeka alafa eve blaatɔ̃ vɔ ene; 
8 Zatu viwo le ame alafa asieke blaene vɔ atɔ̃; 
9 Zakai viwo le ame alafa adre blaade; 
10 Bani viwo le ame alafa ade blaene vɔ eve; 
11 Bebai viwo le ame alafa ade blaeve vɔ etɔ̃; 
12 Azgad viwo le ame akpe ɖeka alafa eve blaeve vɔ eve; 
13 Adonikam viwo le ame alafa ade blaade vɔ ade; 
14 Bigvai viwo le ame akpe eve kple blaatɔ̃ vɔ ade; 
15 Adin viwo le ame alafa ene blaatɔ̃ vɔ ene; 
16 Ater vi siwo tso Hizkiya me le ame blaasieke vɔ enyi; 
17 Bezai viwo le ame alafa etɔ̃ blaeve vɔ etɔ̃; 
18 Yora viwo le ame alafa ɖeka wuieve; 
19 Hasum viwo le ame alafa eve blaeve vɔ etɔ̃; 
20 Gibar viwo le ame blaasieke vɔ atɔ̃; 
21 Betlehem viwo le ame alafa ɖeka blaeve vɔ etɔ̃; 
22 Netofa ŋutsuwo le ame blaatɔ̃ vɔ ade; 
23 Anatot ŋutsuwo le ame alafa ɖeka blaeve vɔ enyi; 
24 Azmavet viwo le ame blaene vɔ eve; 
25 Kiriat-Yearim, Kefira kple Beerot viwo le ame alafa adre blaene vɔ etɔ̃; 
26 Rama kple Geba viwo le ame alafa ade blaeve vɔ ɖekɛ; 
27 Mikmas ŋutsuwo le ame alafa ɖeka blaeve vɔ eve; 
28 Betel kple Ai ŋutsuwo le ame alafa eve blaeve vɔ etɔ̃; 
29 Nebo viwo le ame blaatɔ̃ vɔ eve; 
30 Magbis viwo le ame alafa ɖeka blaatɔ̃ vɔ ade; 
31 Elam kemɛa ƒe viwo le ame akpe ɖeka alafa eve blaatɔ̃ vɔ ene; 
32 Harim viwo le ame alafa etɔ̃ blaeve; 
33 Lod viwo, Hadid viwo kple Ono viwo le ame alafa adre blaeve vɔ atɔ̃; 
34 Yeriko viwo le ame alafa etɔ̃ blaene vɔ atɔ̃; 
35 Senaa viwo le ame akpe etɔ̃ alafa ade blaetɔ̃.
36 Nunɔlawoe nye: Yedaya vi siwo tso Yesua ƒe me, wole ame alafa asieke blaadre vɔ etɔ̃; 
37 Imer viwo le ame akpe ɖeka kple blaatɔ̃ vɔ eve; 
38 Pashur viwo le ame akpe ɖeka alafa eve blaene vɔ adre; 
39 Harim viwo le ame akpe ɖeka kple wuiadre.
40 Lewi viwoe nye: Yesua viwo kple Kadmiel vi siwo katã tso Hodavia viwo dome, wole ame blaadre vɔ ene.
41 Hadzila siwo nye Asaf viwo le ame alafa ɖeka blaeve vɔ enyi. 
42 Agbonudzɔlawo ƒe viwoe nye: Salum viwo, Ater viwo, Talmon viwo, Akub viwo, Hatita viwo, Sobai viwo, wo katã wole ame alafa ɖeka blaetɔ̃ vɔ asieke.
43 Gbedoxɔmesubɔlawoe nye: Ziha viwo, Hasufa viwo, Tabaot viwo, 
44 Keros viwo, Siaha viwo, Padon viwo, 
45 Lebana viwo, Hagaba viwo, Akub viwo, 
46 Hagab viwo, Salmai viwo, Hanan viwo, 
47 Gidel viwo, Gahar viwo, Reaya viwo, 
48 Rezin viwo, Nekoda viwo, Gazam viwo, 
49 Uza viwo, Pasea viwo, Besai viwo, 
50 Asnah viwo, Meunim viwo, Nefusim viwo; 
51 Bakbuk viwo, Hakufa viwo, Harhur viwo, 
52 Bazlut viwo, Mehida viwo, Harsa viwo, 
53 Barkos viwo, Sisera viwo, Tema viwo, 
54 Neziya viwo kple Hatifa viwo.
55 Salomo ƒe subɔviwo ƒe viwoe nye: Sotai viwo, Soferet viwo, Peruda viwo, 
56 Yaala viwo, Darkon viwo, Gidel viwo, 
57 Sefatiya viwo, Hatil viwo, Pokeret-Hazebayim viwo kple Ami viwo.
58 Gbedoxɔmesubɔlawo kple Salomo ƒe subɔviwo ƒe viwo katã le ame alafa etɔ̃ blaasieke vɔ eve.
59 Ame siwo tso Tel-Mela, Tel-Harsa, Kerub, Adon kple Imer, gake womete ŋu fia wo fofowo ƒe aƒekɔwo kple woƒe dzɔtsoƒe be Israel-viwoe yewonye o lae nye: 
60 Delaya viwo, Tobiya viwo, Nekoda viwo, wole ame alafa ade blaatɔ̃ vɔ eve. 
61 Ame siwo tso nunɔlawo ƒe viwo domee nye: Habayiya viwo, Hakoz viwo, Barzilai, si ɖe srɔ̃ tso Gileadtɔ Barzilai ƒe vinyɔnuwo dome, eye wòtsɔ woƒe ŋkɔ la, ƒe viwo. 
62 Ame siawoe di woƒe ƒomeŋkɔ le dzidzimenuŋlɔɖiawo me, ne woaɖo kpe dzidzime si me wotso la dzi, ke womekpɔe o, ale woɖe wo le nunɔladɔ la me. 
63 Eya ta nutodziɖula la gblɔ na wo be womate ŋu aɖu nu kɔkɔewo ƒe nu kɔkɔeawo ƒe ɖeke o, va se ɖe esime nunɔla aɖe bia gbe to Urim kple Tumim la dzi hafi.
64 Ha blibo la katã le ame akpe blaene vɔ eve alafa etɔ̃ blaade, 
65 woƒe kluviwo kple kosiwo mele eme o, woawo le ame akpe adre alafa etɔ̃ blaetɔ̃ vɔ adre; woƒe ŋutsuhadzilawo kple nyɔnuhadzilawo hã le alafa eve. 
66 Woƒe sɔwo le alafa adre blaetɔ̃ vɔ ade, eye woƒe tedzisɔwo le alafa eve blaene vɔ atɔ̃, 
67 woƒe kposɔwo le alafa ene blaetɔ̃ vɔ atɔ̃, eye woƒe tedziwo le akpe ade alafa adre blaeve.
68 Esi tatɔ siwo le wo fofowo ƒe aƒekɔawo nu dometɔ aɖewo va ɖo Afetɔ ƒe aƒe la gbɔ le Yerusalem la, wona nu faa be woatsɔ atso Mawu vavã la ƒe aƒe la ɖe eteƒe. 
69 Wona sika ale si nu woate ŋui ɖe dɔa ŋu: drakma akpe blaade vɔ ɖekɛ, klosalo mina akpe atɔ̃ kple nunɔlawu ʋlaya alafa ɖeka. 
70 Eye nunɔlawo, Lewi viwo, dukɔ la me tɔ aɖewo, hadzilawo, agbonudzɔlawo kple ame siwo nye gbedoxɔmesubɔlawo yi ɖanɔ woƒe duwo me, eye Israel-vi susɔeawo katã hã yi ɖanɔ woƒe duwo me.

EZRA 3
1 Le ɣleti adrelia me, esi Israel-viwo le woƒe duwo me keŋ la, wova kpe ta ɖe Yerusalem kple tame ɖeka. 
2 Eye Yesua, Yehozadak vi, kple nɔvia siwo nye nunɔlawo kpakple Zerubabel, Sealtiel vi, kple nɔviawo tso, eye woɖi Israel ƒe Mawu la ƒe vɔsamlekpui, ne woasa numevɔwo le edzi, abe ale si woŋlɔe ɖe Mawu vavã la ƒe ame Mose ƒe Sea me ene.
3 Ale woɖi vɔsamlekpui la ɖe afi si wònɔ tsã, togbɔ be wonɔ vɔvɔ̃m na dukɔ siwo ƒo xlã wo hã, eye wode asi ŋdi kple fiẽ numevɔwo sasa me le edzi na Afetɔ. 
4 Emegbe woɖu Agbadɔŋkekenyui la abe ale si woŋlɔe ɖii ene, eye wosa numevɔ gbe sia gbe ɖe xexlẽme la nu, abe ale si woɖo na ŋkeke ɖe sia ɖe ene. 
5 Emegbe wosa numevɔ si wosana ɖaa, kple dzinu yeyewo ƒe vɔsawo, kple Afetɔ ƒe azãɖuɣi kɔkɔewo katã ƒe vɔsawo kpakple ame sia ame si lɔ̃ faa va na nu Afetɔ la ƒe numevɔwo. 
6 Wodze numevɔwo sasa na Afetɔ gɔme tso ɣleti adrelia ƒe ŋkeke gbãtɔ dzi, togbɔ be womeɖo Afetɔ ƒe gbedoxɔa gɔme anyi haɖe o hã.
7 Wotsɔ ga na kpekpalawo kple aɖaŋudɔwɔlawo, eye wotsɔ nuɖuɖu, nunono kple ami na Sidontɔwo kple Tirotɔwo, ne woatsɔ sedertiwo tso Lebanon ava Yopa le ƒu la nu, abe ale si Persia-fia Kores ɖe mɔ na woe ene.
8 Esi wogbɔ va Mawu vavã ƒe aƒe la gbɔ le Yerusalem ƒe ƒe evelia ƒe ɣleti evelia me la, Zerubabel, Sealtiel vi, kple Yesua, Yehozadak vi, kpakple wo nɔvi susɔeawo, nunɔlawo kple Lewi viwo, kpakple ame siwo katã gbɔ tso aboyo me va Yerusalem la dze dɔ gɔme; eye woɖo Lewi vi siwo xɔ ƒe blaeve kple edzivɔ la be woakpɔ Afetɔ ƒe aƒe la ƒe dɔ la dzi. 
9 Eya ta Yesua, viawo kple nɔviawo, Kadmiel kple viawo, Yuda viwo, wɔ ɖeka be yewoanye dzikpɔlawo anɔ Mawu vavã la ƒe aƒe la me dɔwɔlawo nu, hekpe ɖe Henada viwo, wo viwo kple wo nɔvi siwo hã nye Lewi viwo ŋu.
10 Esi xɔtulawo ɖo Afetɔ ƒe gbedoxɔ la gɔme anyi la, nunɔla siwo le nunɔlawu me, eye kpẽwo le wo si, kple Lewi vi siwo nye Asaf viwo, eye gakogoewo le wo si la tso be woakafu Afetɔ abe ale si Israel-fia David ɖoe ene. 
11 Eye wodzi ha kafu Afetɔ heda akpe nɛ, “elabena eya amea nyo; eƒe lɔlɔ̃ si nu metsina o la li na Israel tegbee.” Eye dukɔ blibo la katã do ɣli sesĩe kafu Afetɔ le esi woɖo Afetɔ ƒe xɔ la gɔme anyi ta. 
12 Eye nunɔlawo dometɔ geɖe kple Lewi viwo kpakple tatɔ siwo le wo fofowo ƒe aƒekɔawo nu, siwo nye ame tsitsi siwo kpɔ xɔ tsãtɔ la, fa avi hehehe esi woɖo xɔ sia gɔme anyi wokpɔ, esime ame bubu geɖewo ya le aseye tsom hoo. 
13 Ale dukɔ la mete ŋu de vovo dzidzɔɣli la kple ameawo ƒe avifafa la dome o, elabena dukɔ la le ɣli dom sesĩe, eye woƒe gbe de didiƒe ke.

EZRA 4
1  Esi Yuda kple Benyamin ƒe ketɔwo se be aboyome siwo trɔ gbɔ la le gbedoxɔ tum na Afetɔ, Israel ƒe Mawu la, 
2 enumake wote ɖe Zerubabel kple tatɔ siwo le wo fofowo ƒe aƒekɔawo nu ŋu gblɔ na wo be: “Mina míatui kpli mi; elabena míawo hã míesubɔa mia Mawu la abe miawo ke ene, eye eyae míesaa vɔ na tso keke Asiria-fia Esar-Hadon, ame si kplɔ mí va afi sia la, ŋɔli ke.” 
3 Gake Zerubabel kple Yesua kpakple Israel ƒe tatɔ susɔeawo siwo le wo fofowo ƒe aƒekɔawo nu gblɔ na wo be: “Miate ŋu akpɔ gome kpli mí le xɔtutu na mía Mawu la me o, ke boŋ míawo ɖeɖe míatu xɔ na Afetɔ, Israel ƒe Mawu la, abe ale si Persia-fia Kores de se na mí ene.”
4 Eye anyigba la dzi tɔwo ɖe dzi le Yuda dukɔ la ƒo, eye wodo vɔvɔ̃ na wo le xɔ la tutu me. 
5 Woda aɖaŋuɖolawo ɖe wo ŋu be woagblẽ woƒe ɖoɖowo me le Persia-fia Kores ƒe ŋkekeawo katã me, va se ɖe Persia-fia Dario ƒe fiaɖuɣi. 
6 Le Ahasweros ƒe fiaɖuɖu ƒe gɔmedzedze la, woŋlɔ agbalẽ tsɔ tso Yuda kple Yerusalem nɔlawo nu. 
7 Le Persia-fia Artasasta ŋɔli la, Bislam, Mitredat, Tabeel kple eƒe hadɔwɔla susɔeawo ŋlɔ agbalẽ na fia Artasasta; eye woɖe agbalẽ la gɔme ɖe Aramgbe me hetsɔ Aram ŋɔŋlɔdzesiwo ŋlɔe.
8 Dziɖuɖumegãwo ƒe tatɔ Rehum kple agbalẽŋlɔla Simsai ŋlɔ agbalẽ tsɔ tso Yerusalem nu ɖo ɖe fia Artasasta ale: 
9 (Dziɖuɖumegãwo ƒe tatɔ Rehum kple agbalẽŋlɔla Simsai kpakple woƒe hadɔwɔla susɔeawo, siwo nye ʋɔnudrɔ̃lawo kple nutodziɖula siwo ƒe ɖoƒe ɖiɖi wu, agbalẽŋlɔlawo, Erektɔwo, Babilontɔwo, ame siwo le Susa, siwo nye Elamtɔwo, 
10 kple dukɔ siwo katã bubutɔ gã Asenapar ɖe aboyoe hena wole Samaria duwo me la dometɔ susɔeawo kpakple ame siwo susɔ ɖe nuto si le Tɔsisia godo me la gbɔe wòtso, azɔ 
11 agbalẽ si woɖo ɖee la me nyawoe nye esi.)
“Na fia Artasasta, tso wò subɔvi siwo le nuto si le Tɔsisia godo gbɔ: Azɔ 
12 fia la nanyae be, Yudatɔ siwo tso gbɔwò va mía gbɔ le afi sia la va ɖo Yerusalem. Wogbugbɔ le du dzeaglã vɔ̃ɖi la tsom, wole gliawo nu wum, eye wole gɔmeɖoanyiawo ɖɔm ɖo. 
13 Azɔ fia la nanyae be ne wogbugbɔ du sia tso eye wowu eƒe gliawo nu la, ekema woagbe adzɔ, nudzɔdzɔ, alo mɔtaho nana, eye ana fiawo ƒe gakpɔkpɔ dzi naɖe kpɔtɔ. 
14 Ke esi wònye fiasã me dzee míeɖuna, eye medze be míanɔ ekpɔm nu nagblẽ le fia ƒe viɖekpɔƒe ŋu alea o tae míedɔ ame ne míana fia la nanya, 
15 ne woadzro tɔgbuiwo ƒe nuŋlɔɖigbalẽwo me. Àkpɔe le nuŋlɔɖigbalẽawo me be du sia nye du dzeaglã, si nana nu gblẽna le fiawo kple nutowo ŋu, eye ame siwo dea aglãdzedze ɖe dziɖuɖu ŋu ƒe dzi ƒo la le eme tso gbe aɖe gbe ke. Esia tae wotsrɔ̃ du sia ɖo. 
16 Míedi be míana fia nanyae be, ne wogbugbɔ du sia tso hewu eƒe gliwo nu la, ekema màgakpɔ ŋusẽ ɖe nuto si le Tɔsisia godo la dzi o.”
17 Fia la ɖo du ɖe dziɖuɖumegãwo ƒe tatɔ Rehum kple agbalẽŋlɔla Simsai kpakple woƒe hadɔwɔla susɔe siwo le Samaria kple nuto siwo susɔ ɖe Tɔsisia godo be:
“Medo gbe na mi! Azɔ 
18 woxlẽ agbalẽ si mieɖo ɖe mí la le ŋkunyeme eme kɔ nyuie. 
19 Eya ta mede se be woaku nyaa me, eye wokpɔe be du la nye du si tsia tsitre ɖe fiawo ŋu tso gbe aɖe gbe ke, eye wònye du si me wodzea aglã hewɔa ʋunyaʋunya le. 
20 Fia sesẽwo nɔ Yerusalem nu, woɖu nuto siwo katã le Tɔsisia godo dzi, eye woxe adzɔ kple nudzɔdzɔ kpakple mɔtaho na wo. 
21 Azɔ mide se, ne ŋutsu siawo nadzudzɔ dɔa wɔwɔ, ale be woagagbugbɔ du ma atso o, va se ɖe esime meɖe gbe hafi. 
22 Mikpɔ nyuie be mietsɔ nya sia vevie, ne nu nagagblẽ le fia ƒe viɖekpɔƒe ŋu ɖe edzi o.”
23 Ke esi woxlẽ agbalẽ si tso Fia Artasasta gbɔ la me nyawo le Rehum kple agbalẽŋlɔla Simsai kpakple woƒe hadɔwɔlawo ŋkume la, wowɔ kaba yi ɖe Yudatɔwo gbɔ le Yerusalem, eye wotɔ te wo sesẽe. 
24 Ɣemaɣie Mawu ƒe xɔ si nɔ Yerusalem la ƒe dɔ la tɔ; eye dɔ la tsi akpo dzi va se ɖe Persia-fia Dario ƒe fiaɖuɖu ƒe ƒe evelia me.

EZRA 5
1  Eye nyagblɔɖila Hagai kple nyagblɔɖila Zakariya, Ido tɔgbuiyɔvi, gblɔ nya ɖi na Yudatɔ siwo le Yuda kple Yerusalem, le Israel ƒe Mawu, ame si li kpli wo la, ƒe ŋkɔ me. 
2 Ɣemaɣie Zerubabel, Sealtiel vi, kple Yesua, Yehozadak vi, gbugbɔ dze Mawu ƒe xɔ si nɔ Yerusalem la tutu gɔme; eye Mawu ƒe nyagblɔɖilawo nɔ wo ŋu hekpe ɖe wo ŋu. 
3 Ɣemaɣi Tatenai, si nye nutodziɖula le nuto si le Tɔsisi la godo kple Setar-Bozenai kpakple woƒe hadɔwɔlawo va wo gbɔ hebia wo be: “Ame kae ɖe mɔ na mi be miatu xɔ sia ahawu gli sia nu?”
4 Eye wobia wo hã be: “Ŋutsu siwo le xɔ sia tum la ƒe ŋkɔwo ɖe?” 
5 Ke Mawu ƒe ŋku le Yudatɔwo ƒe ametsitsiwo ŋu, ale be womena wodzudzɔ o, va se ɖe esime woɖo nyatakaka la ɖe Dario, eye wòɖo agbalẽ ɖa le nya sia ŋu.
6 Agbalẽ si Tatenai, si nye nutodziɖula le nuto si le Tɔsisia godo, kple Setar-Bozenai kpakple eƒe hadɔwɔlawo, nutodziɖula siwo ƒe ɖoƒe ɖiɖi wu, siwo le nuto si le Tɔsisia godo, ɖo ɖe Fia Dario la me nyawoe nye esi; 
7 woɖo agbalẽ la ɖee, eye ale woŋlɔ ɖe emee nye esi:
“Na Fia Dario:
“Ŋutifafa blibo na wò! 
8 Fia la nanyae be, míeyi Mawu gã la ƒe xɔ la gbɔ le wò nuto si nye Yuda la me, eye wotsɔ kpe gãwo le etum, eye wole ati dem gliawo me. Ameawo le dɔa dzi vevie, eye dɔa le zɔ ɖem le woƒe kutrikuku ta. 
9 Eye míebia gbe woƒe ametsitsiawo be: ‘Ame kae ɖe mɔ na mi be miatu xɔ sia ahawu gli sia nu?’ 
10 Míebia woƒe ŋkɔwo hã, ale be míaŋlɔ ŋutsu siwo nye woƒe tatɔwo la ƒe ŋkɔwo ne míana nànya.
11 “Ale woɖo nya ŋu na míe nye esi: ‘Dziƒowo kple anyigba ƒe Mawu la ƒe subɔlawoe míenye, eye míegbugbɔ le xɔ si Israel-fia gã aɖe tu hewu enu ƒe gbogbo aɖewoe nye esi va yi la tum. 
12 Ke esi mía fofowo do dziku na dziƒowo ƒe Mawu la ta la, etsɔ wo de asi na Kaldeatɔ Babilon-fia Nebukadnezar, ame si gbã xɔ sia heɖe aboyo dukɔ la yi Babilon. 
13 Ke le Babilon-fia Kores ƒe ƒe gbãtɔ me la, Fia Kores ɖe gbe be woagbugbɔ Mawu ƒe xɔ sia atu. 
14 Azɔ hã, Fia Kores fɔ sikanu kple klosalonu siwo nɔ Mawu ƒe aƒe la me siwo Nebukadnezar lɔ tso gbedoxɔ si nɔ Yerusalem me yi Babilon ƒe gbedoxɔ me la, eye wòtsɔ wo na Sesbazar, ame si Kores ɖo nutodziɖulae. 
15 Kores gblɔ nɛ be: “Tsɔ nu siawo. Tsɔ wo yi ɖada ɖe gbedoxɔ si le Yerusalem la me, eye na woagbugbɔ Mawu ƒe xɔ la atu ɖe afi si wònɔ tsã.” 
16 Ale Sesbazar va, eye wòɖo Mawu ƒe xɔ si le Yerusalem la gɔme anyi; eye wole etutu dzi tso ɣemaɣi va se ɖe fifia, ke womekpɔ wu enu o.’
17 “Eya ta ne enyo fia ŋu la, ekema woaku nu me le fia ƒe kesinɔnudzraɖoƒe le Babilon afi ma, ne woakpɔe ɖa be ele eme vavã be Fia Kores ɖe gbe be woagbugbɔ Mawu ƒe xɔ ma atu ɖe Yerusalem hã; eye ale si fia la tso nya me le nya sia ŋu la, negblɔe ɖo ɖe mí.”

EZRA 6
1 Ɣemaɣie Fia Dario ɖe gbe woku nu me le nuŋlɔɖidzraɖoƒewo, afi si wodzraa nu veviwo ɖo le Babilon la me. 
2 Eye woke ɖe agbalẽ xatsaxatsa aɖe ŋu le mɔ́ sesẽ si le Ekbatana le Media nutoa me, eye nyatakaka si le emee nye esi:
3 “Le Fia Kores ƒe ƒe gbãtɔ me la, Fia Kores de se le Mawu ƒe xɔ si le Yerusalem la ŋu be: ‘Woagbugbɔ xɔ la atu wòanye teƒe si woasa vɔ le, woaɖo egɔme anyi, eye wòakɔ abɔklugui blaade akeke abɔklugui blaade, 
4 eye woatsɔ kpe gãwo aɖo amli etɔ̃, eye amli ɖeka nanye ati; woaxe eŋu fewo tso fiaƒe me. 
5 Azɔ hã, woagbugbɔ Mawu ƒe aƒe la me sikanu kple klosalonu siwo Nebukadnezar lɔ tso gbedoxɔ si nɔ Yerusalem me va Babilon la ayii, ne woatsɔ wo ada ɖe wo teƒe le gbedoxɔ si le Yerusalem la me, eye woada wo ɖe Mawu ƒe xɔ la me.’
6 “Eya ta Tatenai, si nye nutodziɖula le nuto si le Tɔsisi la godo, Setar-Bozenai kple miaƒe hadɔwɔla siwo nye nutodziɖula siwo ƒe ɖoƒe ɖiɖi wu, siwo le nuto si le Tɔsisia godo me—mite ɖa tso afi ma! 
7 Miɖe asi le Mawu ƒe xɔtudɔ ma ƒe nya me. Yudatɔwo ƒe nutodziɖula la kple Yudatɔwo ƒe ametsitsiwo agbugbɔ Mawu ƒe xɔ la atu ɖe afi si wònɔ tsã. 
8 Azɔ hã mele se dem tso nu si miawɔ na Yudatɔwo ƒe ametsitsi siawo be woagbugbɔ Mawu ƒe xɔ ma atu ŋu: Miɖe ga le fia ƒe kesinɔnudzraɖoƒe tso adzɔ si woxɔna tso nuto si le Tɔsisia godo me na ŋutsu siawo enumake be woatsɔ ayi dɔa dzi, eye migaxe mɔ na wo o. 
9 Eye ne nu bubu aɖe gahiã, eɖanye nyitsuiwo, agbowo, alẽviwo ɖe dziƒo ƒe Mawu la ƒe numevɔsawo ŋu, eɖanye lu, dze, wain kple ami o, mina woatsɔe ana wo ɖaa gbe sia gbe dedie, abe ale si ko nunɔla siwo le Yerusalem agblɔe ene, 
10 ne woayi edzi anɔ vɔ siwo dzea dziƒowo ƒe Mawu la ŋu la sam, eye woanɔ gbe dom ɖa ɖe fia la kple viawo ƒe agbe ta. 
11 Eye mele gbe ɖem be, ame sia ame si ada se sia dzi la, woaɖe ati le eƒe xɔ me ahee ɖe eŋu, eye eƒe aƒe atrɔ azu dua ƒe nugododeƒe le nya sia ta. 
12 Eye Mawu si na eƒe ŋkɔ le afi ma la naɖe fia sia fia si ado eƒe asi ɖa be yeagblẽ sedede sia me alo agbã Mawu ƒe xɔ sia si le Yerusalem la ɖa le zi dzi, eye wòatu nu kple dukɔ sia dukɔ si awɔ nenema la hã. Nye Dario ye de sea. Mina woawɔe kaba.”
13 Eye Tatenai, si nye nutodziɖula le nuto si le Tɔsisia godo, Setar-Bozenai kple woƒe hadɔwɔlawo wɔ nu sia nu si ƒe se Fia Dario de dzi enumake. 
14 Eye Yudatɔwo ƒe ametsitsiwo yi xɔ la tutu dzi le nyagblɔɖila Hagai kple Zakariya, Ido tɔgbuiyɔvi, ƒe nyagblɔɖi siwo do ŋusẽ wo la nu; eye wowu enu le Israel ƒe Mawu la ƒe sedede kpakple Kores, Dario kple Persia-fia Artasasta ƒe sedede nu. 
15 Wowu xɔ la nu le dzinu Adar ƒe ŋkeke etɔ̃lia dzi, le Fia Dario ƒe fiaɖuɖu ƒe ƒe adelia me.
16 Eye Israel-viwo, nunɔlawo, Lewi viwo kple ame siwo nɔ aboyo me tsã la ƒe ame susɔeawo kɔ Mawu ƒe xɔ sia ŋu kple dzidzɔ. 
17 Eye wotsɔ nyitsu alafa ɖeka, agbo alafa eve kple alẽvi alafa ene vɛ ɖe Mawu ƒe xɔ sia ŋu kɔkɔ ŋuti, kple gbɔ̃tsu wuieve be woatsɔ asa nuvɔ̃vɔ ɖe Israel blibo la katã ta, le Israel-toawo ƒe xexlẽme nu. 
18 Eye woɖo nunɔlawo ɖe woƒe hatsotsowo me kple Lewi viwo ɖe woƒe hatsotsowo me, na Mawu ƒe subɔsubɔdɔ si le Yerusalem la wɔwɔ, abe ale si woŋlɔe ɖe Mose ƒe agbalẽ la me ene.
19 Eye ame siwo nɔ aboyo me tsã la ɖu Ŋutitotoŋkekenyui la le ɣleti gbãtɔ ƒe ŋkeke wuienelia dzi. 
20 Nunɔlawo kple Lewi viwo siaa kɔ wo ɖokuiwo ŋu, ale wo katã ŋu kɔ; wowu Ŋutitotolã na ame siwo katã nɔ aboyo me tsã, wo nɔvi nunɔlawo kple woawo ŋutɔwo. 
21 Eye Israel-vi siwo gbɔ tso aboyo me la ɖui, hekpe ɖe ame sia ame si wɔ ɖeka kpli wo heɖe eɖokui ɖa tso anyigbadzidukɔwo ƒe nu makɔmakɔwo gbɔ be yewoasubɔ Afetɔ, Israel ƒe Mawu la ŋuti. 
22 Eye woɖu Amɔwɔ Maʋamaʋã Bolo Ŋkekenyui la ŋkeke adre kple dzidzɔ, elabena Afetɔ na wokpɔ dzidzɔ, eye wòtrɔ Asiria-fia ƒe dzi ɖe wo ŋu wòdo alɔ wo, le Mawu vavã la, si nye Israel ƒe Mawu la, ƒe dɔ la wɔwɔ me.

EZRA 7
1 Le nu siawo megbe, le Persia-fia Artasasta ƒe fiaɖuɣi la, Ezra trɔ gbɔ. Enye Seraya vi, Azariya vi, Hilkiya vi, 
2 Salum vi, Zadok vi, Ahitub vi, 
3 Amariya vi, Azariya vi, Merayot vi, 4 Zerahiya vi, Uzi vi, Buki vi, 
5 Abisua vi, Finehas vi, Eleazar vi, nunɔlawo ƒe tatɔ Aron ƒe vi. 
6 Ezra sia trɔ gbɔ tso Babilon. Enye Mose ƒe Se si Afetɔ, Israel ƒe Mawu la tsɔ na la gbugbɔŋlɔla bibi aɖe. Fia la lɔ̃ ɖe nu siwo katã wòbia dzi nɛ, elabena Afetɔ eƒe Mawu ƒe asi le edzi.
7 Eya ta Israel-viwo dometɔ aɖewo, nunɔlawo, Lewi viwo, hadzilawo, agbonudzɔlawo kple gbedoxɔmesubɔlawo dometɔ aɖewo yi Yerusalem le Fia Artasasta ƒe ƒe adrelia me. 
8 Eye Ezra va ɖo Yerusalem le ɣleti atɔ̃lia me, le fia la ƒe ƒe adrelia me. 
9 Elabena eya ŋutɔ ɖoe be yewoaho le Babilon le ɣleti gbãtɔ ƒe ŋkeke gbãtɔ dzi, eye le ɣleti atɔ̃lia ƒe ŋkeke gbãtɔ dzi la, eva ɖo Yerusalem, le eƒe Mawu ƒe asi nyui si le edzi la ta. 
10 Elabena Ezra dzra eƒe dzi ɖo, ne wòadzro Afetɔ ƒe Se la me ahawɔ edzi, eye wòafia ɖoɖowo kple ʋɔnudɔdrɔ̃ ŋuti mɔfiamewo le Israel.
11 Agbalẽ si Fia Artasasta tsɔ na nunɔla Ezra si nye nugbugbɔŋlɔla, ame si nye Afetɔ ƒe sedede kple ɖoɖo siwo wòtsɔ na Israel la srɔ̃la bibi la, me nyawoe nye esi:
12 “Artasasta, fiawo ƒe fia, le nya sia ŋlɔm na nunɔla Ezra, si nye dziƒowo ƒe Mawu la ƒe Se la gbugbɔŋlɔla: Wò ŋutifafa nede blibo. Azɔ 
13 mede se be, Israel dukɔ si kpɔtɔ le nye dziɖuƒe la kple woƒe nunɔlawo kpakple Lewi viwo dometɔ ɖe sia ɖe si lɔ̃ be yeayi Yerusalem kpli wò la, neyi faa. 
14 Elabena fia la kple eƒe adaŋudela adreawoe le dɔwòm be nàyi aɖaku nu me akpɔ be wole wɔwɔm ɖe wò Mawu ƒe Se si le asiwò la dzi le Yuda kple Yerusalem hã, 
15 eye nàtsɔ klosalo kple sika si fia la kple eƒe adaŋudelawo lɔ̃ faa na Israel ƒe Mawu, ame si ƒe nɔƒe le Yerusalem, la ayii, 
16 hekpe ɖe klosalo kpakple sika siwo katã nèxɔ le Babilon nutowo katã me, kple nu siwo dukɔ la kple nunɔlawo, ame siwo na nu faa ɖe woƒe Mawu ƒe aƒe si le Yerusalem ŋu la, ŋuti. 
17 Eye nàtsɔ ga sia aƒle nyitsuwo, agbowo, alẽviwo kple wo ŋuti nuɖuvɔsawo kpakple wo ŋuti nunovɔsawo, eye nàtsɔ wo asa vɔ le wò Mawu ƒe aƒe la me vɔsamlekpui si le Yerusalem la dzi.
18 “Eye nu sia nu si nyo wò kple nɔviwòwo ŋu miebe miatsɔ klosalo kple sika susɔea awɔe la, miwɔe le mia Mawu la ƒe lɔlɔ̃nu nu. 
19 Eye nu siwo katã wotsɔ na wò ɖe wò Mawu ƒe aƒe la ŋuti subɔsubɔdɔa ŋu la, tsɔ wo na le Mawu ŋkume le Yerusalem. 
20 Eye nu bubu siwo hiã le wò Mawu ƒe xɔ la ŋu, si wòle na wò be nàna la, tsɔ wo le fia ƒe kesinɔnudzraɖoƒe la ana.
21 “Nye Fia Artasasta, mede se na kesinɔnuwo dzi kpɔla siwo katã le nuto si le Tɔsisia godo be, nu sia nu si nunɔla Ezra, dziƒowo ƒe Mawu la ƒe Se la gbugbɔŋlɔla la abia mi la, miwɔe nɛ kaba, 
22 va se ɖe klosalo talento alafa ɖeka, lu kɔr alafa ɖeka, wain baf alafa ɖeka kple ami baf alafa ɖeka dzi kpakple dze ale si nu wodi. 
23 Woawɔ nu sia nu si ƒe se dziƒowo ƒe Mawu la de ɖe dziƒowo ƒe Mawu la ƒe aƒea ŋu la veviedodotɔe, ne dɔmedzoe nagava fia ƒe dziɖuƒe la kple viawo dzi o. 
24 Eye minyae be, mele be miaxɔ adzɔ, nudzɔdzɔ alo mɔtaho tso nunɔlawo kple Lewi viwo, hadzilawo, agbonudzɔlawo, gbedoxɔmesubɔlawo, kple Mawu ƒe xɔ sia ŋu dɔwɔlawo dometɔ aɖeke si o.
25 “Eye wò Ezra, ɖo nyadrɔ̃lawo kple ʋɔnudrɔ̃lawo le wò Mawu ƒe nunya si le asiwò la nu, ne woadrɔ̃ ʋɔnu dukɔ blibo si le nuto si le Tɔsisia godo, ame siwo katã nya wò Mawu ƒe seawo; eye ame sia ame si menya wo o la, mifia woe. 
26 Eye ame sia ame si mawɔ wò Mawu ƒe Se kple fia ƒe se dzi o la, woadrɔ̃ ʋɔnui kaba, eɖanye be woawui loo anyae ɖa loo ado fe nɛ loo alo adee gaxɔ me o.”
27 Woakafu Afetɔ, mía tɔgbuiwo ƒe Mawu la, ame si tsɔ nu sia de dzi me na fia la, ne wòaɖo atsyɔ̃ na Afetɔ ƒe xɔ si le Yerusalem! 
28 Eye wòve nunye le fia la kple eƒe adaŋudelawo kple fia la ƒe amegã ŋusẽtɔwo katã ŋkume. Eya ta dzi ɖo ƒonye elabena Afetɔ nye Mawu ƒe asi le dzinye, eye meƒo ame ŋkutawo nu ƒu tso Israel, ne woayi kplim.

EZRA 8
1 Ke ame siawoe nye tatɔ siwo le wo fofowo ƒe aƒekɔawo nu, kple ame siwo gbɔ kplim tso Babilon le Fia Artasasta ƒe fiaɖuɣi, siwo ŋkɔwo woŋlɔ ɖe dzidzimenuŋlɔɖiawo me: 
2 ame si tso Finehas viwo domee nye Gersom; ame si tso Itamar viwo domee nye Daniel; ame si tso David viwo domee nye Hatus; 
3 ame si tso Sekaniya viwo dome, tso Paros viwo domee nye Zakariya, eye woŋlɔ ŋutsu alafa ɖeka blaatɔ̃ ƒe ŋkɔwo kpe ɖe eŋu; 
4 ame si tso Pahat-Moab viwo domee nye Eliyeho-Enai, Zerahiya vi, eye ŋutsu alafa eve kpe ɖe eŋu; 
5 ame si tso Zatu viwo domee nye Sekaniya, Yahaziel vi, eye ŋutsu alafa etɔ̃ kpe ɖe eŋu; 
6 ame si tso Adin viwo domee nye Ebed, Yonatan vi, eye ŋutsu blaatɔ̃ kpe ɖe eŋu; 
7 ame si tso Elam viwo domee nye Yesaya, Ataliya vi, eye ŋutsu blaadre kpe ɖe eŋu; 
8 ame si tso Sefatiya viwo domee nye Zebadiya, Mikael vi, eye ŋutsu blaenyi kpe ɖe eŋu; 
9 ame si tso Yoab viwo domee nye Obadiya, Yehiel vi, eye ŋutsu alafa eve wuienyi kpe ɖe eŋu; 
10 ame si tso Bani viwo domee nye Selomit, Yosifia vi, eye ŋutsu alafa ɖeka blaade kpe ɖe eŋu; 
11 ame si tso Bebai viwo domee nye Zakariya, Bebai vi, eye ŋutsu blaeve vɔ enyi kpe ɖe eŋu; 
12 ame si tso Azgad viwo domee nye Yohanan, Hakatan vi, eye ŋutsu alafa ɖeka kple ewo kpe ɖe eŋu; 
13 ame siwo tso Adonikam viwo dome, siwo nye mlɔetɔwo ƒe ŋkɔwoe nye Elifelet, Yeiel kple Semaya, eye ŋutsu blaade kpe ɖe wo ŋu; 
14 ame siwo tso Bigvai viwo domee nye Utai kple Zabud, eye ŋutsu blaadre kpe ɖe wo ŋu.
15 Eye meƒo wo nu ƒu ɖe tɔsisi, si ɖo ta Ahava la nu; eye míeƒu asaɖa anyi ɖe afi ma ŋkeke etɔ̃. Gake esi melé ŋku ɖe dukɔ la kple nunɔlawo dome la, nyemekpɔ Lewi vi aɖeke le afi ma o. 
16 Eya ta medɔ woɖayɔ Eliezer, Ariel, Semaya kple Elnatan, Yarib, Elnatan, Natan, Zakariya kple Mesulam, siwo nye ame ŋkutawo kpakple Yoyarib kple Elnatan, siwo nye nufialawo vɛ. 
17 Eye medɔ wo ɖo ɖe Ido, ame si nye tatɔ le Kasifiya la gbɔ. Megblɔ na wo be woagblɔ na Ido kple nɔvia siwo nye gbedoxɔmesubɔlawo le Kasifiya be woakplɔ subɔlawo vɛ na mí ɖe mía Mawu ƒe aƒe la ŋu. 
18 Eye le mía Mawu ƒe asi nyui si le mía dzi ta la, wokplɔ ŋutsu dzeaɖaŋu si ŋkɔe nye Serebiya vɛ na mí tso Israel-vi Lewi ƒe tɔgbuiyɔvi Mahli ƒe viwo dome hekpe ɖe viawo kple nɔviawo ŋu: wole ame wuienyi;
19 kple Hasabiya hekpe ɖe Yesaya si tso Merari ƒe dzidzimeviwo dome kple nɔviawo kpakple viawo ŋu: wole ame blaeve. 
20 Eye gbedoxɔmesubɔla siwo David kple amegãwo tsɔ na ɖe Lewi viwo ƒe subɔsubɔdɔ ŋu la le alafa eve kple blaeve, eye woŋlɔ wo katã ƒe ŋkɔwo ɖi.
21 Eye meɖe gbeƒã le Ahava-tɔsisi la nu be woatsi nu adɔ, ne míabɔbɔ mía ɖokuiwo ɖe anyi le mía Mawu la ŋkume, ahabia takpɔkpɔ le míaƒe mɔzɔzɔa me, eye be wòakpɔ míawo ŋutɔwo, mía viwo kple míaƒe nunɔamesiwo katã ta. 
22 Ekpe ŋu nam be mabia aʋakɔ kple sɔdolawo fia la, ne woakpɔ mía ta tso míaƒe futɔwo si me le mɔa dzi, elabena míegblɔ na fia la be: “Mía Mawu ƒe asi nyui le ame siwo katã dinɛ la dzi, ke eɖea eƒe ŋusẽ kple dziku ɖe ame siwo katã gblẽnɛ ɖi la ŋu.” 
23 Eya ta míetsi nu dɔ, eye míebia nu sia mía Mawu, eye wòɖo to míaƒe kukuɖeɖe la.
24 Azɔ meɖe ame wuieve le nunɔlawo ƒe tatɔwo dome ɖe vovo, siwo nye Serebiya kple Hasabiya hekpe ɖe wo nɔvi ewo ŋu. 
25 Eye meda klosalo, sika, ŋudɔwɔnuawo kple nu siwo fia kple eƒe adaŋudelawo kple eƒe amegãwo kpakple Israel-vi siwo nɔ afi ma dzɔ ɖe Mawu ƒe aƒe la ŋu la na wo. 
26 Ale meda klosalo talento alafa ade blaatɔ̃ kple klosalonu alafa ɖeka, siwo ƒe kpekpeme le talento eve, kple sika talento alafa ɖeka de asi na wo, 
27 tsɔ kpe ɖe agba goboe sue blaeve, siwo ƒe kpekpeme le dariko akpe ɖeka, kpakple ŋudɔwɔnu eve siwo wotsɔ akɔbli nyuitɔ siwo le dzo dam wɔ, eye woƒe home de sikatɔ nu la ŋu.
28 Eye megblɔ na wo be: “Ame kɔkɔewoe mienye na Afetɔ, eye ŋudɔwɔnuawo nye nu kɔkɔewo, eye klosalo kple sika la nye lɔlɔ̃nu faa nunana na Afetɔ, mia tɔgbuiwo ƒe Mawu la. 
29 Mikpɔ wo dzi nyuie va se ɖe esime miada wo le nunɔlawo kple Lewi viwo ƒe tatɔwo kple Israel ƒe aƒekɔwo ƒe amegãwo ŋkume le Yerusalem, le Afetɔ ƒe aƒe la ƒe xɔwo me.” 
30 Ale nunɔlawo kple Lewi viwo tsɔ klosalo kple sika kple ŋudɔwɔnu siwo woda la be woatsɔ wo ayi mía Mawu ƒe aƒe la me le Yerusalem.
31 Mlɔeba míeho tso Ahava-tɔsisi la nu le ɣleti gbãtɔ ƒe ŋkeke wuievelia dzi be míayi Yerusalem, eye mía Mawu ƒe asi nɔ mía dzi, eye wòɖe mí tso futɔ kple xadela siwo nɔ mɔa dzi si me. 
32 Ale míeva Yerusalem, eye míenɔ afi ma ŋkeke etɔ̃. 
33 Eye le ŋkeke enelia dzi la, míeda klosalo kple sika kpakple ŋudɔwɔnuawo le mía Mawu ƒe aƒe la me de asi na nunɔla Meremot, Uriya vi, eye Eleazar, Finehas vi, nɔ egbɔ, eye Yozabad, Yesua vi kple Noadiya, Binui vi, ame siwo nye Lewi viwo, hã nɔ wo gbɔ. 
34 Woxlẽ nuawo katã eye woda wo heŋlɔ woƒe kpekpeme blibo la katã ɖi. 
35 Ame siwo nɔ aboyo me tsã, siwo trɔ gbɔ tso aboyo me tsɔ numevɔsawo vɛ na Israel ƒe Mawu la: nyitsu wuieve, ɖe Israel blibo la katã nu, agbo blaasieke vɔ ade, alẽtsui blaadre vɔ adre, gbɔ̃tsu wuieve be woatsɔ asa nuvɔ̃vɔe; wotsɔ nu siawo katã vɛ be woatsɔ asa numevɔ na Afetɔ.
36 Eye míetsɔ fia ƒe sewo de asi na fia la ƒe nuto gã dziɖulawo kple nutodziɖula bubu siwo le nuto si le Tɔsisia godo, eye wokpe asi ɖe dukɔ la kple Mawu vavã la ƒe aƒe la ŋu.

EZRA 9
1 Esi wonya wu nu siawo nu ko la, amegãwo va gblɔ nam be: “Israel dukɔ la kple nunɔlawo kpakple Lewi viwo meɖe wo ɖokuiwo ɖa tso dukɔ siwo le anyigba mawo dzi, siwo nye Kanaantɔwo, Hititɔwo, Perizitɔwo, Yebusitɔwo, Amonitɔwo, Moabtɔwo, Egiptetɔwo kple Amoritɔwo ƒe ŋunyɔnuwo ŋu o. 
2 Woawo ŋutɔwo kple wo viŋutsuwo ɖe wo vinyɔnuwo dometɔ aɖewo. Eye fifia wo ame siwo nye dzidzime kɔkɔe la tsaka kple dukɔ siwo le anyigba mawo dzi. Amegãawo kple dziɖulaawo koŋ ye xɔ ŋgɔ le nuteƒemawɔmawɔ sia me.”
3 Ke esi mese nya sia ko la, medze nye awu kple nye awu ʋlaya, eye menyɔ nye taɖa kple nye ge ƒe ɖewo, nye nu ku eye mebɔbɔ nɔ anyi ɖi. 
4 Eye ame sia ame si dea bubu Israel ƒe Mawu la ƒe nyawo ŋu la ƒo ƒu ɖe gbɔnye le aboyomeawo ƒe nuteƒemawɔmawɔ ta, esime nye nu ku mebɔbɔ nɔ anyi ɖi va se ɖe fiẽnuɖuvɔsaɣi.
5 Le fiẽnuɖuvɔsaɣi la, metso le nye nuxaxa la me, eye nye awu kple nye awu ʋlaya kpɔtɔ le dzedze le ŋunye, eye medze klo heke nye abɔwo me na Afetɔ nye Mawu. 
6 Eye megblɔ be: “Oo nye Mawu, ŋu le kpeyem, eye wòte ɖe dzinye be mawu mo dzi na wò, Oo nye Mawu, elabena míaƒe vodadawo dzi ɖe edzi gbɔ mía ta, eye míaƒe fɔɖiɖi la kɔ yi ɖatɔ keke dziƒowo ke. 
7 Tso mía tɔgbuiwo ŋɔli ke la, fɔɖiɖi gã aɖe le mía dzi va se ɖe egbe sia; eye le míaƒe vodadawo ta wotsɔ mía kple míaƒe fiawo kpakple míaƒe nunɔlawo de asi na anyigbadzifiawo, na yi kple aboyoɖeɖe, na haha kple ŋukpedodo, abe ale si wòle egbe sia ene. 
8 Ke azɔ la, Afetɔ mía Mawu, ève mía nu vie, esi nèkpɔtɔ ame aɖewo ɖi na mí, eye nèna dedienɔƒe mí le wò nɔƒe kɔkɔe la, ne míaƒe ŋku dzi nakɔ, Oo mía Mawu, ne agbe vi aɖe nagaɖo mía me le míaƒe kluvinyenye la me. 
9 Elabena togbɔ be kluviwo míenye hã la, mía Mawu megblẽ mí ɖi le míaƒe kluvinyenye la me o; ke boŋ eve mía nu le Persia-fiawo ŋkume, ne wòana agbe nagaɖo mía me, ne míafɔ mía Mawu ƒe aƒe la ɖe te, ne míaɖɔ eƒe gli gbagbãwo ɖo, ne wòana gli nanɔ mía si le Yuda kple Yerusalem.
10 “Azɔ mía Mawu, nya kae míagblɔ le esia megbe? Elabena míegblẽ wò sededewo ɖi, 
11 se siwo nède na mí to wò subɔla nyagblɔɖilawo dzi be: ‘Anyigba si dzi yim miele be miaxɔe wòazu mia tɔ la, anyigba makɔmakɔ wònye le anyigba la dzi dukɔwo ƒe nuwɔna makɔmakɔwo ta, le woƒe ŋunyɔnuwɔwɔ si wotsɔ yɔ edzi tso go ɖeka me va se ɖe go kemɛ me le woƒe makɔmakɔnyenye ta la ŋuti. 
12 Eya ta migatsɔ mia vinyɔnuwo na wo viŋutsuwo o, eye migaɖe wo vinyɔnuwo na mia viŋutsuwo o; migadi woƒe ŋutifafa kple dzidzedze gbeɖe o, ne ŋusẽ naɖo mia ŋu, eye miaɖu anyigba la ƒe nu nyuitɔwo, eye miaxɔe na mia viwo wòazu wo tɔ tegbee.’ 
13 Eye le nu siwo katã va dzɔ ɖe mía dzi le míaƒe nu tovo wɔwɔwo kple míaƒe fɔɖiɖi gã la ta megbe la—elabena Oo mía Mawu, mèhe to na mí ɖe míaƒe vodadawo nu o, eye nèna mí ame siwo le afi sia la kpɔtɔ ɖi— 
14 ɖe míagada wò sededewo dzi ake, eye míana srɔ̃ɖekadodo nanɔ mía kple dukɔ siwo wɔa ŋunyɔnu siawo domea? Ðe màdo dziku ɖe mía ŋu ale gbegbe be nàtsrɔ̃ mí keŋkeŋ eye ame aɖeke masusɔ alo atsi agbe oa? 
15 Oo Afetɔ, Israel ƒe Mawu, wò la èle dzɔdzɔe, elabena míawoe nye agbetsila siwo kpɔtɔ ɖi, abe ale si wòle egbe sia ene. Kpɔ ɖa, míele ŋkuwòme le míaƒe fɔɖiɖi la me, elabena míate ŋu anɔ te ɖe ŋkuwòme le esia ta o.”

EZRA 10
1 Esi Ezra nɔ gbea dom ɖa, eye wònɔ eɖokui me ʋum, nɔ avi fam hetsyɔ akɔ anyi ɖe Mawu vavã la ƒe aƒe la ŋgɔ la, Israel-viwo ƒe ha gã aɖe, si me tɔwo nye ŋutsuwo, nyɔnuwo kple ɖeviwo, va ƒo ƒu ɖe egbɔ, eye dukɔ la nɔ avi fam vevie. 
2 Eye Sekaniya, Yehiel vi, si tso Elam viwo dome gblɔ na Ezra be: “Míawo la, míewɔ nuteƒe na mía Mawu la o, elabena míeɖe dutanyɔnuwo tso anyigba la dzi dukɔwo dome. Gake mɔkpɔkpɔ gali na Israel le esia ŋuti. 
3 Azɔ mina míabla nu kple mía Mawu la, ne míaɖe nyɔnuawo katã kple vi siwo wodzi la ɖa, le Afetɔ kple ame siwo dea bubu mía Mawu ƒe sedede la ŋu la ƒe mɔfiafia nu. Mina míawɔ ɖe Sea dzi. 
4 Tso, elabena wò dɔdeasie, eye míele megbe na wò. Sẽ ŋu, eye nàwɔe.”
5 Ale Ezra tso, eye wòna tatɔ, siwo tso nunɔla Lewi viwo kple Israel blibo la katã dome la ka atam be yewoawɔ ɖe nya sia dzi. Ale woka atam. 
6 Azɔ Ezra tso le Mawu vavã la ƒe aƒe la ŋgɔ, eye wòyi Yehohanan, Eliyasib vi, ƒe xɔ me. Esi wòyi afi ma la, meɖu nu alo no tsi hã o, elabena ele nu xam le aboyomeawo ƒe nuteƒemawɔmawɔ la ŋuti.
7 Azɔ wona woɖe gbeƒã le Yuda kple Yerusalem blibo la be aboyomeawo katã nava ƒo ƒu ɖe Yerusalem; 
8 eye ame si mava le ŋkeke etɔ̃ me abe ale si amegãwo kple ametsitsiawo ɖoe ene o la, woaɖo asi eƒe nunɔamesiwo katã dzi, eye woaɖe eya ŋutɔ ɖa le aboyomeawo ƒe ha la me. 
9 Eya ta Yuda kple Benyamin ŋutsuwo katã va ƒo ƒu ɖe Yerusalem le ŋkeke etɔ̃ me le ɣleti asiekelia ƒe ŋkeke blaevelia dzi. Dukɔ blibo la katã bɔbɔ nɔ Mawu vavã la ƒe aƒe la ƒe xɔxɔnu, eye wole ƒoƒom kpakpakpa le nya si do mo ɖa kple tsidzadza gã la ta.
10 Eye nunɔla Ezra tso hegblɔ na wo be: “Miewɔ nuteƒe o, elabena mieɖe dutanyɔnuwo, eye miena Israel ƒe fɔɖiɖi dzi ɖe edzi. 
11 Azɔ miʋu mia ɖokuiwo me na Afetɔ, mia tɔgbuiwo ƒe Mawu la, eye miwɔ eƒe lɔlɔ̃nu. Miɖe mia ɖokuiwo ɖa tso anyigba la dzi dukɔwo kple dutanyɔnu siawo ŋu.” 
12 Eye ha blibo la katã gblɔ kple gbe sesẽ be: “Míelɔ̃ be míawɔ nya si nègblɔ la dzi pɛpɛpɛ. 
13 Ke hã dukɔ la sɔ gbɔ, eye wònye tsidzaɣi. Manya wɔ be woatɔ ɖe xexe o, eye menye ŋkeke ɖeka alo eve ƒe dɔe o, elabena míaƒe aglãdzedzea nu sẽ ŋutɔ le nya sia me. 
14 Eya ta míeɖe kuku, mina míaƒe amegãwo nanɔ ha blibo la teƒe; eye ame siwo katã le míaƒe duwo me, siwo ɖe dutanyɔnuwo la nava le ɣeyiɣi ɖoɖiawo dzi, eye du sia du ƒe ametsitsiwo kple eƒe ʋɔnudrɔ̃lawo nava kpli wo, va se ɖe esime míana mía Mawu ƒe dɔmedzoe helĩhelĩ si wòdo ɖe mía ŋu la nu nafa le nya sia me.”
15 Gake Yonatan, Asahel vi kple Yahzeya, Tikva vi, tsi tsitre ɖe nya sia ŋu; eye Mesulam kple Sabetai, siwo nye Lewi viwo de wo dzi. 
16 Ke aboyometsolawo wɔ nu si dzi woda asi ɖo; eye nunɔla Ezra kple tatɔ siwo le wo fofowo ƒe aƒekɔawo nu siwo katã ƒe ŋkɔwo woyɔ ɖekaɖeka la, ɖeɖe va ƒo ƒu le ɣleti ewolia ƒe ŋkeke gbãtɔ dzi ne woagalé ŋku ɖe nya la ŋu; 
17 eye kaka ɣleti gbãtɔ ƒe ŋkeke gbãtɔ naɖo la, wokpɔ ŋutsu siwo katã ɖe dutanyɔnuwo ƒe nya la gbɔ vɔ. 
18 Eye wokpɔ be nunɔlawo ƒe vi aɖewo hã ɖe dutanyɔnuwo: ame siwo tso Yesua, Yehozadak vi, ƒe viwo kple nɔviawo domee nye Maaseya, Eliezer, Yarib kple Gedaliya. 
19 Gake wodo ŋugbe be yewoaɖe asi le yewo srɔ̃wo ŋu, eye esi yewoɖi fɔ ta la, yewoana agbo ɖeka ɖe yewoƒe fɔɖiɖi la ta.
20 Ame siwo tso Imer viwo domee nye Hanani kple Zebadiya; 
21 ame siwo tso Harim viwo domee nye Maaseya, Eliya, Semaya, Yehiel kple Uziya; 
22 ame siwo tso Pashur viwo domee nye Elioenai, Maaseya, Ismael, Netanel, Yozabad kple Eleasa. 
23 Ame siwo tso Lewi viwo domee nye Yozabad, Simei kple Kelaya (si wogayɔna be Kelita), Petahiya, Yuda kple Eliezer; 
24 ame si tso hadzilawo domee nye Eliyasib; ame siwo tso agbonudzɔlawo domee nye Salum, Telem kple Uri.
25 Ame siwo tso Paros viwo dome le Israel ye nye Ramiya, Yiziya, Malkiya, Miyamin, Eleazar, Malkiya kple Benaya; 
26 ame siwo tso Elam viwo domee nye Mataniya, Zakariya, Yehiel, Abdi, Yeremot kple Eliya; 
27 ame siwo tso Zatu viwo domee nye Elioenai, Eliyasib, Mataniya, Yeremot, Zabad kple Aziza; 
28 ame siwo tso Bebai viwo domee nye Yehohanan, Hananiya, Zabai, kple Atlai; 
29 ame siwo tso Bani viwo domee nye Mesulam, Maluk, Adaya, Yasub, Seal kple Yeremot; 
30 ame siwo tso Pahat-Moab viwo domee nye Adna, Kelal, Benaya, Maaseya, Mataniya, Bezalel, Binui kple Manase; 
31 ame siwo tso Harim viwo domee nye Eliezer, Yisiya, Malkiya, Semaya, Simeon, 
32 Benyamin, Maluk kple Semariya; 
33 ame siwo tso Hasum viwo domee nye Matenai, Matata, Zabad, Elifelet, Yeremai, Manase kple Simei; 
34 ame siwo tso Bani viwo domee nye Maadai, Amram, Uel, 
35 Benaya, Bedeya, Keluhi, 
36 Wania, Meremot, Eliyasib, 
37 Mataniya, Matenai kple Yaasu; 
38 ame siwo tso Binui viwo domee nye Simei, 
39 Selemiya, Natan, Adaya, 
40 Maknadbai, Sasai, Sarai, 
41 Azarel, Selemiya, Semariya, 
42 Salum, Amariya kple Yosef; 
43 ame siwo tso Nebo viwo domee nye Yeiel, Matitiya, Zabad, Zebina, Yadai, Yoel kple Benaya. 
44 Ame siawo katã ɖe dutanyɔnuwo, eye woɖe asi le nyɔnuawo kple wo viwo ŋu.

LEAVE A REPLY

Please enter your comment!
Please enter your name here