Esta

ESTA
ESTHER

1 Le Ahasweros si ɖu fia ɖe nuto alafa ɖeka blaeve vɔ adre dzi tso India va se ɖe Etiopia ŋɔli, 
2 le ŋkeke mawo me esi Fia Ahasweros bɔbɔ nɔ eƒe fiazikpui dzi le Susan mɔ́ me la, 
3 eɖo kplɔ̃ na eƒe amegãwo katã kple eŋumewo le eƒe fiaɖuɖu ƒe ƒe etɔ̃lia me. Persia kple Media ƒe aʋakɔ la, bubumewo kple nutodziɖulawo nɔ eŋkume, 
4 eye wòɖe eƒe fiaɖuƒe gã la ƒe kesinɔnuwo kple eƒe gãnyenye ƒe bubu kple nyonyo fia wo ŋkeke geɖe, ŋkeke alafa ɖeka blaenyi sɔŋ. 
5 Eye esi ŋkeke siawo wu enu la, fia la ɖo kplɔ̃ na ame siwo katã le Susan mɔ́ la me, ame ŋkutawo kple ame tsɛwo siaa, ɖe fia ƒe fiasã la ƒe abɔ me, le xɔxɔnu la, ŋkeke adre sɔŋ. 
6 Wotsi avɔ ɣitɔ, dzĩtɔ kple blɔtɔ, siwo ŋu wosa aklala kple aɖabɛ dzĩtɔ ƒe kawo ɖo la ɖe klosalosigɛ siwo wowɔ ɖe kpe xɔasi sɔtiwo ŋu la ŋuti, eye woda sikabatiwo kple klosalobatiwo ɖe anyigba si woɖo kpe zɔzrɔ̃e xɔasi hẽtɔ, ɣitɔ, adzagba kple kpe zɔzrɔ̃e xɔasi yibɔtɔ ɖo la dzi.
7 Wotsɔ wain tsae be woano le sikakpluwo me; kplu ɖe sia ɖe to vovo tso wo nɔewo gbɔ, eye wain si fia na la sɔ gbɔ ŋutɔ, abe ale si dze fia ene. 
8 Se si le wain la nono ŋu koe nye be womazi ame aɖeke dzi le esinu wòano gome o, elabena nenemae fia la wɔ ɖoɖo kple amegã siwo le eƒe fiasã la me be ame sia ame nawɔ ale si dze eŋu.
9 Fianyɔnu Wasti hã ɖo kplɔ̃ na nyɔnuwo le Fia Ahasweros ƒe fiasã me.
10 Le ŋkeke adrea gbe, esi wain na fia la ƒe dzi le dzidzɔ kpɔm la, egblɔ na Mehuman, Bizta, Harbona, Bigta, Abagta, Zetar kple Karka, siwo nye fiaŋume adre siwo subɔa Fia Ahasweros ŋutɔ la 
11 be woakplɔ fianyɔnu Wasti ava fia la ŋkume, eye eƒe fiakuku nanɔ eta, ne wòaɖe eƒe tugbedzedze afia dukɔawo kple amegãawo, elabena edze tugbe ŋutɔ. 
12 Ke esi fiaŋumewo va gblɔ fia ƒe nya la na Fianyɔnu Wasti la, egbe be yemava o. Ale fia la do dziku vevie, eye dzi bi ɖe dɔme nɛ.
13 Eya ta fia la ƒo nu kple nunyala siwo nya ɣeyiɣiwo me nyuie (elabena aleae fia la dea adaŋu kple ame siwo bi ɖe se kple senyawo me nyuie la le eƒe nyawo katã mee, 
14 eye eƒe aɖaŋuɖola vevi siwo nɔa eŋue nye Karsena, Setar, Admata, Tarsis, Meres, Marsena, kple Memukan, Persia kple Media ƒe amegã adre, siwo dona ɖe fia la ŋkume, eye woawoe le ɖoƒe kɔkɔtɔ le fiaɖuƒe la me. 
15 Fia la bia wo be: “Esi Fianyɔnu Wasti mewɔ ɖe Fia Ahasweros ƒe nya si wògblɔ to fiaŋumewo dzi la dzi o ɖe, nu kae wòle be woawɔ nɛ le se nu?”
16 Eye Memukan gblɔ le fia la kple amegãawo ŋkume be: “Menye fia la ɖeɖe ko ŋue Fianyɔnu Wasti da vo ɖo o, ke boŋ amegãwo katã kple ame siwo katã le Fia Ahasweros ƒe fiaɖuƒea ƒe nutowo katã me ŋue. 
17 Elabena srɔ̃nyɔnuwo katã le fianyɔnu la ƒe nuwɔna la ŋu nya se ge, eye wogbɔna vlo do ge wo srɔ̃ŋutsuwo agblɔ be, ‘Fia Ahasweros ŋutɔ gblɔ be woakplɔ Fianyɔnu Wasti ava ye ŋkume, gake egbe meyi o ɖe.’ 
18 Egbe sia ke Persia kple Media ƒe amegãwo srɔ̃wo, siwo se fianyɔnu la ƒe nuwɔna sia aƒo nu kple fia la ƒe amegãwo katã alea, eye esia ahe vlododo kple dzikudodo geɖe avɛ. 
19 Ne enyo fia la ŋu la, ekema fia nede se, eye woaŋlɔe ɖe Persia kple Media ƒe sewo dome, si womagate ŋu atrɔ o, be: Wasti megakpɔ mɔ ava Fia Ahasweros ŋkume o; eye fia la netsɔ eƒe fianyɔnunyenye la na ehati nyɔnu bubu si nyo wui. 
20 Eye ne wose fia ƒe sededea le eƒe dziɖuƒe la katã la, ekema srɔ̃nyɔnuwo katã abu wo srɔ̃wo, woabu esiwo nye ame ŋkutawo kple esiwo nye ame tsɛwo siaa.”
21 Nya sia dze fia la kple amegãwo ŋu, eye fia la wɔ Memukan ƒe nya la dzi. 
22 Ale wòɖo agbalẽ ɖe fiaɖuƒea ƒe nutowo katã me, le nuto sia nuto ƒe nuŋɔŋlɔ me, ɖe dukɔ sia dukɔ ƒe gbegbɔgblɔ me, be srɔ̃ŋutsu ɖe sia ɖe nanye amegã le eƒe me, eye wo degbee woado.

ESTA 2
1 Le nu siawo megbe esi Fia Ahasweros ƒe dziku la nu fa la, eɖo ŋku nu si Wasti wɔ kple ale si wòtso nya me le eŋu la dzi. 
2 Eye fiaŋume siwo subɔnɛ gblɔ nɛ be: “Woadi ɖetugbui leaƒe dzetugbewo na fia la. 
3 Eye fia la neɖo dzikpɔlawo le eƒe fiaɖuƒea ƒe nutowo katã me, ne woaƒo ɖetugbui leaƒe dzetugbewo katã nu ƒu ɖe Susan mɔ́ la me, le nyɔnuwo ƒe aƒe la me. Eye woanɔ fia ƒe ame tata Hegai si nye nyɔnuwo ŋu dzɔla ƒe dzikpɔkpɔ te, eye woanɔ tugbedzetikewo sim na wo. 
4 Eye ɖetugbui si ƒe nu alé dzi na fia la nazu fianyɔnu ɖe Wasti teƒe.” Nya la dze fia la ŋu, ale be wòwɔe nenema.
5 Yuda ŋutsu aɖe le Susan mɔ́ la me, eŋkɔe nye Mordekai, Yair vi, Simei vi, Kis vi, eye wònye Benyamintɔ, 
6 woɖe aboyo eya kple aboyomeawo tso Yerusalem kpe ɖe Yuda-fia Yekoniya, si Babilon-fia Nebukadnezar ɖe aboyoe la ŋu. 
7 Eyae nye fofoa nɔviŋutsu ƒe vinyɔnuvi Hadasa, si nye Esta, dzi kpɔla, elabena tɔ kple nɔ megale esi o. Ðetugbui la nya kpɔ hedze tugbe ŋutɔ, eye esi fofoa kple dadaa ku la, Mordekai xɔe wòzu vianyɔnu. 
8 Esime woɖe gbeƒã fia ƒe nya kple eƒe se la, eye woƒo ɖetugbui geɖewo nu ƒu ɖe Susan mɔ́ la me le Hegai ƒe dzikpɔkpɔ te la, wokplɔ Esta hã yi fiasã la me le nyɔnuwo ŋu dzɔla Hegai ƒe dzikpɔkpɔ te.
9 Ke ɖetugbui la ƒe nu dze eŋu, ale be wòve enu, eye wòwɔ kaba na wosi eƒe tugbedzetikewo nɛ, ena nuɖuɖu tɔxɛ la hãe, eye wòtsɔ ɖetugbui adre siwo wotia tso fia ƒe aƒe me la kpe ɖe eŋu. Eɖe eya kple eƒe ɖetugbui siwo asubɔe la le afi ma yi nyɔnuwo ƒe aƒe la ƒe teƒe nyuitɔ. 
10 Esta meƒo nu tso eƒe dukɔ alo eƒe ƒometɔwo ŋu o, elabena Mordekai de se nɛ be wòagagblɔe na ame aɖeke o. 
11 Mordekai ɖia tsa le nyɔnuwo ƒe aƒe la ƒe xɔxɔnu gbe sia gbe be yeanya ale si Esta le eye yeanya ne nane le dzɔdzɔm ɖe edzi.
12 Eɖoa ɖetugbuiawo dometɔ ɖe sia ɖe dzi be wòayi Fia Ahasweros gbɔ, ne wosi atike siwo wosina na ɖetugbuiawo ɣleti wuieve sɔŋ na wo vɔ megbe, elabena ɣeyiɣi mae tugbedzetikewo sisi na wo ƒe ŋkekeawo xɔna—wosia miremi na wo ɣleti ade, eye wosia balsam-mi kple tugbedzetike vovovowo na wo ɣleti ade. 
13 Ne ɖetugbui aɖe le fia la gbɔ yi ge la, nu sia nu si wòbia la, wotsɔnɛ nanɛ, ne etso nyɔnuwo ƒe aƒe la me yina fia la ƒe aƒe me. 
14 Ne eyi le fiẽ la, egbɔna vaa nyɔnuwo ƒe aƒe evelia me le ŋdi le fia ƒe ame tata Saasgaz, ame si nye ahiãwo ŋudzɔla ƒe dzikpɔkpɔ te. Megayia fia la gbɔ o, negbe dzaa ɖe eƒe nu nyo fia la ŋu, eye wòyɔ eŋkɔ be woayɔe vɛ ko hafi.
15 Eye esi wòɖo Abihayil si nye Mordekai fofo nɔviŋutsu ƒe vinyɔnu Esta, si wòxɔ abe vianyɔnu ene, dzi be wòayi fia gbɔ la, mebia naneke o, negbe nu si fia ƒe ame tata Hegai, si nye nyɔnuwo ŋu dzɔla la, yɔ ko. (Ɣemaɣi katã la Esta ƒe nu nyoa ame siwo katã kpɔnɛ la ŋu). 
16 Eye wokplɔ Esta yi Fia Ahasweros gbɔ le fiasã me le ɣleti ewolia, si nye Tebet me, le eƒe fiaɖuɖu ƒe ƒe adrelia me. 
17 Eye fia la lɔ̃ Esta wu nyɔnu bubuawo katã, ale be eƒe nu nyo eŋu eye wòve enu wu ɖetugbui leaƒe bubuawo katã. Ale wòɖɔ fiakuku nɛ heɖoe fianyɔnu ɖe Wasti teƒe. 
18 Eye fia la ɖo kplɔ̃ gã aɖe na eƒe amegãwo katã kple eŋumewo, Esta koŋ ye wòɖo kplɔ̃a na. Ena ablɔɖe nuto siwo le eƒe fiaɖuƒe la me, eye fia la ma nunanawo na amewo abe ale si dze fia ene.
19 Ke esi wogaƒo ɖetugbui leaƒeawo nu ƒu zi evelia la, Mordekai bɔbɔ nɔ fia la ƒe agbo nu. 
20 Esta meƒo nu tso eƒe ƒometɔwo kple eƒe dukɔ ŋu o, abe ale si ko Mordekai de se nɛ ene; Esta wɔa Mordekai ƒe nya dzi, abe ale si ko wòwɔna esime wònɔ eƒe dzikpɔkpɔ te ene.
21 Le ŋkeke mawo me esime Mordekai bɔbɔ nɔ fia la ƒe agbo nu la, fiaŋume eve, Bigtan kple Teres, siwo nye agbonudzɔlawo, do dziku ɖe fia la ŋu, eye woɖo nugbe be yewoawu Fia Ahasweros. 
22 Mordekai se nya la, eye wògblɔe na Fianyɔnu Esta enumake. Eye Esta hã gblɔe na fia la le Mordekai ƒe ŋkɔ me. 
23 Eya ta woku nya la me heva kpɔe be ele eme, ale wohe ŋutsu eveawo ɖe ati ŋu; eye woŋlɔ nya siawo katã ɖe ŋutinyagbalẽ me le fia la ŋkume.

ESTA 3
1 Le nu siawo megbe la, Fia Ahasweros do gã Haman, si nye Agagitɔ Hamedata viŋutsu, eye wòdoe ɖe dzi hetsɔ eƒe zikpui ɖo amegã bubu siwo katã le eŋu la ŋgɔ. 
2 Eye fia la ƒe dɔla siwo katã le fia ƒe agbo nu bɔbɔna tsyɔa mo anyi ɖe Haman ŋkume, elabena aleae fia la de se le eŋu. Gake Mordekai ya mebɔbɔna alo tsyɔa mo anyi ɖe eŋkume o. 
3 Eye fia la ƒe dɔla siwo le fia ƒe agbo nu biaa Mordekai be: “Nu ka tae nèle fia ƒe sedede dzi dam?” 
4 Woƒoa nu nɛ gbe sia gbe gake meɖoa to wo o. Eya ta wogblɔe na Haman be yewoakpɔe ɖa be alɔ̃ ɖe Mordekai ƒe nuwɔnaa dzi hã; elabena egblɔ na wo be Yudatɔe yenye.
5 Esi Haman kpɔe be Mordekai mebɔbɔna tsyɔa mo anyi ɖe ye ŋkume o la, dzi ku Haman vevie. 
6 Ke ebui be enye gbɔɖiɖi ame ɖokui be yeawu Mordekai ɖeɖe ko, elabena woƒo nu tso Mordekai ƒe dukɔ ŋu nɛ. Eya ta Haman te mɔnudidi be yeatsrɔ̃ Yudatɔwo katã, siwo nye Mordekai ƒe dukɔ me tɔwo ɖa le Ahasweros ƒe fiaɖuƒe bliboa katã me.
7 Le ɣleti gbãtɔ, si nye Nisan me, le Fia Ahasweros ƒe ƒe wuievelia me la, woda Pur (si nye Nudzidze aɖe) le Haman ŋkume be woanya ŋkeke kple ɣleti si wòanye, eye wòdze ɣleti wuievelia, si nye Adar dzi. 
8 Haman gblɔ na Fia Ahasweros be: “Dukɔ ɖeka aɖe li, si me tɔwo kaka hema ɖe dukɔ siwo le wò fiaɖuƒea ƒe nutowo katã me; woƒe sewo to vovo na dukɔ bubuawo katã tɔ, womewɔa fia la ƒe sewo dzi o, eye made fia la dzi be wòaɖe asi le wo ŋu nenema o. 
9 Ne enyo fia ŋu la, ekema na woaŋlɔ agbalẽ ade se be woatsrɔ̃ wo. Maxe klosalo talento akpe ewo na dumegãwo ne woatsɔ ade fia ƒe kesinɔnudzraɖoƒe la.”
10 Ale fia la ɖe eƒe ŋkɔsigɛ le asi tsɔ na Haman, Agagitɔ Hamedata viŋutsu, si nye Yudatɔwo ƒe futɔ la. 
11 Eye fia la gblɔ na Haman be: “Wò klosalo la nenɔ anyi ko, eye metsɔ dukɔ la hã de asi na wò be nàwɔ wo ale si nyo ŋuwò.” 
12 Ale woyɔ fia ƒe agbalẽŋlɔlawo le ɣleti gbãtɔ ƒe ŋkeke wuietɔ̃lia dzi. Woŋlɔ agbalẽ le nu siwo katã ƒe se Haman de la nu na fia la ƒe nuto gã dziɖulawo kple nutodziɖula siwo le nuto vovovoawo dzi ɖum, kple dukɔ vovovoawo ƒe amegãwo, eye woɖoe ɖe nuto sia nuto le eƒe nuŋɔŋlɔ nu kple dukɔ sia dukɔ le eƒe gbegbɔgblɔ nu. Woŋlɔe le Fia Ahasweros ƒe ŋkɔ me, eye wotsɔ fia ƒe ŋkɔsigɛ tre enu.
13 Eye wotsɔ agbalẽawo de ame dɔdɔawo si ɖo ɖe fiaɖuƒea ƒe nutowo katã me be woatsrɔ̃ Yudatɔwo katã gbidigbidi, woawu wo, eye woaɖe wo ɖa, ɖekakpui kple ame tsitsi siaa, ɖeviwo kple nyɔnuwo siaa, le ŋkeke ɖeka dzi, le ɣleti wuievelia si nye Adar ƒe ŋkeke wuietɔ̃lia dzi, eye woaha woƒe nunɔamesiwo. 
14 Woɖo agbalẽ sia si me nyawo zu se la ɖe fiaɖuƒea ƒe nuto vovovoawo katã me ne woaɖe gbeƒãe na amewo katã ale be woanɔ dzadzraɖoɖi na ŋkeke sia. 
15 Eye ame dɔdɔawo dze mɔ afɔtsɔtsɔe tsɔ du la yii le fia ƒe nya la nu. Wode sea le Susan mɔ́ la me. Fia la kple Haman bɔbɔ nɔ anyi be yewoano nu; ke tɔtɔ ɖo Susan dua ya me.

ESTA 4
1 Esi Mordekai se nya siwo katã dzɔ la, edze eƒe awuwo, ta akpanya eye wòsi dzofi. Eye wòdo go yi du la me hele avi fam sesĩe nublanuitɔe. 
2 Eva tɔ ɖe keke fia la ƒe agbo nu, gake mege ɖe eme o, elabena ame aɖeke mekpɔ mɔ ata akpanya age ɖe fia la ƒe agbo la me o. 
3 Eye konyifafa gã aɖe ɖo Yudatɔwo dome le nuto ɖe sia ɖe si me fia la ƒe nya kple eƒe se la de, wotsi nu dɔ, wofa avi, eye wofa konyi ŋutɔ. Wo dometɔ geɖe ta akpanya mlɔ anyi ɖe dzofi me. 
4 Esi Esta ƒe ɖetugbui siwo subɔnɛ kple eƒe aƒedzikpɔlawo va egbɔ hegblɔe nɛ la, fianyɔnu la xa nu vevie. Eye wòɖo awuwo ɖe Mordekai be wòatsɔ aɖɔli eƒe akpanya la, ke mexɔ wo o. 
5 Eye Esta yɔ Hatak, si nye fia ƒe aƒedzikpɔlawo dometɔ ɖeka, ame si fia la ɖo be wòasubɔe la, eye wòdɔe ɖo ɖe Mordekai gbɔ be yeanya nu si dzɔ kple nu si ta wòwɔ alea ɖo.
6 Eya ta Hatak yi Mordekai gbɔ le dua ƒe ablɔ si dze ŋgɔ fiasã ƒe agbo nu. 
7 Mordekai gblɔ nu siwo katã dzɔ ɖe edzi kple ga home si Haman do ŋugbe be yeaxe woatsɔ ade fia ƒe kesinɔnudzraɖoƒe ɖe Yudatɔwo ta ne woatsrɔ̃ wo la ŋu nyawo katã nɛ. 
8 Etsɔ se si wode le Susan be woatsrɔ̃ wo gbidii ƒe agbalẽ ɖeka hã nɛ be wòatsɔe afia Esta, ne wòaɖe nu me nɛ, eye wòdɔe be wòayi fia la gbɔ aɖe kuku nɛ be wòave yeƒe dukɔ la nu.
9 Ale Hatak va gblɔ Mordekai ƒe nyawo na Esta. 
10 Eye Esta ɖo nyaa ŋu na Hatak hedɔe ɖe Mordekai gbɔ bena: 
11 “Fiaŋumewo kple ame siwo le fiaɖuƒea ƒe nutowo katã me nyae be ŋutsu sia ŋutsu alo nyɔnu sia nyɔnu si ayi fia gbɔ le xɔxɔnu emetɔ la me, evɔ womeyɔe hafi o la, se ɖeka koe li, si nye be woawui; negbe ɖe fia la do eƒe sikafiatikplɔ la ɖee ko hafi wòatsi agbe. Ke ŋkeke blaetɔ̃e nye esi womeyɔm be mava fia la gbɔ o.”
12 Esi wova gblɔ Esta ƒe nyawo na Mordekai la, 13 eɖo eŋu na Esta be: “Mègabu xaa be esi yele fia ƒe aƒe me ta la, yeatsi agbe le Yudatɔ bubuawo katã dome o. 
14 Eya ta ne èzi kpi le ɣeyiɣi sia me la, gbɔdzɔe kple ɖeɖe atso afi bubu ava na Yudatɔwo; ke wò ŋutɔ kple fofowò ƒe aƒe ya miatsrɔ̃. Eye ame kae nya ne ɣeyiɣi sia tɔgbi tae fianyɔnu ƒe ɖoƒea su asiwò ɖo?”
15 Eye Esta ɖo eŋu ɖo ɖe Mordekai be: 
16 “Yi ɖaƒo Yudatɔ siwo katã le Susan la nu ƒu, eye mitsi nu dɔ ɖe tanye. Migaɖu nu alo ano nu o ŋkeke etɔ̃ sɔŋ, zã kple keli. Nye kple nye dɔlanyɔnuwo hã míatsi nu adɔ. Eyome mayi fia la gbɔ, togbɔ be mele se nu o hã, eye ne woawum la, wonewum faa.” 
17 Ale Mordekai dze mɔ yi ɖawɔ abe ale si tututu Esta de se nɛ ene.

ESTA 5

1 Le ŋkeke etɔ̃a gbe la, Esta do eƒe fiawu eye wòva tɔ ɖe fiasã la ƒe xɔxɔnu emetɔ si dze ŋgɔ fia ƒe aƒea, esime fia la bɔbɔ nɔ eƒe fiazikpui dzi le fiasãa me hedze ŋgɔ aƒe la ƒe mɔnu. 
2 Esi fia la kpɔ Fianyɔnu Esta wòtɔ ɖe xɔxɔnua la, eve enu hedo sikafiatikplɔ si le esi la ɖe Esta. Eye Esta te ɖe eŋu heka asi fiatikplɔ la tame.
3 Fia la biae be: “Fianyɔnu Esta, nya kae dzɔ? Nu ka dim nèle? Ne nye fiaɖuƒea ƒe afã gɔ̃ hãe la, woatsɔe ana wò!” 
4 Esta ɖo eŋu be: “Ne enyo fia ŋu la, ekema fia la kple Haman neva kplɔ̃ si meɖo nɛ la ŋu egbea.” 
5 Eya ta fia la gblɔ na eƒe subɔlawo be: “Miyi ɖayɔ Haman vɛ kaba be míawɔ Esta ƒe biabia la dzi.” Emegbe fia la kple Haman va kplɔ̃ si Esta ɖo la ŋu.
6 Esime wole wain nom la, fia la bia Esta be: “Nu kae nèbe yeabia? Woatsɔe ana wò! Eye nu ka dim nèle? Ne nye fiaɖuƒea ƒe afã gɔ̃ hãe la, woatsɔe ana wò!” 
7 Esta ɖo eŋu be: “Nye biabia kple nye didie nye be, 
8 Ne fia la ve nunye, eye wònyo fia ŋu vavã be yeawɔ nye biabiaa dzi, eye yeawɔ nye didi dzi nam la, ekema fia la kple Haman neva kplɔ̃ si magaɖo na wo etsɔ la ŋu; eye etsɔ la, mawɔ fia ƒe nya la dzi.”
9 Gbe ma gbe Haman dzo kple dzidzɔ, eye eƒe dzi dze eme. Ke esi Haman kpɔ Mordekai le fia la ƒe agbo nu, eye wòkpɔ be metso heƒo kpakpakpa le ye ŋkume o la, Haman do dziku vevie ɖe Mordekai ŋu. 
10 Gake Haman ɖu eɖokui dzi, eye wòyi aƒe me. Emegbe edɔ woɖayɔ exɔlɔ̃wo kple srɔ̃a Zeres vɛ. 
11 Haman ƒo adegbe le eƒe kesinɔnu geɖeawo, via gbogboawo, ale si fia la do gãe, kple ale si wodoe ɖe dzi wòƒo amegãwo kple fiaŋumewo katã ta la ŋu.
12 Haman gblɔ kpee be: “Nu si gawue nye be, Fianyɔnu Esta mekpe ame bubu aɖeke kpe ɖe fia la ŋu va kplɔ̃ si wòɖo ŋu o, negbe nye ko. Etsɔ hã egakpem kpe ɖe fia la ŋu. 
13 Ke nu siawo katã dometɔ aɖeke meɖi ƒo nam o, zi ale si megale Yudatɔ Mordekai kpɔm wòbɔbɔ nɔ fia ƒe agbo la nu.” 
14 Ale srɔ̃a Zeres kple exɔlɔ̃awo katã gblɔ nɛ be: “Na woatu ati wòakɔ abɔklugui blaatɔ̃. Eye ne ŋu ke la, gblɔ na fia la be woahe Mordekai ɖe eŋu. Emegbe nàtsɔ dzidzɔ ayi kplɔ̃ la ŋu kple fia la.” Nya la nyo Haman ŋu, eye wòna wotu ati la.

ESTA 6
1 Le zã ma me la, alɔ̃ bu ɖe fia la. Eya ta egblɔ be woatsɔ nyadzɔdzɔwo ŋuti nuŋlɔɖigbalẽ la vɛ ne woaxlẽ na fia la. 
2 Wokpɔ woŋlɔ ɖe agbalẽa me be, Mordekai ye ʋu go fiaŋume eve, siwo nye Bigtana kple Teres, ame siwo nye agbonudzɔla siwo ɖo nugbe be yewoawu Fia Ahasweros. 
3 Fia la bia be: “Nu kae wowɔ tsɔ de bubu Mordekai ŋu, eye nu kae wowɔ tsɔ da akpe nɛ le esia ta?” Eye fiaŋume siwo subɔnɛ la ɖo eŋu be: “Womewɔ naneke nɛ o.”
4 Emegbe fia la bia be: “Ame kae le xɔxɔnua?” Ke edzɔ be Haman va fiasã ƒe xɔxɔnu gotatɔ la me be yeagblɔ na fia la be woahe Mordekai ɖe ati si yetu nɛ la ŋuti. 
5 Eye fia la ƒe dɔlawo ɖo eŋu nɛ be: “Haman ye tɔ ɖe xɔxɔnua.” Eya ta fia la gblɔ be: “Mina wòage ɖe eme.”
6 Esi Haman ge ɖe eme la, fia la biae be: “Nu kae woawɔ na ŋutsu si ŋu fia di be yeade bubui?” Eye Haman gblɔ le eƒe dzi me be: “Ame ka ŋue fia adi be yeade bubui ne menye nyee o?” 
7 Eya ta Haman ɖo eŋu na fia la be: “Ŋutsu si ŋu fia di be yeade bubui la, 
8 woatsɔ fiawu si fia la dona kple sɔ si fia dona, si ƒe ta fiakuku le la avɛ. 
9 Woatsɔ awua kple sɔa ade fia ƒe amegã bubumewo dometɔ ɖeka si, woado awua na ŋutsu si ŋu fia la di be yeade bubui la, eye woana wòado sɔa ato dua ƒe ablɔ me. Eye woanɔ ɣli dom le eŋgɔ be: ‘Alea wowɔ na ŋutsu si ŋu fia la di be yeade bubui lae nye esi.’” 
10 Enumake fia la gblɔ na Haman be: “Netsɔ! Tsɔ awua kple sɔa nàwɔ abe ale si tututu nègblɔe ene na Yudatɔ Mordekai si bɔbɔ nɔ fia ƒe agbo nu. Mègana naneke nato le nya siwo katã nègblɔ la me o.”
11 Ale Haman tsɔ awua kple sɔa, edo awua na Mordekai, eye wòna wòdo sɔa to dua ƒe ablɔ me, eye wòle ɣli dom le eŋgɔ be: “Alea wowɔ na ŋutsu si ŋu fia la di be yeade bubui lae nye esi!” 
12 Emegbe Mordekai gbugbɔ va fia la ƒe agbo nu, ke Haman ɖe abla yi aƒe me kple nuxaxa, eye wòtsyɔ nu ta. 
13 Eye Haman gblɔ nu siwo katã dzɔ ɖe edzi la na srɔ̃a Zeres kple exɔlɔ̃wo katã. Eye eƒe nunyalawo kple srɔ̃a Zeres gblɔ nɛ be: “Ne Yuda vidzidzie Mordekai, ame si ŋkume nète toyiyi le nye la, ekema màte ŋu aɖu edzi o, ke boŋ àyi to le eŋkume godoo.”
14 Esi wokpɔtɔ nɔ nu ƒom kplii la, fiaŋumewo va ɖo, eye wowɔ kaba kplɔ Haman yi kplɔ̃ si Esta ɖo la ŋu.

ESTA 7
1 Ale fia la kple Haman va kplɔ̃ si Fianyɔnu Esta ɖo la ŋu. 
2 Esi wonɔ kplɔ̃ ŋu nɔ wain nom le ŋkeke evea gbe la, Fia la gabia Esta be: “Fianyɔnu Esta, nu kae nèbe yeabia? Woatsɔe ana wò. Eye nu ka dim nèle? Ne nye fiaɖuƒea ƒe afã gɔ̃ hãe la, woatsɔe ana wò!” 
3 Eye Fianyɔnu Esta ɖo eŋu be: “Oo fia, ne ève nunye, eye wònyo fia ŋu vavã la, ekema meɖe kuku ɖe nye agbe, eye nàxɔ na nye dukɔ la. 
4 Elabena wotsɔ nye kple nye dukɔ la dzra, be woatsrɔ̃ mí, woawu mí, eye woagblẽ mía dome. Ne ɖe wotsɔ mí dzra be míazu kluvi kple kosi dzrowo ko la, anye ne mezi kpi. Gake mesɔ be woaɖe mɔ ɖe xaxa sia ŋu o, elabena agblẽ nu le fia la ŋu.”
5 Eye Fia Ahasweros bia Fianyɔnu Esta be: “Ame kae? Afi kae ame si do dzi be yeawɔ nu sia la le?” 
6 Esta gblɔ be: “Adikãtɔ kple futɔ lae nye Haman vɔ̃ɖi sia.”
Ale ŋɔdzi lé Haman le fia la kple fianyɔnu la ŋkume. 
7 Ke fia la tso le kplɔ̃a ŋu kple dziku heyi fiasã la ƒe abɔ me, eye Haman hã tso be yeaɖe kuku na Fianyɔnu Esta ɖe yeƒe agbe ta, elabena ekpɔe be fia la ɖo tame be yeahe to na ye. 
8 Esi fia la trɔ tso fiasãa ƒe abɔ la me va aƒe si me woɖo kplɔ̃a le la, Haman tsra ɖe aba si dzi Esta le la dzi. Eya ta fia la gblɔ be: “Fianyɔnu la hã gbɔ dɔ ge wòle sesẽe le nye ŋutɔ nye aƒe mea?” Esi nya siawo nya do le fia nu ko la, wotsyɔ nu mo na Haman xoxo. 
9 Eye Harbona, ame si nye fiaŋumewo dometɔ ɖeka, gblɔ be: “Haman tu ati be yeahe Mordekai, ame si ƒo nu heɖe fia ƒe agbe la ɖe eŋu. Wotui ɖe Haman ƒe me, ekɔ abɔklugui blaatɔ̃.” Eye fia la gblɔ be: “Mihee ɖe eŋu.” 
10 Ale wohe Haman ɖe ati si wòtu ɖe Mordekai ŋu la ŋuti, eye fia ƒe dzikua nu fa.

ESTA 8
1 Gbe ma gbe Fia Ahasweros tsɔ Haman, Yudatɔwo ƒe futɔ la ƒe aƒe na Fianyɔnu Esta; eye Mordekai va fia la ŋkume, elabena Esta gblɔ ale si eya kple Mordekai do ƒomee la nɛ. 
2 Eye fia la ɖe eƒe ŋkɔsigɛ, si wòxɔ le Haman si la tsɔ na Mordekai. Eye Esta tsɔ Mordekai ɖo Haman ƒe aƒe la nu.
3 Esta gaƒo nu kple fia la, eye wòtsyɔ mo anyi ɖe eƒe afɔnu fa avi heɖe kuku bia be wòatrɔ Agagitɔ Haman ƒe tame vɔ̃ kple nugbe si wòɖo ɖe Yudatɔwo ŋu la. 
4 Eye fia la do sikafiatikplɔ la ɖe Esta, eye Esta tso hetɔ ɖe fia la ŋkume. 
5 Eye wògblɔ be: “Ne edze fia ŋu, eye wòve nunye, ne nya la sɔ le fia ŋkume, eye nye nu nyo eŋu la, ekema nena woaŋlɔ agbalẽ atsɔ ate fli ɖe agbalẽ siwo tame vɔ̃ ɖola Haman, Agagitɔ Hamedata viŋutsu la ŋlɔ be woatsrɔ̃ Yudatɔ siwo le fiaɖuƒea ƒe nutowo katã me la me. 
6 Elabena aleke mate ŋu akpɔ vɔ̃ si ava nye dukɔ dzi la teƒe, eye aleke mate ŋu akpɔ nye ƒometɔwo ƒe tsɔtsrɔ̃ teƒe?”
7 Eya ta Fia Ahasweros gblɔ na Fianyɔnu Esta kple Mordekai Yudatɔ la be: “Kpɔ ɖa! Metsɔ Haman ƒe aƒe la na Esta, eye mena wohe Haman ɖe ati ŋu, le nugbe si wòɖo be woatso ɖe Yudatɔwo ŋu la ta. 
8 Azɔ miate ŋu aŋlɔ agbalẽ ɖe Yudatɔwo nu ale si nyo mia ŋu le fia ƒe ŋkɔ me, eye miatsɔ fia ƒe ŋkɔsigɛ atre enu, elabena se si woŋlɔ le fia ƒe ŋkɔ me, eye wotsɔ fia ƒe ŋkɔsigɛ tre enu la, womate ŋu atrɔe o.”
9 Eya ta woyɔ fia la ƒe agbalẽŋlɔlawo ɣemaɣi, le ɣleti etɔ̃lia, si nye Sivan, ƒe ŋkeke blaeve vɔ etɔ̃lia dzi; eye woŋlɔ se siwo katã Mordekai de la ɖe agbalẽ me na Yudatɔwo, nuto gã dziɖulawo, nutodziɖulawo kple amegã siwo le nuto vovovoawo dzi ɖum, tso India va se ɖe Etiopia, siwo le nuto alafa ɖeka blaeve vɔ adrewo me, eye woɖoe ɖe nuto sia nuto le eƒe nuŋɔŋlɔ nu ɖe dukɔ sia dukɔ le eƒe gbegbɔgblɔ me, ɖe Yudatɔwo ŋutɔwo ƒe nuŋɔŋlɔ nu, kple woƒe gbegbɔgblɔ me.
10 Eŋlɔ agbalẽa le Fia Ahasweros ƒe ŋkɔ me, etsɔ fia ƒe ŋkɔsigɛ tre enu, eye wòtsɔ agbalẽ siwo woŋlɔ la de ame dɔdɔ siwo doa fia ƒe sɔ ɖidu siwo womla ɖe fia ƒe dɔwo wɔwɔ ŋu, si ɖo ɖa. 
11 Fia la ɖe mɔ na Yudatɔ siwo le du vovovoawo katã me le agbalẽawo me be woaƒo ƒu, aʋli woƒe agbe ta, eye woatsrɔ̃ aʋakɔ alo dukɔ alo nuto si me tɔwo atso ɖe wo ŋu la, eye woawu wo ahaɖe wo ɖa, ɖeviwo kple nyɔnuwo siaa, eye woaha woƒe nuwo. 
12 Woawɔ esia le ŋkeke ɖeka dzi, le Fia Ahasweros ƒe fiaɖuƒea ƒe nutowo katã me, le ɣleti wuievelia, si nye Adar, ƒe ŋkeke wuietɔ̃lia dzi. 
13 Agbalẽa me nyawo nazu se le nuto vovovoawo katã me. Woaɖe gbeƒãe na dukɔwo katã ale be Yudatɔwo nadzra ɖo na ŋkeke sia, be woabia hlɔ̃ woƒe futɔwo. 
14 Ame dɔdɔ siwo doa fia ƒe sɔ ɖiduwo la, wɔ kaba dze mɔ heɖe abla le fia ƒe gbeɖeɖe nu. Wode se sia le Susan mɔ́ la hã me.
15 Ke Mordekai dzo le fia la ŋkume, ele fiawu si wotsɔ avɔ blɔ kple aklala tɔ la me, eye wòɖɔ sikafiakuku gã aɖe hedo awu ʋlaya si wotsɔ avɔ biɖibiɖi kple aɖabɛ dzĩtɔ tɔ. Eye dzidzɔ kple aseyetsotso xɔ Susan du la me. 
16 Eye wònye gbɔdzɔe, dzidzɔ, aseyetsotso kple bubu na Yudatɔwo. 
17 Eye le nuto vovovoawo katã kple du vovovo siwo katã me fia la ƒe nya kple eƒe sea de me la, Yudatɔwo kpɔ dzidzɔ, wotso aseye, woɖo kplɔ̃ hetu aglo. Eye anyigbaa dzi nɔlawo dometɔ geɖewo gblɔ be yewozu Yudatɔwo, elabena Yudatɔwo ƒe ŋɔdzi lé wo.

ESTA 9
1 Le ɣleti wuievelia, si nye Adar, ƒe ŋkeke wuietɔ̃lia dzi, esime ɣeyiɣi de be woawɔ fia la ƒe nya kple eƒe se la dzi, le ŋkeke si Yudatɔwo ƒe futɔwo nɔ mɔ kpɔm be yewoaɖu wo dzi la, nuwo va trɔ bubui, ale be Yudatɔwo boŋ va ɖu ame siwo lé fu wo la dzi. 
2 Yudatɔwo ƒo ƒu ɖe woƒe duwo me le Fia Ahasweros ƒe fiaɖuƒea ƒe nutowo katã me be yewoatu nu kple ame siwo le yewoƒe gbegblẽ dim la, eye ame aɖeke mete ŋu nɔ te ɖe wo nu o, elabena woƒe ŋɔdzi lé dukɔwo katã. 
3 Amegã siwo katã le nutoawo me, nuto gã dziɖulawo, nutodziɖulawo kple ame siwo wɔa fia ƒe dɔwo la kpe asi ɖe Yudatɔwo ŋu le esi Mordekai ƒe ŋɔdzi lé wo ta. 
4 Elabena Mordekai zu amegã le fia ƒe aƒe la me, eye eƒe ŋkɔ ɖi de fiaɖuƒe la ƒe nutowo katã me, elabena Mordekai le gã zum ɖe edzi ɖaa.
5 Yudatɔwo tsɔ yi dza woƒe futɔwo katã, wowu wo eye wotsrɔ̃ wo; wowɔ ame siwo lé fu wo la ale si dze wo ŋu. 
6 Le Susan mɔ́ la me la, Yudatɔwo wu ame alafa atɔ̃. 
7 Wowu Parsandata, Dalfon, Aspata, 
8 Porata, Adaliya, Aridata, 
9 Parmasta, Arisai, Aridai kple Waizata, 
10 ame siwo nye Haman, Hamedata vi si lé fu Yudatɔwo la, ƒe vi ewoawo hã. Gake esi wowu wo la womeha woƒe nuwo o.
11 Wova gblɔ ame siwo wowu le Susan mɔ́ la me gbe ma gbe la ƒe xexlẽme na fia la.
12 Eye fia la gblɔ na Fianyɔnu Esta be: “Yudatɔwo wu amewo le Susan mɔ́ la me, eye wotsrɔ̃ ame alafa atɔ̃ kple Haman viŋutsu ewoawo. Ke aleke wòanɔ le fiaɖuƒea ƒe nuto mamlɛawo me? Azɔ nu ka biam nèle? Woawɔe na wò. Eye nu ka dim nègale? Woawɔ edzi.” 
13 Esta gblɔ be: “Ne enyo fia ŋu la, ekema wòaɖe mɔ na Yudatɔ siwo le Susan be woawɔ ɖe egbe ƒe se la dzi etsɔ hã; eye woahe Haman viŋutsu ewoawo ɖe ati ŋu.” 
14 Eya ta fia la ɖe gbe be woawɔe nenema. Wode se le Susan, eye wohe Haman viŋutsu ewoawo ƒe kukuawo ɖe ati ŋu.
15 Yudatɔ siwo le Susan la gaƒo ƒu ake le ɣleti Adar ƒe ŋkeke wuienelia dzi, eye wowu ame alafa etɔ̃ le Susan, gake womeha woƒe nuwo o.
16 Ke Yudatɔ susɔe siwo le fiaɖuƒea ƒe nutowo me la ƒo ƒu, eye woʋli woƒe agbe ta. Wobia hlɔ̃ woƒe futɔwo, eye wowu ame akpe blaadre vɔ atɔ̃ le woƒe futɔwo dome; gake womeha woƒe nuwo o. 
17 Esia va eme le ɣleti Adar ƒe ŋkeke wuietɔ̃lia dzi, wogbɔ ɖe eme le ɣletia ƒe ŋkeke wuienelia dzi, eye wowɔe wòzu kplɔ̃ɖogbe kple dzidzɔkpɔgbe.
18 Yudatɔ siwo le Susan la ƒo ƒu le ɣletia ƒe ŋkeke wuietɔ̃lia kple ŋkeke wuienelia dzi, eye wogbɔ ɖe eme le eƒe ŋkeke wuiatɔ̃lia dzi, wowɔe wòzu kplɔ̃ɖogbe kple dzidzɔkpɔgbe. 
19 Esia tae Yudatɔ siwo le duviwo me le nuto bubuawo me la wɔ ɣleti Adar ƒe ŋkeke wuienelia wòzu dzidzɔkpɔgbe, kplɔ̃ɖogbe kple aglotugbe, si dzi woɖoa nuɖuɖu ɖe wo nɔewo le.
20 Mordekai ŋlɔ nudzɔdzɔ siawo ɖi, eye wòɖo agbalẽ siwo wòŋlɔ la ɖe Yudatɔ siwo katã le Fia Ahasweros ƒe fiaɖuƒea ƒe nutowo katã me, esiwo le kpuiƒe kple didiƒe siaa. 
21 Eɖoe na wo be ɣleti Adar ƒe ŋkeke wuienelia kple eƒe ŋkeke wuiatɔ̃lia nanye ŋkekenyui eye woanɔ eɖum ƒe sia ƒe, 
22 elabena ŋkeke mawo dzie Yudatɔwo kpɔ gbɔdzɔe tso woƒe futɔwo si me, kple ɣleti si me woƒe nuxaxa trɔ zu dzidzɔ, eye woƒe konyifagbe zu aglotugbe. Woatsɔe awɔ kplɔ̃ɖogbe, dzidzɔkpɔgbe kple ŋkeke siwo dzi woaɖo nuɖuɖu ɖe wo nɔewo ahana nu ame dahewo.
23 Eye Yudatɔwo lɔ̃ be yewoayi azã si gɔme yewodze xoxo la ɖuɖu dzi le nu si Mordekai ŋlɔ na wo la nu. 
24 Elabena Haman, si nye Agagitɔ Hamedata viŋutsu si nye Yudatɔwo katã ƒe futɔ la, ɖo tame vɔ̃ ɖe Yudatɔwo ŋu be yeatsrɔ̃ wo, eye wòna woda Pur, si nye Nudzidze la, be yeana ŋɔdzi nalé wo eye yeatsrɔ̃ wo. 
25 Ke esi Esta va fia la ŋkume la, fia la de se woŋlɔ agbalẽ be: “Tame vɔ̃ sia si wòɖo ɖe Yudatɔwo ŋu la netrɔ va eya ŋutɔ ƒe ta dzi”; eye wohe eya kple viawo ɖe ati ŋu. 
26 Esia tae woyɔa ŋkeke mawo be Purim, le Pur ƒe ŋkɔ nu. Ale le nu siwo katã woŋlɔ ɖe agbalẽ sia me kple nu si teƒe wokpɔ kple nu si dzɔ ɖe wo dzi ta la, 
27 Yudatɔwo ɖoe wo ɖokuiwo kple woƒe dzidzimeviwo kpakple ame siwo katã va wɔ ɖeka kpli wo la dzi be yewoanɔ ŋkeke eve siawo ɖum ɖaa, eye yewoawɔ ɖe nu si woŋlɔ le wo ŋuti la dzi le woƒe ɣeyiɣi ɖoɖi la dzi ƒe sia ƒe, eye yewomada le edzi o. 
28 Eye woaɖo ŋku ŋkeke siawo dzi, woaɖu wo le dzidzime sia dzidzime, ƒome sia ƒome, fiaɖuƒea ƒe nuto sia nuto, kple du sia du me, eye Purim ŋkeke siawo nu nagayi le Yudatɔwo dome o, eye ŋkuɖoɖo wo dzi nu nagatso le woƒe dzidzimeviwo dome o.
29 Eye Fianyɔnu Esta, si nye Abihayil vinyɔnu, kple Yudatɔ Mordekai, ŋlɔ agbalẽ le woƒe ŋusẽ me tsɔ ɖo kpe agbalẽ evelia sia, si ku ɖe Purim ŋu la dzi. 
30 Eye wòɖo agbalẽ siwo woŋlɔ, siwo me ŋutifafanya kple nyateƒenyawo le la, ɖe Yudatɔwo katã le Ahasweros ƒe fiaɖuƒea ƒe nuto alafa ɖeka blaeve vɔ adreawo me, 
31 be wòaɖo kpe Purim ŋkeke siawo ɖuɖu dzi le woƒe ɣeyiɣi ɖoɖi dzi, abe ale si ko Yudatɔ Mordekai kple Fianyɔnu Esta ɖoe na wo kple ale si ko woɖoe wo ɖokuiwo kple woƒe dzidzimeviwo dzi be yewoawɔ ene; esia lɔ nutsitsidɔwo kple woƒe kokoƒoƒo be woaxɔ na yewo hã ɖe eme. 
32 Ale Esta ƒe sedede la ɖo kpe Purim ƒe nya siawo dzi, eye woŋlɔe ɖe agbalẽ me.

ESTA 10
1 Fia Ahasweros ɖo dzizizidɔ na anyigba la kple ƒukpowo dzi nɔlawo.
2 Ke eƒe ŋusẽdɔwo kple dɔ gã siwo katã wòwɔ kpakple ale si fia do gã Mordekai ŋu nyawo katã la, woŋlɔ wo ɖe Media kple Persia fiawo ƒe Ŋutinyagbalẽ me. 
3 Elabena Yudatɔ Mordekai ye nye ame evelia kplɔ Fia Ahasweros ɖo. Exɔ ŋkɔ le Yudatɔwo dome, eye nɔvia gbogboawo katã dea bubu eŋu, enɔ dɔ wɔm hena eƒe dukɔ la ƒe nyonyo, eye wòdia woƒe dzidzimeviwo katã ƒe dedienɔnɔ.

LEAVE A REPLY

Please enter your comment!
Please enter your name here