Daniel

Daniel

1  Le Yuda-fia Yehoyakim ƒe fiaɖuɖu ƒe ƒe etɔ̃lia me la, Babilon-fia Nebukadnezar va Yerusalem, eye wòɖe to ɖee. 
2 Eye Afetɔ tsɔ Yuda-fia Yehoyakim kple Mawu vavã la ƒe aƒe la me nu aɖewo de asi nɛ, ale be wòtsɔ wo yi eƒe mawu ƒe me* le Sinar-nyigba* dzi. Etsɔ nuawo de eƒe mawu ƒe kesinɔnudzraɖoƒe.
3 Eye fia la de se na eŋumewo ƒe tatɔ Aspenaz be wòakplɔ Israel-vi aɖewo hekpe ɖe fia ƒe dzidzimeviwo kple bubumewo ƒe vi aɖewo ŋu vɛ. 
4 Woanye ɖekakpui siwo nu mewɔ afi aɖeke na o, siwo dze ɖeka, wonyaa nu, sidzedze le wo si, wosea nu gɔme nyuie, eye woate ŋu asubɔ le fiasã me. Ame siawoe woafia Kaldeatɔwo ƒe nuŋɔŋlɔ kple gbegbɔgblɔe. 
5 Azɔ hã, fia la ɖoe be woana woƒe gbe sia gbe nuɖuɖu wo tso fia la ƒe nuɖuɖu viviwo kple wain si wònona me. Woana hehe wo ƒe etɔ̃, ale be le ƒe siawo ƒe nuwuwu la, woasubɔ fia la.
6 Ke Yuda-toa me tɔ aɖewo le wo dome, woawoe nye Daniel, Hananiya, Misael kple Azariya. 
7 Eye fiaŋumewo ƒe amegã la tsɔ ŋkɔ na wo; Daniel tɔe nye Beltesazar, Hananiya tɔe nye Sadrak, Misael tɔe nye Mesak, eye Azariya tɔe nye Abednego.
8 Ke Daniel ɖoe le eƒe dzi me be yematsɔ fia ƒe nuɖuɖu viviwo kple wain si wònona la agblẽ kɔ ɖo na ye ɖokui o. Eya ta ebia fiaŋumewo ƒe amegã la be wòalɔ̃ ɖe edzi na ye, ale be yeagagblẽ kɔ ɖo na ye ɖokui o. 
9 Eye Mawu vavã la na fiaŋumewo ƒe amegã la ve Daniel nu hekpɔ nublanui nɛ. 
10 Gake fiaŋumewo ƒe amegã la gblɔ na Daniel be: “Mele vɔvɔ̃m na nye aƒetɔ fia, ame si ɖo miaƒe nuɖuɖu kple miaƒe nunono nam. Ke ne ekpɔ be miaƒe dzedzeme vloe wu ɖekakpui bubuawo tɔ ɖe? Esia ana madze agɔ le fia la dzi.” 
11 Ke Daniel gblɔ na dzikpɔla si fiaŋumewo ƒe amegã la ɖo Daniel, Hananiya, Misael kple Azariya nu la be: 
12 “Meɖe kuku, do wò subɔviwo kpɔ ŋkeke ewo, ne woana amagbewo mí míaɖu kple tsi mí míano; 13 emegbe nàtsɔ míaƒe dzedzeme asɔ kple ɖekakpui siwo ɖua fia ƒe nuɖuɖu viviwo la ƒe dzedzeme, eye nàwɔ na wò subɔviwo ɖe nu si nàkpɔ la nu.”
14 Eya ta elɔ̃ ɖe woƒe biabia la dzi, eye wòdo wo kpɔ ŋkeke ewo. 
15 Le ŋkeke ewo megbe la, woƒe dzedzeme nyo wu, eye woƒe lãme wɔ nyuie wu ɖekakpui bubu siwo katã ɖua fia ƒe nuɖuɖu viviwo. 
16 Ale dzikpɔla la naa amagbe wo ɖe fia ƒe nuɖuɖu viviawo kple wain la teƒe. 
17 Ke Mawu vavã la na sidzedze kple gɔmesese deto ɖekakpui ene siawo le nuŋɔŋlɔ ƒomevi ɖe sia ɖe kple nunya gome; ke wona Daniel ya sea ŋutegawo kple drɔ̃ewo katã ƒomevi gɔme.
18 Esi ɣeyiɣi si fia la de se be woakplɔ wo vɛ de la, fiaŋumewo ƒe amegã la kplɔ wo va Nebukadnezar ŋkume. 
19 Esi fia la ƒo nu kpli wo la, womekpɔ ame aɖeke le wo katã dome, si de Daniel, Hananiya, Misael kple Azariya nu o; eye wosubɔ le fia la ŋkume. 
20 Nya sia nya si fia la bia wo le nunya kple gɔmesese gome la, ekpɔe be woƒo akunyawɔla kple afakala siwo katã le eƒe fiaɖuƒe bliboa me la ta zi gbɔ zi ewo. 
21 Eye Daniel nɔ afi ma va se ɖe Fia Kores ƒe ƒe gbãtɔ me.

Daniel 2
1 Le Nebukadnezar ƒe fiaɖuɖu ƒe ƒe evelia me la, Nebukadnezar ku drɔ̃ewo, eye wòtsi dzodzodzoe, ale be alɔ̃ bu ɖee. 
2 Eya ta fia la ɖe gbe be woayɔ akunyawɔlawo, afakalawo, dzotɔwo kple Kaldeatɔwo vɛ, ne woalĩ fia ƒe drɔ̃eawo nɛ. Eye wova tsi tsitre ɖe fia la ŋkume. 
3 Eye fia la gblɔ na wo be: “Meku drɔ̃e si na metsi dzodzodzoe elabena medi be mase drɔ̃e la gɔme.” 
4 Eye Kaldeatɔwo gblɔ na fia la le Aramgbe me be: “Fia nenɔ agbe tegbee. Lĩ drɔ̃e la na wò subɔviwo, ekema míaɖe egɔme.”
5 Fia la gblɔ na Kaldeatɔwo be: “Nu si meɖo tame kplikpaa be mawɔe nye esi: Ne mielĩ drɔ̃e la heɖe egɔme nam o la, ekema woafli mi kakɛkakɛe, eye miaƒe aƒewo azu nugododeƒewo. 
6 Ke ne mielĩ drɔ̃e la heɖe egɔme la, ekema miaxɔ nunanawo kple teƒeɖoɖo tso gbɔnye, eye made bubu geɖe mia ŋu. Eya ta milĩ drɔ̃e la nam, eye miaɖe egɔme.”
7 Wogagblɔ zi evelia be: “Fia la nelĩ drɔ̃e la na eƒe subɔviwo, ekema míaɖe egɔme.”
8 Fia la gblɔ be: “Menyae nyuie be ɣeyiɣi ko dim miele, elabena mienya tame si meɖo kplikpaa. 
9 Ne mielĩ drɔ̃e la nam o la, ekema tohehe ɖeka koe li na mi katã. Ðe mieɖoe be yewoagblɔ alakpanyawo kple ameflunyawo nam va se ɖe esime nuwo natrɔ. Eya ta milĩ drɔ̃e la nam, ekema manyae be miate ŋu aɖe egɔme.”
10 Kaldeatɔwo ɖo eŋu na fia la be: “Amegbetɔ aɖeke mele anyigba dzi, si ate ŋu awɔ nu si dim fia la le o, elabena fiagã alo nutodziɖula aɖeke mebia nu sia tɔgbi tso akunyawɔla alo afakala alo Kaldeatɔ aɖeke si kpɔ o. 
11 Nu si biam fia le la sesẽ, eye ame aɖeke meli ate ŋu agblɔe na fia la o, negbe mawuwo ko, ame siwo nɔƒe mele amegbetɔwo dome o.”
12 Esia na dzi ku fia la, eye wòdo dɔmedzoe helĩhelĩ heɖe gbe be woawu Babilon nunyalawo katã. 
13 Esi wòde se be woayi aɖawu nunyalawo la, wodi Daniel kple eƒe zɔhɛwo hã be woawu.
14 Ɣemaɣi la, Daniel tsɔ aɖaŋudzedze kple nunya ƒo nu kple fiaŋudzɔlawo ƒe amegã Ariok, ame si tso be yeawu Babilon nunyalawo. 
15 Ebia amegã Ariok be: “Nu ka tae fia la de se sesẽ sia ɖo?” Eye Ariok gblɔ nya la na Daniel. 
16 Eya ta Daniel yi fia la gbɔ ɖabiae be wòana ɣeyiɣi ye, ne yeaɖe drɔ̃ea gɔme na fia la.
17 Emegbe Daniel yi aƒe me, eye wògblɔ nya la na eƒe zɔhɛ Hananiya, Misael kple Azariya. 
18 Eye wòbia tso wo si be woado gbe ɖa na dziƒo ƒe Mawu la be wòakpɔ nublanui na yewo le nya ɣaɣla sia ta, ne woagatsrɔ̃ Daniel kple eƒe zɔhɛwo kpe ɖe Babilon nunyala susɔeawo ŋu o.
19 Ale woɖe nya ɣaɣla la fia Daniel le ŋutega me le zã me. Eye Daniel kafu dziƒo ƒe Mawu la. 
20 Eye Daniel gblɔ be:
“Woakafu Mawu ƒe ŋkɔ tso mavɔ me yi mavɔ me,
Elabena etɔe nye nunya kple ŋusẽ.
21 Eyae trɔa ɣeyiɣiwo kple azãgbewo,
Eɖea fiawo le zi dzi, eye wòɖoa fiawo zi dzi,
Enaa nunya nunyalawo kple sidzedze nugɔmeselawo.
22 Eɖea nu goglowo kple nu ɣaɣlawo fiana,
Enya nu si le viviti me,
Eye egbɔe kekeli le.
23 Oo tɔgbuinyewo ƒe Mawu, meda akpe na wò hele kafuwòm,
Elabena èna nunya kple ŋusẽm.
Azɔ èɖe nu si míebia wò la fiam,
Èɖe fia ƒe nya la fia mí.”
24 Ale Daniel yi Ariok, ame si fia la tia be wòawu Babilon nunyalawo la gbɔ ɖagblɔ nɛ be: “Mègawu Babilon nunyalawo dometɔ aɖeke o. Kplɔm yi fia la gbɔe, ne maɖe drɔ̃e la gɔme na fia la.”
25 Ale Ariok kplɔ Daniel yi fia la gbɔ enumake hegblɔ nɛ be: “Mekpɔ ŋutsu aɖe le Yuda ƒe aboyomeawo dome, si ate ŋu aɖe drɔ̃e la gɔme na fia la.” 
26 Fia la bia Daniel, ame si ŋkɔe nye Beltesazar be: “Àte ŋu alĩ drɔ̃e si meku la ahaɖe egɔme nam vavãa?” 
27 Daniel ɖo eŋu na fia la be: “Nya ɣaɣla si biam fia le la, nunyalawo, afakalawo, akunyawɔlawo alo ɣletivimefakalawo mate ŋu aɖe egɔme na fia la o. 
28 Ke Mawu aɖe le dziƒowo, Ame si ɖea nya ɣaɣlawo fiana; eyae ɖe nu siwo ava dzɔ le ŋkekeawo ƒe nuwuɣi la fia Fia Nebukadnezar. Drɔ̃e si nèku kple ŋutega siwo nèkpɔ esime nèle wò aba dzi lae nye esi:
29 “Oo fia, èle tame bum le nu siwo ava dzɔ la ŋu le wò aba dzi, eye Ame si ɖea nya ɣaɣlawo fiana la ɖe nu si ava dzɔ la fia wò. 
30 Ke menye esi nunya le asinye wu agbagbeawo katã tae woɖe nya ɣaɣla sia fiam ɖo o; ke boŋ ne woaɖe drɔ̃e la gɔme na fia la, eye nànya wò dzimesusuwo tae.
31 “Oo fia, èɖo ŋku anyi, eye nèkpɔ legba gã aɖe! Legba la lolo hele dzo dam eteƒe mekɔ o, ele tsitrenu le ŋkuwòme, eye eƒe nɔnɔme dzi ŋɔ. 
32 Legba sia ƒe ta nye sika nyuitɔ, eƒe akɔta kple eƒe abɔwo nye klosalo, eƒe ƒodo kple eƒe atawo nye akɔbli, 
33 eƒe afɔwo nye gayibɔ, eƒe afɔbayawo nye gayibɔ kple tsu tsaka. 
34 Èle ekpɔm, va se ɖe esime kpe aɖe si menye amegbetɔ ƒe asie kae o la ge va dze legba la ƒe afɔbaya si nye gayibɔ kple tsu tsaka la dzi hegbã wo gudugudu. 
35 Ale gayibɔ, tsu, akɔbli, klosalo kple sika la siaa gbã gudugudu, eye wozu abe tsro le nukuƒoƒe le dzomeŋɔli ene, eye ya kplɔ wo dzoe, ale be womegakpɔ wo teƒe o. Ke kpe si va dze legbaa dzi la zu to gã aɖe hexɔ anyigba blibo la dzi.
36 “Drɔ̃e lae nye esia, eye azɔ míaɖe egɔme na fia la. 
37 Oo fia—wò, ame si nye fiawo dzi fia, wò, ame si dziƒo Mawu la tsɔ fiaɖuƒe, ŋusẽ, ŋutete kple bubu na, 
38 eye wòtsɔ amegbetɔwo, gbemelãwo kple dziƒoxewo de asiwò me, eye wòtsɔ wò ɖo dziɖulae ɖe wo katã nu la—wòe nye sikata la.
39 “Gake fiaɖuƒe bubu ava ɖe yowòme, si made nuwò o; emegbe fiaɖuƒe bubu, si nye etɔ̃lia, akɔblitɔ la ava, eye wòaɖu anyigba blibo la katã dzi.
40 “Fiaɖuƒe enelia asesẽ abe gayibɔ ene. Ale si gayibɔ gbãa nu, eye wòtua nu sia nu la, nenemae wòagbã fiaɖuƒe siawo katã gudugudu, abe ale si gayibɔ gbãa nu sia nu gudugudui ene.
41 “Esi nèkpɔ be afɔbayawo kple afɔbidɛawo ƒe akpa aɖewo nye tsu, eye eƒe akpa aɖewo nye gayibɔ la, efia be fiaɖuƒe la ama, ke gayibɔ ƒe sesẽ anɔ eme, abe ale si nèkpɔ gayibɔ kple tsu tsaka ene. 
42 Eye ale si afɔbidɛawo ƒe akpa aɖewo nye gayibɔ kple tsu tsaka la, nenemae fiaɖuƒe la ƒe akpa aɖe asesẽ, eye eƒe akpa aɖe masesẽ o. 
43 Ale si nèkpɔ gayibɔ kple tsu tsakae la, nenemae woatsaka kple amegbetɔwo; ke womalé ɖe wo nɔewo ŋu o, abe ale si ko gayibɔ kple tsu metsakana o ene.
44 “Eye le fia mawo ŋɔli la, dziƒo ƒe Mawu la aɖo fiaɖuƒe aɖe anyi, si matsrɔ̃ gbeɖegbeɖe o. Eye fiaɖuƒe sia mayi ɖe dukɔ bubu aɖeke si me o. Agbã fiaɖuƒe mawo katã gudugudu, eye wòahe wo va nuwuwui, ke eya ɖeɖe anɔ anyi tegbee, 
45 abe ale si nèkpɔ woka kpe aɖe, ke menye kple amegbetɔ ƒe asi o, wòtso to la dzi va gbã gayibɔ, akɔbli, tsu, klosalo kple sika la gudugudu ene. Mawu Gã lae ɖe nu siwo ava dzɔ la fia fia la. Drɔ̃e la le eme, eye egɔmeɖeɖe le eteƒe.”
46 Ale Fia Nebukadnezar tsyɔ mo anyi, eye wòde bubu Daniel ŋu. Eye woɖe gbe be woatsɔ nunanawo anɛ, eye woado dzudzɔ ʋeʋĩ nɛ. 
47 Eye fia la gblɔ na Daniel be: “Vavãe, miaƒe Mawu la nye mawuwo dzi Mawu kple fiawo dzi Aƒetɔ kpakple Ame si ɖea nya ɣaɣlawo fiana, elabena ète ŋu ɖe nya ɣaɣla sia fia.” 
48 Ale fia la do Daniel ɖe dzi, eye wòna nunana nyui geɖewoe, eye wòtsɔe ɖo dziɖula ɖe Babilon fiaɖuƒea ƒe nutowo katã nu, eye wòna wòzu Babilon nunyalawo katã ƒe tatɔ. 
49 Eye Daniel bia fia la wòtsɔ Sadrak, Mesak kple Abednego ɖo Babilon fiaɖuƒea ƒe nutowo nu, ke Daniel ŋutɔ ya le fiaƒe me.

Daniel 3
1 Fia Nebukadnezar wɔ sikalegba si kɔ abɔklugui blaade, eye wòkeke abɔklugui ade. Eye wòlii ɖe Dura tagba le Babilon fiaɖuƒea ƒe nuto me. 
2 Eye Fia Nebukadnezar dɔ amewo ɖa be woaƒo nuto gã dziɖulawo, nuto sue dziɖulawo, nutodziɖulawo, adaŋudelawo, kesinɔnuwo dzi kpɔlawo, ʋɔnudrɔ̃lawo, nyadrɔ̃lawo kple nutoawo katã dzi kpɔlawo nu ƒu, ne woava kɔ legba si Fia Nebukadnezar li la ŋu.
3 Ale nuto gã dziɖulawo, nuto sue dziɖulawo, nutodziɖulawo, adaŋudelawo, kesinɔnuwo dzi kpɔlawo, ʋɔnudrɔ̃lawo, nyadrɔ̃lawo kple nutoawo dzi kpɔlawo katã va ƒo ƒu, be woakɔ legba si Fia Nebukadnezar li la ŋu. Eye wotsi tsitre ɖe legba si Nebukadnezar li la ŋgɔ. 
4 Eye gbeƒãɖela la do ɣli sesĩe be: “Oo amehawo, dukɔwo kple gbegbɔgblɔ ɖe sia ɖe dolawo, wole se dem na mi be, 
5 ne miese lãdzo, dze, gakasaŋku, saŋku, kasaŋku, dze nuevee kple haƒonu vovovoawo ƒe ɖiɖi la, ekema miabɔbɔ ade ta agu na sikalegba si Fia Nebukadnezar li la. 
6 Ame si mabɔbɔ ade ta agu o la, woatsɔe aƒu gbe ɖe kpodzo si le bibim flaflafla la me enumake.” 
7 Eya ta esi dukɔwo katã se lãdzo, dze, gakasaŋku, saŋku, kasaŋku kple haƒonu vovovoawo ƒe ɖiɖi ko la, amehawo, dukɔwo kple gbegbɔgblɔ ɖe sia ɖe dolawo katã bɔbɔ de ta agu na sikalegba si Fia Nebukadnezar li la.
8 Ɣemaɣi la, Kaldeatɔ aɖewo va tso Yudatɔwo nu. 
9 Eye wogblɔ na Fia Nebukadnezar be: “Fia nenɔ agbe tegbee. 
10 Oo fia, wòe de se be, ame sia ame si se lãdzo, dze, gakasaŋku, saŋku, kasaŋku, dze nuevee kple haƒonu vovovoawo ƒe ɖiɖi la nabɔbɔ ade ta agu na sikalegba la; 
11 eye be ame sia ame si mabɔbɔ ade ta agu o la, woatsɔe aƒu gbe ɖe kpodzo si le bibim flaflafla la me. 
12 Ke Yudatɔ aɖewo li, siwo nètsɔ ɖo Babilon dziɖuɖudɔwo nu, siwo nye Sadrak, Mesak kple Abednego. Oo fia, ŋutsu siawo medea bubu aɖeke ŋuwò o. Womesubɔa wò mawuwo o, eye wogbe tadede agu na sikalegba si nèli la.”
13 Ale dzi ku Nebukadnezar wòdo dɔmedzoe helĩhelĩ, eye wòɖe gbe be woakplɔ Sadrak, Mesak kple Abednego vɛ. Eya ta wokplɔ ŋutsu siawo va fia la ŋkume. 
14 Eye Nebukadnezar bia wo be: “Sadrak, Mesak kple Abednego, nyateƒee wònye be miegbe be yewomasubɔ nye mawuwo o, eye yewomade ta agu na sikalegba si meli la oa? 
15 Azɔ ne miese lãdzo, dze, gakasaŋku, saŋku, kasaŋku, dze nuevee kple haƒonu vovovoawo ƒe ɖiɖi la, ekema miabɔbɔ ade ta agu na legba si mewɔ la. Ke ne miegbe tadede agu nɛ la, ekema woatsɔ mi aƒu gbe ɖe kpodzo bibi la me enumake. Eye mawu kae ate ŋu aɖe mi tso asinye me?”
16 Eye Sadrak, Mesak kple Abednego ɖo eŋu na fia la be: “Oo Nebukadnezar, mehiã be míagaɖe mía ɖokui nu le nya sia me hafi o. 
17 Ne wotsɔ mí ƒu gbe ɖe dzoa me hã la, mía Mawu si subɔm míele la ate ŋu aɖe mí tso kpodzo bibi la me, eye aɖe mí tso asiwò me, Oo fia. 
18 Ke ne mele alea o hã la, Oo fia, nyae be míele wò mawuwo subɔ ge o, eye sikalegba si nèli la, míele ta de ge agu nɛ o.”
19 Ale dzi ku Nebukadnezar vevie ɖe Sadrak, Mesak kple Abednego ŋu, eye eƒe mo trɔ, eye wòɖe gbe be woado dzo ɖe kpodzoa me wòaxɔ dzo zi gbɔ zi adre wu ale si wodonɛ tsã. 
20 Eye wòɖe gbe na ŋutsu sesẽ kako aɖewo le eƒe aʋakɔa me be woabla Sadrak, Mesak kple Abednego atsɔ aƒu gbe ɖe kpodzo si le bibim flaflafla la me.
21 Ale wobla ŋutsu siawo, eye woƒe awudziwuiwo, awuwo, kukuwo kple nudodo bubuwo le wo ŋu wotsɔ wo ƒu gbe ɖe kpodzo si le bibim flaflafla la me. 
22 Esi fia la ƒe nya la nu sẽ, eye wòna wodo dzo ɖe kpoa me wògbɔ eme ta la, dzoƒaɖea wu ŋutsu sesẽ siwo tsɔ Sadrak, Mesak kple Abednego ƒu gbe ɖe dzoa me la. 
23 Ke ŋutsu etɔ̃ siawo, Sadrak, Mesak kple Abednego le babla wotsɔ ƒu gbe ɖe kpodzo si le bibim flaflafla la me.
24 Kasia vɔvɔ̃ ɖo Fia Nebukadnezar wòtso kpla. Ebia eƒe fiaŋumegãwo be: “Ðe menye ŋutsu etɔ̃e míebla tsɔ ƒu gbe ɖe dzoa me oa?” Woɖo eŋu na fia la be: “Ɛ̃, fia.” 
25 Egblɔ be: “Kpɔ ɖa! Mele ŋutsu ene kpɔm, ka tu le wo ŋu, wole zɔzɔm le dzoa me, eye nu vevi aɖeke mewɔ wo o, eye ame enelia ƒe nɔnɔme le abe mawuwo ƒe vi ene.”
26 Eye Nebukadnezar te ɖe kpodzo bibi la ŋu, eye wògblɔ be: “Sadrak, Mesak kple Abednego, mi Mawu Dziƒoʋĩtɔ la ƒe subɔlawo, mido va afii!” Ale Sadrak, Mesak kple Abednego do le dzoa me. 
27 Eye nuto gã dziɖulawo, nuto sue dziɖulawo, nutodziɖulawo kple fiaŋumegã siwo ƒo ƒu ɖe afi ma la lé ŋku ɖe ŋutsu siawo ŋu hekpɔ be dzoa mewɔ naneke ŋuti na wo o, eye be woƒe taɖa ɖeka hɔ̃ hã mefiã o, naneke mewɔ woƒe awuwo o, eye dzo meʋẽ le wo ŋu hã o.
28 Eye Nebukadnezar gblɔ be: “Woakafu Sadrak, Mesak kple Abednego ƒe Mawu, ame si dɔ eƒe dɔla ɖa wòva ɖe eƒe subɔlawo. Woɖo ŋu ɖe eŋu, eye wogbe fia la ƒe sedede dzi wɔwɔ helɔ̃ faa be yewoaku, elabena wogbe be yewomasubɔ alo ade ta agu na mawu aɖeke o, negbe woawo ŋutɔ ƒe Mawu ko. 
29 Eya ta mele se dem be, dukɔ alo gbegbɔgblɔ ɖe sia ɖe me tɔ si agblɔ nya vɔ̃ aɖe ɖe Sadrak, Mesak kple Abednego ƒe Mawu ŋu la, woaflii kakɛkakɛe, eye woƒe aƒewo azu nugododeƒe; elabena mawu bubu aɖeke meli, si ate ŋu aɖe ame abe eya ene o.”
30 Ale fia la do Sadrak, Mesak kple Abednego ɖe dzi le Babilon fiaɖuƒe la me.

Daniel 4
1 “Gbedeasi si tso fia Nebukadnezar gbɔ na amehawo, dukɔwo kple gbegbɔgblɔ siwo katã le anyigba dzi lae nye esi: Medi ŋutifafa geɖe na mi! 
2 Enye dzidzɔ nam be magblɔ dzesi kple nukunu siwo Mawu Dziƒoʋĩtɔ la wɔ nam. 
3 Eƒe dzesiwo lolo, eye eƒe nukunuwo tri akɔ loo! Eƒe fiaɖuƒe nye fiaɖuƒe mavɔ, eye eƒe dziɖuɖu li tso dzidzime yi dzidzime.
4 “Nye, Nebukadnezar, menɔ aƒenye me bɔkɔɔ, eye nuwo dze edzi nam le nye fiasã me. 
5 Meku drɔ̃e, si na vɔvɔ̃ ɖom. Nu siwo mekpɔ le susu me esime mele nye aba dzi kple ŋutega siwo mekpɔ la do voɖi nam. 
6 Eya ta meɖe gbe be woakplɔ Babilon nunyalawo katã ava ŋkunyeme, ne woaɖe drɔ̃e la gɔme nam.
7 “Ɣemaɣi la, akunyawɔlawo, afakalawo, Kaldeatɔwo kple ɣletivimefakalawo va. Esi melĩ drɔ̃e la na wo la, womete ŋu ɖe egɔme nam o. 
8 Mlɔeba Daniel, ame si wotsɔ nye mawu ƒe ŋkɔ Beltesazar na, eye mawu kɔkɔewo ƒe gbɔgbɔ le eme la, va ŋkunyeme; eye melĩ drɔ̃e la nɛ be:
9 “‘Oo Beltesazar, akunyawɔlawo ƒe tatɔ, menyae be mawu kɔkɔewo ƒe gbɔgbɔ le mewò, eye nya ɣaɣla aɖeke meli si sẽ na wò akpa o. Eya ta gblɔ ŋutega siwo mekpɔ le nye drɔ̃ea me eye nàɖe egɔme nam.
10 “‘Ŋutega siwo mekpɔ esi mele nye aba dzi lae nye esi: Meɖo ŋku anyi, eye kpɔ ɖa, mekpɔ ati aɖe le anyigba titina, si kɔ ŋutɔ. 
11 Ati la tsi, eye wòsesẽ, ekɔ yi ɖatɔ dziƒowo, eye wòle dzedzem le anyigba bliboa ƒe afi sia afi. 
12 Eƒe aŋgbawo nya kpɔ, eƒe tsetse sɔ gbɔ, eye nuɖuɖu le edzi na nu gbagbewo katã. Gbemelãwo nɔa eƒe vɔvɔli te, eye dziƒoxewo nɔa eƒe alɔwo dzi, eye wònyia nu gbagbewo katã.
13 “‘Meɖo ŋku anyi le ŋutega siwo mekpɔ esime mele nye aba dzi la me, eye mekpɔ dzɔla kɔkɔe aɖe ɖi tso dziƒo. 
14 Edo ɣli sesĩe gblɔ be: “Milã ati la ƒu anyi, eye milã eƒe alɔwo. Midudu eƒe aŋgbawo, eye mika eƒe tsetseawo hlẽ! Minya lãwo ɖa le ete kple xewo ɖa le eƒe alɔwo dzi. 
15 Ke migblẽ eƒe takpoea ɖe to me, eye mitsɔ gayibɔ kple akɔbli blae ɖe gbe me. Mina dziƒozãmu naƒoe, eye wòanɔ gbemelãwo gbɔ. 
16 Woatrɔ eƒe dzi, be wòaganye amegbetɔ ƒe dzi azɔ o, eye wòazu abe lã ƒe dzi ene, va se ɖe esime ɣeyiɣi adre nava yi nɛ. 
17 Esiae nye dzɔlawo ƒe gbeɖeɖe, eye ame kɔkɔewo ƒe sededee nye esia, ne agbagbeawo nanyae be Dziƒoʋĩtɔ lae nye Dziɖula si kpɔ ŋusẽ ɖe amegbetɔwo ƒe fiaɖuƒewo dzi, eye ame si dze eŋu la, eyae wòtsɔnɛ nana, eye wòtsɔa ame tsɛtɔ le amegbetɔwo dome gɔ̃ hã ɖoa enu.”
18 “‘Esiae nye drɔ̃e, si nye Fia Nebukadnezar meku; ke wò la, Oo Beltesazar, ɖe egɔme, elabena nunyala bubu siwo katã le nye fiaɖuƒea me la mete ŋu ɖe egɔme nam o. Wò la, àte ŋui, elabena mawuwo ƒe gbɔgbɔ le mewò.’
19 “Eye Daniel, ame si ŋkɔe nye Beltesazar, ƒe nu tsi te sẽe, eye eƒe susuwo do ŋɔdzi nɛ.
“Eye fia la gblɔ be: ‘Oo Beltesazar, mègana drɔ̃e la kple eƒe gɔmeɖeɖe nadzi ŋɔ na wò o.’
“Beltesazar gblɔ be: ‘Oo nye aƒetɔ, drɔ̃e la neɖi wò futɔwo ŋu, eye eƒe gɔmeɖeɖe neɖi wò ketɔwo ŋu.
20 “‘Ati si nèkpɔ, si tsi, eye wòsesẽ, eye wòkɔ yi ɖatɔ dziƒowo hele dzedzem le anyigba blibo la katã dzi, 
21 eƒe aŋgbawo nya kpɔ, eƒe tsetse sɔ gbɔ, eye nuɖuɖu le edzi na nu gbagbewo katã, gbemelãwo nɔa ete, eye dziƒoxewo nɔa eƒe alɔwo dzi la, 
22 Oo fia, eyae nye wò ŋutɔ, elabena ètri akɔ, èkpɔ ŋusẽ, wò gãnyenye yi ɖatɔ dziƒowo, eye wò dziɖuɖu de anyigba ƒe mlɔenuwo ke.
23 “‘Eye esi fia la kpɔ dzɔla kɔkɔe aɖe ɖi tso dziƒo hegblɔ be: “Milã ati la ƒu anyi, eye migblẽ edome, ke migblẽ eƒe takpoea kple eƒe kewo ɖe to me, eye mitsɔ gayibɔ kple akɔbli blae ɖe gbe me. Mina dziƒozãmu naƒoe, eye wòanɔ gbemelãwo gbɔ va se ɖe esime ɣeyiɣi adre nava yi nɛ” la. 
24 Oo fia, egɔmeɖeɖee nye esi; nu si Dziƒoʋĩtɔ la ɖo lae adzɔ ɖe nye aƒetɔ fia dzi. 
25 Woanya wò ɖa le amegbetɔwo dome, eye ànɔ gbemelãwo gbɔ, àɖu gbe abe nyitsu ene, dziƒozãmu aƒo wò, eye ɣeyiɣi adre ava yi na wò, va se ɖe esime nànyae be Dziƒoʋĩtɔ lae nye Dziɖula si kpɔ ŋusẽ ɖe amegbetɔwo ƒe fiaɖuƒewo dzi, eye ame si dze eŋu la, eyae wòtsɔnɛ nana.
26 “‘Gake esi wogblɔ be woagblẽ ati la ƒe takpoea kple eƒe kewo ɖi ta la, ne èva dze sii be, Mawue le dzi ɖum le dziƒo vɔ la, wò fiaɖuƒe agasu asiwò. 
27 Eya ta Oo fia, xɔ nye aɖaŋuɖoɖo. Ðe asi le wò nu vɔ̃wo ŋu nàwɔ nu dzɔdzɔe, eye nàɖe asi le wò vɔɖivɔ̃ɖi ŋu nàkpɔ nublanui na ame dahewo boŋ. Ðewohĩ eme anyo na wò eteƒe nadidi.’”
28 Nu siawo katã dzɔ ɖe Fia Nebukadnezar dzi.
29 Le dzinu wuieve megbe la, enɔ tsa ɖim le Babilon fiasã la tame. 
30 Eye fia la gblɔ be: “Ðe menye esiae nye Babilon Gã si metsɔ nye ŋusẽ kple ŋutete tsoe be wòanye fia ƒe aƒe kple nye gãnyenye ƒe bubu oa?”
31 Esi fia la mekpɔ ɖe nu le nyaa me o la, gbe aɖe ɖi tso dziƒo be: “Oo Fia Nebukadnezar, se gbe sia: ‘Fiaɖuƒe la do le asiwò me, 
32 woanya wò le amegbetɔwo dome. Ànɔ gbemelãwo gbɔ. Woana gbe wò nàɖu abe nyitsu ene, eye ɣeyiɣi adre ava yi na wò, va se ɖe esime nànyae be Dziƒoʋĩtɔ lae nye Dziɖula si kpɔ ŋusẽ ɖe amegbetɔwo ƒe fiaɖuƒewo dzi, eye ame si dze eŋu la, eyae wòtsɔnɛ nana.’”
33 Enumake nya la va eme ɖe Nebukadnezar dzi. Wonyae le amegbetɔwo dome, eye wòɖu gbe abe nyitsu ene, dziƒozãmu ƒoe, va se ɖe esime eƒe ɖa to legbee abe hɔ̃ ƒe fu ene, eye eƒe fewo to abe xewo tɔ ene.
34 “Esi ŋkekeawo wu enu la, nye, Nebukadnezar, mefɔ mo dzi kpɔ dziƒowo, eye nye susu gate dɔwɔwɔ nyuie; mekafu Dziƒoʋĩtɔ la, mekafu Ame si le agbe tegbee la hedoe ɖe dzi, elabena eƒe dziɖuɖu nye dziɖuɖu mavɔ, eye eƒe fiaɖuƒe li tso dzidzime yi dzidzime. 
35 Anyigbadzinɔlawo katã meɖi naneke o, eye wòwɔa dziƒoʋakɔwo kple anyigbadzinɔlawo ale si dzea eŋu. Eye ame aɖeke mate ŋu axe mɔ nɛ alo agblɔ nɛ be, ‘Nu kae nye esi wɔm nèle?’ hã o.
36 “Ɣemaɣi la, nye susu gate dɔwɔwɔ, eye nye gãnyenye kple nye atsyɔ̃ kpakple nye fiaɖuƒe ƒe bubu gasu asinye. Nye adaŋudelawo kple nye amegãwo di yonyeme mɔ vevie, eye wogatsɔm ɖo nye fiaɖuƒe la nu, eye wotsɔ gãnyenye si teƒe mekɔ o kpee nam.
37 “Eya ta nye, Nebukadnezar, mele Dziƒofia la kafum, mele edom ɖe dzi, eye mele bubu dem eŋu, elabena eƒe nuwɔwɔwo katã le eteƒe, eƒe mɔwo dzɔ, eye wòbɔbɔa dadalawo ɖe anyi.”

Daniel 5
1 Fia Belsazar ɖo kplɔ̃ gã aɖe na eƒe amegãwo dometɔ akpe ɖeka, eye wòno wain le wo ŋkume. 
2 Esi wain ɖo mo na Belsazar la, egblɔ be woatsɔ sikanu kple klosalonu siwo fofoa Nebukadnezar lɔ tso gbedoxɔ si nɔ Yerusalem me la vɛ, ne fia la kple eƒe amegãwo, srɔ̃awo kple eƒe ahiãwo nano nu le wo me. 
3 Ale woyi ɖatsɔ sikanu siwo wolɔ tso gbedoxɔ, si nye Mawu ƒe aƒe, si nɔ Yerusalem me la vɛ, eye fia la kple eƒe amegãwo, srɔ̃awo kple eƒe ahiãwo no nu le wo me. 
4 Wono wain, eye wokafu mawu siwo nye sika kple klosalo, akɔbli, gayibɔ, ati kple kpe.
5 Kasia wokpɔ amegbetɔ ƒe asibidɛ wòle nu ŋlɔm ɖe fiasã la ƒe gli si wosi akalo na la ŋu le akaɖitia ŋgɔdze, eye fia la kpɔ asi si le nua ŋlɔm la. 
6 Ale fia la ƒe mo fu kpii, eye eƒe tamesusuwo do ŋɔdzi nɛ, eƒe ali le ƒoƒom, eye eƒe klowo le wo nɔewo ƒom kpakpakpa.
7 Eye fia la do ɣli sesĩe be woakplɔ afakalawo, Kaldeatɔwo kple ɣletivimefakalawo vɛ. Eye fia la gblɔ na Babilon nunyalawo be: “Ame si axlẽ nuŋɔŋlɔ sia, eye wòaɖe egɔme nam la, woata aɖabɛ nɛ, woade sikakɔsɔkɔsɔ kɔ nɛ, eye wòanye etɔ̃lia aɖu dzi le fiaɖuƒe la me.”
8 Eye fia la ƒe nunyalawo katã va, ke womete ŋu xlẽ nuŋɔŋlɔa ne woahayi egɔme ɖe ge na fia la o. 
9 Ale vɔvɔ̃ ɖo Fia Belsazar ŋutɔ, eye eƒe mo fu kpii; eƒe amegãwo hã tɔtɔ.
10 Ke esi fianyɔnu la se fia kple eƒe amegãwo ƒe nyawo la, eyi kplɔ̃ɖoƒe la enumake. Eye fianyɔnu la gblɔ be: “Fia nenɔ agbe tegbee. Mègana wò tamesusuwo nado ŋɔdzi na wò o, eye wò mo megafu kpii o. 
11 Oo fia, ŋutsu aɖe le wò fiaɖuƒe la me, si me mawu kɔkɔewo ƒe gbɔgbɔ le. Le fofowò ŋɔli la, wokpɔe be sidzedze, gɔmesese kple nunya si le abe mawuwo tɔ ene la le esi, eye fofowò Fia Nebukadnezar tsɔe ɖo akunyawɔlawo, afakalawo, Kaldeatɔwo kple ɣletivimefakalawo ƒe tatɔe. 
12 Elabena Daniel, ame si fia la tsɔ ŋkɔ na be Beltesazar, ƒe susu ɖa ale gbegbe, sidzedze kple gɔmesese le esi, eɖea drɔ̃ewo kple adzowo gɔme, eye wòɖea nya sesẽwo gɔme. Eya ta na woayɔ Daniel vɛ, eye aɖe egɔme.”
13 Ale wokplɔ Daniel va fia la ŋkume. Eye fia la bia Daniel be: “Wòe nye Daniel, aboyome siwo fofonye, fia la, kplɔ tso Yuda vɛ la dometɔ ɖeka? 
14 Mese le ŋuwò be, mawuwo ƒe gbɔgbɔ le mewò, eye wokpɔe be sidzedze, gɔmesese kple nunya deto le asiwò. 
15 Wokplɔ nunyalawo kple afakalawo va ŋkunyeme be woaxlẽ nuŋɔŋlɔ sia, ne woaɖe egɔme nam, gake womete ŋui o. 
16 Ke mese le ŋuwò be ètea ŋu ɖea nya ɣaɣlawo gɔme, eye nèɖea nya sesẽwo hã gɔme. Eya ta ne ète ŋu xlẽ nuŋɔŋlɔ la heɖe egɔme nam vavã la, woata aɖabɛ na wò, woade sikakɔsɔkɔsɔ kɔ na wò, eye ànye etɔ̃lia aɖu dzi le fiaɖuƒe la me.”
17 Daniel ɖo eŋu na fia la be: “Wò nunanawo nenɔ anyi na wò, eye nàtsɔ wò nunanawo ana ame bubuwo. Gake maxlẽ nuŋɔŋlɔ la na fia la, eye maɖe egɔme nɛ. 
18 Oo fia, Mawu Dziƒoʋĩtɔ la tsɔ fiaɖuƒe, gãnyenye, bubu kple ŋutikɔkɔe na fofowò Nebukadnezar. 
19 Vɔvɔ̃ ɖoa amehawo, dukɔwo kple gbegbɔgblɔ ɖe sia ɖe dolawo, eye wodzona nyanyanya le eŋkume le gãnyenye si wònae la ta. Ame si wòdi be yeawu la, ewunɛ; ame si wòdi be yeana wòanɔ agbe la, enana wònɔa agbe; eye ame si wòdi be yeado ɖe dzi la, edonɛ ɖe dzi; eye ame si wòdi be yeabɔbɔ ɖe anyi la, ebɔbɔnɛ ɖe anyi. 
20 Ke esi eƒe dzi de asi dada me, eye wòsẽ dzi me hedo eɖokui ɖe dzi ta la, woɖiɖii ɖe anyi tso eƒe fiaɖuƒe ƒe fiazikpui la dzi, eye woxɔ eƒe bubu la le esi. 
21 Wonyae ɖa le amegbetɔviwo dome, eye wotrɔ eƒe dzi wòzu abe lã tɔ ene, eye wònɔ gbetedziwo dome. Eɖua gbe abe nyitsu ene, eye dziƒozãmu ƒoe, va se ɖe esime wòdze sii be Mawu Dziƒoʋĩtɔ lae nye Dziɖula si kpɔ ŋusẽ ɖe amegbetɔwo ƒe fiaɖuƒewo dzi, eye ame si dze eŋu la, eyae wòtsɔna ɖoa enu.
22 “Ke wò, via Belsazar, mèbɔbɔ wò dzi ɖe anyi o, evɔ nènya nu siawo katã hafi. 
23 Ke èdo ɖokuiwò ɖe dzi ɖe dziƒowo ƒe Aƒetɔ la ŋu, eye nèna wotsɔ eƒe aƒemenuwo gɔ̃ hã vɛ na wò. Eye wò kple wò amegãwo, srɔ̃wòwo kple wò ahiãwo mieno wain le wo me, eye nèkafu mawu dzodzro siwo nye klosalo kple sika, akɔbli, gayibɔ, ati kple kpe, siwo mekpɔa nu o, eye womesea nu alo dzea si nu hã o. Ke mède bubu Mawu, ame si si me wò gbɔgbɔ kple wò mɔwo katã le la, ya ŋu o. 
24 Eya tae wòdɔ asi sia ɖa wòva ŋlɔ nu sia. 
25 Nu si woŋlɔ lae nye esi: MENE, MENE, TEKEL kple PARSIN.
26 “Nuŋɔŋlɔwo gɔmee nye esi: MENE: Mawu xlẽ wò fiaɖuƒe la ƒe ŋkekewo, eye wòhee va nuwuwui.
27 “TEKEL, woda wò le nudanu me, ke èle wodzoe akpa.
28 “PERES, woma wò fiaɖuƒe la, eye wotsɔe na Mediatɔwo kple Persiatɔwo.”
29 Ale Belsazar de se, eye wota aɖabɛ na Daniel, wode sikakɔsɔkɔsɔ kɔ nɛ; eye woɖe gbeƒãe be, eyae nye dziɖula etɔ̃lia le fiaɖuƒe la me.
30 Zã ma me ke wowu Kaldea-fia Belsazar. 31 Eye Mediatɔ Dario xɔ fiaɖuƒe la; exɔ abe ƒe blaade vɔ eve ene ɣemaɣi.

Daniel 6
1 Dario kpɔ be enyo be yeaɖo nuto gã dziɖula alafa ɖeka blaeve be woanɔ fiaɖuƒe blibo la nu. 
2 Eye wòɖo amegã etɔ̃ wo nu, ame siwo dome Daniel le, ale be nuto gã dziɖula siawo natsɔ nyatakaka anɔ yiyim na wo, ne fia la nagabu naneke o. 
3 Eye Daniel va ƒo amegãwo kple nuto gã dziɖulawo ta le nu sia nu me, elabena eƒe susu ɖa ŋutɔ, eye fia la ɖoe be yeatsɔe aɖo fiaɖuƒe blibo la nu.
4 Ɣemaɣi la, amegãwo kple nuto gã dziɖulawo le mɔnu dim le Daniel ŋu atraɖii, ne woakpɔ nya aɖe le eŋu le dɔ siwo wòwɔna le fiaɖuƒea me la me, ke womete ŋu kpɔ nya alo nu tovo wɔwɔ aɖeke le eŋu o, elabena enye ame si dzi woate ŋu aka ɖo, eléa fɔ ɖe dɔ ŋu, eye mewɔa nu fitifiti aɖeke o. 
5 Eya ta ŋutsu siawo gblɔ be: “Míele nya aɖeke kpɔ ge le Daniel sia ŋu o, negbe le nu siwo ku ɖe eƒe Mawu ƒe se la ŋu me ko.”
6 Ale amegã siawo kple nuto gã dziɖulawo lɔ hoo va fia la gbɔ gblɔ nɛ be: “Fia Dario nenɔ agbe tegbee. 
7 Oo fia, fiaɖuƒe la ƒe amegãwo katã, nuto sue dziɖulawo kple nuto gã dziɖulawo, adaŋudelawo kple nutodziɖulawo, de adaŋu be woade se le fia ƒe ŋkɔ me, eye wòaɖo kpe edzi be, ame sia ame si abia nu mawu alo amegbetɔ aɖe le ŋkeke blaetɔ̃ me, ne menye wò ko o la, woatsɔe aƒu gbe ɖe dzatawo ƒe do me. 
8 Eya ta fia, de se sia eye nàde asi ete, ne tɔtrɔ naganɔ eŋu o ɖe Mediatɔwo kple Persiatɔwo ƒe se, si me wometea fli ɖo o la nu.”
9 Ale Fia Dario de asi nuŋɔŋlɔ la kple se la te.
10 Ke esi Daniel nya se be wode asi nuŋɔŋlɔa te ko la, eyi aƒe me, eye wòge ɖe eƒe xɔtaxɔ si ƒe fesrewo trɔ ɖo ɖe Yerusalem gome la me. Eye wòdzea klo doa gbe ɖa hekafua eƒe Mawu zi etɔ̃ gbe ɖeka le eŋkume, abe ale si ko wòwɔnɛ ɖaa ene. 
11 Ɣemaɣi ŋutsu siawo ge ɖe edzi zi ɖeka ʋla hekpɔ Daniel wòle koko ƒom hele amenuveve biam le eƒe Mawu ŋkume.
12 Eya ta wova fia la gbɔ heɖo ŋku fia ƒe sededea dzi nɛ be: “Oo fia, menye ɖe nède asi sea te be, ame sia ame si abia nu mawu alo amegbetɔ aɖe le ŋkeke blaetɔ̃ me, ne menye wò ko o la, woatsɔe aƒu gbe ɖe dzatawo ƒe do me oa?” Fia la ɖo eŋu be: “Woɖo kpe nya la dzi le Mediatɔwo kple Persiatɔwo ƒe se, si me wometea fli ɖo o la nu.” 
13 Enumake wogblɔ na fia la be: “Oo fia, Daniel, si nye Yuda aboyomeawo dometɔ ɖeka la, medea bubu aɖeke ŋuwò o, eye mebu se si te nède asii la ɖe ɖeke me o, ke boŋ enɔa gbedodoɖa dzi zi etɔ̃ gbe ɖeka.”
14 Esi fia la se nya sia la, ete ɖe edzi ŋutɔ, eye wòdi mɔ si dzi wòato axɔ na Daniel; edze agbagba ɖe sia ɖe be yeaɖee, va se ɖe esime ɣe ɖo to. 
15 Mlɔeba ŋutsu siawo lɔ hoo va fia la gbɔ gblɔ nɛ be: “Oo fia, nyae be, Mediatɔwo kple Persiatɔwo ƒe se wònye be, se alo ɖoɖo ɖe sia ɖe si dzi fia la ɖo kpee la, womatrɔe o.”
16 Eya ta fia la de se wokplɔ Daniel yi ɖaƒu gbe ɖe dzatawo ƒe do me. Eye fia la gblɔ na Daniel be: “Wò Mawu si nèsubɔna atraɖii la, axɔ na wò.” 
17 Azɔ womli kpe va ɖo do la nu, eye fia la tsɔ eƒe ŋkɔsigɛ kple eƒe amegãwo ƒe ŋkɔsigɛwo tre enu, be woagatrɔ naneke le Daniel ƒe nya la me o.
18 Emegbe fia la dzo yi eƒe fiasã me. Etsi nu dɔ zã bliboa, melɔ̃ wowɔ naneke tsɔ do dzidzɔ nɛ o, eye wòtsi zãdomadɔlɔ̃e. 
19 Fia la fɔ ŋdi kanya, esime agu dze, eye wòɖe abla yi dzatawo ƒe do la gbɔ. 
20 Esi wògogo doa la, edo avisimegbee yɔ Daniel. Eye fia la bia Daniel be: “Oo, Daniel, wò, Mawu gbagbe la subɔla, ɖe wò Mawu si nèsubɔna atraɖii la, te ŋu ɖe wò tso dzatawo si mea?” 
21 Enumake Daniel ɖo eŋu na fia la be: “Fia nenɔ agbe tegbee. 
22 Nye Mawu dɔ eƒe dɔla ɖa wòva mia nu na dzatawo, ale be womewɔ nu vevim o, elabena nyemeɖi fɔ aɖeke le eŋkume o; eye nyemedze agɔ aɖeke le dziwò o, Oo fia.”
23 Fia la kpɔ dzidzɔ ale gbegbe, eye wòɖe gbe be woaɖe Daniel le do la me. Esi woɖe Daniel le doa me la, nu vevi aɖeke mewɔe o, elabena eɖo ŋu ɖe eƒe Mawu ŋu.
24 Eye fia la ɖe gbe woyi ɖakplɔ ŋutsu siwo tso Daniel nu la vɛ, eye wotsɔ wo ƒu gbe ɖe dzatawo ƒe do la me hekpe ɖe wo viwo kple wo srɔ̃wo ŋu. Ke womekpɔ ɖo do la gɔme hafi dzatawo xe wo le yame hegbã woƒe ƒuwo katã o.
25 Emegbe Fia Dario ŋlɔ agbalẽ ɖo ɖe amehawo, dukɔwo kple gbegbɔgblɔ siwo katã le anyigba dzi la be: “Medi ŋutifafa geɖe na mi! 
26 Nyee le se dem be, le nye fiaɖuƒea ƒe dziɖuƒewo katã la, woavɔ̃ Daniel ƒe Mawu la ahadzo nyanyanya le eŋkume. Elabena eyae nye Mawu gbagbe la kple Ame si li tegbee, eƒe fiaɖuƒe matsrɔ̃ gbeɖe o, eye eƒe dziɖuɖu li tegbee. 
27 Exɔna na ame, eɖea ame, eye wòwɔa dzesiwo kple nukunuwo le dziƒo kple anyigba dzi, elabena eyae nye ame si ɖe Daniel tso dzatawo si me.”
28 Ke eme nyo na Daniel le Dario ƒe fiaɖuƒe kple Persiatɔ Kores ƒe fiaɖuƒe la me.

Daniel 7
1 Le Babilon-fia Belsazar ƒe ƒe gbãtɔ me la, Daniel ku drɔ̃e, eye wòkpɔ ŋutegawo le eƒe aba dzi. Eye wòŋlɔ drɔ̃e la ɖi; eŋlɔ nyawo katã ɖi tsitotsito. 
2 Daniel gblɔ be:
“Mekpɔ le nye ŋutegawo me le zã me, eye kpɔ ɖa, dziƒo ƒe ya eneawo le atsiaƒu gã la nyamam. 
3 Lã gã ene do tso atsiaƒu la me, eye woto vovo tso wo nɔewo gbɔ.
4 “Gbãtɔ le abe dzata ene, eye wòto hɔ̃ ƒe aʋala. Mele ekpɔm, va se ɖe esime wotu eƒe aʋalawo le eŋu, wokɔe dzi tso anyigba, eye wona wòtɔ ɖe afɔ eve dzi abe amegbetɔ ene, eye wotsɔ amegbetɔ ƒe dzi nɛ.
5 “Eye kpɔ ɖa, lã evelia si le abe sisiblisi ene la do. Wokɔe dzi ɖe akpa ɖeka, eye wòtsɔ aɖu lé agbaƒuti etɔ̃ ɖe nu; eye wogblɔ nɛ be: ‘Tso nàɖu lã geɖe.’
6 “Eyome meɖo ŋku anyi, eye kpɔ ɖa, lã bubu aɖe si le abe lãklẽ ene, gake wòto aʋala ene ɖe dzime abe xevi ene la do. Lã la to ta ene, eye wona dziɖuŋusẽe.
7 “Emegbe meɖo ŋku anyi le ŋutega me le zã me, eye kpɔ ɖa, lã enelia do; eɖi vɔvɔ̃, ŋɔdzi le eŋu, eye wòsesẽ ŋutɔ, eto gaɖu kakowo. Eɖua nu gbãa nu, eye wòfanyaa susɔea kple afɔ. Eto vovo tso lã bubu siwo do ŋgɔ nɛ la gbɔ, eye wòto dzo ewo. 
8 Meɖe ŋku ɖe dzoawo, eye kpɔ ɖa, dzo bubu si nye dzo sue aɖe, to ɖe wo domee, eye woho dzo gbãtɔawo dometɔ etɔ̃ le eŋgɔ. Eye kpɔ ɖa, dzo sia to ŋku abe amegbetɔ ene, eye nu si gblɔa dadanyawo la le esi.
9 “Meɖe ŋku ɖee va se ɖe esime wotsɔ fiazikpuiwo va li anyi, eye Ame Si Li Tso Gbe Aɖe Gbe Ʋĩi Ke la bɔbɔ nɔ anyi. Awu si wòdo la fu tititi abe sno ene, eye eƒe taɖa le abe alẽfu dzadzɛ ene. Eƒe fiazikpui nye dzoƒaɖewo; eƒe tasiaɖamfɔtiwo nye dzobibi. 
10 Dzotɔsisi aɖe le sisim le eŋgɔ. Ame akpe teƒe akpewo le esubɔm, eye ame akpe ewo teƒe akpe ewo le tsitre ɖe eŋkume. Woɖi ʋɔnu, eye woke agbalẽwo.
11 “Ɣemaɣi la, meɖo ŋku anyi le nu kpɔm le dadanya siwo gblɔm dzo la le ta; meɖe ŋku ɖee va se ɖe esime wowu lã la, eye wotsɔ eƒe ŋutilã la na be woatɔ dzoe. 
12 Ke woxɔ dziɖuŋusẽ le lã susɔeawo si, eye wona ɣeyiɣi kple azãgbe si woayi edzi anɔ agbe ase ɖo la wo.
13 “Meɖo ŋku anyi le ŋutega me le zã me, eye kpɔ ɖa, ame aɖe gbɔna kple dziƒolilikpowo abe amegbetɔvi ene; eye wona wòva Ame si li tso gbe aɖe gbe ʋĩi ke la gbɔ, eye wokplɔe va eŋkume.
14 Wotsɔ dziɖuɖu, bubu kple fiaɖuƒe nɛ, ne amehawo, dukɔwo kple gbegbɔgblɔ ɖe sia ɖe dolawo katã nasubɔe. Eƒe dziɖuɖu anɔ anyi tegbee, enu mayi o, eye eƒe fiaɖuƒe nye fiaɖuƒe si womatsrɔ̃ o.
15 “Ke nye, Daniel, nye gbɔgbɔ tsi dzi le menye, elabena ŋutega siwo mekpɔ la do ŋɔdzi nam. 
16 Mete ɖe ame siwo le tsitre ɖi la dometɔ ɖeka ŋu, ne mabia nu sia ƒe gɔmeɖeɖe ŋutɔŋutɔ tso egbɔ. Eya ta eɖe nu si nu siawo fia la gɔme nam be:
17 “‘Lã gã eneawo nye fia ene siwo le anyigba dzi va ge. 
18 Ke Nuwokatãtaƒola la ƒe ame kɔkɔewo axɔ fiaɖuƒe la, eye fiaɖuƒe la azu wo tɔ yi mavɔ me, ɛ̃, tso mavɔ me yi mavɔ me.’
19 “Azɔ medi be manya nu geɖe tso lã enelia, si to vovo tso bubuawo katã gbɔ la ŋu; eɖi vɔvɔ̃ ale gbegbe, eƒe aɖuwo nye gayibɔ, eƒe fewo nye akɔbli, eɖua nu gbãa nu, eye wòfanyaa susɔea kple afɔ; 
20 eye medi be manya nu tso dzo ewo siwo le eta, kple dzo kemɛ si to, si ŋu ŋkuwo le, si ŋgɔ dzo etɔ̃ tu le, eye nu si gblɔa dadanya le esi, eye wòlolo wu bubuawo la hã ŋu.
21 “Meɖo ŋku anyi, esime dzo ma wɔ aʋa kple ame kɔkɔeawo, eye wòɖu wo dzi, 
22 va se ɖe esime Ame si li tso gbe aɖe gbe ʋĩi ke la va, eye wotso afia na Nuwokatãtaƒola ƒe ame kɔkɔeawo, eye ɣeyiɣi ɖoɖi la de be ame kɔkɔeawo naxɔ fiaɖuƒe la.
23 “Ale wògblɔe nye esi: ‘Lã enelia anye fiaɖuƒe enelia si ava anyigba la dzi. Ato vovo tso fiaɖuƒe bubuawo katã gbɔ; avuvu anyigba blibo la katã, eye wòafanyae ahagbãe gudugudu. 
24 Dzo ewoawo gɔmee nye esi: fia ewo ado tso fiaɖuƒe ma me; eye bubu aɖe hã ado le wo megbe, ke eya ato vovo tso gbãtɔawo gbɔ, eye wòabɔbɔ fia etɔ̃ ɖe anyi. 
25 Agblɔ nya tovowo ɖe Dziƒoʋĩtɔ la ŋu, eye wòanɔ fu ɖem na Nuwokatãtaƒola la ƒe ame kɔkɔeawo. Aɖoe be yeatrɔ ɣeyiɣiwo kple se la, eye woatsɔ wo ade asi nɛ ɣeyiɣi kple ɣeyiɣiwo kpakple ɣeyiɣi afã. 
26 Eye woɖi ʋɔnu, eye woxɔ eƒe dziɖuɖu le esi, ne woatsrɔ̃e gbidii ahaɖee ɖa keŋkeŋ.
27 “‘Wotsɔ fiaɖuƒe la, dziɖuɖu la kple fiaɖuƒe siwo katã le dziƒo bliboa te la ƒe gãnyenye de asi na Nuwokatãtaƒola la ƒe ame kɔkɔewo. Woƒe fiaɖuƒe nye fiaɖuƒe mavɔ, eye dziɖuɖuwo katã asubɔ wo ahaɖo to wo.’
28 “Nya la ƒe nuwuwue nye esi. Ke nye, Daniel, nye susuwo do ŋɔdzi nam ale gbegbe be nye mo fu kpii; ke medzra nya la ɖo ɖe nye dzi me.”

Daniel 8
1 Le Fia Belsazar ƒe fiaɖuɖu ƒe ƒe etɔ̃lia me la, nye Daniel, mekpɔ ŋutega aɖe le esi mekpɔ va yi la megbe. 
2 Mekpɔ ŋutega la, eye esime mele ekpɔm la, mele Susan mɔ́ si le Elam nuto me la me; eye mekpɔ le ŋutega la me be mele Ulai-tɔsisi la to. 
3 Esi mefɔ mo dzi la, kpɔ ɖa, agbo aɖe tɔ ɖe tɔsisi la to, eye wòto dzo eve. Dzo eveawo didi, ke ɖeka didi wu evelia, eye legbeetɔ lae nye mamlɛtɔ si to. 
4 Mekpɔ agbo la wòle eƒe dzowo dam ɖo ta ɣetoɖoƒe kple dziehe kpakple anyiehe gome, eye lã aɖeke mete ŋu nɔ te ɖe enu o, eye ame aɖeke metea ŋu xɔa ame le esi me o. Ewɔa nu si dze eŋu, eye wòdoa eɖokui ɖe dzi.
5 Ke esi mele eŋu bum la, kpɔ ɖa, gbɔ̃tsu aɖe tso ɣetoɖoƒe va anyigba blibo la katã dzi, eye eƒe afɔ mele anyigba kam o. Eye dzo titri aɖe le gbɔ̃tsu la ƒe ŋugbladome. 
6 Eɖo ta agbo dzoevee, si mekpɔ wòle tsitre ɖe tɔsisia to la gbɔ; eye wòlũ ɖe edzi kple ŋusẽ le dziku me.
7 Mekpɔe wònɔ tetem ɖe agbo la ŋu, eye dzi kui ɖe eŋu. Etu dzo agbo la ƒu anyi heŋe eƒe dzo eveawo, eye ŋusẽ aɖeke mele agbo la ŋu be wòanɔ te ɖe enu o. Etutui ƒu anyi hetu afɔ edzi, eye ame aɖeke meli axɔ agbo la le esi me o.
8 Ke gbɔ̃tsu la do eɖokui ɖe dzi ale gbegbe, eye esi ŋusẽ ɖo eŋu la, eƒe dzo gã la ŋe; eye dzo ene to ɖe eteƒe trɔ ɖe dziƒo ƒe ya eneawo dzi.
9 Eye dzo sue bubu aɖe to tso wo dometɔ ɖeka me, eye wòlolo ŋutɔ hetrɔ ɖe anyiehe kple ɣedzeƒe gome kpakple Atsyɔ̃nyigba la gbɔ. 
10 Eto helolo va ɖo keke dziƒoʋakɔ la gbɔ, ale be wòna aʋakɔ la me tɔ aɖewo kple ɣletivi aɖewo ge dze anyigba, eye wòtu afɔ wo dzi. 
11 Edo eɖokui ɖe dzi ɖe aʋakɔwo ƒe Amegã la gɔ̃ hã ŋu, exɔ gbe sia gbe vɔsa la le esi, eye wogbã eƒe kɔkɔeƒe si wòɖo anyi la. 
12 Wotsɔ aʋakɔ aɖe de esi hekpe ɖe gbe sia gbe vɔsa la ŋu le dzidada ta; eléa nyateƒe ƒua anyi, eye wòwɔ nu wòdze edzi nɛ.
13 Eye mese ame kɔkɔe aɖe le nu ƒom, eye ame kɔkɔe bubu gblɔ na ame si le nu ƒom la be: “Ɣekaɣie gbe sia gbe vɔsa kple dzidada si ahe aƒedozuzu avɛ kpakple afɔtutu kɔkɔeƒe la kple aʋakɔ la dzi ŋuti ŋutega la anɔ anyi ase ɖo?” 
14 Eye wòɖo eŋu nam be: “Va se ɖe esime fiẽ kple ŋdi akpe eve alafa etɔ̃ nava yi; eye woagbugbɔ kɔkɔeƒe la aɖo te.”
15 Esi nye Daniel, mele ŋutega la kpɔm, eye medi be mase egɔme la, kasia, ame aɖe si le abe ŋutsu ene la, va tsi tsitre ɖe ŋgɔnye. 
16 Eye mese amegbetɔ ƒe gbe le Ulai-tɔsisi la titina, eye wòdo ɣli gblɔ be: “Gabriel, ɖe nu si ame sia kpɔ la gɔme nɛ.” 
17 Ale wòva afi si mele tsitre ɖo, ke esi wòva la, ŋɔdzi lém ale be metsyɔ mo anyi. Eye wògblɔ nam be: “Amegbetɔvi, se egɔme be, ŋutega la ku ɖe nuwuɣi la ŋu.” 
18 Ke esi wòle nu ƒom kplim la, metsyɔ mo anyi heyi alɔ̃ me ʋĩi. Eye wòka asi ŋunye hena metso ɖe tsitrenu ɖe afi si metɔ ɖo tsã. 
19 Eye wògblɔ be: “Kpɔ ɖa, magblɔ nu si ava dzɔ le fɔbubu ƒe ɣeyiɣi mamlɛa me la na wò, elabena nuwuwu ƒe ɣeyiɣi ɖoɖi la ŋue wòku ɖo.
20 “Agbo dzoevee si nèkpɔ la, le tsitre ɖi na Media kple Persia fiawo. 21 Gbɔ̃tsu si to fu kedzekedze la le tsitre ɖi na Hela-fia; ke dzo gã si le ŋugbladome nɛ la le tsitre ɖi na fia gbãtɔ. 
22 Dzo si ŋe eye ene to ɖe eteƒe la, fia be fiaɖuƒe ene ado tso eƒe dukɔ la me, ke ŋusẽ manɔ wo ŋu ade eya nu o.
23 “Eye le woƒe fiaɖuƒea ƒe nuwuɣi, ne woƒe dzidadawo ɖo eƒe yɔyrɔe nu la, ekema fia ɖivɔvɔ̃, si sea nya dovivitiwo gɔme la, ado. 
24 Akpɔ ŋusẽ gã, ke menye to eya ŋutɔ ƒe ŋusẽ me o. Agblẽ nu eteƒe makɔ o, eye wòakpɔ dzidzedze le eƒe nuwɔwɔwo me. Atsrɔ̃ kalẽtɔwo, eye wòagblẽ ame kɔkɔewo ƒe dukɔ la hã. 
25 Akpɔ dzidzedze le ame geɖewo beble me le eƒe ayedzedze la ta; ado eɖokui ɖe dzi le dzi me; eye wòatsrɔ̃ ame geɖewo esime woɖe dzi ɖi bɔkɔɔ. Atso ɖe amegãwo ƒe Amegã la gɔ̃ hã ŋu, ke woagbãe ame ƒe asi manɔmee.
26 “Nu si wogblɔ le ŋutega me tso fiẽ kple ŋdi ŋuti la, nye nyateƒe, ke wò la, tre ŋutega la nu, elabena ɣeyiɣi si ava va le ŋkeke geɖewo megbe la ŋue wòku ɖo.”
27 Ke nu te nye Daniel ŋu, eye medze dɔ ŋkeke aɖewo. Emegbe mefɔ hewɔ fia ƒe dɔ; ke melulu le nu siwo mekpɔ la ta, eye ame aɖeke mese wo gɔme o.

Daniel 9
1 Le Dario, si nye Ahasweros Mediatɔ la ƒe vi, ame si wotsɔ ɖo fiae ɖe Kaldeatɔwo ƒe fiaɖuƒe la nu ƒe ƒe gbãtɔ me— 
2 le eƒe fiaɖuɖu ƒe ƒe gbãtɔ me la, nye Daniel, melé ŋku ɖe agbalẽawo me hekpɔe dze sii le Afetɔ ƒe gbe si va na nyagblɔɖila Yeremiya nu be, Yerusalem ƒe aƒedozuzu la anɔ anyi ƒe blaadre. 
3 Eya ta metrɔ mo ɖe Mawu vavã Afetɔ ŋu, ne matsɔ gbedodoɖa, kokoƒoƒowo kple nutsitsidɔ adii, eye meta akpanya hebɔbɔ nɔ dzofi me. 
4 Medo gbe ɖa na Afetɔ nye Mawu heʋu eme be:
“Oo Afetɔ, Mawu vavã kple Mawu gã si ŋu ŋɔdzi le, ame si wɔa eƒe nubabla dzi eye wòvea ame siwo lɔ̃nɛ kple ame siwo léa eƒe sededewo me ɖe asi la nu, 
5 míewɔ nu vɔ̃, míeda vo, míewɔ nu tovo, eye míedze aglã; míetra ɖa le wò sededewo kple wò ʋɔnudɔdrɔ̃wo ŋu. 
6 Míegbe toɖoɖo wò subɔla nyagblɔɖilawo, ame siwo ƒo nu kple míaƒe fiawo, míaƒe amegãwo, mía tɔgbuiwo kple dukɔ la me tɔwo katã le wò ŋkɔ me. 
7 Oo Afetɔ, tɔwò dzɔ, ke míawo, Yuda ŋutsuwo kple Yerusalem nɔlawo kpakple ame siwo katã le Israel, ame siwo le kpuiƒe kple didiƒe le anyigba siwo katã dzi nèka wo hlẽ ɖo le woƒe nuteƒemawɔmawɔ na wò ta la, mía tɔe nye ŋukpe, abe ale si wòle egbe sia ene.
8 “Oo Afetɔ, mía kple míaƒe fiawo, míaƒe amegãwo kple mía tɔgbuiwo tɔe nye ŋukpe, elabena míewɔ nu vɔ̃ ɖe ŋuwò. 
9 Ke Afetɔ, mía Mawu, èkpɔa nublanui helɔ̃a tsɔtsɔke, ke míawo míedze aglã ɖe ŋuwò. 
10 Míeɖo to Afetɔ mía Mawu ƒe gbe hezɔ le eƒe se siwo wòde na mí to esubɔla nyagblɔɖilawo dzi la nu o. 
11 Israel blibo la da wò Se la dzi, eye wote ɖe aga hegbe wò gbe sese, ale be nètrɔ fiƒode kple atam siwo woŋlɔ ɖe Mawu vavã ƒe subɔla Mose ƒe Se la me kɔ ɖe mía dzi, elabena míewɔ nu vɔ̃ ɖe Mawu ŋu. 
12 Ewɔ eƒe nya si wògblɔ ɖe mía kple míaƒe dziɖulawo ŋu la dzi, esi wòhe vɔ̃ gã aɖe va mía dzi; womewɔ nu si wowɔ le Yerusalem la tɔgbi le dziƒo bliboa te kpɔ o. 
13 Vɔ̃ siawo katã dzɔ ɖe mía dzi, abe ale si woŋlɔe ɖe Mose ƒe Se la me ene, ke míeɖe kuku na Afetɔ mía Mawu be wòakpɔ nublanui na mí ahaɖe asi le míaƒe vodadawo ŋu o, eye míese wò nyateƒe la gɔme o.
14 “Eya ta Afetɔ ƒe ŋku le te, eye wòhe vɔ̃ va mía dzi, elabena nu siwo katã Afetɔ mía Mawu wɔ la le dzɔdzɔe; ke míawo míeɖo to eƒe gbe o.
15 “Azɔ, Oo Afetɔ mía Mawu, wò, ame si tsɔ alɔ sesẽ kplɔ wò dukɔ tso Egipte-nyigba dzi, eye nèwɔ ŋkɔ na ɖokuiwò abe ale si wòle egbe sia ene, míewɔ nu vɔ̃, míewɔ nu tovo. 
16 Oo Afetɔ, míeɖe kuku, wò dziku kple wò dɔmedzoe nu nefa ɖe wò du, Yerusalem, wò to kɔkɔe la ŋu, le wò nu dzɔdzɔe wɔwɔwo katã ta; elabena Yerusalem kple wò dukɔ la zu vlodonu na ame siwo katã ƒo xlã mí le míaƒe nu vɔ̃wo kple mía tɔgbuiwo ƒe vodadawo ta. 
17 Azɔ, Oo mía Mawu, se wò subɔla ƒe gbedodoɖa kple eƒe kokoƒoƒo, eye na wò mo naklẽ ɖe wò kɔkɔeƒe si zu aƒedo la dzi le wò ŋutɔ ɖokuiwò ta, Oo Afetɔ. 
18 Oo nye Mawu, ƒu to anyi nàsee! Ke ŋku nàkpɔ nɔnɔme sesẽ si me míele, kple ale si du si ŋu woyɔ wò ŋkɔ ɖo la zu aƒedoe la; elabena menye míaƒe nu dzɔdzɔe wɔwɔ tae míele kuku ɖem na wò ɖo o, ke boŋ wò nublanuikpɔkpɔ geɖeawo tae. 
19 Oo Afetɔ, see. Oo Afetɔ, tsɔe ke. Oo Afetɔ, lé to ɖe eŋu, eye nàwɔe! Oo nye Mawu, mègahe ɖe megbe o le wò ŋutɔ ɖokuiwò ta, elabena wò ŋkɔe woyɔ ɖe wò du kple wò dukɔ la ŋu.”
20 Esi megale nuƒoƒo dzi, le gbe dom ɖa hele nye nu vɔ̃ kple nye dukɔ Israel ƒe nu vɔ̃ me ʋum, eye mele Afetɔ nye Mawu ƒe amenuveve biam ɖe nye Mawu ƒe to kɔkɔe la ta, 
21 esi megale gbe dom ɖa hele nu ƒom la, ŋutsu Gabriel, ame si mekpɔ le ŋutega me tsã la, va gbɔnye le fiẽvɔsaɣi esime ɖeɖi te ŋunye belibeli. 
22 Ena mese egɔme eye wògblɔ be:
“Oo Daniel, meva ɖo azɔ be makpe ɖe ŋuwò ne gɔmesese deto nasu asiwò, eye nàse nuwo gɔme. 
23 Esi nèdze kokoƒoƒo gɔme la, mexɔ gbedeasi aɖe, eye meva be magblɔe na wò, elabena ame vevi nènye. Eya ta bu nya la ŋu, eye nàse nu si kpɔm nèle la gɔme.
24 “Kwasiɖa blaadre woɖo ɖe wò dukɔ la kple wò du kɔkɔe la ŋu, ne woatsi dzidada nu, ne woaɖe nu vɔ̃ ɖa, ne woalé avu ɖe vodada ta, ne woahe dzɔdzɔenyenye mavɔ vɛ, ne woatre ŋutega kple nyagblɔɖi nu, eye woasi ami na Kɔkɔeƒewo Ƒe Kɔkɔeƒe la. 
25 Azɔ nyae, eye nàse egɔme be, tso esime wode se be woagbugbɔ Yerusalem aɖo te ahagbugbɔe atso va se ɖe esime Mesia Kplɔla la nava la, le kwasiɖa adre kple kwasiɖa blaade vɔ eve. Woagaɖo dua te, eye woagbugbɔe atso hekpe ɖe eƒe ablɔwo kple tsisitoƒewo ŋu, gake woawɔe le xaxaɣiwo.
26 “Eye le kwasiɖa blaade vɔ eve la megbe la, woaɖe Mesia la ɖa, eye naneke masusɔ nɛ o.
“Eye kplɔla aɖe si gbɔna la ƒe aʋakɔ agbã du la kple kɔkɔeƒe la. Eƒe nuwuwu ava abe tsiɖɔɖɔ ene. Aʋawɔwɔ anɔ anyi va se ɖe nuwuwu la; nu si woɖoe nye aƒedozuzu.
27 “Alé nubabla la ɖe te na ame geɖewo kwasiɖa ɖeka; eye le kwasiɖaa ƒe afã me la, atsi vɔsa kple nunanawo nu.
“Ame si ahe aƒedozuzu vɛ la anɔ ŋunyɔnuwo ƒe aʋala dzi ava; eye nu si woɖo la akɔ ɖe nu si zu aƒedo la hã dzi va se ɖe esime wòtsrɔ̃ keŋkeŋ.”

Daniel 10
1 Le Persia-fia Kores ƒe ƒe etɔ̃lia me la, woɖe nya aɖe fia Daniel, ame si ŋkɔe nye Beltesazar; nya la nye nyateƒe, eye wòku ɖe aʋawɔwɔ gã aɖe ŋu. Ese nya la gɔme, eye wòse nu si wòkpɔ la gɔme.
2 Le ŋkeke mawo me la, nye Daniel mexa nu kwasiɖa etɔ̃ sɔŋ. 
3 Nyemeɖu nu nyui aɖeke o, lã alo wain aɖeke mede nu me nam o, eye nyemesi ami o, va se ɖe esime kwasiɖa etɔ̃ la katã wu enu.
4 Le ɣleti gbãtɔ ƒe ŋkeke blaeve vɔ enelia dzi, esime mele tɔsisi gã, si nye Tigris to la, 
5 mefɔ mo dzi eye mekpɔ ŋutsu aɖe si do aklalawu, eye wòtsɔ Ufaz sika bla ali dzi. 
6 Eŋuti le abe krisolit ene, eye eƒe mo le abe dzikedzo ene, eƒe ŋkuwo le abe akakati bibiwo ene, eƒe abɔwo kple eƒe afɔwo le abe akɔbli si le dzo dam ene, eye eƒe nuƒoƒo le ɖiɖim abe amehawo ƒe hoowɔwɔ ene. 
7 Nye Daniel ɖeɖe koe kpɔ ŋutega la; ame siwo le ŋunye ya mekpɔe o. Ke hã, wodzo nyanyanya ŋutɔ, ale be wosi yi ɖabe.
8 Nye ɖeka koe susɔ eye esi mekpɔ ŋutega wɔnuku sia la, ŋusẽ vɔ le ŋunye, nye dzedzeme trɔ ɖe ƒomevii, eye wɔna vɔ le ŋunye keŋkeŋ. 
9 Eye mese eƒe nuƒoƒo; ke esi mese eƒe nuƒoƒo la, metsyɔ mo anyi heyi alɔ̃ me ʋĩi. 
10 Gake asi aɖe ka ŋunye, eye wòʋuʋum mefɔ ɖe nye klo kple asi dzi. 
11 Eye wògblɔ nam be:
“Daniel, wò, si nye ame vevi, lé to ɖe nya siwo magblɔ na wò la ŋu. Azɔ tsi tsitre ɖe tewòƒe, elabena wodɔm ɖe gbɔwò.”
Esi wògblɔ nya siawo nam la, metsi tsitre hele ƒoƒom kpakpakpa.
12 Eye wògblɔ nam be: “Daniel, mègavɔ̃ o. Tso gbe si gbe nètsɔ wò dzi ɖo gɔmesese ŋu, eye nèbɔbɔ ɖokuiwò le wò Mawu ŋkume la, wose wò nyawo, eye wò nyawo tae meva ɖo. 
13 Ke Persia-fiaɖuƒe la ƒe amegã tsi tre ɖe ŋunye ŋkeke blaeve vɔ ɖekɛ sɔŋ. Ke Mikael, amegãwo ƒe tatɔwo dometɔ ɖeka, va kpe ɖe ŋunye; eye menɔ Persia-fiawo gbɔ le afi ma. 
14 Ke azɔ meva be mana nànya nu si ava dzɔ ɖe wò dukɔ la dzi le ŋkekeawo ƒe nuwuɣi, elabena ŋkeke siwo ava va la ŋue ŋutega la ku ɖo.”
15 Ke esi wòle nya siawo gblɔm nam la, mede mo to, eye gbɔgblɔ bu ɖem. 
16 Eye ame aɖe si ƒe nɔnɔme le abe ŋutsu ene la ka asi nye nuyiwo ŋu, ale meke nu, eye meƒo nu gblɔ na ame si le tsitre ɖe ŋgɔnye la be: “Oo nye aƒetɔ, nu si mekpɔ la na dzidzi ƒom, eye ŋusẽ vɔ le ŋunye. 
17 Ke aleke nye aƒetɔ ƒe dɔla awɔ aƒo nu kple nye aƒetɔ? Elabena ŋusẽ aɖeke megale ŋunye fifia o, eye gbɔgbɔ aɖeke megakpɔtɔ ɖe menye o.”
18 Ame si ƒe nɔnɔme le abe ŋutsu ene la gaka asi ŋunye hedo ŋusẽm. 
19 Eye wògblɔ be: “Oo wò, si nye ame vevi, mègavɔ̃ o. Ŋutifafa na wò. Sẽ ŋu, ɛ̃, sẽ ŋu.” Esi wònɔ nu ƒom kplim la, ŋusẽ ɖo ŋunye, eye megblɔ azɔ be: “Nye aƒetɔ neƒo nu, elabena èdo ŋusẽm.”
20 Eye wògblɔ be: “Ènya nu si koŋ ta meva gbɔwò ɖoa? Azɔ magbugbɔ ayi aɖawɔ aʋa kple Persia-megã la. Ne medzo la, Hela-megã ava. 
21 Ke hã, magblɔ nu siwo woŋlɔ ɖe nyateƒegbalẽa me la na wò. Ame aɖeke medo alɔm le nya siawo me o, negbe miaƒe amegã Mikael ko.

Daniel 11
1 “Ke nye la, metso be mado ŋusẽe atui ɖo, le Mediatɔ Dario ƒe ƒe gbãtɔ me. 
2 Azɔ magblɔ nyateƒe la na wò:
“Kpɔ ɖa! Fia etɔ̃ gale dodo ge le Persia, eye enelia aƒo kesinɔnuwo nu ƒu wu bubuawo katã. Ke ne eƒe kesinɔnuwo na ŋusẽ ɖo eŋu ko la, ade adã tame na amewo katã ɖe Hela-fiaɖuƒe la ŋu.
3 “Eye fia sẽŋu aɖe ado eye eƒe dziɖuƒe akeke ta, eye wòawɔ nu si dze eŋu. 
4 Gake ne enya do ko la, woagbã eƒe fiaɖuƒe la, eye woamae ɖe dziƒo ƒe ya eneawo nu, ke menye na eƒe dzidzimeviwo o, eye menye ɖe ŋusẽ si wòtsɔ ɖu dzii la hã nu o; elabena woaho eƒe fiaɖuƒe la atsɔ ana ame bubuwo, ke menye woawo o.
5 “Ŋusẽ aɖo anyiehefia, si nye eƒe amegãwo dometɔ ɖeka ŋu; gake ame bubu akpɔ ŋusẽ wui, eye wòatsɔ ŋusẽ gã si keke ta wu ame kemɛ ƒe dziɖuŋusẽ la aɖu dzii.
6 “Le ƒe aɖewo megbe la, woawɔ ɖeka kple wo nɔewo, eye anyiehefia vinyɔnu ava dziehefia gbɔ, be woabla nu. Ke nyɔnu la malé alɔ si do ŋusẽe la ɖe te o; fia la mali ke o, eye eƒe alɔ hã mali ke o; woatsɔ nyɔnua ŋutɔ, ame siwo kplɔe vɛ, ame si dzii, kple ame si do ŋusẽe ɣemaɣi la ade asi. 
7 Eye alɔ adze tso nyɔnu la ƒe kè me axɔ ɖe fia la teƒe, eye wòava aʋakɔ la gbɔ aho ɖe dziehefia ƒe mɔ́ sesẽ la ŋu, atso ɖe wo ŋu ahaɖu wo dzi. 
8 Atsɔ woƒe mawuwo, woƒe galegbawo, klosalonu kple sikanu xɔasiwo kpakple aboyomewo ayi Egipte. Anɔ adzɔge na dziehefia, 
9 si ava anyiehefia ƒe fiaɖuƒe la me hena ƒe aɖewo, ke agbugbɔ ayi eya ŋutɔ ƒe anyigba dzi.
10 “Ke viawo adzra ɖo na aʋawɔwɔ, eye woaƒo aʋakɔ gã aɖe nu ƒu. Ava ƒo ɖi bibibi abe tsiɖɔɖɔ ene. Ke agbugbɔ, eye wòaho ayi aɖawɔ aʋa va ɖo keke eƒe mɔ́ sesẽ la gbɔ.
11 “Dzi aku anyiehefia la wòaho aɖawɔ aʋa kple eya, si nye dziehefia la; aƒo ameha gã aɖe nu ƒu, ke woatsɔ ameha la ade asi na fia kemɛa. 
12 Eye woakplɔ ameha la adzoe. Eƒe dzi ado eɖokui ɖe dzi, eye wòana ame akpeakpewo nadze anyi; ke mawɔ eƒe ŋusẽ gã la ŋu dɔ o.
13 “Dziehefia la atrɔ agbɔ ava ƒo ameha gã aɖe nu ƒu wòasɔ gbɔ wu gbãtɔ; eye le ɣeyiɣiawo ƒe nuwuwu, le ƒe aɖewo megbe la, ava kple aʋakɔ gã kple aʋawɔnu geɖewo. 
14 Ame geɖewo atso ɖe anyiehefia la ŋu ɣemaɣi.
“Woakplɔ mia devi sẽŋutawo ayi be woana ŋutega aɖe nava eme; ke womate ŋu anɔ te o.
15 “Dziehefia ava ƒu kpo, eye wòaxɔ du si ŋu gli sesẽwo le. Anyiehe ƒe alɔwo manɔ te o, eye eƒe ame tiatiawo hã manɔ te o; ŋusẽ manɔ wo ŋu woanɔ te o. 
16 Ame si ho ɖe eŋu la awɔ nu si dze eŋu, eye ame aɖeke manɔ te ɖe enu o. Ava tɔ ɖe Atsyɔ̃nyigba la dzi, eye ŋusẽ anɔ esi be wòagblẽ nu. 
17 Aɖoe kplikpaa be yeatsɔ yeƒe fiaɖuƒe la ƒe ŋusẽ katã ahoe, eye wòabla nu kple fia ma; awɔ nu si wòdi la ade goe. Woaɖe mɔ le nyɔnuwo ƒe vinyɔnu la ŋu nɛ be wòatsrɔ̃e. Vinyɔnu la manɔ te o, eye makpɔtɔ anye fia ma tɔ o. 
18 Agatrɔ ɖe ƒutanyigbawo ŋu, eye wòaxɔ geɖewo. Ke aʋafia aɖe atsi eƒe vlodoame la nu, ale be eƒe vlodoame la nu natso. Ana wòatrɔ ava eya ŋutɔ dzi. 
19 Agatrɔ ɖe eya ŋutɔ ƒe anyigba ƒe mɔ́ sesẽwo ŋu, ke akli nu adze anyi, eye womagakpɔe o.
20 “Ame aɖe axɔ ɖe eteƒe, ame si ana adzɔxɔla natsa le fiaɖuƒe dzeani la me, gake le ŋkeke ʋɛ aɖewo megbe la, woatsrɔ̃e, ke menye le dziku alo aʋa me o.
21 “Ame ɖigbɔ aɖe axɔ ɖe eteƒe, eye womade fiaɖuƒe la ƒe bubu eŋu o; ava esime woɖe dzi ɖi bɔkɔɔ, eye wòatsɔ numevivi axɔ fiaɖuƒe la. 
22 Ke woakplɔ aʋakɔ siwo gbagba ɖi la adzoe le eya ta, eye woatsrɔ̃ wo; abe ale si woatsrɔ̃ nubabla ƒe Kplɔla la ene. 
23 Le nu si wobla kplii ta la, anɔ alakpa dam, eye wòaho atsɔ dukɔ sue aɖe akpɔ ŋusẽe. 
24 Age ɖe fiaɖuƒea ƒe nuto siwo me kesinɔnuwo bɔ ɖo la me esime woɖe dzi ɖi bɔkɔɔ, eye wòawɔ nu si fofoawo kple tɔgbuiawo mewɔ o. Ama nuhaha kple aboyonu kpakple kesinɔnuwo ɖe wo dome; eye wòaɖo nugbe ɖe mɔ́ sesẽwo ŋu, gake hena ɣeyiɣi aɖe ko.
25 “Atsɔ aʋakɔ gã aɖe adzi eƒe ŋusẽ ɖe edzi ahado ŋusẽ eƒe dzi ɖe anyiehefia ŋu, eye anyiehefia la hã atsɔ aʋakɔ gã nyadri aɖe ŋutɔ adzra ɖo ɖe aʋa la ŋu. Ke manɔ te o, elabena woaɖo nugbe ɖe eŋu. 
26 Ame siwo ɖua nu kplii lae ana wòadze anyi.
“Ke eƒe aʋakɔ la nu ayi abe tɔsisie kplɔe dzoe ene, eye ame geɖewo atsi aʋa.
27 “Fia eve siawo ƒe dzi atrɔ ɖe nu gbegblẽ wɔwɔ ŋu, eye woanɔ kplɔ̃ ɖeka ŋu anɔ alakpa dam na wo nɔewo. Ke madze edzi o, elabena nuwuwu la ava le ɣeyiɣi ɖoɖi la dzi.
28 “Atsɔ nu geɖewo atrɔ ayi eƒe anyigba dzi, eye eƒe dzi atso ɖe nubabla kɔkɔe la ŋu. Awɔ nu si wòdi la ade goe, eye wòatrɔ ayi eƒe anyigba dzi.
29 “Ne ɣeyiɣi ɖoɖi la de la, agatrɔ ava, eye wòaho ɖe anyiehenyigba ŋu. Ke fifia ya manɔ abe tsã ene o, 
30 elabena Kitim tɔdziʋuwo aho ɖe eŋu, eye woabɔbɔe ɖe anyi.
“Atrɔ adzo ahagblɔ fɔbuamenyawo ɖe nubabla kɔkɔe la ŋu ahawɔ nu si wòdi la ade goe; atrɔ adzo, eye wòatrɔ susu ɖe ame siwo gblẽ nubabla kɔkɔea ɖi la ŋu. 
31 Alɔwo ado tso eme; woagblẽ kɔ ɖo na kɔkɔeƒe la, si nye mɔ́ sesẽ la, eye woatsi gbe sia gbe vɔsa la nu.
“Eye woaɖo ŋunyɔnu si ahe aƒedozuzu vɛ la anyi.
32 “Atsɔ numevivinyawo akplɔ ame siwo wɔa nu vɔ̃ɖitɔe hedaa nubabla la dzi la ade xɔsegbegbe me. Ke dukɔ si nya woƒe Mawu la anɔ te ahawɔ nu ale si dze. 
33 Ke ame siwo si gɔmesese deto le le dukɔ la dome ana gɔmesese nasu ame geɖewo si. Woadze anyi le yi, dzo, aboyo kple nuhaha ta ŋkeke aɖewo. 
34 Ke ne wona wokli nu la, woakpe ɖe wo ŋu vie; eye ame geɖewo atsɔ numevivi ava wɔ ɖeka kpli wo. 
35 Woana ame siwo si gɔmesese deto le la dometɔ aɖewo nakli nu. Esia ayi edzi va se ɖe nuwuɣi la bene woadza wo ŋu, akɔ wo ŋu ahana woafu, elabena ɣeyiɣi ɖoɖi la ŋue wòku ɖo.
36 “Fia la awɔ nu si dze eŋu, eye wòado eɖokui ɖe dzi ahado gã eɖokui ɖe mawu sia mawu ŋu; agblɔ nya wɔmoyawo ɖe mawuwo dzi Mawu la ŋu. Adze edzi nɛ, va se ɖe esime fɔbuame la nawu enu; elabena ele be nu si woɖo la nava eme. 
37 Mabu fofoawo ƒe Mawu ɖe ɖeke me o, eye mabu nyɔnuwo ƒe nu malɔ̃nugbɔa ɖe ɖeke me o. Mabu mawu bubu aɖeke ɖe ɖeke me o, ke boŋ ado gã eɖokui ɖe ame sia ame ŋu. 
38 Atsɔ ŋutikɔkɔe ana mawu si le mɔ́ sesẽwo me boŋ; atsɔ sika, klosalo, kpe xɔasiwo kple nu veviwo ade bubu mawu si fofoawo menya o la ŋu. 
39 Aɖo ŋu ɖe dutamawuwo ŋu ahawɔ nu ale si wòdi ɖe mɔ́ sesẽ siwo li ke wu la ŋu. Ade bubu geɖe ame siwo katã de edzi la ŋu, eye wòana woaɖu fia le ame geɖewo dome; eye wòama anyigba la na wo ɖe ga ta.
40 “Le nuwuɣi la, anyiehefia akpe kplii, eye woanɔ wo nɔewo tutum, eye dziehefia atsɔ tasiaɖamwo, sɔdolawo kple tɔdziʋu geɖewo ava dze edzi; ava ƒo ɖi bibibi ato wo dzi abe tsiɖɔɖɔ ene. 
41 Ava Atsyɔ̃nyigba la hã dzi, eye woana dukɔ geɖewo nadze anyi. Ke ame siawoe ado le esi me: Edom, Moab kple Amon ƒe akpa vevitɔ. 
42 Anɔ eƒe asi dom ɖa ɖe anyigbawo ŋu; eye Egipte-nyigba la mato le eme o. 
43 Akpɔ ŋusẽ ɖe kesinɔnu ɣaɣla siwo nye sika kple klosalo kpakple Egipte ƒe nu veviwo katã dzi. Libiatɔwo kple Etiopiatɔwo adze eƒe afɔɖoƒewo yome.
44 “Ke ase nya tso ɣedzeƒe kple dziehe wòaɖe fu nɛ, eye wòaho kple dziku gã be yeagblẽ ame geɖewo ahatsrɔ̃ wo. 
45 Atu eƒe fiagbadɔwo ɖe ƒu gã la kple Atsyɔ̃to kɔkɔe la dome; ke eƒe nuwuwu ava, eye ame aɖeke maxɔ nɛ o.

Daniel 12
1 “Ɣemaɣi la, Mikael, amegã si le mia deviwo nu la ado. Xaxaɣi si tɔgbi meva kpɔ tso esime dukɔwo li va se ɖe ɣemaɣi o la ava. Woaxɔ na wò dukɔ ɣemaɣi, woaxɔ na ame sia ame si ƒe ŋkɔ woŋlɔ ɖe agbalẽ la me.
2 Ame siwo le alɔ̃ dɔm le anyigba tume la dometɔ geɖewo anyɔ, ɖewo na agbe mavɔ, eye bubuwo na vlododo kple ŋunyɔ mavɔ.
3 “Ame siwo si gɔmesese deto le la aklẽ abe dziŋgɔli ƒe keklẽ ene, eye ame siwo kplɔa ame geɖewo vaa dzɔdzɔenyenyemɔ dzi la aklẽ abe ɣletiviwo ene, ɖaa tegbee.
4 “Ke wò, Daniel, ɣla nya siawo, eye nàtre agbalẽ la nu va se ɖe nuwuɣi la. Ame geɖewo atsa, eye sidzedze vavãtɔ adzi ɖe edzi.”
5 Eye nye, Daniel mekpɔ ame eve bubu le tsitre ɖi, ɖeka le tɔsisi la ƒe go si me, eye evelia le tɔsisi la ƒe go kemɛ. 
6 Eye wo dometɔ ɖeka bia ŋutsu si do aklalawu, si le tɔsisi la tame be: “Ɣeyiɣi didi kae wòaxɔ hafi nu wɔnuku siawo me vava nawu nu?” 
7 Eye mesee ŋutsu si do aklalawu, si le tɔsisi la tame do eƒe ɖusi kple miasi ɖe dziƒo hetà Ame si le agbe tegbee la be: “Anye ɣeyiɣi kple ɣeyiɣiwo kpakple ɣeyiɣi afã. Ne wokaka dukɔ kɔkɔe la ƒe ŋusẽ vɔ ko la, nu siawo katã awu enu.”
8 Mesee, ke nyemese egɔme o; eya ta megblɔ be: “Oo, nye aƒetɔ, alekee nu siawo ava wu enui?”
9 Eye wògblɔ be: “Daniel, heyi, elabena nya siawo anɔ ɣaɣla, eye wotre wo nu va se ɖe nuwuɣi la. 
10 Ame geɖewo akɔ wo ɖokuiwo ŋu, woafu ɣie, eye woadza wo ŋu. Ame vɔ̃ɖiwo awɔ nu vɔ̃ɖi, eye ame vɔ̃ɖi aɖeke mase egɔme o; ke ame siwo si gɔmesese deto le la ase egɔme.
11 “Eye tso esime wotsi gbe sia gbe vɔsa la nu, eye woɖo ŋunyɔnu si ahe aƒedozuzu vɛ anyi la, le ŋkeke akpe ɖeka alafa eve blaasieke.
12 “Dzidzɔtɔe nye ame si lala va se ɖe ŋkeke akpe ɖeka alafa etɔ̃ blaetɔ̃ vɔ atɔ̃ la ƒe nuwuwu!
13 “Ke wò la, heyi va se ɖe nuwuwu. Àgbɔ ɖe eme, ke àfɔ le ŋkekeawo ƒe nuwuwu axɔ wò gome.”

LEAVE A REPLY

Please enter your comment!
Please enter your name here